ആംബുലൻസിനുനേർക്കും ആക്രമണം
Wednesday, January 29, 2025 1:55 AM IST
കൊരട്ടി: ഡിസോണ് കലോത്സവത്തിനിടെയുണ്ടായ സംഘർഷത്തിൽ പരിക്കേറ്റവരുമായി ആശുപത്രിയിലേക്കു പോയിരുന്ന ആംബുലൻസിനു നേരേയും ആക്രമണം. പരിക്കേറ്റ കെഎസ്‌യു നേതാക്കളെ കൊണ്ടുപോയ ആംബുലൻസ് കൊരട്ടിയിൽവച്ചാണ് ആക്രമിച്ചത്.
വാഹനത്തിന്‍റെ മുന്നിലെ ചില്ല് അടിച്ചുതകർത്തു. കല്ലും മാരകായുധങ്ങളുമുപയോഗിച്ചായിരുന്നു ആക്രമണമെന്ന് കെഎസ്‌യു പ്രവർത്തകർ ആരോപിച്ചു.
സംഘർഷത്തിൽ പരിക്കേറ്റ കെഎസ്‌യു ജില്ലാ പ്രസിഡന്‍റ് അടക്കമുള്ളവരുമായി ചാലക്കുടി താലൂക്ക് ആശുപത്രിയിലേക്കുള്ള യാത്രയ്ക്കിടെ ദേശീയപാത കൊരട്ടി ലത്തീൻ പള്ളിക്കു സമീപമുള്ള നയാര പെട്രോൾ പന്പിനു മുന്നിൽവച്ചായിരുന്നു ആക്രമണം.
വാഹനത്തിൽ ഇന്ധനം നിറച്ച് പുറത്തേക്കു കടക്കുന്നതിനിടെ കല്ലും കന്പിയും മാരകായുധങ്ങളുമായി എസ്എഫ്ഐ-ഡിവൈഎഫ്ഐ പ്രവർത്തകർ കാറിലെത്തി ആംബുലൻസ് തടഞ്ഞ് ആക്രമിക്കുകയായിരുന്നു. ഇന്നലെ പുലർച്ചെ അഞ്ചോടെയാണു സംഭവം.