ഗുരുതര ആരോഗ്യപ്രശ്നങ്ങളുള്ളവരെ ഋഷികേശ് എയിംസിൽ എത്തിക്കുന്നതിനായി തൊട്ടടുത്തുള്ള ഹെലിപ്പാഡിൽ വ്യോമസേനയുടെ ചിനൂക് ഹെലികോപ്‌റ്ററും സജ്ജമാക്കിയിരുന്നു. എന്നാൽ, രാത്രിയായതിനാലും കനത്ത മൂടൽമഞ്ഞ് ഉള്ളതിനാലും ഹെലികോപ്റ്ററിൽ തൊഴിലാളികളെ കൊണ്ടുപോകേണ്ടെന്ന് അവസാനനിമിഷം തീരുമാനിക്കുകയായിരുന്നു.
30 കിലോമീറ്റർ അകലെയുള്ള ചിന്യാലിസോറിലെ ആരോഗ്യകേന്ദ്രത്തിലേക്കാണ് ഇവരെ കൊണ്ടുപോയത്. അടിയന്തര ചികിത്സയും മാനസികാരോഗ്യ സഹായവും ഇവിടെ ഒരുക്കിയിട്ടുണ്ട്. തൊഴിലാളികൾക്ക് വിദഗ്‌ധ മാനസികാരോഗ്യ ചികിത്സ ലഭ്യമാക്കുമെന്ന് സർക്കാർ അറിയിച്ചു.
റാറ്റ് ഹോൾ മൈനിംഗ് എന്ന പര‌ന്പരാഗത രീതി അവലംബിച്ചു ചെറിയ കുഴൽ രൂപത്തിലുള്ള തുരങ്കത്തിലൂടെയാണ് രക്ഷാപ്രവർത്തകർ സിൽക്യാര തുരങ്കത്തിൽ കുടുങ്ങിയ തൊഴിലാളികളുടെ അടുത്തേക്കെത്തിയത്.
പല മാർഗങ്ങളും പാതിവഴിയിൽ പരാജയപ്പെട്ടതിനെത്തുടർന്നാണ് എലിപ്പൊത്തു പോലെ തുരന്നു കയറിച്ചെല്ലാനുള്ള നിരോധിക്കപ്പെട്ട റാറ്റ് മൈനിംഗിനു തയാറായത്. തുരന്നെടുത്ത പാസേജിലേക്ക് എസ്കേപ്പ് പൈപ്പ് സ്ഥാപിച്ചാണു തൊഴിലാളികളെ പുറത്തെത്തിച്ചത്.
തൊഴിലാളികളെല്ലാം ആരോഗ്യവാന്മാരാണെന്നു ദേശീയ ദുരന്ത നിവാരണ അഥോറിറ്റി വ്യക്തമാക്കി.