ADVERTISEMENT

ADVERTISEMENT

ഉന്നതവിജയികൾക്ക് ഉപഹാരം നല്കി

വെള്ളരിക്കുണ്ട്: എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം നേടിയ ഇൻകാസ് ഖത്തർ കാസർഗോഡ് ജില്ല കമ്മിറ്റി അംഗങ്ങളുടെ മക്കൾക്ക് ഉപഹാരം നല്കി.

ഡിസിസി വൈസ് പ്രസിഡന്‍റ് ബി.പി. പ്രദീപ് കുമാർ, ഇൻകാസ് ഖത്തർ കാസർഗോഡ് ജില്ലാ പ്രസിഡന്‍റ് സുനിൽ ജേക്കബ്, വൈസ് പ്രസിഡന്‍റ് ദിലീപ് കാലിക്കടവ്, യൂത്ത് വിംഗ് സെൻട്രൽ കമ്മിറ്റി ജനറൽ സെക്രട്ടറി വികാസ് പി. നമ്പ്യാർ, സെൻട്രൽ കമ്മിറ്റി എക്സിക്യൂട്ടീവ് അംഗം സണ്ണി എബ്രഹാം, ജില്ലാ എക്സിക്യൂട്ടീവ് അംഗങ്ങളായ സുജിത്ത് കുറ്റിക്കോൽ, ജാഫർ ചീമേനി എന്നിവർ ബന്ധപ്പെട്ട വീടുകളിലെത്തിയാണ് ജില്ലാ കമ്മിറ്റിയുടെ ഉപഹാരം കുട്ടികൾക്ക് കൈമാറിയത്.

ADVERTISEMENT

കൊറിയര്‍ സര്‍വീസ് വാഹനത്തില്‍ മദ്യക്കടത്ത്: രണ്ടുപേര്‍ അറസ്റ്റില്‍

കാഞ്ഞങ്ങാട്: കൊറിയര്‍ സര്‍വീസ് വാഹനത്തില്‍ കടത്തിയ 28.25 ലിറ്റര്‍ ഇന്ത്യന്‍ നിര്‍മിത വിദേശമദ്യവുമായി കൊല്ലം സ്വദേശികളായ യുവാക്കള്‍ അറസ്റ്റില്‍. പരവൂര്‍ കുറുമണ്ടലിലെ എല്‍. ലിജിന്‍ (30), നെടുമ്പന കണ്ണനെല്ലൂരിലെ ഡി. അഖില്‍ (28) എന്നിവരെയാണ് ഹൊസ്ദുര്‍ഗ് എക്‌സൈസ് റെയ്ഞ്ച് ഓഫീസ് എക്‌സൈസ് ഇന്‍സ്പെക്ടര്‍ ഇ.വി. ജിഷ്ണുകുമാറും സംഘം ചേര്‍ന്ന് അറസ്റ്റ് ചെയ്തത്. രഹസ്യ വിവരത്തെതുടര്‍ന്ന് തിങ്കളാഴ്ച രാത്രി 8.45നു മവങ്കാലില്‍ നടത്തിയ പരിശോധനയിലാണ് ഭാരത് ബെന്‍സ് ഗുഡ്സ് കാരിയര്‍ വാനില്‍ കേന്ദ്രഭരണപ്രദേശത്ത് മാത്രം വില്‍പനധികാരമുള്ള ഇന്ത്യന്‍ നിര്‍മിത വിദേശമദ്യവുമായി ഇവര്‍ അറസ്റ്റിലായത്. മാഹിയില്‍ നിന്നും മദ്യം കയറ്റി വഴിനീളെയുള്ള ആവശ്യക്കാര്‍ക്ക് എത്തിച്ചു കൊടുക്കുകയാണ് ഇവര്‍ ചെയ്തു വന്നിരുന്നത്. പരിശോധന സംഘത്തില്‍ അസി. എക്‌സൈസ് ഇന്‍സ്പെക്ടര്‍ (ഗ്രേഡ്) ടി. ജയരാജന്‍, പ്രിവന്‍റീവ് ഓഫീസര്‍ (ഗ്രേഡ്) സി. സന്തോഷ് കുമാര്‍, സിവില്‍ എക്‌സൈസ് ഓഫീസര്‍മാരായ കെ.വി.അനീഷ്, മുഹമ്മദ് ജുനൈദ്, വി.എ.അയൂബ് എന്നിവരും ഉണ്ടായിരുന്നു.

രണ്ടുവർഷം കണ്ടതിനെല്ലാം ഒരുമിച്ച് പിഴയിട്ട് കുമ്പളയിലെ എഐ കാമറകൾ

കാസർഗോഡ്: കുമ്പള-ബദിയടുക്ക റോഡിലും ബന്തിയോട്-അടുക്കം റോഡിലും മോട്ടോർവാഹന വകുപ്പിന്‍റെ എഐ കാമറകളുണ്ടെന്ന് നാട്ടുകാർക്കെല്ലാം അറിയാം. പക്ഷേ കൺമുന്നിൽ നിയമലംഘനങ്ങൾ നടന്നാലും ഒന്നും ചെയ്യാത്ത പാവത്താൻമാരാണെന്നായിരുന്നു കഴിഞ്ഞ രണ്ടുവർഷമായി നാട്ടുകാരുടെ അനുഭവം. അതുകൊണ്ട് കാമറയുടെ മുന്നിലൂടെതന്നെ ഹെൽമറ്റ് വയ്ക്കാതെയും സീറ്റ് ബെൽറ്റിടാതെയുമൊക്കെ പലരും യാത്രചെയ്തു. പക്ഷേ കണക്കുകളെല്ലാം കൂട്ടിവച്ച് അവസാനം ഒരുമിച്ച് തീർക്കാൻ വേണ്ടിയാണ് എഐ കാമറകൾ പതുങ്ങിയിരുന്നതെന്ന് ആരും അറിഞ്ഞില്ല. ഇപ്പോൾ കുമ്പള ഭാഗത്തെ വാഹന ഉടമകൾക്കെല്ലാം 2023 മുതൽ ഈ വർഷം വരെ കാമറയിൽ പതിഞ്ഞ നിയമലംഘനങ്ങൾക്കെല്ലാം കൂടി ഒരുമിച്ച് നോട്ടീസ് കിട്ടുകയാണ്. കുമ്പളയിൽ മാത്രം മൂന്നൂറോളം പേർക്കാണ് ഇതുവരെ നോട്ടീസ് ലഭിച്ചത്. 7000 രൂപ മുതൽ ഒരു ലക്ഷം രൂപ വരെയാണ് ഓരോരുത്തർക്കും ലഭിച്ചിരിക്കുന്ന പിഴ. ഹെൽമറ്റ് ധരിക്കാതെയും സീറ്റ് ബെൽറ്റ് ധരിക്കാതെയും യാത്രചെയ്തത് മുതൽ സീബ്രാലൈനിൽ വാഹനം നിർത്തിയതിനു വരെ പിഴയിട്ടിട്ടുണ്ട്. ബംബ്രാണയിലെ ടെമ്പോ ഡ്രൈവർ സന്ദീപിനാണ് രണ്ടു കാമറകളിൽ പലതവണയായി പതിഞ്ഞ നിയമലംഘനങ്ങളുടെ പേരിൽ ഒരു ലക്ഷം രൂപ പിഴയടക്കാൻ നോട്ടീസ് ലഭിച്ചത്. അറിയാതെ വരുത്തിയ പിഴവുകളുടെ പേരിൽ കാൽ ലക്ഷം രൂപയും പതിനയ്യായിരവും പതിനായിരവുമൊക്കെ പിഴ ലഭിച്ച നിരവധി പേരുണ്ട്. ഗതാഗത നിയമലംഘനം കണ്ടെത്തിയാൽ 15 ദിവസത്തിനകം ഇലക്ട്രോണിക് മാധ്യമത്തിലൂടെ ചലാൻ അയക്കണമെന്നാണ് കേന്ദ്ര ഗതാഗതവകുപ്പിന്‍റെ നിർദേശം. ഇങ്ങനെയിരിക്കേ വർഷങ്ങൾ പഴക്കമുള്ള നിയമലംഘനങ്ങളുടെ പേരിൽ ഒരുമിച്ച് നോട്ടീസ് അയച്ചാൽ അത് കോടതിയിൽ ചോദ്യം ചെയ്യാവുന്നതാണെന്ന് നിയമവിദഗ്ധർ പറയുന്നു. എന്തായാലും ആദ്യംതന്നെ കേസിനു പോകാതെ ഗതാഗതമന്ത്രിക്കും ഉദ്യോഗസ്ഥതലത്തിലും പരാതി നല്കാനാണ് നാട്ടുകാരുടെ തീരുമാനം.

അവധിക്കാലത്ത് ഈസ്റ്റ് എളേരിയിലെ കുട്ടികൾ വായിച്ചത് 15000 ലധികം പുസ്തകങ്ങൾ

ചിറ്റാരിക്കാൽ: ഈസ്റ്റ് എളേരി പഞ്ചായത്തും ലൈബ്രറി കൗൺസിൽ പഞ്ചായത്ത് നേതൃസമിതിയും ചേർന്ന് സംഘടിപ്പിച്ച അവധിക്കാല വായനാ ചാലഞ്ചിന്‍റെ രണ്ടാം സീസൺ ഇന്നലെ അവസാനിച്ചപ്പോൾ മത്സരത്തിൽ പങ്കാളികളായ 600 വിദ്യാർഥികൾ വായിച്ചത് 15000 ലധികം പുസ്തകങ്ങൾ. രണ്ടു മാസത്തിനിടെ 75 പുസ്തകങ്ങൾ വായിച്ച് വായനാ കുറിപ്പ് തയ്യാറാക്കിയ 56 കുട്ടികൾ ഡയമണ്ട് വിഭാഗത്തിലും 50 പുസ്തകങ്ങൾ വായിച്ച് കുറിപ്പ് തയ്യാറാക്കിയ 25 പേർ പ്ലാറ്റിനം വിഭാഗത്തിലും 30 പുസ്തകങ്ങൾ വായിച്ച് കുറിപ്പ് തയ്യാറാക്കിയ 105 പേർ ഗോൾഡൻ വിഭാഗത്തിലും വിജയികളായി. വായനാ മത്സരത്തോടൊപ്പം പഞ്ചായത്തിലെ 13 വായനശാലകളിലായി വിവിധ അനുബന്ധ പരിപാടികളും സംഘടിപ്പിച്ചിരുന്നു. പഞ്ചായത്ത് പ്രസിഡന്‍റ് ജോസഫ് മുത്തോലിയും ലൈബ്രറി കൗൺസിൽ പഞ്ചായത്ത് തല കൺവീനർ പി.ഡി. വിനോദുമാണ് പ്രവർത്തനങ്ങൾക്ക് നേതൃത്വം നല്കിയത്. കൂടുതൽ കുട്ടികൾ ചാലഞ്ച് പൂർത്തിയാക്കിയ വിദ്യാലയത്തിനും ലൈബ്രറിക്കും മാത്യു മാഞ്ഞൂർ പുരസ്കാരo നല്കും. മികച്ച രണ്ട് വായനാ ഡയറികൾക്കും മികച്ച സംഘാടനം കാഴ്ചവെച്ച രണ്ട് ലൈബ്രേറിയൻമാർക്കും കാഷ് അവാർഡ് നല്കും. ഡയമണ്ട് ചാലഞ്ച് വിജയികൾക്ക് ഹരിതം ബുക്സിന്‍റെ പുസ്തക സമ്മാനവും മികച്ച വായനാ കുറിപ്പുകൾ പ്രസിദ്ധീകരിക്കാനുള്ള അവസരവും ലഭിക്കും. ചാലഞ്ച് പൂർത്തിയാക്കിയ മറ്റെല്ലാ കുട്ടികൾക്കും സർട്ടിഫിക്കറ്റുകളും വിവിധ സമ്മാനങ്ങളും നല്കും.

വിഷൻ ഗ്രൂപ്പ് അറേബ്യൻ ഒറിക്സ് പുളിങ്ങോം ജേതാക്ക‌ൾ

കടുമേനി: ജയകേരളുടെ ആഭിമുഖ്യത്തിൽ നടത്തിയ ജയകേരള സൂപ്പർ സോക്കറിൽ വിഷൻ ഗ്രൂപ്പ് അറേബ്യൻ ഒറിക്സ് പുളിങ്ങോം ജേതാക്കളായി. എച്ച് എം പെരുമ്പട്ട റണ്ണേഴ്സ് അപ്പയായി. ജേതാക്കൾക്ക് റ്റി.ഒ. ദേവസ്യ തെങ്ങുംപള്ളിൽ മെമ്മോറിയൽ ട്രോഫിയും 18,001 രൂപ കാഷ് അവാർഡും റണേഴ്സ് അപ്പിന് റ്റി.സി. മാണി തുണിയമ്പ്രാക്കുന്നേൽ മെമ്മോറിയൽ ട്രോഫിയും 13,001 രൂപ കാഷ് അവാർഡും നൽകി. ചിറ്റാരിക്കാൽ ഇൻസ്പെകടർ രഞ്ജിത് രവീന്ദ്രൻ മുഖ്യാതിഥിയായിരുന്നു. സമാപനസമ്മേളനത്തിൽ പഞ്ചായത്ത് പ്രഡിഡന്‍റ് ജോസഫ് മുത്തോലി സമ്മാനദാനം നിർവഹിച്ചു. ജയകേരള രക്ഷാധികാരി ഫാ. മാത്യു വളവനാൽ അനുഗ്രഹപ്രഭാഷണം നടത്തി. ക്ലബ് പ്രസിഡന്‍റ് തോമസ് മാത്യു മണ്ണാനിക്കൽ, ജോർജ് കരിമഠം, വർക്കി മണപ്പാട്ട്, സോബി ജോസഫ് എന്നിവർ പ്രസംഗിച്ചു.

വർണപ്പകിട്ടിൽ പ്രവേശനോത്സവം

വെള്ളരിക്കുണ്ട്: സെന്‍റ് ജൂഡ്സ് എച്ച്എസ്എസ് പ്രവേശനോത്സവം സ്കൂൾ മാനേജർ റവ.ഡോ. ജോൺസൺ അന്ത്യാംകുളം ഉദ്ഘാടനം ചെയ്തു. പ്രിൻസിപ്പൽ ഫാ. സന്തോഷ്‌ കെ. പീറ്റർ, സീനിയർ അസിസ്റ്റന്‍റ് സിസ്റ്റർ മിനി ജേക്കബ്, വെള്ളരിക്കുണ്ട് എഎസ്ഐ സി.കെ. സരിത, ഹയർ സെക്കൻഡറി സ്റ്റാഫ്‌ സെക്രട്ടറി റിൻസി ഏബ്രഹാം, ഹൈസ്കൂൾ സ്റ്റാഫ്‌ സെക്രട്ടറി മെർളി ജോസഫ് എന്നിവർ പ്രസംഗിച്ചു. കാസര്‍ഗോഡ്: നഗരസഭാതല സ്‌കൂള്‍ പ്രവേശനോത്സവം മഡോണ എയുപി സ്‌കൂളില്‍ നഗരസഭ ചെയര്‍മാന്‍ അബ്ബാസ് ബീഗം ഉദ്ഘാടനം ചെയ്തു. പിടിഎ പ്രസിഡന്‍റ് അമീന്‍ തെരുവത്ത് അധ്യക്ഷതവഹിച്ചു. സ്ഥിരംസമിതി അധ്യക്ഷരായ കെ. രജനി, സഹീര്‍ ആസിഫ്, വാര്‍ഡ് കൗണ്‍സിലര്‍ ഹസീന നൗഷാദ്, ബിആര്‍സി കോഓര്‍ഡിനേറ്റര്‍ ഹക്കീം, സിസ്റ്റര്‍ മരിയ ലിസി,പിടിഎവൈസ്പ്രസിഡന്‍റ് പി. ഉനൈസ്, മദര്‍ പിടിഎ പ്രസിഡന്‍റ് മഞ്ജുള ചന്ദ്രന്‍ എന്നിവര്‍ സംസാരിച്ചു. മുഖ്യാപിക സിസ്റ്റര്‍ എ.സി.ശോഭിത സ്വാഗതവും സീനിയര്‍ അസിസ്റ്റന്‍റ് ബിജി ജേക്കബ് നന്ദിയും പറഞ്ഞു. രാജപുരം: ചാച്ചാജി ബഡ്സ് എംസിആർസിയിൽ നടന്ന പ്രവേശനോത്സവം പഞ്ചായത്ത് പ്രസിഡന്‍റ് ടി.കെ.നാരായണൻ ഉദ്ഘാടനം ചെയ്തു. വൈസ് പ്രസിഡന്‍റ് പ്രിയ ഷാജി അധ്യക്ഷതവഹിച്ചു. ജില്ലാ ആയുർവേദ ആശുപത്രി മാനസിക വിഭാഗം മെഡിക്കൽ ഓഫീസർ ഡോ. റഹ്മത്തുള്ള, ബ്ലോക്ക് പഞ്ചായത്തംഗം സി. രേഖ, പഞ്ചായത്ത് സ്ഥിരംസമിതി അധ്യക്ഷരായ പി. ഗീത, കെ. ഗോപി, വാർഡ് മെംബർ ബി. അജിത് കുമാർ, പഞ്ചായത്ത് സെക്രട്ടറി പ്രേമ, അസി. സെക്രട്ടറി രവീന്ദ്രൻ, രാജലക്ഷ്മി എന്നിവർ പ്രസംഗിച്ചു. പ്രിൻസിപ്പൽ ഡാലിയ മാത്യു സ്വാഗതവും സിഡിഎസ് ചെയർപേഴ്സൺ കെ.കമലാക്ഷി നന്ദിയും പറഞ്ഞു. ചെര്‍ക്കള: മാര്‍ത്തോമാ ബധിരവിദ്യാലയത്തിലെ പ്രവേശനോത്സവം പഞ്ചായത്ത് പ്രസിഡന്‍റ് ഖാദര്‍ ബദരിയ ഉദ്ഘാടനം ചെയ്തു. വികസനകാര്യ സ്ഥിരംസമിതി അധ്യക്ഷന്‍ ഹസൈനാര്‍ ബദരിയ മുഖ്യാതിഥി ആയിരുന്നു. അഡ്മിനിസ്‌ട്രേറ്റര്‍ ഫാ. മാത്യു ബേബി അധ്യക്ഷതവഹിച്ചു. പിടിഎ പ്രസിഡന്‍റ് ആര്‍. ഭാസ്‌കരന്‍, ഡോ. ജയരാജ്, യമുന ജി. ഉത്തമന്‍, റൂബി ആന്‍റണി, എ.കെ. ബിന്ദു എന്നിവര്‍ സംസാരിച്ചു. സീനിയര്‍ അസിസ്റ്റന്‍റ് ടി. ബെന്‍സി സ്വാഗതവും സ്റ്റാഫ് സെക്രട്ടറി കെ.ടി. ജോഷിമോന്‍ നന്ദിയും പറഞ്ഞു. പടന്ന: തടിയൻ കൊവ്വൽ എഎൽപി സ്കൂളിലെ പ്രവേശനോത്സവം ചലച്ചിത്രതാരവും പഞ്ചായത്ത് അംഗവുമായ പി.പി. കുഞ്ഞികൃഷ്ണൻ ഉദ്ഘാടനം ചെയ്തു. പിടിഎ പ്രസിഡന്‍റ് പി.വി. ശ്രീജിത്ത് അധ്യക്ഷത വഹിച്ചു. മുഖ്യാധ്യാപിക വി. ലളിത, കെ. ലക്ഷ്മണൻ, പി.വി. അനിൽകുമാർ, വി. അരുൺ കുമാർ എന്നിവർ പ്രസംഗിച്ചു. ശശിമോഹനൻ കരിവെള്ളൂർ കുട്ടികളുമായി സംവദിച്ചു. പഠനോപകരണ വിതരണവും നടത്തി.

ഡോക്ടർമാരുടെ സ്ഥലംമാറ്റം താത്കാലികമായി മരവിപ്പിച്ചു

കാസർഗോഡ്: ജില്ലയിലെ സർക്കാർ ഡോക്ടർമാരുടെ ഒഴിവുകളുടെ എണ്ണം നൂറു കടന്നതോടെ അടിയന്തിര രക്ഷാപ്രവർത്തനവുമായി ജില്ലാ ഭരണകൂടം. കഴിഞ്ഞ ദിവസം ജില്ലാ വികസനസമിതി യോഗത്തിലെടുത്ത തീരുമാനത്തിന്‍റെ അടിസ്ഥാനത്തിൽ ജനപ്രതിനിധികളും കളക്ടറും സംസ്ഥാന ആരോഗ്യവകുപ്പ് ഡയരക്ടർക്ക് കത്തു നല്കിയതിനെ തുടർന്ന് 10 ഡോക്ടർമാരുടെ സ്ഥലംമാറ്റം താത്കാലികമായി മരവിപ്പിച്ചു. സ്ഥലംമാറ്റം ലഭിച്ച 12 പേർ ദിവസങ്ങൾക്കകം വിടുതൽ വാങ്ങി പോയിരുന്നു. അവശേഷിച്ച ഡോക്ടർമാരെയാണ് നിലനിർത്താനായത്. കാസർഗോഡ് ജനറൽ ആശുപത്രിയിൽ ഫോറൻസിക് സർജന്‍റെ അധിക ചുമതല വഹിക്കുന്ന അസി.സർജനേയും ബേഡഡുക്ക താലൂക്ക് ആശുപത്രിയിലെയും ഉടുമ്പുന്തല, വോർക്കാടി, ബായാർ കുടുംബാരോഗ്യകേന്ദ്രങ്ങളിലെയും ഡോക്ടർമാരെയുമാണ് തത്കാലം അതതിടങ്ങളിൽ തന്നെ നിലനിർത്തിയത്. പകരം ഡോക്ടർമാരെ നിയമിക്കുന്നതു വരെയാണ് സ്ഥലംമാറ്റം മരവിപ്പിച്ചത്. എന്നാൽ ഇക്കാര്യം നീണ്ടുപോയാൽ സ്ഥലംമാറ്റം ലഭിച്ച ഡോക്ടർമാർ കോടതിയെ സമീപിച്ച് വിടുതൽ വാങ്ങി പോകാനാണ് സാധ്യത. അതിനു മുമ്പ് പി എസ് സി റാങ്ക് പട്ടികയിൽ നിന്ന് ജില്ലയിൽ പുതിയ ഡോക്ടർമാരെ നിയമിക്കുമെന്നാണ് പ്രതീക്ഷ. നിലവിലുണ്ടായിരുന്ന ഡോക്ടർമാർ സ്ഥലംമാറിപ്പോയതോടെ പൂടംകല്ല് താലൂക്ക് ആശുപത്രിക്കു പിന്നാലെ കാഞ്ഞങ്ങാട് ഗവ.സ്ത്രീകളുടെയും കുട്ടികളുടെയും ആശുപത്രിയിലും മംഗൽപാടി താലൂക്ക് ആശുപത്രിയിലും രാത്രികാല പരിശോധന നിർത്തി. മൂന്നിടങ്ങളിലും രാത്രികാലങ്ങളിൽ അത്യാഹിത വിഭാഗത്തിന്‍റെ പ്രവർത്തനവും അവസാനിപ്പിച്ചു.

സുവര്‍ണ ജൂബിലി സ്മാരക ഓഡിറ്റോറിയം ഉദ്ഘാടനം

കരിവേടകം: കരിവേടകം എയുപി സ്‌കൂള്‍ സുവര്‍ണ ജൂബിലി സ്മാരക ഓഡിറ്റോറിയം തലശേരി അതിരൂപത കോര്‍പറേറ്റ് മാനേജര്‍ ഫാ. സോണി വടശേരി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ജോര്‍ജ് വെള്ളരിങ്ങാട്ട് അധ്യക്ഷതവഹിച്ചു. വികാരി ജനറാള്‍ മോണ്‍. സെബാസ്റ്റ്യന്‍ പാലാക്കുഴി അനുഗ്രഹ പ്രഭാഷണം നടത്തി. ഫാ. അനീഷ് ചക്കിട്ടമുറിയില്‍ മുഖ്യാതിഥിയായിരുന്നു. കരിവേടകം ഒഎസ്ബി ആശ്രമം സുപ്പീരിയര്‍ ഫാ. ബിജു കുഴിവേലില്‍, കരിവേടകം ഇല്യാസ് ജുമാ മസ്ജിദ് ഉസ്താദ് അബ്ദുള്‍ ലത്തീഫ്, പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷ ലിസി തോമസ്, പഞ്ചായത്തംഗം ജോസ് പാറത്തട്ടേല്‍, മുഖ്യാധ്യാപകരായ സി.ജെ. എല്‍സമ്മ, ഷേര്‍ളി അഗസ്റ്റിന്‍, ബ്രില്യന്‍റ് തോമസ്, പിടിഎ പ്രസിഡന്‍റ് സണ്ണി തോമസ്, കെ. നാരായണന്‍, സത്യ ബാബു, ഷിബു വര്‍ക്കി, റെനീഷ് തോമസ് എന്നിവര്‍ സംബന്ധിച്ചു.

യൂത്ത് കോണ്‍ഗ്രസ് ധര്‍ണ നടത്തി

രാജപുരം: കോവിഡ് കാലത്ത് ജനം ക്വാറന്‍റൈനില്‍ ആയപ്പോള്‍ ആരോഗ്യമേഖലയില്‍ കൊള്ളനടത്തിയവര്‍ ഇപ്പോള്‍ മഴക്കാലത്ത് രോഗങ്ങളുമായി ആശുപത്രിയില്‍ എത്തുന്ന രോഗികളെ ആട്ടിയോടിക്കുകയാണെന്നും കോവിഡ് കാലത്ത് രോഗികള്‍ അതിര്‍ത്തിയില്‍ പിടഞ്ഞുമരിച്ചത് പോലെ ഇപ്പോള്‍ സര്‍ക്കാര്‍ ആശുപത്രിയിക്ക് മുന്നില്‍ രോഗികള്‍ മരിച്ചു വീഴുകയാണെന്നും ഡിസിസി വൈസ്പ്രസിഡന്‍റ് ബി.പി. പ്രദീപ് കുമാര്‍. പൂടംകല്ല് താലൂക്ക് ആശുപത്രിയില്‍ ആവശ്യത്തിന് ഡോക്ടര്‍മാര്‍ ഇല്ലാത്തതിലും രാത്രികാലങ്ങളില്‍ സേവനം നിര്‍ത്തലാക്കിയതിലും പ്രതിഷേധിച്ചു യൂത്ത് കോണ്‍ഗ്രസ് കാഞ്ഞങ്ങാട് നിയോജകമണ്ഡലം കമ്മിറ്റി നടത്തിയ ധര്‍ണ ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. ഷിബിന്‍ ഉപ്പിലിക്കൈ അധ്യക്ഷതവഹിച്ചു. കെ.ആര്‍. കാര്‍ത്തികേയന്‍, എം.എം. സൈമണ്‍, വിനോദ് കപ്പിത്താന്‍, മാര്‍ട്ടിന്‍ ഏബ്രഹാം, രജിത രാജന്‍, സി. മണികണ്ഠന്‍, എച്ച്.ആര്‍. വിനീത്, രാജേഷ് പണാംകോട്, അജീഷ് പനത്തടി, വി.കെ. ബാലകൃഷ്ണന്‍, സജി മണ്ണൂര്‍, സജി പ്ലാച്ചേരി, റോയി ആശാരിക്കുന്നേല്‍, സി. രേഖ, ബി. അബ്ദുള്ള, കെ. ഗോപി, പി.എല്‍. റോയ്, ഗംഗാധരന്‍ ആടകം, ജയരാജ് ഏബ്രഹാം, ശരത്ചന്ദ്രന്‍, പ്രതീഷ് കല്ലഞ്ചിറ, ജിബിന്‍ ജയിംസ്, രഞ്ജിത് അരിങ്കല്ല് എന്നിവര്‍ സംസാരിച്ചു.

പൂടംകല്ല് താലൂക്ക് ആശുപത്രിയിൽ രാത്രികാല ചികിത്സ നിർത്തി

രാജപുരം: മഴ തുടങ്ങി പനിക്കാലം എത്തിയപ്പോൾ മലയോരത്തിന് ഇരട്ടടിയായി മലയോര ജനതയുടെ ഏക ആശ്രയമായ പൂടംകല്ല് താലൂക്ക് ആശുപത്രിയിൽ രാത്രി കാല ചികിത്സ നിർത്തി. ഡെങ്കിപ്പനിയും കോവിഡും വൈറൽ പനിയും മറ്റു പകർച്ചവ്യാധികളും റിപ്പോർട്ട് ചെയ്യുന്ന സമയത്താണ് ഡോക്ടർ ഇല്ലാത്തതിന്‍റെ പേരിൽ രാത്രികാല ചികിത്സ നിർത്തലാക്കിയത്. 15 പേരുടെ സേവനം ലഭിക്കേണ്ടയിടത്ത് ആകെയുള്ളത് ഏഴു ഡോക്ടർമാർ. അതിലൊരാൾ മെഡിക്കൽ ഓഫീസറുടെ ചുമതലയിലേക്ക് മാറിയതോടെ ഒപി വിഭാഗത്തിൽ ഉള്ളത് ആറു പേർ മാത്രം. അതോടെയാണ് പൂടംകല്ലിലെ വെള്ളരിക്കുണ്ട് താലൂക്ക് ആശുപത്രിയിൽ 24 മണിക്കൂറും ലഭിച്ചിരുന്ന ഡോക്ടർമാരുടെ സേവനം ഞായറാഴ്ച മുതൽ നിലച്ചത്. ദിവസവും രാത്രിയിൽ കുട്ടികളും വയോധികരും അടക്കം മലയോരത്തിന്‍റെ വിവിധ ഭാഗങ്ങളിൽ നിന്നും നിരവധി പേരാണ് ചികിത്സിക്കായി എത്തുന്നത്. പകൽ സമയത്തും ഇതിന്‍റെ നാലരട്ടി ആളുകൾ എത്തുന്നുണ്ട്. ഡോക്ടർമാരുടെ കുറവുമൂലം ഇവിടെയെത്തുന്ന രോഗികൾ വളരെ ബുദ്ധിമുട്ടാണ്. രാത്രി ഡോക്ടറുടെ സേവനം നിലച്ചതോടെ രോഗികൾ ഇനി സ്വകാര്യ ക്ലിനിക്കുകളെയോ 25 കിലോമീറ്റർ അകലെയുള്ള കാഞ്ഞങ്ങാട്ടെ ജില്ലാ ആശുപത്രിയേയോ ആശ്രയിക്കണം. സർജറിയിലും കുട്ടികളുടെ വിഭാഗത്തിലുമായി രണ്ടു വിദഗ്‌ധർ, മൂന്നു സിവിൽ സർജൻ, ആറ് അസി. സർജൻ, നാലു കാഷ്വാലിറ്റി മെഡിക്കൽ ഓഫീസർ എന്നിങ്ങനെ 15 ഡോക്ടർമാരാണ് ആശുപത്രിയിൽ വേണ്ടത്. അതിൽ സർജൻ സ്ഥലംമാറിപ്പോയതോടെ വിദഗ്‌ധ ഡോക്ടറുടെ സേവനം കുട്ടികളുടെ വിഭാഗത്തിൽ മാത്രമായി ചുരുങ്ങി. നാല് അസി.സർജൻമാരിൽ ഒരാൾ മെഡിക്കൽ ലീവെടുക്കുകയും ചെയ്തതോടെ ആ വിഭാഗത്തിലെ ഡോക്ടർമാരുടെ എണ്ണം മൂന്നായി. നിലവിൽ ഒരു സിവിൽ സർജനുണ്ടെങ്കിലും സ്ഥലം മാറ്റപ്പട്ടികയിൽ ഉൾപെട്ടതിനാൽ ഉടൻ ആസ്പത്രി വിടും. മുഴുവൻ സമയവും പ്രവൃത്തിക്കേണ്ട അത്യാഹിത വിഭാഗത്തിലാകട്ടെ നാല് ഡോക്ടർമാർ വേണ്ടിടത്ത് മെഡിക്കൽ ഓഫീസറെ കൂടാതെ ഒരു ഡോക്ടർ മാത്രമാണുള്ളത്. മെഡിക്കൽ ഓഫീസർക്കാകട്ടെ ഓഫീസ് ജോലിയുടെ ഭാരം കഴിഞ്ഞ് രോഗികളെ പരിശോധിക്കാൻ പലപ്പോഴും സമയം തികയാത്ത സ്ഥിതിയുമാണ്. വെള്ളരിക്കുണ്ട് താലൂക്ക് പരിധിയിലെ ഭൂരിഭാഗം കുടുംബാരോഗ്യ കേന്ദ്രങ്ങളിലും ആവശ്യത്തിന് ഡോക്ടർമാർ ഇല്ലാത്തതിനാൽ ഉച്ചകഴിഞ്ഞുള്ള ഒപിയും മുടങ്ങിയിരിക്കുകയാണ്. ജില്ലയിലെ ഡോക്ടർമാരുടെ ഒഴിവുകൾ നികത്താൻ ആരോഗ്യ വകുപ്പ് പിഎസ്‌സി വഴി നിയമനം നടത്തുമ്പോൾ മെഡിക്കൽ പിജി പൂർത്തിയാക്കിയവർക്ക് പ്രാധാന്യം നൽകണം. അല്ലാത്തപക്ഷം ആശുപത്രികളൽ നിയമനം ലഭിക്കുന്നവർ വൈകാതെ തന്നെ അവധിയെടുത്ത് ഉന്നത വിദ്യാഭ്യാസത്തിനായി പോകും. അതുകൂടാതെ നിയമനത്തിനായി ഡോക്ടർമാരുടെ സേവനം തേടുമ്പോൾ കർണാടക അതിർത്തിയോട് ചേർന്നുകിടക്കുന്ന മേഖലയെന്ന പരിഗണന നൽകി അയൽ സംസ്ഥാനത്ത് നിന്നും പഠിച്ചിറങ്ങിയ ഡോക്ടർമാർക്ക് കേരള രജിസ്ട്രേഷൻ വേണമെന്ന നിബന്ധനയിൽ ഇളവു നൽകുകയും കൂടി നൽകിയാലേ ആരോഗ്യ മേഖലയിൽ ആവശ്യത്തിന് ഡോക്ടർമാർ ഇല്ല എന്ന പ്രശ്നത്തിന് ശരിയായ പരിഹാരം ഉണ്ടാകു എന്ന് ആരോഗ്യമേഖലയുമായി പ്രവൃത്തിക്കുന്നവർ പറയുന്നത്. ഡോക്ടർമാരുടെ ഒഴിവ് പരിഹരിച്ച് ജനങ്ങളുടെ ബുദ്ധിമുട്ട് നീക്കിയില്ലെങ്കിൽ ശക്തമായ സമരത്തിലേക്ക് വ്യാപാര സമൂഹം കടക്കുമെന്ന് വ്യാപാര വ്യവസായി ഏകോപന സമിതി രാജപുരം യൂണിറ്റ് പ്രസിഡന്‍റ് എൻ. മധു പറഞ്ഞു.

പൊറോട്ട തൊണ്ടയില്‍ കുടുങ്ങി മരിച്ചു

പെരിയ: പൊറോട്ട തൊണ്ടയില്‍ കുടുങ്ങി യുവാവ് മരിച്ചു. പെരിയോക്കിയിലെ പരേതനായ കുഞ്ഞിരാമന്‍- ഓമന ദന്പതികളുടെ മകന്‍ ഷിനോജ് (41) ആണ് മരിച്ചത്. കണ്ണൂര്‍ എളയാവൂര്‍ വൈദ്യര്‍പീടികയിലെ ഒരു ബാര്‍ ഹോട്ടല്‍ ജീവനക്കാരനാണ്. തിങ്കളാഴ്ച രാവിലെ താമസസ്ഥലത്തെ ശുചിമുറിയില്‍ വീണു കിടക്കുന്ന നിലയിലാണ് ഷിനോജിനെ കണ്ടെത്തിയത്. കൂടെ താമസിക്കുന്നവര്‍ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല. കണ്ണൂര്‍ ജില്ലാ ആശുപത്രിയില്‍ നടന്ന പോസ്റ്റുമോര്‍ട്ടത്തിലാണ് പൊറോട്ട തൊണ്ടയില്‍ കുടുങ്ങിയാണ് മരണം സംഭവിച്ചതെന്നു വ്യക്തമായത്. ഭാര്യ: സുമ (ബംഗളൂരു), മകള്‍: ശ്രീയാനി. സഹോദരങ്ങള്‍: മനോജ്, രേവതി.

പര്‍ദ്ദ ഷോപ്പ് കത്തിനശിച്ചു

കാസര്‍ഗോഡ്: പര്‍ദ്ദ ഷോപ്പ് കത്തിനശിച്ചു. ഇന്നലെ പുലര്‍ച്ചെ 5.25 ഓടുകൂടി പഴയ ബസ് സ്റ്റാന്‍ഡിലെ സ്റ്റേറ്റ് ഹോട്ടല്‍ കോംപ്ലക്‌സ് ബില്‍ഡിംഗിലെ ഇസ്വാ പര്‍ദ്ദാസ് കടക്ക് തീപിടിച്ചത്. നാട്ടുകാരുടെ ശ്രദ്ധയില്‍പ്പെട്ടതിനെ തുടര്‍ന്ന് കാസര്‍ഗോഡ് അഗ്‌നിരക്ഷാസേനയെ വിവരം അറിയിക്കുകയും സ്റ്റേഷന്‍ ഓഫീസര്‍ കെ. ഹര്‍ഷ, സീനിയര്‍ ഫയര്‍ ആന്‍ഡ് ഓഫീസര്‍ വി. സുകു എന്നിവരുടെ നേതൃത്വത്തില്‍ കാസര്‍ഗോഡ്, കാഞ്ഞങ്ങാട്, ഉപ്പള നിലയങ്ങളില്‍ നിന്ന് അഞ്ച് യൂണിറ്റ് വാഹനം ഒന്നരമണിക്കൂര്‍ പ്രവര്‍ത്തനഫലമായാണ് തീപൂര്‍ണമായും അണയ്ക്കാന്‍ കഴിഞ്ഞത്. ചെര്‍ക്കള ബാലടുക്കം സ്വദേശി പി. നിസാറിന്‍റെ കടയായിരുന്നു കത്തിനശിച്ചത്. ബക്രീദ് പ്രമാണിച്ച് വേണ്ടി കൊണ്ടുവന്നിരുന്ന പര്‍ദ്ദകള്‍, നിസ്‌കാര കുപ്പായങ്ങള്‍ ഉടുപ്പുകള്‍, തയ്യല്‍ മെഷീന്‍ എന്നിവ പൂര്‍ണമായും കത്തി നശിച്ചു. കടയുടെ മുകളിലായി പ്രവര്‍ത്തിച്ചിരുന്ന രൂപം ഹോള്‍സെയില്‍ ആന്‍ഡ് റീട്ടെയില്‍ തുണി കടയും തൊട്ടടുത്ത് ലോട്ടറി, പലചരക്ക് കടകള്‍ എന്നിവയും പ്രവര്‍ത്തിച്ചിരുന്നു. ഫയര്‍ഫോഴ്‌സിന്‍റെ ചടുലമായ പ്രവര്‍ത്തനം മൂലം മറ്റു കടകളിലേക്ക് തീപടരാതിരിക്കാന്‍ കഴിഞ്ഞു. 50 ലക്ഷം രൂപയുടെ നഷ്ടം സംഭവിച്ചതായി കടയുടമ പറഞ്ഞു.

സുസ്മിത എം. ചാക്കോയ്ക്ക് ഇന്‍സ്‌പെയറിംഗ് യംഗ് വുമണ്‍ പുരസ്‌കാരം

കാഞ്ഞങ്ങാട്: ഫാ. ചെറിയാന്‍ നേരേവീട്ടിലിന്‍റെ സ്മരണയ്ക്കായി എറണാകുളം മരട് വിശുദ്ധ ജാന്നാ പള്ളി നല്‍കുന്ന അപൂര്‍വ 2025 ഇന്‍സ്‌പെയറിംഗ് യംഗ് വുമണ്‍ പുരസ്‌കാരത്തിന് മലപ്പച്ചേരി ന്യൂ മലബാര്‍ പുനരധിവാസകേന്ദ്രം ചാരിറ്റബിള്‍ ട്രസ്റ്റ് ഭാരവാഹി സുസ്മിത എം. ചാക്കോ അര്‍ഹയായി. 25,000 രൂപയും പ്രശസ്തിപത്രവും അടങ്ങുന്ന പുരസ്‌കാരം മരട് വിശുദ്ധ ജാന്നാ പള്ളിയിൽ നടന്ന ചടങ്ങില്‍ സംഗീത സംവിധായകന്‍ അല്‍ഫോന്‍സ് ജോസഫ് കൈമാറി. ദലീമ ജോജോ എംഎല്‍എ ചടങ്ങ് ഉദ്ഘാടനം ചെയ്തു. അതിരൂപത സമൂഹ്യസേവന ഡയറക്ടര്‍ ഫാ. ജോസ് കൊളുത്തുവെള്ളി അധ്യക്ഷതവഹിച്ചു. നഗരസഭ ചെയര്‍മാന്‍ ആന്‍റണി ആശാംപറമ്പില്‍, ജോസഫ് നേരേവീട്ടില്‍, അനൈഡ സ്റ്റാന്‍ലി, വികാരി ഫാ. സേവി പടിക്കപറമ്പില്‍, കണ്‍വീനര്‍ രൂപ അഭിലാഷ് എന്നിവര്‍ സംബന്ധിച്ചു. പിതാവിന്‍റെ മരണത്തിന് ശേഷം അധ്യാപക ജോലി ഉപേക്ഷിച്ച് 120ഓളം നിരാലംബര്‍ക്ക് ആശ്രയമായി കാസര്‍ഗോഡ് മടിക്കൈ മലപ്പച്ചേരിയില്‍ പ്രവര്‍ത്തിച്ചു വരുന്ന ന്യൂ മലബാര്‍ പുനരധിവാസകേന്ദ്രം ചാരിറ്റബിള്‍ ട്രസ്റ്റിന്‍റെ പ്രവര്‍ത്തനങ്ങള്‍ ഏറ്റെടുത്ത് നടത്തുന്നത് പരിഗണിച്ചാണ് സുസ്മിതയെ അവാര്‍ഡിന് തെരഞ്ഞെടുത്തത്.

കോൺക്രീറ്റ് മിക്സിംഗ് പ്ലാന്‍റിന്‍റെ പ്രവർത്തനം നിർത്തിവയ്ക്കാൻ നോട്ടീസ് നല്കി

അമ്പലത്തറ: മീങ്ങോത്ത് പന്നിക്കുന്നിലെ ദേശീയപാത നിർമാണ കരാറുകാരായ മേഘ കൺസ്ട്രക്ഷൻസിന്‍റെ കോൺക്രീറ്റ് മിക്സിംഗ് പ്ലാന്‍റിന്‍റെ പ്രവർത്തനം നിർത്തിവയ്ക്കാൻ പുല്ലൂർ-പെരിയ പഞ്ചായത്ത് നോട്ടീസ് നല്കി. പ്ലാന്‍റിൽ നിന്ന് രാസമൂലകങ്ങളടങ്ങിയ കോൺക്രീറ്റ് മാലിന്യം സമീപത്തെ കൃഷിയിടങ്ങളിലേക്കും ജലാശയങ്ങളിലേക്കും ഒഴുകിയെത്തുന്നതായി നേരത്തേ കണ്ടെത്തിയിരുന്നു. പ്ലാന്‍റിൽനിന്ന് കവിഞ്ഞൊഴുകുന്ന മലിനജലം സംസ്കരിക്കുന്നതിനും വെള്ളമൊഴുകാൻ കൃത്യമായ വഴിയൊരുക്കുന്നതിനും ഒരാഴ്ചയ്ക്കകം നടപടി സ്വീകരിക്കാമെന്ന് കമ്പനി അധികൃതർ പഞ്ചായത്തിന് ഉറപ്പ് നല്കിയിരുന്നെങ്കിലും അതും നടപ്പായില്ല. ഇതോടെയാണ് പ്ലാന്‍റിന്‍റെ പ്രവർത്തനം നിർത്തിവയ്ക്കാൻ നോട്ടീസ് നല്കിയത്. പൊതുജനാരോഗ്യത്തിന് ഹാനികരമാകുന്ന വിധത്തിൽ മലിനജലം ഒഴുക്കിവിട്ടതിന് കമ്പനിക്ക് കാൽലക്ഷം രൂപ പിഴയും ചുമത്തിയിട്ടുണ്ട്. ഇക്കാര്യങ്ങൾ ജില്ലാ കളക്ടർക്ക് റിപ്പോർട്ട് ചെയ്യാനും പഞ്ചായത്ത് തീരുമാനിച്ചു.

ഭീമനടി വൈഎംസിഎ ഭാരവാഹികള്‍ ചുമതലയേറ്റു

ഭീമനടി: ഭീമനടി വൈഎംസിഎയുടെ പുതിയ ഭാരവാഹികള്‍ ചുമതലയേറ്റു. വൈഎംസിഎ ഹാളില്‍ നടന്ന സ്ഥാനാരോഹണ ചടങ്ങും കുടുംബസംഗമവും വൈഎംസിഎ മുന്‍ സംസ്ഥാന വൈസ് ചെയര്‍മാനും മുതിര്‍ന്ന മാധ്യമപ്രവര്‍ത്തകനുമായ മാനുവല്‍ കുറിച്ചിത്താനം ഉദ്ഘാടനം ചെയ്തു. ഭീമനടി വൈഎംസിഎ പ്രസിഡന്‍റ് ചെറിയാന്‍ ഊത്തപ്പാറയ്ക്കല്‍ അധ്യക്ഷത വഹിച്ചു. ഭാരവാഹികളുടെ സ്ഥാനാരോഹണത്തിന് ജില്ലാ ചെയര്‍മാന്‍ സണ്ണി മാണിശേരി നേതൃത്വം നല്കി. വ്യാപാരി വ്യവസായി ഏകോപന സമിതി ജില്ലാ വൈസ് പ്രസിഡന്‍റ് തോമസ് കാനാട്ട്, വൈഎംസിഎ വനിതാഫോറം ജില്ലാ ചെയര്‍പേഴ്‌സണ്‍ സിസിലി പുത്തന്‍പുര, വിദ്യാര്‍ഥി സംഘടനയായ യൂണി വൈയുടെ സംസ്ഥാന ചെയര്‍മാന്‍ അഖില്‍ ജോണ്‍, ജില്ലാ ജനറല്‍ കണ്‍വീനര്‍ സി.എം. ബൈജു, ഡാജി ഓടക്കല്‍, സക്കറിയാസ് തേക്കുംകാട്ടില്‍ എന്നിവര്‍ പ്രസംഗിച്ചു. ഭാരവാഹികള്‍: ചെറിയാന്‍ ഊത്തപ്പാറയ്ക്കല്‍ - പ്രസിഡന്‍റ്, വര്‍ക്കിച്ചന്‍ കുത്തുകല്ലില്‍ - വൈസ് പ്രസിഡന്‍റ്, സിജി കുന്നശേരില്‍ - ജനറല്‍ സെക്രട്ടറി, സിജു വാരണത്ത് - ജോയിന്‍റ് സെക്രട്ടറി, വിപിന്‍ അമ്പലത്തിങ്കല്‍ - ട്രഷറര്‍.

സുവര്‍ണജൂബിലി ആഘോഷങ്ങള്‍ക്ക് തുടക്കമായി

കരിവേടകം: കരിവേടകം എയുപി സ്‌കൂളിന്‍റെ ഒരുവര്‍ഷം നീണ്ടുനില്‍ക്കുന്ന സുവര്‍ണ ജൂബിലി ആഘോഷങ്ങള്‍ തലശേരി അതിരൂപത വികാരി ജനറല്‍ മോണ്‍. സെബാസ്റ്റ്യന്‍ പാലാക്കുഴി തിരിതെളിച്ച് ഉദ്ഘാടനം ചെയ്തു. 1976ല്‍ ആലുങ്കല്‍ വര്‍ക്കി സ്ഥാപിച്ച സ്‌കൂളിന്‍റെ 50 വര്‍ഷത്തെ വിദ്യാഭ്യാസ പ്രയാണത്തില്‍ ഓര്‍മ പുതുക്കി 50 വ്യത്യസ്ത ഇന പരിപാടിക്ക് തുടക്കം കുറിച്ചു. സെന്‍റ് മേരീസ് മേരിപുരം എഎല്‍പി സ്‌കൂള്‍, കരിവേടകം എയുപി സ്‌കൂളിന്‍റെയും തലശേരി അതിരൂപത കോര്‍പറേറ്റ് തല പ്രവേശനോത്സവവും സ്‌കൂള്‍ തല പ്രവേശനോത്സവും സംയുക്തമായി പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷ ലിസി തോമസ് ഉദ്ഘാടനം നിര്‍വഹിച്ചു. ഫാ. അനീഷ് ചക്കിട്ടമുറിയില്‍, ഫാ. ബിജു കുഴിവേലില്‍, പഞ്ചായത്തഗം ജോസ് പാറത്തട്ടേല്‍, സി.ജെ. എല്‍സമ്മ, ഷേര്‍ളി അഗസ്റ്റില്‍, ബ്രില്യന്‍റ് തോമസ് ആലുങ്കല്‍, അബ്ദുള്‍ ലത്തീഫ് , സണ്ണി തോമസ്, കെ. നാരായണന്‍, സത്യ ബാബു, ഷിബു ആലുങ്കല്‍, റെനീഷ് തോമസ് എന്നിവര്‍ സംസാരിച്ചു.

കാട്ടാനശല്യത്തിന് ശമനമില്ല; ബളാൽ പഞ്ചായത്തിൽ ലക്ഷങ്ങളുടെ കൃഷിനാശം

മാലോം: എടക്കാനത്തും ബന്തമലയിലും വീണ്ടും കാട്ടാനകളിറങ്ങി വ്യാപകമായി കൃഷി നശിപ്പിച്ചു. തിങ്കളാഴ്ച രാത്രി എടക്കാനത്തെ മാർട്ടിന്‍റെ കൃഷിയിടത്തിലെ കായ്ച്ചുതുടങ്ങിയ ഇരുപത്തഞ്ചോളം തെങ്ങുകളും മുപ്പതോളം കമുകുകളുമാണ് നശിപ്പിച്ചത്. വന്യമൃഗങ്ങളെ പ്രതിരോധിക്കുന്നതിനായി തോട്ടത്തിന്‍റെ അതിർത്തിയിൽ മാർട്ടിൻ സ്ഥാപിച്ച സൗരോർജ വേലിയും ആനകൾ നശിപ്പിച്ചു. പുഞ്ചയിലെ കരിമ്പനക്കുഴി സോജിയുടെ 13 തെങ്ങുകളും വരാച്ചേരി ബിനുവിന്‍റെ 60 കമുകുകളും ഓട്ടപ്പുന്ന ബെന്നിയുടെ നൂറോളം വാഴകളും ആനക്കൂട്ടം നശിപ്പിച്ചു. കഴിഞ്ഞ ഒരാഴ്ചയ്ക്കിടെ ബളാൽ പഞ്ചായത്തിൽ മാത്രം ലക്ഷക്കണക്കിന് രൂപയുടെ കൃഷിനാശമാണ് കാട്ടാനക്കൂട്ടം വരുത്തിയത്.നാശനഷ്ടങ്ങളുണ്ടായ പ്രദേശങ്ങൾ പഞ്ചായത്ത് പ്രസിഡന്‍റ് രാജു കട്ടക്കയം, വികസനകാര്യ സ്ഥിരം സമിതി ചെയർമാൻ അലക്സ് നെടിയകാലായിൽ എന്നിവരുടെ നേതൃത്വത്തിൽ ജനപ്രതിനിധികളും വനം വകുപ്പ് ഉദ്യോഗസ്ഥരും സന്ദർശിച്ച് സ്ഥിതിഗതികൾ വിലയിരുത്തി.

വർണപ്പകിട്ടിൽ പ്രവേശനോത്സവം

മടിക്കൈ: പ്രവേശനോത്സവത്തിന്‍റെ ജില്ലാതല ഉദ്ഘാടനം മടിക്കൈ ജിവിഎച്ച്എസ്എസിൽ ‍ രാജ്മോഹന്‍ ഉണ്ണിത്താന്‍ എംപി നിര്‍വഹിച്ചു. പുതുതായി സ്‌കൂളില്‍ ചേര്‍ന്ന കുട്ടികള്‍ക്കുള്ള ബാഗ് വിതരണം മുന്‍ എംപി പി. കരുണാകരന്‍ നിര്‍വഹിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷതവഹിച്ചു. ഇ. ചന്ദ്രശേഖരന്‍ എംഎല്‍എ മുഖ്യാതിഥിയായി. പഞ്ചായത്ത് പ്രസിഡന്‍റ് എസ്. പ്രീത, വൈസ് പ്രസിഡന്‍റ് വി. പ്രകാശന്‍, വിദ്യാഭ്യാസ സ്ഥിരംസമിതി അധ്യക്ഷ രമ പത്മനാഭന്‍, വിഎച്ച്എസ്ഇ പയ്യന്നൂര്‍ മേഖല എഡി ഡി. ഉദയകുമാരി, ഡയറ്റ് കാസര്‍ഗോഡ് പ്രിന്‍സിപ്പല്‍ രഘുറാംഭട്ട്, എസ്എസ്‌കെ ജില്ലാ കോഓര്‍ഡിനേറ്റര്‍ ബിജുരാജ്, കൈറ്റ് ജില്ലാ കോഓര്‍ഡിനേറ്റര്‍ റോജി ജോസഫ്, വിദ്യാകിരണ്‍ കോഓര്‍ഡിനേറ്റര്‍ പ്രകാശന്‍, ഹൊസ്ദുര്‍ഗ് ബിആര്‍സി ബിപിസി ഡോ.കെ.വി. രാജേഷ്, കെ. പ്രഭാകരന്‍, മുഖ്യാധ്യാപിക കെ. ശ്രീകല, പിടിഎ പ്രസിഡന്‍റ് ശശീന്ദ്രന്‍ മടിക്കൈ, എസ്എംസി ചെയര്‍മാന്‍ പി. സുകുമാരന്‍, എംപിടിഎ പ്രസിഡന്‍റ് സ്മിത സുരേശന്‍ എന്നിവര്‍ സംബന്ധിച്ചു. ഡിഡിഇ മധുസൂദനന്‍ സ്വാഗതവും പ്രിന്‍സിപ്പല്‍ പ്രീതി ശ്രീധരന്‍ നന്ദിയും പറഞ്ഞു. വെള്ളരിക്കുണ്ട്: കരുവുള്ളടുക്കം സെന്‍റ് ജോസഫ്സ് യുപി സ്കൂളിലെ പ്രവേശനോത്സവം ബളാൽ പഞ്ചായത്ത് അംഗം കെ.ആർ. വിനു ഉദ്ഘാടനം ചെയ്തു. മാനേജർ റവ.ഡോ. ജോൺസൺ അന്ത്യാംകുളം അധ്യക്ഷത വഹിച്ചു.അസി.മാനേജർ ഫാ. ജെറിൻ സിഎസ്ടി, മുഖ്യാധ്യാപിക സിസ്റ്റർ റെജീന മാത്യു, സ്റ്റാഫ് സെക്രട്ടറി ഷിന്‍റോ തോമസ്, ജിജി എന്നിവർ പ്രസംഗിച്ചു. സെന്‍റ് എലിസബത്ത് കോൺവെന്‍റ് സ്കൂളിലെ പ്രവേശനോത്സവം ഡ്രീംസ് 2025 പ്രിൻസിപ്പൽ സിസ്റ്റർ ഉദയ നിലവിളക്ക് കൊളുത്തി ഉദ്ഘാടനം ചെയ്തു. ഡോ.എ.പി.ജെ.അബ്ദുൽ കലാമിന്‍റെ വിംഗ്സ് ഓഫ് ഫയർ സ്കൂളിന്‍റെ ഔദ്യോഗിക വായനാ പുസ്തകവുമായി പ്രഖ്യാപിച്ചു. പ്രവേശനോത്സവ പരിപാടികൾക്ക് സിസ്റ്റർ ആൻസി, ദീപാ സെബാസ്റ്റ്യൻ, റിനു ജോൺസൺ എന്നിവർ നേതൃത്വം നല്കി. നിർമലഗിരി എൽപി സ്കൂളിലെ പ്രവേശനോത്സവം ബ്ലോക്ക് പഞ്ചായത്ത് അംഗം ഷോബി ജോസഫ് ഉദ്ഘാടനം ചെയ്തു. സ്കൂൾ മാനേജർ റവ.ഡോ. ജോൺസൺ അന്ത്യാംകുളം അധ്യക്ഷത വഹിച്ചു. ലക്കി ഡ്രോയിൽ വിജയിയായ കുട്ടിക്ക് വിദ്യാഭ്യാസ സ്ഥിരം സമിതി ചെയർമാൻ കെ.വി. അബ്ദുൽ ഖാദർ സമ്മാനം നല്കി. വാർഡ് മെംബർ കെ.ആർ. വിനു, മുഖ്യാധ്യാപിക ഷാന്‍റി സിറിയക്, പിടിഎ പ്രസിഡന്‍റ് ബിബിൻ ഡൊമിനിക്, പി.കെ. ബിന്ദു എന്നിവർ പ്രസംഗിച്ചു. ചിറ്റാരിക്കാൽ: തോമാപുരം സെന്‍റ് തോമസ് ഹയർ സെക്കൻഡറി സ്കൂളിലെ പ്രവേശനോത്സവം പഞ്ചായത്ത് വൈസ് പ്രസിഡന്‍റ് ഫിലോമിന ജോണി ആക്കാട്ട് ഉദ്ഘാടനം ചെയ്തു. സ്കൂൾ മാനേജർ റവ.ഡോ. മാണി മേൽവട്ടം അധ്യക്ഷത വഹിച്ചു. പ്രിൻസിപ്പൽ ഇൻ ചാർജ് ബിനു തോമസ്, പിടിഎ പ്രസിഡന്‍റ് ബിജു പുല്ലാട്ട്, അസി. മാനേജർ ഫാ. ജൂബിൻ കണിപറമ്പിൽ, സീനിയർ സിവിൽ പോലീസ് ഓഫീസർ രഞ്ജിത് കുമാർ, ഫാ.പി.ഐ. ജിജോ, ശുഭലക്ഷ്മി, ഷിജി തോമസ് എന്നിവർ പ്രസംഗിച്ചു. തോമാപുരം സെന്‍റ് തോമസ് എൽപി സ്കൂളിലെ പ്രവേശനോത്സവം പഞ്ചായത്ത് വൈസ് പ്രസിഡന്‍റ് ഫിലോമിന ജോണി ഉദ്ഘാടനം ചെയ്തു. പിടിഎ പ്രസിഡന്‍റ് എബ്രഹാം തെന്നിപ്ലാക്കൽ അധ്യക്ഷത വഹിച്ചു. മുഖ്യാധ്യാപകൻ മാർട്ടിൻ ജോസഫ്, അസി.മാനേജർ ഫാ.ജുബിൻ കണിപ്പറമ്പിൽ, സ്റ്റാഫ് സെക്രട്ടറി സിസ്റ്റർ ജിസ്‌വിൽ, ആൻഷിൽ ജിമിജു എന്നിവർ പ്രസംഗിച്ചു. പ്രവേശനോൽസവത്തിന് മുന്നോടിയായി സ്കുൾ മാനേജർ റവ.ഡോ. മാണി മേൽവട്ടം, അസി.മാനേജർ ഫാ. ജുബിൻ കണിപ്പറമ്പിൽ എന്നിവർ സ്കുൾ ആശീർവദിച്ചു. സെന്‍റ് മേരീസ് ഹൈസ്‌കൂളിലെ പ്രവേശനോത്സവം പിടിഎ പ്രസിഡന്‍റ് ഡൊമിനിക് കോയിതുരുത്തേൽ ഉദ്ഘാടനം ചെയ്തു. പ്രിൻസിപ്പൽ സിസ്റ്റർ ജെസി ജോർജ് അധ്യക്ഷത വഹിച്ചു. സിസ്റ്റർ സിനി, ദിവ്യ, കെ.വി.ശോഭ എന്നിവർ പ്രസംഗിച്ചു. രാജപുരം: ഹോളി ഫാമിലി സ്കൂളിലെ പ്രവേശനോത്സവം സ്കൂൾ മാനേജർ ഫാ. ജോസ് അരിച്ചിറ ഉദ്ഘാടനം ചെയ്തു. പിടിഎ പ്രസിഡന്‍റ് കെ.എ. പ്രഭാകരൻ അധ്യക്ഷത വഹിച്ചു. രാജപുരം എഎസ്ഐ രാജേഷ് മുഖ്യപ്രഭാഷണം നടത്തി. വാർഡ് മെംബർ വനജ ഐത്തു, പ്രിൻസിപ്പൽ ടി.ആർ. വിൻസി, ഹൈസ്കൂൾ വിഭാഗം മുഖ്യാധ്യാപകൻ സജി മാത്യു, എൽപി സ്കൂൾ മുഖ്യാധ്യാപകൻ കെ.ഒ.എബ്രഹാം പിടിഎ പ്രസിഡന്‍റ് സി. ചന്ദ്രൻ, നവാഗതരായ കുട്ടികളുടെ പ്രതിനിധി അൽന എന്നിവർ പ്രസംഗിച്ചു. അസി.മാനേജർ ഫാ. ജോൺ മനക്കുന്നേൽ കുട്ടികൾക്ക് പഠന കിറ്റ് നൽകി. പാലാവയൽ: ഈസ്റ്റ് എളേരി പഞ്ചായത്ത് തല സ്കൂൾ പ്രവേശനോത്സവം പാലാവയൽ സെന്‍റ് ജോൺസ് എൽപി സ്കൂളിൽ പഞ്ചായത്ത് പ്രസിഡന്‍റ് ജോസഫ് മുത്തോലി ഉദ്ഘാടനം ചെയ്തു. സ്കൂൾ മാനേജർ ഫാ. ജോസ് മാണിക്കത്താഴെ അധ്യക്ഷത വഹിച്ചു. ആരോഗ്യ വിദ്യാഭ്യാസ സ്ഥിരം സമിതി ചെയര്‍മാന്‍ പ്രശാന്ത് സെബാസ്റ്റ്യന്‍ മുൻവർഷത്തെ എൽഎസ്എസ് വിജയികളെ അനുമോദിച്ചു. അസി. മാനേജർ ഫാ. ചെറിയാൻ ചെമ്പകശേരി അനുഗ്രഹ പ്രഭാഷണം നടത്തി. പഞ്ചായത്ത് അംഗങ്ങളായ വി.ബി. ബാലചന്ദ്രന്‍, തേജസ് ഷിന്‍റോ, മുഖ്യാധ്യാപിക എം.വി. ഗീതമ്മ, പിടിഎ പ്രസിഡന്‍റ് വി.ജെ. റെന്നി, മദർ പിടിഎ പ്രസിഡന്‍റ് ഷീബ ഷാജൻ, ബിആർസി ട്രെയിനർ സി.എ. ഷീലാ മോൾ, ഇടവക ട്രസ്റ്റി ജോസ് കുട്ടി കണ്ടത്തിൽ, പാലാവയൽ സ്പോർട്സ് ക്ലബ് പ്രസിഡന്‍റ് ബിജു മാപ്പിളപ്പറമ്പിൽ, അമൽ ജോർജ് എന്നിവർ പ്രസംഗിച്ചു. കടുമേനി: സെന്‍റ് മേരീസ് ഹൈസ്കൂളിലെ പ്രവേശനോത്സവം സ്കൂൾ മാനേജർ ഫാ. മാത്യു വളവനാൽ ഉദ്ഘാടനം ചെയ്തു. പഞ്ചായത്ത് അംഗം മേഴ്സി മാണി അധ്യക്ഷത വഹിച്ചു. മുഖ്യാധ്യാപകൻ എം.എ. ജിജി, പിടിഎ പ്രസിഡന്‍റ് ദിലിപ് ജോസഫ് തെങ്ങുംപള്ളിൽ, സീനിയർ അസിസ്റ്റന്‍റ് ഡെറ്റ്സി തോമസ്, സിന്ധു അഗസ്റ്റിൻ എന്നിവർ പ്രസംഗിച്ചു. ചെറുപനത്തടി: സെന്‍റ് മേരീസ് ഇംഗ്ലീഷ് മീഡിയം സ്കൂളിലെ പ്രവേശനോത്സവം പനത്തടി ഫൊറോന വികാരി ഫാ. ജോസഫ് പൂവത്തോലിൽ ഉദ്ഘാടനം ചെയ്തു.സെന്‍റ് മേരീസ് കോളജ് ഡയറക്ടർ ഫാ. ജോസ് മാത്യു പാറയിൽ അധ്യക്ഷതവഹിച്ചു. പ്രിൻസിപ്പൽ ഫാ. ജോസ് കളത്തിപ്പറമ്പിൽ, പിടിഎ പ്രസിഡന്‍റ് സുരേഷ് ഫിലിപ്പ്, സ്റ്റാഫ് സെക്രട്ടറി ബിൻസി ചാക്കോ എന്നിവർ പ്രസംഗിച്ചു. മാലക്കല്ല്: സെന്‍റ് മേരീസ് എയുപി സ്കൂളിൽ നവാഗതരായ കുട്ടികളെ കുരുത്തോലയിൽ തീർത്ത പൂച്ചെണ്ടുകൾ നല്കി വരവേറ്റു. പ്രവേശനോത്സവം വാർഡ് മെംബർ മിനി ഫിലിപ്പ് ഉദ്ഘാടനം ചെയ്തു. സ്കൂൾ മാനേജർ ഫാ. ഡിനോ കുമ്മാനിക്കാട്ട് അധ്യക്ഷത വഹിച്ചു. കുട്ടികളുടെ അവധിക്കാല വായനയുമായി ബന്ധപ്പെട്ട 521 വായനാ പതിപ്പുകൾ നാലാം ക്ലാസ് വിദ്യാർഥി ആദിനന്ദ് മുഖ്യാധ്യാപകൻ എം.എ സജിക്ക് നല്കി പ്രകാശനം ചെയ്തു. കോളിച്ചാൽ ലയൺസ് ക്ലബ്, പനത്തടി സർവീസ് സഹകരണ ബാങ്ക്, മാലക്കല്ല് ക്ഷീരസംഘം, കെസിവൈഎൽ മാലക്കല്ല് എന്നിവയുടെ വകയായി പഠനോപകരണ കിറ്റ് വിതരണവും ഒന്നാം ക്ലാസിലെ കുട്ടികൾക്കുള്ള സൗജന്യ ബാഗ് വിതരണവും നടന്നു. വള്ളിക്കടവ്: സെന്‍റ് സാവിയോ ഇംഗ്ലീഷ് മീഡിയം സ്കൂളിലെ പ്രവേശനോത്സവം ബളാൽ പഞ്ചായത്ത് പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. മാലോം സെന്‍റ് ജോർജ് ഫൊറോന വികാരി ഫാ. ജോസ് തൈക്കുന്നംപുറത്ത് അധ്യക്ഷത വഹിച്ചു. പ്രിൻസിപ്പൽ സിസ്റ്റർ ടീന ആലവേലിൽ, മാനേജർ സിസ്റ്റർ സെലിൻ പാമ്പാടിയിൽ, അസി.വികാരി ഫാ. നിതിൻ ചെറുനിലം, പിടിഎ പ്രസിഡന്‍റ് മനോജ് മണ്ണൂർ, വൈസ്പ്രിൻസിപ്പൽ സിസ്റ്റർ അലോൺസ്, സ്റ്റാഫ് സെക്രട്ടറി ജോസ് പ്രകാശ് എന്നിവർ പ്രസംഗിച്ചു. തൃക്കരിപ്പൂർ: പഞ്ചായത്ത് തല പ്രവേശനോത്സവം സെന്‍റ് പോൾസ് എയുപി സ്കൂളിൽ പഞ്ചായത്ത് പ്രസിഡന്‍റ് വി.കെ. ബാവ ഉദ്ഘാടനം ചെയ്തു. സ്ഥിരം സമിതി അധ്യക്ഷൻ ഷംസുദ്ദീൻ ആയിറ്റി അധ്യക്ഷത വഹിച്ചു. പഞ്ചായത്തംഗം ഇ. ശശിധരൻ, സ്കൂൾ മാനേജർ ഫാ. മാത്യു തൈക്കൽ, മുഖ്യാധ്യാപിക സിസ്റ്റർ ഷീന ജോർജ്, പിടിഎ പ്രസിഡന്‍റ് എം.വി. ഫൈസൽ, സിആർസി കോ-ഓർഡിനേറ്റർ സി. സനൂപ്, സ്റ്റാഫ് സെക്രട്ടറി സരിത സന്തോഷ്, മദർ പിടിഎ പ്രസിഡന്‍റ് എൻ. സുൽഫാനത്ത് എന്നിവർ പ്രസംഗിച്ചു.

നിയന്ത്രണം നീങ്ങി; റാണിപുരത്തേക്ക് സഞ്ചാരികളുടെ ഒഴുക്ക്

റാണിപുരം: കാലവര്‍ഷത്തെ തുടര്‍ന്ന് ജില്ലാ കലക്ടര്‍ കഴിഞ്ഞ 24 മുതല്‍ 31 വരെ ഏര്‍പ്പെടുത്തിയ റാണിപുരം ട്രെക്കിംഗ് നിരോധനത്തിന് ശേഷം ഇന്നലെ തുറന്നപ്പോള്‍ 683 പേര്‍ മല കയറി. ഇതില്‍ 371 പേര്‍ സംസ്ഥാനത്തെ വിവിധ ജില്ലകളില്‍ നിന്ന് എത്തിയവരാണ്. തൊട്ടടുത്ത കര്‍ണാടകയിലെ സുള്ള്യ, മടിക്കേരി, പുത്തൂര്‍ മൈസുരു, ബംഗളുരു, മംഗളുരു എന്നിവിടങ്ങളില്‍ നിന്ന് എത്തിയ സഞ്ചാരികള്‍ 312 പേരാണ്. റാണിപുരത്തിന്‍റെ മഴയും കോടമഞ്ഞും മലനിരകളും വശ്യമായ കാനന കാഴ്ചകള്‍ കാണാനുമായി എത്തുന്ന സഞ്ചാരികളുടെയെണ്ണം ദിനംപ്രതി വര്‍ധിച്ചു വരുന്നു. മുന്‍ വര്‍ഷങ്ങളെ അപേക്ഷിച്ച് റാണിപുരം മലകയറാനെത്തുന്ന പ്രദേശവാസികളുടെയെണ്ണവും കൂടുതലാണ്. സഞ്ചാരികളുടെ എണ്ണം കൂടിയതോടെ ഹോം സ്റ്റേ, സര്‍വീസ്ഡ് വില്ലകളിലും തിരക്ക് കൂടിയിട്ടുണ്ട്. വരും ദിവസങ്ങളില്‍ കൂടതല്‍ വിനോദ സഞ്ചാരികള്‍ റാണിപുരത്തിന്‍റെ പ്രകൃതി സൗന്ദര്യം ആസ്വദിക്കാനായി എത്തുമെന്ന് പ്രതീക്ഷിക്കുന്നതായി റാണിപുരം വനസംരക്ഷണസമിതി പ്രസിഡന്‍റ് എസ്. മധുസൂദനന്‍, സെക്രട്ടറി ഡി. വിമല്‍രാജ് എന്നിവര്‍ അറിയിച്ചു.

ജോലിസ്ഥിരത ഉറപ്പുവരുത്തണം: എകെഎസിപിയു

കാഞ്ഞങ്ങാട്: അക്വാകള്‍ച്ചര്‍ പ്രമോട്ടര്‍മാരുടെ ജോലിസ്ഥിരത ഉറപ്പുവരുത്തണമെന്നും മിനിമം വേതനം 25,000 രൂപ ആയി വര്‍ധിപ്പിക്കണമെന്നും ഓള്‍ കേരള അക്വാകള്‍ച്ചര്‍ പ്രമോട്ടേഴ്‌സ് യൂണിയന്‍ ജില്ലാ സമ്മേളനം ആവശ്യപ്പെട്ടു. കുന്നുമ്മല്‍ അഴീക്കോടന്‍ സെന്‍ററില്‍ നടന്ന പരിപാടി സിഐടിയു ജില്ലാ വൈസ്പ്രസിഡന്‍റ് കാറ്റാടി കുമാരന്‍ ഉദ്ഘാടനം ചെയ്തു. വരയില്‍ രാജന്‍ അധ്യക്ഷതവഹിച്ചു. കെ. തമ്പായി, പി.പി. ശോഭ, പി. രതിക, എന്‍.ഒ. വിജയന്‍, അജിത് ബാലകൃഷ്ണന്‍ എന്നിവര്‍ പ്രസംഗിച്ചു. ഭാരവാഹികള്‍: വരയില്‍ രാജന്‍(പ്രസിഡന്‍റ്), എം. പ്രീത(വൈസ്പ്രസിഡന്‍റ്), ടി.വി. സുജിത് (സെക്രട്ടറി), പി. രതിക(ജോയിന്‍റ് സെക്രട്ടറി), അജിത് ബാലകൃഷ്ണന്‍ (ട്രഷറര്‍).

പുകയില വിരുദ്ധ ദിനാചരണം നടത്തി

രാജപുരം: ജില്ലാ ലീഗൽ സർവീസസ് അതോറിറ്റി, ഹൊസ്ദുർഗ് താലൂക്ക് ലീഗൽ സർവീസസ് കമ്മിറ്റി, കള്ളാർ പഞ്ചായത്ത് സംയുക്താഭിമുഖ്യത്തിൽ പുകയിലവിരുദ്ധ ദിനാചരണം നടത്തി. പഞ്ചായത്ത്‌ പ്രസിഡന്‍റ് ടി.കെ. നാരായണൻ ഉദ്ഘാടനം ചെയ്തു. വൈസ് പ്രസിഡന്‍റ് പ്രിയ ഷാജി അധ്യക്ഷതവഹിച്ചു. സ്ഥിരംസമിതി അധ്യക്ഷൻ കെ. ഗോപി പ്രസംഗിച്ചു. അഡ്വ. വിജിത്ത് വിഷയാവതരണം നടത്തി. പഞ്ചായത്ത്‌ സെക്രട്ടറി എ. പ്രേമ സ്വാഗതവും പിഎൽവി ശ്രീലേഖ നന്ദിയും പറഞ്ഞു.

ജില്ലാതല പ്രവേശനോത്സവം മടിക്കൈ സ്‌കൂളില്‍

കാഞ്ഞങ്ങാട്: പുതിയ അധ്യയനവര്‍ഷ ആരംഭത്തോടനുബന്ധിച്ചുള്ള പ്രവേശനോത്സവത്തിന്‍റെ ജില്ലാതല ഉദ്ഘാടനം ഇന്നു രാവിലെ 10നു മടിക്കൈ മേക്കാട്ട് ജിവിഎച്ച്എസ്എസില്‍ രാജ്‌മോഹന്‍ ഉണ്ണിത്താന്‍ എംപി നിര്‍വഹിക്കും. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷതവഹിക്കും. ഇ. ചന്ദ്രശേഖരന്‍ എംഎല്‍എ മുഖ്യാതിഥിയാകും. ഇതിനുപുറമേ ജില്ലയിലെ 592 പൊതുവിദ്യാലയങ്ങളിലും പ്രവേശനോത്സവം നടക്കും. പൂര്‍ണമായും ഗ്രീന്‍ പ്രോട്ടോക്കോള്‍ പാലിച്ചു കൊണ്ടുള്ള പ്രവര്‍ത്തനങ്ങളാണ് പ്രവേശനോത്സവത്തിന്‍റെ ഭാഗമായി സംഘാടകര്‍ ഒരുക്കിയിരിക്കുന്നത്. ഉദ്ഘാടന ദിവസം മുതല്‍ രണ്ടാഴ്ച കാലം ഓരോ അധ്യയന ദിനത്തിലുംവിദ്യാര്‍ഥികള്‍ക്ക് വിവിധ വിഷയങ്ങളിലുള്ള ഒരു മണിക്കൂര്‍ നീളുന്ന ബോധവത്കരണക്ലാസും ഉണ്ടായിരിക്കും.

പാണത്തൂർ കുടുംബാരോഗ്യ കേന്ദ്രത്തിൽ ഡോക്ടർമാരെയും ജീവനക്കാരെയും നിയമിക്കണം: കോൺഗ്രസ്

രാജപുരം: പാണത്തൂർ കുടുംബാരോഗ്യ കേന്ദ്രത്തിൽ ആവശ്യമായ ഡോക്ടർമാരെയും ജീവനക്കാരെയും അടിയന്തിരമായി നിയമിക്കണമെന്ന് ബളാൽ ബ്ലോക്ക് കോൺഗ്രസ് കമ്മിറ്റി യോഗം ആവശ്യപ്പെട്ടു. മഴക്കാല രോഗങ്ങൾ വർദ്ധിച്ചുവരുന്ന സാഹചര്യത്തിൽ ഒപി പ്രവർത്തനസമയം വെട്ടിക്കുറച്ച നടപടി മലയോരമേഖലയിലെ രോഗികളോടുള്ള വെല്ലുവിളിയാണെന്നും യോഗം ചൂണ്ടിക്കാട്ടി. ബ്ലോക്ക് പ്രസിഡന്‍റ് മധുസൂദനൻ ബാലൂർ അധ്യക്ഷത വഹിച്ചു. കെ.ജെ. ജെയിംസ്, സി. കൃഷ്ണൻ നായർ, സജി പ്ലാച്ചേരി, സണ്ണി ജോസഫ്, എസ്. മധുസൂദനൻ, റോയി ആശാരികുന്നേൽ, ടി.പി. പ്രസന്നൻ, എൻ.വിൻസെന്‍റ്, പി. യോഗേഷ് കുമാർ എന്നിവർ പ്രസംഗിച്ചു.

ജില്ലയിൽ സർക്കാർ ആശുപത്രികളുടെ പ്രവർത്തനം താളംതെറ്റുന്നു

കാസർഗോഡ്: ജില്ലയിൽ സർക്കാർ ഡോക്ടർമാരുടെ ഒഴിവുകളുടെ എണ്ണം 100 കടന്നു. 86 ഒഴിവുകളാണ് ഇതുവരെ ഉണ്ടായിരുന്നത്. അടുത്തിടെ ഇറങ്ങിയ സ്ഥലംമാറ്റ പട്ടികയിൽ ജില്ലയിലെ 22 ഡോക്ടർമാർക്ക് മറ്റു ജില്ലകളിലേക്ക് സ്ഥലംമാറ്റം അനുവദിച്ചിട്ടുണ്ട്. അതേസമയം പുതുതായി ആരെയും കാസർഗോഡ് ജില്ലയിൽ നിയമിച്ചിട്ടില്ല. സ്ഥലംമാറ്റം കിട്ടിയവരെല്ലാം പോകുന്നതോടെ ജില്ലയിലെ ഒഴിവുകളുടെ എണ്ണം 108 ആകും. കാഞ്ഞങ്ങാട് നഗരമധ്യത്തിലുള്ള ഗവ. സ്ത്രീകളുടെയും കുട്ടികളുടെയും ആശുപത്രിയിൽ ഡോക്ടർമാരുടെ കുറവ് മൂലം അത്യാഹിതവിഭാഗം തത്കാലം അടച്ചിടാനുള്ള നീക്കം തുടങ്ങിക്കഴിഞ്ഞു. ബേഡഡുക്ക, മംഗൽപാടി താലൂക്ക് ആശുപത്രികളിൽ കിടത്തിച്ചികിത്സ തന്നെ തത്കാലം ഒഴിവാക്കാനാണ് ആലോചന. മിക്കവാറും കുടുംബാരോഗ്യകേന്ദ്രങ്ങളിലെല്ലാം ഉച്ചയ്ക്ക് ശേഷമുള്ള ഒപി സേവനങ്ങളും നിലച്ചുകഴിഞ്ഞു. ജില്ലയിലെ വിവിധ സർക്കാർ ആശുപത്രികളിലായി 298 ഡോക്ടർമാരുടെ തസ്തികയാണ് നിലവിൽ അനുവദിച്ചിട്ടുള്ളത്. ഇതിൽ 198 സ്ഥിരം ഡോക്ടർമാർ മാത്രമാണ് ഇനിയുണ്ടാവുക. എൻഎച്ച്എമ്മിനും തദ്ദേശസ്ഥാപനങ്ങൾക്കും മറ്റും കീഴിൽ താത്കാലിക നിയമനങ്ങൾ നടത്താൻ ശ്രമങ്ങൾ‌ നടക്കുന്നുണ്ടെങ്കിലും അതിനും ഡോക്ടർമാരെ കിട്ടാത്ത അവസ്ഥയാണ്. പലതവണ അഭിമുഖങ്ങൾ നടത്തിയിട്ടും 26 പേരെ മാത്രമാണ് ഇങ്ങനെ നിയമിക്കാൻ കഴിഞ്ഞിട്ടുള്ളത്. സർക്കാർ ഡോക്ടർമാരുടെ നിയമനത്തിനായുള്ള പി എസ് സി റാങ്ക് പട്ടികയിൽനിന്ന് കഴിഞ്ഞ ഒരുവർഷത്തിനിടെ മൂന്ന് ഘട്ടങ്ങളിലായി 227 പേരെ ജില്ലയിൽ നിയമിച്ചിരുന്നു. അതിൽ 10 ശതമാനം പേർ പോലും ഇപ്പോൾ ജില്ലയിൽ ജോലിചെയ്യുന്നില്ല. പകുതിയോളം പേർ ജോലിയിൽ പ്രവേശിച്ചതേയില്ല. പ്രവേശിച്ചവരിൽ ബഹുഭൂരിപക്ഷവും പിജി പഠനത്തിന്‍റെയും മറ്റും പേരിൽ അവധിയെടുത്ത് തിരികെ പോയി. പനിയും മഞ്ഞപ്പിത്തവും പലതരം മഴക്കാല രോഗങ്ങളും പടരുന്നതിനിടെയാണ് ഡോക്ടർമാരുടെ ക്ഷാമം മൂലം സർക്കാർ ആശുപത്രികളുടെ പ്രവർത്തനം കൂടുതൽ താളംതെറ്റുന്നത്. മഴക്കാലം തുടങ്ങുന്നതിനുമുമ്പ് ജില്ലയിലെ ഡോക്ടർമാരുടെ ഒഴിവുകൾ നികത്തണമെന്ന് ജില്ലയിൽ നിന്നുള്ള ജനപ്രതിനിധികളും ഓരോ മാസവും നടക്കുന്ന ജില്ലാ വികസനസമിതി യോഗങ്ങളും ആവർത്തിച്ച് ആവശ്യപ്പെടുന്നതിനിടയിലാണ് നിലവിലുള്ള ഡോക്ടർമാരിൽനിന്ന് 23 പേർക്കു കൂടി സ്ഥലംമാറ്റത്തിന് സംസ്ഥാന ആരോഗ്യവകുപ്പ് അനുമതി നല്കിയിരിക്കുന്നത്. പകരം ഒരാളിനുപോലും ഇവിടേക്ക് നിയമനം നല്കിയതുമില്ല. ആരോഗ്യമന്ത്രി ഇടയ്ക്കിടെജില്ലയിലെത്തുമ്പോൾ നടത്തുന്ന പ്രഖ്യാപനങ്ങളെല്ലാം വീണ്ടും പാഴ് വാക്കായി. ഇവിടുത്ത സേവനകാലാവധി പൂർത്തിയാക്കിയവർക്കാണ് സ്ഥലംമാറ്റം അനുവദിച്ചതെന്നും പകരം ആരും ഇങ്ങോട്ട് വരാൻ അപേക്ഷ നല്കിയിരുന്നില്ലെന്നുമാണ് ആരോഗ്യവകുപ്പിന്‍റെ പതിവു പല്ലവി. അങ്ങനെയാണെങ്കിൽ പുതിയ നിയമനങ്ങളുടെ കാര്യത്തിലെങ്കിലും ജില്ലയ്ക്ക് പ്രത്യേക മുൻഗണന നല്കാൻ പാടില്ലേയെന്നാണ് നാട്ടുകാരുടെ ചോദ്യം. പിജി പഠനമോ മറ്റ് അവധികളോ കഴിഞ്ഞെത്തുന്നവരെ ചുരുങ്ങിയത് രണ്ടുവർഷമെങ്കിലും ജില്ലയിൽ സേവനമനുഷ്ഠിക്കാൻ നിയോഗിച്ച് പ്രത്യേക ഇൻസെന്‍റീവും മറ്റും നല്കിയാൽ കുറച്ചെങ്കിലും ഡോക്ടർമാരുടെ ലഭ്യത ഉറപ്പുവരുത്താൻ കഴിയും. ഉമ്മൻ ചാണ്ടി സർക്കാരിന്‍റെ കാലത്ത് ഇത്തരത്തിൽ കാസർഗോഡ്, വയനാട്, ഇടുക്കി ജില്ലകളിൽ സേവനമനുഷ്ഠിക്കുന്ന ഡോക്ടർമാർക്ക് പ്രത്യേക ഇൻസെന്‍റീവ് നല്കിയിരുന്നതാണ്. കേവലം പ്രഖ്യാപനങ്ങൾക്കു പകരം ഇത്തരത്തിലുള്ള നടപടികളാണ് സർക്കാരിന്‍റെ ഭാഗത്തുനിന്നുണ്ടാകേണ്ടതെന്ന് നാട്ടുകാർ ചൂണ്ടിക്കാട്ടുന്നു.

കാഞ്ഞങ്ങാട് ഇന്നുമുതല്‍ ട്രാഫിക് പരിഷ്‌കരണം

കാഞ്ഞങ്ങാട്: അറ്റകുറ്റപ്പണിക്കായി പഴയ ബസ് സ്റ്റാന്‍ഡ് അടച്ചിടുകയും അധ്യയനവര്‍ഷം ആരംഭിക്കുകയും ചെയ്ത പശ്ചാത്തലത്തില്‍ കാഞ്ഞങ്ങാട് നഗരത്തിലെ ഗതാഗതകുരുക്കിന് പരിഹാരം കാണുന്നതിനായി ഇന്നു മുതല്‍ ട്രാഫിക് നിയന്ത്രണം ഏര്‍പ്പെടുത്താന്‍ നഗരസഭ ട്രാഫിക് റെഗുലേറ്ററി കമ്മിറ്റി തീരുമാനിച്ചു. പ്രധാന നിര്‍ദേശങ്ങള്‍ പാണത്തൂര്‍ ഭാഗത്തേക്കും വടക്കോട്ടും പോകുന്ന ബസുകള്‍ ആലാമി പള്ളി ബസ് സ്റ്റാന്‍ഡില്‍ നിന്നും ആരംഭിക്കണം. കാസര്‍ഗോഡ് ഭാഗത്ത് നിന്നും കാഞ്ഞങ്ങാട് അവസാനിക്കുന്ന ബസുകള്‍ ആലാമിപള്ളി ബസ് സ്റ്റാന്‍ഡില്‍ യാത്ര അവസാനിപ്പിക്കണം. തെക്ക് ഭാഗത്തേക്ക് പോകുന്ന ബസുകള്‍ കോട്ടച്ചേരി ബസ് സ്റ്റാന്‍ഡില്‍ നിന്നും തുടങ്ങി അലാമിപ്പള്ളി ബസ് സ്റ്റാന്‍ഡില്‍ കയറി യാത്ര തുടരേണ്ടതാണ്. അഞ്ചു മിനിറ്റ് സമയം മാത്രമേ ബസുകള്‍ കോട്ടച്ചേരി ബസ് സ്റ്റാന്‍ഡിന് മുമ്പില്‍ നിര്‍ത്തിയിടാന്‍ പാടുള്ളൂ. നഗരത്തിലെ ഓട്ടോ സ്റ്റാന്‍ഡുകള്‍ സന്ദര്‍ശിച്ച് സ്ഥിതിഗതികള്‍ വിലയിരുത്തി പാര്‍ക്ക് ചെയ്യാവുന്ന ഓട്ടോകളുടെ എണ്ണം നിജപ്പെടുത്തി മാര്‍ക്ക് ചെയ്യും. സര്‍വീസ് റോഡ് ഒരു ഭാഗത്തേക്കുള്ള യാത്ര മാത്രമേ അനുവദിക്കുകയുള്ളൂ. നഗരത്തിലെ അനധികൃത പാര്‍ക്കിംഗിനെതിരെ പോലീസും മോട്ടോര്‍ വെഹിക്കിള്‍ ഡിപ്പാര്‍ട്ട്‌മെന്‍റും സംയുക്തമായി സ്‌പെഷ്യല്‍ ഡ്രൈവ് നടത്താന്‍ തീരുമാനിച്ചു. കട ഉടമകളുടെ വാഹനം പാര്‍ക്ക് ചെയ്യുന്നതിന് സ്വന്തം ഉത്തരവാദിത്വത്തില്‍ സ്ഥലം കണ്ടെത്തേണ്ടതാണ്. സര്‍വീസ് റോഡില്‍ ആവശ്യമായ സ്ഥലത്ത് നോ എന്‍ട്രി ബോര്‍ഡുകളും അറിയിപ്പ് ബോര്‍ഡുകളും സ്ഥാപിക്കും ആലാമിപ്പള്ളി ബസ് സ്റ്റാന്‍ഡില്‍ പാര്‍ക്ക് ചെയ്യുന്ന ടൂറിസ്റ്റ് ബസുകള്‍ക്ക് പാര്‍ക്കിംഗ് ഫീസ് ഏര്‍പ്പെടുത്തി ബസ് സ്റ്റാന്‍ഡില്‍ ഒരു ഭാഗത്ത് സ്ഥലം അനുവദിക്കും. കെഎസ്ആര്‍ടിസി ബസുകള്‍ക്കും ഇതു ബാധകമാണ്. അരയിപ്പാലം ,ജില്ലാ ആശുപത്രി, കടപ്പുറം ഭാഗങ്ങളില്‍ നിന്ന് വരുന്ന ബസുകള്‍ അനശ്വര കോംപ്ലക്‌സിന് മുന്നില്‍ പാര്‍ക്ക് ചെയ്യുന്നതാണ്. നഗരസഭ ഹാളില്‍ ചേര്‍ന്ന യോഗത്തില്‍ ചെയര്‍പേഴ്‌സണ്‍ കെ.വി. സുജാത അധ്യക്ഷതവഹിച്ചു. പൊതുമരാമത്ത് സ്ഥിരംസമിതി അധ്യക്ഷന്‍ കെ. അനീശന്‍, കാഞ്ഞങ്ങാട് ഡിവൈഎസ്പി ബാബു പെരിങ്ങേത്ത്, ഹൊസ്ദുര്‍ഗ് ഇന്‍സ്‌പെക്ടര്‍ പി. അജിത്കുമാര്‍, ട്രാഫിക് എസ്‌ഐ മധുസൂദനന്‍, നഗരസഭ സെക്രട്ടറി കെ.വി. ചന്ദ്രന്‍, പിഡബ്ല്യുഡി സെക്രട്ടറി ദേവന്‍, വില്ലേജ് ഓഫീസര്‍ ഹരികൃഷ്ണന്‍ എന്നിവര്‍ പങ്കെടുത്തു.

ദേശീയപാത നിർമാണത്തിലെ അപാകതകളിൽ സമഗ്ര അന്വേഷണം നടത്തണം: ജില്ലാ വികസന സമിതി

കാസർഗോഡ്: ദേശീയപാത നിർമാണത്തിലെ അപാകതകളെക്കുറിച്ച് സമഗ്രമായ അന്വേഷണം നടത്തണമെന്ന് ജില്ലാ വികസന സമിതി യോഗം ആവശ്യപ്പെട്ടു. ഇതുമൂലമുണ്ടായ വെള്ളക്കെട്ടും മണ്ണിടിച്ചിലും കൊണ്ട് നാശനഷ്ടങ്ങൾ അനുഭവിക്കേണ്ടിവന്ന ജനങ്ങൾക്ക് ദേശീയപാത അഥോറിറ്റിയും നിർമാണ കരാർ കമ്പനികളും നഷ്ടപരിഹാരം നൽകണമെന്നും യോഗത്തിൽ പങ്കെടുത്ത ജനപ്രതിനിധികൾ ആവശ്യപ്പെട്ടു. എംഎൽഎമാരായ ഇ.ചന്ദ്രശേഖരൻ, സി.എച്ച്.കുഞ്ഞമ്പു, എൻ.എ.നെല്ലിക്കുന്ന്, എ.കെ.എം.അഷ്റഫ് എന്നിവരാണ് വിഷയം യോഗത്തിൽ ഉന്നയിച്ചത്. ദേശീയപാത നിർമാണത്തിലെ അശാസ്ത്രീയതകളെക്കുറിച്ച് ജനപ്രതിനിധികൾ മുന്നറിയിപ്പ് നൽകിയിരുന്നെങ്കിലും അവയെല്ലാം ദേശീയപാതാ അഥോറിറ്റിയിലെ ഉദ്യോഗസ്ഥർ അവഗണിച്ചതാണ് പ്രശ്നങ്ങൾ രൂക്ഷമാക്കിയതെന്ന് ജനപ്രതിനിധികൾ ചൂണ്ടിക്കാട്ടി. ദേശീയപാത നിർമാണം നടന്ന സ്ഥലങ്ങളിൽ അതിതീവ്ര മഴയിൽ വെള്ളക്കെട്ടും മണ്ണിടിച്ചിലും ഉണ്ടായതിനെ തുടർന്ന് നിരവധി ആളുകൾക്ക് ജീവനോപാധികൾ നഷ്ടപ്പെട്ടിട്ടുണ്ട്. വീടുകളിലും കടകളിലും ചെളിവെള്ളം കയറി. ചെങ്കള മുതൽ നീലേശ്വരം വരെയും നീലേശ്വരം മുതൽ കാലിക്കടവ് വരെയും ദേശീയപാത നിർമാണവുമായി ബന്ധപ്പെട്ട് നിരവധി ഇടങ്ങളിൽ അപകടാവസ്ഥ നിലനിൽക്കുന്നുണ്ടെന്നും നിർമാണത്തിലെ അപാകതകൾ സംബന്ധിച്ച് സമഗ്രമായ അന്വേഷണം ആവശ്യമാണെന്നും എംഎൽഎമാരായ സി.എച്ച്.കുഞ്ഞമ്പു, ഇ.ചന്ദ്രശേഖരൻ എന്നിവർ പറഞ്ഞു. ചെങ്കള മുതൽ തലപ്പാടി വരെയുള്ള ഭാഗങ്ങളിലും ചില പ്രദേശങ്ങളിൽ വെള്ളക്കെട്ട് രൂപപ്പെട്ടിട്ടുണ്ടെന്ന് എംഎൽഎമാർ ചൂണ്ടിക്കാട്ടി. ചട്ടഞ്ചാലിനും ചെർക്കളയ്ക്കുമിടയിൽ സർവീസ് റോഡ് ഇല്ലാതെ ബുദ്ധിമുട്ടുന്ന പ്രദേശവാസികളുടെ ആവശ്യം ഗൗരവമായി പരിഗണിക്കണമെന്ന് സി.എച്ച്.കുഞ്ഞമ്പു എംഎൽഎ ആവശ്യപ്പെട്ടു. ഡോക്ടർമാരുടെ ഒഴിവുകൾ നികത്തണം ജില്ലയിലെ സർക്കാർ ആരോഗ്യകേന്ദ്രങ്ങളിലെ ഡോക്ടർമാരുടെയും ജീവനക്കാരുടെയും ഒഴിവുകൾ അടിയന്തിരമായി നികത്തണമെന്ന് ജില്ലാ വികസന സമിതി യോഗം ആവർത്തിച്ചാവശ്യപ്പെട്ടു. എൻ.എ.നെല്ലിക്കുന്ന് എംഎൽഎയാണ് ഇതു സംബന്ധിച്ച പ്രമേയം അവതരിപ്പിച്ചത്. ഈ വർഷത്തെ പൊതു സ്ഥലംമാറ്റത്തിൽ ജില്ലയിൽ നിന്നും 22 ഡോക്ടർമാരെ കൂടി പകരക്കാരില്ലാതെ മറ്റു ജില്ലകളിലേക്ക് മാറ്റിയിട്ടുണ്ട്. നിലവിലുള്ള ഒഴിവുകളിലേക്ക് അഭിമുഖം നടത്തി 26 ഡോക്ടർമാരെ താത്കാലികമായി നിയമിച്ചിട്ടുണ്ടെന്നു ജില്ലാ മെഡിക്കൽ ഓഫീസർ അറിയിച്ചു. അതിശക്തമായ മഴ തുടരുന്നതിനാൽ ജില്ലയിൽ പകർച്ചവ്യാധി നിയന്ത്രണം ഉൾപ്പെടെയുള്ള ദുരന്തനിവാരണ പ്രവർത്തനങ്ങൾക്ക് ആരോഗ്യപ്രവർത്തകർ അനിവാര്യമാണെന്നും അതുകൊണ്ട് ഡോക്ടർമാരുടെ സ്ഥലംമാറ്റം ജൂൺ 15 വരെ താത്കാലികമായി നിർത്തിവയ്ക്കണമെന്നും യോഗത്തിൽ അധ്യക്ഷത വഹിച്ച കളക്ടർ കെ.ഇമ്പശേഖർ നിർദേശിച്ചു. ജില്ലയിൽ നിന്ന് പിജി പഠനത്തിനായി അവധിയെടുത്ത് പോകുന്ന ഡോക്ടർമാർ പഠനം പൂർത്തിയാക്കി ഇവിടേക്കു തന്നെ തിരിച്ചെത്താൻ നിർദേശം നല്കണമെന്നും കളക്ടർ പറഞ്ഞു. മുഖ്യമന്ത്രിയുടെ ദുരിതാശ്വാസ നിധിയുമായി ബന്ധപ്പെട്ട അപേക്ഷകളിൽ മംഗളൂരുവിലെ ആശുപത്രികളിൽ നിന്നുള്ള ചികിത്സാ രേഖകൾ ചേർക്കുന്നതിനുള്ള ബുദ്ധിമുട്ടുകൾ പരിഹരിക്കാൻ ആശുപത്രി പിആർഒമാരുടെ യോഗം വിളിച്ചുചേർക്കാൻ തീരുമാനിച്ചു. സഹായം ലഭ്യമാക്കണം ജില്ലയിലുണ്ടായ അതിതീവ്ര മഴയിൽ വ്യാപകമായ നാശനഷ്ടങ്ങൾ നേരിട്ടവർക്ക് മുഖ്യമന്ത്രിയുടെ ദുരിതാശ്വാസനിധിയിൽനിന്ന് അടിയന്തിരമായി ധനസഹായം ലഭ്യമാക്കണമെന്ന് ജില്ലാ വികസനസമിതി യോഗം ആവശ്യപ്പെട്ടു. എ.കെ.എം.അഷ്റഫ് എംഎൽഎയാണ് ഇതു സംബന്ധിച്ച പ്രമേയം അവതരിപ്പിച്ചത്. നീലേശ്വരത്ത് പാലം നിർമിക്കുന്നതിനായി പുഴയിൽ ബണ്ട് കെട്ടിയതിന്‍റെ ഫലമായി വെള്ളം കയറി കൃഷിനാശം സംഭവിച്ച കർഷകർക്ക് ദേശീയപത നിർമാണ കരാർ കമ്പനിയിൽ നിന്ന് നഷ്ടപരിഹാരം അനുവദിക്കുന്നതിനുള്ള നടപടി സ്വീകരിക്കണമെന്ന് ഇ.ചന്ദ്രശേഖരൻ എംഎൽഎ ആവശ്യപ്പെട്ടു. കനത്ത മഴയിൽ കൃഷിനാശം നേരിട്ട മടിക്കൈയിലെ നേന്ത്രവാഴ കർഷകർക്ക് അടിയന്തരമായി ധനസഹായം ലഭ്യമാക്കണമെന്നും എംഎൽഎ പറഞ്ഞു. അടിയന്തര റീ ടാറിംഗ് പടന്നക്കാട് റെയിൽവേ മേൽപ്പാലത്തിലെ കുഴികൾ അടയ്ക്കുന്നതിനുവേണ്ടി സ്വീകരിച്ച നടപടികൾ അശാസ്ത്രീയമാണെന്ന് ഇ.ചന്ദ്രശേഖരൻ എംഎൽഎ ചൂണ്ടിക്കാട്ടി. പാലത്തിനു മുകളിൽ പൂർണമായും റീടാറിംഗ് നടത്തുന്നതിന് അടിയന്തര നടപടി സ്വീകരിക്കണമെന്ന് എംഎൽഎ ആവശ്യപ്പെട്ടു. അധ്യാപക ഒഴിവുകളിൽ 52 പേർക്ക് നിയമനം അധ്യയനവർഷം തുടങ്ങുന്നതിന് മുന്നോടിയായി ജില്ലയിലെ വിവിധ സ്കൂളുകളിലെ അധ്യാപക ഒഴിവുകളിലേക്ക് 52 പേർക്ക് നിയമന ശുപാർശ നല്കിയതായി വിദ്യാഭ്യാസ ഉപ ഡയറക്ടർ അറിയിച്ചു. എൽപി, യുപി, ഹൈസ്കൂ വിഭാഗങ്ങളിലായാണ് ഇത്രയും പേരെ നിയമിക്കുന്നത്. ഇവരെല്ലാം ജൂൺ ആദ്യവാരത്തിൽ തന്നെ ജോലിയിൽ പ്രവേശിക്കും. വിവിധ വിഭാഗങ്ങളിലായി 121 ഒഴിവുകൾ പിഎസ്‌സി ക്ക് റിപ്പോർട്ട് ചെയ്തിട്ടുണ്ടെന്നും ഡിഡിഇ അറിയിച്ചു. ജില്ലയിൽ കായികാധ്യാപകരുടെ പിഎസ്‌സി റാങ്ക് പട്ടിക നിലവിലില്ലാത്തതിനാൽ 12 സ്കൂളുകളിൽ എംപ്ലോയ്മെന്‍റ് എക്സ്ചേഞ്ച് വഴി നിയമനം നടത്തുന്നതിനുള്ള നടപടി സ്വീകരിക്കുമെന്നും ഡിഡിഇ അറിയിച്ചു. സർവീസിൽ നിന്ന് വിരമിക്കുന്ന കാസർഗോഡ് ആർഡിഒ പി.ബിനുമോൻ കെആർഎഫ്ബി എക്സിക്യൂട്ടീവ് എൻജിനീയർ വിനോദ് കുമാർ, സഹകരണ വകുപ്പ് ജോയിൻറ് രജിസ്ട്രാർ കെ.ലസിത, ജില്ലാ മൃഗസംരക്ഷണ ഡെപ്യൂട്ടി ഡയറക്ടർ ഡോ.പ്രശാന്ത് എന്നിവർക്ക് ജില്ലാ വികസനസമിതി യോഗം യാത്രയയപ്പ് നല്കി.

ലഹരിക്കെതിരെ സൈക്കിൾ റൈഡ് നടത്തി

തൃക്കരിപ്പൂർ: രാസലഹരികളുടെയും പുകയില ഉത്പന്നങ്ങളുടെയും നിർമാണം തന്നെ തടയണമെന്നാവശ്യപ്പെട്ടും ഇവയ്ക്കെതിരായി സാമൂഹ്യ അവബോധം ലക്ഷ്യമിട്ടും ഇന്ത്യൻ ഡെന്‍റൽ അസോസിയേഷൻ കോസ്റ്റൽ മലബാർ ബ്രാഞ്ചിന്‍റെ നേതൃത്വത്തിൽ തൃക്കരിപ്പൂർ സൈക്ലിംഗ് ക്ലബിന്‍റെ സഹകരണത്തോടെ സൈക്കിൾ റൈഡ് നടത്തി. തൃക്കരിപ്പൂരിൽ നിന്നും പയ്യന്നൂരിലേക്ക് നടത്തിയ റൈഡ് പയ്യന്നൂർ ഗവ. താലൂക്ക് ആശുപത്രിയിലെ കൺസൾട്ടന്‍റ് സർജൻ ഡോ.പി. അബ്ദുൾ ജലീൽ ഉദ്ഘാടനം ചെയ്തു. ഐഡിഎ കോസ്റ്റൽ മലബാർ ബ്രാഞ്ച് പ്രസിഡന്‍റ് ഡോ. രശ്മി ഹരിദാസ് അധ്യക്ഷത വഹിച്ചു. തൃക്കരിപ്പൂർ സൈക്ലിംഗ് ക്ലബ് പ്രസിഡന്‍റ് ടി.എം.സി. ഇബ്രാഹിം, ഡോ.സി. ശ്രീകുമാർ, അനൂപ് കല്ലത്ത്, ഡോ.പി.കെ. ജയകൃഷ്ണൻ, ഡോ.വി.പി. ജയശേഖരൻ, ഡോ. വിവേക് ആർ. നായർ, ഡോ. സുഹാസ്, ഡോ. സിറാജ് എന്നിവർ പ്രസംഗിച്ചു. ഡെന്‍റൽ ഡോക്ടർമാരും വിദ്യാർഥികളും സൈക്ലിംഗ് ക്ലബ് അംഗങ്ങളും റൈഡിൽ പങ്കാളികളായി.

ആരോഗ്യം ആനന്ദം 2.0 കാൻസർ പ്രതിരോധ ജനകീയ പ്രചാരണ പരിപാടിക്ക് തുടക്കമായി

ചുള്ളിക്കര: സംസ്ഥാന സർക്കാർ നടപ്പിലാക്കുന്ന ആരോഗ്യം ആനന്ദം 2.0 കാൻസർ പ്രതിരോധ ജനകീയ പ്രചാരണ പരിപാടിയുടെ ജില്ലാതല ഉദ്ഘാടനം ചുള്ളിക്കര മേരി ടാക്കീസ് ഓഡിറ്റോറിയത്തിൽ പരപ്പ ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി നിർവഹിച്ചു. കള്ളാർ പഞ്ചായത്ത് പ്രസിഡന്‍റ് ടി.കെ. നാരായണൻ അധ്യക്ഷത വഹിച്ചു. ഇന്നലെ ലോക പുകയില വിരുദ്ധ ദിനത്തോടനുബന്ധിച്ചാണ് പ്രചാരണ പരിപാടിക്ക് തുടക്കമായത്. വദനാർബുദം, വൻകുടലിലെ അർബുദം എന്നിവയുടെ സ്ക്രീനിംഗും ചികിത്സയും പ്രതിരോധ ബോധവത്കരണവുമാണ് ഈ ഘട്ടത്തിൽ ലക്ഷ്യമിടുന്നത്. ഇതിനോടനുബന്ധിച്ച് പുകയിലയ്ക്കെതിരായ ബോധവത്കരണം, പുകയിലരഹിത വിദ്യാലയങ്ങൾ, പുകയില നിയന്ത്രണ നിയമം 2003, ടൊബാക്കോ സെസേഷൻ ക്ലിനിക്കുകൾ എന്നിവയുമായി ബന്ധപ്പെട്ട പരിപാടികൾ നടപ്പിലാക്കും. ജില്ലാ മെഡിക്കൽ ഓഫീസറുടെ ചുമതല വഹിക്കുന്ന സർവൈലൻസ് ഓഫീസർ ഡോ.ബി. സന്തോഷ് ജില്ലയിൽ നടത്തുന്ന വിവിധ പരിപാടികൾ വിശദീകരിച്ചു. ജില്ലാ പഞ്ചായത്ത് അംഗം ഷിനോജ് ചാക്കോ, ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ എം. പത്മകുമാരി, ബ്ലോക്ക് പഞ്ചായത്ത് അംഗങ്ങളായ സി. രേഖ, പി.വി. ശ്രീലത, കള്ളാർ പഞ്ചായത്ത് അംഗം ബി. അജിത് കുമാർ, ജില്ല എജുക്കേഷൻ & മീഡിയ ഓഫീസർ അബ്ദുൾ ലത്തീഫ് മഠത്തിൽ, ഡെപ്യൂട്ടി ജില്ലാ എജുക്കേഷൻ&മീഡിയ ഓഫീസർ പി.പി. ഹസീബ്, താലൂക്ക് ആശുപത്രി മെഡിക്കൽ ഓഫീസർ ഡോ.വി.കെ. ഷിൻസി, പെരിയ സിഎച്ച്സി സൂപ്പർവൈസർ എം. ചന്ദ്രൻ എന്നിവർ പ്രസംഗിച്ചു. ബോധവത്കരണ സെമിനാറിന് നോഡൽ ഓഫീസർ പി. രഞ്ജിത്തും ക്വിസ് മത്സരത്തിന് കാഞ്ഞങ്ങാട് സ്ത്രീകളുടെയും കുട്ടികളുടെയും ആശുപത്രിയിലെ ജെഎച്ച്ഐ സിജോ എം. ജോസും നേതൃത്വം നല്കി.

അധ്യാപകരുടെയും പിടിഎ ഭാരവാഹികളുടെയും യോഗം വിളിച്ച് വെള്ളരിക്കുണ്ട് പോലീസ്

വെള്ളരിക്കുണ്ട്: പുതിയ അധ്യയനവർഷം ആരംഭിക്കുന്നതിന് മുന്നോടിയായി വെള്ളരിക്കുണ്ട് പോലീസ് സ്റ്റേഷൻ പരിധിയിൽ വരുന്ന സ്കൂളുകളിലെ അധ്യാപകരുടെയും പിടിഎ ഭാരവാഹികളുടെയും യോഗം വിളിച്ച് വെള്ളരിക്കുണ്ട് പോലീസ്. സ്കൂളുകളിലും പുറത്തും കുട്ടികളുടെ സുരക്ഷ ഉറപ്പു വരുത്തുന്നതിനുള്ള നടപടികൾ ഉറപ്പാക്കുകയാണ് ലക്ഷ്യം. സ്കൂളുകൾക്ക് സമീപമുള്ള കടകളിൽ ലഹരിവസ്തുക്കളുടെ വില്പന തടയാനുള്ള നടപടികൾ സ്വീകരിക്കും. കുട്ടികൾ രാവിലെ വീട്ടിൽ നിന്നും പുറപ്പെട്ടാൽ നേരെ സ്കൂളുകളിൽ എത്തുന്നുണ്ടോ എന്നും സ്കൂൾ വിട്ടുകഴിഞ്ഞാൽ അവർ പെട്ടെന്നുതന്നെ വീട്ടിൽ മടങ്ങിയെത്തുന്നുണ്ടോ എന്നും ഉറപ്പാക്കണമെന്നും പോലീസ് നിർദേശിച്ചു. സ്കൂൾ വാഹനങ്ങൾ ഓടിക്കുന്ന ഡ്രൈവർമാർ നിറബന്ധമായും പോലീസ് ക്ലിയറൻസ് എടുക്കണം. ഡ്രൈവർമാരുടെ പൂർണ വിവരങ്ങൾ അടങ്ങിയ രജിസ്റ്റർ സ്കൂളുകളിൽ സൂക്ഷിക്കണം. കുട്ടികളുടെ അമിതമായ മൊബൈൽ ഫോൺ ഉപയോഗം തടയണം. പകർച്ചവ്യാധികൾ തടയാൻ പരിസര ശുചീകരണ പ്രവർത്തനങ്ങൾ നടത്തണം. സ്കൂൾ പരിസരങ്ങളിൽ ഇഴജന്തുക്കളുടെ സാന്നിധ്യം ഇല്ലെന്ന് ഉറപ്പുവരുത്തണം. സ്കൂൾ കെട്ടിടങ്ങളുടെ സുരക്ഷ ഉറപ്പു വരുത്തണം. മഴ ശക്തി പ്രാപിക്കുന്ന സാഹചര്യത്തിൽ വിദ്യാർത്ഥികളുടെ യാത്രാ സുരക്ഷിതത്വം കൂടി ഉറപ്പുവരുത്തണമെന്നും അവശ്യഘട്ടങ്ങളിൽ പോലീസിന്‍റെ സഹായം തേടാമെന്നും വെള്ളരിക്കുണ്ട് ഇൻസ്‌പെക്ടർ ടി.കെ. മുകുന്ദൻ അറിയിച്ചു.

വനം വകുപ്പ് പനത്തടി സെക്ഷനിൽ ആയിരം വിത്തുണ്ടകൾ തയാറായി

രാജപുരം: വനത്തിനുള്ളിൽ പ്രകൃതിദത്ത ഫലവൃക്ഷങ്ങൾ വളർത്തിയെടുക്കുകയെന്ന ലക്ഷ്യത്തോടെ വനംവകുപ്പ് നടപ്പിലാക്കുന്ന വിത്തൂട്ട് പദ്ധതിക്കായി പനത്തടി സെക്ഷനിൽ ആയിരത്തോളം വിത്തുണ്ടകൾ തയാറായി. മാവ്, പ്ലാവ്, ആഞ്ഞിലി, പേര, ഞാവൽ, ഇലഞ്ഞി, കുടംപുളി, വാളംപുളി തുടങ്ങി മുപ്പതോളം ഫലവൃക്ഷങ്ങളുടെ വിത്തുകളാണ് ഇവയിൽ ഉൾക്കൊള്ളിച്ചിട്ടുള്ളത്. ചാമുണ്ഡിക്കുന്ന് വനമേഖലയിലാണ് ഇവ നിക്ഷേപിക്കാൻ ഉദ്ദേശിക്കുന്നത്. സെക്ഷൻ ഫോറസ്റ്റ് ഓഫീസർ ബി. ശേഷപ്പ, ബീറ്റ് ഫോറസ്റ്റ് ഓഫീസർമാരായ വി.വി. പ്രകാശൻ, ഡി. വിമൽരാജ്, വി. വിനീത്, കെ. രതീഷ്, ജി. സൗമ്യ, റിസർവ് ഫോറസ്റ്റ് വാച്ചർ എം.എസ്. സുമേഷ് കുമാർ എന്നിവർ വിത്തുണ്ടകളൊരുക്കുന്നതിൽ പങ്കാളികളായി.

വീടിന്‍റെ മുൻവാതില്‍ കുത്തിത്തുറന്ന് 22 പവൻ സ്വർണാഭരണങ്ങൾ കവർന്നു

തൃക്കരിപ്പൂർ: സന്ധ്യാസമയത്ത് വീടിന്‍റെ മുൻവാതിൽ കുത്തിത്തുറന്ന് 22 പവൻ സ്വർണാഭരണങ്ങൾ കവർന്നു. മാണിയാട്ട് സഹകരണ ബാങ്കിന് സമീപത്തെ കെ.സിദ്ദിഖിന്‍റെ വീട്ടിലാണ് കവർച്ച നടന്നത്. നെക് ലെയ്സ്, വളകള്‍, മോതിരങ്ങള്‍, ബ്രേയ്സ് ലെറ്റ് ഉൾപ്പെടെ 15 ലക്ഷത്തിൽപ്പരം രൂപയുടെ സ്വർണാഭരണങ്ങളാണ് കവർച്ച ചെയ്യപ്പെട്ടത്. സിദ്ദിഖ് രണ്ടാഴ്ച മുമ്പ് ഹജ്ജ് കർമത്തിനായി പോയതാണ്. ഭാര്യ ജസീല വെള്ളിയാഴ്ച ഉച്ചകഴിഞ്ഞ് മൂന്നരയോടെ മക്കളേയുംകൂട്ടി പയ്യന്നൂരിലേക്ക് പോയിരുന്നു. രാത്രി പത്ത് മണിയോടെ തിരിച്ചെത്തിയപ്പോഴാണ് വീടിന്‍റെ മുൻവാതിലിന്‍റെ ഓടാമ്പലിനോടു ചേർന്ന ഭാഗം തകർത്ത നിലയിൽ കണ്ടത്. താഴത്തെ നിലയിലുള്ള കിടപ്പുമുറിയിലെ അലമാര തുറന്നാണ് സ്വർണാഭരണങ്ങൾ എടുത്തത്. ചന്തേര ഇന്‍സ്‌പെക്ടര്‍ കെ. പ്രശാന്ത്, പ്രിൻസിപ്പൽ എസ്ഐ കെ.പി. സതീഷ്, പ്രൊബേഷൻ എസ്ഐ സി.ആർ. മൗഷ്മി എന്നിവരുടെ നേതൃത്വത്തില്‍ പോലീസും വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി.

മാലോം വലിയപുഞ്ചയിൽ ആർആർടി സംഘമെത്തി

മാലോം: ദിവസങ്ങളായി കാട്ടാനക്കൂട്ടം തമ്പടിച്ച കാപ്പിത്തട്ട്, വലിയ പുഞ്ച, ബന്തമല പ്രദേശങ്ങളിൽ വനംവകുപ്പിന്‍റെ ആർആർടി സംഘമെത്തി. ആനകളെ ഉൾക്കാട്ടിലേക്ക് തുരത്താനുള്ള ശ്രമങ്ങൾ ആരംഭിച്ചു. ഇന്നലെ പുഞ്ച, ബന്തമല ഭാഗങ്ങളിലെ കൃഷിയിടങ്ങളിൽ കാട്ടാനകൾ വ്യാപകമായി നാശം വിതച്ചിരുന്നു. വരാച്ചേരി ബിനുവിന്‍റെ തോട്ടത്തിലെ കമുകുകൾ മറിച്ചിട്ട് ചവിട്ടിമെതിച്ച നിലയിലാണ്. ആർആർടി സെക്ഷൻ ഫോറസ്റ്റ് ഓഫീസർ പ്രവീൺ കുമാർ, അഭിലാഷ്, രവീന്ദ്ര, നിവേദ്, നിധിൻ ചന്ദ്രൻ, ജിഷ്ണു, സുധീഷ്, സന്തോഷ്, ബിനു, പ്രദീപ് കുമാർ എന്നിവരുടെ നേതൃത്വത്തിലാണ് ആർആർടി സംഘമെത്തിയത്.

സ്ത്രീകളുടെയും കുട്ടികളുടെയും ആശുപത്രി വീണ്ടും അടച്ചുപൂട്ടലിന്‍റെ വക്കിൽ

കാഞ്ഞങ്ങാട്: കഴിഞ്ഞ നിയമസഭാ തെരഞ്ഞെടുപ്പ് കാലത്ത് ധൃതിപിടിച്ച് ഉദ്ഘാടനം നടത്തിയ കാഞ്ഞങ്ങാട് നഗരമധ്യത്തിലെ ഗവ. സ്ത്രീകളുടെയും കുട്ടികളുടെയും ആശുപത്രി പിന്നെയും രണ്ടുവർഷത്തോളം അടഞ്ഞുകിടന്നിരുന്നതാണ്. യൂത്ത് കോൺഗ്രസും ലീഗും ബിജെപിയുമടക്കമുള്ള സംഘടനകൾ പലതവണ പ്രതിഷേധസമരങ്ങൾ നടത്തിയതിനു ശേഷമാണ് ആശുപത്രി തുറന്ന് പ്രവർത്തനക്ഷമമാക്കിയത്. ഇവിടെ ഡോക്ടർമാരും നഴ്സുമാരും മറ്റു ജീവനക്കാരുമടക്കം 152 സ്ഥിരം തസ്തികകൾ അനുവദിക്കുന്നതിനാണ് ജില്ലാ മെഡിക്കൽ ഓഫീസിൽ നിന്ന് സംസ്ഥാന ആരോഗ്യവകുപ്പിലേക്ക് നിർദേശം സമർപ്പിച്ചിരുന്നത്. എന്നാൽ ഒരു സ്ഥിരനിയമനം പോലും ഇതുവരെ ഉണ്ടായിട്ടില്ല. ചട്ടഞ്ചാലിലെ അടച്ചുപൂട്ടിയ ടാറ്റ ആശുപത്രിയിൽ നിന്നും നീലേശ്വരം, തൃക്കരിപ്പൂർ താലൂക്ക് ആശുപത്രികളിൽ നിന്നും ജോലി ക്രമീകരണത്തിലൂടെ ഡോക്ടർമാരെയും നഴ്സുമാരെയും മറ്റു ജീവനക്കാരെയും എത്തിച്ചാണ് ആശുപത്രി പ്രവർത്തനസജ്ജമാക്കിയത്. അടുത്തുതന്നെ സ്ഥിരം തസ്തികകൾ അനുവദിച്ച് ആശുപത്രി പൂർണതോതിൽ പ്രവർത്തനസജ്ജമാക്കുമെന്ന വാഗ്ദാനം ആവർത്തിക്കുന്നതിനിടയിലാണ് ആരോഗ്യവകുപ്പ് ഇവിടെ അത്യാഹിത വിഭാഗത്തിലുള്ള മൂന്നു ഡോക്ടർമാരെയും സ്ഥലംമാറ്റിയത്. ഇനി ദിവസങ്ങൾക്കകം മറ്റെവിടെയെങ്കിലും നിന്ന് ജോലി ക്രമീകരണത്തിലൂടെയോ മറ്റുതരത്തിലോ പകരം ഡോക്ടർമാരെ എത്തിച്ചില്ലെങ്കിൽ അത്യാഹിതവിഭാഗം തത്കാലം അടച്ചുപൂട്ടേണ്ട നിലയാകും. മറ്റു വിഭാഗങ്ങളിലും നിലവിലുള്ള ഡോക്ടർമാരുടെ ജോലി ക്രമീകരിച്ചാണ് ആശുപത്രി നടന്നുപോകുന്നത്. അത്യാവശ്യഘട്ടങ്ങളിൽ ആരെങ്കിലും ലീവെടുത്താൽപോലും ആ വിഭാഗം അടഞ്ഞുകിടക്കുമെന്ന നിലയാണ്.

പള്ളി ഭണ്ഡാരം കുത്തിത്തുറന്ന് കവർച്ച നടത്തിയയാൾ പിടിയിൽ

ചിറ്റാരിക്കാൽ: തോമാപുരം സെന്‍റ് തോമസ് ഫൊറോന പള്ളിയുടെ ഭണ്ഡാരം കുത്തിത്തുറന്ന് കവർച്ച നടത്തിയ ആൾ പിടിയിൽ. ചിറ്റാരിക്കാൽ പള്ളിക്കുന്നിലെ ബി.ടി. രാജേഷി(50)നെയാണ് ചിറ്റാരിക്കാൽ പോലീസ് അറസ്റ്റ് ചെയ്തത്. കഴിഞ്ഞ 28 ന് പുലർച്ചെയായിരുന്നു സംഭവം. ഭണ്ഡാരം കുത്തിത്തുറക്കുന്ന ദൃശ്യം സമീപത്തെ സിസിടിവിയിൽ പതിഞ്ഞിരുന്നു. ആറായിരത്തോളം രൂപയാണ് കവർച്ച ചെയ്യപ്പെട്ടത്. സിസിടിവി ദൃശ്യങ്ങൾ പിന്തുടർന്ന് നടത്തിയ അന്വേഷണത്തിലാണ് മുമ്പും കവർച്ചക്കേസുകളിൽ പ്രതിയായിട്ടുള്ള രാജേഷിനെ കണ്ടെത്തിയത്. ഇൻസ്പെക്ടർ രഞ്ജിത് രവീന്ദ്രൻ, എസ്ഐ അനിൽ കുമാർ എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്തത്. രാജേഷിനെ ഹോസ്ദുർഗ് ജുഡീഷ്യൽ മജിസ്ട്രേറ്റ് കോടതിയിൽ ഹാജരാക്കി 14 ദിവസത്തേക്ക് റിമാൻഡ് ചെയ്തു.

എം സാൻഡ് ഉപയോഗിച്ച് അടയ്ക്കാനുള്ള ശ്രമം തടഞ്ഞു

കാസർഗോഡ്: ചട്ടഞ്ചാലിൽ ദേശീയപാതയുടെ മേൽപ്പാലത്തിൽ വിള്ളലുകൾ. കഴിഞ്ഞ ദിവസം മലവെള്ളപ്പാച്ചിലിൽ പുതിയ ദേശീയപാതയുടെ ഒരു ഭാഗം ഒലിച്ചുപോയ സ്ഥലത്തിന് സമീപം തന്നെയാണ് വിള്ളലുകളും പ്രത്യക്ഷപ്പെട്ടത്. ഈ ഭാഗം ഇതുവരെ വാഹനങ്ങൾക്കായി തുറന്നുകൊടുത്തിട്ടില്ല. വിള്ളലുകൾ കണ്ടതിനു പിന്നാലെ നിർമാണ കരാറുകാരായ മേഘ കൺസ്ട്രക്ഷൻസ് അധികൃതരെത്തി വിള്ളൽഎം സാൻഡ് നിറച്ച് അടക്കാൻ ശ്രമിച്ചത് നാട്ടുകാർ തടഞ്ഞു. ആകെ 50 മീറ്റർ നീളത്തിലുള്ള ഭാഗത്താണ് വിള്ളലുകളുള്ളത്. ജില്ലാ കളക്ടർ ഇവിടെയെത്തി പരിശോധന നടത്തുമെന്ന് തഹസിൽദാർ അറിയിച്ചു.

ഉന്നതവിജയികൾക്ക് കാഞ്ഞങ്ങാട്ട് ദീപികയുടെ ആദരം

കാഞ്ഞങ്ങാട്: പത്താം ക്ലാസ്, പ്ലസ്ടു പരീക്ഷകളിൽ ഉന്നതവിജയം നേടിയ കാഞ്ഞങ്ങാട് മേഖലയിലെ വിദ്യാർഥികൾക്കും സ്കൂളുകൾക്കും മലയാളത്തിലെ പ്രഥമ ദിനപത്രമായ ദീപികയുടെ ആദരവ്. വിദേശ വിദ്യാഭ്യാസരംഗത്തെ വഴികാട്ടിയായ സാന്‍റാ മോണിക്ക സ്റ്റഡി എബ്രോഡുമായി സഹകരിച്ച് പടന്നക്കാട് ഗുഡ് ഷെപ്പേർഡ് ചർച്ച് ഹാളിൽ "ആദരം-2025' എന്ന പേരിൽ സംഘടിപ്പിച്ച പരിപാടി രാജ്മോഹൻ ഉണ്ണിത്താൻ എംപി ഉദ്ഘാടനം ചെയ്തു. ആഗോളതലത്തിൽ വിദ്യാഭ്യാസരംഗം അത്യധികം മത്സരാധിഷ്ഠിതമാകുന്ന കാലത്ത് ഒട്ടും പിന്നിലാകാതെ മുന്നേറ്റം തുടരാൻ നമ്മുടെ കുട്ടികൾക്ക് കഴിയണമെന്നും ഉയർന്ന നിലവാരമുള്ള വിദേശ സർവകലാശാലകളും സ്വകാര്യ സർവകലാശാലകളും ഇവിടെ ഉണ്ടാകേണ്ടത് അനിവാര്യമാണെന്നും അദ്ദേഹം പറഞ്ഞു. ഓരോ കുട്ടിയുടെയും നൈസർഗികമായ കഴിവുകൾ പ്രോത്സാഹിപ്പിക്കപ്പെടുമ്പോൾ അവസരങ്ങൾ അവരെ തേടിയെത്തും. മത്സരങ്ങളിൽ മുന്നേറുന്നതിനൊപ്പം ധാർമികബോധത്തിന്‍റെ പാഠങ്ങൾ വിടാതെ മനസ്സിൽ സൂക്ഷിക്കാനും നമ്മുടെ കുഞ്ഞുങ്ങളെ പ്രാപ്തരാക്കണം. എല്ലാ കാര്യങ്ങളിലും ജനപക്ഷത്ത് നിന്നുകൊണ്ട് ധാർമികമായ നിലപാടുകൾ ഉയർത്തിപ്പിടിക്കുന്ന ദീപികയെ പോലുള്ള പത്രങ്ങൾക്ക് ഇക്കാര്യത്തിൽ വലിയ പങ്ക് വഹിക്കാൻ കഴിയുമെന്നും ഉണ്ണിത്താൻ പറഞ്ഞു. തലശേരി അതിരൂപത വികാരി ജനറാൾ മോൺ. മാത്യു ഇളംതുരുത്തിപടവിൽ അധ്യക്ഷത വഹിച്ചു. ശാരീരികമായ വളർച്ചയ്ക്കൊപ്പം ബുദ്ധിപരവും ധാർമികവുമായ വളർച്ച കൂടി നേടുമ്പോഴാണ് നമുക്ക് നല്ല മനുഷ്യരാകാൻ കഴിയുന്നതെന്ന് അദ്ദേഹം പറഞ്ഞു. തെളിഞ്ഞ നിലവിളക്കുപോലെ കുടുംബത്തിലും സമൂഹത്തിലും പ്രകാശം പരത്താൻ നമ്മുടെ കുട്ടികൾക്ക് കഴിയണമെന്ന് പരിപാടിയിൽ മുഖ്യാതിഥിയായ കാഞ്ഞങ്ങാട് ഡിവൈഎസ്പി ബാബു പെരിങ്ങേത്ത് പറഞ്ഞു. ദീപിക കണ്ണൂർ യൂണിറ്റ് റസിഡന്‍റ് മാനേജർ ഫാ.ജോബിൻ വലിയപറമ്പിൽ, മാർക്കറ്റിംഗ് കോ-ഓർ‌ഡിനേറ്റർ ഫാ. വിപിൻ വെമ്മേനിക്കട്ടയിൽ, സാന്‍റാ മോണിക്ക സ്റ്റഡി എബ്രോഡ് ഫാക്കൽട്ടി പ്രത്യുഷ് ശ്രീവാസ്തവ, ദീപിക സർക്കുലേഷൻ എക്സിക്യൂട്ടീവ് ബാബു പതിപ്പള്ളിൽ എന്നിവർ പ്രസംഗിച്ചു. കാസർഗോഡ് ജില്ലയിലെ വിവിധ സ്കൂളുകളിൽ നിന്ന് സംസ്ഥാന സിലബസ്, സിബിഎസ്ഇ, ഐസിഎസ്ഇ സിലബസുകളിൽ മികച്ച വിജയം കരസ്ഥമാക്കിയ കുട്ടികൾക്ക് സ്വർണമെഡലുകളും 100 ശതമാനം വിജയം നേടിയ സ്കൂളുകൾക്ക് ആദരഫലകങ്ങളും സമ്മാനിച്ചു. നൂറു ശതമാനം വിജയം കൈവരിച്ച പടുപ്പ് സാൻജിയോ സെൻട്രൽ സ്കൂൾ, പനത്തടി സെന്‍റ് മേരീസ് ഇംഗ്ലീഷ് മീഡിയം സ്കൂൾ, കാഞ്ഞങ്ങാട് ക്രൈസ്റ്റ് സിഎംഐ പബ്ലിക് സ്കൂൾ, കൊട്ടോടി സെന്‍റ് ആൻസ് ഇംഗ്ലീഷ് മീഡിയം സ്കൂൾ, നീലേശ്വരം സെന്‍റ് പീറ്റേഴ്സ് സ്കൂൾ, പരപ്പ ഗവ. ഹയർ സെക്കൻഡറി സ്കൂൾ, പെരിയാട്ടടുക്കം സെന്‍റ് മേരീസ് ഇംഗ്ലീഷ് മീഡിയം സ്കൂൾ, രാജപുരം ഹോളി ഫാമിലി ഹയർ സെക്കൻഡറി സ്കൂൾ, പടന്നക്കാട് സ്റ്റെല്ലാ മാരിസ് ഇംഗ്ലീഷ് മീഡിയം സ്കൂൾ, രാജപുരം ടാഗോർ പബ്ലിക് സ്കൂൾ, കാസർഗോഡ് ജയ്മാതാ സീനിയർ സെക്കൻഡറി സ്കൂൾ, ചായ്യോത്ത് മദർ അലക്സിയ ഇംഗ്ലീഷ് മീഡിയം സ്കൂൾ, കാഞ്ഞങ്ങാട് ലിറ്റിൽ ഫ്ളവർ ഗേൾസ് ഹയർ സെക്കൻഡറി സ്കൂൾ എന്നീ സ്ഥാപനങ്ങൾക്ക് ആദരം നല്കി.

ദേശീയപാതയിൽ കാറും ലോറിയും കൂട്ടിയിടിച്ച് യുവതി മരിച്ചു

ഉപ്പള: ദേശീയപാതയിൽ കാറും ലോറിയും കൂട്ടിയിടിച്ച് യുവതി മരിച്ചു. മംഗളൂരു സ്വദേശിയായ പത്മനാഭന്‍റെ ഭാര്യ നവ്യ (30) ആണ് മരിച്ചത്. പദ്മനാഭനും ഇവരുടെ മകനും ഗുരുതരമായി പരിക്കേറ്റു. ഇന്നലെ ഉച്ചകഴിഞ്ഞ് മൂന്നോടെ ഉപ്പള ഗേറ്റിന് സമീപമായിരുന്നു അപകടം. ഉപ്പളയിൽ നിന്ന് മംഗളൂരുവിലേക്ക് പോവുകയായിരുന്ന കാർ എതിർദിശയിൽനിന്ന് വന്ന ലോറിയുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ കാറിന്‍റെ മുൻഭാഗം പൂർണമായും തകർന്നു. ലോറി റോഡിലേക്ക് മറിഞ്ഞു. ഗുരുതരമായി പരിക്കേറ്റ മൂന്നുപേരെയും പുറത്തെടുത്ത് മംഗളൂരുവിലെ സ്വകാര്യ ആശുപത്രിയിലെത്തിച്ചെങ്കിലും നവ്യയുടെ ജീവൻ രക്ഷിക്കാനായില്ല.

കർഷക സ്വരാജ് സത്യഗ്രഹത്തിന് പിന്തുണയുമായി മാതൃവേദി

വെള്ളരിക്കുണ്ട്: കർഷക സ്വരാജ് സത്യഗ്രഹത്തിന് മുന്നോടിയായി നടക്കുന്ന 48 മണിക്കൂർ ഉപവാസത്തിന് പിന്തുണയുമായി മാലോം മേഖലയിലെ മാതൃവേദി പ്രവർത്തകർ സമരപ്പന്തലിലെത്തി. ഡയറക്ടർ ഫാ. ഷാജി കണിയാംപറമ്പിൽ, മേഖലാ പ്രസിഡന്‍റ് അന്നമ്മ തലാപ്പിള്ളി എന്നിവരുടെയും ആനിമേറ്റർ സിസ്റ്റർമാരുടെയും നേതൃത്വത്തിലാണ് ഫൊറോനയിലെ എല്ലാ ഇടവകകളിൽ നിന്നുമുള്ള അമ്മമാർ ഉപവാസ സമരത്തിന് ഐക്യദാർഢ്യമറിയിച്ച് സത്യഗ്രഹ പന്തലിലെത്തിയത്.

ലഹരിക്കെതിരേ സ്കൂൾ പ്രൊട്ടക്ഷൻ ഗ്രൂപ്പ് രൂപീകരിച്ചു

വെള്ളരിക്കുണ്ട്: പുതിയ അധ്യയനവർഷത്തിൽ ലഹരിക്കെതിരായ പ്രവർത്തനങ്ങളുടെ ഭാഗമായി വെള്ളരിക്കുണ്ട് സെന്‍റ് ജൂഡ്സ് ഹയർ സെക്കൻഡറി, ഹൈസ്കൂൾ, സെന്‍റ് ജോസഫ്സ് യുപി, നിർമലഗിരി എൽപി സ്കൂളുകൾ സംയുക്തമായി സ്കൂൾ പ്രൊട്ടക്ഷൻ ഗ്രൂപ്പ് രൂപീകരിച്ചു. സെന്‍റ് ജൂഡ്‌സ് ഹയർ സെക്കൻഡറി സ്കൂൾ ഓഡിറ്റോറിയത്തിൽ നടന്ന യോഗം ബളാൽ പഞ്ചായത്ത് പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. സ്കൂൾ മാനേജർ റവ.ഡോ. ജോൺസൺ അന്ത്യാംകുളം അധ്യക്ഷത വഹിച്ചു. ഹയർ സെക്കൻഡറി സ്കൂൾ പ്രിൻസിപ്പൽ റവ.ഡോ. സന്തോഷ് കെ. പീറ്റർ, മുഖ്യാധ്യാപികമാരായ കെ.എം. അന്നമ്മ, സിസ്റ്റർ റെജീന മാത്യു, ഷാന്‍റി സിറിയക് എന്നിവർ പ്രസംഗിച്ചു. വെള്ളരിക്കുണ്ട് പോലീസ് ഇൻസ്പെക്ടർ ടി.കെ. മുകുന്ദൻ, ഹെൽത്ത് ഇൻസ്പെക്ടർ സാജു സെബാസ്റ്റ്യൻ എന്നിവർ പ്രവർത്തനങ്ങളുടെ മാർഗനിർദേശം നല്കി. പിടിഎ പ്രസിഡന്‍റുമാരായ ജോസ് ചിത്രക്കുഴി, പി. അരവിന്ദാക്ഷൻ, ബിബിൻ ഡൊമിനിക് എന്നിവർ പങ്കെടുത്തു.

കാട്ടിലേക്ക് വിത്തുണ്ടകളെറിയാൻ വനംവകുപ്പ്

കാഞ്ഞങ്ങാട്: കാട്ടിൽ ഫലവൃക്ഷങ്ങൾ മുളപ്പിച്ച് വളർത്തുന്നതിനായി വനംവകുപ്പ് വിത്തുണ്ടകൾ തയ്യാറാക്കുന്നു. ആഞ്ഞിലി, ഞാവൽ, പ്ലാവ്, മാവ്, പേരയ്ക്ക, ചാമ്പങ്ങ, വാളൻ പുളി, കൊടംപുളി എന്നിവയുടെ വിത്തുകളാണ് ജില്ലയിൽ വിത്തുണ്ടകൾ തയ്യാറാക്കാൻ ഉപയോഗിക്കുന്നത്. ഓരോ ഇനത്തിന്‍റെയും വിത്തുകൾ മണ്ണ്, ചാണകം, മഞ്ഞൾ, മറ്റു ജൈവവളങ്ങൾ എന്നിവയിൽ പൊതിഞ്ഞാണ് വിത്തുണ്ടകൾ തയ്യാറാക്കുന്നത്. വനംവകുപ്പിന്‍റെ ജില്ലയിലെ ആറ് സെക്ഷനുകളിലായി വനംവകുപ്പ് ജീവനക്കാരുടെയും വനസംരക്ഷണ സമിതി അംഗങ്ങളുടെയും സന്നദ്ധ പ്രവർത്തകരുടെയും നേതൃത്വത്തിലാണ് വിത്തുണ്ടകൾ തയ്യാറാക്കുന്നത്. വയനാട്ടിൽ നിന്നും മുളയരി എത്തിച്ച് മുളയുടെ വിത്തുണ്ടകൾ കൂടി തയ്യാറാക്കാൻ ശ്രമം നടക്കുന്നുണ്ട്. ജില്ലയിലെ വനസംരക്ഷണ സമിതികൾ മുഖേന ഈ വിത്തുണ്ടകൾ കാട്ടിൽ എറിയാനാണ് പദ്ധതി. ലോക പരിസ്ഥിതി ദിനവും കാലവർഷാരംഭവും പരിഗണിച്ച് ജൂൺ ആദ്യവാരത്തിലായിരിക്കും ഇവ നിക്ഷേപിക്കുക. കാടിന്‍റെ പ്രകൃതിദത്ത ആവരണം കുറവായ സ്ഥലങ്ങൾക്കായിരിക്കും മുൻഗണന. അടുത്തിടെ അക്കേഷ്യ, മാഞ്ചിയം മരങ്ങൾ മുറിച്ചുനീക്കിയ കാറഡുക്ക, മുളിയാർ മേഖലയിലാണ് ഇവ കൂടുതലായി നിക്ഷേപിക്കാൻ ഉദ്ദേശിക്കുന്നത്. മണ്ണും ജൈവവളങ്ങളും കൊണ്ട് പൊതിയുന്നതിലൂടെ ജീവികൾ വിത്തുകളെ തന്നെ ആഹാരമാക്കുന്നത് തടയാനാകും. മുളച്ചുപൊങ്ങുന്ന തൈകളുടെ ആദ്യഘട്ട വളർച്ചയ്ക്കാവശ്യമായ പോഷകങ്ങളും ഇതുവഴി ലഭ്യമാക്കാനാകും. കാടുകളിൽ നിന്ന് അധിനിവേശ സസ്യങ്ങളെ ഒഴിവാക്കി നാടിന്‍റെ പ്രകൃതിക്കിണങ്ങിയ സസ്യജാലങ്ങൾ വളർത്തിയെടുക്കുക, വന്യജീവികൾക്ക് കാട്ടിനുള്ളിൽ തന്നെ ആഹാരം ലഭ്യമാക്കുക എന്നിവയാണ് പദ്ധതിയുടെ ലക്ഷ്യം. ഈ വർഷം ഒരുലക്ഷം വിത്തുണ്ടകൾ നിക്ഷേപിക്കാനാണ് ലക്ഷ്യമിടുന്നത്.

ബിരിക്കുളം-കൊല്ലംപാറ റോഡ് വെള്ളക്കെട്ടിലായി

ബിരിക്കുളം: ടാറിംഗ് ഇളകി കുണ്ടും കുഴിയുമായ ബിരിക്കുളം-കൊല്ലംപാറ ജില്ലാ പഞ്ചായത്ത് റോഡ് മഴക്കാലം തുടങ്ങിയതോടെ മിക്കയിടങ്ങളിലും വെള്ളക്കെട്ടിലായി. വെള്ളംനിറഞ്ഞ കുഴികളുടെ ആഴമറിയാതെ വാഹനങ്ങൾ അപകടത്തിൽ പെടുന്നതും പതിവായി. ഇരുചക്രവാഹനങ്ങൾ കുഴികളിൽ മറിഞ്ഞുവീഴുന്നത് പതിവുകാഴ്ചയാണ്. ഭാഗ്യംകൊണ്ടു മാത്രമാണ് പലരും അപകടത്തിൽ നിന്ന് രക്ഷപ്പെടുന്നത്. ചെറുതും വലുതുമായ റോഡുകളെല്ലാം ദേശീയപാത നിലവാരത്തിൽ നവീകരിക്കുന്ന കാലത്താണ് ബസുകളടക്കം നിരവധി വാഹനങ്ങൾ കടന്നുപോകുന്ന ബിരിക്കുളം-കൊല്ലംപാറ റോഡിന്‍റെ അറ്റകുറ്റപണികൾ പോലും നീണ്ടുപോകുന്നത്. ജില്ലാ പഞ്ചായത്ത് അനുവദിച്ച ഫണ്ട് ഉപയോഗിച്ച് കൊല്ലംപാറ മുതൽ പുല്ലാഞ്ഞിപ്പാറ വരെയുള്ള ഭാഗത്ത് അടുത്തിടെ കുഴികൾ നികത്തി അറ്റകുറ്റപണി നടത്തിയിരുന്നു. അതുകഴിഞ്ഞ് കാട്ടിപ്പൊയിൽ പള്ളം വരെയുള്ള ഒന്നര കിലോമീറ്റർ ഭാഗമാണ് ഇപ്പോൾ പൊട്ടിപ്പൊളിഞ്ഞ് കിടക്കുന്നത്. ഇവിടുത്തെ അറ്റകുറ്റപണിക്ക് ഇനി മഴ തീരുംവരെ കാത്തുനില്ക്കുമോ എന്നാണ് നാട്ടുകാരുടെ ആശങ്ക.

അന്തർസംസ്ഥാന പാതയിടിഞ്ഞ് ഗതാഗതം ഭാഗികമായി തടസപ്പെട്ടു

പാണത്തൂർ: കല്ലപ്പള്ളി പാടികൊച്ചി ജംഗ്ഷനിൽ മണ്ണിടിഞ്ഞ് പാണത്തൂർ-സുള്ള്യ അന്തർസംസ്ഥാനപാതയിൽ ഗതാഗതം ഭാഗികമായി തടസപ്പെട്ടു. റോഡിന്‍റെ പാർശ്വഭിത്തി കെട്ടുന്നതിനായി മണ്ണെടുത്തതാണ് മണ്ണിടിയാൻ കാരണമായതെന്ന് നാട്ടുകാർ പറയുന്നു. പനത്തടി പഞ്ചായത്ത് റോഡ് മെയിന്‍റനൻസ് ഫണ്ട് പദ്ധതിയിൽപ്പെടുത്തി കല്ലപ്പള്ളി പാടികൊച്ചി ജംഗ്ഷനിൽ കലുങ്കിനോട് ചേർന്ന ഭാഗം കോൺക്രീറ്റ് ചെയ്ത് ബലപ്പെടുത്തുന്നതിനായി 7.5 ലക്ഷം രൂപ അനുവദിച്ചിരുന്നു. ഇതിന്‍റെ ഭാഗമായി റോഡിനോട് ചേർന്ന മണ്ണ് മാറ്റിയതാണ് ശക്തമായ മഴ തുടങ്ങിയതോടെ മണ്ണിടിഞ്ഞ് റോഡ് അപകടാവസ്ഥയിൽ ആവുകയും ഇതേതുടർന്ന് വാഹന ഗതാഗതം ഭാഗികമായി തടസപ്പെടുവാനും കാരണമായത്. പ്രവൃത്തി ആരംഭിച്ചപ്പോൾ തന്നെ പാണത്തൂരിൽ നിന്ന് സുള്ള്യയിലേക്കുള്ള കെഎസ്ആർടിസി ബസ് സർവീസ് നിർത്തിയിരുന്നു. അതുകഴിഞ്ഞും സുള്ള്യയിൽ നിന്നും കർണാടകയിലെ കരിക്കയിലേക്ക് പോകുന്ന ഒരു സ്വകാര്യ ബസ് ഇതുവഴി ദിവസേന സർവീസ് നടത്തുന്നുണ്ട്. എന്നാൽ ഇപ്പോൾ റോഡ് ഇടിഞ്ഞതിനാൽ ഈ ബസ് ആളുകളെ പാലത്തിന് ഇപ്പുറം ഇറക്കി അക്കരെ നിന്നു മറ്റൊരു ബസിലാണ് ആളുകൾ പോകുന്നത്.മാസങ്ങൾക്കു മുൻപേ പ്രവർത്തി തുടങ്ങുന്നതിനു വേണ്ടി കരാറുകാരൻ പഞ്ചായത്തിൽ എഗ്രിമെന്‍റ് വച്ചിരുന്നുവെങ്കിലും പഞ്ചായത്തുമായുള്ള ചില തർക്കത്തെ തുടർന്നാണ് പ്രവർത്തി ആരംഭിക്കാൻ താമസിച്ചത് എന്ന് പറയുന്നു. പിന്നീട് തർക്കങ്ങൾ പരിഹരിച്ച് മെയ് മാസത്തിലാണ് പ്രവൃത്തി ആരംഭിച്ചത്. എന്നാൽ പ്രവർത്തി തീരും മുമ്പ് തന്നെ ശക്തമായ മഴ ആരംഭിച്ചതാണ് റോഡ് ഇടിയാനും ഗതാഗത തടസ്സത്തിനും കാരണമായത്. നിരവധി വാഹനങ്ങൾ കടന്നുപോകുന്ന അന്തർസംസ്ഥാന പാതയിലാണ് ഇത്തരത്തിൽ സംഭവിച്ചിരിക്കുന്നത്. നിലവിൽ ബസ് ഗതാഗതം പൂർണമായും നിർത്തിവെച്ചിരിക്കുകയാണ്. കാർ, ജീപ്പ് തുടങ്ങിയ ചെറിയ വാഹനങ്ങൾ മാത്രമാണ് ഇതിലൂടെ കടന്നു പോകുന്നത്. ഇതോടെ നിരവധി ആളുകളാണ് ദുരിതത്തിലായത്. മഴ ഇനിയും നീണ്ടു നിന്നാൽ റോഡ് പൂർണമായും തകരുകയും ഗതാഗതം പൂർണമായും നിലക്കുകയും ചെയ്യും. മഴ തുടങ്ങും മുമ്പ് പ്രവർത്തി പൂർത്തിയാക്കാത്തത് പഞ്ചായത്തിന്‍റെ അനാസ്ഥ കൊണ്ട് മാത്രം എന്നാണ് നാട്ടുകാർ പറയുന്നത്.

മുള്ളേരിയ 110 കെവി സബ്‌സ്റ്റേഷനില്‍ തീപിടിത്തം

മുള്ളേരിയ: മുള്ളേരിയ 110 കെവി സബ്‌സ്റ്റേഷന്‍ യാര്‍ഡില്‍ പൊട്ടന്‍ഷ്യല്‍ ട്രാന്‍സ്‌ഫോമറിന് തീപിടിച്ചു. ഇന്നലെ പുലര്‍ച്ചെ 3.30ഓടെയാണ് സംഭവം. ഡ്യൂട്ടിയിലുണ്ടായിരുന്ന ജീവനക്കാര്‍ യാര്‍ഡിലെ പത്തോളം എസ്റ്റിംഗ്യുഷര്‍ ഉപയോഗിച്ച് തീയണയ്ക്കാന്‍ ശ്രമം നടത്തിയെങ്കിലും തീ നിയന്ത്രണവിധേയമായില്ല. തുടര്‍ന്ന് കാസര്‍ഗോഡ് അഗ്‌നിരക്ഷാ സേനയെ വിവരം അറിയിക്കുകയായിരുന്നു. സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ വി.എന്‍. വേണുഗോപാലിന്‍റെ നേതൃത്വത്തില്‍ സേന എത്തി തീ അണയ്ക്കുകയായിരുന്നു. ചെര്‍ക്കള, മുള്ളേരിയ, ബദിയടുക്ക, എരിഞ്ഞിപ്പുഴ, കുറ്റിക്കോല്‍ എന്നീ സ്ഥലത്തിലെ വൈദ്യുത ബന്ധം ഈ സമയത്ത് വിച്ഛേദിച്ചു. പിന്നീട് തീപിടിച്ച യാഡ് ഒഴിവാക്കിക്കൊണ്ട് പിന്നീട് ബന്ധം പുനഃസ്ഥാപിച്ചു.

മേഘ കണ്‍സ്ട്രക്ഷന്‍ കമ്പനിയെ കരിമ്പട്ടികയില്‍പ്പെടുത്തണം: എംപി

പൊയിനാച്ചി: അശാസ്ത്രീയമായ ദേശീയപാത നിര്‍മ്മാണത്തിലൂടെ വന്‍ അഴിമതി നടത്തിയ മേഘ കണ്‍സ്ട്രക്ഷന്‍ കമ്പനിയെ കരിമ്പട്ടികയില്‍പ്പെടുത്തണമെന്ന് രാജ്മോഹന്‍ ഉണ്ണിത്താന്‍ എംപി. ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ ദേശീയപാത നിര്‍മാണത്തിലെ അഴിമതിക്കെതിരെയും അശാസ്ത്രീയമായ നിര്‍മാണത്തിനുമെതിരെ പൊയിനാച്ചി ടൗണില്‍ നിന്നും മയിലാട്ടിയിലുള്ള മേഘ കണ്‍സ്ട്രക്ഷന്‍ കമ്പനിയുടെ റീജണല്‍ ഓഫീസിലേക്ക് നടത്തിയ ബഹുജന മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മഹാരാഷ്ട്രയിലെ പനവേലില്‍ നിന്നും ആരംഭിച്ച് കേരളത്തിലെ കളയിക്കാവിളയില്‍ അവസാനിക്കുന്ന ദേശീയ പാത 66 ന്‍റെ പ്രവര്‍ത്തിയില്‍ കേരളത്തിലൂടെ പോകുന്ന ദേശീയ പാത നിര്‍മ്മാണത്തില്‍ ഞെട്ടിക്കുന്ന അഴിമതിയാണ് നടക്കുന്നത്. ആയിരക്കണക്കിന് കോടികള്‍ ചെലവുവരുന്ന ബൃഹത്തായ ഒരു നിര്‍മാണ പദ്ധതി നടക്കുമ്പോള്‍ ആദ്യഘട്ടത്തില്‍ തന്നെ സമഗ്രമായ പാരിസ്ഥികാഘാതപഠനവും സാമൂഹികാഘാത പഠനവും നടത്തേണ്ടതുണ്ട്. അതിനുവേണ്ടി പദ്ധതിയുടെ ഡിപിആര്‍ തയാറാക്കി ജനങ്ങളുടെ മുന്നില്‍ അവതരിപ്പിക്കേണ്ടതായിരുന്നു. ദേശീയപാത 66 മൂന്നു സ്ട്രെച്ചറുകളായാണ് നടക്കേണ്ടിയിരുന്നത്. ഇതുപ്രകാരം റോഡ് നിര്‍മ്മാണം ആരംഭിക്കുമ്പോള്‍ ഡിപിആര്‍ പുറത്തിറക്കുകയും പാരിസ്ഥിക ,സാമൂഹികാഘാത പഠനവും നിര്‍ബന്ധമായും നടത്തേണ്ടതായിരുന്നു. ഇതു പാടേ ഒഴിവാക്കിക്കൊണ്ട് കേന്ദ്ര സര്‍ക്കാര്‍ വന്‍ കള്ളക്കളിയാണ് ദേശീയപാത നിര്‍മ്മാണത്തില്‍ നടത്തിയിരിക്കുന്നത്. ഇതുപ്രകാരം മൂന്നു സ്ട്രെച്ചറുകളായി നടത്തേണ്ട റോഡ് നിര്‍മാണം 50 കിലോമീറ്ററിന് ഒരു സ്ട്രെച്ച് പ്രകാരം 19 സ്ട്രെച്ചറുകളാക്കിയാണ് കേന്ദ്രസര്‍ക്കാര്‍ ദേശീയപാത നിര്‍മ്മാണത്തിന് അനുവാദം നല്‍കിയത്. ഇന്ത്യയിലെ ഭീമന്‍ നിര്‍മാണകമ്പനിയായ അദാനി ഗ്രൂപ്പിന് എന്‍എച്ച്എഐ ദേശീയപാത 66 ന്‍റെ കരാര്‍ നല്‍കുകയും മേഘ ഉള്‍പ്പടെയുള്ള നിര്‍മ്മാണ കമ്പനികള്‍ക്ക് കരാര്‍ മറിച്ചുനല്‍കി അദാനിയും കേന്ദ്രസര്‍ക്കാരും വന്‍ അഴിമതിയാണ് നടത്തിയത്. അതിന്‍റെ ഫലമായി കേരളത്തിലെ ജനങ്ങള്‍ക്ക് മുന്‍പില്‍ തീരാശാപമായി ദേശീയപാത നിര്‍മാണം മാറിയിരിക്കുകയുമാണെന്ന് എംപി ആരോപിച്ചു. ദേശീയപാത നിര്‍മാണത്തില്‍ മേഘ കണ്‍സ്ട്രക്ഷന്‍ കമ്പനി വന്‍ അഴിമതി നടത്തിയതായി ബോധ്യപ്പെട്ടിരിക്കുകയാണ്. സര്‍വീസ് റോഡുകളും പാലങ്ങളും ഓവുചാലുകളും പല സ്ഥലങ്ങളിലും തകര്‍ന്നിട്ടുണ്ട്. അശാസ്ത്രീയമായ മണ്ണെടുപ്പ് മൂലം ദേശീയപാതയുടെ സമീപ പ്രദേശങ്ങളില്‍ താമസിക്കുന്ന ജനങ്ങള്‍ക്ക് ശുദ്ധജലക്ഷാമം രൂക്ഷമാണ്. കിണറുകളില്‍ ചെളിയും മലിനജലവും നിറഞ്ഞ സ്ഥിതിയിലാണ് മഴയാരംഭിക്കുമ്പോള്‍ തന്നെ ഇത്ര ഗുരുതരമായ നിലയില്‍ റോഡ് തകര്‍ന്നപ്പോള്‍ മഴയുടെ മൂര്‍ധന്യതയില്‍ കേരളത്തിന്‍റെ അവസ്ഥ എന്തായിരിക്കുമെന്ന് ചിന്തിക്കേണ്ടിയിരിക്കുന്നുവന്നും അദ്ദേഹം പറഞ്ഞു. ഡിസിസി പ്രസിഡന്‍റ് പി.കെ. ഫൈസല്‍ അധ്യക്ഷത വഹിച്ചു. ഹക്കീം കുന്നില്‍, എ. ഗോവിന്ദന്‍ നായര്‍, എം.സി. പ്രഭാകരന്‍, കെ. നീലകണ്ഠന്‍, രമേശന്‍ കരുവാച്ചേരി, കരിമ്പില്‍ കൃഷ്ണന്‍, മീനാക്ഷി ബാലകൃഷ്ണന്‍, പി.ജി. ദേവ്, സാജിദ് മവ്വല്‍, സോമശേഖര ഷേണി, ഗീത കൃഷ്ണന്‍, ഹരീഷ് പി.നായര്‍, മാമുനി വിജയന്‍, ധന്യ സുരേഷ്, മധുസൂദനന്‍ ബാലൂര്‍, ഉമേശന്‍ വേളൂര്‍, ജോയ് ജോസഫ്, കാര്‍ത്തികേയന്‍ പെരിയ, മിനി ചന്ദ്രന്‍, ഷിബിന്‍ ഉപ്പിലിക്കൈ എന്നിവര്‍ സംസാരിച്ചു.

ചെറുപനത്തടിയിൽ രണ്ട് വീടുകൾ അപകടാവസ്ഥയിൽ

പനത്തടി: കാഞ്ഞങ്ങാട് പാണത്തൂർ സംസ്ഥാന പാതയുടെ വികസനത്തിനുവേണ്ടി അശാസ്ത്രീയമായ തരത്തിൽ മലയിടിച്ചതിനെ തുടർന്ന് ചെറുപനത്തടിയിൽ രണ്ട് വീടുകൾ അപകടാവസ്ഥയിൽ. ചെറുപനത്തടിയിലെ റഹീമിന്‍റെയും സഹോദരിയുടെയും വീടുകളാണ് അപകടാവസ്ഥയിലായത്. എൻഡോസൾഫാൻ ദുരിതബാധിതയുൾപ്പെടെയുള്ള കുടുംബം രാവും പകലും ഭീതിയോടെയാണ് വീടുകൾക്കുള്ളിൽ കഴിച്ചുകൂട്ടുന്നത്. റോഡ് വികസനവുമായി ബന്ധപ്പെട്ട് ഈ വീടുകളുടെ വളരെ അടുത്തുവരെ മലയിടിച്ചിട്ടുണ്ട്. മഴ കനത്തതോടെ കുതിർന്നു നിൽക്കുന്ന ബാക്കിഭാഗം എപ്പോൾ വേണമെങ്കിലും വീടുകൾക്കൊപ്പം ഇടിഞ്ഞു നിലംപൊത്താമെന്ന നിലയിലാണ്. അനിയന്ത്രിതമായ മലയിടിക്കലിനെതിരെ നേരത്തേ വീട്ടുകാർ ജില്ലാ കളക്ടർക്കുൾപ്പെടെ പരാതി നല്കിയിരുന്നു. എന്നാൽ ബന്ധപ്പെട്ടവരുടെ ഭാഗത്തുനിന്ന് ഒരു പരിഹാരനടപടികളും ഇതുവരെ ഉണ്ടായിട്ടില്ലെന്ന് ഇവർ പറയുന്നു. ശക്തമായ മഴയിൽ വീടുകളുൾപ്പെടെ സംസ്ഥാന പാതയിലേക്ക് ഇടിഞ്ഞുവീണാൽ റോഡിലെ വാഹനങ്ങൾക്കും യാത്രക്കാർക്കുമടക്കം അത് അപകട ഭീഷണിയാകും. വീടുകൾക്ക് തൊട്ടുതാഴെയായി വൈദ്യുത ലൈനുകളും കടന്നുപോകുന്നുണ്ട്. കഴിഞ്ഞ ദിവസം പൊതുമരാമത്ത് മന്ത്രിയുടെ ഓഫീസുമായി ബന്ധപ്പെട്ടതിനെ തുടർന്ന് കെആർഎഫ്ബി എക്സി. എൻജിനീയർ കെ.വി. വിനോദ് കുമാർ, അസി.എ ൻജിനീയർ രവീന്ദ്രൻ എന്നിവർ സ്ഥലം സന്ദർശിച്ചിരുന്നു. മണ്ണിടിഞ്ഞു വീഴാതിരിക്കാനുള്ള അടിയന്തിര നടപടിയെന്ന നിലയിൽ ഈ ഭാഗത്ത് കരിങ്കല്ല് അടുക്കിവയ്ക്കാൻ കരാർ കമ്പനിക്ക് നിർദേശം നല്കി. മഴ മാറുന്ന മുറയ്ക്ക് ഇവിടെ സംരക്ഷണഭിത്തി നിർമിച്ചു നല്കാമെന്നും അവർ പറഞ്ഞു. പക്ഷേ ഈ വാഗ്ദാനം എത്രകണ്ട് നിറവേറുമെന്ന കാര്യത്തിൽ വീട്ടുകാർക്ക് സംശയമുണ്ട്. പഞ്ചായത്ത് അംഗം കെ.കെ. വേണുഗോപാൽ, മലനാട് വികസന സമിതി ജനറൽ സെക്രട്ടറി ബി. അനിൽ കുമാർ, മോണിറ്ററിംഗ് കമ്മിറ്റി കൺവീനർ അരുൺ ബാലകൃഷ്ണൻ എന്നിവർ വീട്ടുടമയുടെ സഹോദരൻ ഷെരീഫിനൊപ്പം സ്ഥലത്തെത്തി ഉദ്യോഗസ്ഥരുമായി ചർച്ച നടത്തി.

വീട്ടമ്മ പുഴയിലെ ഒഴുക്കില്‍പ്പെട്ട് മരിച്ചു

ബോവിക്കാനം: പുഴയില്‍ തുണി അലക്കാന്‍ പോയ വീട്ടമ്മ ഒഴുക്കില്‍പ്പെട്ട് മരിച്ചു. മുളിയാര്‍ മല്ലം ദുര്‍ഗാപരമേശ്വരി ക്ഷേത്രത്തിനു സമീപത്തെ പരേതനായ നാണു മണിയാണിയുടെ ഭാര്യ ഗോപി (75) ആണ് മരിച്ചത്. ഇന്നലെ രാവിലെ പത്തോടെ വീടിന് 20 മീറ്റര്‍ മാത്രം അകലെയുള്ള പുഴയില്‍ തുണി അലക്കാന്‍ പോയതായിരുന്നു. ഏറെ നേരം കഴിഞ്ഞിട്ടും തിരിച്ചെത്താത്തതിനെ തുടര്‍ന്ന് നാട്ടുകാര്‍ തെരച്ചില്‍ ആരംഭിച്ചു. ഉച്ചയോടെയാണ് നാലു കിലോമീറ്റര്‍ അകലെ കല്ലുകണ്ടത്ത് മൃതദേഹം കണ്ടെത്തിയത്. മക്കള്‍: ബാലകൃഷ്ണന്‍, രാജീവി, കുസുമ, മാലിങ്കന്‍, മധു, സുധനന്‍, പരേതയായ കലാവതി. മരുമക്കള്‍: ചന്ദ്രാവതി, ബാലകൃഷ്ണന്‍, ദിവ്യ, രേഖ, അനില, ഉമേശന്‍, പരേതനായ കൊഗ്ഗു മണിയാണി.

സാമ്പത്തിക ക്രമക്കേട്: മുന്‍ കൃഷി അസി. ഡയറക്ടര്‍ക്ക് 37 വര്‍ഷം തടവ്

കാസര്‍ഗോഡ്: കാസര്‍ഗോഡ് പ്രിന്‍സിപ്പല്‍ കൃഷി ഓഫീസിലെ മുന്‍ അസി.ഡയറക്ടറെ അഞ്ചു കേസുകളില്‍ വിജിലന്‍സ് കോടതി 37 വര്‍ഷം വീതം കഠിനതടവിന് ശിക്ഷിച്ചു. എം.അബ്ദുള്‍ റഹ്‌മാനെയാണ് തലശേരി വിജിലന്‍സ് കോടതി എന്‍ക്വയറി കമ്മീഷണര്‍ ആന്‍ഡ് സ്‌പെഷല്‍ ജഡ്ജ് (വിജിലന്‍സ്) കെ.രാമകൃഷ്ണന്‍ ശിക്ഷിച്ചത്. കാസര്‍ഗോഡ് ജില്ലാ കാര്‍ഷിക ഉത്പന്ന സംഭരണ വിതരണ സൊസൈറ്റിയില്‍ നിന്ന് പണാപഹരണം നടത്തിയതിന് വിജിലന്‍സ് കുറ്റപത്രം സമര്‍പ്പിച്ച അഞ്ചു കേസുകളില്‍ തലശേരി വിജിലന്‍സ് കോടതി കുറ്റക്കാരനാണെന്ന് കണ്ടെത്തി ഓരോ കേസിനും വിവിധ വകുപ്പുകളിലായി ആകെ 37 വര്‍ഷം വീതം കഠിനതടവിനും മൂന്നുലക്ഷം രൂപ വീതം പിഴ ഒടുക്കുന്നതിനും ശിക്ഷിക്കുകയായിരുന്നു. ശിക്ഷ ഒരുമിച്ച് അനുഭവിച്ചാല്‍ മതി. ജില്ലയില്‍ കര്‍ഷകരില്‍ നിന്നും നേരിട്ട് കാര്‍ഷിക ഉത്പന്നങ്ങള്‍ ശേഖരിച്ച് വില്‍പന നടത്തുന്നതിനായി പ്രിന്‍സിപ്പല്‍ കൃഷി ഓഫീസിലെ മാര്‍ക്കറ്റിംഗ് വിഭാഗം അസി.ഡയറക്ടര്‍ സെക്രട്ടറിയും കര്‍ഷക പ്രതിനിധികള്‍ പ്രസിഡന്‍റും ട്രഷററുമായി ഒരു കാര്‍ഷിക ഉത്പന്ന സംഭരണ വിതരണ സൊസൈറ്റി രൂപീകരിച്ചിരുന്നു. 2004-2008 കാലയളവില്‍ ഈ സൊസൈറ്റിയുടെ സെക്രട്ടറിയായി അബ്ദുള്‍ റഹ്‌മാന്‍ ചുമതല വഹിച്ചിരുന്നു. ഇക്കാലത്ത് ജോയിന്‍റ് അക്കൗണ്ടില്‍ നിന്നും സൊസൈറ്റി ചെയര്‍മാന്‍റെയും ട്രഷററുടെയും വ്യാജ ഒപ്പിട്ട് 9,41,888 രൂപ പിന്‍വലിച്ച് പണാപഹരണം നടത്തിയിരുന്നു. കാസര്‍ഗോഡ് വിജിലന്‍സ് യൂണിറ്റാണ് കേസ് രജിസ്റ്റര്‍ ചെയ്ത് അന്വേഷണം പൂര്‍ത്തിയാക്കിയത്. വിജിലന്‍സിനു വേണ്ടി പബ്ലിക് പ്രോസിക്യൂട്ടര്‍ കെ.ഉഷാകുമാരി ഹാജരായി. പ്രതിയെ കണ്ണൂര്‍ സെന്‍ട്രല്‍ ജയിലിലടച്ചു.

കല്‍ക്കണ്ടലഹരി ! നടപടിക്ക് നിര്‍ദേശം

കാസര്‍ഗോഡ്: കല്‍ക്കണ്ടപ്പൊടി എംഡിഎംഎയെന്ന് വരുത്തി കള്ളക്കേസ് എടുത്ത സംഭവത്തില്‍ നടപടി സ്വീകരിക്കാന്‍ മുഖ്യമന്ത്രിയുടെ ഓഫീസിന്‍റെ നിര്‍ദേശം. ഈ സംഭവത്തിലൂടെ നിരപരാധികളായ യുവാക്കള്‍ക്ക് അഞ്ചുമാസം ജയിലില്‍ കഴിയേണ്ടി വന്ന സംഭവത്തില്‍ കുറ്റക്കാരായ പോലീസ് ഉദ്യോഗസ്ഥര്‍ക്ക് എതിരെ നടപടി സ്വീകരിക്കണമെന്ന പരാതിയില്‍ ഉചിത നടപടി സ്വീകരിക്കാനാണ് സംസ്ഥാന പോലീസ് മേധാവിയോട് മുഖ്യമന്ത്രിയുടെ ഓഫീസ് നിര്‍ദേശിച്ചിരിക്കുന്നത്. ഹൈക്കോടതി അഭിഭാഷകനും പൊതുപ്രവര്‍ത്തകനുമായ അഡ്വ. കുളത്തൂര്‍ ജയ്സിംഗ് ന പരാതി നല്കിയത്. കണ്ണൂര്‍ വാരത്തെ നന്ദനം വീട്ടില്‍ മണികണ്ഠൻ, കാസര്‍ഗോഡ് മാലക്കല്ല് ഞരളേറ്റ് വീട്ടില്‍ ബിജു മാത്യു എന്നിവര്‍ക്ക് എതിരെ നടക്കാവ് പോലീസാണ് വ്യാജ ലഹരി കേസ് രജിസ്റ്റര്‍ ചെയ്ത് ഇരുയുവാക്കളെയും ജയിലില്‍ അടച്ചത്. യുവാക്കളുടെ കൈയിൽ നിന്ന് പിടികൂടിയത് കല്‍ക്കണ്ടപ്പൊടിയാണെന്ന് അറിയിച്ചിട്ടും എംഡിഎംഎ കൈവശം വച്ചുവെന്ന പേരില്‍ കള്ളക്കോസ് എടുത്തു. 15 ദിവസത്തിനകം കെമിക്കല്‍ അനാലിസിസ് റിപ്പോര്‍ട്ട് ഹാജരാക്കാന്‍ പോലീസ് നടപടിയും സ്വീകരിച്ചില്ല. 150 ദിവസം കഴിഞ്ഞ് കെമിക്കല്‍ അനാലിസിസ് റിപ്പോര്‍ട്ട് വന്നപ്പോഴാണ് എംഡിഎംഎ എന്ന് വരുത്തി അയച്ച പൊടികള്‍ കല്‍ക്കണ്ടപ്പൊടിയെന്ന വിവരം പുറത്തു വരുന്നത്. എന്നാല്‍ രജിസ്റ്റര്‍ ചെയ്തത് കള്ളക്കോസ് എന്ന് വെളിവായിട്ടും സംഭവത്തിന് കാരണക്കാരായ പോലീസ് ഉദ്യോഗസ്ഥര്‍ക്ക് എതിരെ യാതൊരു നടപടിയും സ്വീകരിച്ചിട്ടില്ലെന്നാണ് അഡ്വ. കുളത്തൂര്‍ ജയ്സിംഗിന്‍റെ പരാതിയില്‍ പറയുന്നു. നിരപരാധികളെ കള്ളക്കോസില്‍ കുടുക്കിയ സംഭവത്തില്‍ ഉത്തര മേഖല ഐജിയും സംസ്ഥാന പോലീസ് മേധാവി ഓഫീസിലെ ചില ഉന്നതരും മൗനം പാലിക്കുകയാണെന്നും പരാതിയില്‍ ആരോപിക്കുന്നു. പ്രതികള്‍ കുറ്റം സമ്മതിച്ചിരുന്നതായി പോലീസ് കോഴിക്കോട്: ഡാന്‍സാഫിന്‍റെ ഭാഗത്തുനിന്നോ പോലീസിന്‍റെ ഭാഗത്തുനിന്നോ വീഴ്ച സംഭവിച്ചിട്ടില്ലെന്നാണ് അധികൃതരുടെ വിശദീകരണം. ഡാന്‍സാഫ് സംഘം പിടികൂടിയ രണ്ടുപേരെയും 2024 നവംബര്‍ 26ന് പോലീസിന് കൈമാറുകയായിരുന്നു. മുന്‍പും ഇവര്‍ക്കെതിരേ പരാതിയുണ്ടായിരുന്നുവെന്നും പ്രതികള്‍ സ്‌റ്റേഷനില്‍ എത്തിയപ്പോള്‍ കുറ്റം സമ്മതിച്ചിരുന്നതായും നടക്കാവ് പോലീസ് പറയുന്നു.പരിശോധനാഫലം മാറിവരാന്‍ കാരണമെന്താണെന്ന് അറിയില്ല. ഇക്കാര്യത്തില്‍ സാധാരണ നടപടിക്രമങ്ങളാണ് പാലിച്ചതെന്നും പോലീസ് പറഞ്ഞു.

ദുരന്ത സാധ്യതാ മേഖലകളിൽ എൻഡിആർഎഫ് സംഘം പരിശോധനയ്ക്കെത്തി

ചെറുവത്തൂർ: മഴ കനത്തതോടെ അപകടസാധ്യതയുള്ള മേഖലകളിൽ എൻഡിആർഎഫ് സംഘം സന്ദർശനം നടത്തി. ദേശീയപാതയിലെ ചെറുവത്തൂർ വീരമലകുന്ന്, മട്ടലായി കുന്ന് എന്നിവയുടെ താഴ്‌വാരവും മയിച്ചയിലും എൻഡിആർഎഫ് സംഘം സന്ദർശനം നടത്തിയത്. ചെന്നൈ ആർക്കോണം നാലാം യൂണിറ്റിലെ ടീം കമാൻഡർ അർജുൻപാൽ രജപുത്, എസ്ഐ വികാസ് യാദവ് എന്നിവരുടെ നേതൃത്വത്തിലുള്ള 26 അംഗ സംഘമാണ് പരിശോധന നടത്തിയത്. കാസർഗോഡ് സോയൽ സർവേ അസിസ്റ്റന്‍റ് ഡയറക്ടർ പി.വി. പ്രമോദ്, ജിയോളജിസ്റ്റ് എസ്. സൂരജ്, ചന്തേര പോലീസ് ഇൻസ്പെക്ടർ കെ. പ്രശാന്ത്, ഹോസ്ദുർഗ് തഹസിൽദാർ ടി. ജയപ്രസാദ്, പി.വി. തുളസിരാജ് എന്നിവരും കൂടെയുണ്ടായിരുന്നു. ചെറുവത്തൂർ പഞ്ചായത്ത് പരിധിയിലെ സന്ദർശനത്തിൽ പ്രസിഡന്‍റ് സി.വി. പ്രമീള, സെക്രട്ടറി പി. വനജ എന്നിവരും സംഘത്തോടൊപ്പം രണ്ട് സ്ഥലങ്ങളിലുമെത്തിയിരുന്നു.നീലേശ്വരം നഗരസഭയിലെ ചാത്തമത്ത് പൊടോത്തുരുത്തി, പാലായി എന്നിവിടങ്ങളിലും എൻഡിആർഎഫ് സംഘം സന്ദർശനം നടത്തി.

കർഷക സത്യഗ്രഹത്തിന് പിന്തുണയുമായി വ്യാപാരി വ്യവസായി ഏകോപന സമിതി

വെള്ളരിക്കുണ്ട്: വെള്ളരിക്കുണ്ടിൽ തുടങ്ങുന്ന കർഷകസ്വരാജ് സത്യഗ്രഹത്തിന് വ്യാപാരി സമൂഹം പൂർണ പിന്തുണ നല്കുമെന്ന് വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റും സംസ്ഥാന വൈസ് പ്രസിഡന്‍റുമായ കെ. അഹമ്മദ് ഷെരീഫ് പ്രഖ്യാപിച്ചു. കർഷകസ്വരാജ് സത്യഗ്രഹത്തിന് മുന്നോടിയായി വെള്ളരിക്കുണ്ടിൽ നടന്നുവരുന്ന 48 മണിക്കൂർ ഉപവാസത്തിന്‍റെ രണ്ടാം ദിവസത്തെ പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വന്യമൃഗശല്യം മൂലം കർഷകർ പ്രതിസന്ധിയിലായതിന്‍റെ പ്രതിഫലനം ചെറുകിട വ്യാപാര മേഖലയിലുണ്ടെന്നും വന്യമൃഗശല്യത്തിന് ശാശ്വതപരിഹാരം കാണാനുള്ള സമരത്തിൽ കർഷകരും ആദിവാസികളും ചെറുകിട വ്യാപാരികളും തൊഴിലാളികളും ഒറ്റക്കെട്ടായി അണിചേരേണ്ടതുണ്ടെന്നും അദ്ദേഹം പറഞ്ഞു. 48 മണിക്കൂർ സത്യഗ്രഹം നടത്തുന്ന ജിമ്മി ഇടപ്പാടി, ബേബി ചെമ്പരത്തി, പി.സി. രഘുനാഥൻ എന്നിവരെ അഹമ്മദ് ഷെരീഫ് ഹാരമണിയിച്ചു. ബ്ലോക്ക് പഞ്ചായത്ത് അംഗം ഷോബി ജോസഫ് അധ്യക്ഷത വഹിച്ചു. രാഷ്ട്രീയ കിസാൻ മഹാസംഘ് നേതാവ് കെ.വി. ബിജു, എം.ജെ. ലോറൻസ്, ശ്രീരാമൻ കൊയ്യോൻ, അഡ്വ. ജോൺ ജോസഫ്, പി.ജി. ദേവ്, ജോമോൻ ജോസഫ്, കെ.വി. അബ്ദുൾ ഖാദർ, കൂക്കൾ ബാലകൃഷ്ണൻ, കെ.ആർ. വിനു, ജോസ് മണിയങ്ങാട് എന്നിവർ പ്രസംഗിച്ചു. സത്യഗ്രഹത്തിന് ഐക്യദാർഢ്യവുമായി 24 മണിക്കൂർ ഉപവാസമാരംഭിച്ച രാഷ്ട്രീയ കിസാൻ മഹാസംഘ് നേതാവ് കെ.വി. ബിജുവിനെ ടി.എം. ബഷീർ ഹാരമണിയിച്ചു.

മാലക്കല്ല് സബ് ട്രഷറി കെട്ടിടത്തിന് ശിലയിട്ടു

മാലക്കല്ല്: മാലക്കല്ല് സബ് ട്രഷറി ശിലാസ്ഥാപനം സെന്‍റ് മേരീസ് എയുപി സ്‌കൂള്‍ അങ്കണത്തില്‍ ധനകാര്യമന്ത്രി കെ.എന്‍. ബാലഗോപാല്‍ നിര്‍വഹിച്ചു. ഇ. ചന്ദ്രശേഖരന്‍ എംഎല്‍എ അധ്യക്ഷത വഹിച്ചു. ബ്ലോക്ക് പ്രസിഡന്‍റ് എം. ലക്ഷ്മി, പഞ്ചായത്ത് പ്രസിഡന്‍റുമാരായ ടി.കെ. നാരായണന്‍, പ്രസന്ന പ്രസാദ്, മുരളി പയ്യങ്ങാനം, പി. ശ്രീജ, ജില്ലാ പഞ്ചായത്തംഗം ഷിനോജ് ചാക്കോ, ബ്ലോക്ക് പഞ്ചായത്തംഗം ജോസ് മാവേലി, വാര്‍ഡ് മെംബര്‍ മിനി ഫിലിപ്പ്, സെന്‍റ് മേരീസ് സ്‌കൂള്‍ മാനേജര്‍ ഫാ. ഡിനോ കുമ്മാനിക്കാട്ട്, പൂക്കയം എസ്റ്റേറ്റ് മാനേജര്‍ ജോമോന്‍ പ്രതിനിധി, ട്രഷറി സ്ഥലം വാങ്ങല്‍ കമ്മിറ്റി കണ്‍വീനര്‍ പി.ജെ. ജോണ്‍, പ്രസ് ഫോറം പ്രസിഡന്‍റ് ഗണേശന്‍ എന്നിവര്‍ പങ്കെടുത്തു. ട്രഷറി വകുപ്പ് ഡയറക്ടര്‍ വി. സാജന്‍ സ്വാഗതവും ജില്ലാ ട്രഷറി ഓഫീസര്‍ കെ. റീജ നന്ദിയും പറഞ്ഞു. കള്ളാര്‍, പനത്തടി, കോടോം-ബേളൂര്‍ പഞ്ചായത്തുകളും 120 ഡിഡിഒമാരും 450 പെന്‍ഷന്‍കാരും പൊതുജനങ്ങളും ആശ്രയിച്ചു വരുന്ന മാലക്കല്ല് സബ് ട്രഷറി പത്തുവര്‍ഷത്തിലേറെയായി കള്ളാര്‍ പൂക്കയം എസ്റ്റേറ്റിന്‍റെ വാടക കെട്ടിടത്തിലാണ് പ്രവര്‍ത്തിച്ചു വരുന്നത്. വര്‍ഷങ്ങള്‍ നീണ്ട ജനകീയ കമ്മിറ്റിയുടെ പരിശ്രമത്തിനൊടുവിലാണ് സബ് ട്രഷറിക്ക് സ്വന്തമായൊരു കെട്ടിടം എന്ന സ്വപ്നങ്ങളുടെ ആദ്യ പടിയെന്ന നിലയില്‍ പൂക്കയം എസ്റ്റേറ്റ് മാനേജ്‌മെന്‍റില്‍നിന്നും 10 സെന്‍റ് സ്ഥലം വാങ്ങുന്നത്. കേരള സര്‍ക്കാരിന്‍റെ ട്രഷറി അടിസ്ഥാന സൗകര്യ വികസന പദ്ധതിയില്‍ ഉള്‍പ്പെടുത്തി 1.38 കോടി രൂപ ചെലവ് കണക്കാക്കി ഒമ്പത് മാസത്തിനുള്ളില്‍ പൂര്‍ത്തീകരിക്കാന്‍ വകുപ്പ് ലക്ഷ്യമിടുന്ന പുതിയ കെട്ടിടത്തിന്‍റെ നിര്‍മാണച്ചുമതല എച്ച്എല്‍എല്‍ കമ്പനിക്കാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]