ഏഷ്യന്‍ അത്‌ലറ്റിക് ചാമ്പ്യന്‍ഷിപ്പ്; ടീമില്‍ 8 മലയാളികള്‍
Saturday, April 26, 2025 1:42 AM IST
കോട്ടയം: ദക്ഷിണകൊറിയയിലെ ഗുമിയില്‍ മേയ് 27 മുതല്‍ 31 വരെ നടക്കുന്ന ഏഷ്യന്‍ അത്‌ലറ്റിക് ചാമ്പ്യന്‍ഷിപ്പിനുള്ള ഇന്ത്യന്‍ ടീമില്‍ എട്ട് മലയാളികള്‍ ഇടംനേടി.
31 പുരുഷന്മാരും 28 വനിതകളും അടക്കം 59 അംഗ സംഘമാണ് ഇന്ത്യയെ പ്രതിനിധീകരിക്കുക. പുരുഷ ജാവലിന്‍ ത്രോയിലെ ഒളിമ്പിക് ചാമ്പ്യന്‍ നീരജ് ചോപ്ര ടീമില്‍ ഇല്ല.
അബ്ദുല്ല അബൂബക്കര്‍ (പുരുഷ ട്രിപ്പിള്‍ജംപ്), ആര്‍. അനു (വനിതാ 400 ഹര്‍ഡില്‍സ്), ആന്‍സി സോജന്‍ (വനിതാ ലോംഗ്ജംപ്) എന്നിവരാണ് വ്യക്തിഗത ഇനങ്ങളില്‍ ഇന്ത്യന്‍ ടീമില്‍ ഇടം നേടിയ മലയാളി താരങ്ങള്‍. ടി.എസ്. മനു, റിന്‍സ് ജോസഫ് (പുരുഷ വിഭാഗം 4 x 400 റിലേ), കെ. സ്നേഹ, ജിസ്ന മാത്യു, സാന്ദ്രമോള്‍ സാബു (വനിതാ വിഭാഗം 4 x 400 റിലേ) എന്നിവരും ടീമില്‍ ഉള്‍പ്പെട്ടു.