ADVERTISEMENT

ADVERTISEMENT

ആശാ വർക്കർമാരുടെ സമരം ഒത്തുതീർപ്പാക്കണം: എംപി

താമരശേരി: ഒരു മാസക്കാലമായി സെക്രട്ടേറിയറ്റ് പടിക്കൽ രാപകൽ സമരം നടത്തുന്ന ആശാ വർക്കർമാരുടെ ന്യായമായ ആവശ്യങ്ങൾ അംഗീകരിക്കണമെന്നും കേരളത്തെ ലഹരി മാഫിയകളുടെ കരാളഹസ്തങ്ങളിൽ നിന്ന് യുവതലമുറയെ രക്ഷപ്പെടുത്താൻ നടപടിയുണ്ടാവണമെന്നും എം.കെ.രാഘവൻ എംപി ആവശ്യപ്പെട്ടു.

താമരശേരി ബ്ലോക്ക് കോൺഗ്രസ് കമ്മറ്റി സംഘടിപ്പിച്ച പ്രതിഷേധ ധർണ്ണ ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക് കോൺഗ്രസ് പ്രസിഡന്‍റ് പി.ഗിരീഷ് കുമാർ അധ്യക്ഷത വഹിച്ചു. കെപിസി സി മെമ്പർമാരായ പി.സി.ഹബീബ് തമ്പി, എ. അരവിന്ദൻ , സി.ടി.ഭരതൻ,

എം.സി.നാസിമുദ്ദീൻ, ഒ.എം ശ്രീനിവാസൻ, നവാസ് ഈർപ്പോണ, ടി ആർ.ഒ.കുട്ടൻ, അഡ്വ.ജോസഫ് മാത്യു , പി.കെ.ഗംഗാധരൻ, പ്രേംജി ജയിംസ്, കെ.സരസ്വതി, അഗസ്ത്യൻ ജോസഫ്, വി.ആർ. കാവ്യ തുടങ്ങിയവർ പ്രസംഗിച്ചു..

ADVERTISEMENT

നവീകരിച്ച റോഡ് ഉദ്ഘാടനം ചെയ്തു

മുക്കം: നിരവധി കുടുംബങ്ങൾക്ക് ആശ്വാസമായ റോഡ് നവീകരിച്ച് നാട്ടുകാർക്കായി തുറന്ന് കൊടുത്തു. കൊടിയത്തൂർ പഞ്ചായത്തിലെ പതിമൂന്ന്, പതിനാറ് വാർഡുകളിൽപെട്ട സൗത്ത് കൊടിയത്തൂർ -വെസ്റ്റ് കൊടിയത്തൂർ റോഡാണ് നവീകരിച്ചത്. വെള്ളക്കെട്ട് ഉൾപ്പെടെ ഉണ്ടാവാൻ സാധ്യതയുള്ള സ്ഥലങ്ങളിൽ കോൺക്രീറ്റും ബാക്കി ഭാഗത്ത് ടാറിംഗ് പ്രവൃത്തിയും പൂർത്തിയാക്കുകയായിരുന്നു. ഈ ഭാഗത്തുള്ളവർക്ക് കൂളിമാട് ഭാഗത്തേക്ക് ഉൾപ്പെടെ എളുപ്പത്തിൽ എത്തിച്ചേരാൻ കഴിയുന്ന റോഡ് കൂടിയാണിത്. കഴിഞ്ഞ മഴക്കാലത്ത് റോഡ് പൂർണമായും തകർന്നതോടെ പഞ്ചായത്ത് ഫണ്ട് അനുവദിക്കുകയായിരുന്നു. റോഡിന്‍റെ ഉദ്ഘാടനം പഞ്ചായത്ത് പ്രസിഡന്‍റ് ദിവ്യ ഷിബു നിർവഹിച്ചു. വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു. ബാബു പൊലുകുന്ന്, അയിഷ ചേലപ്പുറത്ത്, വാർഡ് വികസന സമിതി അംഗങ്ങൾ, നാട്ടുകാർ സംബന്ധിച്ചു.

ഒമ്പത് വര്‍ഷത്തിനിടെ നിയമനം ലഭിച്ചത് 7,178 പേര്‍ക്ക്

കോഴിക്കോട്: പഠിച്ചിറങ്ങിയിട്ടും ജോലിയില്ലെന്ന ആവലാതി ഇനി വേണ്ട, ജില്ലയിലെ വിവിധ സ്ഥാപനങ്ങളില്‍ യോഗ്യക്കനുസരിച്ച ജോലി ലഭിക്കാന്‍ ജില്ലാ എംപ്ലോയ്‌മെന്‍റ് എക്‌സ്‌ചേഞ്ച് സഹായിക്കും. 7,178 പേര്‍ക്കാണ് ഒമ്പത് വര്‍ഷത്തിനിടെ ജില്ലാ എംപ്ലോയ്‌മെന്റ് എക്‌സ്‌ചേഞ്ച് മുഖേന നിയമനം ലഭിച്ചത്. വിവിധ യോഗ്യതയുള്ള 10,715 പുരുഷന്മാരും 18,718 സ്ത്രീകളും ഉള്‍പ്പെടെ 29,433 ഉദ്യോഗാര്‍ഥികളാണ് എംപ്ലോയ്‌മെന്റില്‍ പേര് രജിസ്റ്റര്‍ ചെയ്തത്. വിവിധ ജോബ് ഫെസ്റ്റുകളിലായി 12,873 പേര്‍ക്ക് സ്വകാര്യ മേഖലയിലും ജോലി ലഭിച്ചു. സിവില്‍ സ്റ്റേഷനില്‍ പ്രവര്‍ത്തിച്ച് വരുന്ന ജില്ലാ എംപ്ലോയ്‌മെന്റ് എക്‌സ്‌ചേഞ്ചില്‍ വൊക്കേഷണല്‍ ഗൈഡന്‍സ്, എംപ്ലോയ്‌മെന്റ് മാര്‍ക്കറ്റ് ഇന്‍ഫര്‍മേഷന്‍, സെല്‍ഫ് എംപ്ലോയ്‌മെന്‍റ് എന്നീ യൂണിറ്റുകളും പ്രവര്‍ത്തിച്ചുവരുന്നു. തൊഴില്‍രഹിതരായ ഉദ്യോഗാര്‍ഥികള്‍ക്ക് സ്വയംതൊഴില്‍ യൂണിറ്റ് വഴി സ്വയംതൊഴില്‍ തുടങ്ങാന്‍ ധനസഹായവും നല്‍കുന്നുണ്ട്.

നിക്ഷേപം പൂർണമായും തിരികെ നൽകിയില്ല: മാനേജർ ഹാജരാകണമെന്ന് മനുഷ്യാവകാശ കമ്മീഷൻ

കോഴിക്കോട് : മുതിർന്ന പൗരൻ 2015 മുതൽ നിക്ഷേപിച്ച തുക പൂർണമായും തിരികെ നൽകാത്ത ഇന്ത്യൻ ബാങ്ക് മാനേജരെ വിളിച്ചു വരുത്താൻ മനുഷ്യാവകാശ കമ്മീഷൻ തീരുമാനിച്ചു. മേയ് 20 ന് രാവിലെ 11 ന് കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ നേരിട്ട് ഹാജരാകാനാണ് ജുഡീഷ്യൽ അംഗം കെ. ബൈജുനാഥ് എൽഐസി. ബിൽഡിംഗിൽ പ്രവർത്തിക്കുന്ന ഇന്ത്യൻ ബാങ്ക് മാനേജർക്ക് നിർദ്ദേശം നൽകിയത്.ഉമ്മർ ഫാറൂഖ് (77) സമർപ്പിച്ച പരാതിയിലാണ് നടപടി. 2015 മുതൽ 2025 വരെയാണ് അദ്ദേഹം നിക്ഷേപം നടത്തിയത്. നിക്ഷേപതുക മടക്കി നൽകിയെങ്കിലും അതിൽ നിന്നും 73,239 രൂപ കുറച്ചു നൽകിയെന്നാണ് പരാതി.

കിളികുടുക്കി തീർഥാടന കുരിശുപള്ളിയിൽ പുതുഞായർ ആചരണം

കൂരാച്ചുണ്ട്: കല്ലാനോട് സെന്‍റ് മേരീസ് ഇടവകയുടെ കീഴിലുള്ള കിളികുടുക്കി സെന്‍റ് തോമസ് തീർഥാടന കുരിശുപള്ളിയിൽ പുതുഞായർ ആചരണവും കുരിശുമല കയറ്റത്തിനും കൊടിയേറി. ഇടവക വികാരി ഫാ. ജോസഫ് ചുണ്ടയിൽ കൊടിയേറ്റി. ഇന്ന് വൈകിട്ട് അഞ്ചിന് ആഘോഷമായ വിശുദ്ധ കുർബാന ഫാ. മൈക്കിൾ നീലംപറമ്പിൽ കാർമികത്വം വഹിക്കും. തുടർന്ന് ഏഴിന് ലദീഞ്ഞ്, പ്രദക്ഷിണം. സമാപന ദിവസമായ നാളെ രാവിലെ ആറിന് കിളികുടുക്കി കുരിശുമല കയറ്റം, ഏഴിന് വിശുദ്ധ കുർബാന (കിളികുടുക്കി കുരിശുമലയിൽ) 9.30 ന് ആഘോഷമായ വിശുദ്ധ കുർബാന, സന്ദേശം ഫാ. അമൽ പുരയിടത്തിൽ കാർമികത്വം വഹിക്കും.11 ന് ലദീഞ്ഞ്, പ്രദക്ഷിണം, സമാപന ആശീർവാദം, നേർച്ചഭക്ഷണം, വാദ്യമേളം, രണ്ടിന് കുരിശുമല ഇറക്കം.

മണ്ണൊലിച്ച് വാരിക്കുഴി; യാത്രക്കാരെ വലച്ച് പുലാപ്രപ്പടി റോഡ്

രാമനാട്ടുകര: പാറമ്മൽ റോഡിൽ നിന്നു ദേശീയപാത സർവീസ് റോഡിലേക്കുള്ള പുലാപ്രപ്പടി റോഡിന്‍റെ പ്രവേശന മാർഗം ടാറിംഗ് നടത്താത്തത് യാത്രക്കാരെ വലയ്ക്കുന്നു. മഴയിൽ മണ്ണൊലിച്ചു വാരിക്കുഴി രൂപപ്പെട്ടതോടെ വാഹനങ്ങളുമായി സർവീസ് റോഡിലേക്ക് കയറാൻ പറ്റാത്ത സ്ഥിതി. പ്രദേശവാസികൾ ഏറെദൂരം ചുറ്റി പാറമ്മൽ അങ്ങാടിയിലോ മൈത്രി നഗർ റോഡിലോ പോയി വേണം സർവീസ് റോഡിലേക്ക് കയറാൻ. ആറുവരിപ്പാത നിർമാണം തുടങ്ങിയ ഘട്ടത്തിൽ തന്നെ പുലാപ്രപ്പടി റോഡിൽ നിന്നു ദേശീയപാത സർവീസ് റോഡിലേക്കുള്ള വഴി അടച്ചിരുന്നു. ആറുവരിപ്പാതയുടെ പ്രവൃത്തി പൂർത്തിയായിട്ടു മാസങ്ങളായെങ്കിലും സർവീസ് റോഡിലേക്ക് കയറാനുള്ള പ്രവേശന ഭാഗം ഇതുവരെ ഗതാഗത യോഗ്യമാക്കിയിട്ടില്ല. ഒരു വർഷം മുൻപ് നാട്ടുകാർ പരാതി ഉന്നയിച്ചപ്‌പോൾ കുറച്ചു മണ്ണിട്ട് നികത്തി താൽക്കാലിക വഴി ഒരുക്കിയിരുന്നു. മഴ പെയ്തപ്പോൾ മണ്ണൊലിച്ചു ഇതുവഴി സഞ്ചരിക്കാൻ പറ്റാത്ത അവസ്ഥയായി. ഫാറൂഖ് കോളജ് റോഡ്, ചിറക്കാംകുന്ന്, പാറമ്മൽ, നെല്ലിക്കോട്ട് കാവ് എന്നിവിടങ്ങളിൽ നിന്നു സേവാമന്ദിരം സ്കൂൾ, പരിഹാരപുരം ക്ഷേത്രം, ബൈപാസ് ജംക്‌ഷൻ എന്നിവിടങ്ങളിലേക്ക് എളുപ്പത്തിൽ എത്താവുന്ന റോഡാണിത്.

സ്വകാര്യഭൂമി കാടു മൂടി: പ്രദേശവാസികൾ ദുരിതത്തിലെന്ന് പരാതി

കൂരാച്ചുണ്ട്: സ്വകാര്യ ഭൂമിയിൽ കാടുമുടിയതിനെത്തുടർന്ന് പ്രദേശവാസികൾക്ക് ദുരിതമാകുന്നതായി പരാതി. കൂരാച്ചുണ്ട് പഞ്ചായത്ത് എട്ടാം വാർഡിൽ ഉൾപ്പെട്ട ചാലിടം- മണ്ണുപൊയിൽ റോഡിന് സമീപം അൾത്താമസമില്ലാത്ത സ്വകാര്യഭൂമിയിലാണ് കാലങ്ങളായി കാടുമൂടി കിടക്കുന്നത്. ഇതുമൂലം വന്യമൃഗങ്ങളും ഇഴജന്തുക്കളും നാട്ടുകാർക്ക് ഭീഷണിയായി തീരുന്നുവെന്നും പരാതിയുണ്ട്. മഴക്കാലമായതോടെ കൊതുകു ശല്യവും പെരുകുന്നതിന് കാരണമാകുന്നുവെന്നും ഇത് പൊതുജനാരോഗ്യത്തിന് ഭീഷണിയെന്നും പറയുന്നു. ഇതു സംബന്ധിച്ച് പ്രദേശവാസികൾ പഞ്ചായത്തിന് പരാതി നൽകി. എന്നാൽ നടപടികളൊന്നും സ്വീകരിച്ചില്ലെന്നാണ് ആക്ഷേപം. മഴക്കാല രോഗപ്രതിരോധ പ്രവർത്തനങ്ങൾ ആരോഗ്യ വകുപ്പ് നടപ്പാക്കിവരുന്നുണ്ട്. അടിയന്തരമായി ഇതിന് നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.

വിലങ്ങാട് പാലൂരിൽ കാട്ടാന ഭീതി: വനം വകുപ്പ് പരിശോധന നടത്തി

നാദാപുരം: വിലങ്ങാട് പാലൂരിൽ ജനവാസ കേന്ദ്രങ്ങളോട് ചേർന്ന് വന മേഖലയിൽ കാട്ടാനക്കൂട്ടം നാട്ടുകാർ ഭീതിയിൽ. കണ്ണൂർ ജില്ലയിലെ കണ്ണവം വന മേഖലയിലാണ് പാലൂരിലെ കൃഷിയിടങ്ങളോട് ചേർന്ന് കാട്ടാനകൾ തമ്പടിച്ചതായി പ്രദേശവാസികളുടെ ശ്രദ്ധയിൽ പെട്ടത്. വനത്തിനുള്ളിൽ നിന്ന് ആനകളുടെ അലർച്ചയും മരങ്ങളുടെ കമ്പുകൾ ഒടിക്കുന്ന ശബ്ദവും കേൾക്കുന്നതായി നാട്ടുകാർ പറഞ്ഞു. കൃഷിയിടത്തിൽ ടാപ്പിംഗിനും മറ്റുമായി എത്തിയ തൊഴിലാളികളാണ് ആനകളുടെ സാന്നിധ്യം തിരിച്ചറിഞ്ഞത്. സംഭവമറിഞ്ഞ് വിലങ്ങാട് സെക്ഷൻ വനം വകുപ്പ് അധികൃതരും കുറ്റ്യാടിയിൽ നിന്ന് ആർആർടിയും സ്ഥലത്തെത്തി കണ്ണവം വനത്തിൽ പരിശോധന നടത്തി. കൃഷഭൂമിയിൽ നിന്ന് മുന്നൂറ് മീറ്റർ അകലെ ആനകൾ തമ്പടിച്ചതായി അധികൃതർ സ്ഥിതികരിച്ചു. ആനകളെ വനത്തിനുള്ളിലേക്ക് തുരത്താനും കൃഷിയിടങ്ങളിലേക്കിറങ്ങാതിരിക്കാനും പടക്കം പൊട്ടിക്കുകയും തീ കത്തിച്ചും പ്രതിരോധ നടപടികൾ സ്വീകരിച്ചു. കണ്ണവം വനത്തിൽ നിന്ന് പുഴ കടന്ന് പാലൂരിലെ കൃഷിയിടങ്ങളിൽ ഇറങ്ങുന്ന കാട്ടാനകൾ മുൻ വർഷങ്ങളിൽ വൻ കൃഷി നാശം വരുത്തിയിരുന്നു.

തുമ്പക്കോട്ട് മലയിൽ ക്വാറിക്ക് അനുമതി നൽകരുതെന്ന്

തിരുവമ്പാടി: തുമ്പക്കോട്ട് മലയിൽ ക്വാറി തുടങ്ങാൻ അനുമതി നൽകരുതെന്ന് കോൺഗ്രസ് ആവശ്യപ്പെട്ടു. 7 വർഷം മുമ്പ് കരിങ്കൽ ക്വാറി തുടങ്ങാനുള്ള ശ്രമത്തിൽ നിന്നും പ്രദേശവാസികളുടെ ശക്തമായ പ്രതിഷേധത്തെ തുടർന്ന് ഉടമ പിന്മാറുകയായിരുന്നു. ഇപ്പോൾ പുതിയ അപേക്ഷ വച്ച് തിരുവമ്പാടി പഞ്ചായത്തിൽ നിന്നും പാറ പൊട്ടിക്കാനുള്ള ലൈസൻസ് (ഡി / ഒ ലൈസൻസ്) നേടാനുള്ള തീവ്രശ്രമത്തിലാണ്. ഖനനത്തിന് ഉദ്ദേശിക്കുന്ന പാറയുടെ മുകളിലാണ് ശ്രീകൃഷ്ണ ക്ഷേത്രം സ്ഥിതി ചെയ്യുന്നത്. 100 മീറ്ററിനുള്ളിൽ ഗവ. ഐടിഐ കെട്ടിടം ഉണ്ട്. ചുറ്റുപാടും ഇടതിങ്ങി ധാരാളം വീടുകൾ നിലവിലുണ്ട്. തികച്ചും ജനവാസ കേന്ദ്രമായ തിരുവമ്പാടി പഞ്ചായത്ത് 15-ാം വാർഡ് പാലക്കടവിൽ കരിങ്കൽ ക്വാറി അനുവദിക്കരുതെന്ന് തുമ്പക്കോട്ട് മല സംരക്ഷണ സമിതി യോഗം പഞ്ചായത്തിനോട് ആവശ്യപ്പെട്ടു. യോഗത്തിൽ ചെയർമാൻ ദിവാകരൻ കോക്കോട് അധ്യക്ഷത വഹിച്ചു. രാജു കൊട്ടാരത്തിൽ, നിയോജകമണ്ഡലം പ്രസിഡന്‍റ് ഷിജു ചെമ്പനാനി, ഷൈൻ അമ്പലത്തിങ്കൽ, ബേബി കാരിക്കാട്ടിൽ, സ്കറിയ ആലുങ്കൽ, ദിവാകരൻ കോക്കോട് എന്നിവർ പ്രസംഗിച്ചു.

അനുമതിയില്ലാതെ കെട്ടിട നിര്‍മാണം നഗരത്തില്‍ വ്യാപകമാകുന്നു

കോഴിക്കോട്: നഗരത്തില്‍ അനധികൃത കെട്ടിട നിര്‍മാണം വ്യാപകമാകുന്നു. രാഷ്ട്രീയതലത്തിലും ഉദ്യോഗസ്ഥതലത്തിലും സ്വാധീനം ചെലുത്തിയുണ്ടാക്കുന്ന ഇത്തരം അനധികൃത നിര്‍മാണങ്ങള്‍ തടയാന്‍അധികൃതരുടെ ഭാഗത്തുനിന്ന് നടപടിയൊന്നും ഉണ്ടാകുന്നില്ല. സംസ്ഥാനസര്‍ക്കാറിന്‍റെ ഓഡിറ്റ് വകുപ്പിന്‍റെ 2023-24 വര്‍ഷത്തെ കോര്‍പറേഷന്‍ ഓഡിറ്റ് റിപ്പോര്‍ട്ടിലാണ് ഇക്കാര്യം ചൂണ്ടിക്കാട്ടിയിട്ടുള്ളത്. അനുമതിയില്ലാതെയുള്ള നിര്‍മാണം നടത്തി അത് ക്രമവത്കരിക്കാന്‍ അപേക്ഷ നല്‍കുന്നത് കൂടുകയാണ്. ഇത്തരത്തില്‍ നിര്‍മാണം നടക്കുന്നത് കോര്‍പറേഷന് കണ്ടെത്താനാവുന്നില്ലെന്ന് റിപ്പോര്‍ട്ട് പറയുന്നു. ബില്‍ഡിംഗ് ആപ്ലിക്കേഷന്‍ രജിസ്റ്ററില്‍ കോര്‍പറേഷന്‍ പ്രധാന ഓഫീസില്‍ 2023-24 സാമ്പത്തിക വര്‍ഷം ലഭിച്ച 1996 അപേക്ഷകളില്‍ 916 എണ്ണവും ക്രമവത്കരിക്കാനുള്ളതാണ്. അനുമതി വാങ്ങാതെ കെട്ടിടം നിര്‍മിച്ച ശേഷം ക്രമവത്കരിക്കാന്‍ അപേക്ഷ നല്‍കുന്നതാണ് രീതി. ഇങ്ങനെയുള്ള 916 കെട്ടിടങ്ങളും കോര്‍പറേഷന് കണ്ടെത്താനായില്ല. ഉടമകള്‍ ക്രമവത്കരിക്കാന്‍ അപേക്ഷിക്കുന്നതോടെയാണ് ഇവ അനധികൃതമെന്ന് വ്യക്തമാവുന്നത്. ബേപ്പൂരില്‍ ലഭിച്ച 343 അപേക്ഷകളി ല്‍ 156 എണ്ണവും ക്രമവത്കരിക്കാനായിരുന്നു. ചെറുവണ്ണൂര്‍-നല്ലളം മേഖലയില്‍ ക്രമവത്കരണത്തിന് 109 കെട്ടിടങ്ങളുണ്ട്. എലത്തൂര്‍ മേഖലയില്‍ 472 അനധികൃത കെട്ടിടങ്ങള്‍ കണ്ടെത്തി. ഈ നി ര്‍മാണങ്ങള്‍ക്കെതിരെ നടപടിയുണ്ടായിട്ടില്ല. നികുതി പിരിവും കാ ര്യമായില്ല. കോര്‍പറേഷന്‍റെ പണമിടപാടുകള്‍ കെ-സ്മാര്‍ട്ടിലായെങ്കിലും ഇതുമായി ബന്ധപ്പെട്ട രേഖകള്‍ കൃത്യമല്ല. കെ-സ്മാര്‍ട് ഇപോസ് യന്ത്രത്തില്‍ സ്വീകരിക്കുന്ന തുകകള്‍ മൊത്തം അക്കൗ ണ്ടില്‍ ക്രെഡിറ്റാവുമെങ്കിലും ഏതെല്ലാം തുകകളാണെന്ന് വ്യക്തമാവില്ല. കെ-സ്മാര്‍ട്ടിലെ ഇ പോസ് സ്റ്റേറ്റ്‌മെന്‍റും ബാങ്ക് സ്റ്റേറ്റ്‌മെന്‍റും ഒത്തുപോകുന്നില്ല.കെ-സ്മാര്‍ട്ടിലെ ഹെഡ് ഓഫ് അക്കൗണ്ടുകളില്‍ വരവിനങ്ങളുമായി ബന്ധപ്പെട്ട രജിസ്റ്റര്‍ സൂക്ഷി ക്കുന്നില്ല. 2023 വരെ സാംഖ്യ സോഫ്റ്റ് വെയറിലും തുടര്‍ന്ന് കെ-സ്മാര്‍ട്ടിലുമാണ് കോര്‍പറേഷന്‍റെ പണമിടപാടുകള്‍ നടക്കുന്നത്.കോര്‍പറേഷന്‍ കെട്ടിടങ്ങളുണ്ടാക്കി ഉപയോഗിക്കാതെ വെ ച്ചതിലൂടെ ലക്ഷങ്ങള്‍ നഷ്ടമുണ്ടായതായി ഓഡിറ്റ് റിപ്പോര്‍ട്ടില്‍ പറയുന്നു.

അമിത വേഗതയ്ക്ക് പോലീസ് പിടികൂടിയ സ്വകാര്യ ബസിന് ഒമ്പത് മാസമായി പെർമിറ്റുമില്ല

നാദാപുരം: അമിത വേഗതയിൽ മൽസരിച്ചോടി സംഭവത്തിൽ പോലീസ് പിടികൂടിയ സ്വകാര്യ ബസിന് ഒമ്പത് മാസമായി പെർമിറ്റുമില്ല സർവീസ് നടത്തിയത് യാത്രക്കാരുടെ ജീവൻ പണയ പ്പെടുത്തിയെന്ന് വ്യക്തമായി. കഴിഞ്ഞ ഏപ്രിൽ 22നാണ് നാദാപുരം പോലീസ് സ്റ്റേഷന് മുമ്പിൽവച്ച് അമിത വേഗതയിൽ മറ്റൊരു സ്വകാര്യ ബസുമായി മത്സരിച്ച് ഓടിയ ബസ് പോലീസ് കസ്റ്റഡിയിൽ എടുത്തിരുന്നു. തലശ്ശേരി നിന്ന് തൊട്ടിൽപാലം ഭാഗത്തേക്ക് പോകുന്ന കെഎൽ. 18 വി 4745 നമ്പർ കൂടൽ ബസാണ് നാദാപുരം പോലീസ് സ്റ്റേഷന് മുമ്പിൽ കസ്റ്റഡിയിൽ എടുത്തത്. ബസ് ഡ്രൈവർക്കെതിരേ 35(3) ബിഎൻഎസ്എസ്. വകുപ്പ് പ്രകാരം കേസെടുക്കുകയും ചെയ്തിരുന്നു. കസ്റ്റഡിയിലെടുത്ത ബസ് തിരികെ കിട്ടാനായി രേഖകൾ ഹാജരാക്കിയപ്പോഴാണ് ഒമ്പത് മാസത്തോളമായി പെർമിറ്റ് ഇല്ലെന്ന കാര്യം പോലീസ് അറിയുന്നത്. പെർമിറ്റ് കാലാവധി കഴിഞ്ഞിട്ടും ദീർഘകാലം ബസിന് സർവീസ് നടത്താനിടയായത് മോട്ടോർ വാഹന വകുപ്പിന്‍റെ ഭാഗത്ത് നിന്നുണ്ടായ ഗുരുതരമായ വീഴ്ചയായാണ് വിലയിരുത്തപ്പെടുന്നത്. പെർമിറ്റെല്ലെന്ന് അറിഞ്ഞിട്ടും യാത്രക്കാരെ കുത്തി നിറച്ച് അപകടകരമാം വിധം വാഹനമോടിച്ച ബസ് ജീവനക്കാരും ഉടമയും സംഭവത്തിൽ കുറ്റക്കാരാണ്. പെർമിറ്റ് കാലാവധി കഴിഞ്ഞ ബസിലെ യാത്രക്കാർക്ക് അപകടത്തിൽ പെട്ടാൽ ഇൻഷൂറൻസ് പരിരക്ഷ പോലും ലഭിക്കില്ലെന്ന കാര്യം അറിഞ്ഞ് തന്നെയാണ് ബസ് സർവീസ് നടത്തിയത് . ബസിന്‍റെ രേഖകൾ പരിശോധിക്കേണ്ട മോട്ടോർ വാഹന വകുപ്പ് ഈ കാര്യങ്ങളിൽ മൗനം പാലിക്കുകയാണ്. കഴിഞ്ഞ ദിവസം വടകര - തൊട്ടിൽ പാലം റൂട്ടിൽ പെർമിറ്റ് കഴിഞ്ഞ് സർവീസ് നടത്തിയ മറ്റൊരു സ്വകാര്യ ബസ് നാദാപുരം പോലീസ് പിടികൂടി ദിവസങ്ങളോളം കസ്റ്റഡിയിൽവയ്ക്കുകയും രേഖകൾ ഹാജരാക്കിയ ശേഷം മാത്രമാണ് വിട്ട് നൽകിയത്. വടകര - കുറ്റ്യാടി , തൊട്ടിൽപാലം റൂട്ടിൽ സർവീസ് നടത്തുന്ന ചില ബസുകൾക്ക് പെർമിറ്റ് കാലാവധി കഴിഞ്ഞും സർവീസ് നടത്തുന്നതായി ബസ് തൊഴിലാളികൾ തന്നെ രഹസ്യമായി സമ്മതിക്കുന്നുണ്ട്.

ട്രാൻസ്ജെൻഡറുടെ സ്കൂട്ടർ മോഷണം; പ്രതികൾ പിടിയിൽ

കോഴിക്കോട്: ട്രാൻസ്ജെൻഡറുടെ സ്കൂട്ടറിന്‍റെ താക്കോൽ ബലമായി പിടിച്ചുവാങ്ങി സ്കൂട്ടർ മോഷണം നടത്തിയ കേസിലെ പ്രതികളായ കുന്ദമംഗലം നൊച്ചിപ്പൊയിൽ സ്വദേശി ആനിക്കാട്ടുമ്മൽ വീട്ടിൽ മുഹമ്മദ് റബീൻ (23 ), കൊടുവള്ളി മുക്കാംചാലിൽ വീട്ടിൽ നിസാമുദ്ദീൻ (27 ),പതിമംഗലം പാലുമണ്ണിൽ വീട്ടിൽ അബ്ദുൾ ജബ്ബാർ (23 ), മുട്ടാഞ്ചേരി പരനിലം വീട്ടിൽ മുഹമ്മദ് റാഫി (26 ) എന്നിവരെയാണ് മെഡിക്കൽ കോളജ് സബ് ഡിവിഷൻ അസി. കമ്മീഷണർ ഉമേഷിന്‍റെ നേതൃത്വത്തിലുള്ള സംഘം പിടികൂടിയത്. പ്രതികളിലൊരാളായ ജബ്ബാർ ട്രാൻസ്ജെൻഡറോടൊപ്പം സ്കൂട്ടറിൽ യാത്രചെയ്ത് വരവെ കുന്ദമംഗലം സിന്ധു തിയറ്ററിനടുത്ത് സ്കൂട്ടർ നിർത്തിയ ശേഷം ട്രാൻസ്ജെൻഡറിന്‍റെ കയ്യിൽനിന്നും താക്കോൽ പിടിച്ചു വാങ്ങി സുഹൃത്തുക്കൾക്ക് താക്കോൽ കൈമാറുകയും പ്രതികൾ സംഭവ സ്ഥലത്ത് നിന്നും സ്കൂട്ടറുമായി കടന്നുകളയാനുള്ള ശ്രമം ചെറുക്കുന്നതിനിടെ ട്രാൻസ്ജെൻഡറെ പ്രതികളിലൊരാൾ അടിച്ചു പരിക്കേൽപ്പിക്കുകയുമായിരുന്നു.

മലബാര്‍ ഗ്രൂപ്പ് സാംബിയയിലെ ഭക്ഷണ വിതരണം വിപുലീകരിച്ചു

കോഴിക്കോട്: ദാരിദ്ര്യവും പട്ടിണിയും മാറ്റുകയെന്ന ലക്ഷ്യത്തോടെ മലബാര്‍ ഗ്രൂപ്പ് നടപ്പാക്കി വരുന്ന "ഹംഗര്‍ ഫ്രീ വേള്‍ഡ് ' പദ്ധതിയില്‍ ആഫ്രിക്കന്‍ രാജ്യമായ സാംബിയയിലെ ഭക്ഷണ വിതരണം കൂടുതല്‍ പേരിലേക്ക് വ്യാപിപ്പിച്ചു. ഇവിടുത്തെ മൂന്ന് സ്‌കൂളുകളിലെ 10,000 വിദ്യാര്‍ഥികള്‍ക്കാണ് പ്രതിദിനം പോഷകസമൃദ്ധമായ ഭക്ഷണം വിതരണം ചെയ്യുന്നത്. സാംബിയയില്‍ കഴിഞ്ഞ വര്‍ഷം "ഹംഗര്‍ ഫ്രീ വേള്‍ഡ്' പദ്ധതി ആരംഭിച്ചിരുന്നു. ഇതാണ് ഇപ്പോള്‍ വിപുലീകരിച്ചത്. സാംബിയയിലെ ജോണ്‍ ലയിംഗ് പ്രൈമറി സ്‌കൂള്‍, ചിംഗ് വെലെ പ്രൈമറി സ്‌കൂള്‍, മാമ്പിലിമ പ്രൈമറി സ്‌കൂള്‍ എന്നിവിടങ്ങളിലെ വിദ്യാർഥികള്‍ക്കാണ് പോഷക സമൃദ്ധമായ ഉച്ചഭക്ഷണം വിതരണം ചെയ്യുന്നത്. സാംബിയയിലെ വിദ്യാര്‍ഥികള്‍ക്ക് ഉച്ചഭക്ഷണം നല്‍കുന്ന പദ്ധതിക്ക് മൂന്ന് വര്‍ഷത്തിനുള്ളില്‍ ഒരു മില്യണ്‍ യുഎസ് ഡോളര്‍ നല്‍കുമെന്ന് മലബാര്‍ ഗ്രൂപ്പ് പ്രഖ്യാപിച്ചിരുന്നു. ഇതിന്‍റെ ഭാഗമായാണ് പദ്ധതി വിപുലീകരിച്ചത്. ലുസാക്കയിലെ ജോണ്‍ ലയിംഗ് പ്രൈമറി സ്‌കൂളില്‍ നടന്ന ചടങ്ങില്‍ സാംബിയന്‍ വിദ്യാഭ്യാസ മന്ത്രി ഡഗ്ലസ് സ്യകലിമയാണ് പദ്ധതി വിപുലീകരണത്തിന്‍റെ ഉദ്ഘാടനം നിര്‍വഹിച്ചത്. മലബാര്‍ ഗ്രൂപ്പ് വൈസ് ചെയര്‍മാന്‍ കെ.പി അബ്ദുള്‍ സലാം, ദുബായിലെ സാംബിയ കോണ്‍സല്‍ ജനറല്‍ ജെറി മുഉക്ക, സൗദി അറേബ്യയിലെ സാംബിയ അംബാസഡര്‍ ഡങ്കന്‍ മുലിമ, സാംബിയയിലെ ഇന്ത്യന്‍ ഹൈക്കമ്മീഷന്‍ ഡെപ്യൂട്ടി ഹൈക്കമ്മീഷണര്‍ ആരിഫ് സയീദ്, സാംബിയന്‍ സര്‍ക്കാറിലെ ഉദ്യോഗസ്ഥര്‍, സ്‌കൂള്‍ അധികൃതര്‍ തുടങ്ങിയവര്‍ ചടങ്ങില്‍ പങ്കെടുത്തു. മലബാര്‍ ഗ്രൂപ്പിന്‍റെ ഏറ്റവും പ്രധാനപ്പെട്ട സിഎസ്ആര്‍ പദ്ധതിയാണ് വിശക്കുന്നവര്‍ക്ക് ഒരു നേരത്തെ ഭക്ഷണമെത്തിക്കുകയെന്ന ലക്ഷ്യത്തോടെ നടപ്പാക്കി വരുന്ന "ഹംഗര്‍ ഫ്രീ വേള്‍ഡ്' പദ്ധതി. ഇത് പ്രകാരം ഇന്ത്യയിലെ 17 സംസ്ഥാനങ്ങളിലെ 81 നഗരങ്ങളിലായി ദിനംപ്രതി 60,000ത്തിലധികം പേര്‍ക്ക് നിലവില്‍ പോഷക സമൃദ്ധമായ ഭക്ഷണപ്പൊതികള്‍ വിതരണം ചെയ്യുന്നുണ്ട്.

ബ്ലൂഫ്ളാഗ് സര്‍ട്ടിഫിക്കറ്റുള്ള കാപ്പാട് തീരം ഇരുട്ടിൽ

സുധീര്‍ കൊയിലാണ്ടി കൊയിലാണ്ടി: തെരുവു വിളക്കുകള്‍ അണഞ്ഞു. ടൂറിസ്റ്റ് േകന്ദ്രമായ കാപ്പാട് തീരം ഇരുട്ടിലായി .ദിനം പ്രതി ആയിരക്കണക്കിനാളുകള്‍ സന്ദര്‍ശനത്തിനെത്തുന്ന തീരമാണ് ഇത്തരത്തില്‍ ഇരുട്ടുമൂടി കിടക്കുന്നത്. കഴിഞ്ഞ അഞ്ചു വര്‍ഷമായി തുടര്‍ച്ചയായി ബ്ലുഫ്ളാഗ് സര്‍ട്ടിഫിക്കറ്റ് ലഭിക്കുന്ന കടല്‍ തീരമാണ് കാപ്പാട്. എന്നാല്‍ അധികൃതര്‍ ഇവിടെ വേണ്ടത്ര സൗകര്യങ്ങള്‍ ഏര്‍പ്പെടുത്തുന്നില്ലെന്നാണ് സന്ദര്‍ശകരുടെ പരാതി. ഡെന്‍മാര്‍ക്കിലെ ഇന്‍റര്‍നാഷണല്‍ ഫൗണ്ടേഷന്‍ ഫോര്‍ എന്‍വയണ്‍മെന്‍റ് എഡ്യുക്കേഷന്‍റെ ഇക്കോ ലേബല്‍ ബ്ലൂഫ്ളാഗ്ിന്‍റെ സര്‍ട്ടിഫിക്കറ്റാണ് കാപ്പാട് ബീച്ചിന് ലഭിച്ചത്. സംസ്ഥാനത്ത് ബ്ലൂഫ്ളാഗ് സര്‍ട്ടിഫിക്കറ്റ് ലഭിക്കുന്ന ആദ്യ ബീച്ചാണ് കാപ്പാട്. ഇന്ത്യയില്‍ ആകെ എട്ടു ബീച്ചുകള്‍ക്ക് മാത്രമാണ് ബ്ലുഫ്ളാഗ് സര്‍ട്ടിഫിക്കറ്റ് ലഭിച്ചിട്ടുള്ളത്. ഇത്രയേറെ പ്രാധാന്യമുള്ള കാപ്പാട് തീരം കോഴിക്കോട് ഡിടിപിസിയുടെ ചുമതലയിലാണ് പ്രവര്‍ത്തിക്കുന്നത്. വിദേശികളടക്കം ധാരാളം സഞ്ചാരികള്‍ കാപ്പാട് തീരത്ത് എത്തുന്നുണ്ട്. കിലോമീറ്ററുകളോളമുള്ള കടല്‍ തീരത്ത് രാത്രി കാലത്ത് പേടിയോടെയാണ് സന്ദര്‍ശകര്‍ കഴിയുന്നത്. ദൂരെ നിന്ന് എത്തുന്ന ലഹരി വാണിഭ സംഘങ്ങള്‍ ഇരുട്ടില്‍ ആവശ്യക്കാര്‍ക്ക് മയക്കു മരുന്നു വിതരണം ചെയ്യുകയും പലപ്പോഴും സംഘര്‍ഷം ഉണ്ടാവുകയും ചെയ്യുന്നതായി നാട്ടുകാര്‍ പറയുന്നു. തീരത്തെ തട്ടു കടകള്‍ അടച്ചു കഴിഞ്ഞാല്‍ പിന്നെ തീരം പൂര്‍ണമായും ഇരുട്ടിലാണ്. പഞ്ചായത്ത് അധികൃതരുടെ ശ്രദ്ധയില്‍ ഇക്കാര്യം നിരവധി തവണ കൊണ്ടുവന്നങ്കിലുംയാതൊരു പരിഹാരവും ഉണ്ടായിട്ടില്ല. കച്ചവടക്കാരില്‍ ചിലര്‍ സ്വന്തം പൈസ മുടക്കി ജനറേറ്റര്‍ വെച്ച്, റോഡ് സൈഡില്‍ ട്യൂബ് ലൈറ്റുകള്‍ കെട്ടിയാണ് തീരദേശത്ത് വെളിച്ചമെത്തിക്കുന്നത്.അവിചാരിതമായി രാത്രി സമയത്ത് കടല്‍ തീരത്ത് എന്തെങ്കിലും അപകടമുണ്ടായാല്‍ ഒന്നും ചെയ്യാന്‍ കഴിയാത്ത അവസ്ഥയാണ് നിലവിലുള്ളത്. തെരുവുനായകള്‍ കൂട്ടത്തോടെ ഇരുട്ടില്‍ നിന്ന് സന്ദര്‍ശകര്‍ക്കുനേരേചാടിയ സംഭവങളും ഇവിടെ പതിവാണ്.

പാൽ ഉത്പാദനം കുറയുന്നു : ഒരു വർഷത്തിനിടെ 14,000ത്തോളം ലിറ്ററിന്‍റെ കുറവ്

കോഴിക്കോട്: കർഷകർ ക്ഷീരമേഖലയെ കൈവിടുന്നതുമൂലം പാൽ ഉത്പാദനം കുറയുന്നു. കഴിഞ്ഞ വർഷത്തെ അപേക്ഷിച്ച് ജില്ലയിലെ പാൽ ഉത്പാദനത്തിലും ശേഖരണത്തിലും വൻ കുറവുള്ളതായി ക്ഷീരവികസന വകുപ്പിന്‍റെ റിപ്പോർട്ടുകൾ സൂചിപ്പിക്കുന്നു. മുൻവർഷത്തെ അപേക്ഷിച്ച് ഒരു വർഷത്തിനുള്ളിൽ 14,000 ത്തോളം ലിറ്ററിന്‍റെ കുറവാണുള്ളത്. മൊത്തം പാലുത്പാദനത്തിന്‍റെ 3.6 ശതമാനം കുറവാണ് മാർച്ചിൽ മാത്രം ഉണ്ടായത്. പാൽ സംഭരണത്തിലെയും സൊസൈറ്റികൾക്ക് മിൽമയിൽനിന്ന് പാലിന് ലഭിക്കുന്ന മാർജിനിലെയും കുറവുമൂലം പല സൊസൈറ്റികളും വൻ സാമ്പത്തിക പ്രതിസന്ധിയിലൂടെയാണ് കടന്നുപോകുന്നത്. സബ്സിഡി കുറഞ്ഞതാണ് കർഷകരുടെ ക്ഷീര മേഖലയിൽനിന്നുള്ള വിടുതലിന് മറ്റൊരു കാരണം. ചില േബ്ലാക്കുകളിൽ പാൽ ഉൽപാദനത്തിൽ നേരിയ വർധന സൂചിപ്പിക്കുന്നുണ്ടെങ്കിലും ജില്ലയിൽ മൊത്തം പാൽ ഉൽപാദനം കുറഞ്ഞുവരുകയാണെന്ന് രേഖകൾ സൂചിപ്പിക്കുന്നു. മാർച്ചിലെ കണക്കുപ്രകാരം ജില്ലയിൽ 12 േബ്ലാക്കുകളിലെ 244 സൊസൈറ്റികളിലായി 12,219 ക്ഷീരകർഷകരാണുള്ളത്.

വാഹന കാലാവധി തീർന്നു മരുന്ന് വിതരണം അവതാളത്തിൽ : ഇഎസ്ഐ ഡിസ്പെൻസറികളിൽ മരുന്ന് എത്തുന്നില്ല

കോഴിക്കോട്: കോഴിക്കോട് ജില്ലയിലെ 12 ഇഎസ്ഐ ഡിസ്പെൻസറികൾ ഉൾപ്പെടെ ആറു ജില്ലകളിലെ മരുന്ന് വിതരണത്തിനായി ഉത്തരമേഖല ഇൻഷ്വറൻസ് മെഡിക്കൽ സർവീസ് നോർത്ത് സോൺ ഉപയോഗിച്ചിരുന്ന ഡീസൽ വാഹനത്തിന്‍റെ രജിസ്ട്രേഷൻ കാലാവധി അവസാനിച്ചതിനെത്തുടർന്ന് അടിയന്തര ആവശ്യ മരുന്നുകൾ ഉൾപ്പെടെയുള്ള മരുന്ന് വിതരണം അവതാളത്തിലായി. കഴിഞ്ഞ ഒന്നര മാസമായി സ്ഥിരമായി ഉപയോഗിച്ചിരുന്ന വാഹന രജിസ്ട്രേഷൻ പുതുക്കുന്നതിനായി സമയ ബന്ധിതമായി അറിയിപ്പുകൾ കേരള സംസ്ഥാന ഇൻഷ്വറൻസ് മെഡിക്കൽ സർവീസ് ഡയറക്ടർക്ക് നൽകിയെങ്കിലും അടിയന്തര പ്രാധാന്യത്തോടെ കാലാവധി കഴിയാൻ പോകുന്ന വാഹനത്തിനു പകരം പുതിയത് വാങ്ങാനോ പകരം മരുന്ന് വിതരണത്തിന് സംവിധാനങ്ങൾ ഏർപ്പെടുത്താതിനെ തുടർന്ന് നോർത്ത് സോണിന്‍റെ കീഴിലുള്ള ഡിസ്പൻസറികളിലേക്ക് മരുന്ന് വിതരണം നിലച്ചത് മൂലം ദിവസം നൂറുകണക്കിന് രോഗികളാണ് ദുരിതം പേറുന്നത്. ഇഎസ്ഐ ഡിസ്പൻസറികളിൽ ചികിത്സയ്ക്ക് എത്തുന്ന രോഗികൾ സ്വകാര്യ മെഡിക്കൽ ഷോപ്പുകൾ വഴി മരുന്നുകൾ സ്വയം പണം നൽകി വാങ്ങിയാലും റീം എംബേഴ്സ് വഴി ചെലവായ മുഴുവൻ തുകയും ലഭിക്കാറില്ല. നിലവിൽ ജില്ലയിലെയും മറ്റും ഡിസ്പൻസറികളിലെ ഫാർമസിസ്റ്റ് അടക്കമുള്ള ജീവനക്കാർ ഒത്തു ചേർന്ന് പണം സ്വരൂപിച്ച് സ്വകാര്യ വാഹനങ്ങളിൽ എത്തിക്കുന്ന മരുന്നാണ് ഇപ്പോൾ രോഗികൾക്ക് വിതരണം ചെയ്തു വരുന്നത്. തൊഴിൽ വകുപ്പിന്‍റെ കീഴിൽ ജില്ലയിലെ മാങ്കാവിലുള്ള ഇൻഷ്വറൻസ് മെഡിക്കൽ സർവീസ് ഉത്തര മേഖല ഓഫീസിൽ നിന്നും സ്വകാര്യ വാഹനങ്ങൾ സംഘടിപ്പിച്ച് സ്വയം കൊണ്ടുപോകാനുള്ള ഡിസ്പെൻസറികളിലെ ജീവനക്കാരുടെ അഭാവം ഇത്തരം പ്രവർത്തനകൾക്ക് വലിയ തടസമാകുകയാണ്. വാഹനയിനത്തിൽ ചെലവാകുന്ന പണം നൽകാമെന്ന വാക്കാലുള്ള ഡയറക്ടറേറ്റിന്‍റെ ഉറപ്പ് ഉണ്ടെങ്കിലും പലർക്കും ഈ പണം ഇതുവരെ ലഭിച്ചിട്ടില്ലാ എന്നത് ഇത്തരം ഒറ്റപ്പെട്ട പ്രവർത്തനങ്ങളും നിലയ്ക്കാൻ ഇടയുണ്ട്. ഇതു മൂലം രോഗികൾ തീർത്തും ദുരിതലാകും. ഡിസ്പെൻസറികളിൽ മരുന്നില്ലാത്തതിന്‍റെ പേരിൽ രോഗികളുടെയും മറ്റും ശകാരങ്ങൾ ജീവനക്കാർ നേരിടുന്നതും പതിവാണ്. തൊഴിൽ വകുപ്പും സംസ്ഥാന ഇൻഷ്വറൻസ് മെഡിക്കൽ സർവീസ് ഡയറക്ടറും അടിയന്തര പ്രാധാന്യത്തോടെ മരുന്ന് വിതരണത്തിന് പുതിയ സ്വന്തം വാഹനങ്ങളോ വാടകയ്ക്കോ ഏർപ്പെടുത്തി മരുന്ന് വിതരണം ഉടനടി പുനഃസ്ഥാപിക്കണമെന്ന് പൗരാവകാശ സംരക്ഷണ സമിതി ചെയർമാർ സതീഷ് പാറന്നൂർ ആവശ്യപ്പെട്ടു. ഇക്കാര്യം ഉന്നയിച്ച് വകുപ്പ് മന്ത്രിക്ക് അദ്ദേഹം പരാതി നൽകി. ജില്ലയിലെ വിവിധ ഇഎസ്ഐ ഡിസ്പെൻസറികൾ, മാങ്കാവിലുള്ള ഉത്തരമേഖല ഇൻഷ്വറൻസ് മെഡിക്കൽ സർവീസ് നോർത്ത് സോൺ ഓഫീസ് എന്നിവടങ്ങളിൽ സതീഷ് പാറന്നൂരിന്‍റെ നേതൃത്വത്തിലുള്ള സംഘം സന്ദർശനം നടത്തി.

ലഹരിക്കെതിരേ സമൂഹ നടത്തം

കോഴിക്കോട്: കേരളത്തെ ഗ്രസിച്ച മാരകമായ ലഹരി വിപത്തിനെതിരെ പൊതുജനങ്ങളെ മുൻനിർത്തി പ്രതിരോധം തീർക്കുമെന്ന് രമേശ് ചെന്നിത്തല വ്യക്തമാക്കി. മയക്കുമരുന്ന് ഏതിരെയുള്ള പ്രചാരണത്തിനായി രൂപീകരിച്ച പ്രൗഡ് കേരള ഇനിഷ്യേറ്റീവിന്‍റെ നേതൃത്വത്തിൽ സംഘടിപ്പിച്ച സമൂഹ നടത്തം പരിപാടിഉദ്ഘാടനം ചെയ്യുകയായിരുന്നു ചെന്നിത്തല. കേരളത്തെ ഗ്രസിച്ചിരിക്കുന്ന ഏറ്റവും വലിയ വിപത്താണ് മയക്കുമരുന്ന്. കേരളത്തിന്‍റെ യുവത്വം അസാധാരണമാം വിധത്തിൽ അതിന്‍റെ പിടിയിലമർന്നിരിക്കുന്നു. അതുകൊണ്ടുതന്നെ ലഹരിക്കെതിരെ ബഹുജന മുന്നേറ്റവും ബോധവത്കരണവും അത്യന്താപേക്ഷിതമാണ്. ഈ പരിപാടിക്ക് രാഷ്ട്രീയമില്ല. രാഷ്ട്രീയത്തിന് അതീതമായി നാനാതുറകളിൽപെട്ട ജനതയെ ഒന്നിച്ച് അണിനിരത്തി കൊണ്ടുള്ള ഒരു മുന്നേറ്റമാണ് ഇത്. യാത്രകളെതന്നെ സമരമുറകളാക്കിക്കൊണ്ട് നടത്തുന്ന ഈ മഹത്തായ യജ്ഞത്തിൽ ഇനിയുള്ള ദിനങ്ങളിൽ കൂടുതൽ ആൾക്കാർ പങ്കുചേരുമെന്നും ചെന്നിത്തല വ്യക്തമാക്കി. കാശ്മീരിൽ ഭീകരാക്രമണത്തിൽ കൊല്ലപ്പെട്ട ഇന്ത്യക്കാർക്ക് ആദരാഞ്ജലികൾ അർപ്പിച്ചുകൊണ്ടാണ് സമൂഹ നടത്തത്തിന് തുടക്കമായത്.

അടിയന്തര ശസ്ത്രക്രിയയ്ക്കുപോലും സമ്മതപത്രം ‘എഴുതി' നല്‍കണം

അത്യാഹിത വിഭാഗത്തില്‍ എത്തുന്നവരെ വീണ്ടും ദുരിതത്തിലാക്കി അധികൃതര്‍ കോഴിക്കോട്: കോഴിക്കോട് മെഡിക്കല്‍ കോളജില്‍ അടിയന്തര ശസ്ത്രക്രിയയ്ക്ക് സമ്മതപത്രം എഴുതി നല്‍കണമെന്ന നിര്‍ദേശം രോഗികള്‍ക്ക് ദുരിതമാകുന്നു. അപകടത്തില്‍പ്പെട്ട് എത്തുന്നവര്‍ക്കൊപ്പമുള്ളവരാണ് സമ്മതപത്രം എഴുതിനല്‍കേണ്ടത്. ഡിടിപി ചെയ്തുവച്ച സമ്മതപത്രം ഫോണില്‍ അയച്ചുതരും. ഇതു നോക്കി എഴുതാനാണ് ആവശ്യപ്പെടുന്നത്. ഇത് ഏറെ സമയ നഷ്ടം ഉണ്ടാക്കുന്നതായാണ് പരാതി. എഴുതിവച്ച സമ്മതപത്ര കോപ്പി നല്‍കുകയാണെങ്കില്‍ അതിനടിയില്‍ ബന്ധപ്പെട്ടവര്‍ ഒപ്പിടുകയേ വേണ്ടു. ഇതിനു പകരമാണ് കൈപ്പട നിർദേശം. പലപ്പോഴും അപകടത്തില്‍പ്പെട്ട് എത്തുന്നവര്‍ക്ക് എക്‌സറേ, സ്‌കാനിംഗ്, ഇസിജി തുടങ്ങിയ കാര്യങ്ങള്‍ക്ക് വേണ്ടി ഓടേണ്ട അവസ്ഥയുണ്ട്. ജീവനക്കാരുടെ കുറവുള്ളതിനാല്‍ ഒപ്പം നഴ്‌സുമാരുടെയോ അറ്റന്‍ഡര്‍മാരുടെയോ സൗകര്യം സ്ട്രക്ചര്‍ ഉന്താന്‍ പോലും അത്യാഹിത വിഭാഗത്തില്‍ലഭിക്കാറില്ല.രോഗിയുടെ കൂട്ടിരിപ്പുകാരാണ് ഇതെല്ലാം ചെയ്യുന്നത്. ഇതിനിടയിലാണ് സമ്മതപത്രം സ്വന്തം കൈപ്പടയില്‍ തന്നെ എഴുതി നല്‍കണമെന്ന് നിര്‍ദേശിച്ചിരിക്കുന്നത്. അടിയന്തര ചികിത്സ വേണ്ടവര്‍ക്കെങ്കിലും നേരത്തെ എഴുതി തയ്യാറാക്കിയ സമ്മതപത്രം പ്രിന്‍റ് എടുത്ത് അധികൃതര്‍ നല്‍കണമെന്ന ആവശ്യമാണ് ഉയരുന്നത്. അടിയന്തര ശസ്ത്രക്രിയയ്ക്കുപോലും ലാബുകളില്‍ നിന്നും ഫലം കിട്ടാന്‍ നാലും അഞ്ചും മണിക്കൂറുകളാണ് കാത്തിരിക്കേണ്ടിവരുന്നത്. മെഡിക്കല്‍ കോളജിലെ അത്യാഹിത വിഭാഗത്തില്‍ നിന്നും അകാശപാത വഴി പത്ത് മിനുട്ടോളം സഞ്ചരിച്ചിട്ടുവേണം രക്തപരിശോധന ലാബുകളായ 110, 111 എന്നിവിടങ്ങളില്‍ എത്താന്‍.ഫലത്തില്‍ അപകടത്തില്‍പ്പെട്ട് കോളജില്‍ എത്തുന്നവര്‍ക്കൊപ്പം മൂന്നും നാലും പേരെങ്കിലും ഉണ്ടെങ്കിലേ കാര്യങ്ങള്‍ നടക്കുവെന്നര്‍ഥം.

ഹെല്‍മറ്റ് വച്ച് "തുടരാം'

കോഴിക്കോട്: സൂപ്പര്‍ ഹിറ്റായ മലയാള സിനിമകളും ഡയലോഗുകളും ബോധവത്കരണത്തിനു പയോഗിക്കുന്നത് കേരള പോലീസിന്‍റെ കാര്യത്തില്‍ പുതുമയല്ല. ഇന്നലെ റിലീസായ തുടരും എന്ന മോഹന്‍ലാല്‍ സിനിമയുടെ പോസ്റ്റര്‍ പങ്കുവച്ചുകൊണ്ടാണ് ഹെല്‍മറ്റ് ബോധവത്രണവുമായി പോലീസ് ഔദ്യോഗിക ഫേസ്ബുക്ക് പേജിലൂടെ രംഗത്തെത്തിയത്. ഇത്തവണ പോസ്റ്ററിനെ പോലീസ് ട്രോളിയതാണോ എന്ന സംശയവും ഉയരുന്നു. ഹെല്‍മറ്റിടാതെ മോഹന്‍ലാല്‍ കഥാപാത്രമായ ഷണ്‍മുഖവും സുഹൃത്തും ബൈക്കില്‍ പോകുന്ന ചിത്രമാണ് ഹെല്‍മറ്റ് വച്ച് യാത്ര തുടരാമെന്ന ടാഗ് ലൈനോട് ഔദ്യോഗിക ഫേസ്ബുക്ക് പോസ്റ്റില്‍ പങ്ക് വഹിച്ചിരിക്കുന്നത്. എന്തായാലും പോസ്റ്റര്‍ ഇതിനകം സോഷ്യല്‍ മീഡിയയില്‍ ചര്‍ച്ചയായി കഴിഞ്ഞു.

സമ്പൂര്‍ണ കാഷ്‌ലെസ് രജിസ്‌ട്രേഷന്‍: നടപടികള്‍ വേഗത്തിലാക്കാന്‍ മന്ത്രിയുടെ നിര്‍ദേശം

കോഴിക്കോട്: എല്ലാ പണമിടപാടുകളും ഇ -പേയ്‌മെന്‍റ് സംവിധാനത്തിലേക്ക് മാറ്റി സമ്പൂര്‍ണ കാഷ്‌ലെസ് രജിസ്‌ട്രേഷന്‍ യാഥാര്‍ഥ്യമാക്കുന്നതിനുള്ള നടപടികള്‍ വേഗത്തിലാക്കാന്‍ മന്ത്രി കടന്നപ്പള്ളി രാമചന്ദ്രന്‍റെ നിര്‍ദേശം. രജിസ്‌ട്രേഷന്‍ വകുപ്പ് വയനാട്, കോഴിക്കോട് ജില്ലകളുടെ അവലോകന യോഗം വെസ്റ്റ്ഹില്‍ ഗവ. ഗെസ്റ്റ്ഹൗസില്‍ ഉദ്ഘാടനം ചെയ്യുകയായിരുന്നു മന്ത്രി. രജിസ്‌ട്രേഷന്‍ വകുപ്പ് ഇന്‍സ്‌പെക്ടര്‍ ജനറല്‍ ശ്രീധന്യ സുരേഷ് അധ്യക്ഷത വഹിച്ചു. പഴക്കമുള്ള കെട്ടിടങ്ങള്‍ ആധുനിക സൗകര്യങ്ങളോടെ പുനര്‍നിര്‍മിക്കുക, മുഴുവന്‍ രജിസ്ട്രാര്‍ ഓഫീസുകളും കമ്പ്യൂട്ടര്‍വത്കരിക്കുക, ടോക്കണ്‍ സംവിധാനം ഏര്‍പ്പെടുത്തല്‍, ഓണ്‍ലൈന്‍ സര്‍ട്ടിഫിക്കറ്റുകള്‍, ആധാര പകര്‍പ്പുകള്‍, ബാധ്യത സര്‍ട്ടിഫിക്കറ്റുകള്‍ എന്നിവ ഓണ്‍ലൈനില്‍ ലഭ്യമാക്കല്‍, ജില്ലക്കകത്തെ ഏത് സബ് രജിസ്ട്രാര്‍ ഓഫീസിലും ആധാരങ്ങള്‍ രജിസ്റ്റര്‍ ചെയ്യാനുള്ള സൗകര്യം, മുദ്രപത്രങ്ങള്‍ക്ക് ഇ സ്റ്റാമ്പിംഗ്, ഓണ്‍ലൈന്‍ വിവാഹ രജിസ്‌ട്രേഷന്‍, പണമിടപാടുകള്‍ക്ക് ഇ -പോസ്, ഇ -പേയ്‌മെന്‍റ് സൗകര്യം, ഡിജിറ്റല്‍ എന്‍ഡോഴ്‌സ്‌മെന്‍റ് തുടങ്ങിയ സേവനങ്ങള്‍ പരിഷ്‌കരിക്കും. പൊതുജന സേവനങ്ങള്‍ കുടുതല്‍ സുതാര്യവും സുഗമവുമാക്കുകയാണ് പരിഷ്‌കാരങ്ങളിലൂടെ ലക്ഷ്യമിടുന്നത്.സബ് രജിസ്ട്രാര്‍ ഓഫീസുകളില്‍ ജനകീയ സമിതികള്‍ രൂപീകരിച്ചതായും എല്ലാ മാസവും മൂന്നാമത്തെ ശനിയാഴ്ചകളില്‍ സമിതികള്‍ ചേരുന്നതായും ബന്ധപ്പെട്ടവര്‍ അറിയിച്ചു. സബ് രജിസ്ട്രാര്‍ ഓഫീസിലെ ജീവനക്കാര്‍ റൊട്ടേഷന്‍ അടിസ്ഥാനത്തില്‍ ജോലി ചെയ്യണമെന്ന നിര്‍ദേശം പൂര്‍ണമായും പ്രാബല്യത്തില്‍ വരുന്നുണ്ടെന്ന് മേലുദ്യോഗസ്ഥര്‍ ഉറപ്പാക്കണമെന്നും നിര്‍ദേശം നല്‍കി.

പഴയ വാഹനങ്ങളുടെ രജിസ്‌ട്രേഷന്‍ പുതുക്കുന്നവരുടെ എണ്ണം കുറയുന്നു

കോഴിക്കോട്:15 വര്‍ഷം കഴിഞ്ഞ പഴയ വാഹനങ്ങളുടെ രജിസ്‌ട്രേഷന്‍ പുതുക്കുന്നവരുടെ എണ്ണം കുറയുന്നതായി മോട്ടോര്‍ വാഹന വകുപ്പ്. 15 വര്‍ഷം കഴിഞ്ഞ വാഹനങ്ങള്‍ക്ക് രജിസ്ട്രേഷന്‍ പുതുക്കാന്‍ 50 ശതമാനം നികുതികൂട്ടിയതോടെ പലരും റിന്യൂവല്‍ ചെയ്യാന്‍ മുതിരുന്നില്ല. രജിസ്‌ട്രേഷന്‍ പുതുക്കിയില്ലെങ്കില്‍ 3200 രൂപയാണ് പിഴ. മാത്രമല്ല പുതുക്കുന്ന സമയത്ത് ഇന്‍ഷ്വറന്‍സ്, മുന്‍പ് വാഹനങ്ങള്‍ക്കുണ്ടായിരുന്ന പിഴ എന്നിവയെല്ലാം അടയ്ക്കണം. ഫലത്തില്‍ വലിയൊരു തുക ഇതിനായി കണ്ടെത്തണം. ഇതിനായി ഏജന്‍റുമാര്‍ക്കുള്ള തുക വേറെ. പഴയ വാഹനങ്ങളുടെ മൂന്നിലൊന്നുപോലും ഫിറ്റ്‌നസ് പരിശോധനയ്ക്ക് എത്തിയില്ലെന്നാണ് വിവരം. വലിയ സാമ്പത്തിക ബാധ്യതവരുന്നതിനാല്‍ പലരും ഇതിന് മുതിരുന്നില്ലെന്നാണ് ഉദ്യോഗസ്ഥര്‍ പറയുന്നത്. മൂന്നുമാസം വരെ ഒരേ പിഴ തുകയായതിനാല്‍ കാത്തുനില്‍ക്കുന്നവരും വേറെ. അതേസമയം രജിസ്‌ട്രേഷന്‍ പുതുക്കാത്ത വാഹനങ്ങള്‍ സര്‍വീസ് നടത്തുന്നത് ശ്രദ്ധയില്‍പെട്ടാല്‍ ഉദ്യോഗസ്ഥര്‍ക്ക് കാര്‍ കസ്റ്റഡിയില്‍ എടുക്കാനും തുടര്‍ നടപടികള്‍ സ്വീകരിക്കാനും സാധിക്കും. പഴയവാഹനങ്ങള്‍ പൊളിക്കാന്‍ നിര്‍ബന്ധിതമാക്കുന്നവിധമാണ് ഏപ്രില്‍ ഒന്നുമുതല്‍ നികുതി വര്‍ധിച്ചത്. രജിസ്ട്രേഷന്‍ പുതുക്കാന്‍ അധിക തുക ചെലവഴിക്കേണ്ടത് ഇത്തരം വാഹനങ്ങളുടെ ഡിമാന്‍ഡ് കുറക്കാന്‍ ഇടയാക്കിയിട്ടുണ്ട്. പഴയ വാഹനങ്ങള്‍ ഉപേക്ഷിക്കാന്‍ കൂടുതല്‍ പേര്‍ തയാറായാല്‍ പുതിയ വണ്ടികളുടെ വില്പന കൂടുമെന്നപ്രതീക്ഷയും അസ്ഥാനത്തായി.15 വര്‍ഷത്തിനുശേഷം ഒരോ അഞ്ചുവര്‍ഷത്തേക്കാണ് സ്വകാര്യവാഹനങ്ങളുടെ രജിസ്ട്രേഷന്‍ പുതുക്കുന്നത്. കുത്തനെയുള്ള വര്‍ധനവ് വലിയ തിരിച്ചടിയാണ് ഉണ്ടാക്കിയിരിക്കുന്നത്. വര്‍ഷം 55 കോടിയുടെ അധികവരുമാനമാണ് ഇതിലൂടെ സര്‍ക്കാര്‍ ലക്ഷ്യമിട്ടിരിക്കുന്നത്.

വാഹനാപകടത്തിൽ പരിക്കേറ്റ വീട്ടമ്മ മരിച്ചു

കൊയിലാണ്ടി: വാഹനാപകടത്തിൽ പരിക്കേറ്റ് ചികിത്സയിലിരിക്കെ വീട്ടമ്മ മരിച്ചു. കാപ്പാട് വികാസ് നഗർപാർവണത്തിൽ ബീന (54) ആണ് മരിച്ചത്. അങ്കണവാടി വർക്കറായിരുന്നു. ഭർത്താവ്: കൃഷ്ണൻ മാട്ടുമ്മൽ. മക്കൾ: അമ്പിളി കൃഷ്ണ (കുവൈത്ത്), ഡോ. ആകാശ് കൃഷ്ണ ( മെഡിക്കൽ ഓഫീസർ, സെൻട്രൽ മെഡിക്കൽ സർവീസ്, ഗുണ്ടൽപേട്ട, കർണ്ണാടക). മരുമകൻ: ജിതിൻ തടത്തിൽ (എടപ്പാൾ കുവൈത്ത്). സഹോദരങ്ങൾ: ശ്യാമള, ദേവദാസ് (പാലക്കാട്), മോഹൻദാസ്, ഗീത (എലത്തൂർ), ഷീല (ആനവാതിൽ) ബിനേഷ്, ബിജേഷ്. മരണാനന്തരം കണ്ണുകൾ കോഴിക്കോട് മെഡിക്കൽ കോളജ് നേത്ര ബാങ്കിന് ദാനം ചെയ്തു.

ചിറ്റടിക്കടവ് പാലം: 9.20 കോടി രൂപയുടെ ഭരണാനുമതി

കോഴിക്കോട്: എലത്തൂർ നിയോജക മണ്ഡലത്തിലെ ചിറ്റടിക്കടവ് പാലത്തിന് 9.20 കോടി രൂപയുടെ ഭരണാനുമതി ലഭിച്ചതായി വനം വന്യജീവി സംരക്ഷണ വകുപ്പ് മന്ത്രി എ.കെ. ശശീന്ദ്രൻ അറിയിച്ചു. കോർപറേഷനിലെ മൊകവൂരിനെയും കക്കോടി ഗ്രാമപഞ്ചായത്തിനെയും ബന്ധിപ്പിക്കുന്ന പാലം യാഥാർഥ്യമാകുന്നതോടെ ജനങ്ങളുടെ ഗതാഗതപ്രശ്നത്തിന് പരിഹാരമാകും. പ്രദേശവാസികളുടെ ചിരകാല ആവശ്യമായിരുന്നു ചിറ്റടിക്കടവ് പാലം. സാങ്കേതിക നടപടികൾ പൂർത്തിയാക്കി പാലം നിർമാണം വേഗത്തിലാക്കുമെന്ന് മന്ത്രി അറിയിച്ചു.

പഹൽഗാം ഭീകരാക്രമണം: കോൺഗ്രസ് പ്രതിഷേധജ്വാല തെളിയിച്ചു

കൂരാച്ചുണ്ട് : പഹൽഗാം ഭീകരാക്രമണത്തിനെതിരേ കൂരാച്ചുണ്ട് മണ്ഡലം കോൺഗ്രസ്‌ കമ്മിറ്റിയുടെ നേതൃത്വത്തിൽ പ്രതിഷേധ ജ്വാല തെളിയിച്ചു. ഭീകരവിരുദ്ധ പ്രതിജ്ഞ എടുത്തു. ഡിസിസി സെക്രട്ടറി അഗസ്റ്റിൻ കാരക്കട ഉദ്ഘാടനം ചെയ്തു. നിയുക്ത മണ്ഡലം പ്രസിഡന്‍റ് ജോസ് വെളിയത്ത് അധ്യക്ഷത വഹിച്ചു. യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം പ്രതിജ്ഞ ചൊല്ലിക്കൊടുത്തു. രാജു കിഴക്കേകര, സജി വെങ്കിട്ടയ്ക്കൽ, കുര്യൻ ചെമ്പനാനി, ജെറിൻ കുര്യാക്കോസ്, മനു ചേലാപറമ്പത്ത്, ജ്യോതിഷ് രാരപ്പൻകണ്ടി, വി.ജെ.സെബാസ്റ്റ്യൻ, കെ.സി.സണ്ണി എന്നിവർ പ്രസംഗിച്ചു.

കോൺഗ്രസ് ഭീകരവിരുദ്ധ പ്രതിജ്ഞയെടുത്തു

കോടഞ്ചേരി: ജമ്മു കാശ്മീർ പഹൽഗാം ഭീകരാക്രമണത്തിൽ കൊല്ലപ്പെട്ടവരോടുള്ള ആദരാഞ്ജലികൾ അർപ്പിച്ചുകൊണ്ട് മണ്ഡലം കോൺഗ്രസ് കമ്മിറ്റി പ്രതിഷേധ ജ്വാല തെളിച്ചുകൊണ്ട് ഭീകരവിരുദ്ധ പ്രതിജ്ഞ എടുത്തു. മണ്ഡലം കോൺഗ്രസ് പ്രസിഡന്‍റ് വിൻസെന്‍റ് വടക്കേമുറിയിൽ അധ്യക്ഷത വഹിച്ചു. യുഡിഎഫ് ചെയർമാൻ കെ.എം. പൗലോസ് ഭീകരവിരുദ്ധ പ്രതിജ്ഞ ചൊല്ലി. ബ്ലോക്ക് കോൺഗ്രസ് പ്രസിഡന്‍റ് ജോബി ഇലന്തൂർ, പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, കർഷക കോൺഗ്രസ് സംസ്ഥാന സെക്രട്ടറി സണ്ണി കാപ്പാട്ട് മല, ബ്ലോക്ക് പഞ്ചായത്ത് മെമ്പർ റോയി കുന്നപ്പള്ളി, ബ്ലോക്ക് കോൺഗ്രസ് വൈസ് പ്രസിഡന്‍റ് ജോസ് പൈക, ആന്‍റണി നീർവേലിൽ, പി.പി. നാസർ, ഫ്രാൻസിസ് ചാലിൽ, ബിജു ഓത്തിക്കൽ, ലിസി ചാക്കോ, ചിന്ന അശോകൻ എന്നിവർ പങ്കെടുത്തു.

ജില്ലാതല വോളിമേള ആരംഭിച്ചു

കൂടരഞ്ഞി: അർജുന സ്പോർട്സ് ക്ലബ് സംഘടിപ്പിക്കുന്ന സോമൻ അഞ്ചേരിൽ, കിരൺ ടോംസൺ വളയത്തിൽ സ്മാരക ജില്ലാതല വോളി മേള പഞ്ചായത്ത് സ്റ്റേഡിയത്തിൽ പ്രസിഡന്‍റ് ആദർശ് ജോസഫ് ഉദ്ഘാടനം ചെയ്തു. വി.എം. മാത്യു അധ്യക്ഷത വഹിച്ചു. വി.എ. ജോസ്, വിപിൻ തോമസ്, എം.ടി. തോമസ്, ജസ്റ്റിൻ ജോസ്, നജ്മുദ്ദീൻ, പ്രദീപ് കുമാർ, ജോസ് നരിക്കാട്ട്, എം.ജെ. ജയിംസ് എന്നിവർ പ്രസംഗിച്ചു. എട്ട് ടീമുകൾ പങ്കെടുക്കുന്ന മേളയുടെ ഉദ്ഘാടന മത്സരത്തിൽ കെടിസി ചാത്തമംഗലം വോളിലവേഴ്സ് കുളിരാമുട്ടിയെ പരാജയപ്പെടുത്തി.

ബീച്ചില്‍ രമേശ് ചെന്നിത്തലയുടെ സമൂഹ നടത്തം ഇന്ന്

കോഴിക്കോട്: കേരളത്തെയാകെ ബാധിച്ച ലഹരിമരുന്നു ഉപഭോഗത്തിനെതിരെ സംസ്ഥാനത്തെ സകലവിഭാഗം ജനങ്ങളെയും അണിനിരത്താനുള്ള ശ്രമത്തിന്‍റെ ഭാഗമായി കോഴിക്കോട് ബീച്ചില്‍ മുന്‍ പ്രതിപക്ഷനേതാവ് രമേശ് ചെന്നിത്തലയുടെ നേതൃത്വത്തില്‍ സമൂഹനടത്തം സംഘടിപ്പിക്കുന്നു. ഇന്ന് രാവിലെ ആറു മണിക്കാണ് ബോധവല്‍ക്കരണ സമൂഹ നടത്തം. ലഹരിമരുന്നിനെതിരെയുള്ള ബോധവല്‍ക്കരണത്തിനായി രമേശ് ചെന്നിത്തല രൂപം കൊടുത്ത പ്രൗഡ് കേരള മൂവ്മെന്‍റിന്‍റെ നേതൃത്വത്തിലാണ് നടത്തം. സാംസ്‌കാരിക രാഷ്ട്രീയ മണ്ഡലങ്ങളിലെ പ്രമുഖര്‍ തുടങ്ങി സമൂഹത്തിന്‍റെ നാനാതുറയില്‍പെട്ടവര്‍ ഈ സമൂഹനടത്തത്തില്‍ പങ്കു ചേരുമെന്ന് പ്രൗഡ് കേരള ചെയര്‍മാന്‍ മലയിന്‍കീഴ് വേണുഗോപാല്‍ അറിയിച്ചു.

ലഹരിക്കെതിരേ ബഹുജന കൂട്ടായ്മ സംഘടിപ്പിച്ചു

താമരശേരി: സാമൂഹ്യ ദുരന്തമായി മാറിയ ലഹരി ഉപയോഗത്തിനും വിപണനത്തിനുമെതിരേ ഓമശേരി അമ്പലക്കണ്ടി എട്ടാം വാർഡ്‌ വികസന സമിതി ബഹുജന കൂട്ടായ്മ സംഘടിപ്പിച്ചു. കക്ഷി-രാഷ്ട്രീയ വ്യത്യാസമില്ലാതെ ബഹുജനങ്ങൾ അണിനിരന്ന വിപുലമായ സംഗമം ലഹരിക്കെതിരേയുള്ള നാടിന്‍റെ താക്കീതായി. ലഹരിയെന്ന കൊ‌ടിയ വിപത്തിനെതിരേ ഒറ്റക്കെട്ടാണെന്ന മുദ്രാവാക്യമുയർത്തിയാണ്‌ ബഹുജന കൂട്ടായ്മ സമാപിച്ചത്‌.അമ്പലക്കണ്ടി താജുദ്ദീൻ മദ്‌റസയിൽ നടന്ന ബഹുജന കൂട്ടായ്മയിൽ പഞ്ചായത്ത്‌ വികസന സ്റ്റാൻഡിംഗ്‌ കമ്മിറ്റി ചെയർമാൻ യൂനുസ്‌ അമ്പലക്കണ്ടി അധ്യക്ഷത വഹിച്ചു. കൊടുവള്ളി പോലീസ്‌ ഇൻസ്പെക്ടർ (എസ്‌എച്ച്‌ഒ) കെ.പി. അഭിലാഷ്‌ ഉദ്ഘാടനം ചെയ്തു. വാർഡ്‌ വികസന സമിതി കൺവീനർ അബു മൗലവി അമ്പലക്കണ്ടി, എക്സൈസ്‌ ഓഫീസർ കെ. അതുൽ, കോഴിക്കോട്‌ സിജി ട്രെയിനർ പി.എ. ഹുസൈൻ എന്നിവർ ക്ലാസെടുത്തു. പി. സുൽഫീക്കർ പ്രതിജ്ഞ ചൊല്ലിക്കൊടുത്തു. ബ്ലോക്ക് പഞ്ചായത്ത്‌ മെംബർ എസ്‌.പി. ഷഹന, പഞ്ചായത്തംഗങ്ങളായ കെ. ആനന്ദകൃഷ്ണൻ, അശോകൻ പുനത്തിൽ, പഞ്ചായത്ത്‌ മുൻ പ്രസിഡന്‍റ് കെ.എം. കോമളവല്ലി എന്നിവർ പ്രസംഗിച്ചു.

കോൺഗ്രസ് ഭീകര വിരുദ്ധ പ്രതിജ്ഞയെടുത്തു

താമരശേരി: ജമ്മു കാശ്മീരിലെ പഹൽഗാം കൂട്ടക്കൊലയ്ക്കിരയായ ആളുകൾക്ക് ആദരാഞ്ജലികൾ അർപ്പിച്ച് പുതുപ്പാടി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ മെഴുകുതിരികൾ തെളിയിച്ച് ഭീകര വിരുദ്ധ പ്രതിജ്ഞയെടുത്തു. തുടർന്ന് നടന്ന പ്രതിഷേധ യോഗം ഡിസിസി വൈസ് പ്രസിഡന്‍റ് അന്നമ്മ മാത്യു ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് രാജേഷ് ജോസ് ആധ്യക്ഷത വഹിച്ചു. ദേവസ്യ ചൊള്ളാമഠം, ബിജു പിള്ള, ജാഫർ പൊന്നാങ്കണ്ടി, രതീഷ് പ്ലാപ്പറ്റ, വി.എസ്. നൗഷാദ്, ശാരദ ഞാറ്റുപറമ്പിൽ, ബഷീർ പുഴങ്കര, ഷറഫു കല്ലടിക്കുന്ന്, നാസർ കക്കാട്, എൻ.ആർ. ഷാജി, വിജീഷ് കക്കാട്, കെ.ടി. ഹസൻ, റജി കണ്ണന്താനം, അസീസ് പിലാക്കൽ, സുബൈർ വേളാട്ടിൽ, അജി മാത്യു, സജി മണ്ഡലത്തിൽ, അനൂപ് കക്കാട് എന്നിവർ പ്രസംഗിച്ചു.

മലയോര ഹൈവേ നിർമാണം: ചക്കിട്ടപാറ ടൗണിൽ റോഡ് വീതി നിർണയത്തിൽ കൃത്രിമത്വമെന്ന്

ചക്കിട്ടപാറ: മലയോര ഹൈവേയുടെ ഭാഗമായ ചക്കിട്ടപാറ ടൗണിലെ റോഡ് വീതി അളവിൽ കൃത്രിമത്വം നടക്കുന്നതായി വ്യാപക പരാതി. ആക്ഷേപം പരിശോധിച്ച് ശരിയായ രീതിയിൽ റോഡ് നിർമാണം നടത്താൻ ബന്ധപ്പെട്ടവർ തയാറാകാത്തതിൽ നാട്ടുകാർക്ക് സംശയമുണ്ട്. പണി നിരീക്ഷിക്കാൻ പഞ്ചായത്ത് തലത്തിൽ മോണിറ്ററിംഗ് കമ്മിറ്റി നേരത്തെ രൂപീകരിച്ചിട്ടുണ്ടെങ്കിലും ഇതിന്‍റെ പ്രവർത്തനവും അവതാളത്തിലാണ്‌. പെരുവണ്ണാമൂഴി - ചക്കിട്ടപാറ - ചെമ്പ്ര റോഡിന്‍റെ വികസനത്തിന് വർഷങ്ങൾക്ക് മുമ്പ് തന്നെ സ്ഥലം അക്വയർ ചെയ്തിട്ടുണ്ട്‌. ഇത് താലൂക്ക് സർവേയർ വീണ്ടും പരിശോധിച്ച് വീതി അളവ് നിർണ്ണയിച്ചാൽ പ്രശ്നം പരിഹരിക്കും. പക്ഷേ ചിലർ ഇതിനു സമ്മതിക്കുന്നില്ല. ഇതാണ് പ്രശ്‌നത്തിലെ ദുരൂഹതയും. തർക്കങ്ങൾ കാരണം ടൗണിലെ ഹൈവേ നിർമാണം തടസപ്പെട്ടിരിക്കുകയാണ്. പ്രശ്‌നത്തിൽ സത്വര നടപടി ആവശ്യപ്പെട്ട്‌ വ്യാപാരികൾ രംഗത്തു വന്നിട്ടുണ്ട്.

കൊയിലാണ്ടിയില്‍ കുടുംബശ്രീ അരങ്ങ് കലോത്സവത്തിന് തുടക്കം

കൊയിലാണ്ടി: നഗരസഭയില്‍ കുടുംബശ്രീ അരങ്ങ് കലോത്സവത്തിന് തുടക്കമായി. സിഡിഎസ് യൂണിറ്റുകളില്‍ നിന്നുള്ള കുടുംബശ്രീ അംഗങ്ങളും കുടുംബാംഗങ്ങളുമാണ് മത്സരങ്ങളില്‍ പങ്കെടുക്കുന്നത്. രചന മത്സരങ്ങള്‍ക്ക് പുറമെ നാടന്‍പാട്ട്, ലളിതഗാനം, മാപ്പിളപ്പാട്ട്, കവിത പാരായണം തുടങ്ങിയ ഇനങ്ങളിലും മത്സരമുണ്ട്. വിജയികള്‍ക്ക് ബ്ലോക്ക്, ജില്ലാതല മത്സരങ്ങളില്‍ പങ്കെടുക്കാം. കൊയിലാണ്ടി ടൗണ്‍ ഹാളില്‍ നടന്ന ചടങ്ങ് നഗരസഭ ചെയര്‍പേഴ്‌സണ്‍ സുധ കിഴക്കേപാട്ട് ഉദ്ഘാടനം ചെയ്തു. ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ. ഷിജു അധ്യക്ഷത വഹിച്ചു. വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ നിജില പറവക്കൊടി, മെമ്പര്‍ സെക്രട്ടറി വി. രമിത, നോര്‍ത്ത് സിഡിഎസ് ചെയര്‍പേഴ്‌സണ്‍ ഇന്ദുലേഖ, സൗത്ത് സിഡിഎസ് ചെയര്‍പേഴ്‌സണ്‍ വിബിന, എന്‍യുഎംഎല്‍ പ്രതിനിധികളായ വി.എസ്. റീന, പി.കെ. മിനി എന്നിവര്‍ പ്രസംഗിച്ചു.

വൈബ്രന്‍റ് വില്ലേജ് പ്രോഗ്രാമിന് അപേക്ഷിക്കാം

കോഴിക്കോട്: കേന്ദ്ര യുവജനകാര്യ മന്ത്രാലയം വികസിത വൈബ്രന്‍റ് വില്ലേജ് പ്രോഗ്രാം പരിപാടിയിലൂടെ ലേ-ലഡാക്, ഹിമാചല്‍പ്രദേശ്, ഉത്തരാഖണ്ഡ് എന്നീ സംസ്ഥാനങ്ങളിലെ ഗ്രാമങ്ങളില്‍ 10 ദിവസം താമസിച്ചു പഠിക്കാനും സേവനപ്രവര്‍ത്തനങ്ങള്‍ നടത്താനും അവസരം ഒരുക്കുന്നു. യുവജനകാര്യം, ഗ്രാമവികസനം, സാംസ്‌കാരിക വിനിമയം, സാമൂഹ്യ സേവനം എന്നീ മേഖലകളില്‍ പ്രവര്‍ത്തിക്കാന്‍ താല്‍പര്യമുള്ള ശാരീരികക്ഷമതയുള്ള 21നും 29നും ഇടയില്‍ പ്രായമുള്ള യുവതി യുവാക്കള്‍ക്കാണ് അവസരം. നെഹ്റു യുവകേന്ദ്ര, എന്‍എസ്എസ്, എന്‍സിസി, സ്‌കൗട്ട് ആന്‍ഡ് ഗൈഡ്‌സ് വളന്‍റിയര്‍മാര്‍ക്ക് മുന്‍ഗണന ലഭിക്കും. താല്‍പര്യമുള്ളവര്‍ക്ക് മേരാ യുവഭാരത് പോര്‍ട്ടലില്‍ മെയ് മൂന്ന് വരെ രജിസ്റ്റര്‍ ചെയ്യാം. മേയ് 15 മുതല്‍ 30 വരെയുള്ള പരിപാടിയില്‍ കേരളത്തില്‍നിന്ന് 15 പേര്‍ക്കും ലക്ഷദ്വീപില്‍നിന്ന് 10 പേര്‍ക്കുമാണ് അവസരം. കൂടുതല്‍ വിവരങ്ങള്‍ക്ക് കോഴിക്കോട് നെഹ്റു യുവകേന്ദ്ര ഓഫീസുമായോ എന്‍എസ്എസ് പ്രോഗ്രാം ഓഫീസുമായോ ബന്ധപ്പെടാം. ഫോണ്‍: 9447752234.

ഫ്രണ്ട്സ് മിഷനറി പ്രെയർ ബാൻഡ് സംസ്ഥാന കൺവൻഷൻ

കോഴിക്കോട്: ഭാരതത്തിലെ ഗോത്രവർഗക്കാരുടെയും പാർശ്വവൽക്കരിക്കപ്പെട്ടവരുടെയും സമഗ്ര വികസനത്തിനായി പ്രവർത്തിക്കുന്ന ഫ്രണ്ട്സ് മിഷനറി പ്രെയർ ബാൻഡിന്‍റെ സംസ്ഥാന കൺവൻഷൻ ഇന്ന് വൈകുന്നേരം 6.30ന് കോഴിക്കോട് സിഎസ്ഐ കത്തീഡ്രൽ ചർച്ചിൽ ആരംഭിക്കും. ഫ്രണ്ട്സ് മിഷനറി പ്രെയർ ബാൻഡ് ജനറൽ സെക്രട്ടറി റവ. വിജയ് പി. ഐസക് കൺവൻഷൻ ഉദ്ഘാടനം ചെയ്യും. റവ. ജേക്കബ് ദാനിയേൽ അധ്യക്ഷത വഹിക്കും. റവ. ഡോ. ജേക്കബ് തോമസ്, റവ. ഏബ്രഹാം തോമസ്‌, ഡോ. വിനീത് ഗ്ലാഡ്സൺ എന്നിവർ വിവിധ യോഗങ്ങളിൽ വചന ശുശ്രൂഷ നിർവഹിക്കും. റീജിനൽ സെക്രട്ടറി റവ. ഗോൾഡൻ ഇൻപരാജ്, റോയി പി. മാത്യു എന്നിവരുടെ നേതൃത്വത്തിലുള്ള വിപുലമായ കമ്മിറ്റി കൺവെൻഷനു ക്രമീകരണങ്ങൾ നടത്തും. 27ന് വൈകുന്നേരം 8.30ന് കൺവൻഷൻ സമാപിക്കും.

വാർഡ്തല ശുചീകരണ പ്രവർത്തനങ്ങൾ അവതാളത്തില്‍

കോഴിക്കോട്: ജില്ലയിൽ മഞ്ഞപ്പിത്തം, എലിപ്പനി, ഡങ്കിപ്പനി തുടങ്ങിയ പകർച്ചവ്യാധികൾ പടർന്നുപിടിക്കുമ്പോഴും പ്രതിരോധ പ്രവർത്തനങ്ങൾക്ക് ഫണ്ടില്ലാതെ ആരോഗ്യവകുപ്പ് ഇരുട്ടിൽതപ്പുന്നു. ജില്ലയിൽ തദ്ദേശസ്ഥാപനങ്ങൾക്ക് ദേശീയ ആരോഗ്യ ദൗത്യം (എൻഎച്ച്എം) മുഖേന വാർഡ് ശുചിത്വ പ്രവർത്തനങ്ങൾക്ക് നൽകിയിരുന്ന 10,000 രൂപ ഇത്തവണ അനുവദിച്ചില്ല. അതിനാൽ വാർഡ്തല ശുചീകരണ പ്രവർത്തനങ്ങൾ അവതാളത്തിലായിരിക്കുകയാണ്. കിണറുകളുടെ ക്ലോറിനേഷൻപോലും നടത്താൻ പറ്റാത്ത അവസ്ഥയാണെന്ന് ആരോഗ്യ പ്രവർത്തകർ വ്യക്തമാക്കുന്നു. സാധാരണഗതിയിൽ വർഷത്തിൽ നാലുതവണയും ജലജന്യരോഗങ്ങൾ ഉണ്ടാവുമ്പോൾ അതിൽ കൂടുതലും തവണ ക്ലോറിനേഷൻ നടത്തും. സന്നദ്ധപ്രവർത്തകർക്ക് ഓണറേറിയം നൽകിയാണ് കഴിഞ്ഞവർഷം വരെ ഇത് ചെയ്തുകൊണ്ടിരുന്നത്. എന്നാൽ, ഫണ്ടില്ലാത്തതിനാൽ ഇത്തവണ അത് മുടങ്ങി. പകർച്ചവ്യാധികളും പകർച്ചവ്യാധി മരണങ്ങളും വ്യാപിക്കുന്നതിനിടെയാണ് ആരോഗ്യവകുപ്പ് പ്രതിരോധ പ്രവർത്തനങ്ങളോട് മുഖം തിരിഞ്ഞുനിൽക്കുന്നത്. എൻഎച്ച്എം പദ്ധതികൾക്ക് സർക്കാറിൽനിന്ന് ലഭിക്കേണ്ട ഫണ്ട് വെട്ടിക്കുറച്ചതാണ് പ്രതിരോധ പ്രവർത്തനങ്ങളെ അവതാളത്തിലാക്കിയത്.

ബേപ്പൂർ ജെട്ടിയിലെ റാമ്പ് തകർന്നു: മനുഷ്യാവകാശ കമ്മീഷൻ കേസെടുത്തു

ബേപ്പൂർ: ചാലിയം ജങ്കാർ സർവീസ് നടത്തുന്ന ബേപ്പൂർ ജെട്ടിയിലെ റാമ്പിന്‍റെ മുൻഭാഗവും ഇരുവശങ്ങളും തകർന്ന് ഇരുമ്പുകമ്പികൾ കോൺക്രീറ്റിൽ നിന്നും പുറത്തായിട്ടും തകരാർ പരിഹരിക്കാൻ നടപടിയെടുത്തില്ലെന്ന പരാതിയിൽ മനുഷ്യാവകാശ കമ്മീഷൻ കേസെടുത്ത് കടലുണ്ടി പഞ്ചായത്ത് സെക്രട്ടറിക്ക് നോട്ടീസയച്ചു. കഴിഞ്ഞ ദിവസം യാത്രക്കാർ ജങ്കാറിലേക്ക് കയറുന്നതിനിടയിൽ അവരുടെ കാലുകൾ റാമ്പിനുള്ളിൽ കുടുങ്ങിയ സംഭവത്തിന്‍റെ പശ്ചാത്തലത്തിലാണ് കമ്മീഷൻ ജുഡീഷൽ അംഗം കെ. ബൈജുനാഥ് നടപടിയെടുത്തത്. ബൈക്ക് ജങ്കാറിലേക്ക് കയറ്റുന്നതിനിടയിൽ മണ്ണൂർ സ്വദേശിക്ക് പരിക്കേറ്റിരുന്നു. ഒരാഴ്ചക്ക് മുമ്പ് കൈക്കുഞ്ഞുമായി എത്തിയ യാത്രക്കാരിയും വയോധികയും റാമ്പിലേക്ക് തെന്നി വീണു. ബേപ്പൂർ ജെട്ടിക്കടുത്തുള്ള ജങ്കാർ കാത്തിരിപ്പുകേന്ദ്രവും തകർന്ന നിലയിലാണ്. കടലുണ്ടി പഞ്ചായത്തിന്‍റെ നിയന്ത്രണത്തിലാണ് ജങ്കാർ സർവീസ് നടത്തുന്നത്. ജങ്കാർ സർവീസിലെ പാകപിഴകൾ കടലുണ്ടി പഞ്ചായത്ത് കണ്ടില്ലെന്ന് നടിക്കുന്നതായും പരാതിയുണ്ട്. പഞ്ചായത്ത് സെക്രട്ടറി 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ആവശ്യപ്പെട്ടു. മേയിൽ കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തകളുടെ അടിസ്ഥാനത്തിലാണ് കമ്മീഷൻ സ്വമേധയാ കേസെടുത്തത്.

ജല്‍ ജീവന്‍ മിഷന്‍ : ജില്ലയില്‍ നല്‍കിയത് 2,84,750 കുടിവെള്ള കണക്‌ഷനുകള്‍

കോഴിക്കോട്: ഗ്രാമീണ ഭവനങ്ങളില്‍ പൈപ്പിലൂടെ കുടിവെള്ളം ലഭ്യമാക്കുന്ന ജല്‍ ജീവന്‍ മിഷന്‍ പദ്ധതിയില്‍ ഒമ്പത് വര്‍ഷത്തിനിടെ ജില്ലയില്‍ നല്‍കിയത് മൂന്ന് ലക്ഷത്തോളം കണക്‌ഷനുകള്‍. പദ്ധതിയുടെ ഒന്നാംഘട്ടം ജില്ലയില്‍ പൂര്‍ത്തിയാകുമ്പോള്‍ 2,84,750 കണക്ഷനുകളാണ് ജല അഥോറിറ്റി നല്‍കിയത്. ജലശുദ്ധീകരണശാലകളുടെ പ്രവൃത്തി പൂര്‍ത്തീകരിക്കുന്നതോടെ എല്ലാ പഞ്ചായത്തുകളിലെയും മുഴുവന്‍ വീടുകളിലും വിതരണ ശൃഖല സ്ഥാപിച്ച് ശുദ്ധമായ കുടിവെള്ളം ലഭ്യമാക്കാനാകും. ജല്‍ ജീവന്‍ മിഷന്‍ പദ്ധതി പ്രകാരം 5,26,159 ഗാര്‍ഹിക കുടിവെള്ള കണക്ഷനുകള്‍ നല്‍കാന്‍ 4508.95 കോടി രൂപയുടെ ഭരണ, സാങ്കേതിക അനുമതികളാണ് ലഭിച്ചത്. രണ്ടാംഘട്ട പദ്ധതിയില്‍ ഉള്‍പ്പെടുത്തി ജില്ലയിലെ പെരുവണ്ണാമുഴിയില്‍ 100 എംഎല്‍ഡി ശുദ്ധീകരണശാല നിര്‍മിച്ച് കൂരാച്ചുണ്ട്, കായണ്ണ, നൊച്ചാട്, അരിക്കുളം, മേപ്പയൂര്‍, കീഴരിയൂര്‍, തിക്കോടി, മൂടാടി, കൂത്താളി, ചങ്ങരോത്ത്, പനങ്ങാട്, ഉള്ള്യേരി, അത്തോളി, ചെങ്ങോട്ടുകാവ്, ചേമഞ്ചേരി ഗ്രാമപഞ്ചായത്തുകളില്‍ കുടിവെള്ളം എത്തിക്കുന്ന പദ്ധതി 65 ശതമാനത്തോളം പൂര്‍ത്തിയായി. ചാലിയാര്‍ പുഴ സ്രോതസായി കൂളിമാട് 100 എംഎല്‍ഡി ശുദ്ധീകരണശാല നിര്‍മിച്ച് ചാത്തമംഗലം, മടവൂര്‍, കിഴക്കോത്ത്, ഉണ്ണികുളം, താമരശേരി, കട്ടിപ്പാറ, പുതുപ്പാടി, കോടഞ്ചേരി പഞ്ചായത്തുകളില്‍ കുടിവെള്ളം എത്തിക്കുന്ന പദ്ധതിയും ഇതേ സ്രോതസില്‍നിന്ന് ആരംഭിച്ച് കാരശേരി, കൊടിയത്തൂര്‍, കൂടരഞ്ഞി, തിരുവമ്പാടി ഗ്രാമപഞ്ചായത്തുകളില്‍ കുടിവെള്ളം എത്തിക്കുന്ന പദ്ധതിയുടെ പ്രവൃത്തികളും ജില്ലയില്‍ ത്വരിതഗതിയില്‍ പൂര്‍ത്തീകരിച്ചു വരുന്നു. തുറയൂര്‍ പഞ്ചായത്തില്‍ 3,736 കണക്ഷനും കുന്നുമ്മല്‍ ഗ്രാമപഞ്ചായത്തില്‍ 4,011 കണക്ഷനും നല്‍കി പഞ്ചായത്തുകളെ ഹര്‍ ഘര്‍ ജല്‍ പഞ്ചായത്തായി പ്രഖ്യാപിച്ചു. ജില്ലയില്‍ ആദ്യമായി 100 ശതമാനം കുടിവെള്ള കണക്ഷനുകള്‍ പൂര്‍ത്തീകരിച്ച പഞ്ചായത്തെന്ന നേട്ടം സ്വന്തമാക്കിയത് തുറയൂറാണ്. പെരുവണ്ണാമൂഴിയിലെ 174 ദശലക്ഷം ലിറ്റര്‍ ശേഷിയുള്ള ശുദ്ധീകരണശാലയില്‍നിന്നാണ് ഇവിടെ വെള്ളമെത്തിക്കുന്നത്. ജില്ലയില്‍ കാക്കൂര്‍ (5323), കുരുവട്ടൂര്‍ (7265), ഒളവണ്ണ (14131), കക്കോടി (8602) എന്നീ പഞ്ചായത്തുകളിലെ പ്രവൃത്തികള്‍ അവസാന ഘട്ടത്തിലാണ്.

പുഴയിൽ ചാടിയ ആളുടെ മൃതദേഹം കണ്ടെത്തി

കൊയിലാണ്ടി: കഴിഞ്ഞ ദിവസം മുത്താമ്പി പുഴയിൽ ചാടിയ ആളുടെ മൃതദേഹം കണ്ടെത്തി. മന്ദങ്കാവ് എലമങ്കൽ കുറ്റിമാക്കൂൽ (വടകര) അബ്ദുറഹിമാ (76) ന്‍റെ മൃതദേഹമാണ് നെല്യാടി പാലത്തിന് 250 മീറ്റർ അകലെ നിന്നും ഇന്നലെ ഉച്ചയോടെ കണ്ടെത്തിയത്. കൊയിലാണ്ടിയിൽ നിന്നും മീഞ്ചന്ത, വെള്ളിമാട്കുന്ന്, മുക്കം നിലയങ്ങളിൽ നിന്നുമായി അഗ്നിരക്ഷാ സേനയുടെ സ്കൂബ ടീമാണ് തെരച്ചിൽ നടത്തിയത്. സൈനബയാണ് ഭാര്യ. മക്കൾ: നൗഷാദ്, സിറാജ് ( ഖത്തർ), സീനത്ത്.

ബസ് സ്റ്റാൻഡില്‍ മധ്യവയസ്‌കന്‍ മരിച്ച നിലയില്‍

‌വടകര: പുതിയ ബസ് സ്റ്റാൻഡില്‍ മധ്യവയസ്‌കന്‍ മരിച്ച നിലയില്‍. പഴങ്കാവ് സ്വദേശി പളളിമാടത്തുമ്മല്‍ പവിത്രനാണ് (56) മരിച്ചത്. ബസ് സ്റ്റാൻഡിന്‍റെ വടക്കേ പ്രവേശന കവാടത്തിലെ ഹോട്ടലിനു മുന്നിലാണ് മൃതദേഹം കാണപ്പെട്ടത്. കിടന്നുറങ്ങുകയാണെന്നാണ് ആളുകള്‍ കരുതിയത്. ഇന്നലെ രാവിലെ ഹോട്ടല്‍ തൊഴിലാളികള്‍ വിളിച്ചുണര്‍ത്തിയെങ്കിലും അനക്കമില്ലായിരുന്നു. വടകര പോലീസെത്തി മൃതദേഹം ജില്ലാ ആശുപത്രി മോര്‍ച്ചറിയിലേക്ക് മാറ്റി.

കർഷകനും കൃഷിക്കും സംരക്ഷണം നൽകണം: കർഷക സംഘം

മുക്കം: വന്യമൃഗങ്ങളിൽ നിന്ന് കൃഷിക്കും കർഷകനും സംരക്ഷണം ലഭിക്കാൻ സർക്കാർ നടപടി സ്വീകരിക്കണമെന്നും നഷ്ടപ്പെടുന്ന ജീവനും കൃഷിക്കും മതിയായ നഷ്ട പരിഹാരം നൽകണമെന്നും സ്വതന്ത്ര കർഷക സംഘം തിരുവമ്പാടി നിയോജക മണ്ഡലം കൺവൻഷൻ ആവശ്യപ്പെട്ടു. പ്രസിഡന്‍റ് നടുക്കണ്ടി അബൂബക്കർ അധ്യക്ഷത വഹിച്ചു. മണ്ഡലം മുസ്ലീം ലീഗ് പ്രസിഡന്‍റ് സി.കെ ഖാസിം ഉദ്ഘാടനം ചെയ്തു. മണ്ഡലം മുസ്ലീം ലീഗ് ജനറൽ സെക്രട്ടറി പി.ജി മുഹമ്മദ്,സെക്രട്ടറിമാരായ എ.കെ സാദിഖ്, കെ.പി അബ്ദുറഹിമാൻ, ജില്ലാ കർഷക സംഘം വൈസ് പ്രസിഡന്‍റ് എ.പി മൂസ,സെക്രട്ടറി ഷെരീഫ് അമ്പലകണ്ടി, യൂത്ത് ലീഗ് ജില്ലാ സെക്രട്ടറി എം.ടി സെയ്ത്ഫസൽ,പി. അലവികുട്ടി, എ.എം അബ്ദുല്ല, ബഷീർ പാലാട്ട് തുടങ്ങിയവർ പ്രസംഗിച്ചു.

അന്നമ്മയുടെ ജീവന് ഭീഷണിയായ മരങ്ങൾ ജലസേചന വകുപ്പ് മുറിച്ചു

പെരുവണ്ണാമൂഴി: ചക്കിട്ടപാറ പഞ്ചായത്ത് വാർഡ് ഏഴിൽ പെട്ട എർത്ത് ഡാമിനു സമീപത്തെ താമസക്കാരി വയോധികയും വിധവയുമായ തോണക്കര അന്നമ്മയുടെ സങ്കടത്തിന് അറുതി. ഇവർ താമസിക്കുന്ന പെരുവണ്ണാമൂഴി - മുതുകാട് പാതയുടെ താഴ്ഭാഗത്തുള്ള ഷീറ്റ് മേഞ്ഞ ഷെഡിനു ഭീഷണിയായ വൻ മരങ്ങൾ മുറിച്ചു നീക്കാത്തതായിരുന്നു ഇവരുടെ ദുഃഖം. പ്രശ്നം ദീപികയിൽ ചിത്രം സഹിതം വാർത്തയായിരുന്നു. ഇതേ തുടർന്ന് റോഡിന്‍റെ മുകൾ ഭാഗത്ത് കുറ്റ്യാടി ജലസേചന വകുപ്പിന്‍റെ സ്ഥലത്ത് നിൽക്കുന്ന മരങ്ങൾ ഇന്നലെ ജലസേചന വകുപ്പിന്‍റെ ഉത്തരവാദിത്വത്തിൽ മുറിച്ചു. അന്നമ്മയുടെ ഉറക്കം കെടുത്തിയിരുന്ന മരങ്ങളായിരുന്നുയിത്. മിക്ക മരങ്ങളുടെയും വേരുകൾ മണ്ണിളകി പുറത്തായ നിലയിലായതിനാൽ കാറ്റിലും മഴയിലും കടപുഴകി വീഴാവുന്ന നിലയിലായിരുന്നു. മരം വീണാൽ വൈദ്യുതി ലൈനും തകർത്ത് അന്നമ്മ അന്തിയുറങ്ങുന്ന ഷെഡിനു മീതേക്ക് പതിക്കുന്ന അവസ്ഥയിലായിരുന്നു. ഇത് ഒഴിവായതിന്‍റെ ആശ്വാസത്തിലാണ് അന്നമ്മ.

കോൺഗ്രസ് പ്രതിഷേധിച്ചു

കോടഞ്ചേരി: പാതിവില തട്ടിപ്പ് കേസിൽ സർക്കാരും പോലീസും ഭരണത്തിന്‍റെ തണലിൽ തട്ടിപ്പുകാർക്ക് ഒത്താശ ചെയ്യുന്നു എന്നാരോപിച്ച് മണ്ഡലം കോൺഗ്രസ് കമ്മിറ്റി പ്രതിഷേധിച്ചു. കേരളത്തിൽ മദ്യ, മയക്കുമരുന്ന് അധോലോക തട്ടിപ്പ് സംഘങ്ങൾ പെരുകിയിട്ടും അന്വേഷണ ഏജൻസികൾ മൗനം പാലിച്ച് കുറ്റവാളികൾക്ക് ഒത്താശ ചെയ്യുന്നതിന്‍റെ പരിണിതഫലം ജനങ്ങൾ അനുഭവിക്കുകയാണെന്നും ഇതിനെതിരേ ശക്തമായ നടപടി സ്വീകരിച്ച് കുറ്റവാളികളെ ശിക്ഷിക്കണമെന്നും യോഗം ആവശ്യപ്പെട്ടു. ബ്ലോക്ക് കോൺഗ്രസ് പ്രസിഡന്‍റ് ജോബി ഇലന്തൂർ യോഗം ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് വിൻസെന്‍റ് വടക്കേമുറിയിൽ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, യുഡിഎഫ് ചെയർമാൻ കെ.എം. പൗലോസ്, കർഷക കോൺഗ്രസ് സംസ്ഥാന സെക്രട്ടറി സണ്ണി കാപ്പാട്ട് മല, ബ്ലോക്ക് പഞ്ചായത്ത് മെമ്പർ റോയി കുന്നപ്പള്ളി, ബ്ലോക്ക് കോൺഗ്രസ് കമ്മിറ്റി വൈസ് പ്രസിഡന്‍റ് ജോസ് പൈക, ടോമി ഇല്ലിമൂട്ടിൽ, ഫ്രാൻസിസ് ചാലിൽ, ആനി ജോൺ തുടങ്ങിയവർ പ്രസംഗിച്ചു.

കൂത്താളി ഫാമിൽ ഔഷധസസ്യ കൃഷി ആരംഭിച്ചു

പെരുവണ്ണാമുഴി: കൂത്താളി ജില്ലാ കൃഷി ഫാമിൽ വാണിജ്യ അടിസ്ഥാനത്തിലുള്ള ഔഷധ സസ്യ കൃഷിക്ക് തുടക്കമായി. കോയമ്പത്തൂർ ആര്യ വൈദ്യ ഫാർമസിയുമായി ധാരണാ പത്രം ഒപ്പ് വെച്ച ശേഷമാണ് കൃഷി ആരംഭിക്കുന്നത്. ചിറ്റരത്ത, ചെത്തിക്കൊടുവേലി, ആടലോടകം, ഓരില, കുറുന്തോട്ടി, തിപ്പലി എന്നിവയാണ് ധാരണാപത്രത്തിൽ ഉൾപ്പെടുത്തിയിരിക്കുന്നത്. ഔഷധ സസ്യ കൃഷി ഉദ്ഘാടനവും ഫാം ഉദ്യോഗസ്ഥർക്കും തൊഴിലാളികൾക്കുമായി സംഘടിപ്പിച്ച ശില്പശാലയുടെ ഉദ്ഘാടനവും കോഴിക്കോട് ജില്ലാ പഞ്ചായത്ത് വൈസ് പ്രസിഡന്‍റ് അഡ്വ. പി. ഗവാസ് നിർവഹിച്ചു. വികസന സ്റ്റാൻഡിംഗ് കമ്മിറ്റി ചെയർപേഴ്സൺ വി.പി. ജമീല അധ്യക്ഷത വഹിച്ചു. കോയമ്പത്തൂർ ആര്യ വൈദ്യ ഫാർമസി അഗ്രിക്കൾച്ചർ ഓഫീസർമാരായ കെ. ശശികുമാർ, എം. മുഹമ്മദ് അനീസ് എന്നിവർ ക്ലാസുകളെടുത്തു. കൃഷിവകുപ്പ് ഡെപ്യൂട്ടി ഡയരക്ടർ രൂപ നാരായണൻ, ഫാം സൂപ്രണ്ട് കെ.വി. നൗഷാദ്, കൃഷി ഓഫീസർ ഡോ. പി. മുബീന എന്നിവർ പ്രസംഗിച്ചു.

ഭീകരാക്രമണത്തിൽ മരണപ്പെട്ടവർക്കായി ആദരാഞ്ജലിയർപ്പിച്ച് അധ്യാപകർ

മുക്കം: ജമ്മു കാശ്മീറിലെ പഹൽഗാമിൽ ഭീകരരുടെ ആക്രമണത്തിൽ മരണപ്പെട്ടവർക്കായി ആദരാഞ്ജലികൾ അർപ്പിച്ച് അധ്യാപകക്കൂട്ടം. മുക്കം നീലേശ്വരം ഹയർ സെക്കൻഡറി സ്കൂളിൽ നടക്കുന്ന എസ്എസ്എൽസി പരീക്ഷ പേപ്പർ മൂല്യ നിർണ്ണയ ക്യാമ്പിലെ അധ്യാപകരാണ് ഭീകരാക്രമണത്തിൽ കൊല്ലപ്പെട്ടവർക്കായി ആദരാഞ്ജലികളർപ്പിച്ചത്. നിരപരാധികളായ ടൂറിസ്റ്റുകളെയും തദ്ദേശവാസികളെയും ആക്രമിച്ച് കൊലപ്പെടുത്തിയത് ഒരു കാരണവശാലും മാപ്പർഹിക്കുന്നതല്ലെന്നും മരണപ്പെട്ടവരുടെ കുടുംബത്തിന്‍റെ ദുഃഖത്തിൽ പങ്കുചേരുന്നതായും അധ്യാപകർ പ്രതിജ്ഞ ചെയ്തു. ചടങ്ങിൽ മുക്കം നഗരസഭാ കൗൺസിലറും ചേന്ദമംഗല്ലൂർ ഹയർ സെക്കൻഡറി സ്കൂളിലെ അധ്യാപകനുമായ എ. അബ്ദുൽ ഗഫൂർ ആദരാഞ്ജലികൾ അർപ്പിച്ച് സംസാരിച്ചു. കുന്നമംഗലം ഹയർ സെക്കൻഡറി സ്കൂളിലെ രഞ്ജിത്ത് ചാക്കോ, മുക്കം എംകെഎച്ച്എംഎംഒവി എച്ച്എസ്എസിലെ ഹർഷൽ പറമ്പിൽ, മർകസ് ഗേൾസ് ഹയർസെക്കൻഡറി സ്കൂളിലെ ഡോ. അബൂബക്കർ എന്നിവർ പ്രസംഗിച്ചു.

പൂക്കാട് കലാലയം കളിയാട്ടത്തിന് തുടക്കം

കൊയിലാണ്ടി: പൂക്കാട് കലാലയം കളിയാട്ടത്തിന് ആവേശകരമായ തുടക്കം.പൂക്കാട് കലാലത്തിന്‍റെ ആഭിമുഖ്യത്തിൽ 28 വരെ ആറു ദിവസങ്ങളായി നടക്കുന്ന കളിയാട്ടത്തിനാണ് തുടക്കമായത്. ബാല മനസുകളിൽ ആവേശം പകർന്നുകൊണ്ട് കൊയിലാണ്ടി ബ്ലോക്ക് പഞ്ചായത്ത് പ്രസിഡന്‍റ് പി. ബാബുരാജിന്‍റെ അധ്യക്ഷതയിൽ ചേർന്ന സമ്മേളനത്തിൽ വച്ച് പ്രശസ്ത നാടക സംവിധായകനും സ്കൂൾ ഓഫ് ഗ്രാമ തൃശൂർ ഡയറക്ടറുമായ ഡോ. അഭിലാഷ് പിള്ള ഉദ്ഘാടനം ചെയ്തു. ചേമഞ്ചേരി പഞ്ചായത്ത് പ്രസിഡന്‍റ് സതി കിഴക്കയിൽ, ശിവദാസ് ചേമഞ്ചേരി, എ. അബൂബക്കർ, ഡോ. ഇ. ശ്രീജിത്ത്, കെ. ശ്രീനിവാസൻ, വി.വി. മോഹനൻ എന്നിവർ പങ്കെടുത്തു.

എംഡിഎംഎയുമായി ടൂറിസ്റ്റ് ബസ് ഡ്രൈവർ അറസ്റ്റിൽ

നാദാപുരം: മുതുവടത്തൂരിൽ എംഡിഎംഎയുമായി ടൂറിസ്റ്റ് ബസ് ഡ്രൈവർ അറസ്റ്റിൽ. മുതുവടത്തൂർ പുന്നക്കൽ വീട്ടിൽ ഷബീർ (36) നെയാണ് എസ്ഐ എം.പി. വിഷ്ണുവും നാദാപുരം ഡിവൈഎസ്പിയുടെ സ്ക്വാഡ് അംഗങ്ങളും ചേർന്ന് പിടികൂടിയത്. പ്രതിയിൽ നിന്ന് 0.66 ഗ്രാം എംഡി എംഎ അധികൃതർ കണ്ടെത്തി. മുതുവടത്തൂരിൽ വാഹന പരിശോധനക്കിടെ കെഎൽ 18 എസി 7493 നമ്പർ സ്കൂട്ടറിൽ നിന്നാണ് എംഡിഎംഎ കണ്ടെടുത്തത്. സ്കൂട്ടർ പോലീസ് കസ്റ്റഡിയിൽ എടുത്തു.

കുളത്തുവയൽ ഹൈസ്കൂളിന് പ്രഥമ ശോഭീന്ദ്ര പുരസ്കാരം

കുളത്തുവയൽ: ഗ്രീൻ ക്ലീൻ കേരള, കോഴിക്കോട് ജില്ലാ പഞ്ചായത്ത്, പൊതു വിദ്യാഭ്യാസ വകുപ്പ് എന്നിവയുടെ നേതൃത്വത്തിൽ 2023-24 അധ്യായന വർഷത്തെ മികച്ച പരിസ്ഥിതി പ്രവർത്തനങ്ങൾക്കുള്ള പ്രഥമ ശോഭീന്ദ്ര പുരസ്കാരം കുളത്തുവയൽ സെന്‍റ് ജോർജ് ഹൈസ്കൂളിന്. 25,000 രൂപയും പ്രശസ്തി പത്രവുമാണ് അവാർഡ്. മികച്ച സ്കൂൾ കോർഡിനേറ്റർക്കുള്ള ശോഭീന്ദ്ര പുരസ്കാരത്തിനും കുളത്തുവയൽ ഹൈസ്കൂളിലെ പരിസ്ഥിതി കോഡിനേറ്റർ ഷൈനി അഗസ്റ്റിൻ മൂന്നാം തവണയും അർഹയായി. കോഴിക്കോട് നടക്കാവ് ഗേൾസ് ഹയർ സെക്കൻഡറി സ്കൂളിൽ നടന്ന ചടങ്ങിൽ അഡ്വ. പി.ടി.എ. റഹീം എംഎൽഎ അവാർഡുകൾ വിതരണം ചെയ്തു. ഗ്രീൻ ക്ലീൻ കേരള കോഡിനേറ്റർ മുഹമ്മദ് ഇഖ്ബാൽ, ഡയറ്റ് പ്രിൻസിപ്പൽ യു.കെ അബ്ദുൽ നാസർ, അധ്യാപക അവാർഡ് ജേതാവ് യു.കെ ഷജിൽ, സയൻസ് ക്ലബ് ജില്ലാ സെക്രട്ടറി പ്രശാന്ത്, ഷൈനി അഗസ്റ്റിൻ, കുളത്തുവയൽ സ്കൂളിലെ പരിസ്ഥിതി ക്ലബ് ലീഡേഴ്സുമാരായ വൈഗ നടേഷ്, ദേവിക കൃഷ്ണ എന്നിവർ പ്രസംഗിച്ചു.

പരിമിതികൾ തടസമായില്ല; ഭിന്നശേഷി വിദ്യാർഥികളുടെ നെൽകൃഷിയിൽ നൂറ് മേനി വിളവ്

മുക്കം: മാസങ്ങൾക്ക് മുമ്പ് ചെറുവാടി പുഞ്ചപ്പാടത്തെ 3 ഏക്കർ സ്ഥലം പാട്ടത്തിനെടുത്ത് നെൽകൃഷിയിറക്കുമ്പോൾ ലൗ ഷോർ അധികൃതർ പോലും കരുതിയിരുന്നില്ല ഇത്ര മികച്ച വിളവ് ലഭിക്കുമെന്ന്. എന്നാൽ മൂന്നര മാസത്തിനിപ്പുറം വിളവെടുക്കാനെത്തിയപ്പോൾ പുഞ്ചപ്പാടം സ്വർണവർണമണിഞ്ഞ് നിൽക്കുന്ന സന്തോഷത്തിലാണിവർ. ഭിന്നശേഷി വിദ്യാർഥികൾക്കായി പ്രവർത്തിക്കുന്ന പന്നിക്കോട് ലൗ ഷോർ സ്പെഷ്യൽ സ്കൂൾ വിദ്യാർഥികൾ ചെയ്ത നെൽകൃഷിയിലാണ് നൂറ് മേനി വിളവ് ലഭിച്ചത്. പഠനപ്രവർത്തനങ്ങൾക്ക് പുറമെ മറ്റ് നിരവധി പ്രവർത്തനങ്ങളും നടത്തി വരുന്ന ലൗ ഷോർ സ്പെഷ്യൽ സ്കൂളിൽ കുട്ടികൾക്ക് തൊഴിൽ പരിശീലനം നൽകുക എന്ന ലക്ഷ്യത്തോടെയാണ് കൃഷിയിറക്കിയിരുന്നത്. കൊയ്തെടുത്ത നെല്ല് വിവിധ ഉത്പന്നങ്ങളാക്കി മാറ്റി കടകളിലെത്തിച്ച് വിൽപന നടത്തുമെന്നും ഇതിൽ നിന്ന് കിട്ടുന്ന വരുമാനം വിദ്യാർഥികളുടെ പഠന ആവശ്യങ്ങൾക്കായി ചെലവഴിക്കുമെന്നും ലൗഷോർ മാനേജർ യു.എ മുനീർ പറഞ്ഞു. നെൽകൃഷിയുടെ വിളവെടുപ്പ് കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു നിർവഹിച്ചു. ലൗ ഷോറിന്‍റെ ഈ പ്രവർത്തനം മാതൃക പരമാണന്ന് പ്രസിഡന്‍റ് പറഞ്ഞു. സ്റ്റാൻഡിംഗ് കമ്മിറ്റി ചെയർപേഴ്സൺ ആയിഷ ചേലപ്പുറത്ത്, പ്രസ് ക്ലബ് പ്രസിഡന്‍റ് സി. ഫസൽ ബാബു, കൃഷി അസിസ്റ്റന്‍റ് എ.പി. ബീന, പിടിഎ പ്രസിഡന്‍റ് ബംഗാളത്ത് അബ്ദുറഹ്മാൻ, മാനേജർ യു.എ. മുനീർ, ഹസൻകുട്ടി, യു. ആമിന, എം. ഷമീന, അസീസ് കാരക്കുറ്റി, സി.പി നിയാസ് തുടങ്ങിയവർ സംബന്ധിച്ചു.

കെ. കരുണാകരൻ ഓമശേരി പഞ്ചായത്ത്‌ പ്രസിഡന്‍റ്

താമരശേരി:ഓമശേരി പഞ്ചായത്ത്‌ പ്രസിഡന്‍റായി കോൺഗ്രസിലെ കെ. കരുണാകരനെ തെരഞ്ഞെടുത്തു. പാർട്ടി ധാരണ പ്രകാരം പ്രസിഡന്‍റായിരുന്ന പി.കെ. ഗംഗാധരൻ രാജിവച്ച ഒഴിവിലേക്കാണ്‌ കെ. കരുണാകരൻ തെരഞ്ഞെടുക്കപ്പെട്ടത്. പഞ്ചായത്തംഗങ്ങൾ പങ്കെടുത്ത തെരഞ്ഞെടുപ്പ്‌ യോഗത്തിൽ വികസന സ്റ്റാൻഡിംഗ്‌ കമ്മിറ്റി ചെയർമാൻ മുസ്‌ലിം ലീഗിലെ യൂനുസ്‌ അമ്പലക്കണ്ടിയാണ്‌ കെ. കരുണാകരന്‍റെ പേര്‌ നിർദേശിച്ചത്‌. അഞ്ചാം വാർഡ്‌ മെമ്പർ കോൺഗ്രസിലെ പി.കെ.ഗംഗാധരൻ പിന്താങ്ങി. 19 ൽ 13 അംഗങ്ങളുടെ പിന്തുണയോടെയാണ്‌ തെരഞ്ഞെടുത്തത്‌. വരണാധികാരി മുമ്പാകെ സത്യപ്രതിജ്ഞ ചെയ്ത്‌ അധികാരമേറ്റെടുത്തു. പഞ്ചായത്ത്‌ കമ്മ്യൂണിറ്റി ഹാളിൽ നടന്ന അനുമോദന യോഗം വിടവാങ്ങിയ ഫ്രാൻസിസ്‌ മാർപാപ്പയ്ക്കും ജമ്മു കശ്മീരിൽ ഭീകരാക്രമണത്തിൽ രക്തസാക്ഷികളായവർക്കും ആദരാഞ്ജലിയർപ്പിച്ചു. വൈസ്‌ പ്രസിഡന്‍റ് ഫാത്വിമ അബു അധ്യക്ഷത വഹിച്ചു. വികസന സ്റ്റാൻഡിംഗ്‌ കമ്മിറ്റി ചെയർമാൻ യൂനുസ്‌ അമ്പലക്കണ്ടി, കൊടുവള്ളി ബ്ലോക്ക് പഞ്ചായത്ത്‌ പ്രസിഡന്‍റ് കെ.എം. അഷ്‌റഫ്‌, ജില്ലാ പഞ്ചായത്ത്‌ മെമ്പർ നാസർ എസ്റ്റേറ്റ്മുക്ക്‌, താമരശേരി പഞ്ചായത്ത്‌ പ്രസിഡന്‍റ് എ.അരവിന്ദൻ, പി.പി. കുഞ്ഞായിൻ, എം.എം. വിജയകുമാർ, കെ.കെ. അബ്ദുല്ലക്കുട്ടി, ഒ.എം. ശ്രീനിവാസൻ നായർ, കെ. ബാലകൃഷ്ണൻ തുടങ്ങിയവർ പ്രസംഗിച്ചു. രണ്ടാം വാർഡിൽ നിന്ന് തെരഞ്ഞെടുക്കപ്പെട്ട കെ. കരുണാകരൻ ഒന്നര വർഷത്തിലധികം പഞ്ചായത്തിന്‍റെ ആരോഗ്യ-വിദ്യാഭ്യാസ സ്റ്റാൻഡിംഗ്‌ കമ്മിറ്റി ചെയർമാനായിരുന്നു.

വിനോദസഞ്ചാര കേന്ദ്രങ്ങളുടെ വികസനം : 168 കോടിയുടെ പദ്ധതികൾക്ക് ഭരണാനുമതി

കോഴിക്കോട്: ജില്ലയിലെ വിനോദസഞ്ചാര മേഖലയുടെ വികസനത്തിനായി ഒമ്പത് വര്‍ഷത്തിനിടെ ലഭിച്ചത് 168 കോടി രൂപയുടെ ഭരണാനുമതി. ഓരോ തദ്ദേശസ്വയംഭരണ സ്ഥാപനങ്ങള്‍ക്ക് കീഴിലും ഒരു വിനോദസഞ്ചാര കേന്ദ്രം എന്ന സര്‍ക്കാരിന്‍റെ പദ്ധതിയിലൂടെ ലോകം കണ്ടത് പ്രകൃതിയുടെ നിറച്ചാര്‍ത്തുകളണിഞ്ഞ മനോഹരപ്രദേശങ്ങളാണ്. കാട് മൂടിക്കിടന്നിരുന്ന ചാലിയം കടല്‍ത്തീരവും പരിസരവും പുലിമുട്ടും ഇന്ന് ലോകോത്തര നിലവാരത്തിലുള്ള വിനോദസഞ്ചാര കേന്ദ്രങ്ങളാണ്. രണ്ട് ഘട്ടങ്ങളിലായി 9.53 കോടി രൂപയുടെ പ്രവൃത്തികളാണ് "ഓഷ്യാനസ് ചാലിയം' ബീച്ച് ഡെസ്റ്റിനേഷന്‍ ഒരുക്കാന്‍ ചെലവഴിച്ചത്. രാത്രികാല വിനോദസഞ്ചാരം പ്രോത്സാഹിപ്പിക്കാനായി 4.46 കോടി രൂപ ചെലവഴിച്ച് ഒരുക്കിയ ഫസാഡ് ലൈറ്റിംഗ് പദ്ധതി വിനോദസഞ്ചാരികള്‍ക്കിടയില്‍ വലിയ സ്വീകാര്യതയാണ് നേടിയത്. കോഴിക്കോടിന്‍റെ ഹൃദയഭാഗങ്ങളില്‍ ഒരുക്കിയ ദീപാലങ്കാരങ്ങള്‍ കാണാന്‍ അയല്‍ ജില്ലകളില്‍ നിന്നും ആളുകള്‍ എത്തുന്നുണ്ട്. ബേപ്പൂര്‍ ആന്‍ഡ് ബിയോണ്ട് - ഡെവലപ്മെന്‍റ് ആന്‍ഡ് റെനോവേഷന്‍ ഓഫ് ബേപ്പൂര്‍ ടൂറിസം രണ്ട് ഘട്ടങ്ങളിലായി നടക്കുന്ന പ്രധാന പദ്ധതിയാണ്. അന്താരാഷ്ട്ര പ്രാധാന്യമുള്ള ബേപ്പൂര്‍ അന്താരാഷ്ട്ര വാട്ടര്‍ ഫെസ്റ്റിവലിന് വേദിയായ ബേപ്പൂര്‍ ബീച്ചിലെ ആദ്യഘട്ട വികസന പ്രവൃത്തികള്‍ക്കായി 9.94 കോടി രൂപയുടെ പദ്ധതികള്‍ക്കാണ് വിനോദസഞ്ചാര വകുപ്പില്‍നിന്ന് ഭരണാനുമതിയായത്. ബീച്ചിലെ രണ്ടാംഘട്ട വിനോദസഞ്ചാര വികസന പദ്ധതിയ്ക്കായി 14.99 കോടി രൂപയുടെ ഭരണാനുമതി ലഭിച്ചിരുന്നു. കോഴിക്കോട് ജില്ലയിലെ പ്രധാന വിനോദസഞ്ചാര കേന്ദ്രങ്ങളിലൊന്നായ കടലുണ്ടി പക്ഷി സങ്കേതത്തിന്‍റെ മുഖഛായ മാറ്റിയ "നേയ്ച്ചര്‍ വാക് വേ' പദ്ധതിയുടെ നിര്‍മാണം 1.43 കോടി രൂപ ചെലവിലാണ് പൂര്‍ത്തീകരിച്ചത്. പുഴയുടെ സൗന്ദര്യം ആസ്വദിച്ച് വിശ്രമിക്കാനും പക്ഷി സങ്കേതത്തിന്റെ സൗന്ദര്യം നുകര്‍ന്ന് സമയം ചെലവഴിക്കാനും ഒട്ടേറെ സഞ്ചാരികളാണ് ദിനേന ഇവിടെയെത്തുന്നത്. മലബാര്‍ റിവര്‍ ഫെസ്റ്റിവല്‍ വര്‍ഷംതോറും സംഘടിപ്പിക്കുന്ന പുലിക്കയത്ത് രണ്ട് ഘട്ടങ്ങളിലായി 1.63 കോടി രൂപ ഉപയോഗിച്ച് കയാക്കിംഗ് മത്സരങ്ങള്‍ സംഘടിപ്പിക്കുന്നതിനും പരിശീലനത്തിനുള്ള സൗകര്യങ്ങള്‍ ഒരുക്കുന്നതിനുമായി അന്തര്‍ദേശീയ കയാക്കിംഗ് സെന്‍റര്‍ സ്ഥാപിച്ചു. വിദേശികളടക്കം ആയിരങ്ങളാണ് കയാക്കിംഗില്‍ പങ്കെടുക്കാനും ആസ്വദിക്കാനുമായി ഇവിടെ എത്തുന്നത്. കോഴിക്കോട് നഗര ഹൃദയത്തില്‍ കനോലി കനാലിനോട് ചേര്‍ന്ന് സ്ഥിതിചെയ്യുന്ന പ്രധാന ടൂറിസം കേന്ദ്രങ്ങളില്‍ ഒന്നായ സരോവരം ബയോ പാര്‍ക്കിന്‍റെ സൗന്ദര്യവത്കരണ പദ്ധതിയുടെ ഭാഗമായി 'സരോവരം നേച്ചര്‍ ലേര്‍ണിംഗ് സെന്‍റര്‍ ഫെയ്സ് വണ്‍' ടൂറിസം പദ്ധതി നടപ്പാക്കുന്നതിനായി 1.74 കോടി രൂപയുടെ വികസനപ്രവര്‍ത്തനങ്ങള്‍ നടത്തിയിട്ടുണ്ട്. കുറ്റിച്ചിറ കുളവും പരിസരവും ടൂറിസം പൈതൃക പദ്ധതിയില്‍ ഉള്‍പ്പെടുത്തി രണ്ട് ഘട്ടങ്ങളിലായി 1.25 കോടി രൂപ മുതല്‍ മുടക്കിലാണ് നവീകരിച്ചത്. വൈക്കം മുഹമ്മദ് ബഷീറിന് ബേപ്പൂരില്‍ തന്നെ സ്മാരകം പണിയുന്നതിനായി കോര്‍പ്പറേഷന്‍റെ ഉടമസ്ഥതയിലുള്ള സ്ഥലത്ത് ടൂറിസം വികസന പദ്ധതിയില്‍ ഉള്‍പ്പെടുത്തി 'ആകാശ മിഠായി' എന്ന പേരില്‍ 7.37 കോടി രൂപ ടൂറിസം വകുപ്പ് ഭരണാനുമതി നല്‍കി. ഈ പദ്ധതിയുടെ ഒന്നാം ഘട്ടപ്രവൃത്തിയുടെ ഭാഗമായി കെട്ടിട നിര്‍മ്മാണം പുരോഗമിക്കുകയാണ്. സൗത്ത് ബീച്ച്, ഭട്ട്റോഡ് ബീച്ച്, ഗോതീശ്വരം ബീച്ച്, തോണിക്കടവ്, കരിയാത്തുംപാറ, വയലട, നമ്പികുളം, തുഷാരഗിരി, അരിപ്പാറ, അകലാപ്പുഴ, തിക്കോടി ഡ്രൈവ് ഇന്‍ ബീച്ച്, മിനി ഗോവ, കാപ്പാട്, ഒളോപ്പാറ, കക്കാടംപൊയില്‍, പയംകുറ്റിമല, സാന്‍റ്ബാങ്ക്സ്, ചേര്‍മല കേവ് പാര്‍ക്ക്, പതങ്കയം, കക്കയം, പെരുവണ്ണാമൂഴി, മാനാഞ്ചിറ, ലോകനാര്‍കാവ് തീര്‍ത്ഥാടന ടൂറിസം പദ്ധതി തുടങ്ങി നൂറോളം വിനോദസഞ്ചാര കേന്ദ്രങ്ങള്‍ ജില്ലയിലേക്ക് വിനോദസഞ്ചാരികളെ ആകര്‍ഷിക്കുന്നതില്‍ വലിയ പങ്കുവഹിക്കുന്നു.

യുവാവ് ട്രെയിൻ തട്ടി മരിച്ചു

ഏലംകുളം: പാലത്തോൾ മപ്പാട്ടുകര പാലത്തിന് സമീപം യുവാവ് ട്രെയിൻ തട്ടി മരിച്ചു. മാട്ടായി താന്നിക്കൽ വാസുദേവന്‍റെ മകൻ സുജിത് (32) ആണ് ഇന്നലെ രാവിലെ ഏഴ് മണിക്ക് ഷൊർണൂരിൽ നിന്ന് നിലന്പൂരിലേക്ക് വരുന്ന ട്രെയിൻ തട്ടി മരിച്ചത്. ഭാര്യ: ശില്പ. മകൾ: ആദ്യ (മൂന്ന് വയസ്). സഹോദരൻ: സുരേഷ് ബാബു, പരേതനായ സൂരജ്. അമ്മ: ഏലംകുളം കൊട്ടോംതടത്തിൽ രമണി.

വടകര സ്വദേശിനി അമേരിക്കയില്‍ വാഹനാപകടത്തില്‍ മരിച്ചു

വടകര: മലയാളി വിദ്യാര്‍ഥിനി അമേരിക്കയില്‍ വാഹനാപകടത്തില്‍ മരിച്ചു. കോഴിക്കോട് വടകര സ്വദേശി ഹെന്ന (21)യാണ് മരിച്ചത്. ന്യൂജഴ്‌സിയിലെ റട്ട്‌ഗേസ് യൂണിവേഴ്‌സിറ്റി വിദ്യാര്‍ഥിനിയാണ്.കോളജിലേക്ക് പോകുംവഴി ഹന്നയുടെ കാറില്‍ മറ്റൊരു കാര്‍ ഇടിച്ചാണ് അപകടം. അസ്‌ലം വടകര - സാദിജ ചേളന്നൂര്‍ ദമ്പതികളുടെ മകളാണ്. രക്ഷിതാക്കള്‍ക്കൊപ്പം ന്യൂജഴ്‌സിയിലായിരുന്നു താമസം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]