സൂപ്പര്‍ കപ്പില്‍ കേരള ബ്ലാസ്റ്റേഴ്‌സ് x മോഹന്‍ ബഗാന്‍ ക്വാര്‍ട്ടര്‍ വൈകുന്നേരം 4.30ന്
Saturday, April 26, 2025 1:42 AM IST
ഭുവനേശ്വര്‍: ഡേവിഡ് കാറ്റലയുടെ കേരള ബ്ലാസ്റ്റേഴ്‌സ് എഫ്‌സി രണ്ടാം മത്സരത്തിന് ഇന്നു കളത്തില്‍. 2024-25 സീസണില്‍ ബ്ലാസ്റ്റേഴ്‌സിന്‍റെ മൂന്നാം കോച്ചാണ് സ്പാനിഷുകാരനായ കാറ്റല. 2025 സൂപ്പര്‍ കപ്പിന്‍റെ ക്വാര്‍ട്ടര്‍ പോരാട്ടത്തിനായി കേരള ബ്ലാസ്റ്റേഴ്‌സ് ഇറങ്ങും.
വൈകുന്നേരം 4.30നു ഭുവനേശ്വറിലെ കലിംഗ സ്റ്റേഡിയത്തില്‍ നടക്കുന്ന മത്സരത്തില്‍ വമ്പന്മാരായ മോഹന്‍ ബഗാന്‍ സൂപ്പര്‍ ജയന്‍റ്‌സ് ആണ് ബ്ലാസ്റ്റേഴ്‌സിന്‍റെ എതിരാളികള്‍. കാറ്റലയുടെ ശിക്ഷണത്തിനു കീഴിലെ ആദ്യ മത്സരം ജയിച്ചതിന്‍റെ ആവേശത്തിലാണ് കൊച്ചി ക്ലബ്.
2024-25 സീസണില്‍ ഇരട്ടക്കിരീടം (ഐഎസ്എല്‍ ലീഗ് വിന്നേഴ്‌സ് ഷീല്‍ഡ്, ചാമ്പ്യന്‍ഷിപ്പ്) സ്വന്തമാക്കിയ മോഹന്‍ ബഗാനെ കീഴടക്കി സെമി ഫൈനല്‍ ടിക്കറ്റ് സ്വന്തമാക്കുകയാണ് കാറ്റലയുടെയും ശിഷ്യന്മാരുടെയും ലക്ഷ്യം.
ഇന്നു നടക്കുന്ന രണ്ടാം ക്വാര്‍ട്ടറില്‍ എഫ്‌സി ഗോവയും പഞ്ചാബ് എഫ്‌സിയും ഏറ്റുമുട്ടും. രാത്രി എട്ടിനാണ് കിക്കോഫ്.
ബഗാന്‍റെ സ്വദേശി ടീം
ഐഎസ്എല്‍ ലീഗ് വിന്നേഴ്‌സ് ഷീല്‍ഡും ചാമ്പ്യന്‍സ് കപ്പും സ്വന്തമാക്കിയ ഒന്നാംനിര സംഘവുമായല്ല മോഹന്‍ ബഗാന്‍ സൂപ്പര്‍ ജയന്‍റ്‌സ് 2025 സൂപ്പര്‍ കപ്പിന് എത്തുന്നത്. പകരം സ്വദേശി താരങ്ങളുമായാണ് ബഗാന്‍റെ വരവ്.
പോര്‍ച്ചുഗീസ് ഡിഫെന്‍ഡര്‍ നൂനൊ മിഗ്വേല്‍ പെരേര റീസ് മാത്രമാണ് സൂപ്പര്‍ കപ്പിനുള്ള ബഗാന്‍ ടീമിലെ വിദേശ സാന്നിധ്യം. മലയാളി താരങ്ങളായ സഹല്‍ അബ്ദുള്‍ സമദ്, ആഷിഖി കുരുണിയന്‍ തുടങ്ങിയവര്‍ ടീമിലുണ്ട്.
പ്രീക്വാര്‍ട്ടറില്‍ വാക്കോവര്‍ ലഭിച്ചാണ് ബഗാന്‍റെ വരവ്. നിലവിലെ ചാമ്പ്യന്മാരായ ഈസ്റ്റ് ബംഗാള്‍ ക്ലബ്ബിനെ പ്രീക്വാര്‍ട്ടറില്‍ 2-0നു കീഴടക്കിയാണ് ബ്ലാസ്റ്റേഴ്‌സ് ക്വാര്‍ട്ടറില്‍ എത്തിയത്. ജെസ്യൂസ് ഹിമെനെസ്, നോഹ് സദൗയി എന്നിവരായിരുന്നു പ്രീക്വാര്‍ട്ടറില്‍ ബ്ലാസ്റ്റേഴ്‌സിന്‍റെ ഗോള്‍ നേട്ടക്കാര്‍.