ADVERTISEMENT

ADVERTISEMENT

പ്രതിഷേധ സമരം സംഘടിപ്പിച്ചു

അമ്പലപ്പുഴ: തകർന്നു കിടക്കുന്ന തകഴി ആശുപത്രി റോഡ് ഗതാഗത യോഗ്യമാക്കണമെന്നാവശ്യപ്പെട്ട് വിവിധ സംഘടനകളുടെ നേതൃത്വത്തിൽ പ്രതിഷേധ സമരം സംഘടിപ്പിച്ചു. തകഴി ഗവ. ആശുപത്രിക്കു മുന്നിൽ നടന്ന സമരം ദേശീയ മനുഷ്യാവകാശ സമിതി സംസ്ഥാന പ്രസിഡന്‍റ് അഡ്വ. ദിലീപ് ചെറിയനാട് ഉദ്ഘാടനം ചെയ്തു. ‌

കൺസ്യൂമർ ഫെഡറേഷൻ ഓഫ് ഇന്ത്യ ജില്ലാ പ്രസിഡന്‍റ് കരുമാടി മോഹനൻ അധ്യക്ഷത വഹിച്ചു. ഗൾഫ് റിട്ടേൺഡ് ആൻഡ് പ്രവാസി മലയാളി അസോസിയേഷൻ സംസ്ഥാന ജനറൽ സെക്രട്ടറി വി. ഉത്തമൻ അമ്പലപ്പുഴ, ദേശീയ മനുഷ്യാവകാശ സമിതി ജില്ലാ പ്രസിഡന്‍റ് കെ.കെ. ശശിധരൻ, ജില്ലാ സെക്രട്ടറി ടി. സുരേഷ് തുടങ്ങിയവർ പ്രസംഗിച്ചു.

ADVERTISEMENT

രേഖകളിൽ കൃത്രിമം: കർഷകർ കൃഷിഭവൻ ഉപരോധിച്ചു

മങ്കൊമ്പ്: വിള ഇൻഷുറൻസ് പദ്ധതി രേഖകളിൽ കൃഷിവകുപ്പുദ്യോഗസ്ഥർ കാട്ടിയെന്നാരോപിച്ചു കർഷകർ കൃഷിഭവൻ ഉപരോധിച്ചു. നീലംപേരൂർ കൃഷിഭവൻ പരിധിയിൽ വരുന്ന കിളിയങ്കാവ് പാടശേഖരത്തിലെ കർഷകരാണ് കൃഷിഭവൻ ഉപരോധിച്ചത്. പാടശേഖരസമിതി സെക്രട്ടറി കെ. ഗോപകുമാർ സമരം ഉദ്ഘാടനം ചെയ്തു. വിത കഴിഞ്ഞ് 45 ദിവസങ്ങൾക്കുള്ളിൽ ഇൻഷുറൻസ് നടപടിക്രമങ്ങൾ പൂർത്തീകരിക്കണമെന്നിരിക്കേ, കിളിയങ്കാവ് വടക്ക് പാടശേഖരത്തിൽ വിത കഴിഞ്ഞ് 87-ാം ദിവസത്തിൽ വിത തീയതിയിൽ കൃത്രിമം കാട്ടി ഇൻഷ്വറൻസ് നടപടികൾ പൂർത്തിയാക്കിയ രാമങ്കരി കൃഷി അസിസ്റ്റന്‍റ് ഡയറക്ടർക്കും നീലംപേരൂർ കൃഷി അസിസ്റ്റന്‍റിനുമെതിരേ നടപടിയുണ്ടാകണമെന്നാവശ്യപ്പെട്ടാണ് സമരം നടന്നത്. പാടത്തിന് ഇൻഷ്വറൻസ് പരിരക്ഷ ഉറപ്പാക്കണമെന്നും സമരക്കാർ ആവശ്യപ്പെട്ടു. ജൂൺ 21 നാണ് പാടത്ത് വിത ആരംഭിച്ചത്. കർശന സൂക്ഷ്മപരിശോധനയിൽ അപാകത കണ്ടെത്തി മാറ്റിവച്ച അപേക്ഷാ ഫോറങ്ങൾ സമയബന്ധിതമായി കർഷകർ പൂർത്തീകരിച്ചു നൽകി. വിത തീയതി ജൂലൈ ഏഴാക്കി രജിസ്റ്റർ ചെയ്ത് ആകെയുള്ള 124 കർഷകരിൽ 79 പേരുടേതു മാത്രമാണ് പാസാക്കിയത്. ശേഷിക്കുന്നവയാണ് ജൂലൈ 30 വിതത്തിയതിയാക്കി മാറ്റി സെപ്റ്റമ്പർ 15ന് എഡിഎയുടെ നേതൃത്വത്തിൽ രജിസ്റ്റർ ചെയ്തതെന്നും കർഷകർ പറയുന്നു. വിത തീയതി കൃത്രിമമായി ഒരു മാസത്തിലേറെ വ്യത്യാസത്തിൽ രജിസ്റ്റർ ചെയ്ത സാഹചര്യത്തിൽ, മടവീഴ്ചയുണ്ടായാൽ ഇൻഷ്വറൻസ് ആനുകൂല്യം ലഭിക്കാനുള്ള സാധ്യത തീരെയില്ലെന്നാണ് കർഷകരുടെ ആശങ്ക. കൃഷിമന്ത്രിക്കും സംസ്ഥാന ഡയറക്ടർക്കും പരാതി നൽകുമെന്ന് പാടശേഖര സമിതി പറഞ്ഞു. സമിതി പ്രസിഡന്‍റ് ജെ. ഗോപിദാസ് അദ്ധ്യക്ഷത വഹിച്ച ചടങ്ങിൽ കൺവീനർ തുളസീദാസൻ പിള്ള, എം.എ. ജോസഫ്, റെജികുമാർ ആലഞ്ചേരി, പി.ടി. തോമസ്, സുകുമാരൻ നായർ മറ്റപ്പള്ളിൽ തുടങ്ങിയവർ പ്രസംഗിച്ചു.

വീട് കയറി ആക്രമണം; യുവതിക്ക് പരിക്ക്, ആറുപേർക്കെതിരേ കേസ്

ചെങ്ങന്നൂർ: തിരുവൻവണ്ടൂർ ഇരമല്ലിക്കരയിൽ ആറംഗ സംഘം വീട് കയറി ആക്രമിച്ചതായി പരാതി. സംഭവത്തിൽ വീട്ടുടമയുടെ മകൾക്ക് പരിക്കേറ്റു. ഇക്കഴിഞ്ഞ 14-ന് രാത്രിയിലാണ് സൂര്യഭവനിൽ സുനിൽ കുമാറി(47)ന്‍റെ വീട്ടിൽ ആക്രമണം നടന്നത്. സുനിൽ കുമാറിന്‍റെ മകളായ സൂര്യ ലക്ഷ്മി(22)ക്കാണ് ആക്രമണത്തിൽ പരിക്കേറ്റത്. ഇരുമ്പ് കമ്പി വടികൊണ്ട് അടിച്ചതിനെത്തുടർന്ന് വലതുതള്ളവിരലിന് മുറിവേൽക്കുകയും വസ്ത്രം വലിച്ചു കീറുകയും ചെയ്തതായി സൂര്യലക്ഷ്മി ചെങ്ങന്നൂർ പോലീസിന് നൽകിയ പരാതിയിൽ പറയുന്നു. ആക്രമണം നടന്നപ്പോൾ സുനിൽ കുമാറിന്‍റെ ഇളയ മകൾ ശ്രീ ലക്ഷ്മി പരിക്കേൽക്കാതെ രക്ഷപ്പെട്ടു. വീടിന്‍റെ ജനൽ ചില്ലുകൾ എറിഞ്ഞു തകർക്കുകയും മുറ്റത്തുണ്ടായിരുന്ന ബൈക്കും സിറ്റൗട്ടിലെ കസേരകളും അടിച്ചു തകർക്കുകയും ചെയ്തതായി പരാതിയിൽ പറയുന്നു. സുനിൽ കുമാറിന്‍റെ രണ്ടാം ഭാര്യ പിണങ്ങിപ്പോയതുമായി ബന്ധപ്പെട്ട തർക്കങ്ങളാണ് ആക്രമണത്തിൽ കലാശിച്ചതെന്നാണ് സൂചന. അയൽവാസിയായ തുരുത്തേൽ വിഷ്ണുവിന്‍റെ ഭാര്യ സുബിയാണ് രണ്ടാം ഭാര്യയുടെ ബന്ധുവെന്ന് പരാതിയിൽ പറയുന്നു. സംഭവവുമായി ബന്ധപ്പെട്ട് വിഷ്ണു ഉൾപ്പെടെ ആറ് പേർക്കെതിരേ ചെങ്ങന്നൂർ പോലീസ് കേസെടുത്തു.

തൃക്കുന്നപ്പുഴയിൽ മുണ്ടിനീര് രോഗം വ്യാപിക്കുന്നു

ഹരിപ്പാട്: തീരദേശ ഗ്രാമമായ തൃക്കുന്നപ്പുഴ പഞ്ചായത്തിന്‍റെ വിവിധ ഭാഗങ്ങളിൽ മുണ്ടിനീര് രോഗം വ്യാപിക്കുന്നു. വിവിധ സ്കൂളുകളിൽ പഠിക്കുന്ന 50 ലേറെ കുട്ടികൾക്ക് രോഗം ഇതുവരെ സ്ഥിരീകരിച്ചിട്ടുണ്ട്. രോഗവ്യാപനം തടയാൻ കഴിയാത്തത് ആശങ്ക ഉയർത്തുന്നു. തൃക്കുന്നപ്പുഴ ഗവ. എൽപി സ്കൂളിലെ കുട്ടികൾക്കാണ് ജൂലൈ മാസം ആദ്യം മുണ്ടിനീര് ബാധ കണ്ടുതുടങ്ങിയത്. പലതവണയായി മുപ്പതിലധികം കുട്ടികൾക്ക് രോഗം ബാധിച്ചിട്ടുണ്ട്. ഒന്ന് രണ്ട് ക്ലാസുകൾ പഠിക്കുന്ന കുട്ടികൾക്കാണ് രോഗബാധ ഏറെയും ഉണ്ടായത്. ഓണാഘോഷത്തിനു ശേഷം രോഗബാധ വീണ്ടും കണ്ടുതുടങ്ങിയതിനെത്തുടർന്ന് കഴിഞ്ഞ 12 മുതൽ സ്കൂളിന് അവധി നൽകിയിരിക്കുകയാണ്. ഇപ്പോൾ പല്ലന ഗവൺമെന്‍റ് എൽപി സ്കൂളിലെ കുട്ടികൾക്കാണ് രോഗബാധ കൂടുതലായി കണ്ടുതുടങ്ങുന്നത്. രോഗവ്യാപനം തടയാൻ സ്കൂളിന് 24-ാം തീയതി വരെ കലക്‌ടർ അവധി പ്രഖ്യാപിച്ചു. കാർത്തികപ്പള്ളിയിലും ഹരിപ്പാട്ടും സമീപപ്രദേശങ്ങളിലും ഉള്ള വിവിധ സ്കൂളുകളിലെ കുട്ടികൾക്ക് രോഗബാധ സ്ഥിരീകരിച്ചിട്ടുണ്ട്. മൂന്നര വയസുകാരൻ മുതൽ 13 വയസ് വരെയുള്ള കുട്ടികൾക്ക് രോഗം ബാധിച്ചിട്ടുണ്ട്. രോഗ വ്യാപനം തടയാൻ ഊർജിതമായ പ്രവർത്തനങ്ങളാണ് ആരോഗ്യവകുപ്പ് നടത്തുന്നത്. വിദ്യാലയങ്ങളില്‍ മുണ്ടിനീര് പടര്‍ന്നു പിടിക്കാതിരിക്കാനുള്ള മുന്‍കരുതല്‍ നടപടികള്‍ കൂടുതൽ ഊർജിതമാക്കു ന്നതിനായി ആരോഗ്യ പ്രവർത്തകരുടെയും ആശാവർക്കർമാരുടെയും അടിയന്തയോഗം ഇന്നു നടക്കുമെന്ന് വിദ്യാഭ്യാസ ആരോഗ്യ സ്റ്റാൻഡിംഗ് കമ്മിറ്റി ചെയർമാൻ പറഞ്ഞു. കുട്ടികൾക്ക് നൽകുന്ന എംഎംആർ വാക്സിൻ നിർത്തലാക്കിയതാണ് രോഗം വ്യാപകമാകാൻ കാരണമെന്ന് നാട്ടുകാർ പറയുന്നു. രോഗബാധ കൂടുതൽ ഉണ്ടായ സ്കൂളിനെ കേന്ദ്രീകരിച്ചു മാത്രമാണ് പ്രതിരോധ പ്രവർത്തനങ്ങൾ നടത്തിയിട്ടുള്ളത്. വീട്ടിലുള്ള മറ്റുകുട്ടികൾ വഴിയും രോഗം വ്യാപനം സംഭവിക്കാമെന്ന ആശങ്ക നിലനിൽക്കുന്നു. കൃത്യമായ ബോധവത്കരണം ആവശ്യമാണെന്നും നാട്ടുകാർ പറയുന്നു. ഹരിപ്പാട് ബ്ലോക്ക്‌ പഞ്ചായത്തിന്‍റെ നേതൃത്വത്തിൽ ആശാ വർക്കർമാർവഴി പ്രദേശത്ത് ബോധവത്കരണ നോട്ടീസ് വിതരണം ചെയ്യാനും അനൗൺസ്മെന്‍റ് നടത്താനും തീരുമാനിച്ചിട്ടുണ്ട്.

ചാമ്പ്യന്‍സ് ബോട്ട് ലീഗ് വൈകാതെ ലോകശ്രദ്ധ നേടും: മന്ത്രി റിയാസ്

ആലപ്പുഴ: ആറാം സീസണില്‍ എത്തുമ്പോള്‍ ചാമ്പ്യന്‍സ് ബോട്ട് ലീഗ് ലോക ശ്രദ്ധ പിടിച്ചുപറ്റുമെന്നും അതിനുള്ള ശ്രമങ്ങള്‍ക്ക് സര്‍ക്കാര്‍ തുടക്കം കുറിച്ചതായും ടൂറിസം-പൊതുമരാമത്ത് മന്ത്രി പി.എ. മുഹമ്മദ് റിയാസ് . ചാമ്പ്യന്‍സ് ബോട്ട് ലീഗ് അഞ്ചാം സീസണ്‍ സംസ്ഥാനതല ഉദ്ഘാടനം ഓണ്‍ലൈനായി കൈനകരിയില്‍ നിര്‍വഹിക്കുകയായിരുന്നു അദ്ദേഹം. സിബിഎല്‍ തുടങ്ങി നാലാം സീസണ്‍ എത്തിയപ്പോഴേക്കും രാജ്യാന്തരശ്രദ്ധ പിടിച്ചുപറ്റാന്‍ നമുക്ക് സാധിച്ചു. ആറാം സീസണിലേക്ക് എത്തുമ്പോള്‍ ലോകശ്രദ്ധ പിടിച്ചുപറ്റുന്ന നിലയിലേക്കെത്താനുള്ള പ്രവര്‍ത്തനം ടൂറിസം വകുപ്പ് ആരംഭിച്ചിട്ടുണ്ട്. ഇതിന്‍റെ ഭാഗമായി ലോകരാജ്യങ്ങളില്‍ ചാമ്പ്യന്‍സ് ബോട്ട് ലീഗിന്‍റെ പ്രചാരണത്തിനായി സര്‍ക്കാര്‍ മൈക്രോ സൈറ്റ് പുറത്തിറക്കി. വള്ളംകളിയുടെ സമഗ്രവിവരങ്ങള്‍ രേഖപ്പെടുത്തിയ സൈറ്റ് വഴി കൂടുതല്‍ വിദേശ സഞ്ചാരികളെ സിബിഎല്‍ വേദിയിലേക്ക് എത്തിക്കുകയാണ് ലക്ഷ്യം. ഭാവിയില്‍ ഈ സൈറ്റ് വഴി ടൂര്‍ ബുക്കിംഗ് വരെ നടപ്പാക്കാന്‍ ലക്ഷ്യമുണ്ടെന്നും അദ്ദേഹം പറഞ്ഞു. വള്ളംകളി വ്യാപകമാക്കും സംസ്ഥാനമൊട്ടാകെയുള്ള വള്ളംകളി മത്സരങ്ങളെ കോര്‍ത്തിണക്കി വള്ളംകളി കൂടുതല്‍ വ്യാപകമായി സംഘടിപ്പിക്കണമെന്നാണ് സര്‍ക്കാര്‍ ലക്ഷ്യം. അതുകൊണ്ടുതന്നെ ഇത്തവണ കേരളത്തിന്‍റെ വടക്കുഭാഗത്തുള്ള ജില്ലകളിലും ബോട്ട് ലീഗിന്‍റെ ഭാഗമായി വള്ളംകളി മത്സരങ്ങള്‍ സംഘടിപ്പിക്കുന്നുണ്ടെന്നും മന്ത്രി പറഞ്ഞു. ഉദ്ഘാടന സമ്മേളനത്തില്‍ മുന്‍ എംഎല്‍എ സി.കെ. സദാശിവന്‍ അധ്യക്ഷനായി. ജില്ലാ കളക്ടര്‍ അലക്‌സ് വര്‍ഗീസ് സിബിഎല്‍ സന്ദേശം നല്‍കി. ടൂറിസം വകുപ്പ് അഡീഷണല്‍ ഡയറക്ടര്‍ ശ്രീധന്യ സുരേഷ്, ചമ്പക്കുളം ബ്ലോക്ക് പഞ്ചായത്ത് പ്രസിഡന്‍റ് ജിന്‍സി ജോളി, കൈനകരി ഗ്രാമപഞ്ചായത്ത് പ്രസിഡന്‍റ് എം.സി. പ്രസാദ്, ചമ്പക്കുളം ഗ്രാമപഞ്ചായത്ത് പ്രസിഡന്‍റ് ടി.ജി. ജലജകുമാരി, കൈനകരി ഗ്രാമപഞ്ചായത്ത് വികസനകാര്യ സ്ഥിരംസമിതി അധ്യക്ഷന്‍ കെ.എ. പ്രമോദ്, ടെക്‌നിക്കല്‍ കമ്മിറ്റി അംഗങ്ങളായ മുന്‍ എംഎല്‍എ കെ.കെ. ഷാജു, ആര്‍.കെ. കുറിപ്പ്, എസ്.എം. ഇക്ബാല്‍, മറ്റു ജനപ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

മിന്നും ഫിനിഷിംഗ്

ചമ്പക്കുളം: കൈനകരി പമ്പയാറ്റില്‍ നടന്ന ചാന്പ്യൻസ് ബോട്ട് ലീഗിന്‍റെ അഞ്ചാം പതിപ്പിന്‍റെ ആദ്യ പോരാട്ടത്തില്‍ ആവേശം വാനോളം ഉയര്‍ത്തിയ ഫൈനല്‍ മത്സരത്തിൽ കൈനകരി വില്ലേജ് ബോട്ട് ക്ലബിന്‍റെ വീയപുരം ചുണ്ടന്‍ ഒന്നാം സ്ഥാനം കരസ്ഥമാക്കി, സെന്‍റ് ചാവറ എവര്‍ റോളിംഗ് ട്രോഫിയില്‍ മുത്തമിട്ടു. മൂന്ന് മിനിറ്റ് 33 സെക്കന്‍ഡ് 34 മൈക്രോ സെക്കന്‍ഡില്‍ ഫിനിഷ് ചെയ്താണ് വീയപുരം ജേതാക്കളായത്. മൂന്ന് മിനിറ്റും 33 സെക്കന്‍ഡും 62 മൈക്രോ സെക്കന്‍ഡും എടുത്ത് ഫിനിഷ് ചെയ്ത പള്ളാത്തുരുത്തി ബോട്ട് ക്ലബിന്‍റെ മേല്‍പ്പാടം ചുണ്ടന്‍ രണ്ടാം സ്ഥാനവും മൂന്ന് മിനിറ്റും 41 സെക്കന്‍ഡ് 68 മൈക്രോ സെക്കന്‍ഡും എടുത്ത് ഫിനിഷ് ചെയ്ത നിരണം ബോട്ട് ക്ലബിന്‍റെ നിരണം ചുണ്ടന്‍ മൂന്നാം സ്ഥാനവും നേടി. വീയപുരത്തിന്‍റെ വീറ് അത്യന്തം വാശിയേറിയ പ്രാഥമിക മത്സരങ്ങളില്‍ മൂന്നാം ഹീറ്റ്‌സില്‍ മാറ്റുരച്ച മൂന്നു വള്ളങ്ങള്‍ തന്നെയാണ് ഫൈനലിലും മത്സരിച്ചത്. മൂന്നാം ഹീറ്റ്‌സിന്‍റെ തനിയാവര്‍ത്തനമായിരുന്നു ഫൈനല്‍ മത്സരങ്ങള്‍. കഴിഞ്ഞ നാലു സിബിഎല്‍ സീസണുകളിലും ചാമ്പ്യന്‍മാരായിരുന്ന പള്ളാത്തുരുത്തി ബോട്ട് ക്ലബിനെ ഈ വര്‍ഷത്തെ പുന്നമടക്കായലിലെ നെഹ്‌റു ട്രോഫിയിലും വിബിസി പിന്നിലാക്കിയിരുന്നു. 2024ലെ നെഹ്‌റു ട്രോഫിയില്‍ സമയത്തിന്‍റെ കണക്കില്‍ സാങ്കേതികമായി പള്ളാത്തുരുത്തിയോടു പരാജയം ഏറ്റുവാങ്ങേണ്ടിവന്ന കൈനകരി വില്ലേജ് ബോട്ട് ക്ലബിന്‍റെ മറ്റൊരു നേട്ടമായി കൈനകരിയിലെ വിജയം. ചാമ്പ്യന്‍സ് ബോട്ട് ലീഗിന്‍റെ കഴിഞ്ഞ നാലു സീസണുകളിലും അജയ്യരായി മുന്നേറിയ പള്ളാത്തുരുത്തിക്കു കനത്ത തിരിച്ചടി. കേരള വിനോദ സഞ്ചാര വകുപ്പിന്‍റെ മേല്‍നോട്ടത്തില്‍ സംഘടിപ്പിക്കുന്ന ചാമ്പ്യന്‍സ് ബോട്ട് ലീഗിന്‍റെ അഞ്ചാം പതിപ്പിന്‍റെ ഉദ്ഘാടന മത്സരമാണ് കൈനകരി പമ്പയാറ്റില്‍ നടന്നത്. മന്ത്രി മുഹമ്മദ് റിയാസ് ഓണ്‍ലൈനായി ഉദ്ഘാടനം ചെയ്ത വള്ളംകളിയില്‍ വിജയികള്‍ക്കുള്ള സമ്മാന വിതരണം കൃഷിമന്ത്രി പി. പ്രസാദ് നിര്‍വഹിച്ചു. സമ്മാന നിറവിൽ വീയപുരം ഫസ്റ്റ് ലൂസേഴ്‌സ് ഫൈനലില്‍ ഏറ്റുമുട്ടിയ ചമ്പക്കുളം, ചെറുതന, കാരിച്ചാല്‍ എന്നിവയില്‍ ചെറുതന, കാരിച്ചാല്‍, ചമ്പക്കുളം എന്നിവ യഥാക്രമം ഏഴ് എട്ട് ഒന്‍പത് സ്ഥാനങ്ങളിലെത്തി. ലൂസേഴ്‌സ് ഫൈനലില്‍ മത്സരിച്ച പായിപ്പാട്, നടുവിലേപ്പറമ്പന്‍ എന്നിവയെ പിന്നിലാക്കി നടുഭാഗം നാലാം സ്ഥാനത്ത് എത്തിപ്പോള്‍ നടുവിലേപ്പറമ്പന്‍, പായിപ്പാട് എന്നിവ അഞ്ചും ആറും സ്ഥാനങ്ങളിലെത്തി. വീയപുരം ചുണ്ടൻ ഒന്നാം തുഴക്കാരനും ഒന്നാം പങ്കായക്കാരനും മികച്ച തുഴച്ചില്‍ക്കാരനും അമരക്കാരനുമുള്ള ട്രോഫികളും കരസ്ഥമാക്കി. മികച്ച സംഘാടനം ചുണ്ടന്‍ വള്ളങ്ങളുടെ മത്സരങ്ങള്‍ സമയക്രമം പാലിച്ചു പൂര്‍ത്തിയാക്കാന്‍ സാധിച്ച സംഘാടക മികവിന് അഭിനന്ദനം. ഒരാഴ്ചയില്‍ കുറഞ്ഞ സമയം മാത്രമേ കൈനകരിയില്‍ വള്ളംകളി സംഘടിപ്പിക്കുന്നതിനു ലഭിച്ചുള്ളൂ. എങ്കിലും സംഘാടക മികവുകൊണ്ടും കാണികളുടെ പങ്കാളിത്തംകൊണ്ടും വള്ളംകളി വൻ വിജയമായി മാറി. മത്സര ഇടവേളയില്‍ ജലകായിക പ്രകടനങ്ങളും സിബിഎല്‍ ട്രോഫി പ്രദര്‍ശനത്തോടൊപ്പം ചെണ്ടമേളവും അരങ്ങേറി. ഉച്ചയ്ക്കു രണ്ടിനു കൈനകരി പഞ്ചായത്ത് പ്രസിഡന്‍റ് എം.സി. പ്രസാദ് പതാക ഉയര്‍ത്തിയതോടെ സിബിഎല്‍ മത്സരങ്ങള്‍ക്ക് ആരംഭംകുറിച്ചു. ടൂറിസം അഡീഷണല്‍ ഡയറക്ടര്‍ (ജനറല്‍) ശ്രീധന്യ സുരേഷ് ഐഎഎസ് സ്വാഗതം ആശംസിച്ച യോഗത്തില്‍ സി.കെ. സദാശിവന്‍ എക്‌സ് എംഎല്‍എ അധ്യക്ഷത വഹിച്ചു. വിജയികള്‍ക്കുള്ള സമ്മാനങ്ങള്‍ കൃഷിമന്ത്രി പി. പ്രസാദ് വിതരണം ചെയ്തു.

ഗവേഷക പഠനത്തിന് ഒറ്റമശേരി സ്വദേശിക്ക് രണ്ടുകോടിയുടെ സ്കോളര്‍ഷിപ്പ്

ചേർത്തല: യൂറോപ്യൻ യൂണിയൻ രാജ്യങ്ങളിലെ ഡോക്ടറൽ നെറ്റ്‌വർക്ക് പ്രോട്ടേമിക് ഗവേഷക വിദ്യാർഥികൾക്കായി ഏർപ്പെടുത്തിയിട്ടുള്ള ഹോറിസോൺ മേരി സ്കോളോ ടോവാസ്‌ക ക്യൂറി ആക്‌ഷൻ റിസേർച്ച് പ്രോട്ടേമിക് സ്കോളർഷിപ്പിന് ഒറ്റമശേരി സ്വദേശിയായ സെബിൻ കെ. ബിനു അർഹനായി. രണ്ടു രാജ്യങ്ങളായി നാലു വർഷം ഗവേഷകപഠനം നടത്തുന്നതിനായി 2,01,720 യൂറോയാണ് (രണ്ടു കോടിയോളം രൂപ ) സ്കോർഷിപ് ലഭിക്കുന്നത്. ആദ്യം വിയന്നയിലെ വീൻ ടെക്നിക്കൽ യൂണിവേഴ്സിറ്റിയിലും തുടർന്ന് അയർലാൻഡ് മൂൺസ്റ്റർ ടെക്‌നോളജിക്കൽ യൂണിവേഴ്‌സിറ്റിയിലുമാണ് പഠനം. തണ്ണീർമുക്കം എൽപി സ്കൂൾ പ്രഥമാധ്യാപകന്‍ ഒറ്റമശേരി കുരിശിങ്കൽ വീട്ടിൽ ബിനു കെ. കുഞ്ഞപ്പന്‍റെയും അർത്തുങ്കൽ സെന്‍റ് ഫ്രാൻസിസ് അസീസി ഹയര്‍ സെക്കന്‍ഡറി സ്കൂളിലെ അധ്യാപിക മേരിലാമ്മ വർഗീസിന്‍റെയും മകനാണ്. യൂറോപ്യൻ യൂണിയൻ രാജ്യങ്ങളിലെ ഗവേഷകാത്മക പ്രവർത്തനങ്ങൾ പ്രോത്സാഹിപ്പിക്കുന്നതിനായാണ് ഹോറിസോൺ മേരി സ്കോളോ ടോവാസ്‌ക ആക്‌ഷൻ ഡോക്ടറൽ നെറ്റ്‌വർക്ക് സ്കോളർഷിപ്പ് ഏർപ്പെടുത്തിയിട്ടുള്ളത്. ആഗോളതലത്തിൽ റിസേർച്ചിൽ താത്പര്യമുള്ള വിദ്യാർഥികളിൽ നിന്നും വിവിധ ഘട്ടങ്ങളിലായി തെരഞ്ഞെടുക്കപ്പെടുന്നവർക്കാണ് സ്കോളർഷിപ്പ് നൽകുന്നത്. സെബിന്‍റെ സഹോദരി ആൻ മരിയ കെ. ബിനു സൗത്ത് കൊറിയൻ പുസാൻ നാഷണൽ യൂണിവേഴ്സിറ്റിയിൽ ഗവേഷക വിദ്യാർഥിയാണ്.

കത്തിക്കയറി ഇറച്ചിക്കോഴി വില

തുറവൂർ: ആരും നിയന്ത്രിക്കാൻ ഇല്ലാതെ കത്തിക്കയറി ഇറച്ചിക്കോഴി വില. ഒരു കിലോ കോഴിയിറച്ചിക്ക് 25 രൂപ മുതൽ 75 രൂപ വരെയുള്ള വർധനവാണ് ഉണ്ടായിരിക്കുന്നത്. സർക്കാരോ മറ്റ് ഏജൻസികളോ വില നിയന്ത്രിക്കാത്തത് കോഴി വ്യാപാരികളുടെ ഇത്തരത്തിലുള്ള പിടിച്ചുപറിക്ക് കാരണമെന്നു ചൂണ്ടിക്കാണിക്കപ്പെടുന്നു. കഴിഞ്ഞ ഗവൺമെന്‍റിന്‍റെ കാലത്ത് ധനകാര്യമന്ത്രിയായിരുന്ന തോമസ് ഐസക് ഒരു കിലോ കോഴി 80 രൂപയ്ക്ക് വിൽക്കുമെന്ന് പ്രഖ്യാപിച്ചെങ്കിലും കോഴി ഇറച്ചി വ്യാപാരികൾ മന്ത്രിയുടെ പ്രഖ്യാപനം തള്ളിക്കൊണ്ട് തങ്ങൾക്ക് തോന്നുന്ന വിലയിൽ കോഴിയെ വിൽക്കുമെന്നുള്ള നിലപാടാണ് എടുത്തത്. ഇപ്പോഴും കോഴിവില നിയന്ത്രിക്കാനാകാതെ റോക്കറ്റുപോലെ മുകളിലേക്ക് കയറിക്കൊണ്ടിരിക്കു. ഓണത്തിനു മുമ്പും ഓണത്തിന് ശേഷവും 130 രൂപയ്ക്ക് മുകളിലാണ് ലൈവ് കോഴിവില. 135 മുതൽ 175 വരെയാണ് നിലവിലെ കോഴിവില. ഇതുമൂലം വിവാഹവും മറ്റു ചടങ്ങുകൾ നടത്തുന്നവരെ പ്രതികൂലമായി ബാധിച്ചിരിക്കുകയാണ്. വ്യാപാരസ്ഥാപനങ്ങളും വൻതുക നൽകി കോഴി ഇറച്ചി വാങ്ങേണ്ട അവസ്ഥയാണ്. അതുകൊണ്ടുതന്നെ ഒട്ടു മിക്ക ഹോട്ടലുകളിലും കോഴി ഇറച്ചി ഉപയോഗിച്ച് ഉണ്ടാക്കുന്ന ഭക്ഷ്യവസ്തുക്കൾക്ക് അമിതമായ വിലയാണ് ഈടാക്കുന്നത്. തമിഴ്നാട് ലോബിയും കേരളത്തിലെ ചിലരും ചേർന്നാണ് നിലവിൽ കോഴിവില നിയന്ത്രിക്കുന്നത്. പല കോഴി ഇറച്ചി വിൽപ്പന സ്ഥാപനങ്ങളും കോഴിക്ക് പല വിലയാണ് ഈടാക്കുന്നത്. ആലപ്പുഴ ജില്ലയിലെ തന്നെ ഒട്ടുമിക്ക കോഴി ഇറച്ചി വിൽപ്പന കേന്ദ്രങ്ങളും യാതൊരുവിധ അടിസ്ഥാന സൗകര്യങ്ങളും ഇല്ലാതെയാണ് പ്രവർത്തിക്കുന്നത്. ചുരുക്കം ചില കടകൾക്ക് മാത്രമേ കോഴി ഇറച്ചി മാലിന്യങ്ങൾ സംസ്കരിക്കുവാൻ സൗകര്യമുള്ളു. മറ്റുസ്ഥാപനങ്ങൾ കോഴി ഇറച്ചി മാലിന്യങ്ങൾ ചാക്കിൽക്കെട്ടി പൊതുതോടുകളിലോ റോഡിന്‍റെ വശങ്ങളിലോ, കുറ്റിക്കാടുള്ള സ്ഥലങ്ങളിലോ കടൽത്തീരത്തോ തള്ളുകയാണ് ചെയ്യുന്നത്. ഇത് പകർച്ചവ്യാധികൾ പടർന്നുപിടിക്കുന്നതിന് കാരണമാകുന്നുണ്ട്. ഒരു പ്രദേശത്തുതന്നെ ഇറച്ചിക്കോഴിക്ക് പലവിലയാണ് ഈടാക്കുന്നത് . സർക്കാരും മറ്റ് ഏജൻസികളും ഇത്തരത്തിലുള്ള പിടിച്ചുപറി കണ്ടില്ലെന്ന് നടിക്കുകയാണ്. അടിയന്തരമായി സംസ്ഥാനത്തെ കോഴിവില നിയന്ത്രിക്കാനുള്ള കർശനനടപടി ഉണ്ടാകണമെന്ന ആവശ്യം ശക്തമായി.

കുത്തിയതോട് പോലീസ് സ്റ്റേഷന് ബിഐഎസ് അംഗീകാരം

തുറവൂർ: ബ്യൂറോ ഓഫ് ഇന്ത്യൻ സ്റ്റാൻഡേർഡ് സർട്ടിഫിക്കേഷനോടെ ഐഎസ്‌ഒ അംഗീകാരം കുത്തിയതോട് സ്റ്റേഷൻ സ്വന്തമാക്കി. ഈ അംഗീകാരം കരസ്ഥമാക്കിയ ഇന്ത്യയിലെ തന്നെ രണ്ടാമത്തെ സ്റ്റേഷനാണ് കുത്തിയതോട് പോലീസ് സ്റ്റേഷൻ. ഈ അംഗീകാരം ആദ്യം അർത്തുങ്കൽ പോലീസ് സ്റ്റേഷൻ കരസ്ഥമാക്കിയിരുന്നു. സേവനവും സൗകര്യവും മിക്കച്ചതാക്കിയാണ് ഈ നേട്ടം കൈവരിച്ചത്. ആറു മാസത്തെ നീണ്ട പരിശ്രമമാണ് നേട്ടത്തിന് പിന്നിൽ. ബി ഐഎസ് ദക്ഷിണമേഖല ഓഫീസിലെ സംഘം സ്റ്റേഷൻ സന്ദർശിച്ച് നല്കിയ മാർഗ നിർദേശം അനുസരിച്ചാണ് മികച്ച സേവനവും സൗകര്യവും ഉറപ്പാക്കിയത്. ക്രമസമാധാന പരിപാലനം, കുറ്റാന്വേഷണം, പരാതി തീർപ്പാക്കുന്നതിലെ വേഗത, രേഖകളുടെ പരിപാലനം, ഉദ്യോഗസ്ഥരുടെ പെരുമാറ്റം, ശുചിത്വ-ഹരിതചട്ട പരിപാലനം, ദൈനംദിന പ്രവർത്തനത്തിൽ ആധുനിക സാങ്കേതിക വിദ്യ പ്രയോജനപ്പെടുത്തൽ തുടങ്ങിയ ഘടകങ്ങളിൽ ബിഐഎസ് നിഷ്കർഷിക്കുന്ന മികവ് കൈവരിച്ചാണ് നേട്ടം സ്വന്തമാക്കിയത്. ആലപ്പുഴ ജില്ലാ പോലീസ് മേധാവി മോഹനചന്ദ്രൻ നായർ ഐ പിഎസിന്‍റെ പിൻതുണയേടെ ചേർത്തല എഎസ്‌പി ഹരീഷ് ജെയിൻ ഐപിഎസിന്‍റെ മേൽനോട്ടത്തിൽ കുത്തിയതോട് ഇൻസ്പെക്ടർ ഓഫ് പോലീസ് അജയ മോഹൻ എം., പോലീസ് സബ് ഇൻസ്പെക്ടർ രാജീവ് , സലി സി.സി. എന്നിവരുടെ നേതൃത്വത്തിൽ സേനാംഗങ്ങൾ കൈകോർത്താണ് സ്റ്റേഷൻ പ്രവർത്തനം ഉന്നത നിലവാരത്തിലെത്തിച്ചത്. ഇന്ന് രാവിലെ 11.ന് സ്റ്റേഷൻ അങ്കണത്തിൽ കേരള കൃഷി വകുപ്പ് മന്ത്രി പി. പ്രസാദ് ഉദ്ഘാടനം നിർവഹിക്കും. അരൂർ എംഎൽഎ ദലീമ ജോജോ, ഉന്നത പോലീസ് ഉദ്യോഗസ്ഥർ എന്നിവർ പങ്കെടുക്കും. ചടങ്ങിൽ ബ്യൂറോ ഓഫ് ഇന്ത്യൻ സ്റ്റാൻഡേർഡ് ( IS/ISO 9001- 2015 ) സർട്ടിഫിക്കറ്റ് ബിഐഎസ് പ്രതിനിധി കൈമാറും .

കായംകുളത്ത് കൂടുതൽ ട്രെയിനുകള്‍ക്ക് സ്റ്റോപ്പ് അനുവദിക്കണം: കെ.സി. വേണുഗോപാല്‍ എംപി

കായംകുളം: മധ്യ തിരുവിതാംകൂറിലെ പ്രധാന തീരദേശ റെയില്‍വേ സ്റ്റേഷനായ കായംകുളം ജംഗ്‌ഷൻ റെയിൽവേ സ്റ്റേഷനിൽ വന്ദേഭാരത്, രാജധാനി ഉള്‍പ്പെടെ പത്തോളം ട്രെയിനുകള്‍ക്ക് സ്‌റ്റോപ്പ് അനുവദിക്കണമെന്ന് ആവശ്യപ്പെട്ട് കെ.സി. വേണുഗോപാല്‍ എംപി കേന്ദ്ര റെയില്‍വേ മന്ത്രിക്ക് കത്തു നല്‍കി. വന്ദേഭാരതിന് പുറമെ തിരുവനന്തപുരം നോര്‍ത്ത്( കൊച്ചുവേളി), യോഗ് നാഗരി ഋഷികേഷ് സൂപ്പര്‍ഫാസ്റ്റ് എക്‌സ്പ്രസ്, തിരുവനന്തപുരം ചെന്നൈ എംജിആര്‍ സെന്‍ട്രല്‍ സൂപ്പര്‍ഫാസ്റ്റ് എക്‌സ്പ്രസ്, തിരുവനന്തപുരം ചെന്നൈ എംജിആര്‍ സെന്‍ട്രല്‍ സൂപ്പര്‍ എസി എക്‌സ്പ്രസ്, തിരുവനന്തപുരം ഹസ്രത് നിസാമുദ്ദീന്‍ രാജധാനി എക്‌സ്പ്രസ്, തിരുവനന്തപുരം നോര്‍ത്ത് യശ്വന്ത്പുരം എസി എക്‌സ്പ്രസ്, തിരുവനന്തപുരം നോര്‍ത്ത് ഹുബ്ബള്ളി സൂപ്പര്‍ഫാസ്റ്റ് എക്‌സ്പ്രസ്, തിരുവനന്തപുരം വെരാവല്‍ എക്‌സ്പ്രസ്, ഹംസഫര്‍ എക്‌സ്പ്രസ്, വിവേക് സൂപ്പര്‍ഫാസ്റ്റ് എക്‌സ്പ്രസ് എന്നിവയ്ക്കും സ്റ്റോപ്പ് അനുവദിക്കണമെന്ന് കെ.സി. വേണുഗോപാല്‍ എംപി ആവശ്യപ്പെട്ടു. നിരവധി കേന്ദ്ര-സംസ്ഥാന സര്‍ക്കാര്‍ ഓഫീസുകള്‍ സ്ഥിതി ചെയ്യുന്ന പ്രദേശമാണ് കായംകുളം. ഇതിന് പുറമെ അമൃതാനന്ദമയി മഠം, ആയുര്‍വേദ മെഡിക്കല്‍ കോളജ്, എൻജിനിയറിംഗ് കോളജ് , ഇന്‍ഡോ-ടിബറ്റന്‍ ബോര്‍ഡര്‍ പോലീസ് ക്യാമ്പ്, എന്‍ടിപിസി തുടങ്ങിയ സ്ഥാപനങ്ങളുടെയും സാംസ്‌കാരിക, ചരിത്ര, വ്യവസായ, വിദ്യാഭ്യാസ, ആരോഗ്യ മേഖലകളുടെയും ആവശ്യകത കണക്കിലെടുത്താണ് ഈ ട്രെയിനുകള്‍ക്ക് കൂടി സ്റ്റോപ്പ് അനുവദിക്കണമെന്ന ആവശ്യം എംപി ഉന്നയിച്ചത്. ശബരിമല തീർഥാടകരും ആഭ്യന്തര വിദേശ സഞ്ചാരികളും പ്രധാനമായി ആശ്രയിക്കുന്ന സ്റ്റേഷന്‍ എന്ന പരിഗണന മുന്‍നിര്‍ത്തി കായംകുളം സ്റ്റേഷന്‍റെ നവീകരണ പ്രവൃത്തികളും അടിയന്തരമായി ആരംഭിക്കണമെന്ന് അദ്ദേഹം ആവശ്യപ്പെട്ടു.

ഗവണ്‍മെന്‍റ് ബോയ്‌സ് സ്‌കൂളില്‍ ശ്രീനാരായണഗുരു സമാധി ദിനാചരണം

ചേര്‍ത്തല: ശ്രീനാരായണ മെമ്മോറിയല്‍ ഗവണ്‍മെന്‍റ് ബോയ്‌സ് ഹയര്‍സെക്കന്‍ഡറി സ്‌കൂളും താലൂക്ക് മഹാസസമാധി ദിനാചരണകമ്മിറ്റിയും ചേര്‍ന്നുള്ള ശ്രീനാരായണഗുരുവിന്‍റെ 98-ാമത് മഹാസമാധി ദിനാചരണം നാളെ നടക്കും. ശ്രീനാരായണഗുരുദേവന്‍ ദാനംചെയ്ത സ്ഥലത്താണ് സര്‍ക്കാര്‍ സ്‌കൂളിന്‍റെ വികസനം നടന്നത്. പതിറ്റാണ്ടുകളായി മുടങ്ങാതെയാണ് സ്‌കൂളില്‍ സമാധി ദിനാചരണം നടന്നുവരുന്നത്. ഇക്കുറിയും സമാധി ദിനാചരണത്തിനു വിപുലമായ ക്രമീകരണങ്ങളാണൊരുക്കിയിരിക്കുന്നതെന്ന് സമാധി ദിനാചരണകമ്മിറ്റി ചെയര്‍മാന്‍ സി.കെ. വിജയഘോഷ് ചാരങ്കാട്ട്, ജനറല്‍ കണ്‍വീനര്‍ കെ.ആര്‍. രാജു, വൈസ് ചെയര്‍മാന്‍മാരായ പി.എം. പുഷ്‌കരന്‍, എസ്. ജയധരന്‍, ജി. ഗോപിദാസ് എന്നിവര്‍ പത്രസമ്മേളനത്തില്‍ അറിയിച്ചു. രാവിലെ പത്തിനു ഗുരുദേവന്‍ കണ്ണാടി പ്രതിഷ്ഠ നടത്തിയ കളവംകോടം ശക്തീശ്വരം ക്ഷേത്രത്തില്‍നിന്ന് സ്‌കൂളിലെ വിദ്യാര്‍ഥികള്‍ നയിക്കുന്ന ദീപശിഖ റിലേ. രണ്ടിനു സ്‌കൂളില്‍ നടക്കുന്ന സമാധിദിന സമ്മേളനം മുന്‍ മന്ത്രി ജി. സുധാകരന്‍ ഉദ്ഘാടനം ചെയ്യും. കളവംകോടം ശക്തീശ്വരം ക്ഷേത്രം പ്രസിഡന്‍റ് സി.കെ. ഷാജിമോഹന്‍ മുഖ്യപ്രഭാഷണം നടത്തും. 3.45ന് പുഷ്പാര്‍ച്ചനയും സമാധി സമൂഹ പ്രാർഥനയേയും തുടര്‍ന്ന് നാലിന് മൗനജാഥ. കണിച്ചുകുളങ്ങര ദേവസ്വം സ്‌കൂളുകളില്‍ ചേര്‍ത്തല: കണിച്ചുകുളങ്ങര ദേവസ്വം സ്‌കൂളുകളുടെ സംയുക്ത നേതൃത്വത്തില്‍ നാളെ ശ്രീനാരായണ ഗുരുദേവന്‍റെ 98-ാം സമാധിദിനം ആചരിക്കും. സാംസ്‌കാരിക സമ്മേളനവും മെറിറ്റ് അവാര്‍ഡ് വിതരണവുമായാണ് സമാധിദിനം ആചരിക്കുന്നത്. വിദ്യകൊണ്ടു പ്രബുദ്ധരാകുകയെന്ന ഗുരുസന്ദേശത്തില്‍ പ്രവര്‍ത്തിച്ചുതുടങ്ങിയതാണ് കണിച്ചുകുളങ്ങരയിലെ ദേവസ്വം സ്‌കൂളുകള്‍. മുന്‍ കാലങ്ങളിലേക്കാള്‍ മികവോടെയുള്ള സമാധി ദിനാചരണത്തിന് ഒരുക്കങ്ങളായതായി ഹയര്‍സെക്കൻഡറി സ്‌കൂള്‍ പ്രിന്‍സിപ്പല്‍ എം. അജിത, വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ രജനി രവീന്ദ്രന്‍, വിഎച്ച്എസ്എസ് പ്രഥമാധ്യാപിക എസ്. സുജിഷ, ഗേള്‍സ് ഹൈസ്‌കൂള്‍ പ്രഥമാധ്യാപിക കെ.പി. ഷീബ, ജനറല്‍ കണ്‍വീനര്‍ ബാബു രാമചന്ദ്രന്‍, പി.കെ. മനോജ്, പി.കെ. രാമകൃഷ്ണന്‍ എന്നിവര്‍ പത്രസമ്മേളനത്തില്‍ അറിയിച്ചു. സ്‌കൂളുകളില്‍നിന്ന് ഉന്നതവിജയം നേടിയവര്‍ക്ക് സ്വര്‍ണമെഡലടക്കം 200 ഓളം പുരസ്‌കാരങ്ങളാണ് സമ്മേളനത്തില്‍ നല്‍കുന്നത്. പകല്‍ 2.30ന് നടക്കുന്ന സാംസ്‌കാരിക സമ്മേളനം ഫിഷറീസ് മന്ത്രി സജി ചെറിയാന്‍ ഉദ്ഘാടനം ചെയ്യും. കണിച്ചുകുളങ്ങര ദേവസ്വം പ്രസിഡന്‍റ് വെള്ളാപ്പളളി നടേശന്‍ അധ്യക്ഷനാകും. പ്രഭാഷകന്‍ വി.കെ. സുരേഷ് ബാബു മുഖ്യപ്രഭാഷണം നടത്തും. ഹയര്‍സെക്കന്‍ഡറി റിട്ടയേര്‍ഡ് റീജിയണല്‍ ഡെപ്യൂട്ടി ഡയറക്ടര്‍ വി.കെ. അശോക് കുമാര്‍ സമാധിദിന സന്ദേശം നല്‍കും.

ജനറൽ ആശുപത്രിയിൽ എൻഡോസ്കോപ്പി പ്രവർത്തനം തുടങ്ങി; കോളനോസ്കോപ്പി ഉടൻ

ആലപ്പുഴ: ജനറൽ ആശുപത്രി ആലപ്പുഴയിൽ എൻഡോസ്കോപ്പി പ്രവർത്തനം തുടങ്ങി. കഴിഞ്ഞമാസം എച്ച്. സലാം എംഎൽഎ ഉദ്ഘാടനം ചെയ്ത എൻഡോസ്കോപ്പിയുടെ പ്രവർത്തനം ബന്ധപ്പെട്ട ജീവനക്കാർക്ക് ആവശ്യമായ പരിശീലനം നൽകിയതിനുശേഷം ഇന്നലെ മുതലാണ് ആരംഭിച്ചത്. ഗാസ്ട്രോ എൻട്രോളജിസ്റ്റ് ഡോ. ഉണ്ണികൃഷ്ണന്‍റെ നേതൃത്വത്തിൽ ഇന്നലെ മൂന്നുപേരെയാണ് എൻഡോസ്കോപ്പി പരിശോധനയ്ക്ക് വിധേയരാക്കിയത്. ഒരുദിവസം അഞ്ചുപേരെവരെ എൻഡോസ്കോപ്പി ചെയ്യാം. ആലപ്പുഴ നഗരസഭ അനുവദിച്ച 37,68,000 രൂപ ഉപയോഗിച്ചാണ് എൻഡോസ്കോപ്പി, കോൾനോസ്കോപ്പി, പ്രോസസർ എന്നിവ വാങ്ങിയത്. വൻകുടലിൽ വരുന്ന കാൻസർ രോഗത്തെ കോളനോസ്കോപ്പി വഴി കണ്ടെത്താം. ജില്ലയിൽ ജനറൽ ആശുപത്രിയിൽ മാത്രമാണ് ഈ സൗകര്യമുള്ളത്. സംസ്ഥാന സർക്കാരിന്‍റെ ആരോഗ്യം ആനന്ദം രണ്ടാംഘട്ടം പ്രവർത്തനങ്ങൾ ഊർജീതമാക്കുന്നതിന്‍റെ ഭാഗമായി ഒന്നര മാസത്തിനുള്ളിൽ കോളനോസ്കോപ്പിയുടെ പ്രവർത്തനവും തുടങ്ങാനാണ് ഉദ്ദേശമെന്ന് സൂപ്രണ്ട് ഡോ. സന്ധ്യ ആർ. പറഞ്ഞു. എൻഡോസ്കോപ്പിവഴി അന്നനാളത്തിലെയും ആമാശയത്തിലെയും കാൻസർ കണ്ടുപിടിച്ച് നേരത്തെതന്നെ ചികിത്സ ആരംഭിച്ചു സുഖമാക്കാൻ സാധിക്കും.

മാലിന്യത്തിൽ മുങ്ങി കായലും തോടുകളും

പൂച്ചാക്കല്‍: വേമ്പനാട്ട് കായലും അനുബന്ധ ജലാശയങ്ങളും അനുദിനം മലിനമാകുന്നത് മത്സ്യത്തൊഴിലാളികള്‍ക്കു വിനയാകുന്നു. മത്സബന്ധനം നടത്തി ഉപജീവനം കഴിക്കുന്ന മത്സ്യത്തൊഴിലാളികള്‍ക്കു മാലിന്യം നീക്കി മത്സ്യബന്ധനം നടത്തേണ്ട സ്ഥിതിയാണ്. പാണാവള്ളി ജെട്ടി പ്രദേശങ്ങളില്‍ കായേലോരത്ത് അടിഞ്ഞുകൂടുന്ന മാലിന്യത്തിന്‍റെ വ്യാപ്തി അതീവ ഗുരുതരമായ പ്രശ്നങ്ങളിലേക്കാണ് നീങ്ങുന്നത്. സ്പീഡ് ബോട്ടുകളിൽ മാലിന്യം മത്സ്യബന്ധനത്തിനിടെ പായലും പ്ലാസ്റ്റിക് മാലിന്യവും കയറുന്നതു മൂലം വലകള്‍ നശിക്കുന്നതിനാൽ വലിയ സാമ്പത്തിക ബാധ്യതയാണ് മത്സ്യത്തൊഴിലാളികള്‍ക്കു നേരിടേണ്ടി വരുന്നത്. ഏറെനേരം ശ്രമിച്ചാലേ അടുത്ത ദിവസത്തേക്കു വല വൃത്തിയാക്കിയെടുക്കാനാകൂ. സ്പീഡ് ബോട്ടുകളില്‍ കൊണ്ടുവന്നു തള്ളുന്നതിനു പുറമേ വീടുകളില്‍നിന്നു വരെ മാലിന്യം കായലിലേക്ക് ഇടുന്നുണ്ട്. മിനറല്‍ വാട്ടറിന്‍റെയും സോഡയുടെയും കുപ്പികളും പ്ലാസ്റ്റിക് കവറുകളുമാണ് കായലില്‍ ഒഴുകി നടക്കുന്ന മാലിന്യങ്ങളിലേറെയും. ഹോട്ടല്‍ മാലിന്യവും പച്ചക്കറികളുടെ അവശിഷ്ടങ്ങളും കായലില്‍ എത്തുന്നുണ്ട്. വേമ്പനാട്ട് കായലിലെ പെരുമ്പളം ഭാഗത്താണ് വന്‍തോതില്‍ മാലിന്യം തള്ളുന്നത്. കായല്‍ കടവില്‍ വസ്ത്രങ്ങള്‍ അലക്കാന്‍ പോലും പറ്റാത്ത സ്ഥിതിയാണ്. കക്കൂസ് മാലിന്യവും പല ഉള്‍നാടന്‍ ജലാശയങ്ങളിലും പ്രത്യേകിച്ച് തോടുകളില്‍ കക്കൂസ് മാലിന്യം ഒഴുക്കുന്നതായും ആക്ഷേപമുണ്ട്. പൂച്ചാക്കല്‍ ഇലക്‌ട്രിസിറ്റി കവലയ്ക്കു പടിഞ്ഞാറുള്ള കലുങ്കുഭാഗത്തു കൂടി പ്രഭാത സവാരിക്കാര്‍ ഉള്‍പ്പെടെ മൂക്കു പൊത്തിയാണ് നടക്കുന്നത്. കലുങ്കിനു സമീപം മാലിന്യം തള്ളുന്നവരെ പിടികൂടാന്‍ പാണാവള്ളി പഞ്ചായത്ത് കാമറകള്‍ സ്ഥാപിച്ചെങ്കിലും ഇപ്പോൾ അവയെല്ലാം പ്രവര്‍ത്തനരഹിതമാണ്. പൂച്ചാക്കല്‍ പഴയ പാലത്തിനു സമീപമുള്ള തോട്ടിലേക്കു കക്കൂസ് മാലിന്യം ഒഴുക്കാന്‍ വന്ന വാഹനം ഇടിച്ച് കലുങ്കിന്‍റെ ഒരു ഭാഗം തകര്‍ന്നിട്ട് അധികം നാളായിട്ടില്ല. പൂച്ചാക്കല്‍ പുതിയ പാലത്തിലും ഇതു തന്നെയാണു സ്ഥിതി. പള്ളിപ്പുറം ഭാഗത്ത് പാടത്തേക്കും കക്കൂസ് മാലിന്യം ഒഴുക്കുന്നുണ്ട്. ചത്തുപൊങ്ങുന്ന മത്സ്യങ്ങൾ കായലിലും ഇടത്തോടുകളിലും മാലിന്യം കുമിഞ്ഞു കൂടുന്നതിനാല്‍ മത്സ്യങ്ങള്‍ ചത്തു പൊങ്ങുന്നുണ്ട്. പൂച്ചാക്കല്‍ തോട്ടിലും മറ്റും ഇതു പതിവ് കാഴ്ചയാണ്. മത്സ്യങ്ങളുടെയും കക്കയുടെയും പ്രജനനവും ഇതു മൂലം തടസപ്പെടുന്നു. മത്സ്യത്തിന്‍റെയും കറുത്ത കക്കയുടെയും ലഭ്യത കുറഞ്ഞുവരികയാണ്. ചെമ്മീന്‍ ഷെഡ്ഡുകളില്‍നിന്നുള്ള മാലിന്യവും കായലിലേക്കാണ് ഒഴുകിയെത്തുന്നത്.

ചാംപ്യന്‍സ് ലീഗിന് ഇന്നു തുടക്കം; കൈവിരിച്ച് കൈനകരി

ചമ്പക്കുളം: ഇത്തവണത്തെ ചാംപ്യന്‍സ് ബോട്ട് ലീഗിന് തുഴച്ചിലുകാരുടെ നാട്ടിൽ തുടക്കമാകും. കൈനകരി തുഴച്ചില്‍കാരുടെയും മത്സ്യത്തൊഴിലാളികളുടെയും നാടാണ്. ഏറ്റവും കൂടുതല്‍ ഉള്‍നാടന്‍ മത്സ്യത്തൊഴിലാളികളുള്ള കേരളത്തിലെ ഗ്രാമ പഞ്ചായത്ത് എന്ന വിശേഷണമുള്ള കൈനകരിക്കു ചാമ്പ്യന്‍സ് ബോട്ട് ലീഗിന് വേണ്ട സൗകര്യം ഒരുക്കാന്‍ ലഭിച്ചത് അഞ്ചു ദിവസം മാത്രം. എങ്കിലും അതു വെല്ലുവിളിയായി ഏറ്റെടുത്ത് ഒരുക്കങ്ങൾ പൂർത്തീകരിച്ചിരിക്കുകയാണ് കൈനകരിയിലെ സംഘാടകർ. മത്സരത്തിന് യോഗ്യത നേടിയ ചുണ്ടന്‍ വള്ളങ്ങളുടെയും ക്ലബുകളുടെയും പട്ടികയ്ക്കു സിബിഎല്‍ യോഗത്തില്‍ അംഗീകാരമായതോടെയാണ് സിബിഎല്‍ രൂപരേഖ തയാറാക്കിയതും ഉദ്ഘാടനം കൈനകരിയില്‍ തീരുമാനിച്ചതും. ജങ്കാർ പവിലിയൻ മറ്റ് വേദികളില്‍നിന്നു വ്യത്യസ്തമായി കരയില്‍ പവിലിയന്‍ നിര്‍മിക്കാന്‍ നിര്‍വാഹമില്ലാത്തതിനാല്‍ പമ്പയാറ്റില്‍ തന്നെയാണ് വലിയ ജങ്കാര്‍ ഉപയോഗിച്ചു പവിലിയന്‍ നിര്‍മിച്ചത്. രണ്ട് വലിയ ജങ്കാറുകളിലായിട്ടാണ് പവിലിയനുകള്‍. സ്ഥലസൗകര്യങ്ങളുടെ അപര്യാപ്ത ചൂണ്ടിക്കാട്ടി ചിലർ എതിർത്തെങ്കിലും കൈനകരിയുടെ വള്ളംകളി പാരമ്പര്യവും ക്ലബുകളുടെ പ്രാധാന്യവുമാണ് സിബിഎല്‍ ഉത്ഘാടന മത്സരം കൈനകരിയില്‍ത്തന്നെ നടത്താൻ തുണയായത്. കൈനകരി കരുത്ത് കഴിഞ്ഞ നാലു സീസണുകളിലും കൈനകരി പഞ്ചായത്ത് പരിധിക്കു പുറത്തേക്കു സിബിഎല്‍ ട്രോഫി പോയിട്ടില്ല. കഴിഞ്ഞ നാല് സീസണുകളിലും പള്ളാത്തുരുത്തി ബോട്ട് ക്ലബാണ് സിബിഎല്‍ ട്രോഫി നേടിയത്. ഇത്തവണത്തെ നെഹ്‌റു ട്രോഫിയില്‍ മുത്തമിട്ട കൈനകരിയുടെതന്നെ വില്ലേജ് ബോട്ട് ക്ലബ് വളളം കളിയിലെ പുതിയ ചാമ്പ്യനാകാനുള്ള ഒരുക്കത്തിലാണ്. കൈനകരിയിലെതന്നെ യുബിസിയും കൈനകരിയുടെ ഭാഗമായ വേണാട് ബോട്ട് ക്ലബുമെല്ലാം വള്ളംകളി രംഗത്ത് ആവേശം നിറച്ചവരാണ്. ആലപ്പുഴ പുന്നമടക്കായലില്‍ അരങ്ങേറുന്ന നെഹ്‌റു ട്രോഫി മത്സര വള്ളംകളിയുടെ ആദ്യ മത്സരം നടന്നത് കൈനകരിയിലെ മീനപ്പള്ളി കായലില്‍ ആയിരുന്നു എന്നത് കൈനകരിയുടെ വള്ളംകളി പാരമ്പര്യത്തിന്‍റെ പകിട്ടേറ്റുന്നു. മത്സരം അരങ്ങേറുന്ന പമ്പാ നദിയുടെ ഇരുകരകളിലും വഴികളുണ്ട്. ഇതു വള്ളംകളി കാണാന്‍ എത്തുന്നവര്‍ക്കു സൗകര്യമാകും. ട്രാക്കും മറ്റ് സൗകര്യങ്ങളും റെഡിയായിക്കഴിഞ്ഞു. ജില്ലാ പോലീസ് മേധാവിയുടെ നേരിട്ടുള്ള മേല്‍നോട്ടത്തി പോലീസ് സേനയെ കൈനകരിയിലും സമീപപ്രദേശങ്ങളിലും വള്ളംകളിയുടെ സുഗമമായ നടത്തിപ്പിനായി വിന്യസിക്കും. ആലപ്പുഴ എടിഒ, ആര്‍ടിഒ, എക്‌സൈസ്, ഫയര്‍ ആന്‍ഡ് സേഫ്റ്റി ഡിപ്പാര്‍ട്ട്മെന്‍റ് തുടങ്ങി വിവിധ വകുപ്പുകളും രംഗത്തുണ്ട്. ഉദ്ഘാടനം മന്ത്രി മുഹമ്മദ് റിയാസ് നിര്‍വഹിക്കും ആലപ്പുഴ: ചാമ്പ്യന്‍സ് ബോട്ട് ലീഗ് സീസണ്‍-5 സംസ്ഥാനതല ഉദ്ഘാടനം ഇന്ന് ഉച്ചകഴിഞ്ഞ് നാലിന് കൈനകരി പമ്പയാറ്റില്‍ മന്ത്രി പി.എ. മുഹമ്മദ് റിയാസ് നിര്‍വഹിക്കും. മന്ത്രി പി. പ്രസാദ് അധ്യക്ഷനാകും. മന്ത്രി സജി ചെറിയാന്‍ മുഖ്യാതിഥിയാകും. കൊടിക്കുന്നില്‍ സുരേഷ് എംപി വിശിഷ്ടാതിഥിയാകും. തോമസ് കെ. തോമസ് എംഎല്‍എ മുഖ്യപ്രഭാഷണം നടത്തും. ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി, ജില്ലാ കളക്ടര്‍ അലക്‌സ് വര്‍ഗീസ്, ടൂറിസം അഡീഷണല്‍ ഡയറക്ടര്‍ ശ്രീധന്യ സുരേഷ് തുടങ്ങിയവര്‍ പങ്കെടുക്കും. ഉച്ചയ്ക്കു രണ്ടിന് കൈനകരി പഞ്ചായത്ത് പ്രസിഡന്‍റ് എം.സി. പ്രസാദ് പതാക ഉയര്‍ത്തും. 2.30 മുതല്‍ ചുണ്ടന്‍ വള്ളങ്ങളുടെ ഹീറ്റ്‌സ് മത്സരങ്ങള്‍. ഒമ്പത് ചുണ്ടന്‍വള്ളങ്ങളാണ് മത്സരിക്കുന്നത്.

അനൂപിന് വീട് ഒരുങ്ങുന്നു, ഭൂമിയുടെ ആധാരം മന്ത്രിക്ക് കൈമാറി

മാവേലിക്കര: ശരീരമാകെ തളര്‍ന്ന് ഓട്ടോമാറ്റിക് ചെയറില്‍ ലോട്ടറി വ്യാപാരം നടത്തി മാവേലിക്കര സബ് ആര്‍ടി ഓഫീസ് പരിസരത്ത് റോഡ് സുരക്ഷാ ബോധവത്കരണം നടത്തുന്ന ഭിന്നശേഷി യുവാവായ അനൂപിന് മോട്ടോര്‍ വാഹന വകുപ്പിന്‍റെ നേതൃത്വത്തില്‍ വീട് ഒരുങ്ങുന്നു. അനൂപിന്‍റെ വാടകവീടിന്‍റെയും അതിലേക്കു പോകുന്ന വഴിയുടെയും ദയനീയ അവസ്ഥ കണ്ട് മാവേലിക്കര ജോയിന്‍റ് ആര്‍ടിഒ എം.ജി. മനോജിനന്‍റെയും സഹ ഉദ്യോഗസ്ഥരുടെയും കൂട്ടായ പരിശ്രമമാണ് അനൂപിന്‍റെ ചിരകാല സ്വപ്നം സഫലമാക്കുന്നത്. മന്ത്രി കെ.ബി. ഗണേഷ്കുമാര്‍ മാവേലിക്കരയില്‍ എത്തിയപ്പോള്‍ തന്‍റെ വീല്‍ചെയറില്‍ അനൂപ് മന്ത്രിയെ കാണാന്‍ എത്തുകയും ദയനീയസ്ഥിതി വിവരിക്കുകയും ചെയ്തിരുന്നു. അന്ന് മന്ത്രി അനൂപിന് ലോട്ടറി വ്യാപാരം നടത്തുവാന്‍ ഡിസ്‌പ്ലേ റാക്ക് സമ്മാനിച്ചാണ് മടങ്ങിയത്. അനൂപിന്‍റെ വീട് എന്ന സ്വപ്നം സാക്ഷാത്കരിക്കുന്നതിനുവേണ്ടിയുള്ള ശ്രമം തുടരാന്‍ ഉദ്യോഗസ്ഥര്‍ക്ക് മന്ത്രി നിര്‍ദേശം നല്‍കുകയും ചെയ്തിരുന്നു. തുടര്‍ന്ന് കട്ടച്ചിറ ജോണ്‍ എഫ്. കെന്നഡി സ്‌കൂളിലെ മാനേജ്‌മെന്‍റും അധ്യാപക വിദ്യാര്‍ഥി രക്ഷകര്‍ത്താ കൂട്ടായ്മയും ഒപ്പം നില്‍ക്കുകയും അനൂപിന് സ്ഥലം വാങ്ങി നല്‍കാനായി മുന്നോട്ടുവരികയും ചെയ്തു. മാവേലിക്കരയുടെ ഹൃദയഭാഗത്തുതന്നെ നാലു സെന്‍റ് വസ്തു അനൂപിനായി അവര്‍ വാങ്ങി നല്‍കി. അനൂപിന് വീട് ഒരുക്കാന്‍ ജീവകാരുണ്യ പ്രവര്‍ത്തകനായ വിദേശ വ്യവസായി പമ്പാവാസന്‍ നായരുടെ നേതൃത്വത്തിലുള്ള സിഎംഎന്‍ ട്രസ്റ്റ് പാലക്കാട് സന്നദ്ധമായി മുന്നോട്ടുവന്നു. അനേകം വ്യക്തികളും സ്ഥാപനങ്ങളും അനൂപിന്‍റെ വീട്ടിലേക്കുള്ള ഉപകരണങ്ങളും ഫര്‍ണീച്ചറുകളും സ്‌പോണ്‍സര്‍ ചെയ്തിട്ടുണ്ട്. അനൂപിനായി വാങ്ങിയ ഭൂമിയുടെ ആധാരം ഗതാഗതമന്ത്രിക്ക് എം.എസ്. അരുണ്‍കുമാര്‍ എംഎല്‍എ, അഡീഷണല്‍ ട്രാന്‍സ്‌പോര്‍ട്ട് കമ്മീഷണര്‍ പ്രമോജ് ശങ്കര്‍ എന്നിവരുടെ സാന്നിധ്യത്തില്‍, ജോണ്‍ എഫ്. കെന്നഡി സ്‌കൂള്‍ മാനേജര്‍ സിറിലും മാതാവും ചേര്‍ന്ന് കൈമാറി. ഗതാഗത മന്ത്രിയുടെ ഓഫീസില്‍വച്ച് നടന്ന ചടങ്ങില്‍ മാവേലിക്കര ജോയിന്‍റ് ആര്‍ടിഒ എംജി മനോജ്, അസിസ്റ്റന്‍റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍ സജു പി. ചന്ദ്രന്‍ എന്നിവര്‍ പങ്കെടുത്തു. അനൂപിന് വീട് ഒരുക്കാന്‍ തന്‍റെ വകുപ്പിലെ ജീവനക്കാര്‍ മുന്നിട്ടിറങ്ങിയതിനെ മന്ത്രി പ്രശംസിച്ചിരുന്നു. ഈ ഉദ്യമത്തിന് മുന്‍കൈയെടുത്ത ഗതാഗതമന്ത്രി തന്നെ തന്‍റെ വീടിന് തറക്കല്ലിടണം എന്നാണ് അനൂപിന്‍റെ ആഗ്രഹം.

ആസ്പിറോ ഓവറോള്‍ കിരീടം പുന്നപ്ര മാര്‍ ഗ്രിഗോറിയസിന്

എടത്വ: സെന്‍റ് അലോഷ്യസ് കോളജ് കൊമേഴ്‌സ് & മാനേജ്‌മെന്‍റ് ഫെസ്റ്റ് ആസ്പിറോ 4.0ല്‍ പുന്നപ്ര മാര്‍ ഗ്രിഗോറിയസ് കോളജ് ഓഫ് ആര്‍ട്ട് & സയന്‍സ് ഓവറോള്‍ ചാമ്പ്യന്‍മാരായി. കോളജ് വിദ്യാര്‍ഥികള്‍ക്കായി സീനിയര്‍-ജൂണിയര്‍ വിഭാഗങ്ങള്‍ക്കായി ബെസ്റ്റ് മാനേജര്‍, തീമാറ്റിക് ഡാന്‍സ്, ഗ്രൂപ്പ് ഡാന്‍സ്, ട്രഷര്‍ ഹണ്ട്, ഫോട്ടോഗ്രാഫി, ബിസിനസ് ക്വിസ്, ഫുട്‌ബോള്‍ തുടങ്ങിയ 10 ഇനങ്ങളിലായിട്ടാണ് മത്സരം സംഘടിപ്പിച്ചത്. മിസ് കേരള ഫൈനലിസ്റ്റ് തന്‍സീം നൗഷാദ് ഉദ്ഘാടനം നിര്‍വഹിച്ചു. മാനേജര്‍ ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിച്ചു. പ്രിന്‍സിപ്പല്‍ പ്രഫ. ഡോ. ജി. ഇന്ദുലാല്‍, തസ്തീമ് നൈഷാദ്, സാന്‍റി ജോസ്ഫ്, പ്രവീണ്‍ ജോസഫ്, ക്രിസ്റ്റി മാര്‍ക്കോസ് ഫിലിപ്പ് എന്നിവര്‍ പ്രസംഗിച്ചു.

ദേശീയപാതയിൽ ശുദ്ധജലം പാഴാകുന്നു; സമരവുമായി കോൺഗ്രസ്

അമ്പലപ്പുഴ: ദേശീയപാതയിൽ അധികൃതരുടെ അനാസ്ഥമൂലം ശുദ്ധജലം പാഴാകുന്നതിൽ സമരവുമായി കോൺഗ്രസ്. ദേശീയപാത പുനർനിർമാണത്തിന്‍റെ ഭാഗമായി നിർമാണ കമ്പനിയുടെ അനാസ്ഥമൂലം ശുദ്ധജലവിതരണത്തിന്‍റെ പൈപ്പുകൾ നിരവധി സ്ഥലങ്ങളിൽ പൊട്ടി വെള്ളം പാഴായിട്ടും കമ്പനി അധികൃതരും ബന്ധപ്പെട്ട സർക്കാർ വകുപ്പുകളും തദ്ദേശസ്ഥാപനങ്ങളും മൗനം തുടരുന്നത് ദുരൂഹമാണെന്ന് അമ്പലപ്പുഴ ബ്ലോക്ക്‌ കോൺഗ്രസ് കമ്മിറ്റി ആരോപിച്ചു. പുറക്കാട് ജംഗ്ഷനിലും അയ്യൻകോയിക്കൽ ക്ഷേത്രത്തിന് തെക്ക് ഭാഗത്തും കരൂർ ഗാബീസ് പമ്പിന് മുന്നിലും പായൽക്കുളങ്ങര കൽവർട്ടിനോട് ചേർന്നും കുടിവെള്ളം പാഴാകാൻ തുടങ്ങിയിട്ട് ദിവസങ്ങൾ ഏറെയായി. നിരവധി തവണ ബന്ധപ്പെട്ട അധികാരികളോട് പരാതി അറിയിച്ചിട്ടും നടപടി ഉണ്ടാവാത്തത് പൊതുജനങ്ങളോടുള്ള വെല്ലുവിളിയാണ്. അനാസ്ഥ തുടർന്നാൽ ബ്ലോക്ക് കോൺഗ്രസ് കമ്മിറ്റി പ്രത്യക്ഷ സമര പരിപാടികൾക്ക് നേതൃത്വം നൽകുമെന്ന് ബ്ലോക്ക് പ്രസിഡന്‍റ് ടി.എ. ഹാമിദ് അറിയിച്ചു.

ആലപ്പുഴ നഗരത്തില്‍ ഇന്നലെ സ്വകാര്യബസുകള്‍ ഓടിയില്ല

ആലപ്പുഴ: മണ്ണഞ്ചേരി-ആലപ്പുഴ-ഇരട്ടകുളങ്ങര റൂട്ടില്‍ സര്‍വീസ് നടത്തിവരുന്ന മുപ്പത് സ്വകാര്യബസുകള്‍ ഇന്നലെ ഓടിയില്ല. ജില്ലാക്കോടതിപ്പാലം പൊളിച്ചപ്പോള്‍ ബദലായി നിര്‍ദേശിച്ച റൂട്ടില്‍ ആയിരം രൂപ പ്രതിദിനം നഷ്ടം വരുന്നതിനാലാണ് ഇന്നലെ സര്‍വീസ് നിര്‍ത്തിവച്ച് പ്രതിഷേധിച്ചത്. കേരള ബസ് ട്രാന്‍സ്പോര്‍ട്ട് അസോസിയേഷന്‍ ജില്ലാ കമ്മിറ്റിയാണ് പ്രതിഷേധിക്കാന്‍ തീരുമാനിച്ചത്. പുതിയ റൂട്ടില്‍ ചേര്‍ത്തല കനാലിന് മീതെ പോപ്പി പാലത്തിന് അപ്രോച്ച് റോഡ് പണിയുന്നതിനുവേണ്ടി റോഡ് കുത്തിപ്പൊളിച്ചും റോഡില്‍ ഈ ഭാഗത്ത് മെറ്റലും പൂഴിയും ഇറക്കിയിരിക്കുന്നതു മൂലം മഴയില്‍ കുഴഞ്ഞ് വാഹനങ്ങള്‍ താഴ്ന്നുപോകാന്‍ ഇടയാക്കുന്നതായും കൂടതല്‍ ദൂരം ഓടേണ്ടി വരുന്നതുമൂലം സമയക്ലിപ്തത പാലിക്കാന്‍ സാധിക്കാതെ വരുന്നത് ജീവനക്കാരും മറ്റ് വാഹന ഉടമകളും തമ്മില്‍ വാക്കേറ്റത്തിനു കാരണമാകുന്നതായും കേരള ബസ് ട്രാന്‍സ്പോര്‍ട്ട് അസോസിയേഷന്‍ കുറ്റപ്പെടുത്തുന്നു. പോലീസിന്‍റെ ഇടപെടല്‍ അനിവാര്യമാണെന്നും റോഡില്‍ കൂട്ടിയിട്ടിരിക്കുന്ന നിര്‍മാണ സാമഗ്രികള്‍ അടിയന്തരമായി നീക്കം ചെയ്ത് റോഡ് സഞ്ചാരയോഗ്യമാക്കണമെന്നും ബസ് ജീവനക്കാരും ഉടമകളും ആവശ്യപ്പെട്ടു. അപ്രോച്ച് റോഡ് നിര്‍മാണം പൂര്‍ത്തിയാകുന്നതുവരെ നഗരചത്വരത്തിനുള്ളില്‍ കൂടിയുള്ള റോഡ് സ്വകാര്യബസുകള്‍ക്ക് യാത്രയ്ക്ക് അനുവദിക്കണമെന്ന് കേരള ബസ് ട്രാന്‍സ്പോര്‍ട്ട് അസോസിയേഷന്‍ ആലപ്പുഴ ജില്ലാ പ്രസിഡന്‍റ് പി.ജെ. കുര്യനും സെക്രട്ടറി എസ്.എം. നാസറും ആവശ്യപ്പെട്ടു. ഈ ആവശ്യങ്ങള്‍ ഉന്നയിച്ചുകൊണ്ടുള്ള നിവേദനം അസോസിയേഷന്‍ ഭാരവാഹികളായ ബിജു ദേവിക, സുനീര്‍ ഫിര്‍ദോസ്, സനല്‍ സലിം എന്നിവര്‍ ചേര്‍ന്ന് ജില്ലാ കളക്ടര്‍, ആര്‍ടിഒ, ഡിവൈഎസ്പി എന്നിവര്‍ക്ക് സമര്‍പ്പിച്ചു.

എംഡിഎംഎ കടത്ത്: ചേർത്തലയിൽ ചില്ലറ വില്പനക്കാർ പിടിയിൽ

ചേര്‍ത്തല: ബംഗളൂരുവില്‍നിന്നെത്തിക്കുന്ന എംഡിഎംഎയുടെ ജില്ലയിലെ ചില്ലറ വില്പനക്കാര്‍ ചേര്‍ത്തല പോലീസിന്‍റെ പിടിയില്‍. കായംകുളം കൃഷ്ണപുരം പഞ്ചായത്ത് നെടുംപുരയിടത്തില്‍ വീട്ടില്‍ രതീഷ് (34), കരുനാഗപ്പള്ളി കുലശേഖരമംഗലം മൂപ്പന്‍റയത്ത് പടീറ്റതില്‍ അഫ്‌സല്‍ (30) എന്നിവരാണ് പടിയിലായത്. കഴിഞ്ഞ ഏപ്രില്‍ അഞ്ചിന് ബംഗളൂരുവില്‍നിന്നു വില്പനയ്ക്കായി എത്തിച്ച 98 ഗ്രാം എംഡിഎംഎയുമായി രണ്ടുപേര്‍ പിടിയിലായിരുന്നു. ഈ കേസിലെ നാലും അഞ്ചും പ്രതികളാണ് രതീഷും അഫ്‌സലും. ഏപ്രിലില്‍ പിടിയിലായ ഒന്നും രണ്ടും പ്രതികളായ സുഭാഷും ഷംനാസും നിലവില്‍ റിമാന്‍ഡിലാണ്. മൂന്നാം പ്രതി തിരച്ചിലിനിടെ വിദേശത്തേക്കു കടന്നതായാണ് സൂചന. റിമാന്‍ഡിലുള്ളവരെ അടുത്തിടെ തുടരന്വേഷണത്തിന്‍റെ ഭാഗമായി ചേര്‍ത്തല പോലീസ് കസ്റ്റഡിയില്‍ വാങ്ങി തെളിവെടുക്കുകയും ചോദ്യം ചെയ്യുകയും ചെയ്തിരുന്നു. സുഭാഷും ഷംനാസും ബംഗളൂരുവില്‍നിന്നു എത്തിക്കുന്ന എംഡിഎംഎയാണ് രതീഷും അഫ്സലും ജില്ലയുടെ വിവിധ ഭാഗങ്ങളില്‍ കോളജുകളിലും ഹോസ്റ്റലുകളിലുമെത്തിച്ചു വിതരണം ചെയ്തിരുന്നത്. ഇരട്ടിവിലയ്ക്കായിരുന്നു ചില്ലറ വില്‍പന. 17 നാണ് ഇരുവരെയും പിടികൂടിയത്. സ്റ്റേഷന്‍ ഓഫീസര്‍ ജി. അരുണിന്‍റെ നേതൃത്വത്തില്‍ സബ് ഇന്‍സ്പക്ടര്‍ എസ്. സുരേഷ്‌കുമാര്‍, സിപിഒമാരായ സതീഷ്, സുധീഷ്, അജയ് എന്നിവരടങ്ങിയ സംഘമാണ് ഇവരെ പിടികൂടിയത്. കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു.

ജില്ലാ കോടതിപ്പാലം ഗതാഗതക്കുരുക്കിലെന്ന്

ആലപ്പുഴ: ജില്ലാ കോടതിപ്പാലത്തിന്‍റെ നിര്‍മാണത്തെത്തുടര്‍ന്ന് വാഹനം തിരിച്ചുവിടുന്ന വഴികളില്‍ കനത്ത ഗതാഗതക്കുരുക്കില്‍. റോഡ് സഞ്ചാരയോഗ്യമാക്കുന്നതില്‍ അധികൃതരുടെ വീഴ്ചയാണ് ഗതാഗതക്കുരുക്കിനു കാരണമെന്ന് തത്തംപള്ളി റസിഡന്‍റ്സ് അസോസിയേഷന്‍ കുറ്റപ്പെടുത്തി. റോഡുകളിലെ തടസങ്ങള്‍ അടിയന്തരമായി നീക്കം ചെയ്യണമെന്ന് മുന്‍കൂട്ടി അറിയിച്ചിട്ടും അവഗണിച്ചത് ഖേദകരവും യാത്രക്കാരോടുള്ള വെല്ലുവിളിയുമാണെന്ന് ടിആര്‍എ പ്രസിഡന്‍റ് തോമസ് മത്തായി കരിക്കംപള്ളില്‍ ചൂണ്ടിക്കാട്ടി. പട്ടണ ചത്വര വഴിയുടെ തുടക്ക ഭാഗങ്ങളിലും ചത്വരത്തിലും റോഡിലേക്ക് ഇറങ്ങിനില്‍ക്കുന്ന കല്‍ക്കെട്ടുകളും പൊളിച്ചിട്ടിരിക്കുന്ന അവശിഷ്ടങ്ങളും മരങ്ങളും നീക്കം ചെയ്യണം. വലിയ വാഹനങ്ങള്‍ കടന്നു പോകാന്‍ സൗകര്യം ഇല്ലാത്തിടത്ത് ഹെവി വാഹനങ്ങള്‍ അനുവദിക്കരുത്. തുടങ്ങിയ നിര്‍ദേശങ്ങളാണ് അസോസിയേഷന്‍ അധികൃതരുടെ മുന്നില്‍ വച്ചത്. കിടങ്ങാംപറമ്പ്-ഗോവണിപ്പാലം റോഡില്‍ ഒരു അറ്റകുറ്റപ്പണിയും നടത്തിയിട്ടില്ലെന്നും ഇടുങ്ങിയ കോടതി-കോര്‍ത്തശേരി, കിടങ്ങാംപറമ്പ് ജംഗ്ഷന്‍-സിവൈഎംഎ ജംഗ്ഷന്‍ റോഡുകളില്‍ കിലോമീറ്ററുകള്‍ ദൂരത്തില്‍ രാവിലെ മുതല്‍ വൈകുന്നേരം വരെ ഓട്ടോറിക്ഷകള്‍ നീണ്ടനിരയായി ഇടുന്നതും അധികൃത പാര്‍ക്കിംഗും വലിയ ഗതാഗതക്കുരുക്കിനു കാരണമാകുന്നതായും അസോസിയേഷന്‍ ചൂണ്ടിക്കാട്ടി.

കല്ലിശേരി-കുത്തിയതോട് റോഡിൽ ഗതാഗതക്കുരുക്ക് രൂക്ഷം : അധികൃതർ മൗനത്തിൽ

ചെങ്ങന്നൂര്‍: കല്ലിശേരി-കുത്തിയതോട് റോഡില്‍ ഗതാഗതക്കുരുക്ക് രൂക്ഷമാകുന്നു. കല്ലിശേരി മുതല്‍ സ്വകാര്യ ആശുപത്രയുടെ സമീപം പ്രയാര്‍ മേടപ്പടി റോഡ്, അമ്പീരേത്ത് മുക്ക്, തിക്കേക്കാട് എന്നിവിടങ്ങളിലാണ് ഗതാഗതക്കുരുക്ക് പതിവാകുന്നത്. റോഡിന്‍റെ ഇരുവശത്തും വാഹനങ്ങള്‍ അലക്ഷ്യമായും അനധികൃതമായും പാര്‍ക്ക് ചെയ്യുന്നതാണ് പ്രധാന കാരണം. ഇതുവഴി കടന്നുപോകുന്ന കാല്‍നടയാത്രക്കാര്‍ക്കും ഇരുചക്രവാഹന യാത്രക്കാര്‍ക്കും വലിയ ബുദ്ധിമുട്ടാണ് നേരിടുന്നത്. റോഡരികില്‍ പാര്‍ക്ക് ചെയ്യുന്ന വാഹനങ്ങള്‍ കാരണം യാത്രാ സ്വാതന്ത്ര്യം നഷ്ടപ്പെടുന്നതായി നാട്ടുകാര്‍ പറയുന്നു. അടുത്തിടെ സ്‌കൂള്‍ ബസ് ഉള്‍പ്പെടെ മണിക്കൂറുകളോളം ഗതാഗതക്കുരുക്കില്‍പ്പെട്ടത് വലിയ വാര്‍ത്തയായിരുന്നു. അടിയന്തര സാഹചര്യങ്ങളില്‍ ആംബുലന്‍സിന് പോലും കടന്നുപോകാന്‍ കഴിയാത്ത സ്ഥിതിയാണെന്നും പരാതിയുണ്ട്. ഗതാഗതക്കുരുക്കിനു പുറമേ, പൈപ്പ് ലൈന്‍ സ്ഥാപിക്കാന്‍ എടുത്ത കുഴികള്‍ ശരിയായി മൂടാത്തതും യാത്രക്കാര്‍ക്ക് ദുരിതമുണ്ടാക്കുന്നു. കൂടാതെ, സ്വകാര്യ ആശുപത്രിയിലെ ജീവനക്കാര്‍ ഉപയോഗിച്ച സര്‍ജിക്കല്‍ മാസ്‌കുകള്‍ റോഡരികില്‍ വലിച്ചെറിയുന്നതും ആരോഗ്യപ്രശ്‌നങ്ങള്‍ക്കു കാരണമാകുന്നുണ്ട്. ഈ വിഷയങ്ങള്‍ പഞ്ചായത്ത് അധികൃതരുടെ ശ്രദ്ധയില്‍പ്പെടുത്തിയിട്ടും നടപടിയൊന്നും ഉണ്ടായിട്ടില്ലെന്ന് നാട്ടുകാര്‍ ആരോപിക്കുന്നു. ഗതാഗതക്കുരുക്ക് നിയന്ത്രിക്കാന്‍ വേണ്ടത്ര സംവിധാനങ്ങളോ ഹോം ഗാര്‍ഡുകളോ ഇല്ലാത്തത് ജനങ്ങളോടുള്ള വെല്ലുവിളിയാണെന്നും ആക്ഷേപം ഉയരുന്നുണ്ട്. അടിയന്തരമായി വിഷയത്തില്‍ പരിഹാരം കാണണമെന്നാണ് നാട്ടുകാരുടെ ആവശ്യം.

കുട്ടനാട്ടിലെ രണ്ടാംകൃഷി: ആദ്യ കൊയ്ത്ത് ഇന്നു പൂർത്തിയാകും

ആലപ്പുഴ: കുട്ടനാട്ടിലെ ഈ സീസണിലെ ആദ്യ കൊയ്ത്ത് കരുവാറ്റയിലെ ഈഴാംകരി കിഴക്ക് പാടശേഖരത്തിൽ ഇന്നു പൂർത്തിയാകും. 133.4 ഹെക്ടര്‍ വിസ്തൃതിയുള്ള പാടശേഖരത്തില്‍ 170 കര്‍ഷകരാണ് കൃഷിയിറക്കിയത്. 135 ദിവസം മൂപ്പുള്ള ഉമ നെല്ലിനമാണ് വിതച്ചിരുന്നത്. 12 യന്ത്രങ്ങളാണ് കൊയ്ത്തിന് എത്തിച്ചത്. ഒരേക്കര്‍ കൊയ്യാന്‍ ശരാശരി ഒരു മണിക്കൂര്‍ 10 മിനിറ്റ് സമയമാണ് എടുക്കുന്നത്. കുട്ടനാട്ടില്‍ ഇതുവരെ 7,224 ഹെക്ടറില്‍ രണ്ടാംകൃഷി ഇറക്കിയിട്ടുണ്ട്. അമ്പലപ്പുഴ, ആലപ്പുഴ, ചമ്പക്കുളം, ഹരിപ്പാട്, രാമങ്കരി ബ്ലോക്കുകളിലെ 14 കൃഷിഭവനുകളുടെ പരിധിയില്‍ വരുന്ന 123 പാടശേഖരങ്ങളിലെ 10,095 കര്‍ഷകരാണ് ഇക്കുറി രണ്ടാംകൃഷിയിറക്കിയത്. ആകെ വിസ്തൃതിയുടെ 91 ശതമാനവും ഉമ ഇനമാണ് വിതച്ചത്. പൗര്‍ണമി, മനുരത്‌ന ഇനങ്ങളും ഉമയ്ക്ക് പുറമേ കൃഷി ചെയ്തു. പുന്നപ്ര വടക്ക്, ആലപ്പുഴ നഗരസഭ കൃഷിഭവനുകളുടെ പരിധിയിൽ മൂന്നു പാടശേഖരങ്ങളിലെ 138.52 ഹെക്ടറില്‍ ജില്ലാ പഞ്ചായത്ത്, കൃഷിവകുപ്പ് മുഖേന നടപ്പിലാക്കിയ വിത്തു ഗ്രാമം പദ്ധതി പ്രകാരം ലഭ്യമാക്കിയ മനുരത്‌ന വിത്താണ് വിതച്ചത്. 15ന് വിത ആരംഭിച്ച കരുവാറ്റയിലെതന്നെ മാന്ത്ര-മീഞ്ചാല്‍ പാടശേഖരമാണ് നിലവില്‍ ഏറ്റവുമവസാനം വിത നടന്ന പാടശേഖരം.

ശുചീകരണത്തൊഴിലാളികളുടെ ഒഴിവുള്ള തസ്തികകളില്‍ നിയമനം നടത്തും

ആലപ്പുഴ: നഗരസഭ 2025 മേയ് 31 വരെ ഉണ്ടായിട്ടുള്ള 46 ശുചീകരണ വിഭാഗം തൊഴിലാളികളുടെ ഒഴിവുകളിലേക്ക് അടിയന്തര നിയമനം നടത്തുന്നതിന് കൗണ്‍സില്‍ തീരുമാനിച്ചു. നഗരസഭ ഒഴിവുകള്‍ റിപ്പോര്‍ട്ട് ചെയ്ത പ്രകാരം എംപ്ലോയ്മെന്‍റ് എക്സ്ചേഞ്ചില്‍നിന്നു ലഭ്യമായ 532 പേരുടെ ലിസ്റ്റില്‍നിന്നു ഇന്‍റര്‍വ്യൂ നടത്തി നിയമനം നടത്തും. ചെയര്‍പേഴ്സണ്‍, വൈസ് ചെയര്‍മാന്‍, ആരോഗ്യ സ്ഥിരം സമിതി അധ്യക്ഷ, മുനിസിപ്പല്‍ സെക്രട്ടറി, ഹെല്‍ത്ത് ഓഫീസര്‍ ഇന്‍ ചാര്‍ജ് എന്നിവരടങ്ങുന്ന ഇന്‍റര്‍വ്യൂ ബോര്‍ഡിനും കൗണ്‍സില്‍ അംഗീകാരം നല്‍കി. എംപ്ലോയ്മെന്‍റ് ലിസ്റ്റിനു പുറമേ കോടതി ഉത്തരവ് പ്രകാരം 55 മുന്‍കാല താത്കാലിക തൊഴിലാളികളെ കൂടി അഭിമുഖത്തില്‍ പങ്കെടുപ്പിക്കുന്നതിനും തീരുമാനിച്ചു. പതിനഞ്ചാം ധനകാര്യ കമ്മീഷന്‍റെ ഹെല്‍ത്ത് ഗ്രാന്‍റിന്‍റെ രണ്ടാം ഗഡു ആയി ആലപ്പുഴ നഗരസഭയ്ക്ക് അനുവദിച്ച 60 ലക്ഷം രൂപ നഗര ജനകീയ ആരോഗ്യ കേന്ദ്രങ്ങളുടെ നടത്തിപ്പ് ചെലവുകള്‍ക്ക് വിനിയോഗിക്കുന്നതിന് തീരുമാനിച്ചു. പിഎംഎവൈ ലൈഫ് പദ്ധതി ഗുണഭോക്താക്കളായ രണ്ടു പേര്‍ക്ക് വിവിധ കാരണങ്ങളാല്‍ ഭവനനിര്‍മാണം പൂര്‍ത്തീകരിക്കാന്‍ സാധിക്കാത്തതിനാല്‍ കൈപ്പറ്റിയ തുക തിരികെ ഈടാക്കി ആധാരം തിരികെ നല്‍കുന്നതിന് തീരുമാനിച്ചു. നഗരസഭാ ചെയര്‍പേഴ്സണ്‍ കെ.കെ. ജയമ്മ അധ്യക്ഷത വഹിച്ച കൗണ്‍സിലില്‍ വൈസ് ചെയര്‍മാന്‍ പി.എസ്.എം. ഹുസൈന്‍, സ്ഥിരം സമിതി അധ്യക്ഷരായ എം,ആര്‍. പ്രേം, എ.എസ്. കവിത, നസീര്‍ പുന്നയ്ക്കല്‍, ആര്‍. വിനിത, റീഗോ രാജു, സലിം മുല്ലാത്ത് തുടങ്ങിയവര്‍ പ്രസംഗിച്ചു.

ചേര്‍ത്തല, മരാരിക്കുളം സ്റ്റേഷനിൽ കൂടുതൽ സ്റ്റോപ്പ് നല്‍കണം: കെ.സി. വേണുഗോപാല്‍

ചേർത്തല: ചേര്‍ത്തല, മരാരിക്കുളം സ്റ്റേഷനുകളോടുള്ള അവഗണന അവസാനിപ്പിച്ച് അധിക ട്രെയിനുകൾക്ക് സ്റ്റോപ്പ് അനുവദിക്കണമെന്ന് കെ.സി. വേണുഗോപാല്‍ എംപി. ഇക്കാര്യം ആവശ്യപ്പെട്ട് റെയില്‍വേ മന്ത്രിക്ക് കത്തു നല്‍കി. ചെന്നൈ-തിരുവനന്തപുരം എക്‌സ്പ്രസ്, കൊച്ചുവേളി-അമൃത്സര്‍ എക്‌സ്പ്രസ്, തിരുവനന്തപുരം-ചെന്നൈ സൂപ്പര്‍ എസി എക്‌സ്പ്രസ്, കൊച്ചുവേളി-ചണ്ഡീഗഡ് സമ്പര്‍ക്ക ക്രാന്തി എക്‌സ്പ്രസ് തുടങ്ങിയ ട്രെയിനുകള്‍ക്ക് ചേര്‍ത്തല സ്റ്റേഷനിലും എറണാട് എക്‌സ്പ്രസ്, ഇന്‍റര്‍സിറ്റി എക്‌സ്പ്രസ് തുടങ്ങിയ ട്രെയിനുകള്‍ക്ക് മരാരിക്കുളം സ്റ്റേഷനിലും സ്റ്റോപ്പേജ് അനുവദിക്കണമെന്നും എംപി ആവശ്യപ്പെട്ടു.

വണ്ടി പാര്‍ക്കിംഗിന് മുണ്ടയ്ക്കൽ പാലം!

ചമ്പക്കുളം: കോടികള്‍ മുടക്കി കൈനകരി പഞ്ചായത്തില്‍ പമ്പാനദിക്കു കുറുകെ നിര്‍മിച്ച മുണ്ടയ്ക്കല്‍ പാലം വാഹന പാര്‍ക്കിംഗിനുള്ള സ്ഥലമായി മാറിയിരിക്കുന്നു. കുട്ടനാട്ടിലെ പല പാലങ്ങളിലും വെള്ളപ്പൊക്ക സമയത്തു വാഹനങ്ങൾ പാലങ്ങളില്‍ സൂക്ഷിക്കാറുണ്ട്. എന്നാല്‍, വെള്ളപ്പൊക്കമായാലും വേനലായാലും മുണ്ടയ്ക്കല്‍ പാലത്തില്‍ പാർക്കിംഗിനു തടസമില്ല. കാരണം, പാലംകൊണ്ട് വഴി തീരുകയാണ്. പാലത്തിന്‍റെ പടിഞ്ഞാറേ കരയില്‍നിന്ന് കിഴക്കേ കരയിലെത്തിയാല്‍ പിന്നെ വാഹനം പോകണമെങ്കില്‍ നാട്ടുകാര്‍ മുന്‍കൈ എടുത്തു നിര്‍മിച്ച ഓട്ടോ റോഡ് മാത്രമാണ് ശരണം. ചാമ്പ്യന്‍സ് ബോട്ട് ലീഗിന്‍റെ അഞ്ചാം പതിപ്പിന്‍റെ ആദ്യമത്സരം ഇന്ന് ഉദ്ഘാടനം ചെയ്യപ്പെടുന്നത് കൈനകരിയിലാണ്. മുണ്ടയ്ക്കല്‍ പാലത്തിനു സമീപത്താണ് വള്ളംകളിയുടെ ഫിനിഷിംഗ് പോയിന്‍റ്. വള്ളംകളി ഉദ്ഘാടനം ചെയ്യുന്നത് വിനോദസഞ്ചാര, പൊതുമരാമത്ത് മന്ത്രിയും. പാലത്തിന്‍റെ സ്ഥിതി മന്ത്രിയുടെ ശ്രദ്ധയിൽപ്പെടുമെന്ന പ്രതീക്ഷയിലാണ് നാട്ടുകാർ. അഞ്ചുവർഷം കഴിഞ്ഞിട്ടും 2015ല്‍ മുഖ്യമന്ത്രി ഉമ്മന്‍ ചാണ്ടി മുണ്ടയ്ക്കല്‍ പാലത്തിന്‍റെ നിര്‍മാണോദ്ഘാടനം നിര്‍വഹിക്കുമ്പോള്‍ ജനങ്ങള്‍ പ്രതീക്ഷയിലായിരുന്നു. പാലത്തിന്‍റെ നിര്‍മാണം പൂര്‍ത്തിയാക്കിയിട്ട് അഞ്ചു വര്‍ഷങ്ങള്‍ കഴിഞ്ഞിട്ടും പമ്പയുടെ കിഴക്കേ കരയില്‍ റോഡ് ഇന്നും സ്വപ്നം മാത്രം. പല റോഡുകളുടെയും പേരുകള്‍ പറയുന്നെങ്കിലും ഒന്നും ഇതുവരെ പൂര്‍ത്തിയായിട്ടില്ല. പ്രകൃതിഭംഗിക്കു കീര്‍ത്തി കേട്ട കൈനകരിയിലെ പാടശേഖരങ്ങളും കായലുകളും സന്ദര്‍ശിക്കാന്‍ നിരവധി വിനോദസഞ്ചാരികളാണെത്തുന്നത്. വഞ്ചി വീടുകളില്‍ കായല്‍ സഞ്ചാരം നടത്തുകയെന്നത് അപ്രായോഗികവും സാമ്പത്തിക ബാധ്യതയും വരുത്തുന്നതുമായതിനാൽ യാത്രാസൗകര്യത്തിന്‍റെ അഭാവത്തില്‍ കായല്‍ കാഴ്ചകള്‍ ഒഴിവാക്കുകയാണ് പതിവ്. കേരളത്തിലെ ആദ്യവിശുദ്ധന്‍ ചാവറ കുര്യാക്കോസ് ഏലിയാസന്‍റെ ജന്മഗൃഹത്തിലേക്കും ഈ പാലത്തില്‍നിന്ന് ഒരു കിലോമീറ്റര്‍ മാത്രമാണ് ദൂരം. എന്നാല്‍, ഇവിടെ എത്താന്‍ ഏക ആശ്രയം ഒരു ഓട്ടോ റോഡ് മാത്രമാണ്. അത് പകുതിയോളം സിഎംഐ സമൂഹം നേരിട്ടു നിർമിച്ചതും. കൈനകരിയെ കൈവിടരുത് പ്രകൃതി സൗന്ദര്യം കൈനകരിക്ക് ആവോളം ഉണ്ടെങ്കിലും അതു പ്രയോജനപ്പെടുത്താന്‍ വേണ്ട സൗകര്യങ്ങള്‍ ഒരുക്കാനാകുന്നില്ല. ദീര്‍ഘകാലമായി കൈനകരി ഗ്രാമപഞ്ചായത്ത് ഭരണം സിപിഎം നേതൃത്വത്തിലുള്ള ഇടതുപക്ഷത്തിനാണ്. മുണ്ടയ്ക്കല്‍ പാലത്തിന്‍റെ നിര്‍മാണ ലക്ഷ്യം പൂര്‍ത്തിയാകണമെങ്കില്‍ ഇവിടെ നിര്‍ദേശിക്കപ്പെട്ടിരിക്കുന്ന അനുബന്ധ റോഡുകള്‍ സമയബന്ധിതമായി നിര്‍മാണം പൂര്‍ത്തിയാക്കണം. അതിനാണ് പൊതുമരാമത്ത് മന്ത്രി ഈ പാലം വന്നു കാണണമെന്ന് നാട്ടുകാര്‍ ആവശ്യപ്പെടുന്നത്. അനന്ത വിനോദ സഞ്ചാര സാധ്യതകളുള്ള കൈനകരിയെ വിനോദ സഞ്ചാര മന്ത്രി കൂടിയായ പൊതുമരാമത്ത് മന്ത്രി പരിഗണിക്കും എന്ന പ്രതീക്ഷയിലാണ് കൈനകരിക്കാര്‍.

മെഡിക്കൽ കോളജ് ആശുപത്രിയിലെ രോഗികൾക്ക് സൂപ്രണ്ടിന്‍റെ കൈത്താങ്ങ്

അമ്പലപ്പുഴ: മെഡിക്കൽ കോളജ് ആശുപത്രിയിലെ രോഗികൾക്ക് സൂപ്രണ്ടിന്‍റെ കൈത്താങ്ങ്. ആശുപത്രി വാർഡുകളിൽ ചികിത്സയിൽ കഴിയുന്ന ആരോരുമില്ലാത്ത രോഗികൾക്ക് കഞ്ഞി അരച്ചുകൊടുക്കുന്നതിനുവേണ്ടി മിക്സി കെയർ ടേക്കർ വാങ്ങി നൽകിയാണ് ഡോ. ഹരികുമാർ മാതൃകയായത്. 108 ആബുലൻസുകളിലും മറ്റ് ആരോഗ്യ കേന്ദ്രങ്ങളിൽനിന്നുമായി നിരവധി വയോധികരെയാണ് തുടർ ചികിത്സയ്ക്കെത്തിക്കുന്നത്. ഇവർക്ക് മരുന്നും ചികിത്സയും ലഭിക്കുമെങ്കിലും ഭക്ഷണം ഉള്ളിലാക്കാൻ സാധിക്കാത്ത ദൈന്യത മനസിലാക്കിയാണ് ഡോ. ഹരികുമാർ ഭക്ഷണം അരച്ചുനൽകുന്നതിന് ഉപകരണം വാങ്ങി നൽകിയത്. കിടപ്പുരോഗികളെ പരിചരിക്കുന്നതിന് മൂന്നു കെയർ ടേക്കർമാരെയും നിയമിച്ചിട്ടുണ്ട്. ഇതിൽ ഒരാളായ പ്രീതിക്കാണ് മിക്സി കെയർ ടേക്കർ കൈമാറിയത്.

കായംകുളം റെയിൽവേ സ്റ്റേഷനോട് അവഗണന: പ്രതിഷേധം ഉയരുന്നു

കായംകുളം: തീരദേശത്തെയും മധ്യതിരുവിതാംകൂറിലെയും പ്രധാന സ്റ്റേഷനായ കായംകുളം ജംഗ്‌ഷൻ റയിൽവേ സ്റ്റേഷനോടുള്ള അവഗണനയ്ക്കെതിരേ ജനകീയ പ്രതിഷേധം ഉയരുന്നു. കാൽലക്ഷം പേരുടെ ഒപ്പുശേഖരണം നടത്താൻ റയിൽവേ ആക‌്ഷൻ കൗൺസിൽ തീരുമാനിച്ചു. അവഗണന അവാസാനിപ്പിക്കുക, വന്ദേഭാരത് രാജധാനി അടക്കമുള്ള എല്ലാ ട്രെയിനുകൾക്കും സ്റ്റോപ്പ് അനുവദിക്കുക തുടങ്ങിയ 26 ആവശങ്ങൾ ഉന്നയിച്ച് റെയിൽവേ മന്ത്രാലയത്തിന് നിവേദനം നൽകാൻ ആക‌്ഷൻ കൗൺസിലിന്‍റെ നേതൃത്വത്തിൽ 20ന് കാൽലക്ഷം പേരുടെ ഒപ്പുശേഖരണം നടത്തും. വൈകിട്ട് 4ന് കായംകുളം റെയിവേ സ്റ്റേഷനു മുന്നിലാണ് ഒപ്പുശേഖരണം. ആലപ്പുഴയിൽനിന്നു രാവിലെ 6.30നുശേഷം കായംകുളം ഭാഗത്തേക്കുള്ള ഇന്‍റർസിറ്റി പുറപ്പെട്ട് കഴിഞ്ഞാൽ പിന്നീട് ഈ വഴി മറ്റ് ട്രെയിനുകളില്ല. രാവിലെ 9.30ന് ആലപ്പുഴയിലെത്തുന്ന എറണാകുളം -ആലപ്പുഴ പാസഞ്ചർ കായംകുളത്തേക്ക് നീട്ടുകയാണങ്കിൽ യാത്രക്കാർക്ക് ഏറെ ഗുണം ചെയ്യും. രാവിലെ 11.30ന് കായംകുളത്ത് എത്തുന്ന നേത്രാവതി എക്സ്പ്രസ് കഴിഞ്ഞാൽ വൈകുന്നേരം 6.30ന് മാത്രമേ ആലപ്പുഴ ഭാഗത്തേക്ക് ട്രെയിൻ സർവീസ് ഉള്ളൂ. കോവിഡ് കാലത്ത് നിർത്തിവച്ച എറണാകുളം- കായംകുളം പാസഞ്ചർ ഇതുവരെ പുനരാരംഭിച്ചിട്ടില്ല. മാത്രമല്ല, റെയിൽവേയ്ക്ക് ഏറ്റവും കൂടുതൽ വരുമാനം നേടിത്തരുന്ന മധ്യതിരുവിതാംകൂറിലെ പ്രധാന സ്റ്റേഷനുകളിൽ ഒന്നായ കായംകുളത്ത് വന്ദേ ഭാരത് ട്രെയിനിന് സ്റ്റോപ്പ് അനുവദിച്ചിട്ടില്ല. ദേശീയപാതയിൽ നിർമാണം നടക്കുന്നതിനാൽ യാത്ര ദുഷ്കരമായതിനാൽ യാത്രക്കാർ കൂടുതലായും ട്രെയിനുകളെയാ ണ് ആശ്രയിക്കുന്നത്. ജംഗ്‌ഷൻ റയിൽവേ സ്റ്റേഷൻ ആണെങ്കിലും വേണ്ടത്ര അടിസ്ഥാന സൗകര്യങ്ങൾ സ്റ്റേഷനിൽ ഏർപ്പെടുത്തിയിട്ടില്ല.ഇപ്പോൾ സ്റ്റേഷനിൽ നവീകരണ പ്രവർത്തനങ്ങൾ നടന്നുവരികയണ്. കൂടുതൽ ടിക്കറ്റ് കൗണ്ടറുകളും യാത്രക്കാർക്ക് ശീതീകരിച്ച വിശ്രമമുറികളൂം ഏർപ്പെടുത്തണമെന്ന ആവശ്യവും ശക്തമാണ്.

എക്സലൻഷ്യ അവാർഡ്: ചേര്‍ത്തല നൈപുണ്യ കോളജിന് തുടര്‍ച്ചയായി നേട്ടം

ചേര്‍ത്തല: ചേര്‍ത്തല നൈപുണ്യ സ്കൂൾ ഓഫ് മാനേജ്‌മെന്‍റിനു തുടര്‍ച്ചയായി നേട്ടം. ദേശീയ മൂല്യനിർണയ-അക്രഡിറ്റേഷൻ കൗൺസിൽ (നാക്) എ ഗ്രേഡ് ലഭിച്ചതിനു പിന്നാലെ ദേശീയ മികവിലെത്തിയ സംസ്ഥാനത്തെ ഉന്നതവിദ്യാഭ്യാസ സ്ഥാപനങ്ങൾക്ക്‌ സംസ്ഥാന സര്‍ക്കാര്‍ നല്‍കുന്ന എക്സലൻഷ്യ അവാർഡും ചേര്‍ത്തല നൈപുണ്യ സ്കൂൾ ഓഫ് മാനേജ്‌മെന്‍റിന് ലഭിച്ചു. സംസ്ഥാനത്ത് നാക് എ++, എ+, എ ഗ്രേഡുകൾ നേടിയതും എൻഐആർഎഫ്‌, കെഐആർഎഫ്‌ റാങ്കിംഗിൽ മുന്നിലെത്തിയതുമായ ഉന്നതവിദ്യാഭ്യാസ സ്ഥാപനങ്ങളെ ആദരിക്കുന്നതിന്‍റെ ഭാഗമായി മിനിസ്റ്റേഴ്സ് അവാർഡ് ഫോർ എക്സെലൻസ് നൽകിയുള്ള എക്സലൻഷ്യ-2025 പുരസ്കാരമാണ് ചേര്‍ത്തല നൈപുണ്യ സ്കൂൾ ഓഫ് മാനേജ്‌മെന്‍റിന് ലഭിച്ചത്. സംസ്ഥാന ഉന്നതവിദ്യാഭ്യാസവകുപ്പും സ്റ്റേറ്റ് ലെവൽ ക്വാളിറ്റി അഷുറൻസ് സെൽ കേരളയും ചേർന്നാണ് പരിപാടി സംഘടിപ്പിച്ചത്. ‌തിരുവനന്തപുരം ടാഗോർ തിയറ്ററിൽ നടന്ന ചടങ്ങിൽ നൈപുണ്യ സ്കൂൾ ഓഫ് മാനേജ്‌മെന്‍റ് എക്സിക്യൂട്ടീവ് ഡയറക്ടർ ഫാ. വർഗീസ് പാലാട്ടി, പ്രിൻസിപ്പൽ ഡോ. ബിജി പി. തോമസ്, കോളജ് ഐക്യുഎസി കോ-ഓർഡിനേറ്റർ സി.എസ്. അഭിനന്ദ് എന്നിവര്‍ക്ക് ഉന്നതവിദ്യാഭ്യാസവകുപ്പു മന്ത്രി ഡോ. ആർ. ബിന്ദു പുരസ്കാരം സമ്മാനിച്ചു. വിദ്യാഭ്യാസത്തിലെ ഗുണനിലവാരം, നവീന അധ്യാപനരീതികൾ, വിദ്യാർഥികളുടെ സമഗ്ര വളർച്ച, സാമൂഹിക പ്രതിബദ്ധത എന്നിവയിൽ കൈവരിച്ച നേട്ടങ്ങളാണ് നാക് അംഗീകാരത്തിനും എക്സലൻഷ്യ അവാർഡിനും കാരണമായതെന്നും നൈപുണ്യ സ്കൂൾ ഓഫ് മാനേജ്‌മെന്‍റിന്‍റെ നേട്ടം കേരളത്തിലെ മാനേജ്‌മെന്‍റ് വിദ്യാഭ്യാസരംഗത്ത് പുതിയ മാനദണ്ഡങ്ങൾ സൃഷ്ടിക്കുന്നതാണെന്നും എക്സിക്യൂട്ടീവ് ഡയറക്ടർ ഫാ. വർഗീസ് പാലാട്ടി പറഞ്ഞു.

എസി റോഡിൽ മേൽപ്പാതയുടെ തൂണിനരികിൽ കഞ്ചാവുചെടി

ചമ്പക്കുളം: എസി റോഡിൽ കഞ്ചാവ് ചെടി കണ്ടെത്തി. പണ്ടാരക്കുളം മേൽപ്പാതയുടെ ഒൻപതാം നമ്പർ തൂണിനു സമീപത്തുനിന്ന് 50 സെന്‍റീമീറ്റർ ഉയരത്തിൽ വളർന്ന കഞ്ചാവുചെടി കണ്ടെത്തി. കുട്ടനാട് എക്സൈസ് ഉദ്യോഗസ്ഥർ സ്ഥല പരിശോധന നടത്തി കഞ്ചാവ് ചെടി കസ്റ്റഡിയിലെടുത്ത് കേസ് രജിസ്റ്റർ ചെയ്ത് അന്വേഷണം തുടങ്ങി. ഉദ്യോഗസ്ഥർക്ക് ലഭിച്ച സന്ദേശത്തിന്‍റെ അടിസ്ഥാനത്തിലാണ് പരിശോധന നടത്തിയത്. അസി. എക്സൈസ് ഇൻസ്പെക്ടർമാരായ ആർ. അജിരാജ്, എം.ആർ. സുരേഷ്, പ്രിവന്‍റീവ് ഓഫിസർ പി.ടി. ഷാജി, സിവിൽ എക്സൈസ് ഓഫിസർ എസ്. അരുൺ എന്നിവരടങ്ങിയ സംഘമാണ് കഞ്ചാവുചെടി കണ്ടെത്തിയത്.

സംസ്ഥാന സബ് ജൂണിയര്‍ ബാസ്‌കറ്റ് ബോള്‍; താരങ്ങള്‍ക്കു സ്വീകരണം

ആലപ്പുഴ: ലീയോ തേര്‍ടീന്ത് എച്ച്എസ് സ്‌കൂളില്‍ നടക്കുന്ന ആണ്‍കുട്ടികളുടെ സംസ്ഥാന സബ് ജൂണിയര്‍ ബാസ്‌കറ്റ് ബോള്‍ സെലക‌്ഷന്‍ ക്യാമ്പില്‍ പങ്കെടുക്കുന്ന വിദ്യാര്‍ഥികള്‍ക്ക് സ്വീകരണം നല്‍കി. സ്‌കൂള്‍ ഓഡിറ്റോറിയത്തില്‍ ചേര്‍ന്ന സമ്മേളനം ജില്ലാ സ്പോര്‍ട്സ് കൗണ്‍സില്‍ പ്രസിഡന്‍റ് പി.ജെ. ജോസഫ് ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ഫ്രാന്‍സിസ് കൊടിയനാട് അധ്യക്ഷത വഹിച്ചു. കോര്‍പറേറ്റ് മാനേജര്‍ ഫാ. നെല്‍സണ്‍ തൈപ്പറമ്പില്‍ അഭിനന്ദന സന്ദേശം നല്‍കി കളിക്കാരെ ആദരിച്ചു. കേരള ബാസ്‌കറ്റ്ബോള്‍ അസോസിയേഷന്‍ പ്രസിഡന്‍റ് ജേക്കബ് ജോസഫ്, ജില്ലാ ബാസ്‌കറ്റ്ബോള്‍ അസോസിയേഷന്‍ പ്രസിഡന്‍റ് റോണി മാത്യു, സെക്രട്ടറി ജോണ്‍ ജോര്‍ജ്, പിആര്‍ഒ തോമസ് മത്തായി കരിക്കംപള്ളില്‍, പ്രിന്‍സിപ്പല്‍ പി.ജെ. യേശുദാസ്, ഹെഡ്മാസ്റ്റര്‍ മാനുവല്‍ ജോസ്, ഫിസിക്കല്‍ എഡ്യൂക്കേഷന്‍ ടീച്ചര്‍ പി.ബി. ഐജിന്‍, സംസ്ഥാന ബാസ്‌കറ്റ്ബോള്‍ ടീം പരിശീലകരായ എസ്. ഷഹബാസ്, പി. നരേഷ് എന്നിവര്‍ പ്രസംഗിച്ചു. സംസ്ഥാന സബ് ജൂണിയര്‍ ക്യാമ്പ് ലീയോ തേര്‍ട്ടീന്ത് സ്‌കൂളില്‍ ആദ്യമായാണ് സംഘടിപ്പിക്കുന്നത്. സ്‌കൂളില്‍നിന്ന് നാലുപേര്‍ സംസ്ഥാന ക്യാമ്പിലുണ്ട്. ദേശീയ ചാമ്പ്യന്‍ഷിപ് ഡെറാഡൂണിലാണ്്. പുന്നപ്ര ജ്യോതിനികേതന്‍ സ്‌കൂളില്‍ നടന്ന 50-ാമത് കേരള സംസ്ഥാന സബ് ജൂണിയര്‍ ബാസ്‌കറ്റ്ബോള്‍ ചാമ്പ്യന്‍ഷിപ്പ്-2025 ആണ്‍കുട്ടികളുടെ വിഭാഗത്തില്‍ ആലപ്പുഴ ജില്ലയായിരുന്നു ചാമ്പ്യന്മാര്‍. ആ ടീമില്‍ ഏഴുപേര്‍ ലീയോ തേര്‍ട്ടീന്ത് സ്‌കൂളില്‍നിന്നായിരുന്നു. ആ ചാമ്പ്യന്‍ഷിപ്പില്‍നിന്നാണ് സംസ്ഥാന ടീമിനായുള്ള കോച്ചിംഗ് ക്യാമ്പിലേക്ക് കളിക്കാരെ തെരഞ്ഞെടുത്തത്.

അനധികൃത ഡ്രോണുകൾ: പരാതി നൽകിയിട്ടും നടപടിയില്ല

അന്പലപ്പുഴ: രാജ്യസുരക്ഷയെ ബാധിക്കുന്ന അനധികൃത ഡ്രോണുകൾ കുട്ടനാടൻ പാടശേഖരങ്ങളുടെ മുകളിൽ. പരാതി നൽകിയിട്ടും നടപടിയില്ല. നാട്ടുകാർ അറിയിച്ചതിനെത്തുടർന്ന് പുറക്കാട് കൃഷിഭവന്‍റെ പരിധിയില്‍ കൊച്ചുപുത്തന്‍കരി പാടശേഖരത്തില്‍ വിത്ത് വിതയ്ക്കുന്നതിനിടെ രഹസ്യാന്വേഷണ വിഭാഗം പിടികൂടി അമ്പലപ്പുഴ പോലീസിന് കൈമാറിയെങ്കിലും രാഷ്ട്രീയ ഇടപെടലിനെത്തുടർന്ന് നടപടി എടുക്കാതെ ഡ്രോൺ വിട്ടുകൊടുത്തത് വിമർശനങ്ങൾക്ക് കാരണമായിരുന്നു. രാജ്യസുരക്ഷയുടെ ഭാഗമായി വിദേശനിർമിത ഡ്രോണുകൾ ഇറക്കുമതി ചെയ്യുന്നത് 2022ൽ കേന്ദ്രസർക്കാർ നിരോധിച്ചതാണ്. എന്നാൽ, ചൈനയിൽനിന്നു സ്പെയറുകൾ ഇറക്കുമതി ചെയ്ത് ബംഗളൂരുവിൽ അസംബ്ലി ചെയ്ത നാല് ഡ്രോണുകൾ കോട്ടയം, ആലപ്പുഴ ജില്ലകളിൽ പ്രവർത്തിച്ചുവരുന്നുണ്ട്. ഡയറക്ടർ ജനറൽ ഓഫ് സിവിൽ ഏവിയേഷന്‍റെ അംഗീകാരമുള്ള ഡ്രോണുകൾക്ക് മാത്രമാണ് ഇവിടെ പ്രവർത്തിപ്പിക്കാൻ അനുമതിയുള്ളത്. ഇത് പ്രവർത്തിപ്പിക്കുന്ന ഓപ്പറേറ്റർമാർക്ക് ഡ്രോൺ പൈലറ്റ് ട്രെയിനിംഗ് സർട്ടിക്കിക്കറ്റ് നിർബന്ധമാണ്. നെറ്റ് ഉപയോഗിച്ചാണ് ഡ്രോണുകൾ പ്രവർത്തിപ്പിക്കുന്നത്. ഇതിലെ യൂനിക്ക് ഐഡന്‍റിഫിക്കേഷൻ നമ്പരുകൾ ഉപയോഗിച്ച് ഡ്രോണുകളുടെ ഉടമസ്ഥാവകാശം കണ്ടെത്താൻ കഴിയും. എന്നാൽ, അംഗീകാരമില്ലാത്ത ഡ്രോണുകള്‍ക്ക് യൂനിക് ഐഡന്‍റിഫിക്കേഷൻ നമ്പരുകൾ ലഭിക്കില്ല. അതുകൊണ്ടുതന്നെ ഇത്തരം ഡ്രോണുകളുടെ വിവരങ്ങൾ പോലീസിനും മറ്റും ശേഖരിക്കാൻ കഴിയില്ല. കൂടാതെ നെറ്റുകൾ ഉപയോഗിച്ചാണ് ഡ്രോണുകൾ പ്രവർത്തിപ്പിക്കുന്നത്. പ്രദേശത്തിന്‍റെ ഭൂപ്രകൃതിയും മറ്റ് വിവരങ്ങളും സർവറുകളിൽ അപ്‌ലോഡ് ചെയ്തതിനുശേഷമേ ഡ്രോണുകൾ പ്രവർത്തിപ്പിക്കാൻ കഴിയുകയുളളൂ. അനധികൃത ഡ്രോണുകളുടെ സർവറുകൾ ചൈന കേന്ദ്രീകരിച്ചാണ് പ്രവർത്തിക്കുന്നത്. അങ്ങനെ അവിടെയുള്ള സർവറിൽനിന്നു ഡ്രോൺ പ്രവർത്തിക്കുന്ന പ്രദേശത്തെക്കുറിച്ചുള്ള വിവരങ്ങൾ ചോർത്തിയെടുക്കാനാകും. കഴിഞ്ഞദിവസം ഡി.ജെ എന്ന കമ്പനിയുടെ ഡ്രോണാണ് രഹസ്യാന്വേഷണവിഭാഗം പിടികൂടി പോലീസിൽ ഏൽപ്പിച്ചത്. എന്നാൽ, തൊട്ടടുത്ത ദിവസങ്ങളിലും ഇതേ ഡ്രോൺ പാടശേഖരങ്ങളിൽ പ്രവർത്തിപ്പിച്ചിരുന്നു. അനധികൃത ഡ്രോണുകള്‍ പ്രവര്‍ത്തിപ്പിക്കുന്നതിനെതിരേ വ്യാപക പരാതി ഉണ്ടെങ്കിലും നടപടി സ്വീകരിക്കാന്‍ അധികൃതര്‍ തയാറാകുന്നില്ല.

പച്ചത്തുരുത്തിൽ ചെന്നിത്തല ഒന്നാമത്

മാന്നാർ: ഹരിതകേരളം മിഷന്‍റെ നവകേരളം കർമ പദ്ധതി-2 ന്‍റെ ഭാഗമായി വിദ്യാലയങ്ങളിൽ നടത്തിയ പച്ചത്തുരുത്ത് രൂപവത്കരണത്തിൽ സ്കൂൾ തലത്തിൽ ചെന്നിത്തല ജവഹർ നവോദയ വിദ്യാലയം ഒന്നാം സ്ഥാനം നേടി. സ്കൂളിൽ പച്ചത്തുരുത്തു സ്ഥാപിക്കാമെന്നുള്ള ആശയം ചെന്നിത്തല പഞ്ചായത്ത് പ്രസിഡന്‍റ് വിജയമ്മ ഫിലേന്ദ്രനാണ് മുന്നോട്ടുവച്ചത്. അന്നത്തെ പ്രിൻസിപ്പൽ സി.എച്ച്. ദിനേശൻ ഇതിനായി 10 സെന്‍റ് സ്ഥലം അനുവദിച്ചു. 2023 ജൂൺ അഞ്ചിനാണ് സ്കൂളിൽ പച്ചത്തുരുത്ത് സ്ഥാപിച്ചത്. 10 സെന്‍റ് സ്ഥലത്ത് തുടങ്ങിയ പച്ചത്തുരുത്ത് ഇന്ന് 40 സെന്‍റോളം വ്യാപിച്ചിട്ടുണ്ട്. ചെന്നിത്തല തൃപ്പെരുന്തുറ പഞ്ചായത്തിലെ തൊഴിലുറപ്പിന്‍റെ സഹായത്തോടെ പ്രവർത്തനം ഏറ്റെടുക്കുകയായിരുന്നു. കാടുപിടിച്ചുകിടന്ന സ്ഥലം വൃത്തിയാക്കി കൃഷി തുടങ്ങി. വെള്ളത്തിന്‍റെ ദൗർലഭ്യം കാരണം ആദ്യം നട്ട തൈകൾ വേനൽക്കാലത്തു നശിച്ചു. പിന്നീട് വനം വകുപ്പിന്‍റെ സഹായത്തോടെ കൂടുതൽ തൈകൾ ലഭ്യമാക്കി റീപ്ലാന്‍റേഷൻ പച്ചത്തുരുത്തു ചെയ്യുകയായിരുന്നു. സംരക്ഷണത്തിനായി സംഘാടകസമിതി രൂപവത്കരിച്ച് സ്കൂൾ അധ്യാപകനായ വി. പ്രദീപ് കുമാറിനെ പദ്ധതി കോ-ഓർഡിനേറ്ററായി തെരഞ്ഞെടുത്തു. വനംവകുപ്പിന്‍റെ സഹായത്തോടെ ഹൈബ്രിഡ് തൈകൾ നട്ടു. റെസിഡൻഷ്യൽ സ്കൂൾ ആയതിനാൽ കുട്ടികൾ നല്ലരീതിയിൽ പരിപാലനം നടത്തുന്നുണ്ട്. ആദ്യ ഘട്ടത്തിൽ പേര, മാവ്, ചാമ്പ, പതിമുഖം, പ്ലാവ്, നെല്ലി തുടങ്ങിയ ഫലവൃക്ഷങ്ങളാണ് നട്ടത്. ഇപ്പോൾ അശോകം, ദന്തപ്പാല, റംബൂട്ടാൻ, പനിനീർ ചാമ്പ, സപ്പോട്ട, ഔഷധസസ്യങ്ങൾ തുടങ്ങിയവയും നട്ടിട്ടുണ്ട്. തുടക്കത്തിൽ 30 തൈകളായിരുന്നത് ഇപ്പോൾ 120തൈകൾ കൂടി നട്ട് 150 തൈകളായി. മറ്റു സംസ്ഥാനങ്ങളിൽനിന്നുള്ള കുട്ടികൾ ഈ വിദ്യാലയത്തിൽ പഠിക്കുന്നുണ്ട്. അവരുടെ ഇടപെടലുകൾ, പ്രത്യേകിച്ച് ഉത്തർപ്രദേശ് സ്വദേശികളായ കുട്ടികളുടെ കൃഷിയിലുള്ള അറിവ് കൃഷിക്കും പച്ചത്തുരുത്തിനും ഏറെ സഹായകമാണ്. ജൈവവളങ്ങൾ ഉപയോഗിച്ചുള്ള കൃഷിരീതികൾ അവലംബിക്കുന്നു. തുടർച്ചയായ രണ്ടുവർഷങ്ങളിൽ മാസ്റ്റർ ജഗന്നാഥ്, കുമാരി ആവണി ഗിരീഷ് എന്നിവ മികച്ച വിദ്യാർഥി കർഷകർക്കുള്ള അവാർഡ് നേടി. പ്രിൻസിപ്പൽ ജോളി ടോമി, കോ-ഓർഡിനേറ്റർ വി. പ്രദീപ്കുമാർ എന്നിവർ കുട്ടികൾക്കുവേണ്ട മാർഗനിർദേശം നൽകുന്നു. മുഖ്യമന്ത്രി പിണറായി വിജയനിൽനിന്നും വിദ്യാർഥികൾ അവാർഡ് ഏറ്റുവാങ്ങി.

വിദഗ്ധ ചികിത്സ ലഭ്യമാക്കുന്നതിന് പുതിയ പദ്ധതി

അമ്പലപ്പുഴ: സംസ്ഥാനത്ത് സാമൂഹികാരോഗ്യകേന്ദ്രങ്ങളിലും സബ് സെന്‍ററുകളിലും സ്ത്രീകൾക്കും കുട്ടികൾക്കും വിദഗ്ധ ചികിത്സ ലഭ്യമാക്കുന്നതിനായി പുതിയ പദ്ധതി നിലവിൽ വന്നു. സ്ത്രീ എന്ന പേരിലാണ് പദ്ധതിയാരംഭിച്ചിരിക്കുന്നത്. പദ്ധതി പ്രകാരം ഇനിമുതൽ എല്ലാ സബ്സെന്‍ററിലും വിദഗ്ധ പരിശോധനയും ലഭ്യമാകും. ആഴ്ചയിലൊരിക്കൽ സ്ത്രീകൾക്കും കുട്ടികൾക്കും പ്രത്യേക ക്ലിനിക് പ്രവർത്തിക്കും. കൂടാതെ അയൽക്കൂട്ട പരിശോധന എന്ന പേരിൽ എല്ലാ വാർഡിലുമെത്തി പരിശോധനയും ബോധവത്കരണവും നടത്തും. സബ് സെന്‍ററുകളിൽ 10 തരം പരിശോധനകൾ ലഭ്യമാകും. സാമൂഹികാരോഗ്യകേന്ദ്രങ്ങളിൽ ജനറൽ മെഡിസിൻ കൂടാതെ സൈക്യാട്രി, ഗൈനക്ക്, ത്വക്, ഡന്‍റൽ എന്നിവയുടെ വിദഗ്ധ പരിശോധനകളും ഇനിമുതൽ ലഭ്യമാണ്. സബ് സെന്‍ററുകൾ മുഖേന 36 ഇനം മരുന്നുകളും ലഭ്യമാക്കും. പദ്ധതിയുടെ പുറക്കാട് പഞ്ചായത്തുതല ഉദ്ഘാടനം ആരോഗ്യ സ്റ്റാൻഡിംഗ് കമ്മിറ്റി ചെയർമാൻ വി.എസ്. ജിനുരാജ് നിർവഹിച്ചു. മെഡിക്കൽ ഓഫീസർ ഡോ. ഷിബു സുകുമാരൻ അധ്യക്ഷത വഹിച്ചു. പഞ്ചായത്തംഗങ്ങളായ മനോജ്, സുഭാഷ്, മെഡിക്കൽ ഓഫീസർ ഡോ. ഹരിശങ്കർ, ഹെൽത്ത് ഇൻസ്പെക്ടർ ജിനു സുധാകർ എന്നിവർ പ്രസംഗിച്ചു.

വിശ്വകർമദിനാഘോഷം

മുഹമ്മ: അഖില കേരള വിശ്വകർമ മഹാസഭ 555 ശാഖയുടെ നേതൃത്വത്തിൽ വിശ്വകർമ ദിനാഘോഷം സംഘടിപ്പിച്ചു. ശാഖാ പ്രസിഡന്‍റ് പി.ആർ. വിശ്വംഭരൻ അധ്യക്ഷനായി. മുഹമ്മ കെഇ കാർമൽ പ്രിൻസിപ്പൽ റവ.ഡോ. സാംജി വടക്കേടം സമ്മേളനം ഉദ്ഘാടനം ചെയ്തു. പി.ബി. ചിത്രകുമാർ സ്വാഗതം പറഞ്ഞു. ശില്പകലയിൽ മികവ് തെളിയിച്ച ശ്രീകാന്ത് പി. വിശ്വത്തിനെയും സിനിമാ സീരിയൽതാരം നിതാ കർമയേയും ആദരിച്ചു. കെ.ഡി. ദിലീപ്, കെ.ബി. പ്രസന്ന കുമാരി എന്നിവർ പ്രസംഗിച്ചു.

നിരവധി കേസുകളിലെ പ്രതി പിടിയിൽ

തുറവൂർ: കണ്ണൂർ പയ്യോളി പോലീസ് സ്റ്റേഷൻ പരിധിയിൽ കൊലപാതകശ്രമം ഉൾപ്പെടെയുള്ള അടിപിടി കേസിലെ പ്രതി കോടതിയിൽ ഹാജരാകാതെ പല സ്ഥലങ്ങളിലായി ഒളിവിൽ താമസിച്ചുവന്നിരുന്ന പ്രതി പിടിയിൽ. കണ്ണൂർ ജില്ലയിൽ അയനിക്കാട് പിഒയിൽ ആവിത്താര വീട്ടിൽ പാമ്പ് ഷിജേഷ് എന്നുവിളിക്കുന്ന ഷിജേഷാ(35)ണ് പോലീസ് പിടിയിലായത്. കുത്തിയതോട് പോലീസ് സ്റ്റേഷൻ പരിധിയിൽ തുറവൂർ ഭാഗത്ത് കണ്ണൂർ സ്വദേശിയായ ഒരാൾ താമസിക്കുന്നതായി കുത്തിയതോട് പോലീസിന് വിവരം ലഭിച്ചതിന്‍റെ അടിസ്ഥാനത്തിൽ ഇയാളെ കണ്ടെത്തി ചോദ്യം ചെയ്തതിൽനിന്നാണ് പ്രതിയെ പിടികൂടിയത്. സംഘത്തിൽ കുത്തിയതോട് ഇൻസ്പെക്ടർ ഓഫ് പോലീസ് അജയ മോഹൻ, സിപിഒ വിജേഷ്, അമൽരാജ് പ്രവീൺ, ആൻസൺ എന്നിവരുണ്ടായിരുന്നു. പ്രതിയെ പിന്നീട് പയ്യോളി പോലീസിനു കൈമാറി.

മാർ തൂങ്കുഴി സഭയ്ക്ക് പുതുദിശാബോധം പകർന്ന ഇടയശ്രേഷ്ഠൻ: എറണാകുളം-അങ്കമാലിഅതിരൂപത

കൊച്ചി: സവിശേഷമായ നേതൃശുശ്രൂഷയിലൂടെ സഭയ്ക്കും സമൂഹത്തിനും ക്രിസ്തുവിന്‍റെ ലാളിത്യവും കാലഘട്ടത്തിന്‍റെ ആവശ്യമനുസരിച്ചുള്ള പുതുദിശാബോധവും പകർന്ന ഇടയശ്രേഷ്ഠനാണു കാലം ചെയ്ത ആർച്ച്ബിഷപ് മാർ ജേക്കബ് തൂങ്കുഴിയെന്ന് എറണാകുളം-അങ്കമാലി അതിരൂപത അനുസ്മരിച്ചു. അര നൂറ്റാണ്ടു പിന്നിട്ട പൗരോഹിത്യ ജീവിതത്തിലൂടെയും മൂന്നു രൂപതകളിലെ ഇടയശുശ്രൂഷകളിലൂടെയും മാർ തൂങ്കുഴി സുവിശേഷസന്ദേശങ്ങളെ അനേകരിലേക്കെത്തിക്കുന്നതിനും ക്രിസ്തുസാക്ഷ്യം തെളിമയോടെ പ്രകാശിപ്പിക്കുന്നതിലും ശ്രദ്ധിച്ചു. ആഴമാർന്ന ജീവിതാനുഭവങ്ങളും സ്നേഹാർദ്രമായ ജീവിതശൈലിയും സമന്വയിപ്പിച്ച് സഭാശുശ്രൂഷകളെ അദ്ദേഹം കൂടുതൽ മഹത്വപൂർണവും സ്വീകാര്യതയുമുള്ളതാക്കി. സേവനം ചെയ്ത രൂപതകൾക്കുള്ളിൽ ഒതുങ്ങുന്നതായിരുന്നില്ല മാർ തൂങ്കുഴിയുടെ ജീവിതം ചെലുത്തിയ സ്വാധീനം. കേരളസഭയ്ക്കാകെയും പുതുദിശാബോധം നൽകാനാകുന്ന ഇടപെടലുകൾ അദ്ദേഹം നടത്തി. മാർ തൂങ്കുഴിയുടെ നിര്യാണം സഭയ്ക്കും പ്രത്യേകമായി എറണാകുളം- അങ്കമാലി അതിരൂപതയ്ക്കും തീരാനഷ്‌ടമാണ്. കേരളസഭയ്ക്കു വിസ്മരിക്കാനാകാത്ത സംഭാവനകൾ‌ നൽകിയ മാർ ജേക്കബ് തൂങ്കുഴിയുടെ സ്വർഗപ്രാപ്തിയിൽ എറണാകുളം -അങ്കമാലി അതിരൂപതയിലെ പിതാക്കന്മാരുടെയും വൈദികരുടെയും സമർപ്പിതരുടെയും വിശ്വാസികളുടെയും പ്രാർഥനകൾ നേരുന്നതായും അതിരൂപത അനുശോചനസന്ദേശത്തിൽ പറഞ്ഞു.

തിരുനാളിനു കൊടിയേറി

മങ്കൊമ്പ്: ചേന്നങ്കരി സെന്‍റ് ജോസഫ്‌സ് പള്ളിയിൽ ഇടവകമധ്യസ്ഥനായ വിശുദ്ധ യൗസേപ്പിതാവിന്‍റെ തിരുനാളിനു തുടക്കമായി. വികാരി ഫാ. ജോസഫ് ബംഗ്ലാവുപറമ്പിൽ കൊടിയേറ്റി. ഇന്നു വൈകുന്നേരം 4.30ന് വിശുദ്ധ കുർബാന, സന്ദേശം ആർച്ച്ബിഷപ് മാർ ജോസഫ് പെരുന്തോട്ടം. കുരിശടി പ്രദക്ഷിണം, സന്ദേശം. നാളെ വൈകുന്നേരം നാലിന് മധ്യസ്ഥപ്രാർഥന, വിശുദ്ധ കുർബാന, സന്ദേശം ചങ്ങനാശേരി ആർച്ച്ബിഷപ് മാർ തോമസ് തറയിൽ. 5.30ന് ദിവ്യകാരുണ്യ പ്രദക്ഷിണം. 20ന് വൈകുന്നേരം നാലിന് മധ്യസ്ഥപ്രാർഥന, വിശുദ്ധ കുർബാന, സന്ദേശം- കർദിനാൾ മാർ ജോർജ് ആലഞ്ചേരി. ദേവമാതാ കുരിശടിയിലേക്കു പ്രദക്ഷിണം, തുടർന്ന് പ്രസുദേന്തി വാഴ്ച. ലൈറ്റ് ആൻഡ് സൗണ്ട് ഷോ. ചെണ്ട, വയലിൻ ഫ്യൂഷൻ. പ്രധാന തിരുനാൾ ദിനമായ 21ന് രാവിലെ 9.30ന് വിശുദ്ധ കുർബാന-ഫാ. വിപിൻ കുരിശുതറ, തിരുനാൾ സന്ദേശം ഫാ. ഫ്രാൻസീസ് കർത്താനം, തിരുനാൾ പ്രദക്ഷിണം.

കത്തോലിക്ക കോൺഗ്രസ് ശക്തിപ്പെടേണ്ടതു കാലത്തിന്‍റെ ആവശ്യം: മാർ പാംപ്ലാനി

കൊച്ചി: വർത്തമാനകാല ആവശ്യങ്ങൾ തിരിച്ചറിഞ്ഞ് സഭയുടെയും സമുദായത്തിന്‍റെയും ശബ്‌ദമാകാൻ കത്തോലിക്ക കോൺഗ്രസിനു കഴിയണമെന്ന് ആർച്ച്ബിഷപ് മാർ ജോസഫ് പാംപ്ലാനി. എറണാകുളം-അങ്കമാലി അതിരൂപതയിൽ സംഘടനയുടെ പുതിയ ഭാരവാഹികളുടെ നേതൃസംഗമം ഉദ്ഘാടനം ചെയ്യുകയായിരുന്നു അദ്ദേഹം. സമുദായ അംഗങ്ങളുടെ ന്യായമായ ആവശ്യങ്ങൾക്കുവേണ്ടി പ്രവാചകധീരതയോടെ ശക്തമായ നിലപാടുകളെടുക്കാൻ സാധിച്ചെങ്കിൽ മാത്രമേ കത്തോലിക്ക കോൺഗ്രസിനു സഭയിലും സമൂഹത്തിലും ഒരു തിരുത്തൽ ശക്തിയാകാൻ കഴിയൂവെന്നും മാർ പാംപ്ലാനി ഓർമിപ്പിച്ചു. അതിരൂപത പ്രസിഡന്‍റ് എസ്.ഐ. തോമസ് അധ്യക്ഷത വഹിച്ചു. ജനറൽ സെക്രട്ടറി ബേബി പൊട്ടനാനിയിൽ, ട്രഷറർ ജോൺസൺ പടയാട്ടി, ഗ്ലോബൽ വൈസ് പ്രസിഡന്‍റ് ബെന്നി ആന്‍റണി, ഗ്ലോബൽ സെക്രട്ടറി ഫ്രാൻസിസ് മൂലൻ, ജോസ് ആന്‍റണി, സെജോ ജോൺ തുടങ്ങിയവർ പ്രസംഗിച്ചു. കത്തോലിക്ക കോൺഗ്രസ് കേന്ദ്രസമിതിയുടെ നേതൃത്വത്തിൽ ഒക്‌ടോബറിൽ നടക്കുന്ന അവകാശ സംരക്ഷണ യാത്രയ്ക്ക് അതിരൂപതയുടെ സ്വീകരണം കാലടിയിൽ ഒരുക്കും. അതിരൂപത സമിതിയുടെ നേതൃത്വത്തിലുള്ള വിവിധ സബ്കമ്മറ്റികളെയും യോഗത്തിൽ പ്രഖ്യാപിച്ചു.

പൈല്‍ ആന്‍ഡ് സ്ലാബ് സ്ഥാപിക്കുന്നതിനിടെ റോഡ് പിളര്‍ന്നു

ഹരിപ്പാട്: പൈല്‍ ആന്‍ഡ് സ്ലാബ് സ്ഥാപിക്കുന്നതിനിടെ റോഡ് പിളര്‍ന്നു. നദീതീരസംരക്ഷണത്തിന്‍റെ ഭാഗമായുള്ള പ്രവര്‍ത്തനത്തിനിടെയാണ് റോഡ് പിളര്‍ന്നത്. വീയപുരം 13-ാം വാര്‍ഡില്‍ ഗവ. ഹയർ സെക്കൻഡറി സ്കൂളിന് പടിഞ്ഞാറുവശത്തെ അപ്രോച്ചു റോഡ് അവസാനിക്കുന്ന നദീതീരത്താണ് പൈല്‍ ആന്‍ഡ് സ്ലാബ് സ്ഥാപിക്കുന്ന പ്രവര്‍ത്തനങ്ങള്‍ നടക്കുന്നത്. അപ്രോച്ചിനോട് ചേര്‍ന്നുള്ള വേലിയില്‍പ്പടി റോഡാണ് പിളര്‍ന്നത്. ടാര്‍ റോഡാണിത്. ഉയരക്കൂടുതലുള്ള ഭാഗത്ത് എത്തുമ്പോള്‍ ഇങ്ങനെ റോഡ് പിളരാറുണ്ടെന്നാണ് അധികൃതരുടെ ഭാഷ്യം. പ്രവര്‍ത്തനത്തിന്‍റെ ആഘാതത്തില്‍ സമീപത്തെ കെട്ടിടങ്ങള്‍ക്ക് ക്ഷതം ഏല്‍ക്കുന്നതായി പരാതി ഉയര്‍ന്നിരുന്നു. പരാതിയെത്തുടര്‍ന്ന് ഇവിടങ്ങളില്‍ പൈല്‍ ആന്‍ഡ് സ്ലാബ് സ്ഥാപിക്കുന്ന പ്രവൃത്തിനിര്‍ത്തിവച്ചിരുന്നു. ഇറിഗേഷന്‍ വകുപ്പ് ആണ് പ്രവര്‍ത്തനത്തിന് മേല്‍നോട്ടം വഹിക്കുന്നത്. സംഭവസ്ഥലം പഞ്ചായത്ത് പ്രസിഡന്‍റ് ഷീജ സുരേന്ദ്രനും വൈസ് പ്രസിഡന്‍റ് പി.എ. ഷാനവാസും സന്ദര്‍ശിച്ചു.

ഒരു ലോഡ് തെരുവുനായ്ക്കളെ റോഡിൽ തള്ളി

ചാരുംമൂട്: തെരുവുനായ്ക്കളുടെ ശല്യം രൂക്ഷമായ ചുനക്കര ചാരുംമൂട് മേഖലയിൽ അജ്ഞാതസംഘം ഒരു ലോഡ് തെരുവുനായ്ക്കളെ ലോറിയിൽ എത്തിച്ചു തള്ളിയതായി പരാതി. തെരുവു നായ്ക്കളെ കൂട്ടത്തോടെ വാഹനത്തിൽ കൊണ്ടുവന്നു തള്ളുന്നതായി മുമ്പും പരാതി ഉയർന്നിരുന്നു. പൊതുവേ തെരുവുനായ്ക്കളുടെ എണ്ണം ഏറിയ പ്രദേശത്താണ് വീണ്ടും കൊണ്ടുവന്നു തള്ളിയിരിക്കുന്നത്. ഏറെ തിരക്കേറിയ കൊല്ലം- തേനി ദേശീയപാതയിലും ചുനക്കര പഞ്ചായത്തിലെ വിവിധ പ്രദേശങ്ങളിലുമാണ് കഴിഞ്ഞദിവസം തെരുവുനായ്ക്കളെ കൂട്ടത്തോടെ കണ്ടെത്തിയത്. തെരുവുനായ്ക്കൾ കൂട്ടത്തോടെ സഞ്ചരിക്കുന്നതു ഇരുചക്ര യാത്രികർക്കും കാൽനട യാത്രികൾക്കും വലിയ ഭീഷണിയായി മാറിയിരിക്കുകയാണ്. വിദ്യാർഥികളും ഭീതിയിൽ തെരുവുനായ്ക്കളെ തള്ളിയ സംഭവത്തിൽ സിസിടിവി ദൃശ്യങ്ങൾ കേന്ദ്രീകരിച്ചു പോലീസ് അന്വേഷണം ആരംഭിച്ചിട്ടുണ്ട്. റോഡിൽ വൻ തോതിൽ തെരുവുനായ്ക്കൾ നിറഞ്ഞതോടെ വിദ്യാർഥികൾ ഉൾപ്പടെയുള്ളവർക്കു പുറത്തിറങ്ങി സഞ്ചരിക്കാനാവാത്ത സ്ഥിതിയാണ്. വീടുകളിൽ കൂട്ടത്തോടെ എത്തുന്ന തെരുവുനായ്ക്കൾ വളർത്തു മൃഗങ്ങളെ ആക്രമിച്ചു കൊല്ലുന്നതും പതിവാണ്. തെരുവുനായ്ക്കൾ കൂട്ടത്തോടെ ഇറങ്ങിയതോടെ പ്രഭാത സവാരി പോലും പലരും ഉപേക്ഷിച്ചു. ചിലർ വടിയും മറ്റും കൈയിൽ കരുതിയാണ് സഞ്ചാരം. മേഖലയിൽ നിരവധിപേർ കഴിഞ്ഞ ആറു മാസത്തിനുള്ളിൽ തെരുവ് നായ്ക്കളുടെ ആക്രമണത്തിനിരയായിട്ടുണ്ട്. പുലർച്ചെ ട്യൂഷൻ കേന്ദ്രങ്ങളിലേക്കു പോകുന്ന വിദ്യാർഥികൾക്കൊപ്പം സുരക്ഷയെ കരുതി മാതാപിതാക്കളും പോകേണ്ട സ്ഥിതിയാണ്. ദൂരെ ഇടങ്ങളിൽനിന്നു പിടികൂടുന്ന നായ്ക്കളെ ആണ് കൂട്ടത്തോടെ വാഹനങ്ങളിൽ എത്തിച്ച് പാതയോരത്തു തള്ളുന്നതെന്നും ശക്തമായ നടപടി വേണമെന്നും നാട്ടുകാർ ആവശ്യപ്പെട്ടു.

കുട്ടനാട്ടില്‍ തെരുവുനായ ഭീഷണി

ചമ്പക്കുളം: കുട്ടനാട്ടിലെ മിക്ക പഞ്ചായത്തുകളും തെരുവുനായ ഭീഷണിയില്‍. സ്‌കൂള്‍ പരിസരങ്ങളും പൊതുസ്ഥലങ്ങളും തെരുവുനായകള്‍ കൈയടക്കി. തെരുവുനായ ശല്യത്തില്‍നിന്നു നാട്ടുകാരെ സംരക്ഷിക്കേണ്ട ഭരണകൂടം ഇക്കാര്യത്തില്‍ നിശബ്ദത പാലിക്കുന്നു. സ്‌കൂളില്‍ പോകുന്ന മക്കള്‍ നായകടി ഏല്‍ക്കാതെ തിരിച്ച് എത്തണേയെന്ന പ്രാര്‍ഥനയോടെയാണ് മാതാപിതാക്കള്‍ കാത്തിരിക്കുന്നത്. കുട്ടനാട്ടില്‍ പ്രഭാത നടത്തത്തിന് ഇറങ്ങുന്നവരുടെ എണ്ണം കുറഞ്ഞിരിക്കുന്നു. വൈകുന്നേരങ്ങളിലും പകല്‍സമയം പോലും വഴികളിലൂടെ ഒറ്റയ്ക്ക് നടക്കാന്‍ ആളുകള്‍ ഭയപ്പെടുന്നു. ഇരുചക്രവാഹന യാത്രക്കാരും സൈക്കിള്‍ യാത്രക്കാരും ഭയത്തോടെയാണ് യാത്രക്കിറങ്ങുന്നത്. ഏതു സമയത്തും എവിടെനിന്നും നായയുടെ ആക്രമണം പ്രതീക്ഷിക്കേണ്ട സാഹചര്യമാണിന്ന് കുട്ടനാട്ടിലെ പല പഞ്ചായത്തുകളിലും നിലനില്ക്കുന്നത്. പത്രവിതരണം നടത്തുന്നവര്‍ നായകടി ഭയന്ന് നേരം പുലര്‍ന്ന് കഴിഞ്ഞാണ് പലയിടത്തും പത്രം വിതരണം പോലും നടത്തുന്നത്. പുളിങ്കുന്ന് പഞ്ചായത്തിലെ മങ്കൊമ്പിലും നെടുമുടി പഞ്ചായത്തിലെ തെക്കേമുറിയിലും തെരുവുനായ ആക്രമണം ഉണ്ടായിട്ട് ആഴ്ചകള്‍ മാത്രം. മങ്കൊമ്പില്‍ തെരുവുനായ നിരവധി ആളുകളെ ആക്രമിച്ചപ്പോള്‍. നെടുമുടിയില്‍ തെരുവുനായ ആക്രമിച്ച കച്ചവടക്കാരന്‍റെ ധൈര്യപൂര്‍വമായ സമയോചിത ഇടപെടല്‍ പേവിഷബാധയുണ്ടായിരുന്ന നായയുടെ കടിയില്‍നിന്നും നിരവധി ആളുകളെ രക്ഷിച്ചു. നെടുമുടി പഞ്ചായത്തിലെ എട്ടാം വാര്‍ഡില്‍ റെയാന്‍സ് ഏജന്‍സീസ് എന്ന സ്ഥാപനം നടത്തുന്ന ടിറ്റോ ജോസഫിനാണ് തന്‍റെ സ്ഥാപനത്തിന് മുന്നില്‍വച്ച് നായകടിയേറ്റത്. സ്ത്രീകളും കുട്ടികളും അടക്കം നിരവധി ആളുകള്‍ ഈ സമയം സ്ഥാപനത്തിനു മുന്നിലുണ്ടായിരുന്നു. തന്നെ ആക്രമിച്ച നായയെ സാഹസികമായി പിടികൂടി ബന്ധിച്ച് മൃഗാശുപത്രിയില്‍ പരിശോധന നടത്തിയതില്‍ നായക്ക് പേവിഷബാധ സ്ഥിരികരിക്കുകയും ചെയ്തു. തുടര്‍ന്ന് ചികിത്സ നേടിയ ഇയാള്‍ ഇപ്പോഴും ഇതിന്‍റെ ആഘാതത്തില്‍നിന്നു മുക്തനായിട്ടില്ല. കൂട്ടമായി നടക്കുകയും ആക്രമിക്കുകയും ചെയ്യുന്ന തെരുവുനായ്ക്കളില്‍ ചിലതെങ്കിലും വീടുകളില്‍ വളര്‍ത്തിയിരുന്നതും ഇപ്പോള്‍ തുറന്നുവിട്ടിരിക്കുന്നതുമാണെന്ന് കാണാന്‍ കഴിയും. ഈ തെരുവുനായ്ക്കളുടെ കഴുത്തില്‍ ബെല്‍റ്റുകള്‍ ഇപ്പോഴുമുണ്ട്. ബന്ധപ്പെട്ട തദ്ദേശസ്വയംഭരണസ്ഥാപനങ്ങളുടെ അലംഭാവമാണ് ഇപ്രകാരം തെരുവുനായകളുടെ വര്‍ധനവിനു കാരണം. അടിയന്തര നടപടികള്‍ ബന്ധപ്പെട്ട അധികാരികളുടെ ഭാഗത്തുനിന്ന് ഉണ്ടാവണമെന്നാണ് നാട്ടുകാരുടെ ആവശ്യം.

ചേർത്തലയിൽ ബസ് പാലത്തിലേക്ക് ഇടിച്ചുകയറി; 28 പേര്‍ക്കു പരിക്ക്

ചേര്‍ത്തല: ദേശീയപാതയില്‍ നിര്‍മാണം നടക്കുന്ന കോണ്‍ക്രീറ്റ് പാലത്തിലേക്കു കെഎസ്ആര്‍ടിസി ബസ് ഇടിച്ചു കയറി ബസിലുണ്ടായിരുന്ന 28 പേര്‍ക്കു പരിക്ക്. സാരമായി പരിക്കേറ്റ 10 യാത്രക്കാരെ വിദഗ്ധ ചികിത്സയ്ക്കായി ആലപ്പുഴ വണ്ടാനം മെഡിക്കല്‍ കോളജ് ആശുപത്രിയിലേക്കു മാറ്റി. നട്ടെല്ലിനു പരിക്കേല്‍ക്കുകയും കാലൊടിയുകയും ചെയ്ത ബസ് ഡ്രൈവര്‍ കൊല്ലം നീണ്ടൂര്‍ എടത്തറവീട്ടില്‍ ശ്രീരാജ് സുരേന്ദ്രന്‍ (33), കണ്ടക്ടര്‍ തിരുവനന്തപുരം സുജിനാഭവനില്‍ സുജിത് (38), കൊല്ലം മേച്ചേരി പുത്തന്‍വീട്ടില്‍ ഗോപാലകൃഷ്ണന്‍ (57), ബിഹാര്‍ സ്വദേശി മുഹമ്മദ് ബഷീര്‍ (31), കാലടി ചേരാനല്ലൂര്‍ തൈക്കാത്ത് സിജിബാബു (42), തിരുവനന്തപുരം ആര്യാങ്കാവ് പാറവിള പുത്തന്‍വീട്ടില്‍ അജിത്കുമാര്‍ (52), പാലക്കാട് ഹെഡ് ഓഫീസ് പോസ്റ്റല്‍ ക്വാര്‍ട്ടേഴ്‌സില്‍ അനൂപ് (40), ചേര്‍പ്പുളശേരി തറയില്‍വീട്ടില്‍ അരുണ്‍കുമാര്‍ (36), കോയമ്പത്തൂര്‍ സ്വദേശിനികളായ ഉഷ (32), ശൈലജ (45) എന്നിവരാണ് ആലപ്പുഴ മെഡിക്കല്‍ കോളജില്‍ ചികിത്സയിലുള്ളത്.

നിയന്ത്രണം വിട്ടു കോയമ്പത്തൂരില്‍നിന്നു തിരുവനന്തപുരത്തേക്കു പോകുകയായിരുന്ന കെഎസ്ആര്‍ടിസി സൂപ്പര്‍ ഫാസ്റ്റ് സ്വിഫ്റ്റ് ബസ് ആണ് അപകടത്തില്‍പെട്ടത്. ചൊവ്വാഴ്ച പുലര്‍ച്ചെ അഞ്ചോടെ ദേശീയപാതയില്‍ ചേര്‍ത്തല പോലീസ് സ്റ്റേഷനു വടക്ക് ഹൈവേ പാലത്തിനു സമീപമായിരുന്നു അപകടം. പരിക്കേറ്റവരില്‍ സംസ്ഥാനത്തിന്‍റെ വിവിധ ഭാഗങ്ങളിലുളളവരും ഇതരസംസ്ഥാനക്കാരുമുണ്ട്. ചേര്‍ത്തല റെയില്‍വേ സ്റ്റേഷനില്‍ യാത്രക്കാരെ ഇറക്കി തിരുവനന്തപുരത്തേക്കു പോകുകയായിരുന്ന ബസ് ഹൈവേ പാലത്തിനു സമീപം നിയന്ത്രണം വിട്ട് ദേശീപാതയില്‍ അടിപ്പാലം നിര്‍മിക്കുകയായിരുന്ന ഭാഗത്തേക്ക് ഇടിച്ചുകയറുകയായിരുന്നു. അടിപ്പാതയുടെ രണ്ടാംഘട്ട ഭാഗത്ത് കോണ്‍ക്രീറ്റിംഗിനായി കെട്ടിയ കമ്പികളിലേക്കാണ് ബസ് ഇടിച്ചു കയറിയത്.

നിര്‍മാണം നടക്കുന്നതിനാല്‍ ഇവിടെ വാഹനങ്ങള്‍ തിരിച്ചുവിടാന്‍ താത്ക്കാലിക ക്രമീകരണങ്ങളാണ് ഒരുക്കിയിരുന്നത്. ഇതെല്ലാം തകര്‍ത്താണ് ബസ് ഇടിച്ചുകയറിയത്. ഉറങ്ങിപ്പോയെന്ന് സംശയം ക്രമീകരണങ്ങള്‍ കാണാതെ വാഹനം മുന്നോട്ടു പോയതോടെയാണ് അപകടമുണ്ടായത്. ഇടിയുടെ ആഘാതത്തില്‍ ബസിന്‍റെ മുന്‍ഭാഗം തകര്‍ന്നു. ചേര്‍ത്തലയില്‍നിന്ന് അഗ്നിശമനസേനയെത്തി മുന്‍ഭാഗം പൊളിച്ചാണ് ഡ്രൈവറെയും കണ്ടക്ടറെയും മുന്‍വരിയിലിരുന്നവരെയും പുറത്തെത്തിച്ചത്. ബസില്‍ത്തന്നെ തെറിച്ചുവീണും സീറ്റിലും കമ്പികളിലും തലയിടിച്ചുമാണ് മറ്റുള്ളവര്‍ക്കു പരിക്ക്. ഡ്രൈവര്‍ ഉറങ്ങിപ്പോയതാണെന്നു കരുതുന്നു. അതേസമയം, ബസ് അമിത വേഗത്തിലായിരുന്നെന്നും പറയുന്നുണ്ട്. അശ്രദ്ധമായി വാഹനം ഓടിച്ചതിന് ഡ്രൈവര്‍ക്കെതിരേ ചേര്‍ത്തല പോലീസ് കേസെടുത്തിട്ടുണ്ട്. ദേശീയപാത നിര്‍മാണവുമായി ബന്ധപ്പെട്ടു പാലം പണി നടക്കുന്നതിനാല്‍ ഈ ഭാഗത്തു താല്കാലിക പാത ഒരുക്കിയിട്ടുണ്ട്. ദേശീയപാതയിലൂടെ ഇരു ഭാഗങ്ങളില്‍നിന്നു വരുന്ന വാഹനങ്ങള്‍ തൊട്ടടുത്ത് എത്തുമ്പോഴാണ് റോഡിനു താത്കാലികമായി പാത ഒരുക്കിയ വിവരം മനസിലാകുകയുള്ളൂ. ദേശീയപാതയിലൂടെ ഇങ്ങനെ വേഗത്തില്‍ വരുന്ന വാഹനങ്ങള്‍ സ്ഥിരമായി അപകടത്തില്‍ പെടാറുണ്ടെന്നും നാട്ടുകാര്‍ പറയുന്നു.

ഇനി സിബിഎല്‍ പൂരം ; ചാമ്പ്യന്‍സ് ബോട്ട് ലീഗ് അഞ്ചാം സീസണ്‍ 19 മുതല്‍

ആലപ്പുഴ: സംസ്ഥാന വിനോദ സഞ്ചാരവകുപ്പ് സംഘടിപ്പിക്കുന്ന ചാമ്പ്യന്‍സ് ബോട്ട് ലീഗ് (സിബിഎല്‍) അഞ്ചാം സീസണ്‍ 19 മുതല്‍ നടക്കും. കൈനകരിയിലാണ് ഐപിഎല്‍ ക്രിക്കറ്റ് മാതൃകയിലുള്ള ചുണ്ടന്‍വള്ളങ്ങളുടെ ലീഗ് മത്സരമായ ചാമ്പ്യന്‍സ് ബോട്ട് ലീഗ് ആരംഭിക്കുന്നത്. മൂന്നുമാസം നീളുന്ന 12 മത്സരങ്ങളുള്ള സിബിഎല്‍ ഡിസംബര്‍ ആറിന് കൊല്ലത്തെ പ്രസിഡന്‍റ്സ് ട്രോഫിയോടെ സമാപിക്കും. വിജയികള്‍ക്ക് 5.63 കോടി രൂപ സമ്മാനമായി ലഭിക്കും. ചാമ്പ്യന്‍സ് ബോട്ട് ലീഗ് (സിബിഎല്‍) അഞ്ചാം സീസണിന്‍റെ മൈക്രോസൈറ്റും പ്രൊമോഷണല്‍ വീഡിയോയും മന്ത്രി പി.എ. മുഹമ്മദ് റിയാസ് കഴിഞ്ഞദിവസം പുറത്തിറക്കിയിരുന്നു. തെക്കന്‍ കേരളത്തെ കേന്ദ്രീകരിച്ചാണ് സിബിഎല്‍ മത്സരങ്ങളില്‍ ഭൂരിഭാഗവും. മലബാര്‍ മേഖലയിലും മധ്യകേരളത്തിലും മൂന്ന് മത്സരങ്ങള്‍ വീതം നടക്കും. കോട്ടയം താഴത്തങ്ങാടി, എറണാകുളം ജില്ലയിലെ പിറവം, മറൈന്‍ ഡ്രൈവ്, തൃശൂര്‍ കോട്ടപ്പുറം, ആലപ്പുഴ ജില്ലയിലെ പുളിങ്കുന്ന്, കരുവാറ്റ, പാണ്ടനാട്, കായംകുളം, കൊല്ലം ജില്ലയിലെ കല്ലട എന്നിവിടങ്ങള്‍ക്കൊപ്പം വടക്കന്‍ കേരളത്തില്‍ കാസര്‍ഗോഡ് ചെറുവത്തൂര്‍, കണ്ണൂര്‍ ധര്‍മ്മടം, കോഴിക്കോട് ബേപ്പൂര്‍ എന്നിവിടങ്ങളിലും സിബിഎല്‍ മത്സരങ്ങള്‍ നടത്തുന്നുണ്ട്. കാസര്‍കോട്ട് ആദ്യമായാണ് സിബിഎല്‍ മത്സരങ്ങള്‍ നടക്കുന്നത്. ഇത്തവണത്തെ നെഹ്‌റു ട്രോഫി വള്ളംകളിയില്‍ ആദ്യസ്ഥാനങ്ങളിലെത്തിയ പുന്നമട ബോട്ട് ക്ലബ്, നിരണം ബോട്ട് ക്ലബ്, പള്ളാത്തുരുത്തി ബോട്ട് ക്ലബ്, വില്ലേജ് ബോട്ട് ക്ലബ്, ചങ്ങനാശേരി ബോട്ട് ക്ലബ്, കാരിച്ചാല്‍ ചുണ്ടന്‍ ബോട്ട് ക്ലബ്, ഇമ്മാനുവല്‍ ബോട്ട് ക്ലബ്, ടൗണ്‍ ബോട്ട് ക്ലബ്, തെക്കേക്കര ബോട്ട് ക്ലബ് എന്നീ ക്ലബുകളാണ് സിബിഎല്ലില്‍ മത്സരിക്കുക. ഒന്നാം സ്ഥാനം കരസ്ഥമാക്കുന്ന ക്ലബിന് 25 ലക്ഷവും രണ്ടാം സ്ഥാനം നേടുന്നവര്‍ക്ക് 15 ലക്ഷവും മൂന്നാം സ്ഥാനത്തെത്തുന്ന ക്ലബിന് 10 ലക്ഷംരൂപയും സമ്മാനമായി ലഭിക്കും. ഓരോ മത്സരവേദിയിലും വിജയികളാകുന്നവരില്‍ ഒന്നാം സ്ഥാനക്കാര്‍ക്ക് അഞ്ചുലക്ഷം രൂപയും രണ്ടാം സ്ഥാനക്കാര്‍ക്ക് മൂന്നു ലക്ഷവും മൂന്നാം സ്ഥാനക്കാര്‍ക്ക് ഒരു ലക്ഷം രൂപയും ലഭിക്കും. ബോണസായി ഓരോ ടീമിനും നാലു ലക്ഷം രൂപ വീതവും നീക്കിവച്ചിട്ടുണ്ട്. ചെറുവള്ളങ്ങളുടെ വിഭാഗത്തില്‍ ഒന്നാം സ്ഥാനക്കാര്‍ക്ക് മൂന്നു ലക്ഷം രൂപയും രണ്ടും മൂന്നും സ്ഥാനങ്ങളില്‍ എത്തുന്ന ടീമുകള്‍ക്ക് യഥാക്രമം 1.50 ലക്ഷവും 50,000 രൂപയും വീതം ലഭിക്കും. ഈ വിഭാഗത്തില്‍ ബോണസായി ഓരോ ടീമിനും ഒരു ലക്ഷം രൂപ വീതവും നീക്കിവച്ചിട്ടുണ്ട്. ധര്‍മ്മടം (കണ്ണൂര്‍), താഴത്തങ്ങാടി (കോട്ടയം, സെപ്റ്റംബര്‍ 27), ചെറുവത്തൂര്‍ (കാസര്‍ഗോട്, ഒക്ടോബര്‍ 2), പിറവം (ഒക്ടോബര്‍ 4), മറൈന്‍ ഡ്രൈവ് (എറണാകുളം, ഒക്ടോബര്‍ 11), ബേപ്പൂര്‍ (കോഴിക്കോട് ഒക്ടോബര്‍ 19), കോട്ടപ്പുറം (തൃശൂര്‍, ഒക്ടോബര്‍ 25), പുളിങ്കുന്ന് (നവംബര്‍ 1), കരുവാറ്റ (നവംബര്‍ 8), പാണ്ടനാട് (നവംബര്‍ 15), കായംകുളം (നവംബര്‍ 22, ആലപ്പുഴ), കല്ലട (കൊല്ലം, നവംബര്‍ 29) എന്നിവിടങ്ങളിലാണ് മറ്റു മത്സരള്‍. കഴിഞ്ഞ നാല് സീസണിലും പള്ളാത്തുരുത്തി ബോട്ട് ക്ലബ് തുഴഞ്ഞ വള്ളങ്ങളാണ് വിജയികളായത്. അഞ്ചാം സീസണില്‍ തുഴയ്ക്ക് തീപിടിക്കുന്ന മത്സരങ്ങളാണ് വള്ളംകളി പ്രേമികള്‍ പ്രതീക്ഷിക്കുന്നത്. സിബിഎല്ലിനുള്ള അടിസ്ഥാന സൗകര്യങ്ങളും പ്രചാരണവും ടൂറിസം ഡയറക്ടറേറ്റ് ഒരുക്കും. സിബിഎല്ലിന്‍റെ മികച്ച നടത്തിപ്പിന് സിബിഎല്‍ ലിമിറ്റഡ് രൂപീകരിച്ചിരുന്നു.

മാലിന്യസംസ്കരണത്തില്‍ ചേപ്പാടിന്‍റെ കണ്ടെയ്നര്‍ മാതൃക

ആലപ്പുഴ: മാലിന്യസംസ്കരണം കൂടുതല്‍ പ്രകൃതിസൗഹൃദമാക്കി മാതൃകയാവുകയാണ് ചേപ്പാട് പഞ്ചായത്ത്. മാലിന്യം സംഭരിക്കാനുള്ള പഞ്ചായത്തിലെ മെറ്റീരിയൽ കളക്ഷൻ ഫെസിലിറ്റികള്‍ (എംസിഎഫ്) ഒരുക്കാന്‍ കോണ്‍ക്രീറ്റ് കെട്ടിടങ്ങള്‍ തേടിപ്പോകാതെ പഴയ കണ്ടെയ്നറുകള്‍ കണ്ടെത്തിയാണ് ചേപ്പാട് വേറിട്ട മാതൃക സമ്മാനിച്ചത്. പഴയ രണ്ടു കണ്ടെയ്നറുകളാണ് അജൈവ മാലിന്യങ്ങൾ സംഭരിക്കുന്ന എംസിഎഫ് കേന്ദ്രമാക്കി പഞ്ചായത്ത് മാറ്റിയത്. പ്രതിമാസം 800 കിലോ അജൈവ മാലിന്യം ഇതിലൂടെ സംഭരിക്കുന്നുണ്ട്. 2024-25 വാർഷിക പദ്ധതിയിൽ ഉൾപ്പെടുത്തിയാണ് മാലിന്യ പരിപാലനത്തിനായി കണ്ടെയ്നറുകൾ എത്തിച്ചത്. പഞ്ചായത്തിന്‍റെ തനത് ഫണ്ടും കേന്ദ്ര ധനകാര്യ കമ്മീഷൻ ഗ്രാന്‍റും ചേർത്ത് 6,48,528 രൂപ ഇതിനായി ചെലവഴിച്ചു. കണ്ടെയ്നർ ആർക്കിടെക്ചർ സ്ഥാപനമായ ഇന്‍റഗ്രേറ്റഡ് ലിഫ്റ്റേഴ്സിന്‍റെ പക്കൽനിന്നാണ് കണ്ടെയ്നറുകൾ വാങ്ങിയത്. മൂന്നാം വാർഡിൽ പഞ്ചായത്തിനു സമീപവും പതിനൊന്നാം വാർഡിൽ ദേശീയപാതയ്ക്കു സമീപം കോട്ടംകോയിക്കൽ ജംഗ്ഷനിലുമാണ് ഇവ സ്ഥാപിച്ചിട്ടുള്ളത്. 36.31 ക്യൂബിക് മീറ്റർ കപ്പാസിറ്റിയുള്ള കണ്ടെയ്നറിന് 20 അടി ഉയരമുണ്ട്. 14 വാർഡുകളിലെ എംസിഎഫ് പ്രവർത്തനങ്ങളിലൂടെ 28 ഹരിതകർമസേനാംഗ ങ്ങൾക്കാണ് പഞ്ചായത്തില്‍ തൊഴിൽ നൽകുന്നത്. പ്ലാസ്റ്റിക് ഉത്പന്നങ്ങൾ, പ്ലാസ്റ്റിക് കുപ്പികൾ, ചില്ല് മാലിന്യം തുടങ്ങിയവ ഇവർ സംഭരിക്കും. തുടര്‍ന്ന് ഇവ തരംതിരിച്ച് ക്ലീൻ കേരള കമ്പനിക്കും പ്ലാനറ്റ് എർത്ത് എക്കോ സൊല്യൂഷൻസിനും കൈമാറുകയാണ് ചെയ്യുന്നത്.

മുട്ടം ഹോളി ഫാമിലി ഹൈസ്കൂള്‍ സുവര്‍ണജൂബിലിക്കു തുടക്കം

ചേർത്തല: മുട്ടം ഹോളി ഫാമിലി ഹയർ സെക്കൻഡറി സ്കൂളിലെ ഹൈസ്കൂള്‍ വിഭാഗം സുവർണജൂബിലി ആഘോഷങ്ങൾക്കു തുടക്കമായി. മുൻ ഡിജിപി ഹോർമിസ് തരകൻ ഉദ്ഘാടനം ചെയ്തു. സ്കൂൾ മാനേജർ ഫാ. ജോഷി വേഴപ്പറമ്പിൽ അധ്യക്ഷത വഹിച്ചു. എറണാകുളം-അങ്കമാലി അതിരൂപത വികാരി ജനറാൾ റവ. ഡോ. ആന്‍റോ ചേരാംതുരുത്തി അനുഗ്രഹ പ്രഭാഷണം നടത്തി. ഗാനരചയിതാവ് അജീഷ് ദാസൻ ജൂബിലി ലോഗോ മത്സര വിജയികൾക്ക് സമ്മാനദാനം നിർവഹിച്ചു. നഗരസഭാ ചെയർപേഴ്സൺ ഷേർളി ഭാർഗവൻ, വാർഡ് കൗൺസിലർ മിത്ര വിന്ദാഭായ്, പിടിഎ പ്രസിഡന്‍റ് അഡ്വ. ജാക്സൺ മാത്യു, മുൻ പ്രഥമാധ്യാപകൻ ജോയ് സെബാസ്റ്റ്യൻ, പ്രിൻസിപ്പൽ ലിസ കുര്യൻ, ഹെഡ്മിസ്ട്രസ് എം. മിനി, ജൂബിലി ആഘോഷ കമ്മിറ്റി ജനറൽ കൺവീനർ ബിന്ദു ജോസഫ്, ജോയിന്‍റ് ജനറൽ കൺവീനർ സാജു തോമസ്, ഫിനാൻസ് കമ്മിറ്റി കൺവീനർ വി. ശ്രീഹരി, സ്റ്റാഫ് സെക്രട്ടറി എം.ടി. ജോസഫ് എന്നിവർ പ്രസംഗിച്ചു. ഹൈസ്കൂൾ വിഭാഗം സ്ഥാപിതമായതിന്‍റെ അമ്പതാം വാർഷികത്തോടനുബന്ധിച്ച് ഒരുവർഷം നീളുന്ന വിവിധ പരിപാടികളാണ് ഒരുക്കിയിട്ടുള്ളത്.

ഗ്രാനൈറ്റ് തെന്നി മറിഞ്ഞ് അതിഥിതൊഴിലാളികൾക്കു പരിക്ക്

ചെങ്ങന്നൂർ: കുന്നത്തുമലയിൽ നിർമാണത്തിലിരിക്കുന്ന ശബരിമല ഇടത്താവളത്തിന്‍റെ നിർമാണസ്ഥലത്ത് ഗ്രാനൈറ്റ് വീണ് രണ്ട് അതിഥിത്തൊഴിലാളികൾക്ക് ഗുരുതരമായി പരിക്കേറ്റു. വെസ്റ്റ് ബംഗാൾ സ്വദേശികളായ അലി ഹുസൈൻ (23), റഷീദാർ ഹുസൈൻ (31) എന്നിവർക്കാണ് പരിക്കേറ്റത്. ഇരുവരുടെയും കാലിന് പൊട്ടലുണ്ട്. ഇന്നലെ രാവിലെ, ഇടത്താവളത്തിന്‍റെ നിർമാണ സ്ഥലത്തേക്ക് ഗ്രാനൈറ്റ് ഇറക്കുന്നതിനിടെയാണ് അപകടം. ഗ്രാനൈറ്റ് പാളി തെന്നിമാറി തൊഴിലാളികളുടെ കാലുകളിലേക്ക് വീഴുകയായിരുന്നു. ഉടൻതന്നെ സ്ഥലത്തുണ്ടായിരുന്ന മറ്റുള്ളവർ രക്ഷാപ്രവർത്തനം ആരംഭിച്ചു. വിവരമറിഞ്ഞ് സ്ഥലത്തെത്തിയ ചെങ്ങന്നൂർ ഫയർ ഫോഴ്‌സ് സംഘം പരിക്കേറ്റവരെ ചെങ്ങന്നൂർ ജില്ലാ ആശുപത്രിയിൽ പ്രവേശിപ്പിച്ചു.

വളവനാട് ആരോഗ്യകേന്ദ്രം സ്ഥാപിക്കാൻ നടപടിയെടുക്കും: പി.പി. ചിത്തരഞ്ജൻ എംഎൽഎ

മുഹമ്മ: വളവനാട് ബോധി റസിഡന്‍റ്സ് അസോസിയേഷന്‍റെ നേതൃത്വത്തിൽ വിദ്യാഭ്യാസ അവാർഡ് ദാന സമ്മേളനം നടന്നു. പി.പി. ചിത്തരഞ്ജൻ എംഎൽ എ സമ്മേളനം ഉദ്ഘാടനം ചെയ്തു. വളവനാട് മേഖലയിൽ ആരോഗ്യകേന്ദ്രം സ്ഥാപിക്കുന്നതിനും മേഖലയിലെ വെള്ളക്കെട്ട് ഒഴിവാക്കുന്നതിനും നടപടി സ്വീകരിക്കുമെന്നു ചിത്തരഞ്ജൻ പറഞ്ഞു. വിദ്യാഭ്യാസ മേഖലയിൽ ഉന്നതവിജയം നേടിയ വിദ്യാർഥികളെ കാഷ് അവാർഡും ഉപഹാരവും നൽകി എംഎൽഎ ആദരിച്ചു. കലാ-കായിക മത്സരങ്ങളിലെ വിജയികൾക്കുള്ള കാഷ് അവാർഡുകളും ട്രോഫികളും വളവനാട് ദേവസ്വം പ്രസിഡന്‍റ് ബിൻസ് വിതരണം ചെയ്തു. രക്ഷാധികാരി എൻ. വേണുഗോപാൽ അധ്യക്ഷത വഹിച്ചു. അസോസിയേഷൻ സെക്രട്ടറി എം. മധു, സി.സി. കൈലാസൻ, എൻ. ഓമനക്കുട്ടൻ, ടി. സുനിൽ, പി. സുരേഷ്, കെ.എൻ. സജിമോൻ എന്നിവർ പ്രസംഗിച്ചു.

വൈറോളജി ഇൻസ്റ്റിറ്റ്യൂട്ട് ലബോറട്ടറി; അന്തിമാനുമതി നൽകണമെന്ന് കെ.സി. വേണുഗോപാൽ എംപി

ആലപ്പുഴ: വൈറോളജി ഇന്‍സ്റ്റിറ്റ്യൂട്ടില്‍ പുതുതായി നിര്‍മിച്ച ബയോസേഫ്റ്റി ലെവല്‍-3 ലബോറട്ടറിയുടെ സര്‍ട്ടിഫിക്കേഷന്‍ നടപടികള്‍ക്ക് അന്തിമാനുമതി നല്‍കണമെന്ന് ആവശ്യപ്പെട്ട് കെ.സി. വേണുഗോപാല്‍ എംപി കേന്ദ്ര ആരോഗ്യമന്ത്രി ജെ.പി. നദ്ദയ്ക്ക് കത്തു നല്‍കി. അമീബിക് മസ്തിഷ്‌ക ജ്വരം പടര്‍ന്നുപിടിക്കുന്ന ഗുരുതരമായ സാഹചര്യമാണ് സംസ്ഥാനത്തുള്ളത്. ഇവ ഉള്‍പ്പെടെയുള്ള ജലജന്യരോഗങ്ങളുടെ നിര്‍ണയങ്ങള്‍ക്ക് അത്യാധുനിക സംവിധാനങ്ങളോടെ സജ്ജീകരിച്ചിരിക്കുന്നതാണ് വൈറോളജി ഇന്‍സ്റ്റിറ്റ്യൂട്ട്. ഇതിനുപരിയായി നിപ്പാ വൈറസ്, പക്ഷിപ്പനി, കുരങ്ങ് പനി തുടങ്ങിയ ഗുരുതരരോഗങ്ങളുടെ പരിശോധനയും രോഗനിര്‍ണയവും നടത്താനുള്ള സൗകര്യവും ഇവിടെ ക്രമീകരിച്ചിട്ടുണ്ട്. അതിനാല്‍ അടിയന്തര സാഹചര്യം കണക്കിലെടുത്ത് വൈറോളജി ഇന്‍സ്റ്റിറ്റ്യൂട്ടിന്‍റെ പ്രവര്‍ത്തനം പൂര്‍ണതോതില്‍ പ്രവര്‍ത്തിപ്പിക്കുന്നതിന് നടപടി സ്വീകരിക്കണമെന്നും വേണുഗോപാല്‍ കത്തില്‍ ആവശ്യപ്പെട്ടു.

സ്വാമി വിവേകാനന്ദൻ യുവപ്രതിഭാ പുരസ്കാരം: 23 വരെ അപേക്ഷിക്കാം

ആലപ്പുഴ: സ്വാമി വിവേകാനന്ദന്‍ യുവ പ്രതിഭാ പുരസ്‌കാരത്തിന് നോമിനേഷന്‍ സമര്‍പ്പിക്കുന്നതിനും മികച്ച യുവജന ക്ലബ്ബുകള്‍ക്കുള്ള അവാര്‍ഡിന് അപേക്ഷിക്കുന്നതിനും 23 വരെ സമയം നീട്ടി. യുവപ്രതിഭാ പുരസ്കാരത്തിന് നിശ്ചിതഫോറത്തിൽ നോമിനേഷൻ സമർപ്പിക്കാം. വ്യക്തിഗത പുരസ്കാരത്തിനായി അതത് മേഖകളിലെ 18 നും 40-നും മധ്യേയുള്ള യുവജനങ്ങളെയാണ് നോമിനേറ്റ് ചെയ്യേണ്ടത്. സാമൂഹ്യപ്രവർത്തനം, മാധ്യമപ്രവർത്തനം (പ്രിന്‍റ് മീഡിയ), മാധ്യമ പ്രവർത്തനം (ദ്യശ്യമാധ്യമം), കല, സാഹിത്യം, കായികം (വനിത), കായികം (പുരുഷൻ), സംരംഭകത്വം, കൃഷി എന്നീ മേഖലകളിൽനിന്നു മികച്ച ഓരോ വ്യക്തിക്കുവീതം ആകെ ഒമ്പതു പേർക്കാണ് പുരസ്കാരങ്ങൾ നൽകുന്നത്. പുരസ്കാരത്തിനായി സ്വയം അപേക്ഷ സമർപ്പിക്കാൻ കഴിയില്ല. അതത് മേഖലകളുമായി ബന്ധപ്പെട്ട ഏതൊരാൾക്കും മറ്റൊരാളെ നോമിനേറ്റ് ചെയ്യാവുന്നതാണ്. പുരസ്കാരത്തിന് അർഹരാകുന്നവർക്ക് 50,000 രൂപയും പ്രശസ്തി പത്രവും നൽകും. കൂടാതെ കേരള സംസ്ഥാന യുവജനക്ഷേമ ബോർഡിൽ അഫിലിയേറ്റ് ചെയ്തിട്ടുള്ള യൂത്ത്, യുവ, അവളിടം ക്ലബ്ബുകൾക്കും അവാർഡിനായി അപേക്ഷിക്കാം. ജില്ലാതലത്തിൽ തെരഞ്ഞെടുത്ത മികച്ച ക്ലബ്ബിന് 30,000 രൂപയും പ്രശസ്തി പത്രവും പുരസ്കാരവും നൽകും. ജില്ലാതലത്തിൽ അവാർഡിന് അർഹത നേടിയ ക്ലബ്ബുകളെയാണ് സംസ്ഥാനതലത്തിൽ പരിഗണിക്കുന്നത്. സംസ്ഥാന അവാർഡ് നേടുന്ന ക്ലബ്ബിന് 50,000 രൂപയും പ്രശസ്തി പത്രവും പുരസ്കാരവും നൽകും. മാര്‍ഗനിര്‍ദേശങ്ങളും അപേക്ഷാ ഫോറവും കേരള സംസ്ഥാന യുവജനക്ഷേമ ബോര്‍ഡിന്‍റെ www.ksywb.kerala.gov.in എന്ന വെബ്‌സൈറ്റില്‍ ലഭ്യമാണ്. അപേക്ഷ സമര്‍പ്പിക്കാനുള്ള മേല്‍വിലാസം- ജില്ലാ യൂത്ത് പ്രോഗ്രാം ഓഫീസര്‍, ജില്ലാ യുവജനകേന്ദ്രം, മിനി സിവില്‍ സ്റ്റേഷന്‍, തത്തംപള്ളി പി.ഒ, ആലപ്പുഴ-13 ഫോണ്‍ 9847133866. 0477- 2239736.

അനുയോജ്യ സ്ഥലമായില്ല; നൂറനാട് കേന്ദ്രീയ വിദ്യാലയം നഷ്ടപ്പെടുമോ?

ചാരുംമൂട്: അനുയോജ്യമായ സ്ഥലം കിട്ടാത്തതു മൂലം നൂറനാട് ഐടിബിപി ബറ്റാലിയനോടു ചേർന്നു കേന്ദ്ര സർക്കാർ അനുവദിച്ച കേന്ദ്രീയ വിദ്യാലയം നഷ്ടപ്പെടുമെന്ന് ആശങ്ക. സംസ്ഥാന സർക്കാർ അധികം സ്ഥലം അനുവദിച്ചെങ്കിലും ഇത് അനുയോജ്യമല്ലെന്നു മുമ്പ് കണ്ടെത്തിയിരുന്നു. കേന്ദ്രീയ വിദ്യാലയം സ്ഥാപിക്കാൻ ആകെ അഞ്ചേക്കർ ഭൂമിയാണ് വേണ്ടത്. നിലവിൽ 3.27 ഏക്കർ ഭൂമി ക്യാമ്പ് അനുബന്ധ സൗകര്യങ്ങളായി ലഭ്യമാണ്. കേന്ദ്രീയ വിദ്യാലയം സ്ഥാപിക്കാൻ അധികമായി 1.73 ഏക്കർ ഭൂമികൂടിയാണ് ആവശ്യമുള്ളത്. വെറുതെ കിടന്നിട്ടും നൂറനാട് ലെപ്രസി സാനിട്ടോറിയത്തിൽ ആവശ്യത്തിലധികം ഭൂമി വെറുതെ കിടക്കുന്നുണ്ടെന്നും ഇതു കേന്ദ്രീയ വിദ്യാലയത്തിനു വിട്ടുനൽകണമെന്നും ആവശ്യപ്പെട്ടു കൊടിക്കുന്നിൽ സുരേഷ് എംപി മുഖ്യമന്ത്രിക്കു കത്ത് നൽകിയെങ്കിലും ഫലം കണ്ടില്ല. അഞ്ച് ഏക്കർ ഭൂമിയുടെ കൈവശരേഖ കേന്ദ്ര സർക്കാരിനു നൽകിയാൽ കേന്ദ്രീയ വിദ്യാലയം സ്ഥാപിക്കപ്പെടും. നിലവിൽ ആലപ്പുഴ ജില്ലയിൽ ചെന്നിത്തലയിലും പത്തനംതിട്ട ജില്ലയിലെ അടൂരുമാണ് കേന്ദ്രീയ വിദ്യാലയം ഉള്ളത്. സർക്കാർ പറയുന്ന സ്ഥലം സംസ്ഥാന സർക്കാർ നിലവിൽ അനുവദിച്ചിരിക്കുന്ന അധിക ഭൂമി അനുയോജ്യമല്ലാത്തതിനാൽ സാനിറ്റോറിയം വളപ്പിൽത്തന്നെ അനുയോജ്യമായ മറ്റൊരു സ്ഥലം അനുവദിക്കണമെന്ന് സംസ്ഥാന സർക്കാരിനോട് ആവശ്യപ്പെട്ടു കൊടിക്കുന്നിൽ സുരേഷ് എംപിയുടെ നേതൃത്വത്തിൽ ജനപ്രതിനിധികളെ പങ്കെടുപ്പിച്ചു ജനസഭയും സംഘടിപ്പിച്ചിരുന്നു. സംസ്ഥാന സർക്കാർ ഐടിബിപി ക്യാമ്പിൽനിന്ന് 1.5 കിലോമീറ്റർ അകലെ റവന്യൂ പുറമ്പോക്കിൽ 1.73 ഏക്കർ ഭൂമി നൽകാമെന്നാണ് അറിയിച്ചത്. എന്നാൽ, കേന്ദ്ര പിഡബ്ല്യുഡി മാനദണ്ഡങ്ങൾ പ്രകാരം ഈ സ്ഥലം അനുയോജ്യമല്ലെന്നു സ്ഥലം പരിശോധിച്ച കേന്ദ്ര സംഘം റിപ്പോർട്ട് നൽകിയിരുന്നു. അനുയോജ്യമായ സ്ഥലം ഹരിപ്പാടാണെന്ന് ചെന്നിത്തല സുരേഷ് ഗോപിക്ക് കത്തുനൽകി ഹരിപ്പാട്: എംയിംസിന് അനുയോജ്യമായ സ്ഥലം ഹരിപ്പാടാണെന്ന് രമേശ് ചെന്നിത്തല. ഇതു സംബന്ധിച്ച് അദ്ദേഹം കേന്ദ്രമന്ത്രി സുരേഷ് ഗോപിക്കു കത്തു നൽകി. എയിംസ് തുടങ്ങാൻ അനുയോജ്യമായ സ്ഥലം കേരളത്തിൽ ആലപ്പുഴ ജില്ലയാണെന്നും സ്ഥലം ലഭിക്കുകയാണെങ്കിൽ ആലപ്പുഴ ജില്ലയിൽ എയിംസ് തുടങ്ങുമെന്നുള്ള കേന്ദ്രമന്ത്രി സുരേഷ് ഗോപിയുടെ പ്രസ്താവന ശ്രദ്ധയിൽപ്പെട്ടതിനെത്തുടർന്നാണ് രമേശ് ചെന്നിത്തല കത്ത് നൽകിയത്. ഹരിപ്പാട് മണ്ഡലത്തിൽ കഴിഞ്ഞ യുഡിഎഫ് സർക്കാരിന്‍റെ കാലത്ത്, സിയാൽ മാതൃകയിൽ ഒരു മെഡിക്കൽ കോളജ് സ്ഥാപിക്കാൻ, ഏകദേശം 25 ഏക്കർ സ്ഥലം കരുവാറ്റ പഞ്ചായത്തിൽ, ദേശീയപാതയോടു ചേർന്നു റവന്യൂവകുപ്പ് ഏറ്റെടുത്തിരുന്നു. നയപരമായ കാര്യങ്ങളെത്തുടർന്ന് ഹരിപ്പാട് മെഡിക്കൽ കോളജിന്‍റെ പദ്ധതി ഉപേക്ഷിക്കപ്പെട്ടതിനാൽ ഈ സ്ഥലം വെറുതെ കിടക്കുകയാണ്. ഈ സ്ഥലം എയിംസിന് എന്തുകൊണ്ടും അനുയോജ്യമാണ്. എല്ലാ പിന്തുണയും സഹകരണവും വാഗ്ദാനം ചെയ്യുന്നുവെന്നും രമേശ് ചെന്നിത്തല കേന്ദ്രമന്ത്രി സുരേഷ് ഗോപിക്ക് അയച്ച കത്തിൽ ചൂണ്ടിക്കാട്ടി. എയിംസ് മാവേലിക്കരയിൽ സ്ഥാപിക്കണം: കൊടിക്കുന്നിൽ ചാരുംമൂട്: കേരളത്തിൽ ഒാൾ ഇന്ത്യ മെഡിക്കൽ ഇൻസ്റ്റിറ്റ്യൂട്ട് ആലപ്പുഴയിൽ സ്ഥാപിക്കണമെന്നുള്ള കേന്ദ്ര ടൂറിസം സഹമന്ത്രി സുരേഷ് ഗോപിയുടെ ആവർത്തിച്ചുള്ള പ്രതികരണങ്ങളിൽ ആത്മാർഥതയുണ്ടെങ്കിൽ എയിംസ് ജില്ലയിലെ മാവേലിക്കരയിൽ സ്ഥാപിക്കാൻ കേന്ദ്രസർക്കാർ തയാറാകണമെന്നു കൊടിക്കുന്നിൽ സുരേഷ് എംപി. കേരളത്തിനു പുതുതായി എയിംസ് അനുവദിക്കണമെന്നുള്ളത് നാളുകളായുള്ള ആവശ്യമാണ്. നേരത്തെ കേന്ദ്രസർക്കാർ പുതുതായി 22 എയിംസുകൾക്ക് അംഗീകാരം നൽകിയിരുന്നുവെങ്കിലും അപ്പോഴും കേന്ദ്രം കേരളത്തെ തഴഞ്ഞു. കേരളത്തിലെ എംപിമാർ ഈ വിഷയത്തിൽ തുടർച്ചയായി പ്രധാനമന്ത്രിക്കും കേന്ദ്ര ആരോഗ്യമന്ത്രിക്കും നിവേദനങ്ങൾ നൽകിയിരുന്നെങ്കിലും യാതൊരു പരിഗണനയും ലഭിച്ചില്ലെന്നും കൊടിക്കുന്നിൽ പറഞ്ഞു. നേരത്തെ ഇ എസ് ഐ കോർപറേഷന്‍റെ മെഡിക്കൽ കോളജിനായി നിർദേശിച്ചിരുന്ന തഴക്കര ജില്ലാ കൃഷി ഫാം അന്നത്തെ ജില്ലാ പഞ്ചായത്ത് പ്രസിഡന്‍റായ ഇപ്പോഴത്തെ കായംകുളം എംഎൽഎ യു പ്രതിഭയുടെ നിഷേധാത്മക നിലപാട് മൂലം നഷ്ടപ്പെട്ടതായും എയിംസിന്‍റെ കാര്യത്തിൽ ഇത്തരമൊരു അവസ്ഥ ഉണ്ടാകാതിരിക്കാൻ എല്ലാവരും ഒറ്റക്കെട്ടായി അണിനിരക്കണമെന്നും കൊടിക്കുന്നിൽ പറഞ്ഞു.

കാമുകിയുടെ കൂട്ടുകാരിയെ പീഡിപ്പിച്ച യുവാവിനെ പോലീസ് കസ്റ്റഡിയില്‍ വാങ്ങി

ചേര്‍ത്തല: പ്രായപൂര്‍ത്തിയാകാത്ത വിദ്യാര്‍ഥിനിയെ വസ്ത്രം വാങ്ങിനല്‍കാമെന്ന് പ്രലോഭിപ്പിച്ച് വൈക്കത്തെത്തിച്ചു പീഡിപ്പിച്ച യുവാവിനെ ചേര്‍ത്തല പോലീസ് കസ്റ്റഡിയില്‍ വാങ്ങി തെളിവെടുത്തു. പിറവം മുളക്കുളം നോര്‍ത്ത് പാറേക്കാട്ട് കുഴയില്‍ എല്‍ജോ ജോയി(24)യെയാണ് കസ്റ്റഡിയില്‍ വാങ്ങിയത്. കഴിഞ്ഞയാഴ്ചയാണ് ഇയാളെ ചേര്‍ത്തല പോലീസ് പോക്‌സോ പ്രകാരം അറസ്റ്റ് ചെയ്ത് റിമാന്‍ഡിലാക്കിയത്. എറണാകുളത്ത് ഹോട്ടല്‍ മാനേജ്‌മെന്‍റ് വിദ്യാര്‍ഥിയായ എല്‍ജോജോയ് തന്‍റെ കാമുകിയുടെ കൂട്ടുകാരിയായ പ്ലസ് വണ്‍ വിദ്യാര്‍ഥിനിയെയാണ് തന്ത്രപൂര്‍വം വൈക്കത്ത് പാര്‍ക്കിനോടു ചേര്‍ന്ന കുറ്റിക്കാട്ടിലെത്തിച്ചു പീഡിപ്പിച്ചത്. വിദ്യാര്‍ഥിയുടെ പരാതിയിലായിരുന്നു ഇയാള്‍ക്കെതിരേ കേസെടുത്തത്. കസ്റ്റഡിയില്‍ വാങ്ങിയ പ്രതിയുമായി ചേര്‍ത്തല പോലീസ് വൈക്കത്ത് തെളിവെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]