അമ്പഴക്കാട്
ഫൊറോന പള്ളി
അമ്പഴക്കാട്: സെന്റ് തോമസ് ഫൊറോന പള്ളിയിലെ ഇടവകമധ്യസ്ഥനായ മാർ തോമാശ്ലീഹായുടെ ദുക്റാന തിരുനാളിനു മാനന്തവാടി രൂപത സഹായമെത്രാൻ മാർ അലക്സ് താരാമംഗലം കൊടിയേറ്റി. തിരുനാൾപ്രസുദേന്തിവാഴ്ചയും ബിഷപ് നടത്തി. വികാരി ഫാ. സെബാസ്റ്റ്യൻ നടവരമ്പൻ, അസിസ്റ്റ് വികാരി ഫാ. എഡ്വിൻ ചക്കാലമറ്റത്ത്, കൈക്കാരന്മാരായ ഷൈജൻ കൂനൻ, ബിജു മാടപ്പിള്ളി, സേവി കാച്ചപ്പിള്ളി, തിരുനാൾ ജനറൽ കൺവീനർ മാർട്ടിൻ മേനാച്ചേരി, കമ്മിറ്റി കൺവീനർമാർ, ഇടവാകാംഗങ്ങൾ എന്നിവർ സന്നിഹിതരായിരുന്നു.
നാളെ തിരുനാൾദിനത്തിൽ രാവിലെ ഏഴിനും വൈകീട്ട് അഞ്ചിനും വിശുദ്ധ കുർബാന. രാവിലെ 5.45നു വിശുദ്ധ കുർബാനയ്ക്കു വികാരി ഫാ. സെബാസ്റ്റ്യൻ നടവരമ്പൻ കാർമികത്വം വഹിക്കും. തിരുക്കർമങ്ങൾക്കുശേഷം വിശുദ്ധന്റെ രൂപം പള്ളിയിൽനിന്നു പന്തലിലേക്ക് എഴുന്നള്ളിച്ചുവയ്ക്കും. തുടർന്നു വെഞ്ചരിപ്പിനുശേഷം നേർച്ചയൂട്ട് ആരംഭിക്കും. രാവിലെ പത്തിന് ആഘോഷമായ തിരുനാൾ റാസയ്ക്ക് ഇരിങ്ങാലക്കുട മെത്രാൻ മാർ പോളി കണ്ണൂക്കാടൻ മുഖ്യകാർമികത്വം വഹിക്കും. തുടർന്നു തിരുനാൾപ്രദക്ഷിണം.
കോട്ടപ്പുറം മാർക്കറ്റ്
കപ്പേള
കൊടുങ്ങല്ലൂർ: കോട്ടപ്പുറം മാർക്കറ്റിലെ കപ്പേളയിൽ വിശുദ്ധ തോമാശ്ലീഹായുടെ തിരുനാളിനു കോട്ടപ്പുറം രൂപത വികാരി ജനറാൾ മോൺ. റോക്കി റോബി കളത്തിൽ കൊടിയേറ്റി. കത്തീഡ്രൽ വികാരി ഫാ. ജാക്സൻ വലിയപറമ്പിൽ, ഫാ. ഷാജു മൈക്കിൾ കുരിശിങ്കൽ തുടങ്ങിയവർ സംബന്ധിച്ചു.
കനകമല
തീര്ഥാടനകേന്ദ്രം
കൊടകര: കനകമല മാര് തോമ കുരിശുമുടി തീര്ഥാടനകേന്ദ്രത്തില് ദുക്റാന തിരുനാളിന് കൊടിയേറി. കുറ്റിക്കാട് ഫൊറോന വികാരി ഫാ. ലിജു പോള് പറമ്പത്ത് കൊടിയേറ്റം നിര്വഹിച്ചു. തീര്ഥാടന കേന്ദ്രം റെക്ടര് ഫാ. അലക്സ് കല്ലേലി സഹകാര്മികനായി.
തുടര്ന്ന് ദിവ്യബലി, ലദീഞ്ഞ്, നൊവേന എന്നിവ ഉണ്ടായി. ഡീക്കന് ജോര്ജുകുട്ടി എംഎസ് ജെ, തിരുനാള് ജനറല് കണ്വീനര് ജോര്ജ് പന്തല്ലൂക്കാരന്, കൈക്കാരന്മാരായ ആന്റണി കരിയാട്ടി, ജോസ് വെട്ടുമണിക്കല്, ഷിജു പഴേടത്തുപറമ്പില്, ലിജോ ചാതേലി എന്നിവര് പരിപാടികള്ക്ക് നേതൃത്വം നല്കി.
തിരുനാള് ദിനമായ നാളെ റാസ കുര്ബാന, തിരുശേഷിപ്പ് വണക്കം , ഊട്ട് നേര്ച്ച എന്നിവ ഉണ്ടാകും.