ADVERTISEMENT

ADVERTISEMENT

"കിങ്ങിണിക്കൂട്ടം' അങ്കണവാടി കലോത്സവം നടത്തി

കൂരാച്ചുണ്ട്: പഞ്ചായത്ത് അങ്കണവാടി കലോത്സവം "കിങ്ങിണിക്കൂട്ടം' സെന്‍റ് തോമസ് പാരീഷ് ഹാളിൽ നടന്നു. പഞ്ചായത്ത് പ്രസിഡന്‍റ് പോളി കാരക്കട ഉദ്ഘാടനം ചെയ്തു. വൈസ് പ്രസിഡന്‍റ് റസീന യൂസഫ് അധ്യക്ഷത വഹിച്ചു. പഞ്ചായത്തംഗങ്ങളായ ഒ.കെ. അമ്മദ്, ഡാർളി ഏബ്രഹാം, വിൻസി തോമസ്, എസിഡിഎസ് സൂപ്പർവൈസർ കെ. നളിനി, സിഡിപിഒ കെ.എം. റസിയ എന്നിവർ പ്രസംഗിച്ചു.

ADVERTISEMENT

കർശന നിയന്ത്രണങ്ങളുമായി കോടഞ്ചേരി പഞ്ചായത്ത്

കോടഞ്ചേരി: കോടഞ്ചേരി പഞ്ചായത്തിന്‍റെ പരിധിയിലുള്ള പതങ്കയം ടൂറിസ്റ്റ് ഡെസ്റ്റിനേഷനിൽ തുടർച്ചയായി ഉണ്ടാകുന്ന അപകട മരണങ്ങൾ ഇല്ലാതാക്കുവാനും സുരക്ഷ ഉറപ്പുവരുത്താനും കർശനം നിയന്ത്രണങ്ങൾ ഏർപ്പെടുത്തുവാൻ പഞ്ചായത്തിന്‍റെ നേതൃത്വത്തിൽ ചേർന്ന ഉന്നതതല യോഗത്തിൽ തീരുമാനമായി. പതങ്കയം സംരക്ഷണ സമിതിയിൽ പ്രാദേശിക കുടുംബങ്ങളെ ഉൾപ്പെടുത്തി റൊട്ടേഷൻ വ്യവസ്ഥയിൽ വോളണ്ടറിമാരെ നിയമിക്കുവാനും അവർക്ക് ആവശ്യമുള്ള ലൈഫ് ജാക്കറ്റ് യൂണിഫോം, ഐഡന്‍റിറ്റി കാർഡ് ഉൾപ്പെടെയുള്ളവ നൽകി പോലീസ്, ഫയർഫോഴ്സ് ഉദ്യോഗസ്ഥരുടെ നേതൃത്വത്തിൽ കൃത്യമായി പരിശീലനം നൽകുവാൻ യോഗത്തിൽ തീരുമാനമായി. പതങ്കയം ടൂറിസ്റ്റ് ഡെസ്റ്റിനേഷനിൽ എത്തുന്ന സന്ദർശകരിൽ നിന്നും 10 രൂപ നിരക്കിൽ ഫീസിടാക്കുന്നതിനും സന്ദർശക സമയം ഒന്പത് മുതൽ 5 വരെയാക്കി നിജപ്പെടുത്തുവാനും തീരുമാനിച്ചു. പഞ്ചായത്ത്‌ പ്രസിഡന്‍റ് അലക്സ്‌ തോമസ് ചെമ്പകശേരി അധ്യക്ഷത വഹിച്ചു. യോഗത്തിൽ പഞ്ചായത്ത് വൈസ് പ്രസിഡന്‍റ് ജമീലാ ആസീസ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സൂസൻ വർഗീസ്, പഞ്ചായത്ത് മെമ്പർമാരായ ഏലിയാമ്മ സെബാസ്റ്റ്യൻ, ബിന്ദു ജോർജ്, റോസമ്മ തോമസ്, ചിന്നാ അശോകൻ, കോടഞ്ചേരി പോലീസ് സ്റ്റേഷൻ ഇൻസ്പെക്ടർ കെ.ഒ. പ്രദീപ്, സെക്രട്ടറി കെ. സീനത്ത്, നെല്ലിപ്പൊയിൽ വില്ലേജ് ഓഫീസർ എൻ.പി. മിനി, ജിനേഷ് കുര്യൻ, ബെനിറ്റോ ചാക്കോ, തുടങ്ങിയവർ പ്രസംഗിച്ചു.

മദ്യം പിടികൂടി

ചക്കിട്ടപാറ: ചക്കിട്ടപാറ ടൗണിൽ നരിനട റോഡിലെ കെട്ടിടത്തിലെ മുറിയിൽ നിന്നു പെരുവണ്ണാമൂഴി പോലീസ് മദ്യം പിടികൂടി. മദ്യം കഴിച്ചെന്നു സംശയിക്കുന്ന പരിസരത്തുണ്ടായിരുന്ന ചിലരുടെ പേരിൽ കേസ് എടുക്കുമെന്ന് പരിശോധനക്ക് നേതൃത്വം നൽകിയ സബ് ഇൻസ്പെക്ടർ പി.എം. അമ്മദ് പറഞ്ഞു. മദ്യം പിടികൂടിയ മുറിയിൽ ധാരാളം ഒഴിഞ്ഞ മദ്യക്കുപ്പികൾ കണ്ടെത്തിയിട്ടുണ്ട്.രഹസ്യവിവരത്തിന്‍റെ അടിസ്ഥാനത്തിലാണ് പോലീസ് മിന്നൽ പരിശോധനക്കെത്തിയത്. ഇതിനിടെ ചിലർ പോലീസ് നടപടിക്കെതിരേ വാക്കേറ്റം നടത്തുകയുമുണ്ടായി.

കുളമ്പുരോഗ പ്രതിരോധ കുത്തിവെപ്പ്

മുക്കം: സംസ്ഥാന സർക്കാർ, മൃഗസംരക്ഷണ വകുപ്പ് വഴി നടപ്പാക്കുന്ന ദേശീയ ജന്തുരോഗ നിയന്ത്രണ പദ്ധതിയുടെ ഭാഗമായി കുളമ്പുരോഗ പ്രതിരോധ കുത്തിവെപ്പ് ആറാം ഘട്ടത്തിന് കൊടിയത്തൂർ പഞ്ചായത്തിൽ തുടക്കമായി. പഞ്ചായത്ത്തല ഉദ്ഘാടനം പ്രസിഡന്‍റ് ദിവ്യ ഷിബു നിർവഹിച്ചു. വികസന സ്റ്റാൻഡിംഗ് കമ്മിറ്റി ചെയർപേഴ്സൻ ആയിഷ ചേലപ്പുറം, തോട്ടുമുക്കം വെറ്ററിനറി സർജൻ ഡോ. കെ. ഇന്ദു, മുണ്ടോട്ടുകുളങ്ങര വെറ്ററിനറി സർജൻ ഡോ. കെ. സുഭാഷ് രാജ്, ലൈവ്സ്റ്റോക് ഇൻസ്‌പെക്ടർമാരായ കെ.എസ്. സുനിമോൾ, വി.എ. ബാബുമോൻ തുടങ്ങിയവർ ചടങ്ങിൽ പങ്കെടുത്തു.

ആരോഗ്യ സേനാംഗങ്ങൾക്ക് പരിശീലനം

കൂരാച്ചുണ്ട്: മഴക്കാല രോഗ പ്രതിരോധ പ്രവർത്തനങ്ങളുടെ ഭാഗമായി കൂരാച്ചുണ്ട് പഞ്ചായത്തിലെ ആരോഗ്യ സേനാംഗങ്ങൾക്കായി പരിശീലനം നൽകി. പഞ്ചായത്ത് പ്രസിഡന്‍റ് ഒ.കെ. അമ്മദ് ഉദ്ഘാടനം ചെയ്തു. വൈസ് പ്രസിഡന്‍റ് വിൻസി തോമസ് അധ്യക്ഷത വഹിച്ചു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ സിമിലി ബിജു, പഞ്ചായത്തംഗം ആൻസമ്മ ജോസഫ്, സിഡിഎസ് ചെയർപേഴ്സൺ കാർത്തിക വിജയൻ, പഞ്ചായത്ത് സെക്രട്ടറി ഇ. ഷാനവാസ്‌ എന്നിവർ പ്രസംഗിച്ചു. ഹെൽത്ത് ഇൻസ്‌പെക്ടർ എ.സി. അരവിന്ദൻ ആരോഗ്യ ബോധവത്കരണ ക്ലാസ് നയിച്ചു.

സിപിഎം ഭരിക്കുന്ന തദ്ദേശ സ്ഥാപനങ്ങള്‍ അഴിമതിയുടെ കേന്ദ്രങ്ങള്‍: എന്‍. സുബ്രഹ്മണ്യന്‍

പേരാമ്പ്ര: സിപിഎം ഭരിക്കുന്ന തദ്ദേശ സ്ഥാപനങ്ങള്‍ അഴിമതിയുടെ കേന്ദ്രങ്ങളായി മാറിയെന്ന് കെപിസിസി രാഷ്ട്രീയ കാര്യ സമിതി അംഗം എന്‍. സുബ്രഹ്മണ്യന്‍. സിപിഎമ്മിന്‍റെ പ്രാദേശിക നേതാക്കള്‍ പണമുണ്ടാക്കാന്‍ തദ്ദേശ സ്ഥാപനങ്ങളെ ഉപയോഗിക്കുകയാണെന്നും അദ്ദേഹം പറഞ്ഞു. പേരാമ്പ്ര പഞ്ചായത്തിലെ ഭരണ സ്തംഭനത്തിനും ധൂര്‍ത്തിനുമെതിരേ പഞ്ചായത്ത് യുഡിഎഫ് കമ്മിറ്റി സംഘടിപ്പിച്ച വാഹന പ്രചാരണ ജാഥ പേരാമ്പ്ര ഹൈസ്‌കൂളിന് സമീപം ഉദ്ഘാടനം ചെയ്യുകയായിരുന്നു അദ്ദേഹം. ഫണ്ട് വെട്ടിക്കുറച്ച് തദ്ദേശ സ്ഥാപനങ്ങളെ സംസ്ഥാന സര്‍ക്കാര്‍ ഞെക്കിക്കൊല്ലുകയാണ്. ധൂര്‍ത്തും അഴിമതിയും മറച്ചുവയ്ക്കാന്‍ പേരാമ്പ്ര പഞ്ചായത്ത് ഭരണ നേതൃത്വം ഗിമ്മിക്ക് കാണിക്കുകയാണെന്നും ഇത് ജനം തിരിച്ചറിയുമെന്നും അദ്ദേഹം പറഞ്ഞു. കക്കിനകണ്ടി മൊയ്തു അധ്യക്ഷത വഹിച്ചു. ജാഥാ ക്യാപ്റ്റന്‍ കെ.പി. റസാഖ്, പൈലറ്റ് കെ.സി. രവീന്ദ്രന്‍, സത്യന്‍ കടിയങ്ങാട്, സി.പി.എ അസീസ്, രാജന്‍ മരുതേരി, പി.കെ രാഗേഷ്, പി.എസ് സുനില്‍കുമാര്‍, വി.ടി സൂരജ്, അര്‍ജുന്‍ കറ്റയാട്ട്, പുതുക്കുടി അബ്ദുറഹിമാൻ എന്നിവർ പ്രസംഗിച്ചു.

തിരുവമ്പാടി ഹൈസ്കൂൾ മൈതാനം; പ്രശ്ന പരിഹാരത്തിന് സർവകക്ഷി യോഗത്തിൽ തീരുമാനം

തിരുവമ്പാടി: തിരുവമ്പാടി ഹൈസ്കുൾ മൈതാനവുമായി ബന്ധപ്പെട്ട് കഴിഞ്ഞ ദിവസമുണ്ടായ പ്രശ്നങ്ങൾ രമ്യമായി പരിഹരിക്കാൻ സർവകക്ഷി യോഗത്തിൽ തീരുമാനം. ലിന്‍റോ ജോസഫ് എംഎൽഎയുടെ അധ്യക്ഷതയിൽ തിരുവമ്പാടി പഞ്ചായത്ത് ഓഡിറ്റോറിയത്തിൽ ചേർന്ന സർവകക്ഷി യോഗത്തിലാണ് തീരുമാനം. ഹൈസ്കൂൾ മൈതാനിയിൽ ഫുട്ബോൾ കളിക്കാനെത്തിയവർ സ്ഥാപിച്ച താൽക്കാലിക ഗോൾ പോസ്റ്റ് കഴിഞ്ഞ ദിവസം എടുത്ത് മാറ്റിയിരുന്നു. ഇതിനെ തുടർന്നുണ്ടായ പ്രശ്‌നങ്ങൾ ഒഴിവാക്കാനായിരുന്നു സർവകക്ഷി യോഗം വിളിച്ചത്. മൈതാനത്ത് 15നകം ഗോൾ പോസ്റ്റ് സ്ഥാപിക്കും. രാത്രി 7.30വരെ മൈതാനം പൊതുജനങ്ങൾക്ക് ഉപയോഗിക്കാം. ഇതുസംബന്ധിച്ച് തിരുവമ്പാടി സേക്രഡ് ഹാർട്ട് ഹയർ സെക്കൻഡറി സ്കൂൾ മാനേജ്‌മെന്‍റ് പ്രതിനിധികൾ സർവകക്ഷി യോഗത്തിൽ ഉറപ്പ് നൽകി. അഞ്ച് വർഷമായി അടച്ചിട്ടിരുന്ന മൈതാനം തുറക്കാൻ ഏഴു മാസം മുമ്പാണ് വിദ്യാഭ്യാസ ഉപഡയറക്ടർ ഉത്തരവിട്ടത്. തുടർന്ന്, മാനേജ്‌മെന്‍റ് ഹൈസ്കൂൾ മൈതാനം തുറന്ന് കൊടുക്കുകയായിരുന്നു. ഫുട്ബോൾ പരിശീലനം ഉൾപ്പെടെ മൈതാനം വീണ്ടും സജീവമാകവെയാണ് കഴിഞ്ഞ ദിവസം വീണ്ടും പ്രശ്നങ്ങളുണ്ടായത്. സർവകക്ഷി യോഗത്തിൽ പഞ്ചായത്ത് പ്രസിഡന്‍റ് ബിന്ദു ജോൺസൺ, വൈസ് പ്രസിഡന്‍റ് കെ.എ. അബ്ദുറഹ്മാൻ, ബാബു പൈക്കാട്ടിൽ, സി. ഗണേഷ് ബാബു, ഷൗക്കത്തലി കൊല്ലളത്തിൽ, സജീവ് മഠത്തിൽ, തോമസ് വലിയപറമ്പൻ, തിരുവമ്പാടി സബ് ഇൻസ്പെക്ടർ ഇ.കെ. രമ്യ, റോബർട്ട് നെല്ലിക്കതെരുവിൽ, ഗണേശ്ബാബു തുങ്ങിയവർ ചടങ്ങിൽ പങ്കെടുത്തു.

കേരള ടീമിന്‍റെ ജേഴ്സി പ്രകാശനം ചെയ്തു

താമരശേരി: സോഫ്റ്റ്ബേസ്ബോൾ ഫെഡറേഷൻ കപ്പ് നാഷണൽ കിരീടത്തിനായി മഹാരാഷ്ട്രയിലേക്ക് പുറപ്പെടുന്ന കേരള ടീമിന്‍റെ ജേഴ്സി സോഫ്റ്റ്ബേസ്ബോൾ അസോസിയേഷൻ സംസ്ഥാന ജനറൽ സെക്രട്ടറി പി.എം. എഡ്വേർഡ് പ്രകാശനം ചെയ്തു. ചടങ്ങിൽ സോഫ്റ്റ്ബേസ്ബോൾ അസോസിയേഷൻ സംസ്ഥാന ട്രഷറർ ഷിജോ സ്കറിയ, ജില്ലാ സെക്രട്ടറി വിപിൻ സോജൻ, ഏഷ്യൻ ഗെയിംസ് സ്വർണ ജേതാവ് എസ്. ശ്രേയ, കോച്ച്മാരായ കെ. അക്ഷയ്, വിപിൽ വി. ഗോപാൽ എന്നിവർ പ്രസംഗിച്ചു. നിലവിൽ കേരള പുരുഷ വനിതാ ടീമുകൾ ചാമ്പ്യൻമാരാണ്.

കുറുക്കൻകുന്നിൽ കുടിവെള്ളമില്ല: മനുഷ്യാവകാശ കമ്മീഷന്‍ കേസെടുത്തു

കോഴിക്കോട്: തലക്കുളത്തൂർ പഞ്ചായത്തിലെ കുറുക്കൻ കുന്നിൽ താമസിക്കുന്ന 18 കുടുംബങ്ങൾക്ക് കുടിവെള്ളം കിട്ടുന്നില്ലെന്ന പരാതിയിൽ മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് കേസെടുത്ത് പഞ്ചായത്ത് സെക്രട്ടറിക്ക് നോട്ടീസയച്ചു. 15 ദിവസത്തിനകം റിപ്പോർട്ട് സമർപ്പിക്കണം. ജൂൺ 25 ന് കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് നടപടി. 10 വർഷങ്ങൾക്ക് മുമ്പ് കിണർ ഇടിഞ്ഞത് കാരണമാണ് കുടിവെള്ളം ഇല്ലാതായത്. പൈപ്പുണ്ടെങ്കിലും വെള്ളം കിട്ടാറില്ലെന്നും നാട്ടുകാർ പറയുന്നു.

അമരാട് മലയിലെ അനധികൃത നിർമാണം നിർത്തിവയ്ക്കണമെന്ന്

താമരശേരി: അമരാട് മലയിൽ സ്വകാര്യ ഗ്രൂപ്പിന്‍റെ ഉടമസ്ഥതയിലുള്ള സ്ഥലത്തെ നിർമാണങ്ങളെ സംബന്ധിച്ച് ആശങ്ക ഉയർന്ന സാഹചര്യത്തിൽ സിപിഎം നേതാക്കൾ പ്രദേശം സന്ദർശിച്ചു. പ്രാദേശത്ത് കൂടെ ഒഴുകുന്ന തോടിന്‍റെ സ്വാഭാവിക നീരൊഴുക്ക് തടസപ്പെടുത്തി ഭീമമായ തോതിൽ വെള്ളം കെട്ടിനിർത്തി താഴ്‌വാരത്ത് താമസിക്കുന്ന ആളുകൾക്ക് ഭീഷണിയാവുന്ന തരത്തിൽ നിർമിച്ച തടയണയും അശാസ്ത്രീയമായ രൂപത്തിൽ തോടിന് കുറുകെ നിർമിച്ച പാലവും അടിയന്തരമായി പൊളിച്ചുനീക്കണമെന്ന് സിപിഎം കട്ടിപ്പാറ ലോക്കൽ കമ്മിറ്റി കട്ടിപ്പാറ പഞ്ചായത്ത്‌ സെക്രട്ടറിയോട് ആവശ്യപ്പെട്ടു. ഇക്കോ ടൂറിസം, ഫാം ടൂറിസം ഉൾപ്പെടെയുള്ള നൂതന വിനോദ സഞ്ചാര സാധ്യതകൾ പരമാവധി പ്രയോജനപ്പെടുത്തിക്കൊണ്ട് ജനങ്ങളുടെ ജീവന് ഭീഷണിയാവാത്ത തരത്തിൽ ടൂറിസ്റ്റ് സംരംഭങ്ങൾ ഉയർന്ന് വരണമെന്നും സിപിഎം ആവശ്യപ്പെട്ടു. നിധീഷ് കല്ലുള്ളതോട്, സി.പി. നിസാർ, ലത്തീഫ്, അഖിൽ മലയിൽ, സി.എം. അബ്ദുൽ അസീസ്, സി.കെ. മുജീബ് എന്നിവർ സ്ഥലം സന്ദർശിച്ചു.

ചെമ്പനോട റോഡിൽ കുടിവെള്ള പൈപ്പ് പൊട്ടി വെള്ളം പാഴാകുന്നു

പെരുവണ്ണാമുഴി: ചെമ്പനോട റൂട്ടിൽ മൂത്താട്ട് പുഴ പാലത്തിന് സമീപം റോഡിന്‍റെ മധ്യഭാഗത്തായി വാട്ടർ അഥോററ്റിയുടെ പൈപ്പ് പൊട്ടി വെള്ളം പാഴാകുന്നു. റോഡിൽ വെള്ളം തളം കെട്ടി നിൽക്കുന്നത് വാഹന യാത്രക്കാർക്ക്‌ വളരെയധികം ബുദ്ധിമുട്ട് സൃഷ്ടിക്കുന്നുണ്ട്. അധികൃതരോട് പ്രശ്നം പല തവണ അവതരിപ്പിച്ചെങ്കിലും യാതൊരു നടപടികളും സ്വീകരിക്കുന്നില്ലെന്നാണ് നാട്ടുകാരുടെ പരാതി. പേരാമ്പ്ര വാട്ടർ അഥോറിറ്റിയുടെ പരിധിയിൽ പെടുന്ന ഭാഗമാണിത്. പ്രശ്നം ഉടൻ പരിഹരിക്കണമെന്ന് സാമൂഹ്യ പ്രവർത്തകൻ ഷാരോൺ പൂഴിത്തോട് ആവശ്യപ്പെട്ടു.

കായിക വകുപ്പിന്‍റെ ലഹരി വിരുദ്ധ സന്ദേശ യാത്രയ്ക്ക് സമാപനം

കോഴിക്കോട്: കായിക വകുപ്പ് സംഘടിപ്പിച്ച ലഹരി വിരുദ്ധ സന്ദേശയാത്ര കിക്ക് ഡ്രഗ്സ്- സേ യെസ് ടു സ്പോർട്സിനെ കോഴിക്കോട്ടുകാർ നെഞ്ചേറ്റി. കായിക മന്ത്രി വി. അബ്ദുറഹ്മാൻ നയിക്കുന്ന ലഹരിവിരുദ്ധ സന്ദേശ യാത്ര കാസർക്കോട്, കണ്ണൂർ, വയനാട് ജില്ലകൾ പിന്നിട്ടാണ് നാലാം ദിനമാണ് കോഴിക്കോടെത്തിയത്. മലബാർ ക്രിസ്ത്യൻ കോളജ് മൈതാനത്ത് നിന്നാരംഭിച്ച വാക്കത്തോൺ വ്യത്യസ്തമായ ഫ്ളോട്ടുകളാൽ വർണ്ണാഭമായി. കരാട്ടെയും കളരിയും സ്കേറ്റിംഗും സൈക്ലിംഗുമൊക്കെയായി കുട്ടികളും മുതിർന്നവരും മാനാഞ്ചിറ മൈതാനിയിലെ ബാസ്ക്കറ്റ് ബോൾ കോർണറിലെത്തി. സൂംബ നൃത്തത്തോടെ സമാപന സമ്മേളനത്തിന് തുടക്കമായി. മാതാ പേരാമ്പ്രയുടെ സംഗീത ശിൽപ്പമായ ജ്യോതിർഗമയയെ നിറഞ്ഞ കയ്യടികളോടെയാണ് ജനങ്ങൾ സ്വീകരിച്ചത്. മാനാഞ്ചിറ മൈതാനത്ത് നടന്ന സമാപന സമ്മേളനം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. കളിയിടങ്ങൾ കുറയുന്നതാണ് പുതിയ തലമുറ നേരിടുന്ന പ്രതിസന്ധിയെന്ന് മന്ത്രി പറഞ്ഞു. കളിക്കളങ്ങൾ സജീവമാക്കി അവരെ കൂടെ കൂട്ടണം. അല്ലാതെ കുറ്റം പറയുന്നതിൽ കാര്യമില്ലെന്നും മന്ത്രി പറഞ്ഞു. ലഹരി വിരുദ്ധ സന്ദേശയാത്ര ജനങ്ങൾ ഏറ്റെടുത്തു കഴിഞ്ഞെന്ന് കായിക മന്ത്രി വി. അബ്ദുറഹ്മാൻ പറഞ്ഞു. കോഴിക്കോട് മേയർ ബീന ഫിലിപ്പ് അധ്യക്ഷത വഹിച്ചു. വനംവകുപ്പ് മന്ത്രി എ.കെ ശശീന്ദ്രൻ മുഖ്യാതിഥിയായിരുന്നു.

കട്ടിപ്പാറ പൗരാവലി കർഷകനെ ആദരിച്ചു

താമരശേരി: കട്ടിപ്പാറ സംയുക്ത കർഷക കൂട്ടായ്മയുടെ നേതൃത്വത്തിൽ കട്ടിപ്പാറ പൗരാവലി, നീണ്ട 25 വർഷക്കാലം കട്ടിപ്പാറ റബർ ഉത്പാദക സംഘം പ്രസിഡന്‍റായിരുന്ന ഏറത്ത് സെബാസ്റ്റ്യനെ ഉപഹാരം നൽകി ആദരിച്ചു. കട്ടിപ്പാറ പഞ്ചായത്ത് പ്രസിഡന്‍റ് പ്രേംജി ജയിംസ് യോഗം ഉദ്ഘാടനം ചെയ്തു. സംയുക്ത കർഷക കൂട്ടായ്മ ചെയർമാൻ കെ.വി. സെബാസ്റ്റ്യൻ അധ്യക്ഷത വഹിച്ചു. കൊടുവള്ളി ബ്ലോക്ക് പഞ്ചായത്ത് മെമ്പർ നിധീഷ് കല്ലുള്ളതോട് മുഖ്യപ്രഭാഷണം നടത്തി. ഷാൻ കട്ടിപ്പാറ, ബാബു കുരിശിങ്കൽ, രാജു തുരുത്തിപള്ളി, സി.കെ.സി അസൈനാർ, സലിം പുല്ലടി, ബാബു, വി.പി. ദേവസ്യ മഞ്ഞാനയിൽ, പി.എ. ലത്തീഫ്, അസീസ് വെട്ടി ഒഴിഞ്ഞതോട്ടം, എ.കെ. ലോഹിതാക്ഷൻ, എ.കെ. അശോകൻ എന്നിവർ പ്രസംഗിച്ചു.

എം. ഷിബുവിന് യാത്രയയപ്പ് നല്‍കി

കോഴിക്കോട്: ഗസറ്റഡ് തസ്തികയിലേക്ക് പ്രമോഷന്‍ ലഭിച്ച എന്‍ജിഒ അസോസിയേഷന്‍ സംസ്ഥാന സെക്രട്ടറിയേറ്റ് അംഗവും സെറ്റോ ജില്ലാ ചെയര്‍മാനുമായ എം.ഷിബുവിന് എന്‍ജിഒ അസോസിയേഷന്‍ ജില്ലാ കമ്മിറ്റി യാത്രയപ്പു നല്‍കി.കെപിസിസി ജനറല്‍ സെക്രട്ടറി അഡ്വ. പി.എം. നിയാസ് ഉദ്ഘാടനം ചെയ്തു. അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശ്ശേരി അധ്യക്ഷനായി. സംസ്ഥാന സെക്രട്ടറിയേറ്റ് അംഗം സിജു കെ. നായര്‍, സെറ്റോ ജില്ലാ കണ്‍വീനര്‍ പി.കെ. രാധാകൃഷ്ണന്‍, എന്‍.ടി.ജിതേഷ്, ടി.അജിത് കുമാര്‍, മധു രാമനാട്ടുകര, കെ.പി. സുജിത , കെ.വി. രവീന്ദ്രന്‍, വി.വിപീഷ് , പി. പ്രദീപ് കുമാര്‍, കെ.ഫവാസ് , എലിസബത്ത് ടി. ജേക്കബ് , രഞ്ജിത്ത് ചേമ്പാല എന്നിവര്‍ സംസാരിച്ചു.എം. ഷിബു മറുപടി പ്രസംഗം നടത്തി.

ബേപ്പൂര്‍ ഗോഡൗണില്‍നിന്ന് റേഷന്‍ സാധനങ്ങള്‍ എടുക്കില്ലെന്ന്

കോഴിക്കോട് : സിറ്റി റേഷനിങ് ഓഫീസ് സൗത്ത് ബേപ്പൂര്‍ എന്‍എഫ്എസ്എ ഗോഡൗണിലെ തൊഴില്‍ തര്‍ക്കം ശാശ്വതമായി തീരാത്ത സാഹചര്യത്തില്‍ ബേപ്പൂര്‍ ഗോഡൗണില്‍ നിന്നു റേഷന്‍ എടുക്കുന്നത് നിര്‍ത്തിവെയ്ക്കാന്‍ ആള്‍കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ തീരുമാനിച്ചു. അസോസിയേഷന്‍ സൗത്ത് ഏരിയ കമ്മിറ്റിയുടേയാണ് തീരുമാനം. സംസ്ഥാന ജനറല്‍ സെക്രട്ടറി ടി. മുഹമ്മദലി, ഇ.ശ്രീജന്‍, കെ.പി.അഷ്‌റഫ്, ടി.ജയപ്രകാശന്‍,കെ.അജയകുമാര്‍,ടി.കെ. അരുണ്‍കുമാര്‍, ഫഹദ്,വി.വി.നാരായണന്‍ തുടങ്ങിയവര്‍ പ്രസംഗിച്ചു.

സ്ത്രീകളുടെ ഡിജിറ്റല്‍ ശാക്തീകരണം; വഴിതുറന്ന് കുടുംബശ്രീ സെമിനാര്‍

കോഴിക്കോട്: സ്ത്രീകളുടെ ഡിജിറ്റല്‍ ശാക്തീകരണത്തിലേക്ക് വഴിതുറന്നും സൈബറിടങ്ങളിലെ കുറ്റകൃത്യങ്ങളെ കുറിച്ച് മുന്നറിയിപ്പുമായി കുടുംബശ്രീ സെമിനാര്‍. "എന്‍റെ കേരളം' പ്രദര്‍ശന-വിപണന മേളയുടെ ഭാഗമായാണ് "കുടുംബശ്രീയും സ്ത്രീകളുടെ ഡിജിറ്റല്‍ ശാക്തീകരണവും' വിഷയത്തില്‍ സെമിനാര്‍ സംഘടിപ്പിച്ചത്. കുടുംബശ്രീ സംരംഭങ്ങളുടെ ഉല്‍പന്നങ്ങള്‍ പുത്തന്‍ സാങ്കേതിക വിദ്യയുടെ സാധ്യതകള്‍ കൂടി പ്രയോജനപ്പെടുത്തി ലോകത്തിന് മുമ്പില്‍ അവതരിപ്പിക്കാന്‍ സാധിക്കണമെന്ന് ഉദ്ഘാടനം നിര്‍വഹിച്ച ലിന്‍റോ ജോസഫ് എംഎല്‍എ അഭിപ്രായപ്പെട്ടു. കാലാനുസൃതമായ മാറ്റം കുടുംബശ്രീയുടെ പല മേഖലകളിലും ഉണ്ടായിട്ടുണ്ടെന്നും ഏറെ കരുതലോടെയാണ് കുടുംബശ്രീയെ സര്‍ക്കാര്‍ ചേര്‍ത്തുവെക്കുന്നതെന്നും അദ്ദേഹം കൂട്ടിച്ചേര്‍ത്തു. ഡിജി കേരളം, ഡിജിറ്റല്‍ സാക്ഷരത, ഡിജിറ്റല്‍ രംഗത്തെ തൊഴില്‍സാധ്യത, നിര്‍മിതബുദ്ധി, ഡിജിറ്റല്‍ പ്ലാറ്റ്‌ഫോമുകളിലൂടെയുള്ള ഉല്‍പന്നങ്ങളുടെയും സേവനങ്ങളുടെയും വിപണനം തുടങ്ങിയ വിഷയങ്ങള്‍ സെമിനാറില്‍ ചര്‍ച്ച ചെയ്തു. കാലിക്കട്ട് സര്‍വകലാശാല സിന്‍ഡിക്കേറ്റ് അംഗം അഡ്വ. എല്‍.ജി. ലിജീഷ് അധ്യക്ഷത വഹിച്ചു. എല്‍എസ്ജിഡി അസി. ഡയറക്ടര്‍ സജിന സത്താര്‍ മോഡറേറ്ററായി. കുടുംബശ്രീ ഗവേണിംഗ് എക്‌സിക്യൂട്ടീവ് അംഗം കെ.കെ. ലതിക, ജില്ലാ മിഷന്‍ കോഓഡിനേറ്റര്‍ പി.സി. കവിത, ടെക്‌നോളജി കോളമിസ്റ്റ് സെയ്ദ് ഷിയാസ് മിര്‍സ, സൈബര്‍ ലീഗല്‍ കണ്‍സല്‍ട്ടന്‍റ് അഡ്വ. ഇര്‍ഫാന്‍ ഇബ്രാഹിം സേട്ട്, ഓക്‌സിലറി സംസ്ഥാന റിസോഴ്‌സ് പേഴ്‌സണ്‍ എസ്. ജ്യോതി തുടങ്ങിയവര്‍ പങ്കെടുത്തു. അഴകിന്‍റെയും കരുത്തിന്‍റയും പ്രദർശനമായി ബോഡി ബിൽഡിംഗ് കോഴിക്കോട്: ശരീര സൗന്ദര്യത്തിന്‍റെ അഴകും കരുത്തും കാണിച്ച് ബോഡി ബിൽഡിംഗ് പ്രദർശനം. സംസ്ഥാന സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി ബീച്ചിൽ നടക്കുന്ന എന്‍റെ കേരളം പ്രദർശന വിപണന മേളയിലെ കായിക പ്രദർശനങ്ങളുടെ ഭാഗമായാണ് ബോഡി ബിൽഡിംഗ് പ്രദർശനം അരങ്ങേറിയത്. കഴിഞ്ഞ വർഷത്തെ മിസ്റ്റർ കേരള സാബിത്ത്, ജൂനിയർ വിഭാഗത്തിൽ സംസ്ഥാന ചാമ്പ്യനായ സിമിൽ രാജൻ, സ്പോർട്സ് ഫിസിക്കിൽ മിസ്റ്റർ സൗത്ത് ഏഷ്യ ചാമ്പ്യൻഷിപ്പ് കരസ്ഥമാക്കിയ സചിൻ, രാജ്യാന്തര താരം കവിത എന്നിവർ പ്രദർശനത്തിനെത്തി. കായികമാണ് ലഹരി എന്ന സന്ദേശവുമായി സംഘടിപ്പിച്ച ബോഡി ബിൽഡിംഗ് പ്രദർശനം ജില്ലാ സ്‌പോര്‍ട്‌സ് കൗണ്‍സില്‍ വൈസ് പ്രസിഡന്‍റ് ഡോ. റോയ് വി. ജോൺ ഉദ്ഘാടനം ചെയ്തു. ജില്ലാ അസിസ്റ്റന്‍റ് ഇൻഫർമേഷൻ ഓഫീസർ എ.പി നൗഷാദ്, ജില്ലാ ബോഡി ബിൽഡിംഗ് അസോസിയേഷന്‍ പ്രസിഡന്‍റ് ഗിരീഷ്, സെക്രട്ടറി ബാബു ഹനാൻ, വി.കെ. സാബിറ, ഗിരീഷ് എന്നിവർ പ്രസംഗിച്ചു. photo : കുടുംബശ്രീ ദേശീയ സരസ് മേള ടൂറിസം പൊതുമരാമത്ത് വകുപ്പ് മന്ത്രി പി. എ. മുഹമ്മദ്‌ റിയാസ് സന്ദർശിക്കുന്നു.

അപകടത്തിൽ സ്‌കൂട്ടര്‍ യാത്രക്കാരന്‍ മരിച്ചു

പന്തീരാങ്കാവ്: പെരുമണ്ണ - പുത്തൂര്‍മഠം റോഡില്‍ പുത്തൂര്‍ മഠം ജംഗ്ഷന് സമീപം സ്‌കൂട്ടര്‍ പിക്കപ്പ് വാനിലിടിച്ച് സ്‌കൂട്ടര്‍ യാത്രക്കാരന്‍ മരിച്ചു. കടലുണ്ടി വലിയോട്ടില്‍ഹൗസില്‍ അനീഷ് (40) ആണ് മരിച്ചത്. ഇന്നലെ രാവിലെ 6.30-നായിരുന്നു അപകടം. ഗുരുതരപരിക്കേറ്റ അനീഷിനെ ഉടന്‍ മെഡിക്കല്‍ കോളജില്‍ എത്തിക്കാന്‍ ശ്രമിച്ചെങ്കിലും അപ്പോഴേക്കും മരിച്ചു. പന്തിരാങ്കാവ് പോലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.

ഇല്ലിപ്പിലായി - മണിച്ചേരി- വയലട റോഡിന്‍റെ പുതിയ അലൈൻമെന്‍റ് തയാറാക്കുന്നു

കൂരാച്ചുണ്ട്: പഞ്ചായത്തിലെ ഇല്ലിപ്പിലായി - മണിച്ചേരി- വയലട പിഡബ്ല്യൂഡി റോഡ് നിർമാണത്തിന്‍റെ ഭാഗമായി റോഡിന്‍റെ പുതിയ അലൈൻമെന്‍റ് തയാറാക്കുന്നതിനായി പിഡബ്ല്യൂഡി ഉദ്യോഗസ്ഥരും റോഡ് ആക്ഷൻ കമ്മിറ്റിയംഗങ്ങളും ഇന്നലെ മേഖല സന്ദർശിച്ചു. 2013 ൽ പൊതുമരാമത്ത് വകുപ്പ് റോഡ് ഏറ്റെടുക്കുകയും 2016-ൽ കിഫ്ബിയിൽ ഉൾപ്പെടുത്തി റോഡ് നിർമാണം നടത്താൻ തീരുമാനിക്കുകയും ചെയ്തിരുന്നു. എന്നാൽ കിഫ്ബിയുടെ സാങ്കേതിക വിദഗ്ധർ അടങ്ങുന്ന സംഘം റോഡ് സന്ദർശിക്കുകയും നിലവിലുള്ള റോഡിന്‍റെ അലൈൻമെന്‍റ് പ്രകാരം നിർമാണം സാധ്യമല്ലെന്ന് അറിയിച്ചതിനെ തുടർന്ന് കിഫ്ബി ധനസഹായം ലഭിക്കാതെയായിരുന്നു. കഴിഞ്ഞ കാലങ്ങളിലെ പ്രളയത്തിലും മറ്റും റോഡ് പാടെ തകർന്ന നിലയിലാണ്. ഒട്ടനവധി കുടുംബങ്ങളും കൂടാതെ മണിച്ചേരി ഉന്നതിയിലെ പത്ത് കുടുംബങ്ങളും താമസിക്കുന്ന പ്രദേശമാണിത്. കൊയിലാണ്ടി റോഡ്സ് സബ് ഡിവിഷൻ അസിസ്റ്റന്‍റ് എക്സിക്യൂട്ടീവ് എൻജിനീയർ കെ. മിഥുൻ, ബാലുശേരി പിഡബ്ല്യൂഡി അസിസ്റ്റന്‍റ് എൻജിനീയർ കെ. ഷമേജ്,ഓവർസീയർ ടി.ടി ആൻസി, റോഡ് ആക്ഷൻ കമ്മിറ്റിയംഗങ്ങളായ തോമസ് വെട്ടിക്കുഴി,എൻ.കെ. കുഞ്ഞമ്മദ്, ജോയി വെട്ടിക്കുഴി, എ.സി. ഗോപി, ഇ.എം. അവറാച്ചൻ, മാത്യൂ പാറപ്പുറംഎന്നിവരും സംഘത്തോടൊപ്പം ഉണ്ടായിരുന്നു. റോഡിന്‍റെ സർവേ നടത്തി ഒരാഴ്ചക്കകം എസ്റ്റിമേറ്റ് തയാറാക്കി ചീഫ് എൻജിനീയർക്ക് സമർപ്പിക്കുമെന്നും അധികൃതർ അറിയിച്ചു. ഇല്ലിപ്പാലായി മുതൽ മണിച്ചേരി വരെയാണ് ഇന്നലെ ഉദ്യേഗസ്ഥ സംഘം സന്ദർശിച്ചത്.

അസീം വെളിമണ്ണയ്ക്ക് സ്വീകരണം നൽകി

കോഴിക്കോട്: പാരീസിൽ വച്ച് നടന്ന പാര സിമ്മിംഗ് വേൾഡ് സീരീസ് ചാമ്പ്യൻഷിപ്പിൽ എസ്എസ് ടു കാറ്റഗറിയിൽ ക്വാളിഫൈ ചെയ്തു മികച്ച പ്രകടനം കാഴ്ചവച്ച് തിരിച്ചെത്തിയ ആസീം വെളിമണ്ണയ്ക്ക് കോഴിക്കോട് എയർപോർട്ടിൽ ഫൂട്ട് വോളി അസോസിയേഷന്‍റെ നേതൃത്വത്തിൽ സ്വീകരണം നൽകി. ദേശീയ സെക്രട്ടറി എ.കെ. മുഹമ്മദ് അഷ്റഫ് ബൊക്കെ കൊടുത്ത് സ്വീകരിച്ചു. ചടങ്ങിൽ ജില്ലാ ഫൂട്ട് വോളി അസോസിയേഷൻ സെക്രട്ടറി കെ.വി. റാഷിദ് അധ്യക്ഷത വഹിച്ചു.

തിരുവമ്പാടിയിൽ അധ്യാപക പരിശീലന ശില്പശാലയ്ക്ക് തുടക്കമായി

തിരുവമ്പാടി: ലയൺസ് ക്ലബ് ഓഫ് തിരുവമ്പാടിയുടെ നേതൃത്വത്തിൽ തിരുവമ്പാടി അൽഫോൻസാ കോളജിൽ സ്കൂൾ അധ്യാപകർക്കായി ലയൺസ് ഇന്‍റർനാഷണലിന്‍റെയും താമരശേരി വിദ്യാഭ്യാസ ഏജൻസിയുടെയും സഹകരണത്തോടെ ദ്വിദിന പരിശീലന ശില്പശാല ആരംഭിച്ചു. പരിപാടി അൽഫോൻസാ കോളജ് പ്രിൻസിപ്പൽ ഡോ. ഷൈജു ഏലിയാസ് ഉദ്ഘാടനം ചെയ്തു. പരിശീലനത്തിൽ 45 ഓളം അധ്യാപകർ പങ്കെടുത്തു. ഇന്ന് വൈകുന്നേരം നാലിന് പരിപാടി സമാപിക്കും. താമരശേരി രൂപതയുടെ കീഴിലുള്ള സ്കൂളുകളിൽ അഞ്ച് മുതൽ ഒന്പത് വരെ ക്ലാസുകൾ പഠിക്കുന്ന വിദ്യാർഥികൾക്ക് നൈപുണ്യ വികസന ക്ലാസുകളും ലഹരിവിരുദ്ധ ബോധവത്കരണ ക്ലാസുകളും നൽകുക എന്നതാണ് പദ്ധതിയുടെ പ്രധാന ഉദ്ദേശം. ലയൺസ് ക്ലബ് പ്രസിഡന്‍റ് അഡ്വ. ജിമ്മി ജോർജ് അധ്യക്ഷനായി. ലയൺസ് ക്വസ്റ്റ് ഇന്‍റർനാഷണൽ ട്രെയിനർമാരായ കവിത ശാസ്ത്രി, പ്രഫ. വർഗീസ് വൈദ്യൻ, ക്ലബ് സെക്രട്ടറി അഡ്വ. സിബിൻ വി. ജോസ്, പി.എ. മത്തായി, ഇ.കെ. സെബാസ്റ്റ്യൻ, കെ.സി. ജോൺ, ജയേഷ് സ്രാമ്പിക്കൽ, മില്ലി മോഹനൻ, ഡോ. ആധി ലക്ഷ്മി, സിന്ദു ദിൻരാജ് എന്നിവർ പ്രസംഗിച്ചു.

കുളമ്പുരോഗ നിവാരണ പദ്ധതി: വാക്സിൻ വിതരണം ചെയ്തു

കൂരാച്ചുണ്ട്: കേരള സർക്കാർ മൃഗസംരക്ഷണ വകുപ്പ് ഏർപ്പെടുത്തിയ കുളമ്പുരോഗ നിയന്ത്രണ പദ്ധതിയുടെ ആറാം ഘട്ട വാക്സിനേഷൻ വിതരണം കൂരാച്ചുണ്ട് പഞ്ചായത്തിൽ നടത്തി. 4 മാസവും അതിനു മുകളിലും പ്രായമുള്ള എരുമ, പശുവർഗത്തിലുള്ള എല്ലാ ഉരുക്കളെയും കുളമ്പ് രോഗത്തിൽ നിന്നും സംരക്ഷിക്കുന്നതിനുള്ള പ്രതിരോധ മരുന്ന് കുത്തിവയ്ക്കുന്നതാണ് പദ്ധതി. ഉരുക്കൾക്കുള്ള ഇൻഷ്വറൻസ് പരിരക്ഷ ലഭിക്കണമെങ്കിൽ ഈ കുത്തിവെപ്പ് അനിവാര്യമാണ്. പഞ്ചായത്ത് പ്രസിഡന്‍റ് ഒ.കെ. അമ്മദ് വാക്സിനേഷൻ പദ്ധതി ഉദ്ഘാടനം നിർവഹിച്ചു. വൈസ് പ്രസിഡന്‍റ് വിൻസി തോമസ്, മെമ്പർ അരുൺ ജോസ്, വെറ്ററിനറി സർജൻ ഡോ. കാർത്തിക, എൽഐമാരായ മോഹനൻ, ശശി തുടങ്ങിയവർ പങ്കെടുത്തു.

കൈതപ്പൊയിൽ കുടിവെള്ള പദ്ധതി നാടിന് സമർപ്പിച്ചു

മുക്കം: കൊടിയത്തുർ പഞ്ചായത്തിലെ നിരവധി കുടുംബങ്ങൾക്കാശ്വാസമായി നിർമിച്ച കൈതപ്പൊയിൽ കുടിവെള്ള പദ്ധതി നാടിന് സമർപ്പിച്ചു. 2024- 25 വാർഷിക പദ്ധതിയിൽ ഉൾപ്പെടുത്തി കൊടിയത്തൂർ പഞ്ചായത്തും കുന്നമംഗലം ബ്ലോക്ക് പഞ്ചായത്തും സംയുക്തമായി 21 ലക്ഷം രൂപ ചെലവഴിച്ചാണ് പ്രവൃത്തി പൂർത്തീകരിച്ചത്. വയറിംഗ് ഉൾപ്പെടെയുള്ള പ്രവൃത്തിക്കായി പഞ്ചായത്ത് രണ്ടര ലക്ഷം രൂപയും വകയിരുത്തിയിരുന്നു. ശിവദാസൻ വടക്കം പുറത്ത്, സുഭാഷ് കിളിഞ്ഞിലിക്കാട്ട് എന്നിവർ സൗജന്യമായി വിട്ടു നൽകിയ സ്ഥലത്താണ് ഇരുപതിലധികം കുടുംബങ്ങൾക്കാശ്വാസമായ പദ്ധതി യഥാർത്ഥ്യമാക്കിയത്. മഴക്കാലത്ത് പോലും കുടിവെള്ള ക്ഷാമം അനുഭവിക്കുന്ന പ്രദേശമാണിത്. പഞ്ചായത്ത് പ്രസിഡന്‍റ് ദിവ്യ ഷിബു പദ്ധതിയുടെ ഉദ്ഘാടനം നിർവഹിച്ചു. ബ്ലോക്ക് പഞ്ചായത്തംഗം കെ.പി സൂഫിയാൻ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ മുഖ്യാതിഥിയായി. സ്റ്റാൻഡിംഗ് കമ്മിറ്റി ചെയർമാൻമാരായ ബാബു പൊലുകുന്നത്ത്, ആയിഷ ചേലപ്പുറം, മറിയംകുട്ടി ഹസൻ, പഞ്ചായത്തംഗം ഫാത്തിമ നാസർ, ഷിജിമോൻ കിളിഞ്ഞിക്കാട്ട്, സുജടോം, അബ്ദു തിരുനിലത്ത്, പോൾ ആന്‍റണി, അബൂട്ടി വളപ്പിൽ തുടങ്ങിയവർ പ്രസംഗിച്ചു. പദ്ധതിക്കായി സ്ഥലം സൗജന്യമായി വിട്ടു നൽകിയ ശിവദാസൻ വടക്കം പുറത്ത്, സുഭാഷ് കിളിഞ്ഞിലിക്കാട്ട് എന്നിവരെയും പദ്ധതി ഏറ്റെടുത്ത് നടത്തിയ കോൺട്രാക്ടർ വി.കെ അനീഷിനെയും ചടങ്ങിൽ ആദരിച്ചു.

കാരശേരിയിൽ സ്നേഹതീരം വയോജന പാർക്ക് നാടിന് സമർപ്പിച്ചു

മുക്കം: വൈകുന്നേരങ്ങളിൽ ഒരു ചായയൊക്കെ കുടിച്ച് അൽപ്പം സൊറ പറഞ്ഞിരിക്കുന്നത് മലയാളികളുടെ ഒരു ശീലമാണ്. എന്നാൽ ജാതിമത രാഷ്ട്രീയ ഭേദമന്യെ അങ്ങിനെ ഇരിക്കാനുള്ള പൊതു ഇടങ്ങൾ ഇന്ന് നാട്ടിലില്ലാത്ത അവസ്ഥയുമാണ്. ഈയൊരു സാഹചര്യത്തിലാണ് കാരശേരി പഞ്ചായത്ത് 2024- 25 വാർഷിക പദ്ധതിയിൽ ഉൾപ്പെടുത്തി കാരശേരി അങ്ങാടിയിൽസ്നേഹതീരം എന്ന പേരിൽ വയോജന പാർക്ക് നിർമിച്ചത്. കാരശേരി അങ്ങാടിയുടെ ഹൃദയഭാഗത്ത് ബസ് സ്റ്റോപ്പിനോട് ചേർന്നാണ് മുതിർന്നവർക്കും നാട്ടുകാർക്കും ഒരുമിച്ചിരിക്കാനും സല്ലപിക്കാനുമായി പാർക്ക് ഒരുക്കിയത്. പാർക്കിന്‍റെ ഉദ്ഘാടനം കാരശേരി പഞ്ചായത്ത് പ്രസിഡന്‍റ് സുനിതാ രാജൻ നിർവഹിച്ചു. വാർഡ് മെമ്പർ റുക്കിയ റഹീം അധ്യക്ഷത വഹിച്ചു. വൈസ് പ്രസിഡന്‍റ് ജംഷീദ് ഒളകര, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ സത്യൻ മുണ്ടയിൽ, വികസന സ്റ്റാൻഡിംഗ് കമ്മിറ്റി ചെയർപേഴ്സൺ ശാന്ത ദേവി മൂത്തേടത്ത്, പഞ്ചായത്ത് അംഗങ്ങളായ ആമിന എടത്തിൽ, കെ. കൃഷ്ണദാസ്, ആസൂത്രണ സമിതി ഉപാധ്യക്ഷൻ എം.ടി. സൈദ് ഫസൽ, സി. അബ്ദുറഹിമാൻ, നടുക്കണ്ടി അബൂബക്കർ തുടങ്ങി‍യവർ പ്രസംഗിച്ചു.

കോര്‍പറേഷന്‍ ഓഫീസിലെ സൈറണ്‍ പ്രവര്‍ത്തിച്ചില്ല : യുദ്ധസമാനമായ അന്തരീക്ഷം സൃഷ്ടിച്ച് മോക്ഡ്രില്‍

കോഴിക്കോട്: കേന്ദ്ര ആഭ്യന്തര മന്ത്രാലയത്തിന്‍റെ നിര്‍ദേശപ്രകാരം കോഴിക്കോട് ജില്ലയില്‍ സിവില്‍ ഡിഫന്‍സ് മോക്ക് ഡ്രില്‍ നടത്തിയത് നിരവധി സ്ഥലങ്ങളില്‍. മറ്റിടങ്ങളിലെല്ലാം മോക്ഡ്രില്‍ മുന്‍കൂട്ടി തീരുമാനിച്ചതുപോലെ പാകപ്പിഴകളില്ലാതെ നടത്താന്‍ കഴിഞ്ഞപ്പോള്‍ കോഴിക്കോട് കോര്‍പറേഷന്‍ ഓഫീസില്‍ ആദ്യത്തെ അപായ സൈറണ്‍ മുഴങ്ങാത്തത് കല്ലുകടിയായി. വൈകുന്നേരം നാലിനാണ് മോക് ഡ്രില്‍ ആരംഭിക്കേണ്ടിയിരുന്നത്. കോര്‍പറേഷന്‍ ഓഫീസില്‍ ആദ്യത്തെ അപായ സൈറണ്‍ മുഴങ്ങാത്തതിനാല്‍ ജീവനക്കാരും ഉദ്യോഗസ്ഥരും ആശയക്കുഴപ്പത്തിലായി. നാലുമണി മുതല്‍ 30 സെക്കന്‍ഡ് അലേര്‍ട്ട് സൈറണ്‍ മൂന്നു വട്ടം നീട്ടി ശബ്ദിക്കുമെന്നാണ് അറിയിച്ചിരുന്നത്. സൈറണ്‍ കേള്‍ക്കുന്ന ഇടങ്ങളിലും കേള്‍ക്കാത്ത ഇടങ്ങളിലും 4.02നും 4.29നും ഇടയില്‍ ആണ് മോക്ക്ഡ്രില്‍ നടത്തേണ്ടതെന്ന് കേന്ദ്രസര്‍ക്കാര്‍ അറിയിച്ചിരുന്നു. 4.28 മുതല്‍ സുരക്ഷിതം എന്ന സൈറണ്‍ 30 സെക്കന്‍ഡ് മുഴങ്ങുന്നതോടെയാണ് മോക്ഡ്രില്‍ അവസാനിപ്പിക്കേണ്ടത്. സൈറന്‍റെ അഭാവത്തില്‍ കോര്‍പറേഷന്‍ ഓഫീസില്‍ മോക്ഡ്രില്‍ ആരംഭിക്കാനായില്ല. ജീവനക്കാരും ഫയര്‍ ഫോഴ്സ്, പോലീസ് ഉദ്യോഗസ്ഥരും സൈറണ്‍ കേട്ടില്ല. എന്നാല്‍ സൈറണ്‍ മുഴങ്ങിയെന്നായിരുന്നു കോര്‍പറേഷന്‍ അധികൃതരുടെ വാദം. ഒടുവില്‍ നാലരക്ക് അവസാന സൈറണ്‍ മുഴങ്ങിയതോടെ ജീവനക്കാരും വിവിധ സേനാംഗങ്ങളും പിരിഞ്ഞുപോയി. മോക്ഡ്രില്‍ വീക്ഷിക്കാന്‍ ധാരാളം ആളുകള്‍ കോര്‍പറേഷന്‍ പരിസരത്ത് എത്തിയിരുന്നു. ബേപ്പൂര്‍ ജിഎച്ച്എസ്എസ്, ഏലത്തൂര്‍ പുതിയാപ്പ ജിഎഫ്എച്ച്എസ്എസ്, പയ്യോളി ജിഎച്ചഎസ്എസ്, കോഴിക്കോട് ഗവ. എന്‍ജിനീയറിംഗ് കോളജ്, പന്നിയങ്കര ജിയുപിഎസ്, കൊയിലാണ്ടി പിഡബ്ല്യൂഡി റസ്റ്റ് ഹൗസ്, തിരുവംഗൂര്‍ കമ്മ്യൂണിറ്റി ഹെല്‍ത്ത്‌സെന്‍റര്‍ എന്നിവിടങ്ങളിലും മോക്ഡ്രില്ലിന്‍റെ ഭാഗമായി അപായ സൈറണ്‍ മുഴക്കി. ജില്ലയിലെ മറ്റു പൊതു ഇടങ്ങളിലും മോക്ഡ്രില്‍ നടന്നു. ആരാധനാലയങ്ങളിലെ അനൗണ്‍്‌സ്‌മെന്‍റ് സംവിധാനങ്ങള്‍ ഉപയോഗിച്ചാണ് ഗ്രാമപ്രദേശങ്ങളില്‍ പൊതുജനങ്ങള്‍ക്ക് ജാഗ്രതാ നിര്‍ദേശം നല്‍കിയത്.ബോംബ്, മിസൈല്‍ ആക്രമണം, തീപിടുത്തം, ആക്രമണ സൂചന ലഭിച്ചാലുള്ള മുന്നൊരുക്കം തുടങ്ങിയ വിഭാഗങ്ങളായി തിരിച്ചായിരുന്നു മോക്ഡ്രില്‍. സമാനമായ സാഹചര്യങ്ങള്‍ യഥാര്‍ത്ഥത്തില്‍ ഉണ്ടായാല്‍ സ്വീകരിക്കേണ്ട നടപടികളും ഒരുക്കങ്ങളുമാണ് മോക്ഡ്രില്ലിലൂടെ ഉദ്യോഗസ്ഥര്‍ക്കും പൊതുജനങ്ങള്‍ക്കും പരിചയപ്പെടുത്തിയത്. സിവില്‍ ഡിഫന്‍സ് വളണ്ടിയര്‍മാര്‍, എന്‍സിസി കേഡറ്റുകള്‍, അഗ്‌നിരക്ഷാ, പോലീസ് സേനാംഗങ്ങള്‍, സര്‍ക്കാര്‍ ഉദ്യോഗസ്ഥര്‍ തുടങ്ങിയവര്‍ മോക്ഡ്രില്ലില്‍ പങ്കാളികളായി. മുക്കം: കേന്ദ്ര ആഭ്യന്തര മന്ത്രാലയത്തിന്‍റെ നിർദേശ പ്രകാരം കൊടിയത്തൂർ പഞ്ചായത്തിലും മോക് ഡ്രിൽ സംഘടിപ്പിച്ചു. യുദ്ധമുണ്ടാവുമ്പോൾ ഓരോരുത്തരും സുരക്ഷിത സ്ഥാനങ്ങളിലേക്ക് മാറേണ്ടത് എങ്ങിനെയെന്ന് മനസിലാക്കുന്ന രീതിയിലായിരുന്നു സിവിൽ ഡിഫൻസ് മോക്ഡ്രിൽ സംഘടിപ്പിച്ചത്. പന്നിക്കോട് എയുപി സ്കൂളിൽ നടന്ന ചടങ്ങിൽ പഞ്ചായത്ത് ക്ഷേമ കാര്യ സ്റ്റാൻഡിംഗ് കമ്മിറ്റി ചെയർമാൻ ബാബു പൊലുകുന്ന് അധ്യക്ഷനായി. പി. ഹരിദാസൻ, പി. അബ്ദു, അങ്കണവാടി ടീച്ചർ രഹ്നാസ്, ആശാ വർക്കർ രമണി, പി.ബിന്ദു, റസിയ, അനിത തുടങ്ങിയവർ പ്രസംഗിച്ചു. പേരാമ്പ്ര: പെരുവണ്ണാമൂഴിയിൽ ഇന്നലെ വൈകുന്നേരം നാലായപ്പോൾ ജനം കാത് കൂർപ്പിച്ചു, സൈറൺ മുഴങ്ങുന്നതും കാത്ത്. പക്ഷെ സൈറൺ മുഴങ്ങിയില്ല. തെരഞ്ഞെടുക്കപ്പെട്ട പ്രധാന സ്ഥലങ്ങളിൽ മോക്ഡ്രിൽ അരങ്ങേറുമെന്ന് പൊതു അറിയിപ്പുണ്ടായിരുന്നു. അതിലൊന്ന് കുറ്റ്യാടി ജലസേചന പദ്ധതിയും ടൂറിസ്റ്റു കേന്ദ്രവും ജപ്പാൻ കുടിവെള്ള പദ്ധതിയും ചെറുകിട ജല വൈദ്യുതി ഉൽപ്പാദന കേന്ദ്രവും ഉൾപ്പെടുന്ന പെരുവണ്ണാമൂഴിയായിരുന്നു. സമയം കഴിഞ്ഞിട്ടും ആരെയും കാണാനില്ലായിരുന്നു. ഒടുവിൽ പെരുവണ്ണാമൂഴി അണക്കെട്ടിനു സമീപം ആൾക്കൂട്ടം കണ്ടു. ജലസേചന പദ്ധതി ജീവനക്കാരും അണക്കെട്ട് കാണാനെത്തിയവരും ഏതാനും പോലീസ്‌ ഉദ്യോഗസ്ഥരുമാണ് അവിടെ ഉണ്ടായിരുന്നത്. അടിയന്തര സന്ദർഭത്തെ എങ്ങനെ നേരിടണമെന്ന ബോധവത്കരണം പെരുവണ്ണാമൂഴി പോലീസ്‌ സബ് ഇൻസ്‌പെക്‌ടർ എസ്. ഗൗതം ആൾക്കൂട്ടത്തിനു നൽകി. ജലസേചന വകപ്പ് അസി. എക്സി.എൻജിനീയർ പി.കെ. ബിജു, സിവിൽ പോലീസ് ഓഫീസർ ടി. സമീർ എന്നിവർ സന്നിഹിതരായിരുന്നു.

മോർ ഗീവർഗീസ് സഹദായുടെ ഓർമ്മ പെരുന്നാൾ ഇന്ന് സമാപിക്കും

കോടഞ്ചേരി: മോർ ഗീവർഗീസ് സഹദായുടെ ഓർമ്മ പെരുന്നാൾ ഇന്ന് സമാപിക്കും. ഓർമ്മ പെരുന്നാളിന് പ്രധാന കാർമ്മികത്വം വഹിക്കുന്നതിന് എത്തിച്ചേർന്ന മൈലാപ്പൂർ, ബാംഗ്ലൂർ, യുകെ ഭദ്രാസനങ്ങളുടെ മെത്രാപ്പോലീത്ത ഐസക് മോർ ഒസ്താത്തിയോസിനെ വട്ടൽ കുരിശ് പള്ളി അങ്കണത്തിൽവച്ച് സ്വീകരിച്ചു. വെളിമുണ്ട കുരിശിങ്കൽ നിന്നുള്ള പ്രദക്ഷിണം മൈക്കാവ് പള്ളിയിലെ മഞ്ഞനിക്കര ബാവായുടെ കബറിടത്തിലെ പ്രാർഥനയ്ക്ക്‌ ശേഷം വട്ടൽ കുരിശ് പള്ളിയിൽ എത്തിച്ചേർന്നു. വികാരി ഫാ. ബേസിൽ തമ്പി പടിഞ്ഞാറേക്കര, വന്ദ്യ ഏലിയാസ് കോർ എപ്പിസ്കോപ്പ തൊണ്ടലിൽ, ഫാ. അനീഷ് കവുങ്ങുംപ്പിള്ളിൽ, ഫാ. ബേസിൽ തൊണ്ടലിൽ, ഫാ. റെജി കോലാനിക്കൽ, ഫാ. ജോൺസൺ മനയിൽ, സഭാ വർക്കിംഗ് കമ്മിറ്റിയംഗം ബേബി ജേക്കബ് പീടിയേക്കൽ, ട്രസ്റ്റി തമ്പി വായിക്കാട്ട്, രാജു പറകണ്ടത്തിൽ, റോബിൻ പറകണ്ടത്തിൽ, സെക്രട്ടറി മോൻസി കാരപറമ്പിൽ എന്നിവർ നേതൃത്വം നൽകി. സന്ധ്യാ പ്രാർഥനക്ക് ശേഷം മെത്രാപ്പോലീത്ത ഐസക്ക് മോർ ഒസ്താത്തിയോസ് പ്രസംഗിച്ചു. ഇന്ന് രാവിലെ 8.30 ന് മെത്രാപ്പോലീത്ത ഐസക് മോർ ഒസ്താത്തിയോസിന്‍റെ പ്രധാന കാർമ്മികത്വത്തിൽ വിശുദ്ധ കുർബാന അർപ്പിക്കും. 11 ന് ആശീർവാദത്തോടെ പെരുന്നാൾ ശുശ്രൂഷകൾ സമാപിക്കും.

വട്ടച്ചിറ കുരിശുപള്ളിയിൽ തിരുനാൾ നാളെ കൊടിയേറും

കൂരാച്ചുണ്ട്: സെന്‍റ് തോമസ് ഫൊറോന ഇടവകയുടെ കീഴിലുള്ള വട്ടച്ചിറ കുരിശുപള്ളിയിൽ വിശുദ്ധ സെബസ്ത്യാനോസിന്‍റെ തിരുനാൾ നാളെ വൈകിട്ട് അഞ്ചിന് സെന്‍റ് തോമസ് ഫൊറോന വികാരി ഫാ. വിൻസെന്‍റ് കണ്ടത്തിൽ കൊടിയേറ്റും. തുടർന്ന് 5.10 ന് തിരുസ്വരൂപ പ്രതിഷ്ഠ, 5.15 ന് ആഘോഷമായ വിശുദ്ധ കുർബാന, സന്ദേശം, നൊവേന, പത്തിന് വൈകിട്ട് 4.30ന് ജപമാല അഞ്ചിന് പ്രസുദേന്തി വാഴ്ച, ആഘോഷമായ തിരുനാൾ കുർബാന, സന്ദേശം, നൊവേന, സിഒഡി ഡയറക്ടർ ഫാ. തോമസ് പാറൻകുളങ്ങര കാർമികത്വം വഹിക്കും. തുടർന്ന് ലദീഞ്ഞ്, പ്രദക്ഷിണം, 7.30ന് സമാപന ആശീർവാദം, ആകാശ വിസ്മയം, സ്നേഹവിരുന്ന് എന്നിവയോടെ സമാപിക്കും.

ചൂരല്‍മല ദുരന്തത്തിലെ രക്ഷാപ്രവര്‍ത്തനം പുനരാവിഷ്‌കരിച്ച് അഗ്‌നിരക്ഷ സേന

വിജ്ഞാനവും വിനോദവുമായി എന്‍റെ കേരളം പ്രദര്‍ശന-വിപണന മേള കോഴിക്കോട്: ചൂരല്‍മല ദുരന്തത്തില്‍ മുണ്ടക്കൈയില്‍ അകപ്പെട്ട കൈകുഞ്ഞിനെ കയറിലൂടെ സുരക്ഷിത സ്ഥാനത്തേക്ക് മാറ്റുന്ന അഗ്‌നിരക്ഷ സേനയുടെ ചിത്രം ആരുടെയും മനസില്‍നിന്ന് മാഞ്ഞിട്ടുണ്ടാവില്ല. ദുരന്തത്തില്‍ അഗ്‌നിരക്ഷാ സേന നടത്തിയ രക്ഷാപ്രവര്‍ത്തനത്തിന്‍റെ വര്‍ക്കിംഗ് മോഡല്‍ ഒരുക്കി ഒരിക്കല്‍കൂടി അന്നത്തെ ഓര്‍മകളിലേക്ക് കൂട്ടിക്കൊണ്ടുപോകുകയാണ് എന്‍റെ കേരളം പ്രദര്‍ശന-വിപണന മേളയിലെ അഗ്‌നിരക്ഷാ സേനയുടെ സ്റ്റാള്‍. വെള്ളാര്‍മലയും മുണ്ടക്കൈയും സെന്‍റിനെന്‍റല്‍ റോക്കും ടീ ഫാക്ടറിയും അടയാളപ്പെടുത്തിയ മോഡല്‍ രക്ഷാദൗത്യത്തില്‍ പങ്കെടുത്ത ഫയര്‍ഫോഴ്‌സ് അംഗങ്ങള്‍ തന്നെ അക്കാര്യം വിശദീകരിക്കുമ്പോള്‍ ഒരേസമയം ആകാംക്ഷയും ഭീതിയും വന്നുനിറയും. അഗ്‌നിരക്ഷാ സേനയുടെ മറ്റു പ്രധാന രക്ഷാദൗത്യങ്ങളായ ആമഴിയഞ്ചാം തോടും ബ്രഹ്‌മപുരവും പ്രളയ കാലത്തെ പ്രവര്‍ത്തനങ്ങളും സ്റ്റാളില്‍ പ്രദര്‍ശിപ്പിച്ചിട്ടുണ്ട്. സ്‌കൂബ ഡൈവിംഗ്, തീയില്‍നിന്ന് രക്ഷ നേടുന്നതിനുള്ള പ്രത്യേക വസ്ത്രം, റിമോട്ട് കൊണ്ട് നിയന്ത്രിക്കുന്ന വെള്ളത്തിനടിയില്‍ പോകുന്ന പ്രത്യേക വാഹനം എന്നിവയെല്ലാം പ്രദര്‍ശിപ്പിച്ചിട്ടുണ്ട്. തൂക്കുമരവും ലോക്കപ്പും ഒരുക്കി ജയില്‍ വകുപ്പ് ജയിലിലെ ലോക്കപ്പും തൂക്കുമരവും സിനിമകളില്‍ മാത്രം കണ്ടവര്‍ക്ക് നേരിട്ട് കാണാനുള്ള അവസരമാണ് എന്‍റെ കേരളം പ്രദര്‍ശന മേളയില്‍ ജയില്‍ വകുപ്പ് ഒരുക്കിയിരിക്കുന്നത്. മുഖ്യമന്ത്രി പിണറായി വിജയന്‍റെയടക്കം പ്രമുഖരുടെ ജയില്‍ രേഖകളും സന്ദര്‍ശക രജിസ്റ്ററിലെ വിവരങ്ങളും പ്രദര്‍ശിപ്പിച്ചിട്ടുണ്ട്. ആനയെ വരെ പിടിക്കാം കാടിറങ്ങി വരുന്ന ആനയെ തടയാനുള്ള ഹാങ്ങിംഗ് ഫെന്‍സിംഗ് സംവിധാനവും പാമ്പ്, കുരങ്ങന്‍, മുള്ളന്‍പന്നി തുടങ്ങിയ ജീവികളെ പിടിക്കാനുള്ള ഉപകരണങ്ങളുമെല്ലാം ഒരുക്കിയിട്ടുണ്ട് വനം വകുപ്പിന്‍റെ സ്റ്റാളില്‍. സോളാര്‍ സെന്‍സറിംഗ് കാമറകളും സുരക്ഷ കവചവും ഇവിടെയുണ്ട്. വേങ്ങ, തേക്ക്, രക്തചന്ദനം തുടങ്ങിയ വൃക്ഷങ്ങളും പൊതുജനങ്ങള്‍ക്ക് പരിചയപ്പെടുത്തുന്നുണ്ടിവിടെ. ലഹരിക്കെതിരേ പ്രതിരോധം മാതൃത്വം, ലഹരിക്കെണി, ഡിപ്രഷന്‍, കിരാതം, ജീവിതമാണ് ലഹരി എന്നിവയെ അടിസ്ഥാനമാക്കിയ കലാ സൃഷ്ടികളാണ് എക്‌സൈസ് വകുപ്പിന്‍റെ പ്രദര്‍ശന സ്റ്റാളില്‍ ഉള്ളത്. വിമുക്തി ലഹരിവിരുദ്ധ ക്വിസ്, ലഹരിക്കെതിരേ കൈയൊപ്പ് ശേഖരണം എന്നിവയുമുണ്ട്. റോഡ് സുരക്ഷ മാര്‍ഗങ്ങളുടെ ബോധവത്കരണ വീഡിയോയും ഇ ചലാന്‍ വഴി പിഴയടക്കാനുള്ള സംവിധാനങ്ങളുമായാണ് മോട്ടോര്‍ വാഹന വകുപ്പ് പ്രദര്‍ശന മേളയില്‍ തയാറാക്കിയിരിക്കുന്നത്. കുട്ടികള്‍ക്കുള്ള ആയുര്‍വേദ ചികിത്സ കുട്ടികള്‍ക്കുള്ള ആയുര്‍വേദ ചികിത്സാ പദ്ധതികള്‍ പരിചയപ്പെടുത്തി 'എന്‍റെ കേരളം' പ്രദര്‍ശന-വിപണന മേളയിലെ സെമിനാര്‍. "കുട്ടികളുടെ ആയുര്‍വേദം' എന്ന വിഷയത്തില്‍ ആയുഷ് വകുപ്പാണ് സെമിനാര്‍ സംഘടിപ്പിച്ചത്. കുട്ടികളുടെ അസുഖങ്ങള്‍ക്കുള്ള ചികിത്സകള്‍ ആയുര്‍വേദത്തില്‍ ഉണ്ടെങ്കിലും അത് മനസിലാക്കാന്‍ നമുക്ക് സാധിക്കാതെ പോകുന്നുവെന്ന് സെമിനാര്‍ ഉദ്ഘാടനം ചെയ്ത് തോട്ടത്തില്‍ രവീന്ദ്രന്‍ എംഎല്‍എ പറഞ്ഞു. ജില്ലാ ആയുര്‍വേദ ആശുപത്രി സിഎംഒ യദു നന്ദന്‍ അധ്യക്ഷത വഹിച്ചു. ഡോ. ദയ വിഷയാവതരണം നടത്തി. സീനിയര്‍ മെഡിക്കല്‍ ഓഫീസര്‍ ഡോ. ഷൈജു ഒല്ലാങ്കോട് മോഡറേറ്ററായി. മേള കാണാം, കൈ നിറയെ സാധനങ്ങളുമായി മടങ്ങാം എന്‍റെ കേരളം പ്രദര്‍ശന-വിപണന മേള കാണാന്‍ എത്തുന്നവര്‍ക്ക് കൈ നിറയെ സാധനങ്ങളുമായി മടങ്ങാം. സര്‍ക്കാരിന്‍റെ നാലാം വാര്‍ഷികാഘോഷങ്ങളുടെ ഭാഗമായ മേളയില്‍നിന്ന് ഗുണമേന്മയുള്ള ഉല്‍പന്നങ്ങള്‍ വിലക്കുറവില്‍ വാങ്ങാനാകും. ഖാദി, മില്‍മ, ഫിഷറീസ്, മത്സ്യഫെഡ്, ആത്മ കോഴിക്കോട്, കയര്‍ഫെഡ്, കൃഷി വകുപ്പ്, ചാത്തമംഗലം പൗള്‍ട്രി ഫാം തുടങ്ങിയവയുടെ സ്റ്റാളുകളില്‍ നിന്നാണ് ഉത്പന്നങ്ങള്‍ വാങ്ങാന്‍ അവസരം. ഖാദിയുടെ സ്റ്റാളില്‍ എത്തുന്നവര്‍ക്ക് കൈത്തറി വസ്തുക്കള്‍ നിര്‍മിക്കുന്നത് നേരിട്ട് കാണാനും അവസരമുണ്ട്. ഖാദി ഉല്‍പന്നങ്ങള്‍ 30 ശതമാനം റിബേറ്റിലാണ് നല്‍കുന്നത്. അഞ്ച് ദിവസം കൊണ്ട് ലക്ഷം രൂപയുടെ വരുമാനമാണ് ഈ സ്റ്റാളില്‍നിന്ന് ലഭിച്ചത്. അച്ചാറുകള്‍, മസാലപ്പൊടികള്‍, ധാന്യങ്ങള്‍, പാലുല്‍പന്നങ്ങള്‍, മൂല്യവര്‍ധിത ഉല്‍പന്നങ്ങള്‍, ചെടികള്‍ തുടങ്ങിയവ സ്റ്റാളുകളില്‍നിന്ന് വാങ്ങാം. സപ്ലൈക്കോ, കണ്‍സ്യൂമര്‍ഫെഡ് തുടങ്ങിയവയുടെ സ്റ്റാളുകളിലും സാധനങ്ങള്‍ വാങ്ങാന്‍ ആളുകളുടെ തിരക്കാണ്. കീബോഡിലും തബലയിലും വിസ്മയിപ്പിച്ച് ഹരിനന്ദും റമിന്‍ റഷീദും എന്‍റെ കേരളം പ്രദര്‍ശന-വിപണന മേളയില്‍ സംഗീതോപകരണങ്ങള്‍കൊണ്ട് വിസ്മയിപ്പിച്ച് പി. ഹരിനന്ദും റമിന്‍ റഷീദും. മേളയിലെ ക്രിയേറ്റീവ് കോര്‍ണറിലാണ് കീബോഡും തബലയും കൊണ്ട് ഏഴാം ക്ലാസുകാര്‍ കാണികളെ കൈയിലെടുത്തത്. വില്യംസ് സിന്‍ഡ്രോം രോഗത്തെ വെല്ലുവിളിച്ചാണ് ഈ കൊച്ചുമിടുക്കന്മാര്‍ മേളയിലെ താരങ്ങളായത്. സമഗ്ര ശിക്ഷാ കോഴിക്കോടിന്‍റെ "മല്‍ഹാര്‍ പാട്ട്കൂട്ടം' ട്രൂപ്പിലെ അംഗങ്ങളായ ഇവര്‍ സ്‌പെഷ്യല്‍ സ്‌കൂള്‍ കലോത്സവത്തില്‍ ജില്ലയെ പ്രതിനിധീകരിച്ച് തിളക്കമാര്‍ന്ന വിജയം കൈവരിച്ചവരാണ്. തബല, കീബോഡ് എന്നിവക്കൊപ്പം ലളിതഗാനത്തിലും മികവറിയിച്ചിട്ടുണ്ട്. ഹരിനന്ദ് മുതുവന എയുപി സ്‌കൂളിലെയും റമിന്‍ റഷീദ് മണിയൂര്‍ യു പി സ്‌കൂളിലെയും വിദ്യാര്‍ഥികളാണ്.

വോളണ്ടിയർ പരിശീലനം സംഘടിപ്പിച്ചു

മുക്കം: കാരശേരി ആശ്വാസ് പാലിയേറ്റീവിന്‍റെ ശാക്തീകരണത്തിന്‍റെ ഭാഗമായി വോളണ്ടിയർ പരിശീലനം സംഘടിപ്പിച്ചു. പഞ്ചായത്തിലെ കിടപ്പ് രോഗികൾക്ക് സമാശ്വാസമേകാൻ കൂടുതൽ പരിചരണങ്ങൾ നൽകുന്നതിന് വേണ്ടി വളണ്ടിയർമാരെ സജ്ജമാക്കുന്നതിനാണ് പരിശീലനം സംഘടിപ്പിച്ചത്. പരിശീലന പരിപാടി പഞ്ചായത്ത് വൈസ് പ്രസിഡന്‍റ് ജംഷിദ് ഒളകര ഉദ്ഘാടനം ചെയ്തു. ജനറൽ കൺവീനർ എം.ടി. സെയ്ത് ഫസൽ അധ്യക്ഷത വഹിച്ചു. ട്രഷറർ ജി. അബ്ദുൽ അക്ബർ, കോ ഓർഡിനേറ്റർ നടുക്കണ്ടി അബുബക്കർ, സംസ്ഥാന ട്രെയിനർ പി.കെ അബ്ദുൽ ഖാദർ, സലീം വലിയ പറമ്പ്, കെ.സി അബ്ദുസമദ് എന്നിവർ പ്രസംഗിച്ചു.

കേരള ടീമിന്‍റെ ജേഴ്സി പ്രകാശനം ചെയ്തു

കോടഞ്ചേരി: സോഫ്റ്റ് ബേസ്ബോൾ ഫെഡറേഷൻ കപ്പ് നാഷണൽ കിരീടത്തിനായി മഹാരാഷ്ട്രയിലേക്ക് പുറപ്പെടുന്ന കേരള ടീമിന്‍റെ ജേഴ്സി സോഫ്റ്റ് ബേസ്ബോൾ അസോസിയേഷൻ സംസ്ഥാന ജനറൽ സെക്രട്ടറി പി.എം. എഡ്വേർഡ് പ്രകാശനം ചെയ്തു. ചടങ്ങിൽ സോഫ്റ്റ് ബേസ്ബോൾ അസോസിയേഷൻ സംസ്ഥാന ട്രഷറർ ഷിജോ സ്കറിയ, ജില്ലാ സെക്രട്ടറി വിപിൻ സോജൻ, ഏഷ്യൻ ഗെയിംസ് സ്വർണ ജേതാവ് എസ്. ശ്രേയ, കോച്ചുമാരായ കെ. അക്ഷയ്, വിപിൽ വി. ഗോപാൽ എന്നിവർ പ്രസംഗിച്ചു. നിലവിൽ കേരള പുരുഷ-വനിതാ ടീമുകൾ ചാമ്പ്യൻമാരാണ്.

കുടിവെള്ള പദ്ധതി നടത്തിപ്പുകാരുടെ സംഗമം നടത്തി

തിരുവമ്പാടി: തിരുവമ്പാടി പഞ്ചായത്ത് കുടുംബാരോഗ്യ കേന്ദ്രത്തിന്‍റെ ആഭിമുഖ്യത്തിൽ പഞ്ചായത്തിലെ പൊതു കുടിവെള്ള പദ്ധതി നടത്തിപ്പുകാരുടെ "കരുതൽ' സംഗമം നടത്തി. പഞ്ചായത്ത് ഹാളിൽ നടന്ന സംഗമം പഞ്ചായത്ത് പ്രസിഡന്‍റ് ബിന്ദു ജോൺസൺ ഉദ്ഘാടനം ചെയ്തു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ലിസി ഏബ്രഹാം അധ്യക്ഷത വഹിച്ചു. "ജലജന്യ രോഗങ്ങളും കുടിവെള്ള പദ്ധതി പരിപാലനവും' എന്ന വിഷയത്തിൽ ജൂണിയർ ഹെൽത്ത് ഇൻസ്പെക്ടർ എസ്. റോഷൻലാൽ ബോധവത്കരണ ക്ലാസ് നടത്തി. വാർഡ് മെമ്പർ കെ.എ. മുഹമ്മദ് അലി, ജൂണിയർ ഹെൽത്ത് ഇൻസ്പെക്ടർമാരായ സെൽവകുമാർ, മുഹമ്മദ് മുസ്തഫാ ഖാൻ, യു.കെ. മനീഷ, അഞ്ജന, ലിസമ്മ തോമസ് എന്നിവർ പ്രസംഗിച്ചു.‌

ഇ.എം. പള്ളത്ത് ചരിത്ര മ്യൂസിയം ഉദ്ഘാടനം ചെയ്തു

ഓമശേരി: കായലുംപാറയിൽ ഇമ്മാനുവൽ പള്ളത്ത് ചരിത്ര മ്യൂസിയം ഓമശേരി പഞ്ചായത്ത് പ്രസിഡന്‍റ് കെ. കരുണാകരൻ ഉദ്ഘാടനം ചെയ്തു. ചരിത്ര രചനയും ചരിത്ര പഠനവും കാലഘട്ടത്തിന്‍റെ ആവശ്യമാണെന്നും പ്രാദേശികമായി ഇത്തരം മ്യൂസിയങ്ങൾ ഉയർന്നു വരേണ്ടത് അനിവാര്യമാണെന്നും അദ്ദേഹം പറഞ്ഞു. കേരള പ്രാദേശിക ചരിത്ര പഠന സമിതി കോഴിക്കോട് ജില്ലാ പ്രസിഡന്‍റ് ടി.വി. രാജൻ അധ്യക്ഷത വഹിച്ചു. ഓമശേരി പഞ്ചായത്ത് വിദ്യാഭ്യാസ ക്ഷേമകാര്യ സമിതി ചെയർമാൻ പി.കെ. ഗംഗാധരൻ, പ്രാദേശിക ചരിത്ര പഠന സമിതി സെക്രട്ടറി കെ. രമേശ്, മോഹനൻ പുത്തഞ്ചേരി, ജിതിനം രാധാകൃഷ്ണൻ, കൂടത്തായി സെന്‍റ് മേരീസ് എച്ച്എസ്എസ് പിആർഒ ജോസ് തുരുത്തിമറ്റം, ചരിത്ര അധ്യാപകൻ സോജി തോമസ് തുടങ്ങിയവർ പ്രസംഗിച്ചു.

മെഡിക്കൽ കോളജിലെ തീപിടിത്തം: യൂത്ത് ലീഗ് രാപ്പകല്‍ സമരത്തിന്

കോഴിക്കോട്: മെഡിക്കല്‍ കോളജില്‍ രണ്ടുദിവസം തുടര്‍ച്ചയായി തീപിടിത്തം ഉണ്ടായതു സംബന്ധിച്ച് സമഗ്ര അന്വേഷണം നടത്തണമെന്നാവശ്യപ്പെട്ട് യൂത്ത് ലീഗിന്‍റെ ആഭിമുഖ്യത്തില്‍ രാപ്പകല്‍ സമരം നടത്തും. 10ന് വൈകുന്നേരം മൂന്നുമുതല്‍ രാത്രി 10വരെയാണ് സമരമെന്ന് ജില്ലാ ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. കെട്ടിടനിര്‍മാണത്തിലെ അഴിമതി സമഗ്രമായി അന്വേഷിച്ച് കുറ്റക്കാര്‍ക്കെതിരേ നടപടിയെടുക്കുക, മെഡിക്കല്‍ കോളജിനെ തകര്‍ക്കാനുള്ള ഗൂഢനീക്കം ചെറുക്കുക തുടങ്ങിയ ആവശ്യങ്ങള്‍ കൂടി ഉന്നയിച്ചാണ് സമരം. ജില്ലാ പ്രസിഡന്‍റ് മിസ്ഹബ് കീഴരിയൂര്‍, ജനറല്‍ സെക്രട്ടറി ടി.മൊയ്തീന്‍കോയ, ട്രഷറര്‍ കെ.എം.എ. റഷീദ് എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

കായിക വകുപ്പിന്‍റെ ലഹരി വിരുദ്ധ സന്ദേശ യാത്ര നാളെ ജില്ലയില്‍

കോഴിക്കോട്: ലഹരിക്കെതിരെ "കിക്ക് ഡ്രഗ്സ്, സെ യെസ് ടു സ്പോര്‍ട്സ്' എന്ന മുദ്രാവാക്യവുമായി മന്ത്രി വി. അബ്ദുറഹിമാന്‍റെ നേതൃത്വത്തില്‍ കാസര്‍കോട് മുതല്‍ തിരുവനന്തപുരം വരെ കായിക വകുപ്പ് സംഘടിപ്പിക്കുന്ന ലഹരി വിരുദ്ധ സന്ദേശ യാത്ര എട്ടിന് ജില്ലയില്‍ പ്രവേശിക്കും. രാവിലെ ആറിന് അടിവാരത്ത് നിന്ന് താമരശേരി ചുങ്കം വരെ മരത്തോണ്‍ സംഘടിപ്പിക്കുമെന്ന് ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റ് ഒ. രാജഗോപാല്‍ വാര്‍ത്താസമ്മേളനത്തില്‍ അറിയിച്ചു. പി.ടി.എ. റഹീം എംഎല്‍എ ഫ്ളാഗ് ഓഫ് ചെയ്യും. മാരത്തോണില്‍ ഒന്ന്, രണ്ട് മൂന്ന് സ്ഥാനക്കാര്‍ക്ക് യഥാക്രമം 15000, 10000 , 7500 രൂപയും മറ്റു സ്ഥാനക്കാര്‍ക്ക് 2000രൂപ വീതവും ക്യാഷ് പ്രൈസ് നല്‍കും. കോഴിക്കോട് ജില്ലക്കാരായ പുരുഷ-വനിത താരങ്ങള്‍ക്ക് വ്യത്യസ്ത മത്സരങ്ങളാണ് സംഘടിപ്പിക്കുന്നത്. താമരശേരി ചുങ്കം മുതല്‍ താമരശേരി ബസ് സ്റ്റാന്‍ഡ് വരെ കായിക മന്ത്രിയുടെ നേതൃത്വത്തില്‍ ജില്ലയിലെ എംഎല്‍എമാര്‍, ജില്ലാ പഞ്ചായത്ത് പ്രസിഡന്‍റ്, ജനപ്രതിനിധികള്‍ സ്പോര്‍ട്സ് കൗണ്‍സില്‍ പ്രസിഡന്‍റ്, സ്റ്റാന്‍ഡിംഗ് കമ്മിറ്റി അംഗങ്ങള്‍, കായിക താരങ്ങള്‍ എന്നിവര്‍ പങ്കെടുക്കുന്ന വാക്കത്തോണും ഉണ്ടാകും. ജില്ലയിലെ അമ്പായത്തോട് ഹയര്‍സെക്കന്‍ഡറി സ്‌കൂള്‍ ഗ്രൗണ്ട്, പറമ്പില്‍ ബസാര്‍ മിനിസ്റ്റേഡിയം, ഈസ്റ്റ് നടക്കാവ് സ്വിമ്മിംഗ് പൂള്‍, ചെലവൂര്‍ സ്പോര്‍ട്സ് പാര്‍ക്ക് എന്നിവിടങ്ങളില്‍ മന്ത്രി സന്ദര്‍ശനം നടത്തി കായിക താരങ്ങളെ അഭിസംബോധന ചെയ്യും. വൈകുന്നേരം നാലിന് ക്രിസ്ത്യന്‍ കോളജ് ഗ്രൗണ്ട് മുതല്‍ മാനാഞ്ചിറ മൈതാനം വരെ വാക്കത്തണ്‍ നടത്തും. വൈകുന്നേരം ആറിന് വിവിധ കായിക പ്രദര്‍ശനങ്ങളോടൊപ്പം മാനാഞ്ചിറ ബാസ്‌ക്കറ്റ് ബോള്‍ കോര്‍ട്ടില്‍ ലഹരി വിരുദ്ധ സന്ദേശ യാത്രയ്ക്ക് ജില്ലയില്‍ സമാപനമാകും.സെക്രട്ടറി പ്രപു പ്രേമനാഥ്, ഡോ. വി. റോയ് ജോണ്‍, വിനീഷ്‌കുമാര്‍ എന്നിവരും വാര്‍ത്താസമ്മേളനത്തില്‍ സംബന്ധിച്ചു.

കൂടരഞ്ഞി വൈഎംസിഎ കുടുംബ സംഗമം നടത്തി

കൂടരഞ്ഞി: വൈഎംസിഎ കുടുംബ സംഗമം നടത്തി. ചടങ്ങിൽ പുതിയ ഭാരവാഹികളുടെ സ്ഥാനാരോഹണവും പുതുതായി ചേർന്നവരുടെ സത്യപ്രതിജ്ഞയും നടന്നു. വൈഎംസിഎ കേരള റീജിയൺ ചെയർമാൻ പ്രഫ. അലക്സ് തോമസ് പരിപാടി ഉദ്ഘാടനം ചെയ്തു. വൈഎംസിഎ പ്രവർത്തകർ സമൂഹത്തെ കാർന്നു തിന്നുന്ന മയക്കു മരുന്നിനെതിരേ പോരാടാൻ മുന്നോട്ടുവരണമെന്ന് അദ്ദേഹം പറഞ്ഞു. കൂടരഞ്ഞി വൈഎംസിഎ പ്രസിഡന്‍റ് ജിജി കിഴക്കരക്കാട്ട് അധ്യക്ഷത വഹിച്ചു. അൽഫോൻസാ കോളജ് അഡ്മിനിസ്ട്രേറ്റർ ഫാ. മനോജ് കൊല്ലംപറമ്പിൽ അനുഗ്രഹപ്രഭാഷണം നടത്തി. റീജണൽ കമ്മിറ്റി മെമ്പർ ഡോ. എം. തോമസ് മുഖ്യപ്രഭാഷണം നടത്തി. പുതിയ ഭാരവാഹികളായി തങ്കച്ചൻ കൊച്ചുകൈപ്പയിൽ (പ്രസിഡന്‍റ്), ജ്യോതിഷ് ചാക്കോ മംഗരയിൽ (സെക്രട്ടറി), സില്‍വിന്‍ പുതുപ്പിള്ളി (വൈസ് പ്രസിഡന്‍റ്), വിപിൻ തോമസ് പഴൂർ (ജോ. സെക്രട്ടറി), സാജു വർഗീസ് (ട്രഷറർ) എന്നിവരെ തെരഞ്ഞെടുത്തു. വൈഎംസിഎ നാഷണൽ എക്സിക്യൂട്ടീവ് മെമ്പർ വി.എം. മത്തായി, റീജണൽ കമ്മിറ്റി അംഗം വർഗീസ് അലക്സാണ്ടർ, പി.എ. മത്തായി, കോഴിക്കോട് സബ് റീജിയൺ ചെയർമാൻ ജേക്കബ് ജോൺ, കൺവീനർ ബാബു മതിച്ചിപറമ്പിൽ, തങ്കച്ചൻ കൊച്ചുകൈപ്പേൽ, വിപിൻ പഴൂർ, ജോർജ് വർഗീസ്, ജ്യോതിഷ് ചാക്കോ എന്നിവർ പ്രസംഗിച്ചു. വിവിധ കലാപരിപാടികളും നടന്നു.

യാത്രക്കാർക്കും സമീപവാസികൾക്കും ഭീഷണി ഉയർത്തി ഉണങ്ങിയ വൻമരം

ചക്കിട്ടപാറ: ചക്കിട്ടപാറ ടെലിഫോൺ എക്സ്ചേഞ്ച് വളപ്പിൽ യാത്രക്കാർക്കും സമീപവാസികൾക്കും ഭീഷണി ഉയർത്തി ഉണങ്ങിയ വൻ മരം. നിരന്തരം വാഹനങ്ങളും കാൽനട യാത്രക്കാരുമുള്ള പാതയുടെ ഓരത്താണ് മരം നിൽക്കുന്നത്. ഇത് മുറിച്ചു നീക്കാത്ത പക്ഷം വലിയ അപകടത്തിനു കാരണമാകും. പ്രശ്നം പരിഹരിക്കണമെന്നാവശ്യപ്പെട്ട് സമീപവാസികൾ ചക്കിട്ടപാറ പഞ്ചായത്ത് പ്രസിഡന്‍റിന് നേരിട്ട് രേഖാമൂലം പരാതി നൽകിയിട്ടുണ്ട്. വാർഡ്‌ 12 ലാണ് എക്സ്ചേഞ്ചും അപകട ഭീഷണിയായ മരവുമുള്ളത്.

കർഷക മഹാ പഞ്ചായത്ത് വിജയിപ്പിക്കണം: വിഫാം

പേരാമ്പ്ര: സേവ് വെസ്റ്റേണ്‍ ഗാട്ട്‌സ് പീപ്പിള്‍ ഫൗണ്ടേഷന്‍റെയും വിഫാം ഫാർമേഴ്സ് ഫൗണ്ടേഷന്‍റെയും നേതൃത്വത്തില്‍ കേരളത്തില്‍ പ്രവര്‍ത്തിക്കുന്ന 111 കര്‍ഷക ബഹുജന സംഘടനകളുടെ പങ്കാളിത്തത്തോടെ "ഒഴിവാക്കപ്പെട്ടവരുടെ ഭൂരിപക്ഷ കേരളം' അടിസ്ഥാന വിഷയമാക്കി 10, 11 തീയതികളില്‍ മൂവാറ്റുപുഴ നെസ്റ്റില്‍ നടക്കുന്ന കർഷക മഹാ പഞ്ചായത്ത് വിജയിപ്പിക്കണമെന്ന് വിഫാം കർഷകസംഘടന ആഹ്വാനം ചെയ്‌തു. ഭൂമി നിയമങ്ങള്‍മൂലം പീഡിപ്പിക്കപ്പെടുന്ന ജനത, വന്യജീവി സംഘര്‍ഷവും വനനിയമങ്ങളും, സംസ്ഥാന ധനകാര്യ പ്രതിസന്ധി, മനുഷ്യരും പരിസ്ഥിതിയും, വികസനത്തില്‍ ഒഴിവാക്കപ്പെട്ടവര്‍ ഒന്നിക്കുന്നു, കാര്‍ഷിക ചെറുകിട കച്ചവട മേഖലയിലെ പ്രതിസന്ധികള്‍, കുടുംബശ്രീ മോഡലില്‍ കര്‍ഷകശ്രീ, കര്‍ഷക മഹാപഞ്ചായത്തിലെ ചര്‍ച്ചകളുടെ അടിസ്ഥാനത്തില്‍ നയ രൂപീകരണം, ഒഴിവാക്കപ്പെട്ടവരുടെ പ്രകടന പത്രിക തയാറാക്കി രാഷ്ട്രീയ നേതൃത്വത്തിന് സമര്‍പ്പിക്കല്‍ തുടങ്ങി കേരളത്തെ പൊതുവായി ബാധിക്കുന്ന ഒന്പത് വിഷയങ്ങള്‍ ആസ്പദമാക്കിയുള്ള ക്ലാസുകളും ചര്‍ച്ചകളുമാണ് രണ്ട് ദിവസം നടക്കുന്നത്. മഹാ പഞ്ചായത്തിന്‍റെ ഒരുക്കത്തിനായി ചേർന്ന യോഗത്തിൽ വി ഫാം ഫാർമേഴ്സ് ഫൗണ്ടേഷൻ ചെയർമാൻ ജോയി കണ്ണഞ്ചിറ അധ്യക്ഷത വഹിച്ചു. ബോണി ആനത്താനം, അഡ്വ. സുമിൻ എസ്. നെടുങ്ങാടൻ, കമൽ ജോസഫ്, വി.ടി. തോമസ്, ബാബു പൈകയിൽ, ബാബു പുതുപറമ്പിൽ, സണ്ണി കൊമറ്റത്തിൽ, സെമിലി സുനിൽ എന്നിവർ പ്രസംഗിച്ചു.

കാട്ടുമൃഗങ്ങളെ കൈകാര്യം ചെയ്യാൻ കർഷകരെ അനുവദിക്കണം: ബേബി കാപ്പുകാട്ടിൽ

ചക്കിട്ടപാറ: കൃഷിഭൂമിയിലിറങ്ങുന്ന കാട്ടുമൃഗങ്ങളെ കൈകാര്യം ചെയ്യുവാൻ കർഷകരെ അനുവദിക്കുന്നില്ലെങ്കിൽ ഭാവിയിൽ കേരളത്തിലെ ജനങ്ങൾ ഭക്ഷണ സാധനങ്ങൾക്ക് ഇതര സംസ്ഥാനങ്ങളെ പൂർണമായി ആശ്രയിക്കേണ്ടി വരുമെന്ന് കേരളാ കോൺഗ്രസ് -എം സംസ്ഥാന സ്റ്റിയറിംഗ് കമ്മിറ്റി അംഗം ബേബി കാപ്പുകാട്ടിൽ പറഞ്ഞു. പാർട്ടി ചക്കിട്ടപാറ മണ്ഡലം കമ്മിറ്റി ഓഫീസിന്‍റെ ഉദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം. കേരളത്തിലേക്കുള്ള ട്രാൻസ്പോർട്ടിംഗ് സംവിധാനത്തിന് തടസങ്ങൾ നേരിട്ടാൽ സംസ്ഥാനത്തെ ജനങ്ങൾ പട്ടിണി കിടക്കേണ്ടി വരുന്ന ദുരവസ്ഥയാണ്. വന്യമൃഗ ശല്യം കാരണം കൃഷി ചെയ്യാൻ പറ്റാത്ത സ്ഥിതിയാണിന്നുള്ളതെന്നും അദ്ദേഹം ചൂണ്ടിക്കാട്ടി. മണ്ഡലം പ്രസിഡന്‍റ് ജോസുകുട്ടി പുരയിടത്തിൽ അധ്യക്ഷത വഹിച്ചു. ജില്ലാ സെക്രട്ടറി ബോബി ഓസ്റ്റിൻ, പേരാമ്പ്ര നിയോജക മണ്ഡലം പ്രസിഡന്‍റ് ശ്രീധരൻ മുതുവണ്ണാച്ച, പ്രഫഷണൽ ഫ്രണ്ട് സംസ്ഥാന പ്രസിഡന്‍റ് ബേബി സെബാസ്റ്റ്യൻ കൂനന്താനം, എൽസി ബേബി, ബിന്ദു മനോജ്, ജോയി പനമറ്റം, ജോണി പാറത്തറ, ജെയ്സൺ തെങ്ങുംപള്ളിൽ, പ്രസാദ് ചടയംമുറി, ടോമി വട്ടോട്ടു തറപ്പേൽ എന്നിവർ പ്രസംഗിച്ചു.

സെമിനാർ, ചിത്രം വര, സിനിമ... സജീവമായി "എന്‍റെ കേരളം' പ്രദര്‍ശന-വിപണന മേള

സൈബര്‍ കുറ്റകൃത്യങ്ങളെ കരുതലോടെ നേരിടാന്‍ കരുത്ത് പകര്‍ന്ന് സെമിനാര്‍ കോഴിക്കോട്: സൈബര്‍ ലോകത്തെ കുറ്റകൃത്യങ്ങളും ചതിക്കുഴികളും ചര്‍ച്ച ചെയ്ത് "എന്‍റെ കേരളം' പ്രദര്‍ശന-വിപണന മേളയിലെ സെമിനാര്‍. "സൈബര്‍ കുറ്റകൃത്യങ്ങളെ കരുതലോടെ നേരിടാം' വിഷയത്തില്‍ പോലീസ് വകുപ്പാണ് സെമിനാര്‍ സംഘടിപ്പിച്ചത്. പൊതുജനങ്ങളുടെ അവകാശങ്ങള്‍ നിഷേധിക്കാതെ സൈബര്‍ കുറ്റകൃത്യങ്ങളെ ഫലപ്രദമായി എങ്ങനെ നേരിടാമെന്ന് ചിന്തിക്കണമെന്ന് സെമിനാര്‍ ഉദ്ഘാടനം ചെയ്ത് കെ.പി. കുഞ്ഞമ്മദ് കുട്ടി എംഎല്‍എ പറഞ്ഞു. കുറ്റകൃത്യങ്ങള്‍ തെളിയിക്കുന്നതില്‍ പോലീസിന്‍റെ നേട്ടങ്ങള്‍ അഭിമാനകരവും മാതൃകാപരവുമാണെന്ന് അദ്ദേഹം കൂട്ടിച്ചേര്‍ത്തു. ഇന്‍റര്‍നെറ്റ് ഉപയോഗം അധികമായപ്പോള്‍ സൈബര്‍ കുറ്റകൃത്യങ്ങളുടെ എണ്ണവും വര്‍ധിച്ചെന്ന് സെമിനാര്‍ അഭിപ്രായപ്പെട്ടു. സിറ്റി പോലീസ് കമ്മീഷണര്‍ ടി. നാരായണന്‍ അധ്യക്ഷത വഹിച്ചു. അസിസ്റ്റന്‍റ് കമ്മീഷണര്‍ എസ്. ഉമേഷ്, പോലീസ് സൈബര്‍ എക്‌സ്‌പേര്‍ട്ട് കെ. ബീരജ്, നിംഹാന്‍സ് ക്ലിനിക്കല്‍ സൈക്കോളജിസ്റ്റ് സോനു എസ്. ദേവ് എന്നിവര്‍ വിഷയമവതരിപ്പിച്ചു. ഡെപ്യൂട്ടി കമ്മീഷണര്‍ അരുണ്‍ കെ. പവിത്രന്‍ മോഡറേറ്ററായി. ക്രിയേറ്റീവ് കോര്‍ണറില്‍ വര്‍ണവിസ്മയം തീര്‍ത്ത് നിഹാരിക രാജ് ചുറ്റും കൂടിനിന്നവര്‍ക്ക് മുമ്പില്‍ നിമിഷനേരംകൊണ്ട് മനോഹര ചിത്രങ്ങളൊരുക്കി നിഹാരിക രാജ്. എന്‍റെ കേരളം പ്രദര്‍ശന-വിപണന മേളയിലെ ക്രിയേറ്റീവ് കോര്‍ണറിലാണ് ഗിന്നസ് ജേതാവായ നിഹാരിക വരയുടെ വര്‍ണവിസ്മയം തീര്‍ത്തത്. പച്ചപുതച്ച ഗ്രാമവും മണ്ണില്‍ വിത്തെറിയുന്ന കര്‍ഷകനും മണ്‍പാതയും അതിലൊരു കൊച്ചുവീടുമൊക്കെ നിഹാരികയുടെ വരയില്‍ തെളിഞ്ഞു. സംസ്ഥാന തലത്തില്‍ ഉള്‍പ്പടെ നിരവധി ചിത്രരചന മത്സരങ്ങളില്‍ അംഗീകാരങ്ങള്‍ നേടിയ മിടുക്കിയാണ് നിഹാരിക. പൊയില്‍ക്കാവ് എച്ച്എസ്എസില്‍ ഈ വര്‍ഷം പത്താം ക്ലാസിലേക്ക് വിജയിച്ച നിഹാരിക അക്രിലിക്, വാട്ടര്‍ കളര്‍, പെന്‍സില്‍ ഡ്രോയിംഗ്, ഓയില്‍ പെയിന്‍റിംഗ്, ക്ലേ വര്‍ക്ക് എന്നിവയിലെല്ലാം പ്രതിഭ തെളിയിച്ചിട്ടുണ്ട്. 2023ലാണ് ഗിന്നസ് ബുക്ക് ഓഫ് റെക്കോര്‍ഡ്‌സില്‍ ഇടംപിടിച്ചത്. നിഹാരികക്ക് പുറമെ ക്രിയേറ്റീവ് കോര്‍ണറില്‍ പടിഞ്ഞാറ്റുമുറി ജിയുപിഎസിലെ കുട്ടി റേഡിയോ ജോക്കികളും കാരിക്കേച്ചര്‍ വരയുമായി കൊയിലാണ്ടി അരിക്കുളം സ്വദേശി അതുലുമുണ്ടായിരുന്നു. വരയും പാട്ടും സംഗീതവും ഉള്‍പ്പെടെയുള്ള വ്യത്യസ്ത കഴിവുകള്‍ പ്രദര്‍ശിപ്പിക്കാന്‍ വേദിയൊരുക്കുന്ന ക്രിയേറ്റിവ് കോര്‍ണറില്‍ ഓരോ ദിവസവും വ്യത്യസ്ത മേഖലകളില്‍ കഴിവ് തെളിയിച്ച കുട്ടികളാണ് അവതരണത്തിനെത്തുന്നത്. ഇന്ന് രാവിലെ 11 മുതല്‍ കീബോര്‍ഡ്, തബല എന്നിവയുമായി റെനിലും ഹരിനന്ദും എത്തും. തിയേറ്ററിലിരുന്ന് സിനിമ കാണാം, സൗജന്യമായി ഒരേസമയം നൂറോളം പേര്‍ക്ക് സൗജന്യമായി സിനിമ കാണാന്‍ അവസരമൊരുക്കുകയാണ് "എന്‍റെ കേരളം' പ്രദര്‍ശന-വിപണന മേളയിലെ സിനിമ തിയേറ്റര്‍. സെല്ലുലോയ്ഡ്, ചെമ്മീന്‍, ഗോഡ്ഫാദര്‍, കിരീടം തുടങ്ങിയ സിനിമകളും ഡോക്യുമെന്‍ററികളുമെല്ലാം രാവിലെ മുതല്‍ ബിഗ് സ്‌ക്രീനില്‍ ആസ്വദിക്കാം. കുട്ടികളും മുതിര്‍ന്നവരും ഉള്‍പ്പെടെ നിരവധി പേരാണ് പൂര്‍ണമായും ശീതീകരിച്ച തിയേറ്ററിലെത്തി സിനിമ ആസ്വദിച്ച് മടങ്ങുന്നത്. ഓഫറുകള്‍ പരിചയപ്പെടുത്തി ബിഎസ്എന്‍എല്‍ സ്റ്റാള്‍ പുതിയ ഓഫറുകളും ഫൈബര്‍ നെറ്റ് കണക്‌ഷനും പരിചയപ്പെടുത്തി എന്‍റെ കേരളം പ്രദര്‍ശന-വിപണന മേളയിലെ ബിഎസ്എന്‍എല്‍ സ്റ്റാള്‍. വിവിധ സര്‍വീസുകള്‍, പഴയ നമ്പറുകളില്‍നിന്ന് മാറാതെ പുതിയ കണക്‌ഷന്‍ എടുക്കാനുള്ള സംവിധാനം, വൈഫൈ മോഡം മാതൃകകള്‍ തുടങ്ങിയവ സ്റ്റാളില്‍ ഒരുക്കിയിട്ടുണ്ട്. കണക്‌ഷന്‍ സംബന്ധിച്ച പരാതികളും സ്വീകരിക്കുന്നുണ്ട്. 399 രൂപ മുതല്‍ തുടങ്ങുന്ന പ്ലാനുകള്‍ മുതല്‍ 9500 ജിബി വരെ ലഭ്യമാകുന്ന 4799 രൂപയുടെ പ്ലാനുകള്‍ വരെ ബിഎസ്എന്‍എല്‍ ഉപഭോക്താക്കള്‍ക്കായി നല്‍കുന്നുണ്ട്.

മലയോര ഹൈവേ നിർമ്മാണം: ചക്കിട്ടപാറയിൽ റോഡ് താലൂക്ക് സർവെയർ അളക്കും

ചക്കിട്ടപാറ: പെരുവണ്ണാമൂഴി ചക്കിട്ടപാറ ചെമ്പ്ര റൂട്ടിലെ മലയോര ഹൈവേ നിർമ്മാണത്തിൽ ഉയർന്നിരിക്കുന്ന അതിര് നിർണയ പ്രശ്നം പരിഹരിക്കുവാൻ തീരുമാനമായി. താലൂക്ക് സർവേയറെ കൊണ്ട് റോഡ് വീതി അളവു നടത്തുവാൻ ഇന്നലെ ചക്കിട്ടപാറ പഞ്ചായത്ത് ഹാളിൽ ചേർന്ന സർവകക്ഷി യോഗം തീരുമാനിച്ചു. ഇതിനുവേണ്ടി രാഷ്ട്രീയ പാർട്ടി നേതാക്കളായ എ. ജി. ഭാസ്കരൻ (സി.പി.എം) ചെയർമാനും, റെജി കോച്ചേരി (കോൺഗ്രസ്) കൺവീനറുമായി സപ്പോർട്ടിംഗ് കമ്മിറ്റിക്കു രൂപം നൽകി. ഹൈവേ പ്രവർത്തി ചക്കിട്ടപാറ ടൗണിൽ എത്തിയപ്പോഴാണ് റോഡിന്‍റെ വീതി നിർണയത്തിലെ അപാകത നാട്ടുകാരുടെ ശ്രദ്ധയിൽ പെട്ടത്. കാര്യങ്ങൾ കെആർഎഫ്ബി. ഉദ്യോഗസ്ഥരോടും കരാറുകാരോടും പറഞ്ഞെങ്കിലും ചെവിക്കൊള്ളാൻ അവർ തയാറായില്ല. ഇതോടെ പണി വ്യാപാരികൾ തടഞ്ഞു. നാട്ടുകാർ ഒപ്പുശേഖരണം നടത്തി താലൂക്ക് വികസനസമിതിക്ക് കൂട്ട പരാതിയും നൽകി. ഇതോടെ ടി.പി. രാമകൃഷ്ണൻ എംഎൽഎ ബന്ധപ്പെട്ട ഉദ്യോഗസ്ഥരുടെ യോഗം ഇന്നലെ പെരുവണ്ണാമൂഴിയിൽ വിളിച്ചു ചേർത്തു. ജനഹിതത്തിനനുസരിച്ച് മലയോര ഹൈവേ നിർമ്മാണം നടത്താൻ നിർദ്ദേശം നൽകി. ഇതോടെയാണ് താലൂക്ക് സർവെയർ റോഡിന്‍റെ വീതിയും അതിരും നിർണയിക്കട്ടെയെന്ന തീരുമാനമുണ്ടായത്. പെരുവണ്ണാമൂഴി മുതൽ ചെമ്പ്ര വരെയുള്ള അഞ്ച് കിലോമീറ്റർ റോഡ് വികസനത്തിനു വേണ്ടി വർഷങ്ങൾക്കു മുമ്പ് അക്വയർ ചെയ്ത മുഴുവൻ സ്ഥലവും കണ്ടെത്തി സർക്കാർ അധീനതയിൽ നിലനിർത്താനുള്ള നടപടി ഉണ്ടാകണമെന്ന ആവശ്യം പഞ്ചായത്തിൽ ചേർന്ന സർവകക്ഷി യോഗത്തിൽ പങ്കെടുത്തവർ ഒന്നടങ്കം ആവശ്യപ്പെട്ടു. പ്രസിഡന്‍റ് കെ.സുനിൽ അധ്യക്ഷത വഹിച്ചു. വൈസ് പ്രസിഡന്‍റ് ചിപ്പി മനോജ്, ജനപ്രതിനിധികളായ ഇ.എം. ശ്രീജിത്ത്, ജിതേഷ് മുതുകാട്, ഗിരിജ ശശി, രാഷ്ട്രീയ പാർട്ടി നേതാക്കളായ റെജി കോച്ചേരി, എ. ജി. ഭാസ്കരൻ, രാജൻ വർക്കി, ബാബു കൂനംതടം, ജെയിംസ് മാത്യു, പ്രദീപൻ ചക്കിട്ടപാറ എന്നിവരും കെആർഎഫ്ബി. ഉദ്യോഗസ്ഥരും സംബന്ധിച്ചു.

ഫറോക്ക് താലൂക്ക് ആശുപത്രിയില്‍ 103 കിടക്കകളുള്ള ആശുപത്രി സമുച്ചയം ഒരുങ്ങുന്നു

കോഴിക്കോട്: പാവപ്പെട്ട രോഗികൾക്ക് മെച്ചപ്പെട്ട ആരോഗ്യ ചികിത്സ ഉറപ്പാക്കാൻ ഫറോക്ക് ഗവ.താലൂക്ക് ആശുപത്രിയിൽ പുതിയ കെട്ടിട സമുച്ചയം ഒരുങ്ങി. കിഫ്ബി ഫണ്ടിൽ 14.36 കോടി ചെലവിട്ട് നിർമിച്ച നാല് നില കെട്ടിടം ജൂണ്‍ ആദ്യവാരം ഉദ്ഘാടനം ചെയ്യും.കെട്ടിടത്തിന്‍റെ അവസാനഘട്ട പണികൾ പുരോഗമിക്കുകയാണ്. ആവശ്യമായ മെഡിക്കൽ ഉപകരണങ്ങൾ ലഭ്യമാകുന്നതോടെ പ്രവര്‍ത്തനം തുടങ്ങും.103 കിടക്കകളുള്ള ആശുപത്രി സമുച്ചയമാണ് നിർമിച്ചിരിക്കുന്നത്.4,337 ചതുരശ്ര മീറ്റർ വിസ്തൃതിയുള്ള കെട്ടിട സമുച്ചയവും അനുബന്ധ സൗകര്യങ്ങളുമാണ് ഒരുക്കിയത്.38 കാറുകൾ, 150 ബൈക്കുകൾ എന്നിവയ്ക്കു പാര്‍ക്കിംഗ് സൗകര്യവുമുണ്ട്. പൊതുമേഖലാ സ്ഥാപനമായ വാപ്കോസിന്‍റഎ നേതൃത്വത്തിലാണ് കെട്ടിട നിർമാണം പൂർത്തിയാകുന്നത്. ഫറോക്ക്, രാമനാട്ടുകര നഗരസഭകൾ, കോർപറേഷൻ ചെറുവണ്ണൂർ, ബേപ്പൂർ മേഖല, കടലുണ്ടി, ചേലേമ്പ്ര, ചെറുകാവ്, വാഴയൂർ, വള്ളിക്കുന്ന് പഞ്ചായത്തുകളിൽ നിന്നുൾപ്പെടെ ആയിരക്കണക്കിന് രോഗികൾ ഫറോക്ക് താലൂക്ക് ആശുപത്രിയിൽ ചികിത്സ തേടിയെത്തുന്നുണ്ട്.ഇവിടെ അടിസ്ഥാന സൗകര്യങ്ങൾ വർധിക്കുന്നതോടെ ജനങ്ങൾക്ക് ആരോഗ്യ സേവനം കൂടുതൽ ഫലപ്രദമാകും.എല്ലാ വിഭാഗം വിദഗ്ധ ഡോക്ടർമാരുടെയും സേവനവും ലഭ്യമാകും. എന്നതു പാവപ്പെട്ട രോഗികൾക്ക് ഗുണകരമാണ്. കൂടാതെ ആർദ്രം പദ്ധതി വിഭാവനം ചെയ്യുന്ന സമഗ്ര ആരോഗ്യ പരിരക്ഷ എല്ലാവർക്കും ഉറപ്പാക്കാനുമാകും. സ്വന്തം ലേഖകന്‍

ബൈപാസ് റോഡ് യാഥാർത്ഥ്യമാകാനുള്ള പ്രവർത്തനങ്ങൾ ത്വരിതഗതിയിലാക്കണം

കൂരാച്ചുണ്ട് :അനുദിനം ഗതാഗതക്കുരുക്ക് മൂലം ദുരിതം അനുഭവിക്കുന്ന കൂരാച്ചുണ്ട് നിവാസികളുടെ സ്വപ്നമായ ബൈപാസ് റോഡ് യാഥാർത്ഥ്യമാകാനുള്ള പ്രവർത്തനങ്ങൾ ത്വരിതഗതിയിലാക്കാൻ സംസ്ഥാന സർക്കാരും എംഎൽഎയും പഞ്ചായത്ത് അധികൃതരും ആത്മാർത്ഥമായി ശ്രമം നടത്തണമെന്ന് സിപിഐ കൂരാച്ചുണ്ട് ബ്രാഞ്ച് സമ്മേളനം ആവശ്യപ്പെട്ടു. ബൈപാസ് റോഡിനുവേണ്ടി കൂരാച്ചുണ്ടിലെ ജനങ്ങൾ കാത്തിരിപ്പ് തുടങ്ങിയിട്ട് കാലങ്ങളായി. റോഡിന്‍റെ ആദ്യ ഘട്ടത്തിന്‍റെ ഭാഗമായുള്ള അലൈൻമെന്‍റ്, പൈലിംഗ് തുടങ്ങിയവ നടത്തിയെങ്കിലും സർക്കാർ ഭാഗത്തു നിന്നും തുടർനടപടികളൊന്നും ഉണ്ടായിട്ടില്ല. ഒട്ടുമിക്കദിവസങ്ങളിലും കൂരാച്ചുണ്ട് അങ്ങാടി ഗതാഗതക്കുരുക്കിൽ വീർപ്പുമുട്ടുന്നുണ്ട്. മാത്രമല്ല ഇവിടെ വാഹന പാർക്കിംഗ് സംവിധാനക്കുറവും റോഡിന്റെ വീതി കുറവുമെല്ലാമാണ് കാരണമാകുന്നത്. കൂരാച്ചുണ്ടിലൂടെ കടന്നു പോകുന്ന മലയോര ഹൈവേയുടെ നിർമാണത്തിന്‍റെ ഭാഗമായുള്ള ടൗണിലെ പ്രവർത്തികൾ വൈകുന്നത് ഗതാഗതക്കുരുക്കിന് ആക്കം വർധിപ്പിക്കുന്നുണ്ട്.ഈ അവസ്ഥയിൽ ബൈപാസ് റോഡ് യാഥാർത്യമാക്കാൻ എത്രയും വേഗം നടപടി വേണമെന്നും സമ്മേളനം ആവശ്യപ്പെട്ടു. കെ.വി. കുഞ്ഞപ്പൻ നഗറിൽ നടന്ന സമ്മേളനംടി.കെ. ശിവദാസൻ അദ്ധ്യക്ഷത വഹിച്ചു.മുരളി ,സി.കെ ബാലകൃഷ്ണൻ,എ.കെ. പ്രേമൻ, പി.ടി. തോമസ്, വിനു മ്ലാക്കുഴിയിൽ, ഗോപാലൻ മണ്ടോപ്പാറ, പീറ്റർ കിങ്ങിണിപ്പാറ,എന്നിവർ പ്രസംഗിച്ചു.പുതിയ ഭാരവാഹികളായിഎ.കെ. പ്രേമൻ (സെക്രട്ടറി)ടി.കെ.ശിവദാസൻ (അസി. സെക്രട്ടറി) എന്നിവരെ തെരഞ്ഞെടുത്തു.

എന്‍റെ കേരളം പ്രദര്‍ശന മേളയില്‍ താരമായി കൃഷിവകുപ്പ് സ്റ്റാളുകള്‍

കോഴിക്കോട്: രണ്ടാം പിണറായി സര്‍ക്കാറിന്‍റെ നാലാം വാര്‍ഷിക ആഘോഷങ്ങളോട് അനുബന്ധിച്ച് കോഴിക്കോട് ബീച്ചില്‍ ആരംഭിച്ച എന്‍റെ കേരളം പ്രദര്‍ശന വിപണന മേളകളയില്‍ ഒരുക്കിയ കൃഷിവകുപ്പിന്‍റെ സ്റ്റാളുകള്‍ ശ്രദ്ധേയമായി. മുഖ്യമന്ത്രി പിണറായി വിജയന്‍ ഉദ്ഘാടനം ചെയ്ത മേളയില്‍ തീം പവലിയനില്‍ ഒരുക്കിയിരിക്കുന്ന കൃഷി വകുപ്പ് സ്റ്റാളില്‍ ഡിജിറ്റല്‍ അഗ്രികള്‍ച്ചര്‍ മേഖലയിലെ പ്രവര്‍ത്തനങ്ങള്‍ പൊതുജനങ്ങള്‍ക്ക് അനുഭവഭേദ്യമാകുന്ന തരത്തിലാണ് സ്റ്റാള്‍ സജ്ജികരിച്ചിരിക്കുന്നത്. ഡ്രോണ്‍ സംവിധാനത്തിന്‍റെ കൃഷിയിടത്തിലെ സാധ്യതകളെക്കുറിച്ച് കര്‍ഷകര്‍ക്കും പൊതുജനത്തിനും അവബോധം സൃഷ്ടിക്കുന്നതിനും ഡ്രോണ്‍ പ്രവര്‍ത്തനം അടുത്തറിയുന്നതിനും ലൈവ് ഡെമോണ്‍സ്ട്രഷനും സ്റ്റാളില്‍ സജ്ജീകരിച്ചിട്ടുണ്ട്. കൃഷി വകുപ്പിന്റെ സ്വന്തം ബ്രാന്‍ഡായ കേരളഗ്രോ ഉല്‍പ്പന്നങ്ങളുടെയും മില്ലറ്റ് ഉല്‍പ്പന്നങ്ങളുടെയും പ്രദര്‍ശനവും ഒരുക്കിയിട്ടുണ്ട്. കാര്‍ഷിക സേവനങ്ങള്‍ ഒരു കുടക്കീഴിലാക്കി നിലവില്‍ വന്ന കതിര്‍ ആപ്പ് രജിസ്‌ട്രേഷന്‍ ഹെല്‍പ് ഡെസ്‌ക്കും കൃഷി വകുപ്പ് നടപ്പിലാക്കുന്ന വിവിധ ഫ്‌ളാഗ്ഷിപ്പ് പദ്ധതികളെ സംബന്ധിച്ച വിവരങ്ങള്‍ ലഭ്യമാക്കുന്ന ഹെല്‍പ്പ് ഡസ്‌കുകളും തീം പവലിയനില്‍ ഒരുക്കിയിരിക്കുന്നത് സന്ദര്‍ശകര്‍ക്ക് ഏറെ ഗുണപ്രദമായി. വിളകളിലെ രോഗ കീട നിയന്ത്രണം സംബന്ധിച്ച് സമഗ്രമായ വിവരങ്ങള്‍ ലഭ്യമാക്കുന്ന ക്രോപ്പ് ഹെല്‍ത്ത് ക്ലിനിക്കും പ്ലാന്റ് ഡോക്ടര്‍ സേവനവും സ്റ്റാളില്‍ സജ്ജീകരിച്ചിട്ടുണ്ട്. ഇതിന് പുറമെ 1500 സ്‌ക്വയര്‍ ഫീറ്റില്‍ കൃഷി വകുപ്പ് കോഴിക്കോട് ജില്ല ഒരുക്കിയിരിക്കുന്ന നടീല്‍ വസ്തുക്കളുടെയും, കാര്‍ഷിക മൂല്യ വര്‍ദ്ധിത ഉത്പന്നങ്ങളുടെയും പ്രദര്‍ശന വിപണന മേളയും പൊതുജന പങ്കാളിത്തം കൊണ്ട് സജീവമായി. ബയോ ഫാര്‍മസി, കേരളഗ്രോ ബ്രാന്‍ഡ് ഉല്‍പ്പന്നങ്ങളുടെയും മില്ലറ്റുകളുടെയും വിപണന സ്റ്റാളുകള്‍, വിവിധയിനം നെല്‍വിത്തുകളുടെ അപൂര്‍വ ശേഖരത്തിന്റെ പ്രദര്‍ശനം, വിവിധ ബ്ലോക്ക് ലെവല്‍ ഫെഡറേറ്റഡ് ഓര്‍ഗനൈസേഷനുകളുടെയും ഫാമുകളുടെയും പ്രദര്‍ശന സ്റ്റാളുകള്‍, വിവിധയിനത്തില്‍പെട്ട നാളികേരങ്ങളുടെ പ്രദര്‍ശനം എന്നിവ കൊണ്ട് സ്റ്റാളുകള്‍ എല്ലാം തന്നെ സജീവമായി. കാര്‍ഷിക യന്ത്രങ്ങളുടെയും ഉപകരണങ്ങളുടെയും പ്രദര്‍ശനവുമായി കാര്‍ഷിക എന്‍ജിനീയറിങ് വിഭാഗം ഒരുക്കിയ സ്റ്റാള്‍ ഏറെ ജനശ്രദ്ധ ആകര്‍ഷിച്ചു. വിവിധ കാര്‍ഷിക ഉത്പന്നങ്ങള്‍ വാങ്ങുന്നതിനുള്ള സൗകര്യവും ഇവിടെ സജ്ജീകരിച്ചിട്ടുണ്ട്.

കർഷകർക്കാശ്വാസം; നടക്കൽ തോട് ശുചീകരിച്ചു

മുക്കം: നിരവധി കർഷകർക്കാശ്വാസമായി കാരക്കുറ്റി - നടക്കൽ - കുറ്റിപ്പൊയിൽ തോട് ശുചീകരിച്ചു. മഴക്കാല മുന്നൊരുക്കങ്ങളുടെ ഭാഗമായാണ് തോടിന്‍റെ ഒരു ഭാഗം കലുങ്കിനോട് ചേർന്ന് ശുചീകരിച്ചത്.നിലവിൽ മുകൾ ഭാഗത്ത് നിന്നും കല്ലും മണ്ണും ചപ്പുചവറുകളുമൊലിച്ചെത്തി സ്വാഭാവിക ഒഴുക്ക് തടസ്സപ്പെടുന്ന അവസ്ഥയായിരുന്നു. വെള്ളം കെട്ടി നിൽക്കുന്നത് സമീപത്തെ കിണറുകൾ കലങ്ങുന്നതിനും വയലുകളിലേക്ക് കൂടുതൽ വെള്ളം ഒലിച്ചിറങ്ങി കൃഷി ചെയ്യുന്നതിനും തടസ്സമായിരുന്നു. ഈ സാഹചര്യത്തിലാണ് വാർഡ് മെമ്പർ വി. ഷംലൂലത്തിന്‍റെ നേതൃത്വത്തിൽ തോട് ശുചീകരിച്ചത്. അഹമ്മദ് കുട്ടി പുളക്ക തൊടി പ്രവർത്തനങ്ങൾക്ക് നേതൃത്വം നൽകി.

ആസ്റ്റർ മിംസിൽ പിഎംആർ വിഭാഗം പ്രവർത്തനം ആരംഭിച്ചു

കോഴിക്കോട്: അസുഖങ്ങൾ കൊണ്ടും അപകടങ്ങൾ കൊണ്ടും ശരീരത്തിന്‍റെ ചലനം നഷ്ടപ്പെട്ടവർക്ക് സാധാരണ ജീവിതത്തിലേക്കുള്ള തിരിച്ച് പോക്കിന് സാധ്യമാകുന്ന കേരളത്തിലെ ഏറ്റവും മികച്ച എഐ-വിആർ സൗകര്യങ്ങളോടെയുള്ള പിഎംആർ വിഭാഗം പ്രവർത്തനം ആരംഭിച്ചു. നവീകരിച്ച പിഎംആർ വിഭാഗത്തിന്‍റെ ഉദ്ഘാടനം ഷാഫി പറമ്പിൽ എംപി നിർവഹിച്ചു. അത്യാധുനിക സജ്ജീകരങ്ങളുള്ള ആശുപത്രികളിൽ ഇത്തരം വിഭാഗങ്ങളുടെ പ്രവർത്തനവുംകൂടി വരുന്നതോടെ രോഗികൾക്ക് അത് കൂടുതൽ ആശ്വാസം നൽകുന്നതിനും വേഗത്തിൽ രോഗമുക്തി നേടുന്നതിനും കാരണമാകുമെന്ന് അദ്ദേഹം പറഞ്ഞു. ഫിസിയാട്രിസ്റ്റ് (റിഹാബിലിറ്റേഷൻ വിദഗ്ദ്ധൻ), ഒക്യുപേഷണൽ തെറാപ്പിസ്റ്റ്, ഫിസിയോതെറാപ്പിസ്റ്റ്, സ്‌പീച്ച് ആൻഡ് ലാംഗ്വേജ് തെറാപ്പിസ്റ്റ്, പ്രോസ്തറ്റിസ്റ്റ്, ഓർത്തോട്ടിസ്റ്റ്, റിഹാബിലിറ്റേഷൻ നഴ്‌സുമാർ, സൈക്കോളജിസ്റ്റ്, സാമൂഹികപ്രവർത്തകർ എന്നിവരടങ്ങിയ ടീമിലുടെ പിഎംആറിന്‍റെ പ്രവർത്തനം നടക്കുന്നത്. ചടങ്ങിൽ മുൻ ഇന്ത്യൻ ഫുട്ബോൾ താരം അനസ് എടത്തൊടിക, ആസ്റ്റർമിംസ് സിഎംഎസ് ഡോ. ഏബ്രഹാം മാമൻ, ഡോ. നൗഫൽ ബഷീർ, പിഎംആർ വിഭാഗം മേധാവി ഡോ. കെ.പി. ആയിഷ റുബീന തുടങ്ങിയവർ പങ്കെടുത്തു.

ത്രിദിന നീന്തൽ പരിശീലനം സമാപിച്ചു

തിരുവമ്പാടി : മുക്കം അഗ്നിരക്ഷാ സേനയും ജെസിഐ കാരശ്ശേരിയും സംയുക്തമായി മുങ്ങിമരണങ്ങൾ ഒഴിവാക്കുക എന്ന ലക്ഷ്യത്തോടെ സംഘടിപ്പിച്ച ത്രിദിന നീന്തൽ പരിശീലനം സമാപിച്ചു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ ഉദ്ഘാടനവും സർട്ടിഫിക്കറ്റ് വിതരണവും നിര്‍വഹിച്ചു. തിരുവമ്പാടി ഹിൽസ് സ്വിമ്മിങ് പൂളിൽ മൂന്നു ദിവസമായി നടന്ന നീന്തൽ പരിശീലന ക്യാമ്പിനാണ് സമാപനമായത് നീന്തിവാ മക്കളെ പദ്ധതിയുടെ ബ്രാൻഡ് അംബാസിഡർ റന ഫാത്തിമയുടെ നേതൃത്വത്തിലാണ് പരിശീലനം നൽകിയത്. ജെസിഐ കാരശ്ശേരി പ്രസിഡന്‍റ് മുഹമ്മദ് ആസാദ് ചടങ്ങിൽ അധ്യക്ഷനായി.

ഫ്രഷ് കട്ട് താൽക്കാലികമായി പ്രവർത്തനം നിർത്തി

താമരശേരി: കട്ടിപ്പാറ പഞ്ചായത്തിലെ ഇറച്ചിപ്പാറയിൽ പ്രവർത്തിക്കുന്ന കേരളത്തിലെ ഏറ്റവും വലിയതും കോഴിക്കോട് ജില്ലയിലെ ഏക കോഴി അറവുമാലിന്യ സംസ്കരണ ഫാക്ടറിയായ ഫ്രഷ് ക്കട്ട് താൽക്കാലികമായി അറ്റകുററ പണികൾക്കായി പ്രവർത്തനം നിർത്തിവെച്ചു. മലിനീകരണ നിയന്ത്രണ ബോർഡും, ശുചിത്വമിഷനും, ഗ്രാമ പഞ്ചായത്തും , ഡിഎല്‍എഫ്എംസിയും നിഷ്കർഷിക്കുന്ന വ്യവസ്ഥകളും,നാട്ടുകാരുടെ ആശങ്കകളും പരിഹരിച്ചതിനു ശേഷം മാത്രമേ ഫാക്ടറി തുടർന്ന് തുറന്നു പ്രവർത്തിക്കുകയുള്ളൂ. ഉദ്യോഗസ്ഥരുടെയും, ഫാക്ടറി ഉടമകളുടെയും, സമരസമിതി പ്രവർത്തകരുടെയും മേൽനോട്ടത്തിലായിരിക്കും ഫാക്ടറിയുടെ നവീകരണ പ്രവർത്തി നടത്തുകയെന്ന് മാനേജ്മെന്‍റ് വ്യക്തമാക്കി.എന്നാൽ ജില്ലയിലെ മാലിന്യ നീക്കത്തെ ഇത് ബാധിക്കില്ലെന്നും പകരം സംവിധാനം ഏർപ്പെടുത്തിയിട്ടുണ്ടെന്നും ഫാക്ടറി മാനേജ്മെന്‍റ് വ്യക്തമാക്കി.പ്രശ്നങ്ങൾ പരിഹരിച്ച് എത്രയും വേഗത്തിൽ പ്ലാന്‍റ് തുടർന്ന് പ്രവർത്തിക്കുന്നതാണെന്നും മാനേജ്മെന്‍റ് അറിയിച്ച. 2019 മുതലാണ് ഫ്രഷക്കട്ട് ഫാക്ടറിയുടെ പ്രവർത്തനം ആരംഭിച്ചത്.

സെമിനാർ നടത്തി

കോഴിക്കോട്: ലോകത്ത് ഏറ്റവും മികച്ച ഭരണഘടനയുണ്ടായിട്ടും നമ്മുടെ രാജ്യത്ത് ജനാധിപത്യവും നിയമവ്യവസ്ഥയും പരീക്ഷണം നേരിടുകയാണെന്ന് മുസ്ലിംലീഗ് ദേശീയ ഓർഗനൈസിംഗ് സെക്രട്ടറി ഇ.ടി. മുഹമ്മദ് ബഷീർ അഭിപ്രായപ്പെട്ടു. ജനാധിപത്യം ഉപയോഗിച്ചു കൊണ്ട് ഫാഷിസം എങ്ങനെ നടപ്പാക്കാം എന്നതാണ് ഇന്ത്യയിലെ ഭരണകൂടം തെളിയിച്ചു കൊണ്ടിരിക്കുന്നത്. ജനാഭിലാഷമല്ല കോർപ്പറേറ്റ് ഭീമൻമാരുടെ ഇഛയാണ് ഭരണകൂടത്തിന് പ്രധാനം എന്നു വന്നിരിക്കുന്നു. ഇതിനെതിരെ ജനങ്ങൾ തന്നെ രംഗത്തിറങ്ങണം -അദ്ദേഹം പറഞ്ഞു. കൾച്ചറൽ ഇനിഷ്യേറ്റീവ് കേരള കോഴിക്കോട്ട് സംഘടിപ്പിച്ച വംശഹത്യയും എമ്പുരാനും സെമിനാർ ഉദ്ഘാടനം ചെയുകയായിരുന്നു അദ്ദേഹം. സർക്കാരിനെതിരെ സംസാരിക്കുന്നവർക്കെതിരെ അന്വേഷണ ഏജൻസികളെ വിട്ട് പീഡിപ്പിക്കുന്ന സിനിമയിലെ രംഗം യഥാർത്ഥ ജീവിതത്തിൽ ആവർത്തിക്കുന്നതാണ് നാം കാണുന്നത്. ഇതിൽ അവർക്ക് ഒട്ടും ലജ്ജ തോന്നാത്തത്അൽഭുതമില്ലെന്നും അദ്ദേഹം പറഞ്ഞു. കൾച്ചറൽ ഇനിഷ്യേറ്റീവ് സംസ്ഥാന പ്രസിഡന്‍റ് വി.കെ. മൂസ അധ്യക്ഷത വഹിച്ചു.

ലഹരിക്കെതിരേ എക്‌സൈസ് സെമിനാര്‍

കോഴിക്കോട്: പുതുതലമുറയുടെ മാനസികാരോഗ്യം സംരക്ഷിക്കേണ്ടതിന്‍റെ ആവശ്യകതയും ലഹരി ഉപയോഗത്തിന്‍റെ പ്രത്യാഘാതങ്ങളും ചര്‍ച്ച ചെയ്ത് എന്‍റെ കേരളം പ്രദര്‍ശന-വിപണന മേളയിലെ സെമിനാര്‍. "പുതുതലമുറയും മാനസികാരോഗ്യവും' എന്ന വിഷയത്തില്‍ എക്‌സൈസ് വകുപ്പാണ് സെമിനാര്‍ സംഘടിപ്പിച്ചത്. പുതുതലമുറയാകെ വഴിതെറ്റിയവരല്ലെന്നും അവരുടെ നന്മകളെ വിലകുറച്ച് കാണരുതെന്നും സെമിനാര്‍ അഭിപ്രായപ്പെട്ടു. മാനസികാരോഗ്യം തകരുമ്പോഴാണ് കുട്ടികളും മുതിര്‍ന്നവരും ഉള്‍പ്പടെ ലഹരി പോലുള്ളവയില്‍ അഭയം തേടുന്നതെന്നും പുതുതലമുറയുടെ മാനസികാരോഗ്യം സംരക്ഷിക്കാന്‍ സാമൂഹികപരമായ ഇടപെടല്‍ കൂടി ആവശ്യമുണ്ടെന്നും സെമിനാര്‍ വിലയിരുത്തി.പുതിയ തലമുറയുടെ ചിന്തയും അഭിപ്രായവും പരിഗണിക്കണമെന്ന് സെമിനാര്‍ ഉദ്ഘാടനം ചെയ്ത കെ.എം. സച്ചിന്‍ദേവ് എംഎല്‍എ അഭിപ്രായപ്പെട്ടു. സമൂഹത്തില്‍ പിടിമുറുക്കിയ ലഹരിക്കെതിരെ ഒറ്റക്കെട്ടായി നിലകൊള്ളണമെന്നും അദ്ദേഹം പറഞ്ഞു.സെമിനാറില്‍ സാമൂഹികനീതി വകുപ്പ് മുന്‍ അസി. ഡയറക്ടര്‍ അഷ്‌റഫ് കാവില്‍, വിമുക്തി ഡി അഡിക്ഷന്‍ സെന്‍റര്‍ സൈക്യാട്രിസ്റ്റ് ഡോ. വനതി സുബ്രഹ്‌മണ്യം, ഫാറൂഖ് കോളജ് ജേണലിസം വിദ്യാര്‍ഥി അര്‍ഷിന്‍ സനീന്‍ എന്നിവര്‍ വിഷയമവതരിപ്പിച്ചു.

ഡോ. സി. രഘുനാഥന്‍ നായര്‍ക്കും സുനില്‍കുമാര്‍ ഗുരിക്കള്‍ക്കും പുരസ്‌കാരം

കോഴിക്കോട്: ചെലവൂര്‍ ഉസ്താദ് സിഎം ഗുരുക്കളുടെ സ്മരണാര്‍ഥം ആയുര്‍വേദ ചികിത്സയിലെ മികവുറ്റ േസവനത്തിന് ഏര്‍പ്പെടുത്തിയ ഭിഷക് പ്രതിഭ അവാര്‍ഡ് ഡോ. സി. രഘുനാഥന്‍ നായര്‍ക്ക്. ആയോധന പ്രതിഭ അവാര്‍ഡ് കെ. സുനില്‍കുമാര്‍ ഗുരിക്കള്‍ക്കും ലഭിച്ചു. 25000 രൂപ വീതവും പ്രശസ്തിപത്രവുമാണ് പുരസ്‌കാരം. വിദ്യ പ്രതിഭ അവാര്‍ഡുകളും കളരി വിദ്യാര്‍ഥി പ്രതിഭാ അവാര്‍ഡുകളും ഇതോടൊപ്പം പ്രഖ്യാപിച്ചിട്ടുണ്ട്. ഇന്നു നടക്കുന്ന അനുസമരണ സമ്മേളനത്തില്‍ അവാര്‍ഡുകള്‍ വിതരണം െചയ്യുമെന്ന് ഷാഫി ദവാ ഖാന ജനറല്‍ മാനേജര്‍ എ.മൂസ ഹാജി, ചെയര്‍നോന്‍ ഡോ. അഹീര്‍ അലി, ജഡ്ജിംഗ് കമ്മിറ്റി ചെയര്‍മാന്‍ ഡോ. മനോജ് കാളൂര്‍ എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

ജപ്പാൻ കുടിവെള്ള പദ്ധതി കുഴി കാരണം കച്ചവടം മുടങ്ങി; കേസെടുത്തു

കോഴിക്കോട് : പേരാമ്പ്രയിൽ ജപ്പാൻ കുടിവെള്ള പദ്ധതിക്ക് വേണ്ടിയെടുത്ത വലിയ കുഴി കാരണം വ്യാപാരിക്ക് ഒരു മാസമായി കച്ചവടം നടത്താൻ നിവൃത്തിയില്ലെന്ന പരാതിയിൽ മനുഷ്യാവകാശ കമ്മീഷൻ കേസെടുത്തു. ജല അതോറിറ്റി കോഴിക്കോട് എക്സിക്യൂട്ടീവ് എന്‍ജിനീയര്‍ പരാതി പരിശോധിച്ച് 10 ദിവസത്തിനകം വിശദീകരണം നൽകണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ടു. 21 ന് കോഴിക്കോട് നടക്കുന്ന സിറ്റിംഗിൽ കേസ് പരിഗണിക്കും. ദൃശ്യമാധ്യമ വാർത്തയുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിലാണ് നടപടി. തച്ചറാത്ത് കുഞ്ഞിക്കണ്ണൻ എന്നയാളുടെ ചെറിയ കടമുറിയ്ക്ക് മുന്നിലാണ് വലിയ കുഴിയെടുത്തത്. നാലു ദിവസത്തിനകം കുഴിമൂടാമെന്ന ഉറപ്പാണ് നൽകിയത്. എന്നാൽ ഒരു മാസമായിട്ടും കുഴി മൂടിയിട്ടില്ല. ഇതിന് സമീപമുള്ള ട്രാൻസ്ഫോർമർ കുഴിയിലേക്ക് മറിഞ്ഞു നിൽക്കുന്നു. പഞ്ചായത്തിൽ അടക്കം പരാതി നൽകിയിട്ടും നടപടിയുണ്ടായില്ല. ഒരു മാസമായി കടയിലേക്ക് ആളുകൾക്ക് കയറാനാവുന്നില്ലെന്നാണ് പരാതിയില്‍ പറയുന്നത്.

നഴ്‌സസ് വാരാഘോഷത്തിന് തുടക്കമായി

കോഴിക്കോട്: ജില്ലാ നഴ്‌സസ് വാരാഘോഷത്തിനു തുടക്കമായി.രാവിലെ മുതലക്കുളം മൈതാനിയില്‍നിന്ന് ആരംഭിച്ച വിളംബര യാത്രയോടെയാണ് വാരാഘോഷം തുടങ്ങിയത്. വിളംബര ജാഥയില്‍ നൂറ് കണക്കിന് നഴ്‌സുമാര്‍ അണിനിരന്നു. റാലിക്ക് ശേഷം ലഹരി വിരുദ്ധ സന്ദേശമുയര്‍ത്തി ബലൂണുകള്‍ പറത്തി.ജില്ലാ നഴ്‌സിംഗ് ഓഫീസര്‍ പദ്മിനി.സി പതാക ഉയര്‍ത്തി. ടൗണ്‍ ഹാളില്‍ നടന്ന ചടങ്ങില്‍ സബ് കളക്ടര്‍ ഹര്‍ഷില്‍ ആര്‍.മീണ ഉദ്ഘാടനം ചെയ്തു. ഡിഎംഒ ഡോ. എന്‍. രാജേന്ദ്രന്‍ അധ്യക്ഷത വഹിച്ചു.സിന്ധു ഡി. നായര്‍, പി.ജി സന്തോഷ,പി.സി സുനിത, ശോഭന കുമാരി ,ഗീതാ കുമാരി എ, ഇന്ദിര ടി, ഷീബ എല്‍.വി, വനജ കെ, ഷീബ പി, സോളി ജോസഫ്, ബെസ്സി ജോസഫ്, അരുണ്‍കുമാര്‍ പി വി എന്നിവര്‍ സംസാരിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]