ADVERTISEMENT

ADVERTISEMENT

സ്‌പെഷല്‍ സ്‌കൂള്‍ ബാഡ്മിന്‍റണ്‍ ടൂര്‍ണമെന്‍റ് : അമ്പൂരി നവജ്യോതിയ്ക്ക് തിളക്കം

വെള്ളറട: ചെങ്ങന്നൂരിൽ നടന്ന ഡോ. എ.പി.ശ്രീകുമാര്‍ മെമ്മോറിയല്‍ സൗത്ത് കേരള സ്‌പെഷല്‍ സ്‌കൂള്‍ ബാഡ്മിന്‍റണ്‍ ടൂര്‍ണമെന്‍റില്‍ അമ്പൂരി നവജ്യോതിയ്ക്ക് തിളക്കം.

പതിനാറിലധികം ടീമുകളുമായി മത്സരിച്ചതില്‍ ഡബിള്‍സ് ഒന്നാം സ്ഥാനവും ട്രോഫിയും കാഷ് അവാര്‍ഡും സിംഗിള്‍സ് മത്സരത്തില്‍ ഒന്നാം സ്ഥാനവും കരസ്ഥമാക്കി.

നവ ജ്യോതിയുടെ അദ്വൈത്- അജോ ടീമിന് ഡബിള്‍സിലും അദ്വൈതിന് സിംഗിള്‍സ് മത്സരത്തിലുമാണ് ഒന്നാം സ്ഥാനം.

ADVERTISEMENT

പഞ്ചായത്ത് രക്ഷാ യാത്ര സംഘടിപ്പിച്ചു

പാറശാല: പാറശാല ഗ്രാമ-ബ്ലോക്കു പഞ്ചായത്തുകള്‍ ഭരിക്കുന്ന എല്‍ഡിഎഫ് ഭരണസമിതിയുടെ അഴിമതിക്കെതിരെ പാറശാല - പരശുവയ്ക്കല്‍ മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തില്‍ പഞ്ചായത്ത് രക്ഷാ യാത്ര സംഘടിപ്പിച്ചു. പഞ്ചായത്ത് രക്ഷാ യാത്ര പവതിയാന്‍വിളയില്‍ കെപിസിസി സെക്രട്ടറി ഡോ.ആര്‍.വല്‍സലന്‍ ഉത്ഘാടനം ചെയ്തു. ജാഥ ക്യാപ്റ്റന്‍മാരായ കൊറ്റാമം ലിജിത്ത്, ജെ.കെ. ജസ്റ്റിന്‍രാജ്, എ.ടി.ജോര്‍ജ് , പാശാല സുധാകരന്‍, കൊറ്റാമം വിനോദ്, അഡ്വ.എസ്.ജോണ്‍, കൊല്ലിയോടു സത്യനേശന്‍ , വേലപ്പന്‍ നായര്‍, കൊറ്റാമം മോഹനന്‍, മധു, അരുണ്‍, ലെല്‍വിന്‍ ജോയ്, പവതിയന്‍വിള സുരേന്ദ്രന്‍ എന്നിവര്‍ പ്രസംഗിച്ചു.

കനത്ത മഴയിൽ കള്ളിക്കാട് ജംഗ്ഷൻ വെള്ളത്തിലായി; പലയിടത്തും നാശനഷ്ടം

കള്ളിക്കാട് : കഴിഞ്ഞ രണ്ടു ദിവസമായി പെയ്ത മഴയിൽ കള്ളിക്കാട് ജംഗ്ഷൻ വെള്ളത്തിലായി. പലയിടത്തും നാശനഷ്ടമുണ്ടായി. മലയോര ഹൈവ കടന്നുപോകുന്ന സ്ഥലമാണ് കള്ളിക്കാട് ജംഗ്ഷൻ. ഇവിടെയാണ് മണിക്കൂറുകളോളം വെള്ളം കെട്ടി നിന്നത്. വാഹനങ്ങളിലും കച്ചവട സ്ഥാപനങ്ങളിലും വെള്ളം കയറി. പഞ്ചായത്തിലെ പല ഭാഗത്തും നാശനഷ്ടമുണ്ട്. തുറന്ന ജയിൽ അനക്‌സ് ഭാഗത്തെ റോഡിൽ മരം വീണതോടെ ഇതുവഴിയുള്ള ഗതാഗതവും തടസ്സപ്പെട്ടു. വാഴിച്ചൽ, പേരെക്കോണം, വാവോട്, മൈലക്കര, പന്ത , മരകുന്നം എന്നിവിടങ്ങളിലും മരങ്ങൾ കടപുഴകി വീണു. തോട് കരകവിഞ്ഞതോടെ വീടുകളിലും കൃഷിയിടങ്ങളിലും വെള്ളം കയറി. നെയ്യാർഡാമിലും നല്ല നീരൊഴുക്കാണ്. ഡാം തുറന്നുവിട്ടതിനാൽ വെള്ളപ്പൊക്ക ഭീഷണിയില്ല. കുറ്റിച്ചൽ പരുത്തിപ്പള്ളി ഭാഗത്തെ ശാസ്താക്ഷേത്രത്തിൽ വെള്ളം കയറി. ചപ്പാത്ത്, ഉത്തരം കോട്, മലവിള, തച്ചൻകോട് തുടങ്ങിയ ഇടങ്ങളിലും നാശമുണ്ടായി. കാര്യോട്, കുമ്പിൾമൂട് തോട് നിറഞ്ഞുകവിഞ്ഞു. ഇരുകരകളിലെയും കൃഷിയിടങ്ങൾക്ക് നാശം സംഭവിച്ചു. കാപ്പുകാട് ഭാഗത്ത് നിരവധി വീടുകളിൽ വെള്ളം കയറി. മൈലക്കരയിൽ വാഴതോപ്പുകളിൽ വെള്ളം കയറിയതോടെ വൻ നാശനഷ്ടവും സംഭവിച്ചു.

വേട്ടമുക്ക് പാർക്ക് നവീകരണം തുടങ്ങി

പേരൂര്‍ക്കട: വേട്ടമുക്കിലെ പാര്‍ക്കിന്‍റെ നവീകരണ പ്രവര്‍ത്തനങ്ങളുടെ ഉദ്ഘാടനം വി.കെ പ്രശാന്ത് എംഎല്‍എ നിര്‍വ്വഹിച്ചു. ആസ്തി വികസന ഫണ്ടില്‍ നിന്നു 15 ലക്ഷം രൂപ ചെലവിട്ടാണ് പാര്‍ക്ക് നവീകരിക്കുന്നത്. പാര്‍ക്കിന്‍റെ ചുറ്റുമതില്‍ പൂര്‍ണമായും പുനര്‍നിര്‍മിക്കും. ചവിട്ടുപടികളില്‍ ഗ്രാനൈറ്റ് സ്ഥാപിക്കും. പ്രകാശ സംവിധാനം, ഊഞ്ഞാല്‍, ഇരിപ്പിടങ്ങള്‍ എന്നിവയും പാര്‍ക്കില്‍ ഒരുക്കും. രണ്ടുമാസത്തിനുള്ളില്‍ പാര്‍ക്കിന്‍റെ നവീകരണം പൂര്‍ത്തീകരിക്കുമെന്നും എംഎല്‍എയുടെ ഓഫീസ് അറിയിച്ചു. താലൂക്ക് ലൈബ്രറി കൗണ്‍സില്‍ അംഗം കെ.ആര്‍ മധുസൂദനന്‍, പൊതുജന സമാജം ഗ്രന്ഥശാല പ്രസിഡന്‍റ് കെ.എന്‍ ആനന്ദന്‍ എന്നിവര്‍ പങ്കെടുത്തു.

വൈദ്യുത ശ്മശാനം തകരാറിലായിട്ട് രണ്ടു വർഷം

മാറനല്ലൂർ: വൈദ്യുതശ്മശാനം തകരാറിലായിട്ട് രണ്ടു വർഷമായിട്ടും ശരിയാക്കിയെടുക്കാനുള്ള നടപടി എങ്ങുമെത്തിയില്ല. വാതകശ്മശാനത്തിന്‍റെ പ്രവർത്തനം മാത്രമാണ് ഇപ്പോൾ മാറനല്ലൂരിലെ പൊതുശ്മശാനത്തിൽ നടക്കുന്നത്. വൈദ്യുതശ്മശാനം തകരാറിലായത് സംസ്‌കാരത്തിനായി എത്തുന്നവരെ ബുദ്ധിമുട്ടിലാക്കിയിരിക്കുകയാണ്. ഇതു തകരാറിലായിട്ട് രണ്ടു വർഷം പിന്നിട്ടെങ്കിലും അറ്റകുറ്റപ്പണികൾ നടത്താൻ പഞ്ചായത്തധികൃതർ തയ്യാറാകുന്നില്ല. ഒരു മൃതദേഹം സംസ്‌കരിക്കുന്നതിന് രണ്ടു മണിക്കൂർ വേണ്ടിവരും. ഒരു ദിവസം അഞ്ചിൽക്കൂടുതൽ മൃതദേഹങ്ങൾ സംസ്‌കരിക്കാൻ കഴിയില്ല. കൂടുതൽ മൃതദേഹങ്ങൾ സംസ്‌കരിക്കേണ്ട സാഹചര്യം വന്നാൽ മറ്റെവിടെയെങ്കിലും പോകേണ്ട അവസ്ഥയാണുള്ളത്. കഴിഞ്ഞ ദിവസങ്ങളിൽ മാറനല്ലൂരിലെ പൊതുശ്മശാനത്തിൽ പത്തിൽ കൂടുതൽ മൃതദേഹങ്ങളാണ് സംസ്‌കാരത്തിനായി എത്തിച്ചത്. പലർക്കും തൈക്കാട് ശാന്തികവാടത്തിലേക്ക് മൃതദേഹങ്ങൾ കൊണ്ടുപോകേണ്ടിവന്നു. പഞ്ചായത്തിലെ മലവിള കുക്കിരിപാറയ്ക്കു സമീപം ഒരേക്കർ അറുപതിയഞ്ച് സെന്‍റ് സ്ഥലത്താണ് വൈദ്യുതശ്മശാനം 2020 ൽ പ്രവർത്തനം തുടങ്ങിയത്. കോവിഡ് കാലത്ത് മൃതദേഹങ്ങൾ സംസ്‌കരിക്കാൻ കഴിയാതെവന്നതു കാരണമാണ് വൈദ്യുതശ്മശാനത്തോടൊപ്പം വാതകശ്മശാനവും പ്രവർത്തനം തുടങ്ങിയത്. ജില്ലാപ്പഞ്ചായത്തിന്‍റെ ഫണ്ടും പഞ്ചായത്തിന്റെ തനത് ഫണ്ടും ചേർത്ത് വാതകശ്മശാനം പ്രവർത്തനമാരംഭിച്ചു. വാതകശ്മശാനത്തിന്റെ പ്രവർത്തനം തുടങ്ങി ആഴ്ചകൾ പിന്നിട്ടപ്പോൾത്തന്നെ വൈദ്യുതശ്മശാനം തകരാറിലായി. മെഷീനുകൾക്ക് കേടുപാട് സംഭവിച്ചതു കാരണം അറ്റകുറ്റപ്പണികൾ നടത്തുന്നതിന് ഭീമമായ തുക വേണ്ടിവരും. അതു കണ്ടെത്താൻ കഴിയാത്തതിനാലാണ് വൈദ്യുതശ്മശാനം പ്രവർത്തിപ്പിക്കാൻ കഴിയാതെപോകുന്നതെന്നാണ് പഞ്ചായത്തധികൃതർ പറയുന്നത്. മാറനല്ലൂരിൽ പൊതുശ്മശാനം യാഥാർഥ്യമായത് നാട്ടുകാർക്കും സമീപ പഞ്ചായത്തുകളിലുള്ളവർക്കും ഏറെ ആശ്വാസമായിരുന്നു. സംസ്‌കാരം നടത്താനെത്തുമ്പോൾ കാത്തിരിക്കേണ്ടിവരുന്നതും മടങ്ങിപ്പോകേണ്ടിവരുന്നതും ഒഴിവാക്കാൻ വൈദ്യുതശ്മശാനത്തിന്‍റെ പ്രവർത്തനംകൂടി ആരംഭിക്കണമെന്ന് നാട്ടുകാർ ആവശ്യപ്പെടുന്നു.

കാട്ടാക്കട ഡിപ്പോയിൽ നിന്നും പുതിയ സർവീസ് തുടങ്ങി

കാട്ടാക്കട: കെഎസ്ആർടിസി കാട്ടാക്കട ഡിപ്പോയിൽ നിന്നും സർവീസ് ആരംഭിക്കുന്ന പുതിയ ബസുകളുടെ ഫ്ലാഗ് ഓഫും ഇ-ഓഫീസ് ഉദ്‌ഘാടനവും ഐ.ബി.സതീഷ് എംഎൽഎ നിർവഹിച്ചു. കാട്ടാക്കട പഞ്ചായത്ത് പ്രസിഡന്‍റ് കെ.അനിൽകുമാർ അധ്യക്ഷനായി. മൂന്ന് ബസുകളിൽ ഒരെണ്ണം നിലവിലെ അമൃത ആശുപത്രി സർവീസിനും രണ്ട് ബസുകൾ നെടുമങ്ങാട്, പൂവാർ ഫാസ്റ്റ് സർവീസിനുമായാണ് ഉപയോഗിക്കുക. കോർപ്പറേഷന്‍റെ ആധുനികീകരണത്തിന്‍റെ ഭാഗമായാണ് പേപ്പർരഹിത ഇടപാടുകൾക്കായി ഇ- ഓഫീസ് സംവിധാനം വരുന്നതെന്ന് കെഎസ്ആർടിസി സിഎംഡി പി.എസ്.പ്രമോദ് ശങ്കർ പറഞ്ഞു. പഞ്ചായത്ത് വൈസ് പ്രസിഡൻറ് എ.മഞ്ജുഷ, പഞ്ചായത്ത് അംഗങ്ങൾ, ഉദ്യോഗസ്ഥർ തുടങ്ങിയവർ സംസാരിച്ചു.

നഗരത്തിൽ ഇന്ന് ഗതാഗത നിയന്ത്രണം

വലിയതുറ: രാഷ്ടപതിയുടെ സന്ദര്‍ശനത്തോടനുബന്ധിച്ചുളള റിഹേഴ്‌സലുമായി ബന്ധപ്പെട്ട് തിരുവനന്തപുരം നഗരത്തില്‍ ഇന്ന് ഗതാഗത നിയന്ത്രണം. ഇന്ന് രാവിലെ 11 മുതൽ ശംഖുംമുഖം -ഓള്‍സെയിന്‍റ്സ് - ചാക്ക - പേട്ട - ജനറല്‍ ആശുപത്രി - ആശാന്‍ സ്‌ക്വയര്‍ -വേള്‍ഡ് വാര്‍ മ്യൂസിയം -വെളളയമ്പലം -കവടിയാര്‍ റോഡിലും , ശംഖുംമുഖം-വലിയതുറ , പൊന്നറ , കല്ലുംമൂട്-ഈഞ്ചയ്ക്കല്‍-അനന്തപുരി ആശുപത്രി-ഈഞ്ചയ്ക്കല്‍-മിത്രാനന്ദപുരം-എസ്പി ഫോര്‍ട്ട്-ശ്രീകണ്‌ഠേശ്വരം പാര്‍ക്ക്-തകരപ്പറമ്പ് മേല്‍പ്പാലം-ചൂരക്കാട്ടുപാളയം-തമ്പാനൂര്‍ ഫ്‌ളൈ ഓവര്‍-തൈക്കാട്-വഴുതയ്ക്കാട്-വെളളയമ്പലം റോഡിലും , വെളളയമ്പലം-മ്യൂസിയം-കോര്‍പ്പറേഷന്‍ ഓഫീസ് -രക്തസാക്ഷി മണ്ഡപം-ബേക്കറി ജങ്ഷന്‍-വിമന്‍സ് കോളജ് റോഡിലും കവടിയാര്‍-കുറവന്‍കോണം-പട്ടം-കേശവദാസപുരം-ഉളളൂര്‍-ആക്കുളം-കുഴിവിള-ഇന്‍ഫോസിസ്-കഴക്കൂട്ടം-വെട്ടുറോഡ് റോഡിലും ഗതാഗത നിയന്ത്രണമേർപ്പെടുത്തി. വിമാനത്താവളത്തിലും റയില്‍വേ സ്റ്റേഷനിലേയ്ക്കും വരുന്ന യാത്രക്കാര്‍ മുന്‍കൂട്ടി യാത്രകള്‍ ക്രമീകരിക്കേണ്ടതാണ്. കൂടുതൽ വിവരങ്ങള്‍ അറിയുന്നതിന് 9497930055 , 0471-25588731 എന്നീ നമ്പരുകളില്‍ ബന്ധപ്പെടാവുന്നതാണ്.

യുവാക്കളെ കൊലപ്പെടുത്താന്‍ ശ്രമം: ഒന്നാംപ്രതി പിടിയില്‍

പേരൂര്‍ക്കട: യുവാക്കളെ കുത്തിക്കൊലപ്പെടുത്താന്‍ ശ്രമിച്ച സംഘത്തിലെ ഒന്നാം പ്രതി പിടിയിൽ. വിളവൂര്‍ക്കല്‍ വിഴവൂര്‍ പെന്തക്കോസ്ത് പള്ളിക്കു സമീപം ചരുവിള വീട്ടില്‍ ഫെബിന്‍ (24) ആണ് പിടിയിലായത്. പൂജപ്പുര സിഐ പി. ഷാജിമോന്‍, എസ്ഐ അഭിജിത്ത്, സിപിഒമാരായ ഉണ്ണികൃഷ്ണന്‍, അനുരാഗ് എന്നിവരാണ് പ്രതിയെ എറണാകുളത്തുനിന്നു പിടികൂടിയത്. ഈമാസം 5നാണ് നെട്ടയം കാച്ചാണി തേജസ് നഗര്‍ പൊയ്കയില്‍ വീട്ടില്‍ മുഹമ്മദ് ഹാരിസ് (23), കാച്ചാണി സ്വദേശി സെയ്ദ് മുഹമ്മദ് (22) എന്നിവരെ കുത്തിക്കൊലപ്പെടുത്താന്‍ ശ്രമിച്ചത്. വിഴിഞ്ഞത്ത് സ്വകാര്യാവശ്യങ്ങള്‍ക്കു പോയശേഷം രണ്ടു ബൈക്കുകളിലായി വീട്ടിലേക്കു തിരികെ പോകുകയായിരുന്നു നാലു യുവാക്കള്‍. പ്രതികള്‍ കൂട്ടംകൂടി നിന്നതു കണ്ടപ്പോള്‍ എന്തിനാണ് ഇവിടെ നില്‍ക്കുന്നതെന്ന് മുഹമ്മദ് ഹാരിസും സെയ്ദ് മുഹമ്മദും ചോദിച്ചു. ഇതില്‍ പ്രകോപിതരായ പ്രതികള്‍ യുവാക്കളുമായി വാക്കുതര്‍ക്കത്തിലേര്‍പ്പെട്ടു. നാലുപേര്‍ കമ്പുകളും ഹെല്‍മെറ്റുകളും ഉപയോഗിച്ച് യുവാക്കളെ അടിച്ചുപരിക്കേല്‍പ്പിച്ചു. ഫെബിന്‍ അരയില്‍ തിരുകിയിരുന്ന കത്തിയെടുത്ത് യുവാക്കളെ മുതുകില്‍ കുത്തിപ്പരിക്കേല്‍പ്പിച്ചു. കുത്തേറ്റവര്‍ തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സ തേടി. സംഭവത്തിൽ അന്വേഷണം നടന്നുവരുന്നതിനിടെ തൃക്കണ്ണാപുരം സ്വദേശി സഞ്ജിത്ത് (18), പുന്നയ്ക്കാമുകള്‍ സ്വദേശികളായ അരുണ്‍ (18), അലന്‍ അബി (18), മലയിന്‍കീഴ് സ്വദേശി ഗൗരി ശങ്കര്‍ (21) എന്നിവര്‍ പിടിയിലായിരുന്നു. ഫെബിനെ റിമാന്‍ഡ് ചെയ്തു.

കാട്ടുപന്നിയുടെ ആക്രമണത്തിൽ രണ്ട് വനം ജീവനക്കാർക്കു പരിക്ക്

നെയ്യാർഡാം: കാട്ടുപന്നിയുടെ ആക്രമണത്തിൽ നെയ്യാർ വൈൽഡ് ലൈഫ് സാങ്ച്വറിയിലെ രണ്ട് ജീവനക്കാർക്ക് പരിക്കേറ്റു. കോട്ടൂർ സെക്‌ഷനിലെ ബീറ്റ് ഫോറസ്റ്റ് അസിസ്റ്റന്‍റ് രാജേന്ദ്രൻ കാണി, ജീവനക്കാരനായ ഷൈജു സതീശൻ എന്നിവർക്കാണ് ആണ് ഡ്യൂട്ടി സമയത്ത് കാട്ടു പന്നിയുടെ ആക്രമണത്തിൽ പരിക്കേറ്റത്. ഇവരുടെ തലയിലും കൈയിലും വയറിലും പരിക്കുണ്ട്. ശനിയാഴ്ച രാത്രി 9നായിരുന്നു ഇവർക്കു നേരെ കാട്ടുപന്നിയുടെ ആക്രമണം ഉണ്ടായത്. ഡ്യൂട്ടിക്കിടെ കാപ്പി കുടിക്കാൻ ഇറങ്ങിയപ്പോൾ കാപ്പ് കാട് ആനപരിപാലന കേന്ദ്രത്തിന്‍റെ പ്രവേശന കവാടത്തിന് സമീപമാണ് കാട്ടുപാന്നിയുടെ ആക്രമണം ഉണ്ടായത്. രാജേന്ദ്രൻ കാണിയും ഷൈജു സതീശനും ബൈക്കിൽ സഞ്ചരിക്കവെ കാട്ടുപന്നി ആക്രമിക്കുകയായിരുന്നു. ഇരുവരും നെയ്യാർ ഡാം , ആര്യനാട് ഗവ.ആശുപത്രികളിൽ ചികിത്സതേടി . ബൈക്കിന് സാരമായ തകരാറുണ്ട്.

കേരള സ്കൂൾ കായികമേള തീം സോംഗ് പുറത്തിറക്കി

തിരുവനന്തപുരം: സംസ്ഥാന സ്കൂൾ കായികമേളയുടെ തീം സോംഗ് പുറത്തിറക്കി. പൊതുവിദ്യാലയങ്ങളിലെ വിദ്യാർഥികൾ ഗാനരചനയും സംഗീത സംവിധാനവും ഗാനാലാപനവും നിർവഹിച്ചതെന്ന സവിശേഷതയും ഈ തീം സോംഗിനുണ്ട്. "പടുത്തുയർത്താം കായിക ലഹരി' എന്ന് തുടങ്ങുന്ന ഗാനത്തിന്‍റെ രചന പാലക്കാട് പൊറ്റശേരി ഗവണ്‍മെന്‍റ് ഹയർ സെക്കൻഡറി സ്കൂളിലെ പന്ത്രണ്ടാം ക്ലാസ് വിദ്യാർഥി വി. പ്രഫുൽദാസ് ആണ്. കോട്ടണ്‍ഹിൽ ഗവണ്‍മെന്‍റ് ഗേൾസ് ഹയർ സെക്കൻഡറി സ്കൂളിലെ ഒന്പതാം ക്ലാസ് വിദ്യാർഥിനിയായ ശിവങ്കരി പി.തങ്കച്ചി സംഗീത സംവിധാനവും ഇതേ സകൂളിലെ വിദ്യാർഥികളായ നവമി ആർ.വിഷ്ണു, അനഘ എസ്.നായർ, ലയ വില്യം, എ.പി.കീർത്തന, തൈക്കാട് മോഡൽ ബോയ്സ് ഹയർ സെക്കൻഡറി സ്കൂളിലെ കെ.ആർ. നന്ദകിഷോർ, പി.ഹരീഷ്. ആർ. അഥിത്ത് എന്നിവർ ചേർന്നാണ് ഗാനം ആലപിച്ചത്. കൈറ്റ് വിക്ടേഴ്സ് വീഡിയോ പ്രൊഡക്ഷൻ ചെയ്ത ഗാനത്തിന്‍റെ ഗിറ്റാർ സുരേഷ് പരമേശ്വറും കീബോർഡ് ആന്‍റ് മിക്സിംഗ് രാജീവ് ശിവയുമാണ് നിർവഹിച്ചത്. പൊതുവിദ്യാഭ്യാസ ഡയറക്ടർ എൻ.എസ്.കെ ഉമേഷ്, ഐ.ബി സതീഷ് എംഎൽഎ തുടങ്ങിയവർ പങ്കെടുത്ത ചടങ്ങിൽ ഗാനം ഒരുക്കിയ വിദ്യാർഥികളെ മന്ത്രി അനുമോദിച്ചു.

"പ്രത്യാശയുടെ നടത്തം' സംഘടിപ്പിച്ചു

തിരുവനന്തപുരം: ലോക സ്തനാർബുദ ബോധവത്ക്കരണ ദിനത്തോടനുബന്ധിച്ച് ആശ്രയ സന്നദ്ധ സംഘടനയുടെ നേതൃത്വത്തിൽ മാനവീയം വീഥിയിൽ "പ്രത്യാശയുടെ നടത്തം' സംഘടിപ്പിച്ചു. എഐജി മെറിൻ ജോസഫ് "പ്രത്യാശയുടെ നടത്തം' ഫ്ലാഗ് ഓഫ് ചെയ്തു. ആർസിസി സർജിക്കൽ ഓങ്കോളജി വിഭാഗം മേധാവി ഡോ. പോൾ അഗസ്റ്റിൻ ബോധവത്ക്കരണ പരിപാടി ഔദ്യോഗികമായി ഉദ്ഘാടനം ചെയ്തു. ചടങ്ങിൽ ആർസിസി മുൻ അഡീഷണൽ ഡയറക്ടർ ഡോ. കുസുമകുമാരി, കമ്മ്യൂണിറ്റി മെഡിസിൻ പ്രൊഫസറും സ്നേഹിത ഡയറക്ടറുമായ ഡോ. റെജി ജോസ് എന്നിവർ ആശംസകൾ അർപ്പിച്ചു സംസാരിച്ചു. ആശ്രയയുടെ സ്ഥാപക പ്രസിഡന്‍റ് ശാന്ത ജോസിന്‍റെ നേതൃത്വത്തിൽ നടന്ന പരിപാടിയിൽ പൊതുജനങ്ങളും സന്നദ്ധപ്രവർത്തകരും ആശ്രയയുടെ സർവൈവർ സപ്പോർട്ട് ഗ്രൂപ്പിലെ അംഗങ്ങളും സജീവമായി പങ്കെടുത്തു.

തിക്കുറിശി അനുസ്മരണവും പ്രതിഭാ സംഗമവും

തിരുവനന്തപുരം: മലയാളത്തിന്‍റെ മഹാനടന്‍ തിക്കുറിശി സുകുമാരന്‍ നായരുടെ 109 ാം ജന്മദിനത്തോടനുബന്ധിച്ച് തിക്കുറിശി ഫൗണ്ടേഷന്‍റെ ആഭിമുഖ്യത്തില്‍ തിരുവനന്തപുരം പ്രസ് ക്ലബ്ബില്‍ തിക്കുറിശി അനുസ്മരണവും പ്രതിഭാ സംഗമവും സംഘടിപ്പിച്ചു. മലയാളം മിഷന്‍ മുന്‍ രജിസ്ട്രാര്‍ വിനോദ് വൈശാഖി ഉദ്ഘാടനം ചെയ്തു. ഫൗണ്ടേഷന്‍ പ്രസിഡന്‍റ് ബി. മോഹന ചന്ദ്രന്‍ നായര്‍ അധ്യക്ഷത വഹിച്ചു. സെക്രട്ടറി രാജന്‍ വി. പൊഴിയൂര്‍ തിക്കുറിശി അനുസ്മരണ പ്രഭാഷണം നടത്തി. തുടര്‍ന്ന് സാഹിത്യവും സമൂഹവും എന്ന വിഷയത്തില്‍ സെമിനാറും നടന്നു. ഫൗണ്ടേഷന്‍ അംഗം വസന്ത എസ്. പിള്ളയുടെ ശിശിരകാല പ്രണയം എന്ന പുസ്തക ചര്‍ച്ചയില്‍ എ.പി. ജിനന്‍, വി. സുരേശന്‍ നര്‍മ കൈരളി, അജിതാ രതീഷ് എന്നിവര്‍ പങ്കെടുത്തു. ഡാന്‍സര്‍ ചിത്രമോഹന്‍റെ അധ്യക്ഷതയില്‍ നടന്ന കവിയരങ്ങില്‍ തലയല്‍ മനോഹരന്‍ നായര്‍, ദിന കവി, മധു വണ്ടന്നൂര്‍, ബിനു കല്‍പ്പകശ്ശേരി, പേയാട് വിനയന്‍, വള്ളക്കടവ് ഷാഫി, വി.ഡഗ്ലസ്സ്, ഹരിഹരപുരം, ടി.എല്‍. സ്മിത, ഗീതകുമാരി, ഛായാറാണി തുടങ്ങിയവര്‍ പങ്കെടുത്തു.

വയലാർ ഗാനസാഗരവും സ്നേഹസാഗരവും: പി.എസ്.ശ്രീധരൻ പിള്ള

തിരുവനന്തപുരം: വയലാർ എന്നും വിസ്മയമാണെന്നും അദ്ദേഹം ഒരുപോലെ ഗാനസാഗരവും സ്നേഹ സാഗരവുമായിരുന്നെന്നും മുൻ ഗോവ ഗവർണർ അഡ്വ.പി.എസ്.ശ്രീധരൻ പിള്ള പറഞ്ഞു. വയലാർ രാമവർമ്മയുടെ 50-ാം ചരമവാർഷികത്തോടനുബന്ധിച്ച് വയലാർ സാംസ്കാരിക വേദിയുടെ ആഭിമുഖ്യത്തിൽ പുത്തരിക്കണ്ടം ഇ.കെ.നായനാർ പാർക്കിൽ നടക്കുന്ന ദശദിന വയലാർ സാംസ്ക്കാരികോത്സവത്തിന്‍റെ രണ്ടാം ദിനത്തിലെ സാംസ്കാരിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. പ്രശസ്ത ചലച്ചിത്ര പിന്നണിഗായകൻ ജി.വേണുഗോപാൽ മുഖ്യാതിഥിയായിരുന്നു. വയലാർ സുവർണ സ്മൃതി കവിത പുരസ്കാരം നേടിയ കവി സുമേഷ് കൃഷ്ണനും വയലാർ ചെറുകഥാ സാഹിത്യ പുരസ്കാരം നേടിയ തലയൽ മനോഹരൻ നായരും പി.എസ്.ശ്രീധരൻ പിള്ളയിൽ നിന്നും പുരസ്ക്കാരങ്ങൾ ഏറ്റുവാങ്ങി. തലയൽ മനോഹരൻ നായർ രചിച്ച ‘മുല്ലവള്ളിയും മാൻകിടവും’ നാടക പുസ്തകം പി.എസ്. ശ്രീധരൻപിള്ള ഡോ.എം.ആർ തമ്പാന് നൽകി പ്രകാശനം നിർവഹിച്ചു. ചലച്ചിത്ര ക്യാമറമാൻ പുഷ്പൻ വേണുഗോപാൽ,സംവിധായകൻ ബാലുകിരിയത്ത്,സംവിധായകൻ രാധാകൃഷ്ണൻ മംഗലത്ത്, അപ്പുവിന്‍റെ ഒഴിവു കാലം എന്ന മികച്ച ടെലിഫിലിമിന് ജയശ്രീ ഗോപാലകൃഷ്ണൻ എന്നിവരെ ചടങ്ങിൽ പി.എസ്.ശ്രീധരൻപിള്ള ആദരിച്ചു. ചടങ്ങിൽ വയലാർ സ്മൃതി വർഷ ആഘോഷ കമ്മിറ്റി ചെയർമാൻ മുക്കംപാലമൂട് രാധാകൃഷ്ണൻ അധ്യക്ഷനായി. പ്രമുഖ സാഹിത്യകാരൻ ഡോ.എം.ആർ.തമ്പാൻ, അഡ്വ.ജെ.ആർ.പത്മകുമാർ,സിഎംപി ജില്ലാ പ്രസിഡന്‍റ് മനോജ്,സാഹിത്യകാരൻ സബീർ തിരുമല,വയലാർ രാമവർമ്മ സാംസ്കാരിക വേദി സെക്രട്ടറി മണക്കാട് രാമചന്ദ്രൻ എന്നിവർ ആശംസകൾ അർപ്പിച്ചു. ജനറൽ കൺവീനർ ജി.വിജയകുമാർ സ്വാഗതം പറഞ്ഞു.

കൊല്ലത്ത് സിപിഐയിൽ പൊട്ടിത്തെറി : കുണ്ടറയ്ക്കു പിന്നാലെ കടയ്ക്കലിലും കൂട്ടരാജി

കൊല്ലം : തദ്ദേശ സ്വയം ഭരണ സ്ഥാപങ്ങളിലേക്കുള്ള തെരഞ്ഞെടുപ്പ് പടിവാതിൽക്കൽ എത്തിയിരിക്കേ കൊല്ലത്ത് സിപി ഐയിൽ വിഭാഗീയത കനത്തു. പൊട്ടിത്തെറിയിൽ കടയ്‌ക്കലിലും സിപിഐ അംഗങ്ങളുടെ കൂട്ടരാജി ഉണ്ടായി. കുണ്ടറയ്ക്ക് പിറകെ കടയ്‌ക്കലിലും സിപി ഐയുടെ നേതാക്കളും പ്രവർത്തകരും അടക്കം രാജിവച്ചത് എൽഡിഎഫ് ജില്ലാ നേതൃത്വത്തിന് ആശങ്കയ്ക്ക് ഇടയാക്കിയിട്ടുണ്ട്. വിവിധ സ്ഥാനങ്ങൾ വഹിച്ചിരുന്ന 112 പേരാണ് കടയ്‌ക്കലിൽ പാർട്ടിവിട്ടത്. മന്ത്രി ജെ.ചിഞ്ചുറാണിയുടെ ചടയമംഗലം നിയോജക മണ്ഡലത്തിലാണ് സിപിഐ ജില്ലാ നേതൃത്വം പ്രതീക്ഷിക്കാത്ത കൂട്ടത്തോടെ രാജി ഉണ്ടായിരിക്കുന്നത്. 10 മണ്ഡലം കമ്മിറ്റി അംഗങ്ങൾ, 45 ലോക്കൽ കമ്മിറ്റി അംഗങ്ങൾ, 48 ബ്രാഞ്ച് സെക്രട്ടറിമാർ, ഒമ്പത് ബ്ലോക്ക് -ഗ്രാമ പഞ്ചായത്ത്‌ അംഗങ്ങൾ എന്നിവർ രാജിവച്ചവരിൽ ഉൾപ്പെടും. ജില്ലാ നേതൃത്വത്തോടുള്ള അതൃപ്തി അറിയിച്ചു കൊണ്ടാണ് രാജി പ്രഖ്യാപനം നടന്നിരിക്കുന്നത്. 700ൽ അധികം പാർട്ടി അംഗങ്ങൾ രാജിവച്ചതായാണ് വിമത നേതാക്കൾ അവകാശപ്പെടുന്നത്. ഉൾപാർട്ടി പ്രശ്നങ്ങളാണ് തീരുമാനത്തിന് കാരണമെന്നും അവർ പറയുന്നു. എന്നാൽ അഴിമതി നടത്തിയതിന് സംഘടനാ നടപടി നേരിട്ടയാൾ അടക്കമാണ് രാജിവച്ചതെന്ന് സിപിഐ ജില്ലാ നേതൃത്വം പറയുന്നുണ്ട്. എം എൻ സ്മാരകത്തിനായി ഫണ്ട് പിരിവു നടത്തിയതിൽ അഴിമതി നടത്തിയതായി ആരോപണ വിധേയനായ മണ്ഡലം സെക്രട്ടറിയുടെ പേരിൽ പാർട്ടി ഡിസിയും എക്സിക്യൂട്ടീവും നടപടിയെടുക്കാനിരിക്കെയാണ് കൂട്ടരാജി സംഭവം. പ്രവർത്തകർ പാർട്ടിവിട്ടെന്ന പ്രചാരണം അടിസ്ഥാന രഹിതമെന്നാണ് സിപി ഐ ജില്ലാ നേതൃത്വം പ്രതികരിച്ചത്. അതേസമയം, വിഭാഗീയതയെത്തുടർന്നു കുണ്ടറ മണ്ഡലം കമ്മിറ്റിയിൽ നിന്നു കൂട്ട രാജി‍ ഉണ്ടായതിന് പിറകെയാണ് കടയ്‌ക്കലും രാജി ഉണ്ടായിരിക്കുന്നത്. മുൻ മണ്ഡലം സെക്രട്ടറി ഉൾപ്പെടെ മുന്നൂറോളം പേർ ആണ് കുണ്ടറയിൽ ഒരാഴ്ച മുൻപ് രാജി വെച്ചത്. മുൻ പാർട്ടി മണ്ഡലം സെക്രട്ടറി ടി.സുരേഷ്, ഇളമ്പ‌ ള്ളൂർ മുൻ വൈസ് പ്രസിഡന്‍റും മണ്ഡലം അസി. സെക്രട്ടറിയുമായ ജലജ ഗോപൻ, സെക്രട്ടേറിയറ്റ് അംഗം സോണി വി.പള്ളം, സെക്രട്ടേറിയറ്റ് അംഗവും കുണ്ടറ ലോക്കൽ കമ്മിറ്റി സെക്രട്ടറിയുമായ എം.ഗോപാലകൃഷ്ണൻ, പേരയം എൽസി സെക്രട്ടറി ജോൺ വിൻസന്‍റ്, ഇളമ്പള്ളൂർ എൽസി സെക്രട്ടറി ഒ.എസ്.വരുൺ, എഐവൈഎഫ് കുണ്ടറ മണ്ഡലം സെക്രട്ടറി മുഹമ്മദ് ഷാൻ, മഹിള സംഘം ഭാരവാഹികളായ ജയ, പ്രിഷിൽഡ വിൽസൺ എന്നിവരാണ് കുണ്ടറയിൽ സി പി ഐ വിട്ട പ്രാദേശിക നേതാക്കൾ. 28 എൽസി അംഗങ്ങളും 22 ബ്രാഞ്ച് സെക്രട്ടറിമാരും രാജി വെച്ചിരുന്നെങ്കിലും ഇവരിൽ 17 ഓളം എൽ സി അംഗങ്ങളും എട്ടു ബ്രാഞ്ച് സെക്രട്ടറിമാരും പിന്നീട് പാർട്ടി ജില്ലാ നേതൃത്വവുമായി സമവായത്തിലെത്തുകയായിരുന്നു. 25 അംഗങ്ങൾ അടങ്ങുന്ന മണ്ഡലം കമ്മിറ്റിയിലെ മൂന്നു പേർക്കെതിരെ നടപടി എടുത്തതാണ് പ്രശ്നങ്ങൾക്ക് തുടക്കം. കഴിഞ്ഞ മണ്ഡലം സമ്മേളനത്തിലാണു കുണ്ടറയിൽ സി പി ഐ യിലെ വിഭാഗീയത പുറത്ത് വരുന്നത്. സെക്രട്ടറി തെരഞ്ഞെടുപ്പുമായി ബന്ധപ്പെട്ട് ഉപരിനേതൃത്വത്തിന്‍റെ നിർദേശം ഒരു വിഭാഗം എതിർത്തതോടെ സമ്മേളനം അടികൂടി പിരിയുന്ന സാഹചര്യമാണ് ഉണ്ടായത്. സെക്രട്ടറിയായിരുന്ന ടി.സുരേഷ് കുമാറിനെ മാറ്റി സേതുനാഥിനെ നിയമിക്കണമെന്നു ജില്ല സെക്രട്ടറി നിർദേശം നൽകിയതാണ് ചിലരെ ചൊടിപ്പിക്കുന്നത്. മുന്പ് എട്ടു തവണ സെക്രട്ടറിയായ സേതുനാഥിനെ സെക്രട്ടറിയായി തെരഞ്ഞെടുക്കുന്നതു ഭൂരിപക്ഷ പ്രതിനിധികളും എതിർത്തു. സുരേഷ് കുമാറിനെ തന്നെ നിലനിർത്തണം എന്നായിരുന്നു ആവശ്യം. സമ്മേളനത്തിൽ പങ്കെടുത്ത സംസ്ഥാന എക്സിക്യൂട്ടീവ് അംഗം കെ.ആർ.ചന്ദ്രമോഹനൻ, ജില്ലാ സെക്രട്ടറി പി.എസ്.സുപാൽ,അസി.സെക്രട്ടറിമാരായ സാം കെ.ഡാനിയൽ, എം.എസ്.താര, ജില്ലാ നേതാക്കളായ മന്മഥൻ നായർ, ആർ.എസ്.അനിൽ, ജി.ബാബു, ജഗദമ്മ എന്നിവരാണു ജില്ലാ എക്സിക്യൂട്ടീവ് തീരുമാനമായി സെക്രട്ടറി സ്ഥാനത്തേക്കു സേതുനാഥിന്‍റെ പേര് നിർദേശിച്ചത്. തീരുമാനം ക്രമവിരുദ്ധമാണെന്ന് ആരോപിച്ചായിരുന്നു അംഗങ്ങൾ സമ്മേളനം ബഹിഷ്കരിച്ചത്. തുടർന്നാണ് ജില്ലാ നേതൃത്വം മൂന്നു പേർക്കെതിരെ അച്ചടക്ക നടപടി സ്വീകരിക്കുന്നത്. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് അടുത്ത സാഹചര്യത്തിൽ കൂട്ടരാജി സിപിഐ സംഘടനാ സംവിധാനത്തെ ദുർബലമാക്കുമെന്ന കാര്യം ഉറപ്പാണ്.

സംസ്ഥാനത്ത് മൊബിലിറ്റി രംഗത്ത് വിപ്ലവം: ധാരണാപത്രം ഒപ്പുവച്ചു

തിരുവനന്തപുരം: കേരളത്തിന്‍റെ ഇന്നൊവേഷൻ ഇക്കോസിസ്റ്റത്തിന് ഉണർവേകുന്നതിന് ട്രെസ്റ്റ് റിസർച്ച് പാർക്ക്, ഓട്ടോമോട്ടീവ് റിസർച്ച് അസോസിയേഷൻ ഓഫ് ഇന്ത്യ (എആർഎഐ), കേരള ഡെവലപ്മെന്‍റ് ആൻഡ് ഇന്നൊവേഷൻ സ്ട്രാറ്റജിക് കൗണ്‍സിൽ (കെഡിസ്ക്) എന്നീ സ്ഥാപനങ്ങൾ ധാരണാപത്രം ഒപ്പുവച്ചു. ഇലക്ട്രിക്, സ്മാർട്ട് മൊബിലിറ്റി സാങ്കേതിക വിദ്യകളിൽ സംസ്ഥാനത്തെ ഒരു ഗവേഷണവികസന കേന്ദ്രമാക്കി മാറ്റാൻ ലക്ഷ്യമിട്ടുള്ളതാണ് ഈ പങ്കാളിത്തം. മൊബിലിറ്റി സാങ്കേതികവിദ്യകളിൽ ഫണ്ടിംഗോടെയുള്ള പ്രോജക്റ്റുകൾ ആരംഭിക്കുന്നതിനായി സംയുക്ത ഗവേഷണം, പവർ ഇലക്ട്രോണിക്സ്, ബാറ്ററി സാങ്കേതികവിദ്യകൾ എന്നിവയിൽ പ്രവർത്തിക്കുന്ന സ്റ്റാർട്ടപ്പുകൾക്ക് ഇൻകുബേഷൻ, മാർഗനിർദ്ദേശം, വ്യവസായ ബന്ധങ്ങൾ എന്നിവ ഉറപ്പാക്കുന്നതിന് സ്റ്റാർട്ടപ്പ് പിന്തുണ എന്നിങ്ങനെ നാല് പ്രധാന മേഖലകളിൽ ശ്രദ്ധ കേന്ദ്രീകരിക്കുന്നതാണ് ധാരണാപത്രം. മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി ഡോ. കെ. എം. എബ്രഹാം, കെഡിസ്ക് മെന്പർ സെക്രട്ടറി ഡോ. പി. വി. ഉണ്ണികൃഷ്ണൻ, എആർഎഐ ഡയറക്ടർ ഡോ. റെജി മത്തായി , ഡോ. എം.എസ്.രാജശ്രീ (സിഇഒ, ട്രെസ്റ്റ് റിസർച്ച് പാർക്ക്), ഡോ. വി. ചന്ദ്രശേഖർ(സീനിയർ ഡയറക്ടർ, സിഡാക്ക്) പി.സതീഷ് കുമാർ(എംഡി, ട്രാവൻകൂർ ടൈറ്റാനിയം പ്രോഡക്ട്സ് ലിമിറ്റഡ്) ഡോ. എ.അശോക് കുമാർ(കണ്‍സൾട്ടന്‍റ്,കെഡിസ്ക്) , സുദീപ് അംബാരെ (സിഇഒ, എആർഎഐ), ബോബിൻ സാജി ജോർജ്( ടെക്നിക്കൽ ഹെഡ്, ട്രെസ്റ്റ് റിസർച്ച് പാർക്ക്), വി. ശ്രീകുമാർ(സെക്രട്ടറി, ജിടെക് ഗ്രൂപ്പ് ഓഫ് കന്പനീസ്, സെന്‍റർ ഹെഡ് ടാറ്റാ എൽക്സി) ഡോ. പുഷ്പരാജൻ ജോസഫ്( ഡെപ്യൂട്ടി മാനേജർ, ട്രാവൻകൂർ ടൈറ്റാനിയം പ്രോഡക്ട്സ് ലിമിറ്റഡ്)എന്നിവർ ചടങ്ങിൽ പങ്കെടുത്തു.

സിനിമകൾക്ക് ചെയ്യാനാകാത്ത സാമൂഹ്യ ധർമം പ്രഫഷണൽ നാടകങ്ങൾ നിർവഹിക്കുന്നു: കെ. ജയകുമാർ

തിരുവനന്തപുരം: പ്രശ്നങ്ങളെ അഭിമുഖീകരിക്കാൻ സമൂഹത്തെ സജ്ജമാക്കുക എന്ന, സിനിമകൾക്ക് ചെയ്യാൻ സാധിക്കാത്ത വലിയ ധർമം പ്രഫഷണൽ നാടകങ്ങൾ നിർവഹിച്ചു കൊണ്ടിരിക്കുകയാണെന്ന് കവിയും മുൻ ചീഫ് സെക്രട്ടറിയുമായ കെ. ജയകുമാർ. സംസ്കാര സാഹിതി പ്രഥമ നാടകോത്സവത്തിന്‍റെ രണ്ടാം ദിനത്തിലെ സാംസ്‌കാരിക സമ്മേളനം ഉത്ഘാടനം ചെയ്ത് സംസാരിക്കുകയായിരുന്നു അദ്ദേഹം. സമൂഹത്തിലെ ധാർമിക സമസ്യകളെ ചലച്ചിത്ര മേഖല വളരെ ഉദാസീനമായി അഭിമുഖീകരിക്കുമ്പോൾ നാടകങ്ങളാണ് ഏറ്റവും ധീരമായി അവയെ അരങ്ങത്ത് അവതരിപ്പിക്കുന്നത്. എഐ പോലുള്ള ടെക്നോളജികൾ എല്ലാ മേഖലയെയും കീഴടക്കുന്ന ഈ കാലത്ത് നാടകം മാത്രമാണ് ഇന്നൊരു ശുദ്ധകല എന്ന് പറയാവുന്ന ഏകകലയെന്നും അദ്ദേഹം പറഞ്ഞു. ചടങ്ങിൽ, ലളിതകല അക്കാദമി മുൻ ചെയർമാനും കാർട്ടൂണിസ്റ്റുമായ കാട്ടൂർ നാരായണപിള്ള, സംരംഭക ഷീല ജെയിംസ്, നാടക കലാ പ്രവർത്തകൻ ചെറുന്നിയൂർ നമശിവായൻ, സംസ്കാര സാഹിതി സംസ്ഥാന വൈസ് ചെയർമാൻ കെ.ആർ.ജി ഉണ്ണിത്താൻ, സംസ്ഥാന സെക്രട്ടറി മണ്ണാന്മൂല രാജേഷ്, ജില്ലാ സെക്രട്ടറിമാരായ എം. രാജേഷ് കുമാർ, കുറ്റിച്ചൽ രാജേഷ് രാജേഷ് തുടങ്ങിയവർ പങ്കെടുത്തു. സംസ്കാര സാഹിതിയുടെ ഇന്നത്തെ ലോഗോയും ജവഹർലാൽ ബാലജനവേദി എന്ന അഖിലേന്ത്യ സംഘടനയുടെ ലോഗോയും തയ്യാറാക്കിയ കാട്ടൂർ നാരായണപിള്ള പഴയ അനുഭവങ്ങൾ വിവരിച്ചത് സദസിന് കൗതുകമായി. ശേഷം കൊല്ലം അനശ്വര തിയേറ്ററിന്‍റെ "ആകാശത്തൊരു കടൽ' നാടകം അവതരിപ്പിച്ചു. ഇന്ന് വൈകിട്ട് 5.30ന് ഭാരത്‌ഭവൻ മണ്ണരങ്ങിൽ അടൂർ പ്രകാശ് എംപി, സിനിമ സംവിധായകൻ ശ്യാമ പ്രസാദ്, സിനിമ- നാടക പ്രവർത്തകൻ അലൻസിയർ തുടങ്ങിയർ പങ്കെടുക്കുന്ന സംസ്‌കാരിക സമ്മേളനം. തുടർന്ന് തിരുവനന്തപുരം സൗപർണിക തിയേറ്ററിന്‍റെ അവതരിപ്പിക്കുന്ന നാടകം "താഴ്‌വാരം’.

നിർദേശങ്ങൾക്ക് പുല്ലുവില; വഴുതക്കാട്, ശാസ്തമംഗലം ഭാഗങ്ങളിൽ ഫുട്പാത്ത് തട്ടുകടകൾ സജീവം

പേരൂർക്കട: പൊതുജനങ്ങൾക്ക് യാത്രാ തടസം ഉണ്ടാക്കിയിരുന്ന റോഡ് വക്കിലെയും ഫുട്പാത്തിലെയും തട്ടുകടകൾക്ക് പോലീസ് ഏർപ്പെടുത്തിയ വിലക്കിന് പുല്ലുവില. രണ്ടാഴ്ച മുമ്പാണ് വഴുതക്കാട്, ശാസ്തമംഗലം ഭാഗങ്ങളിലായി പ്രവർത്തിച്ചുവരുന്ന ഇരുപതോളം തട്ടുകടകൾക്ക് പോലീസ് വിലക്ക് ഏർപ്പെടുത്തി കൊണ്ടുള്ള നോട്ടീസ് നൽകിയത്. രണ്ടുദിവസത്തിനുള്ളിൽ തട്ടുകടകളുടെ പ്രവർത്തനം നിർത്തണമെന്നതായിരുന്നു പോലീസിന്‍റെ നിർദേശം. നിർദ്ദേശം നൽകിയ ദിവസവും അതിനടുത്ത ദിവസവും തട്ടുകടകൾ പ്രവർത്തിച്ചില്ല. എന്നാൽ മൂന്നാമത്തെ ദിവസം മുതൽ സജീവമായ തട്ടുകടകൾ ഇപ്പോഴും പ്രവർത്തിച്ചുവരുന്നുണ്ട്. പോലീസ് പരിശോധനയ്ക്ക് എത്തിയ ദിവസം തട്ടുകട ഉടമകളുടെ പ്രതിഷേധം ഉണ്ടായിരുന്നു. തിരുവനന്തപുരം നഗരസഭ ഇടപെട്ടാൽ മാത്രമേ രാത്രികാല തട്ടുകടകളുടെ പ്രവർത്തനങ്ങൾക്ക് നിയന്ത്രണം ഏർപ്പെടുത്താനോ അവസാനിപ്പിക്കുവാനോ സാധിക്കുകയുള്ളൂ എന്ന് മ്യൂസിയം പോലീസ് പറയുന്നു. വൈകുന്നേരം അഞ്ച് മുതൽ സജീവമാകുന്ന തട്ടുകടകൾ രാത്രി 12 വരെ പ്രവർത്തിക്കാറുണ്ട്. ഇക്കാരണത്താൽ വഴുതക്കാട്, ശാസ്തമംഗലം റോഡുകളിൽ അനധികൃത വാഹന പാർക്കിംഗും ഗതാഗതക്കുരുക്കും വർധിക്കുന്നതായി പൊതുജനങ്ങൾ ആക്ഷേപം ഉന്നയിച്ചിരുന്നു. ഇതിനിടെയാണ് മ്യൂസിയം പോലീസ് പരിശോധനയ്ക്ക് എത്തിയത്.

നെയ്യാറ്റിന്‍കര രൂപതയുടെ പുതിയ മെത്രാൻ കത്തീഡ്രൽ പള്ളിയിൽ ദിവ്യബലി അർപ്പിച്ചു

നെയ്യാറ്റിന്‍കര : നെയ്യാറ്റിന്‍കര രൂപതയുടെ പുതിയ മെത്രാനായി ചുമതലയേറ്റ ബിഷപ്പ് ഡോ.സെല്‍വരാജന്‍ നെയ്യാറ്റിന്‍കര രൂപതയുടെ ഭദ്രാസന ദേവാലയമായ അമലോത്ഭവമാതാ കത്തിഡ്രല്‍ പളളിയില്‍ രൂപതയുടെ പുതിയ ഇടയെനെന്ന നിലയില്‍ ആദ്യദിവ്യബലി അര്‍പ്പിച്ചു. മുന്‍ മെത്രാന്‍ ഡോ.വിന്‍സന്‍റ് സാമുവല്‍ സഹകാര്‍മികനായി. കരുണയോടെ ശ്രുശ്രൂഷകള്‍ക്ക് നേതൃത്വം നല്‍കുമ്പോള്‍ എന്നും വെല്ലുവിളികളാണ് നേരിടുന്നതെന്നും ദൗത്യ ബോധ്യത്തില്‍ നിന്ന് പിന്‍മാറാതെ വെല്ലുവിളികളെ തരണം ചെയ്ത് മുന്നോട്ട് പോകണമെന്നും വചന സന്ദേശത്തില്‍ മുന്‍ മെത്രാന്‍ വിന്‍സന്‍റ് സാമുവല്‍ പറഞ്ഞു. രൂപതക്കൊപ്പം വെല്ലുവിളികള്‍ നേരിട്ട് അജപാലന ദൗത്യം തുടരുമെന്ന് ബിഷപ്പ് ഡോ.സെല്‍വരാജന്‍ പറഞ്ഞു. രൂപതയിലെ പാസ്റ്ററല്‍ കൗണ്‍സില്‍ അംഗങ്ങളും കൂരിയ അംഗങ്ങളും വൈദികരും സന്യസ്തരും വിശ്വാസി സമൂഹവും ദിവ്യബലിയില്‍ പങ്കെടുത്തു.

സംസ്ഥാന സ്കൂൾ കായികമേള : ഒരേ സമയം 2,500 പേർക്ക് ഭക്ഷണം കഴിക്കാനുള്ള പന്തൽ പുത്തരിക്കണ്ടത്ത്

തിരുവനന്തപുരം: സംസ്ഥാന സ്കൂൾ കായികമേളയിൽ ഒരേ സമയം 2,500 പേർക്ക് ഭക്ഷണം കഴിക്കാനുള്ള വിശാലമായ പന്തലാണ് പുത്തരിക്കണ്ടം മൈതാനത്ത് ഒരുങ്ങിയിട്ടുള്ളത്. കൂടാതെ മറ്റ് അഞ്ച് അടുക്കളകളും പ്രവർത്തിക്കുന്നുണ്ട്. പുത്തരിക്കണ്ടെത്തെ പ്രധാന ഭക്ഷണശാലയോട് അനുബന്ധിച്ച് കായിക നേട്ടങ്ങളെ കുറിച്ചുള്ള സമഗ്ര എക്സിബിഷനും അതിന്‍റെ ഭാഗമായുള്ള ചെറിയ കായിക വിനോദങ്ങളും ഒരുക്കും.74 സ്കൂളുകളിലായി ആണ് കുട്ടികളുടെ താമസം ക്രമീകരിച്ചിട്ടുള്ളത്. മൈതാനങ്ങളിലും താമസ സ്ഥലത്തും പോലീസിന്‍റെ നേതൃത്വത്തിൽ സുരക്ഷ ക്രമീകരിച്ചു. നിരോധിത ഉൽപ്പന്നങ്ങൾ വിറ്റഴിക്കുന്നില്ല എന്ന് ഉറപ്പാക്കാൻ ഗ്രൗണ്ടുകളിലും താമസ സ്ഥലത്തും എക്സൈസിന്‍റെ പ്രത്യേക ജാഗ്രതാ നിരീക്ഷണം ഉണ്ടായിരിക്കും. മെഡിക്കൽ കമ്മിറ്റിയുടെ നേതൃത്വത്തിൽ കായിക താരങ്ങൾക്ക് കളിസ്ഥലങ്ങളിലും താമസ സ്ഥലത്തും ജില്ലാ മെഡിക്കൽ ഓഫീസറുടെ നേതൃത്വത്തിൽ അലോപ്പതി, ആയുർവേദം, ഹോമിയോപ്പതി, സ്പോർട്സ് ആയുർവേദ, ഫിസിയോ തെറാപ്പി, സ്പോർട്സ് മെഡിസിൻ എന്നിവയുടെ സൗകര്യവും ആംബുലൻസ് സർവീസും പ്രത്യേക മെഡിക്കൽ ടീം സേവനവും ഏർപ്പാടാക്കിയിട്ടുണ്ട്. രജിസ്ട്രേഷൻ കമ്മിറ്റിയുടെ നേതൃത്വത്തിൽ കായിക താരങ്ങളുടെ രജിസ്ട്രേഷൻ പൂർത്തിയാക്കാനുള്ള നടപടികൾ തുടരുകയാണെന്നു വിദ്യാഭ്യാസ മന്ത്രി പത്രസമ്മേളനത്തിൽ അറിയിച്ചു.

യാത്രക്കാരന് ദേഹാസ്വാസ്ഥ്യം: സൗദി വിമാനം തിരുവനന്തപുരത്ത് അടിയന്തര ലാന്‍ഡിംഗ് നടത്തി

വലിയതുറ: യാത്രക്കാരന് ദേഹാസ്വാസ്ഥ്യം അനുഭവപ്പെട്ടതിനെത്തുടര്‍ന്ന് മദീനയിലേയ്ക്കുളള സൗദി എയര്‍ലൈന്‍സ് വിമാനം തിരുവനന്തപുരം രാജ്യാന്തര വിമാനത്താവളത്തില്‍ അടിയന്തരമായി ലാന്‍ഡിംഗ് നടത്തി. ഇന്നലെ വൈകുന്നേരം 6.30നാണ് സൗദി എയര്‍ലൈന്‍സ് വിമാനമായ 821 - ബി 77 ഡബ്ല്യൂ തിരുവനന്തപുരത്ത് ഇറക്കിയത്. ജക്കാര്‍ത്തയില്‍ നിന്നും മദീനയിലേയ്ക്കാണ് വിമാനം പോകേണ്ടിയിരുന്നത്. വിമാനത്തിലെ യാത്രക്കാരനായ ഇന്ത്യോനേഷ്യന്‍ സ്വദേശിയായ 29 കാരൻ ബോധരഹിതനായതിനെത്തുടര്‍ന്നാണ് വിമാനം നടപടിക്രമങ്ങള്‍ക്ക് ശേഷം തിരുവനന്തപുരം വിമാനത്താവളത്തില്‍ അടിയന്തരമായി ഇറക്കിയത്. തുടര്‍ന്ന് യുവാവിനെ ആംബുലന്‍സില്‍ അനന്തപുരി ആശുപത്രിയിലേയ്ക്ക് മാറ്റുകയായിരുന്നു.

ഇറ്റലിയിയിലേക്ക് വ്യാജവീസ നൽകി തട്ടിപ്പ്: ഇടുക്കി സ്വദേശി അറസ്റ്റിൽ

മെഡിക്കല്‍കോളജ്: ഇറ്റലിയിയിലേക്ക് കെയര്‍ടേക്കറിന്‍റെ വ്യാജ വീസ നല്‍കി പറ്റിച്ചയാളെ അറസ്റ്റു ചെയ്തു. ഇടുക്കി തങ്കമണി നെല്ലിപ്പാറ ആര്‍സി പള്ളിക്കു സമീപം കാരിക്കക്കുന്നേല്‍ വീട്ടില്‍ റോബിന്‍ ജോസ് (35) ആണ് വ്യാജ വീസ തട്ടിപ്പിന് അറസ്റ്റിലായത്. മെഡിക്കല്‍കോളജ് സിഐ ബി.എം.ഷാഫി, എസ്ഐ വിഷ്ണു, സിപിഒമാരായ വിനോദ്, പ്രശാന്ത്, ബല്‍റാം എന്നിവര്‍ എറണാകുളത്തുനിന്നാണ് കസ്റ്റഡിയിലെടുത്തത്. മെഡിക്കല്‍കോളജിനു സമീപം ഉള്ളൂരില്‍ താമസിച്ചുവരുന്ന തൃശൂര്‍ ഇടക്കുന്നി പനക്കുട്ടിച്ചിറ കാരക്കാട് വീട്ടില്‍ ബൈജു (50) വാണ് പറ്റിക്കപ്പെട്ടത്. സംഭവത്തെക്കുറിച്ച് പോലീസ് പറയുന്നത്: ഒരു പരസ്യം ശ്രദ്ധയില്‍പ്പെട്ടതിനെത്തുടര്‍ന്നാണ് ബൈജു പ്രതിയുമായി ബന്ധപ്പെടുന്നത്. 2023 ജനുവരി മാസത്തിലാണ് തട്ടിപ്പ് നടന്നത്. ഇറ്റലിയിലേക്ക് പ്രത്യേക ജോബ് വീസയ്ക്കായി വിവിധ കാലയളവുകളിലായി 6,50,000 രൂപ പ്രതി തട്ടിയെടുക്കുകയായിരുന്നു. 2023 ജനുവരി മാസത്തില്‍ 50,000 രൂപയും മാര്‍ച്ച് മാസത്തില്‍ വീണ്ടും 50,000 രൂപയും നല്‍കിയ ബൈജു ഏപ്രില്‍ മാസത്തില്‍ താന്‍ ബാങ്കില്‍ നിന്നു പിന്‍വലിച്ച 4,50,000 രൂപ പ്രതിക്ക് നേരിട്ടു നല്‍കി. ഇതേവര്‍ഷം മെയ്മാസത്തില്‍ വീണ്ടമൊരു 50,000 രൂപ പ്രതിയുടെ അക്കൗണ്ടിലേക്ക് അയച്ചുകൊടുത്തു. മെയ്മാസത്തില്‍ത്തന്നെ വീണ്ടുമൊരു 50,000 രൂപ പ്രതിയുടെ അക്കൗണ്ടിലേക്ക് ട്രാന്‍സ്ഫര്‍ ചെയ്തു നല്‍കി. വലിയൊരു തുക വിവിധ അക്കൗണ്ടുകളിലേക്ക് അയച്ചുകൊടുത്ത ബൈജു ഏഴുമാസത്തോളം വിസയ്ക്കായി കാത്തിരുന്നു. ഒടുവില്‍ നിരന്തരം ബന്ധപ്പെട്ടതിന്‍റെ അടിസ്ഥാനത്തില്‍ ഒരു വീസ ബൈജുവിന് ലഭിച്ചു. വിസയുമായി എയര്‍പോര്‍ട്ടില്‍ എത്തിയപ്പോഴാണ് അതു വ്യാജവീസയാണെന്നു തിരിച്ചറിയുന്നത്. ഇതിനെത്തുടര്‍ന്നാണ് ബൈജു പോലീസില്‍ പരാതി നല്‍കിയത്. മാസങ്ങള്‍ നീണ്ട അന്വേഷണത്തിനൊടുവില്‍ എറണാകുളത്തെ ഒരു സ്ഥാപനത്തില്‍ നിന്നാണ് റോബിന്‍ ജോസിനെ പോലീസ് കസ്റ്റഡിയിലെടുത്തത്. ഇയാളെ കോടതി റിമാന്‍ഡ് ചെയ്തു.

സർക്കാർ ജീവനക്കാർക്കായി സാലറി പാക്കേജുമായി ഇന്ത്യൻ ബാങ്ക്

തിരുവനന്തപുരം: ഇന്ത്യൻ ബാങ്കിന്‍റെ ഇൻഡ് സന്പൂർണ്ണ പ്ലസ് പദ്ധതിയിലൂടെ ജീവനക്കാർക്ക് സീറോ ബാലൻസ് അക്കൗണ്ട് ലഭ്യമാക്കുന്നു. ഈ അക്കൗണ്ടിനൊപ്പം 2.57 കോടി രൂപയുടെ അപകട ഇൻഷ്വറൻസ്, പത്തുലക്ഷം രൂപയുടെ ടേം ലൈഫ് ഇൻഷ്വറൻസ് എന്നിവ സൗജന്യമായി നൽകുന്നു. മെഡിസെപ്പ് ഉൾപ്പെടെയുള്ള മെഡിക്കൽ ഇൻഷ്വറൻസുകൾക്ക് വർഷത്തിൽ വെറും 749 രൂപ ചെലവിൽ 15 ലക്ഷം രൂപവരെ ടോപ്പ് -അപ്പ് സൗകര്യവും ഉണ്ട്. ഭവന വായ്പകൾക്ക് പലിശ 7.40 % മുതലും വാഹനവായ്പകൾക്ക് 7.15% മുതലും ലഭ്യമാണ്.

ദേവാലയ നിര്‍മാണത്തിന് ശിലാസ്ഥാപനം

തിരുവനന്തപുരം: പരിശുദ്ധ യല്‍ദോ മാര്‍ ബസേലിയോസ് ബാവായുടെ നാമത്തില്‍ രൂപീകരിച്ച കഴക്കൂട്ടം യാക്കോബായ ഇടവകയുടെ ദേവാലയ നിര്‍മാണത്തിന്‍റെ ശിലാസ്ഥാപനം യാക്കോബായ സുറിയാനി സഭയുടെ കൊല്ലം ഭദ്രാസനാധിപന്‍ മാത്യൂസ് മാര്‍ തേവോദോസിയോസ് മെത്രപ്പോലീത്ത നിര്‍വഹിച്ചു. ബഥേല്‍ മാര്‍ത്തോമാ ദേവാലയ ത്തില്‍ നടന്ന വിശുദ്ധ കുര്‍ബാനയ്ക്ക് മെത്രാപ്പോലീത്ത കാര്‍മികത്വം വഹിച്ചു. പരിശുദ്ധ അന്ത്യോഖ്യാ പാത്രിയര്‍ക്കീസ് ബാവായുടെ മലങ്കര സന്ദര്‍ശനവേളയില്‍ ആശീര്‍വദിച്ച അടിസ്ഥാനശിലയാണ് സ്ഥാപിച്ചത്. ഇതോടനുബന്ധിച്ചു ചേര്‍ന്ന സമ്മേളനത്തില്‍ ബഥേല്‍ മാര്‍ത്തോമ്മാ ഇടവക വികാരി റവ. ഡോ. രഞ്ചന്‍ ജോണ്‍ നെല്ലിമൂട്ടില്‍, യാക്കോബായ ഇടവക വികാരി ഫാ. പോപ്‌സണ്‍ വര്‍ഗീസ്, ഐഎസ്ആര്‍ഒ. മുന്‍ ഡപ്യൂട്ടി ഡയറക്ടര്‍ ഷെവ. ഡോ. കോശി എം. ജോര്‍ജ് എന്നിവര്‍ പ്രസംഗിച്ചു.

ജെ.സി.ഡാനിയേൽ മെമ്മോറിയൽ ഓപ്പൺ എയർ തിയറ്റർ ഉദ്ഘാടനം 22ന്

നെയ്യാറ്റിന്‍കര : മലയാള ചലച്ചിത്രലോകത്തിന്‍റെ പിതാവ് ജെ.സി ഡാനിയലിന്‍റെ സ്മരണാര്‍ഥം സാംസ്കാരിക വകുപ്പിന്‍റെ സഹായത്തോടെ നെയ്യാറ്റിന്‍കര നഗരസഭ നിര്‍മിച്ച ജെ.സി.ഡാനിയല്‍ ഓപ്പണ്‍ തിയറ്റര്‍ 22 ന് മന്ത്രി സജി ചെറിയാന്‍ നാടിന് സമര്‍പ്പിക്കും. നെയ്യാറ്റിന്‍കര നഗരസഭ സ്റ്റേഡിയത്തില്‍ ഒരേ സമയം 250 പേര്‍ക്ക് ഇരിക്കാവുന്ന വിധത്തില്‍ ബാല്‍ക്കണി സംവിധാനത്തോടെയുള്ള ഓപ്പണ്‍ തിയറ്ററാണ് നിര്‍മിച്ചിരിക്കുന്നത്. സമീപത്തെ പാര്‍ക്കില്‍ ജെ.സി ഡാനിയലിന്‍റെ പൂര്‍ണകായ പ്രതിമയുമുണ്ട്. ജെ.സി ഡാനിയല്‍ പ്രതിമ സ്ഥാപിച്ചതു പോലെ തന്നെ ഓപ്പണ്‍ തിയറ്റര്‍ പ്രവര്‍ത്തനക്ഷമമാകുന്പോള്‍ മലയാള സിനിമയുടെ പിതാവിനുള്ള ജന്മനാടിന്‍റെ ആദരസൂചകമായ സ്മാരകമാണെന്ന ചാരിതാര്‍ഥ്യം നഗരസഭ ചെയര്‍മാന്‍ പി.കെ രാജമോഹനനും അദ്ദേഹം നയിക്കുന്ന ഭരണസമിതിക്കുമുണ്ട്. മലയാളത്തിലെ ആദ്യചലച്ചിത്രമായ വിഗതകുമാരന്‍റെ പ്രഥമ പ്രദര്‍ശനം തിരുവനന്തപുരത്ത് കാപ്പിറ്റോള്‍ തിയറ്ററില്‍ നടന്നതിന്‍റെ 97 -ാം വാര്‍ഷികം അടുത്ത മാസമാണ്. സാംസ്കാരിക പരിപാടികള്‍ക്കും സിനിമാ പ്രദര്‍ശനത്തിനും ലക്ഷ്യമിട്ടാണ് ഓപ്പണ്‍ തിയറ്റര്‍ രൂപകല്‍പ്പന ചെയ്തിട്ടുള്ളത്. മലയാള സിനിമയുടെ പിതാവിന്‍റെ ജന്മനാട്ടില്‍ ഒരു തിയറ്റര്‍ പോലുമില്ലല്ലോ എന്നൊരു പരാതി ഇവിടുത്തെ ചലച്ചിത്രപ്രേമികള്‍ക്കുണ്ടായിരുന്നു. തിയറ്റര്‍ സ്ഥാപിക്കാന്‍ ഉചിതമായ സ്ഥലം കണ്ടെത്താനടക്കമുള്ള നടപടികള്‍ നടക്കുകയുമുണ്ടായി. നെയ്യാറ്റിന്‍കര അക്ഷയ ഷോപ്പിംഗ് കോംപ്ലക്സിന്‍റെ മുകള്‍വശം, ആറാലുംമൂട് മാര്‍ക്കറ്റ് ഗ്രൗണ്ട് മുതലായവിടങ്ങളിലൊക്കെ വിദഗ്ധര്‍ പ്രാഥമിക പരിശോധന നടത്തുകയും ചെയ്തു. വിവിധ കാരണങ്ങളാല്‍ തിയറ്റര്‍ എന്നത് ഇപ്പോഴും സ്വപ്നമായി അവശേഷിക്കുന്നു. ഈ സാഹചര്യം നിലനില്‍ക്കെയാണ് ഓപ്പണ്‍ തിയറ്റര്‍ എന്ന ആശയം സാക്ഷാത്കരിക്കപ്പെട്ടിരിക്കുന്നത്. ജെ.സി.ഡാനിയേൽ ഫൗണ്ടേഷൻ സ്ഥാപിച്ച മലയാള സിനിമയുടെ പിതാവിന്‍റെ പൂർണകായ പ്രതിമയ്ക്ക് സമീപത്താണ് തീയറ്റർ നിർമിച്ചത്. ജെ.സി.ഡാനിയേലിന്‍റെ സ്മരണ നിലനിർത്തുന്നതിനു വേണ്ടി നിർമിച്ച പ്രതിമ സ്ഥാപിക്കുന്നതിന് ഇടം കിട്ടാതെ മൂന്നുവർഷത്തോളം ഒരു ഓഡിറ്റോറിയത്തിൽ വച്ചിരിക്കുകയായിരുന്നു. ഫൗണ്ടേഷൻ ചെയർപേഴ്സൺ സോന എസ്.നായർ ഇക്കാര്യം നെയ്യാറ്റിൻകര നഗരസഭ ചെയർമാന്‍റെ ശ്രദ്ധയിൽപ്പെടുത്തിയപ്പോൾ നഗരസഭ ചെയർമാൻ പൂർണ സമ്മതത്തോടെ ജെ.സി.ഡാനിയേലിന്‍റെ ജന്മനാടായ നെയ്യാറ്റിൻകരയിൽ തന്നെ പ്രതിമ സ്ഥാപിക്കുവാൻ അനുവാദം നൽകുകയായിരുന്നു.

റോഡുപരോധം: എം.വിജയകുമാർ ഉൾപ്പെടെ 20 പേരെ വെറുതെ വിട്ടു

നെടുമങ്ങാട്: റോഡുകളുടെ ശോച്യാവസ്ഥയിൽ പ്രതിഷേധിച്ച് റോഡുപരോധിച്ച കേസിൽ മുൻ സ്പീക്കറും സിപിഎം നേതാവുമായ എം.വിജയകുമാർ ഉൾപ്പടെ 20 പൊതുപ്രവർത്തകരെ നെടുമങ്ങാട് ഒന്നാംക്ലാസ് മജിസ്‌ട്രേട്ട് റൂബി ഇസ്മായിൽ വെറുതെ വിട്ടു. 2015-ൽ അരുവിക്കര മണ്ഡലത്തിലെ റോഡുകളുടെ ശോച്യാവസ്ഥയ്‌ക്കെതിരെ വിജയകുമാറിന്‍റെ നേതൃത്വത്തിൽ റോഡ് ഉപരോധിച്ച പങ്കജാക്ഷൻ നായർ,കുമാരദാസ്,ശോഭനകുമാർ, എം.രാജേന്ദ്രൻ,സതീഷ്‌കുമാർ,മണിക്കുട്ടൻ,മോഹനൻ,ശാലിനി, ഉണ്ണിക്കുട്ടൻ, ബാലു,ഷൈജു,നാരായണൻ നായർ, ശശീന്ദ്രൻ,വിജയകുമാർ,ഹരികുമാർ,മനോഹരൻ നായർ എന്നീ സി.പി.എം പ്രവർത്തകരെയാണ് കോടതി വെറുതെ വിട്ടത്. പ്രതികൾക്ക് വേണ്ടി അഭിഭാഷകരായ എം.എ.കാസിം, എസ്.എസ്.ബിമൽ,ഹലീനാമുഹമ്മദ്,ആരാധനാ വാസുദേവൻ,എ.അബ്ദുൽസലാം,കെ.എസ്.അലിഫ്, ജെ.അമല, എ.എൽ.ലിജിത, പി.സി.അരവിന്ദ് എന്നിവർ ഹാജരായി.

തൊണ്ടിമുതൽ തിരിമറി കേസ്: അന്തിമവാദം തുടങ്ങി

നെടുമങ്ങാട്: മുൻ മന്ത്രിയും എംഎൽഎയുമായ ആന്‍റണി രാജുവിനെതിരായ തൊണ്ടി മുതലിൽ തിരിമറി നടത്തിയെന്ന കേസിൽ അന്തിമവാദം നെടുമങ്ങാട് ജുഡീഷ്യൽ ഫസ്‌റ്റ് ക്ലാസ് മജിസ്ട്രേറ്റ് കോടതി ഒന്നിൽ തുടങ്ങി. കഴിഞ്ഞദിവസം ഉച്ചകഴിഞ്ഞാണ്‌ പ്രോസിക്യൂഷൻ വാദം ആരംഭിച്ചത്.പബ്ലിക് പ്രോസിക്യൂട്ടർ മൻമോഹന്‍റെ വാദം രണ്ട് മണിക്കൂറോളം നീണ്ടു. വാദം വൈകിട്ട് 5.45 വരെ നീണ്ടു. കഴിഞ്ഞ മൂന്നിന് നെടുമങ്ങാട് ജുഡീഷ്യൽ ഫസ്‌റ്റ് ക്ലാസ് മജിസ്ട്രേറ്റ് കോടതി ഒന്നിൽ ഹാജരായ ഒന്നാം പ്രതി ജോസിനും രണ്ടാം പ്രതി ആന്‍റണി രാജു എംഎൽഎയ്ക്കും പ്രോസിക്യൂഷൻ നൽകിയ തെളിവുകൾ മജിസ്ട്രേറ്റ് വായിച്ചു കേൾപ്പിച്ചിരുന്നു. തുടർന്നാണ് അന്തിമ വാദം ആരംഭിച്ചത്.കേസിൽ 29 സാക്ഷികൾ ഉണ്ടെങ്കിലും 19 പേരെ മാത്രമാണ് വിസ്‌തരിച്ചത്. മരണപ്പെട്ടതിനെ തുടർന്നും അസുഖത്തെ തുടർന്നും 8 പേരെയും 2 പേരെ പ്രോസിക്യൂഷനും ഒഴിവാക്കിയിരുന്നു. വരുംദിവസങ്ങളിൽ വാദം തുടരും.

ജനാര്‍ദനപുരം ഹയര്‍ സെക്കൻഡറി സ്‌കൂളില്‍ സ്‌നേഹാമൃതം പദ്ധതി

വെള്ളറട: നിരവധി ചാരിറ്റി പ്രവര്‍ത്തനങ്ങള്‍ നടപ്പാക്കി വരുന്ന ഒറ്റശേഖരമംഗലം ജനാര്‍ദനപുരം ഹയര്‍ സെക്കൻഡറി സ്‌കൂളില്‍ മെഡിക്കല്‍ കോളജ്, ആര്‍സിസി ആശുപത്രികളില്‍ ചികിത്സയില്‍ കഴിയുന്ന അശരണരും ആലംബഹീനരുമായ രോഗികള്‍ക്കും കൂട്ടിരിപ്പുകാര്‍ക്കും ഒരു നേരത്തെ ഭക്ഷണപ്പൊതി നല്‍കുന്ന പദ്ധതിയായ സ്‌നേഹാമൃതം പദ്ധതിയ്ക്ക് ഇന്ന് തുടക്കമിട്ടു. കുട്ടികളുടേയും രക്ഷിതാക്കളുടേയും സഹകരണത്തോടെ എല്ലാ മാസവും 1500 പേര്‍ക്ക് ഭക്ഷണപ്പൊതി നല്‍കാനാണ് ലക്ഷ്യം. ഉദ്ഘാടനത്തോടനുബന്ധിച്ച് ആര്‍സിസിയില്‍ ചികിത്സയില്‍ കഴിയുന്ന രോഗികള്‍ക്കും കൂട്ടിരിപ്പുകാര്‍ക്കുമായി 1000 പേര്‍ക്ക് ഭക്ഷണപ്പൊതി വിതരണം നടത്തി.

വയലാർ ജനതയുടെ സാമൂഹ്യ ബോധം ഉണർത്തിയ കവി: മന്ത്രി വി.ശിവൻകുട്ടി

തിരുവനന്തപുരം: കേരളീയ ജീവിതത്തെ പുരോഗമനപരമായ പാതയിലേക്കു നയിക്കുവാൻ വയലാർ രാമവർമയുടെ സർഗാത്മക രചനകൾ പ്രേരമായി എന്ന് മന്ത്രി വി.ശിവൻകുട്ടി. കലയുടെ മാനുഷിക മുഖം ആവിഷ്ക്കരിച്ച കവിയാണ് വയലാർ രാമവർമ എന്നും മന്ത്രി പറഞ്ഞു. വയലാർ രാമവർമ സാംസ്കാരിക വേദി സംഘടിപ്പിച്ച വയലാർ ദശദിന സ്മൃതി വർഷ സാംസ്കാരിക ഉത്സവത്തിന്‍റെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. പുത്തരിക്കണ്ടം ഇ.കെ.നായനാർ പാർക്കിലായിരുന്നു ചടങ്ങ്. ചടങ്ങിൽ ഗാന്ധിഭവൻ ചെയർമാൻ പുനലൂർ സോമരാജൻ അധ്യക്ഷത വഹിച്ചു. സാംസ്കാരിക ഉത്സവത്തിന്‍റെ ഭാഗമായുള്ള കലാപരിപാടികളുടെ ഉദ്ഘാടനം ഡോ. കെ. ഓമനക്കുട്ടി നിർവഹിച്ചു. വിവിധ കലാ മേഖലകളിലെ പ്രതിഭകൾക്കുള്ള അവാർഡ് ദാനവും മന്ത്രി ശിവൻകുട്ടി നിർവഹിച്ചു. മുൻ മേയർ അഡ്വ. കെ.ചന്ദ്രിക, ഭാരത് ഭവൻ മെന്പർ സെക്രട്ടറി ഡോ. പ്രമോദ് പയ്യന്നൂർ, കോട്ടുകാൽ കൃഷ്ണകുമാർ, ശാസ്തമംഗലം ഗോപൻ, മുക്കുംപാലമൂട് രാധാകൃഷ്ണൻ, ജി. വിജയകുമാർ, അഡ്വ. വിജയമോഹൻ തുടങ്ങിയവർ പങ്കെടുത്തു. ചടങ്ങിന് വയലാർ രാമവർമ സാംസ്കാരികവേദി സെക്രട്ടറി മണക്കാട് രാമചന്ദ്രൻ സ്വാഗതം പറഞ്ഞു. നൃത്തഗുരുവായ കലാമണ്ഡലം വിമലാ മേനോന് ആദരവ് അർപ്പിച്ചുകൊണ്ട് റിഗാറ്റ ഗിരിജയുടെ നേതൃത്വത്തിൽ നടന്ന വിമലാലാസ്യം ശ്രദ്ധേയമായി. തുടർന്ന് പാട്ടിന്‍റെ മടിശീല എന്ന ഗാനസന്ധ്യ അരങ്ങേറി.

തണല്‍മരം വീണ് ഗതാഗതം തടസപ്പെട്ടു

പേരൂര്‍ക്കട: മണ്ണന്തല ഗവ. പ്രസ് റോഡില്‍ ക്വാര്‍ട്ടേഴ്‌സിനു സമീപം തണല്‍മരം വീണ് ഗതാഗതം തടസപ്പെട്ടു. ഇന്നലെ രാവിലെ 7.30നാണ് തണൽമരം വേരോടെ പിഴുതു റോഡിലേക്ക് വീണത്. തിരുവനന്തപുരം ഫയര്‍‌സ്റ്റേഷനില്‍ നിന്ന് ഫയര്‍ആൻഡ് റെസ്‌ക്യു ഓഫീസര്‍ എം.എസ്.ഷഹീര്‍, ഓഫീസര്‍മാരായ വിമല്‍, ജസ്റ്റിന്‍, മനു, എഫ്ആര്‍ഒ ഡ്രൈവര്‍ ശിവഗണേഷ് എന്നിവരാണ് മരശിഖരങ്ങള്‍ മുറിച്ചുമാറ്റി ഗതാഗതം പുന:സ്ഥാപിച്ചത്.

കാപ്പ നിയമം ലംഘിച്ചയാൾ പിടിയിൽ

പേരൂര്‍ക്കട: കാപ്പ നിയമം ലംഘിച്ചതിന് ക്രിമിനല്‍ക്കേസ് പ്രതിയെ ഫോര്‍ട്ട് പോലീസ് പിടികൂടി. ബണ്ട് റോഡ് ചിറപ്പാലം മിനി കോളനിയില്‍ പ്രശാന്ത് (34) ആണ് കാപ്പ ലംഘിച്ചതിന് അറസ്റ്റിലായത്. ഈവര്‍ഷം മെയ് 6-നാണ് കാപ്പ നിയമം അനുസരിച്ച് പ്രശാന്തിനെ നാടുകടത്തിയത്. തിരുവനന്തപുരം നഗരപരിധിയില്‍ പ്രവേശിക്കരുതെന്നായിരുന്നു കര്‍ശനമായ വ്യവസ്ഥ. ഇതിന്‍പ്രകാരം നെയ്യാറ്റിന്‍കര ഭാഗത്താണ് ഇയാള്‍ താമസിച്ചുവന്നിരുന്നത്. എന്നാല്‍ കഴിഞ്ഞദിവസം ഫോര്‍ട്ട് സ്റ്റേഷനില്‍ ഉള്‍പ്പെട്ട മിനി കോളനിയിലെത്തിയ ഇയാള്‍ അയല്‍വാസിയായ ഒരു സ്ത്രീയെ ആക്രമിക്കുകയും തലയ്ക്കടിച്ചു പരിക്കേല്‍പ്പിക്കുകയും ചെയ്തു. ഈ സംഭവത്തിലാണ് പ്രശാന്തിനെ വീണ്ടും പോലീസ് അറസ്റ്റുചെയ്തത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

നെടുമങ്ങാട് നഗരസഭ സംവരണ വാർഡുകൾ

നെടുമങ്ങാട്: നെടുമങ്ങാട് നഗരസഭയിൽ സംവരണ വാർഡുകൾ നറുക്കെടുപ്പിലൂടെ നിശ്ചയിച്ചു. പട്ടികജാതി സ്ത്രീ സംവരണം : 4 പാളയത്തിൻമുകൾ,11 മൂത്താംകോണം, പട്ടികജാതി സംവരണം :3 കുശർകോട്,24 പടവള്ളിക്കോണം, സ്ത്രീസംവരണം: 1 കല്ലുവരമ്പ്‌,6 മണക്കോട്,13 കൊല്ലങ്കാവ്,15 വാണ്ട,16 പനങ്ങോട്ടേല,17 മുഖവൂർ,22 തറട്ട,23 ഇടമല,25 കണ്ണാരംകോട്,28 ടി.എച്ച്.എസ്,29 പേരുമല, 30 മാർക്കറ്റ്,31 പതിനൊന്നാംകല്ല്, 33 പത്താംകല്ല്,34 കൊപ്പം,37 പേരയത്തുകോണം,38 പരിയാരം,40 പുങ്കുമ്മൂട്‌,42 പൂവത്തൂർ. ജനറൽ വാർഡുകൾ: ഇരിഞ്ചയം,ഉളിയൂർ,നെട്ട, നഗരിക്കുന്നു,കച്ചേരി,ടൗൺ,കൊടിപ്പുറം,പുലിപ്പാറ,കൊറളിയോട്,പതിനാറാംകല്ല്,മന്നൂർക്കോണം,വലിയമല,പറണ്ടോട്,മഞ്ച,പറമുട്ടം,സന്നഗർ,അരശുപറമ്പ്‌,ചിറയ്ക്കാണി,ടവർ).

പാഴ്‌സല്‍ നല്‍കിയില്ല; പായസക്കടയില്‍ കാറിടിച്ചുകയറ്റി അതിക്രമം

പോത്തന്‍കോട് : പാഴ്‌സല്‍ നല്‍കാത്തതിന്‍റെ ദേഷ്യത്തില്‍ പായസക്കടയില്‍ കാര്‍ ഇടിച്ചുകയറ്റി. ഇന്നലെ ഉച്ചക്ക് ഫാര്‍മേഴ്‌സ് ബാങ്കിന് സമീപമാണ് സംഭവം നടന്നത്. റോഡിന് സമീപമായിരുന്നു പായസക്കട പ്രവര്‍ത്തിച്ചിരുന്നത്. പോത്തന്‍കോട് സ്വദേശിനി റസീനയാണ് പായസക്കടയുടെ ഉടമ. മകൻ യാസീന്‍ ആയിരുന്നു സംഭവം നടക്കുമ്പോള്‍ കടയില്‍ ഉണ്ടായിരുന്നത്. കാറിൽ വന്ന രണ്ട് യുവാക്കൾ പായസമുണ്ടോയെന്ന് എന്ന് ചോദിക്കുകയും ഇല്ല എന്ന് പറഞ്ഞപ്പോൾ അസഭ്യം പറയുകയും തുടർന്ന് കാർ പിന്നോട്ട് എടുത്തു അമിത വേഗതയിൽ കടയിലേക്ക് ഇടിച്ചു കയറ്റുകയുമായിരുന്നു. പോലീസ് കേസ്‌ എടുത്തു അന്വേഷണം ആരംഭിച്ചു.

പുതിയ ചുവടുവയ്പുമായി വിഴിഞ്ഞം തുറമുഖം

കപ്പലുകൾക്ക് ഇന്ധനം നൽകുന്ന ഷിപ്പ് ടു ഷിപ്പ് ബങ്കറിംഗ് സർവീസ് വിഴിഞ്ഞം :പുതിയ ചുവടുവയ്പുമായി വിഴിഞ്ഞം അന്താരാഷ്ട്ര തുറമുഖം. കപ്പലുകൾക്ക് ഇന്ധനം നൽകുന്ന ഷിപ്പ് ടു ഷിപ്പ് ബങ്കറിംഗ്് സർവീസ് തുടങ്ങി. അദാനി ബങ്കറിങ് കമ്പനിയുടെ നേതൃത്വത്തിൽ എം ടി ഷോൺ 1 എന്ന കപ്പലിൽ നിന്ന് വിഴിഞ്ഞം തുറമുഖത്തിന്‍റെ ആങ്കറേജിലുള്ള എംഎസ്‌സി അക്കിറ്റെറ്റ എന്ന കപ്പലിലാണ് ആദ്യമായി വെരി ലോ സൾഫർ ഫ്യുയൽ ഓയിൽ നിറച്ച് തുടക്കം കുറിച്ചത്. വിഴിഞ്ഞത്ത് ഈ സേവനം തുടങ്ങിയതോടെ കപ്പലുകളിൽ ഇന്ധനം നിറക്കാൻ സിംഗപ്പൂർ, ശ്രീലങ്ക ഉൾപ്പെടെയുള്ള വിദേശ രാജ്യങ്ങളിലെ തുറമുഖങ്ങളെ ആശ്രയിക്കുന്നത് കുറയ്ക്കാൻ കഴിയുമെന്ന് അധികൃതർ പറയുന്നു. ട്രാൻഷിപ്മെന്‍റ് ഹബ് ആയി വളരുന്ന വിഴിഞ്ഞം ലോകോത്തര കപ്പൽ കമ്പനികളുടെ ഇന്ധനം നിറയ്ക്കൽ കേന്ദ്രമായും അധികം വൈകാതെ മാറും. മുംബൈ, കൊച്ചി എന്നിവിടങ്ങളിൽ നിന്ന് ബങ്കറിൽ എത്തിക്കുന്ന ഇന്ധനം തീരത്തു നിന്ന് 18 കിലോമീറ്റർ ( 10 നോട്ടിക്കൽ) ഉൾക്കടൽവരെയുള്ള അന്തർദേശീയ കപ്പൽ ചാനലിൽ നങ്കൂരമിടുന്ന കപ്പലുകൾക്കും എത്തിക്കാനാകുമെന്നതാണ് വിഴിഞ്ഞത്തിന്‍റെ പ്രത്യേകത. ഇതുവഴി സർക്കാരിന് വൻ നികുതി വർധനവ് ഉണ്ടാകുമെന്നും അധികൃതർ കരുതുന്നു. അന്താരാഷ്ട്ര കപ്പൽ ചാനൽ വഴി ദിനംപ്രതി നൂറ് കണക്കിന് കപ്പലുകൾ ലോകത്തിന്‍റെ വിവിധ ഭാഗങ്ങളിലേക്ക് ചരക്കുമായി കടന്നുപോകുന്നുണ്ട്. ഇവക്കെല്ലാം ഏറെ പ്രയോജനം വരത്തക്ക രീതിയിലാണ് വിഴിഞ്ഞത്ത് ബങ്കറിംഗ് വിധാനമൊരുക്കിയത്.

കനത്ത മഴ: കുറ്റിച്ചൽ ജംഗ്ഷൻ വെള്ളത്തിൽ

കുറ്റിച്ചൽ: തോരാതെ പെയ്യുന്ന മഴയിൽ കാട്ടാക്കട കുറ്റിച്ചൽ ജംഗ്ഷൻ വെള്ളത്തിലായി. മലയോര ഹൈവേ പോകുന്ന കുറ്റിച്ചൽ ജംഗ്ഷനിൽ റോഡ് നിർമാണത്തിലെ അപാകതയാണ് ഇപ്പോഴും ഇവിടെ വെള്ളക്കെട്ടിന് കാരണമാകുന്നത്. നിർമാണ ഘട്ടത്തിൽ തന്നെ നിരവധി സന്നദ്ധ പ്രവർത്തകരും പൊതുപ്രവർത്തകരും ഒക്കെ വിഷയം ചൂണ്ടിക്കാണിച്ചെങ്കിലും ഇത് അവഗണിച്ചാണ് റോഡ് നിർമാണം നടന്നത്. സാധാരണ മഴയിൽ പോലും റോഡ് കുളമായി മാറുന്ന സാഹചര്യമാണ്. കനത്ത മഴപെയ്താൽ റോഡിലുള്ള വെള്ളം മുഴുവൻ സമീപത്തെ കടകളിലേക്ക് ഇരച്ചുകയറുന്ന അവസ്ഥയിലാണ്. ഈ സമയം ഇതുവഴി വാഹനങ്ങൾ കടന്നുപോയാൽ പിന്നെ ഒരാൾക്കും ഇതുവഴി സഞ്ചരിക്കാൻ കഴിയാത്ത സാഹചര്യവും ഉണ്ട്.

ഇൻഫാം പാറശാല കാർഷികജില്ല സമ്മേളനം ചാരോട്ടുകോണത്ത്

പാറശാല : രൂപതയിലെ സാമൂഹിക വികസന പ്രസ്ഥാനമായ ക്ഷേമയോടനുബന്ധിച്ച് കർഷക ഉന്നമനത്തിന് വേണ്ടി കർഷകസംഘടനയായ ഇൻഫാം പാറശാല കാർഷിക സംഗമം ഇന്ന് ഉച്ചയ്ക്ക് രണ്ടിന് ചാരോട്ടുകോണം മാർ ഈവാനിയോസ് പാരിഷ് ഹാളിൽ പാറശാല രൂപത അധ്യക്ഷൻ തോമസ് മാർ യൗസേബിയോസിന്‍റെ അധ്യക്ഷതയിൽ ഇൻഫാം ദേശീയ ചെയർമാൻ ഫാ. തോമസ് മറ്റമുണ്ടയിൽ ഉദ്ഘാടനം ചെയ്യും. തയ്യൽ യൂണിറ്റിന്‍റെ ഉദ്ഘാടനം അഡ്വ. വിൻസന്‍റ് എം എൽഎയും മികച്ച കർഷകരെ ആദരിക്കൽ കാരോട് പഞ്ചായത്ത് പ്രസിഡന്‍റ് സി.എ. ജോസും കർഷകർക്കുള്ള ഐഡി കാർഡ് വിതരണം ഇൻഫാം സംസ്ഥാന പ്രസിഡന്‍റ് ജോസ് ഇടപ്പാട്ടും നിർവഹിക്കും. മുഖ്യപ്രഭാഷണം റവ. ഫാ. ജോർജ് വെട്ടിക്കാട്ടിൽ നടത്തും. പാറശാല കാർഷിക ജില്ല ഡയറക്ടർ റവ. ഫാ. ജോണ്‍ പുന്നാറ, കാർഷികജില്ല പ്രസിഡന്‍റ് എൻ. ധർമ്മരാജ് പിൻകുളം, ഇൻഫാം ദേശീയ ട്രഷറർ ജെയ്സണ്‍, ഇൻഫാം സംസ്ഥാന എക്സിക്യൂട്ടീവ് അംഗം സനൽകുമാർ എൻ. എസ്, ജോയ് ഫ്രാൻസിസ് കൊടങ്ങാവിള, സാലി കാഞ്ഞിരംകുളം, പ്രബിത ചെറുവാരക്കോണം, ഗീത പാമാംകോട് തുടങ്ങിയവർ പ്രസംഗിക്കും.

തദ്ദേശ തെരഞ്ഞെടുപ്പ്: ബ്ലോക്ക് പഞ്ചായത്തുകളിലെ സംവരണ ഡിവിഷൻ

തിരുവനന്തപുരം: 2025ലെ തദ്ദേശ തെരഞ്ഞെടുപ്പിന് മുന്നോടിയായി ജില്ലയിലെ ബ്ലോക്ക് പഞ്ചായത്തുകൾക്ക് കീഴിലെ സംവരണ ഡിവിഷനുകളുടെ തെരഞ്ഞെടുപ്പ് നടത്തി. കളക്ടറേറ്റ് കോണ്‍ഫറന്‍സ് ഹാളിൽ നടന്ന നറുക്കെടുപ്പിന് ജില്ലാ കളക്ടർ അനു കുമാരി നേതൃത്വം നൽകി. പാറശാല, അതിയന്നൂര്‍, നേമം, പോത്തന്‍കോട്, പെരുങ്കടവിള, വെള്ളനാട്, കിളിമാനൂര്‍, വാമനപുരം, നെടുമങ്ങാട്, ചിറയിന്‍കീഴ്, വര്‍ക്കല എന്നീ ബ്ലോക്ക് പഞ്ചായത്തുകളിലെ നറുക്കെടുപ്പാണ് നടന്നത്. ബ്ലോക്ക് പഞ്ചായത്തുകളും സംവരണ ഡിവിഷനുകളും ചുവടെ ചേർക്കുന്നു: പാറശാല ബ്ലോക്ക് പഞ്ചായത്ത് പട്ടികജാതി സംവരണം- 12-പൊഴിയൂര്‍ സ്ത്രീ സംവരണം- 3-ചെങ്കല്‍, 4-ഉദിയന്‍കുളങ്ങര, 5-പൊൻവിള, 6-പരശുവയ്ക്കല്‍, 10-കാരോട്, 11-കുളത്തൂര്‍, 14-പൂവാര്‍, 15-അരുമാനൂര്‍. അതിയന്നൂര്‍ ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം- 11-പുല്ലുവിള പട്ടികജാതി സംവരണം- 7-നെല്ലിമൂട് സ്ത്രീ സംവരണം- 1-മുട്ടയ്ക്കാട്, 2-പെരിങ്ങമ്മല, 3-പയറ്റുവിള, 4-അവണാകുഴി, 8-കാഞ്ഞിരംകുളം, 12-അടിമലത്തുറ. നേമം ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം -14-താന്നിവിള പട്ടികജാതി സംവരണം -9-പൂങ്കോട് സ്ത്രീ സംവരണം 5-മേലാരിയോട്, 6-ഊരൂട്ടമ്പലം, 10-കല്ലിയൂര്‍, 11-പൂങ്കുളം, 12-വെളളായണി, 15-വലിയറത്തല, 16-മച്ചേല്‍, 18-പേയാട്. പോത്തന്‍കോട് ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം -13-തുമ്പ പട്ടികജാതി സംവരണം -11-മൈതാനി സ്ത്രീ സംവരണം - 3-വെയിലൂര്‍ , 5-മുരുക്കുംപുഴ , 6-മഞ്ഞമല , 8-പണിമൂല , 12-മേനംകുളം , 14-പുതുകുറിച്ചി. പെരുങ്കടവിള ബ്ലോക്ക് പഞ്ചായത്ത് പട്ടികജാതി സംവരണം -11-മാരായമുട്ടം സ്ത്രീ സംവരണം -1-കള്ളിക്കാട്, 6-ആനാവൂര്‍, 7-പാലിയോട്, 9-മഞ്ചവിളാകം, 10-ധനുവച്ചപുരം, 12-പെരുങ്കടവിള, 15-വാഴിച്ചല്‍, 16-ഒറ്റശേഖരമംഗലം. വെള്ളനാട് ബ്ലോക്ക് പഞ്ചായത്ത് പട്ടികജാതി സംവരണം -17-തൊളിക്കോട് പട്ടികവർഗ സംവരണം -14-വെള്ളനാട് സ്ത്രീ സംവരണം -1-വിതുര , 3-പറണ്ടോട്, 4-ആര്യനാട്, 5-കുറ്റിച്ചല്‍, 9-കാട്ടാകട, 12-ഉറിയാക്കോട് , 13-ചാങ്ങ, 15-കുളപ്പട, 16-ചക്രപാണിപുരം. നെടുമങ്ങാട് ബ്ലോക്ക് പഞ്ചായത്ത് പട്ടികജാതി സംവരണം -14-തേക്കട സ്ത്രീ സംവരണം 4-അരുവിക്കര, 5-ചെറിയകൊണ്ണി, 6-അഴിക്കോട്, 8-ഏണിക്കര, 10-വട്ടപ്പാറ, 12-വേറ്റിനാട്, 13-വെമ്പായം, 15-വേങ്കവിള. കിളിമാനൂര്‍ ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം -4-പോങ്ങനാട്, 10-നഗരൂര്‍ പട്ടികജാതി സംവരണം -14-കല്ലമ്പലം സ്ത്രീ സംവരണം 1-പളളിക്കല്‍, 2-മടവൂര്‍, 5-കിളിമാനൂര്‍, 11-വെളളല്ലൂര്‍, 13-കരവാരം, 16-തൃക്കോവിൽവട്ടം. വാമനപുരം ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം -10-നന്ദിയോട് പട്ടികജാതി സംവരണം -5-പാങ്ങോട് സ്ത്രീ സംവരണം -2-കുറ്റിമൂട് , 3-കല്ലറ, 7-ഇടിഞ്ഞാര്‍, 13-പിരപ്പന്‍കോട്, 14-കോലിയകോട് , 15-വെഞ്ഞാറമൂട്, 16-നെല്ലനാട്. ചിറയിന്‍കീഴ് ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം -7-അയിലം പട്ടികജാതി സംവരണം -14-അഞ്ചുതെങ്ങ്. സ്ത്രീ സംവരണം- 2-വക്കം, 5-പുരവൂര്‍, 6-മുദാക്കല്‍, 9-കിഴുവിലം, 10-കൂന്തളളൂര്‍, 12-ചിറയിന്‍കീഴ്. വര്‍ക്കല ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം -9-കവലയൂര്‍ പട്ടികജാതി സംവരണം -8-മണമ്പൂര്‍. സ്ത്രീ സംവരണം -2-ഇലകമണ്‍, 3-അയിരൂര്‍, 6-ചെമ്മരുതി, 7-ഒറ്റൂര്‍, 11-വടശ്ശേരിക്കോണം, 12-വിളബ്ഭാഗം.

ഒരു വർഷത്തിനുള്ളിൽ തലസ്ഥാനം കളറാകും

പാളയത്ത് വി.എസ്.അച്യുതാനന്ദൻ അർബൻ പാർക്ക്, അഞ്ചിടങ്ങളിൽ സൗന്ദര്യവത്ക്കരണം തിരുവനന്തപുരം: ഒരു വർഷത്തിനുള്ളിൽ തലസ്ഥാന നഗരം കളറാക്കാനുള്ള കിടിലൻ പദ്ധതികളുമായി തിരുവനന്തപുരം വികസന അഥോറിറ്റി(ട്രിഡ). പാളയത്ത് മുൻ മുഖ്യമന്ത്രി വി.എസ്.അച്യുതാനന്ദന്‍റെ പേരിൽ അർബൻ പാർക്ക്, വട്ടിയൂർക്കാവിൽ പുനരധിവാസ കെട്ടിടം, ജവഹർ ബാലഭവനിൽ പ്ലേ സ്കേപ്പ്, ചാക്ക-ഈഞ്ചക്കൽ ഫ്ളൈ ഓവറിന്‍റെ താഴ്ഭാഗം സൗന്ദര്യവത്ക്കരിക്കുന്ന ’ആമുഖം’, ചാക്ക-ശംഖുമുഖം-എയർപോർട്ട് ആഭ്യന്തര ടെർമിനൽ കോറിഡോർ സൗന്ദര്യവത്ക്കരണം, ജവഹർ ബാലഭവനിൽ ലൈബ്രറിയും കുട്ടികളുടെ തീയറ്ററും, എൽഎംഎസ്-വെള്ളയന്പലം-കവടിയാർ-പൈപ്പ്‌ലൈൻ റോഡ് സൗന്ദര്യവൽക്കരണം തുടങ്ങിയ പദ്ധതികൾ നഗരത്തിന്‍റെ മുഖച്ഛായ മാറ്റുമെന്ന് ട്രിഡ ചെയർമാൻ കെ.സി വിക്രമൻ പത്രസമ്മേളനത്തിൽ അറിയിച്ചു. വി.എസ്.അച്യുതാനന്ദൻ അർബൻ പാർക്ക് പാളയം രക്തസാക്ഷി മണ്ഡപത്തിന് അഭിമുഖമായി 1.2 ഏക്കറിലാണ് മുൻ മുഖ്യമന്ത്രി വി.എസ്.അച്യുതാനന്ദന്‍റെ സ്മരണ നിലനിർത്താൻ മനോഹരമായ പാർക്ക് നിർമിക്കുന്നത്. ഇതിനായി സംസ്ഥാന സർക്കാരിന്‍റെ പദ്ധതി വിഹിതത്തിൽ നിന്ന് 1.64 കോടി രൂപയാണ് വകയിരുത്തിയിട്ടുള്ളത്. കോസ്റ്റ് ഫോർഡ് ആണ് നിർവഹണ ഏജൻസി. വയോജന സൗഹൃദ നടപ്പാതകൾ, കുട്ടികളുടെ കളിയിടം, ഓപ്പണ്‍ ജിം, പുൽത്തകിടി, ജലധാരയും ആന്പൽത്തടാകവും, ലഘുഭക്ഷണ കിയോസ്കുകൾ, വിഐപി പാർക്കിംഗ് സൗകര്യം, പൊതുശൗചാലയങ്ങൾ, ഓപ്പണ്‍ എയർ ഓഡിറ്റോറിയം എന്നിവയാണ് പാർക്കിന്‍റെ പ്രത്യേകതകൾ. പാർക്കിന്‍റെ നിർമാണ ഉദ്ഘാടനം വി.എസിന്‍റെ ജന്മദിനമായ 22 ന് രാവിലെ 11.30 ന് മന്ത്രി എം.ബി രാജേഷ് നിർവഹിക്കും. ഭാവിയിൽ വി.എസ്.അച്യുതാനന്ദന്‍റെ ഒരു പൂർണകായ പ്രതിമ ഇവിടെ സ്ഥാപിക്കുമെന്നും ട്രിഡ വ്യക്തമാക്കി. പുനരധിവാസ കെട്ടിട നിർമാണം വട്ടിയൂർക്കാവ് റോഡ് വികസന പദ്ധതിയുടെ ഭാഗമായി ഒഴിപ്പിക്കപ്പെടുന്ന കച്ചവടക്കാർക്കുള്ള പുനരധിവാസ പദ്ധതിയായാണ് ഇത് നടപ്പിലാക്കുന്നത്. കിഫ്ബിയുടെ സാന്പത്തിക സഹായത്തോടെ 2.17 ഏക്കർ ഇതിനകം ഒഴിപ്പിച്ചെടുത്തു. 89 കോടി രൂപയാണ് കിഫ്ബി ചില വഴിച്ചത്. മൂന്നു നിലകളിലായാണ് പ്രധാന കെട്ടിടം നിലക്കൊള്ളുന്നത്. അതിനോടൊപ്പം എ ബ്ലോക്ക് കെട്ടിടവുമുണ്ട്. ആകെ വിസ്തീർണം 2153 ചതുരശ്ര മീറ്ററാണ്. ആംഫി തിയേറ്ററുണ്ട്. പാർക്കും പൊതുയോഗത്തിനുള്ള സ്ഥലവുമുണ്ട്. കുട്ടികളുടെ കളിയിടങ്ങളുണ്ട്. ഒന്നാംഘട്ട മായി 9.26 കോടി രൂപയുടെ എസ്റ്റിമേറ്റ് അനുസരിച്ചുള്ള നിർമാണമാണ് നടത്തുക. ഭരണാനുമതി ലഭിച്ചു കഴിഞ്ഞു. സാങ്കേതിക അനുമതി ലഭിച്ചാലുടൻ ഈ വർഷം തന്നെ നിർമാണപ്രവർത്തനങ്ങൾ ആരംഭിക്കും. അർബൻ റെജുവനേഷൻ & ബ്യൂട്ടിഫിക്കേഷൻ സ്കീം കിഫ്ബി വഴി നഗരത്തെ സൗന്ദര്യവത്ക്കരിക്കുന്നതിനായി വിഭാവനം ചെയ്തിട്ടുള്ള അഞ്ചു പദ്ധതികളാണ് ഈ സ്കീമിനു കീഴിൽ നടപ്പിലാക്കുന്നത്. ട്രിഡ തയ്യാറാക്കി നൽകി കിഫ്ബി അംഗീകരിച്ച ഡീറ്റെയിൽഡ് പ്രോജക്റ്റ് റിപ്പോർട്ടിന്‍റെ അടിസ്ഥാനത്തിൽ നിർമാണ ചുമതല സ്മാർട്ട്സിറ്റി തിരുവനന്തപുരം ലിമിറ്റഡിനാണ്. പദ്ധതിയുടെ പ്രവർത്തന പുരോഗതി നിരീക്ഷിക്കുന്നത് ട്രിഡ ആയിരിക്കും. അറിവിടം: ജവഹർ ബാലഭവനിലെ കാര്യക്ഷമമായി ഉപയോഗിക്കപ്പെടാത്ത തുറസായ സ്ഥലം ഉപയോഗപ്പെടുത്തി കുട്ടികൾക്കായി അത്യാധുനിക പ്ലേ സ്കേപ്പ് നിർമിക്കുകയാണ് പദ്ധതിയുടെ ലക്ഷ്യം. ഇവിടെ പ്രദർശനത്തിനായി സ്ഥാപിച്ചിരിക്കുന്ന സീ ഹോക്ക് യുദ്ധ വിമാനത്തിനു സമീപം ക്യൂ ആർ കോഡ് സ്ഥാപിക്കും. മൊബൈൽ ഉപയോഗിച്ച് ഇത് സ്കാൻ ചെയ്താൽ ഏവിയേഷൻ ചരിത്രത്തിലെ അറിവിന്‍റെ ലോകം അവർക്കു മുന്നിൽ തുറക്കും. ആമുഖം: ചാക്ക, ഈഞ്ചയ്ക്കൽ ഫ്ളൈ ഓവറിന്‍റെ താഴ്ഭാഗം സൗന്ദര്യവത്ക്കരിക്കുന്ന പദ്ധതിയിൽ ആർട്ട് ഇൻസ്റ്റലേഷനുകൾ, ലാൻഡ് സ്കേപ്പിംഗ്, ലൈറ്റിംഗ്, റോഡരികിലെ നടപ്പാത, ചുമർചിത്രങ്ങൾ തുടങ്ങിയവയാണ് ഉൾപ്പെടുത്തിയിട്ടുള്ളത്. ഇവിടം: ചാക്ക-ശംഖുമുഖം ബീച്ച്-എയർപോർട്ട് ആഭ്യന്തര ടെർമിനൽ-കോറിഡോർ സൗന്ദര്യവത്ക്കരണം ’ഇവിടം’ പദ്ധതിയുടെ ഭാഗമായി നടപ്പിലാക്കും. കാൽനടപ്പാത, ഇരിപ്പിടങ്ങൾ, വാൾ ആർട്ട്, ഇൻസ്റ്റാലേഷനുകൾ, സുസ്ഥിര ലാൻഡ്സ്കേപ്പ്, ലൈറ്റിംഗ്, കുടിവെള്ള സൗകര്യം തുടങ്ങിയവ പദ്ധതിയുടെ ഭാഗമായി ഒരുക്കും. അറിവിടം: ജവഹർ ബാലഭവനിൽ രണ്ടാം ഘട്ടമായി പ്രധാന സ്കൂൾ കെട്ടിടം, ഓഫീസ്, ലൈബ്രറി കെട്ടിടം, കുട്ടികളുടെ തീയേറ്റർ, കളി സ്ഥലങ്ങൾ തുടങ്ങിയവയാണ് നിർമിക്കുക. എൽഎംഎസ്-വെള്ളയന്പലം-കവടിയാർ-പൈപ്പ്‌ലൈൻ റോഡ് സൗന്ദര്യവത്ക്കരണത്തിന്‍റെ ഭാഗമായി ലാന്‍റ് സ്കേപ്പിംഗ്, ലൈറ്റിംഗ്, ഫുട്പാത്തുകൾ, സൈക്കിൾ ട്രാക്ക്, ഓപ്പണ്‍ ജിം, പാർക്ക് എന്നിവ നിർമിക്കാനും പദ്ധതി തയാറാക്കിയിട്ടുണ്ട്.

വയോധിക ട്രെയിന്‍തട്ടി മരിച്ചനിലയില്‍

മെഡിക്കല്‍കോളജ്: വയോധികയെ ട്രെയിന്‍തട്ടി മരിച്ചനിലയില്‍ കണ്ടെത്തി. കരിക്കകം മതില്‍മുക്ക് മുസ്‌ലിം ജമാഅത്തിനു സമീപം മുടുമ്പില്‍ പുത്തന്‍വീട്ടില്‍ എം. ഗിരിജകുമാരി (63) യാണ് മരിച്ചത്. കഴിഞ്ഞദിവസം ഉച്ചയ്ക്കാണ് ദാരുണമായ സംഭവം ഉണ്ടായത്. തിരുവനന്തപുരത്തേക്കു വന്ന ജനശതാബ്ദി എക്‌സ്പ്രസിനു മുന്നില്‍ ഇവര്‍ ചാടുകയായിരുന്നുവെന്നാണ് ലോക്കോ പൈലറ്റ് പോലീസിന് നല്‍കിയ മൊഴി. വീടിനു സമീപത്ത് മതില്‍മുക്കില്‍ റെയില്‍വേട്രാക്ക് കടന്നുപോകുന്ന വളവിലാണ് ഇവര്‍ ചാടിയത്. കൈകാലുകളും ശരീരവും ഒടിഞ്ഞു നുറുങ്ങിയ നിലയിലായിരുന്നു. ഭര്‍ത്താവിന്‍റെ അസുഖവും തുടര്‍ന്നുള്ള മാനസിക വിഷമവുമാണ് ആത്മഹത്യക്കു കാരണമെന്നു പോലീസ് പറയുന്നു. പേട്ട പോലീസ് ഇന്‍ക്വസ്റ്റ് നടപടികള്‍ സ്വീകരിച്ചു. മൃതദേഹം പോസ്റ്റുമോര്‍ട്ടത്തിനുശേഷം ബന്ധുക്കള്‍ക്ക് വിട്ടുകൊടുത്തു. ഭര്‍ത്താവ്: എം. മോഹനന്‍ നായര്‍. മക്കള്‍: എം. നിശാന്ത്, എം. നിതീഷ്. മരുമക്കള്‍: പി. മാലിനി, കെ. അഭിരാമി. സഞ്ചയനം വ്യാഴാഴ്ച രാവിലെ എട്ടിന്.

വലിയവിള ബിഎം എല്‍പി സ്കൂളില്‍ പച്ചക്കറി വിളവെടുപ്പ്

നെയ്യാറ്റിന്‍കര : സ്കൂളിലെ പച്ചക്കറി കൃഷി വിളവെടുപ്പ് ആഘോഷമാക്കി വിദ്യാര്‍ഥികള്‍. പുതുതലമുറയുടെ കാര്‍ഷിക താത്പര്യം പ്രോത്സാഹിപ്പിക്കാനുറച്ച് അധ്യാപകരും രക്ഷിതാക്കളും. വലിയവിള ബിഎം എല്‍പി സ്കൂളില്‍ കുളത്തൂര്‍ കൃഷി ഭവന്‍റെ സഹകരണത്തോടെയാണ് വിവിധയിനം പച്ചക്കറി കൃഷിക്ക് തുടക്കം കുറിച്ചത്. സ്കൂളില്‍ വിദ്യാര്‍ഥികളുടെ കൃഷിക്കൂട്ടം ക്ലബ് സജീവമാണ്. പച്ചക്കറി വിത്തുകളും ആവശ്യമായ മാര്‍ഗനിര്‍ദേശങ്ങളും നല്‍കിയത് കുളത്തൂര്‍ കൃഷി ഭവനാണ്. വഴുതനങ്ങ, കത്തിരിക്ക എന്നീ പച്ചക്കറികളുടെ വിളവെടുപ്പ് ഉദ്ഘാടനം പിടിഎ പ്രസിഡന്‍റ് സിജു നിർവഹിച്ചു. വിദ്യാര്‍ഥികള്‍ ചെറുപ്രായത്തിലേ കാര്‍ഷികാഭിമുഖ്യമുള്ളവരാകണമെന്ന് അദ്ദേഹം അഭിപ്രായപ്പെട്ടു. സ്കൂള്‍ ഹെഡ്മിസ്ട്രസ് കൊച്ചുറാണി, അധ്യാപകര്‍, രക്ഷിതാക്കള്‍, കൃഷി ഭവന്‍ പ്രതിനിധികള്‍ എന്നിവര്‍ സംബന്ധിച്ചു.

വിശ്വാസ സംഗമം നടത്തി

വെള്ളറട: ശബരിമലയിലെ സ്വര്‍ണം കൊള്ളയടിച്ച സംഭവത്തിൽ പ്രതിഷേധിച്ച് ഇന്ത്യന്‍ നാഷണല്‍ കോണ്‍ഗ്രസ് മാരായമുട്ടം - ആനാവൂര്‍ മണ്ഡലം കമ്മറ്റികളുടെ നേതൃത്വത്തില്‍ വിശ്വാസ സംഗമം നടത്തി. മാരായമുട്ടം മണ്ഡലം പ്രസിഡന്‍റ് ബിനില്‍ മണലുവിളയുടെ അധ്യക്ഷതയില്‍ ചേര്‍ന്ന യോഗം മുന്‍ ഡിസിസി പ്രസിഡന്‍റ് അഡ്വ.കെ. മോഹന്‍കുമാര്‍ ഉദ്ഘാടനം ചെയ്തു. കെപിസിസിജനറല്‍ സെക്രട്ടറിമാരായ നെയ്യാറ്റിന്‍കര സനല്‍ മണക്കാട് സുരേഷ് എന്നിവര്‍ മുഖ്യപ്രഭാഷണം നടത്തി. ആശംസകള്‍ അറിയിച്ചുകൊണ്ട് മാരായമുട്ടം എം.എസ്.അനില്‍, ആനാവൂര്‍ മണ്ഡലം പ്രസിഡന്‍റ് ആനാവൂര്‍ രാജേഷ്, ബ്ലോക്ക് ഭാരവാഹികളായ വടകര ജയന്‍, മണ്ണൂര്‍ ശ്രീകുമാര്‍ , കാക്കണം മധു , അനൂപ് പാലിയോട്, തത്തിയൂര്‍ സുരേന്ദ്രന്‍ , മണവാരി ശശി , ചാവടി അനില്‍, കാരക്കോണം ഗോപന്‍, ഗോപകുമാര്‍ , കുന്നത്തുകാല്‍ മണികണ്ഠന്‍, കുസുമകുമാരി , മഞ്ജുഷ ജയന്‍ , വടകര വേണുഗോപാല്‍ , കോട്ടയക്കല്‍ വിനോദ്, കോട്ടയക്കല്‍ സുകു, ശ്രീരാഗം ശ്രീകുമാര്‍ ,അനില്‍കുമാര്‍ എസ്. കെ ,വിനീഷ് കോട്ടയക്കല്‍,വിഷ്ണു ഗാന്ധി , മേച്ചേരി അനീഷ്, അഖില്‍ തൃപ്പലവൂര്‍, കോട്ടയ്ക്കല്‍ മധു , തൃപ്പലവൂര്‍ സന്തോഷ് തുടങ്ങിയവര്‍ നേതൃത്വം നല്‍കി.

പാറശാല പഞ്ചായത്ത് വികസന സദസ് സംഘടിപ്പിച്ചു

പാറശാല: പാറശാല പഞ്ചായത്ത് നടത്തിയ വികസന പ്രവര്‍ത്തനങ്ങള്‍ ജനങ്ങള്‍ക്ക് മുന്നില്‍ അവതരിപ്പിച്ചും ജനങ്ങളില്‍ നിന്ന് അഭിപ്രായങ്ങള്‍ ശേഖരിച്ചുകൊണ്ടും പാറശാല പഞ്ചായത്ത് വികസന സദസ് സംഘടിപ്പിച്ചു. ഉദ്ഘാടനം സി.കെ. ഹരീന്ദ്രന്‍ എംഎല്‍എ നിര്‍വ്വഹിച്ചു . ഗ്രാമപഞ്ചായത്ത് പ്രസിഡന്‍റ് എല്‍.മഞ്ജുസ്മിത അധ്യക്ഷത വഹിച്ചു. പഞ്ചായത്ത് നടത്തിയ വികസന പ്രവര്‍ത്തനങ്ങളുടെ റിപ്പോര്‍ട്ട് അവതരണം പ്രസിഡന്‍റ് എല്‍.മഞ്ജുസ്മിത നടത്തി .ആശംസകള്‍ നേര്‍ന്നുകൊണ്ട് പഞ്ചായത്ത് വൈസ് പ്രസിഡന്‍റ് ആര്‍. ബിജു, പഞ്ചായത്ത് സ്ഥിരം സമിതി അധ്യക്ഷരായ അനിതാറാണി, വീണ, ബ്ലോക്ക് പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷ വിനിത കുമാരി, പഞ്ചായത്ത് അംഗങ്ങളായ ഓമന, മായ, ജയകുമാര്‍, ക്രിസ്തുരാജ്, അനിത, എം. സുനില്‍, സുധാമണി, ഐസിഡിഎസ് സൂപ്പര്‍വൈസര്‍ ഡോ. മഞ്ജു. എന്‍. രാഘവന്‍ നാടാര്‍, എ. ശശിധരന്‍ നായര്‍, എസ്. മധു, ജസ്റ്റിന്‍, ഡോ. സെബി, സുന്ദരേശന്‍, കുടുംബശ്രീ ചെയര്‍ പേഴ്‌സ്ന്‍ സബൂറാ ബീവി, ജോണ്‍ സേവ്യര്‍, പഞ്ചായത്ത് സെക്രട്ടറി ജി. എസ്. ഹരി തുടങ്ങിയവര്‍ സംസാരിച്ചു. സംസ്ഥാന സര്‍ക്കാരിന്‍റെ വികസന നേട്ടങ്ങള്‍ കോര്‍ത്തിണക്കിയ വീഡിയോ സദസില്‍ പ്രദര്‍ശിപ്പിച്ചു. തുടര്‍ന്ന് പഞ്ചായത്ത് വികസനത്തിനായുള്ള ജനങ്ങളുടെ അഭിപ്രായങ്ങളും ചര്‍ച്ചകളും നടന്നു.

കാണാതായ മൂന്നംഗ കുടുംബത്തെ കണ്ടെത്തി

പേരൂര്‍ക്കട: മൂന്നാഴ്ച മുമ്പ് വീട്ടില്‍ നിന്നു കാണാതായ മൂന്നംഗ കുടുംബത്തെ ഫോര്‍ട്ട് പോലീസ് കണ്ടെത്തി തിരുവനന്തപുരത്ത് എത്തിച്ചു. സെപ്തംബര്‍ 24ന് രാവിലെ 9 മുതല്‍ വീട്ടില്‍ നിന്നു കാണാതായ ദന്പതികളേയും നാലു വയസുള്ള മകളെയുമാണ് കണ്ടെത്തിയത്. കടബാധ്യത മൂലമാണ് മാറിനിന്നതെന്ന് ദമ്പതികള്‍ ഫോര്‍ട്ട് സിഐ വി.ആര്‍ ശിവകുമാറിനോടു പറഞ്ഞു. വീട്ടില്‍നിന്നു സ്ഥലംവിട്ട ഇവര്‍ തമിഴ്‌നാട്ടില്‍ കോയമ്പത്തൂരില്‍ താമസിച്ചു വരികയായിരുന്നു. ഭർത്താവിന് കോയമ്പത്തൂരില്‍ ഡ്രൈവറായി ജോലി ലഭിച്ചു. ഭാര്യയ്ക്കും ഇതേസ്ഥലത്ത് തരക്കേടില്ലാത്ത ഉദ്യോഗം ലഭിച്ചു. ഇതിനിടെയാണ് മൊബൈല്‍ ലൊക്കേഷന്‍ കേന്ദ്രീകരിച്ച് പോലീസ് കോയമ്പത്തൂരിലെത്തുന്നത്. പോലീസാണ് ഇവരെ കാര്യങ്ങള്‍ പറഞ്ഞു മനസ്സിലാക്കി വീട്ടിലേക്കു വണ്ടി കയറ്റിയത്. തിരുവനന്തപുരത്ത് എത്തിയ മൂവരും നിയമനടപടിക്രമങ്ങള്‍ പൂര്‍ത്തീകരിച്ചശേഷം ബന്ധുക്കള്‍ക്കൊപ്പം ചേര്‍ന്നു.

ശ്മശാന ഭൂമിയിൽ മാലിന്യം കത്തിക്കൽ: കരാറുകാരന് പിഴ ചുമത്തി

വിതുര: മേമല വാർഡ് പരിധിയിലെ ശ്മശാന ഭൂമിയിൽ പഞ്ചായത്ത് ഓഫീസിൽ നിന്നുള്ള മാലിന്യം കത്തിച്ച സംഭവത്തിൽ കരാറുകാരന് പിഴ ചുമത്തി പഞ്ചായത്ത്. മേമല സ്വദേശി ശ്രീകുമാറിനാണ് സോളിഡ് വേസ്റ്റ് മാനേജ്മെന്‍റ് റൂൾ പ്രകാരം 5,000 രൂപ പിഴ ചുമത്തിയത്. ഹരിത കർമ സേനയുടെ നേതൃത്വത്തിൽ മാലിന്യ ശേഖരണവും സംസ്കരണവും നടക്കുന്നതിനിടെ ശ്മശാന ഭൂമിയിൽ മാലിന്യം കത്തിയമരുന്ന ദൃശ്യങ്ങൾ പുറത്തു വന്നതു വിവാദമായിരുന്നു. പിന്നാലെ യുഡിഎഫ് രംഗത്ത് വന്നിരുന്നു. പേപ്പർ മാലിന്യത്തിനു പുറമേ ഇലക്ട്രോണിക്, പ്ലാസ്റ്റിക് മാലിന്യം ഉൾപ്പെടെ കത്തുന്നത് ദൃശ്യങ്ങളിൽ വ്യക്തമായിരുന്നു. ഇതു സംബന്ധിച്ച് റിപ്പോർട്ട് നൽകാൻ സെക്രട്ടറി ഷിബു പ്രണാബിനെ പ്രസിഡന്‍റ് മഞ്ജുഷ ജി.ആനന്ദ് ചുമതലപ്പെടുത്തിയിരുന്നു. തുടർന്ന് നൽകിയ റിപ്പോർട്ടിന്റെ അടിസ്ഥാനത്തിലാണ് പിഴ ചുമത്തിയത്. എന്നാൽ ഇലക്ട്രോണിക്, പ്ലാസ്റ്റിക് മാലിന്യം കത്തിച്ചെന്ന വാദം തെറ്റാണെന്ന് പഞ്ചായത്ത് പ്രസിഡന്‍റ് മഞ്ജുഷ ജി.ആനന്ദ് പറഞ്ഞു. തദ്ദേശ തിരഞ്ഞെടുപ്പിനു മുന്നോടിയായി ശ്മശാനത്തിന്‍റെ പ്രവർത്തനം തടസപ്പെടുത്തി രാഷ്ട്രീയ മുതലെടുപ്പ് നടത്തി തെറ്റിധാരണ പരത്താൻ വേണ്ടി വിഷയം യുഡിഎഫ് വിവാദമാക്കാൻ ശ്രമിക്കുകയാണെന്നും മാലിന്യം കത്തിച്ച സംഭവത്തിൽ പഞ്ചായത്ത് അടിയന്തിര നടപടി സ്വീകരിച്ചുവെന്നും പ്രസിഡന്‍റ് പറഞ്ഞു.

പ്ലസ്ടു വിദ്യാർഥിനിയെ പീഡിപ്പിച്ചയാൾ അറസ്റ്റിൽ

പൂവാർ: പ്ലസ്ടു വിദ്യാർഥിനിയെ പീഡിപ്പിച്ച കേസിലെ പ്രതിയെ കാഞ്ഞിരംകുളം പോലീസ് പിടികൂടി. കരുംകുളം പുല്ലുവിള തോട്ടം പുരയിടത്തിൽ ദീപു ഗിൽബർട്ടി(23) നെയാണ് കാഞ്ഞിരംകുളം പോലീസ് അറസ്റ്റ് ചെയ്തത്. 5ന് വൈകുന്നേരം 6 ന് പെൺകുട്ടിയെ പ്രലോഭിപ്പിച്ച് പുതിയതുറയിൽ നിന്നും തട്ടി കൊണ്ടുപോയി ലോഡ്ജിൽ എത്തിച്ച് പീഡിപ്പിക്കുകയായിരുന്നു.പെൺകുട്ടിയെ കാണാനില്ലെന്ന് അമ്മ കാഞ്ഞിരംകുളം പോലീസിൽ നൽകിയ പരാതിയെ തുടർന്ന് അന്വേഷണം നടത്തി വരുന്നതിനിടയിൽ ഇന്നലെ പെൺകുട്ടിയേയും പ്രതിയേയും പൂവാർ ഭാഗത്തു വച്ച് പിടികൂടിയത്. കാഞ്ഞിരംകുളം എസ് എച്ച് ഒ പി.രതീഷിന്‍റെ നേതൃത്വത്തിൽ എസ് സി പി ഒ അരുൺ,വിഷ്ണു, സിപിഒ-മാരായ നിതിൻ,ബിനു എന്നിവരടങ്ങിയ സംഘമാണ് പ്രതിയെ പിടികൂടിയത്. ഇയാൾ കഴിഞ്ഞ വർഷം സമാനമായ രീതിയിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിലെ പ്രതിയാണ്. ജാമ്യത്തിലിറങ്ങിയ പ്രതിയാണ് വീണ്ടും പീഡന കേസിൽപ്പെട്ടത്. പ്രതിയെ കോടതി റിമാൻഡ് ചെയ്തു.

ലോറി തടഞ്ഞ് പണപ്പിരിവ്: ആർടി ഓഫീസിലെ മുൻ ഡ്രൈവർ അറസ്റ്റില്‌

വിഴിഞ്ഞം: ബൈപ്പാസിലൂടെ രാത്രികാലങ്ങളിൽ വരുന്ന വാഹനങ്ങൾ തടഞ്ഞ് പണപ്പിരിവ് നടത്തിയ സംഭവത്തിൽ ആർടി ഓഫീസിലെ മുൻ താൽക്കാലിക ഡ്രൈവറെ കാഞ്ഞിരംകുളം പോലീസ് അറസ്റ്റ് ചെയ്തു. കാഞ്ഞിരംകുളം കരിച്ചൽ രതീഷ് ഭവനിൽ രതീഷ് (37) ആണ് അറസ്റ്റിലായത്. ഇയ്യാൾ പാറശാല ആർടി ഓഫീസിൽ രണ്ടുവർഷത്തോളം ഡ്രൈവറായി ജോലി ചെയ്തിട്ടുണ്ടെന്ന് പോലീസ് അറിയിച്ചു. കോവളം - കാരോട് ബൈപ്പാസിൽ പൂവാർ - കാഞ്ഞിരംകുളം സ്റ്റേഷൻ പരിധിയിൽ രാത്രികാലങ്ങളിൽ ലോറികൾ തടഞ്ഞ് വാഹന ഉടമകളിൽ നിന്നും വൻതോതിൽ പണം പിരിവ് നടത്തിവന്ന കേസിലെ രണ്ടാം പ്രതിയാണ് പിടിയിലായ രതീഷ്. കേസിൽ ആർടിഒ എൻഫോഴ്സ്മെന്‍റ് വിഭാഗത്തിലെ ഒരു ഉദ്യോഗസ്ഥനെ ഒന്നാം പ്രതിയാക്കിയാണ് കേസ്. തമിഴ്നാട് തിരുനെൽവേലി ജില്ലയിലെ കാവൽകിണർ സ്വദേശിയായ സെന്തിൽകുമാർ നൽകിയ പരാതിയിൽ ഫോൺനമ്പർ കേന്ദ്രീകരിച്ച് നടത്തിയ അന്വേഷണത്തിലാണ് രതീഷിനെ കാഞ്ഞിരംകുളം പോലീസ് അറസ്റ്റ് ചെയ്തത്. തമിഴ്നാട്ടിൽ നിന്നും വിഴിഞ്ഞം അദാനി പോർട്ടിലേക്ക് കരിങ്കല്ല് കയറ്റി കൊണ്ടുവരുന്ന ലോറികളിൽ നിന്നാണ് ഉദ്യോഗസ്ഥരും പ്രതിയും ചേർന്ന് പണം പിരിപ്പ് നടത്തി വന്നത്. ആർടിഒ എൻഫോഴ്സ്‌മെൻറ് വിഭാഗത്തിലെ ഉദ്യോഗസ്ഥരെന്ന് പറഞ്ഞാണ് ലോറികൾ തടഞ്ഞ് പണം തട്ടിയെടുക്കുന്നതെന്ന് പരാതിയിൽ പറയുന്നു. കേസുമായി ബന്ധപ്പെട്ട് കൂടുതൽ പേരെ ചോദ്യം ചെയ്യേണ്ടതുണ്ട് എന്നാണ് കാഞ്ഞിരംകുളം എസ് എച്ച് ഒ.പി രതീഷ് പറയുന്നത്. അറസ്റ്റ് ചെയ്ത പ്രതിയെ കോടതി റിമാൻഡ് ചെയ്തു.

സംസ്ഥാനത്ത് മാറ്റം കൊണ്ടുവരുന്നതിൽ പഞ്ചായത്തുകളുടെ പങ്ക് വലുത്: മന്ത്രി കെ.എൻ.ബാലഗോപാൽ

നെടുമങ്ങാട് : സംസ്ഥാനത്ത് സാധാരണ ജനങ്ങളുടെ ഇടയിൽ മാറ്റം കൊണ്ടുവരുന്നതിൽ പഞ്ചായത്തുകളുടെ പങ്ക് വലുതാണെന്ന് ധന മന്ത്രി കെ.എൻ.ബാലഗോപാൽ. പ്ലാൻ ഫണ്ടിന്‍റെ 30 ശതമാനം പ്രവർത്തനങ്ങളും പഞ്ചായത്തുകൾ വഴിയാണ് നടപ്പിലാക്കുന്നത്. ഡിജിറ്റൽ സാക്ഷരത പോലുള്ള അഭിമാന പദ്ധതികൾ നടപ്പിലാക്കാൻ കഴിഞ്ഞത് പഞ്ചായത്തുകളുടെ പൂർണ പിന്തുണ കൊണ്ടാണ്. ഉഴമലയ്ക്കൽ പഞ്ചായത്തിന്‍റെ ആദ്യ പ്രസിഡന്‍റ് എം.പ്രഭാകരന്‍റെ സ്മരണാർഥം നിർമ്മിച്ച സ്വരാജ് ഹാൾ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. സ്വരാജ് ട്രോഫി അവാർഡ് തുക വിനിയോഗിച്ചാണ് ഹാൾ നിർമ്മിച്ചത്. രണ്ട് തവണ ജില്ലയിൽ ഒന്നാം സ്ഥാനവും ഈ വർഷം സംസ്ഥാന തലത്തിൽ രണ്ടാമതും ആയിരുന്നു പഞ്ചായത്ത്. 80 ലക്ഷം രൂപ ചിലവിൽ നിർമ്മിച്ച ഹാളിൽ 500 പേർക്ക് ഇരിക്കാവുന്ന സൗകര്യമുണ്ട്. ജി. സ്റ്റീഫൻ എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ജെ.ലളിത, ജില്ലാ പഞ്ചായത്ത് അംഗം എ.മിനി, പഞ്ചായത്ത് വൈസ് പ്രസിഡന്‍റ് എസ്.ശേഖരൻ തുടങ്ങിയവർ പങ്കെടുത്തു.

കളക്ടറേറ്റിലെ സെക്യൂരിറ്റി കാബിന്‍ നിര്‍മാണം പുനരാരംഭിച്ചു

പേരൂര്‍ക്കട: കുടപ്പനക്കുന്ന് കളക്ടറേറ്റില്‍ മാസങ്ങളായി നിലച്ചിരുന്ന സെക്യൂരിറ്റി കാബിന്‍ നിര്‍മാണം പുനരാരംഭിച്ചു. കഴിഞ്ഞ ഏഴിന് ദീപിക പ്രസിദ്ധീകരിച്ച വാര്‍ത്തയെത്തുടര്‍ന്നാണ് കാബിന്‍ നിര്‍മാണം വീണ്ടും തുടങ്ങിയത്. കഴിഞ്ഞ ഏഴ് മാസമായി കാബിന്‍ നിര്‍മാണം നിലച്ചിരിക്കുന്നതും കാബിന്‍റെ മേല്‍ക്കൂര ബലപ്പെടുത്താതെ വെറുതെ ഷീറ്റുപാകിയിരിക്കുന്നതും വാര്‍ത്തയില്‍ സൂചിപ്പിച്ചിരുന്നു. പിഡബ്ല്യുഡിയ്ക്ക് ക്യാബിന്‍റെ നിര്‍മാണച്ചുമതല നല്‍കിയതുമുതല്‍ പണി ഇഴഞ്ഞുനീങ്ങുകയായിരുന്നു. കളക്ടറേറ്റില്‍ നിലവിലുള്ള നാലു സുരക്ഷാജീവനക്കാര്‍ക്കുവേണ്ടിയാണ് ക്യാബിന്‍ ഒരുങ്ങുന്നത്. വാര്‍ത്തയെ തുടര്‍ന്ന് അധികൃതര്‍ ഇടപെട്ട് മേല്‍ക്കൂരയിലെ ഷീറ്റുകള്‍ മാറ്റി. പകരം കോണ്‍ക്രീറ്റ് ചെയ്യുന്നതിനുള്ള പ്രവര്‍ത്തനങ്ങള്‍ ആരംഭിച്ചു. എഡിഎം ടി.കെ വിനീതിന്‍റെ ഇടപെടലിലൂടെ കാബിന്‍റെ നിര്‍മാണം എത്രയും വേഗം പൂര്‍ത്തീകരിക്കാന്‍ തീരുമാനമായിട്ടുണ്ട്.

തിരുവനന്തപുരം കോർപറേഷൻ : സംവരണ വാർഡുകൾ

തിരുവനന്തപുരം: തദ്ദേശസ്വയംഭരണ തെരഞ്ഞെടുപ്പിന് മുന്നോടിയായി തിരുവനന്തപുരം കോർപറേഷൻ പരിധിയിലെ സംവരണ വാർഡുകളുടെ നറുക്കെടുപ്പ് നടത്തി. എൽഎസ്ജിഡി ഡയറക്ടർ (അർബൻ) സൂരജ് ഷാജിയുടെ നേതൃത്വത്തിൽ നന്ദൻകോട് സ്വരാജ് ഭവനിലാണ് നറുക്കെടുപ്പ് നടത്തിയത്. പട്ടികജാതി സ്ത്രീ സംവരണം 4-കാട്ടായിക്കോണം, 10- പാങ്ങപ്പാറ, 73-ആറ്റുകാല്‍, 96-അലത്തറ, 99 കുളത്തൂര്‍ പട്ടികജാതി സംവരണം 19 -കാച്ചാണി, 24-പേരൂര്‍ക്കട, 51-ആറന്നൂര്‍, 95-ചെറുവയ്ക്കല്‍ സ്ത്രീ സംവരണം 3-ചന്തവിള, 7-ചേങ്കോട്ടുകോണം, 8-ചെമ്പഴന്തി, 9-കാര്യവട്ടം, 11-ശ്രീകാര്യം, 15-അമ്പലമുക്ക്, 16-കുടപ്പനക്കുന്ന്, 18-നെട്ടയം, 26-കുറവന്‍കോണം, 30-നാലാഞ്ചിറ, 31-ഇടവക്കോട്, 33-മെഡിക്കല്‍കോളേജ്, 34- പട്ടം, 35-കേശവദാസപുരം, 36-ഗൗരിശപട്ടം, 39-പാളയം, 40-വഴുതയ്ക്കാട് , 41-ശാസ്തമംഗലം, 43-തിരുമല, 47-പൂജപ്പുര, 50-വലിയശാല, 55-പൊന്നുമംഗലം, 59-നെടുങ്കാട്, 60-കാലടി, 61-കരുമം, 62-പുഞ്ചക്കരി, 64-വെങ്ങാനൂര്‍, 67-ഹാര്‍ബര്‍, 68-വെള്ളാര്‍, 70-പൂന്തുറ, 71-പുത്തന്‍പള്ളി, 72-അമ്പലത്തറ, 74-കളിപ്പാന്‍കുളം, 76- ബീമാപള്ളി, 77- വലിയതുറ, 78 വള്ളക്കടവ്, 79-ശ്രീവരാഹം, 80-മണക്കാട്, 83-പെരുന്താന്നി, 84-ശ്രീകണ്‌ഠേശ്വരം, 90-വെട്ടുകാട്, 91-കരിയ്ക്കകം, 92-കടകംപള്ളി, 93-അണമുഖം, 94- ആക്കുളം, 101-പള്ളിത്തുറ.

ശബരിമല സ്വർണക്കൊള്ള: മഹിളാ കോൺഗ്രസ് കുറ്റവിചാരണ നടത്തി

വിതുര : ശബരിമലയിലെ സ്വർണക്കൊള്ളയിൽ പ്രതിഷേധിച്ച് മഹിളാ കോൺഗ്രസ് തൊളിക്കോട് മണ്ഡലം കമ്മിറ്റിയുടെ നേതൃത്വത്തിൽ മന്ത്രി വി.എൻ.വാസവന്‍റെയും ദേവസ്വം ബോർഡ് പ്രസിഡന്‍റ് പി.എസ്.പ്രശാന്തിന്‍റെയും കോലങ്ങളിൽ ചെരുപ്പ് മാല അണിയിച്ച് കുറ്റവിചാരണ നടത്തി. സംസ്ഥാന സെക്രട്ടറി ഷെമി ഷംനാദ് ഉദ്‌ഘാടനം ചെയ്തു. ഡിസിസി ജനറൽ സെക്രട്ടറി തോട്ടുമുക്ക് അൻസർ, കോൺഗ്രസ് തൊളിക്കോട് മണ്ഡലം പ്രസിഡന്‍റ് തൊളിക്കോട് ഷംനാദ്, യുഡിഎഫ് ചെയർമാൻ ചായം സുധാകരൻ, എൻ.എസ്.ഹാഷിം, കെ.എൻ.അൻസർ, ബി.പ്രതാപൻ, ശോഭന ജോർജ്, എസ്.സുഷമ, സൗമ്യ രാജ്, ആനപ്പെട്ടി കബീർ, പ്രീത കുമാരി, വീണ കുമരേശൻ, സത്താർ ഇരുത്തല, സജീദ് മേടയിൽ, എം.എം.സലീം, മുബീൻ മുഹമ്മദ് എന്നിവർ സംസാരിച്ചു.

യുവാവിന്‍റെ കൈയിൽ കുടുങ്ങിയ വിലങ്ങ് ഫയർഫോഴ്സ് മുറിച്ചു മാറ്റി

പേരൂര്‍ക്കട: യുവാവിന്‍റെ ഇടതു കൈത്തണ്ടയില്‍ കുടുങ്ങിയ വിലങ്ങ് ഫയര്‍ഫോഴ്‌സ് ഉദ്യോഗസ്ഥര്‍ മുറിച്ചു നീക്കി. മണക്കാട് സ്വദേശിയായ 25കാരന്‍റെ കൈകളില്‍ അണിഞ്ഞിരുന്ന വിലങ്ങാണ് ഇടതു കൈത്തണ്ടയുടെ ഭാഗത്ത് കുടുങ്ങുകയും ഏറെനേരത്തെ പരിശ്രമത്തിനൊടുവില്‍ മുറിച്ചുമാറ്റുകയും ചെയ്തത്. മദ്യപിച്ച് വീട്ടില്‍ പ്രശ്‌നമുണ്ടാക്കിയതിനെ തുടർന്നാണ് ഫോര്‍ട്ട് പോലീസ് 25കാരനെ സ്റ്റേഷനിലെത്തിച്ചത്. ഇവിടെയും ഇയാള്‍ അക്രമാസക്തനായതോടെ വിലങ്ങണിയിക്കുകയായിരുന്നു. യുവാവ് ബഹളം തുടര്‍ന്നതോടെ വിലങ്ങ് ഇടതു കൈത്തണ്ടയില്‍ കുടുങ്ങി. ഫോര്‍ട്ട് സ്റ്റേഷനിലെ പോലീസ് ഉദ്യോഗസ്ഥര്‍ ഇയാളെ തിരുവനന്തപുരം ഫയര്‍‌സ്റ്റേഷനിലെത്തിച്ചു. ഗ്രേഡ് സ്റ്റേഷന്‍ ഓഫീസര്‍ സതീഷ്‌കുമാറും ഉദ്യോഗസ്ഥരായ എം.എസ് ഷഹീര്‍, വി.എസ് സവിന്‍ എന്നിവരും ചേര്‍ന്ന് 20 മിനിറ്റ് പരിശ്രമിച്ചാണ് വിലങ്ങ് നീക്കിയത്.

നെടുമങ്ങാട്ട് 24കാരിക്ക് അമീബിക് മസ്തിഷ്ക ജ്വരം

നെടുമങ്ങാട് : ഇരിഞ്ചയത്ത് 24 വയസുള്ള യുവതിയ്ക്ക് അമീബിക് മസ്തിഷ്ക ജ്വരം സ്ഥിരീകരിച്ചു. പനി ഉൾപ്പെടെയുള്ള ശാരീരിക ബുദ്ധിമുട്ടുകൾ ഉണ്ടായത്തിനെതുടർന്ന് കഴിഞ്ഞ ആഴ്ച മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. രക്ത പരിശോധനയിലാണ് മസ്തിഷ്ക ജ്വരം സ്ഥിരീകരിച്ചത്. യുവതി നിലവിൽ വെന്‍റിലേറ്ററിലാണ്. യുവതിയുടെ രണ്ട് വയസുള്ള കുട്ടിയും നിരീക്ഷണത്തിലാണെന്ന് ആരോഗ്യ വകുപ്പ് അധികൃതർ അറിയിച്ചു. എന്നാൽ രോഗ ബാധയുടെ ഉറവിടത്തെ സംബന്ധിച്ച് വ്യക്തത വന്നിട്ടില്ല.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]