ദേശീയപാത ആറില്‍ ഹിന്ദാറിൽ മലയിടിച്ചിലുണ്ടായതോടെ മിസോറം തലസ്ഥാനം മറ്റിടങ്ങളില്‍നിന്ന് ഒറ്റപ്പെട്ടു. മറ്റു നിരവധി റോഡുകളിലും മണ്ണിടിച്ചില്‍ റിപ്പോര്‍ട്ട് ചെയ്തിട്ടുണ്ട്.
അതേസമയം, പശ്ചിമബംഗാളിൽ വീശിയടിച്ച റിമാൾ ചുഴലിക്കൊടുങ്കാറ്റ് ആസാം, ത്രിപുര, മേഘാലയ സംസ്ഥാനങ്ങളിൽ നാശനഷ്‌ടമുണ്ടാക്കി. ആസാമിൽ മൂന്നു പേരും ത്രിപുരയിൽ ഒരാളും മരിച്ചു. വിവിധ സംഭവങ്ങളിലായി നിരവധി പേർക്ക് പരിക്കേറ്റു.
കനത്ത കാറ്റിൽ വൈദ്യുതി പോസ്റ്റുകൾ തകർന്ന് ആസാം, മിസോറം സംസ്ഥാനങ്ങളിലെ വിവിധ ഭാഗങ്ങളിൽ തിങ്കളാഴ്ച അർധരാത്രി മുതൽ വൈദ്യുതിബന്ധം വിച്ഛേദിക്കപ്പെട്ടിരിക്കുകയാണ്. മിസോറമിൽ നിരവധി സ്ഥലങ്ങളിൽ ഉരുൾപൊട്ടലുണ്ടായി. ആസാമിലെ സോണിത്പുർ ജില്ലയിൽ സ്കൂൾ ബസിനു മുകളിൽ മരം വീണ് 12 വിദ്യാർഥികൾക്ക് പരിക്കേറ്റു. ആസാമിൽ 12 ജില്ലകളിലാണ് ചുഴലിക്കൊടുങ്കാറ്റ് നാശം വിതച്ചത്.