അഞ്ചല്‍ സെന്‍റ് ജോണ്‍സ് സ്‌കൂള്‍ റൂബി ജൂബിലി സമാപനം ഇന്ന്
1509262
Wednesday, January 29, 2025 6:25 AM IST
അഞ്ചല്‍: സെന്‍റ് ജോണ്‍സ് സ്‌കൂള്‍ സ്ഥാപിതമായതിന്‍റെ നാല്‍പ്പതാം വാര്‍ഷികം (റൂബി ജൂബിലി) ഇന്ന് സമാപിക്കും. ഇന്ന് വൈകുന്നേരം നാലിന് ചേരുന്ന സമ്മേളനത്തിൽ സ്‌കൂള്‍ രക്ഷാധികാരി ആർച്ച് ബിഷപ് കര്‍ദിനാള്‍ മാര്‍ ബസേലിയോസ് ക്ലീമീസ് കാതോലിക്കാ ബാവ അധ്യക്ഷത വഹിക്കും. ആരോഗ്യ മന്ത്രി വീണാ ജോര്‍ജ് ഉദ്ഘാടനം ചെയ്യും. എന്‍.കെ. പ്രേമചന്ദ്രന്‍ എംപി, പി.എസ്. സുപാല്‍ എംഎല്‍എ, ഡോ. കെ.വി. തോമസ്‌കുട്ടി, കെ.എം. മാത്യു, പ്രിന്‍സിപ്പല്‍ മേരി പോത്തന്‍, പ്രഫ. സിമി സാജു, കണ്‍വീനര്‍ എസ്. മായപ്രഭ, അഫ്‌റ അമീന്‍ എന്നിവര്‍ പ്രസംഗിക്കും. തുടര്‍ന്ന് ചലച്ചിത്രതാരം കലാഭവന്‍ പ്രജോദിന്‍റെ നേതൃത്വത്തിലുള്ള സംഘം കലാപരിപാടികള്‍ അവതരിപ്പിക്കും.
10 ദിവസമായി സ്‌കൂളില്‍ വിവിധ പരിപാടികള്‍ സംഘടിപ്പിച്ചിരുന്നു. വിവിധ സെമിനാറുകളില്‍ നാല്‍പ്പതോളം പ്രശസ്ത വ്യക്തികള്‍ കുട്ടികളുമായി ആശയ സംവാദം നടത്തി. ഇന്‍റര്‍ സ്‌കൂള്‍ ചെസ് ടൂര്‍ണമെന്‍റ്, ഡിബേറ്റ് കോംപറ്റീഷന്‍ എന്നിവ സംഘടിപ്പിച്ചിരുന്നു. വിജയികള്‍ക്ക് അഞ്ചല്‍ ഈസ്റ്റ് ഹയര്‍സെക്കൻഡറി സ്‌കൂള്‍ പ്രിന്‍സിപ്പല്‍ അനസ് ബാബു സമ്മാനങ്ങള്‍ വിതരണം ചെയ്തു. രണ്ട് ദിവസം നടന്ന കുട്ടികളുടെ ചലച്ചിത്രമേളയില്‍ അന്താരാഷ്ട്ര നിലവാരമുള്ള എട്ട് ചലച്ചിത്രങ്ങള്‍ പ്രദര്‍ശിപ്പിച്ചു.
രണ്ട് ദിവസം നീണ്ട പുസ്‌കത മേള, ആര്‍ട്ടിഫിഷ്യല്‍ ഇന്‍റലിജന്‍സ് ഹാക്കത്തോണ്‍ എന്നിവ ഇന്നലെ സമാപിച്ചു. ഹാക്കത്തോണില്‍ പ്രോജക്ട് വിഭാഗത്തില്‍ കരിക്കം ഇന്‍റര്‍നാഷണല്‍ സ്‌കൂള്‍, സെന്‍റ് ജോണ്‍സ് സ്‌കൂള്‍, അഞ്ചല്‍ വെസ്റ്റ് ഹയര്‍ സെക്കൻഡറി സ്‌കൂള്‍ എന്നിവ യഥാക്രമം ഒന്നും രണ്ടും മൂന്നും സ്ഥാനങ്ങള്‍ നേടി.
മികച്ച അവതരണത്തിന് മരുതമണ്‍ പള്ളി മാര്‍ ബസേലിയോസ്, അഞ്ചല്‍ സെന്‍റ് ജോണ്‍സ് എന്നിവ സമ്മാനങ്ങള്‍ നേടി. റൂബി ജൂബിലിയോട് അനുബന്ധിച്ചുള്ള സ്ഥാപക ദിനാചരണം ഇന്നലെ നടന്നു. മുന്‍ ഡിജിപി ജേക്കബ് പുന്നൂസ് ആര്‍ച്ച് ബിഷപ് ബനഡിക്ട് മാര്‍ ഗ്രിഗോറിയോസ് അനുസ്മരണ പ്രഭാഷണം നടത്തി.