ADVERTISEMENT

ADVERTISEMENT

കെഎസ്എസ്പിയു കൺവൻഷൻ

കുറ്റ്യാടി: കെഎസ്എസ്പിയു കാവിലുംപാറ യൂണിറ്റ് കൺവൻഷൻ തൊട്ടിൽ പാലം സബ് ഇൻസ്പെക്ടർ എം. അൻവർ ഷാ ഉദ്ഘാടനം ചെയ്തു.

തൊട്ടിൽപ്പാലം വ്യാപാരിഭവൻ ഓഡിറ്റോറിയത്തിൽ നടന്ന ചടങ്ങിൽ കെ.ടി. വൽസമ്മ അധ്യക്ഷത വഹിച്ചു. ചടങ്ങിൽ ഉന്നത വിജയികളെ ആദരിക്കുകയും പുതിയ അംഗങ്ങളെ സ്വീകരിക്കുകയും ചെയ്തു.

ധനസഹായ വിതരണവും നടത്തി. എടത്തിൽ ദാമോധരൻ, കെ.കെ. രവീന്ദ്രൻ, എ. ശ്രീധരൻ, ജോൺ കട്ടക്കയം, എം.കെ. ജോൺസൺ, എസ്.വി. സേവ്യർ, വി.കെ. നാണു, വി.കെ. ചന്ദ്രൻ എന്നിവർ പ്രസംഗിച്ചു.

ADVERTISEMENT

പെരുമാൾപുരത്തും തിക്കോടിയിലും ലോറി റോഡിലെ കുഴിയില്‍ കുടുങ്ങി

പയ്യോളി: മഴ കനത്തതോടെ റോഡിൽ രൂപപ്പെട്ട കുഴികൾ കാരണം തിങ്കളാഴ്ച കാലത്തും പയ്യോളി മേഖലയിൽ കനത്ത ഗതാഗതക്കുരുക്ക്. പെരുമാൾ പുരത്തെ വെള്ളക്കെട്ടിൽ ഭാരം കയറ്റിയ ലോറി കുഴിയിൽ വീണ് കയറാൻ ആകാതെ വന്നത് മണിക്കൂറുകൾ നീണ്ട ഗതാഗതക്കുരുക്കിനാണ് ഇടയാക്കിയത്. കോട്ടയത്തേക്ക് മരവുമായി പോവുകയായിരുന്ന ലോറിയാണ് അപകടാവസ്ഥയിൽ ആയത്. പോലീസ് ഇടപെട്ട് പിന്നീട് നിർമാണ കമ്പനിയുടെ ഹൈഡ്രോളിക് ക്രെയിൻ സ്ഥലത്തെത്തിച്ചാണ് ലോറി ഉയർത്തി ഗതാഗതം പുനസ്ഥാപിച്ചത്. ആറുവരി പാതയുടെ നിർമാണം കഴിഞ്ഞ തിക്കോടി പാലൂരിൽ സമാനമായ മറ്റൊരു ലോറി ചെരിഞ്ഞ് അപകടാവസ്ഥയിൽ ആയത് ഗതാഗത തടസ്സത്തിനിടയാക്കി. കണ്ണൂരിൽ നിന്ന് പെരുമ്പാവൂരിലെ പ്ലൈവുഡ് ഫാക്ടറിലേക്ക് മരവുമായി പോവുകയായിരുന്നു ലോറിയാണ് അപകടാവസ്ഥയിൽ ആയത്. ഇതേ തുടർന്ന് തിക്കോടി മേഖലയിൽ ദേശീയപാത ഇരുവശത്തേക്കുള്ള ഗതാഗതം സർവീസ് റോഡ് വഴി തിരിച്ചുവിട്ടത് കൂടുതൽ ഗതാഗതക്കുരുക്കിന് കാരണമായി. തിങ്കളാഴ്ച രാവിലെ പതിവ് തിരക്ക് കൂടി ആയതോടെ ബസുകൾ ഉൾപ്പെടെയുള്ള വാഹനങ്ങൾ പല വഴിയിലൂടെ തിരിച്ചു വിടേണ്ടി വന്നു. കഴിഞ്ഞദിവസം ജില്ലാ കളക്ടര്‍ ഇടപെട്ട് റോഡിന്‍റെ പ്രശ്നങ്ങൾ പരിഹരിക്കാൻ ദേശീയപാത അതോറിറ്റിയോടും നിർമാണ കമ്പനിയോടും ആവശ്യപ്പെട്ടിരുന്നെങ്കിലും കുഴിയുള്ള ഇടങ്ങളിൽ മെറ്റൽ പാകി അധികൃതരുടെ കണ്ണിൽ പൊടി ഇടുകയാണ് കരാർ കമ്പനി ചെയ്തത്.

യൂത്ത്‌കോണ്‍ഗ്രസിന്‍റെ കളക്ടറേറ്റ് മാര്‍ച്ചില്‍ സംഘര്‍ഷം

കോഴിക്കോട്: ആരോഗ്യമന്ത്രി വീണാ ജോര്‍ജിന്‍റെ രാജി ആവശ്യപ്പെട്ട് യൂത്ത് കോണ്‍ഗ്രസ് കോഴിക്കോട് ജില്ലാ കമ്മിറ്റിയുടെ നേതൃത്വത്തില്‍ നടത്തിയ കളക്ടറേറ്റ് മാര്‍ച്ചില്‍ സംഘര്‍ഷം. എരഞ്ഞിപ്പാലത്തു നിന്ന് ആരംഭിച്ച മാര്‍ച്ച് കളക്ടറേറ്റിനു മുന്‍പില്‍ പോലീസ് തടഞ്ഞു. പ്രതിഷേധ മാര്‍ച്ച് ഡിസിസി പ്രസിഡന്‍റ് കെ. പ്രവീണ്‍ കുമാര്‍ ഉദ്ഘാടനം ചെയ്തു. നേതാക്കളുടെ പ്രസംഗം കഴിഞ്ഞ ഉടന്‍ പ്രവര്‍ത്തകര്‍ ബാരിക്കേഡുകള്‍ മറിച്ചിട്ടത് പോലീസുമായുള്ള സംഘര്‍ഷത്തിനു കാരണമായി. പോലീസ് നിരവധി തവണ ജലപീരങ്കി പ്രയോഗിച്ചെങ്കിലും പ്രവര്‍ത്തകര്‍ പ്രധാന കവാടത്തിനു മുന്നില്‍ നിന്നും മാറിയില്ല. ഒരു വിഭാഗം പ്രവര്‍ത്തകര്‍ ബാരിക്കേഡുകള്‍ വലിച്ചെടുത്ത് സിവില്‍ സ്റ്റേഷനു മുന്‍പില്‍ ദേശീയപാതയിലെത്തി റോഡ് ഉപരോധിച്ചതോടെ ഏറെ സമയം ഗതാഗതം തടസപ്പെട്ടു. റോഡില്‍ ഉപരോധം തുടര്‍ന്നതോടെ അറസ്റ്റ് ചെയ്ത നേതാക്കളുമായി മുന്നോട്ടു പോകാനാകാതെ പോലീസ് വാഹനം കുടുങ്ങി. യൂത്ത് കോണ്‍ഗ്രസ് ദേശീയ സെക്രട്ടറി വിദ്യ ബാലകൃഷ്ണന്‍, ജില്ലാ പ്രസിഡന്‍റ് ആര്‍. ഷഹിന്‍, എന്നിവര്‍ ഉള്‍പ്പെടെ 23 പേരെ പൊലീസ് അറസ്റ്റുചെയ്ത് നീക്കി.

വളയത്ത് വ്യാപാര സ്ഥാപനത്തിനു നേരേ ബോംബേറ്

നാദാപുരം: വളയത്ത് വ്യാപാര സ്ഥാപനത്തിന് നേരേ അജ്ഞാതര്‍ സ്റ്റീല്‍ ബോംബ് എറിഞ്ഞു. പൊട്ടാതെ കടയുടെ വരാന്തയ്ക്ക് സമീപത്ത് കണ്ടെത്തിയ ബോംബ് വളയം പോലീസ് കസ്റ്റഡിയിലെടുത്ത് നിര്‍വീര്യമാക്കി. വളയം നിരവുമ്മലിലെ നടുക്കണ്ടിയില്‍ ദാമോദരന്‍റെ കടയ്ക്ക് നേരേയാണ് ബോംബേറ് ഉണ്ടായത്. തിങ്കളാഴ്ച്ച രാവിലെ 7.30 ഓടെ കട തുറക്കാനെത്തിയപ്പോഴാണ് പൊട്ടിയ സ്റ്റീല്‍ കണ്ടെയ്‌നറും സമീപത്ത് വെടി മരുന്ന് ചിതറിക്കിടക്കുന്ന നിലയിലും കണ്ടത്. തുടര്‍ന്ന് വിവരം പോലിസില്‍ അറിയിച്ചു. പോലീസ് നടത്തിയ പരിശോധനയില്‍ സ്റ്റീല്‍ ബോംബാണ് എന്ന് സ്ഥിരീകരിച്ചു. വടകരയില്‍ നിന്നെത്തിയ വിരലടയാള വിദഗ്ധരും ബോംബ്, കെ 9 സ്‌ക്വാഡ് അംഗങ്ങളും സ്ഥലത്ത് പരിശോധന നടത്തി. സംഭവത്തില്‍ വളയം പോലിസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.

വീട്ടമ്മയുടെ 15 കോഴികളെ തെരുവുനായകള്‍ കൊന്നൊടുക്കി

പെരുവണ്ണാമൂഴി: ചക്കിട്ടപാറ പഞ്ചായത്തിലെ വാര്‍ഡ് ഒന്നിലെ പറമ്പല്‍ ഭാഗത്ത് വീട്ടമ്മ വളര്‍ത്തിയിരുന്ന കോഴികളെ തെരുവുനായകള്‍ കടിച്ചുകൊന്നു. ആന്ത്രോത്ത് ഷിജി റോബിന്‍ വളര്‍ത്തിയിരുന്ന 15 കോഴികളെയാണ് മൂന്നു നായകള്‍ കൂട്ടം ചേര്‍ന്നു അക്രമിച്ചു കൊന്നത്. ഗ്രാമസഭ വഴി ലഭിച്ച 10 കോഴികളടക്കം ആക്രമണത്തില്‍ ചത്തു. വീട്ടുമുറ്റത്ത് കയറി തെരുവുനായകള്‍ ആക്രമിച്ചത് വീട്ടമ്മക്ക് ഭയത്തോടെ കണ്ടുനില്‍ക്കാനേ കഴിഞ്ഞുള്ളൂ. വാര്‍ഡ് അംഗത്തെ വിവരം അറിയിച്ചിട്ടുണ്ട്. തെരുവുനായകള്‍ കാരണം കുട്ടികളെ സ്‌കൂളിലയക്കാന്‍ പോലും വിഷമിക്കുകയാണെന്ന് ഷിജി പറഞ്ഞു.

ബിന്ദുവിന്‍റെ മരണം മന്ത്രിമാര്‍ വരുത്തിയ മനപൂര്‍വമല്ലാത്ത നരഹത്യ: സണ്ണി ജോസഫ്

കോഴിക്കോട്: കോട്ടയം മെഡിക്കല്‍ കോളജ് ആശുപത്രിയില്‍ കെട്ടിടം തകര്‍ന്ന് ബിന്ദു മരിക്കാനിടയായ സംഭവം മന്ത്രിമാര്‍ വരുത്തിയ മനപൂര്‍വമല്ലാത്ത നരഹത്യയാണെന്ന് കെപിസിസി പ്രസിഡന്‍റ് സണ്ണി ജോസഫ് എംഎല്‍എ. കെപിസിസി ആഹ്വാനംചെയ്ത സമര സംഗമം കോഴിക്കോട് ജില്ലാ തല പരിപാടി കോഴിക്കോട് ശ്രീനാരായണ സെന്‍റിനറി ഹാളില്‍ ഉദ്ഘാടനം ചെയ്യുകയായിരുന്നു സണ്ണി ജോസഫ്. മരണത്തിന്‍റെ ധാര്‍മ്മികവും നിയമപരവുമായ ഉത്തരവാദിത്തം ആരോഗ്യമന്ത്രിക്ക് ഉള്‍പ്പെടെയുണ്ടെന്നും ജീവന്‍ രക്ഷിക്കുന്നതിന് പകരം രക്ഷാപ്രവര്‍ത്തനം വൈകിപ്പിച്ചത് അവരാണെന്നും സണ്ണി ജോസഫ് പറഞ്ഞു. ആരോഗ്യമന്ത്രി കെട്ടിടം ഉരുട്ടിയിട്ട് കൊന്നതാണോ എന്നാണ് മന്ത്രി വി.എന്‍. വാസവന്‍ ചോദിച്ചത്. അങ്ങനെ തങ്ങളാരും പറഞ്ഞിട്ടില്ല. എന്നാല്‍ ബിന്ദുവിന്‍റെ ഭര്‍ത്താവും മകളും അവരെ കാണുന്നില്ലെന്ന് പറഞ്ഞിട്ടും തകര്‍ന്ന കെട്ടിടത്തിന് അടിയില്‍ ആരുമില്ലെന്ന നിലപാടെടുത്ത മന്ത്രിമാര്‍ രണ്ടേകാല്‍ മണിക്കൂര്‍ രക്ഷാപ്രവര്‍ത്തനം തടസ്സപ്പെടുത്തുകയായിരുന്നു. ഡിസിസി പ്രസിഡന്‍റ് അഡ്വ.കെ. പ്രവീണ്‍കുമാര്‍ അധ്യക്ഷത വഹിച്ചു. യുഡിഎഫ് കണ്‍വീനര്‍ അടൂര്‍ പ്രകാശ് എംപി, എം.കെ. രാഘവന്‍ എംപി, കെപിസിസി വര്‍ക്കിംഗ് പ്രസിഡന്‍റുമാരായ പി.സി. വിഷ്ണുനാഥ് എംഎല്‍എ, എ.പി അനില്‍കുമാര്‍ എംഎല്‍എ, ഷാഫി പറമ്പില്‍ എംപി, രാഷ്ട്രീയകാര്യ സമിതി അംഗങ്ങളായ അഡ്വ.ടി. സിദ്ദിഖ്, എന്‍. സുബ്രഹ്‌മണ്യന്‍, കെപിസിസി ജനറല്‍ സെക്രട്ടറിമാരായ അഡ്വ.കെ. ജയന്ത്, അഡ്വ.പി.എം. നിയാസ്, കെ.എം. അഭിജിത്ത്, അഡ്വ. വിദ്യാ ബാലകൃഷ്ണന്‍, കെ. ബാലനാരായണന്‍, വി. ദിനേശ് മണി തുടങ്ങിയവര്‍ സംസാരിച്ചു.

ജലബജറ്റ് പൂര്‍ത്തിയാക്കുന്ന രണ്ടാമത്തെ ജില്ല; ജലബജറ്റിന്‍റെ അവസാനവട്ട പ്രവര്‍ത്തനത്തില്‍ കോഴിക്കോട്

കോഴിക്കോട്: ജലബജറ്റിന്‍റെ അവസാനവട്ട പ്രവര്‍ത്തനത്തില്‍ കോഴിക്കോട്. ജില്ലയിലെ എല്ലാ തദ്ദേശ സ്വയംഭരണ സ്ഥാപനങ്ങളിലും ഈമാസം അവസാനത്തോടെ ജല ബജറ്റ് തയാറാക്കുന്ന പ്രക്രിയ പൂര്‍ത്തിയാകും. ഇതോടെ ഈ പ്രക്രിയ പൂര്‍ത്തിയാക്കുന്ന സംസ്ഥാനത്തെ രണ്ടാമത്തെ ജില്ലയായി കോഴിക്കോട് മാറും. കാസര്‍കോട് ഇതിനകം ഇത് പൂര്‍ത്തിയാക്കിയിട്ടുണ്ട്. കോഴിക്കോട് ജില്ലയിലെ 70 ഗ്രാമപഞ്ചായത്തുകളിലും ഏഴ് മുനിസിപ്പാലിറ്റികളിലും ജലബജറ്റ് പൂര്‍ത്തിയാക്കി. ഇപ്പോള്‍ കോര്‍പറേഷന്‍ പരിധിയിലാണ് സര്‍വേ നടക്കുന്നത്. ഈ മാസം അവസാനത്തോടെ ഇത് പൂര്‍ത്തിയാക്കാന്‍ കഴിയുമെന്ന് ഹരിത കേരളം മിഷന്‍ ജില്ലാ കോ-ഓര്‍ഡിനേറ്റര്‍ പി.ടി. പ്രസാദ് പറഞ്ഞു. ജലത്തിന്‍റെ ഉപയോഗം സംബന്ധിച്ച് പൊതുജനങ്ങളില്‍ അവബോധം സൃഷ്ടിക്കുന്നതിനും ജലസംരക്ഷണം ഉറപ്പാക്കുന്നതിനുമാണ് ജലബജറ്റ് നടപ്പാക്കുന്നത്. ജലസ്രോതസുകളുടെ വിവരം, ജല ലഭ്യത, കൃഷി, വ്യവസായം, മൃഗസംരക്ഷണം, വിനോദസഞ്ചാരം തുടങ്ങിയ മേഖലകളില്‍ ജലത്തിന്‍റെ ഉപയോഗം എന്നിവയുടെ അടിസ്ഥാനത്തിലാണ് സര്‍വേ നടക്കുന്നത്. കോഴിക്കോട് നഗരത്തില്‍ കിണറുകളും കുളങ്ങളും ഉള്‍പ്പെടെയുള്ള ജലസ്രോതസുകളുണ്ട്. ജപ്പാന്‍കുടിവെള്ള പദ്ധതി ഉള്‍പ്പെടെയുള്ള സംവിധാനങ്ങള്‍ വഴി വെള്ളം വിതരണം ചെയ്യുന്നു. ഇതെല്ലാം സര്‍വേയില്‍ പരിശോധിക്കും. ഇവിടെ ലഭിക്കുന്ന മഴയുടെ അളവും പരിശോധിക്കും. ഏത് മാസങ്ങളിലാണ് വെള്ളത്തിന്‍റെ ലഭ്യത കുറയുന്നത്, എപ്പോഴാണ് കൂടുതല്‍ കിട്ടുന്നത് എന്ന വിവരവും അടയാളപ്പെടുത്തും. അതുപോലെ വീടുകളിലും സ്ഥാപനങ്ങളിലും മറ്റും വെള്ളത്തിന്‍റെ ഉപയോഗം എത്രമാത്രം നടക്കുന്നു എന്ന കാര്യവും പരിശോധിക്കും. സര്‍വേയുടെ അടിസ്ഥാനത്തില്‍ റിപ്പോര്‍ട്ട് തയാറാക്കും. ഇതിന്‍റെ തുടര്‍ച്ചയായി ജലസംരക്ഷണവുമായി ബന്ധപ്പെട്ട നടപടികള്‍ സ്വീകരിക്കും. കുന്ദമംഗലത്തെ ജലവിഭവ വികസന വിനിയോഗകേന്ദ്രത്തിന്‍റെയും (സിഡ്ബള്യുആര്‍ഡിഎം) ഹരിതകേരള മിഷന്‍റെയും സഹായത്തോടെയാണ് പദ്ധതി നടപ്പാക്കുന്നത്. സാങ്കേതിക സഹായവും റിസോഴ്സ് പേഴ്സണ്‍മാരുടെ സേവനവും ഹരിതകര്‍മസേന ലഭ്യമാക്കും. വരള്‍ച്ചയും വെള്ളപ്പൊക്കവും നേരിടാന്‍ എന്തെല്ലാം ചെയ്യണമെന്ന് ജലബജറ്റിലൂടെ വ്യക്തമാകും. ഭൂഗര്‍ഭജലത്തിന്‍റെ അളവ് കുറയുന്നതും ജലസംരക്ഷണം കാര്യക്ഷമമല്ലാത്തതുമാണ് പ്രശ്നമാവുന്നത്. അതേസമയം, ജലത്തിന്‍റെ ഉപയോഗത്തില്‍ നിയന്ത്രണം ഉണ്ടാവുന്നില്ല എന്നതു പോരായ്മയാണ്. ഒരാള്‍ക്ക് ശരാശരി പ്രതിദിനം 135 ലിറ്റര്‍ വെള്ളം മതിയാവുമെങ്കിലും അതിന്‍റെ ഇരട്ടിയും അതില്‍ കൂടതലുമെല്ലാം ഉപയോഗിക്കുന്നുണ്ട്. ഈ വിഷയങ്ങളെല്ലാം കണക്കിലെടുത്താവും ജലബജറ്റ് പദ്ധതി രൂപംകൊള്ളുക. നെല്‍വയലുകളുടെ വിസ്തൃതി കുറഞ്ഞുവന്നതോടെ വെള്ളം മണ്ണിലേക്ക് ഇറങ്ങാനുള്ള വഴി അടഞ്ഞു. മുറ്റം കോണ്‍ക്രീറ്റും ഇന്‍റർലോക്കുമായതോടെ അവിടെയും വെളളം മണ്ണിലേക്ക് ഇറങ്ങാതെ ഒഴുകിപോവുന്ന അവസ്ഥയായി. ഇത്തരം വിഷയങ്ങളെല്ലാം ജലബജറ്റ് ചര്‍ച്ച ചെയ്യുന്നുണ്ടെന്ന് പി.ടി. പ്രസാദ് പറഞ്ഞു.

ബാഡ്മിന്‍റണ്‍ ടൂര്‍ണമെന്‍റ് ഒമ്പത് മുതല്‍

കോഴിക്കോട്: സാവിത്രി ദേവി സാബു മെമ്മോറിയല്‍ ഓള്‍ കേരള ജൂനിയര്‍ ബാഡ്മിന്‍റണ്‍ റാങ്കിങ് ടൂര്‍ണമെന്‍റ് ഒമ്പതു മുതല്‍ 13 വരെ ദേവഗിരി സെന്‍റ് ജോസഫ് കോളജിലെ ഫാ. ജോസഫ് പൈക്കട സിഎംഐ മെമ്മോറിയല്‍ ഇന്‍ഡോര്‍ സ്റ്റേഡിയത്തില്‍ നടക്കും.ഒമ്പതിന് രാവിലെ ഒമ്പതിന് എം.കെ. രാഘവന്‍ എംപി ഉദ്ഘാടനം ചെയ്യുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. അണ്ടര്‍ 15,17 വയസ് വിഭാഗത്തിലുള്ളവര്‍ക്ക് ടൂര്‍ണമെന്‍റില്‍ മത്സരിക്കാം. ഡബിള്‍സ്, സിംഗിള്‍സ്, മിക്‌സഡ് ഡബിള്‍സ് കാറ്റഗറികളിലാണ് മത്സരം നടക്കുക. വിജയികള്‍ക്ക് 75000/ രൂപയുടെ പ്രൈസ് മണി നല്‍കും. കേരള ബാഡ്മിന്‍റണ്‍ അസോസിയേഷനും കോഴിക്കോട് ജില്ലാ ബാഡ്മിന്‍റണ്‍ അസോസിയേഷനും സംയുക്തമായാണ് ടൂര്‍ണമെന്‍റ് സംഘടിപ്പിക്കുന്നത്. വാര്‍ത്താസമ്മേളനത്തില്‍ അലോക് കുമാര്‍ സാബു, കെ. ഹരികൃഷ്ണന്‍, പി.ടി. ആദം, കെ.വി. അബ്ദുറഹിമാന്‍, കെ. ബിജി എന്നിവര്‍ പങ്കെടുത്തു.

കോഴിക്കോട് മെഡിക്കല്‍ കോളജിന്‍റെ സംരക്ഷണഭിത്തി ഇടിഞ്ഞു

കോഴിക്കോട്: കോഴിക്കോട് മെഡിക്കല്‍ കോളജിന്‍റെ സംരക്ഷണഭിത്തി ഇടിഞ്ഞു. ഇന്നലെ രാത്രി ഒന്‍പതരയോടെയാണ് ദന്തല്‍ കോളജിനു സമീപമാണ് സംഭവം. ഭിത്തി ഇടിഞ്ഞ് വീണ് റോഡരികില്‍ പാര്‍ക്ക് ചെയ്ത വാഹനങ്ങള്‍ക്ക് കേടുപാടുകള്‍ സംഭവിച്ചു. ഭിത്തി നിര്‍മ്മിക്കാനുപയോഗിച്ച വെട്ടുകല്ലുകള്‍ റോഡരികില്‍ പാര്‍ക്ക് ചെയ്തിരുന്ന വാഹനങ്ങളുടെ മുകളിലേക്കാണ് വീണത്. ആര്‍ക്കും പരിക്കില്ല. ഏതാനും മാസങ്ങളായി ഭിത്തി അപകടാവസ്ഥയിലായിരുന്നു.

വന്യജീവി സംഘര്‍ഷം: ജില്ലയില്‍ 20 ഹോട്ട് സ്പോട്ടുകള്‍

കോഴിക്കോട്: ജില്ലയിലെ മനുഷ്യ-വന്യജീവി സംഘര്‍ഷത്തിന്‍റെ സ്ഥിതി, ലഘൂകരണ പ്രവര്‍ത്തനങ്ങള്‍, പ്ലാന്‍ രൂപീകരണം എന്നിവയുമായി ബന്ധപ്പെട്ട് പൊതുമരാമത്ത്- ടൂറിസം മന്ത്രി പി.എ.മുഹമ്മദ് റിയാസിന്‍റെ അധ്യക്ഷതയില്‍ ജില്ലാതല നിയന്ത്രണ സമിതി യോഗം ചേര്‍ന്നു. കാടുപിടിച്ചു കിടക്കുന്ന സ്വകാര്യഭൂമികള്‍ വെട്ടിത്തെളിക്കുന്നുണ്ടെന്ന് ഉറപ്പുവരുത്തണമെന്നും ഇതിനായി തദ്ദേശ സ്വയംഭരണം, റവന്യു, ഇറിഗേഷന്‍, ദുരന്ത നിവാരണ അഥോറിറ്റി എന്നിവയുടെ സംയുക്ത യോഗം വിളിച്ചുചേര്‍ക്കണമെന്നും യോഗത്തില്‍ മന്ത്രി നിര്‍ദേശിച്ചു. വന്യജീവി ആക്രമണവുമായി ബന്ധപ്പെട്ട് നിലവില്‍ ജില്ലയില്‍ 20 ഹോട്ട്സ്പോട്ടുകള്‍ ഉണ്ടെന്നും കഴിഞ്ഞ നാല് വര്‍ഷത്തിനിടെ ഏറ്റവും കൂടുതല്‍ റിപ്പോര്‍ട്ട് ചെയ്തത് കാട്ടുപന്നികളുടെ അക്രമണമാണെന്നും ഡിഎഫ്ഒ യു. ആഷിക് അലി അറിയിച്ചു. 549 കാട്ടുപന്നി ആക്രമണമാണുണ്ടായത്. 529 കാട്ടാന ആക്രമണത്തിന് പുറമെ പുലി, കടുവ, കാട്ടുപോത്ത് അക്രമണങ്ങളും റിപ്പോര്‍ട്ട് ചെയ്യപ്പെട്ടു. പാമ്പ് കടിയേറ്റാണ് ഏറ്റവും കൂടുതല്‍ മരണങ്ങള്‍ സംഭവിച്ചത്. ഈ വര്‍ഷം പാമ്പുകടിയേറ്റ ഒരു മരണവും തേനീച്ച കുത്തിയുള്ള ഒരു മരണവും ഉണ്ടായി. കഴിഞ്ഞ അഞ്ച് വര്‍ഷത്തിനിടയില്‍ 233.47 ലക്ഷം രൂപ വന്യജീവി ആക്രമണങ്ങള്‍ക്ക് നഷ്ടപരിഹാരമായി ജില്ലയില്‍ നല്‍കിയിട്ടുണ്ട്. മനുഷ്യ-വന്യജീവി സംഘര്‍ഷങ്ങള്‍ കുറക്കുന്നതിന് വനം വകുപ്പ് വിവിധ നടപടികള്‍ സ്വീകരിക്കുന്നുണ്ട്. മിഷന്‍ സര്‍പ്പ, പിആര്‍ടി, വൈല്‍ഡ് പിഗ്, സോളാര്‍ ഫെന്‍സിങ് എന്നിങ്ങനെ പത്ത് മിഷനുകള്‍, 24 മണിക്കൂര്‍ പ്രവര്‍ത്തിക്കുന്ന ഓപറേഷന്‍ സെന്‍റര്‍ എന്നിവ പ്രവര്‍ത്തിക്കുന്നു. ജനജാഗ്രത സദസ്സുകള്‍, വ്യാജവാറ്റിനെതിരായ പ്രവര്‍ത്തനങ്ങള്‍ എന്നിവയും നടക്കുന്നതായും ഡിഎഫ്ഒ അറിയിച്ചു. പാമ്പിന്‍റെ റെസ്‌ക്യൂ ഓപ്പറേഷനു വേണ്ടി 57 വോളന്‍റിയര്‍മാര്‍ക്ക് ജില്ലയില്‍ പരിശീലനം നല്‍കി. ഇതില്‍ 20 പേര്‍ക്കാണ് കിറ്റുകള്‍ നല്‍കിയത്. ബാക്കിയുള്ളവര്‍ക്ക് കിറ്റുകള്‍ നല്‍കാനും എല്ലാ ആശുപത്രികളിലും ആന്‍റി വെനത്തിന്‍റെ ലഭ്യത കൂട്ടാനും യോഗത്തില്‍ ആവശ്യമുയര്‍ന്നു. യോഗത്തില്‍ മേയര്‍ ബീന ഫിലിപ്പ്, ജില്ലാ കളക്ടര്‍ സ്‌നേഹില്‍ കുമാര്‍ സിംഗ്, വിവിധ വകുപ്പ് മേധാവികള്‍ എന്നിവരും പങ്കെടുത്തു.

ബിജെപി പ്രവര്‍ത്തകര്‍ ബീച്ചാശുപത്രി സൂപ്രണ്ട് ഓഫീസ് ഉപരോധിച്ചു

കോഴിക്കോട്: ബീച്ച് ആശുപത്രിയില്‍ ക്വാത് ലാബ് പ്രവര്‍ത്തനം നിലച്ചതിനെ തുറന്ന് പാവപെട്ട രോഗികളെ ഡിസ്ചാര്‍ജ് ചെയ്ത് പറഞ്ഞുവിട്ടതിനെതിരെ ആശുപത്രി സൂപ്രണ്ട് ഓഫീസ് ബിജെപി നടക്കാവ് മണ്ഡലം കമ്മിറ്റി ഉപരോധിച്ചു. ജില്ലാ ജനറല്‍ സെക്രട്ടറി എം. സുരേഷ് ഉത്ഘാടനം ചെയ്തു. പ്രവീണ്‍ തളിയില്‍ അധ്യക്ഷത വഹിച്ചു. മണ്ഡലം ജനറല്‍ സെക്രട്ടറിമാരായ കെ.പി. പ്രമോദ്, ജിഷഷിജു, ജില്ലാ വൈസ് പ്രസിഡന്‍റുമാരായ എം.രാജിവ് കുമാര്‍, ജോയ് വളവില്‍, ജില്ല സെക്രട്ടറിമാരായ എം. ജഗനാഥന്‍, ദീപ ടി. മണി, മണ്ഡലം വൈസ് പ്രസിഡന്‍റുമാരായ അഡ്വ. ബിജിത്ത് ചെറോട്ട്, ദിലീപ്, പി.കെ.ഗണേശന്‍, ശ്യാം പ്രസാദ് ,എന്‍. പി. പ്രദീപ് കുമാര്‍, പ്രജോഷ് തൊടിയില്‍, ലതിക ചേറോട്ട്, വേദസ്, ടിപി പ്രേമരാജന്‍ എന്നിവര്‍ നേതൃത്വം നല്‍കി.

കെ.സി.രാമചന്ദ്രന്‍ പുരസ്‌കാരം കെ.ജി. പങ്കജാക്ഷന്

കോഴിക്കോട്: ഐഎന്‍ടിയുസി നേതാവായിരുന്ന കെ.സി.രാമചന്ദ്രന്‍റെ സ്മരണാര്‍ഥം ഏര്‍പ്പെടുത്തിയ പുരസ്‌കാരം എഐടിയുസി സംസ്ഥാന വൈസ് പ്രസിഡിന്‍റ് കെ.ജി. പങ്കജാക്ഷന്. 15ന് രാവിലെ 10 മണിക്ക് ഡിസിസി പ്രസിഡന്‍റ് അഡ്വ.കെ. പ്രവീണ്‍ കുമാര്‍ പുരസ്ക്കാര സമര്‍പ്പണം നടത്തുമെന്ന് പ്രസിഡന്‍റ് എന്‍. കെ അബ്ദുറഹിമാനും കണ്‍വീനര്‍ അഡ്വ.എം.രാജനും അറിയിച്ചു. ഫലകവും പ്രശസ്തി പത്രവുമാണ് പുരസ്‌കാരം. രാഷ്ട്രീയ, ട്രേഡ് യുനിയന്‍ സാംസ്‌ക്കാരിക മേഖലയിലെ പ്രമുഖര്‍ പങ്കെടുക്കും.

നിപ വൈറസ് ബാധ: ജാഗ്രത വേണമെന്ന് ജില്ലാ ആരോഗ്യവകുപ്പ്

കോഴിക്കോട്: നിപ വൈറസ് ബാധക്കെതിരെ ജാഗ്രത പാലിക്കണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു. നിലവില്‍ കോഴിക്കോട് ജില്ലയില്‍ നിപ കേസുകള്‍ റിപ്പോര്‍ട്ട് ചെയ്തിട്ടില്ലെങ്കിലും രോഗലക്ഷണങ്ങള്‍ കണ്ടാല്‍ ആരോഗ്യ പ്രവര്‍ത്തകരെ അറിയിക്കുകയും അവരുടെ നിര്‍ദേശങ്ങള്‍ അനുസരിച്ച് പ്രവര്‍ത്തിക്കുകയും ചെയ്യണമെന്നും സ്വയം ചികിത്സ പാടില്ലെന്നും ഡിഎംഒ അറിയിച്ചു. പക്ഷിമൃഗാദികളുടെ ശരീര സ്രവങ്ങള്‍ വിസര്‍ജ്യം എന്നിവയുമായി സമ്പര്‍ക്കം ഉണ്ടായാല്‍ സോപ്പ് ഉപയോഗിച്ച് നന്നായി കൈ കഴുകുക, നിലത്തുവീണുകിടക്കുന്നതോ പക്ഷികളും മൃഗങ്ങളും കടിച്ചിട്ടുള്ളതോ ആയ പഴങ്ങളും പച്ചക്കറികളും ഉപയോഗിക്കരുത്, താഴെ വീണുകിടക്കുന്ന പഴങ്ങള്‍ കഴിക്കരുത്, പഴങ്ങളും പച്ചക്കറികളും നന്നായി കഴുകി മാത്രം ഉപയോഗിക്കുക, വവ്വാലുകള്‍ കാണപ്പെടുന്ന പ്രദേശങ്ങളില്‍ തെങ്ങ്, പന എന്നിവയില്‍നിന്ന് ലഭിക്കുന്ന തുറന്ന പാത്രങ്ങളില്‍ ശേഖരിക്കുന്ന കള്ള് ഉപയോഗിക്കരുത്, പക്ഷിമൃഗാദികളുടെ ശരീര സ്രവങ്ങള്‍ വിസര്‍ജ്യം എന്നിവ കലരാത്ത രീതിയില്‍ ഭക്ഷണപദാര്‍ഥങ്ങളും കുടിവെള്ളവും നന്നായി അടച്ച് സൂക്ഷിക്കുക, തുമ്മുമ്പോഴും ചുമക്കുമ്പോഴും തൂവാല ഉപയോഗിച്ച് മൂക്കും വായും മറയ്ക്കുക, കൈകള്‍ സോപ്പും വെള്ളവും ഉപയോഗിച്ച് ഇടക്കിടെ കഴുകുക, കൈകള്‍ കൊണ്ട് ഇടക്കിടെ മുഖത്ത് സ്പര്‍ശിക്കുന്നത് ഒഴിവാക്കുക, രോഗീപരിചരണത്തില്‍ ഏര്‍പ്പെടുന്നവര്‍ വ്യക്തി സുരക്ഷാ മുന്‍കരുതലുകള്‍ സ്വീകരിക്കുക എന്നീ മുന്‍കരുതലുകള്‍ വേണമെന്നും ഡിഎംഒ നിര്‍ദേശിച്ചു. സംശയ നിവാരണത്തിന് ജില്ലാ മെഡിക്കല്‍ ഓഫീസില്‍ പ്രവര്‍ത്തിക്കുന്ന 04952373903 നമ്പറിലോ സംസ്ഥാനതലത്തില്‍ 24 മണിക്കൂറും പ്രവര്‍ത്തിക്കുന്ന ദിശ ഹെല്‍പ് ലൈന്‍ നമ്പറിലോ വിളിക്കാം. നിപ രോഗം ഒരു ജന്തുജന്യ വൈറസ് രോഗമാണ്. വവ്വാലുകളും പന്നികളുമാണ് വൈറസിന്‍റെ സ്വാഭാവിക വാഹകര്‍. നിപ വൈറസ് ബാധയുള്ള വവ്വാലുകളില്‍നിന്നോ പന്നികളില്‍നിന്നോ രോഗം മനുഷ്യരിലേക്ക് പകരാം. വ്യക്തിഗത സുരക്ഷാ മാര്‍ഗങ്ങള്‍ സ്വീകരിക്കാതെ രോഗിയുമായി അടുത്തിടപഴകുന്നതിലൂടെ മനുഷ്യരില്‍നിന്ന് മനുഷ്യരിലേക്കും രോഗം പകരും. വൈറസ് ബാധയുള്ള വവ്വാലുകളുടെ കാഷ്ഠം, ഉമിനീര്‍, മൂത്രം കലര്‍ന്ന പാനീയങ്ങളും വവ്വാല്‍ കടിച്ച പഴങ്ങളും മറ്റും കഴിക്കുന്നതിലൂടെ രോഗം പകരാം. രോഗാണുക്കള്‍ ശരീരത്തില്‍ പ്രവേശിച്ച് നാല് മുതല്‍ 14 ദിവസത്തിനുള്ളില്‍ രോഗലക്ഷണങ്ങള്‍ പ്രകടമാകാം. രക്തം, മൂത്രം, തൊണ്ടയില്‍ നിന്നുള്ള സ്രവം, നട്ടെല്ലില്‍നിന്ന് കുത്തിയെടുത്ത സുഷുമ്‌നാസ്രവം എന്നിവയാണ് പരിശോധനക്കായി അയക്കുന്നത്. പനിയോട് കൂടിയുള്ള ശരീരവേദന, തലവേദന, ക്ഷീണം, ചുമ, തൊണ്ടവേദന, വയറിളക്കം എന്നിവയാണ് പ്രാരംഭ രോഗലക്ഷണങ്ങള്‍. രോഗം മൂര്‍ച്ഛിക്കുന്നതിനനുസരിച്ച് ഛര്‍ദ്ദി, സ്ഥലകാല ബോധമില്ലായ്മ, മാനസിക വിഭ്രാന്തി, അപസ്മാരം, ബോധക്ഷയം, ശ്വാസതടസ്സം എന്നിവയും ഉണ്ടാകാം. ശരിയായ ചികിത്സ ലഭിച്ചില്ലെങ്കില്‍ മരണം വരെ സംഭവിക്കാം.

ശമ്പള പരിഷ്‌കരണത്തില്‍ ഇടത് നിലപാട് അപഹാസ്യം:പ്രേംനാഥ് മംഗലശേരി

കോഴിക്കോട് : ശമ്പള പരിഷ്‌കരണം വൈക്കുന്നതില്‍ പ്രതികരിക്കാന്‍ പോലും തയാറാകാതെ ഇടതുപക്ഷ സംഘടനകളുടെ സമീപനം അപഹാസ്യമാണെന്ന് എന്‍ജിഒ അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശേരി.ശമ്പള പരിഷ്‌കരണം വൈകുന്നതില്‍ പ്രതിഷേധിച്ച് എന്‍ജിഒ അസോസിയേഷന്‍ കോഴിക്കോട് ജില്ലാ വ്യവസായ കേന്ദ്രത്തിനു മുന്‍പില്‍ നടത്തിയ പ്രതിഷേധ ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. 2019- ലെ ശമ്പള പരിഷ്‌ക്കരണ ആനുകൂല്യം അനുവദിക്കുന്നതിനു ജീവനക്കാര്‍ ഉയര്‍ത്തുന്ന ആവശ്യങ്ങള്‍ അംഗീകരിക്കാതെ എല്ലാ ആവശ്യങ്ങളും സര്‍ക്കാര്‍ നീട്ടികൊണ്ടുപോവുകയാണ്. ഇപ്പോള്‍ 2025 ന് ശേഷം കിട്ടുമെന്ന് പ്രസംഗിച്ചു നടക്കുകയാണ് ഇടതുപക്ഷ നേതാക്കളെന്ന് അദ്ദേഹം പറഞ്ഞു. ബ്രാഞ്ച് പ്രസിഡന്‍റ് കെ.ടി. രമേശന്‍ അധ്യക്ഷത വഹിച്ചു. സെറ്റോ ജില്ലാ ചെയര്‍മാന്‍ സിജു കെ. നായര്‍ മുഖ്യപ്രഭാഷണം നടത്തി. ജില്ലാ വൈസ് പ്രസിഡന്‍റ് രഞ്ജിത്ത് ചേമ്പാല, ജില്ലാ ജോ.സെക്രട്ടറി കെ.പി. സുജിത,തുഷാര ആര്‍ കൃഷ്ണന്‍, കെ. ലിജിന, പി.അരുണ്‍, എം.വി. ബഷീര്‍, കെ.വി. ബാലകൃഷ്ണന്‍, എം.ടി. ബിജിത്ത്, കെ.എം.ഷാജു എന്നിവര്‍ സംസാരിച്ചു.പ്രതിഷേധ പ്രകടനത്തിന് കെ.ടി. രാജി , റോഷ്ണ ഡെന്‍സില്‍, കെ. ജോതിഷ് കുമാര്‍ എന്നിവര്‍ നേതൃത്വം നല്‍കി.

മന്ത്രിയുടെ രാജിക്കായി കോണ്‍ഗ്രസ് പ്രകടനം നടത്തി

നരിനട: ആരോഗ്യ മന്ത്രി വീണാ ജോര്‍ജ് രാജി വയ്ക്കണമെന്ന് ആവശ്യപ്പെട്ട് നരിനടയില്‍ഒമ്പതാം വാര്‍ഡ് കോണ്‍ഗ്രസ് കമ്മിറ്റിയുടെ നേതൃത്വത്തില്‍ പ്രതിഷേധ പ്രകടനവും പൊതുയേറ്റവും നടത്തി. വാര്‍ഡ് പ്രസിഡന്‍റ് ശശി പുതിയേട്ടില്‍ അധ്യക്ഷത വഹിച്ചു. പ്രവാസി കോണ്‍ഗ്രസ് ചക്കിട്ടപാറ മണ്ഡലം പ്രസിഡന്‍റ് ജെയിംസ് തോട്ടുപുറം, ഗിരിജ ശശി, സുഭാഷ് തോമസ്, ബേബി മുക്കത്ത്, ലാലി കാരക്കട, സണ്ണി ചിറയ്ക്കല്‍, ജോസ് ഞാറുകുന്നേല്‍, ജീജോ തയ്യുള്ളതില്‍, സുമതി ലാല്‍ മോഹന്‍, അജിത, ഷിനി ജിജോ, സജി കാക്കനാട്ട്, സുരേഷ് ഏരംപുറം, ജോര്‍ജ് പുളിക്കപറമ്പില്‍, ഷാജി മുണ്ടയ്ക്കാട്ട്, ചാണ്ടി ഇടമണ്ണേല്‍, ബാലന്‍ നായര്‍, അപ്പച്ചന്‍ കുന്നത്തുംപാറ എന്നിവര്‍ നേതൃത്വം നല്‍കി.

കക്കൂസ് മാലിന്യ പ്ലാന്‍റിനെതിരെ സമരം ചെയ്തവരെ സര്‍ക്കാര്‍ ദ്രോഹിക്കുന്നു: മുസ്ലിംലീഗ്

കോഴിക്കോട്:പള്ളിക്കണ്ടി അഴീക്കല്‍ റോഡില്‍ കല്ലായി പുഴ നികത്തി കക്കൂസ് മാലിന്യ പ്ലാന്റ് നിര്‍മിക്കാനുള്ള സര്‍ക്കാറിന്‍റെ നടപടിയില്‍ പ്രതിഷേധിച്ചതിന്‍റെ പേരില്‍ പ്രദേശവാസികള്‍ക്കെതിരെ സര്‍ക്കാര്‍ കള്ളകേസ് എടുത്ത് ദ്രോഹിക്കുകയാണെ് മുസ്ലിംലീഗ് ആരോപിച്ചു. ശക്തമായ ജനകീയ പ്രക്ഷോഭത്തെ തുടര്‍ന്ന് കക്കൂസ് മാലിന്യപ്ലാന്‍റ് നിര്‍മാണ പ്രവൃത്തിയില്‍ നിന്ന് സര്‍ക്കാര്‍ പിന്മാറിയെങ്കിലും സ്ത്രീകള്‍ ഉള്‍പ്പെടെ നൂറിലധികം പ്രദേശവാസികള്‍ കേസുമായി ഇപ്പോഴും കോടതി കയറുകയാണ്. പ്രദേശവാസികളുടെ ന്യായമായ ആവശ്യത്തിന് പ്രതികരിച്ചതിന്‍റെ പേരില്‍ ജനങ്ങളെ ദ്രോഹിക്കുന്ന വിധം സര്‍ക്കാര്‍ എടുത്തിട്ടുള്ള കള്ളകേസുകള്‍ ഉടനെ പിന്‍വലിക്കണമെന്നാവശ്യപ്പെട്ട് നൈനാംവളപ്പ് മുസ്ലിം ലീഗ് കമ്മിറ്റിയുടെ നേതൃത്വത്തില്‍ 12ന് വൈകുന്നേരം 4.30 ന് പള്ളിക്കണ്ടി ബീച്ചില്‍ ജനകീയ പ്രതിഷേധ ധര്‍ണ സംഘടിപ്പിക്കും. മുസ്‌ലിം ലീഗ് സംസ്ഥാന ജനറല്‍ സെക്രട്ടറി പി.എം.എ സലാം ഉദ്ഘാടനം ചെയ്യും. സംഘാടക സമിതി യോഗത്തില്‍ പ്രസിഡന്‍റ് ഫൈസല്‍ പള്ളിക്കണ്ടി അധ്യക്ഷത വഹിച്ചു. ജനറല്‍ സെക്രട്ടറി എന്‍.വി. ശംസു, എന്‍.വി. ബാവ, കെ.ടി.സിദീഖ്, എസ്.വി. അശറഫ്, എന്‍.വി. അശറഫ്, എന്‍.വി. ഹംസകോയ, എന്‍.വി. അമീന്‍, എന്‍.വി. അബ്ദു , എന്‍.വി. അബൂബക്കര്‍, എന്‍.വി സലിം എന്നിവര്‍ പ്രസംഗിച്ചു.

ഫാ. സ്റ്റാന്‍ സാമിയെ അനുസ്മരിച്ചു

കോഴിക്കോട്: ഗോത്ര വിഭാഗങ്ങളുടെ ഉന്നമനത്തിനായി പ്രവര്‍ത്തിച്ച മനുഷ്യാവകാശ പ്രവര്‍ത്തകന്‍ ഫാ. സ്റ്റാന്‍ സാമിയെ മരണത്തിലേക്ക് തള്ളിവിട്ടത് ഭരണകൂട ഭീകരതയാണെന്ന് കെഎല്‍സിഎ കോഴിക്കോട് അതിരൂപതാ സമിതി സംഘടിപ്പിച്ച അനുസ്മരണ സമ്മേളനം അഭിപ്രായപ്പെട്ടു. സമ്മേളനം മോണ്‍. വിന്‍സെന്‍റ് അറക്കല്‍ ഉദ്ഘാടനം ചെയ്തു. കെഎല്‍സിഎ അതിരൂപത പ്രസിഡന്‍റ് ബിനു എഡ്വേഡ് അധ്യക്ഷത വഹിച്ചു. കെഎല്‍സിഎ സംസ്ഥാന വൈസ് പ്രസിഡന്‍റ് നൈജു അറക്കല്‍, ഫാ. പോള്‍ ആന്‍ഡ്രൂസ്, കെ.വൈ.ജോര്‍ജ്, ഫ്‌ളോറ മെന്‍ഡോന്‍സ, എ.ജെ.സണ്ണി, പ്രകാശ് പീറ്റര്‍, തോമസ് ചെമ്മനം, ജോഷി ആഞ്ഞിലിക്കാട്, ജോയ് പൂമല, മജോ പൂമല, വിന്‍സെന്‍റ് വട്ടപറമ്പില്‍, ജസ്റ്റിന്‍ ആന്‍റണി, മഞ്ജു ഫ്രാന്‍സിസ്, പി.ഷാജി, ഹെലന്‍, ലത മെന്‍ഡോന്‍സ, പി.ജെ.സേവ്യര്‍ എന്നിവര്‍ പ്രസംഗിച്ചു.

ചക്കിട്ടപാറയില്‍ വൈദ്യുതി മുടങ്ങുന്നത് പതിവ്; വശംകെട്ട് ഉപയോക്താക്കള്‍

ചക്കിട്ടപാറ: വൈദ്യുതി മുടങ്ങുന്നത് പതിവായതോടെ ചക്കിട്ടപാറ സെക്ഷന്‍ ഓഫീസിനു കീഴിലെ ആയിരക്കണക്കിനു ഉപയോക്താക്കള്‍ ഒരു മാസത്തോളമായി കടുത്ത ബുദ്ധിമുട്ടില്‍. വീടുകള്‍ക്കു പുറമെ, സര്‍ക്കാര്‍, സ്വകാര്യ ഓഫീസുകള്‍, ചെറുകിട വ്യവസായ സംരംഭങ്ങള്‍, ധനകാര്യ സ്ഥാപനങ്ങള്‍, വിദ്യാലയങ്ങള്‍ എന്നിവയെല്ലാം വൈദ്യുതി തകരാറില്‍ വലയുകയാണ്. ചെറുകിട കുടി വെള്ള പദ്ധതികളെയും വൈദ്യുതി തകരാര്‍ ബാധിക്കുന്നുണ്ട്. സെക്ഷന്‍ ഓഫീസിനോടൊപ്പം 110 കെ.വി.സബ് സ്റ്റേഷനും ചക്കിട്ടപാറയിലുണ്ടെങ്കിലും ഉപയോക്താക്കള്‍ നേരിടുന്ന വൈദ്യുതി മുടക്കത്തിനു ശമനമില്ല. ചക്കിട്ടപാറ പഞ്ചായത്ത് പൂര്‍ണമായും കൂത്താളി, ചങ്ങരോത്ത് ഗ്രാമ പഞ്ചായത്തുകള്‍ ഭാഗികമായും ചക്കിട്ടപാറ സെക്ഷനു കീഴിലാണ്. മലയോരത്ത് മരങ്ങള്‍ക്കിടയിലൂടെ ലൈനുകള്‍ കടന്നു പോകുന്നതാണ് വൈദ്യുതി തടസത്തിനു കാരണമെന്നാണ് കെഎസ്ഇബി അധികൃതര്‍ പറയുന്നത്.

ഉന്നത വിജയികളെ അനുമോദിച്ചു

മുക്കം: പരീക്ഷകളില്‍ മികച്ച വിജയം നേടിയ കൊടിയത്തൂര്‍ പിടിഎം ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥികള്‍ക്കൊപ്പം അവരുടെ രക്ഷിതാക്കളെയും അനുമോദിച്ചത് വേറിട്ട അനുഭവമായി . ജില്ലാ പഞ്ചായത്തംഗം നാസര്‍ എസ്റ്റേറ്റ്മുക്ക് പരിപാടി ഉദ്ഘാടനം ചെയ്തു.പി.ടി.എ പ്രസിഡന്‍റ് സി. ഫസല്‍ ബാബു അധ്യക്ഷത വഹിച്ചു. മുക്കം എംഎംഒ കോളജ് പ്രിന്‍സിപ്പല്‍ ഡോക്ടര്‍ സാജിദിനേയും അണ്ടര്‍ 19 ദേശീയ ഫുട്‌ബോള്‍ ടൂര്‍ണമെന്‍റില്‍ചാമ്പ്യന്മാരായ കേരള ഫുട്‌ബോള്‍ ടീമിന്‍റെ പരിശീലകനായ സലീം കൊളായിയെയും ആദരിച്ചു. മജീദ് പുതുക്കുടി, എസ്.എ.നാസര്‍, ഷരീഫ് അമ്പലക്കണ്ടി,പ്രിന്‍സിപ്പല്‍ എം.എസ്. ബിജു, ഹെഡ്മാസ്റ്റര്‍ ജി. സുധീര്‍, സ്റ്റാഫ് സെക്രട്ടറി കെ.ടി. സലീം, ഇര്‍ഷാദ് ഖാന്‍, കെ.സി. ലുഖ്മാന്‍, ഷഹര്‍ബാന്‍ കോട്ട, ഫഹദ് ചെറുവാടി തുടങ്ങിയവര്‍ പങ്കെടുത്തു

വൈക്കം മുഹമ്മദ് ബഷീറിനെ അനുസ്മരിച്ച് കുട്ടികള്‍

പുല്ലൂരാംപാറ: സെന്‍റ് ജോസഫ്‌സ് യു.പി സ്‌കൂളില്‍ വൈക്കം മുഹമ്മദ് ബഷീര്‍ അനുസ്മരണ ദിനാചരണം വൈവിധ്യമാര്‍ന്ന പരിപാടികളോടെ സംഘടിപ്പിച്ചു. പുല്ലുരാംപാറ നെഹ്‌റു മെമ്മോറിയല്‍ ലൈബ്രറിയുടെ സഹകരണത്തോടെ സംഘടിപ്പിച്ച പുസ്തകപ്രദര്‍ശനം പിടിഎ പ്രസിഡന്‍റ് സോണി മണ്ഡപത്തില്‍ ഉദ്ഘാടനം ചെയ്തു. ചിത്രകല അധ്യാപികയായ ഷാഹിനയും വിദ്യാര്‍ത്ഥികളും ചേര്‍ന്ന് ബഷീര്‍ കഥാപാത്രങ്ങളുടെ ചിത്രം വരച്ചു. നാലാം ക്ലാസ് വിദ്യാര്‍ഥിനി മിറല്‍ എലിസബത്ത് സജി പുസ്തകപരിചയം നടത്തി. ഹെഡ്മാസ്റ്റര്‍ സിബി കുര്യാക്കോസ്, സീനിയര്‍ അസിസ്റ്റന്‍റ് അബ്ദുള്‍ റഷീദ്, നെഹ്‌റു മെമ്മോറിയല്‍ ലൈബ്രറി പ്രസിഡന്‍റ് റ്റി.ജെ. സണ്ണി, സെക്രട്ടറി റ്റി.റ്റി. തോമസ്, ബാലവേദി കണ്‍വീനര്‍ ജോസ് പുളിക്കാട്ട്, ലൈബ്രേറിയന്‍ കെ.ജെ.ജോസ് എന്നിവര്‍ പങ്കെടുത്തു. അധ്യാപകരായ റോഷിയ ജോസഫ്, ജിഷ തോമസ്, ജിസ ജോര്‍ജ് എന്നിവര്‍ നേതൃത്വം കൊടുത്തു.

കെഎംസിടിയില്‍ സൗജന്യ മെഡിക്കല്‍ ക്യാമ്പ്

കോഴിക്കോട്: കെഎംസിടി മെഡിക്കല്‍ കോളജ് ഫിസിക്കല്‍ മെഡിസിന്‍ ആന്‍ഡ് റീഹാബിലിറ്റേഷന്‍ വിഭാഗത്തില്‍ ഇന്നും നാളെയും സൗജന്യ മെഡിക്കല്‍ ക്യാമ്പ് സംഘടിപ്പിക്കുന്നു. ദേശീയ ഫിസിക്കല്‍ മെഡിസിന്‍ ആന്‍ഡ് റീഹാബിലിറ്റേഷന്‍ ദിനത്തോടനുബന്ധിച്ച് രാവിലെ 9.30 മുതല്‍ 12.30 വരെയാണ് ക്യാമ്പ് നടക്കുന്നതെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. ക്യാമ്പില്‍ സെറിബ്രല്‍ പാള്‍സി, സ്‌ട്രേക്ക്, സ്‌പൈനല്‍ ഇന്‍ഞ്ചറി, സ്‌പോട്ട്‌സ് പരിക്കുകള്‍, കാലങ്ങളായിട്ടുള്ള ശരീര വേദന, സന്ധി വേദന, വാത രോഗങ്ങള്‍, അസ്ഥി തേയ്മാനം, ബാലന്‍സ് പ്രശ്‌നങ്ങള്‍, ഓര്‍ത്തോപ്പെഡിക്, ന്യുറോളജിക്കല്‍, കാര്‍ഡിയാക്, സ്‌പൈന്‍, അംപുട്ടേഷന്‍, ബേണ്‍, പെയിന്‍ മാനേജ്മെന്റ് എന്നിവയില്‍ വിദഗ്ധ റിഹാബിലിറ്റേഷന്‍, അസുഖം കഴിഞ്ഞുള്ള ജീവിത ഗുണനിലവാരം മെച്ചപ്പെടുത്താനുള്ള ഇടപെടലുകള്‍ എന്നിവ ക്യാമ്പില്‍ പരിഗണിക്കും. പരിശോധനയും സിബിസി, ജിആര്‍ബിഎസ് ടെസ്റ്റുകളും സൗജന്യമായിരിക്കും. കൂടാതെ എക്‌സ്-റേ, സിടി, എംആര്‍ഐ എന്നിവക്ക് 15 ശതമാനം ഇളവും, സര്‍ജറി ആവിശ്യമുള്ളവര്‍ക്ക് 25 ശതമാനം ഇളവും നല്‍കും. വാര്‍ത്താസമ്മേളനത്തില്‍ ഹോസ്പിറ്റല്‍ ചീഫ് എക്‌സിക്യൂട്ടീവ് ഓഫീസര്‍ ഡോ.പി.എം. റമീസ്, ഫിസിക്കല്‍ മെഡിസിന്‍ ആന്‍ഡ് റീഹാബിലിറ്റേഷന്‍ വിഭാഗം മേധാവി ഡോ.ടി.കെ. വാസുദേവന്‍, ഡോ.ജേക്കബ് ജോര്‍ജ്, ഡോ.ഹഫീസ ടാംടന്‍, ഡോ. അബ്ദുള്ള എന്നിവര്‍ പങ്കെടുത്തു.

മാനാഞ്ചിറ - മലാപ്പറമ്പ് റോഡ് നിർമാണം ദ്രുതഗതിയിൽ

കോഴിക്കോട്: നഗരവികസന പാത പദ്ധതിയുടെ ഭാഗമായി 24 മീറ്ററിൽ വീതി കൂട്ടുന്ന മാനാഞ്ചിറ – മലാപ്പറമ്പ് റോഡിന്‍റെ പ്രവൃത്തി 2026 ഫെബ്രുവരിക്കു മുൻപ് തീര്‍ക്കാന്‍ നിര്‍ദേശം.റോ‍ഡ് നിർമാണം പൂർത്തിയാകുന്നതോടെ എരഞ്ഞിപ്പാലം ജംഗ്ഷനില്‍ വയനാട് റോഡിൽ മേൽപാലം നിർമിക്കാനുള്ള പദ്ധതികളുമായി മുന്നോട്ടു പോകുമെന്നാണ് പിഡബ്ല്യുഡി വിഭാഗം പറയുന്നത്. നിർമാണം 20 ദിവസം പിന്നിട്ടതോടെ മാനാഞ്ചിറ – മലാപ്പറമ്പ് റോഡിൽ പ്രവൃത്തികൾ ദ്രുതഗതിയിലാണ് നടക്കുന്നത്. 30 മീറ്റർ വീതിയുള്ള പാലമാണ് എരഞ്ഞിപ്പാലത്തു നിർമിക്കുക. ഏറെ ഗതാഗതത്തിരക്കുള്ള ജംക്‌ഷനായതിനാൽ എരഞ്ഞിപ്പാലം പോസ്റ്റ് ഓഫിസ് മുതൽ സിവിൽ സ്റ്റേഷനു താഴെ ചുള്ളിയോട് റോഡ് ജംഗ്ഷൻ വരെ മേൽപാലം നിർമിക്കാനാണ് ആലോചന. വീതി കൂട്ടൽ പ്രവൃത്തി നടക്കുന്ന 5.32 കിലോമീറ്ററിൽ എരഞ്ഞിപ്പാലം ഒഴികെ മറ്റു സ്ഥലങ്ങളിൽ ഭൂമി ഏറ്റെടുക്കൽ പൂർത്തിയായി. എരഞ്ഞിപ്പാലത്ത് ഒരു സ്ഥലത്തിന്‍റെ ഉടമയുമായി കോടതി നടപടി തുടരുന്നതിനാൽ ഈ ഭാഗം മാത്രം ഒഴിവാക്കിയാണ് നിലവിൽ വികസനം നടക്കുന്നത്. ഏറ്റെടുത്ത സ്ഥലത്ത് രണ്ട് മീറ്റർ വീതിയിൽ ഇരുഭാഗത്തും ഓടയ്ക്കും ഒപ്പം കേബിൾ ഡക്റ്റിനുമുള്ള പ്രവർത്തനമാണ് നടക്കുന്നത്. കഴിഞ്ഞ മാസം 16 നാണ് റോഡ് നവീകരണം മന്ത്രി പി.എ.മുഹമ്മദ് റിയാസ് ഉദ്ഘാടനം ചെയ്തത്. 79.9 കോടിയോളം രൂപയാണ് നിർമാണച്ചെലവ്. രണ്ടു വശത്തും 8.5 മീറ്റർ വീതം വീതിയിലാണ് റോഡ്.

പ്രസവത്തെ തുടര്‍ന്ന് യുവതി മരിച്ചു

മുക്കം: പ്രസവത്തെ തുടര്‍ന്ന് യുവതി മരിച്ചു. വല്ലത്തായിപ്പാറ കോഴിക്കരുവാട്ടില്‍ ഫൈസലിന്‍റെ ഭാര്യ സൈഫുന്നിസ(35)യാണ് കറുത്തപറമ്പിലെ സ്വകാര്യ ആശുപത്രിയില്‍ വച്ച് മരിച്ചത്. തിങ്കളാഴ്ച പുലര്‍ച്ചെ മൂന്നോടെ സൈഫുന്നിസ ആണ്‍കുട്ടിക്ക് ജന്മം നല്‍കിയിരുന്നു. സുഖപ്രസവം നടന്നതിന് പിന്നാലെയാണ് മരണം സംഭവിച്ചത്. വലിയപറമ്പ് സര്‍ക്കാര്‍ പറമ്പിലെ മേലേ പൂളമണ്ണ് മുഹമ്മദ്- സുബൈദ ദമ്പതികളുടെ മകളാണ്. മക്കള്‍: സഹല്‍, ഷഹാന ഷെറിന്‍, ഷഹസ. സഹോദരങ്ങള്‍: ഉമ്മുഹബീബ, ഫാത്തിമ സുഹറ, അബ്ദുല്‍ ഹമീദ്, സിറാജുദീന്‍.

കെ. കരുണാകരൻ അനുസ്മരണം

കൂരാച്ചുണ്ട്: മുൻ മുഖ്യമന്ത്രിയും കോൺഗ്രസ്‌ നേതാവുമായിരുന്ന കെ. കരുണാകരന്‍റെ 107-ാം ജന്മദിനാചരണത്തിന്‍റെ ഭാഗമായി കൂരാച്ചുണ്ട് മണ്ഡലം കോൺഗ്രസ്‌ കമ്മിറ്റി സംഘടിപ്പിച്ച അനുസ്മരണ യോഗം മണ്ഡലം വൈസ് പ്രസിഡന്‍റ് ഷാജു കാരക്കട ഉദ്ഘാടനം ചെയ്തു. ജെറിൻ കുര്യാക്കോസ് അധ്യക്ഷത വഹിച്ചു. യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം, നിയോജക മണ്ഡലം സെക്രട്ടറി വിഷ്ണു തണ്ടോറ, കെഎസ്‌യു മണ്ഡലം പ്രസിഡന്‍റ് രാഹുൽ രാഘവൻ, വി.ജെ. സെബാസ്റ്റ്യൻ, ബെസ്‌ലിൻ മഠത്തിനാൽ, ജോസ്ബിൻ കുര്യാക്കോസ്, ജ്യോതിഷ് രാരപ്പൻകണ്ടി, ഷിബിൻ പാവത്തികുന്നേൽ എന്നിവർ പ്രസംഗിച്ചു.

ജേഴ്സി പ്രകാശനം ചെയ്തു

മുക്കം: മുക്കം ഫുട്ബോൾ അക്കാദമി 2025 -26 വർഷത്തെ പുതിയ ജേഴ്സി പുറത്തിറക്കി. സൈഫുദ്ധീൻ സാപ്സി ജേഴ്സി പ്രകാശനം നിർവഹിച്ചു. എട്ട് വയസ് മുതൽ 15 വയസുവരെയുള്ള കുട്ടികൾക്കാണ് അക്കാദമിയിൽ ക്യാമ്പ് ഒരുക്കിയിട്ടുള്ളത്. രാവിലെ ഏഴ് മുതൽ ഒന്പത് വരെയുംവൈകുന്നേരം മൂന്ന് മുതൽ അഞ്ച് വരെയുമാണ് മണാശേരിയിലുള്ള മുക്കം നഗരസഭാ മൈതാനത്താണ് ക്യാമ്പ്. അക്കാദമി കൺവീനർ പ്രിൻസ് മാമ്പറ്റ, പരിശീലകരായ മുനിർ പരപ്പനങ്ങാടി, വിനീഷ് മുക്കം,അക്കാദമിയിലെ കുട്ടികൾ രക്ഷിതാക്കൾ പരിപാടിയിൽ സംബന്ധിച്ചു.

പ്രതിഷേധ ജ്വാല സംഘടിപ്പിച്ചു

കോഴിക്കോട്: കോട്ടയം മെഡിക്കൽ കോളജ് ആശുപത്രിയിൽ കെട്ടിടം തകർന്നുണ്ടായ അപകടത്തിൽ മരണപ്പെട്ട ബിന്ദുവിന്‍റെ മരണത്തിൽ ആരോഗ്യമന്ത്രി വീണാ ജോർജ് രാജി വയ്ക്കണമെന്ന് ആവശ്യപ്പെട്ട് നവ ജനശക്തി കോൺഗ്രസ് ജില്ല കമ്മിറ്റി മാനാഞ്ചിറ കിഡ്സൺ കോർണറിൽ പ്രതിഷേധ ജ്വാല സംഘടിപ്പിച്ചു. നവ ജനശക്തി കോൺഗ്രസ് ദേശീയ പ്രസിഡന്‍റ് മനോജ് ശങ്കരനെല്ലൂർ പ്രതിഷേധ സമരം ഉദ്ഘാടനം ചെയ്തു. ജില്ല പ്രസിഡന്‍റ് ഗണേഷ് പാലത്ത് അധ്യക്ഷത വഹിച്ചു. ജില്ല നേതാക്കളായ ടി.കെ. രവീന്ദ്രൻ, ബാലകൃഷ്ണ കുറുപ്പ്, ഇർഷാദ് മീഞ്ചന്ത, ഉമ്മർ മേത്തോട്ടത്താഴം, സ്നേഹ രാജ്, രാമകൃഷ്ണൻ ചീക്കിലോട്, രഘു പന്യങ്കര, സഹദ് കുറ്റിച്ചിറ, ഉമ്മർ പൊറ്റമ്മൽ, കുഞ്ഞിക്ക കുറ്റ്യാടി, വിജയൻ കൊളത്തൂർ, സാജുദ്ധീൻ തിരുവണ്ണൂർ, രാജേഷ് പാലത്ത് തുടങ്ങിയവർ പങ്കെടുത്തു.

ആരോഗ്യമന്ത്രിയെ ജയിലിലടച്ച് പ്രതിഷേധം

കൂരാച്ചുണ്ട്: കോട്ടയം മെഡിക്കല്‍ കോളജ് ആശുപത്രിയില്‍ കെട്ടിടം തകര്‍ന്നുവീണ് സ്ത്രീ മരിച്ച സംഭവത്തില്‍ ആരോഗ്യമന്ത്രി വീണാ ജോര്‍ജ് രാജിവയ്ക്കണമെന്നാവശ്യപ്പെട്ട് യൂത്ത് കോൺഗ്രസ്‌ മന്ത്രിയെ പ്രതീകാത്മകമായി ജയിലിലടച്ച് സമരം നടത്തി. യൂത്ത് കോൺഗ്രസ്‌ സംസ്ഥാന ജനറൽ സെക്രട്ടറി വൈശാഖ് കണ്ണോറ ഉദ്ഘാടനം ചെയ്തു.യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. കെഎസ്‌യു സംസ്ഥാന സമിതി അംഗം അർജുൻ പൂനത്ത് മുഖ്യപ്രഭാഷണം നടത്തി. കോൺഗ്രസ്‌ മണ്ഡലം പ്രസിഡന്‍റ് ജോസ് വെളിയത്ത്, കൂരാച്ചുണ്ട് പഞ്ചായത്ത് വൈസ് പ്രസിഡന്‍റ് വിൻസി തോമസ്, ഗ്രാമപഞ്ചായത്തംഗം ജെസി ജോസഫ് കരിമ്പനയ്ക്കൽ, ജെറിൻ കുര്യാക്കോസ്, ജോസ്ബിൻ കുര്യാക്കോസ്, നിഖിൽ വെളിയത്ത് എന്നിവർ പ്രസംഗിച്ചു.

മത്സ്യകൃഷി വിളവെടുപ്പ് നടത്തി

കൂടരഞ്ഞി: പഞ്ചായത്തിലെ ജനകീയ മത്സ്യകൃഷി പദ്ധതിയുടെ വിളവെടുപ്പ് നടത്തി. പഞ്ചായത്ത് പ്രസിഡന്‍റ് ആദർശ് ജോസഫ് ഉദ്ഘാടനം ചെയ്തു. വാർഡ് മെമ്പർ ജോസ് മോൻ മാവറ അധ്യക്ഷനായി. കൂട്ടക്കര, പറയങ്ങാട് പുത്തൻപുരയ്ക്കൽ ഔതയുടെ നാച്ചുറൽ കുളത്തിൽ വളർത്തിയ ഗിഫ്റ്റ് തിലോപ്പിയ ഇനത്തിൽപ്പെട്ട മത്സ്യങ്ങളുടെ വിളവെടുപ്പാണ് നടന്നത്.

പെൺകുട്ടികൾക്ക് സ്വയം പ്രതിരോധ പരിശീലനം സംഘടിപ്പിച്ചു

ചേളന്നൂർ: പ്രതികൂല സാഹചര്യങ്ങളെ അതിജീവിക്കാൻ പെൺകുട്ടികളെ പ്രാപ്തരാക്കുക എന്ന ലക്ഷ്യം വച്ച് വിജിൽ കേരള ഫൗണ്ടേഷൻ ജില്ലാ റൂറൽ പോലീസിന്‍റെ സഹകരണത്തോടെ ചേളന്നൂർ എസ്എൻ ട്രസ്റ്റ് ഹയർ സെക്കൻഡറി സ്കൂളിൽ പെൺകുട്ടികൾക്ക് ദ്വിദിന സ്വയം പ്രതിരോധ പരിശീലനം പരിപാടി സംഘടിപ്പിച്ചു. കാക്കൂർ സർക്കിൾ ഇൻസ്പെക്ടർ സാജു ഏബ്രഹാം ഉദ്ഘാടനം ചെയ്തു. വിജിൽ കേരള ഫൗണ്ടേഷൻ ചെയർമാൻ ശശികുമാർ ചേളന്നൂർ അധ്യക്ഷനായി. സ്കൂൾ പ്രിൻസിപ്പൽ പി.കെ. ഷീജ, പ്രധാനധ്യാപിക ജൂലി പോത്തോടി, സ്കൂൾ ജാഗ്രത സമിതി കൺവീനർ എൻ.പി. സഫീർ ഫസൽ, എസ്.ആർ. കൽമദാസ്, എം. ധന്യ, എസ്.പി. ശലോമി പ്രസംഗിച്ചു. ജില്ലാ റൂറൽ പോലീസ് ഡിഫൻസ് ടീം അംഗങ്ങളായ അസിസ്റ്റന്‍റ് സബ് ഇൻസ്പെക്ടർ വി.വി. ഷീജ, സീനിയർ സിവിൽ പോലീസ് ഓഫീസർ കെ.ജി. ജീജ ക്ലാസെടുത്തു.

അശാസ്ത്രീയ വാർഡ് വിഭജനം; പ്രതിഷേധവുമായി കോൺഗ്രസ്

പേരാമ്പ്ര: കൂത്താളി പഞ്ചായത്ത് ഒന്നാം വാർഡ് കോൺഗ്രസ് മഹാത്മ കുടുംബ സംഗമം സംഘടിപ്പിച്ചു. വരുന്ന തദ്ദേശ സ്വയംഭരണ തെരഞ്ഞെടുപ്പിൽ പിടിച്ചെടുക്കുക എന്ന ലക്ഷ്യത്തോടെ അശാസ്ത്രീയമായി വാർഡുകൾ വെട്ടി മുറിച്ച നടപടയിൽ യോഗം പ്രതിഷേധം രേഖപ്പെടുത്തി. കുടുംബ സംഗമം കെപിസിസി സെക്രട്ടറി സത്യൻ കടിയങ്ങാട് ഉദ്ഘാടനം ചെയ്തു. വാർഡ് കമ്മിറ്റി പ്രസിഡന്‍റ് റീത്ത ബെൻ അധ്യക്ഷത വഹിച്ചു. വിവിധ പരീക്ഷകളിൽ വിജയം കൈവരിച്ചവരെ ആദരിച്ചു. മണ്ഡലം കോൺഗ്രസ് കമ്മിറ്റി പ്രസിഡന്‍റ് രാജൻ കെ. പുതിയേടത്ത് മുഖ്യ പ്രഭാഷണം നടത്തി. ഡികെടിഎഫ് സംസ്ഥാന സെക്രട്ടറി പി.സി. രാധാകൃഷ്ണൻ, മോഹൻദാസ് ഓണിയിൽ, മഹിമ രാഘവൻ നായർ, പി.കെ. ശ്രീധരൻ, ഐശ്വര്യ നാരായണൻ, കെ.വി. രാഗിത, പി.കെ നൗജിത്ത്, വി.കെ ബാലൻ എന്നിവർ പ്രസംഗിച്ചു.

ഗ്രാമീണബാങ്കുകളെ സ്വകാര്യവത്ക്കരിക്കാനുള്ള നീക്കം ഉപേക്ഷിക്കുക: എം.കെ. രാഘവൻ

കോഴിക്കോട്: ഗ്രാമീണ ബാങ്കുകളെ സ്വകാര്യവത്ക്കരിക്കാനുള്ള നീക്കങ്ങളിൽ നിന്നും കേന്ദ്ര -സംസ്ഥാന സർക്കാരുകൾ പിന്തിരിയണമെന്ന് എം.കെ. രാഘവൻ എംപി ആവശ്യപ്പെട്ടു. കേരള ഗ്രാമീണ ബാങ്ക് സ്റ്റാഫ്‌ അസോസിയേഷന്‍റെയും ഓഫീസർസ് കോൺഗ്രസിന്‍റെയും കോഴിക്കോട് - വയനാട് സംയുക്ത മേഖല സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. അടുത്ത പാർലിമെന്‍റ് സമ്മേളനത്തിൽ ഈ വിഷയം ഉന്നയിക്കുമെന്ന് അദ്ദേഹം അറിയിച്ചു. ഒന്പതിനു നടക്കുന്ന കേന്ദ്ര ട്രേഡ് യൂണിയനുകളുടെ അഖിലേന്ത്യാ പണിമുടക്ക് വിജയിപ്പിക്കാനാവശ്യമായ പ്രചരണ പ്രവർത്തനങ്ങളിൽ സംഘടനകൾ സജീവമാകുമെന്ന് ഭാരവാഹികൾ പറഞ്ഞു. ബാങ്കിൽ വർഷങ്ങളായി ജോലി ചെയ്യുന്ന താത്കാലിക ജീവനക്കാരെ സ്ഥിരപ്പെടുത്തുക, മികച്ച സേവനങ്ങൾ ഇടപാടുകാർക്കു നൽകുന്നതിനാവശ്യമായ ജീവനക്കാരെ നിയമിക്കുക തുടങ്ങിയ ആവശ്യങ്ങൾ ഉന്നയിച്ചു പ്രക്ഷോഭ പരിപാടികൾക്ക് തുടക്കമിടും. യോഗത്തിൽ പ്രവീൺ കുമാർ അധ്യക്ഷനായി. എഎഎൻടിയുസി ജില്ലാപ്രസിഡന്‍റ് കെ. രാജീവ്‌, അഭിജിത്ത്, ജയകൃഷ്ണൻ, സോമൻ, അതുൽ, പ്രബിത എന്നിവർ പ്രസംഗിച്ചു. സംഘടനയുടെ ഭാരവാഹികളായി എൻ. പ്രവീൺകുമാർ (പ്രസിഡന്‍റ്), കെ.എസ്. അനൂപ് (സെക്രട്ടറി) എന്നിവരെ തെരഞ്ഞെടുത്ത്.

പലിശ കുറച്ച കേരള ബാങ്ക് നടപടി പിൻവലിക്കണമെന്ന്

കോഴിക്കോട്: സഹകരണ സംഘങ്ങളുടെ നിക്ഷേപങ്ങളുടെ പലിശ കുറച്ച കേരള ബാങ്ക് നടപടി പിൻവലിക്കണമെന്ന് ഐഎൻടിയുസി സംസ്ഥാന പ്രസിഡന്‍റ് ആർ. ചന്ദ്രശേഖരൻ. കേരള കോ ഓപ്പറേറ്റീവ് എംപ്ലോയീസ് കോൺഗ്രസ്‌ (ഐഎൻടിയുസി) സംസ്ഥാന കമ്മിറ്റി യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരളത്തിന്‍റെ അടിസ്ഥാനപരമായ മാറ്റങ്ങൾക്ക് വേണ്ടി നിലകൊണ്ട സ്ഥാപനങ്ങളെ കൊള്ളയടിക്കാനുള്ള ഗൂഢാലോചനയുടെ ഭാഗമാണ് ഇത്തരം തീരുമാനങ്ങൾ. ഇതിനെതിരേ യൂണിയൻ പ്രക്ഷോഭത്തിന് നേതൃത്വം നൽകുമെന്നും അദ്ദേഹം പറഞ്ഞു. അമ്പക്കാട് സുരേഷ് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി മനോജ്‌ എടാണി, അഡ്വ. എം. രാജൻ, കൈപ്പള്ളി മാധവൻ കുട്ടി, എസ്.ആർ. ഹാരിസ്, സന്തോഷ്‌ ഏറാടികുളങ്ങര, ഇ.എം. ഗിരീഷ്, കെ.വി. സന്തോഷ്‌, ഇ.കെ. മധു, സി.വി. അഖിൽ എന്നിവർ പ്രസംഗിച്ചു

ഐസിഡിഎസ് സൂപ്പർവൈസർക്ക് യാത്രയയപ്പ് നൽകി

മുക്കം: അഞ്ച് വർഷത്തെ സേവനത്തിന് ശേഷം കൊടിയത്തൂർ പഞ്ചായത്തിൽ നിന്നും മറ്റൊരു പഞ്ചായത്തിലേക്ക് സ്ഥലം മാറിപ്പോവുന്ന ജനകീയ ഐസിഡിഎസ് സൂപ്പർവൈസർ പി.കെ. ലിസക്ക് പരിവാർ കൊടിയത്തൂർ പഞ്ചായത്ത് കമ്മിറ്റി യാത്രയയപ്പ് നൽകി. കൊടിയത്തൂർ പാലിയേറ്റീവ് ഭവനിൽ പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ ഉപഹാരം നൽകി. പി.എം. നാസർ അധ്യക്ഷത വഹിച്ചു. ഭിന്നശേഷി വിദ്യാർഥികളുടെ അമ്മമാരുടെ ആദരവും ചടങ്ങിൽ നടന്നു. മുക്കം പ്രസ് ക്ലബ് പ്രസിഡന്‍റ് സി. ഫസൽ ബാബു, ടി.കെ. ജാഫർ,അബ്ദുൽ അസീസ് കാരക്കുറ്റി, മുഹമ്മദ് സൈഗോൺ, കരീം പൊലുകുന്നത്ത്, മുഹമ്മദ്,ബഷീർ കണ്ടങ്ങൾ, ബാബു, സെലീന, ആയിഷ ഹന്ന, സജിന തുടങ്ങിയവർ പ്രസംഗിച്ചു.

മലബാർ റിവർ ഫെസ്റ്റിവൽ പ്രീ ഇവന്‍റുകൾക്ക് തുടക്കമായി

തിരുവമ്പാടി: മലബാർ റിവർ ഫെസ്റ്റിവലിന്‍റെ ഭാഗമായി നടക്കുന്ന പ്രീ ഇവന്‍റുകൾ ആരംഭിച്ചു. ചൂണ്ടയിടൽ മത്സരം "തിലാപ്പിയ' യുടെ രണ്ടാം പതിപ്പിന്‍റെ ഉദ്ഘാടനം ലിന്‍റോ ജോസഫ് എംഎൽഎ നിർവഹിച്ചു. തിരുവമ്പാടി ലെയ്ക് വ്യൂ ഫാം സ്റ്റേയിൽ നടന്ന മത്സരത്തിൽ മലപ്പുറം, കോഴിക്കോട് ജില്ലകളിൽ നിന്നായി നിരവധിയാളുകൾ പങ്കെടുത്തു. ചൂണ്ടയിടൽ മത്സരത്തിൽ പങ്കെടുക്കാൻ എത്തിയ ആളുകളുടെ ആവേശം കണ്ട് എംഎൽഎയും ചൂണ്ടയിട്ടു. എന്നാൽ പ്രതീക്ഷിച്ച രീതിയിൽ മീൻ ലഭിച്ചില്ല. വളരെ എളുപ്പമാണെന്ന് വിചാരിച്ച ചൂണ്ടയിടൽ അങ്ങനെയല്ലെന്ന് ശേഷം എംഎൽഎ പറഞ്ഞു. മത്സരത്തിൽ ഒന്നാം സമ്മാനമായ മൂവായിരം രൂപയും മൂന്ന് കിലോ മത്സ്യവും മുക്കം അഗസ്ത്യൻമുഴി സ്വദേശി നിതിൻ കരസ്ഥമാക്കി. വിജയികളായവർക്കുള്ള സമ്മാനം കർഷക കോൺഗ്രസ് സംസ്ഥാന ജനറൽ സെക്രട്ടറി ബോസ് ജേക്കബ്, തിരുവമ്പാടി പഞ്ചായത് പ്രസിഡന്‍റ് ബിന്ദു ജോൺസൺ, കോടഞ്ചേരി പഞ്ചായത്ത് പ്രസിഡന്‍റ് അലക്സ് തോമസ് എന്നിവർ ചേർന്ന് വിതരണം ചെയ്തു. ഏറ്റവും വലിയ മത്സ്യത്തെ പിടിച്ച ആൾക്കുള്ള പ്രത്യേക സമ്മാനത്തിനു തിരുവമ്പാടി പെരുമാലിപ്പടി സ്വദേശി ഷിബിൻ അർഹനായി. 24 മുതൽ 27 വരെ മലബാർ റിവർ ഫെസ്റ്റിവൽ നടക്കുക.

സര്‍ക്കാറിനെതിരേ കോൺഗ്രസിന്‍റെ സമരസംഗമം ഇന്ന്

കോഴിക്കോട്: സംസ്ഥാന സര്‍ക്കാറിന്‍റെ ജനദ്രോഹ നയങ്ങള്‍ക്കെതിരേയുള്ള സമരസംഗമം കോഴിക്കോട് ശ്രീനാരാണ സെന്‍റിനറി ഹാളില്‍ ഇന്ന് ഉച്ചയ്ക്ക്‌ശേഷം 2.30ന് നടക്കും. കെപിസിസി പ്രസിഡന്‍റ് സണ്ണി ജോസഫ് എംഎല്‍എ ഉദ്ഘാടനം ചെയ്യുന്ന ചടങ്ങില്‍ യുഡിഎഫ് കണ്‍വീനര്‍ അടൂര്‍ പ്രകാശ് എംപി, കോണ്‍ഗ്രസ് പാര്‍ലമെന്‍ററി പാര്‍ട്ടി സെക്രട്ടറി എം.കെ. രാഘവന്‍ എംപി, കെപിസിസി വര്‍ക്കിംഗ് പ്രസിഡന്‍റുമാരായ എ.പി. അനില്‍കുമാര്‍ എംഎല്‍എ, പി.സി. വിഷ്ണുനാഥ് എംഎല്‍എ, ഷാഫി പറമ്പില്‍ എംപി എന്നിവരും കെപിസിസി ഭാരവാഹികളും പങ്കെടുക്കും. കെപിസിസി മെമ്പര്‍മാര്‍, ഡിസിസി ഭാരവാഹികള്‍, ബ്ലോക്ക് ഭാരവാഹികള്‍, മണ്ഡലം പ്രസിഡന്‍റുമാര്‍, തദ്ദേശസ്വയംഭരണ സ്ഥാപനങ്ങളിലെ അംഗങ്ങള്‍, പോഷകസംഘടന ബ്ലോക്ക് പ്രസിഡന്‍റുമാര്‍ ജില്ലാ സംസ്ഥാന ഭാരവാഹികള്‍ എന്നിവരാണ് സമരസംഗമത്തിലെ പ്രതിനിധികള്‍. വിവിധങ്ങളായ മേഖലയിലെ ഭരണ പരാജയങ്ങള്‍ സമരസംഗമത്തില്‍ ചര്‍ച്ചയാകുമെന്നും ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അറിയിച്ചു.

സൈക്യാട്രിസ്റ്റുകളുടെ സംസ്ഥാന സമ്മേളനം കോഴിക്കോട്ട്

കോഴിക്കോട്: സൈക്യാട്രിസ്റ്റുകളുടെ സംഘടനയായ ഇന്ത്യന്‍ സൈക്യാട്രിക് സൊസൈറ്റിയുടെ 41-ാം സംസ്ഥാന സമ്മേളനം "സിപ്സ്‌കോൺ-25' ഓഗസ്റ്റ് 22 മുതല്‍ 24 വരെ ഹോട്ടല്‍ ടിയാരയില്‍ നടക്കും. കാലിക്കട്ട് സൈക്യാട്രിക് ഗില്‍ഡാണ് സമ്മേളനം സംഘടിപ്പിക്കുന്നത്. കേരളത്തില്‍ നിന്നും മറ്റു സംസ്ഥാനങ്ങളില്‍ നിന്നും വിദേശത്തു നിന്നുമായി 300 ഡോക്ടര്‍മാര്‍ മൂന്നു ദിവസത്തെ സമ്മേളനത്തില്‍ പങ്കെടുക്കുമെന്ന് കാലിക്കട്ട് സൈക്യാട്രിക് ഗില്‍ഡ് സെക്രട്ടറി ഡോ. ദയാല്‍ നാരായണ്‍ അറിയിച്ചു. രാജ്യത്തെ വിവിധ മെഡിക്കല്‍ കോളജുകളില്‍ നിന്നുമായി മുന്നൂറോളം പിജി വിദ്യാര്‍ഥികളും സമ്മേളനത്തിനെത്തും. ഓഗസ്റ്റ് 22ന് രാവിലെ പൊതുജനങ്ങള്‍ക്കായുള്ള ബോധവത്കരണ പരിപാടിയോടെയാണ് സമ്മേളനത്തിന് തുടക്കമാവുക. മനഃശാസ്ത്ര സംബന്ധിയായ വിവിധ വിഷയങ്ങള്‍ അവതരിപ്പിക്കുന്ന ബോധവത്കരണ പരിപാടിയില്‍ പൊതുജനങ്ങള്‍ക്ക് പ്രശസ്ത സൈക്യാട്രിസ്റ്റുകളുമായി ആശയവിനിമയം നടത്താനും സംശയനിവാരണത്തിനും അവസരമൊരുക്കുമെന്ന് സംസ്ഥാന ഭാരവാഹികളായ ഡോ. മോഹന്‍ സുന്ദരം, ഡോ. അനീസ് അലി, ഡോ.രാജ്മോഹന്‍ വേലായുധന്‍ എന്നിവര്‍ അറിയിച്ചു. മാനസികാരോഗ്യവുമായി ബന്ധപ്പെട്ട വിവിധ വിഷയങ്ങളില്‍ വിദഗ്ധര്‍ അറുപതോളം പ്രബന്ധങ്ങള്‍ അവതരിപ്പിക്കും. "മെന്‍റല്‍ ഹെല്‍ത്ത് കെയര്‍ ആക്ട് നടപ്പാക്കുന്നതിലെ പ്രായാഗിക ബുദ്ധിമുട്ടും വെല്ലുവിളികളും' എന്ന വിഷയത്തില്‍ രാജ്യാന്തര സിംപോസിയവും സംഘടിപ്പിക്കും. ഇന്ത്യയില്‍ നിന്നും വിദേശത്തു നിന്നുമുള്ള സൈക്യാട്രിസ്റ്റുകളും നിയമവിദഗ്ധരും സിംപോസിയത്തില്‍ പങ്കെടുക്കും. കുട്ടികളുടെയും മുതിര്‍ന്നവരുടെയും മാനസികാരോഗ്യം, ചികിത്സയില്‍ മരുന്നുകളുടെ ഉപയോഗവുമായി ബന്ധപ്പെട്ട പ്രശ്നങ്ങൾ, ആധുനിക രോഗനിര്‍ണയ സംവിധാനങ്ങൾ, മാനസിക രോഗങ്ങളില്‍ ജനിതകശാസ്ത്ര ഗവേഷണങ്ങളിലൂടെ ലഭ്യമായ പുതിയ അറിവുകള്‍ തുടങ്ങി വിവിധ വിഷയങ്ങളില്‍ ചര്‍ച്ചകളും നടക്കും.

വന്യമൃഗ ആക്രമണം : ‘സാരിവേലി കെട്ടി പ്രതിഷേധിക്കും’

താമരശേരി: വര്‍ധിച്ചുവരുന്ന വന്യമൃഗ ആക്രമണം തടയാന്‍ വനംവകുപ്പ് നടപടി സ്വീകരിക്കാത്തതില്‍ പ്രതിഷേധിച്ച് ഓഗസ്റ്റ് ആദ്യവാരം കോഴിക്കോട്, മലപ്പുറം ജില്ലകളിലെ ഫോറസ്റ്റ് ഓഫീസുകള്‍ക്ക് മുമ്പിലും വനാതിര്‍ത്തികളിലും സാരിവേലി കെട്ടി സമരം ചെയ്ത് പ്രതിഷേധിക്കുമെന്ന് കത്തോലിക്ക കോണ്‍ഗ്രസ് താമരശേരി രൂപത പ്രതിനിധി സഭ പ്രഖ്യാപിച്ചു. വരുന്ന പഞ്ചായത്ത് തെരഞ്ഞെടുപ്പില്‍ അടക്കം ജനവഞ്ചനയുടെ പ്രതിഷേധപ്രതിഫലനം ഉണ്ടാകുമെന്നും നേതാക്കള്‍ അറിയിച്ചു. ആധാരം, പട്ടയം, കരം അടച്ച രസീത് തുടങ്ങിയ രേഖകളോടെ കൈവശം വച്ച് അനുഭവിച്ചുവരുന്ന ഭൂമിക്ക് ബാങ്ക് വായ്പ ലഭിക്കുന്നതിന് വനംവകുപ്പിന്‍റെ എന്‍ഒസി വേണമെന്ന നിബന്ധനക്കെതിരേ കത്തോലിക്ക കോണ്‍ഗ്രസ് പ്രമേയം പാസാക്കി. ഇത്തരം കരിനിയമങ്ങളെ എന്തുവില കൊടുത്തും എതിര്‍ക്കുമെന്ന് സമിതി പ്രഖ്യാപിച്ചു. പെരുവണ്ണാമൂഴി മുതല്‍ ആനക്കാംപൊയില്‍ വരെ വന്യമൃഗങ്ങളുടെ ശല്യം തടയാന്‍ ഉടന്‍ സൗരവേലി അടക്കമുള്ള സംവിധാനങ്ങള്‍ തീര്‍ക്കുമെന്ന് വനംമന്ത്രി പ്രഖ്യാപനം നടത്തിയിട്ട് രണ്ടുവര്‍ഷം കഴിഞ്ഞു. ഇതുവരെ യാതൊരു നടപടിയും ഉണ്ടാകാത്തതിനെതിരേയാണ് സാരിവേലി കെട്ടി സമരം ചെയ്യുന്നത്. യോഗത്തില്‍ രൂപതാ പ്രസിഡന്‍റ് ഡോ. ചാക്കോ കാളംപറമ്പിൽ, ഡയറക്ടര്‍ ഫാ. സബിന്‍ തൂമുള്ളിൽ, ജനറല്‍ സെക്രട്ടറി ഷാജി കണ്ടത്തിൽ, ട്രഷറര്‍ സജി കരോട്ട്, പ്രിന്‍സ് ദിനംപറമ്പിൽ, ജോണ്‍സണ്‍ കക്കയം, ജോഷി കറുകമാലിൻ, ജോസ് ചെറുവള്ളി, ഡോ. ജോണ്‍ കട്ടക്കയം, ടോമി ചക്കുംമുട്ടിൽ, ജോസഫ് പുലക്കുടി, ഷാന്‍റോ തകടിയേൽ, അല്‍ഫോന്‍സ മാത്യു, ഷെല്ലി, ജോസഫ് ആലവേലിൽ, ജെയിംസ് തൊട്ടിയിൽ, വര്‍ഗീസ് ലോന തുടങ്ങിയവര്‍ സംസാരിച്ചു.

എകെസിസി നേതൃ ശില്പശാല നടത്തി

താമരശേരി: കത്തോലിക്ക കോണ്‍ഗ്രസ് ഗ്ലോബല്‍-രൂപതാ സമിതിയുടെ നേതൃത്വത്തില്‍ "മോസസ് 2കെ25' എന്ന പേരില്‍ ശില്പശാല സംഘടിപ്പിച്ചു. താമരശേരി രൂപതയിലെ എല്ലാ യൂണിറ്റുകളില്‍ നിന്നുമുള്ള പ്രസിഡന്‍റ്, സെക്രട്ടറി, ട്രഷറർ, രൂപത പ്രതിനിധി, ഫൊറോന പ്രസിഡന്‍റ്, സെക്രട്ടറി, ട്രഷറർ, രൂപത നിര്‍വാഹ സമിതി അംഗങ്ങൾ, രൂപതാതല യൂത്ത് കോ ഓര്‍ഡിനേറ്റര്‍മാർ, വനിതാ കോ ഓര്‍ഡിനേറ്റര്‍മാര്‍ എന്നിവര്‍ പങ്കെടുത്തു. എകെസിസി രൂപത പ്രസിഡന്‍റ് ഡോ. ചാക്കോ കാളംപറമ്പില്‍ അധ്യക്ഷത വഹിച്ച യോഗം ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ ഉദ്ഘാടനം ചെയ്തു. ഗ്ലോബല്‍ ജനറല്‍ സെക്രട്ടറി ഡോ. ജോസുകുട്ടി ഒഴുകയിൽ, രൂപത ജനറല്‍ സെക്രട്ടറി ഷാജി കണ്ടത്തിൽ, ട്രഷറര്‍ സജി കരോട്ട് എന്നിവര്‍ സംസാരിച്ചു. ഡോ.കെ.എം. ഫ്രാന്‍സിസ്, ഡോ. ജോസുകുട്ടി ഒഴുകയിൽ, ഗ്ലോബല്‍ വൈസ് പ്രസിഡന്‍റ് ബെന്നി ആന്‍റണി, ഡോ. പീറ്റര്‍ എം. രാജ്, ഡോ. ചാക്കോ കാളംപറമ്പിൽ, ഫാ. സബിന്‍ തൂമുള്ളിൽ, ട്രീസ സെബാസ്റ്റ്യൻ, നിമ്മി, അഡ്വ. ടോം ഐകുളമ്പില്‍ എന്നിവര്‍ ക്ലാസെടുത്തു.

റെയില്‍വേയുടെ ഓണ്‍ലൈന്‍ പണമിടപാടില്‍ ബുദ്ധിമുട്ടി വയോജനങ്ങൾ

കോഴിക്കോട്: ട്രെയിന്‍ ടിക്കറ്റ് എടുക്കുന്നവര്‍ കൗണ്ടറില്‍ നേരിട്ട് പണമടയ്ക്കുന്നതിന് പകരം ഡിജിറ്റല്‍ പേയ്‌മെന്‍റ് ചെയ്യണമെന്ന നിബന്ധന പ്രായമായ യാത്രക്കാര്‍ക്ക് ബുദ്ധിമുട്ടാകുന്നതായി ആക്ഷേപം. ഓണ്‍ലൈന്‍ പണമിടപാട് പ്രോത്സാഹിപ്പിക്കാനുള്ള റെയില്‍വേ മന്ത്രാലയത്തിന്‍റെ ചുവട് പിടിച്ചാണ് പുതിയ പരിഷ്‌കാരം. പ്രായമായവര്‍ക്കും ഡിജിറ്റല്‍ പണമിടപാട് സംവിധാനം അറിയാത്തവര്‍ക്കുമാണ് നിബന്ധന ബുദ്ധിമുട്ടായിരിക്കുന്നത്. ഇതിനെതിരേ വ്യാപകമായ പ്രതിഷേധം ഉയരുകയാണ്. പാലക്കാട് ഡിവിഷനിലെ സ്റ്റേഷനുകളിലാണ് പ്രധാനമായും ഓണ്‍ലൈന്‍ പേയ്‌മെന്‍റ് നടപ്പാക്കുന്നത്. പരിഷ്‌കാരം സംബന്ധിച്ച് കഴിഞ്ഞദിവസം വടകര റെയില്‍വേ സ്റ്റേഷനില്‍ യാത്രക്കാരും ഉദ്യോഗസ്ഥരും തമ്മില്‍ വാക്കേറ്റമുണ്ടായി. റെയില്‍വേയുടെ നിര്‍ദേശമാണെന്നാണ് ടിക്കറ്റ് കൗണ്ടറിലെ ജീവനക്കാര്‍ പറയുന്നതെങ്കിലും അത്തരമൊരു നിര്‍ദേശമുണ്ടായിട്ടില്ലെന്നാണ് ഉന്നത ഉദ്യോഗസ്ഥര്‍ പറയുന്നത്. റെയില്‍വേ ടിക്കറ്റ് നിരക്ക് വര്‍ധിപ്പിച്ച ദിവസം തന്നെയാണ് ഇത്തരമൊരു പരിഷ്‌കാരം നടപ്പാക്കി തുടങ്ങിയത്.

പാസഞ്ചര്‍ ട്രെയിൻ സര്‍വീസ്: അധികൃതര്‍ക്ക് ഒളിച്ചുകളിയെന്ന്

കോഴിക്കോട്: നിര്‍ത്തലാക്കിയ പാസഞ്ചര്‍ ട്രെയിൻ സര്‍വീസുകള്‍ പുനരാരംഭിക്കുന്ന വിഷയത്തില്‍ റെയില്‍വേയുടെ ഒളിച്ചുകളി അവസാനിപ്പിക്കണമെന്ന് മലബാര്‍ ട്രെയിന്‍ പാസഞ്ചഴ്‌സ് അസോസിയേഷന്‍റെ എക്‌സിക്യുട്ടീവ് കമ്മിറ്റി യോഗം ആവശ്യപ്പെട്ടു. എല്ലാവര്‍ക്കും ഉപകാരപ്രദമായ സര്‍വീസാണ് റെയില്‍വേ നിര്‍ത്തലാക്കിയത്. ഈ വിഷയത്തില്‍ കോഴിക്കോട്, വടകര, തൃശൂര്‍ എംപിമാര്‍ മൗനത്തിലാണെന്ന് യോഗം ആരോപിച്ചു. പാലക്കാട്-കണ്ണൂര്‍ സ്‌പെഷല്‍ എക്‌സ്പ്രസ് പാലക്കാട് നിന്നും മൂന്നിനുശേഷം പുറപ്പെടുന്ന രീതിയില്‍ ക്രമീകരിക്കണം. പള്ളിപ്പുറം, തിരുന്നാവായ, വള്ളിക്കുന്ന്, കടലുണ്ടി, വെസ്റ്റ്ഹില്‍ എന്നിവടങ്ങളില്‍ സ്റ്റോപ്പ് അനുവദിക്കണം. വിജയന്‍ കണ്ടുപ്പറമ്പിന്‍റെ അധ്യക്ഷതയില്‍ ചേര്‍ന്ന യോഗത്തില്‍ എം. ഫിറോസ് ഫിസ, പി.പി.രാമനാഥൻ, ജയപ്രകാശ് വള്ളിക്കുന്ന്, പ്രമോദ് പന്നിയങ്കര, റഷീദ് മീഞ്ചന്ത എന്നിവര്‍ സംസാരിച്ചു.

യുവതിയെ പീഡിപ്പിക്കാന്‍ ശ്രമം: യുവാവ് പോലീസിന്‍റെ പിടിയില്‍

കോഴിക്കോട്: യുവതിയോട് അപമര്യാദയായി പെരുമാറിയ യുവാവ് അറസ്റ്റിലായി. കണ്ണൂര്‍ മയ്യില്‍ സ്വദേശി പാലകുന്ന് വീട്ടില്‍ പ്രണവി (31) നെയാണ് കോഴിക്കോട് ടൗണ്‍ പോലീസ് അറസ്റ്റ് ചെയ്തത്.കഴിഞ്ഞമാസം 12നാണ് കേസിനാസ്പദമായ സംഭവം നടന്നത്. ഇരിക്കൂര്‍ സ്വദേശിനിയായ യുവതിയെ കോഴിക്കോട് റെയില്‍വെ സ്റ്റേഷന് അടുത്തുള്ള അപ്‌സര റസിഡന്‍സിയിലെ ഒന്നാം നിലയിലെ റൂമില്‍വച്ച് ഇയാള്‍ ലൈംഗിക ഉദ്ദേശത്തോട് കൂടി വിവസ്ത്രയാക്കുകയും കഴുത്ത് ഞെരിച്ച് കൊല്ലാന്‍ ശ്രമിക്കുകയും ചെയ്തുവെന്നാണ് പരാതി. കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു. പ്രതിക്ക് എതിരേ കണ്ണൂര്‍ ജില്ലയില്‍ വിവാഹ വാഗ്ദാനം നല്‍കി പീഡിപ്പിച്ചതിനും നഗ്‌ന ചിത്രങ്ങള്‍ പകര്‍ത്തി ഭീഷണിപ്പെടുത്തി ഒന്നേ മുക്കാല്‍ പവന്‍റെ ബ്രേസ്‌ലറ്റും 55000 രൂപ തട്ടിയെടുത്തതിനും കേസുകളുണ്ട്.

വിഷക്കായ കഴിച്ച വിദ്യാർഥി ചികിത്സയിൽ

താമരശേരി: വീടിനു സമീപത്തെ പറമ്പിൽ നിന്നും ഞാവൽപ്പഴമെന്ന് കരുതി വിഷക്കായ കഴിച്ച വിദ്യാർഥി ചികിത്സയിൽ. താമരശേരി ഗവ. ഹയർ സെക്കൻഡറി സ്കൂൾ ഒന്പതാം ക്ലാസ് വിദ്യാർഥിയായാണ് ചികിത്സയിലുള്ളത്. വിദ്യാർഥിയെ താമരശേരി താലൂക്ക് ആശുപത്രിയിൽ പ്രവേശിപ്പിച്ച് പ്രാഥമിക ചികിത്സ നൽകിയ ശേഷം മെഡിക്കൽ കോളജ് ആശുപത്രിയിലേക്ക് മാറ്റുകയായിരുന്നു. ചുണ്ട് തടിച്ചു വരികയും ദേഹാസ്വാസ്ഥ്യം അനുഭവപ്പെടുകയും ചെയ്തതിനെ തുടർന്നാണ് ചികിത്സ തേടിയത്. കൂട്ടുകാർക്ക് ഒപ്പമാണ് കുട്ടി വിഷക്കായ കഴിച്ചത്. കഴിഞ്ഞ ദിവസങ്ങളിലും രണ്ടു കുട്ടികൾ സമാന രീതിയിൽ വിഷക്കായ കഴിച്ച് താമരശേരി താലൂക്ക് ആശുപത്രിയിൽ ചികിത്സ തേടിയിരുന്നു. കാഴ്ചയിൽ ഞാവൽ പഴത്തോട് സാമ്യമുള്ള കായ ആയതുകൊണ്ടാണ് കുട്ടികൾ വിഷക്കായ പറിച്ചുതിന്നാൻ ഇടയായത്.

നാദാപുരത്ത് ഇരുനില കെട്ടിടം തകർന്നുവീണു; ഒഴിവായത് വൻ ദുരന്തം

നാദാപുരം: സ്വകാര്യ വ്യക്തിയുടെ ഉടമസ്ഥതയിലുള്ള ഇരുനില കോൺക്രീറ്റ് കെട്ടിടം തകർന്നുവീണു. നാദാപുരം കസ്തുരികുളത്തെ അമ്പത് വർഷത്തോളം പഴക്കമുള്ള സ്വകാര്യ വ്യക്തിയുടെ കെട്ടിടമാണ് ഇന്നലെ പുലർച്ച മൂന്നരയോടെ തകർന്നുവീണത്. കെട്ടിടത്തിന്‍റെ ഒന്നാം നിലയിൽ ശാഫി കളരി മർമ ചികിത്സാലയവും താഴത്തെ നിലയിൽ മറ്റ് വ്യാപാര സ്ഥാപനങ്ങളും പ്രവർത്തിക്കുന്നുണ്ട്. ഇന്നലെ അവധി ദിവസമായതിനെ തുടർന്ന് കളരി മർമ ചികിത്സകനായ കോഴിക്കോട് ചെലവൂർ സ്വദേശി അബ്ദുറഹ്മാൻ ഗുരിക്കൾ നാട്ടിലേക്ക് പോയതിനാൽ അപകടത്തിൽ നിന്ന് രക്ഷപ്പെട്ടു. ഇദ്ദേഹം താമസിക്കുന്ന റൂമിന്‍റെ ഭാഗമാണ് തകർന്നുവീണത്. രാത്രി വൈകിയും ഈ കെട്ടിടത്തിന് സമീപത്തെ ഫാസ്റ്റ് ഫുഡ് കടയിൽ ആളുകൾ ഉണ്ടാകാറുണ്ട്. അപകടം നടന്നത് പുലർച്ചെ ആയതിനാൽ റോഡിലും മറ്റും ആളില്ലാത്തത് വൻ ദുരന്തം ഒഴിവാക്കി. കെട്ടിടത്തിന്‍റെ മേൽക്കുരയിൽ സ്ഥാപിച്ചിരുന്ന ഷീറ്റുകളും മറ്റും പതിനൊന്ന് കെവി ലൈനിൽതട്ടി നിൽക്കുന്നതിനാൽ പുലർച്ചെ തന്നെ കെഎസ്ഇബി അധികൃതർ വൈദ്യുതി ബന്ധം വിച്ഛേദിച്ചിരുന്നു. രാവിലെ ഫയർഫോഴ്സ് എത്തി ഷീറ്റുകളും ഇരുമ്പ് പൈപ്പുകളും മുറിച്ച് മാറ്റിയാണ് വൈദ്യുതി ബന്ധം പുനഃസ്ഥാപിച്ചത്. റോഡിലേക്ക് വീണ കെട്ടിടാവശിഷ്ടങ്ങൾ ജെസിബി ഉപയോഗിച്ച് മാറ്റി.

ഇരട്ടക്കൊലപാതകം നടത്തിയെന്ന പ്രതിയുടെ കുറ്റസമ്മതം : കൊല്ലപ്പെട്ടതാരാണെന്നു കണ്ടെത്താന്‍ മിസിംഗ് കേസുകൾക്ക് പിറകെ പോലീസ്

കോഴിക്കോട്: മലപ്പുറം വേങ്ങര ചേറൂര്‍ കിളിനക്കോട് പള്ളിക്കല്‍ ബസാറില്‍ താമസിക്കുന്ന തായ്പറമ്പില്‍ മുഹമ്മദലി (54) കൂടരഞ്ഞിയിലും വെള്ളയില്‍ ബീച്ചിലുമായി രണ്ടുപേരെ കൊലപ്പെടുത്തിയെന്ന വെളിപ്പെടുത്തല്‍ നടത്തിയതിന്‍റെ അടിസ്ഥാനത്തില്‍ വിശദമായ അന്വേഷണത്തിന് പ്രത്യേക പോലീസ് സംഘം. രണ്ടു മൃതദേഹങ്ങളുടെയും പോസ്റ്റ്മോര്‍ട്ടം നടന്ന കോഴിക്കോട് മെഡിക്കല്‍ കോളജില്‍ നിന്ന് ഫോറന്‍സിക് വിഭാഗത്തിന്‍റെ സഹായത്തോടെ പോസ്റ്റ്മോര്‍ട്ടം രേഖകള്‍ ശേഖരിച്ച് ശാസ്ത്രീയമായ അന്വേഷണം നടത്താനാണ് പോലീസിന്‍റെ നീക്കം. മുഹമ്മദലിയുടെ വെളിപ്പെടുത്തലിനു പിന്നാലെ രണ്ടു ജില്ലകളിലെ പോലീസ് സംഘമാണ് അന്വേഷണം നടത്തുന്നത്. 1986ല്‍ കൂടരഞ്ഞിയിലും 1989ല്‍ വെള്ളയില്‍ ബീച്ചില്‍വച്ചും താന്‍ കൊലപാതകങ്ങള്‍ നടത്തി എന്നായിരുന്നു മുഹമ്മദലിയുടെ വെളിപ്പെടുത്തല്‍. വര്‍ഷങ്ങള്‍ പിന്നിട്ടിട്ടും ആരാണ് മരിച്ചതെന്ന് കണ്ടെത്താന്‍ സാധിച്ചിട്ടില്ല. ഇവരെ തിരിച്ചറിയുകയാണ് പോലീസിനുള്ള വെല്ലുവിളി. മരിച്ചവരെ തിരിച്ചറിയാന്‍ കൊലപാതകം നടന്ന കാലയളവില്‍ വിവിധ പോലീസ് സ്‌റ്റേഷനുകളില്‍ രജിസ്റ്റര്‍ ചെയ്ത മിസിംഗ് കേസുകളെക്കുറിച്ചും പോലീസ് അന്വേഷണം ആരംഭിച്ചു. വെള്ളയില്‍ ബീച്ചില്‍ 1989ല്‍ കണ്ടെത്തിയ മൃതദേഹത്തിന്‍റെ പോസ്റ്റ്മോര്‍ട്ടം റിപ്പോര്‍ട്ട് അടക്കം ശേഖരിച്ച് അന്വേഷണം നടത്താന്‍ സിറ്റി പോലീസ് കമ്മിഷണര്‍ ഏഴംഗ ക്രൈം സ്‌ക്വാഡ് രൂപീകരിച്ചിട്ടുണ്ട്. കൂടരഞ്ഞിയില്‍ 1986ല്‍ മരിച്ച അജ്ഞാതന്‍റെ കൂടുതല്‍ വിവരങ്ങള്‍ തിരുവമ്പാടി പോലീസും അന്വേഷിക്കുന്നുണ്ട്. അതിനിടെ മുഹമ്മദലിയെ വീണ്ടും കസ്റ്റഡിയില്‍ വാങ്ങി മൊഴിയെടുക്കാനുള്ള നീക്കവും പോലീസ് നടത്തുന്നുണ്ട്. മുഹമ്മദലിക്ക് മാനസിക പ്രശ്‌നങ്ങള്‍ ഉണ്ടാകാമെന്ന സഹോദരന്‍റെ വെളിപ്പെടുത്തല്‍ സംബന്ധിച്ചും പോലീസ് അന്വേഷണം ആരംഭിച്ചിട്ടുണ്ട്. 2015ല്‍ കോഴിക്കോട് വിജയ ആശുപത്രിയിലും തൊട്ടടുത്ത വര്‍ഷം മെഡിക്കല്‍ കോളജ് ആശുപത്രിയിലും മുഹമ്മദലി ചികിത്സ തേടിയിരുന്നതായുള്ള സൂചനകള്‍ ശരിയാണോയെന്നു പോലീസ് പരിശോധിച്ചു വരികയാണ്. കൂടരഞ്ഞിയില്‍ താന്‍ കൊലപ്പെടുത്തിയതായി മുഹമ്മദലി പറഞ്ഞ യുവാവിന്‍റെ ശ്വാസകോശത്തില്‍ മണ്ണും ചെളിയും കണ്ടിരുന്നതായി അന്നത്തെ പോസ്റ്റ്‌മോര്‍ട്ടം റിപ്പോര്‍ട്ടില്‍ സൂചിപ്പിക്കുന്നുണ്ട്. മരണത്തിന് ഏതാനും ദിവസങ്ങള്‍ക്കുശേഷം ഇരിട്ടിയില്‍ നിന്ന് ഏതാനുംപേര്‍ മരിച്ചയാളുടെ വിവരങ്ങള്‍ അന്വേഷിച്ച് കൂടരഞ്ഞിയില്‍ വന്നിരുന്നതായി നാട്ടുകാരില്‍ ചിലര്‍ ഓര്‍മിക്കുന്നുണ്ട്. മരിച്ചത് മകനാണോ എന്ന സംശയത്തെ തുടര്‍ന്നാണ് ഇരിട്ടിയില്‍ നിന്ന് ആളുകള്‍ എത്തിയത്. ഇവരെ കണ്ടെത്താനുള്ള ശ്രമമാണ് തിരുവമ്പാടി പോലീസ് നടത്തുന്നത്. ജൂണ്‍ അഞ്ചിനാണ് മുഹമ്മദലി വേങ്ങര പോലീസില്‍ കീഴടങ്ങി കൂടരഞ്ഞിയിലെ കൊലപാതകത്തെക്കുറിച്ച് വെളിപ്പെടുത്തിയത്. തന്നെ ആക്രമിക്കാന്‍ ശ്രമിച്ചയാളെ ചവിട്ടിയെന്നും അയാള്‍ സമീപത്തെ തോട്ടില്‍ വീണ് മരിച്ചുവെന്നുമാണ് മുഹമ്മദലി വെളിപ്പെടുത്തിയത്. ഈ കേസില്‍ റിമാന്‍ഡിലായ മുഹമ്മദലിയെ പിന്നീട് കസ്റ്റഡിയിലെടുത്ത് ചോദ്യം ചെയ്തപ്പോഴാണ് വെള്ളയില്‍ ബീച്ചിലെ കൊലപാതകത്തെക്കുറിച്ചും വെളിപ്പെടുത്തല്‍ നടത്തിയത്. ഈ കൊലപാതകത്തില്‍ മറ്റൊരാള്‍ക്ക് പങ്കുള്ളതായും മുഹമ്മദലി പറഞ്ഞിട്ടുണ്ട്. ഇയാള്‍ കഞ്ചാവ് ബാബു എന്നറിയപ്പെടുന്ന ആള്‍ ആണെന്നാണ് സൂചന. ഇയാളെക്കുറിച്ചും പോലീസ് അന്വേഷിക്കുന്നുണ്ട്.

റിസോർട്ട് ജീവനക്കാരൻ മരിച്ച നിലയിൽ

കൂടരഞ്ഞി: കക്കാടംപൊയിലിൽ റിസോർട്ട് ജീവനക്കാരനെ മരിച്ച നിലയിൽ കണ്ടെത്തി. കേരളാ കോൺഗ്രസ് പ്രാദേശിക നേതാവായ പുതുപ്പാടി കക്കാട് മച്ചുകുഴിയിൽ ജോർജ് എം. തോമസ് ആണ് മരിച്ചത്. റിസോർട്ടിലെ മുറിയിൽ മരിച്ച നിലയിൽ കണ്ടെത്തുകയായിരുന്നു. ഹൃദ്രോഗമാണ് മരണ കാരണമെന്ന് പോലീസ് അറിയിച്ചു. ഭാര്യ: ബിന്ദു താമരശേരി വലിയപറമ്പിൽ കുടുംബാംഗം. മക്കൾ: ക്രിസ്റ്റീന, ക്രിസ്റ്റഫർ. മരുമകൻ: ജോൺസൻ മണ്ഡപത്തിൽ പൊന്നാങ്കയം പുല്ലൂരാംപാറ. സംസ്കാരം ഇന്ന് നാലിന് കോടഞ്ചേരി സെന്‍റ് മേരീസ് ഫൊറോന പള്ളിയിൽ.

ബസ് യാത്രക്കിടെ അതിക്രമം; കണ്ടക്ടർ റിമാൻഡിൽ

പേരാമ്പ്ര: ബസ് യാത്രക്കാരിക്കു നേരെ ലൈംഗിക അതിക്രമം നടത്തിയെന്ന കേസിൽ സ്വകാര്യ ബസിലെ കണ്ടക്ടർ അറസ്റ്റിൽ. മാപ്പറ്റക്കുനി റൗഫ് (38) ആണ് പോലീസ് പിടിയിലായത്. കോഴിക്കോട് കുറ്റ്യാടി റൂട്ടിൽ ഓടുന്ന സ്വകാര്യ ബസിൽ ജൂൺ പത്തിനായിരുന്നു സംഭവം. കേസിനെ തുടർന്ന് ഒളിവിലായിരുന്ന പ്രതി കഴിഞ്ഞ ദിവസം പേരാമ്പ്രയിലെത്തിയപ്പോഴാണ് ഇൻസ്പെക്ടർ പി. ജംഷീദിന്‍റെ നിർദ്ദേശപ്രകാരം എസ്ഐ പി.സി. ഷാജി, എസ്‌സിപിഒ സി.എം. സുനിൽകുമാർ എന്നിവർ ചേർന്ന് പിടികൂടിയത്. പേരാമ്പ്ര കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ആരോഗ്യ മന്ത്രിയുടെ കോലം കത്തിച്ച് പ്രതിഷേധിച്ചു

താമരശേരി: ആരോഗ്യമന്ത്രി രാജിവെക്കണമെന്ന് ആവശ്യപ്പെട്ട് പുതുപ്പാടി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ഈങ്ങാപ്പുഴയിൽ കോൺഗ്രസ് പ്രവർത്തകർ മന്ത്രിയുടെ കോലം കത്തിച്ചു. ജില്ലാ പഞ്ചായത്തംഗം അംബിക മംഗലത്ത് പ്രതിഷേധ യോഗം ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് രാജേഷ് ജോസ് അധ്യക്ഷത വഹിച്ചു. പി.സി. മാത്യു, ബിജു താന്നിക്കാകുഴി, ദേവസ്യചൊള്ളാമഠം, സലോമി സലീം, ബീന തങ്കച്ചൻ, കമറുദ്ദീൻ അടിവാരം, ലിസമ്മ തോമസ്, ശാരദ ഞാറ്റുപറമ്പിൽ, എം.കെ. ജാസിൽ, വി.എസ്. നൗഷാദ്, ജോർജ് കുരുത്തോല, ബഷീർ പുഴങ്കര, റിയാസ് കാക്കവയൽ പ്രസംഗിച്ചു. താമരശേരി മണ്ഡലം കോൺഗ്രസ് കമ്മറ്റിയുടെ ആഭിമുഖ്യത്തിൽ താമരശേരി ടൗണിൽ പ്രതിഷേധ പ്രകടനവും പൊതുയോഗവും നടത്തി. കെപിസിസി മെമ്പർ പി.സി. ഹബീബ് തമ്പി ഉദ്ഘാടനം ചെയ്തു. മണ്ഡലം പ്രസിഡന്‍റ് എം.സി നാസിമുദ്ദീൻ അധ്യക്ഷത വഹിച്ചു. പി. ഗിരീഷ് കുമാർ, നവാസ് ഈർപ്പോണ, ഒ.എം ശ്രീനിവാസൻ, കെ.പി അഹമ്മദ് കുട്ടി മാസ്റ്റർ, അഡ്വ.ജോസഫ് മാത്യു തുടങ്ങിയവർ പ്രസംഗിച്ചു. സി. മുഹ്സിൻ,സത്താർ പള്ളിപ്പുറം, ടി.പി. ഷരീഫ്, ബാലകൃഷ്ണൻ പുല്ലങ്ങോട്, ഖദീജ സത്താർ, കെ.പി കൃഷ്ണൻ, വി.കെ.എ.കബീർ, രാജേഷ് കോരങ്ങാട്, ഗിരീഷ് യു.ആർ, ഷീജ ദിലീപ് തുടങ്ങിയവർ നേതൃത്വം നൽകി.

മലയോര ഹൈവേ നിർമാണം: സുതാര്യമാക്കണമെന്ന് ബി.ജെ.പി

ചക്കിട്ടപാറ: പെരുവണ്ണാമൂഴി - ചക്കിട്ടപാറ - ചെമ്പ്ര റൂട്ടിൽ മലയോര ഹൈവേ നിർമാണം സുതാര്യമായി നടത്തണമെന്ന് ബിജെപി പഞ്ചായത്ത് കമ്മിറ്റി ചക്കിട്ടപാറയിൽ സംഘടിപ്പിച്ച പൊതു യോഗത്തിൽ ആവശ്യപ്പെട്ടു. റോഡിന്‍റെ വികസനത്തിനായി മുൻപ് സർക്കാർ പൊന്നും വില നൽകി ഏറ്റെടുത്ത സ്ഥലം പൂർണമായി സംരക്ഷിച്ചു കൊണ്ടു വേണം ഹൈവേ നിർമാണം നടത്താൻ. റോഡിന്‍റെ സ്ഥലം കയ്യേറിയവരെ സംരക്ഷിക്കുന്ന നയം സ്വീകരിക്കുന്ന ഇടത് വലത് രാഷ്ട്രീയ നേതൃത്വങ്ങളുടെയും ജനപ്രതിനിധികളുടെയും നിലപാടിനെ പ്രക്ഷോഭത്തിലൂടെയും നിയമപരമായും നേരിടുമെന്ന് യോഗം മുന്നറിയിപ്പ് നൽകി. ബിജെപി ജില്ലാ മുൻ ജനറൽ സെക്രട്ടറി എം. മോഹനൻ ഉദ്ഘാടനം ചെയ്‌തു. വി.വി. രാജൻ അധ്യക്ഷത വഹിച്ചു. പഞ്ചായത്ത് കമ്മിറ്റി പ്രസിഡന്‍റ് ബാബു പുതുപ്പറമ്പിൽ മലയോര ഹൈവേ നിർമാണ പ്രശ്നങ്ങൾ വിശദീകരിച്ചു. നേതാക്കളായ ഡി.കെ. മനു, കെ.കെ. രജീഷ്, കെ.എം. സുധാകരൻ, തറേമ്മൽ രാജേഷ്, പ്രകാശ് മലയിൽ, ജുബിൻ ബാലകൃഷ്ണൻ, പ്രകാശൻ കോമത്ത്, മോഹനൻ ഇല്ലത്ത് എന്നിവർ പ്രസംഗിച്ചു.

കെ. കരുണാകരൻ അനുസ്മരണം നടത്തി

കോഴിക്കോട്: വളരെ എളിയ നിലയില്‍ ജീവിതം ആരംഭിച്ച് കഠിനാദ്ധ്വാനത്തിലൂടെ ഉന്നത സ്ഥാനങ്ങളിലെത്തിയ കെ. കരുണാകരന്‍റെ ജീവിതം രാഷ്ട്രീയ പ്രവര്‍ത്തകര്‍ക്ക്ഒരു പാഠപുസ്തകമാണെന്ന് മുല്ലപ്പള്ളി രാമചന്ദ്രന്‍ അഭിപ്രായപ്പെട്ടു. മുൻ മുഖ്യമന്ത്രി കെ. കരുണാകരന്‍റെ 107-ാം ജന്മദിനത്തില്‍ ഡിസിസി സംഘടിപ്പിച്ച ജന്മദിനാഘോഷ പരിപാടി ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഭരണമികവും ദീര്‍ഘവീക്ഷണവുമുള്ള ഭരണാധികാരിയെന്ന നിലയില്‍ കേരളത്തിന്‍റെ വികസനത്തിന് അദ്ദേഹം നല്‍കിയ സംഭാവനകള്‍ എക്കാലത്തും ഓര്‍മ്മിക്കപ്പെടും. ഇന്ത്യയില്‍തന്നെ മുന്നണി രാഷ്ട്രീയം പരിചയമല്ലാത്ത കാലത്ത് കേരളത്തില്‍ ഐക്യജനാധിപത്യമുന്നണിക്ക് രൂപംകൊടുക്കുന്നതില്‍ അദ്ദേഹം വഹിച്ച പങ്ക് കേരള രാഷ്ട്രീയത്തില്‍ വലിയ മാറ്റങ്ങള്‍ക്ക് കാരണമായി. കേരളത്തിലെ കോണ്‍ഗ്രസിന്‍റെ എക്കാലത്തെയും ഒരേയൊരു ലീഡര്‍ കെ. കരുണാകനാണെന്ന് നിസ്സംശയം പറയാമെന്നും അദ്ദേഹം പറഞ്ഞു. ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അധ്യക്ഷത വഹിച്ചു. കെപിസിസി ജനറല്‍ സെക്രട്ടറിമാരായ അഡ്വ. കെ. ജയന്ത്, അഡ്വ. പി.എം. നിയാസ്, യുഡിഎഫ് ജില്ലാ ചെയര്‍മാന്‍ കെ. ബാലനാരായണന്‍ എന്നിവര്‍ പ്രസംഗിച്ചു. കൂടരഞ്ഞി: മുൻ കേരള മുഖ്യമന്ത്രി കെ. കരുണാകരനെയും മുൻ കോൺഗ്രസ് ബ്ലോക്ക് സെക്രട്ടറിയും പഞ്ചായത്ത് സ്റ്റാൻഡിംഗ് കമ്മിറ്റി ചെയർമാനുമായിരുന്ന രാജു താമരക്കുന്നേലിനെയും കൂടരഞ്ഞി മണ്ഡലം കോൺഗ്രസ് കമ്മിറ്റി അനുസ്മരിച്ചു. രാജ്യം കണ്ട ഏറ്റവും വലിയ രാഷ്ട്രീയ ഭീഷ്മാചാര്യനായിരുന്നു കെ. കരുണാകരനെന്ന് യോഗം ഉദ്ഘാടനം ചെയ്ത് ബ്ലോക്ക് വൈസ് പ്രസിഡന്‍റ് മുഹമ്മദ് പാതിപ്പറമ്പിൽ പറഞ്ഞു. മണ്ഡലം പ്രസിഡന്‍റ് സണ്ണി പെരികിലം തറപ്പേൽ, സണ്ണി കിഴക്കാരക്കാട്ട്, പൗലോസ് താന്നി മുളയിൽ, ജോസ് പള്ളിക്കുന്നേൽ, ജിന്‍റോ പുഞ്ച തറപ്പേൽ, ജോസ് മലപ്രവനാൽ തുടങ്ങിയവർ പ്രസംഗിച്ചു. താമരശേരി: പുതുപ്പാടി മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ മുൻ മുഖ്യമന്ത്രി കെ. കരുണാകരൻ അനുസ്മരണം നടത്തി. കോൺഗ്രസ് ഭവനിൽ ഡിസിസി നിർവാഹക സമിതി അംഗം പി.സി മാത്യു അനുസ്മരണം ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് രാജേഷ് ജോസ് അധ്യക്ഷത വഹിച്ചു. ബിജു താന്നിക്കാകുഴി, ദേവസ്യചൊള്ളാമഠം, അംബിക മംഗലത്ത്, ജോർജ് കുരുത്തോല, ബഷീർ പുഴങ്കര, ഷറഫു കല്ലടിക്കുന്ന്, നാസർ പുഴങ്കര, രതീഷ് പ്ലാപ്പറ്റ തുടങ്ങിയവർ പ്രസംഗിച്ചു.

താമരശേരിയിൽ മോഷണശ്രമം നടത്തിയ ആളെ തിരിച്ചറിഞ്ഞു

താമരശേരി: കാരാടി കുറുന്തോട്ടിക്കണ്ടി മുനീറിന്‍റെ വീട്ടിൽ ജനൽ പൊളി തുളച്ച് കവർച്ചാ ശ്രമം നടത്തിയ മോഷ്ടാവിനെ തിരിച്ചറിഞ്ഞു.താമരശേരി അമ്പായത്തോട്ടിലെ ഫിഷർ കമ്പനിക്ക് സമീപമുള്ള മാക്സി ജോസഫിന്‍റെ വീട്ടിൽ നിന്നും ഏഴുപവൻ സ്വർണം മോഷ്ടിച്ച കേസിൽ പിടിയിലായ ബര്‍മുഡ കള്ളന്‍ എന്ന എരുമാട് ജോസിനെ ചോദ്യം ചെയ്തപ്പോഴാണ് മുനീറിന്‍റെ വീട്ടിൽ കവർച്ചാ ശ്രമം നടത്തിയത് താനാണെന്ന് സമ്മതിച്ചത്. മലപ്പുറം കൊണ്ടോട്ടിയിലും കോട്ടക്കലിലും സമാന രൂപത്തിൽ ഇയാൾ മോഷണം നടത്തി വരുന്നതിനിടെയാണ് കഴിഞ്ഞ ദിവസം ഇയാൾ പിടിയിലായത്.സ്ഥിരമായി ബർമുഡ ധരിച്ച് മോഷണത്തിന് ഇറങ്ങുന്നതിനാലാണ് ബർമുഡ കള്ളൻ എന്ന പേര് ജോസിന് വീണത്. ജൂൺ 15ന് പുലർച്ചെയായിരുന്നു മുനീറിന്‍റെ വീടിന്‍റെ മുൻവശത്തെ വാതിലിനോട് ചേർന്ന ജനലിന്‍റെ കൊളുത്തുകൾ ഉള്ള ഭാഗം യന്ത്രം ഉപയോഗിച്ച് തുളച്ച് ജനൽ തുറന്ന് വാതിലിന്‍റെ ടവർബോൾട്ട് തുറക്കാൻ ശ്രമിച്ചത്. ശബ്ദം കേട്ട് വീട്ടുകാർ ഉണർന്നതോടെ വീട് തുറക്കാനുള്ള ശ്രമം ഉപേക്ഷിച്ച് കടന്നുകളയുകയായിരുന്നു.രണ്ടു വർഷം മുമ്പാണ് ഇയാൾ അമ്പായത്തോടിലെ വീട്ടിൽ മോഷണം നടത്തിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]