കൊച്ചി: കുന്നുകര ഗ്രാമപഞ്ചായത്തിൽ കിടപ്പിലായവർക്കും രോഗികൾക്കും സാന്ത്വനം പകരുന്ന സബർമതി ചാരിറ്റബിൾ സൊസൈറ്റി, ശ്വാസസംബന്ധമായ ബുദ്ധിമുട്ടുകൾ നേരിടുന്നവർക്കായി ഓക്സിജൻ കോൺസെൻട്രേറ്ററുകൾ ശേഖരിച്ചു. ഒന്നാം വാർഡ് മെമ്പറും സ്റ്റാൻഡിംഗ് കമ്മിറ്റി ചെയർപേഴ്സണുമായ സിജി വർഗീസിന്റെ നേതൃത്വത്തിലാണു ഓക്സിജൻ കോൺസെൻട്രേറ്ററുകൾ ശേഖരിച്ചു സബർമതി ചാരിറ്റബിൾ സൊസൈറ്റിക്കു കൈമാറിയത്.
68000 രൂപ വീതം വില വരുന്ന ഏഴ് ഓക്സിജൻ കോൺസെൻട്രേറ്ററുകളാണു ഇതോടെ സൊസൈറ്റിക്കു ലഭിച്ചത്. കുന്നുകര പഞ്ചായത്തിലെ പതിനഞ്ചു വാർഡുകളിലുമുള്ള രോഗികൾക്ക് സൗജന്യമായി ഉപയോഗിക്കാൻ ഈ മെഷീനുകൾ നൽകും.
രോഗികൾക്ക് ആവശ്യമായ വിവിധ മെഡിക്കൽ ഉപകരണങ്ങളും മറ്റു സഹായങ്ങളും സബർമതി ചാരിറ്റബിൾ സൊസൈറ്റി സൗജന്യമായി ലഭ്യമാക്കുന്നുണ്ട്. രണ്ടു വർഷമായി കുന്നുകര കേന്ദ്രമായി പ്രവർത്തിക്കുന്ന സൊസൈറ്റി സുമനസുകളുടെ സഹകരണത്തോടെയാണു പ്രവർത്തനങ്ങൾ ഏകോപിപ്പിക്കുന്നത്.
കുന്നുകര ഗ്രാമപഞ്ചായത്ത് പ്രസിഡന്റ് സൈന ബാബു, മുൻ പ്രസിഡന്റ് ഫ്രാൻസിസ് തറയിൽ, സിജി വർഗീസ് എന്നിവർ ചേർന്ന് ഓക്സിജൻ കോൺസെൻട്രേറ്ററുകൾ സബർമതി ഭാരവാഹികൾക്കു കൈമാറി. ഗ്രാമപഞ്ചായത്ത് വൈസ് പ്രസിഡന്റ് എം.എ. ജബ്ബാർ, സൊസൈറ്റി പ്രസിഡന്റ് കരീം കാഞ്ഞോടാൻ, വൈസ് പ്രസിഡന്റ് കെ.ടി. കൃഷ്ണൻ, ജോയിന്റ് സെക്രട്ടറി സെബി തോമസ്, കോ -ഓർഡിനേറ്റർമാരായ ജി. അനിൽ,
താഹിർ, ഫ്രാൻസിസ്, സോണി, ഷിബു വർഗീസ്, ആന്റു, റോജി, തനൂജ, സാലി, ഷാബു, ജോമി തുടങ്ങിയവർ പ്രസംഗിച്ചു. രാത്രിയും പകലും രോഗികൾക്ക് സഹായങ്ങളുമായി എത്താൻ സന്നദ്ധതയുള്ള നൂറുകണക്കിനു വോളണ്ടിയർമാരും സബർമതിയ്ക്കുണ്ട്.