ADVERTISEMENT

ADVERTISEMENT

തെരുവ് നായ ശല്യം ; കളക്ടറേറ്റിനു മുന്നിൽ ശ്രദ്ധ ക്ഷണിക്കൽ സമരം നടത്തി

കോഴിക്കോട്: രൂക്ഷമായ തെരുവ് നായ ശല്യം പരിഹരിക്കാൻ അടിയന്തര നടപടികൾ സ്വീകരിക്കണം എന്നാവശ്യപ്പെട്ടു കൊണ്ട് റെസിഡന്‍റ്സ് അപ്പെക്സ് കൗൺസിൽ ഓഫ് കോഴിക്കോടിന്‍റെ നേതൃത്വത്തിൽ കളക്ടറേറ്റിന് മുന്നിൽ ശ്രദ്ധക്ഷണിക്കൽ സമരം നടത്തി. കോൺഫെഡറേഷൻ ഓഫ് റെസിഡന്‍റ്സ് വെൽഫെയർ അസോസിയേഷൻ അഖിലേന്ത്യാ ജനറൽ സെക്രട്ടറി പി.സി. അജിത്‌ കുമാർ ഉദ്ഘാടനം ചെയ്തു.

കോൺഫെഡറേഷൻ അഖിലേന്ത്യാ ജോയിന്‍റ് സെക്രട്ടറിയും റെസിഡന്‍റ്സ് അപ്പെക്സ് കൗൺസിൽ ജില്ലാ പ്രസിഡന്‍റുമായ എം.കെ. ബീരാൻ അധ്യക്ഷത വഹിച്ചു. ജില്ലാ ജനറൽ സെക്രട്ടറി സി. രാധാകൃഷ്ണൻ, സംസ്ഥാന വർക്കിംഗ്‌ പ്രസിഡന്‍റ് ആർ. അനിൽ കുമാർ,

വനിതാ കമ്മിറ്റി സംസ്ഥാന പ്രസിഡന്‍റ് കെ. സതീദേവി, സംസ്ഥാന വൈസ് പ്രസിഡന്‍റ് കെ.പി. ജനാർദ്ദനൻ, വനിതാ കമ്മിറ്റി ജില്ലാ പ്രസിഡന്‍റ് എൻ.കെ. ലീല, എൻ. ഭാഗ്യനാഥൻ, കെ.സി. രവീന്ദ്രനാഥ്‌, എം.പി. രാമകൃഷ്ണൻ, പി. രാധാകൃഷ്ണൻ, കെ.വി. ഷാബു, സക്കീർ പാറക്കാട് പ്രസംഗിച്ചു.

ADVERTISEMENT

മലയോര ഹൈവേ : ഭൂമി വിട്ടുനല്‍കിയവര്‍ക്ക് ഉടന്‍ സാക്ഷ്യപത്രം നല്‍കുമെന്ന്

കൂരാച്ചുണ്ട്: മലയോര ഹൈവേയുടെ നിര്‍മ്മാണത്തിന്‍റെ ഭാഗമായി കൂരാച്ചുണ്ട് ടൗണില്‍ റോഡിനായി ഭൂമി വിട്ടുനല്‍കിയ ഉടമകളില്‍ പുതിയ കെട്ടിടങ്ങള്‍ നിര്‍മ്മിക്കുന്നതിനായി അപേക്ഷ നല്‍കിയവര്‍ക്ക് ഇളവ് ലഭിക്കുന്നതിനായി റോഡ് ഫണ്ട് ബോര്‍ഡില്‍ നിന്നും നല്‍കുന്ന സാക്ഷ്യപത്രം ഉടന്‍ നല്‍കുമെന്ന് പഞ്ചായത്ത് പ്രസിഡന്‍റ് ഒ.കെ അമ്മദ് അറിയിച്ചു. റോഡ് നിര്‍മ്മാണത്തിനായി സ്ഥലം വിട്ടു നല്‍കിയ കെട്ടിട ഉടമകള്‍ക്ക് പുതിയ കെട്ടിടങ്ങള്‍ നിര്‍മ്മിക്കുന്നതിനായി പഞ്ചായത്ത് കെട്ടിട നിര്‍മ്മാണ ചട്ടങ്ങളില്‍ ഇളവ് നല്‍കുമെന്ന് ഉടമകള്‍ സമ്മതപത്രം നല്‍കിയ സമയത്ത് പഞ്ചായത്ത് അറിയിച്ചിരുന്നു. റോഡില്‍ നിന്നും മൂന്നു മീറ്റര്‍ ദൂരം പാലിച്ചുകൊണ്ട് കെട്ടിടം നിര്‍മ്മിക്കണമെന്ന ചട്ടത്തില്‍ ഇളവ് നല്‍കുമെന്നാണ് പഞ്ചായത്ത് ഉറപ്പു നല്‍കിയിരുന്നത്. എന്നാല്‍ കെട്ടിട നിര്‍മാണ ആവശ്യാര്‍ത്ഥം ഉടമകള്‍ പഞ്ചായത്തിനെ സമീപിച്ചപ്പോള്‍ ഭൂമി വിട്ടു നല്‍കിയെന്നുള്ള കെ ആര്‍ എഫ് ബി യുടെ സാക്ഷ്യപത്രം ഹാജരാക്കാന്‍ ആവശ്യപ്പെട്ടു. ഇത് ഭൂ ഉടമകളെ പ്രതിസന്ധിയിലാക്കിയിരുന്നു. ഭൂമി വിട്ടു നല്‍കിയിട്ടും ഉടമകള്‍ക്ക് കെആര്‍എഫ്ബി സാക്ഷ്യപത്രം നല്‍കാതിരുന്നതാണ് പ്രതിസന്ധി സൃഷ്ടിച്ചത്. ഇതേ തുടര്‍ന്ന് റോഡ് ഫണ്ട് ബോര്‍ഡ് ഉദ്യോഗസ്ഥരും പഞ്ചായത്ത് അധികൃതരും ചേര്‍ന്ന് അപേക്ഷ നല്‍കിയ ഏഴു പേരുടെ സ്ഥലംഇന്നലെ അളന്ന് തിട്ടപ്പെടുത്തി. രണ്ടുദിവസത്തിനുള്ളില്‍ ഇവര്‍ക്ക് സാക്ഷ്യപത്രം നല്‍കുമെന്നു പഞ്ചായത്ത് പ്രസിഡന്‍റ് പറഞ്ഞു. വൈസ് പ്രസിഡന്‍റ് വിന്‍സി തോമസ്, സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ സിമിലി ബിജു, കെആര്‍എഫ്ബി ഉദ്യോഗസ്ഥരായ പ്രോജക്ട് എന്‍ജിനീയര്‍ കെ.അദ്യുത് രാജ്, സൈറ്റ് സൂപ്പര്‍വൈസര്‍ എം.ജെ. അതുല്‍, എന്‍.കെ കുഞ്ഞമ്മദ് തുടങ്ങിയവര്‍ നേതൃത്വം നല്‍കി.

വരുന്നൂ.. കോര്‍പറേഷന്‍റെ ഷോപ്പിങ് ഫെസ്റ്റിവൽ

കോഴിക്കോട് : വ്യാപാരമേഖലയ്ക്ക് ഉണര്‍വേകാനും ടൂറിസം സാധ്യതകള്‍ പ്രോത്സാഹിപ്പിക്കുന്നതിനുമായി കോര്‍പറേഷന്‍ ഷോപ്പിങ് ഫെസ്റ്റിവല്‍ സംഘടിപ്പിക്കുന്നു. കോര്‍പറേഷന്‍റെ എല്ലാ പ്രദേശങ്ങളിലേയും വ്യാപാരികളെ ഉള്‍ക്കൊള്ളുന്ന തരത്തിലാണ് ഫെസ്റ്റിവല്‍ സംഘിടിപ്പിക്കുന്നത്. പദ്ധതി നടപ്പാക്കുന്നതിനായി ഡിപിആര്‍ തയാറാക്കുന്നതിന് ഇവന്റ് മാനേജ്മെന്‍റ് കമ്പനിയെ ചുമതലപ്പെടുത്താന്‍ മേയര്‍ ഡോ.ബീനാഫിലിപ്പിന്‍റെ അധ്യക്ഷതയില്‍ ചേര്‍ന്നകൗണ്‍സില്‍ യോഗം അംഗീകാരം നല്‍കി. ഫെസ്റ്റിവല്‍ എങ്ങനെ എപ്രകാരം നടപ്പാക്കുമെന്നത് സംബന്ധിച്ചാണ് ഡിപിആര്‍ തയാറാക്കുന്നത്. ഇതിനായി താല്‍പര്യപത്രം ഉടന്‍ ക്ഷണിക്കും. എന്നാല്‍ മേളകള്‍ നടത്തി പരചയസമ്പത്തുള്ള കോര്‍പറേഷന്‍ ഷോപ്പിങ് ഫെസ്റ്റിവല്‍ സംഘിടിപ്പിക്കാന്‍ സ്വകാര്യ കമ്പനിയില്‍ നിന്ന് ഡിപിആര്‍ തേടുന്നതിനോട് യുഡിഎഫ് അംഗങ്ങള്‍ വിയോജിച്ചു. കോര്‍പറേഷനിലെ മികച്ച ഉദ്യോഗസ്ഥരെയും സ്റ്റാന്‍റിങ് കമ്മിറ്റികളേയും ഉള്‍പ്പെടുത്തി ഡിപിആര്‍ തയാറാക്കാവുന്നതാണെന്ന് പ്രതിപക്ഷ ഉപനേതാവ് കെ. മൊയ്തീന്‍ കോയ പറഞ്ഞു. ഇവന്റ് മാനേജ്മെന്‍റ് കമ്പനി ഫെസ്റ്റിവല്‍ നടത്തുമ്പോള്‍ കോര്‍പറേഷനിലെ ജനപ്രതിനിധികള്‍ക്ക് കാര്യമായി ഇടപെടാന്‍ സാധിക്കില്ലെന്നും പ്രതിപക്ഷം ചൂണ്ടിക്കാട്ടി. എന്നാല്‍ ചരിത്രപരമായി ഏറെ പ്രാധാന്യങ്ങളുള്ള നഗരത്തിന്റെ പൈതൃകത്തിന് ഇണങ്ങുന്ന രീതിയിയില്‍ പ്രഫഷനലായി ഒരു രൂപ രേഖ തയാറാക്കുന്നതിനാണ് കമ്പനിയെ ചുമതലപ്പെടുത്തുന്നതെന്ന് മേയറും ഡെപ്യൂട്ടി മേയര്‍ സി.പി മുസാഫര്‍ അഹമ്മദും പറഞ്ഞു.

തുരങ്കപാതയ്ക്കൊപ്പം നാലുവരിപ്പാത നിർമിക്കുക ലക്ഷ്യം: എംഎൽഎ

തിരുവമ്പാടി: ആനക്കാംപൊയിൽ - കള്ളാടി- മേപ്പാടി തുരങ്കപ്പാതയുടെ പ്രവേശന കവാടമായ മറിപ്പുഴയിൽനിന്നു നാഷണൽ ഹൈവേ 66 ലേക്ക് 30 മീറ്റർ വീതിയിൽ നാലുവരിപ്പാത നിർമിക്കുകയാണ് സർക്കാരിന്‍റെ അടുത്ത ലക്ഷ്യമെന്ന് ലിന്‍റോ ജോസഫ് എംഎൽഎ അറിയിച്ചു. തുരങ്ക പാതയുടെ നിർമാണോദ്ഘാടനത്തോടനുബന്ധിച്ച് സംഘടിപ്പിച്ച സ്വാഗതസംഘം പിരിച്ചുവിടുന്ന യോഗം ഉദ്ഘാടനം ചെയ്ത് സംസാരിക്കുകയായിരുന്നു എംഎൽഎ. തുരങ്കപാതയുടെ പണി പൂർത്തീകരിക്കുന്നതോടൊപ്പം നാലുവരി പാതയുടെ പണിയും പൂർത്തീകരിക്കാനാണ് സർക്കാർ ലക്ഷ്യമിടുന്നതെന്നും എംഎൽഎ പറഞ്ഞു. ആനക്കാംപൊയിൽ പാരീഷ് ഹാളിൽ ചേർന്ന യോഗത്തിൽ തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ അധ്യക്ഷത വഹിച്ചു. തിരുവമ്പാടി പഞ്ചായത്ത് അംഗങ്ങളായ ബേബി കരിമ്പിൻപുരയിടത്തിൽ, രാജു അമ്പലത്തിങ്കൽ, ബ്ലോക്ക് പഞ്ചായത്ത് അംഗം ബാബു കളത്തൂർ, സെന്‍റ് മേരീസ് യുപി സ്കൂൾ പ്രധാനാധ്യാപകൻ റോയ്, ബെന്നി ആനക്കല്ലേൽ തുടങ്ങിയവർ പ്രസംഗിച്ചു.

പിക്കപ്പ് ലോറി ഓട്ടോയിൽ ഇടിച്ചു

നാദാപുരം: ഇരുമ്പ് പൈപ്പ് കയറ്റിയ പിക്കപ്പ് ലോറി അശ്രദ്ധമായി റോഡിലിറക്കി ഓട്ടോയിൽ ഇടിച്ച് രണ്ട് പേർക്ക് പരിക്ക്. പുറമേരി സ്വദേശി ഓട്ടോ ഡ്രൈവർ ബാബു, കക്കംവെള്ളി സ്വദേശിനിക്കുമാണ് പരിക്കേറ്റത്. നാദാപുരം - വടകര സംസ്ഥാന പാതയിൽ പുറമേരിയിലാണ് അപകടം. സംസ്ഥാന പാതയിൽ നിന്നും വീട്ടിലേക്ക് പൈപ്പുമായി കയറുന്നതിനിടെ വീട്ടിൽ നിന്നും മറ്റൊരു വാഹനം റോഡിലേക്ക് ഇറക്കാൻ പിക്കപ്പ് ലോറി പിറകോട്ട് ഇറക്കുകയായിരുന്നു. ഇതിനിടെ ഓട്ടോറിക്ഷ ലോറിയിൽ നിന്ന് പുറത്തേക്ക് തള്ളി നിൽക്കുന്ന ഇരുമ്പ് പൈപ്പുകളിലും ലോറിയിലും വന്നിടിക്കുകയായിരുന്നു. ഓട്ടോയുടെ മുൻഭാഗം പൂർണമായി തകർന്നു. പരിക്കേറ്റവർ നാദാപുരം ഗവ. താലൂക്ക് ആശുപത്രിയിലും, വടകര ആശുപത്രിയിലും ചികിത്സ തേടി.

കെ-സ്മാര്‍ട്ട് ഫെസിലിറ്റേഷന്‍ സെന്‍റര്‍ പ്രവര്‍ത്തനം തുടങ്ങി

കോഴിക്കോട്: കോര്‍പറേഷന്‍ ഓഫീസിലെ കെ-സ്മാര്‍ട്ട് ഫെസിലിറ്റേഷന്‍ സെന്‍ററിന്‍റെയും സാമൂഹ്യ സുരക്ഷാ പെന്‍ഷന്‍ സേവന കേന്ദ്രത്തിന്‍റെയും പ്രവര്‍ത്തനം ആരംഭിച്ചു. കോര്‍പറേഷന്‍ ഓഫീസില്‍ നിന്ന് ലഭ്യമാകുന്ന വിവിധ സേവനങ്ങള്‍ സംബന്ധിച്ച് പ്രദര്‍ശിപ്പിക്കുന്ന ഡിജിറ്റല്‍ ഇന്‍ഫര്‍മേഷന്‍ ഡിസ്‌പ്ലേ ബോര്‍ഡ് ജനസേവനകേന്ദ്രത്തിന് മുന്നില്‍ സ്ഥാപിച്ചു. ഫ്രന്‍റ് ഓഫീസില്‍ നടന്ന ചടങ്ങില്‍ മേയര്‍ ഡോ.ബീനാ ഫിലിപ്പ് ഉദ്ഘാടനം നിര്‍വഹിച്ചു. കോര്‍പറേഷന്‍ ഓഫീസില്‍ നിന്നു പൊതുജനങ്ങള്‍ക്ക് മികച്ച സേവനം ലഭ്യമാക്കുന്നതിന് കൗണ്‍സിലും ജീവനക്കാരും ഒരുമിച്ച് പ്രവര്‍ത്തിക്കുന്നതിനുള്ള ശ്രമങ്ങളുടെ ഭാഗമായാണ് ഈ സേവനം ഓഫീസില്‍ ആരംഭിച്ചതെന്ന് മേയര്‍ പറഞ്ഞു. അക്ഷയ കേന്ദ്രങ്ങള്‍ വഴി ഫീസ് നല്‍കി സമര്‍പ്പിച്ചിരുന്ന വിവിധ അപേക്ഷകള്‍ ഇനി കോര്‍പറേഷന്‍ ഓഫീസില്‍ നിന്നു സൗജന്യമായി പൊതുജനങ്ങള്‍ക്കാകെ ലഭ്യമാകും. പെന്‍ഷന്‍ സേവന കേന്ദ്രം സാധാരണക്കാരായ പെന്‍ഷന്‍ ഗുണഭോക്താക്കള്‍ക്ക് വലിയ ആശ്രയമാകും. ഡെപ്യൂട്ടി മേയര്‍ സി.പി മുസാഫര്‍ അഹമ്മദ് അധ്യക്ഷത വഹിച്ചു. സ്ഥിരം സമിതി ചെയര്‍മാന്‍മാരായ പി.ദിവാകരന്‍, പി.സി രാജന്‍, കോര്‍പറേഷന്‍ സെക്രട്ടറി കെ.യു ബിനി , അഡീഷണല്‍ സെക്രട്ടറി എന്‍.കെ ഹരീഷ് എന്നിവര്‍ സംസാരിച്ചു.

24 മണിക്കൂർ ഉപവാസം തുടങ്ങി

കൊയിലാണ്ടി: നന്തി ടൗണിൽ നാഷണൽ ഹൈവേ നിർമിക്കുന്ന 300 മീറ്റർ നീളവും 10 മീറ്റർ ഉയരവും 30 മീറ്റർ വീതിയുമുള്ള എംബാങ്ക്മെന്‍റിന് പകരം എലിവേറ്റഡ് ഹൈവേ നിർമിക്കണമെന്ന ആവശ്യവുമായി എൻഎച്ച് 66 നന്തി ജനകീയ കമ്മിറ്റി നടത്തുന്ന 24 മണിക്കൂർ ഉപവാസ സമരം പ്രശസ്ത എഴുത്തുകാരനും സാമൂഹിക പ്രവർത്തകനുമായ കൽപ്പറ്റ നാരായണൻ ഉദ്ഘാടനം ചെയ്തു. കനത്ത മഴ ലഭിക്കുന്ന പ്രദേശമായതിനാൽ മണ്ണ് കൊണ്ട് നിർമിക്കുന്ന എംബാങ്ക്മെന്‍റ് തകരാനും നന്തി ടൗണിൽ വെള്ളം കയറാനുമുള്ള സാധ്യത കൂടുതലാണ്. പരിസ്ഥിതി നശിപ്പിച്ചുകൊണ്ടുള്ള നിർമാണരീതി കടുത്ത കുടിവെള്ളക്ഷാമവും കടുത്ത ചൂടും ഉണ്ടാക്കുമെന്നും കൽപ്പറ്റ നാരായണൻ അഭിപ്രായപ്പെട്ടു. ഈ മാസം 23, 24 തീയതികളിൽ കേന്ദ്ര മന്ത്രിയുമായി നടക്കുന്ന കൂടിക്കാഴ്ചയിൽ നന്തിക്കാരുടെ ആവശ്യത്തിനായി പരമാവധി ശ്രമിക്കുമെന്ന് സമരപ്പന്തൽ സന്ദർശിച്ച വടകര എംപി ഷാഫി പറമ്പിൽ പറഞ്ഞു.

പാലിയേറ്റീവ് പ്രവർത്തനം സുവിശേഷ ദൗത്യം: റവ. ഡോ. ബിനു കുളത്തിങ്കൽ

കുളത്തുവയൽ: സ്നേഹത്തിൽ അധിഷ്ഠിതമായ സുവിശേഷ ദൗത്യമാണ് പാലിയേറ്റീവ് പ്രവർത്തനത്തിന്‍റെ കാതലെന്ന് സെന്‍റ് അൽഫോൻസാ പാലിയേറ്റീവ് ആൻഡ് ജെറിയാട്രിക് കെയർ താമരശേരി രൂപത ഡയറക്ടർ റവ. ഫാ. ഡോ. ബിനു കുളത്തിങ്കൽ പറഞ്ഞു. സംഘടനയുടെ കുളത്തുവയൽ മേഖലാ വോളണ്ടിയർ സംഗമം കുളത്തുവയൽ ഇടവക പാരീഷ് ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം. ഒപ്പമുണ്ട് എന്ന വിശ്വാസവും, സങ്കടം കേൾക്കാനും സാന്ത്വനിപ്പിക്കാനും സഹായിക്കാനും തന്‍റെ അരികെ ആളുണ്ട് എന്ന ആത്മ വിശ്വാസവും കിടപ്പു രോഗികളിൽ ജനിപ്പിക്കാൻ കഴിയുന്നിടത്താണ് ഓരോ പാലിയേറ്റീവ് വോളണ്ടിയറുടേയും പ്രവർത്തന വിജയപഥമെന്നും അദ്ദേഹം കൂട്ടിച്ചേർത്തു. സെന്‍റ് അൽഫോൻസാ പാലിയേറ്റീവ് കെയറിന്‍റെ രൂപതാ പ്രസിഡന്‍റ് ബേബി സെബാസ്റ്റ്യൻ കൂനന്താനം അധ്യക്ഷത വഹിച്ചു. മേഖലാ സെക്രട്ടറി പ്രസാദ് സിംഗ് ചന്ദ്രൻകുന്നേൽ റിപ്പോർട്ട് അവതരിപ്പിച്ചു. പാലിയേറ്റീവ് പ്രവർത്തന രംഗത്ത് 20 വർഷം പൂർത്തിയാക്കിയ മേഖലാ പ്രസിഡന്‍റ് ജോസ് തോണക്കരയെ രൂപതാ ഡയറക്ടർ പൊന്നാടയണിയിച്ചും ഉപഹാരം നൽകിയും ആദരിച്ചു. പാലിയേറ്റീവ് നഴ്‌സിംഗ് രംഗത്ത് 15 വർഷത്തിലധിക കാലമായി നിസ്വാർത്ഥ സേവനം അനുഷ്ഠിക്കുന്ന നഴ്സ് സുബൈദ ബഷീറിനെ കുളത്തുവയൽ സെന്‍റ് ജോർജ് തീർത്ഥാടന കേന്ദ്രം റെക്‌ടർ റവ. ഡോ. തോമസ് കളരിക്കൽ ഉപഹാരം നൽകി ആദരിച്ചു. താമരശേരി രൂപതാ സെന്‍റ് അൽഫോൻസാ പാലിയേറ്റീവ് കെയറിന്‍റെ പ്രസിഡന്‍റായി തെരഞ്ഞെടുക്കപ്പെട്ട ബേബി സെബാസ്റ്റ്യനെ പെരുവണ്ണാമൂഴി ഫാത്തിമ മാതാ ഇടവക വികാരി ഫാ. ഏബ്രഹാം വള്ളോപ്പള്ളി പൊന്നാടയണിച്ച് ആദരിച്ചു. ജോസ്‌ തോണക്കര, ലിസി ജഗൻ മുക്കള്ളിൽ, റോസിലിൻ കല്ലൂര്, ഗ്രേസി കൊടൂർ എന്നിവർ പ്രസംഗിച്ചു. ജോസ് കുറൂർ, സ്വർഗകുമാർ, ജോഷി ചീങ്കല്ലേൽ, ബേബി പുതിയേടത്ത്, സോമൻ കപ്പലുമാക്കൽ തുടങ്ങിയവർ പരിപാടികൾക്ക്‌ നേതൃത്വം നൽകി.

ദര്‍ശനം സാംസ്‌കാരിക വേദി മുപ്പതാം വാര്‍ഷികാഘോഷം

കോഴിക്കോട്: കാളാണ്ടിത്താഴം ദര്‍ശനം സാംസ്‌കാരിക വേദിയുടെ മുപ്പതാം വാര്‍ഷികാഘോഷത്തിന്‍റെ ഭാഗമായി മെഗാ ഇവന്‍റ് 19,20 തീയതികളില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. . ദര്‍ശനത്തിന്‍റെ പ്രവര്‍ത്തനത്തില്‍ വിവിധ സേവനങ്ങളും സഹായ സഹകരണങ്ങളും നല്‍കിയ വ്യക്തികളെയും സ്ഥാപനങ്ങശളയും ആദരിച്ചുകൊണ്ടാണ് 19ന് വാര്‍ഷികാഘോഷത്തിനു തുടക്കം കുറിക്കുക. തുടര്‍ന്ന് വി.െക സുരേഷ്ബാബുവിന്‍റെ പ്രഭാഷണം നടക്കും. പ്രാദേശിക കലാകാരന്‍മാരുടെ നൃത്തസന്ധ്യയും കരോക്കെ ഗാനമേളയും ഒരുക്കിയിട്ടുണ്ട്. 20ന് നാടന്‍ പാട്ടുകാരി പ്രസീത ചാലക്കുടി സംഘടിപ്പിക്കുന്ന നാടന്‍പാട്ട് നൃത്ത ദൃശ്യവിസ്മയം അരങ്ങേറും. 21ന് സാംകാരിക സംഗമം ഒരുക്കിയതായും അവര്‍ അറിയിച്ചു.ജനറല്‍ കണവീനര്‍ കെ.സതീശന്‍, പ്രസിഡന്‍റ് പി.സിദ്ധാര്‍ഥന്‍, കെ. കുഞ്ഞാലി സഹീര്‍, സല്‍മി സത്യാര്‍ഥി എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

യാത്രാദുരിതത്തിന് ശമനമില്ല : പയ്യോളിയിൽ "പൊടിപൂരം'

പയ്യോളി: ദേശീയപാത നിർമാണം മൂന്നുവർഷം പിന്നിടുമ്പോഴും പയ്യോളിയിലെ യാത്രാദുരിതത്തിന് ശമനമില്ല. മഴക്കാലത്ത് കുഴികൾ രൂപപ്പെടുന്നതും വാഹനങ്ങൾ മറിയുന്നതും യാത്രക്കാർ അപകടത്തിൽപ്പെടുന്നതുമാണ് ദുരിതമെങ്കിൽ മഴ മാറിയാൽ കനത്ത പൊടി ശല്യമാണ് ടൗണിൽ ആകെ ഉള്ളത്. മാസ്ക് ധരിക്കാതെ പയ്യോളിയിലൂടെയുള്ള യാത്ര അങ്ങേയറ്റം ബുദ്ധിമുട്ടാണ്. വ്യാപാരികളും ഓട്ടോ തൊഴിലാളികളും ഉൾപ്പെടെയുള്ള ടൗണിൽ നിരന്തരം ഉണ്ടാവുന്നവർക്ക് പലതരത്തിലുള്ള ആരോഗ്യ പ്രശ്നങ്ങളും വന്നു തുടങ്ങി. മഴയത്ത് കുഴിയടക്കാൻ വേണ്ടി പാറപ്പൊടി ഉപയോഗിച്ചതാണ് പ്രധാന പ്രശ്നമായി മാറുന്നത്. മഴ മാറിക്കഴിഞ്ഞാൽ ഇതിലുള്ള ചീളുകൾ ഉൾപ്പെടെയുള്ളവ പൊടിക്കൊപ്പം ശ്വാസകോശത്തിൽ വരെ എത്തുന്നുണ്ടെന്ന് ആരോഗ്യ വിദഗ്ധർ പറയുന്നു. ഇതിന് പരിഹാരം കാണാനായി കരാർ കമ്പനി ലോറിയിൽ വെള്ളം എത്തിച്ച് നനയ്ക്കുന്ന ജോലി ഏതാണ്ട് ഉപേക്ഷിച്ച മട്ടാണ്. ശ്രീകൃഷ്ണ ജയന്തി ദിനത്തിൽ വൈകുന്നേരം ആണ് പയ്യോളി ടൗണിലെ ബാരിക്കേടഡുകൾ നീക്കി ജംഗ്ഷൻ ഗതാഗതത്തിനായി തുറന്നു കൊടുത്തത്. നാലു മാസത്തിലേറെയായി അടച്ചിട്ടിരുന്ന വഴി തുറന്നുപ്പോൾ ടാറിംഗ് ചെയ്യാത്തതിനാൽ രൂക്ഷമായ പൊടി ശല്യമാണ്. നിലവിൽ നിർമിച്ചിരിക്കുന്ന മേൽപ്പാലത്തിലേക്കുള്ള അപ്പ്രോച്ച് റോഡ് നിർമിക്കുന്നതിന് വേണ്ടി റെയിൽവേ സ്റ്റേഷന് സമീപമുള്ള കിഴക്കും പടിഞ്ഞാറും ഭാഗത്തെ സർവീസ് റോഡ് ബന്ധിപ്പിക്കുന്ന ഭാഗം അടച്ചിട്ടുണ്ട്. ഇതോടെ മുഴുവൻ വാഹനങ്ങളും ജംഗ്ഷനിലൂടെ കടന്നു പോകുമ്പോൾ കൂടുതൽ പൊടി ശല്യമാണ്. ജംഗ്ഷൻ തുറന്നു കൊടുത്തതിനുശേഷം പൊടി ശല്യം കുറയ്ക്കാനായി ഒരു തവണ പോലും കരാർ കമ്പനി ഈ ഭാഗം നനച്ചിട്ടില്ലെന്ന് സമീപത്തെ വ്യാപാരിയായ "ഐശ്വര്യ ഹോം നീഡ്‌സ്' ഉടമ സതീശൻ പറയുന്നു. ഇക്കാര്യത്തിൽ നഗരസഭ ഇടപെടാതെ മാറി നിൽക്കുന്നതും രൂക്ഷമായ വിമർശനം ഉയർത്തുന്നുണ്ട്.

മനുഷ്യ-വന്യജീവി സംഘർഷ ലഘൂകരണ യജ്ഞം : വനംവകുപ്പ് ഹെൽപ് ഡെസ്ക് തുറന്നു

കൂരാച്ചുണ്ട്: കേരള വനം വകുപ്പ് മനുഷ്യ - വന്യജീവി സംഘർഷ ലഘൂകരണ യജ്ഞ പരിപാടിയുടെ ഭാഗമായി കൂരാച്ചുണ്ട് പഞ്ചായത്തിൽ ഹെൽപ് ഡെസ്ക് പഞ്ചായത്ത് ഓഫീസ് കെട്ടിടത്തിൽ തുറന്നു. പഞ്ചായത്ത് പ്രസിഡന്‍റ് ഒ.കെ. അമ്മദ് ഉദ്ഘാടനം ചെയ്തു. വൈസ് പ്രസിഡന്‍റ് വിൻസി തോമസ് അധ്യക്ഷത വഹിച്ചു. പഞ്ചായത്ത് സ്ഥിരം സമിതി അംഗങ്ങളായ സണ്ണി പുതിയകുന്നേൽ, ഡാർളി ഏബ്രഹാം, സിമിലി ബിജു, കക്കയം ഫോറസ്റ്റ് ഓഫീസ് സെക്ഷൻ ഓഫീസർ പി. ബഷീർ, ബീറ്റ് ഫോറസ്റ്റ് ഓഫീസർ എസ്. അഭിനന്ദ്, പഞ്ചായത്ത് സെക്രട്ടറി ഫാത്തിമ നിഷാന, അസിസ്റ്റന്‍റ് സെക്രട്ടറി മനിൽകുമാർ എന്നിവർ പ്രസംഗിച്ചു. വനം വകുപ്പ് ഉദ്യോഗസ്ഥരും പഞ്ചായത്ത് പ്രതിനിധികളും അടങ്ങുന്ന ടീമുകൾ ഈ ഹെൽപ് ഡെസ്ക്കുകൾ മുഖേന പൊതുജനങ്ങളിൽ നിന്നും പരാതികൾ ശേഖരിക്കുകയും ഓരോ പഞ്ചായത്തിലും ഇതിനായി ഒരു ഫെസിലിറ്റേറ്ററെ ചുമതലപ്പെടുത്തുകയും പ്രാദേശിക തലത്തിൽ പരിഹരിക്കാൻ കഴിയുന്ന പ്രശ്നങ്ങൾക്ക് ഒന്നാം ഘട്ടമായ പഞ്ചായത്ത് തലത്തിൽ പരിഹാരം കാണുകയും ചെയ്യും. ജില്ലയിൽ ഏറ്റവും കൂടുതൽ വന്യമൃഗ ശല്യം അനുഭവപ്പെടുന്ന 14 പഞ്ചായത്തുകളിലാണ് ഹെൽപ് ഡെസ്ക്കുകൾ ആരംഭിച്ചിരിക്കുന്നത്. വന്യജീവികളുമായി ബന്ധപ്പെട്ട് ബുദ്ധിമുട്ടുകൾ അനുഭവിക്കുന്ന ഏവർക്കും ഹെൽപ് ഡെസ്ക്കിൽ ബന്ധപ്പെടാവുന്നതും പരാതികൾ നൽകാവുന്നതുമാണ് കൂടരഞ്ഞി: തദ്ദേശസ്ഥാപനങ്ങളിൽ വനംവകുപ്പ് ഹെൽപ്പ് ഡെസ്ക് തുറന്നു. 30 വരെ കൂടരഞ്ഞി പഞ്ചായത്ത് ഓഫീസിൽ ഹെൽപ് ഡെസ്ക് പ്രവർത്തിക്കും. മനുഷ്യ വന്യജീവി സംഘർഷം, ആവാസവ്യവസ്ഥ പുനസ്ഥാപനം, നഷ്ടപരിഹാരം, ആശയങ്ങൾ, നയങ്ങൾ, ഗവേഷണം, നിയമങ്ങളും ചട്ടങ്ങളും, സന്നദ്ധ സംഘടനകളുടെ പ്രവർത്തനം, വനംവകുപ്പിന്‍റെ വിവിധ സേവനങ്ങൾ, ഇക്കോ ടൂറിസം, സ്വയം സന്നദ്ധ പുനരധിവാസം, വനാവകാശ നിയമം, പരിവേഷ പോർട്ടൽ, പൊതുസ്ഥലങ്ങളിലെ മരം മുറി മുതലായ വിഷയങ്ങളിലുള്ള ആവലാതികളും സംശയങ്ങളും പൊതു ജനങ്ങൾക്ക് ഹെൽപ് ഡെസ്കിൽ നൽകാവുന്നതാണ്. കഴിഞ്ഞ 31 ന് മുഖ്യമന്ത്രി ഉദ്ഘാടനം ചെയ്ത മൂന്നുഘട്ടങ്ങളിലായി നടപ്പാക്കുന്ന തീവ്രയജ്ഞ പരിപാടിയുടെ ഭാഗമായാണ് ഹെൽപ് ഡെസ്ക് തുറന്നത്. താമരശേരി: മനുഷ്യ - വന്യജീവി സംഘർഷ ലഘൂകരണ തീവ്രയജ്ഞ പരിപാടിയുടെ ഭാഗമായി കട്ടിപ്പാറ പഞ്ചായത്തിൽ പരാതി സ്വീകരിക്കുന്നതിനുള്ള ഹെൽപ് ഡെസ്ക് പ്രവർത്തനമാരംഭിച്ചു. പഞ്ചായത്ത് പ്രസിഡന്‍റ് പ്രേംജി ജെയിംസ് ഉദ്ഘാടനം ചെയ്തു. വൈസ് പ്രസിഡന്‍റ് ബിന്ദു സന്തോഷ്‌, പഞ്ചായത്ത് സെക്രട്ടറി നൗഷാദ് അലി, ജനപ്രതിനിധികളായ അഷ്റഫ് പൂലോട്, മുഹമ്മദ് ഷാഹിം, ജീൻസി തോമസ് സംഘടനാ പ്രതിനിധികളായ കരീം പുതുപ്പാടി, കെ.വി. സെബാസ്റ്റ്യൻ, മജീദ് ഇരുമ്പോട്ടു പൊയിൽ, ഷിജോ ജോൺ, പഞ്ചായത്ത് അസിസ്റ്റന്‍റ് സെക്രട്ടറി ശ്രീകുമാർ തുടങ്ങിയവർ പങ്കെടുത്തു. ഒക്ടോബർ 30 വരെയാണ് തീവ്രയജ്‌ഞ പരിപാടി സംഘടിപ്പിച്ചിരിക്കുന്നത്. ചക്കിട്ടപാറ: ചക്കിട്ടപാറ പഞ്ചായത്ത് ഓഫീസിൽ ഹെൽപ് ഡെസ്ക് ആരംഭിച്ചു. ഇതിന്‍റെപ്രചരണ പോസ്റ്റർ പ്രകാശനം ചെയ്തു. പഞ്ചായത്ത് പ്രസിഡന്‍റ് കെ. സുനിൽ ഹെൽപ് ഡെസ്ക് ഉദ്ഘാടനം ചെയ്തു.പഞ്ചായത്ത് ഭരണസമിതി അംഗം ജിതേഷ് മുതുകാട്, പെരുവണ്ണാമൂഴി ഫോറസ്റ്റ് റെയിഞ്ച് ഓഫീസർ എ.സി. സുധീന്ദ്രൻ, ഡെപ്യുട്ടി റെയിഞ്ച് ഫോറസ്റ്റ് ഓഫീസർ എസ്.എൻ. രാജേഷ്, സെക്ഷൻ ഫോറസ്റ്റ് ഓഫീസർ ടി.വി. ബിനേഷ് കുമാർ, ബീറ്റ് ഫോറസ്റ്റ് ഓഫീസർമാരായ ആർ. കൃഷ്ണപ്രിയ, ബി.വി. ബിസ്‌ന, ടി. ധീരജ്, ഫോറസ്റ്റ് വാച്ചർ പി.പി. ശോഭന, എൻഎംആർ വാച്ചർ പി.ഡി. പോൾ, ഉണ്ണി, സുനിൽ കുമാർ, രാജീവൻ, ഹനീഫ എന്നിവർ പങ്കെടുത്തു. കോടഞ്ചേരി: കോടഞ്ചേരി പഞ്ചായത്തില്‍ ആരംഭിച്ച ഹെല്‍പ് ഡെസ്‌കില്‍ പരാതി നിക്ഷേപിച്ച് പ്രസിഡന്‍റ് അലക്‌സ് തോമസ് ചെമ്പകശേരി ഉദ്ഘാടനം നിര്‍വഹിച്ചു. ബ്ലോക്ക് പഞ്ചായത്ത് അംഗം റോയി കുന്നപ്പള്ളി, ഗ്രാമപഞ്ചായത്ത് വൈസ് പ്രസിഡന്‍റ് ജമീല അസീസ്, ബീറ്റ് ഫോറസ്റ്റ് ഓഫീസര്‍ അജീഷ്, ഗ്രാമപഞ്ചായത്ത് സെക്രട്ടറി കെ. സീനത്ത്, മെമ്പര്‍മാരായ ചിന്ന അശോകന്‍, ഏലിയാമ്മ കണ്ടത്തില്‍, പിആര്‍ടി അംഗം ലൂയിസ് ജോസഫ് തുടങ്ങിയവര്‍ പങ്കെടുത്തു.

വിശ്വകര്‍മ ജയന്തി ആചരണം 17ന്

കോഴിക്കോട്: ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ വിശ്വകര്‍മ ജയന്തി സാമൂഹ്യ സേവന പദ്ധതികളിലൂടെ ആചരിക്കുന്നു. ഇതിന്‍റെ ഭാഗമായി രക്തദാനം, ആയിരം കുഞ്ഞുങ്ങള്‍ക്ക് സൗജന്യമായി കാതുകുത്തി സ്വര്‍ണകമ്മല്‍ നല്‍കല്‍, പഴയകാല സ്വര്‍ണതൊഴിലാളികളെ ആദരിക്കല്‍ എന്നിവ യൂണിറ്റുകളില്‍ സംഘടിപ്പിക്കും. പരിപാടിയുടെ സംസ്ഥാനതല ഉദ്ഘാടനം 17ന് ചാലപ്പുറം ബുള്ളിയന്‍ ആര്‍ക്കേഡില്‍ അസോസിയേഷന്‍ സംസ്ഥാന പ്രസിഡന്‍റ് കെ.സുരേന്ദ്രന്‍ നിര്‍വഹിക്കുമെന്ന് ഫൈസല്‍ അമീന്‍, പി. സുനില്‍കുമാര്‍, നാസര്‍ സലീന, സുധീര്‍ കളരിക്കല്‍, വി.അബ്ദുല്ല എന്നിവർ വാര്‍ത്താസമ്മേളനത്തില്‍ പറഞ്ഞു.

ടാലൻഷിയ 2.0 മെഗാ ക്വിസ് മത്സരത്തിന് ഉജ്ജ്വല തുടക്കം

താമരശേരി: താമരശേരി കോർപറേറ്റ് എഡ്യൂക്കേഷണൽ ഏജൻസി വിദ്യാർഥികൾക്കായി നടത്തി വരുന്ന ടാലൻഷിയ 2.0 മെഗാ ക്വിസ് മത്സരത്തിന് തിരുവമ്പാടി അൽഫോൻസാ കോളജിൽ തുടക്കമായി. കോഴിക്കോട്, മലപ്പുറം ജില്ലയിലെ വിവിധ സ്കൂളിൽ നിന്ന് വിദ്യാർഥികൾ മത്സരത്തിനെത്തി. ഹയർ സെക്കൻഡറി സ്കൂൾ വിദ്യാർഥികൾക്ക് രാവിലെയും എൽപി വിഭാഗത്തിന് ഉച്ചകഴിഞ്ഞുമാണ് മത്സരങ്ങൾ നടന്നത്. അൽഫോൻസാ കോളജ് മാനേജർ ഫാ. സ്കറിയ മങ്കരയുടെ അധ്യക്ഷതയിൽ നടന്ന പരിപാടി കോളജ് പ്രിൻസിപ്പൽ ഡോ. ഷൈജു ഏലിയാസ് ഉദ്ഘാടനം ചെയ്തു. അൽഫോൻസാ കോളജ് അഡ്മിനിസ്ട്രേറ്റർ ഫാ. മനോജ് കൊല്ലംപറമ്പിൽ ക്വിസ് മത്സരങ്ങൾ നിയന്ത്രിച്ചു. കോർപറേറ്റ് മാനേജർ ഫാ. ജോസഫ് വർഗീസ് പ്രസംഗിച്ചു. അധ്യാപകരായ വിപിൻ എം. സെബാസ്റ്റ്യൻ, റോഷിൻ മാത്യു, ഷിബു മാത്യു എന്നിവർ നേതൃത്വം നൽകി. രാവിലെ നടന്ന ഹയർ സെക്കൻഡറി സ്കൂൾ ഗ്രാന്‍റ് ഫിനാലെ മത്സരത്തിൽ പടത്തുകടവ് ഹോളി ഫാമിലി ഹയർ സെക്കൻഡറി സ്കൂൾ, പുല്ലൂരാംപാറ സെന്‍റ് ജോസഫ്സ് ഹയർ സെക്കൻഡറി സ്കൂൾ, കുളത്തുവയൽ സെന്‍റ് ജോർജസ് ഹയർ സെക്കൻഡറി സ്കൂൾ യഥാക്രമം ആദ്യ മൂന്നു സ്ഥാനങ്ങൾ കരസ്ഥമാക്കി. ഉച്ചയ്ക്ക് ശേഷം നടന്ന എൽപി വിഭാഗം ഗ്രാന്‍റ് ഫിനാലെ മത്സരത്തിൽ തിരുവമ്പാടി സേക്രഡ് ഹാർട്ട് യുപി സ്കൂൾ ഒന്നാം സ്ഥാനവും കട്ടിപ്പാറ നസ്രത്ത് എൽപി സ്കൂൾ മൂത്തോറ്റിക്കൽ രണ്ടാം സ്ഥാനവും നേടി. ഇന്ന് ഹൈസ്കൂൾ, യുപി വിഭാഗം മത്സരങ്ങൾ നടക്കും. സമാപന സമ്മേളനം താമരശേരി ബിഷപ് മാർ റെമീജിയോസ് ഇഞ്ചനാനിയിൽ ഉദ്ഘാടനം ചെയ്യും. കോർപറേറ്റ് മാനേജർ ഫാ.ജോസഫ് വർഗീസ് അധ്യക്ഷത വഹിക്കും. സംസ്ഥാന ചലച്ചിത്ര അക്കാദമി ചെയർമാൻ പ്രേംകുമാർ മുഖ്യാതിഥിയായി പങ്കെടുക്കും. ചലചിത്ര അക്കാദമി റീജണൽ കോഓർഡിനേറ്റർ നവീന വിജയൻ പ്രസംഗിക്കും.

മദ്യപിച്ച് പോലീസ് സ്റ്റേഷൻ ആക്രമിച്ച യുവാവ് പിടിയിൽ

മുക്കം: മുക്കത്തെ സ്വകാര്യ ബാറിൽ നിന്ന് മദ്യപിച്ച് പോലീസ് സ്റ്റേഷനിൽ അതിക്രമിച്ചു കയറി അക്രമം നടത്തിയ യുവാവ് പിടിയിൽ. ചൊവ്വാഴ്ച പുലർച്ചെ രണ്ടരയോടെയാണ് സംഭവം. മലപ്പുറം ജില്ലയിലെ കിഴിശേരി തൃപ്പനച്ചി സ്വദേശി അബൂബക്കർ സിദ്ധീഖാണ് ആക്രമണം നടത്തിയത്. ഇയാൾ മദ്യപിച്ച് പുറത്തിറങ്ങിയ ശേഷം താൻ വന്ന വാഹനംവച്ച സ്ഥലം മറന്നുപോവുകയും അത് അന്വേഷിച്ച് നടക്കുകയുമായിരുന്നു. അതിനിടെയാണ് 400 മീറ്ററോളം അപ്പുറത്തുള്ള പോലീസ് സ്റ്റേഷൻ പരിസരത്തെത്തിയത്. ആദ്യം ചരൽ വാരി എറിയുകയും പോലീസുകാർ പിടിച്ചു മാറ്റുന്നതിനിടയിൽ ജീപ്പിന് കല്ലെറിഞ്ഞ് നാശനഷ്ടങ്ങൾ വരുത്തുകയുമായിരുന്നു. ഔദ്യോഗിക കൃത്യനിർവഹണം തടസപ്പെടുത്തുകയും സ്റ്റേഷൻ പോർച്ചിൽ നിർത്തിയിട്ട വാഹനത്തിന്‍റെ ചില്ല് അടിച്ചുപൊളിച്ച് നാശനഷ്ടം വരുത്തുകയും ചെയ്തിൽ വിവിധ വകുപ്പുകൾ അനുസരിച്ച് കേസ് രജിസ്റ്റർ ചെയ്തിട്ടുണ്ട്.

തലയടിച്ചു പൊട്ടിക്കും; പോലീസിനെതിരേ ഭീഷണിയുമായി കെഎസ്‌യു നേതാവ്

കോഴിക്കോട്: പോലീസ് ഉദ്യോഗസ്ഥര്‍ക്കതിരേ ഭീഷണി പ്രസംഗവുമായി കെഎസ്‌യു കോഴിക്കോട് ജില്ലാ പ്രസിഡന്‍റ് വി.ടി. സൂരജ്. സമരങ്ങളെ തടഞ്ഞാല്‍ പോലീസിന്‍റെ തലയടിച്ചുപൊട്ടിക്കുമെന്നായിരുന്നു സൂരജിന്‍റെ പ്രസംഗം. പോലീസ് അതിക്രമങ്ങള്‍ക്കെതിരേ ഡിസിസി പ്രസിഡന്‍റ് പ്രവീണ്‍ കുമാറിന്‍റെ നേതൃത്വത്തില്‍ സംഘടിപ്പിച്ച സമരത്തിന്‍റെ വേദിയിലായിരുന്നു സൂരജിന്‍റെ വിവാദ പ്രസംഗം. കോണ്‍ഗ്രസിന്‍റെ കണ്ണിലെ കരടായ കോഴിക്കോട് ടൗണ്‍ മുന്‍ എസിപി ബിജുരാജിന്‍റെയും കസബ മുന്‍ സിഐ കൈലാസ് നാഥിന്‍റെയും തലയടിച്ച് പൊട്ടിക്കുമെന്നാണ് പ്രസംഗത്തിലെ സൂചന. കെഎസ്‌യു വിന്‍റെ സമരങ്ങളെ ഇനി തടയാന്‍ വന്നാല്‍ ഉദ്യോഗസ്ഥരെ ആക്രമിക്കാന്‍ യൂത്ത്‌കോണ്‍ഗ്രസ്, കെഎസ്‌യു നേതാക്കള്‍ തയാറാകുമെന്നതില്‍ സംശയം വേണ്ടെന്നും സൂരജ് പറഞ്ഞു.

കോഴിക്കോടിന്‍റെ സാമ്പത്തിക ഇടനാഴിയായി കുട്ട-പുറക്കാട്ടിരി ഗ്രീന്‍ഫീല്‍ഡ് ഹൈവേ മാറും

കോഴിക്കോട്: കര്‍ണാടകയിലെ കുട്ടയില്‍ നിന്ന് പുറപ്പെട്ട് മാനന്തവാടി വഴി കോഴിക്കോട്ടെ പുറക്കാട്ടിരി വരെ നീളുന്ന ഗ്രീന്‍ഫീല്‍ഡ് ഹൈവേ യാഥാര്‍ഥ്യമായാല്‍ കോഴിക്കോടിന്‍റെ സാമ്പത്തിക ഇടനാഴിയായി മാറും. 45 മീറ്ററില്‍ നാലുവരിയായി ലക്ഷ്യമിടുന്ന ഹൈവേ ഒരു എക്കണോമിക് കോറിഡോര്‍ ആയാണ് വിഭാവനം ചെയ്യപ്പെട്ടിരിക്കുന്നത്. ഈ റോഡ് കോഴിക്കോട് നിന്നു കുട്ടയില്‍ എത്തുന്നതോടെ നിരവധി സാധ്യതകള്‍ കോഴിക്കോട്, വയനാട് ജില്ലകള്‍ക്ക് മുന്നില്‍ തുറന്നു കിട്ടും. കുട്ടയില്‍ നിന്നു സമീപകാലത്ത് കേന്ദ്രസര്‍ക്കാര്‍ അനുമതി നല്‍കിയ മൈസൂര്‍- കുശാല്‍നഗര്‍ ഗ്രീന്‍ഫീല്‍ഡ് ഹൈവേയിലേക്ക് കണക്ട് ചെയ്യുന്നതോടെ കര്‍ണാടകയിലെ ഹസന്‍ വഴി പൂനെ, ഹൈദരാബാദ്, അമരാവതി, നാഗ്പൂര്‍ തുടങ്ങി ഇന്ത്യയിലെ നിരവധി പ്രധാന നഗരങ്ങളിലേക്ക് കോഴിക്കോട് നിന്നു സമാന്തരപാതകള്‍ തുറന്നു കിട്ടും. ഇത് കൂടാതെ മൈസൂരു, ബംഗളൂരു നഗരങ്ങളിലേക്ക് രാത്രിയാത്രാ നിരോധനമില്ലാത്ത 24 മണിക്കൂര്‍ ചരക്ക് ഗതാഗതം ഉറപ്പ് നല്‍കുന്ന പാതയായും ഇത് മാറും. കേരളത്തില്‍ നടപ്പാക്കാന്‍ പോകുന്ന നിര്‍ദിഷ്ട കണ്ണൂര്‍ എയര്‍പോര്‍ട്ട് - കുറ്റ്യാടി നാലുവരിപ്പാതയും നിലവിലെ സംസ്ഥാന-ദേശീയപാതകളും പണിപൂര്‍ത്തിയായിക്കൊണ്ടിരിക്കുന്ന മലയോര ഹൈവേയും ഈ റോഡിനോട് ചേരുന്നതോടെ താമരശേരി ചുരത്തിനും കുറ്റ്യാടി ചുരത്തിനും ഇടയില്‍ കിടക്കുന്ന അവികസിതമായ മലയോരമേഖലയില്‍ മികച്ച റോഡ് നെറ്റ്‌വര്‍ക്ക് തന്നെ രൂപപ്പെടും. ഇവിടങ്ങളിലെ ടൂറിസം സാധ്യതകളും കൃത്യമായി ഉപയോഗപ്പെടുത്താന്‍ സാധിക്കും. ഗ്രീന്‍ഫീല്‍ഡ് ഹൈവേ നിലവില്‍ പറഞ്ഞുകേള്‍ക്കുന്ന അലൈന്‍മെന്‍റ് ഉപയോഗിച്ചാല്‍ കോഴിക്കോട്ടെ അകലാപ്പുഴ മുതല്‍ വയനാട്ടിലെ ബാണാസുരസാഗര്‍ വരെയുള്ള വിവിധ ടൂറിസം പ്രാധാന്യമുള്ള കേന്ദ്രങ്ങള്‍, കടല്‍, കായല്‍ മുതല്‍ പശ്ചിമഘട്ടമലനിരകള്‍ വരെ നീളുന്ന വൈവിധ്യം നിറഞ്ഞ കാഴ്ചകള്‍ ഈ പാതയ്ക്ക് ഇരുവശവും ഒരുക്കും. നിരവധി വന്‍നഗരങ്ങളിലേക്ക് യാത്രയ്ക്കും ചരക്ക് നീക്കത്തിനും പുതിയ വഴികള്‍ തുറക്കുന്ന ഈ റോഡ് വലിയ വാണിജ്യ സാധ്യതകളാണ് കോഴിക്കോട്, വയനാട് ജില്ലകള്‍ക്ക് മുന്നില്‍ തുറന്നിടുകയെന്ന് ചൂണ്ടിക്കാണിക്കപ്പെടുന്നു. ബന്ദിപ്പൂര്‍ വനമേഖലയിലൂടെ കടന്നുപോകുന്ന ദേശീയപാത 766-ലെ രാത്രിയാത്ര നിരോധനം കേവലം യാത്രക്കാര്‍ക്ക് മാത്രമല്ല ബുദ്ധിമുട്ട് ഉണ്ടാക്കുന്നത്. ചരക്കുവാഹനങ്ങളുടെ ഇടതടവില്ലാത്ത സഞ്ചാരം ഇല്ലാതാക്കി ചരക്ക് നീക്കത്തിന് കാലതാമസം വരുത്തുകയും വലിയ സാമ്പത്തിക നഷ്ടത്തിന് ഇടവരുത്തുകയും ചെയ്യുന്നു. ഇത് കൂടാതെ ഗതാഗതനിയന്ത്രണം കഴിഞ്ഞു നീങ്ങുന്ന ചരക്കുവാഹനങ്ങള്‍ ഉള്‍പ്പടെയുള്ളവ ഒന്നിച്ച് താമരശേരി ചുരത്തില്‍ എത്തി രൂക്ഷമായ ഗതാഗതക്കുരുക്കിന് കാരണമാവുകയും ചെയ്യുന്നു. ഈ സാഹചര്യത്തിലാണ്‌ കുട്ട- പുറക്കാട്ടിരി ഗ്രീന്‍ഫീല്‍ഡ് ഹൈവേയുടെ പ്രസക്തി വര്‍ധിക്കുന്നതെന്ന് ആക്‌ഷന്‍കമ്മിറ്റി വ്യക്തമാക്കി. 7134 കോടി രൂപയുടെ ഈ പദ്ധതി കേന്ദ്ര ഗതാഗതമന്ത്രി നിതിന്‍ ഗഡ്കരി 2024 ജനുവരി അഞ്ചിനു ഓണ്‍ലൈനായി നടത്തിയ വാര്‍ത്താസമ്മേളനത്തില്‍ പ്രഖ്യാപിച്ചിരുന്നതാണ്. ഡിപിആര്‍ തയാറാക്കാന്‍ ഒരു കണ്‍സള്‍ട്ടന്‍സിയെ നിയോഗിച്ചതായും ജനുവരിയില്‍ അന്തിമരൂപം പുറത്ത് വരുമെന്നും മന്ത്രി സൂചിപ്പിച്ചിരുന്നു. എന്നാല്‍ പിന്നീട് പ്രവര്‍ത്തനങ്ങള്‍ നിലയ്ക്കുകയും പദ്ധതി നിര്‍ത്തിവയ്ക്കുകയും ചെയ്തു. ബാലുശേരിയില്‍ ചേര്‍ന്ന യോഗത്തില്‍ ചെയര്‍മാന്‍ എന്‍.യു പ്രവീണ്‍ അധ്യക്ഷത വഹിച്ചു. കണ്‍വീനര്‍ കുഞ്ഞിക്കണ്ണന്‍ ചെറുക്കാട് , ഒ.എം കൃഷ്ണകുമാര്‍, കെ.പി മനോജ് കുമാര്‍, ഉണ്ണിക്കൃഷ്ണന്‍ തിരുളി, അബ്ദുള്‍ ഫൈസല്‍, ടി.പി. അബ്ദുള്‍ ലത്തീഫ് എന്നിവര്‍ സംസാരിച്ചു.

മുന്നറിയിപ്പ് ലംഘിച്ച് സഞ്ചാരികള്‍ അപകടസാധ്യതയുള്ള പുഴയിലിറങ്ങുന്നു

കൂരാച്ചുണ്ട്: കൂരാച്ചുണ്ട് പഞ്ചായത്ത് പരിധിയിലെ കക്കയം, കരിയാത്തുംപാറ മേഖലകളിലെ പെരുവണ്ണാമൂഴി ഡാം റിസര്‍വോയറിന്‍റെ ഭാഗമായുള്ള പുഴയില്‍ സന്ദര്‍ശകര്‍ ഇറങ്ങി അപകടങ്ങളുണ്ടാകുന്നത് പതിവായിട്ടും പഞ്ചായത്തിന്‍റെ നേതൃത്വത്തില്‍ ചേര്‍ന്ന സര്‍വ്വകക്ഷി യോഗത്തിലെടുത്ത തീരുമാനങ്ങള്‍ ഇന്നും കടലാസില്‍. സഞ്ചാരികള്‍ പുഴയില്‍ മുങ്ങി മരിക്കുന്നത് പതിവായതിനെ തുടര്‍ന്ന് മേഖലയില്‍ നിയന്ത്രങ്ങള്‍ ഏര്‍പ്പെടുത്താനാണ് സര്‍വകക്ഷി യോഗത്തില്‍ തീരുമാനിച്ചിരുന്നത്. ഇത് നടപ്പിലാകാത്തതിനാല്‍ അപകടങ്ങള്‍ ആവര്‍ത്തിക്കുകയാണ്. രണ്ടു മാസം മുമ്പ് കക്കയം മുപ്പതാംമൈല്‍ മേഖലയിലെ പുഴയില്‍ സുഹൃത്തുക്കളോടൊപ്പം കുളിക്കാനിറങ്ങിയ യുവാവ് അപകടത്തില്‍പെട്ട് മരണമടഞ്ഞിരുന്നു. തുടര്‍ന്ന് ഗ്രാമപഞ്ചായത്തിന്‍റെ നേതൃത്വത്തില്‍ സന്ദര്‍ശകര്‍ക്ക് നിയന്ത്രണമേര്‍പ്പെടുത്താന്‍ യോഗം ചേര്‍ന്ന് തീരുമാനമെടുത്തിരുന്നു. അപകട സാധ്യതകള്‍ ഏറെയുള്ള പുഴയില്‍ പ്രവേശനം നിരോധിച്ചിട്ടുണ്ടെങ്കിലും സന്ദര്‍ശകര്‍ ഇവയൊന്നും വകവയ്ക്കാതെ വെള്ളത്തില്‍ ഇറങ്ങുകയും അപകടത്തില്‍ പെടുകയും ചെയ്യുന്നത് പതിവാകുകയാണ്. റിസര്‍വോയര്‍ മേഖലകളില്‍ പ്രവേശിക്കുന്നത് നിരോധിച്ചുകൊണ്ടുള്ള ബോര്‍ഡുകള്‍ കൂടുതല്‍ സ്ഥലങ്ങളില്‍ സ്ഥാപിക്കാനാണ് യോഗത്തില്‍ തീരുമാനിച്ചത്. ഇതിനായി ഒന്‍പതംഗ കമ്മിറ്റിയും രൂപീകരിച്ചിരുന്നു. ഈ വിഷയം സംബന്ധിച്ച് ഗ്രാമപഞ്ചായത്ത് ഭരണസമിതി യോഗത്തില്‍ പ്രത്യേക അജണ്ട വച്ച് തീരുമാനമെടുക്കുന്നതിനും എംഎല്‍എയുമായി ചര്‍ച്ച ചെയ്ത് കൂടുതല്‍ ഗൈഡുമാരെ നിയമിക്കുന്നതിനുള്ള നടപടികള്‍ സ്വീകരിക്കാനും തീരുമാനിച്ചിരുന്നു. എന്നാല്‍ മാസങ്ങള്‍ പിന്നിട്ടിട്ടും ഇതുമായി ബന്ധപ്പെട്ട് യാതൊരു നടപടിയും സ്വീകരിച്ചിട്ടില്ലെന്നാണ് ആക്ഷേപം. കഴിഞ്ഞ അവധി ദിവസങ്ങളില്‍ ഈ മേഖലകളില്‍ സന്ദര്‍ശകരുടെ എണ്ണം വര്‍ധിച്ചിരുന്നു. സന്ദര്‍ശകരില്‍ പലരും പുഴയില്‍ ഇപ്പോഴും ഇറങ്ങി കുളിക്കുന്നത് അപകട സാധ്യത വര്‍ധിപ്പിക്കുന്നുണ്ട് .ഇതിന് പരിഹാരം കാണാന്‍ അധികൃതര്‍ അടിയന്തര നടപടി സ്വീകരിക്കണമെന്ന ആവശ്യമാണ് ഉയരുന്നത്.

പഴയ തിരോധാന കേസുകള്‍ പൊടിതട്ടിയെടുത്ത് പോലീസ്; മൂന്നുമാസത്തിനിടെ തെളിയിച്ചത് രണ്ടുകേസുകള്‍

കോഴിക്കോട്: കാണാതായ രണ്ടാളുകളുടെ കേസുകള്‍ അടുത്തിടെ തെളിയിച്ചതിനു പിന്നാലെ വര്‍ഷങ്ങളായുള്ള തിരോധാന കേസുകള്‍ പോലീസ് പൊടിതട്ടിയെടുക്കുന്നു.കോഴിക്കോട്ടുനിന്നു കാണാതായ മാമിയുടെ കേസും ഊര്‍ജിതമായി അന്വേഷിക്കാനാണ് പോലീസിന്‍റെ തീരുമാനം. മൂന്നുമാസത്തിനിടെ രണ്ടു തിരോധാന കേസുകള്‍ കൊലപാതകമാണെന്ന് തെളിയിക്കാന്‍ കഴിഞ്ഞത് പോലീസിന് ആത്മവിശ്വാസം നല്‍കുന്നുണ്ട്. എലത്തൂര്‍ പോലീസ് രജിസ്റ്റര്‍ ചെയ്ത വിജില്‍ വിജയന്‍റെ തിരോധാന കേസാണ് പോലീസ് തെളിയിച്ച പ്രധാന കേസ്. ആറുവര്‍ഷം മുമ്പുള്ള മിസ്സിംഗ് കേസില്‍ മൂന്നുപ്രതികളെ അറസ്റ്റ് ചെയ്യാനും വിജിലിന്‍റേതാണെന്ന് കരുതുന്ന 53 അസ്ഥികളും ഷൂവും കണ്ടെടുക്കാനും പോലീസീനു കഴിഞ്ഞിരുന്നു. വിജിലിന്‍റെ ബൈക്കും കിട്ടി. സുഹൃത്തുക്കളായ മൂന്നു പ്രതികള്‍ പോലീസിന്‍റെ പിടിയിലായിട്ടുണ്ട്. അസ്ഥികള്‍ ഡിഎന്‍എ ടെസ്റ്റിനയച്ച് ഉറപ്പുവരുത്തുന്ന ജോലി മാത്രമാണ് ഇനി ബാക്കിയുള്ളത്. മെഡിക്കല്‍ കോളജ് പോലീസ് സ്‌റ്റേഷന്‍ പരിധിയില്‍നിന്നു കാണാതായ ഹേമചന്ദ്രനെ കൊന്നതാണെന്ന് തെളിയിക്കാനും പോലീസിനു കഴിഞ്ഞു. കഴിഞ്ഞ വര്‍ഷം മാര്‍ച്ച് ഇരുപതിനാണ് ബത്തേരി സ്വദേശിയായ ഹേമചന്ദ്രനെ സാമ്പത്തിക തര്‍ക്കത്തെ തുടര്‍ന്ന് പ്രതികള്‍ കോഴിക്കോട്ടെ മായനാടുനിന്ന് തട്ടിക്കൊണ്ടുപോയത്. കൊലപ്പെടുത്തിയശേഷം ചേരമ്പാടി വനത്തില്‍ കുഴിച്ചുമൂടുകയായിരുന്നു.കേസില്‍ അഞ്ചുപ്രതികെള പോലീസ് അറസ്റ്റ് ചെയ്തിട്ടുണ്ട്. വ്യത്യസ്തമായ സ്‌ക്വാഡുകള്‍ നടത്തിയ അന്വേഷണം ഏകോപിപ്പിച്ചത് സിറ്റി പോലീസ് കമ്മീഷണര്‍ ടി.നാരായണനാണ്. മേല്‍നോട്ട ചുമതല നിര്‍വഹിച്ചത് ഡെപ്യൂട്ടി പോലീസ് കമ്മീഷണര്‍ അരുണ്‍ കെ. പവിത്രനാണ്. അന്വേഷണസംഘങ്ങള്‍ തമ്മില്‍ കൃത്യമായ ഏകോപനം നടത്തിയും പ്രതിമാസം അവലോകനം നടത്തിയുമാണ് ഈ നേട്ടം കൈവരിക്കാന്‍ പോലീസിനു കഴിഞ്ഞത്. രണ്ടുകേസുകളിലും അസ്ഥി കണ്ടെടുക്കാന്‍ കഴിഞ്ഞത് പോലീസിനു നേട്ടമായി. ഈ കേസന്വേഷണങ്ങള്‍ ലക്ഷ്യം കണ്ടതിന്‍റെ ആവേശമാണ് പഴയ ഫയലുകളിലേക്ക് കടക്കാന്‍ പോലീസിന് ഈര്‍ജം നല്‍കിയത്. ക്രിമിനല്‍ ബന്ധം, മയക്കുമരുന്ന് കടത്ത്, സാമ്പത്തിക തര്‍ക്കം തുടങ്ങിയ കേസുകളില്‍പെട്ടവരെ കാണാത്ത കേസുകളാണ് തെളിയിക്കാനുള്ളത്. കോഴിക്കോട്ടെ റിയല്‍ എസ്‌റ്റേറ്റ് ബിസിനസുകാരനായ മാമിയുടെ തിരോധാന കേസും ഇതില്‍ ഉള്‍പ്പെടുന്നു. 2023 ഓഗസ്റ്റ് ഇരുപതിനാണ് മാമിയെ കാണാതായത്. ക്രൈംബ്രാഞ്ച് സ്‌പെഷല്‍ സ്‌ക്വാഡ് അന്വേഷണം നടത്തുന്നുണ്ടെങ്കിലും എവിടെയും എത്തിയിട്ടില്ല. ഈ കേസ് എത്രയും വേഗത്തില്‍ തെളിയിക്കുന്നതിനുള്ള നീക്കത്തിലാണ് പോലീസ്. തിരോധാന കേസുകളിലെല്ലാം പരമാവധി ഡിജിറ്റല്‍ തെളിവുകള്‍ ശേഖരിച്ച് മുന്നോട്ടുപോകാനാണ് തീരുമാനം. ഇതിന്‍റെ ഭാഗമായി ഫോണ്‍കോള്‍ വിവരങ്ങള്‍ ശേഖരിക്കും. സംസ്ഥാന ഹൈടെക് ക്രൈം എന്‍ക്വയറി സെല്ലിന്‍റെ സഹായം ഉപയോഗപ്പെടുത്തിയായിരിക്കും അന്വേഷണം. നേരത്തെ വിശ്വാസ്യയോഗ്യമല്ലെന്ന് കണ്ട് മാറ്റിവച്ച സാഹചര്യത്തെളിവുകള്‍ പുനഃപരിശോധിക്കാനും ആലോചനയുണ്ട്. തിരോധാന കേസുകളില്‍ ജനങ്ങള്‍ക്കുള്ള ആശങ്ക പരിഹരിക്കുന്നതിനാണ് വേഗത്തില്‍ പുനരന്വേഷണത്തിനുള്ള നീക്കം നടക്കുന്നത്. സ്വന്തം ലേഖകന്‍

അങ്കണവാടി അധ്യാപികയുടെ മാല കവര്‍ന്ന പ്രതി അറസ്റ്റില്‍

നാദാപുരം: അങ്കണവാടി അധ്യാപികയുടെ സ്വര്‍ണമാല പിടിച്ചു പറിച്ച കേസിലെ പ്രതി അറസ്റ്റില്‍. കാസര്‍കോട് കീഴൂര്‍ ചന്ദ്രഗിരി സ്വദേശി ഷംനാസ് മന്‍സിലില്‍ മുഹമ്മദ് ഷംനാസി(32)നെയാണ് നാദാപുരം എസ്‌ഐ എം.പി. വിഷ്ണു അറസ്റ്റ് ചെയ്തത്. ഇക്കഴിഞ്ഞ ജൂലൈയിലാണ് കേസിനാസ്പമായ സംഭവം. അധ്യാപിക ഇരിങ്ങണ്ണൂര്‍ അങ്കണവാടിയിലേക്ക് പോകുന്നതിനിടെ സ്‌കൂട്ടറിലെത്തിയ പ്രതി മാല പിടിച്ച് പറിക്കുകയും സ്‌കൂട്ടറില്‍ രക്ഷപ്പെടുകയുമായിരുന്നു. ഇതിന് പിന്നാലെ തലശേരി മേഖലയില്‍ വ്യാപകമായി സ്വര്‍ണാഭരണങ്ങള്‍ കവര്‍ന്ന പ്രതിയെ കാസര്‍കോട് എസ്പിയുടെ സ്‌ക്വാഡ് അംഗങ്ങള്‍ പിടികൂടുകയും തലശേരി പോലീസ് രജിസ്റ്റര്‍ ചെയ്ത കേസുകളില്‍ പ്രതി ചേര്‍ക്കുകയുമായിരുന്നു. തുടര്‍ന്ന് റിമാൻഡിലായ പ്രതിയെ നാദാപുരം പോലീസ് അറസ്റ്റ് രേഖപ്പെടുത്തി രണ്ട് ദിവസത്തേക്ക് തെളിവെടുപ്പിനും മറ്റുമായി കസ്റ്റഡിയില്‍ വാങ്ങി. കാസര്‍കോട്, കണ്ണൂര്‍ ജില്ലകളില്‍ പ്രതിക്കെതിരേ 12 കേസുകള്‍ നിലവില്‍ ഉണ്ടെന്നും കേസുകള്‍ വിവിധ കോടതികളില്‍ വിചാരണ നടക്കുകയാണെന്നും പോലീസ് പറഞ്ഞു. കസ്റ്റഡിയിലെടുത്ത പ്രതിയെ പരാതിക്കാരി തിരിച്ചറിഞ്ഞു.

വേള്‍ഡ് അത്‌ലറ്റിക്‌സ് ബ്രോണ്‍സ് ലെവല്‍ റഫറി ടെസ്റ്റ് പാസായി ഡോ. റോയ് വി. ജോണ്‍

കോഴിക്കോട്: വേള്‍ഡ് അത്‌ലറ്റിക്‌സ് നേരിട്ട് നടത്തിയ റഫറി സെലക്‌ഷനില്‍ ബ്രോണ്‍സ് ലെവല്‍ നേട്ടവുമായി ഡോ. റോയ് വി. ജോണ്‍. കോമണ്‍വെല്‍ത്ത് ഗെയിംസ്, എഷ്യന്‍ അത്‌ലറ്റിക്‌സ് ചാമ്പ്യന്‍ഷിപ്പ്, ഓള്‍സ്റ്റാര്‍ അത്‌ലറ്റിക്‌സ് ചാമ്പ്യന്‍ഷിപ്പ് തുടങ്ങി നിരവധി ദേശീയ, അന്തര്‍ദേശീയ മത്സരങ്ങള്‍ നിയന്ത്രിച്ചിട്ടുള്ള പരിചയമാണ് ഈ നേട്ടത്തിലേക്ക് റോയിയെ എത്തിച്ചത്. കഴിഞ്ഞ ദേശീയ ഗെയിംസിലും ട്രാക്കിനെ നിയന്ത്രിച്ചത് ഇദ്ദേഹമായിരുന്നു. നാഷണല്‍ ഇന്‍സ്റ്റിറ്റ്യൂട്ട് ഓഫ് സ്‌പോര്‍ട്സില്‍ നിന്ന് അത്‌ലറ്റിക്‌സ് കോച്ചിംഗില്‍ എ ഗ്രേഡ് നേടിയിട്ടുള്ള റോയ് കാലിക്കട്ട് യൂണിവേഴ്‌സിറ്റി അത്‌ലറ്റിക്‌സ് ടീം കോച്ച്, മനേജര്‍ എന്നീ നിലകളിലും പ്രവര്‍ത്തിച്ചിട്ടുണ്ട്. ഗവ. ഫിസിക്കല്‍ എഡ്യുക്കേഷന്‍ കോളജ് മുന്‍ പ്രിന്‍സിപ്പല്‍, ദേവഗിരി സെന്‍റ് ജോസഫ്സ് കോളജ് സ്‌പോര്‍ട്സ് മാനേജ്‌മെന്‍റ് വിഭാഗം മേധാവി എന്നീ നിലകളില്‍ പ്രവര്‍ത്തിച്ചിട്ടുള്ള ഇദ്ദേഹം കോഴിക്കോട് ജില്ലാ സ്‌പോര്‍ട്സ് കൗണ്‍സില്‍ വൈസ് പ്രസിഡന്‍റും സിഐസിഎസ് ബിഎഡ് കോളജിലെ കായിക വിഭാഗം വിസിറ്റിംഗ് ഫ്രഫസറുമാണ്.

ദീപിക നമ്മുടെ ഭാഷ പദ്ധതി : മരുതോങ്കര സെന്‍റ് മേരീസ് ഹയര്‍ സെക്കന്‍ഡറി സ്‌കൂൾ

മരുതോങ്കര: സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ ദീപിക നമ്മുടെ ഭാഷ പദ്ധതി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ആന്‍റോ മൂലയില്‍ സ്‌കൂള്‍ ലീഡര്‍ നിഷാല്‍ സുമേഷിന് ദീപിക പത്രം നല്‍കിയാണ് ഉദ്ഘാടനം നിർവഹിച്ചത്. ഹെഡ്മാസ്റ്റര്‍ സജി തോമസ്, അധ്യാപിക രാജി സി. ആന്‍സ്, ഡിഎഫ്‌സി മേഖല പ്രസിഡന്‍റ് ബേബി ഇയ്യാലില്‍, ദീപിക ഏരിയ മാനേജര്‍ ജോഷി എന്നിവര്‍ പ്രസംഗിച്ചു. അച്ചാമ്മ പതാപറമ്പില്‍, നിര്‍മ്മല പെരുമ്പള്ളില്‍, ജോണ്‍ പൂതക്കുഴി, നോബിന്‍ വാതല്ലൂര്‍ കാലായില്‍, അനുഷ്‌ക്ക ബേബി ഇയ്യാലില്‍, തോമസ് കൈതക്കുളം, ബിജി വെട്ടിക്കല്‍, മത്തച്ചന്‍ വടക്കേടത്ത്, മത്തായി പതാപറമ്പില്‍, സന്തോഷ് നെല്ലരികയില്‍, ജോസ് വെട്ടിക്കല്‍ എന്നിവരാണ് സെന്‍റ് മേരീസ് സ്‌ക്കൂളിലേക്ക് പത്രങ്ങള്‍ സ്‌പോണ്‍സര്‍ ചെയ്തത്.

താമരശേരി രൂപത കൈക്കാരന്‍മാരുടെ സംഗമം സംഘടിപ്പിച്ചു

താമരശേരി: താമരശേരി രൂപതയുടെ റൂബി ജൂബിലിയോടനുബന്ധിച്ച് സംഘടിപ്പിച്ച കൈക്കാരന്‍മാരുടെ സംഗമം രൂപത വികാരി ജനറാള്‍ മോണ്‍. ഏബ്രഹാം വയലില്‍ ഉദ്ഘാടനം ചെയ്തു. രൂപത പ്രൊക്കുറേറ്റര്‍ ഫാ. ജോര്‍ജ് മുണ്ടനാട്ട് സ്വാഗതം പറഞ്ഞു. എകെസിസി ഗ്ലോബല്‍ ഡയറക്ടര്‍ ഫാ. ഫിലിപ്പ് കവിയില്‍ സമുദായത്തിന്‍റെ കെട്ടുറപ്പിന്‍റെ ആവശ്യകതയെക്കുറിച്ച് ക്ലാസെടുത്തു. താമരശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍ മുഖ്യപ്രഭാഷണം നടത്തുകയും കൈക്കാരന്‍മാര്‍ക്ക് ജൂബിലി സമ്മാനങ്ങള്‍ നല്‍കുകയും ചെയ്തു. കൂടരഞ്ഞി ഇടവക ട്രസ്റ്റി ടോമി പ്ലാത്തോട്ടത്തില്‍, കൂമുള്ളി ഇടവക ട്രസ്റ്റി സില്‍വി, രൂപത ചാന്‍സിലര്‍ ഫാ. സെബാസ്റ്റ്യന്‍ കാവളക്കാട്ട് തുടങ്ങിയവര്‍ പ്രസംഗിച്ചു.

"കളേഴ്സ് ഓഫ് കെയര്‍' ചിത്രരചനാ മത്സരം സംഘടിപ്പിച്ചു

കോഴിക്കോട്: ലോക പ്രഥമശുശ്രൂഷാ ദിനത്തോടനുബന്ധിച്ച് ബേബി മെമ്മോറിയല്‍ ഹോസ്പിറ്റലിന്‍റെ സാമൂഹിക ഉത്തരവാദിത്വ പദ്ധതിയായ ലൈഫ് ലൈനര്‍ കുട്ടികള്‍ക്കായി സംഘടിപ്പിച്ച "കളേഴ്സ് ഓഫ് കെയര്‍' ചിത്രരചനാ മത്സരം ശ്രദ്ധേയമായി. അടിയന്തര സാഹചര്യങ്ങളില്‍ ശരിയായ പ്രഥമശുശ്രൂഷയുടെ പ്രാധാന്യം ജനങ്ങളിലേക്ക് എത്തിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. കണ്ണൂര്‍, വടകര, പയ്യന്നൂര്‍, കോഴിക്കോട്, തൊടുപുഴ എന്നിവിടങ്ങളിലായി മത്സരം സംഘടിപ്പിച്ചു. കോഴിക്കോട് ഹൈലൈറ്റ് മാളില്‍ നടന്ന പരിപാടിയില്‍ ചിത്രകാരന്‍ നിഷാദ് വി. അബൂബക്കര്‍ തത്സമയം ചിത്രം വരച്ചു. അടിയന്തര ഘട്ടങ്ങളില്‍ ശാസ്ത്രീയ പ്രഥമ ശുശ്രൂഷ നല്‍കുവാന്‍ പ്രാപ്തരായ പൗരന്മാരുടെ ശൃംഖല സംസ്ഥാനത്തുടനീളം വാര്‍ത്തെടുക്കുക എന്ന ലക്ഷ്യത്തിന്‍റെ ഭാഗമായി ബേബി മെമ്മോറിയല്‍ ഹോസ്പിറ്റല്‍ ആരംഭിച്ച സിഎസ്ആര്‍ സംരംഭമാണ് ലൈഫ് ലൈനര്‍.

ടാലന്‍ഷിയ 2.0 മെഗാ ക്വിസ് മത്സരം ഇന്നും നാളെയും

താമരശേരി: താമരശേരി കോര്‍പറേറ്റ് എഡ്യൂക്കേഷണല്‍ ഏജന്‍സി വിദ്യാര്‍ഥികള്‍ക്കായി നടത്തി വരുന്ന ടാലന്‍ഷിയ 2.0 മെഗാ ക്വസ് മത്സരം ഇന്നും നാളെയുമായി നടക്കും. ഇന്ന് രാവിലെ 9.30ന് തിരുവമ്പാടി അല്‍ഫോന്‍സ കോളജില്‍ മത്സരം ആരംഭിക്കുമെന്ന് കോര്‍പറേറ്റ് മാനേജര്‍ ഫാ.ജോസഫ് വര്‍ഗീസ് അറിയിച്ചു. കോളജ് മാനേജര്‍ ഫാ.സ്‌കറിയ മങ്കരയുടെ അധ്യക്ഷതയില്‍ നടക്കുന്ന പരിപാടി കോളജ് പ്രിന്‍സിപ്പല്‍ ഷൈജു ഏലിയാസ് ഉദ്ഘാടനം ചെയ്യും. നാളെ നടക്കുന്ന സമാപന സമ്മേളനം താമരശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍ ഉദ്ഘാടനം ചെയ്യും. കോര്‍പറേറ്റ് മാനേജര്‍ ഫാ. ജോസഫ് വര്‍ഗീസ് അധ്യക്ഷത വഹിക്കും. സംസ്ഥാന ചലച്ചിത്ര അക്കാദമി ചെയര്‍മാന്‍ പ്രേംകുമാര്‍ മുഖ്യാതിഥിയായിരിക്കും. ചലച്ചിത്ര അക്കാദമി റീജണല്‍ കോ ഓര്‍ഡിനേറ്റര്‍ നവീന വിജയന്‍ പ്രസംഗിക്കും. അല്‍ഫോന്‍സ കോളജ് അഡ്മിനിസ്‌ട്രേറ്റര്‍ ഫാ. മനോജ് കൊല്ലംപറമ്പില്‍, അധ്യാപകരായ വിപിന്‍ എം. സെബാസ്റ്റ്യന്‍, റോഷിന്‍ മാത്യു എന്നിവര്‍ നേതൃത്വം നല്‍കും.

തിക്കോടിയിൽ അടിപ്പാത നിർമ്മാണം ആരംഭിച്ചു

പയ്യോളി: രണ്ടു വർഷത്തിലേറെയായി പ്രതിഷേധവും സമരവുമായി നിലകൊണ്ട തിക്കോടി നിവാസികൾക്ക് അനുവദിച്ച അടിപ്പാതയുടെ നിർമ്മാണം ആരംഭിച്ചു. തിക്കോടി ടൗണിൽ നിന്ന് കോഴിക്കോട് ഭാഗത്തേക്ക് 350 മീറ്റർ ദൂരെയാണ് അടിപ്പാത നിർമ്മിക്കുന്നത്. ഒരുമാസം കൊണ്ട് നിർമ്മാണം പൂർത്തിയാക്കാൻ ആകും എന്നാണ് പ്രതീക്ഷ. ഇതോടെ തിക്കോടി മേഖലയിലെ ദേശീയപാത വികസനത്തിന്‍റെ അനിശ്ചിതാവസ്ഥയ്ക്ക് പൂർണ്ണവിരാമം ഉണ്ടാകും.ദേശീയപാത നിർമ്മാണത്തിന്‍റെ ആദ്യഘട്ടം മുതൽ തന്നെ അടിപ്പാത നിർമ്മിക്കണമെന്ന ആവശ്യവുമായി തിക്കോടിയിലെ ബഹുജന കൂട്ടായ്മ സമര രംഗത്തുണ്ട്. ഏറെ ജനസാന്ദ്രതയുള്ള തീരദേശവും കിഴക്കൻ ഭാഗവും തമ്മിൽ വിഭജിക്കപ്പെടുമെന്ന് ആശങ്കയായിരുന്നു ഈ നീക്കത്തിന് കാരണമായത്.എന്നാൽ ഒരു കിലോമീറ്റർ താഴെ ദൂരെയുള്ള തിക്കോടി പഞ്ചായത്ത് ബസാറിൽ അടിപ്പാത അനുവദിച്ചതോടെ തിക്കോടി ടൗണിലെ അടിപ്പാതാ സ്വപ്നങ്ങൾക്ക് മങ്ങലേൽക്കുകയായിരുന്നു. ഇതോടെയാണ് റിലേ നിരാഹാരം ഉൾപ്പെടെയുള്ള സമരപ്രക്ഷോഭ പരമ്പരങ്ങളുമായി അടിപ്പാത സമരസമിതിയുടെ നേതൃത്വത്തിൽ തിക്കോടിയിലെ ജനങ്ങൾ അണിനിരന്നത്. കേരളത്തിൽ എല്ലായിടത്തും ദേശീയപാത നിർമ്മാണം പുരോഗമിച്ചപ്പോഴും തിക്കോടി ഉൾപ്പെടുന്ന ചെറിയ മേഖലയിലെ നിർമ്മാണം സമരസമിതിയുടെ പ്രതിഷേധത്തെ തുടർന്ന് ആരംഭിക്കുക പോലും ചെയ്തിരുന്നില്ല .

വിദേശമദ്യ വില്‍പ്പനക്കാരനെ നാട്ടുകാര്‍ പിടികൂടി എക്‌സൈസിനു കൈമാറി

നാദാപുരം: വിദേശമദ്യ വില്‍പ്പനക്കാരനെ നാട്ടുകാര്‍ പിടികൂടി എക്‌സൈസിനു കൈമാറി. തിനൂര്‍ കയപ്പക്കൊല്ലിയില്‍ മദ്യവില്‍പ്പന നടത്തുന്നതിനിടെ വാണിമേല്‍ വെള്ളിയോട് സ്വദേശി നടുവിലക്കണ്ടി കുമാരനാ (59)ണ് പിടിയിലായത്. പ്രതിയില്‍ നിന്ന് 12.5 ലിറ്റര്‍ മദ്യം അധികൃതര്‍ പിടികൂടി. കയപ്പക്കൊല്ലിയില്‍ മദ്യം വിതരണം ചെയ്യുന്നതിനിടെ പ്രതിയെ നാട്ടുകാര്‍ തടഞ്ഞു വച്ച് എക്‌സൈസ് ഉദ്യോഗസ്ഥര്‍ക്ക് കൈമാറുകയായിരുന്നു. പ്രതിയെ കോടതി റിമാന്‍റ് ചെയ്തു.നാദാപുരം എക്‌സൈസ് പ്രിവന്‍റിവ് ഓഫീസര്‍ കെ.കെ. ജയനും സംഘവുമാണ് പ്രതിയെ കസ്റ്റഡിയില്‍ എടുത്തത്.

എന്‍.ജി.ഒ. അസോ. പ്രതിഷേധ മാര്‍ച്ച്

കോഴിക്കോട്: ജീവനക്കാരോടുള്ള സംസ്ഥാന സര്‍ക്കാരിന്‍റെ ദ്രോഹ നടപടികള്‍ക്കെതിരെ എന്‍ജിഒ അസോസിയേഷന്‍ ജില്ലാ കമ്മിറ്റി പുതിയറ സബ് ട്രഷറിക്കു മുമ്പില്‍ പ്രതിഷേധ മാര്‍ച്ചും ധര്‍ണയും നടത്തി. ഡിസിസി ജനറല്‍ സെക്രട്ടറി ദിനേശ് പെരുമണ്ണ ഉദ്ഘാടനം ചെയ്തു. ജില്ലാ പ്രസിഡന്‍റ് പ്രേംനാഥ് മംഗലശ്ശേരി അധ്യക്ഷനായി. കുടിശ്ശിക ക്ഷാമബത്ത അനുവദിക്കുക, പങ്കാളിത്തപെന്‍ഷന്‍ പിന്‍വലിക്കുക, അനുവദിച്ച ക്ഷാമബത്തയുടെ 154 മാസത്തെ കുടിശിക നല്‍കുക, 12ാം ശമ്പള പരിഷ്‌കരണം നടപ്പിലാക്കുക, ശമ്പള റിക്കവറിക്ക് അധിക ഫീസ് ചുമത്തുന്ന ഉത്തരവ് പിന്‍വലിക്കുക, വിലക്കയറ്റം നിയന്ത്രിക്കുക, പിന്‍വാതില്‍ നിയമനം അവസാനിപ്പിക്കുക എന്നീ ആവശ്യങ്ങള്‍ ഉന്നയിച്ചായിരുന്നു മാര്‍ച്ചും ധര്‍ണ്ണയും. സെറ്റോ ജില്ലാ ചെയര്‍മാന്‍ സിജു കെ. നായര്‍, സംസ്ഥാന കമ്മിറ്റി അംഗം മധു രാമനാട്ടുകര, കെ.വി. രവീന്ദ്രന്‍, വി.വിപീഷ്, പി. പ്രദീപ് കുമാര്‍, വി.പി. ജംഷീര്‍, കെ.പി. സുജിത എന്നിവര്‍ സംസാരിച്ചു. എം.വി. ബഷീര്‍, പി.അരുണ്‍, കെ.ടി. രമേശന്‍, കെ.വി. ബാലകൃഷ്ണന്‍, പി. നിസാര്‍, പി. ലിജിന, സി.ജെ ലിന്‍സ്, റോഷ്‌ന ഡെന്‍സില്‍ ടി. സാറാമ്മകെ. ജോതിഷ് കുമാര്‍, കെ ജയേഷ്, കെ. എന്‍ ശരത്, കെ. സന്തോഷ് കുമാര്‍ എന്നിവര്‍ നേതൃത്വം നല്‍കി.

തദ്ദേശ സ്വയംഭരണ തെരഞ്ഞെടുപ്പ് അട്ടിമറിക്കാന്‍ സിപിഎം ശ്രമം: ഡിസിസി

കോഴിക്കോട്: ഭരണ സംവിധാനം ഉപയോഗിച്ച് തദേശസ്വയംഭരണ തെരഞ്ഞെടുപ്പില്‍ കൃത്രിമ വിജയം ഉണ്ടാക്കാനുള്ള ശ്രമം സിപിഎം നടത്തുകയാണെന്ന് ഡിസിസി പ്രസിഡന്‍റ് അഡ്വ. കെ.പ്രവീണ്‍ കുമാര്‍ ആരോപിച്ചു. ജീവനക്കാര്‍ നിയമ വിരുദ്ധ നടപടിക്ക് കൂട്ടുനിന്നാല്‍ കനത്ത വില നല്‍കേണ്ടിവരുമെന്നും അദേഹം മുന്നറിയിപ്പ് നല്‍കി. തിരുവള്ളൂര്‍ ഗ്രാമഞ്ചായത്ത് ഓഫീസിലേക്ക് യുഡിഎഫ് പഞ്ചായത്ത് കമ്മറ്റി നടത്തിയ മാര്‍ച്ച് ഉദ്ഘാടനം ചെയ്യുകയായിരുന്നു അദേഹം. വാര്‍ഡു വിഭജനം മുതല്‍ വോട്ടര്‍പട്ടിക ക്രമീകരണത്തില്‍ വരെ ഒട്ടുമിക്ക പഞ്ചായത്തുകളിലും ഗുരുതരമായ ക്രമക്കേടുകള്‍ നടന്നിട്ടുണ്ട്. അതിര്‍ത്തി പാലിക്കാതെ വീടുകള്‍ ഉള്‍പ്പെടുത്തുക, വിചാരണക്ക് ഹാജരായ ഭിന്നശേഷിക്കാരുടെയും നാളിതു വരെ വിദേശത്തു പോകാത്തവരുടേയും ഉള്‍പ്പെടെ വോട്ടുകള്‍ ഒഴിവാക്കുക, ഒരു വീട്ടിലെ അംഗങ്ങളെ രണ്ടു വാര്‍ഡുകളിലായി വിന്യസിക്കുക. ഇങ്ങനെ ഒട്ടേറെ പ്രകടമായ ക്രമക്കേടുകള്‍ തിരുവള്ളൂരില്‍ തന്നെ നടന്നിട്ടുണ്ടെന്നും പ്രവീണ്‍കുമാര്‍ ആരോപിച്ചു. ചെയര്‍മാന്‍ ആര്‍. രാമകൃഷ്ണന്‍ അധ്യക്ഷത വഹിച്ചു. മുസ്ലിം ലീഗ് ജില്ലാ വൈസ് പ്രസിഡന്‍റ് കെ.ടി. അബ്ദുറഹ്‌മാന്‍ മുഖ്യപ്രഭാഷണം നടത്തി. നിയോജകമണ്ഡലം ചെയര്‍മാന്‍ അമ്മാരപ്പള്ളി കുഞ്ഞിശങ്കരന്‍, കണ്‍വീനര്‍ നൊച്ചാട്ട് കുഞ്ഞബ്ദുല്ല, പാലൂന്നി മൊയ്തു, പി.സി ഷീബ, പി.സി ഹാജറ, ഡി. പ്രജീഷ്, ബവിത്ത് മലോല്‍, സി.പി.വിശ്വന്‍, ചുണ്ടയില്‍ മൊയ്തുഹാജി, കണ്ണോത്ത് സൂപ്പിഹാജി, എഫ്.എം മുനീര്‍, പി.കെ.കൃഷ്ണന്‍, പി.അബ്ദുറഹ്‌മാന്‍ എന്നിവര്‍ പ്രസംഗിച്ചു. സബിത മണക്കുനി, കിണറുള്ളതില്‍ കുഞ്ഞമ്മദ്, ഷബീര്‍ കോട്ടപ്പള്ളി, നിഷില കോരപ്പാണ്ടി, കെ.വി ഷഹനാസ്, സി.കെ സൂപ്പി, ബവിത പഷ്ണക്കുഴി, വി.കെ. ഇസ്ഹാഖ്, അജയ് കൃഷ്ണ, കെ.സി. നബീല, ശ്രീജ തറവട്ടം, സി.വി ഹമീദ് തുടങ്ങിയവര്‍ നേതൃത്വം നല്‍കി.

പോക്സോ കേസിൽ പ്രതി അറസ്റ്റില്‍

കോഴിക്കോട്: ആണ്‍കുട്ടിയെ പീഡിപ്പിച്ച മോഷണക്കേസ് പ്രതിയെ പോക്സോ കേസില്‍ പോലീസ് അറസ്റ്റു ചെയ്തു. മലപ്പുറം തേഞ്ഞിപ്പലം സ്വദേശിയായ പാലക്കാട്ട് വീട്ടില്‍ സൈനുദ്ദീനെ(42)യാണ് കോഴിക്കോട് ടൗണ്‍ പോലീസ് അറസ്റ്റ് ചെയ്തത്. കോഴിക്കോട് ബീച്ചില്‍ വച്ച് പരിചയപ്പെട്ട പ്രായപൂര്‍ത്തിയാകാത്ത ആണ്‍കുട്ടിയെ ലോഡ്ജിലെത്തിച്ച് പീഡിപ്പിച്ചുവെന്നാണ് പരാതി. കുട്ടിയുമായി സൗഹൃദം സ്ഥാപിച്ച പ്രതി കാറില്‍ റെയില്‍വേ സ്റ്റേഷന് സമീപത്തുള്ള ലോഡ്ജിലേക്ക് കൊണ്ടുപോയി. ഇവിടെ വച്ചാണ് ലൈംഗികാതിക്രമം നടത്തിയത്. കുട്ടി പരാതി നല്‍കിയതിനെ തുടര്‍ന്നാണ് പോലീസ് നടപടി സ്വീകരിച്ചത്.

70 കുടുംബങ്ങള്‍ക്ക് സഹായവുമായി സിയസ്‌കൊയുടെ ആര്‍ദ്രം പദ്ധതി

കോഴിക്കോട് : സപ്തതി ആഘോഷിക്കുന്ന സിയസ്‌കൊ എഴുപത് കുടുംബങ്ങള്‍ക്ക് ശൗചാലയവും കുഴല്‍ കിണറും നിര്‍മിച്ചു നല്‍കുന്ന ആര്‍ദ്രംപദ്ധതിക്ക് രൂപം നല്‍കി. സിയസ്‌കൊ ജനറല്‍ ബോഡി യോഗത്തില്‍ പ്രസിഡന്‍റ് സി.ബി.വി. സിദ്ധീഖ് പദ്ധതി വിശദീകരിച്ചു. പദ്ധതിയുടെ ചെയര്‍മാനായി പി. കെ. വി. അബ്ദുല്‍ അസീസ് , കണ്‍വീനറായി ആദം കാതരിയകത്ത് എന്നിവരെ തെരഞ്ഞെടുത്തു. തെക്കേപ്പുറം പ്രദേശത്തെ ആയിരക്കണക്കിന് ആളുകളുടെ ഏക ആശ്രയമായ പരപ്പില്‍ പോസ്റ്റ് ഓഫീസ് അടച്ചു പുട്ടാനുള്ള നടപടി പിന്‍വലിക്കണമെന്ന് സിയസ്‌കൊ ജനറല്‍ ബോഡി യോഗം ആവശ്യപ്പെട്ടു.പ്രസിഡന്‍റ് സി.ബി.വി.സിദ്ധീഖ് അദ്ധ്യക്ഷത വഹിച്ചു. സെക്രട്ടറി എം.വി. ഫസല്‍ റഹ്മാന്‍ വാര്‍ഷിക റിപ്പോര്‍ട്ടും ട്രഷറര്‍ പി.പി. അബ്ദുല്ല കോയ ഓഡിറ്റ് റിപ്പോര്‍ട്ടും അവതരിപ്പിച്ചു. പ്രസിഡന്‍റ് സി.ബി.വി. സിദ്ധീഖ് പതാക ഉയര്‍ത്തി. ലൈബ്രറി ചെയര്‍മാന്‍ എസ്.എഖുദ്‌സി, സെക്രട്ടറി എം.ഹസ്സന്‍കോയ എന്നിവര്‍ നേതൃത്വം നല്‍കി.വൈസ് പ്രസിഡന്‍റുമാരായ കെ. നൗഷാദ് അലി, എസ്.എം. സാലിഹ്, സെക്രട്ടറിമാരായ സി.പി.എം സഈദ് അഹമ്മദ്, പി.വി. മുഹമ്മദ് യൂനുസ്, ആദം കാതിരിയകം, പി.കെ.വി. അബ്ദുള്‍ അസീസ്, കെ.പി. മമ്മത് കോയ, പി .എന്‍ .വലീദ് എന്നിവര്‍ സംസാരിച്ചു.

പള്ളിപ്പടി റെസിഡന്‍സ് അസോസിയേഷന്‍ രൂപവത്കരിച്ചു

തിരുവമ്പാടി: പുല്ലൂരാംപാറ പള്ളിപ്പടി കേന്ദ്രീകരിച്ചു പള്ളിപ്പടി റെസിഡന്‍സ് അസോസിയേഷന്‍ രൂപവത്ക്കരിച്ചു. ആന്‍റണി കണ്ടത്തിന്‍ തൊടികയിലിന്‍റെ വീട്ടില്‍ നടന്ന യോഗം തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍ ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ് ടി.ടി. കുര്യന്‍ അധ്യക്ഷത വഹിച്ചു. ജില്ലാ പഞ്ചായത്ത് മെമ്പര്‍ ബോസ് ജേക്കബ് മുഖ്യപ്രഭാഷണം നടത്തി. വാര്‍ഡ് മെമ്പര്‍ മേഴ്‌സി പുളിക്കാട്ട്, ജോസ് മാത്യു, സിറിയക്ക് മണലോടി, ജോര്‍ജ് ഓണാട്ട്, ഷിജു ചെമ്പനാനി, പി.ജെ. ലാല്‍, ഷിജി ജോബി എന്നിവര്‍ പ്രസംഗിച്ചു. ചടങ്ങില്‍ ഓണാഘോഷ പരിപാടികളും നടത്തി. മികച്ച കര്‍ഷകനായി തെരഞ്ഞെടുക്കപ്പെട്ട സിജോ കണ്ടത്തിന്‍ തൊടികയില്‍, പരമ്പരാഗത കര്‍ഷകനായ ജോസ് കണ്ടെത്തിന്‍ തൊടികയില്‍, പരീക്ഷകളില്‍ ഉന്നത വിജയം കരസ്ഥമാക്കിയ വിദ്യാര്‍ഥികള്‍ എന്നിവരെ ആദരിച്ചു. ടി.ടി.കുര്യനെ പ്രസിഡന്‍റായും ഷിജു ചെമ്പനാനിയെ ജന:സെക്രട്ടറിയായും പി.ജെ. ലാലിനെ ഖജാന്‍ജിയായും തെരഞ്ഞെടുത്തു.

അന്താരാഷ്ട്ര ജനാധിപത്യ ദിനം; വോട്ടിന്‍റെ പ്രാധാന്യം വിളിച്ചോതി കലാജാഥ സംഘടിപ്പിച്ചു

കോഴിക്കോട്: അന്താരാഷ്ട്ര ജനാധിപത്യ ദിനത്തോടനുബന്ധിച്ച് ജില്ലാ ഭരണകൂടത്തിന്‍റെയും തെരഞ്ഞെടുപ്പ് വിഭാഗത്തിന്‍റെയും നേതൃത്വത്തില്‍ വോട്ടര്‍ ബോധവത്ക്കരണ കലാജാഥ സംഘടിപ്പിച്ചു. കളക്ടറേറ്റില്‍ നിന്നും ആരംഭിച്ച കലാജാഥ ജില്ലാ കളക്ടര്‍ സ്നേഹില്‍ കുമാര്‍ സിംഗ് ഫ്‌ളാഗ് ഓഫ് ചെയ്തു. യുവജനങ്ങള്‍ക്കിടയില്‍ വോട്ടിന്‍റെ പ്രാധാന്യം വര്‍ധിപ്പിക്കുക, സമ്മതിദായകരുടെ പങ്കാളിത്തം ഉറപ്പാക്കുക എന്നീ സന്ദേശങ്ങളുമായാണ് കലാജാഥ പര്യടനം നടത്തുന്നത്. സാമൂതിരി ഗുരുവായൂരപ്പന്‍ കോളജിലെ വിദ്യാര്‍ത്ഥികളുടെ നേതൃത്വത്തില്‍ അണിനിരന്ന കലാജാഥ ജെഡിടി, ലോ കോളജ്, ദേവഗിരി കോളേജ്, മലബാര്‍ ക്രിസ്ത്യന്‍ കോളേജ്, ഐഎച്ച്ആര്‍ഡി കോളേജ്, പുതിയ ബസ് സ്റ്റാന്‍റ്, കോഴിക്കോട് ബീച്ച് എന്നിവിടങ്ങളില്‍ പര്യടനം നടത്തി. ജില്ലാ ഇലക്ഷന്‍ ഡെപ്യൂട്ടി കളക്ടര്‍ ഗോപിക ഉദയന്‍, ജില്ലാ സ്വീപ് കോഓഡിനേറ്റര്‍ ഡെപ്യൂട്ടി കളക്ടര്‍ സി. ബിജു, ജില്ലാ ഇന്‍ഫര്‍മേഷന്‍ ഓഫീസര്‍ സി.പി. അബ്ദുല്‍ കരീം, കാലിക്കട്ട് യൂണിവേഴ്സിറ്റി ജില്ലാ നാഷണല്‍ സര്‍വീസ് സ്‌കീം കോ ഓര്‍ഡിനേറ്റര്‍ ഫസീല്‍ അഹ്‌മദ്, ഡിസിഐപി കോര്‍ഡിനേറ്റര്‍ ഡോ. നിജീഷ് ആനന്ദ്, സാമൂതിരി ഗുരുവായൂരപ്പന്‍ കോളജ് എന്‍എസ്എസ് കോ ഓര്‍ഡിനേറ്റര്‍ ജിബിന്‍ ബേബി, അധ്യാപിക പി.ഐ. മീര, വിദ്യാര്‍ഥികള്‍ എന്നിവര്‍ പങ്കെടുത്തു.

യുഡിഎഫ് ധര്‍ണ നടത്തി

മേപ്പയൂര്‍: ഫെബ്രുവരിയില്‍ മേപ്പയ്യൂര്‍ പഞ്ചായത്തിന്‍റെ നേതൃത്വത്തില്‍ നടത്തിയ സാംസ്‌കാരിക പരിപാടിയായ മേപ്പയൂര്‍ ഫെസ്റ്റിന്‍റെ വരവ് ചെലവ് കണക്ക് അവതരിപ്പിക്കാത്തത് അഴിമതി മൂടിവെക്കാന്‍ വേണ്ടിയാണെന്ന് ആരോപിച്ച് യുഡിഎഫ് മേപ്പയൂര്‍ പഞ്ചായത്ത് കമ്മിറ്റി പ്രകടനവും ധര്‍ണയും സംഘടിപ്പിച്ചു. മുസ്ലിംലീഗ് മണ്ഡലം ജനറല്‍ സെക്രട്ടറി ടി.കെ.എ ലത്തീഫ് ഉദ്ഘാടനം ചെയ്തു. യു.ഡി.എഫ് ചെയര്‍മാന്‍ പറമ്പാട്ട് സുധാകരന്‍ അധ്യക്ഷത വഹിച്ചു. പി.കെ.അനീഷ്, കമ്മന അബ്ദുറഹിമാന്‍, ഇ.അശോകന്‍, കെ.പി. രാമചന്ദ്രന്‍, എം.എം അഷ്‌റഫ് , കെ.പി. വേണുഗോപാല്‍, എം.കെ അബ്ദുറഹ്‌മാന്‍, കെ.എം.എ അസീസ്, സി.പി. നാരായണന്‍ സംസാരിച്ചു. കെ.എം. ശ്യാമള, ഷര്‍മിന കോമത്ത്, റാബിയ എടത്തിക്കണ്ടി, സറീന ഒളോറ നേതൃത്വം നല്‍കി.

നവരാത്രി സര്‍ഗോത്സവം 20ന്

കോഴിക്കോട്: കേസരി ഭവനില്‍ നവരാത്രി സര്‍ഗോത്സവം 20ന് വൈകിട്ട് 5.30ന് കൊല്ലൂര്‍ മൂകാംബിക ക്ഷേത്രം മുഖ്യ അര്‍ച്ചകന്‍ സുബ്രഹ്‌മണ്യ അഡിഗകളുടെ കാര്‍മ്മികത്വത്തില്‍ നടക്കുന്ന മഹാ സാരസ്വത പൂജയോടെ ആരംഭിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 22 ന് വൈകിട്ട് 5.30ന് കേന്ദ്ര സാംസ്‌കാരിക മന്ത്രി ഗജേന്ദ്ര സിംഗ് ശെഖാവത്ത് ഉദ്ഘാടനം ചെയ്യും. സംഗീത സംവിധായകന്‍ ഔസേപ്പച്ചന്‍, ചലച്ചിത്രനടി വിധു ബാല, പ്രജ്ഞാ പ്രവാഹ് ദേശീയ സംയോജകന്‍ ജെ.നന്ദകുമാര്‍ തുടങ്ങിയവര്‍ പങ്കെടുക്കും. തുടര്‍ന്നുള്ള ദിവസങ്ങളില്‍ ജൂനാ അഖാഡ മഹാമണ്ഡലേശ്വര്‍ സ്വാമി ആനന്ദവനം ഭാരതി, പി.ടി.ഉഷ എം.പി, സി.സദാനന്ദന്‍ എം.പി, ആചാര്യശ്രീ എം.ആര്‍.രാജേഷ്, ശ്രേഷ്ഠാചാര സഭ ആചാര്യന്‍ എം.ടി. വിശ്വനാഥന്‍, സ്വാമി നന്ദാത്മജാനന്ദ, മുന്‍ ഗോവ ഗവര്‍ണര്‍ അഡ്വ.പി.എസ്.ശ്രീധരന്‍ പിള്ള, നടി അഖില ശശിധരന്‍, സ്വാമി നരസിംഹാനന്ദ, ഡോ.മുരളീ വല്ലഭന്‍ തുടങ്ങിയവര്‍ പങ്കെടുക്കും. പ്രമുഖ കലാകാരന്മാരായ ഏലൂര്‍ ബിജു, ഡോ.ആര്‍എല്‍വി രാമകൃഷ്ണന്‍, ഗായത്രി മധുസൂദനന്‍, മനു രാജ് തിരുവനന്തപുരം, പട്ടാഭിരാമ പണ്ഡിറ്റ്, ഡോ.പ്രശാന്ത് വര്‍മ്മ, ഭരദ്വാജ് സുബ്രഹ്‌മണ്യം, കെ.വി.എസ് ബാബു തുടങ്ങിയവര്‍ പങ്കെടുക്കും. ഈ വര്‍ഷത്തെ നവരാത്രി സര്‍ഗ പ്രതിഭാ പുരസ്‌ക്കാരം 29 വൈകിട്ട് 5.30ന് കേരള ഗവര്‍ണര്‍ രാജേന്ദ്ര വിശ്വനാഥ ആര്‍ലേക്കര്‍ പിന്നണി ഗായകന്‍ മധു ബാലകൃഷ്ണന് സമ്മാനിക്കും.

സ്വദേശ് മെഗാ ക്വിസ് മത്സര വിജയികള്‍

തിരുവമ്പാടി: കെപിഎസ്ടിഎ അക്കാദമിക് കൗണ്‍സില്‍ നേതൃത്വത്തിലുള്ള സ്വദേശ് മെഗാ ക്വിസ് 2025 മുക്കം ഉപജില്ലയില്‍ നടത്തി. മുക്കം നഗരസഭ കൗണ്‍സിലര്‍ മധു ഉദ്ഘാടനം ചെയ്തു ഉപജില്ലാ പ്രസിഡന്‍റ് ജോളി ജോസഫ് അധ്യക്ഷനായി. സംസ്ഥാന നിര്‍വാഹക സമിതി അംഗം സുധീര്‍കുമാര്‍, ഉപജില്ല സെക്രട്ടറി ഇ.കെ.മുഹമ്മദ് അലി, വിദ്യാഭ്യാസ ജില്ല വൈസ് പ്രസിഡന്‍റ് സിറില്‍ ജോര്‍ജ്, വിദ്യാഭ്യാസ ജില്ല കൗണ്‍സിലര്‍മാരായ ബേബി സലീന, കെ.സി.അബ്ദുറബ്ബ്, ഉപജില്ല ജോ. സെക്രട്ടറി അര്‍ച്ചന, എക്‌സ്‌ക്യൂട്ടീവ് കമ്മറ്റിയംഗങ്ങളായ ബെറ്റ്‌സി മേരി, ഹര്‍ഷല്‍, രാധാകൃഷ്ണന്‍ എന്നിവര്‍ സംസാരിച്ചു. എല്‍.പി.വിഭാഗം ഒന്നാം സ്ഥാനം: ഹാഷിര്‍ അഹമ്മദ് (ജി.എച്ച്.എസ്.എസ്. ചെറുവാടി) രണ്ടാം സ്ഥാനം: ലയ അന്ന ജോസഫ് (സെന്‍റ് ജോസഫ്‌സ് യു.പി.എസ്. പുല്ലൂരാംപാറ), യു.പി.വിഭാഗം ഒന്നാം സ്ഥാനം: അസില്‍ മുഹമ്മദ് (എ.എം.യു.പി.എസ്. കുമാരനെല്ലൂര്‍) രണ്ടാം സ്ഥാനം: മുഹമ്മദ് അമീന്‍ ഫൈസല്‍ (എ.യു.പി.എസ്. താഴെക്കോട്). ഹൈസ്‌കൂള്‍ വിഭാഗം ഒന്നാം സ്ഥാനം: എം.നഷ്‌വ (പി.ടി.എം.എച്ച്. എസ്.എസ്. കൊടിയത്തൂര്‍). രണ്ടാം സ്ഥാനം: മുഹമ്മദ് സയാന്‍ (പി.ടി.എം.എച്ച്. എസ്.എസ്. കൊടിയത്തൂര്‍).

52 ഓണം ബംപര്‍ ലോട്ടറി ടിക്കറ്റുകള്‍ മോഷണം പോയി

കൊയിലാണ്ടി: കൊയിലാണ്ടിയില്‍ നിന്നും 52 ഓണം ബംപര്‍ ലോട്ടറി ടിക്കറ്റുകള്‍ മോഷണം പോയതായി പരാതി. കൊയിലാണ്ടി ബസ്സ്റ്റാന്‍ഡിലെ വി.കെ.ലോട്ടറി സ്റ്റാളില്‍ നിന്നാണ് ടിക്കറ്റുകള്‍ മോഷണം പോയത്. ഞായറാഴ്ച വൈകിട്ട് ആറുമണിയോടെയായിരുന്നു സംഭവം. ലോട്ടറി സ്റ്റാളിലെ ജീവനക്കാരന്‍ മുസ്തഫ പോലീസില്‍ പരാതി നല്‍കി. രണ്ടാഴ്ചമുന്‍പ് 22 ലോട്ടറികളും രണ്ട് ദിവസം മുന്‍പും മൂന്ന് ടിക്കറ്റുകളും കളവുപോയതായി മുസ്തഫ പരാതിയില്‍ പറയുന്നു. സിസിടിവി ദൃശ്യങ്ങളടക്കം പോലീസ് പരിശോധിക്കുന്നുണ്ട്.

പോലീസിനെതിരേ ഡിസിസി പ്രസിഡന്‍റിന്‍റെ ഉപവാസ സമരം ഇന്ന്

കോഴിക്കോട്: പോലീസ് ഗുണ്ടായിസത്തിനെതിരെയും യൂത്ത് കോണ്‍ഗ്രസ്, കെഎസ്‌യു നേതാക്കളെ കള്ളകേസില്‍ കുടുക്കി പീഡിപ്പിക്കുകയും ചെയ്യുന്നതിനെതിരേ കോഴിക്കോട് ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ ഇന്ന് ഉപവാസ സമരം നടത്തും. രാവിലെ ഒന്‍പതുമുതല്‍ വൈകീട്ട് അഞ്ചുവരെ നടക്കാവ് ഐജി ഓഫീസിന് സമീപമാണ് സമരം. കോണ്‍ഗ്രസ് പാര്‍ലമെന്‍ററി പാര്‍ട്ടി സെക്രട്ടറി എം.കെ. രാഘവന്‍ എം.പി. ഉദ്ഘാടനം ചെയ്യും. കെപിസിസി വര്‍ക്കിംഗ് പ്രസിഡന്‍റ് ഷാഫി പറമ്പില്‍ എംപി ആമുഖ പ്രഭാഷണം നടത്തും. സമാപന സമ്മേളനം വൈകീട്ട് 4.30ന് മുന്‍ കെപിസിസി പ്രസിഡന്‍റ് കെ. മുരളീധരന്‍ ഉദ്ഘാടനം ചെയ്യും. സിനിമ നടന്‍ ജോയ്മാത്യു, എഴുത്തുകാരായ കല്‍പറ്റ നാരായണന്‍, യു.കെ. കുമാരന്‍, യു.ഡി.എഫ് കക്ഷി നേതാക്കള്‍, കെപിസിസി, ഡിസിസി നേതാക്കള്‍ തുടങ്ങിയവര്‍ അഭിസംബോധന ചെയ്യാനെത്തുമെന്ന് ഡിസിസി ജനറല്‍ സെക്രട്ടറി പി.എം. അബ്ദുറഹ്‌മാന്‍ അറിയിച്ചു.

പുഴയില്‍ ചാടിയ യുവാവിന്‍റെ മൃതദേഹം കണ്ടെടുത്തു

കൊയിലാണ്ടി: മുത്താമ്പിപുഴയില്‍ ചാടിയ യുവാവിന്‍റെ മൃതദേഹം കണ്ടെടുത്തു. അരിക്കുളം മാവട്ട് മോവര്‍ വീട്ടില്‍ പ്രമോദാ (40)ണ് ഇന്നലെ പുലര്‍ച്ചെ കൊയിലാണ്ടി മുത്താമ്പി പുഴയില്‍ ചാടിയത്. നടേരി ഭാഗത്തു നിന്നാണ് മൃതദേഹം കണ്ടെത്തിയത്. കൊയിലാണ്ടി പോലീസും ഫയര്‍ഫോഴ്‌സും കോഴിക്കോട് നിന്നുള്ള സ്‌കൂബ ടീമും തെരച്ചിലിനായി എത്തിയിരുന്നു.

സ്വകാര്യബസിടിച്ച് ബൈക്ക് യാത്രികന്‍ മരിച്ചു

കോഴിക്കോട്: പൂവാട്ടുപറമ്പില്‍ സ്വകാര്യബസിടിച്ച് ബൈക്ക് യാത്രികന്‍ മരിച്ചു. കായലം സ്വദേശി സലിം ആണ് മരിച്ചത്. ഇന്നലെ വൈകിട്ട് അഞ്ചിന് പെരുവയല്‍ ഗ്രാമപഞ്ചായത്ത് ഓഫീസിനു സമീപമായിരുന്നു അപകടം. മാവൂരില്‍ നിന്ന് കോഴിക്കോട്ടേക്കു പോകുകയായിരുന്ന ബസാണ് ഇടിച്ചത്. അമിതവേഗത്തിലായിരുന്നു ബസ്. മുന്നിലെ ബസിനെ മറികടക്കാന്‍ ശ്രമിക്കവെ എതിര്‍ശദിശയില്‍ നിന്ന് മറ്റൊരു വാഹനം വന്നപ്പോള്‍ ബസ് റോഡരികിലേക്ക് ചേര്‍ത്തപ്പോഴണ് ബൈക്കില്‍ ഇടിച്ചത്. സലിം ബസിന് അടിയില്‍പെടുകയും ചക്രം കയറി തല്‍ക്ഷണം മരിക്കുകയുമായിരുന്നു.

വിദ്യാർഥിനിയെ ആദരിച്ചു

കൂടരഞ്ഞി: കഴിഞ്ഞ ദിവസം കൂടരഞ്ഞി അങ്ങാടിയിലുണ്ടായ വാഹനാപകടത്തിൽ രക്ഷാപ്രവർത്തനം നടത്തിയ വിദ്യാർഥിനി റോസ്മിനെ മൗണ്ട് ഹീറോസിന്‍റെ നേതൃത്വത്തിൽ മെമന്‍റോ നൽകി ആദരിച്ചു. അപകടം നടക്കുന്ന സമയത്ത് സ്കൂൾ വിട്ടു വരികയായിരുന്ന റോസ്മിൻ മറ്റൊന്നും ചിന്തിക്കാതെ ഓടിയെത്തുകയും തുടർന്ന് പ്രാഥമിക ശുശ്രൂഷകൾ നൽകി ഹോസ്പിറ്റലിൽ എത്തിക്കുകയുമായിരുന്നു. പഞ്ചായത്ത് പ്രസിഡന്‍റ് ആദർശ് ജോസഫ് റോസ്മിന് മെമന്‍റോ നൽകി. വാർഡ് മെമ്പർ ജെറീന റോയ്, മൗണ്ട് ഹീറോസ് അഡ്മിൻമാരായ അനീഷ് പുത്തൻപുര, ജയേഷ് സ്രാമ്പിക്കൽ തുടങ്ങിയവർ ചടങ്ങിൽ സംബന്ധിച്ചു.

സ്വദേശ് മെഗാ ക്വിസ് മത്സരം നടത്തി

കുറ്റ്യാടി: കെപിഎസ്ടിഎ കുന്നുമ്മൽ ഉപജില്ല കമ്മിറ്റിയുടെ നേതൃത്വത്തിൽ നടത്തിയ സ്വദേശ് മെഗാ ക്വിസ് മത്സരം ശ്രദ്ധേയമായി. ഉപജില്ലയിലെ വിവിധ സ്കൂളുകളിൽ നിന്നും തെരഞ്ഞെടുത്ത എൽപി, യുപി, ഹൈസ്കൂൾ, ഹയർ സെക്കൻഡറി വിഭാഗം വിദ്യാർഥികൾക്കായാണ് മത്സരം സംഘടിപ്പിച്ചത്. വിദ്യാർഥികളിൽ സ്വാതന്ത്ര്യ സമര ചരിത്രത്തെ കുറിച്ചും സമര നായകരെക്കുറിച്ചും അവബോധം സൃഷ്ടിക്കുക എന്ന ലക്ഷ്യത്തോടെയാണ് ക്വിസ് മത്സരം സംഘടിപ്പിച്ചത്. കെപിഎസ്ടിഎ സംസ്ഥാന അക്കാദമിക് സെൽ കൺവീനർ മനോജ് കൈവേലി ഉദ്ഘാടനം ചെയ്തു. ഉപജില്ല പ്രസിഡന്‍റ് ജി.കെ. വരുൺ കുമാർ അധ്യക്ഷനായി. പി.പി. ദിനേശൻ, ടി.വി. രാഹുൽ, ഇ. ഉഷ, ഹാരിസ് വടക്കയിൽ, സുധീർ അരൂർ, സി.എസ്. ആതിര, വി.കെ. അശ്വിൻ തുടങ്ങിയവർ പ്രസംഗിച്ചു.

കുടുംബശ്രീ അംഗങ്ങൾക്ക് ജെൻഡർ ബ്രിഗേഡ് പരിശീലനം നൽകി

പേരാമ്പ്ര: ജില്ലാ കുടുംബശ്രീ മിഷന്‍റെയും ചെറുവണ്ണൂർ പഞ്ചായത്ത് സിഡിഎസ് ജെൻഡർ റിസോഴ്സ് സെന്‍ററിന്‍റെയും നേതൃത്വത്തിൽ കുടുംബശ്രീ അംഗങ്ങൾക്ക് ജെൻഡർ ബ്രിഗേഡ് പരിശീലനം നൽകി. സിഡിഎസ് ചെയർപേഴ്സൺ ടി.കെ. രാധയുടെ അധ്യക്ഷതയിൽ പഞ്ചായത്ത് വൈസ് പ്രസിഡന്‍റ് ആദില നിബ്രാസ് ഉദ്ഘാടനം ചെയ്തു. പേരാമ്പ്ര അഗ്നിരക്ഷാ നിലയത്തിലെ സീനിയർ ഫയർ ആൻഡ് റെസ്ക്യൂ ഓഫീസർ റഫീഖ് കാവിൽ അഗ്നി സുരക്ഷയുമായി ബന്ധപ്പെട്ടുള്ള ബോധവത്കരണ ക്ലാസും ഫയർ എക്‌സ്റ്റിംഗ്യൂഷറുകൾ ഉപയോഗിച്ച് തീ കെടുത്തുന്നതിനുള്ള പരിശീലനവും നൽകി. ഗ്യാസ് ലീക്ക് അപകടങ്ങൾക്കുള്ള മുൻ കരുതലുകളും പ്രതിരോധ മാർഗങ്ങളും പ്രായോഗികമായി വിശദമാക്കി. ഇലക്ട്രിക് ഷോട്ട് സർക്യൂട്ട് അപകടങ്ങളെക്കുറിച്ചും മുൻകരുതലുകളും വിശദീകരിച്ചു. ആസ്റ്റർ മിംസ് ഹോസ്പിറ്റൽ എമർജൻസി മെഡിസിൻ വിഭാഗം ട്രെയിനിംഗ് കോഡിനേറ്റർ ബിജു പ്രഥമ ശുശ്രൂഷ ക്ലാസ് എടുത്തു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ മഞ്ജുഷ, സിഡിഎസ് സാമൂഹ്യ ഉപസമിതി കൺവീനർ റീജ, ആറാം വാർഡ് സിഡിഎസ് മെമ്പർ ഷൈനി എന്നിവർ പ്രസംഗിച്ചു.

കെഎസ്എസ്പിയു സന്നദ്ധ സേന രൂപീകരിച്ചു

തിരുവമ്പാടി: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ (കെഎസ്എസ്പിയു) തിരുവമ്പാടി പഞ്ചായത്ത് കമ്മിറ്റി അംഗങ്ങളുടെ സന്നദ്ധ സേന രൂപീകരിച്ചു. സംഘടനയുടെ ജീവകാരുണ്യ പ്രവർത്തന മേഖലയിൽ വേറിട്ട ചുവടുവെപ്പെന്ന നിലയിൽ സോഷ്യൽ വെൽഫെയർ സ്കീമിന്‍റെ ഭാഗമായിട്ടാണ് 25 അംഗങ്ങളുടെ സന്നദ്ധ സേന രൂപീകരിച്ചത്. മക്കൾ വിദേശത്തേക്ക് ചേക്കേറുകയും വീടുകളിൽ വയോധികരായ പെൻഷൻ അംഗങ്ങളായ മാതാപിതാക്കൾ തനിച്ചാവുകയും ചെയ്യുന്ന ഇക്കാലത്ത് അവർക്ക് സഹായഹസ്തവുമായി എത്തുക എന്ന ലക്ഷ്യത്തോടെയാണ് വൊളന്‍റിയർ ടീം സജ്ജമായിട്ടുള്ളത്. ആശുപത്രിയിൽ പോകുക, മറ്റ് അത്യാവശ്യ സേവനങ്ങൾ വീടുകളിൽ എത്തിക്കുക എന്നിവക്കായി പ്രവർത്തിക്കുന്ന ടീമിൽ ആതുര ശുശ്രൂഷകർ, കൗൺസിലർമാർ, വാഹനമോടിക്കുന്നവർ എന്നിവരും ഉണ്ടാകും. "അരികെ' സേവന പദ്ധതിയുടെ ലോഞ്ചിംഗ് എഴുത്തുകാരനും അധ്യാപകനുമായ എ.വി. സുധാകരൻ നിർവഹിച്ചു. യൂണിറ്റ് പ്രസിഡന്‍റ് എം.വി. ജോർജ് അധ്യക്ഷത വഹിച്ചു. കേരള സർക്കാർ കാർഷിക വികസന വകുപ്പിന്‍റെ മികച്ച ക്ഷോണി സംരക്ഷണ കർഷകനുള്ള സംസ്ഥാന അവാർഡ് ജേതാവ് പുരയിടത്തിൽ പി.ജെ. തോമസിനെ സമ്മേളനത്തിൽ ആദരിച്ചു.

എംഡിഎംഎയുമായി പിടിയിൽ

കൊയിലാണ്ടി: ബുള്ളറ്റിൽ കടത്തുകയായിരുന്ന എംഡിഎംഎയുമായി യുവാവ് പിടിയിൽ. അത്തോളി മേക്കോത്ത് ഹാരിസി (28) നെ യാണ് പിടികൂടിയത്. തിരുവങ്ങൂർ കുനിയിൽ കടവ് പാലത്തിനു സമീപം കഴിഞ്ഞ ദിവസം രാത്രി നടത്തിയ വാഹന പരിശോധനയിലാണ് ഇയാൾ സഞ്ചരിച്ച ബുള്ളറ്റിൽ നിന്നും 4.41 ഗ്രാം എംഡിഎംഎ പിടികൂടിയത്. എസ്ഐമാരായ ആർ.സി. ബിജു, കെ.പി. ഗിരീഷ്, എഎസ്ഐ റെക്കീബ്, അനീഷ് മടോളി, ഗംഗേഷ്, സ്ക്വാഡ് അംഗങ്ങളായ അതുൽ, ശ്യാം എന്നിവരാണ് പരിശോധനയിൽ പങ്കെടുത്തത്.

കരോക്കെ ഗാനാലാപന മത്സരം ഉദ്ഘാടനം ചെയ്തു

കോഴിക്കോട്: ഗ്രന്ഥശാലാ ദിനത്തില്‍ ദര്‍ശനം സാംസ്‌കാരിക വേദിയുടെ മുപ്പതാം വാര്‍ഷികത്തിന്‍റെ ഭാഗമായി കരോക്കെ ഗാനാലാപന മത്സരം നടത്തി. സാഹിത്യകാരന്‍ സുഭാഷ് ചന്ദ്രന്‍ ഉദ്ഘാടനം ചെയ്തു. താലൂക്ക് ലൈബ്രറി കൗണ്‍സില്‍ ജോയിന്‍റ് സെക്രട്ടറി എം.ടി. ശിവരാജന്‍, താലൂക്ക് ലൈബ്രറി കൗണ്‍സില്‍ അംഗം പി.കെ. ശാലിനി, സംഘാടക സമിതി വര്‍ക്കിംഗ് ചെയര്‍മാന്‍മാരായ എം.എ. ജോണ്‍സണ്‍, കെ. കുഞ്ഞാലി സഹീര്‍, സാഹിത്യകാരി സല്‍മി സത്യാര്‍ത്ഥി എന്നിവര്‍ പങ്കെടുത്തു. മത്സര വിജയികള്‍ക്ക് 19ന് സമ്മാനങ്ങള്‍ നല്‍കും. അന്നേദിവസം വി.കെ. സുരേഷ് ബാബുവിന്‍റെ പ്രഭാഷണവും ഉണ്ടാകും. 20 ന് നടക്കുന്ന മെഗാ പരിപാടിയില്‍ പ്രസീത ചാലക്കുടിയും സംഘവും അവതരിപ്പിക്കുന്ന നാടന്‍പാട്ടും മറ്റു കലാരൂപങ്ങളും ഉണ്ടായിരിക്കുമെന്ന് ദര്‍ശനം പ്രസിഡന്‍റ് പി. സിദ്ധാര്‍ത്ഥന്‍ അറിയിച്ചു.

വാഗ്ഭടാനന്ദ വായനശാലയില്‍ പ്രവര്‍ത്തക സംഗമം സംഘടിപ്പിച്ചു

കോഴിക്കോട്: എരഞ്ഞിപ്പാലം ശ്രീ വാഗ്ഭടാനന്ദ ഗുരുദേവര്‍ സ്മാരക വായനശാലയുടെ ആഭിമുഖ്യത്തില്‍ ഗ്രന്ഥശാലാ ദിനാചരണത്തിന്‍റെ ഭാഗമായി പ്രവര്‍ത്തക സംഗമം സംഘടിപ്പിച്ചു. അഡ്വ. എ. വിശ്വനാഥന്‍ ഉദ്ഘാടനം ചെയ്തു. വായനശാലാ പ്രസിഡന്‍റ് പി.എസ്. വിപിന്‍, സെക്രട്ടറി കെ. ശൈലേഷ്, അഡ്വ. വിനോദ് സിംഗ് ചെറിയാന്‍, സി. സുരേന്ദ്രന്‍, ഡോ. കെ.വി. തോമസ്, പി.വി. രാധാകൃഷ്ണന്‍ നായര്‍, പി. ഭാസ്‌കരന്‍, കെ.വി. അജിത്കുമാര്‍, ബി.എസ്. ഉപേന്ദ്രന്‍, ശശി, കെ. പ്രകാശന്‍, പി. ഭാസ്‌ക്കരന്‍, സി.പി. ഷൈനി, വി.കെ. സ്വരാജ്, ഇ.എന്‍. പ്രഭാകരന്‍ എന്നിവര്‍ പ്രസംഗിച്ചു.

ടഗ് ഓഫ് വാർ ചാമ്പ്യൻഷിപ്പ് ആരംഭിച്ചു

കോഴിക്കോട്: കോഴിക്കോട് ജില്ലാ ടഗ് ഓഫ് വാർ അസോസിയേഷന്‍റെ സഹകരണത്തോടെ സംഘടിപ്പിക്കുന്ന ഇരുപതാമത് കേരള സംസ്ഥാന അണ്ടർ 17 ടഗ് ഓഫ് വാർ ചാമ്പ്യൻഷിപ്പ് എളേറ്റിൽ എംജെ ഹയർ സെക്കൻഡറി സ്കൂൾ ഗ്രൗണ്ടിൽ ആരംഭിച്ചു. മന്ത്രി എ.കെ. ശശീന്ദ്രൻ ചാമ്പ്യൻഷിപ്പ് ഉദ്ഘാടനം ചെയ്തു. കിഴക്കോത്ത് പഞ്ചായത്ത്‌ പ്രസിഡന്‍റ് സി. കെ സാജിദത്ത് അധ്യക്ഷത വഹിച്ചു. അഡ്വ. പി.ടി.എ. റഹീം എംഎൽഎ മുഖ്യാതിഥിയായിരുന്നു. ബ്ലോക്ക്‌ പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർമാൻ ടി.എം. രാധാകൃഷ്ണൻ, പഞ്ചായത്ത്‌ അംഗങ്ങളായ കെ.കെ.എ. ജബാർ, റസീന പൂക്കോട്ട്, പി.പി നസ്‌റി, മാനേജ്മെന്‍റ് കമ്മിറ്റി പ്രസിഡന്‍റ് സി. പോക്കർ, ഷാജി ചെറിയാൻ, എം. മുഹമ്മദ്‌ അലി, പി.പി. മുഹമ്മദ്‌ ഇസ്മായിൽ, സിദ്ധീഖ് മലബാരി, ബി.സി. മോയിൻ, വി.കെ. തങ്കച്ചൻ, സി.ടി. ഭരതൻ എന്നിവർ പ്രസംഗിച്ചു.

ആനന്ദനിർവൃതിയിലാഴ്ത്തി മഹാശോഭായാത്ര

കൊയിലാണ്ടി: ബാലഗോകുലത്തിന്‍റെ ആഭിമുഖ്യത്തിൽ കൊയിലാണ്ടിയിൽ നടന്ന മഹാശോഭായാത്ര നഗരത്തെ ആനന്ദ നിർവൃതിയിലാഴ്ത്തി. "ഗ്രാമം തണലൊരുക്കട്ടെ; ബാല്യം സഫലമാകട്ടെ' എന്ന സന്ദേശമുയർത്തി ആബാലവൃദ്ധം ഭക്തർ അണിനിരന്ന ശോഭായാത്രയിൽ വേഷ പ്രഛന്നരായ ബാലികാ-ബാലകന്മാർ ഓടക്കുഴലേന്തി പീലിതിരുമുടി ചൂടി കണ്ണന്‍റെ ബാല്യകാല കുസൃതികളെ അനുസ്മരിപ്പിച്ചു. മുത്തുക്കുടകളും, താലപ്പൊലിയും, ഭജന സംഘങ്ങളും, കൃഷ്ണലീല നൃത്തമാടിയ കുട്ടികളും ശോഭായാത്രക്ക് മിഴിവേകി. രാധാ-കൃഷ്ണ ജീവിത സങ്കൽപങ്ങളിലെ ഭക്തിനിർഭരവും രസ പ്രധാനവുമായ മുഹൂർത്തങ്ങളെ സ്മരിക്കുന്ന പ്രൗഢവും വർണാഭവുമായ നിശ്ചല ദൃശ്യങ്ങൾ നഗരവീഥിയിലെ വിസ്മയ കാഴ്ചകളായി മാറി. വൃന്ദാവനത്തിലെ ഗോപികമാരുടെ പ്രേമ പാരവശ്യവും, ഗോപരിപാലനവും, കാളീയ മർദ്ദനവും മറ്റും ദൃശ്യചാരുത പകർന്നു. ആന്തട്ട ശ്രീരാമകൃഷ്ണ മഠം, ഏഴു കുടിക്കൽ ശ്രീകുറുംബ ഭഗവതി ക്ഷേത്ര പരിസരം, വലിയ മങ്ങാട് അറയിൽ ശ്രീകുറുംബ ഭഗവതി ക്ഷേത്ര പരിസരം, ചെറിയ മങ്ങാട് കോട്ടയിൽ ശ്രീ ദുർഗാ ഭഗവതി ക്ഷേത്ര പരിസരം, മനയടത്ത് പറമ്പിൽ ക്ഷേത്രപരിസരം, വിരുന്നു കണ്ടി ശ്രീകുറുംബാഭഗവതി ക്ഷേത്രപരിസരം, ഉപ്പാലക്കണ്ടി ശ്രീഭദ്രകാളി ക്ഷേത്ര പരിസരം, കൊരയങ്ങാട് ഭഗവതി ക്ഷേത്ര പരിസരം, കൊല്ലം വേദവ്യാസവിദ്യാലയം എന്നിവിടങ്ങളിൽ നിന്നും ആരംഭിച്ച ശോഭായാത്രകൾ കൊരയങ്ങാട് തെരുവിൽ സംഗമിച്ചു. ശേഷം സംഘാടക സമിതി ചെയർമാൻ വി.കെ. മുകുന്ദൻ വിവേകാനന്ദപ്പാറ സംരക്ഷണത്തിനായി പൊരുതിയ നാരായണന് ഗോകുല പതാക കൈമാറി. മഹാ ശോഭായാത്ര കൊയിലാണ്ടി സ്റ്റേഡിയത്തിൽ സമാപിച്ചു.

എൻഎസ്എസ് യൂണിറ്റ് ഉദ്ഘാടനം ചെയ്തു

കുന്നമംഗലം: ഓക്സിലിയം നവജ്യോതി ഹയർ സെക്കൻഡറി സ്കൂളിൽ ആരംഭിച്ച എൻഎസ്എസ് യൂണിറ്റിന്‍റെ ഉദ്ഘാടനം അഡ്വ. പി.ടി.എ റഹീം എംഎൽഎ നിർവഹിച്ചു. സ്കൂൾ മാനേജരും സുപ്പീരിയറുമായ ലിസി ജോസ് അധ്യക്ഷത വഹിച്ചു. എൻഎസ്എസ് ജില്ലാ കോർഡിനേറ്റർ എം.കെ. ഫൈസൽ, കുന്നമംഗലം ക്ലസ്റ്റർ കോർഡിനേറ്റർ പി.കെ സുധാകരൻ, സ്കൂൾ പ്രിൻസിപ്പൽ ജെ. വിൻസി, നരിക്കുനി ജിഎച്ച്എസ്എസ് അധ്യാപകൻ റെജി വർഗീസ്, ഓക്സിലിയം നവജ്യോതി എൻഎസ്എസ് പ്രോഗ്രാം ഓഫീസർ സജി മാത്യു തുടങ്ങിയവർ പ്രസംഗിച്ചു. ‌‌‌

വിലങ്ങാട് പാലത്തിന്‍റെ അപ്രോച്ച് റോഡിൽ മണ്ണിടിഞ്ഞ് കാർ താഴ്ന്നു

വിലങ്ങാട്: ടൗൺ പാലത്തിന് സമീപം അപ്രോച്ച് റോഡിൽ മണ്ണ് ഇടിഞ്ഞ് കാർ താഴ്ന്നു. കണ്ണൂർ സ്വദേശികൾ സഞ്ചരിച്ച കാറാണ്അപകടത്തിൽപെട്ടത്. ഇന്നലെ ഉച്ചയ്ക്കാണ് സംഭവം. കാർ പാലത്തിലേക്ക് കയറുന്നതിനിടെ മുൻഭാഗം റോഡരിക് ഇടിഞ്ഞ് താഴുകയായിരുന്നു. അപകടത്തിൽ ആർക്കും പരിക്കില്ല. ഉരുൾ പൊട്ടലിൽ മല വെള്ളം ഇരച്ച് കയറി റോഡ് ഒലിച്ച് പോയിരുന്നു. ഇതേ തുടർന്ന് നാട്ടുകാർ പുഴയിൽ നിന്ന് കല്ലും മണ്ണും ജെസിബി ഉപയോഗിച്ച് അറ്റകുറ്റ പ്രവൃത്തി നടത്തിയിരുന്നു. ഈ ഭാഗത്ത് കൂടെ അപകടകരമാം വിധമാണ് വാഹനങ്ങൾ കടന്ന് പോവുന്നത്.

പ്രീമിയർ ലീഗ് ഫുട്ബോൾ ടൂർണമെന്‍റ് നടത്തി

മുക്കം: ദേശീയ കായിക ദിനത്തോടനുബന്ധിച്ച് ഡോൺ ബോസ്കോ കോളജിൽ വിദ്യാർഥികൾക്ക് വേണ്ടി ബോസ്കോ പ്രീമിയർ ലീഗ് ഫുട്ബോൾ ടൂർണമെന്‍റ് നടത്തി. മൂന്നു ദിവസമായി നടന്ന മത്സരത്തിൽ ആറ് ടീമുകളാണ് പങ്കെടുത്തത്. മത്സരത്തിൽ ലിവർപൂൾ, സാന്‍റോസ് എന്നീ ടീമുകൾ ഒന്നും രണ്ടും സ്ഥാനങ്ങൾ കരസ്ഥമാക്കി, വിജയികൾക്കുള്ള ട്രോഫികൾ കോളജ് മാനേജർ ഫാ. മാർട്ടിൻ അഗസ്റ്റിൻ, പ്രിൻസിപ്പൽ ഡോ. ഫാ. ജോബി എം. ഏബ്രഹാം എന്നിവർ വിതരണം ചെയ്തു. മികച്ച കളിക്കാരൻ, മികച്ച പ്രതിരോധക്കാരൻ, മികച്ച ഗോളി, ടോപ് സ്കോറർ എന്നീ വിഭാഗങ്ങളിൽ ടി.പി. മനാഫ്, സൽമാൻ, ഷബീൽ, ആര്യൻ റൂബൻ എന്നിവർ ട്രോഫികൾ കരസ്ഥമാക്കി. ലീഗ് മത്സരങ്ങൾക്ക് സ്പോർട്സ് കോഡിനേറ്റർ സന്തോഷ് മരുതോലിൽ വിദ്യാർഥി കോഡിനേറ്റേഴ്സായ ഉമ്മർ മുക്തർ, അഹമ്മദ് സമീർ, അഭിനാഥ് എന്നിവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]