വര്‍ണക്കൂടാരം ഉദ്ഘാടനം ചെയ്തു

നെയ്യാറ്റിൻകര: നല്ലൂര്‍വട്ടം ഗവ. എല്‍പി സ്കൂളില്‍ പ്രീ പ്രൈമറി വിഭാഗത്തിനായി സ്റ്റാര്‍സ് പദ്ധതി പ്രകാരം നിര്‍മിച്ച വർണക്കൂടാരം കെ. ആന്‍സലന്‍ എംഎല്‍എ ഉദ്ഘാടനം ചെയ്തു. പാറശാല ബ്ലോക്ക് പഞ്ചായത്ത് പ്രസിഡന്‍റ് അഡ്വ. എസ്.കെ. ബെന്‍ ഡാര്‍വിന്‍, കുളത്തൂര്‍ പഞ്ചായത്ത് പ്രസിഡന്‍റ് ഗീതാ സുരേഷ്, ജനപ്രതിനിധികള്‍, അധ്യാപകര്‍, രക്ഷിതാക്കള്‍ എന്നിവര്‍ പങ്കെടുത്തു.

ADVERTISEMENT

പതിനാലുകാരിയെ ഗർഭിണിയാക്കിയ കേസിൽ പ്രതി കുറ്റക്കാരൻ; ശിക്ഷ തിങ്കളാഴ്ച

തിരുവനന്തപുരം: പതിനാലുകാരിയെ പീഡിപ്പിച്ചു ഗർഭിണിയാക്കിയ കേസിൽ പ്രതി കുറ്റക്കാരനെന്ന് തിരുവനന്തപുരം അതിവേഗ കോടതി ജഡ്ജി അഞ്ജു മീര ബിർള കണ്ടത്തി. തിങ്കളാഴ്ച ശിക്ഷ വിധിക്കും. 2022 നവംബർ ഒന്പതിന് രാത്രി ഏഴോടെ ചാലയിലാണ് കേസിന് ആസ്പദമായ സംഭവം നടന്നത്. എട്ടാം ക്ലാസിൽ പഠിക്കുകയായിരുന്ന കുട്ടിയുമായി പ്രതി അടുപ്പത്തിലായിരുന്നു. സംഭവ ദിവസം പ്രതി കുട്ടിയെ വീടിനടുത്തുള്ള പൊളിഞ്ഞ മുറിയിൽ ബലം പ്രയോഗിച്ചു കൊണ്ടു പോയി പീഡിപ്പിക്കുകയായിരുന്നു. പീഡനത്തെ തുടർന്ന് കുട്ടി ഗർഭിണി ആയി. ആശുപത്രിയിൽ ചികിത്സക്കു പോയപ്പോഴാണ് ഡോക്ടർ പോലീസിനെ വിവരം അറിയിച്ചത്. തുടർന്ന് കുട്ടിക്കു ഗർഭഛിദ്രം നടത്തി. കുട്ടിക്കു പതിനാലു വയസ് ആയതിനാൽ സുരക്ഷ പരിഗണിച്ച് ഡോക്ടർമാർ കൂടിയാലോചിച്ച് ഗർഭഛിദ്രം നടത്താൻ തീരുമാനിക്കുകയായിരുന്നു. ഗർഭഛിദ്രം നടത്തിയപ്പോൾ കിട്ടിയ ഭ്രൂണവും പ്രതിയുടെയും കുട്ടിയുടെയും രക്തസാന്പിളുകളും ഡിഎൻഎ പരിശോധനയ്ക്ക് അയച്ചു. പരിശോധനയിൽ ഭ്രൂണം പ്രതിയുടേതും കുട്ടിയുടേതുമാണെന്ന് ശാസ്ത്രീയമായി തെളിഞ്ഞിരുന്നു. ഇതിനു പുറമേ പ്രതിക്കു പ്രായപൂർത്തിയാകുന്നതിനു മുന്പു കുട്ടിയെ പീഡിപ്പിച്ചതിന് ജുവനൈൽ കോടതിയിൽ ഒരു കേസുണ്ട് ഈ കേസിൽ ജാമ്യത്തിൽ ഇറങ്ങിയതിനു ശേഷം പ്രതി വീണ്ടും കുട്ടിയെ ബലം പ്രയോഗിച്ചു തട്ടിക്കൊണ്ടു പോയി മണക്കാടുള്ള ഒരു ഒഴിഞ്ഞ വീട്ടിൽ കൊണ്ടു പോയി കേസ് കൊടുത്തതിന് മർദിക്കുകയും തുടർന്ന് പീഡിപ്പിക്കുകയും ചെയ്തു. ഈ കേസിന്‍റെ വിചാരണ ഇതേ കോടതിയിൽ നടന്നു വരികയാണ്. പ്രോസിക്യൂഷൻ വേണ്ടി സ്പെഷൽ പബ്ലിക് പ്രോസിക്യൂട്ടർ ആർ.എസ്. വിജയ് മോഹൻ ഹാജരായി. ഫോർട്ട് സിഐ ജെ. രാകേഷ് അന്വേഷണം നടത്തി.

പരിശീലന പരിപാടി ഉദ്ഘാടനം ചെയ്തു

നെടുമങ്ങാട് : വനിതാ കമ്മീഷന്‍റെ നേതൃത്വത്തിൽ വെള്ളനാട് ബ്ലോക്ക്‌ പഞ്ചായത്തിൽ ജാഗ്രതാ സമിതി അംഗങ്ങൾക്കായി പരിശീലന പരിപാടി കമ്മീഷൻ ചെയർപേഴ്‌സൺ അഡ്വ. പി. സതീദേവി ഉദ്ഘാടനം ചെയ്തു. കമ്മിഷന്‍റെ പ്രവർത്തനങ്ങളിൽ സുപ്രധാനമായ പരിപാടിയാണ് ജാഗ്രതാ സമിതി അംഗങ്ങൾക്ക് നൽകുന്ന പരിശീലനമെന്ന് ചെയർപേഴ്സൺ പറഞ്ഞു. ബ്ലോക്ക്‌ പഞ്ചായത്ത്‌ ഹാളിൽ നടന്ന പരിപാടിയിൽ ബ്ലോക്ക്‌ പഞ്ചായത്ത്‌ പ്രസിഡന്‍റ് എസ്. ഇന്ദുലേഖ അധ്യക്ഷത വഹിച്ചു. വെള്ളനാട് പഞ്ചായത്ത് പ്രസിഡന്‍റ് കെ.എസ്. രാജലക്ഷ്മി, കാട്ടാക്കട പഞ്ചായത്ത് പ്രസിഡന്‍റ് കെ. അനിൽ കുമാർ, കുറ്റിച്ചൽ പഞ്ചായത്ത് പ്രസിഡന്‍റ് ജി. മണികണ്ഠ‌ൻ, വെള്ളനാട് ബ്ലോക്ക് പഞ്ചായത്ത് വികസനകാര്യ സ്‌റ്റാൻഡിംഗ് കമ്മിറ്റി ചെയർപേഴ്‌സൺ സരള ടീച്ചർ, ആരോഗ്യ വിദ്യാഭ്യാസ സ്‌റ്റാൻഡിംഗ് കമ്മിറ്റി ചെയർപേഴ്‌സൺ ഉഷാ വിൻസന്‍റ് , വനിതാ കമ്മീഷൻ സീനിയർ സുപ്രണ്ട് ഡോ. എസ്. എൽ. പ്രതാപൻ, കാര്യവട്ടം ക്യാമ്പസ് അസിസ്റ്റന്‍റ് പ്രൊഫസർ ഡോ. എസ്. ജി. ബീനമോൾ, വെള്ളനാട് ഐസിഡിഎസ് ശിശുവികസനപദ്ധതി ഓഫീസർ എസ്.ലേഖ എന്നിവർ പങ്കെടുത്തു.

കരമന-പൂജപ്പുര റോഡിലെ അനധികൃത കൈയേറ്റങ്ങൾ മൂന്നു മാസത്തിനകം ഒഴിപ്പിക്കണം: മനുഷ്യാവകാശ കമ്മീഷൻ

തിരുവനന്തപുരം: കരമന-പൂജപ്പുര റോഡിന്‍റെ ഇരുവശങ്ങളും കൈയേറി അനധികൃത കച്ചവടം വ്യാപകമാണെന്ന് പരാതി ഉയർന്ന സാഹചര്യത്തിൽ മൂന്നു മാസത്തിനകം കൈയേറ്റം ഒഴിപ്പിക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ് ഉത്തരവിട്ടു. നഗരസഭാ പരിധിയിലുള്ള റോഡിൽ കാൽനട യാത്രക്കാർക്കും വാഹനങ്ങൾക്കും തടസം സൃഷ്ടിക്കുന്ന കൈയേറ്റങ്ങൾ നഗരസഭ ഒഴിപ്പിക്കണം. പൊതുമരാമത്ത് റോഡിലെ കൈയേറ്റങ്ങൾ ഒഴിപ്പിക്കാൻ എക്സിക്യൂട്ടീവ് എൻജിനീയർ നടപടിയെടുക്കണമെന്നും ജസ്റ്റിസ് അലക്സാണ്ടർ തോമസ് ആവശ്യപ്പെട്ടു. അതിനു മുന്പ് പരാതിക്കാരെയും കൈയേറ്റം നടത്തിയതായി ആരോപിക്കപ്പെടുന്നവരെയും കേൾക്കണം. സ്ഥലപരിശോധനയും നടത്തണം. കരമന, പൂജപ്പുര റോഡിലെ അനധികൃത കൈയേറ്റങ്ങൾക്കെതിരെ കോഓർഡിനേഷൻ ഓഫ് തമലം റസിഡൻസ് സെക്രട്ടറി ജി. സുരേന്ദ്രൻ സമർപ്പിച്ച പരാതിയിലാണ് ഉത്തരവ്. പൂജപ്പുര മുതൽ കുഞ്ചാലുംമൂട് വരെ റോഡിന്‍റെ ഇരുവശങ്ങളിലും അനധികൃത കൈയേറ്റങ്ങൾ വ്യാപകമാണെന്നും കൈയേറ്റങ്ങൾ ഒഴിവാക്കി ഗതാഗതം സുഗമമാക്കാൻ 17 സ്ഥാപനങ്ങൾക്ക് നോട്ടീസ് നൽകിയിട്ടുണ്ടെന്നും നഗരസഭാ സെക്രട്ടറി കമ്മീഷനെ അറിയിച്ചു. എന്നാൽ നഗരസഭയുടെ നോട്ടീസിന് സ്ഥാപന ഉടമകൾ യാതൊരു വിലയും കൽപ്പിക്കാറില്ലെന്നും നടപ്പാതകളും ടാറും കൈയേറുന്ന സാഹചര്യമുണ്ടെന്നും പരാതിക്കാർ അറിയിച്ചു.

ആത്മബോധമുണർത്താൻ സംഗീതം അനിവാര്യം: മന്ത്രി കടന്നപ്പള്ളി രാമചന്ദ്രൻ

തിരുവനന്തപുരം: മനുഷ്യമനസിനെ വിമലീകരിക്കാനും മദ്യപാനം തുടങ്ങിയ ലഹരി ഉപയോഗത്തെ പ്രതിരോധിക്കാനും സംഗീത ഉപാസന സഹായിക്കുമെന്ന് മന്ത്രി കടന്നപ്പള്ളി രാമചന്ദ്രൻ. ഗുരുവായൂർ ദേവസ്വം ചെന്പൈ സംഗീതോത്സവത്തിന്‍റെ സുവർണ ജൂബിലി ആഘോഷങ്ങളുടെ ഭാഗമായി ശ്രീവരാഹം ചെന്പൈ മെമ്മോറിയൽ ഹാളിൽ നടന്ന ആഘോഷ ചടങ്ങ് ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. സംസ്ഥാനത്തിന്‍റെ ആറു കേന്ദ്രങ്ങളിലായി നടത്തുന്ന സുവർണ ജൂബിലി ആഘോഷങ്ങളുടെ രണ്ടാമത്തെ പരിപാടിയാണ് ചെന്പൈ സ്മാരക ട്രസ്റ്റിന്‍റെ ആഭിമുഖ്യത്തിൽ സംഘടിപ്പിച്ചത്. സംഗീതവഴിയിൽ ജാതിമത ഭേദങ്ങളോ രാഷ്ട്രീയമോ ഇല്ല. സംഗീതത്തിന്‍റെ ആത്മചൈതന്യമാണ് ചെന്പൈ എന്നും കടന്നപ്പള്ളി രാമചന്ദ്രൻ പറഞ്ഞു. പ്രപഞ്ച സംഗീതം ആവാഹിച്ച് തീർഥമായി ആസ്വാദകർക്കു നല്കുന്നവരാണ് മഹാസംഗീതജ്ഞർ എന്ന് ചെന്പൈ അനുസ്മരണ പ്രഭാഷണത്തിൽ കവി പ്രഫ. വി. മധുസൂദനൻ നായർ പറഞ്ഞു. വിശ്വസംഗീതധാര ആത്മാവിൽ ആവാഹിച്ച മഹാപുരുഷന്മാരിൽ ഏറ്റവും സ്മരണീയനാണ് ചെന്പൈ വൈദ്യനാഥ ഭാഗവതർ കേരളത്തിന്‍റെ മഹത്തായ സംഗീതപാരന്പര്യത്തെ വരുംതലമുറകളിലേക്കു പകർന്ന് നല്കാനുള്ള സാംസ്കാരികയജ്ഞം അനിവാര്യമാണ്. മൂല്യവത്തായ പുതിയ തലമുറയെ വാർത്തെടുക്കുവാൻ ഇത്തരം സാംസ്കാരിക മുന്നേറ്റങ്ങൾ നടത്തണം എന്നും വി. മധുസൂദനൻ നായർ വ്യക്തമാക്കി. ചടങ്ങിൽ ഗുരുവായൂർ ദേവസ്വം ചെയർമാൻ ഡോ. വി. കെ. വിജയൻ അധ്യക്ഷത വഹിച്ചു. ആന്‍റണി രാജു എംഎൽഎ മുഖ്യാതിഥി ആയിരുന്നു. ചടങ്ങിൽ മുതിർന്ന സംഗീതജ്ഞരായ പ്രഫ. രുഗ്മിണി ഗോപാലകൃഷ്ണൻ, ലളിത ഗോപാലൻ നായർ, പ്രഫ. എസ്. ബാലമ്മാൾ, ചേർത്തല എം.കെ. രാമചന്ദ്രൻ, പാർവതിപുരം പദ്മനാഭ അയ്യർ എന്നിവരെ മന്ത്രി ആദരിച്ചു. കൗണ്‍സിലർമാരായ കെ. കെ. സുമേഷ്, ഹരികുമാർ, ദേവസ്വം ഭരണസമിതി അംഗങ്ങളായ സി. മനോജ്, മനോജ് ബി. നായർ, കെ. എസ്. ബാലഗോപാൽ എന്നിവർ പങ്കെടുത്തു. ദേവസ്വം ഭരണസമിതി അംഗം കെ.പി. വിശ്വനാഥൻ സ്വാഗതം ആശംസിച്ചു. അഡ്മിനിസ്ട്രേറ്റർ ഒ. ബി. അരുണ്‍കുമാർ കൃതജ്ഞത പറഞ്ഞു. തുടർന്ന് വിഘ്നേഷ് ഈശ്വറിന്‍റെ സംഗീത കച്ചേരി നടന്നു. ചെന്പൈ സംഗീതോത്സവത്തിന്‍റെ ഭാഗമായി 21 വരെ എല്ലാ ദിവസവും വൈകുന്നേരം 6.15 മുതൽ പ്രമുഖ സംഗീതജ്ഞരുടെ കർണാടക സംഗീത കച്ചേരി നടക്കും.

കടകംപള്ളിക്ക് എതിരേയുള്ള പരാതി പോലീസ് കമ്മീഷണർക്ക് കൈമാറി

തിരുവനന്തപുരം: മുൻ മന്ത്രിയും സിപിഎം എംഎൽഎയുമായ കടകംപള്ളി സുരേന്ദ്രനെതിരേ സംസ്ഥാന പോലീസ് മേധാവിക്കു ലഭിച്ച പരാതി തിരുവനന്തപുരം സിറ്റി പോലീസ് കമ്മീഷണർക്കു കൈമാറി. ഇതിന്‍റെ അടിസ്ഥാനത്തിൽ സിറ്റി പോലീസ് കമ്മീഷണർ പ്രാഥമിക പരിശോധന തുടങ്ങി. ആരോപണം ഉന്നയിച്ച ഇരയായ യുവതിയുടെ മൊഴിയെടുക്കുമോ എന്നു വ്യക്തമല്ല. പോലീസ് മൊഴിയെടുപ്പിൽ ഇര ആരോപണത്തിൽ ഉറച്ചു നിന്നാൽ കേസെടുക്കേണ്ടി വരും. തിരുവനന്തപുരം ഡിസിസി വൈസ് പ്രസിഡന്‍റും പോത്തൻകോട് ബ്ലോക്ക് പഞ്ചായത്ത് മുൻ പ്രസിഡന്‍റുമായ എം. മുനീറാണ് പരാതിക്കാരൻ. കടകംപള്ളി മോശമായി സംസാരിക്കുകയും സമീപിക്കുകയും ചെയ്തുവെന്നാണ് സ്ത്രീയുടെ വെളിപ്പെടുത്തൽ. മന്ത്രിമന്ദിരത്തിൽ ശിപാർശയുമായി എത്തിയ യുവതിയോടു മഴകോട്ട് ഇട്ട് തന്‍റെ അടുത്തേക്കു വരാൻ പറയുന്ന ഓഡിയോ സന്ദേശവും കൈമാറിയിരുന്നു. പരാതിക്കാരി നേരിട്ടു പരാതിയോ മൊഴിയോ നൽകിയാൽ മാത്രം കേസെടുത്ത് അന്വേഷണം നടത്തിയാൽ മതിയെന്നായിരുന്നു പോലീസിന്‍റെ ആദ്യ നിലപാട്.

യുവാവിനെ കൊലപ്പെടുത്തിയ കേസിൽ പ്രതിക്ക് ജീവപര്യന്തം കഠിനതടവ്

തിരുവനന്തപുരം: യുവാവിനെ ക്രിക്കറ്റ് ബാറ്റ് കൊണ്ടു തലയ്ക്കടിച്ചു കൊലപ്പെടുത്തിയ കേസിൽ പ്രതിക്ക് ജീവപര്യന്തം കഠിനതടവും ഒരു ലക്ഷം രൂപ പിഴയും ശിക്ഷ. തിരുവനന്തപുരം അഞ്ചാം അഡീഷണൽ സെഷൻസ് ജഡ്ജി സിജു ഷെയ്ഖ് ആണു ശിക്ഷ വിധിച്ചത്. പിഴ അടച്ചില്ലെങ്കിൽ ഒരു വർഷംകൂടി കഠിനതടവ് അനുഭവിക്കണം. മംഗലപുരം വെയിലൂർ കോട്ടറക്കരി കൊല്ലുമല വീട്ടിൽ ജയകുമാറി (40) നെ കൊലപ്പെടുത്തിയ കേസിൽ വെയിലൂർ കോട്ടറകരി നിസാർ മൻസിലിൽ സജീർ (40)നെ ആണു ശിക്ഷിച്ചത്. 2008 ഡിസംബർ 19 നു രാത്രി എട്ടിനു ശേഷമായിരുന്നു കേസിനാസ്പദമായ സംഭവം നടക്കുന്നത്. കോട്ടറക്കരി ജംഗ്ഷനിൽ യംഗ്‌മെൻസ് ക്ലബിനു സമീപം ക്രിസ്മസ് ആഘോഷവുമായി ബന്ധപ്പെട്ട് പുൽക്കൂട് നിർമിച്ചുകൊണ്ടിരിക്കുന്പോൾ ജയകുമാർ പ്രതിയുടെ ഇരട്ടപ്പേരു വിളിച്ചതിന്‍റെ വൈരാഗ്യത്തിൽ ക്ലബിനകത്തു സൂക്ഷിച്ചിരുന്ന ക്രിക്കറ്റ് ബാറ്റ് എടുത്ത് കൊണ്ടുവന്നു പ്രതി സജീർ ജയകുമാറിന്‍റെ തലയ്ക്കടിക്കുകയായിരുന്നു. നാട്ടുകാർ ജയകുമാറിനെ തിരുവനന്തപുരം മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടർ ബി.എസ്. രാജേഷ് അഭിഭാഷകരായ എ. ബീനാകുമാരി, എം.എസ്. ലക്ഷ്മി എന്നിവർ ഹാജരായി.

അയ്ങ്കാമം എല്‍പി സ്‌ക്കൂളില്‍ വര്‍ണക്കൂടാരം ആരംഭിച്ചു

പാറശാല: പ്രീപ്രൈമറി വിദ്യഭ്യാസം അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്‍റെ ഭാഗമായി പാറശാല ബിആര്‍സിയുടെ നേതൃത്വത്തിൽ പത്ത് ലക്ഷം രൂപ ചിലവഴിച്ച് പണികഴിപ്പിച്ച വര്‍ണക്കൂടാരം അയ്ങ്കാമം ഗവ. എല്‍പി സ്കൂളിൽ പ്രവര്‍ത്തനം ആരംഭിച്ചു. ഉദ്ഘാടനം സി.കെ. ഹരീന്ദ്രന്‍ എംഎല്‍എ നിര്‍വ്വഹിച്ചു. പഞ്ചായത്ത് പ്രസിഡന്‍റ് എല്‍. മഞ്ജുസ്മിത അധ്യക്ഷത വഹിച്ചു. മുഖ്യപ്രഭാഷണം ബ്ലോക്ക് പഞ്ചായത്ത് പ്രസിഡന്‍റ് അഡ്വ. എസ്. കെ. ബെന്‍ഡാര്‍വിന്‍ നടത്തി. പദ്ധതി വിശദീകരണം ബിപിസി എസ്. ആര്‍. പത്മജ നിര്‍വഹിച്ചു. ആശംസകള്‍ നേര്‍ന്നുകൊണ്ട് പഞ്ചായത്ത് വൈസ് പ്രസിഡന്‍റ് ആര്‍. ബിജു, ബ്ലോക്ക് പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷ വിനിതകുമാരി, ഗ്രാമപഞ്ചായത്ത് സ്ഥിരംസമിതി അധ്യക്ഷരായ അനിതാറാണി, വീണ, ഗ്രാമപഞ്ചായത്ത് അംഗങ്ങളായ മഹിളകുമാരി,സുധാമണി, വൈ. എസ്.ബിനിത , ബീജ, അജി റാണി. ചെറുവാരക്കോണം സർവീസ് സഹകരണ ബാങ്ക് പ്രസിഡന്‍റ് അശോകന്‍ , പിടിഎ പ്രസിഡന്‍റ് പി. ലിജു, പ്രധാന അധ്യാപിക കെ.ഷെറീന തുടങ്ങിയവര്‍ സംസാരിച്ചു.

കുട്ടിപ്പോലീസ് പെയിന്‍റടിച്ചു; കാത്തിരിപ്പു കേന്ദ്രം പുത്തനായി

വിതുര: ബോണക്കാട് ഫാക്ടറി ജംഗ്ഷനിലെ ബസ് കാത്തിരിപ്പു കേന്ദ്രം പെയിന്‍റ് ചെയ്ത് പുത്തനാക്കി വിതുര വിഎച്ച്എസ്എസിലെ സ്റ്റുഡന്‍റ് പോലീസ് കേഡറ്റുകൾ. എസ്‌പിസി സംസ്ഥാന തലത്തിൽ നടത്തിയ ത്രിദിന ഓണം ക്യാമ്പിനോടനുബന്ധിച്ച് സംഘടിപ്പിച്ച ഫീൽഡ് വിസിറ്റിന്‍റെ ഭാഗമായാണ് പെയിന്‍റിംഗ്. ആക്രി വിറ്റും ഭക്ഷണ ചലഞ്ചുകൾ നടത്തിയും കണ്ടെത്തിയ തുക ഉപയോഗിച്ചാണ് കേഡറ്റുകൾ ബസ് സ്റ്റോപ്പ്‌ പെയിന്‍റ് ചെയ്തത്. ഫീൽഡ് വിസിറ്റിന്റെ ഭാഗമായി പ്രകൃതി നടത്തവും നടത്തി. ലയങ്ങളിൽ എത്തി തോട്ടം തൊഴിലാളികളുമായി സംവദിച്ച ശേഷമാണ് കുട്ടികൾ മടങ്ങിയത്. സീനിയർ-ജൂനിയർ വിഭാങ്ങളിലെ 88 കേഡറ്റുകളാണ് പങ്കെടുത്തത്. മൂന്നു ദിവസത്തെ അവധിക്കാല ക്യാമ്പ് പഞ്ചായത്ത്‌ പ്രസിഡന്‍റ് മഞ്ജുഷ.ജി. ആനന്ദ് ഉദ്ഘാടനം ചെയ്തു. പിടിഎ പ്രസിഡന്‍റ് ആർ.രവിബാലൻ പതാകയുയർത്തി. മൂന്നു ദിവസത്തെ ക്യാമ്പിൽ വ്യക്തിത്വ വികസനം, ഡിജിറ്റൽ ലിറ്ററസി, സൈബർ സുരക്ഷ തുടങ്ങി വിവിധ സെഷനുകൾ ചർച്ച ചെയ്തു. സമാപന ചടങ്ങ് വിതുര എസ്എച്ച് പ്രദീപ് കുമാർ ഉദ്ഘാടനം ചെയ്തു.

മേലാരിയോട് വിശുദ്ധ മദര്‍ തെരേസാ ദേവാലയത്തില്‍ തിരുസ്വരൂപ പ്രദക്ഷിണം ഇന്ന്

നെയ്യാറ്റിന്‍കര : മദര്‍ തെരേസയുടെ നാമഥേയത്തിലെ ലോകത്തിലെ ആദ്യ ദേവാലയമായ നെയ്യാറ്റിന്‍കര രൂപതയിലെ മേലാരിയോട് വിശുദ്ധ മദര്‍ തെരേസാ തീര്‍ഥാടന ദേവാലയത്തില്‍ തിരുസ്വരൂപ പ്രദക്ഷിണം ഇന്ന് നടക്കും. വൈകിട്ട് 7 മണിക്ക് ആഘേ.ഷമായ ദിവ്യബലി തുടര്‍ന്ന പളളിയങ്കണത്തില്‍ നിന്ന് ആരംഭിക്കുന്ന പ്രദക്ഷിണം മേലാരിയോട് കുരിശടി ജംഗ്ഷനില്‍ പോയി തിരികെ ദേവാലയത്തില്‍ എത്തിച്ചേരും. നാളെ വൈകുന്നേരം 7 നാണ് ആഘോഷമായ സമാപന ദിവ്യബലി, തുടര്‍ന്ന് ദിവ്യകാരുണ്യ പ്രദക്ഷിണം നടക്കും.

വനിതാ ജീവനക്കാർക്കൊപ്പം സെൽഫിയെടുത്ത് കളക്ടർ

പേരൂര്‍ക്കട: സ്ത്രീകളുടെ സുരക്ഷയ്ക്കും ശാക്തീകരണത്തിനുമായി ജില്ലയില്‍ നടത്തുന്ന സങ്കല്‍പ്പ് പദ്ധതിയുടെ പ്രചാരണത്തിന്‍റെ ഭാഗമായി കളക്ടറേറ്റില്‍ അണിനിരന്ന വനിതാ ജീവനക്കാർ ജില്ലാകളക്ടര്‍ അനുകുമാരിക്കൊപ്പം സെല്‍ഫിക്ക് പോസ് ചെയ്തു. വനിത ശിശുവികസന വകുപ്പിന്‍റെ ആഭിമുഖ്യത്തിലാണ് സിവില്‍സ്റ്റേഷനിലെ വനിതാ ജീവനക്കാര്‍ കളക്ടര്‍ക്കൊപ്പം സെല്‍ഫിയെടുത്തത്. 10 ദിവസം നീണ്ടുനില്‍ക്കുന്ന പ്രചാരണ പരിപാടികളാണ് ജില്ല, ബ്ലോക്ക്, പഞ്ചായത്ത് തലത്തില്‍ സംഘടിപ്പിക്കുന്നത്. സമൂഹത്തില്‍ ശക്തമായ സാന്നിധ്യം അറിയിക്കുന്ന വനിതകളുമായുള്ള സെല്‍ഫി പ്രോഗ്രാം 30 വരെ ജില്ലയിലുടനീളം തുടരും. സങ്കല്‍പ്പ് ജില്ലാ മിഷന്‍ കോ-ഓര്‍ഡിനേറ്റര്‍ നീതു എസ്. സൈനുവാണ് പരിപാടിക്ക് നേതൃത്വം വഹിക്കുന്നത്.

അനധികൃത അരിഷ്ടം പിടികൂടി

പൂവാർ: മദ്യം കലർത്തി വിൽപ്പന നടത്തിവന്ന അരിഷ്ടം പിടികൂടി. പൂവാർ മെഡിഗാർഡ് ഫാർമസ്യൂട്ടിക്കൽസ് ഏജൻസിയിൽ നിന്നാണ് അനധികൃത അരിഷ്ടം പിടികൂടിയത്. നെയ്യാറ്റിൻകര എക്സൈസ് സംഘം നടത്തിയ പരിശോധനയിൽ സ്ഥാപനത്തിന് നിയമാനുസൃതമായ ലൈസൻസുകൾ ഒന്നും ഇല്ലെന്ന് കണ്ടെത്തി.നാലോളം കമ്പനികളുടെ അരിഷ്ടങ്ങളാണ് പിടികൂടിയത്. കൂടാതെ 9350 രൂപയും കണ്ടെടുത്തു. തുടർന്ന് സ്ഥാപനം എക്സെസ് പൂട്ടിച്ചു. ഡോക്ടറുടെ കുറുപ്പടി ഇല്ലാതെയാണ് അരിഷ്ട വില്പന നടത്തിയതെന്ന് റെയ്ഡിന് നേതൃത്വം നൽകിയ നെയ്യാറ്റിൻകര എക്സൈസ് സർക്കിൾ ഇൻസ്പെക്ടർ വിനോദ്, ഇൻസ്പെക്ടർ അജയകുമാർ എന്നിവർ വ്യക്തമാക്കി. അനധികൃത അരിഷ്ടം വിൽപ്പന നടത്തിയതിന് അനിൽകുമാർ, ഫാറൂഖ് എന്നിവരുടെ പേരിൽ കേസ് എടുത്തു. തീരപ്രദേശം ഉൾപ്പെടെ തൊട്ടടുത്ത ഗ്രാമമീണ മേഖലകൾ കേന്ദ്രീകരിച്ച് പാൻമസാലകളും അനധികൃത അരിഷ്ടം, കഞ്ചാവ് എന്നിവയുടെ വ്യാപാരം വ്യാപകമാണെന്ന് നാട്ടുകാർ പറയുന്നു. അധികൃതരുടെ മൂക്കിന് താഴെയാണ് അനധികൃത ലഹരി വസ്തുക്കളുടെ വ്യാപാരം പൊടിപൊടിക്കുന്നതെന്നും ആക്ഷേപമുണ്ട്. ലഹരി സംഘങ്ങളുടെ താവളമായി പൂവാർ മാറിയിട്ടും അധികൃതർ ജാഗ്രത പുലർത്തുന്നില്ലെന്നാണ് നാട്ടുകാർ പറയുന്നത്.

വിദ്യാര്‍ഥിനിയെ പീഡിപ്പിച്ചെന്ന പരാതിയിൽ യുവാവ് അറസ്റ്റിൽ

പേരൂര്‍ക്കട: കോളജ് വിദ്യാര്‍ഥിനിയെ പീഡിപ്പിച്ചെന്ന പരാതിയിൽ യുവാവിനെ മ്യൂസിയം പോലീസ് അറസ്റ്റുചെയ്തു. പത്തനംതിട്ട റാന്നി പൂവന്മല മേട്ടുങ്കല്‍ വീട്ടില്‍ ബ്രിജില്‍ ബ്രിജി (26) ആണ് അറസ്റ്റിലായത്. കണ്ണൂരിലെ ഒരു സ്വകാര്യ കോളജില്‍ ഇരുവരും ഫിസിയോതെറാപ്പിക്കു പഠിക്കുന്ന സമയത്താണ് പരസ്പരം കാണുന്നതും പരിചയപ്പെടുന്നതും. കോഴ്‌സിന്‍റെ ഭാഗമായി പാലാരിവട്ടത്ത് എത്തിയപ്പോഴാണ് തനിക്ക് ലൈംഗിക പീഡനം നേരിടേണ്ടിവന്നതെന്നും വിവാഹം കഴിക്കാമെന്ന് ഉറപ്പുനല്‍കിയിരുന്നുവെന്നും യുവതി പറയുന്നു. എന്നാല്‍ പിന്നീട് വിവാഹത്തില്‍ നിന്നു പിന്മാറിയ ബ്രിജില്‍ ബ്രിട്ടണിലേക്ക് പറക്കാന്‍ തയ്യാറെടുക്കുന്നതായി വിവരം ലഭിച്ചതോടെയാണ് യുവതി പരാതി നല്‍കാന്‍ തീരുമാനിച്ചത്. കന്‍റോണ്‍മെന്‍റ് എസി സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ സിഐ വിമല്‍, എസ്ഐമാരായ വിപിന്‍, ബാലസുബ്രഹ്‌മണ്യൻ, സൂരജ്, രാജേഷ്, സിപിഒമാരായ ഷൈന്‍, ഷീല, ദീപു, ഉദയന്‍, സുല്‍ഫി, സാജന്‍, അരുണ്‍, ഷിനി എന്നിവര്‍ അന്വേഷണസംഘത്തില്‍ ഉണ്ടായിരുന്നു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

വ്യാജ മോഷണക്കേസ്: ഒരാൾക്കു കൂടി ജാമ്യം

നെടുമങ്ങാട്: വീട്ടുജോലിക്കാരിക്കെതിരെ വ്യാജ മോഷണ കേസു ചുമത്തിയ സംഭവവമായി ബന്ധപ്പെട്ട് ഒരാൾക്കുകൂടി ജാമ്യം. വീട്ടു ജോലിക്കാരിയായ പനയമുട്ടം സ്വദേശി ബിന്ദു മാല മോഷ്ടിച്ചതായി കാട്ടി പേരൂര്‍ക്കട പൊലീസില്‍ പരാതി നല്‍കിയ വീട്ടുടമ ഓമന ഡാനിയേലിന്‍റെ മകള്‍ നിഷാ ഡാനിയേലിനാണ് ജാമ്യം ലഭിച്ചത്. നെടുമങ്ങാട് എസ്‌സിഎസ്ടി കോടതി മജിസ്ട്രേട്ട് എ. ഷാജഹാനാണ് ജാമ്യം അനുവദിച്ചത്. കേസിലെ മറ്റു പ്രതികളായ ഓമന ഡാനിയേലിനും പേരൂര്‍ക്കട എസ്ഐ പ്രസാദിനും നേരത്തേ ജാമ്യം ലഭിച്ചിരുന്നു. സ്റ്റേഷനിലെ എഎസ്ഐ പ്രസന്നന്‍ ഒഴിച്ചുള്ള മറ്റെല്ലാ പ്രതികള്‍ക്കും ജാമ്യം ലഭിച്ചു. പ്രസന്നന്‍ ഇനിയും കോടതിയില്‍ ജാമ്യാപേക്ഷ സമര്‍പ്പിച്ചിട്ടില്ല. കഴിഞ്ഞ ഏപ്രില്‍ ഇരുപതിനാണ് വീട്ടില്‍ നിന്നും മാലമോഷ്ടിച്ചുവെന്ന് ആരോപിച്ച് പേരൂര്‍ക്കട എന്‍സിസി നഗര്‍ ബഥേല്‍ വീട്ടില്‍ ഓമന ഡാനിയേല്‍ ബിന്ദുവിനെതിരെ പേരൂര്‍ക്കട പൊലീസില്‍ പരാതി നല്‍കിയത്.കസ്റ്റഡിയിലായ ബിന്ദുവിനെ പൊലീസ് മാനസികമായി പീഡിപ്പിച്ചതായി ആരോപണം ഉയര്‍ന്നതിനെ തുടര്‍ന്ന് എസ്ഐഎയും എഎസ്ഐയേയും സര്‍വീസില്‍ നിന്നും സസ്പെന്‍ഡു ചെയ്തിരുന്നു. കേസ് അന്വേഷിച്ച ക്രൈംബ്രാഞ്ച് മാലമോഷണ കേസ് കെട്ടിച്ചമച്ചതാണെന്ന് കണ്ടെത്തുകയും ചെയ്തിരുന്നു.

യുവതിയുടെ മരണം ചികിത്സാപ്പിഴവ് മൂലമെന്നു ബന്ധുക്കൾ

നെടുമങ്ങാട്: സ്വകാര്യ ആശുപത്രിയിൽ യുവതി മരിച്ചത് ചികിത്സാ പിഴവുമൂലമെന്നു ആരോപിച്ച് ബന്ധുക്കൾ. അരുവിക്കര വെമ്പന്നൂർ കുറുന്തോട്ടം ചിത്തിരയിൽ ഹരിയുടെ ഭാര്യ ആർ.ദീപ (38) ആണ് സ്വകാര്യ ആശുപത്രിയിൽ ശസ്ത്രക്രിയക്ക് വിധേയമായ ശേഷം മരിച്ചത്. പരാതിയെ തുടർന്ന് അരുവിക്കര പോലീസ് അസ്വാഭാവിക മരണത്തിന് കേസെടുത്തു. കഴിഞ്ഞ 10ന് പുലർച്ചെ വയറു വേദനയെ തുടർന്നാണ് ദീപ സ്വകാര്യ ആശുപത്രിയിൽ ചികിത്സ തേടിയത്.അന്നേ ദിവസം മരുന്ന് നൽകി വിട്ടു. രോഗം കുറയാത്തതോടെ വൈകുന്നേരം 4.30 ന് വീണ്ടും ആശുപത്രിയിൽ എത്തി. ഉടൻ ഡോക്ടറുടെ നിർദേശാനുസാരണം ശസ്ത്രക്രിയക്ക് വിധേയയായി. ശസ്ത്രക്രിയക്ക് ശേഷം രോഗിയുടെ മൃതദേഹമാണ് ലഭിച്ചതെന്നും ചികിത്സാ പിഴവാണെന്നും ബന്ധുക്കൾ ആരോപിച്ചു. ശസ്ത്രക്രിയ വിജയമാണെന്ന് ഡോക്ടർ പറഞ്ഞതിന് മൂന്ന് മണിക്കൂർ ശേഷം ഹൃദയസ്തംഭനം മൂലം ആണ് രോഗി മരിച്ചതെന്നു ആശുപത്രി അധികൃതർ അറിയിച്ചെന്നും ബന്ധുക്കൾ പറഞ്ഞു. ഇന്നലെ പുലർച്ചെയാണ് ദീപ മരിച്ചതായി ബന്ധുക്കളെ അറിയിച്ചത്. ആർഡിഓയുടെ സാന്നിധ്യത്തിൽ ഇൻക്വസ്റ്റ് നടത്തിയ മൃതദേഹം മെഡിക്കൽ കോളജ് ആശുപത്രിയിൽ പോസ്റ്റ്മോർട്ടം നടത്തി. അതേസമയം സ്കാൻ ചെയ്തപ്പോൾ ഉടനടി ശസ്ത്രക്രിയ ആവശ്യമായതിനെ തുടർന്നാണ് ശസ്ത്രക്രിയ നടത്തിയതെന്നും ഇതിന് മുൻപ് തന്നെ യുവതിയുടെ നില ഗുരുതരം ആണെന്ന് ബന്ധുക്കളോട് പറഞ്ഞിരുന്നതായും ആശുപത്രി അധികൃതർ പറഞ്ഞു. വെന്‍റിലേറ്ററിലേക്ക് മാറ്റിയാണ് ശസ്ത്രക്രിയ നടത്തിയതെന്നും 48 മണിക്കൂർ കഴിഞ്ഞാൽ മാത്രമേ അപകട നിലതരണം ചെയ്യുകയുള്ളൂ എന്നും ബന്ധുക്കളെ അറിയിച്ചിരുന്നതായും ചികിത്സാപ്പിഴവല്ലെന്നും ആശുപത്രി അധികൃതർ പറഞ്ഞു. അഭിനന്ദനയാണ് ദീപയുടെ മകൾ.

പൈപ്പ് പൊട്ടി മാന്‍ഹോളിലൂടെ ജലം പാഴാകുന്നു

പേരൂര്‍ക്കട: പൈപ്പ് പൊട്ടി മാന്‍ഹോളിലൂടെ ജലം പാഴാകുന്നതിനാല്‍ വലിയശാല വാര്‍ഡിലെ ബാപ്പുജി നഗര്‍ മുളമൂട് ലെയിനില്‍ കുടിവെള്ളമില്ല. പ്രദേശത്തെ 250 കുടുംബങ്ങളാണ് കുടിവെള്ളമില്ലാതെ കഷ്ടപ്പെടുന്നത്. വെള്ളയമ്പലം ഒബ്‌സര്‍വേറ്ററിയില്‍ നിന്നാണ് മുളമൂട് ലെയിനിലേക്ക് കുടിവെള്ളം വിതരണം ചെയ്യുന്നത്. ജനങ്ങളുടെ പരാതിയെത്തുടര്‍ന്ന് വാട്ടര്‍ അഥോറിറ്റി ഉദ്യോഗസ്ഥര്‍ സ്ഥലത്തെത്തി പ്രാഥമിക പരിശോധന നടത്തി. പൈപ്പ് പൊട്ടി മാന്‍ഹോളിലൂടെ വന്‍തോതില്‍ ജലം പാഴാകുന്നതായി കണ്ടെത്തുകയും ചെയ്തു. മേട്ടുക്കടയില്‍ നിന്ന് ഇറങ്ങിവരുന്ന ഇടുങ്ങിയ റോഡാണ് മുളമൂട് ലെയിന്‍. അതുകൊണ്ടുതന്നെ പൈപ്പിന്‍റെ പണി ശ്രമകരമാണെന്നും വാഹനഗതാഗതം പൂര്‍ണമായി തടസപ്പെടുമെന്നും വാട്ടര്‍ അഥോറിറ്റി പറയുന്നു. അതേസമയം ഗതാഗതം കുറയുന്ന രാത്രിസമയത്ത് ജീവനക്കാര്‍ സ്ഥലത്തെത്തി പരിശോധന നടത്തുമെന്നും എന്നാല്‍ മാത്രമേ ഏതുപൈപ്പാണ് പൊട്ടിയതെന്ന് അറിയാന്‍ സാധിക്കുകയുള്ളൂവെന്നും പാളയം സെക്‌ഷന്‍ എഇ അറിയിച്ചു. പൈപ്പ് അറ്റകുറ്റപ്പണിക്കുവേണ്ടി റോഡ് കുഴിച്ച് പരിശോധന നടത്താന്‍ ആഴ്ചകള്‍ കഴിഞ്ഞിട്ടും വാട്ടര്‍ അഥോറിറ്റി ശ്രമം നടത്തിയില്ലെന്ന് വലിയശാല വാര്‍ഡ് കൗണ്‍സിലര്‍ എസ്. കൃഷ്ണകുമാര്‍ പറയുന്നു. അര്‍ധരാത്രി പിന്നിടുമ്പോള്‍ മാത്രം പൈപ്പിലൂടെ ലഭിക്കുന്ന വെള്ളം ശേഖരിച്ചുവച്ചാണ് അടുത്തദിവസം ഉപയോഗിക്കുന്നതെന്ന് പ്രദേശവാസികൾ പറയുന്നു.

ചന്ദനമരം മുറിച്ചു കടത്തിയവർ പിടിയിൽ

കുറ്റിച്ചൽ: പുരയിടത്തിൽ നിന്നും ചന്ദനമരം മുറിച്ചു കടത്തിയവരെ വനംവകുപ്പ് പിടികൂടി. ജയാ ഭവനിൽ ഗോപകുമാറിന്‍റെ പുരയിടത്തിൽ നിന്ന ചന്ദന മരം മുറിച്ചു കടത്തിയ വെള്ളനാട് സ്റ്റേഡിയം റോഡ് അമ്പിളിക്കുഴി സന്തോഷ് ഭവനിൽ അനിൽകുമാർ (43), വെള്ളനാട് കൊക്കോതമംഗലം കാർത്തിക ഭവനിൽ അനീഷ് (39) എന്നിവരാണ് പിടിയിലായത്. ഉറിയാകോട് മണലി വിള മാനൂർകോണം വിമൽ എന്ന ടിൻകു (37) , സന്ദീപ് എന്നിവർക്കായുള്ള അന്വേഷണം പുരോഗമിക്കുന്നു. 11 ന് രാത്രിയോടെ ആണ് ചന്ദന മരം മുറിച്ചത്. 16 കഷ്ണങ്ങളാക്കി ചെത്തിമിനുക്കി ഓട്ടോറിക്ഷയിൽ കടത്തിക്കൊണ്ടു പോകുമ്പോഴാണ് വനവകുപ്പ് ഇവരെ മുണ്ടേല കാണിക്കപ്പെട്ടയ്ക്ക് സമീപം പിടികൂടിയത്. 70 കിലോയോളം ചന്ദനവും ഇത് കടത്താൻ ഉപയോഗിച്ച ഓട്ടോറിക്ഷയും വന വകുപ്പ് കസ്റ്റഡിയിൽ എടുത്തു. ഫോറസ്റ്റ് ഇന്‍റലിജൻസിന് ലഭിച്ച വിവരത്തിന്‍റെ അടിസ്ഥാനത്തിൽ പരുത്തിപ്പള്ളി റേഞ്ച് ഓഫിസർ ശ്രീജു , ഡെപ്യൂട്ടി റേഞ്ച് ഓഫീസർ അനിൽകുമാർ,സെക്‌ഷൻ ഫോറസ്റ്റ് ഓഫീസർ പ്രദീപ്, ബിഎഫ്ഒ മാരായ റോയ് ജോൺസൺ, വിനോദ്, വാച്ചർ പ്രദീപ് കുമാർ തുടങ്ങിയവരാണ് പ്രതികളെ പിടികൂടിയത്. പ്രതികളെ കോടതിയിൽ ഹാജരാക്കി.

തകർന്നു വീഴാവുന്ന നിലയിൽ ബാരിക്കേഡുകൾ : മുക്കോലയിൽ പതിയിരിക്കുന്നത് അപകടം

വിഴിഞ്ഞം: കോവളം - കാരോട് ബൈപ്പാസിലെ സർവീസ് റോഡിൽ മുക്കോല ഭാഗത്ത് പതിയിരിക്കുന്നത് വൻ അപകടം .ജനത്തിന്‍റെ ജീവനും സ്വത്തിനും സുരക്ഷയൊരുക്കാൻ ലക്ഷ്യം വച്ച് നിർമിച്ച ബാരിക്കേഡുകളിൽ ചിലത് തുരുമ്പെടുത്തു നശിച്ചു. ഉറപ്പിച്ചിരുന്ന ആണികൾ ഇളകിമാറി ഏത് നിമിഷവും ഇവ തകർന്ന് വീഴാവുന്ന അവസ്ഥയിലുമായി. മുക്കോലയിൽ നിന്ന് ബാലരാമപുരത്തേക്ക് പോകുന്ന റോഡിലെ പാലത്തോട് ചേർന്നാണ് ഏപ്പോൾ വേണമെങ്കിലും തകർന്ന് വീഴാവുന്ന അവസ്ഥയിൽ ബാരിക്കേഡുള്ളത്. അൻപതടിയോളം താഴ്ചയിലൂടെ കടന്നുപോകുന്ന പ്രധാന ബൈ റോഡിൽ പതിക്കാതെ വാഹന യാത്രക്കാരുടേയും കാൽനടയാത്രക്കാരുടേയും സുരക്ഷ ഉറപ്പുവരുത്താനാണ് ബാരിക്കേഡുകൾ നിർമിച്ചത്. ഏറെ ഉയരമുള്ള സ്ഥലങ്ങളിലും ബാരിക്കേഡിന് രണ്ടടിയോളം മാത്രം പൊക്കമുള്ളതിൽ വ്യാപക പരാതി ഉയരുന്നതിനു പുറമേയാണ് ഇപ്പോഴത്തെ അവസ്ഥ. ബാരിക്കേഡുകളുടെ പൊക്കക്കുറവ് കാരണം നടന്ന് പോകുന്നതിനിടയിൽ അതിഥി തൊഴിലാളികളായ രണ്ട് പേർ നേരത്തെ കാൽ വഴുതി താഴ്ചയിലേക്ക് പതിച്ച സംഭവവും അരങ്ങേറിയിരുന്നു. ഗുരുതര പരിക്കേറ്റ ഇരുവരും രക്ഷപ്പെട്ടത് ഭാഗ്യം കൊണ്ട് മാത്രമായിരുന്നു. ഇരുചക്ര വാഹനവും ചരക്കു ലോറിയുംവരെ പൊക്കം കുറഞ്ഞ ബാരിക്കേഡുകൾ തകർത്ത് തിരക്കുള്ള ബൈ റോഡിലേക്ക് വീണ് യാത്രക്കാർക്ക് പരിക്കേറ്റ സംഭവങ്ങളും മുക്കോലഭാഗത്ത് അരങ്ങേറിയിരുന്നു. തലനാരിഴക്കാണ് എല്ലായ്പ്പോഴും വലിയ അപകടങ്ങൾ ഒഴിവായത്. പാലത്തിൽ നിന്ന് വാഹനങ്ങളും യാത്രക്കാരും വളവ് തിരിഞ്ഞ് വരുന്ന ഭാഗത്താണ് നിലവിലെ അപകടക്കെണി. കൂടാതെ പാലത്തിന്‍റെ വശങ്ങളിലെ തെരുവ് വിളക്കുകളുടെ അഭാവവും അപകടഭീഷണി കൂട്ടുന്നു. തുറമുഖ നിർമാണത്തിനുള്ള പാറക്കല്ലും മറ്റുമായി ദിനംപ്രതി നൂറ് കണക്കിന് ടിപ്പർ ലോറികൾ കടന്ന് പോകുന്ന ഇടുങ്ങിയ ഒറ്റവരിപ്പാതയാണ് സർവീസ് റോഡുകൾ. കൂറ്റൻ വാഹനങ്ങൾ വന്നാൽ വഴിയാത്രക്കാർക്ക് പോലും ഒന്ന് മാറി നിൽക്കാൻ ഇടമില്ലാത്ത തരത്തിലാണ് നിർമാണവും.

നിധി ആർട്സ് ആൻഡ് സ്പോട്സ് ക്ലബ് ഓണോത്സവവും വാര്‍ഷികവും

നെടുമങ്ങാട്: പൂവത്തൂർ പട്ടാളംമുക്കിൽ പ്രവര്‍ത്തിക്കുന്ന നിധി ആർട്സ് ആൻഡ് സ്പോട്സ് ക്ലബിന്‍റെ നിധി ഓണോത്സവും രണ്ടാം വാര്‍ഷികവും ബാലാദേവി ഉദ്ഘാടനം ചെയ്തു. രമേശ് കുമാറിന്‍റെ അധ്യക്ഷത വഹിച്ചു. യോഗിശിവൻ, മഹാകവി പൂവത്തൂർ ഭാർഗവൻ, കൗൺസിലർമാരായ ലേഖാ വിക്രമൻ, രാജേന്ദ്രൻ നായർ, താരാജയകുമാർ എന്നിവർ പ്രസംഗിച്ചു. എസ്. സുജിത്ത് കരുണാകരൻ റിപ്പോർട്ട് അവതരിപ്പിച്ചു. വിവിധ പരീക്ഷകളിൽ ഉന്നതവിജയം നേടിയ വിദ്യാർഥികളെയും വിശിഷ്ടവ്യക്തികളെയും ചടങ്ങിൽ ആദരിച്ചു.

മുഹമ്മദ് ബഷീര്‍ ബാബുവിന് സേവന പുരസ്‌കാരം നല്‍കി

തിരുവനന്തപുരം : കേരള മുസ്‌ലിം ജമാഅത്ത് കൗണ്‍സിലിന്‍റെ ദേശീയ കണ്‍വീനറും മുതിര്‍ന്ന പത്രപ്രവര്‍ത്തകനുമായ കലാപ്രേമി ബഷീര്‍ ബാബുവിനെ സേവന പുരസ്‌കാരം നല്‍കി കെഎംജെസി ആദരിച്ചു. വൈഎംസിഎ ഹാളില്‍ നടന്ന ചടങ്ങില്‍ പുരസ്‌കാരവും പൊന്നാടയും മന്ത്രി വി. ശിവന്‍കുട്ടി ബഷീര്‍ ബാബുവിനു സമ്മാനിച്ചു. കെഎംജെസി പ്രസിഡന്‍റ് കരമന ബയാര്‍ അധ്യക്ഷത വഹിച്ചു. കെപിസി സി മുന്‍ പ്രസിഡന്‍റ് കെ.മുരളീധരന്‍, മന്ത്രി മുഹമ്മദ് റിയാസ്, ദുബായിലെ പെര്‍ഫെക്റ്റ് ഗ്രൂപ്പ് മാനേജിംഗ് ഡയറക്ടര്‍ അഡ്വ. സിറാജുദ്ദീന്‍, ഉലമാ കൗണ്‍സില്‍ ചെയര്‍മാന്‍ എ.എം. ഹാജി, ബദറുദ്ദീന്‍ മൗലവി, മിലാദ് ശരീഫ്, കമ്മിറ്റി കണ്‍വീനര്‍ അഹമ്മദ് ബാഖവി, ജില്ലാ സെക്രട്ടറി എ.എല്‍.എം. കാസിം, ബീമാപള്ളി സക്കീര്‍ മുസ്‌ലിയാര്‍, വിഴിഞ്ഞം ഹനീഫ തുടങ്ങിയവര്‍ പങ്കെടുത്തു സംസാരിച്ചു.

വീട്ടമ്മയുടെ മൂന്നര പവന്‍റെ മാല കവർന്നു

കാട്ടാക്കട: കെഎസ്ആർടിസി ബസ് കയറുന്നതിനിടെ വീട്ടമ്മയുടെ മൂന്നര പവന്‍റെ മാല കവർന്നു. അമ്പലത്തിൻകാല ശ്രീകല്ലടി ബാവ നിവാസിൽ ഗിരിജ കുമാരി(58)യുടെ മാലയാണ് കാട്ടാക്കട ഡിപ്പോയിൽനിന്ന് കവർന്നത്. കാട്ടാക്കടനിന്നും കൊറ്റംപള്ളിവഴി കീഴാറൂരിലേയ്ക്കു പോകുന്ന ബസിൽകയറവേയാണു മാല നഷ്ടപ്പെട്ടത്. ക്ഷേത്രദർശനം കഴിഞ്ഞ് ഉച്ചയോടെ ബന്ധുവിനൊപ്പം കാട്ടാക്കട ഡിപ്പോയിലെത്തി ഏറെ നേരം കാത്തിരുന്ന ശേഷമാണു ബസ് വന്നത്. ബസിനുള്ളിലേയ്ക്കു കയറുന്നതിനിടെയുള്ള തിരക്കിനിടയിലാണ് മൂന്നരപ്പവന്‍റെ മാല നഷ്ടപ്പെട്ടത്. പിന്നിൽനിന്ന സ്ത്രീയാണ് മാലപൊട്ടിച്ചതെന്നറിഞ്ഞു നിലവിളിച്ചപ്പോഴേക്കും മോഷ്ടാവ് ഓടി രക്ഷപ്പെട്ടെന്നു ഗിരിജ പറയുന്നു. മാല മോഷണം പോയതറിഞ്ഞതോടെ ഏറെ ബഹളം വയ്ക്കുകയും നിലവിളിക്കുകയും ചെയ്തെങ്കിലും ഡിപ്പോയിലെ സുരക്ഷാജീവനക്കാരോ ഉദ്യോഗസ്ഥരോ ഇടപെട്ടില്ലെന്ന് ഒപ്പമുണ്ടായവർ പറഞ്ഞു. പിന്നാലെ ഗിരിജ കുമാരി പോലീസിൽ പരാതി നൽകി.

കാരക്കോണം മെഡിക്കല്‍ കോളജിൽ പ്ലാസ്റ്റിക് സര്‍ജറി വിഭാഗം തുറന്നു

വെള്ളറട: കാരക്കോണം സിഎസ്ഐ മെഡിക്കല്‍ കോളജില്‍ പ്ലാസ്റ്റിക് സര്‍ജറി വിഭാഗം പ്രവര്‍ത്തനമാരംഭിച്ചു. സര്‍ജറി വകുപ്പ് മേധാവി ഡോ. പുനിതാ തെട്രാവൂ ഒലിയുടെ അധ്യക്ഷതയില്‍ നടന്ന ചടങ്ങില്‍ മെഡിക്കല്‍ സൂപ്രണ്ട് എസ്. ബാബുരാജ് ഉദ്ഘാടനം നിര്‍വഹിച്ചു. റവ. എ. ആര്‍. സുശീല്‍, ഡോ. പ്രേംകുമാര്‍ എന്നിവര്‍ പ്രസംഗിച്ചു. പ്ലാസ്റ്റിക് സര്‍ജറിയില്‍ 30 വര്‍ഷത്തിലധികമായ സേവനപരിചയവും സൂപ്പര്‍ സ്‌പെഷാലിറ്റി ബിരുദങ്ങളുമുള്ള ഡോ. അനീഷ് ഏലിയാസാണു ചീഫ് കണ്‍സള്‍ട്ടന്‍റ്. രാവിലെ ഒന്പതു മുതല്‍ ഉച്ചയ്ക്ക് ഒരു മണി വരെയാണ് ഔട്ട് പേഷ്യന്‍റ് വിഭാഗം പ്രവര്‍ത്തിക്കുന്നത്. കിടത്തി ചികിത്സിക്കുന്നവര്‍ക്കു വേണ്ടിയുള്ള പ്രത്യേക വാര്‍ഡും ക്രമീകരിച്ചിട്ടുണ്ട്.

"അവൾക്കായി' പദ്ധതി നെടുമങ്ങാട് ബ്ലോക്ക് തല ഉദ്ഘാടനം

നെടുമങ്ങാട്: ബ്ലോക്ക് പഞ്ചായത്ത് താലൂക്ക് ഹോമിയോ ആശുപത്രിയുടെ സഹകരണത്തോടെ കൗമാരക്കാരായ പെൺകുട്ടികൾക്കുവേണ്ടി നടപ്പിലാക്കിവരുന്ന അവൾക്കായി പദ്ധതിയുടെ 2025- 26 വർഷത്തിലെ ബ്ലോക്കുതല ഉദ്ഘാടനം അരുവിക്കര ഹയർ സെക്കൻഡറി സ്കൂളിൽ പഞ്ചായത്ത് പ്രസിഡന്‍റ് ആർ. കല നിർവഹിച്ചു. ബ്ലോക്ക് പഞ്ചായത്ത് മെമ്പർ വി. വിജയൻ നായർ അധ്യക്ഷത വഹിച്ചു. ആശുപത്രി സൂപ്രണ്ട് ഡോ. ജയ എം. ഡേവിഡ് പദ്ധതി അവതരണം നിർവഹിച്ചു. ആർഎംഒ ഡോ. നിഷ്മ ജോൺസ്, മെഡിക്കൽ ഓഫീസർ ഡോ. എൻ.എസ്. സഹീന തുടങ്ങിയവർ ബോധവത്കരണ ക്ലാസിനു നേതൃത്വം നൽകി. പ്രിൻസിപ്പൽ റാണി ആർ. ചന്ദ്രൻ സംസാരിച്ചു. അരുവിക്കര ഗവ. ഹോമിയോ ഡിസ്‌പെൻസറിയിലെ മെഡിക്കൽ ഓഫീസർ ഡോ. വി.എസ്. അജിത് നന്ദി പറഞ്ഞു.

മദ്യലഹരിയിൽ സുഹൃത്തിനെ കുത്തിപ്പരിക്കേല്‍പ്പിച്ചയാള്‍ അറസ്റ്റില്‍

പേരൂര്‍ക്കട: യുവാവിനെ കുത്തിപ്പരിക്കേല്‍പ്പിച്ചയാളെ ഫോര്‍ട്ട് പോലീസ് അറസ്റ്റുചെയ്തു. ആറ്റുകാല്‍ പടശ്ശേരിയില്‍ ചാത്തന്‍ സജീവ് എന്നുവിളിക്കുന്ന സജീവ് (45) ആണ് അറസ്റ്റിലായത്. ബുധനാഴ്ചയായിരുന്നു കേസിനാസ്പദമായ സംഭവം. ആറ്റുകാല്‍ സ്വദേശി കുട്ടന്‍ എന്നുവിളിക്കുന്ന രാഹുല്‍ (38) ആണ് കത്രിക കൊണ്ട് തുടയില്‍ കുത്തേറ്റ് ഫോര്‍ട്ട് താലൂക്കാശുപത്രിയില്‍ ചികിത്സയില്‍ കഴിയുന്നത്. സംഭവദിവസം ആറ്റുകാല്‍ ബണ്ടുറോഡിനു സമീപം പടശ്ശേരിയിലെ സജീവിന്‍റെ വീട്ടിലിരുന്ന് ഇരുവരും മദ്യപിക്കുകയായിരുന്നു. മദ്യലഹരിയില്‍ വാക്കുതര്‍ക്കമുണ്ടാകുകയും അരയില്‍ സൂക്ഷിച്ചിരുന്ന കത്രിക ഉപയോഗിച്ച് സജീവ് സുഹൃത്തായ രാഹുലിനെ കുത്തിപ്പരിക്കേല്‍പ്പിക്കുകയുമായിരുന്നു. കുത്തേറ്റ രാഹുല്‍ സ്ഥലത്തുനിന്ന് ഓടിരക്ഷപ്പെടാന്‍ ശ്രമിക്കുന്നതിനിടെ കൃത്യം നടത്തിയശേഷം സജീവ് ഒളിവില്‍പ്പോയി. ഇയാള്‍ വീട്ടിലെത്തിയിട്ടുണ്ടെന്ന വിവരത്തെ തുടര്‍ന്ന് ഫോര്‍ട്ട് സിഐ വി.ആര്‍. ശിവകുമാര്‍, എസ്ഐ അനു എസ്. നായര്‍, എഎസ്ഐ അജി എന്നിവര്‍ ചേര്‍ന്നു പ്രതിയെ കസ്റ്റഡിയിലെടുക്കുകയായിരുന്നു. സജീവിനെതിരേ 13 ക്രിമിനല്‍ക്കേസുകള്‍ വിവിധ സ്റ്റേഷനുകളിലായുണ്ട്. ഇതുകൂടാതെ ഇയാള്‍ രണ്ടു കൊലപാതകക്കേസുകളിലും പ്രതിയാണ്. കരമന പോലീസ് സ്റ്റേഷനില്‍ ഗുണ്ടാനിയമ പ്രകാരം അറസ്റ്റിലായിട്ടുള്ളയാളാണ് കുത്തേറ്റ രാഹുല്‍. അറസ്റ്റിലായ സജീവിനെ കോടതിയില്‍ ഹാജരാക്കി റിമാന്‍ഡ് ചെയ്തു.

അട്ടക്കുളങ്ങരയിലെ തീപിടിത്തം; നഷ്ടം 10 കോടിയെന്നു ഫയര്‍ഫോഴ്‌സ്

പേരൂര്‍ക്കട: അട്ടക്കുളങ്ങരയില്‍ ഓടു പാകിയ വീട്ടിലുണ്ടായ തീപിടിത്തത്തിലൂടെയുണ്ടായത് 10 കോടിരൂപയുടെ നഷ്ടമെന്നു തിരുവനന്തപുരം ഫയര്‍ഫോഴ്‌സ് സംഘം. കഴിഞ്ഞദിവസം രാവിലെ ഏഴോടെയാണു പുത്തന്‍തെരുവ് ആനവാല്‍ തെരുവില്‍ സോമന്‍റെ വീടിനു തീപിടിച്ചത്. പുലര്‍ച്ചെ നിലവിളക്ക് കത്തിച്ചുവച്ചശേഷം സോമന്‍റെ കുടുംബം ക്ഷേത്രദര്‍ശനത്തിനുപോയിരുന്നു. അയല്‍വാസികളാണ് വീട്ടില്‍നിന്നു തീയും പുകയും ഉയരുന്നതു കണ്ടത്. തിരുവനന്തപുരം ഫയര്‍‌സ്റ്റേഷനില്‍നിന്ന് സ്റ്റേഷന്‍ ഓഫീസര്‍മാരായ കെ.എന്‍. ഷാജി, എസ്. അനീഷ് കുമാര്‍ എന്നിവര്‍ ഉള്‍പ്പെട്ട മൂന്നു യൂണിറ്റെത്തി രണ്ടു മണിക്കൂര്‍ പരിശ്രമിച്ചാണ് തീ കെടുത്തിയത്. അടുത്തടുത്ത് വീടുകള്‍ സ്ഥിതിചെയ്യുന്ന സ്ഥലമാണ് പുത്തന്‍ തെരുവ്. സോമന്‍റെ വീട്ടില്‍ പടര്‍ന്ന തീ സമീപത്തെ രണ്ടുവീടുകളിലേക്കു വ്യാപിച്ചുവെങ്കിലും നാശനഷ്ടങ്ങള്‍ ഉണ്ടാകുന്നതിനുമുമ്പുതന്നെ ഫയര്‍ഫോഴ്‌സ് രക്ഷാപ്രവർത്തനം നടത്തി. സോമന്‍റെ വീട്ടിലുണ്ടായിരുന്ന വസ്ത്രങ്ങള്‍, അടുക്കളസാധനങ്ങള്‍, ഫര്‍ണീച്ചറുകള്‍ തുടങ്ങിയവ മുഴുവനായി കത്തിനശിക്കുകയായിരുന്നു.

താക്കോല്‍ എടുക്കാന്‍ ശ്രമിക്കുന്നതിനിടെ യുവാവിന്‍റെ കൈ മാന്‍ഹോളില്‍ കുടുങ്ങി

പേരൂര്‍ക്കട: മാന്‍ഹോളില്‍ വീണ ബൈക്കിന്‍റെ താക്കോല്‍ എടുക്കാന്‍ ശ്രമിക്കുന്നതിനിടെ യുവാവിന്‍റെ കൈ കുടുങ്ങി. തിരുവനന്തപുരം ഫയര്‍ഫോഴ്‌സ് എത്തി ഹൈഡ്രോളിക് സ്‌പ്രെഡ്ഡര്‍ ഉപയോഗിച്ച് യുവാവിനെ രക്ഷപ്പെടുത്തി. ബുധനാഴ്ച അര്‍ധരാത്രിയോടടുത്തു വഴയില ഇന്ത്യന്‍ ഓയില്‍ പെട്രോള്‍ പമ്പിനു സമീപമായിരുന്നു സംഭവം. നെടുമങ്ങാട് കരിപ്പൂര്‍ മേക്കുംകര ഇടവിളാകത്ത് വീട്ടില്‍ ഷാജി (39)യുടെ കൈയാണ് മാന്‍ഹോളില്‍ കുടുങ്ങിയത്. ഷാജിയും സുഹൃത്തും വഴയിലയിലെ വീട്ടിലേക്കു തിരിക്കുന്നതിനായി റോഡുവശത്തുകൂടി നടന്നു. ഇതിനിടെ കൈവശമിരുന്ന താക്കോല്‍ അബദ്ധത്തില്‍ മാന്‍ഹോളിനുള്ളിലേക്കു വീഴുകയായിരുന്നു. ഇതെടുക്കാന്‍ ശ്രമിക്കുന്നതിനിടെയാണ് ഷാജിയുടെ കൈ മാന്‍ഹോളില്‍ കുടുങ്ങിയത്. വിവരമറിഞ്ഞ് എത്തിയ നാട്ടുകാര്‍ സമീപത്തെ കടയില്‍ നിന്ന് എണ്ണ കൊണ്ടുവരികയും മാന്‍ഹോളില്‍ ഒഴിച്ച് ഷാജിയുടെ കൈ പുറത്തെടുക്കാന്‍ ശ്രമിക്കുകയും ചെയ്തു. എന്നാല്‍ ഇതു വിജയിക്കാതെ വന്നതോടെ ഫയര്‍‌സ്റ്റേഷനില്‍ വിവരമറിയിക്കുകയായിരുന്നു. സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സജികുമാറിന്‍റെ നേതൃത്വത്തില്‍ ഓഫീസര്‍മാരായ ഷഹീര്‍, പ്രദോഷ്, രാഹുല്‍, സനു, എഫ്.ആര്‍.ഒ ഡ്രൈവര്‍ സുമേഷ് എന്നിവര്‍ ചേര്‍ന്നാണു ഷാജിയെ രക്ഷപ്പെടുത്തിയത്. മാന്‍ഹോളില്‍വീണ താക്കോല്‍ എടുത്തുനല്‍കി ഷാജിയെ വീട്ടിലെത്തി ച്ചശേഷമാണ് ഫയര്‍ഫോഴ്‌സ് സംഘം മടങ്ങിയത്.

നവരാത്രി ഘോഷയാത്ര ആലോചനയോഗം

പാറശാല: നവരാത്രി വിഗ്രഹ ഘോഷയാത്രയെ 21 തീയതി സംസ്ഥാന അതിര്‍ത്തിയായ കളിയിക്കാവിളയില്‍ സ്വീകരിക്കുന്നതുമായി ബന്ധപ്പെട്ട് പാറശാലയില്‍ ആലോചനയോഗം നടന്നു. പാറശാല ജയമഹേഷ് ഓഡിറ്റോറിയത്തില്‍ നടന്ന യോഗം സി.കെ. ഹരീന്ദ്രന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് എല്‍. മഞ്ജുസ്മിത അധ്യക്ഷത വഹിച്ചു. ഡെപ്യൂട്ടി തഹസില്‍ദാര്‍ കൃഷ്ണകുമാര്‍, സബ് ഇന്‍സ്‌പെക്ടര്‍ ഹര്‍ഷകുമാര്‍, ഡെപ്യൂട്ടി ദേവസ്വം കമ്മീഷണര്‍ ദിലീപ് കുമാര്‍, നെയ്യാറ്റിങ്കര എസി അയ്യപ്പന്‍, എസ്.എസ്. സാബു, പാറശാല പഞ്ചായത്ത് വൈസ് പ്രസിഡന്‍റ് ആര്‍. ബിജു, വില്ലേജ് ഓഫീസര്‍ ബിജു, പഞ്ചായത്ത് അംഗങ്ങളായ ക്രിസ്തുരാജ്, വീണ, ക്രിസ്തുദാസ്, കെഎസ്ഇബി എഇ ഷാജി, പഞ്ചായത്ത് അസിസ്റ്റന്‍റ് സെക്രട്ടറി സാംജി, വിവിധ സംഘടനാ പ്രതിനിധികള്‍ , സര്‍ക്കാര്‍ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

വെഞ്ഞാറമൂട് ജംഗ്ഷനിലെ ഫ്ലൈ ഓവർ നിർമാണം തുടങ്ങി

ഗതാഗത നിയന്ത്രണം ഏർപ്പെടുത്തി വെഞ്ഞാറമൂട്: ജംഗ്ഷനിലെ ഫ്ലൈ ഓവറിന്‍റെ നിർമാണം ആരംഭിച്ചു. അതുമായി ബന്ധപ്പെട്ട ഗതാഗത ക്രമീകരണങ്ങൾ ഏർപ്പെടുത്തിയതായി വെഞ്ഞാറമൂട് പോലീസ് ഇൻസ്പക്ടർ ആസാദ് അബ്ദുൽ കലാം അറിയിച്ചു. കൊട്ടാരക്കര ഭാഗത്തു നിന്നും തിരുവനന്തപുരത്തേക്കു പോകുന്ന കെഎസ് ആർടിസി ഒഴികെയുള്ള ചരക്കു വാഹനങ്ങൾ ഉൾപ്പെടെയുള്ള ഹെവി വാഹനങ്ങൾ കിളിമാനൂരിൽനിന്നും തിരിഞ്ഞു നഗരൂർ വഴി ആലങ്കോടെത്തി എൻഎച്ച്എൽ പ്രവേശിച്ച് കഴക്കൂട്ടം ഭാഗത്തേക്കു പോകണം. കൊട്ടാരക്കരയിൽനിന്നും പോത്തൻകോട്, കഴക്കൂട്ടം തിരുവനന്തപുരം ഭാഗത്തേക്ക് പോകേണ്ട മറ്റുവാഹനങ്ങൾ അമ്പലമുക്കിൽനിന്നും തിരിഞ്ഞു ബൈപ്പാസ് കേറി പിരപ്പൻകോടെത്തി എംസി റോഡിൽ പ്രവേശിച്ച് യാത്ര തുടരണം. തിരുവനന്തപുരം സിറ്റിയിൽനിന്നും എംസി റോഡ് വഴി കൊട്ടാരക്കര ഭാഗത്തേക്കു പോകേണ്ട കെഎസ്ആർടിസി ഒഴികെയുള്ള ചരക്കു-ഹെവി വാഹനങ്ങൾ കഴക്കൂട്ടത്ത് എത്തി ആറ്റിങ്ങൽ വഴി ആലങ്കോടു നിന്നും തിരിഞ്ഞു കിളിമാനൂരിലെത്തി എംസി റോഡിൽ പ്രവേശിച്ച് യാത്ര തുടരണം. വട്ടപ്പാറയിൽനിന്നും കൊട്ടാരക്കര ഭാഗത്തേക്കു വരുന്ന വാഹനങ്ങൾ കന്യാകുളങ്ങരയിൽനിന്നും തിരിഞ്ഞു പോത്തൻകോട് വഴി മംഗലാപുരത്തെത്തി എൻഎച്ചിൽ പ്രവേശിച്ച് ആറ്റിങ്ങൽ വഴി ആലങ്കോട് നിന്നും തിരിഞ്ഞു കിളിമാനൂർ വഴി എം സി റോഡിൽ പ്രവേശിച്ച് യാത്ര തുടരണം. പോത്തൻകോട് ഭാഗത്തുനിന്നും വെഞ്ഞാറമൂട് ഭാഗത്തേക്കു പോകേണ്ട വാഹനങ്ങൾ മംഗലാപുരം ഭാഗത്തെത്തി എൻഎച്ചിൽ പ്രവേശിച്ച് ആറ്റിങ്ങൽ വഴി ആലങ്കോട് നിന്നും തിരിഞ്ഞു കിളിമാനൂർ വഴി എം സി റോഡിൽ പ്രവേശിച്ച് യാത്ര തുടരണം. പോത്തൻകോട് ഭാഗത്തുനിന്നും വെഞ്ഞാറമൂട് ഭാഗത്തേക്കു വരുന്ന കെഎസ്ആർടിസി വാഹനങ്ങൾ തൈക്കാട് ജംഗ്ഷനു മുമ്പുള്ള സമന്വയ നഗറിൽ എത്തി ഇടത്തേക്കു തിരിഞ്ഞു യാത്ര ചെയ്തു ആറ്റിങ്ങൽ റോഡിലുള്ള പാക്കിസ്ഥാൻ മുക്കിലെത്തി വെഞ്ഞാറമൂട് ഭാഗത്തേക്ക് യാത്ര ചെയ്യണം. തിരുവനന്തപുരം ഭാഗത്തുനിന്നും വരുന്ന ലൈറ്റ് വാഹനങ്ങൾ പിരപ്പൻകോട് നിന്നും ബൈപ്പാസ് വഴി നാഗരുകുഴി കുറ്റിമൂട് എത്തി അമ്പലമുക്കു നിന്നും എംസി റോഡിൽ പ്രവേശിച്ച് യാത്ര തുടരണം. തിരുവനന്തപുരം ഭാഗത്തുനിന്നും വരുന്ന കെഎസ്ആർടിസി വാഹനങ്ങൾ തൈക്കാട് എത്തി സമന്വയ നഗർ വഴി ആറ്റിങ്ങൽ റോഡിലുള്ള പാക്കിസ്ഥാൻ മുക്കിലെത്തി വെഞ്ഞാ റമൂട് ഭാഗത്ത് പ്രവേശിക്കണം. ഒന്നാംഘട്ട പൈലിംഗ് ജോലികൾ ആരംഭിച്ചിരിക്കുകയാണ്. ആയത് കെഎസ്ആർടിസി സ്റ്റാൻഡിനു സമീപമാണു നടക്കുന്നത്. പെൻസിൽ ക്രമീകരണങ്ങളും നടന്നുവരുന്നുണ്ട്. പൈലിംഗ് വർക്ക് പുരോഗമിക്കുന്ന പക്ഷം ഫെൻസിംഗ് ക്രമീകരിക്കുകയും ആ സമയം ഗതാഗത നിയന്ത്രണം പുനഃക്രമീകരിക്കുമെന്നും ഇസ്പെക്ടർ അറിയിച്ചു.

ശ്രീനാരായണ ഗുരുദേവജയന്തി

നെടുമങ്ങാട്: എസ്എൻഡിപി യോഗം നെടുമങ്ങാട് ടൗൺ ശാഖയുടെ നേതൃത്വത്തിൽ ശ്രീനാരായണ ഗുരുദേവജയന്തി ആഘോഷിച്ചു. ശാഖാ പ്രസിഡന്‍റ് എസ്. സിദ്ധാർഥൻ പതാകയുയർത്തി. തുടർന്നു ഗുരുദേവ പ്രാർഥനയും നടന്നു. എസ്എസ്എൽസി- പ്ലസ് ടു- ബിരുദ പരീക്ഷകളിൽ ഉന്നതവിജയം നേടിയ അഭിരാമി, ആദിത്യൻ, സുരേഷ്, ബി. ദേവിക, അഭിനീത്‌, എസ്.എസ്. ദേവനന്ദ്‌, എസ്. ഗോവിന്ദ് എന്നിവർക്ക് ഉപഹാരം നൽകി അനുമോദിച്ചു. മുതിർന്ന ശാഖാംഗങ്ങളെ ചട‌ങ്ങിൽ ആദരിച്ചു. കിടപ്പുരോഗികൾക്കു ധനസഹായം വിതരണം ചെയ്തു. പ്രകാശ്, സഹദേവൻ, എസ്.ശശി, ഗോപാലകൃഷ്ണൻ, ഗോമതി, ഉഷ, തുളസി, ശാരദ, സുമംഗല, ടി.ശാരദ എന്നിവർ പങ്കെടുത്തു. ശാഖാ സെക്രട്ടറി വി. മനോഹരൻ, എക്സിക്യു്ട്ടീവ് കമ്മിറ്റി അംഗങ്ങളായ നെട്ടിറച്ചിറ സുരേഷ്, സാംബശിവൻ, യൂണിയൻ പ്രതിനിധി കെ. ശിവരാജൻ, ഉഴമലയ്ക്കൽ എസ്എൻഎച്ച്എസ്എസ് സ്കൂൾ അധ്യാപകൻ അനിൽകുമാർ എന്നിവർ പ്രസംഗിച്ചു. പായസ വിതരണവും നടന്നു.

ഓണാഘോഷം: നഗരം വൃത്തിയാക്കിയത് 10,782 കിലോ മാലിന്യശേഖരണത്തിലൂടെ

പേരൂര്‍ക്കട: ഓണാഘോഷ സമാപനത്തിനുശേഷം നഗരം വൃത്തിയാക്കിയത് 10,782 കിലോ മാലിന്യശേഖരണത്തിലൂടെയെന്നു തിരുവനന്തപുരം നഗരസഭ പത്രക്കുറിപ്പില്‍ അറിയിച്ചു. 72 ഉദ്യോഗസ്ഥരുടെ നേതൃത്വത്തില്‍ 919 ശുചീകരണത്തൊഴിലാളികള്‍ 10 പോയിന്‍റുകളിലെത്തിയാണ് ശുചീകരണം നടത്തിയത്. 50 ഗ്രീന്‍ ആര്‍മിയെയും നിയോഗിച്ചിരുന്നു. 4222 കിലോ ജൈവ മാലിന്യവും 6560 കിലോ അജൈവ മാലിന്യവുമാണ് ശേഖരിച്ചത്.

സഹകരണ സൊസൈറ്റിയിൽ മോഷണം

പൂവാർ: പരണിയം ഫാർമേഴ് സ് വെൽഫയർ സൊസൈറ്റിയിൽ മോഷണം. അലമാരയിൽ സൂക്ഷിച്ചിരുന്ന 97,000 രൂപ കവർന്നു. ബുധനാഴ്ച രാത്രിയിലായിരുന്നു സംഭവം.പ ുറകു വശത്തെ വാതിൽ കുത്തിപ്പൊളിച്ചാണ് കള്ളൻമാർ അകത്തു കടന്നത്. ഫയലുകളും വാരിവലിച്ചിട്ട നിലയിലായിരുന്നതായും പോലീസ് അറിയിച്ചു. ഇന്നലെ രാവിലെ ഓഫീസ് തുറക്കാനെത്തിയ ജീവനക്കാരാണു മോഷണ വിവരം ആദ്യമറിയുന്നത്. ചിട്ടി, ലോൺ, ദിവസ കളക്‌ഷൻ എന്നിങ്ങനെയുള്ള പണമാണ് സൂക്ഷിച്ചിരുന്നതെന്ന് അധികൃതർ പറയുന്നു. വിരലടയാള വിദഗ്ദരും ഡോഗ് സ്ക്വാഡും സ്ഥ ലത്തു പരിശോധന നടത്തി. കാഞ്ഞിരംകുളം പോലീസ് അന്വേഷണമാരംഭിച്ചു.

നേമം സഹകരണ ബാങ്ക് തട്ടിപ്പ് : മുൻ സെക്രട്ടറി എ.ആർ. രാജേന്ദ്രന്‍റെ അറസ്റ്റ് വൈകുന്നതിൽ ആശങ്ക

നേമം: 96 കോടി രൂപയുടെ ക്രമക്കേടുകൾ നടന്ന നേമം സഹകരണ ബാങ്കിൽ രണ്ടാം പ്രതിയായ മുൻ സെക്രട്ടറി എ. ആർ. രാജേന്ദ്രൻ നടത്തിയ ക്രമക്കേട് 31 കോടി രൂപയുടേതെന്നു സഹകരണ വകുപ്പിന്‍റെ അന്വേഷണത്തിൽ തെളിഞ്ഞതായി വിവരാവകാശ രേഖകളിൽ വ്യക്തമാക്കുന്നു. നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനു ലഭിച്ച രേഖകളിൽ ഏറ്റവും കൂടുതൽ വെട്ടിപ്പു നടത്തിയത് ഈ രണ്ടാം പ്രതിയാണെന്നു പ്രത്യേകം പരമാർശിക്കുന്നു. മറ്റൊരു മുൻ സെക്രട്ടറി എസ്. ബാലചന്ദ്രൻ നായർ, മുൻ പ്രസിഡന്‍റ് ആർ. പ്രദീപ് കുമാർ എന്നിവരെ ക്രൈംബ്രാഞ്ച് അറസ്റ്റ് ചെയ്തിരുന്നു. പക്ഷേ പ്രധാനപ്രതിയായ എ.ആർ. രാജേന്ദ്രനെ നാളിതുവരെ ആയിട്ടും അറസ്റ്റ് ചെയ്തിട്ടില്ല. ഇയാളെ അറസ്റ്റ് ചെയ് താൽ പല ഉന്നതരുടെയും പേരു പുറത്തുവരുമെന്ന ഏക കാരണത്താലാണ് അറസ്റ്റ് വൈകിപ്പിക്കുന്നതെന്നു നിക്ഷേപകർ സംശയിക്കുന്നു. മക്കളുടെ പേരിലും മരുമകന്‍റെ പേരിലും ഭാര്യയുടെ പേരിലും നിരവധി ലോണുകൾ എഴുതി എടുത്തു. ഉന്നതങ്ങളിലെ ഇടപെടൽ കാരണമാണ് ഇയാളുടെ അറസ്റ്റ് വൈകിപ്പിക്കുന്നതെന്നും ഉടനെ പിടികൂടണമെന്നും നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും കൺവീനർ കൈമനം സുരേഷും ആവശ്യപ്പെട്ടു.

പാചകം ചെയ്യുന്നതിനിടെ ഗ്യാസ് സിലിണ്ടർ ചോർന്നു

കോവളം : വീട്ടിൽപാചകം ചെയ്യുന്നതിനിടയിൽ ഗ്യാസ് ചോർന്നു. ഫയർഫോഴ്സിന്‍റെ ഇടപെടൽ അപകടം ഒഴിവായി. കാക്കാ മൂല, കണ്ണൻ കുഴി വീട്ടിൽ യേശുദാസിന്‍റെ വീട്ടിലെ എൽപിജി സിലിണ്ടറിലാണു ചോർച്ചയുണ്ടായത്. വീടിന്‍റെ അടുക്കളയിൽ പാചകത്തിനായി ഗ്യാസ് ഓൺ ചെയ്യുന്നതിനിടയിൽ ശക്തിയായി വാതകം പുറത്തേക്കു ചീറ്റിയതോടെ ഭയന്ന വീട്ടുകാർ കുഞ്ഞുങ്ങളടക്കം പുറത്തേക്ക് ഇറ ങ്ങിയോടി. തുടർന്നു വീട്ടിലെയും പരിസരത്തുള്ള വീടുകളിലെയും വൈദ്യുതി ബന്ധം വി ഛേദിക്കുകയും ചെയ്തു. വിവരമറിഞ്ഞെത്തിയ സേനാംഗങ്ങൾ സിലിണ്ടറിന്‍റെ ചേർച്ച താല്കാലികമായി അടച്ചശേഷം തുറസായ സ്ഥലത്തേക്കു മാറ്റി അപകട സ്ഥിതി ഒഴിവാക്കി. തുടർന്നു സിലിണ്ടർ മാറ്റാൻ ഏജൻസിക്കു നിർദേശം നൽകി, വൈദ്യുതി ബന്ധം പുനഃസ്ഥാപിച്ചു. സീനിയർ ഫയർ ആൻഡ് റെസ്ക്യൂ ഓഫിസർ സനു, ഓഫിസർമാരായ സന്തോഷ് കുമാർ, സനൽ, അരുൺ, രഹിൽ എന്നിവരാണു രക്ഷാപ്രവർത്തനം നടത്തിയത്.

കഫറ്റേറിയയിലെ മോഷണം : മുഹമ്മദ് അബ്ദുള്‍ ഹാദി മാനസികാരോഗ്യ കേന്ദ്രത്തില്‍

പേരൂര്‍ക്കട: പൂജപ്പുര കഫറ്റേറിയയില്‍ ഓഗസ്റ്റ് 30നു നടന്ന മോഷണവുമായി ബന്ധപ്പെട്ടു പിടിയിലായ പോത്തന്‍കോട് സ്വദേശി മുഹമ്മദ് അബ്ദുള്‍ ഹാദി (26) ഊളമ്പാറ മാനസികാരോഗ്യ കേന്ദ്രത്തില്‍ ചികിത്സയില്‍. മാനസികാസ്വാസ്ഥ്യം പ്രകടിപ്പിക്കുന്നതായി ബോദ്ധ്യപ്പെട്ടതിന്‍റെ അടിസ്ഥാനത്തിലാണ് പ്രതിയെ മാനസികാരോഗ്യ കേന്ദ്രത്തിലേക്കു മാറ്റിയത്. പൂജപ്പുര സെന്‍ട്രല്‍ ജയില്‍ വകയായുള്ള ഫുഡ് ഫോര്‍ ഫ്രീഡം കഫറേറ്ററിയയില്‍ നിന്നു 4.25 ലക്ഷം രൂപ കവര്‍ന്ന സംഭവത്തില്‍ ഓഗസ്റ്റ് 26ന് പത്തനംതിട്ടയില്‍ തിരുവല്ലയിലെ സഹതടവുകാരന്‍റെ വീട്ടില്‍ നിന്നാണ് പോലീസ് ഇയാളെ പിടികൂടിയത്. പ്രതി മാനസികാസ്വാസ്ഥ്യം പ്രകടിപ്പിച്ചതിനെ തുടര്‍ന്നാണ് മജിസ്‌ട്രേറ്റിന്‍റെ നിര്‍ദേശപ്രകാരം ഇയാളെ മാനസികാരോഗ്യ കേന്ദ്രത്തിലേക്കു മാറ്റിയത്. ആശുപത്രിയില്‍ നിരീക്ഷണത്തിലുള്ള ഇയാളുടെ മാനസിക നിലയെക്കുറിച്ച് ആശുപത്രി സൂപ്രണ്ട് റിപ്പോര്‍ട്ട് നല്‍കുന്നതിന്‍റെ അടിസ്ഥാനത്തിലായിരിക്കും തുടര്‍നടപടിയെന്നു പൂജപ്പുര പോലീസ് അറിയിച്ചു.

തിരുവനന്തപുരം അന്താരാഷ്ട്ര വിമാനത്താവളത്തിൽ എമിഗ്രേഷൻ ക്ലിയറൻസ് 30 സെക്കൻഡിനുള്ളിൽ..!

വലിയതുറ: കേന്ദ്ര ആഭ്യന്തര മന്ത്രാലയത്തിനു കീഴിലുള്ള ബ്യൂറോ ഓഫ് എമിഗ്രേഷൻ നടപ്പിലാക്കുന്ന ‘ഫാസ്റ്റ് ട്രാക്ക് എമിഗ്രേഷൻ - ട്രസ്റ്റഡ് ട്രാവലർ പ്രോഗ്രാം തിരുവനന്തപുരം അന്താരാഷ്ട്ര വിമാനത്താവളത്തിലും സജ്ജമായി. നൂതന സംവിധാനം കേന്ദ്ര ആഭ്യന്തര, സഹകരണ മന്ത്രി അമിത് ഷാ വെർച്വലായി ഉദ്ഘാടനം ചെയ്തു. തിരുവനന്തപുരം അന്താരാഷ്ട്ര വിമാനത്താവളത്തിൽ നടന്ന ചടങ്ങിൽ ഫോറിനേഴ്‌സ് റീജിയണൽ രജിസ്ട്രേഷൻ ഓഫീസിലെ അരവിന്ദ് മേനോൻ, ചീഫ് എയർപോർട്ട് ഓഫീസർ രാഹുൽ ഭട്കോട്ടി എന്നിവർ പ്രസംഗിച്ചു. ഐജി ശ്യാം സുന്ദർ, ഡിഐജി നിശാന്തിനി എന്നിവരും മറ്റ് ഉന്നത പോലീസ് ഉദ്യോഗസ്ഥരും പങ്കെടുത്തു. തിരുവനന്തപുരത്തിനു പുറമെ കോഴിക്കോട്, ലഖ്‌നൗ, തിരുച്ചി, അമൃത്സർ എന്നിവിടങ്ങളിലും ഫാസ്റ്റ് ട്രാക്ക് ഇമിഗ്രേഷൻ - ട്രസ്റ്റഡ് ട്രാവലർ പ്രോഗ്രാമിന് കേന്ദ്രമന്ത്രി തുടക്കം കുറിച്ചു. ഇ-ഗേറ്റ്‌സ് സൗകര്യം കൊച്ചി, ഡൽഹി, മുംബൈ, അഹമ്മദാബാദ്, കൊൽക്കത്ത, ചെന്നൈ, ബെംഗളൂരു, ഹൈദരാബാദ്, തുടങ്ങിയ വിമാനത്താവളങ്ങളിലും ഇതിനകം ലഭ്യമാണ്. https://ftittp.m ha.gov.in എന്ന ഓൺലൈൻ പോർട്ടൽ വഴിയാണ് എഫ്ടി ഐ -ടിടിപി നടപ്പാക്കിയിരിക്കുന്നത്.

പ്രാദേശിക കലാപ്രവർത്തകരുടെ സംഗമമായി ഗ്രാമീണ ഓണം ഫെസ്റ്റ്

വെഞ്ഞാറമൂട്: വെഞ്ഞാറമൂട് സാംസ്കാരിക സഹകരണ സംഘവും ജില്ലാ ടൂറിസം പ്രമോഷൻ കൗൺസിലും സംയുക്തമായി വെഞ്ഞാറമൂട്ടിൽ സംഘടിപ്പിച്ച ഗ്രാമീണ ഓണം ഫെസ്റ്റ്, പ്രാദേശിക കലാകാരന്മാരുടെ സംഗമമായി മാറി. പ്രാദേശിക കലാപ്രവർത്തകർക്ക് സാമ്പത്തിക സഹായം നൽകുക, കലാരൂപങ്ങൾ അവതരിപ്പിക്കുന്നതിനു വേദിയൊരുക്കുക തുടങ്ങിയ ലക്ഷ്യങ്ങളോടെയാണ് ഇത്തവണ ഗ്രാമീണ ഓണം ഫെസ്റ്റ് സംഘടിപ്പിച്ചത്. വെഞ്ഞാറമൂട് ഗവ. ഹയർ സെക്കൻഡറി സ്കൂൾ അങ്കണത്തിൽ നടന്ന കലാപരിപാടികളുടെ ഉദ്ഘാടനം ഡി.കെ. മുരളി എംഎൽഎ നിർവഹിച്ചു. സാംസ്‌കാരിക സഹകരണ സംഘം പ്രസിഡന്‍റ് ഡോ. ബി. നജീബ് അധ്യക്ഷത വഹിച്ചു. ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ ബി. അസീനാ ബീവി, കെ. സജീവ്, ഹസി സോമൻ, ജയകുമാർ താലം ജൂവലറി, പി.ജി. സുധീർ, ഷാഹിനാദ് പുല്ലമ്പാറ, ഡോ. ഉണ്ണികൃഷ്ണൻ പാറയ്ക്കൽ, ജി. ശ്രീകണ്ഠൻ, ജെ. ഷാജഹാൻ എന്നിവർ സംസാരിച്ചു. രാജേഷ് ഭരതന്നൂരും സംഘവും അവതരിപ്പിച്ച ചെണ്ടമേളത്തോടെ ഫെസ്റ്റിനു തുടക്കമായി. തെയ്യാട്ടവും അരുമ അയിരൂപ്പാറയും സംഘവും അവതരിപ്പിച്ച തിരുവാതിരക്കളിയും ചരടു പിന്നിക്കളിയും ശ്രദ്ധേയമായി. ഏഴു ടീമുകൾ മാറ്റുരച്ച കൈകൊട്ടിക്കളി മത്സരവും നടന്നു. ചിറയിൻകീഴ് അഴൂർ ശാർക്കരേശ്വരി ടീം ഒന്നാം സ്ഥാനവും വെഞ്ഞാറമൂട് കലിയുഗ ഡാൻസ് അക്കാദമി രണ്ടാം സ്ഥാനവും കല്ലറ മുളയിൽകോണം ലങ്കേശ്വര കൈകൊട്ടിക്കളി കലാസമിതി മൂന്നാം സ്ഥാനവും നേടി. നാടൻപാട്ട് കലാകാരൻ സന്തോഷ് ബാബു, എസ്.എൻ. രഹീന എന്നിവർ ചേർന്നു പാട്ടുത്സവവും അവതരിപ്പിച്ചു. വിജയികൾക്കും പങ്കെടുത്തവർക്കും എംഎൽഎ സമ്മാനങ്ങൾ നൽകി.

പടക്കപ്പൽ ഐഎൻഎസ് കബ്രാ വിഴിഞ്ഞത്ത്

വിഴിഞ്ഞം: തുറമുഖ മേഖലയുടെ സുരക്ഷ അന്വേഷിക്കാൻ നേവിയുടെ പടക്കപ്പൽ ഐഎൻഎസ് കബ്രാ വിഴിഞ്ഞത്ത് എത്തി. കൊച്ചിയിൽനിന്ന് ഇന്നലെ വൈകുന്നേരം ആറോടെ സേനാംഗങ്ങളും ഓഫീസർമാരും ഉൾപ്പെടെ 46 പേരുമായി മാരിടൈം ബോർഡിന്‍റെ തുറമുഖത്ത് നങ്കൂരമിട്ടു. അന്താരാഷ്ട്ര തുറമുഖത്തിന്‍റെ ഒന്നാം ഘട്ടനിർമാണം പൂർത്തിയാക്കി ചരക്കു കപ്പലുകൾ അടുത്തശേഷം സേനയുടെ നിരീക്ഷണവും ശക്തമാക്കിയിരുന്നു. ഇതിനുമുന്പ് ഐഎൻഎസ് കൽപ്പേനിയും വിഴിഞ്ഞത്തു വന്നു മടങ്ങിയിരുന്നു.

മാറനല്ലൂരിൽ യുവാക്കൾക്ക് പോലീസിന്‍റെ ക്രൂരമർദനം: വിവരങ്ങൾ പുറത്ത്

യുവാക്കളെ ക്രൂരമായി മർദിച്ചത് കഴിഞ്ഞ ഡിസംബറിൽ മാറനല്ലൂർ: സ്വകാര്യ ഭാഗത്ത് മുളക് സ്‌പ്രേ അടിച്ചു. പിന്നാലെ തേങ്ങാകൊണ്ടു പുറത്തടിച്ചു. മാറനല്ലൂരിലെ പോലീസിന്‍റെ ക്രൂരമർദന വിവരങ്ങൾ പുറത്ത്. ആളുമാറി വീട്ടിൽ കയറിയതു ചോദ്യം ചെയ്ത യുവാക്കളെ പോലീസ് അതിക്രൂരമായി മർദിച്ച വിവരമാണു പുറത്തായിരിക്കുന്നത്. കഴിഞ്ഞ ഡിസംബറിലായിരുന്നു സംഭവം. സിഐ ഷിബു, എസ്‌ഐ കിരൺ എന്നിവരാണ് മൂന്നു യുവാക്കളെ മർദിച്ചു കള്ളക്കേസിൽ കുടുക്കി ജയിലിൽ അടച്ചത്. കുന്നംകുളത്തും പീച്ചിയിലും പോലീസ് മർദനങ്ങൾ പുറത്തുവന്നതിനു തൊട്ടുപിന്നാലെയാണ് പുതിയസംഭവം പുറത്തായിരിക്കുന്നത്. മാറനല്ലൂർ കോട്ടുമുകൾ സ്വദേശികളും സഹോദരങ്ങളുമായ ശരത്, ശരൺ, ഇവരുടെ സുഹൃത്ത് വിനു എന്നിവർക്കാണ് മർദനമേറ്റത്. ഡിസംബർ 22നു രാത്രി യുവാക്കൾ വീടിനു മുന്നിലിരിക്കുകയായിരുന്നു. ആ സമയത്താണു നാലുപേർ അയൽവാസിയായ വിനോദിന്‍റെ വീട്ടുമതിൽ ചാടിക്കടക്കുന്നതു കണ്ടത്. യുവാക്കൾ ഇവരെ തടഞ്ഞുനിർത്തി കാര്യം അന്വേഷിക്കുന്നതിനിടെ വീടിനുള്ളിൽനിന്നു പോലീസ് യൂണിഫോം ധരിച്ച ഉദ്യോഗസ്ഥൻ പുറത്തേക്കു വന്നു. മതിൽ ചാടിയതു മഫ്തിയിലുള്ള പോലീസുകാരാണെന്നും കഞ്ചാവുകേസുമായി ബന്ധപ്പെട്ട അന്വേഷണമാണ് നടക്കുന്നതെന്നും യുവാക്കൾ അറിയുന്നത് അപ്പോഴായിരുന്നു. എന്നാൽ പോലീസ് യുവാക്കളെ കസ്റ്റഡിയിൽ എടുത്ത് സ്റ്റേഷനിലേക്കു കൊണ്ടു പോകുകയായിരുന്നു. തുടർന്നു യുവാക്കളെ ക്രൂരമായി മർദിക്കുകയും ക്യത്യനിർവഹണം തടസപ്പെടുത്തിയതിനു കേസെടുക്കുകയുമായിരുന്നു. മർദനത്തിന്‍റെ ഭാഗമായി കാലിന്‍റെ ഇടയിൽ തലപിടിച്ചുവച്ച ശേഷം പോലീസുകാർ തേങ്ങ കൊണ്ടു പുറത്തിടിച്ചെന്നും കണ്ണിലും വായിലും കുരുമുളക് സ്പ്രേ അടിച്ചെന്നും യുവാക്കൾ ആരോപിക്കുന്നു. സിഐ ഷിബു സ്വകാര്യഭാഗത്തു പിടിച്ചു വലിച്ചു സ്പ്രേ അടിച്ചെന്നും യുവാക്കൾ ആരോപിക്കുന്നു. തുടർന്നു ജയിലിലായതോടെ യുവാക്കളുടെ ജീവിതവും ജോലിയും പ്രതിസന്ധിയിലായി. ഇവർ നിയമനടപടികൾ സ്വീകരിച്ചതിനുപിന്നാലെ സിഐ ഷിബുവും എസ്‌ഐ കിരണും ഒത്തുതീർപ്പിനായി എത്തിയിരുന്നുവെന്നും യുവാക്കൾ പറയുന്നു. എന്നാൽ കേസുമായി മുന്നോട്ടു പോകുകയാഎന്നും ഒരു ഒത്തു തീർപ്പിനും തയാറല്ലെന്നും യുവാക്കൾ പറഞ്ഞു.

ഡെറാഡൂണിൽ പരിശീലനത്തിനിടെ സൈനികന്‍ മരിച്ചു

നേമം : ഉത്തരാഖണ്ഡിലെ ഡെറാഡൂണില്‍ പരിശീലനത്തിനിടെ സൈനികന്‍ മരിച്ചു. നേമം വെള്ളായണി സ്റ്റുഡിയോ റോഡ് കണ്ടമത്ത് വീട്ടില്‍ പരേതനായ ശെല്‍വരാജിന്‍റെയും സരോജത്തിന്‍റെയും മകന്‍ എസ്. ബാലു (33) ആണ് മരിച്ചതായി ബുധനാഴ്ച രാത്രി ബന്ധുക്കള്‍ക്ക് വിവരം ലഭിച്ചത്. ഡെറാഡൂണില്‍ മിലിട്ടറി അക്കാഡമിയില്‍ പരിശീലനത്തിടെയാണ് മരണം സംഭവിച്ചതെന്നാണ് ബന്ധുക്കള്‍ക്ക് കിട്ടിയ വിവരം. ആറുമാസം മുമ്പാണ് ബാലു അവസാനമായി നാട്ടിലെത്തിയത്. പാപ്പനംകോട് പുതിയ വീട് നിര്‍മ്മാണം അന്തിമഘട്ടത്തിലെത്തിയപ്പോഴാണ് ബാലുവിന്‍റെ മരണം. മൃതദേഹം ഇന്ന് വൈകുന്നേരത്തോടെ പാപ്പനംകോട് ഇഞ്ചിപ്പുല്ലുവിളയിലെ വാടക വീട്ടില്‍ കൊണ്ടുവരും. ഭാര്യ: അര്‍ഷിത. മക്കള്‍ : ആദി, അയാന്‍.

4 മാസം പ്രായമുളള കുഞ്ഞ് മരിച്ച നിലയില്‍

തിരുവല്ലം: അമ്മ പാല്‍ നല്‍കി ഉറങ്ങാന്‍ കിടത്തിയ 4 മാസം പ്രായമുളള കുഞ്ഞ് മരിച്ച നിലയില്‍. തിരുവല്ലം പ്ലാങ്ങല്‍ തിരുവാതിരയില്‍ ഡോ.അരുണ്‍ മിത്ര-നിമ്മി എസ്.ലാല്‍ ദമ്പതികളുടെ ഇളയ മകന്‍ നിയാന്‍ മിത്രയാണ് മരിച്ചത്. ബുധനാഴ്ചയായിരുന്നു സംഭവം. മുലപ്പാല്‍ തൊണ്ടയില്‍ കുടുങ്ങിയതാവാം മരണ കാരണമെന്നാണ് പ്രാഥമിക നിഗമനമെന്നു പോലീസ് പറഞ്ഞു. നെയ്യാറ്റിന്‍കര കമുകിന്‍കോട്ടുളള വീട്ടുവളപ്പില്‍ സംസ്‌കരിച്ചു. സഹോദരന്‍ രണ്ടര വയസുളള നിമിത്ത് മിത്ര. തിരുവല്ലം പോലീസ് മേല്‍ നടപടികള്‍ സ്വീകരിച്ചു.

വളളത്തിൽ കുഴഞ്ഞുവീണ് മരിച്ചു

വിഴിഞ്ഞം : വിഴിഞ്ഞത്ത് നിന്ന് മീൻ പിടിക്കാൻ പോയ മത്സ്യത്തൊഴിലാളി വളളത്തിൽ കുഴഞ്ഞുവീണ് മരിച്ചു. വെട്ടുകാട് ചെറിയതുറ സ്വദേശി വർഗീസ് (51)ആണ് മരിച്ചത്. ബുധനാഴ്ച വൈകുന്നേരം മൂന്നരയോടെയാണ് വർഗീസ് ഉൾപ്പെട്ട അഞ്ചംഗ സംഘം വിഴിഞ്ഞത്ത് നിന്ന് വള്ളമിറക്കിയത്. മീൻ പിടിക്കുന്നതിനിടയിൽ രാത്രി പത്തോടെ വള്ളത്തിൽ കുഴഞ്ഞു വീണ വർഗീസിനെ കൂടെയുള്ളവർ കരയിലെത്തിച്ച് വിഴിഞ്ഞം സർക്കാർ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടു നൽകി. തീരദേശ പോലീസ് മേൽനടപടി സ്വീകരിച്ചു.

കോൺഗ്രസിന്‍റെ കാട്ടാക്കട പോലീസ് സ്റ്റേഷൻ മാർച്ചിൽ സംഘർഷം

കാട്ടാക്കട: കോൺഗ്രസ് പ്രവർത്തകർ കാട്ടാക്കട പോലീസ് സ്റ്റേഷനിലേക്ക് നടത്തിയ പ്രതിഷേധം അക്രമാസക്തമായി. കുന്നംകുളത്തെ യൂത്ത് കോൺഗ്രസ് നേതാവിനെ മർദിച്ചതിൽ പ്രതിഷേധിച്ച് ആഹ്വാനം ചെയ്ത പ്രതിഷേധ പ്രകടനം കാട്ടാക്കട സ്റ്റേഷനു മുന്നിലാണ് നടന്നത്. ഉദ്ഘാടനം കഴിഞ്ഞയുടൻ പ്രവർത്തകർ പ്രതിഷേധവുമായി സ്റ്റേഷന്‍റെ അകത്തേക്ക് കടക്കാൻ ശ്രമിച്ചതാണു സംഘർഷത്തിനു കാരണമായത്. പോലീസ് പ്രതിരോധിക്കാൻ തുടങ്ങിയപ്പോൾ കൂടുതൽ പ്രവർത്തകർ സ്റ്റേഷനിലേക്കു തള്ളിക്കയറി. അതോടെ കൂടുതൽ പോലീസെത്തി പ്രവർത്തകരെ നീക്കം ചെയ്യാൻ ശ്രമം തുടങ്ങി. അതിനിടെ പ്രവർത്തകരെ മർദിച്ചതായി പരാതി വന്നതോടെ ബഹളമായി. തുടർന്നു മുതിർന്ന നേതാക്കളെത്തി പ്രവർത്തകരെ പിന്തിരിപ്പിച്ചു. ഇതുമായി ബന്ധപ്പെട്ട് കോൺഗ്രസ് നേതാക്കളായ ഷാജി ഭാസ്, അനീഷ്, ഷില്ലി സ്റ്റീഫൻ എന്നിവരെ അറസ്റ്റ് ചെയ്തു. ഇവരെ മർദിച്ചതായി കോൺഗ്രസ് ആരോപിച്ചു.

ബിന്ദുവിന് ജോലി വാഗ്ദാനം ചെയ്തു എംജിഎം ഗ്രൂപ്പ്

നെടുമങ്ങാട്: വ്യാജ മോഷണക്കേസിൽ പ്രതിയാക്കപ്പെട്ട ബിന്ദുവിനു ജീവിത സ്വപ്നം പടുത്തുയർത്താൻ ജോലി വാഗ്ദാനവുമായി എംജിഎം ഗ്രൂപ്പ്. എംജിഎം ഗ്രൂപ്പ് ഓഫ് എജുക്കേഷൻ ഇൻസ്റ്റിറ്റ്യൂട്ടിന്‍റെ വിതുര പൊന്മുടി വാല്യൂ പബ്ലിക് സ്കൂളിൽ പ്യുണായി ബിന്ദുവിനു നിയമനം നൽകി. കഴിഞ്ഞ ഏപ്രിൽ മാസമാണ് പനവൂർ പനയമുട്ടം പാമ്പാടി സ്വദേശിനി ആർ. ബിന്ദുവിനെ എൻസിസി നഗർ ബഥേൽ വീട്ടിൽ ഓമന ഡാനിയേൽ നൽകിയ പരാതിയിൽ പേരൂർക്കട പോലീസ് അറസ്റ്റ് ചെയ്തത്. 20 മണിക്കൂർ സ്റ്റേഷനിൽ മാനസികമായി പീഡിപ്പിച്ചശേഷം പോലീസ് ബിന്ദുവിനെ വിട്ടയക്കുകയായിരുന്നു.തുടർന്നു മാസങ്ങൾക്ക് ശേഷമാണ് ബിന്ദു കുറ്റക്കാരിയല്ല എന്ന് ക്രൈംബ്രാഞ്ച് അന്വേഷണ റിപ്പോർട്ട് സമർപ്പിച്ചത്. ഈ ആറുമാസക്കാലം ബിന്ദുവിന് വീട്ടുജോലിക്കു പോകാനുള്ള മാനസികാവസ്ഥ നഷ്ടപ്പെട്ട അവസ്ഥയിലായിരുന്നു. ബിന്ദുവിന്‍റെ അവസ്ഥ മനസിലാക്കിയ എംജിഎം ഗ്രൂപ്പ് ഓഫ് എഡ്യൂക്കേഷൻ ഇൻസ്റ്റിറ്റ്യൂഷൻ ചെയർമാൻ ഡോ ഗീവർഗീസ് യോഹന്നാൻ ഏതെങ്കിലും ഒരു സ്കൂളിൽ പ്യൂണായി ജോലി വാഗ്ദാനം ചെയ്തത്. തുടർന്ന് ഏറ്റവും സൗകര്യപ്രദമായ വിതുര പൊന്മുടി വാലി പബ്ലിക് സ്കൂളിൽ ജോലിക്ക് എത്താമെന്നു ബിന്ദു സമ്മതിച്ചു. ഇതിനു പുറമെ വീട്ടിൽ ഫർണിച്ചർ സാധനങ്ങളും പ്ലസ് വൺ, പത്താം ക്ലാസ് വിദ്യാർഥിനികളായ മക്കൾക്കു പഠനോപകരണങ്ങളും വാ ങ്ങി നൽകി. എംജിഎം സ്കൂൾ ഓഫ് ഇൻസ്റ്റിറ്റ്യൂഷൻ മാനേജർ സുനിൽകുമാർ വിതുര എംജിഎം സ്കൂൾ പ്രിൻസിപ്പൽ ദീപ സി. നായർ, മാനേജർ അഡ്വ. എൽ ബീന. എന്നിവർ വീട്ടിലെത്തി ജോലി വിവരം അറിയിക്കുകയും സാധനങ്ങളും കൈമാറുകയും ചെയ്തു.

ഫ്ലാറ്റില്‍ യുവതിയുടെ മരണം; ആന്ധ്ര സ്വദേശി അറസ്റ്റില്‍

പേരൂര്‍ക്കട: ഫ്‌ളാറ്റിനുള്ളില്‍ യുവതി തൂങ്ങിമരിച്ച സംഭവത്തില്‍ ആന്ധ്ര സ്വദേശിയായ യുവാവിന്‍റെ അറസ്റ്റ് കന്‍റോൺമെന്‍റ് പോലീസ് രേഖപ്പെടുത്തി. ഗുണ്ടൂര്‍ എട്ടാംലെയിന്‍ ഇന്ദിര കോളനിയിൽനിന്നും തെലങ്കാന ഹൈദരാബാദ് മാതാപൂര്‍ ഫ്‌ളാറ്റിൽ താമസിച്ചുവരുന്ന നരിഷെട്ടി ശ്രീകാന്ത് (28) ആണ് അറസ്റ്റിലായത്. പോണ്ടിച്ചേരി കാരിക്കല്‍ മുക്കുളം സ്ട്രീറ്റ് 13-ല്‍ അളകര്‍സാമിയുടെ മകള്‍ എ. അക്ഷയയെ (25) തിങ്കളാഴ്ച രാവിലെ 11നു ജനറല്‍ ആശുപത്രിക്കു സമീപം തമ്പുരാന്‍മുക്കിലെ ആര്‍ടെക് തമ്പുരാന്‍സ് ഫ്‌ളാറ്റിലെ അഞ്ചാം നിലയിലെ ബി- 5 അപ്പാര്‍ട്ട്‌മെന്‍റിനുള്ളില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു. ഒരു ഇന്‍സ്റ്റിറ്റ്യൂട്ടില്‍ ജർമൻ ഭാഷ പഠിക്കുന്നതിനുവേണ്ടിയാണ് അക്ഷയ ഇവിടെ രണ്ടാഴ്ചയായി താമസിച്ചുവന്നിരുന്നത്. യുവതിയുടെ മരണവുമായി ബന്ധപ്പെട്ട് അക്ഷയയുടെ ബന്ധുക്കളില്‍നിന്നു പോലീസ് വിശദമായ മൊഴി രേഖപ്പെടുത്തിയിരുന്നു. ഇതിന്‍റെ അടിസ്ഥാനത്തിലാണ് നരിഷെട്ടി ശ്രീകാന്തിലേക്ക് അന്വേഷണം എത്തുന്നത്. ഏകദേശം രണ്ടുവര്‍ഷമായി യുവാവും യുവതിയും പരിചയക്കാരാണെന്നും ഇവര്‍ വിവാഹം കഴിക്കാന്‍ തീരുമാനിച്ചിരുന്നതാണെന്നും കന്‍റോൺമെന്‍റ് സിഐ പറഞ്ഞു. മരണത്തിനു രണ്ടുദിവസംമുമ്പ് ഇരുവരും തമ്മില്‍ സൗന്ദര്യപ്പിണക്കം ഉണ്ടായെന്നും ഇതിന്‍റെ പേരില്‍ നരിഷെട്ടി ശ്രീകാന്ത് അക്ഷയയുടെ നമ്പര്‍ ബ്ലോക്ക് ചെയ്തിരുന്നുവെന്നും ഫോണ്‍ സ്വിച്ച് ഓഫ് ചെയ്തിരുന്നുവെന്നും കണ്ടെത്താന്‍ സാധിച്ചു. താന്‍ നിരന്തരം അക്ഷയയുടെ സമീപത്ത് ഉണ്ടാകണമെന്ന് ഇവര്‍ വാശിപിടിച്ചിരുന്നുവെന്നും ഇതു സഹിക്കാനാകാതെയാണ് ഫോണ്‍ ബ്ലോക്ക് ചെയ്തതെന്നും പിണക്കമുണ്ടായതെന്നുമാണ് യുവാവ് പറയുന്നത്. പോലീസിന്‍റെ നിര്‍ദേശത്തെ തുടര്‍ന്ന് നരിഷെട്ടി ശ്രീകാന്ത് കന്‍റോൺമെന്‍റ് സ്റ്റേഷനില്‍ ഹാജരാകുകയായിരുന്നു. ഇയാളെ കോടതി റിമാന്‍ഡ് ചെയ്തു.

യുവാവിനെ മര്‍ദിച്ചശേഷം മൊബൈല്‍ ഫോൺ തട്ടിയെടുത്ത സംഘത്തിലെ രണ്ടുപേര്‍ അറസ്റ്റില്‍

വലിയതുറ: യുവാവിനെ ക്രൂരമായി മര്‍ദിച്ച ശേഷം മൊബൈല്‍ ഫോണ്‍ തട്ടിയെടുത്ത മൂന്നംഗ സംഘത്തിലെ രണ്ടു പേരെ വലിയതുറ പോലീസ് അറസ്റ്റ് ചെയ്തു. വട്ടിയൂര്‍ക്കാവ് നെട്ടയം കാച്ചാണി എ.കെ.ജി. നഗര്‍ ലക്ഷംവീട് കോളനിയില്‍ ആദര്‍ശ് (29), നേമം സ്റ്റുഡിയോ റോഡ് നാഫിയ കോട്ടേജില്‍ വാടകയ്ക്ക് താമസിക്കുന്ന നിയാസ് (21) എന്നിവരാണ് പിടിയിലായത്. ഇവരുടെ സംഘത്തില്‍ ഉള്‍പ്പെട്ട പാച്ചല്ലൂര്‍ സ്വദേശി ആര്‍ഷ ഒളിവിലാണ്. ബുധനാഴ്ച പുലര്‍ച്ചെ 4.30 ഓടുകൂടി വലിയതുറ ജംഗ്ഷനിലുളള കുരിശടിക്കു മുന്നിലായിരുന്നു സംഭവം നടന്നത്. വിളവൂര്‍ക്കല്‍ സിഎസ്ഐ ചര്‍ച്ചിനു സമീപം കിഴക്കിന്‍കര പുത്തന്‍വീട്ടില്‍ സിജുവിനെ (28) യാണു പ്രതികള്‍ മര്‍ദിച്ചത്. കുരിശടിക്കു മുന്നില്‍ പെണ്‍സുഹൃത്തിനൊപ്പം സിജു ഫോട്ടോയെടുക്കുന്ന സമയം അതുവഴി കാറില്‍ വരികയായിരുന്ന പ്രതികള്‍ ഇവരെ അസഭ്യം പറഞ്ഞിരുന്നു. ഇതിനെതിരെ പ്രതികരിച്ച സിജുവിനെ പ്രതികള്‍ മൂന്നുപേരും ചേർന്നു ക്രൂരമായി മര്‍ദിച്ച ശേഷം മൊബൈല്‍ ഫോണ്‍ തട്ടിയെടുത്ത് കാറില്‍ രക്ഷപ്പെടുകയായിരുന്നു. സിജു നല്‍കിയ പരാതിയില്‍ കേസെടുത്ത പോലീസ് നടത്തിയ അന്വേഷണത്തിലാണ് നിയാസും ആദര്‍ശും പിടിയിലായത്. ഒളിവില്‍ പോയ ആര്‍ഷയ്ക്കായി അന്വേഷണം ഊര്‍ജിതമാക്കിയതായി പോലീസ് പറഞ്ഞു.തിരുവല്ലം പോലീസിന്‍റെ ജീപ്പ് അടിച്ചുതകര്‍ത്ത കേസിലും പോലീസുകാരെ ആക്രമിച്ചതടക്കം നിരവധി കേസുകളിലും പ്രതിയാണ് ആദര്‍ശ്. വലിയതുറ എസ്എച്ച്ഒ അശോകകുമാര്‍, എസ്ഐ ഇന്‍സമാം എന്നിവരുടെ നേതൃത്വത്തിലുളള പോലീസ് സംഘം അറസ്റ്റ് ചെയ്ത പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

മധ്യവർഗ വരുമാന രാജ്യങ്ങളുടെ നിരയിലേക്ക് കേരളത്തെ ഉയർത്തുക ലക്ഷ്യം: മന്ത്രി

തിരുവനന്തപുരം: മധ്യവർഗ വരുമാന രാജ്യങ്ങളുടെ നിരയിലേക്ക് കേരളത്തെ ഉയർത്തുകയാണ് അടുത്ത ലക്ഷ്യമെന്നും ഇതിൽ കുടുംബശ്രീക്ക് നിർണായക പങ്കു വഹിക്കാനാവുമെന്നും മന്ത്രി എം.ബി രാജേഷ്. കുടുംബശ്രീ, ദേശീയ ഗ്രാമീണ ഉപജീവന ദൗത്യം എന്നിവയുടെ സംയുക്താഭിമുഖ്യത്തിൽ ഹോട്ടൽ ഹൈസിന്തിൽ സംഘടിപ്പിക്കുന്ന റൂറൽ എന്‍റർപ്രൈസ് ഇൻക്യുബേറ്റർ -ത്രിദിന ദേശീയ ശിൽപശാലയുടെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. കുടുംബശ്രീ മുഖേന സംസ്ഥാനത്തു നടപ്പാക്കുന്ന സ്റ്റാർട്ടപ് വില്ലേജ് എന്‍റർപ്രണർഷിപ് പ്രോഗ്രാം അംബ്രല്ല പദ്ധതിയുടെ കീഴിൽ വരുന്ന സംരംഭകത്വ വികസന പദ്ധതികളിൽ ഉൾപ്പെട്ട ഒരു ഉപപദ്ധതിയാണ് ഇൻക്യുബേറ്റർ. ഇന്ത്യയിൽ കേരളത്തിൽ മാത്രമാണു നിലവിൽ ഇൻക്യുബേറ്റർ പദ്ധതി നടപ്പാക്കുന്നത്. വിപണിയിൽ വിജയിക്കാൻ പ്രയാസം നേരിടുന്ന ഉൽപാദന സേവന മേഖലകളിലെ സംരംഭങ്ങൾക്ക് ഇൻക്യുബേറ്റർ പദ്ധതി വഴി ആവശ്യമായ പിന്തുണകൾ ലഭ്യമാക്കും. ഇങ്ങനെ ഒാരോ കാലഘട്ടത്തിലും നേരിടുന്ന വെല്ലുവിളികളെ അഭിമുഖീകരിച്ചു കൊണ്ട് സ്വയം ആധുനികവത്കരിച്ചു കൊണ്ടാണു കുടുംബശ്രീയുടെ പ്രവർത്തനങ്ങളെന്നും മന്ത്രി പറഞ്ഞു. ഗ്രാമീണ മേഖലയിലെ സംരംഭകർക്ക് സുസ്ഥിര ഉപജീവന മാർഗമൊരുക്കുന്നതിന്‍റെ ഭാഗമായി ഉൽപാദനം മുതൽ വിപണനം വരെയുള്ള വിവിധ ഘട്ടങ്ങളിൽ ആവശ്യമായ പിന്തുണകൾ ലഭ്യമാക്കി ശക്തവും വിപുലവുമായ സംരംഭക ശൃംഖല സൃഷ്ടിക്കാനാവുമെന്നു കേന്ദ്ര ഗ്രാമവികസന മന്ത്രാലയം സെക്രട്ടറി ശൈലേഷ് കുമാർ സിംഗ് ഒാൺലൈനായി പങ്കെടുത്തു കൊണ്ട് മുഖ്യപ്രഭാഷണത്തിൽ പറഞ്ഞു. കേന്ദ്ര ഗ്രാമവികസന മന്ത്രാലയം ഡയറക്ടർ എസ്.എം. രാജേശ്വരി, കുടുംബശ്രീ എക്സിക്യൂട്ടീവ് ഡയറക്ടർ എച്ച്. ദിനേശൻ തുടങ്ങിയവർ പങ്കെടുത്തു.

സഹോദരങ്ങളെ കാറിടിച്ച സംഭവം; ഉടമ ഹാജരായി

പേരൂര്‍ക്കട: സ്‌കൂട്ടറില്‍ യാത്രചെയ്യുകയായിരുന്ന സഹോദരങ്ങളെ ഇടിച്ചിട്ട കാര്‍ നിര്‍ത്താതെ പോയ സംഭവത്തില്‍ കാറുടമ മ്യൂസിയം സ്റ്റേഷനില്‍ ഹാജരായി. തിരുവനന്തപുരം സ്വദേശി സുരേന്ദ്രബാബുവാണ് സ്റ്റേഷനിലെത്തി മൊഴി നല്‍കിയത്. താന്‍ സ്‌കൂട്ടര്‍ യാത്രികരെ കണ്ടില്ലെന്നായിരുന്നു ഉടമയുടെ മൊഴി. കഴിഞ്ഞ ശനിയാഴ്ച ഉച്ചയ്ക്ക് ഒരുമണിയോടെ നന്തന്‍കോട്ടെ ഒരു ഹോട്ടലിനു സമീപമായിരുന്നു സംഭവം. പേരൂര്‍ക്കട ഹിന്ദുസ്ഥാന്‍ ലാറ്റക്സിനു സമീപം താമസിക്കുന്ന എസ്.എസ്. സുനിത, ഇവരുടെ സഹോദരന്‍ വട്ടിയൂര്‍ക്കാവ് പുതൂര്‍ക്കോണം സ്വദേശി എസ്.എസ്. സുനില്‍ എന്നിവരെയാണ് കാര്‍ ഇടിച്ചിട്ടത്. കാര്‍ ഓടിച്ചിരുന്നയാള്‍ വാഹനം നിര്‍ത്തിയെങ്കിലും പിന്നീട് കാറില്‍നിന്നിറങ്ങാതെ അമിതവേഗത്തില്‍ മുന്നോട്ടുപോകുകയായിരുന്നു. പിറകേയെത്തിയ മറ്റൊരു കാറിലുണ്ടായിരുന്നവരാണ് ഇരുവരേയും ആശുപത്രിയില്‍ പ്രവേശിപ്പിച്ചത്. സുനിതയുടെ മകന്‍ അതിന്‍ എസ്. പ്രസാദ് വയറുവേദനയെ തുടര്‍ന്ന് കോസ്മോ ആശുപത്രിയില്‍ ചികിത്സയിലായിരുന്നു. മകന്‍റെ വസ്ത്രങ്ങളും മറ്റും വീട്ടില്‍നിന്ന് എടുക്കുന്നതിനു പേരൂര്‍ക്കടയിലേക്കു പോകുന്നതിനിടെയാണ് സുനിലും സുനിതയും സഞ്ചരിച്ചിരുന്ന സ്‌കൂട്ടറിനു പിറകില്‍ കാര്‍ വന്നിടിച്ചത്. വീഴ്ചയില്‍ സുനിലിനു സാരമായി പരിക്കേറ്റിരുന്നു. അപകടകരമായ രീതിയില്‍ വാഹനം ഓടിച്ചതിനും സ്‌കൂട്ടര്‍ യാത്രികരെ ഇടിച്ചിട്ടതിനും ഉടമയ്‌ക്കെതിരേ കേസെടുത്തിട്ടുണ്ട്. തുടരന്വേഷണവും തെളിവുശേഖരണവും നടന്നുവരുന്നതിനാല്‍ ഉടമയുടെ മൊഴി രേഖപ്പെടുത്തിയശേഷം പോലീസ് വിട്ടയയ്ക്കുകയായിരുന്നു.

ആഭ്യന്തരവിപണി കൈയടക്കാൻ കഴിയാതെ ഹോർട്ടികോർപ്

വിഴിഞ്ഞം: വൻകിട കമ്പനികൾ നൽകുന്നതിനേക്കാൾ വമ്പൻ വിലക്കുറവിൽ വില്പന നടത്തിയിട്ടും ആഭ്യന്തര വിപണി കൈയടക്കാൻ കഴിയാതെ ഹോർട്ടികോർപ്. കഴിഞ്ഞ വർഷം ഏറ്റെടുത്ത അൻപതിനായിരത്തോളം കിലോ തേനും ഇക്കുറി പൂർണമായി വിറ്റഴിക്കാനായില്ല . തേൻ ശേഖരണം വഴിമുട്ടിയതോടെ കേരളത്തിലെ ആയിരക്കണക്കിനു തേനിച്ച കർഷകർ ദുരിതത്തിലായി. ബാങ്ക് ലോണെടുത്തും പലിശയ്ക്കു പണം വാങ്ങിയും തേനിച്ച വളർത്തുന്ന നിരവധി പേർ നഷ്ടക്കണക്കുകൾ എണ്ണിയിട്ടും നിസാഹയരായി അധികൃതർ. മറ്റു സംസ്ഥാനങ്ങളിൽ നിന്നുള്ള വൻകിട കമ്പനികൾ മാർക്കറ്റിംഗ് തന്ത്രങ്ങളിലൂടെ വിപണി പിടിച്ചടക്കിയതാണ് ഹോർട്ടികോർപിനു വൻ തിരിച്ചടിയായത്. മറ്റ് ഉത്പന്നങ്ങൾക്ക് നൽകുന്ന തരത്തിൽ സർക്കാർ സബ്സിഡി നൽകാതെ വന്നതോടെ തനതു ഫണ്ടിൽനിന്നുള്ള പണം കൊണ്ടാണ് കോർപ്പറേഷൻ കിലോക്ക് 195 രൂപ നിരക്കിൽ തേൻ ശേഖരിച്ചിരുന്നത്. ഏറ്റെടുത്തതിന്‍റെ വിറ്റഴിക്കൽ കുറഞ്ഞ ഇക്കുറി ശേഖരണം പൂർണമായി സ്തംഭിച്ചതാണ് കർഷകർക്ക് വിനയായത്. നൂറിൽ കൂടുതൽ തേനിച്ചക്കൂടുകളുള്ള അയ്യായിരത്തോളം കർഷകർ ഹോർട്ടി കോർപിൽ മാത്രം അംഗങ്ങളായുണ്ടെന്നാണറിവ്. ഇതു കൂടാതെ വിവിധ സൊസൈറ്റികളിലും മറ്റുമായി നൂറുകണക്കിനു പേർ വേറെയും അംഗങ്ങളായുണ്ടെന്നും അധികൃതർ പറയുന്നു. ജനുവരി, ഫെബ്രുവരി മാർച്ച് മാസങ്ങളിൽ കർഷകർ ശേഖരിക്കുന്ന തേൻ മതിയായ വില നൽകുന്ന സ്ഥാപനങ്ങൾക്ക് ദിവസങ്ങൾക്കുള്ളിൽ വിറ്റഴിക്കുകയാണ് പതിവ്. ഹോർട്ടികോർപിനെ കൂടാതെ ഖാദിബോ ർഡ്, മറുനാടൻ സൊസൈറ്റി, ആയൂർവേദ സ്ഥാപനമായ ഔഷധി ഉൾപ്പെടെയുള്ള വിവിധ സ്ഥാപനങ്ങൾ നേരിട്ടു തേൻ വാങ്ങുന്നതായി കർഷകർ പറയുന്നു. ഏറ്റെടുക്കുന്ന സ്ഥാപനങ്ങളുടെ വിറ്റഴിക്കലിനനുസരിച്ചുള്ള ശേഖരണവും കർഷകരെ ബാധിക്കുന്നുണ്ട്. പ്രത്യേക രീതിയിൽ പരമാവധി ഒരു വർഷം വരെ സംരക്ഷിക്കാനുള്ള സംവിധാനങ്ങളാണ് കർഷകർക്കുള്ളത്. നിലവിൽ ശേഖരിച്ച് ആറു മാസം വരെ കഴിഞ്ഞ തേൻ ഇനിയെങ്കിലും അധികൃതർ ഏറ്റെടുത്തില്ലെങ്കിൽ പലരും വലിയ കടക്കെണിയിലാകും. കേരളത്തിൽ ഏറ്റവുമധികം കർഷകരുള്ളത് തിരുവനന്തപുരം നെയ്യാറ്റിൻകരയിലെ കോടങ്കരയിലാണെന്ന് അധികൃതർ പറയുന്നു. ഇവിടത്തെ നൂറുകണക്കിന് പേരുടെ ഏക വരുമാനമാണ് തേനിച്ച കൾ. ഡീസൺ കഴിഞ്ഞാൽ ഈച്ചകളുടെ വളർച്ചയ്ക്കായുള്ള ഭക്ഷണത്തിനും സംരക്ഷണത്തിനു മായി ഭാരിച്ച തുക ചിലവഴിക്കേണ്ടിവരുമെന്നും കഷകർ പറയുന്നു. കേരളത്തിന്‍റെ അങ്ങോളമിങ്ങോളമുള്ള എസ്റ്റേറ്റുകളിലെത്തിക്കുന്ന കൂടുകളിൽ നിന്നുള്ള തേൻ ശേഖരണം കുറഞ്ഞാലും കർഷകർ നഷ്ടത്തിലേക്കു കൂപ്പുകുത്തും. മറ്റു വൻകിട കമ്പനികൾ ശേഖരിച്ചു വിപണിയിൽ ഇറക്കുന്ന തേനിന് ഉപഭോക്താക്കളിൽനിന്ന് വൻ വിലയാണ് ഈടാക്കുന്നത്. ഇവരുടെ മാർക്കറ്റിംഗ് തന്ത്രമാണു വിപണി പിടിച്ചെടുക്കാൻ വഴിയൊരുക്കിയത്. വൻകിട കമ്പനികൾ തേൻ മാത്രം വിപണിയിൽ ഇറക്കുമ്പോൾ ഹോർട്ടികോർപ് ഏറെ ആരോഗ്യകരമായ ഇഞ്ചി തേൻ, വെളുത്തുള്ളി തേൻ, ഹണികോള എന്നിങ്ങനെയുള്ളവയും നിർമി ച്ചിറക്കുന്നുണ്ട്. എന്നാൽ ഇവ ആവശ്യമായ മാർക്കറ്റിംഗ് തന്ത്രത്തിലൂടെ ജനങ്ങളിൽ എത്തിക്കാനുള്ള നടപടിയില്ല താനും. തേൻ വ്യവസായം വർധിപ്പിക്കുകയെന്ന ലക്ഷ്യത്തോടെ സബ് സിഡി നിരക്കിൽ തേനിച്ചക്കൂടുകൾ വിതരണം ചെയ്യുന്ന അധികൃതർക്ക് സബ്സിഡി നിരക്കിൽ തേൻ എടുക്കാൻ നിർവാഹമില്ലാത്തതും വിനയാകുന്നുണ്ട്. എസ്. രാജേന്ദ്രകുമാർ

തിരുവനന്തപുരം അന്താരാഷ്ട്ര വിമാനത്താവളത്തിലെ ഫാസ്റ്റ് ട്രാക്ക് ഇമിഗ്രേഷന്‍ ഉദ്ഘാടനം ഇന്ന്

വലിയതുറ: കേന്ദ്ര ആഭ്യന്തര മന്ത്രാലയത്തിനു കീഴിലുള്ള ബ്യൂറോ ഓഫ് ഇമിഗ്രേഷന്‍ നടപ്പിലാക്കുന്ന "ഫാസ്റ്റ് ട്രാക്ക് ഇമിഗ്രേഷന്‍ -ട്രസ്റ്റഡ് ട്രാവലര്‍ പ്രോഗ്രാം' തിരുവനന്തപുരം വിമാനത്താവളത്തില്‍ നടപ്പിലാക്കുന്നു. പരിപാടിയുടെ ഉദ്ഘാടനം ഇന്നു രാവിലെ 11.30നു കേന്ദ്ര ആഭ്യന്തര-സഹകരണ വകുപ്പ് മന്ത്രി അമിത് ഷാ വെര്‍ച്വലായി നിര്‍വഹിക്കും. തിരുവനന്തപുരം അന്താരാഷ്ട്ര വിമാനത്താവളത്തിലെ ടെര്‍മിനല്‍ -2 ലെ ഡിപ്പാര്‍ച്ചര്‍ ഏരിയായില്‍ വീഡിയോ കോണ്‍ഫറന്‍സിലൂടെയാണ് ഉദ്ഘാടനം നടക്കുക. ഇതോടെ യാത്രക്കാര്‍ക്ക് ഇമിഗ്രേഷന്‍ ക്ലിയറന്‍സ് പ്രക്രിയ സുഗമമാകും. ഇന്ത്യന്‍ പൗരന്മാര്‍, ഓവര്‍സീസ് സിറ്റിസണ്‍ഷിപ്പ് ഓഫ് ഇന്ത്യ (ഒസിഐ) കാര്‍ഡ് കൈവശമുള്ള വിദേശ പൗരന്മാര്‍ എന്നിവര്‍ക്ക് ഇമിഗ്രേഷന്‍ ക്ലിയറന്‍സ് പ്രക്രിയ വേഗത്തിലാക്കുന്നതിനായാണ് ഫാസ്റ്റ് ട്രാക്ക് ഇമി ഗ്രേഷന്‍-ട്രസ്റ്റഡ് ട്രാവലേഴ്‌സ് പ്രോഗ്രാം ആരംഭിച്ചത്. യോഗ്യരായ അപേക്ഷകര്‍, അപേക്ഷാ ഫോമില്‍ നല്‍കിയിരിക്കുന്ന ഡാറ്റ ഫീല്‍ഡുകള്‍ അനുസരിച്ച് ആവശ്യമായ വിവരങ്ങള്‍ക്ക് പുറമേ ബയോമെട്രിക്‌സ് (വിരലടയാളവും മുഖചിത്രവും) നല്‍കേണ്ടതുണ്ട്. ആവശ്യമായ പരിശോധനകളും യോഗ്യതയും അടിസ്ഥാനമാക്കിയാണു പ്രോഗ്രാമിലേക്കുള്ള എന്‍‌റോള്‍മെന്‍റ് നടത്തുക. എഫ്ടിഐ-ടിടിപിയുടെ കീഴിലുളള ഇ-ഗേറ്റ്‌സ് സൗകര്യം ഇപ്പോള്‍ ഡല്‍ഹി, മുംബൈ, അഹമ്മദാബാദ്, കൊല്‍ക്കത്ത, ചെന്നൈ, ബെംഗളൂരു, ഹൈദരാബാദ്, കൊച്ചി തുടങ്ങിയ എട്ട് വിമാനത്താവളങ്ങളില്‍ ലഭ്യമാണ്.

എം. നന്ദകുമാറിനു നാടിന്‍റെ അന്ത്യാഞ്ജലി

തിരുവനന്തപുരം: മുന്‍ കളക്ടറും പിആര്‍ഡി ഡയറക്ടറുമായിരുന്ന വട്ടിയൂര്‍ക്കാവ് അറപ്പുര ഗാര്‍ഡന്‍സ് വിഎആർഎ -296 പ്രണവത്തിൽ എം. നന്ദകുമാറിനു നാടിന്‍റെ അന്ത്യാഞ്ജലി. ഇന്നലെ രാവിലെ 11. 45 മുതൽ ഉച്ചകഴിഞ്ഞ് 2.45 വരെ കവടിയാർ യൂണിവേഴ്‌സിറ്റി വുമൺസ്‌ അസോസിയേഷൻ ഹാളിൽ നടന്ന പൊതുദർശനത്തിൽ മന്ത്രി വി. ശിവൻകുട്ടി, വി.കെ. പ്രശാന്ത്‌ എംഎൽഎ, ദിവ്യ എസ്‌. അയ്യർ, എം. വിജയകുമാർ, കെ. മുരളീധരൻ, കളക്‌ടർ അനുകുമാരി, ടി. പി. സെൻകുമാർ, പാലോട്‌ രവി, ചീഫ് സെക്രട്ടറി എ. ജയതിലക്‌ തുടങ്ങി രാഷ്ട്രീയ-സാംസ്‌കാരിക-സാമൂഹ്യ രംഗത്തെ പ്രമുഖർ ഉൾപ്പെടെ ആയിരങ്ങൾ ആദരാഞ്ജലി അർപ്പിച്ചു. തുടർന്നു വീട്ടിലും പൊതുദർശനത്തിനുവച്ചു. വൈകുന്നേരം 5.30നു ശാന്തികവാടത്തിൽ മൃതദേഹം സംസ്‌കരിച്ചു. തലച്ചോറിലെ ശസ്ത്രക്രിയയെ തുടർന്നു നാലുമാസമായി തിരുവനന്തപുരത്തെ സ്വകാര്യാശുപത്രിയിൽ ചികിത്സയിലിരിക്കെ ചൊവ്വാഴ്ച രാത്രി 7.40 ഓ ടെയായിരുന്നു അന്ത്യം. 2011 ഒക്ടോബറിലാണ് നന്ദകുമാര്‍ തിരുവനന്തപുരം കലക്ടറായി നിയമിതനായത്. കോളജ് വിദ്യാഭ്യാസ വകുപ്പ്, ഭാഗ്യക്കുറി വകുപ്പ്, സിവിൽ സപ്ലൈസ് വകുപ്പ്, പിആർഡി, കുടുംബശ്രീ എന്നിവയിൽ ഡയറക്ടറായും ഭൂവിനിയോഗ വകുപ്പ്, റൂറൽ ഡെവലപ്മെന്‍റ് എന്നിവയിൽ കമീഷണറായും സേവനം ചെയ്തിട്ടുണ്ട്. സംഖ്യാശാസ്ത്രം, ജ്യോതിഷം, തന്ത്രവിദ്യ എന്നിവയിലും പാണ്ഡിത്യമുണ്ടായിരുന്നു.

നെട്ടയിൽ കെ. സജി അനുസ്മരണം സംഘടിപ്പിച്ചു

നെടുമങ്ങാട്: മികച്ച അധ്യാപകനും പൊതുപ്രവർത്തകനും കോൺഗ്രസ് നേതാവും സാമുദായിക പ്രവർത്തകനുമായിരുന്ന നെട്ടയിൽ കെ. സജിയുടെ ഒന്നാം ചരമവാർഷികം ആചരിച്ചു. ഡിസിസി വൈസ് പ്രസിഡന്‍റ് അഡ്വ. എം മുനീർ, നഗരസഭാ മുൻ ചെയർമാൻ വട്ടപ്പാറ ചന്ദ്രൻ, വിശ്വഹിന്ദുപരിഷത്ത് സെക്രട്ടറി നെടുമങ്ങാട് ശ്രീകുമാർ, രഞ്ജിത് കൃഷ് ണ, അഡ്വ. എൻ. ബാജി, നെറ്റിറച്ചിറ ജയൻ, എസ്.എൻ. ട്രസ്റ്റ് ഡയറക്ടർ ബോർഡ് അംഗം ഗുലാബ് കുമാർ, ടി. അർജുനൻ, ചിറമുക്ക് റാഫി, നെട്ടയിൽ ഷിനു, ചന്ദ്രകുമാർ, ചന്ദ്രൻ, മധു എന്നിവർ അനുസ്മരണ പ്രഭാഷണം നടത്തി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]