നടിയുടെ പരാതി: സംവിധായകൻ സനല്‍കുമാറിനെ നാട്ടിലെത്തിക്കാന്‍ പോലീസ് ശ്രമം
Wednesday, January 29, 2025 1:55 AM IST
കൊച്ചി: സ്ത്രീത്വത്തെ അപമാനിച്ചെന്ന നടിയുടെ പരാതിയില്‍ അന്വേഷണം നേരിടുന്ന സംവിധായകന്‍ സനല്‍കുമാര്‍ ശശിധരനെതിരേ നടപടിക്കൊരുങ്ങി പോലീസ്.
ഇയാള്‍ നിലവില്‍ അമേരിക്കയിലാണെന്നാണ് പോലീസിനു ലഭിച്ചിട്ടുള്ള വിവരം. ഇതിന്‍റെ അടിസ്ഥാനത്തില്‍ ഇയാള്‍ കഴിയുന്ന സംസ്ഥാനത്ത് നടിയെക്കൊണ്ടു പരാതി കൊടുപ്പിക്കാനാണ് പോലീസിന്‍റെ നീക്കം.
ഇയാളെ നാട്ടിലെത്തിക്കുന്നതിനായി അമേരിക്കന്‍ കോണ്‍സുലേറ്റിനെ സമീപിക്കാന്‍ ശ്രമം തുടങ്ങിയതായി സിറ്റി പോലീസ് കമ്മീഷണര്‍ പുട്ട വിമലാദിത്യ പറഞ്ഞു.
നടിയുടെ പരാതിയില്‍ ജാമ്യമില്ലാ വകുപ്പുകളാണ് സനല്‍കുമാര്‍ ശശിധരനെതിരേ ചുമത്തിയിരിക്കുന്നത്. പിന്തുടര്‍ന്ന് ശല്യപ്പെടുത്തുക, സ്ത്രീത്വത്തെ അപമാനിച്ചു എന്നീ വകുപ്പുകളിലാണ് എളമക്കര പോലീസ് കേസെടുത്തിട്ടുള്ളത്.
സിറ്റി പോലീസ് കമ്മീഷണര്‍ക്ക് നടി ഇ-മെയില്‍ മുഖേന അയച്ച പരാതി എളമക്കര പോലീസിന് കൈമാറുകയായിരുന്നു. നേരത്തേയുണ്ടായ സമാന പരാതിയില്‍ കുറ്റപത്രം നല്‍കാനിരിക്കെയാണ് രണ്ടാമത്തെ കേസ് ഇയാള്‍ക്കെതിരേ രജിസ്റ്റര്‍ ചെയ്തത്.
കഴിഞ്ഞ ഏതാനും ദിവസമായി നടിയെ പരാമര്‍ശിച്ചും ടാഗ് ചെയ്തും സംവിധായകന്‍ ഒട്ടേറെ പോസ്റ്റുകള്‍ സമൂഹമാധ്യമങ്ങളില്‍ പങ്കുവച്ചിരുന്നു. പോസ്റ്റുകളില്‍ അവരുടെ ജീവിതം അപകടത്തിലാണെന്ന് സനല്‍ പറഞ്ഞിരുന്നു.
നടിയുടേതെന്ന പേരില്‍ ഓഡിയോ സംഭാഷണങ്ങളും പുറത്തുവിട്ടു. പിന്നാലെ, നടി അഭിനയിച്ച് സനല്‍ സംവിധാനം ചെയ്ത സിനിമ സമൂഹമാധ്യമങ്ങള്‍ വഴി റിലീസ് ചെയ്തിരുന്നു. നേരത്തേ ഇതേ നടിയുടെ പരാതിയില്‍ പോലീസ് സനലിനെ അറസ്റ്റ് ചെയ്തിരുന്നു. 2022 മേയില്‍ അറസ്റ്റിലായ സനലിനെ ജാമ്യത്തില്‍ വിടുകയായിരുന്നു.
എളമക്കര പോലീസ് രജിസ്റ്റര്‍ ചെയ്ത കേസില്‍ തിരുവനന്തപുരം പാറശാലയില്‍നിന്നാണ് അന്നു സനല്‍ അറസ്റ്റിലായത്. സമൂഹമാധ്യമം വഴിയും ഫോണ്‍ വഴിയും ബന്ധുക്കളും സുഹൃത്തുക്കളും വഴിയും സനല്‍കുമാര്‍ ശശിധരന്‍ നിരന്തരം പ്രണയാഭ്യര്‍ഥന നടത്തുന്നതായും പിന്തുടര്‍ന്ന് ശല്യംചെയ്യുന്നതായുമായിരുന്നു പരാതി.
ഫേസ്ബുക്ക് പോസ്റ്റുകള്‍ നീക്കം ചെയ്യാന്‍ നടപടി സ്വീകരിക്കുമെന്ന് കമ്മീഷണര്‍
കൊച്ചി: നടിക്കെതിരായ സംവിധായകന്‍ സനല്‍കുമാര്‍ ശശിധരന്‍റെ ഫേസ്ബുക്ക് പോസ്റ്റുകള്‍ നീക്കം ചെയ്യാന്‍ നടപടി സ്വീകരിക്കുമെന്ന് എറണാകുളം സിറ്റി പോലീസ് കമ്മീഷണര്‍ പുട്ട വിമലാദിത്യ.
വിദേശത്തുള്ള സനല്‍കുമാറിനെതിരേ നിയമപരമായ നടപടികളെടുക്കും. ഇയാളെ ബന്ധപ്പെട്ട് ആവശ്യമായ നടപടി സ്വീകരിക്കും. അപകീര്‍ത്തികരമായ കാര്യങ്ങളില്‍ ഫേസ്ബുക്ക് ഇടപെടലിന് പോലീസ് നീക്കം നടത്തുമെന്നും അദ്ദേഹം മാധ്യമങ്ങളോട് പറഞ്ഞു.