കോട്ടയം: അക്ഷര വെളിച്ചത്തിന്റെ ആറുപതിറ്റാണ്ടുകള് പിന്നിട്ട് അമലഗിരി ബികെ കോളജ് വജ്രജൂബിലി നിറവില്.
ചങ്ങനാശേരി രൂപതയുടെ പ്രഥമമെത്രാനും ആരാധനാ സന്യാസിനി സമൂഹത്തിന്റെ സ്ഥാപകനുമായ ധന്യന് മാര് തോമസ് കുര്യാളശേരിയുടെ ദീര്ഘവീക്ഷണത്തിന്റെയും വിദ്യാഭ്യാസ ദര്ശനത്തിന്റെയും സാക്ഷാത്കാരമാണ് അമലഗിരി ബികെ കോളജ്. ചങ്ങനാശേരി സെന്റ് തോമസ് പ്രൊവിന്സിലെ സന്യാസിനികള് പെണ്കുട്ടികള്ക്കു മികച്ച വിദ്യാഭ്യാസം നല്കുകയെന്ന ലക്ഷ്യത്തോടെ 1965ലാണ് കോളജ് തുടങ്ങുന്നത്.
ആറു പതിറ്റാണ്ടുകള് പിന്നിടുമ്പോള് ബികെ കോളജ് കേരളത്തിലെ മികച്ച വനിതാ കലാലയങ്ങളിലൊന്നായി മാറി. ഒമ്പത് ഡിഗ്രി കോഴ്സുകളും ഏഴു പിജി കോഴ്സുകളും ഇക്കണോമിക്സ് വിഭാഗത്തിലെ ഗവേഷണ കേന്ദ്രവും കോളജിന്റെ അക്കാദമിക മികവിന് ഉദാഹരണങ്ങളാണ്. കരിയര് ഓറിയന്റഡ് സര്ട്ടിഫിക്കറ്റ് കോഴ്സുകള്, ഡിപ്ലോമ കോഴ്സുകള്, കരിയര് ആന്ഡ് പ്ലേസ്മെന്റ് സെല്, നാലുവര്ഷ ഓണേഴ്സ് ബിരുദത്തോടൊപ്പം പാര്ടൈം തൊഴിലവസരങ്ങള്, എന്പിടിഇഎല് കോഴ്സുകള് പഠനത്തോടൊപ്പം കലാലയം ഉറപ്പുവരുത്തുന്നു.
പ്രഗല്ഭരായ അധ്യാപകര്, പ്രശാന്തവും വിദ്യാര്ഥി സൗഹൃദപരവുമായ പഠനാന്തരീക്ഷം, ആധുനികരീതിയില് സജ്ജീകരിച്ചിരിക്കുന്ന സാങ്കേതിക മികവാര്ന്ന ക്ലാസ്റൂമുകള്, സമാധാന പൂര്ണവും ശാന്തവുമായ കലാലയാന്തരീക്ഷം എന്നിവ അലഗിരി ബികെ കോളജിന്റെ സവിശേഷതകളാണ്. നിരവധി യൂണിവേഴ്സിറ്റി റാങ്കുകള്, പാഠ്യ-പാഠ്യേതര രംഗത്തെ അപൂര്വനേട്ടങ്ങള്. നാക് എപ്ലസ് ഗ്രേഡ്, എന്ഐആര്എഫ് റാങ്കിംഗ് എന്നിവ കോളജിനെ മികവിന്റെ കേന്ദ്രമാക്കുന്നു.
ഒരു വര്ഷം നീണ്ടുനില്ക്കുന്ന വജ്രജൂബിലി ആഘോഷങ്ങള് 24ന് രാവിലെ 10.30ന് ആരംഭിക്കും. വജ്രജൂബിലി ഉദ്ഘാടനം ഉച്ചയ്ക്ക് 12ന് നടക്കും.സമ്മേളനത്തില് കോളജ് മാനേജര് സിസ്റ്റര് ലില്ലി റോസ് അധ്യക്ഷത വഹിക്കും. വജ്രജൂബിലി ആഘോഷങ്ങളുടെ ഉദ്ഘാടനം ഡോ. ശശി തരൂര് എംപി നിര്വഹിക്കും.
വജ്രജൂബിലി വര്ഷത്തിലെ പ്രത്യേക കര്മപദ്ധതികളുടെ റിലീസിംഗ് ഫ്രാന്സിസ് ജോര്ജ് എംപി നിര്വഹിക്കും. എംജി യൂണിവേഴ്സിറ്റി വൈസ് ചാന്സലര് പ്രഫ.ഡോ.സി.ടി. അരവിന്ദകുമാര്, പ്രിന്സിപ്പല് ഡോ. മിനി തോമസ്, ഡോ. മിനി ആലീസ്, ഡോ. രേഖ മാത്യൂസ്, ഡോ. സ്റ്റാര്ലെറ്റ് മാത്യു എന്നിവര് പ്രസംഗിക്കും.
60-ാം ജൂബിലി ആഘോഷത്തിന്റെ ഭാഗമായി കോളജിന്റെ വളര്ച്ചയില് ഒപ്പം നടന്ന 60 ഗുരുഭൂതരെയും ആദരിക്കും. അമലഗിരിയിലെ വിദ്യാര്ഥിനികളായിരുന്ന 60 സന്യസ്തസമര്പ്പിതരുടെ സാന്നിധ്യം ഉദ്ഘാടനച്ചടങ്ങിനെ ഹൃദ്യമാക്കും.
പത്രസമ്മേളനത്തില് മാനേജര് സിസ്റ്റര് ലില്ലി റോസ്, പ്രിന്സിപ്പല് ഡോ. മിനി തോമസ്, ബര്സാര് സിസ്റ്റര് മോന്സിറ്റ, ജനറല് കണ്വീനര് ഡോ. സ്റ്റാര്ലെറ്റ് മാത്യു, ഷെറിന് ജോര്ജ്, സ്മൃതി മേരി മാണി എന്നിവര് പങ്കെടുത്തു.