ADVERTISEMENT

ADVERTISEMENT

സെന്‍റ് മേരീസ് സ്കൂളിൽ എക്സ്പോ നടത്തി

ചിറ്റാരിക്കാൽ: സെന്‍റ് മേരീസ് ഇംഗ്ലീഷ് മീഡിയം സ്കൂളിൽ എക്സ്പോ 2024 സംഘടിപ്പിച്ചു. കുട്ടികൾ വിവിധ വിഷയങ്ങളിലെ ആശയങ്ങൾ ദൃശ്യവത്കരിച്ച് അവതരിപ്പിച്ചു.

ജില്ലയിലെ മികച്ച വില്ലേജ് ഓഫീസർ അവാർഡ് ജേതാവ് അനിൽ സി. ഫിലിപ്പ് ഉദ്ഘാടനം ചെയ്തു. പിടിഎ പ്രസിഡന്‍റ് ജോജി പുല്ലാഞ്ചേരി അധ്യക്ഷത വഹിച്ചു. മുഖ്യാധ്യാപിക സിസ്റ്റർ ജെസി ജോർജ്, സിസ്റ്റർ ജോളി ചാക്കോ, കോ-ഓർഡിനേറ്റർമാരായ സാബു ജോസഫ്, കെ.കെ. ബൈജു എന്നിവർ പ്രസംഗിച്ചു. തെരേസ സെസിൽ സ്വാഗതവും നിമിൽ മരിയ നന്ദിയും പറഞ്ഞു. ചടങ്ങിൽ അനിൽ സി. ഫിലിപ്പിനെ ആദരിച്ചു.

ADVERTISEMENT

ആരോഗ്യമേഖലയോടുള്ള സര്‍ക്കാര്‍ അനാസ്ഥയ്ക്കെതിരേ കോണ്‍ഗ്രസ് ധര്‍ണ നടത്തി

കാഞ്ഞങ്ങാട്: ആരോഗ്യമേഖലയോടുള്ള സര്‍ക്കാര്‍ അനാസ്ഥയ്ക്കെതിരെ കാഞ്ഞങ്ങാട്, ഉദുമ ബ്ലോക്ക് കോണ്‍ഗ്രസ് കമ്മിറ്റികള്‍ കാഞ്ഞങ്ങാട് ജില്ലാ ആശുപത്രിക്ക് മുന്നില്‍ സംഘടിപ്പിച്ച ധര്‍ണ ഡിസിസി പ്രസിഡന്‍റ് പി.കെ. ഫൈസല്‍ ഉദ്ഘാടനം ചെയ്തു. ഉമേശന്‍ വേളൂര്‍ അധ്യക്ഷത വഹിച്ചു. ഭക്തവത്സലന്‍, സാജിദ് മൗവ്വല്‍, വി.ആര്‍. വിദ്യാസാഗര്‍, പി.വി. സുരേഷ്, ഗീത കൃഷ്ണന്‍, ധന്യ സുരേഷ്, കെ.പി. ബാലകൃഷ്ണന്‍, മനോജ് തോമസ്, രവീന്ദ്രന്‍ കരിച്ചേരി, ഗോപാലന്‍ ഇരിയ, രാജന്‍ കെ. അരീക്കര, കെ.ആര്‍. കാര്‍ത്തികേയന്‍, ദിവാകരന്‍ കരിച്ചേരി എന്നിവര്‍ പ്രസംഗിച്ചു. രാജപുരം: പൂടംകല്ല് താലൂക്ക് ആശുപത്രിക്ക് മുന്നിൽ നടത്തിയ പ്രതിഷേധ ധർണ യുഡിഎഫ് ജില്ലാ കൺവീനർ എ. ഗോവിന്ദൻ നായർ ഉദ്ഘാടനം ചെയ്തു. മധുസൂദനൻ ബാലൂർ അധ്യക്ഷത വഹിച്ചു. മീനാക്ഷി ബാലകൃഷ്ണൻ, ബി.പി. പ്രദീപ്കുമാർ, ഹരീഷ് പി. നായർ, ടി.കെ. നാരായണൻ, എം.എം. സൈമൺ, വി. ബാലകൃഷ്ണൻ ബാലൂർ, എം.പി. ജോസഫ്, ബാലകൃഷ്ണൻ മാണിയൂർ, വിനോദ് കപ്പിത്താൻ, ബാബു കദളിമറ്റം, എം.യു. തോമസ്, ജോബി ജോസഫ്, പി.എ. ആലി, സി. കൃഷ്ണൻ നായർ, കെ. ഗോപി, നാരായണൻ ചുള്ളിക്കര, പ്രിയ ഷാജി, രാധാമണി, വി.കെ. ബാലകൃഷണൻ, ബാബു മാണിയൂർ എന്നിവർ പ്രസംഗിച്ചു. തൃക്കരിപ്പൂർ: തൃക്കരിപ്പൂർ ഗവ. താലൂക്ക് ആശുപത്രിയിലേക്ക് ബ്ലോക്ക് കോൺഗ്രസ് കമ്മിറ്റി നേതൃത്വത്തിൽ നടത്തിയ ധർണ കെപിസിസി സെക്രട്ടറി എം. അസിനാർ ഉദ്ഘാടനം ചെയ്തു. കെ.വി. വിജയൻ അധ്യക്ഷത വഹിച്ചു. കരിമ്പിൽ കൃഷ്ണൻ, കെ.വി. ഗംഗാധരൻ, കെ.പി. പ്രകാശൻ, പി.കുഞ്ഞിക്കണ്ണൻ, സി. രവി, കെ.വി. ജതീന്ദ്രൻ, കെ. സിന്ധു, കെ. ശ്രീധരൻ, കെ.പി. ദിനേശൻ, എം. രജീഷബാബു, കെ. അശോകൻ, കെ. ജയരാമൻ, ഇ. രാജേന്ദ്രൻ, കെ. കുഞ്ഞമ്പു, പി.കെ. താജുദ്ദീൻ, എം. അബ്ദുൾ സലാം എന്നിവർ പ്രസംഗിച്ചു.

സജി ചെറിയാൻ പറഞ്ഞത് യാഥാർഥ്യം: കെ. സുരേന്ദ്രൻ

തൃക്കരിപ്പൂർ: കേരളത്തിലെ സർക്കാർ മെഡിക്കൽ കോളജിൽ ചികിത്സ തേടി പോയാൽ ജീവൻ ബാക്കിയുണ്ടാവില്ലെന്നും അതു കൊണ്ടാണ് മന്ത്രിമാർ സ്വകാര്യ ആശുപത്രികളെ ആശ്രയിക്കുന്നതെന്നും മന്ത്രി സജി ചെറിയാൻ തന്നെ സാക്ഷ്യപ്പെടുത്തുമ്പോൾ ആതുരശുശ്രൂഷാരംഗത്തിന്‍റെ യഥാർഥ ചിത്രമാണ് പുറത്തു വരുന്നതെന്ന് മുൻ ബിജെപി സംസ്ഥാന പ്രസിഡന്‍റ് കെ. സുരേന്ദ്രൻ. ബിജെപി തൃക്കരിപ്പൂർ മണ്ഡലം കൺവൻഷൻ കെഎംകെ ഓഡിറ്റോറിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ടി.വി. ഷിബിൻ അധ്യക്ഷത വഹിച്ചു. ജില്ലാ പ്രസിഡന്‍റ് എം.എൽ. അശ്വിനി മുഖ്യപ്രഭാഷണം നടത്തി. എം. ഭാസ്കരൻ, എം. ബൽരാജ്, പി.ആർ. സുനിൽ, സാഗർ ചാത്തമത്ത്, ടി. കുഞ്ഞിരാമൻ, ഇ. അനുപ്രിയ, എം. ശ്യാമപ്രസാദ്, കെ. രമേശൻ, ഇ.എം. സോജു, കെ. പുരുഷോത്തമൻ എന്നിവർ പ്രസംഗിച്ചു.

പാമ്പുകളെ തുറന്നുവിടുന്ന കാര്യത്തില്‍ വനംവകുപ്പിന് ആശയക്കുഴപ്പം

കാസര്‍ഗോഡ്: വീടുകളിലും പരിസരത്തും പാമ്പിനെ കണ്ടാല്‍ ഒരൊറ്റ വിളിയില്‍ വനംവകുപ്പിന്‍റെ സര്‍പ്പ വോളണ്ടിയര്‍മാര്‍ വീട്ടിലെത്തി പാമ്പിനെ പിടികൂടും. ജില്ലയില്‍ അന്പതിലേറെ പേരാണ് പാമ്പുകളെ പിടിക്കാന്‍ വനംവകുപ്പിന്‍റെ ലൈസന്‍സ് എടുത്തിട്ടുള്ളത്. ഈ മഴക്കാലത്ത് മാത്രം ജില്ലയില്‍ നിന്ന് നൂറുകണക്കിന് പാമ്പുകളെയാണ് ഇവര്‍ പിടികൂടി റസ്‌ക്യൂ ചെയ്തത്. പക്ഷേ ഇങ്ങനെ പിടികൂടുന്ന പാമ്പുകളെ തുറന്നുവിടാന്‍ പലയിടത്തും അനുയോജ്യമായ സ്ഥലങ്ങളില്ലാത്തത് വലിയ പ്രതിസന്ധിയാണ്. പിടികൂടുന്ന പാമ്പുകളെ യോജിച്ച ആവാസവ്യവസ്ഥയില്‍ വനംവകുപ്പിന്‍റെ നിര്‍ദേശം. എന്നാല്‍ സംരക്ഷിത വനങ്ങളില്ലാത്ത പ്രദേശങ്ങളില്‍ ഈ പാമ്പുകളെ എവിടെ വിടുമെന്നാണ് ഉയരുന്ന പ്രധാന ചോദ്യം. ഈ ചോദ്യത്തിന് വനംവകുപ്പിന്‍റെ കൈയില്‍ മറുപടിയുമില്ല. ജനവാസമേഖലയോടു ചേര്‍ന്ന സ്ഥലങ്ങളില്‍ വിട്ടാല്‍ അവ വീടുകളിലേക്ക് വീണ്ടും എത്താന്‍ സാധ്യതയുണ്ട്. സര്‍പ്പ വോളന്‍റിയര്‍മാരുടേത് സൗജന്യസേവനമാണ്. യാത്രാചെലവ് പോലും സ്വന്തമായി വഹിച്ചാണ് അവര്‍ പാമ്പുകളെ പിടിക്കാൻ പോകുന്നത്. ഇവയെ തുറന്നുവിടാന്‍ വനപ്രദേശങ്ങള്‍ തേടി കിലോമീറ്ററുകള്‍ പോകുക എന്നത് ഇവര്‍ക്ക് ബുദ്ധിമുട്ടേറിയ കാര്യമാണ്. ഇവര്‍ പിടിക്കുന്ന പാമ്പുകളെ വനംവകുപ്പ് ഉദ്യോഗസ്ഥര്‍ കൊണ്ടുപോകാറുണ്ടെങ്കിലും പിടിക്കുന്നവരുടെയും പാമ്പുകളുടെയും എണ്ണം കൂടിയത് കാരണം പലപ്പോഴും കൃത്യസമത്ത് എത്താന്‍ സാധിക്കാറില്ല. അതുകൊണ്ട് ഒറ്റപ്പെട്ട് കിടക്കുന്ന സ്ഥലങ്ങള്‍ നോക്കി തുറന്നുവിടേണ്ടി വരുന്ന സാഹചര്യമുണ്ട്. രാജവെമ്പാല ഉള്‍പ്പെടെ അപകടകാരികളായ പാമ്പുകള്‍ പുതിയതായി പലയിടത്തും കാണാനുള്ള പ്രധാന കാരണം ഇതെന്നാണ് ആരോപണം. വനത്തോടു ചേര്‍ന്ന സ്ഥലങ്ങളില്‍ പാമ്പുകളുടെ ശല്യം വര്‍ധിക്കുന്നതായും നാട്ടുകാര്‍ ആരോപിക്കുന്നുണ്ട്. സര്‍പ്പ വോളണ്ടിയര്‍മാര്‍ പിടികൂടുന്ന പാമ്പുകളെ ഉള്‍വനത്തില്‍ തുറന്നുവിടാന്‍ വനംവകുപ്പ് പ്രത്യേക ശ്രദ്ധപതിപ്പിക്കണമെന്നാണ് ഇവരുടെ ആവശ്യം.

കോടോത്ത് സ്മാര്‍ട്ട് വില്ലേജ് ഓഫീസ് നാടിന് സമര്‍പ്പിച്ചു

കോടോം: സര്‍ക്കാരിന്‍റെ പ്ലാന്‍ ഫണ്ടില്‍ നിന്ന് 50 ലക്ഷം രൂപ ചെലവഴിച്ച് നിര്‍മിച്ച കോടോത്ത് സ്മാര്‍ട്ട് വില്ലേജ് ഓഫീസ് റവന്യു മന്ത്രി കെ. രാജന്‍ ഓണ്‍ലൈനായി ഉദ്ഘാടനം ചെയ്തു. ഇ. ചന്ദ്രശേഖരന്‍ എംഎല്‍എ അധ്യക്ഷത വഹിച്ചു. നിര്‍മിതികേന്ദ്രം ജനറല്‍ മാനേജര്‍ ഇ.പി. രാജ്‌മോഹന്‍ റിപ്പോര്‍ട്ട് അവതരിപ്പിച്ചു. ഡപ്യൂട്ടി കളക്ടര്‍ ലിപു എസ്. ലോറന്‍സ്, വെള്ളരിക്കുണ്ട് താലൂക്ക് തഹസില്‍ദാര്‍ പി.വി. മുരളി, ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി, പഞ്ചായത്ത് പ്രസിഡന്‍റ് പി. ശ്രീജ, ജില്ലാ പഞ്ചായത്തംഗം ഷിനോജ് ചാക്കോ, ബ്ലോക്ക് പഞ്ചായത്തംഗം പി.വി. ശ്രീലത, പഞ്ചായത്ത് വൈസ് പ്രസിഡന്‍റ് പി. ദാമോദരന്‍, പഞ്ചായത്തംഗങ്ങളായ പി. കുഞ്ഞികൃഷ്ണന്‍, സൂരയ ഗേപാലന്‍, ആന്‍സി ജോസഫ്, രാഷ്‌ട്രീയ പാര്‍ട്ടി പ്രതിനിധികളായ പി. ഗോവിന്ദന്‍, ടി.കെ. രാമചന്ദ്രന്‍, എ. രാമചന്ദ്രന്‍, പി. സാജു ജോസഫ്, രാധാകൃഷ്ണന്‍, എ.യു. മത്തായി എന്നിവര്‍ പ്രസംഗിച്ചു.

ദേശീയപാതയ്ക്ക് ബസ് കാത്തിരിപ്പുകേന്ദ്രങ്ങളോട് അകൽച്ച; മഴ നനഞ്ഞുകുതിർന്ന് യാത്രക്കാർ

കാസർഗോഡ്: തലപ്പാടി-ചെങ്കള റീച്ചിൽ പുതിയ ദേശീയപാതയുടെ നിർമാണം അവസാനഘട്ടത്തിലെത്തിയിട്ടും ബസ് കാത്തിരിപ്പു കേന്ദ്രങ്ങളുടെ നിർമാണം എങ്ങുമെത്തിയില്ല. മംഗളൂരുവിലേക്ക് ചികിത്സയ്ക്ക് പോകുന്ന രോഗികളും വിദ്യാർഥികളുമടക്കമുള്ള യാത്രക്കാർ പെരുമഴയത്തും സർവീസ് റോഡുകളുടെ ഓരത്ത് ബസ് കാത്തുനിൽക്കേണ്ട അവസ്ഥയിലാണ്. പലപ്പോഴും കെഎസ്ആർടിസി അടക്കമുള്ള ദീർഘദൂര ബസുകൾ സ്റ്റോപ്പുകളിൽ നിർത്താതെ പ്രധാനപാതയിലൂടെ മാത്രം പോകുന്നത് യാത്രക്കാർക്ക് ഇരട്ടി ദുരിതമാകുന്നു. ദേശീയപാതയുടെ നിർമാണം തുടങ്ങിയ കാലം മുതൽ മഴയും വെയിലും പൊടിയുമെല്ലാം സഹിച്ച് പാതയോരത്ത് ബസ് കാത്തുനിൽക്കാനാണ് യാത്രക്കാരുടെ വിധി. അതിന് ഇനിയും കാര്യമായ മാറ്റമുണ്ടായിട്ടില്ല. പാതയോരത്തെ പഴയ കെട്ടിടങ്ങളെല്ലാം പൊളിച്ചുമാറ്റിയതോടെ മഴ വന്നാൽ കയറിനിൽക്കാൻ പോലും ഇടമില്ല. തലപ്പാടി-ചെങ്കള റീച്ചിൽ ആകെ 77 ബസ് കാത്തിരിപ്പുകേന്ദ്രങ്ങൾ നിർമിക്കാനാണ് ധാരണയായിട്ടുള്ളത്. ഇതിൽ ഏറിയ പങ്കും ഇനിയും നിർമാണം പോലും തുടങ്ങിയിട്ടില്ലാത്ത നിലയിലാണ്. നിർമാണത്തിലിരിക്കുന്ന ബസ് കാത്തിരിപ്പു കേന്ദ്രങ്ങൾക്കു തന്നെ നീളവും വീതിയും കുറവാണെന്ന പരാതി ഉയർന്നിട്ടുണ്ട്. അകത്ത് മഴ നനയാതിരിക്കാനുള്ള സൗകര്യവും പരിമിതമാണെന്ന് യാത്രക്കാർ ചൂണ്ടിക്കാട്ടുന്നു. മിക്കയിടങ്ങളിലും സർവീസ് റോഡുകൾക്കു തന്നെ ആവശ്യമായ വീതിയിൽ സ്ഥലം കിട്ടാത്ത സാഹചര്യത്തിൽ ബസ് കാത്തിരിപ്പുകേന്ദ്രങ്ങൾ നിർമിക്കാൻ സ്ഥലം തികയാത്ത അവസ്ഥയാണെന്നാണ് ദേശീയപാത അധികൃതർ പറയുന്നത്.

സിപിഐ ജില്ലാ സമ്മേളനം: ഒരുക്കങ്ങൾ പൂർത്തിയായി

വെള്ളരിക്കുണ്ട്: വെള്ളരിക്കുണ്ടിൽ 11, 12, 13 തീയതികളില്‍ നടക്കുന്ന സിപിഐ ജില്ലാ സമ്മേളനത്തിന് ഒരുക്കങ്ങള്‍ പൂര്‍ത്തിയായതായി സംഘാടക സമിതി ഭാരവാഹികള്‍ പത്രമ്മേളനത്തില്‍ അറിയിച്ചു. 11നു പതാക, കൊടിമര ജാഥകളും 12, 13 തീയതികളില്‍ പ്രതിനിധി സമ്മേളനവുമാണ് നടക്കുക. 11നു വൈകുന്നേരം നാലിന് സംഘാടകസമിതി ചെയര്‍മാന്‍ കെ.എസ്. കുര്യാക്കോസ് സമ്മേളന നഗരിയില്‍ പതാക ഉയര്‍ത്തും. പൊതുസമ്മേളനം ദേശീയ എക്സിക്യൂട്ടീവംഗം പി. സന്തോഷ് കുമാര്‍ എംപി ഉദ്ഘാടനം ചെയ്യും. 12, 13 തീയതികളില്‍ വെള്ളരിക്കുണ്ട് വീനസ് ഓഡിറ്റോറിയത്തിൽ നടക്കുന്ന പ്രതിനിധി സമ്മേളനം രാവിലെ 10നു ദേശീയ എക്സിക്യൂട്ടീവംഗം കെ. പ്രകാശ് ബാബു ഉദ്ഘാടനം ചെയ്യും. സിപിഐ സംസ്ഥാന അസി. സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ്, സംസ്ഥാന എക്സിക്യൂട്ടീവ് അംഗങ്ങളായ സി.പി. മുരളി, കെ.കെ. അഷ്റഫ്, പി. വസന്തം, ടി.വി. ബാലന്‍ എന്നിവര്‍ സംബന്ധിക്കും. പത്ര സമ്മേളനത്തില്‍ ജില്ലാ സെക്രട്ടറി സി.പി. ബാബു, കെ.എസ്. കുര്യാക്കോസ്, കണ്‍വീനര്‍ എം. കുമാരന്‍, ജില്ലാ എക്സിക്യൂട്ടീവംഗം ബങ്കളം കുഞ്ഞികൃഷ്ണന്‍, പബ്ലിസിറ്റി കമ്മിറ്റി കണ്‍വീനര്‍ സി.പി. സുരേശന്‍ എന്നിവര്‍ സംബന്ധിച്ചു.

സ്വകാര്യബസ് പണിമുടക്കില്‍ വലഞ്ഞ് ജനം

കാഞ്ഞങ്ങാട്: സ്വകാര്യബസുടമകള്‍ പ്രഖ്യാപിച്ച പണിമുടക്ക് പൂര്‍ണമായതോടെ യാത്രക്കാര്‍ പെരുവഴിയിലായി. ദേശീയപാതയിലും മലയോരമേഖലയിലുമാണ് യാത്രാക്ലേശം ഏറ്റവും രൂക്ഷമായത്. കെഎസ്ആര്‍ടിസി അധിക സര്‍വീസ് നടത്തുമെന്ന് പറഞ്ഞെങ്കിലും ദേശീയപാതയില്‍ ബസിനായി യാത്രക്കാര്‍ക്ക് മണിക്കൂറുകളോളം കാത്തുനില്‍ക്കേണ്ട സ്ഥിതിയായിരുന്നു. പെരിയ, പൊയിനാച്ചി, ചട്ടഞ്ചാല്‍, ചെര്‍ക്കള ഭാഗങ്ങളിലേക്ക് പോകേണ്ട യാത്രക്കാരാണ് ഏറെ വലഞ്ഞത്. ഏറെ യാത്രക്കാരുള്ള ബന്തടുക്ക, പടുപ്പ്, കുറ്റിക്കോല്‍ ഭാഗത്തേയ്ക്ക് കാഞ്ഞങ്ങാട് നിന്നും ബസ് സര്‍വീസ് പൂര്‍ണമായും നിലച്ചു. വിദ്യാര്‍ഥികളും ജോലിക്കാരും ഉള്‍പ്പെടെ നിരവധിപേര്‍ക്ക് ഇതോടെ യാത്ര ചെയ്യാനായില്ല. കെഎസ്ആര്‍ടിസി ബസുകള്‍ ഇല്ലാത്ത ഗ്രാമപ്രദേശങ്ങളില്‍ നിന്നുള്ള വിദ്യാര്‍ഥികള്‍ക്കും ജോലിക്കാര്‍ക്കും ഇന്നലെ കാഞ്ഞങ്ങാട്, കാസര്‍ഗോഡ് ഭാഗത്തേയ്ക്ക് എത്തിച്ചേരാന്‍ യാതൊരു നിര്‍വാഹവുമില്ലായിരുന്നു. മലയോരമേഖലയില്‍ പാണത്തൂര്‍ റൂട്ടില്‍ മാത്രമാണ് വലിയൊരു യാത്രാദുരിതം അനുഭവപ്പെടാതിരുന്നത്.

കുരുക്കഴിക്കാൻ കാഞ്ഞങ്ങാടിന് വേണം നീലേശ്വരം മാതൃകയിൽ ഒരു ടൗൺ സ്റ്റാൻഡ്

കാഞ്ഞങ്ങാട്: നഗരമധ്യത്തിലുള്ള പഴയ ബസ്‌സ്റ്റാൻഡ് കെട്ടിടം കാലപ്പഴക്കം മൂലം ഇനി അറ്റകുറ്റപ്പണികൾ നടത്താൻ കഴിയാത്ത നിലയിലായതോടെ പകരം സംവിധാനങ്ങളെക്കുറിച്ചുള്ള ചർച്ചകൾ സജീവമാകുന്നു. പഴയ ബസ്‌സ്റ്റാൻഡ് കെട്ടിടം പൊളിച്ചുമാറ്റി ആ സ്ഥാനത്ത് ആധുനിക സംവിധാനങ്ങളോടെയുള്ള പാർക്കിംഗ് പ്ലാസ നിർമിക്കണമെന്ന ആവശ്യം കഴിഞ്ഞ നഗരസഭാ ഭരണസമിതിയുടെ കാലത്ത് ഉയർന്നുകേട്ടിരുന്നു. ബസുകളെ പൂർണമായും ആലാമിപ്പള്ളിയിലെ പുതിയ ബസ്‌സ്റ്റാൻഡിലേക്ക് മാറ്റാമെന്നും പഴയ ബസ്‌സ്റ്റാൻഡ് നിൽക്കുന്ന സ്ഥലം നഗരത്തിലെ പാർക്കിംഗ് പ്രശ്നം പരിഹരിക്കുന്നതിനായി ഉപയോഗപ്പെടുത്താമെന്നുമായിരുന്നു ആശയം. എന്നാൽ, ഈ ആശയം ഇപ്പോൾ പരീക്ഷണാടിസ്ഥാനത്തിൽ നടപ്പാക്കിയപ്പോൾ തന്നെ പരാജയമെന്നു തെളിഞ്ഞിരിക്കുകയാണ്. യാർഡിന്‍റെ അറ്റകുറ്റപ്പണികളുടെ പേരിൽ പഴയ ബസ് സ്റ്റാൻഡ് അടച്ചിട്ടും ബസുകളെ പൂർണമായും ആലാമിപ്പള്ളിയിലേക്ക് മാറ്റാൻ കഴിഞ്ഞിട്ടില്ല. നഗരകേന്ദ്രത്തിൽ നിന്ന് മൂന്നുകിലോമീറ്ററോളം അകലെയുള്ള ആലാമിപ്പള്ളിയിൽ ബസിറങ്ങാനോ കയറാനോ യാത്രക്കാരെ കിട്ടാത്ത നിലയാണ്. പഴയ ബസ്‌സ്റ്റാൻഡിനു മുന്നിൽ നിരനിരയായി നിർത്തി യാത്രക്കാരെ ഇറക്കുകയും കയറ്റുകയും ചെയ്ത ശേഷം ബസുകൾ നാമമാത്രമായി മാത്രം ആലാമിപ്പള്ളി ബസ് സ്റ്റാൻഡിലേക്ക് പോകുകയാണ് ചെയ്യുന്നത്. ഇതോടെ നഗരമധ്യത്തിൽ ഗതാഗതക്കുരുക്കൊഴിയാത്ത നേരമില്ലാതായി. പഴയ ബസ്‌സ്റ്റാൻഡ് കെട്ടിടം പൊളിച്ചുമാറ്റുകയാണെങ്കിൽ പകരം അതേ സ്ഥാനത്ത് പുതിയ കെട്ടിടം നിർമിക്കാതെ നീലേശ്വരത്ത് ചെയ്ത മാതൃകയിൽ യാർഡിന്‍റെ മറുവശത്ത് നിർമിക്കുകയാണെങ്കിൽ നഗരമധ്യത്തിലെ സ്ഥലദൗർലഭ്യത്തിനും ഗതാഗതക്കുരുക്കിനും അത് വലിയൊരളവിൽ പരിഹാരമാകുമെന്ന് നാട്ടുകാർ ചൂണ്ടിക്കാട്ടുന്നു. കൂടുതൽ നീളത്തിലും വലിപ്പത്തിലുമുള്ള ഷോപ്പിംഗ് കോംപ്ലക്സ് നിർമിച്ചുകൊണ്ട് നഗരസഭയ്ക്ക് ഭാവിയിൽ മികച്ച വരുമാനം ഉറപ്പുവരുത്താൻ കഴിയും. നിലവിൽ ബസ്‌സ്റ്റാൻഡ് കെട്ടിടം നിൽക്കുന്ന സ്ഥലവും അതിന്‍റെ മുൻവശവുമെല്ലാം യാർഡിന്‍റെ ഭാഗമകുമ്പോൾ ഇപ്പോൾ റോഡിൽ നിരനിരയായി നിർത്തിയിടുന്ന ബസുകൾക്കും യാത്രക്കാർക്കം മികച്ച സ്ഥലസൗകര്യം ഉറപ്പുവരുത്താനും കഴിയും. ആലാമിപ്പള്ളിയിൽ പ്രധാന ബസ്‌സ്റ്റാൻഡ് ഉള്ളതുകൊണ്ട് ഇതിനെ താരതമ്യേന ചെറിയ ഒരു ടൗൺ സ്റ്റാൻഡായി ഉപയോഗപ്പെടുത്തിക്കൊണ്ട് നഗരമധ്യത്തിലെ കുരുക്കഴിക്കാനാകുമെന്നാണ് പ്രതീക്ഷ.

ഉമ്മൻ ചാണ്ടി പ്രതിഭ പുരസ്കാര വിതരണം

ഭീമനടി: എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങളിലും എ പ്ലസ് നേടിയ കുട്ടികൾക്ക് വെസ്റ്റ് എളേരി മണ്ഡലം യൂത്ത് കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി പ്രതിഭ പുരസ്കാരം വിതരണം ചെയ്തു. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ഡോ. സോയ ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോബിൻ പറമ്പ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ജോമോൻ ജോസ് മുഖ്യാതിഥിയായി. പഞ്ചായത്ത് അംഗങ്ങളായ കെ.കെ. തങ്കച്ചൻ, ഷെരീഫ് വാഴപ്പള്ളി, ടി.എ. ജെയിംസ്, നേതാക്കളായ എ.വി. ഭാസ്കരൻ, സി.എ. ബാബു, രാജേഷ് തമ്പാൻ, ജിപിൻ പയ്യന്നൂർ, പി.ടി. ജോസഫ്, ഷോബി തോമസ്, സന്ദീപ് കുടത്തുകാട്, ശ്രീനാഥ്, ചാക്കോ എന്നിവർ പ്രസംഗിച്ചു.

ജില്ലാതല വായന പക്ഷാചരണം സമാപിച്ചു

കാസർഗോഡ്: വായന മനുഷ്യമനസ്സുകളെ വിമലീകരിക്കുന്നുവെന്നും വായനയിലൂടെ ആര്‍ജിക്കുന്ന അനുഭവങ്ങളിലൂടെയാണ് മനുഷ്യന്‍ മറ്റ് ജീവികളില്‍ നിന്ന് വ്യത്യസ്തനാകുന്നതെന്നും എഴുത്തുകാരൻ എന്‍. സന്തോഷ് കുമാര്‍ പറഞ്ഞു. ജില്ലാ ഇന്‍ഫര്‍മേഷന്‍ ഓഫീസിന്‍റെ ആഭിമുഖ്യത്തിൽ പരവനടുക്കം ഗവ. മോഡല്‍ റസിഡന്‍ഷ്യല്‍ സ്‌കൂളില്‍ സംഘടിപ്പിച്ച വായന പക്ഷാചരണത്തിന്‍റെ ജില്ലാതല സമാപന പരിപാടിയില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. എഡിഎം പി. അഖില്‍ പരിപാടി ഉദ്ഘാടനം ചെയ്തു. എംആര്‍എസ് സീനിയര്‍ സൂപ്രണ്ട് കെ.എം. പ്രസന്ന അധ്യക്ഷത വഹിച്ചു. ജില്ലാ ഇന്‍ഫര്‍മേഷന്‍ ഓഫീസര്‍ എം. മധുസൂദനന്‍, അസിസ്റ്റന്‍റ് എഡിറ്റര്‍ എ.പി. ദില്‍ന, വി.എസ്. വിനു, എം. വിനോദ് കുമാര്‍, സുഹര്‍ഷ, ശിവാനി എന്നിവര്‍ പ്രസംഗിച്ചു.

സിപിഐ വിളംബര ജാഥ നടത്തി

വെള്ളരിക്കുണ്ട്: സിപിഐ 25-ാം പാർട്ടി കോൺഗ്രസിനു മുന്നോടിയായുള്ള ജില്ലാ സമ്മേളനം ഈ മാസം 11,12,13 തീയ്യതികളിൽ വെള്ളരിക്കുണ്ടിൽ നടക്കും. പതാക, കൊടിമര ജാഥകൾ 11 ന് നടക്കും. ജില്ലാ സമ്മേളനത്തിന് മുന്നോടിയായി വെള്ളരിക്കുണ്ടിൽ വിളംബര ജാഥ നടത്തി. പോടോര കുഞ്ഞിരാമൻ നായർ സ്മാരക മന്ദിരത്തിൽ നിന്നാരംഭിച്ച വിളംബര ജാഥ വെള്ളരിക്കുണ്ട് ടൗണിൽ സമാപിച്ചു. ജില്ലാ സെക്രട്ടറി സി.പി. ബാബു, കെ.എസ്. കുര്യാക്കോസ്, ബങ്കളം കുഞ്ഞികൃഷ്ണൻ, എം. കുമാരൻ, വി.കെ. ചന്ദ്രൻ, രത്നാകരൻ നമ്പ്യാർ, കെ. ഭാസ്കരൻ അടിയോടി, കെ. ഭൂപേഷ് ബാനം എന്നിവർ നേതൃത്വം നല്കി.

ബിജെപി മാർച്ചിനു നേരെ ജലപീരങ്കി പ്രയോഗം

കാസർഗോഡ്: ആരോഗ്യമന്ത്രി വീണാ ജോര്‍ജിന്‍റെ രാജി ആവശ്യപ്പെട്ട് ബിജെപി ജില്ലാ കമ്മിറ്റിയുടെ നേതൃത്വത്തില്‍ കാസര്‍ഗോഡ് ജനറല്‍ ആശുപത്രിയിലേക്ക് നടത്തിയ മാര്‍ച്ചിനു നേരെ പോലീസിന്‍റെ ജലപീരങ്കി പ്രയോഗം. എൽഐസി ഓഫീസിന് മുന്നില്‍ വെച്ച് മാര്‍ച്ച് പോലീസ് തടഞ്ഞു. ബിജെപി മുന്‍ സംസ്ഥാന സെക്രട്ടറി വി.കെ. സജീവന്‍ മാര്‍ച്ച് ഉദ്ഘാടനം ചെയ്തു. ജില്ലാ പ്രസിഡന്‍റ് എം.എല്‍. അശ്വിനി, ജനറല്‍ സെക്രട്ടറിമാരായ പി.ആര്‍. സുനില്‍, എന്‍. ബാബുരാജ്, മനുലാല്‍ മേലത്ത്, നേതാക്കളായ സവിത ടീച്ചര്‍, വി. രവീന്ദ്രൻ, സതീഷ് ചന്ദ്ര ഭണ്ഡാരി എന്നിവർ നേതൃത്വം നല്കി.

67,778 പേര്‍ക്ക് ജീവിതശൈലി രോഗ സാധ്യത

കാഞ്ഞങ്ങാട്: ആര്‍ദ്രം മിഷന്‍ ഒന്നാംഘട്ടം വാര്‍ഷിക ആരോഗ്യ പരിശോധനയുടെ ഭാഗമായി ജില്ലയില്‍ 30 വയസിനു മുകളില്‍ പ്രായുള്ള ആള്‍ക്കാരില്‍ നടത്തിയ ആരോഗ്യപരിശോധനയില്‍ 67,778 പേര്‍ക്ക് ജീവിതശൈലി രോഗ സാധ്യത കണ്ടെത്തി. 52,302 പേര്‍ക്ക് പരിശോധന പൂര്‍ത്തിയാക്കി. 16,646 പേര്‍ക്ക് രക്തസമ്മര്‍ദ്ദവും 1811 പേര്‍ക്ക് പ്രമേഹവും കണ്ടെത്തി. ഒന്നാം ഘട്ടത്തില്‍ 87 ശതമാനം സര്‍വേ പൂര്‍ത്തീകരിച്ചു. രണ്ടാംഘട്ടത്തില്‍ 185 917 പേര്‍ക്ക് ജീവിതശൈലിരോഗ സാധ്യത കണ്ടെത്തുകയും 32516 പേരുടെ പരിശോധന പൂര്‍ത്തിയാക്കുകയും ചെയ്തു. 7323 പേര്‍ക്ക് പുതുതായി രക്തസമ്മര്‍ദ്ദം 988 പേര്‍ക്ക് പുതുതായി പ്രമേഹവും കണ്ടെത്തി. ജീവിതശൈലി രോഗങ്ങള്‍ പ്രാരംഭ ഘട്ടത്തില്‍ തന്നെ കണ്ടെത്തി ചികിത്സ ഉറപ്പാക്കുന്നതിന് സംസ്ഥാന ആരോഗ്യവകുപ്പ് നടപ്പിലാക്കിവരുന്ന പദ്ധതിയാണ് പോപ്പുലേഷന്‍ ബേസ്ഡ് സ്‌ക്രീനിംഗ്, അഥവാ വാര്‍ഷിക ആരോഗ്യ പരിശോധന. പദ്ധതിയുടെ ഭാഗമായി 30 വയസിനു മുകളിലുള്ള എല്ലാ വ്യക്തികളിലും പരിശോധനനടത്തി ജീവിതശൈലി രോഗങ്ങളും അവയ്ക്ക് വഴിവയ്ക്കുന്ന കാരണങ്ങളും കണ്ടെത്തുന്നു. ഇതിനായി ആരോഗ്യ പ്രവര്‍ത്തകര്‍ പ്രവര്‍ത്തകര്‍ നേരിട്ടു വീടുകളില്‍ എത്തി വിവരശേഖരണം നടത്തും. ശേഖരിച്ച വിവരങ്ങള്‍ ഇ-ഹെല്‍ത്ത് പ്ലാറ്റ്‌ഫോമിലൂടെയാണ് രേഖപ്പെടുത്തുക. ഇതിനായി ശൈലി എന്ന പ്രത്യേക ആപ്പ് സംവധാനവും ഒരുക്കിയിട്ടുണ്ട്.

ലയൺസ് ക്ലബ് ഭാരവാഹികൾ സ്ഥാനമേറ്റു

ചിറ്റാരിക്കാൽ: ചിറ്റാരിക്കാൽ ലയൺസ് ക്ലബിന്‍റെ പുതിയ ഭാരവാഹികളുടെ സ്ഥാനാരോഹണം വെള്ളിയേപ്പള്ളിൽ ഓഡിറ്റോറിയത്തിൽ ലയൺസ് സെക്കൻഡ് വൈസ് ഡിസ്ട്രിക്ട് ഗവർണർ പി.എസ്. സൂരജ് ഉദ്ഘാടനം ചെയ്തു. പ്രസിഡന്‍റ് കെ.കെ. തോമസ് അധ്യക്ഷത വഹിച്ചു. പുതിയ പ്രസിഡന്‍റായി വി.വി. ബിനോയ്, സെക്രട്ടറിയായി സെബാസ്റ്റ്യൻ മാത്യു, ട്രഷററായി ടി.എസ്. സജീവ് എന്നിവർ സ്ഥാനമേറ്റു. മുൻ പ്രസിഡന്‍റുമാരെയും വിവിധ സേവനപ്രവർത്തനങ്ങൾ നടത്തിയ ക്ലബ് അംഗങ്ങളെയും ഉന്നത വിജയം നേടിയ വിദ്യാർഥികളെയും ആദരിച്ചു. റീജണൽ ചെയർമാൻ സി.ജെ. ജോസഫ്, ജിമ്മി തോമസ്, മഞ്ജു അഭിലാഷ്, എൻ.കെ. സാലു, ടി.എസ്. സജീവ്, സെബാസ്റ്റ്യൻ മാത്യു, കെ.സി. തോമസ്, വി.എസ്. കുര്യൻ എന്നിവർ പ്രസംഗിച്ചു.

കോൺഗ്രസ് കുടുംബ സംഗമം നടത്തി

വെള്ളരിക്കുണ്ട്: പഞ്ചായത്ത് തെരഞ്ഞെടുപ്പിന്‍റെ മുന്നൊരുക്കങ്ങളുടെ ഭാഗമായി ബളാൽ പഞ്ചായത്ത് പതിനാലാം വാർഡിൽ കോൺഗ്രസ് മഹാത്മാഗാന്ധി കുടുംബ സംഗമം സംഘടിപ്പിച്ചു. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ഡോ. സോയ ജോസഫ് ഉദ്ഘാടനം ചെയ്തു. വാർഡ് പ്രസിഡന്‍റ് ഷിജോ ജോർജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് രാജു കട്ടക്കയം മുഖ്യാതിഥിയായി. ഡിസിസി വൈസ് പ്രസിഡന്‍റ് പി.ജി. ദേവ്, ജനറൽ സെക്രട്ടറി ഹരീഷ് പി. നായർ, യൂത്ത്‌ കോൺഗ്രസ് സംസ്ഥാന ജനറൽ സെക്രട്ടറി ജോമോൻ ജോസ്, ബ്ലോക്ക്‌ പഞ്ചായത്ത് അംഗം ഷോബി ജോസഫ്, വാർഡ് മെംബർ കെ.ആർ. വിനു, ബ്ലോക്ക് കോൺഗ്രസ് പ്രസിഡന്‍റ് മധുസൂദനൻ ബാലൂർ, മണ്ഡലം പ്രസിഡന്‍റ് എം.പി. ജോസഫ്, മഹിളാ കോൺഗ്രസ് ജില്ലാ ജനറൽ സെക്രട്ടറി ബിൻസി ജെയിൻ, പി. രാഘവൻ, ജോസ് സെബാസ്റ്റ്യൻ, ജോസ് വടക്കേപറമ്പിൽ, ദിലീപ് മാത്യു എന്നിവർ പ്രസംഗിച്ചു.

കാണാമറയത്ത് ലഹരിയുടെ പുതുവഴികൾ തേടി വിദ്യാർഥികൾ

ചിറ്റാരിക്കാൽ: എൽപി ക്ലാസുകൾ മുതൽ കോളജ് തലം വരെയുള്ള വിദ്യാഭ്യാസസ്ഥാപനങ്ങളിൽ ലഹരിവിരുദ്ധ ബോധവത്കരണ പരിപാടികൾ മുറയ്ക്ക് നടക്കുമ്പോഴും ഒരു വിഭാഗം വിദ്യാർഥികളെങ്കിലും കാണാമറയത്ത് ലഹരിയുടെ പുതുവഴികൾ തേടുന്നത് ആശങ്കയാകുന്നു. ബംഗളൂരുവിലും മംഗലാപുരത്തും നിന്നെത്തുന്ന ആധുനിക ലഹരിമരുന്നുകൾ മലയോരമേഖലയിൽ പോലും സുലഭമാകുന്ന നിലയാണ്. ലഹരി ഉപഭോഗത്തിന്‍റെ കാര്യത്തിൽ മുതിർന്നവരുടെ ഇടയിൽ നടക്കുന്ന മാറ്റങ്ങളെല്ലാം അതേ രീതിയിൽ കുട്ടികളുടെ ഇടയിലുമെത്തുന്നു. പാൻപരാഗ്, ഹാൻസ് പോലുള്ള ലഹരിവസ്തുക്കൾ ഇപ്പോൾ പഴയതുപോലെ കാണാനില്ല. എന്നാൽ പല കടകളുടെയും പിന്നാമ്പുറങ്ങളിൽ വിശ്വസ്തരായ ഇടപാടുകാർക്ക് മാത്രം കാപ്സ്യൂളുകളുടെയും ലഹരി മിഠായികളുടെയും രൂപത്തിൽ ഇവ ലഭ്യമാണ്. ഈ ഇടപാടുകാരിൽ പലരും വിദ്യാർഥികൾ തന്നെയാണ്. മറ്റു കുട്ടികളിലേക്ക് ലഹരിവസ്തുക്കൾ എത്തുന്നത് ഈ ഇടനിലക്കാർ മുഖേനയാണ്. പാൻപരാഗ്, റോജ, ഹാൻസ്, ചൈന, തുളസി, മധു, കൂൾ തുടങ്ങിയ പേരുകളിൽ അറിയപ്പെടുന്ന ഈ ലഹരിവസ്തുക്കൾക്ക് പായ്ക്കറ്റിൽ എഴുതിയ വില അഞ്ചുരൂപ മുതൽ 10 രൂപ വരെയാണെങ്കിലും ഇടനിലക്കാർ ആവശ്യക്കാരിൽ നിന്ന് വാങ്ങുന്നത് 20 രൂപ വരെയാണ്. കുട്ടികളായതിനാൽ രഹസ്യമായി എന്തോ വലിയ കാര്യം ചെയ്യുകയാണെന്ന ത്രില്ലോടുകൂടി കൂടുതൽ പണം നല്കാൻ തയ്യാറാവുകയും ചെയ്യുന്നു. രക്ഷിതാക്കളുടെ കൈയിൽ നിന്ന് ആവശ്യത്തിലേറെ പണം കിട്ടുന്നതും ഇതിന് കാരണമാണ്. മൊബൈൽ ഫോണുകൾ സൂക്ഷിക്കാനേല്പിക്കുന്നതിന്‍റെ പേരിലും കുട്ടികൾ കടക്കാരുമായി ബന്ധം സ്ഥാപിക്കുന്നു. ഓൺലൈനിൽ ഓർഡർ ചെയ്യുന്ന ലഹരിവസ്തുക്കൾ വിദ്യാർഥികൾക്ക് പാഴ്സലായും കൊറിയറായും എത്തുന്ന സംഭവങ്ങളുമുണ്ട്. ബംഗളൂരുവിലും മംഗലാപുരത്തും ഉപരിപഠനത്തിനു പോകുന്ന ചിലരെങ്കിലും നാട്ടിലേക്കു വരുമ്പോൾ ലഹരിമരുന്നുകളുടെ കാരിയർമാരാകുന്ന സംഭവങ്ങളും മലയോരത്ത് ഉണ്ടായിട്ടുണ്ട്. ബംഗളൂരുവിൽ പഠിക്കുന്ന മലയോരത്തെ അറിയപ്പെടുന്ന കുടുംബങ്ങളിലെ രണ്ട് കുട്ടികൾ അടുത്തകാലം വരെ എല്ലാ ശനിയാഴ്ചകളിലും നാട്ടിലെത്തിയിരുന്നു. വീട്ടിൽ പറയാതെയുള്ള ഈ വരവിൽ സംശയം തോന്നിയ രക്ഷിതാക്കൾ ഒരുദിവസം ഇവരെ അറിയിക്കാതെ ശനിയാഴ്ച രാവിലെ ഇവർ ബസ്സിറങ്ങുന്നിടത്ത് പോയപ്പോൾ കണ്ടത് ഇതരസംസ്ഥാന തൊഴിലാളികളും വിദ്യാർഥികളുമടക്കം പത്തോളം പേർ ഇവരെ കാത്തുനിൽക്കുന്നതാണ്. വീട്ടിലറിയിക്കാതെയുള്ള യാത്രകൾ അതോടെ അവസാനിച്ചു. മലയോരത്തെ ഒരു ഹയർ സെക്കൻഡറി സ്കൂളിൽ ഒരു വിദ്യാർഥിനിയുടെ സ്വഭാവത്തിലുണ്ടായ മാറ്റം ശ്രദ്ധിച്ച് ബാഗ് പരിശോധിച്ച അധ്യാപിക കണ്ടത് സിഗരറ്റ് പായ്ക്കറ്റുകളും ലഹരിവസ്തുക്കളുമാണ്. രക്ഷിതാക്കളെ വിവരമറിയിച്ചപ്പോൾ സ്കൂളിലെത്തിയ അച്ഛനോടും തട്ടിക്കയറുകയാണ് പെൺകുട്ടി ചെയ്തത്. പിന്നീട് ദിവസങ്ങളോളം നീണ്ട കൗൺസിലിംഗിനു ശേഷമാണ് പെൺകുട്ടിയെ സാധാരണ നിലയിലേക്ക് കൊണ്ടുവരാനായത്. ബൈക്കിൽ സഞ്ചരിച്ച് കൃത്യസമയങ്ങളിൽ വിദ്യാർഥികൾക്കും യുവാക്കൾക്കും ലഹരി വസ്തുക്കൾ എത്തിക്കുന്ന സംഘങ്ങളും മലയോരത്ത് സജീവമാണ്. മിക്കപ്പോഴും കണ്ണൂരിലും കാസർഗോട്ടും മംഗലാപുരത്തുമൊക്കെയാണ് ഇവരുടെ കണ്ണികൾ ചെന്നുചേരുന്നത്. പലപ്പോഴും വൈകുന്നേരങ്ങളിൽ സ്കൂൾ മൈതാനങ്ങൾക്കും മറ്റും സമീപത്താണ് ഇവർ തമ്പടിക്കുന്നത്. പുതുതലമുറയിൽ പുകവലി കുറഞ്ഞെങ്കിലും മദ്യപാനത്തിന് സാമൂഹിക അംഗീകാരം ലഭിച്ചെന്ന നിലയിലാണ് കുട്ടികളടക്കം പെരുമാറുന്നതെന്ന് ചൈൽഡ് ലൈൻ പ്രവർത്തകർ പറയുന്നു. 10 വയസുള്ള കുട്ടികൾ പോലും മദ്യപിച്ചിട്ടുള്ളതായി ഇവരോട് തുറന്നുപറഞ്ഞിട്ടുണ്ട്. ആൺകുട്ടികളും പെൺകുട്ടികളും ഇക്കാര്യത്തിൽ ഒപ്പത്തിനൊപ്പമാണ്. അടുത്തിടെ ഒരു പ്ലസ്ടു സ്കൂളിലെ അഞ്ച് കുട്ടികൾ ക്ലാസ് സമയം കഴിഞ്ഞിട്ടും വീട്ടിലെത്താതിരുന്നതിനെ തുടർന്ന് അന്വേഷിച്ചപ്പോൾസ്കൂൾ കെട്ടിടത്തിനു മുകളിൽ മദ്യപിച്ച് അവശരായി കിടക്കുന്നതാണ് കണ്ടത്. പലപ്പോഴും ഇത്തരം കാര്യങ്ങൾ പുറത്തുവന്നാൽ സ്കൂളുകൾക്ക് പേരുദോഷം വരുമെന്നു ഭയന്ന് സംഭവം മറച്ചുവയ്ക്കാനാണ് ബന്ധപ്പെട്ടവർ ശ്രമിക്കുന്നതെന്ന് അധ്യാപകർ തന്നെ പറയുന്നു. മലയോരത്തെ ഒരു സ്കൂളിൽ രൂപീകരിച്ച ലഹരിവിരുദ്ധ ജാഗ്രതാസമിതിയുടെ ചെയർമാന്‍റെ മകന്‍റെ കൈയിൽനിന്നുതന്നെ ലഹരിവസ്തുക്കൾ കണ്ടെടുത്തത് അടുത്തിടെയാണ്.

എണ്ണപ്പാറ കുടുംബാരോഗ്യ കേന്ദ്രത്തിലുമുണ്ട് തകർന്നുവീഴാൻ പാകത്തിലൊരു കെട്ടിടം

എണ്ണപ്പാറ: എണ്ണപ്പാറ കുടുംബാരോഗ്യകേന്ദ്രത്തിൽ തകർന്നുവീഴാറായ നിലയിൽ നിൽക്കുന്ന പഴയ കെട്ടിടം പൊളിച്ചുമാറ്റണമെന്ന ആവശ്യം ശക്തമാകുന്നു. ഏതാണ്ട് അമ്പതുവർഷം മുമ്പ് എണ്ണപ്പാറയിലെ പ്രാഥമികാരോഗ്യകേന്ദ്രം പ്രവർത്തനം തുടങ്ങിയത് ഈ കെട്ടിടത്തിലാണ്. 10 വർഷം മുമ്പാണ് പുതിയ കെട്ടിടം നിർമിച്ച് അതിലേക്ക് മാറിയത്. ഇതിനു ശേഷവും അങ്കണവാടിയായും കോവിഡ് പരിശോധനാകേന്ദ്രമായുമൊക്കെ ഈ കെട്ടിടം ഉപയോഗിച്ചിരുന്നു. എന്നാൽ ഇപ്പോൾ ഇത് കാലപ്പഴക്കം മൂലം തീർത്തും ദുർബലാവസ്ഥയിലായി. കെട്ടിടത്തിന്‍റെ മേൽക്കൂര തകർച്ചയിലായതോടെ ഓടുകൾ പലതും ഇഴകിവീണു. മഴവെള്ളം ചോർന്നൊഴുകി ചുവരുകളും ദുർബലാവസ്ഥയിലായി. ചുറ്റുപാടും കാടുകയറി ഇഴജന്തുക്കൾക്ക് താവളമാകാനും തുടങ്ങി. ഇത് പൊളിച്ചുമാറ്റിയാൽ ആശുപത്രിയുടെ വികസനപ്രവർത്തനങ്ങൾക്ക് കൂടുതൽ സ്ഥലസൗകര്യം ലഭിക്കും. അതേസമയം കുടുംബാരോഗ്യകേന്ദ്രത്തിനായി 1.8 കോടി രൂപ ചെലവിൽ നിർമിച്ച പുതിയ ഇരുനിലക്കെട്ടിടം ഉദ്ഘാടനം ചെയ്തിട്ട് ഒരുവർഷത്തിലേറെയായിട്ടും പൂർണമായും പ്രവർത്തനസജ്ജമാക്കാൻ കഴിഞ്ഞിട്ടില്ല.

പ്രീതിക്ക് വേണം, സുമനസുകളുടെ കൈത്താങ്ങ്

ഭീമനടി: മാങ്ങോടെ പ്രീതി രാമചന്ദ്രന്‍റെ (40) ചികിത്സയ്ക്കായി നാടൊരുമിക്കുന്നു. ഇരുവൃക്കകളും തകരാറിലായി ഒരു വർഷമായി ചികിത്സയിലാണ് പ്രീതി. ഭർത്താവ് രാമചന്ദ്രൻ വൃക്ക നൽകാൻ തയ്യാറാണ്. ഹാർട്ട് പേഷ്യന്‍റായ മകന്‍റെ ചികിത്സയ്ക്കായി കടക്കെണിയിലായപ്പോഴാണ് ഇരുട്ടടിയായി ഭാര്യയും രോഗത്തിലായത്. കൂലിപ്പണിയെടുത്ത് ജീവിക്കുന്ന രാമചന്ദ്രന് ചികിത്സാ ചെലവ് താങ്ങാനാവുന്നതിലും അപ്പുറമാണ്. ഈ സാഹചര്യത്തിൽ പ്രീതിയുടെ വൃക്കമാറ്റിവെയ്ക്കൽ ശസ്ത്രക്രിയക്ക് വിധേയമാക്കി പുതിയ ജീവിതത്തിലേക്ക് മടക്കിക്കൊണ്ടുവരാൻ പഞ്ചായത്ത് പ്രസിഡന്‍റ് ഗിരിജ മോഹനൻ രക്ഷാധികാരിയായും കെ. രമേശൻ ചെയർമാനായും സി.വി. ശശിധരൻ കൺവീനറായും ബിനോയ് കെ. ജോൺ ട്രഷററായും ചികിത്സാ സഹായ കമ്മറ്റി രൂപീകരിച്ചിട്ടുണ്ട്. കേരള ഗ്രാമീൺ ബാങ്ക് നർക്കിലക്കാട് ശാഖയിൽ അക്കൗണ്ട് ആരംഭിച്ചു. അക്കൗണ്ട് നമ്പർ -40406101 040184, IFSC KLGB0040406.

കാഞ്ഞങ്ങാട് സ്റ്റേഡിയം യാഥാര്‍ഥ്യമാക്കണം

കാഞ്ഞങ്ങാട്: കാഞ്ഞങ്ങാടിന് അനുവദിച്ച സ്റ്റേഡിയം യാഥാര്‍ഥ്യമാക്കാന്‍ നഗരസഭ സ്ഥലം കണ്ടെത്തണമെന്ന് വെറ്ററന്‍സ് അത്‌ലറ്റിക് ഫെഡറേഷന്‍ ജില്ലാകമ്മിറ്റി രൂപീകരണയോഗം ആവശ്യപ്പെട്ടു. മുന്‍ നഗരസഭ ചെയര്‍മാന്‍ വി.വി. രമേശന്‍ ഉദ്ഘാടനം ചെയ്തു. സംസ്ഥാന വൈസ് പ്രസിഡന്‍റ് ബാബു കോട്ടപ്പാറ അധ്യക്ഷതവഹിച്ചു. സംസ്ഥാന പ്രസിഡന്‍റ് വി. ഗിരീശന്‍ മുഖ്യാതിഥിയായി. എം.കെ. വിനോദ്കുമാര്‍, സി. മുഹമ്മദ്കുഞ്ഞി, ഇ.വി. ജയകൃഷ്ണന്‍, സുകുമാരന്‍ പെരിയച്ചൂര്‍, പ്രവീണ്‍ മാത്യു, ബി. മുകുന്ദപ്രഭു എന്നിവര്‍ സംസാരിച്ചു. ഭാരവാഹികള്‍: വി.വി. രമേശന്‍ (പ്രസിഡന്‍റ്), കെ.എം. നാസര്‍, സുകുമാരന്‍ പെരിയച്ചൂര്‍, ബാബു കുന്നത്ത്, ദീപ പേരൂര്‍ (വൈസ്പ്രസിഡന്‍റുമാര്‍), എം.കെ. വിനോദ് കുമാര്‍ (സെകട്ടറി), പ്രവീണ്‍ മാത്യു, പി.എം. അബുള്‍ നാസര്‍, പി. നാരായണന്‍, രാജീവന്‍ ഏഴാംമൈല്‍ (ജോയിന്‍റ് സെക്രട്ടറിമാര്‍), ഇ.വി. ജയകൃഷ്ണന്‍ (ട്രഷറര്‍).

ചുള്ളി ഫാമിന്‍റെ പച്ചക്കറി പന്തലിന് ആവശ്യക്കാരേറുന്നു

ബളാൽ: ചുള്ളി ഫാം ഉടമയും യുവ കർഷകനുമായ പി.സി. ബിനോയ് മട്ടുപ്പാവ് കൃഷിക്കും അടുക്കളത്തോട്ടങ്ങൾക്കും അനുയോജ്യമായ രീതിയിൽ രൂപകല്പന ചെയ്ത പച്ചക്കറി പന്തലിന് ആവശ്യക്കാരേറുന്നു. കൊണ്ടുനടക്കാവുന്നതും മടക്കാവുന്നതുമായ രീതിയിൽ തയ്യാറാക്കിയ പന്തലിന്‍റെ രൂപകല്പനയ്ക്ക് പേറ്റന്‍റും ലഭിച്ചിട്ടുണ്ട്. ചുള്ളി വെജിറ്റബിൾ ക്ലൈംബർ (ട്രെല്ലിസ് സിസ്റ്റം) എന്ന പേരിൽ ഓൺലൈനിലൂടെയും നേരിട്ടും ഇത് വിപണിയിലെത്തിച്ചിട്ടുണ്ട്. പരിമിതമായ സ്ഥലസൗകര്യമുള്ള ഇടങ്ങളിൽ പോലും മത്തങ്ങ, ബീൻസ്, വെള്ളരി, പയർ എന്നിവയടക്കം ഈ സംവിധാനമുപയോഗിച്ച് കൃഷിചെയ്യാം. ഇത് സ്ഥാപിക്കാൻ 27 ചതുരശ്ര അടി സ്ഥലം മാത്രമാണ് ആവശ്യമുള്ളത്. അതേസമയം 43 ചതുരശ്ര അടി സ്ഥലം കൃഷിക്കായി ലഭ്യമാക്കുകയും ചെയ്യുന്നു. സംസ്ഥാന കൃഷിവകുപ്പും കാർഷിക സർവകലാശാലയുമുൾപ്പെടെ ഈ സംവിധാനം വാങ്ങി ഉപയോഗിക്കുന്നുണ്ട്. അടുത്തിടെ ബംഗളൂരുവിൽ നടന്ന നാഷണൽ ഹോർട്ടിക്കൾച്ചർ ഫെയർ എക്സിബിഷനിലും ഇത് ശ്രദ്ധ നേടിയിരുന്നു.

ദേശീയപാത : സംയുക്ത പരിശോധന നടത്തണമെന്ന് നിർദേശം

കാസർഗോഡ്: ദേശീയപാത നിര്‍മാണവുമായി ബന്ധപ്പെട്ട് വിവിധ സ്ഥലങ്ങളിൽ ഉണ്ടായിട്ടുള്ള പ്രശ്‌നങ്ങൾ പരിഹരിക്കുന്നതിനായി ജനപ്രതിനിധികളും ദേശീയപാത അഥോറിറ്റി ഉദ്യോഗസ്ഥരും ചേര്‍ന്ന് ബന്ധപ്പെട്ട സ്ഥലങ്ങളിൽ സംയുക്ത പരിശോധന നടത്തണമെന്ന് ജില്ലാ വികസന സമിതി യോഗം നിര്‍ദേശിച്ചു. ചെങ്കള-നീലേശ്വരം റീച്ചിലുണ്ടായ പ്രശ്നങ്ങളുമായി ബന്ധപ്പെട്ട് കരാര്‍ കമ്പനിക്ക് കാരണം കാണിക്കൽ നോട്ടീസ് നല്‍കിയിട്ടുണ്ടെന്നും ദേശീയപാത അഥോറിറ്റി ആസ്ഥാനത്തുനിന്നുള്ള വിദഗ്ധ സമിതി ജൂണ്‍ 11, 12 തീയതികളിലായി ജില്ലയിലെ വിവിധ നിര്‍മാണ പ്രദേശങ്ങളിൽ പരിശോധന നടത്തിയിട്ടുണ്ടെന്നും പ്രോജക്ട് ഡയറക്ടര്‍ യോഗത്തിൽ അറിയിച്ചു. ഇതുവരെ സ്വീകരിച്ച നിർമാണരീതികള്‍ വിലയിരുത്തുന്നതിനും കൂടുതല്‍ മെച്ചപ്പെടുത്തുന്നതിനുമായി വിദഗ്ധ സമിതിയുടെ റിപ്പോര്‍ട്ട് കാത്തിരിക്കുകയാണെന്നും അദ്ദേഹം അറിയിച്ചു. തീരദേശ ഹൈവേയുടെ അലൈന്‍മെന്‍റ് ജില്ലയിൽ നിർദിഷ്ട തീരദേശ ഹൈവേയുടെ അലൈന്‍മെന്‍റ് പെട്ടെന്നുതന്നെ പൂര്‍ത്തീകരിച്ച് തുടര്‍നടപടികളിലേക്ക് നീങ്ങണമെന്ന് സി.എച്ച്. കുഞ്ഞമ്പു എംഎല്‍എ ജില്ലാ വികസനസമിതി യോഗത്തിൽ ആവശ്യപ്പെട്ടു. കാഞ്ഞങ്ങാട് നിയോജക മണ്ഡലത്തിൽ ആകെയുള്ള 14.92 കിലോമീറ്റർ ദൂരത്തിൽ 4.3 കിലോമീറ്റര്‍ ഒഴികെയുള്ള ഭാഗത്ത് കല്ലിടല്‍ പ്രവൃത്തി പൂര്‍ത്തിയാക്കിയിട്ടുണ്ട്. നഷ്ടപ്പെടുന്ന വീടുകളുടെ എണ്ണം പരമാവധി കുറയ്ക്കുന്ന വിധത്തില്‍ അലൈന്‍മെന്‍റ് മാറ്റി വരയ്ക്കാന്‍ കിഫ്ബി നിര്‍ദേശം നല്കിയിട്ടുണ്ടെന്നും കെആര്‍എഫ്ബി എക്സിക്യൂട്ടീവ് എൻജിനിയര്‍ അറിയിച്ചു. ഉദുമ, കാസര്‍ഗോഡ് നിയോജക മണ്ഡലങ്ങളിൽ 730 മീറ്റർ നീളത്തില്‍ കല്ലിടല്‍ പ്രവൃത്തി പൂര്‍ത്തിയാക്കിയിട്ടുണ്ടെന്നും തുടര്‍ന്നുള്ള ഭാഗങ്ങളില്‍ തീരദേശ ഹൈവേയുടെ നിര്‍മാണം ഒഴിവാക്കി അലൈന്‍മെന്‍റ് നിലവിലുള്ള കാസര്‍ഗോഡ്-കാഞ്ഞങ്ങാട് സംസ്ഥാന പാതയുമായി യോജിപ്പിക്കാൻ തീരുമാനമായിട്ടുണ്ടെന്നും അദ്ദേഹം അറിയിച്ചു. കളക്ടറേറ്റ് മിനി കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ എഡിഎം പി. അഖില്‍ അധ്യക്ഷത വഹിച്ചു. ഡോക്ടര്‍മാരുടെ ഒഴിവുകള്‍ നികത്തണം ജില്ലയിൽ സർക്കാർ ആരോഗ്യകേന്ദ്രങ്ങളിലെ ഡോക്ടര്‍മാരുടെയും ജീവനക്കാരുടേയും ഒഴിവുകള്‍ നികത്തണമെന്ന ആവശ്യം എന്‍. എ. നെല്ലിക്കുന്ന് എംഎല്‍എ വീണ്ടും ജില്ലാ വികസനസമിതി യോഗത്തിൽ ഉന്നയിച്ചു. ജില്ലയില്‍ അടുത്തിടെ 37 ഡോക്ടര്‍മാരെ പിഎസ് സി വഴി നിയമിച്ചെങ്കിലും 19 പേര്‍ മാത്രമാണ് ജോലിയില്‍ പ്രവേശിച്ചത്. ഇതില്‍ 16 പേരും ഉപരിപഠനത്തിനായി അവധിയില്‍ പോവുകയും ചെയ്തു. മൂന്ന് പേര്‍ മാത്രമേ യഥാർഥത്തിൽ ജോലിയില്‍ പ്രവേശിച്ചിട്ടുള്ളൂവെന്ന് അദ്ദേഹം ചൂണ്ടിക്കാട്ടി. ഈ ഒഴിവുകളെല്ലാം വീണ്ടും ആരോഗ്യവകുപ്പ് ഡയറക്ടര്‍ക്ക് റിപ്പോര്‍ട്ട് ചെയ്തിട്ടുണ്ടെന്ന് ജില്ലാ മെഡിക്കല്‍ ഓഫീസര്‍ അറിയിച്ചു. ഭൂമി കണ്ടെത്താൻ നടപടി ജില്ലയില്‍ ഡിജിറ്റല്‍ സര്‍വേ പുരോഗമിക്കുന്ന വില്ലേജുകളില്‍ ഭൂരഹിതരില്ലാത്ത കേരളം പദ്ധതിയില്‍ പട്ടയം ലഭിച്ചവരുടെ ഭൂമി കണ്ടെത്തുന്നതിനും അതിര്‍ത്തി നിര്‍ണയിക്കുന്നതിനുമുള്ള അപേക്ഷകള്‍ ലഭിക്കുകയാണെങ്കില്‍ സ്പെഷ്യല്‍ സര്‍വേ ടീമിനെ ഉള്‍പ്പെടുത്തി സര്‍വേ നടപടികള്‍ വേഗത്തില്‍ പൂര്‍ത്തിയാക്കാനുള്ള നടപടി സ്വീകരിക്കുമെന്ന് ഡെപ്യൂട്ടി കളക്ടര്‍ (എല്‍ആര്‍) അറിയിച്ചു. തങ്കയം ജംഗ്ഷനിൽ റോഡ് വീതി കൂട്ടണം തൃക്കരിപ്പൂര്‍ തങ്കയം ജംഗ്ഷനിലെ അപകട ഭീഷണി ഒഴിവാക്കാൻ വീതി കൂട്ടുന്നതിനുള്ള എസ്റ്റിമേറ്റ് തയ്യാറാക്കാനും പ്രവൃത്തി വേഗത്തില്‍ നടത്താൻ കെഎസ്ഇബി, പൊതുമരാമത്ത് വകുപ്പുകൾ സഹകരിച്ച് പ്രവർത്തിക്കണമെന്നും എം. രാജഗോപാലന്‍ എംഎല്‍എ പറഞ്ഞു. ദേശീയപാതയിലെ ബസുകള്‍ സര്‍വീസ് റോഡ് കൂടി ഉപയോഗിക്കണം ദേശീയപാതയില്‍ സര്‍വീസ് നടത്തുന്ന കെഎസ്ആര്‍ടിസിയടക്കം പല ബസുകളും ഇപ്പോൾ സര്‍വീസ് റോഡുകൾ ഉപയോഗിക്കാതെ പ്രധാന പാതയിലൂടെ മാത്രമാണ് ഓടുന്നതെന്നും സർവീസ് റോഡുകൾക്കു സമീപമുള്ള സ്റ്റോപ്പുകളിൽ ബസ് കാത്തുനിൽക്കുന്ന യാത്രക്കാർക്ക് ബസ് കയറാനാകാത്ത നിലയാണെന്നും എ.കെ.എം.അഷറഫ് എംഎല്‍എ ചൂണ്ടിക്കാട്ടി. ഇത്തരത്തില്‍ സര്‍വീസ് നടത്തരുതെന്ന് നിര്‍ദേശം നല്‍കിയിട്ടുണ്ടെന്നും സ്വകാര്യ സ്റ്റേജ് കാര്യേജ് വാഹനങ്ങള്‍ പ്രധാന പാതയിലൂടെ മാത്രമായി സര്‍വീസ് നടത്തുന്നത് ശ്രദ്ധയില്‍പ്പെട്ടാല്‍ പിഴ ഈടാക്കുന്നതുള്‍പ്പെടെയുള്ള നടപടികള്‍ സ്വീകരിക്കുമെന്നും ആര്‍ടിഒ അറിയിച്ചു.

യുവജന ശാക്തീകരണം കാലഘട്ടത്തിന്‍റേയും സഭയുടേയും അനിവാര്യത: റവ.ഡോ. ഫിലിപ്പ് കവിയിൽ

പനത്തടി: യുവജനങ്ങളാണ് സഭയുടെ കരുത്തെന്നും യുവജന ശാക്തീകരണം കാലഘട്ടത്തിന്‍റേയും സഭയുടെയും അനിവാര്യതയാണെന്നും കത്തോലിക്കാ കോൺഗ്രസ് ഗ്ലോബൽ ഡയറക്ടർ റവ.ഡോ. ഫിലിപ്പ് കവിയിൽ പറഞ്ഞു. കത്തോലിക്കാ കോണ്‍ഗ്രസ് പനത്തടി ഫൊറോനയുടെയും യൂത്ത് കൗണ്‍സിലിന്‍റെയും നേതൃത്വത്തിൽ സംഘടിപ്പിച്ച വിജയോത്സവം ഉദ്ഘാടനം ചെയ്യുകയായിരുന്നു അദ്ദേഹം. വരുന്ന തദ്ദേശ തിരഞ്ഞെടുപ്പിലും കത്തോലിക്കാ കോൺഗ്രസിന്‍റെ സജീവസാന്നിധ്യമുണ്ടാകണമെന്ന് അദ്ദേഹം പറഞ്ഞു. എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ കുട്ടികളെ ചടങ്ങിൽ അനുമോദിച്ചു. കത്തോലിക്ക കോൺഗ്രസ് പനത്തടി ഫൊറോന നിയുക്ത ഡയറക്ടര്‍ ഫാ. ജോസഫ് പന്തലാടിക്കലിന് സ്വീകരണം നല്കി. ഫൊറോന പ്രസിഡന്‍റ് ജോണി തോലംപുഴ അധ്യക്ഷനായി. ഫൊറോന വികാരി ഫാ.ജോസഫ് പൂവത്തോലില്‍, പാണത്തൂർ പള്ളി അസി.വികാരി ഫാ. അലക്‌സ് കൊച്ചുപറമ്പില്‍, എകെസിസി ഗ്ലോബൽ സെക്രട്ടറി പീയൂസ് പറേടം, രൂപതാ സെക്രട്ടറി രാജീവ് തോമസ്, യൂത്ത് കോ-ഓർഡിനേറ്റർമാരായ ആഖിൻ മരിയ, ലിജേഷ് ഫ്രാൻസിസ്, റോണി ആന്‍റണി, ജിൻസ് കൊല്ലംകുന്നേൽ, റീന വർഗീസ്, നിബിൻ കണിയാന്തറ, ജിതിൻ പൗലോസ്, യൂണിറ്റ് ഭാരവാഹികളായ സണ്ണി ഇലവുങ്കൽ, ജോസ് നാഗരോലിൽ എന്നിവർ പ്രസംഗിച്ചു.

ലഹരിവിരുദ്ധ സെമിനാറും ഒപ്പുമരവും

പടിമരുത്: സെന്‍റ് സെബാസ്റ്റ്യന്‍സ് പള്ളിയുടെ സുവർണ ജൂബിലി ആഘോഷത്തിന്‍റെ ഭാഗമായി നടത്തിയ ലഹരിവിരുദ്ധ സെമിനാര്‍ രാജപുരം ഇന്‍സ്‌പെക്ടര്‍ പി. രാജേഷ് ഉദ്ഘാടനം ചെയ്തു. ആഘോഷ കമ്മറ്റി ചെയര്‍മാന്‍ ഫാ. ജോണ്‍സണ്‍ വേങ്ങപറമ്പില്‍ അധ്യക്ഷതവഹിച്ചു. എസ്ഐ പ്രദീപ്കുമാര്‍ ക്ലാസെടുത്തു. ആഘോഷ കമ്മറ്റി കണ്‍വീനര്‍ വില്‍സണ്‍ തരണിയില്‍ സ്വാഗതവും സണ്‍ഡേസ്‌ക്കൂള്‍ ഹെഡ്മാസ്റ്റര്‍ ജോണി പാലനില്‍ക്കും തൊട്ടിയില്‍ നന്ദിയും പറഞ്ഞു. സെന്‍ വെളളുക്കുന്നേല്‍, സുനില്‍ വരിക്കപ്ലാക്കല്‍, പ്രിന്‍സ് പാമ്പയ്ക്കല്‍, വിനോദ് ചെത്തിക്കത്തോട്ടത്തില്‍, റെജി നാഗമറ്റം, സണ്ണി ഉണ്ണാണ്ടന്‍പറമ്പില്‍, അനൂപ് ചാത്തംകുഴയ്ക്കല്‍, രാജു മീമ്പളളി, ബേബി കണ്ടംങ്കരി, മാത്യു കൈതക്കോട്ടില്‍, സേവ്യര്‍ പാലനില്‍ക്കുംതൊട്ടിയില്‍ എന്നിവര്‍ നേതൃത്വം നല്‍കി. ജൂബിലി ആഘോഷത്തിന്‍റെ ഭാഗമായി കെസിവൈഎം യൂണിറ്റ് ലഹരിവിപത്തിനെതിരെ ഒപ്പുമരമൊരുക്കി. യൂണിറ്റ് പ്രസിഡന്‍റ് ജിനോള്‍ പൂവനില്‍ക്കുന്നതില്‍ ഉദ്ഘാടനം ചെയ്തു. സാന്‍ജോസ് വരിക്കപ്ലാക്കല്‍, നോയല്‍ പി. ജെയിന്‍, ആല്‍ബര്‍ട്ട് തീത്തയില്‍, ജോസഫ് ആച്ചിക്കല്‍, ക്രിസ്റ്റീന്‍ പുത്തന്‍പുരയില്‍, ആല്‍സണ്‍ ചെത്തിക്കത്തോട്ടത്തില്‍, അമല്‍ ആച്ചിക്കല്‍,ജോഷ്വ കൊളക്കാട്ടുകടിയില്‍, ജുവല്‍ പുന്നശേരി, സാല്‍വിന്‍ വരിക്കപ്ലാക്കല്‍, എഡ്വിൻ മരങ്ങാട്ട് എന്നിവര്‍ നേതൃത്വം നല്‍കി.

സ്ഥലം ലഭ്യമായാല്‍ നീലേശ്വരത്ത് ഡിപ്പോ സാധ്യത പരിശോധിക്കും:കെഎസ്ആര്‍ടിസി എംഡി

നീലേശ്വരം: സ്ഥലം ലഭ്യമായാല്‍ നീലേശ്വരത്ത് കെഎസ്ആര്‍ടിസി ഡിപ്പോയുടെ സാധ്യത പരിശോധിക്കുമെന്ന് കെഎസ് ആര്‍ടിസി എംഡി പ്രമോജ് ശങ്കര്‍. ജില്ലയിലെ മൂന്നാമത്തെ നഗരസഭയായ നീലേശ്വരത്ത് കെഎസ്ആര്‍ടിസി ഡിപ്പോ അനുവദിക്കാനാവശ്യമായ സാധ്യതാപരിശോധന നടത്തുമെന്നും അദ്ദേഹം അറിയിച്ചു. കെട്ടിടം ഉള്‍പ്പെടെയുള്ള സ്ഥലസൗകര്യം ലഭിച്ചാല്‍ ഡിപ്പോ അനുവദിക്കുന്നതിനുള്ള എല്ലാ സാധ്യതകളും പരിശോധിക്കും. വിനോദസഞ്ചാരമേഖലകളെ ഉള്‍പ്പെടുത്തി നീലേശ്വരം വഴി കൂടുതല്‍ കെഎസ്ആര്‍ടിസി സര്‍വീസുകള്‍ അനുവദിക്കുമെന്നും ഇദ്ദേഹം ഉറപ്പ് നല്‍കി. ഈ ആവശ്യങ്ങള്‍ ഉന്നയിച്ച് കേരള കോണ്‍ഗ്രസ്- ബി ജില്ലാ കമ്മിറ്റി നല്‍കിയ നിവേദനത്തിന് മറുപടിയായാണ് ഉറപ്പ് ലഭിച്ചത്. കാസര്‍കോട് ഡിപ്പോ സന്ദര്‍ശനത്തിനെത്തിയ എംഡിക്ക് ജില്ലാ ജനറല്‍ സെക്രട്ടറി സുരേഷ് പുതിയേടത്താണ് നിവേദനം നല്‍കിയത്. നീലേശ്വരത്ത് ഡിപ്പോ ആരംഭിച്ചാല്‍ ജില്ലയിലെ തെക്കന്‍ മേഖലയിലെ മലയോര, തീരദേശ മേഖലകള്‍ കേന്ദ്രീകരിച്ച് പുതിയ സര്‍വീസുകള്‍ തുടങ്ങാനാകുമെന്ന കാര്യം പരിശോധിക്കുമെന്നും അദ്ദേഹം പറഞ്ഞു. ജില്ലാ ആസ്ഥാനമായ കാസര്‍കോട്ടും കാഞ്ഞങ്ങാട്ടുമാണ് നിലവില്‍ കെഎസ്ആര്‍ടിസി ഡിപ്പോകള്‍ പ്രവര്‍ത്തിച്ചു വരുന്നത്. നീലേശ്വരത്തും സമീപങ്ങളിലും നിലവില്‍ കെഎസ്ആര്‍ടിസി സര്‍വീസുകള്‍ പരിമിതമാണെന്ന കാര്യം നിവേദനത്തില്‍ പറഞ്ഞിരുന്നു. ഡിപ്പോ യാഥാര്‍ഥ്യമായാല്‍ വെസ്റ്റ് എളേരി, ഈസ്റ്റ് എളേരി, ബളാല്‍, കയ്യൂര്‍ ചീമേനി, ചെറുപുഴ, കിനാനൂര്‍-കരിന്തളം, മടിക്കൈ പഞ്ചായത്തുകളിലെ യാത്രക്ലേശത്തിന് പരിഹാരമാകും.

സൗജന്യ യൂണിഫോം ലഭിക്കാതെ ജില്ലയില്‍ 32,000 വിദ്യാര്‍ഥികള്‍

കാസര്‍ഗോഡ്: ജില്ലയില്‍ സര്‍ക്കാര്‍ ഹൈസ്‌കൂളുകളില്‍ 32,000ത്തിലേറെ വിദ്യാര്‍ഥികള്‍ക്ക് സൗജന്യ യൂണിഫോം കിട്ടിയില്ല. കാഴ്ചശേഷിയില്ലാത്തവര്‍ ഉള്‍പ്പെടെ 3000 ഭിന്നശേഷി വിദ്യാര്‍ഥികളും ഇതില്‍ ഉള്‍പ്പെടും. ഒന്നു മുതല്‍ എട്ടുവരെ ക്ലാസുകളിലെ വിദ്യാര്‍ഥികള്‍ക്കാണ് രണ്ടു സെറ്റ് യൂണിഫോം കിട്ടാന്‍ അര്‍ഹതയുള്ളത്. സര്‍ക്കാര്‍ ഹൈസ്‌കൂളുകളില്‍ എപിഎല്‍ വിഭാഗം ആണ്‍കുട്ടികള്‍ ഒഴികെയുള്ള കുട്ടികള്‍ക്കാണ് യൂണിഫോം കിട്ടാനുള്ളത്. കേന്ദ്രസര്‍ക്കാര്‍ ഫണ്ടില്‍ നിന്നും സര്‍വ ശിക്ഷക് കേരളയുടെ സഹായത്തോടെയാണ് ഇവര്‍ക്ക് യൂണിഫോം അലവന്‍സ് നല്‍കേണ്ടത്. കഴിഞ്ഞ രണ്ടുവര്‍ഷമായി കേന്ദ്രസര്‍ക്കാര്‍ ഫണ്ട് കിട്ടാത്തതാണ് പദ്ധതി മുടങ്ങാന്‍ കാരണമെന്ന് അധികൃതര്‍ പറയുന്നു. എപിഎല്‍ വിഭാഗം കുട്ടികള്‍ക്ക് സംസ്ഥാന സര്‍ക്കാര്‍ ഫണ്ട് മുഖേന അലവന്‍സ് ലഭിച്ചുതുടങ്ങി. ഹൈസ‌ൂളുകള്‍ ഇല്ലാത്ത ഗവ. എല്‍പി, യുപി സ്‌കൂളുകളിലെയും എയ്ഡഡ് സ്‌കൂളിലെയും കുട്ടികള്‍ക്ക് സംസ്ഥാന സര്‍ക്കാര്‍ ഫണ്ടില്‍ നിന്നും അലവന്‍സ് നല്‍കാന്‍ തുടങ്ങി. 120ലേറെ ഗവ. ഹൈസ്‌കൂളുകളിലെ ഒന്നു മുതല്‍ എട്ടുവരെ ക്ലാസുകളിലെ മുഴുവന്‍ പെണ്‍കുട്ടികളും എപിഎല്‍ വിഭാഗം ഒഴികെയുള്ള മറ്റ് ആണ്‍കുട്ടികളുമാണ് യൂണിഫോം അലവന്‍സ് കാത്തുകഴിയുന്നത്. സംസ്ഥാനത്തൊട്ടാകെ ഇതുതന്നെയാണ് സ്ഥിതി. രണ്ടു സെറ്റ് യൂണിഫോം വാങ്ങാനുള്ള തുകയാണ് വിദ്യാര്‍ഥികളുടെ പേരില്‍ ബാങ്ക് അക്കൗണ്ടില്‍ കിട്ടിയിരുന്നത്. കഴിഞ്ഞവര്‍ഷം നിരവധി കുട്ടികള്‍ക്ക് ഈ തുക ലഭിച്ചില്ല. പിടിഎ യോഗങ്ങളില്‍ അടക്കം ഇതിനെതിരെ വലിയ പ്രതിഷേധമുണ്ടായിരുന്നു. സര്‍ക്കാരില്‍ നിന്നും തുക അനുവദിക്കുമെന്ന് പ്രതീക്ഷിച്ച് മുഖ്യാധ്യാപകര്‍ സ്വന്തം കീശയില്‍ നിന്നും പണം നല്‍കി വിദ്യാര്‍ഥികളെ സഹായിച്ചിരുന്നു. ഇതോടെ രക്ഷിതാക്കള്‍ക്ക് ഈ തുക മടക്കിക്കൊടുക്കേണ്ട സ്ഥിതിവന്നു. ഇതു തിരിച്ചുകൊടുക്കാന്‍ കഴിയാത്ത രക്ഷിതാക്കളുമുണ്ട്. ഈ വര്‍ഷവും അലവന്‍സ് അനുവദിച്ചില്ലെങ്കില്‍ രക്ഷിതാക്കളോട് എന്തു സമാധാനം പറയുമെന്ന് ചിന്തയിലാണ് മുഖ്യാധ്യാപകര്‍.

ഉമ്മൻ ചാണ്ടി പ്രതിഭാ പുരസ്കാര വിതരണം നടത്തി

ചിറ്റാരിക്കാൽ: എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങളിലും എ പ്ലസ് നേടിയ വിദ്യാർഥികൾക്ക് യൂത്ത് കോൺഗ്രസ് ഈസ്റ്റ് എളേരി മണ്ഡലം കമ്മിറ്റിയുടെ നേതൃത്വത്തിൽ ഉമ്മൻചാണ്ടി പ്രതിഭാ പുരസ്കാരം നല്കി. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ഡോ. സോയാ ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോമോൻ ജോസഫ് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ജോമോൻ ജോസ് മുഖ്യാതിഥിയായി. പഞ്ചായത്ത് പ്രസിഡന്‍റ് ജോസഫ് മുത്തോലി, കെപിസിസി അംഗം ശാന്തമ്മ ഫിലിപ്പ്, ഷോണി കലയത്താങ്കൽ, ജോർജുകുട്ടി കരിമഠം, ജോസ് കുത്തിയതോട്ടിൽ, മാത്യു സെബാസ്റ്റ്യൻ, തോമസ് മാത്യു, അഗസ്റ്റിൻ ജോസഫ്, ജോണിക്കുട്ടി ജോസ്, അലക്സ് കോണിക്കൽ, എബി പുറയാറ്റിൽ എന്നിവർ പ്രസംഗിച്ചു. അധ്യാപകനായ ടിജോ മാത്യു ആലക്കോട് കുട്ടികൾക്ക് കരിയർ ഗൈഡൻസ് ക്ലാസെടുത്തു.

സര്‍ക്കാര്‍ ആശുപത്രികള്‍ ഇല്ലായ്മയുടെ കേന്ദ്രങ്ങളായി മാറി: സോണി സെബാസ്റ്റ്യന്‍

കാസര്‍ഗോഡ്: സാമൂഹ്യമാധ്യമങ്ങളില്‍ യാഥാര്‍ഥ്യത്തിന്‍റെ തരിമ്പുപോലുമില്ലാത്ത റീലുകള്‍ പടച്ചുവിടുന്ന ആളുകളുടെ കേദാരമായി സംസ്ഥാനത്തെ ആരോഗ്യവകുപ്പ് മാറിയിരിക്കുകയാണെന്ന് കെപിസിസി ജനറല്‍ സെക്രട്ടറി സോണി സെബാസ്റ്റ്യന്‍‍. ജില്ലാ കോണ്‍ഗ്രസ് കമ്മിറ്റി നേതൃയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കോവിഡ്, നിപ്പ ഉള്‍പ്പടെയുള്ള സാംക്രമിക രോഗങ്ങള്‍ പടരുന്ന സാഹചര്യത്തില്‍ വിദഗ്ധ ചികിത്സക്കായി സര്‍ക്കാര്‍ ആശുപതികളില് രോഗികള്‍ എത്തിക്കൊണ്ടിരിക്കുമ്പോള്‍ ആവശ്യമുള്ള മെഡിക്കല്‍ ഉപകരണങ്ങളുടെയും അവശ്യ മരുന്നുകളുടെയും ഇല്ലായ്മയുടെ കേന്ദ്രമായി ആശുപത്രികള്‍ മാറിയിരിക്കുന്നു. ഉന്നതരായ ഡോക്ടര്‍മാര്‍ ഉള്‍പ്പടെ സര്‍ക്കാരിന്‍റെ ഈ തണുപ്പന്‍ സമീപനത്തിനെതിരെ പരസ്യമായി പ്രതികരിക്കാന്‍ തുടങ്ങിയിരിക്കുന്നുവെന്ന് അദ്ദേഹം പറഞ്ഞു. കേരളത്തിലെ ആരോഗ്യമേഖലയെ നിശ്ചലമാക്കിയ സംസ്ഥാനസര്‍ക്കാരിന്‍റെ നിരുത്തരവാദ നിലപാടിനെതിരെ രണ്ടാംഘട്ട സമരപരിപാടിയുടെ ഭാഗമായി നാളെ രാവിലെ 10നു കാഞ്ഞങ്ങാട് ജില്ലാ ആശുപത്രി, മഞ്ചേശ്വരം, കാസര്‍ഗോഡ്, വെള്ളരിക്കുണ്ട്, നീലേശ്വരം, തൃക്കരിപ്പൂര്‍ എന്നീ ആറു കേന്ദ്രങ്ങളിലെ സര്‍ക്കാര്‍ ആശുപത്രികള്‍ക്ക് മുന്നില്‍ നടക്കുന്ന പ്രതിഷേധ ധര്‍ണ വിജയിപ്പിക്കുവാനും യോഗം തീരുമാനിച്ചു. ഡിസിസി പ്രസിഡന്‍റ് പി.കെ. ഫൈസല്‍ അധ്യക്ഷതവഹിച്ചു. ഹക്കീം കുന്നില്‍, കെ. നീലകണ്ഠന്‍, മീനാക്ഷി ബാലകൃഷ്ണന്‍, പി.ജി. ദേവ്, സാജിദ് മവ്വല്‍, ഹരീഷ് പി. നായര്‍, സി.വി. ജയിംസ്, സോമശേഖര ഷേണി, രാജു കട്ടക്കയം, ജോയ് ജോസഫ്, എം. രാജീവന്‍ നമ്പ്യാര്‍, ഉനൈസ് ബേഡകം, എം.സി. പ്രഭാകരന്‍ എന്നിവര്‍ സംസാരിച്ചു.

ജില്ലാ മെഡിക്കൽ ഓഫീസിലേക്ക് നടത്തിയ യൂത്ത് കോൺഗ്രസ് മാർച്ചിൽ സംഘർഷം

കാഞ്ഞങ്ങാട്: കോട്ടയം മെഡിക്കൽ കോളജിലെ കെട്ടിടം തകർന്ന സംഭവത്തിൽ രക്ഷാപ്രവർത്തനം വൈകിപ്പിച്ച് യുവതിയുടെ മരണത്തിനിടയാക്കിയതിൽ പ്രതിഷേധിച്ചും സംസ്ഥാനത്തിന്‍റെ ആരോഗ്യമേഖലയെ വെന്‍റിലേറ്ററിലാക്കിയ മന്ത്രി വീണാ ജോർജ് രാജിവെക്കണമെന്നാശ്യപ്പെട്ടുകൊണ്ടും യൂത്ത് കോൺഗ്രസ്‌ ജില്ലാ കമ്മിറ്റിയുടെ നേതൃത്വത്തിൽ ജില്ലാ മെഡിക്കൽ ഓഫീസിലേക്ക് നടത്തിയ പ്രതിഷേധ മാർച്ചിൽ സംഘർഷം. കൂളിയങ്കാലിൽ നിന്ന് ആരംഭിച്ച മാർച്ച് ജില്ലാ ആശുപത്രി പരിസരത്ത് പോലീസ് തടഞ്ഞു. പോലീസ് ജലപീരങ്കി പ്രയോഗിച്ചിട്ടും പ്രവർത്തകർ പിരിഞ്ഞുപോവാതെ മുന്നോട്ടാഞ്ഞതോടെയാണ് സംഘർഷം കൈയാങ്കളിയിലെത്തിയത്. കെഎസ്‌യു തൃക്കരിപ്പൂർ നിയോജകമണ്ഡലം പ്രസിഡന്‍റ് എ.വി. വരുൺ രാജിന്‍റെ തലയ്ക്ക് പരിക്കേറ്റു. ഡിസിസി വൈസ് പ്രസിഡന്‍റ് കെ.കെ. രാജേന്ദ്രൻ മാർച്ച്‌ ഉദ്ഘാടനം ചെയ്തു. യൂത്ത് കോൺഗ്രസ്‌ ജില്ലാ പ്രസിഡന്‍റ് കെ.ആർ. കാർത്തികേയൻ അധ്യക്ഷത വഹിച്ചു. മണ്ഡലം കോൺഗ്രസ്‌ പ്രസിഡന്‍റ് കെ.പി. ബാലകൃഷ്ണൻ, സി.എം. ഉനൈസ്, രാജേഷ് തമ്പാൻ, മാർട്ടിൻ ജോർജ്, രതീഷ് കാട്ടുമാടം, ദീപു കല്യോട്ട്, അനൂപ് കല്യോട്ട്, ശിവപ്രസാദ് അറുവാത്ത്, രജിത രാജൻ, എം. കുഞ്ഞികൃഷ്ണൻ, ഷിബിൻ ഉപ്പിലിക്കൈ, വസന്തൻ പടുപ്പ്, രാജേഷ് പുല്ലൂർ എന്നിവർ പ്രസംഗിച്ചു.

ഷിറിയയിൽ ദേശീയപാതയും പാർശ്വഭിത്തിയും കയറിമറിഞ്ഞ് വിദ്യാർഥികൾ

ഷിറിയ: ഗവ. ഹയർ സെക്കൻഡറി സ്കൂളിനു മുന്നിൽ ദേശീയപാത മുറിച്ചുകടക്കാൻ മേൽപ്പാലമില്ലാത്തതിനാൽ ദേശീയപാതയും പാർശ്വഭിത്തിയും കയറിമറിഞ്ഞ് വിദ്യാർഥികളുടെ അപകടയാത്ര. അര കിലോമീറ്റർ അകലെ മുട്ടം എന്ന സ്ഥലത്താണ് ദേശീയപാതയ്ക്ക് കുറുകേ മേൽനടപ്പാലമുള്ളത്. മേൽപ്പാലം കടക്കുന്നതിനായി അത്രയും ദൂരത്തിലും തിരിച്ചും നടക്കാനുള്ള ബുദ്ധിമുട്ട് ഒഴിവാക്കാനാണ് വിദ്യാർഥികൾ അപകടകരമായ വിധത്തിൽ ദേശീയപാത മുറിച്ചുകടക്കുന്നത്. ഉദ്ഘാടനം കഴിഞ്ഞിട്ടില്ലെങ്കിലും ഇപ്പോൾതന്നെ അതിവേഗപാതയിലൂടെ നിരവധി വാഹനങ്ങൾ കടന്നുപോകുന്നുണ്ട്. സാധാരണഗതിയിൽ അതിവേഗപാതകളിൽ കാൽനടയാത്രക്കാർ പാത മുറിച്ചുകടക്കുന്ന സാഹചര്യമില്ലാത്തതിനാൽ അപകടങ്ങൾ സംഭവിക്കാനുള്ള സാധ്യതയേറെയാണ്. അതിന് വഴിവയ്ക്കാതെ ഇവിടെ കൂടി മേൽനടപ്പാലം അനുവദിക്കുന്നതിനുള്ള നടപടികൾ ഉണ്ടാകണമെന്നാണ് നാട്ടുകാരുടെ ആവശ്യം. ഷിറിയ സ്കൂളിന് മുന്നിൽ മേൽപ്പാലമോ അടിപ്പാതയോ അനുവദിച്ചു തരണമെന്നാവശ്യപ്പെട്ട് നാട്ടുകാർ നേരത്തേ പലതവണ ബന്ധപ്പെട്ടവർക്ക് നിവേദനങ്ങൾ നല്കിയിരുന്നതാണ്. എന്നാൽ അനുകൂല നടപടികളൊന്നും ഉണ്ടായില്ല. അടിപ്പാതയുടെ കാര്യത്തിൽ ഇനിയൊന്നും ചെയ്യാനാകാത്ത സാഹചര്യത്തിൽ മേൽനടപ്പാലമെങ്കിലു അനുവദിച്ചുതരണമെന്നാണ് ഇപ്പോൾ എല്ലാവരുടെയും ആവശ്യം.

കുമ്പള സാമൂഹികാരോഗ്യകേന്ദ്രവും ഫിറ്റ്നസില്ലാത്ത കെട്ടിടത്തിൽ

കുമ്പള: നിത്യേന നാനൂറോളം രോഗികളെത്തുന്ന കുമ്പള സാമൂഹികാരോഗ്യകേന്ദ്രം പ്രവർത്തിക്കുന്നത് ഫിറ്റ്നസില്ലാത്ത കെട്ടിടത്തിൽ. കാലപ്പഴക്കമേറിയ രണ്ട് ഓടുമേഞ്ഞ കെട്ടിടങ്ങ മാത്രമാണ് ഇവിടെയുള്ളത്. ഒരു കെട്ടിടം 1954 ൽ നിർമിച്ചതാണ്. ഇതിന്‍റെ മേൽക്കൂരയിലെ കഴുക്കോലുകളും പട്ടികകളുമെല്ലാം ദ്രവിച്ച നിലയിലാണ്. ഈ കെട്ടിടത്തിന്‍റെ നവീകരണത്തിന് അഞ്ചുകോടി രൂപ അനുവദിച്ചതായി ഒരുവർഷം മുമ്പ് സർക്കാരിന്‍റെ പ്രഖ്യാപനമുണ്ടായിരുന്നു. എന്നാൽ കാര്യമായ തുടർനടപടികളൊന്നും ഉണ്ടായിട്ടില്ല. ചില സാമൂഹ്യ സംഘടനകളുടെ നേതൃത്വത്തിൽ വിഷയം സർക്കാരിന്‍റെ താലൂക്ക് തല അദാലത്തിലെത്തിച്ചിരുന്നെങ്കിലും നവീകരണത്തിനായി പദ്ധതി തയ്യാറാക്കി സർക്കാരിലേക്ക് സമർപ്പിച്ചിട്ടുണ്ടെന്ന മറുപടിയാണ് ലഭിച്ചത്. മഴക്കാലത്ത് ചോർന്നൊലിക്കുന്ന മേൽക്കൂരയ്ക്ക് താഴെ ശ്വാസമടക്കിപ്പിടിച്ചുകൊണ്ടാണ് ഡോക്ടർമാരും രോഗികളും ആശുപത്രി ജീവനക്കാരും കഴിയുന്നത്.

കർഷകസഭയും ഞാറ്റുവേല ചന്തയും നടത്തി

പിലിക്കോട്: കൃഷിവകുപ്പിന്‍റെ ആഭിമുഖ്യത്തിൽ സംഘടിപ്പിച്ച നീലേശ്വരം ബ്ലോക്ക് തല കർഷകസഭയും ഞാറ്റുവേല ചന്തയും പടുവളം എസ്ജിഎസ്‌വൈ ഹാളിൽ ബ്ലോക്ക് പഞ്ചായത്ത് പ്രസിഡന്‍റ് മാധവൻ മണിയറ ഉദ്ഘാടനം ചെയ്തു. വൈസ് പ്രസിഡന്‍റ് പി.കെ. ലക്ഷ്മി അധ്യക്ഷത വഹിച്ചു. ബ്ലോക്ക് തലത്തിൽ മികച്ച ജൈവകർഷകനായി തെരഞ്ഞെടുക്കപ്പെട്ട രവീന്ദ്രൻ കൊടക്കാട്, സേവനമേഖലയിൽ മികച്ച കൃഷിക്കൂട്ടമായി തെരഞ്ഞെടുക്കപ്പെട്ട നീലേശ്വരം അഗ്രോ സർവീസ് സൊസൈറ്റി എന്നിവരെ ആദരിച്ചു. കൃഷിവകുപ്പ് ഡെപ്യൂട്ടി ഡയറക്ടർ ബിന്ദു മാത്യു, സോയിൽ സർവേ അസി. ഡയരക്ടർ പി.വി. പ്രമോദ്, പ്രധാൻമന്ത്രി ഫസൽ ബീമാ യോജന ജില്ലാ കോ-ഓർഡിനേറ്റർ യു. അജിത് കുമാർ എന്നിവർ വിവിധ പദ്ധതികളെക്കുറിച്ച് വിശദീകരിച്ചു. പിലിക്കോട് പഞ്ചായത്ത് പ്രസിഡന്‍റ് പി.പി. പ്രസന്നകുമാരി, ബ്ലോക്ക് പഞ്ചായത്ത് സ്ഥിരം സമിതി ചെയർമാൻ എം. സുമേഷ്, കൃഷി അസി.ഡയരക്ടർ കെ. ബിന്ദു, കൃഷി ഓഫീസർമാരായ ടി. അംബുജാക്ഷൻ, ആർ. പ്രീതി, അരവിന്ദൻ കൊട്ടാരത്തിൽ, എ. റജീന, എസ്. ഉമ, കൃഷ്ണ വേദിക, നിത്യ മോഹൻ എന്നിവർ പ്രസംഗിച്ചു. കേരള അഗ്രോ ബ്രാൻഡിന്‍റെ വിവിധ ഉല്ലന്നങ്ങളുടെയും നടീൽ വസ്തുക്കളുടെയും പ്രദർശനവും വില്പനയും നടന്നു. നാടൻ പച്ചക്കറി ഉല്പന്നങ്ങളും ഞാറ്റുവേല ചന്തയിൽ വില്പനയ് ക്കെത്തി.

പാറക്കടവിലെ കുട്ടികൾക്ക് ബിരിയാണിയും ചിക്കൻകറിയും നേരത്തേ കിട്ടി

പാറക്കടവ്: പാറക്കടവ് എഎൽപി സ്കൂളിലെ കുട്ടികൾക്ക് വിദ്യാഭ്യാസ വകുപ്പിന്‍റെ പുതിയ ഉച്ചഭക്ഷണ മെനു വരുന്നതിനു മുമ്പുതന്നെ ബിരിയാണിയും ചിക്കൻകറിയുമൊക്കെ ഉച്ചഭക്ഷണത്തിന്‍റെ ഭാഗമാണ്. കുട്ടികളുടെയും അധ്യാപകരുടെയും ജന്മദിനങ്ങളിലും മറ്റ് ആഘോഷവേളകളിലുമാണ് ചിക്കൻ കറിയും സദ്യയും പായസവുമൊക്കെ കുട്ടികളുടെ മുന്നിലെത്തുന്നത്. പൂർവവിദ്യാർഥികളും രക്ഷിതാക്കളും നാട്ടുകാരുമെല്ലാം അവരുടെ ആഘോഷങ്ങളിൽ സ് കൂളിലെ കുട്ടികളെയും ഒപ്പം കൂട്ടാൻ എപ്പോഴും ശ്രദ്ധിക്കാറുണ്ട്. അതു കൊണ്ടുതന്നെ ഓരോ മാസവും പലതവണ സ്കൂളിലെ ഉച്ചഭക്ഷണ മെനുവിൽ സദ്യയും ബിരിയാണിയുമെല്ലാം സ്ഥാനം പിടിക്കുന്നു. പിടിഎ, മദർ പിടിഎ അംഗങ്ങളുടെ നേതൃത്വത്തിലാണ് കുട്ടികൾക്ക് ശുദ്ധമായ ഭക്ഷണം ഒരുക്കിനല്കുന്നത്. രക്ഷിതാക്കളുടെ റിസോഴ്സ് ഗ്രൂപ്പ് രുപീകരിച്ച് പൊതുവിദ്യാഭ്യാസ വകുപ്പ് നടപ്പിലാക്കുന്ന പുതിയ ഉച്ചഭക്ഷണ മെനു ഒന്നുകൂടി കൃത്യമായി കുട്ടികളിലെത്തിക്കാനുള്ള തയ്യാറെടുപ്പിലാണ് മുഖ്യാധ്യാപകൻ ബിജു മാത്യു പാഴൂരും സഹാധ്യാപകരും.

കെ. കരുണാകരൻ അനുസ്മരണം

ചിറ്റാരിക്കാൽ: ഈസ്റ്റ് എളേരി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ കെ. കരുണാകരന്‍റെ 107-ാം ജന്മവാർഷികത്തോടനുബന്ധിച്ച് പുഷ്പാർച്ചനയും അനുസ്മരണവും നടത്തി. മണ്ഡലം പ്രസിഡന്‍റ് ജോർജ് കരിമഠം അധ്യക്ഷത വഹിച്ചു. ടോമി പ്ലാച്ചേരി അനുസ്മരണ പ്രഭാഷണം നടത്തി. മാത്യു സെബാസ്റ്റ്യൻ, തോമസ് മാത്യു, അഗസ്റ്റിൻ ജോസഫ്, ഡൊമിനിക് കോയിത്തുരുത്തേൽ, സെബാസ്റ്റ്യൻ പൂവത്താണി, ജോൺസൺ മുണ്ടമറ്റം, ബേബി, സാബു, മനോജ് എന്നിവർ നേതൃത്വം നല്കി. തൃക്കരിപ്പൂർ: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ നടന്ന കെ. കരുണാകരൻ അനുസ്മരണം ഡിസിസി വൈസ് പ്രസിഡന്‍റ് കെ.കെ. രാജേന്ദ്രൻ ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് എം. രജീഷ് ബാബു അധ്യക്ഷത വഹിച്ചു. ബ്ലോക്ക് കോൺഗ്രസ് പ്രസിഡന്‍റ് കെ.വി. വിജയൻ, യുഡിഎഫ് നിയോജക മണ്ഡലം ചെയർമാൻ പി. കുഞ്ഞിക്കണ്ണൻ, ഡികെടിഎഫ് സംസ്ഥാന ജനറൽ സെക്രട്ടറി സി. രവി, പി.വി. കണ്ണൻ, കെ.പി. ദിനേശൻ, വി. മനോഹരൻ എന്നിവർ പ്രസംഗിച്ചു. പുഷ്പാർച്ചനയ്ക്ക് കെ. പത്മനാഭൻ, ടി. സുരേശൻ, അജിത്ത് തൈക്കീൽ, കെ.എൻ.സി. ഇബ്രാഹിം, ടി.വി. ആനന്ദകൃഷ്ണൻ, എൻ. സൈതലവി എന്നിവർ നേതൃത്വം നല്കി.

വിദ്യാർഥി സംഘർഷം: ഏഴ് എസ്എഫ്ഐ പ്രവർത്തകർക്കെതിരേ കേസ്

കാസർഗോഡ്: വെള്ളിയാഴ്ച സംസ്ഥാനതലത്തിൽ ആഹ്വാനംചെയ്ത സമരവുമായി ബന്ധപ്പെട്ട് പ്രകടനം നടത്തിയ കെ എസ് യു പ്രവർത്തകരെ ആക്രമിച്ചതിന് ജില്ലയിലെ രണ്ട് സ്കൂളുകളിലായി ഏഴ് എസ്എഫ്ഐ പ്രവർത്തകർക്കെതിരേ പോലീസ് കേസെടുത്തു. കുണ്ടംകുഴി ഗവ. ഹയർ സെക്കൻഡറി സ്കൂളിലെ പ്ലസ്ടു വിദ്യാർഥി മരുതടുക്കത്തെ ഷാഹിദി(17)നെ ആക്രമിച്ച് തലയ്ക്ക് പരിക്കേല്പിച്ചതിന് അഭിഷേക്, ശിവസൂര്യ, ഗൗതം, ശ്രീവിനായക്, അമൽ, നീരജ് എന്നിവർക്കെതിരെയാണ് ബേഡകം പോലീസ് കേസെടുത്തത്. പിലിക്കോട് ഗവ. ഹയർ സെക്കൻഡറി സ്കൂളിൽ പ്രിൻസിപ്പലിന് സമര നോട്ടീസ് നല്കി പുറത്തിറങ്ങുകയായിരുന്ന കെ എസ് യു പ്രവർത്തകൻ റാസിഫിനെ ആക്രമിച്ചതിന് എസ്എഫ്ഐ പ്രവർത്തകൻ കാർത്തിക് രാജീവനെതിരേ ചന്തേര പോലീസ് കേസെടുത്തു.

വിദ്യാരംഗം കലാസാഹിത്യ വേദി ഉദ്ഘാടനം

വെള്ളരിക്കുണ്ട്: കരിവുള്ളടുക്കം സെന്‍റ് ജോസഫ് യുപി സ്കൂളിൽ വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഉദ്ഘാടനം സിനിമാ പ്രവർത്തകൻ ചന്ദ്രു വെള്ളരിക്കുണ്ട് നിർവഹിച്ചു. പിടിഎ പ്രസിഡന്‍റ് പി. അരവിന്ദാക്ഷൻ അധ്യക്ഷത വഹിച്ചു. സ്കൂൾ മാനേജർ റവ.ഡോ. ജോൺസൺ അന്ത്യംകുളം അനുഗ്രഹ പ്രഭാഷണം നടത്തി. ചിറ്റാരിക്കാൽ എഇഒ ജസിന്ത ജോൺ വിശിഷ്ടാതിഥിയായി. മുഖ്യാധ്യാപിക സിസ്റ്റർ റജിന മാത്യു, മദർ പിടിഎ പ്രസിഡന്‍റ് നിഷ്മ, ജസ്റ്റിൻ ജോസ്, സൈമ ജോസ് എന്നിവർ പ്രസംഗിച്ചു. തുടർന്ന് ആൻവിയ ജൂവലും സംഘവും അവതരിപ്പിച്ച നൃത്തവും മാത്യൂസും സംഘവും അവതരിപ്പിച്ച ബഷീർ അനുസ്മരണ ദൃശ്യഭാഷ്യവും അരങ്ങേറി. പാലാവയൽ: സെന്‍റ് ജോൺസ് ഹയർ സെക്കൻഡറി സ്കൂളിൽ വിദ്യാരംഗം കലാസാഹിത്യ വേദിയുടെയും വിവിധ ക്ലബുകളുടെയും ഈ വർഷത്തെ പ്രവർത്തനോദ്ഘാടനം നടന്നു. റിട്ട. അധ്യാപകനും സാംസ്കാരിക പ്രവർത്തകനുമായ എം.വി. ജനാർദനൻ വിദ്യാരംഗം കലാസാഹിത്യ വേദിയുടെയും സ്കൂൾ മാനേജർ ഫാ. ജോസ് മാണിക്കത്താഴെ വിവിധ ക്ലബുകളുടെയും ഉദ്ഘാടനം നിർവഹിച്ചു. പിടിഎ പ്രസിഡന്‍റ് സോമി ജോർജ് അറയ്ക്കൽ അധ്യക്ഷത വഹിച്ചു. പ്രിൻസിപ്പൽ ഡോ. മെൻഡലിൻ മാത്യു, അധ്യാപകരായ മിനി തോമസ്, സിസ്റ്റർ ഷെല്ലി, വിദ്യാർഥി പ്രതിനിധി ആൻമരിയ തോമസ് എന്നിവർ പ്രസംഗിച്ചു. വിദ്യാർത്ഥികളുടെ വിവിധ കലാപരിപാടികളും നടന്നു.

ബഷീർ അനുസ്മരണം

കാസർഗോഡ്: വൈക്കം മുഹമ്മദ് ബഷീറിന്‍റെ കൃതികൾ പരത്തിയ വെളിച്ചം കാലമേറുമ്പോഴും കൂടുതൽ തെളിച്ചമുള്ളതാവുകയാണെന്ന് എഴുത്തുകാരൻ അംബികാസുതൻ മാങ്ങാട് പറഞ്ഞു. ജില്ലാ ഇൻഫർമേഷൻ ഓഫീസും കളക്ടറേറ്റിലെ അക്ഷര ലൈബ്രറിയും ചേർന്ന് സംഘടിപ്പിച്ച ബഷീർ അനുസ്മരണവും ചെറുകഥ പുരസ്കാര വിതരണവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ല ഇൻഫർമേഷൻ ഓഫീസർ എം. മധുസൂദനൻ അധ്യക്ഷത വഹിച്ചു. അസിസ്റ്റന്‍റ് എഡിറ്റർ എ.പി. ദിൽന അവാർഡ് ജേതാക്കളെ പരിചയപ്പെടുത്തി. ഡെപ്യൂട്ടി കലക്ടർ (ആർആർ) കെ. അജേഷ്, എം. ഉദയപ്രകാശ്, കെ. മുകുന്ദൻ, എ. ആശാലത എന്നിവർ പ്രസംഗിച്ചു. ചെറുകഥ പുരസ്കാരം ഇ.കെ. നിധീഷിനും ജൂറിയുടെ പ്രത്യേക പരാമർശത്തിനുള്ള പുരസ്കാരം സുധീഷ് ചട്ടഞ്ചാലിനും സമ്മാനിച്ചു. ആസ്വാദനക്കുറിപ്പ് മത്സരത്തിൽ വിജയികളായ വിദ്യാർഥികൾക്കും സമ്മാനങ്ങൾ നല്കി. ചിറ്റാരിക്കാൽ: തോമാപുരം സെന്‍റ് തോമസ് ഹയർ സെക്കൻഡറി സ്കൂളിൽ ബഷീർ അനുസ്മരണം സംഘടിപ്പിച്ചു. രാജൻ ചുള്ളി മുഖ്യപ്രഭാഷണം നടത്തി. മുഖ്യാധ്യാപകൻ ജസ്റ്റിൻ മാത്യു, സ്റ്റാഫ് സെക്രട്ടറി റജീന എബ്രഹാം എന്നിവർ പ്രസംഗിച്ചു. കുട്ടികളുടെ വിവിധ കലാപരിപാടികളും നടന്നു.

കെ. ദാമോദരൻ അനുസ്മരണം നടത്തി

തൃക്കരിപ്പൂർ: വായനാ പക്ഷാചരണത്തിന്‍റെ ഭാഗമായി സി. അച്യുതമേനോൻ ഗ്രന്ഥാലയത്തിന്‍റെ നേതൃത്വത്തിൽ കെ. ദാമോദരൻ അനുസ്മരണം നടത്തി. സിപിഐ സംസ്ഥാന കൗൺസിൽ അംഗം ഗോവിന്ദൻ പള്ളിക്കാപ്പിൽ ഉദ്ഘാടനം ചെയ്തു. കെ.വി. ദിലീഷ് അധ്യക്ഷത വഹിച്ചു. ഗ്രന്ഥശാലാ സംഘം താലൂക്ക് കൗൺസിൽ വൈസ് പ്രസിഡന്‍റ് സി.വി. വിജയരാജ്, രാഘവൻ മാണിയാട്ട്, എം.പി. ബിജീഷ്, രവീന്ദ്രൻ മാണിയാട്ട്, വി.എം. ചന്ദ്രൻ, കെ. മനോഹരൻ എന്നിവർ പ്രസംഗിച്ചു. മുതിർന്ന ഗ്രന്ഥശാലാ പ്രവർത്തകനും ഗ്രന്ഥശാല സംഘം മുൻ ജില്ലാ പ്രസിഡന്‍റുമായ മധുരംകൈയിലെ പി. അമ്പുവിനെ വീട്ടിലെത്തി ആദരിച്ചു.

സിഗരറ്റ് വലിക്കാൻ നിർബന്ധിച്ചു; പ്ലസ്ടു വിദ്യാർഥികൾക്കെതിരേ കേസ്

നീലേശ്വരം: പ്ലസ് വൺ വിദ്യാർഥിയെ തടഞ്ഞുനിർത്തി ആക്രമിക്കുകയും സിഗരറ്റ് വലിക്കാൻ നിർബന്ധിക്കുകയും ചെയ്തതിന് ഏഴ് പ്ലസ്ടു വിദ്യാർഥികൾക്കെതിരേ കേസ്. കോട്ടപ്പുറം ഗവ. വൊക്കേഷണൽ ഹയർ സെക്കൻഡറി സ്കൂളിലെ വിദ്യാർഥിയുടെ പരാതി പ്രകാരമാണ് പ്ലസ്ടു വിദ്യാർഥികളായ അൻവർ, ഗാനി, റിഷി തുടങ്ങി ഏഴുപേർക്കെതിരെ നീലേശ്വരം പോലീസ് കേസെടുത്തത്. ജൂൺ 3 ന് ഉച്ചയ്ക്ക് ഒരുമണിയോടെ സ്കൂളിനടുത്തുള്ള മസ്ജിദിന് സമീപത്തെ ഷെഡിൽ വച്ചായിരുന്നു സംഭവമെന്ന് പരാതിയിൽ പറയുന്നു.

കാസര്‍ഗോട്ടെ ട്രെയിന്‍ യാത്രക്കാരുടെ പ്രശ്‌നങ്ങള്‍ പരിഹരിക്കണം

കാസര്‍ഗോഡ്: അത്യുത്തര കേരളത്തിലെ റെയില്‍ യാത്രക്കാര്‍ നേരിടുന്ന സൗകര്യങ്ങളുടെ അപര്യാപ്തത സംബന്ധിച്ചും അതില്‍ അടിയന്തിരമായി സ്വീകരിക്കേണ്ട നടപടികള്‍ സംബന്ധിച്ചും രാജ്‌മോഹന്‍ ഉണ്ണിത്താന്‍ എംപി നല്‍കിയ നിര്‍ദേശങ്ങളില്‍ തുടര്‍ നടപടി വേഗത്തിലാക്കാന്‍ കാസര്‍ഗോഡ് റെയില്‍വേ പാസഞ്ചേഴ്‌സ് അസോസിയേഷന്‍ പ്രസിഡന്‍റ് ആര്‍. പ്രശാന്ത്കുമാര്‍ ദക്ഷിണ റെയില്‍വേ പാലക്കാട് ഡിവിഷന്‍ അഡിഷണല്‍ ഡിവിഷണല്‍ റെയില്‍വേ മാനേജര്‍ എം. ജയകൃഷ്ണന് നിവേദനം നല്‍കി. കോഴിക്കോട് ഭാഗത്ത് നിന്ന് വൈകുന്നേരം മുതല്‍ പാതിരാത്രി വരെ കാസര്‍ഗോട്ടേക്കും തിരിച്ചും പ്രതിദിന ഹൃസ്വ ദൂരവണ്ടികള്‍ ഇല്ലാത്തതും ഈ ഭാഗത്തുള്ള സ്റ്റേഷനുകളുടെ അടിസ്ഥാന സൗകര്യങ്ങളുടെ അപര്യാപ്തത, സീസണ്‍ ടിക്കറ്റ് യാത്രക്കാരുടെ ദുരിതങ്ങള്‍ എന്നിവ പരിഹരിക്കാനുള്ള നിര്‍ദേശങ്ങളില്‍ അനുഭാവ പൂര്‍ണമായ നടപടികള്‍ കൈകൊള്ളുമെന്നു എഡിആര്‍എം പ്രതികരിച്ചു. ഇതുസംബന്ധിച്ച് യാത്രക്കാരുടെ പ്രതിനിധികളുടെ സാന്നിധ്യത്തില്‍ കാസര്‍ഗോഡ് വെച്ചു ചര്‍ച്ച ചെയ്യാന്‍ റെയില്‍വേ ഉന്നത ഉദ്യോഗസ്ഥരുടെ യോഗം വിളിച്ചു ചേര്‍ക്കണമെന്ന് ആവശ്യപ്പെട്ട് എംപി റയില്‍വേ സോണ്‍ ജനറല്‍ മാനേജര്‍ക്ക് മെയില്‍ അയച്ചിട്ടുണ്ട്.

കമ്പല്ലൂരിൽ ചെണ്ടുമല്ലി കൃഷിക്ക് തുടക്കമായി

കമ്പല്ലൂർ: സിആർസി ഗ്രന്ഥാലയത്തിന്‍റെ നേതൃത്വത്തിൽ നടത്തുന്ന ചെണ്ടുമല്ലി കൃഷിയുടെ നടീൽ ഉത്സവം പഞ്ചായത്ത് പ്രസിഡന്‍റ് ജോസഫ് മുത്തോലി ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് കെ.പി. ദാമോദരൻ അധ്യക്ഷത വഹിച്ചു. ഗ്രന്ഥശാലയ്ക്ക് സമീപത്തുള്ള കെ.പി. നാരായണന്‍റെ സ്ഥലത്താണ് ചെണ്ടുമല്ലി കൃഷി നടത്തുന്നത്. ഓണക്കാലം ലക്ഷ്യമിട്ട് ആയിരത്തോളം തൈകളാണ് ഗ്രന്ഥശാലയുടെ നേതൃത്വത്തിൽ നട്ടു പരിപാലിക്കുന്നത്. ചടങ്ങിൽ പഞ്ചായത്ത് അംഗം പി.വി. സതീദേവി, കൃഷി ഓഫീസർ അബിൻ സി. അജിത്ത്, എം. മനോജ് കുമാർ, പി.കെ. മോഹനൻ, എ.ആർ. വിജയകുമാർ, പി.ഡി. വിനോദ്, കെ.പി. ബൈജു, എം.വി. ബാലകൃഷ്ണൻ എന്നിവർ സംബന്ധിച്ചു.

എകെസിസി ഫൊറോന സമ്മേളനം

പാലാവയൽ: കത്തോലിക്ക കോൺഗ്രസ് തോമാപുരം ഫൊറോന സമ്മേളനം കാവുന്തല സെന്‍റ് ജോസഫ് പാരിഷ് ഹാളിൽ എകെസിസി ഫൊറോന ഡയറക്ടർ ഫാ. മാത്യു വളവനാൽ ഉദ്ഘാടനം ചെയ്തു. ഫൊറോന കമ്മിറ്റി പ്രസിഡന്‍റ് സാജു പടിഞ്ഞാറേട്ട് അധ്യക്ഷത വഹിച്ചു. അതിരൂപത പ്രസിഡന്‍റ് ഫിലിപ്പ് വെളിയത്ത് മുഖ്യപ്രഭാഷണം നടത്തി. കാവുന്തല പള്ളി വികാരി ഫാ. എബിൻ മടപ്പാംതോട്ടുങ്കൽ, തോമസ് മണ്ണനാനിക്കൽ, സെബാസ്റ്റ്യൻ വട്ടപറമ്പിൽ, ടോമി നടുവിലേക്കുറ്റ് എന്നിവർ പ്രസംഗിച്ചു. ഫൊറോനയിൽ എകെസിസി യൂണിറ്റ് ഇല്ലാത്ത ഇടവകകളിൽ പുതിയ യൂണിറ്റുകൾ രൂപീകരിക്കാനും ഫൊറോന, യൂണിറ്റ് തലങ്ങളിൽ ഫണ്ട് ശേഖരണാർത്ഥം സമ്മാന കൂപ്പണുകൾ വിതരണം ചെയ്യാനും ഫൊറോന ഡയറക്ടർ ഫാ. മാത്യു വളവനാലിന്‍റെ നേതൃത്വത്തിൽ യൂണിറ്റുകൾ സന്ദർശിക്കാനും തീരുമാനിച്ചു.

കോൺഗ്രസ് പ്രതിഷേധം

ചിറ്റാരിക്കാൽ: കോട്ടയം മെഡിക്കൽ കോളജിൽ കെട്ടിടം തകർന്ന് വീട്ടമ്മ മരിക്കാനിടയാക്കിയ സംഭവത്തിന്‍റെ ഉത്തരവാദിത്വം ഏറ്റെടുത്തുകൊണ്ട് ആരോഗ്യമന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ടുകൊണ്ട് ഈസ്റ്റ് എളേരി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ചിറ്റാരിക്കാലിൽ പ്രതിഷേധ പ്രകടനം നടത്തി. കെപിസിസി അംഗം ശാന്തമ്മ ഫിലിപ്പ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോർജ് കരിമഠം അധ്യക്ഷത വഹിച്ചു. ടോമി പ്ലാച്ചേരി, തോമസ് മാത്യു, ജോസ് കുത്തിയതോട്ടിൽ, മാത്യു സെബാസ്റ്റ്യൻ, ബെന്നി കോഴിക്കോട്, അഗസ്റ്റിൻ ജോസഫ്, ഡൊമിനിക്, ജോണി, ജോൺസൺ മുണ്ടമറ്റം, അയൂബ്, ജോസഫ് വാഴക്കൻ, മനോജ്, അനീഷ് എന്നിവർ നേതൃത്വം നല്കി. രാജപുരം: കോട്ടയം മെഡിക്കൽ കോളജിലുണ്ടായ അപകടവുമായി ബന്ധപ്പെട്ട് തികഞ്ഞ അനാസ്ഥ കാട്ടിയ ആരോഗ്യമന്ത്രി രാജിവയ്ക്കണമെന്നാവശ്യപ്പെട്ടുകൊണ്ട് കള്ളാർ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധം നടത്തി. പ്രതിഷേധ പരിപാടിയും മണ്ഡലം കോൺഗ്രസ് നേതൃയോഗവും കർഷക കോൺഗ്രസ് ജില്ലാ പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. മണ്ഡലം പ്രസിഡന്‍റ് എം.എം. സൈമൺ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ടി.കെ. നാരായണൻ, ബ്ലോക്ക് സെക്രട്ടറി വി.കെ. ബാലകൃഷ്ണൻ, വനജ ഐത്തു, ഇ.കെ. ഗോപാലൻ എന്നിവർ പ്രസംഗിച്ചു.

നീലേശ്വരം-ഇടത്തോട് റോഡ് വികസനത്തിന് വീണ്ടും ജീവൻ വയ്ക്കുന്നു

നീലേശ്വരം: വർഷങ്ങൾ നീണ്ട കാത്തിരിപ്പിനും മെല്ലെപ്പോക്കിനും അനുബന്ധ പ്രശ്നങ്ങൾക്കുമൊടുവിൽ നീലേശ്വരം-ഇടത്തോട് റോഡ് വികസനത്തിന് വീണ്ടും ജീവൻ വയ്ക്കുന്നു. നീലേശ്വരം പേരോലിൽ റെയിൽവേ മേൽപ്പാലം മുതൽ താലൂക്ക് ആശുപത്രി വരെയുള്ള ഭാഗത്ത് റോഡ് വികസനത്തിനായി ഏറ്റെടുത്ത സ്ഥലത്തെ കെട്ടിടങ്ങൾ പൊളിച്ചുമാറ്റാൻ ടെൻഡറായി. ദീർഘനാളത്തെ നിയമപ്രശ്നങ്ങൾക്കു ശേഷമാണ് ഇവിടെ 1.3 കിലോമീറ്റർ ദൂരത്തിലുള്ള സ്ഥലവും കെട്ടിടങ്ങളും റോഡ് വികസനത്തിനായി നഷ്ടപരിഹാരം നല്കി ഏറ്റെടുത്തത്. കെട്ടിടങ്ങൾ പൊളിച്ചുമാറ്റുന്നതിനായി നേരത്തേ പലതവണ ഓൺലൈൻ ടെൻഡർ വിളിച്ചെങ്കിലും ആരും കരാറെടുക്കാൻ മുന്നോട്ടുവന്നിരുന്നില്ല. പിന്നീട് കെആർഎഫ്ബി പ്രൊജക്ട് ഡയറക്ടർ മുഖേന സാധാരണ ലേല നടപടികളിലൂടെയാണ് ടെൻഡർ നല്കിയത്. കെട്ടിടങ്ങൾ പൊളിച്ചുമാറ്റുന്നതിനു പിന്നാലെ ഈ ഭാഗത്തെ റോഡ് വികസനവും മറ്റു ഭാഗങ്ങളിൽ പൂർത്തിയാകാതെ കിടക്കുന്ന പ്രവൃത്തികളും ഒരുമിച്ച് ചേർത്ത് പുതിയ ടെൻഡർ വിളിച്ച് കഴിവതുംവേഗത്തിൽ പ്രവൃത്തികൾ പുനരാരംഭിക്കാനാണ് ധാരണ. 2018 ലാണ് കിഫ്ബി പദ്ധതിയിൽ 42.1 കോടി രൂപ ചെലവിൽ നീലേശ്വരം-ഇടത്തോട് റോഡിന്‍റെ നവീകരണ പ്രവൃത്തികൾ ആരംഭിച്ചത്. എന്നാൽ തുടക്കംമുതൽ ഇഴഞ്ഞുനീങ്ങിയ പ്രവൃത്തികൾ നാട്ടുകാർക്കും വാഹനയാത്രക്കാർക്കും തീരാദുരിതമായി. റോഡിന്‍റെ സമീപപ്രദേശങ്ങൾ പലതവണ പൊടിയിൽ മുങ്ങി. കെആർഎഫ്ബി അധികൃതർ പലതവണ സമയം നീട്ടിനല്കിയിട്ടും പ്രവൃത്തികൾ കൃത്യമായി പൂർത്തീകരിക്കാൻ കരാറുകാരന് കഴിയാതെവന്നതോടെ രണ്ടുവർഷം മുമ്പ് കരാർ റദ്ദാക്കുകയായിരുന്നു. ഇഴഞ്ഞുനീങ്ങിയ പ്രവൃത്തികൾ അതിനുമുമ്പുതന്നെ പാതിവഴിയിൽ നിലച്ചിരുന്നു. അവശേഷിക്കുന്ന പ്രവൃത്തികളുടെ പുതുക്കിയ എസ്റ്റിമേറ്റ് തയ്യാറാക്കിയതിനു ശേഷമാകും പുതിയ ടെൻഡർ വിളിക്കുക. ഈ മഴക്കാലം കഴിയുന്നതോടെ തന്നെ പുതിയ ടെൻഡർ വിളിച്ച് പ്രവൃത്തികൾ പുനരാരംഭിക്കാൻ കഴിയുമെന്നാണ് പ്രതീക്ഷ.

ജില്ലയിലെ സർവകലാശാല കാമ്പസുകളിൽ ആളൊഴിയുന്നു

നീലേശ്വരം: മൾട്ടി കാമ്പസ് സർവകലാശാല എന്ന ആശയത്തോടെ തുടങ്ങിയ കണ്ണൂർ സർവകലാശാല ഇപ്പോൾ കോഴ്സുകളെല്ലാം സർവകലാശാല ആസ്ഥാനത്തുതന്നെ കേന്ദ്രീകരിക്കുന്ന സാമ്പ്രദായിക രീതിയിലേക്ക് മാറാനൊരുങ്ങുമ്പോൾ ജില്ലയിലെ സർവകലാശാല കാമ്പസുകളിൽ ആളൊഴിയുന്നു. കേരളത്തിലെ ഒരു സർവകലാശാലയുടെ ആദ്യത്തെ വില്ലേജ് കാമ്പസ് എന്ന വിശേഷണത്തോടെ തുടങ്ങിയ നീലേശ്വരം പാലാത്തടത്തെ ഡോ.പി.കെ. രാജൻ മെമ്മോറിയൽ കാമ്പസിൽനിന്ന് മലയാള വിഭാഗത്തെ മാങ്ങാട്ടുപറമ്പ് കാമ്പസിലേക്ക് മാറ്റാനുള്ള ശ്രമമാണ് ഏറ്റവുമൊടുവിൽ നടക്കുന്നത്. പുതിയ നാലുവർഷ ബിരുദ കോഴ്സുകൾക്കും ഇന്‍റഗ്രേറ്റഡ് കോഴ്സുകൾക്കും അനുസൃതമായി ബിരുദാനന്തര ബിരുദ കോഴ്സുകളെ പുനക്രമീകരിക്കുമ്പോൾ എല്ലാ കോഴ്സുകളും ഒരിടത്തായിരിക്കുന്നതാണ് സൗകര്യപ്രദമെന്നാണ് അധികൃതരുടെ നിലപാട്. മലയാളം കോഴ്സ് പഠിക്കുന്നവർക്ക് മറ്റു ഭാഷകളും ജേർണലിസം, ചരിത്രം തുടങ്ങിയ വിഷയങ്ങളും ഇലക്ടീവ് ആയി തെരഞ്ഞെടുത്ത് പഠിക്കാൻ ഇതുവഴി അവസരമൊരുങ്ങും. ഈ വിഷയങ്ങൾ മുഖ്യവിഷയമായി പഠിക്കുന്നവർക്ക് മലയാളവും പഠിക്കാൻ കഴിയും. ഇതേ വിശദീകരണത്തിന്‍റെ അടിസ്ഥാനത്തിലാണ് കഴിഞ്ഞവർഷം എം എസ് സി മോളിക്യുലാർ ബയോളജി കോഴ്സ് നീലേശ്വരത്തു നിന്ന് തലശേരി പാലയാട് കാമ്പസിലേക്ക് മാറ്റിയത്. മൈക്രോബയോളജി പോലുള്ള സമാനമായ മറ്റു ശാസ്ത്രവിഷയങ്ങളുള്ളത് പാലയാട് കാമ്പസിലാണെന്നും കോഴ്സുകൾ ഒരേ സ്ഥലത്താക്കിയാൽ വിദ്യാർഥികൾക്ക് ഇഷ്ടവിഷയങ്ങൾ ഇലക്ടീവായി ചേർത്തു പഠിക്കാൻ കഴിയുമെന്നുമാണ് അന്നും പറഞ്ഞത്. എംഎ മലയാളം കൂടി മാറ്റിയാൽ പാലാത്തടം കാമ്പസിൽ ആകെ അവശേഷിക്കുക എംഎ ഹിന്ദിയും എംബിഎയും മാത്രമായിരിക്കും. ഭാഷാവിഷയങ്ങളുടെ ഏകീകരണത്തിന്‍റെ പേരിൽ ഹിന്ദിയും ഏതുനിമിഷവും മാങ്ങാട്ടുപറമ്പിലേക്ക് മാറ്റിയേക്കാം. അതോടെ വിശാലമായ സ്ഥലസൗകര്യവും കെട്ടിടങ്ങളുമെല്ലാമുള്ള പാലാത്തടം കാമ്പസ് ഒരു സ്വാശ്രയ എംബിഎ പഠനകേന്ദ്രം മാത്രമായി ഒതുങ്ങും. കണ്ണൂർ സർവകലാശാലയുടെ ബഹുഭാഷാ പഠന ഗവേഷണകേന്ദ്രമാക്കാൻ ലക്ഷ്യമിട്ടിരുന്ന മഞ്ചേശ്വരം കാമ്പസ് ഇപ്പോൾ ലോ കോളജായും കാസർഗോഡ് ചാല കാമ്പസ് ബിഎഡ് സെന്‍ററായും മാത്രമാണ് ഫലത്തിൽ പ്രവർത്തിക്കുന്നത്. കാസർഗോഡ് എംബിഎ കോഴ്സും നീലേശ്വരത്ത് എംസിഎ കോഴ്സും നേരത്തേ തുടങ്ങിയിരുന്നെങ്കിലും അടിസ്ഥാന സൗകര്യങ്ങളുടെ കുറവും ആവശ്യത്തിന് കുട്ടികളെ കിട്ടാനില്ലാത്തതും കാരണം നിർത്തുകയായിരുന്നു. പരമ്പരാഗത കോഴ്സുകൾ പുതിയ കാലത്തിന്‍റെ ആവശ്യങ്ങൾക്കനുസരിച്ച് പുനക്രമീകരിക്കുന്നത് നല്ല കാര്യമാണെങ്കിലും അങ്ങനെ ചെയ്യുമ്പോൾ ജില്ലയിലെ കാമ്പസുകളെ പൂർണമായും ഒഴിച്ചുനിർത്തുന്നത് ശരിയല്ലെന്ന് വിദ്യാർഥികളും അധ്യാപകരും നാട്ടുകാരുമെല്ലാം ചൂണ്ടിക്കാട്ടുന്നു. ജില്ലയിലെ കാമ്പസുകളിലെ സൗകര്യങ്ങൾ മെച്ചപ്പെടുത്തി പുതുതലമുറയുടെ ആവശ്യങ്ങൾക്കൊത്ത കോഴ്സുകൾ ഇവിടെയും തുടങ്ങാൻ സർവകലാശാല നടപടി സ്വീകരിക്കണമെന്നാണ് എല്ലാവരുടെയും ആവശ്യം.

കഞ്ചാവ് മിഠായി കൊറിയറിൽ; വിദ്യാർഥി എക്സൈസ് പിടിയിൽ

കാഞ്ഞങ്ങാട്: സ്വകാര്യ കൊറിയർ സർവീസ് വഴി ഉത്തർപ്രദേശിൽ നിന്ന് പാഴ്സലായെത്തിയ കഞ്ചാവ് മിഠായികളുടെ പായ്ക്കറ്റ് ഏറ്റുവാങ്ങാനെത്തിയ വിദ്യാർഥി എക്സൈസിന്‍റെ പിടിയിലായി. കാഞ്ഞങ്ങാട് സൗത്ത് തൈവളപ്പിലെ ദിൽജിത്തിനെയാണ് (19) എക്സൈസ് ഇൻസ്പെക്ടർ ഇ.വി.ജിഷ്ണുകുമാറിന്‍റെ നേതൃത്വത്തിലുള്ള സംഘം പിടികൂടിയത്. വെള്ളിക്കോത്ത് പ്രവർത്തിക്കുന്ന സ്വകാര്യ കെറിയർ സ്ഥാപനത്തിലേക്കാണ് പാഴ്സലെത്തിയത്. കോളജ് വിദ്യാർഥിയായ ദിൽജിത്ത് കഞ്ചാവ് മിഠായികളുടെ വിതരണവുമായി ബന്ധപ്പെട്ട് നേരത്തേ എക്സൈസിന്‍റെ നിരീക്ഷണത്തിലായിരുന്നു. ഇതിന്‍റെ ഭാഗമായാണ് എക്സൈസ് സംഘം ഇയാളെ പിന്തുടർന്ന് കെറിയർ സ്ഥാപനത്തിനു സമീപമെത്തിയത്. വെള്ളിക്കോത്ത് മഹാകവി പി സ്മാരക ഗവ.സ്കൂളിന്‍റെ എതിർവശത്തുള്ള കൊറിയർ സ്ഥാപനത്തിൽ നിന്ന് പാഴ്സൽ വാങ്ങി പുറത്തിറങ്ങിയ ഉടൻതന്നെ ഇയാളെ കൈയോടെ പിടികൂടുകയായിരുന്നു. രണ്ടു പായ്ക്കറ്റുകളിലായി ഉണ്ടായിരുന്ന 448 ഗ്രാം കഞ്ചാവ് മിഠായി ഇയാളിൽ നിന്നു പിടിച്ചെടുത്തു.

പശുവിനെ വാങ്ങിയപ്പോള്‍ കിട്ടിയത് മുട്ടന്‍പണി; ഒടുവില്‍ കോടതി വഴി ബെന്നിക്ക് നീതി

ഷൈബിന്‍ ജോസഫ് കാസര്‍ഗോഡ്: ഒരു പശുവിനെ വാങ്ങിയത് ഇത്ര വലിയ പൊല്ലാപ്പാകുമെന്ന് ബദിയഡുക്ക ബേളയിലെ ബെന്നി കണ്ണംപള്ളി എന്ന കെ.എ. മത്തായി (51) സ്വപ്‌നത്തില്‍ പോലും കരുതിയില്ല. തന്നെ വഞ്ചിച്ചതിനും ദ്രോഹിച്ചതിനുമെതിരെ പോലീസ് സ്‌റ്റേഷനും കോടതിയും കയറിയിറങ്ങി മൂന്നുവര്‍ഷം നീണ്ടുനിന്ന ഒറ്റയാള്‍ പോരാട്ടത്തിനൊടുവിലാണ് ഈ കര്‍ഷകനെ തേടി നീതിയെത്തുന്നത്. 16 ലിറ്റര്‍ പാല്‍ ഗാരണ്ടി 2022ലാണ് സംഭവം. തന്‍റെ സുഹൃത്ത് പറഞ്ഞതനുസരിച്ചാണ് മുജംഗാവിലെ കെ.എസ്. ഗണേഷ് റാവുവിന്‍റെ വീട്ടില്‍ പശുവിനെ വാങ്ങാനെത്തുന്നത്. സഹിവാള്‍ ഇനത്തില്‍പെട്ട നല്ല വലുപ്പമുള്ള പശുവായിരുന്നു ഇത്. ഗര്‍ഭിണിയായ പശു ഒരാഴ്ചയക്കുള്ളില്‍ പ്രസവിക്കുമെന്നാണ് വീട്ടുകാര്‍ പറഞ്ഞിരുന്നത്. ആദ്യ പ്രസവത്തില്‍ ദിവസവും 16 ലിറ്റര്‍ പാല്‍ കിട്ടിയിരുന്നതായും ഇത്തവണ 18 ലിറ്റര്‍ കിട്ടുമെന്നും 16 ലിറ്ററില്‍ കുറഞ്ഞാല്‍ പശുവിനെ തങ്ങള്‍ തന്നെ തിരിച്ചെടുത്തേക്കാമെന്നും ഗണേഷ് റാവു പറഞ്ഞു. എന്നാല്‍ 14 ലിറ്റര്‍ പാല്‍ കിട്ടിയാല്‍ താന്‍ തൃപ്തനാണെന്ന് ബെന്നി മറുപടി നല്‍കി. 36,500 രൂപയാണ് വില പറഞ്ഞത്. പണം സംഘടിപ്പിക്കുന്നതില്‍ താമസം വന്നതിനാല്‍ പശുവിനെ വാങ്ങല്‍ അല്പം വൈകിയപ്പോള്‍ ഗണേഷ് റാവുവിന്‍റെ ഭാര്യ പലതവണ ബെന്നിയെ വിളിച്ചു. മംഗളൂരുവില്‍ പഠിക്കുന്ന മകള്‍ക്ക് ഹോസ്റ്റല്‍ ഫീസ് അടയ്ക്കാന്‍ അത്യാവശ്യമായി 20,000 രൂപ വേണമെന്നും അല്ലാത്തപക്ഷം ഹോസ്റ്റലില്‍നിന്നും പുറത്താക്കുമെന്നും ബാക്കി പണം പിന്നീട് തന്നാല്‍ മതിയെന്നും പശുവിനെ വാങ്ങണമെന്നും നിര്‍ബന്ധിച്ചു. അവരുടെ സാമ്പത്തികബുദ്ധിമുട്ട് കണ്ട് മനസലിഞ്ഞ ബെന്നി പറഞ്ഞ തുക മുഴുവനും നല്‍കി ഏപ്രില്‍ ഒമ്പതിന് പശുവിനെ വാങ്ങി. കറക്കാന്‍ സമ്മതിക്കാത്ത പശു പശുവിനെ വീട്ടിലേക്ക് കൊണ്ടുവന്ന് 20 ദിവസം കഴിഞ്ഞ് ഏപ്രില്‍ 29നാണ് പ്രസവം നടക്കുന്നത്. എന്നാല്‍ പാല്‍ കറക്കാന്‍ ചെന്നപ്പോഴാണ് വിവരമറിയുന്നത്. ആക്രമണകാരിയായ പശു തന്‍റെ അടുത്തേക്ക് കറവപാത്രവുമായി വരാന്‍പോലും ആരെയും അനുവദിച്ചില്ല. മാത്രമല്ല, സ്വന്തം കിടാവിനെ മുലയൂട്ടാന്‍ പോലും പശു തയാറായില്ല. ഭാര്യ സൗമ്യയുടെ കൂടി സഹായത്തോടെ വളരെ കഷ്ടപ്പെട്ട് ബെന്നി കറന്നുനോക്കിയപ്പോള്‍ കിട്ടിയത് വെറും രണ്ടു ലിറ്റര്‍ പാല്‍ മാത്രം. ആദ്യത്തെ 11 ദിവസവും ഇതുതന്നെ അവസ്ഥ. ഇക്കാര്യം ഗണേഷ് റാവുവിനോട് പറഞ്ഞപ്പോള്‍ എങ്ങനെയാണ് ഈ പശുവിനെ കറക്കേണ്ടതെന്ന് നേരിട്ടുവന്ന് കാണിച്ചുതരാമെന്നു പറഞ്ഞെങ്കിലും വന്നില്ല. ബെന്നി പലതവണ ഫോണില്‍ വിളിച്ചിട്ടും റാവു വരാന്‍ കൂട്ടാക്കിയില്ല. വാദിയെ പ്രതിയാക്കി പോലീസില്‍ പരാതി ഇതിനിടെയാണ് കുമ്പള പോലീസ് സ്റ്റേഷനില്‍നിന്ന് ബെന്നിക്ക് ഫോണ്‍ വരുന്നത്. ഫോണില്‍ വിളിച്ചു ഭീഷണിപ്പെടുത്തിയെന്ന് പറഞ്ഞ് ഗണേഷ് റാവുവിന്‍റെ ഭാര്യ തനിക്കെതിരെ പരാതി നല്‍കിയെന്നും സ്റ്റേഷനിലേക്കു ചെല്ലണമെന്നും പറഞ്ഞപ്പോള്‍ ബെന്നി ഞെട്ടി. സ്റ്റേഷനിലേക്കു ചെന്നപ്പോള്‍ പോലീസുകാര്‍ പരുഷമായി പെരുമാറുകയും തല്ലാനോങ്ങുകയും ചെയ്തു. എന്നാല്‍ പശുവില്പനയുമായി ബന്ധപ്പെട്ട തര്‍ക്കമാണ് പരാതിക്കു പിന്നിലെന്നും പരാതിക്കാരിയോട് സംസാരിച്ചാല്‍ ഇക്കാര്യം വ്യക്തമാകുമെന്നും എന്നിട്ടു വേണമെങ്കില്‍ തന്നെ തല്ലിക്കോയെന്നും ബെന്നി പറഞ്ഞു. പരാതിക്കാരിയെ വിളിച്ചു ചോദിച്ചപ്പോള്‍ പോലീസിന് സത്യം ബോധ്യപ്പെട്ടു. ബെന്നിയോട് പശുവിനെ ഗണേഷ് റാവുവിന്‍റെ വീട്ടില്‍ കൊണ്ടുചെന്നാക്കാനും 10 ദിവസത്തിനുശേഷം പശുവിന് കൂടുതല്‍ പാല്‍ കിട്ടുന്നുണ്ടോയെന്നും പരിശോധിക്കാനും നിര്‍ദേശിച്ചു. അന്നേദിവസം തന്നെ ബെന്നി പശുവിനെ അവിടെ കൊണ്ടുചെന്നാക്കി. നിയമപോരാട്ടത്തിലേക്ക് മേയ് 21നാണ് ബെന്നിക്ക് ഗണേഷ് റാവുവിന്‍റെ ഫോണ്‍ വരുന്നത്. പശുവിന് 12 ലിറ്റര്‍ പാല്‍ കിട്ടാന്‍തുടങ്ങിയെന്ന് പറഞ്ഞു. പുലര്‍ച്ചെ അഞ്ചിനു തന്നെ ബെന്നി 10 കിലോമീറ്റര്‍ അകലെയുള്ള റാവുവിന്‍റെ വീട്ടിലെത്തി. അവിടെ കണ്ട കാഴ്ചയെക്കുറിച്ച് ബെന്നി പറയുന്നു. ""റാവു വലിയൊരു വടിയുമായി നില്‍ക്കുന്നു. അദ്ദേഹത്തിന്‍റെ അമ്പലത്തിലെ പ്രസാദം നല്‍കി പശുവിന്‍റെ ശ്രദ്ധ മാറ്റുന്നു. ഇതിനിടെ ഭാര്യ കഷ്ടപ്പെട്ട് പശുവിനെ കറക്കുന്നു. എന്നിട്ട് കിട്ടിയതാകട്ടെ വെറും രണ്ടരലിറ്റര്‍ പാലും.'' ബെന്നി വിവരം പോലീസിനെ അറിയിച്ചു. പണം മടക്കിക്കൊടുക്കാന്‍ പോലീസ് റാവുവിന് നിര്‍ദേശം നല്‍കി. എന്നാല്‍ റാവു അതിന് തയാറായില്ല. തുടര്‍ന്ന് കേസ് ഒത്തുതീര്‍പ്പാക്കാന്‍ പോലീസ് ജില്ലാ നിയമസേവന അഥോറിറ്റിക്ക് വിട്ടു. 30,000 രൂപയെങ്കിലും തന്നാല്‍ കേസ് ഒത്തുതീര്‍പ്പാക്കാമെന്ന് ബെന്നി പറഞ്ഞു. എന്നാല്‍ ഒത്തുതീര്‍പ്പിന് തയാറാകാതിരുന്ന റാവു തനിക്ക് ബെന്നിയെ പരിചയമില്ലെന്നും പശുവിനെ താന്‍ വിറ്റിട്ടില്ലെന്നുമാണ് അഥോറിറ്റിയോട് പറഞ്ഞത്. തനിക്ക് പണം നല്‍കിയെങ്കില്‍ അതിന്‍റെ തെളിവ് ഹാജരാക്കണമെന്നും റാവു ആവശ്യപ്പെട്ടു. ഇതേത്തുടര്‍ന്ന് കേസ് ജില്ലാ ഉപഭോക്തൃകോടതിക്ക് വിട്ടു. അഭിഭാഷകനെ വയ്ക്കാതെ സ്വന്തം നിലയ്ക്കാണ് ബെന്നി കോടതിയില്‍ വാദിച്ചത്. പോലീസിന്‍റെ മൊഴിയും തനിക്കെതിരെ റാവുവിന്‍റെ ഭാര്യ കൊടുത്ത പരാതിയും കേസ് ബെന്നിക്ക് അനുകൂലമാക്കി. 20,000 രൂപ നഷ്ടപരിഹാരമടക്കം 56,500 രൂപ 30 ദിവസത്തിനകം ബെന്നിക്ക് നല്‍കാന്‍ 2023 ജൂണ്‍ 20നു കോടതി ഉത്തരവായി. എന്നാല്‍ പണം കൊടുക്കാന്‍ റാവു ഒരുക്കമായിരുന്നില്ല. ഇയാള്‍ തിരുവനന്തപുരത്തെ സംസ്ഥാന ഉപഭോക്തൃകോടതിയില്‍ അപ്പീലിന് പോയി. ഇതിനായി നഷ്ടപരിഹാരത്തുകയുടെ പകുതി (28,250 രൂപ) ഇയാള്‍ കോടതിയില്‍ കെട്ടിവയ്ക്കുകയും ചെയ്തു. എന്നാല്‍ മേല്‍ക്കോടതിയും റാവുവിന്‍റെ വാദം തള്ളിക്കളഞ്ഞു. ഗ്രാമപ്രദേശങ്ങളില്‍ പശുവില്പനയില്‍ ബില്ലോ രസീതോ പോലുള്ള രേഖകള്‍ പ്രതീക്ഷിക്കാനാകില്ലെന്ന് നിരീക്ഷിച്ച കോടതി റാവു കെട്ടിവച്ച പണം ബെന്നിക്ക് കൈമാറാന്‍ നിര്‍ദേശം നല്‍കി. അതേസമയം കേസ് നടക്കുന്ന കാലയളവില്‍ റാവു നിയമവിരുദ്ധമായി ഈ പശുവിനെയും കിടാവിനെയും വില്‍ക്കുകയും പണം കീശയിലാക്കുകയും ചെയ്തു. ""റബര്‍ ടാപ്പിംഗും പശുവളര്‍ത്തലും ഒരുമിച്ചുകൊണ്ടുപോകാമെന്നായിരുന്നു ആഗ്രഹം. എന്നാല്‍ ഇങ്ങനെയൊരു ദുരനുഭവമുണ്ടായതോടെ ഉണ്ടായിരുന്ന മറ്റു മൂന്നു പശുക്കളെയും വിറ്റു. ഇപ്പോള്‍ റബര്‍തോട്ടം പാട്ടത്തിനെടുത്ത് ടാപ്പിംഗ് നടത്തുകയാണ്. വൈകിയെങ്കിലും നീതി നടപ്പായതില്‍ സന്തോഷം.''-ബെന്നി പറഞ്ഞു.

ജെസിഐ പഴശി എൻജിനിയറിംഗ് സ്കോളർഷിപ് നൽകും

മട്ടന്നൂർ: പ്ലസ്ടുവിന് അമ്പതു ശതമാനത്തിന് മുകളിൽ മാർക്ക്‌ നേടിയ യോഗ്യരായ കുട്ടികൾക്ക് സ്കോളർഷിപോടുകൂടി എൻജിനിയറിംഗ് പഠിക്കാൻ അവസരം ഒരുക്കുന്നു. മലബാർ ഇൻസ്റ്റിറ്റ്യൂട്ട് ഓഫ് ടെക്നോളജി അഞ്ചരക്കണ്ടിയുമായി സഹകരിച്ചു കൊണ്ടാണ് ജെസിഐ പഴശി അവസരം ഒരുക്കുന്നത്. ഇന്നു രാവിലെ 11 മുതൽ ഉച്ചകഴിഞ്ഞ് രണ്ടുവരെ മട്ടന്നൂർ കൈലാസ് ഓഡിറ്റോറിയത്തിൽ നടക്കുന്ന ക്യാമ്പിൽ കുട്ടികൾക്ക് അഡ്മിഷൻ എടുക്കാം. പത്രസമ്മേളനത്തിൽ ജെസിഐ പഴശി പ്രസിഡന്‍റ് ലിപിൻ കെ. ഗോപാൽ, മട്ടന്നൂർ നഗരസഭാ വിദ്യാഭ്യാസ സ്റ്റാന്‍റിംഗ് കമ്മിറ്റി ചെയർമാൻ വി.കെ. സുഗതൻ, മലബാർ ഇൻസ്റ്റിറ്റ്യൂട്ട് ഓഫ് ടെക്നോളജി പ്രിൻസിപ്പൽ പ്രഫ. ഡി.ആർ. റഹൂഫ്, സി.വി. രജിത് എന്നിവർ പങ്കെടുത്തു. ക്യാമ്പിൽ പങ്കെടുക്കാൻ പേര് രജിസ്റ്റർ ചെയ്യേണ്ടതാണ്. ഫോൺ: 90485 67476, 96560 36410.

പയ്യന്നൂരില്‍ നിരീക്ഷണ കാമറ 23; കണ്ണടച്ചത് 19

പയ്യന്നൂര്‍: പയ്യന്നൂരിന്‍റെ ക്രമസമാധാന പരിപാലന രംഗത്ത് സഹായകമാകാനുദ്ദേശിച്ച് സ്ഥാപിച്ച നിരീക്ഷണ കാമറകളില്‍ കണ്ണടച്ചിട്ട് മാസങ്ങളായിട്ടും അറ്റകുറ്റപ്പണികൾ നടത്താതെ അധികൃതർ. 2022 മാര്‍ച്ചിലാണ് പയ്യന്നൂര്‍ പോലീസ് കണ്‍ട്രോള്‍ റൂമിന്‍റെ ഭാഗമായി നിരീക്ഷണ കാമറകള്‍ സ്ഥാപിച്ചത്. നഗരത്തിന്‍റെ മുക്കും മൂലയും ഒപ്പിയെടുക്കാന്‍ പറ്റുന്ന വിധത്തില്‍ 23 കാമറകളാണ് വിവിധയിടങ്ങളിലായി സ്ഥാപിച്ചിരുന്നത്. പയ്യന്നൂരില്‍ പോലീസ് കണ്‍ട്രോള്‍ റൂം ആരംഭിച്ചപ്പോള്‍ ഇതിനോടനുബന്ധിച്ച് നഗരത്തില്‍ നിരീക്ഷണ കാമറകള്‍ സ്ഥാപിക്കാനുള്ള തീരുമാനം കുറച്ചു വൈകിയാണെങ്കിലും നടപ്പാക്കുകയായിരുന്നു. ഇതോടെ കൃത്യമായ തെളിവ് ലഭിക്കുമെന്നതിനാല്‍ നഗരത്തിലെ സാമൂഹ്യ വിരുദ്ധ പ്രവര്‍ത്തനങ്ങള്‍ക്കും കുറ്റകൃത്യങ്ങള്‍ക്കും തടയിടുവാനും കഴിഞ്ഞിരുന്നു. മുമ്പ് ഗതാഗത നിയമം പാലിക്കാത്ത വാഹനങ്ങള്‍ക്കെതിരെ കാമറകളുപയോഗിച്ച് പോലീസ് നടപ്പാക്കിയ നടപടികള്‍ ഫലപ്രദമായിരുന്നതിന്‍റെ വെളിച്ചത്തിലായിരുന്നു കാമറകള്‍ സ്ഥാപിച്ചത്. പയ്യന്നൂരിലെ വ്യാപാരി സമൂഹത്തിനും ആശ്വാസം പകരുന്ന നടപടിയായിരുന്നു ഇത്. എന്നാലിപ്പോള്‍ കേബിളുകളുടെ തകരാറും കാമറകളുടെ തകരാറും കാരണം ഇതില്‍ 19 കാമറകള്‍ പ്രവര്‍ത്തന രഹിതമാണ്. അവശേഷിക്കുന്ന നാല് കാമറകള്‍ മാത്രമാണ് ഇപ്പോള്‍ പ്രവര്‍ത്തിക്കുന്നത്. തകരാറിലായ കാമറകള്‍ പ്രവര്‍ത്തന ക്ഷമമാക്കാന്‍ ആരും മുന്നോട്ടുവരാത്ത അവസ്ഥയാണ്. പയ്യന്നൂരിലെ വ്യാപാരി സമൂഹത്തിന്‍റെ സഹായത്തോടെ വര്‍ഷങ്ങള്‍ക്ക് മുമ്പ് പയ്യന്നൂര്‍ നഗരത്തില്‍ സ്ഥാപിച്ചിരുന്ന നിരീക്ഷണ കാമറകള്‍ അറ്റകുറ്റപ്പണികള്‍ ചെയ്യാത്തതിനെ തുടര്‍ന്ന് ഉപയോഗശൂന്യമായിരുന്നു. പയ്യന്നൂര്‍ നഗരസഭ നിരീക്ഷണ കാമറകള്‍ സ്ഥാപിക്കുന്നതിനായി പത്തുലക്ഷം രൂപ ബജറ്റില്‍ വകയിരുത്തിയിരുന്നതുമാണ്.

യൂത്ത് ലീഗ് ഡിഎംഒ ഓഫീസ് മാർച്ചിൽ സംഘർഷം, ജലപീരങ്കി പ്രയോഗിച്ചു

കണ്ണൂർ: കണ്ണൂർ ജില്ലയിലെ ആശുപത്രികളോടുള്ള സർക്കാരിന്‍റെ അവഗണന അവസാനിപ്പിക്കണമെന്നാവശ്യപ്പെട്ട് മുസ്‌ലിം യൂത്ത് ലീഗ് ഡിഎംഒ ഓഫീസിലേക്ക് നടത്തിയ മാർച്ചിൽ സംഘർഷം. പോലീസ് ജലപീരങ്കി പ്രയോഗിച്ചു. എകെജി ആശുപത്രി പരിസരത്തുനിന്നും പ്രകടനമായെത്തിയ പ്രവർത്തകർ പള്ളിക്കുന്ന് ഗവ. നഴ്സിംഗ് കോളജ് കാന്പസിൽ പ്രവർത്തിക്കുന്ന ഡിഎംഒ ഓഫീസിലേക്ക് കടക്കാൻ ശ്രമിച്ചതാണ് സംഘർഷത്തിനിടയാക്കിയത്. പോലീസ് അടച്ച് ബന്തവസാക്കിയ ഗേറ്റ് തള്ളിത്തുറക്കാനും ഗേറ്റ് മറികടന്ന് കാന്പസിലേക്ക് കടക്കാനുമുള്ള പ്രവർത്തകരുടെ ശ്രമം പോലീസ് തടഞ്ഞു. തുടർന്ന് പോലീസും സമരക്കാരും തമ്മിൽ ഉന്തും തള്ളുമുണ്ടായി. സംഘർഷാവസ്ഥ ഒഴിവാക്കാൻ പോലീസ് ജലപീരങ്കി പ്രയോഗിച്ചു. യൂത്ത് ലീഗ് സംസ്ഥാന ട്രഷറർ ഇസ്മയിൽ വയനാട് സമരം ഉദ്ഘാടനം ചെയ്തു. ജില്ലാപ്രസിഡന്‍റ് നസീർ നെല്ലൂർ അധ്യക്ഷത വഹിച്ചു. മാർച്ച് ഉദ്ഘാടനം ചെയ്തതിനു പിന്നാലെ പ്രവർത്തകർ വീണ്ടും ഗേറ്റ് തള്ളിത്തുറന്ന് ഡിഎംഒ ഓഫീസിലേക്ക് തള്ളിക്കയറാൻ ശ്രമിച്ചതാണ് രണ്ടാമതും സംഘർഷാവസ്ഥയ്ക്കിടയാക്കിയത്. സമരക്കാരെ പിന്തിരിപ്പിക്കാനായി പോലീസ് വീണ്ടും ജലപീരങ്കി പ്രയോഗിക്കുകയും അറസ്റ്റ് ചെയ്യുകയുമായിരന്നു. ‍ യൂത്ത് ലീഗ് ജില്ലാജനറൽ സെക്രട്ടറി പി.സി. നസീർ, കെ.കെ.ഷിനാജ്, ഷംസീർ മയ്യിൽ, അഷ്ക്കർ കണ്ണാടിപ്പറന്പ്, ഷബീർ എടയന്നൂർ, ജംഷീർ ആലക്കാട് എന്നിവരെയാണ് അറസ്റ്റ് ചെയ്തത്. അറസ്റ്റിലായവരെ പോലീസ് ജീപ്പിൽ സ്റ്റേഷനിലേക്ക് കൊണ്ടു പോകുന്നത് പ്രവർത്തകർ തടഞ്ഞു. വാഹനത്തിന് മുന്നിൽ നിരന്നുനിന്ന് പ്രതിരോധം തീർക്കുകയായിരന്നു. ഇത് പോലീസും പ്രവർത്തകരും തമ്മിലുള്ള ഉന്തിലും തള്ളിലും കലാശിച്ചു. പോലീസ് സംയമനം പാലിച്ചതിനാലാണ് ലാത്തിച്ചാർജ് ഒഴിവായത്. ഇതിനിടെ നേതാക്കൾ ഇടപെട്ട് പ്രവർത്തകരെ ശാന്തരാക്കി വാഹനത്തിന് കടന്നു പോകാൻ സൗകര്യമൊരുക്കുകയായിരുന്നു. അറസ്റ്റിലായവരെ സ്റ്റേഷൻ ജാമ്യത്തിൽ വിട്ടയച്ചു.

വോർക്കാടിയിൽ വീടിനുനേരെ വെടിവയ്പ്; ജനൽച്ചില്ല് തകർന്നു

മഞ്ചേശ്വരം: വോർക്കാടിയിൽ അർധരാത്രിക്കുശേഷം വീടിനുനേരെ വെടിവയ്പ്. നല്ലങ്കിപദവിലെ ബി.എം. ഹരീഷിന്‍റെ വീടിനു നേരെയാണ് ഇന്നലെ പുലർച്ചെ രണ്ടരയോടെ അജ്ഞാതസംഘം വെടിയുതിർത്തത്. വെടിയേറ്റ് വീടിന്‍റെ ജനൽച്ചില്ല് തകർന്നു. ശബ്ദംകേട്ട് വീട്ടുകാർ ഉണർന്നുനോക്കിയപ്പോൾ ഒരു കാറും ബൈക്കും സ്റ്റാർട്ട് ചെയ്ത് പോകുന്നത് കണ്ടതായി ഹരീഷ് മഞ്ചേശ്വരം പോലീസിൽ നല്കിയ പരാതിയിൽ പറഞ്ഞു. പോലീസും ഫോറൻസിക് വിദഗ്ധരും സ്ഥലത്തെത്തി പരിശോധന നടത്തി. ജനൽച്ചില്ലിൽ വെടിയുണ്ട തുളച്ചുകയറിയതിന്‍റെ പാടുകൾ സ്ഥിരീകരിച്ചു. കരുതിക്കൂട്ടിയുള്ള ആക്രമണമാണോ അതോ കാട്ടുപന്നിയെ വെടിവയ്ക്കാനെത്തിയ നായാട്ടുസംഘത്തിന് ലക്ഷ്യം തെറ്റിയതാണോ എന്ന കാര്യത്തിൽ അന്വേഷണം നടക്കുകയാണ്. പ്രദേശത്ത് രാത്രികാലങ്ങളിൽ നായാട്ടുസംഘങ്ങൾ സജീവമാണെന്ന് പോലീസിന് വിവരം ലഭിച്ചിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]