പാലക്കാട് : പോസ്റ്റൽ വോട്ടിംഗിന്റെ ഭാഗമായി പോലീസ്, ഫയർ ആൻഡ് റസ്ക്യൂ, ജയിൽ, എക്സൈസ്, മിൽമ, ഇലക്ട്രിസിറ്റി, വാട്ടർ അഥോറിറ്റി, കെഎസ്ആർടിസി, ട്രഷറി സർവീസ്, ആരോഗ്യം, ഫോറസ്റ്റ്, ദൂരദർശൻ, ബിഎസ്എൻഎൽ, റെയിൽവേ, പോസ്റ്റ് ടെലഗ്രാഫ് ഉൾപ്പെട്ട കേന്ദ്രസർക്കാർ സ്ഥാപനങ്ങൾ, മാധ്യമപ്രവർത്തകർ, കൊച്ചി മെട്രോ റെയിൽ ലിമിറ്റഡ് എന്നിവയിലുൾപ്പെട്ട അവശ്യസേവനത്തിലുള്ള മുൻകൂട്ടി അപേക്ഷ സമർപ്പിച്ചവർക്ക് ഇന്ന് മുതൽ 22, 23 തിയതികളിലായി ബന്ധപ്പെട്ട പോസ്റ്റൽ വോട്ടിംഗ് സെന്‍ററുകളിൽ രാവിലെ 10 മുതൽ അഞ്ചുവരെ പോസ്റ്റൽ വോട്ടിംഗ് നടക്കും. ഇവർക്ക് രണ്ടാം ഘട്ട പോസ്റ്റൽ വോട്ടിംഗ് ബാധകമല്ല.
ഇന്നു വോട്ടിംഗ് നടക്കുന്ന സെന്‍ററുകൾ
പാലക്കാട്, മലന്പുഴ മണ്ഡലങ്ങൾക്ക് പാലക്കാട് ഗവ വിക്ടോറിയ കോളജ്. ഷൊർണൂർ, ഒറ്റപ്പാലം മണ്ഡലങ്ങൾക്ക് ഒറ്റപ്പാലം എൽഎസ്എൻ ജിഎച്ച്എസ്എസ്. പട്ടാന്പി, തൃത്താല മണ്ഡലങ്ങളിലുള്ളവർക്ക് പട്ടാന്പി ശ്രീ നീലകണ്ഠ സംസ്കൃത കോളജ്. കോങ്ങാട് മണ്ഡലത്തിന് കൊപ്പം ലയണ്‍സ് സ്കൂൾ.
മണ്ണാർക്കാട് മണ്ഡലത്തിന് മണ്ണാർക്കാട് എംഇഎസ് കല്ലടി കോളജ്. തരൂർ, ആലത്തൂർ മണ്ഡലത്തിന് ആലത്തൂർ ബിഎസ്എസ് ഗുരുകുലം ഹയർ സെക്കൻഡറി സ്കൂൾ. ചിറ്റൂർ, നെന്മാറ മണ്ഡലങ്ങൾക്ക് ഗവ കോളജ് ചിറ്റൂർ എന്നിവിടങ്ങളിലാണ് വോട്ടർ ഫെസിലിറ്റേഷൻ സെന്‍റർ ക്രമീകരിച്ചിരിക്കുന്നത്.