പെഗാട്രോണിന്റെ കൂടുതൽ ഓഹരികൾ ടാറ്റയ്ക്ക്
Monday, November 18, 2024 2:05 AM IST
മുംബൈ: ആപ്പിൾ ഫോണുകളുടെ വിതരണം ശക്തിപ്പെടുത്താൻ തന്ത്രപരമായി നീക്കം നടത്തി ടാറ്റ ഇലക്‌ട്രോണിക്സ്. കരാർ നിർമാതാക്കളായ തായ് വാൻ കന്പനി പെഗാട്രോണിന്റെ ഇന്ത്യയിലെ ഏക ഐഫോണ് പ്ലാന്‍റിന്‍റെ ഭൂരിഭാഗം ഓഹരികളും വാങ്ങാൻ ടാറ്റ ഇലക്‌ട്രോണിക്സ് സമ്മതിച്ചതായി പേരു വെളിപ്പെടുത്താൻ ആഗ്രഹിക്കാത്ത കന്പനിയുമായി അടുത്ത വൃത്തങ്ങൾ റോയിട്ടേഴ്സിനോട്് വെളിപ്പെടുത്തി.
കരാർ പ്രകാരം, ടാറ്റ 60 ശതമാനം ഓഹരി കൈവശം വയ്ക്കുകയും സംയുക്ത സംരംഭത്തിന് കീഴിൽ ദൈനംദിന പ്രവർത്തനങ്ങൾ നടത്തുകയും ചെയ്യും. 40 ശതമാനം ഓഹരിയുള്ള പെഗാട്രോണ് സാങ്കേതിക പിന്തുണ നൽകും. ഇടപാടിന്‍റെ സാന്പത്തിക വശങ്ങളെക്കുറിച്ച് ഇവർ വെളിപ്പെടുത്തിയില്ല.
ഇക്കാര്യത്തെക്കുറിച്ച് ടാറ്റയിൽനിന്ന് പ്രതികരണമൊന്നും വന്നിട്ടില്ല. അതേസമയം ആപ്പിളും പെഗാട്രോണും റോയിട്ടേഴ്സിന്റെ ചോദ്യങ്ങളോട് പ്രതികരിച്ചില്ല. ഇടപാട് പൂർത്തിയായ കാര്യം വെള്ളിയാഴ്ച പ്ലാന്‍റിൽവച്ച് ജീവനക്കാർക്കു മുന്പിൽ പ്രഖ്യാപിച്ചു.
ഇടപാട് പൂർത്തിയാക്കുന്നതിന് വരും ദിവസങ്ങളിൽ കോന്പറ്റീഷൻ കമ്മീഷൻ ഓഫ് ഇന്ത്യയുടെ (സിസിഐ) അനുമതി തേടാനാണ് കന്പനികളുടെ പദ്ധതി.പെഗാട്രോണിന് ആപ്പിളിന്‍റെ പിന്തുണയുണ്ടെന്നും ഇന്ത്യയിലെ ഏക ഐഫോണ് പ്ലാന്‍റ് ടാറ്റയ്ക്ക് വിൽക്കാൻ വിപുലമായ ചർച്ചകൾ നടത്തുന്നുണ്ടെന്നും ഏപ്രിലിൽ റോയിട്ടേഴ്സ് ആദ്യമായി റിപ്പോർട്ട് ചെയ്തു.
ബെയ്ജിംഗും വാഷിംഗ്ടണും തമ്മിലുള്ള ഭൗമ-രാഷ്‌ട്രീയ പിരിമുറുക്കങ്ങൾക്കിടയിൽ ആപ്പിൾ ചൈനയ്ക്കപ്പുറം വിതരണ ശൃംഖല വിപുലീകരിക്കാൻ കൂടുതൽ ശ്രമിക്കുന്നു. ഈ വർഷം ഇന്ത്യയിൽനിന്ന് 20 മുതൽ 25 ശതമാനം വരെ ഐ ഫോണുകളുടെ കയറ്റുമതി ഉണ്ടാകുമെന്നാണ് വിദഗ്ധർ അഭിപ്രായപ്പെടുന്നത്. കഴിഞ്ഞ വർഷം 12 മുതൽ 14 ശതമാനം കയറ്റുമതിയാണ് നടത്തിയത്.
ഐഫോൺ നിർമാണത്തിൽ ആധിപത്യത്തിന് ടാറ്റ
ഇന്ത്യയിലെ ഏറ്റവും വലിയ കന്പനികളിലൊന്നായ ടാറ്റ, ഇന്ത്യയിൽ പ്രവർത്തിക്കുന്ന മറ്റൊരു ഐഫോണ് കരാർ നിർമാതാക്കളായ ഫോക്സ്കോണിനോട് മത്സരിച്ച് ഐഫോണ് നിർമാണത്തിലേക്ക് അതിവേഗം വികസിച്ചുകൊണ്ടിരിക്കുകയാണ്. ടാറ്റയുമായുള്ള പങ്കാളിത്തത്തിലൂടെ ആപ്പിൾ ഇന്ത്യയിൽ ചുവടുറപ്പിക്കാനാണ് ഒരുങ്ങുന്നത്.
ഇത് ടാറ്റയുടെ ഇന്ത്യയിലെ മൂന്നാമത്തെ ഐഫോണ് നിർമാണ കേന്ദ്രമാകും. ഇത് കന്പനിയുടെ ഐ ഫോണ് നിർമാണത്തെ ശക്തിപ്പെടുത്തും. ചെന്നൈ ആസ്ഥാനമായുള്ള പെഗാട്രോണ് പ്ലാന്‍റിൽ 10000ത്തിലേറെ ജോലിക്കാരുള്ളത്. ഇവിടെനിന്ന് അന്പത് ലക്ഷത്തോളം ഐഫോണുകളാണ് ഓരോ വർഷവും ഇറങ്ങുന്നത്. തമിഴ്നാട്ടിലെ ഹൊസൂരിലും കർണാടകയിലും നിലവിലുള്ള പ്ലാന്‍റുകൾ പൂർത്തിയാകുകയാണ്. കർണാടകയിലെ പ്ലാന്‍റ് കഴിഞ്ഞ വർഷം തായ്വാൻ കന്പനിയായ വിസ്ട്രണിൽനിന്നാണ് ഏറ്റെടുത്തത്. ഹൊസൂരിയിൽ ഐഫോണുകളുടെ ഘടകങ്ങളുടെ നിർമാണവുമുണ്ട്. ഇവിടെ സെപ്റ്റംബറിൽ തീപിടിത്തമുണ്ടായിരുന്നു.