പിന്തുണച്ച് ഗോവിന്ദനും രാമകൃഷ്ണനും : Deepika.com Kerala News |

Click here for detailed news of all items

പിന്തുണച്ച് ഗോവിന്ദനും രാമകൃഷ്ണനും

Tuesday, December 24, 2024 2:40 AM IST

തിരുവനന്തപുരം: വയനാട്ടിൽ കോണ്‍ഗ്രസ് നേതാവ് പ്രിയങ്ക ഗാന്ധിയുടെ വിജയം മുസ്‌ലിം വർഗീയ വാദികളുടെ പിൻബലത്തിലായിരുന്നുവെന്ന പാർട്ടി പോളിറ്റ്ബ്യൂറോ അംഗം എ.വിജയരാഘവന്‍റെ പരാമർശത്തോടു യോജിച്ചു സിപിഎം സംസ്ഥാന സെക്രട്ടറി എം.വി. ഗോവിന്ദനും ഇടതുമുന്നണി കണ്‍വീനർ ടി.പി. രാമകൃഷ്ണനും.

വിജയരാഘവന്‍റെ പരാമർശം ജമാഅത്തെ ഇസ്‌ലാമിക്കെതിരേയായിരുന്നുവെന്നും മുസ്‌ലിംലീഗിനെതിരേയല്ലായിരുന്നുവെന്നും ഗോവിന്ദൻ പറഞ്ഞു. വിജയരാഘവൻ വിമർശിച്ചത് വർഗീയ സംഘടനകളുമായി ചേർന്നുള്ള കോണ്‍ഗ്രസിന്‍റെ പ്രവർത്തനത്തെയാണെന്ന് ടി.പി. രാമകൃഷ്ണനും പറഞ്ഞു.

ആർഎസ്എസ് വിമർശനം ഹിന്ദുക്കൾക്ക് എതിരല്ല. ഭൂരിപക്ഷ, ന്യൂനപക്ഷ വർഗീയതകൾ ശക്തിയായി വരുന്നു. അതിൽ ഒരു വിട്ടുവീഴ്ച ഉണ്ടാകില്ല. മുസ്‌ലിം സമുദായത്തിൽ ഭൂരിപക്ഷവും മതേതരവാദികളാണ്.

മുസ്‌ലിം വർഗീയവാദത്തിന്‍റെ പ്രധാനികൾ ജമാഅത്തെ ഇസ്‌ലാമിയാണ്. ജമാഅത്തെ ഇസ്‌ലാമിയുടെയും എസ്ഡിപിഐയുടെയും സഖ്യകക്ഷിയാണു കോണ്‍ഗ്രസ്. വിജയരാഘവൻ പറഞ്ഞതു വളരെ കൃത്യമാണ്.

എസ്ഡിപിഐയുടെയും ജമാഅത്തെ ഇസ്‌ലാമിയുടെയും സഖ്യകക്ഷി എന്ന രീതിയിൽ തന്നെയാണു വോട്ടു ലഭിച്ചത്. ലീഗ് വർഗീയ കക്ഷി എന്നു പറയുന്നില്ല. അതാകാതിരിക്കണം എന്നാണു പറയുന്നത്. ലീഗ് കൃത്യമായ നിലപാടു സ്വീകരിക്കുന്നില്ല. ലീഗിനകത്തും ജമാഅത്തെ ഇസ്‌ലാമിയും എസ്ഡിപിഐയുമായുള്ള ബന്ധത്തിന്‍റെ പ്രശ്നം ഉയർന്നുവരുമെന്നും എം.വി. ഗോവിന്ദൻ പറഞ്ഞു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.