ADVERTISEMENT

ADVERTISEMENT

ഹരിതകർമസേനയുടെ സത്യസന്ധത; വീട്ടമ്മയ്ക്ക് നഷ്ടപ്പെട്ട പണം തിരികെ ലഭിച്ചു

കൂരോപ്പട: കൂരോപ്പടയിലെ ഹരിതകർമസേനയുടെ സത്യസന്ധത വീട്ടമ്മയ്ക്ക് തിരികെ ലഭിച്ചത് ഒരു മാസം മുൻപ് നഷ്ടപ്പെട്ട പണം. കൂരോപ്പട പഞ്ചായത്തിലെ മൂന്നാം വാർഡിലെ ഹരിതകർമസേനാംഗങ്ങളായ അനീഷാ, സിന്ധു മനോജ് എന്നിവർ ഏപ്രിൽ ഒന്പതിനു വാർഡിലെ കപ്പിലുമാക്കൽ പൊന്നമ്മയുടെ വീട്ടിൽ പ്ലാസ്റ്റിക്കുകളും ബാഗുകളും ശേഖരിക്കുന്നതിന് എത്തി. ഗൃഹനാഥയായ പൊന്നമ്മയാണ് വീട്ടിലെ പ്ലാസ്റ്റിക്കുകളും പഴയ ബാഗുകളും ഇവർക്ക് നൽകിയത്. പണം അടങ്ങിയ പഴയ ബാഗും പ്ലാസ്റ്റിക്കിന്‍റെ കൂടെ നൽകി.

വീടുകളിൽ നിന്ന് ശേഖരിച്ച പ്ലാസ്റ്റിക്കുകൾ ചാക്കിലാക്കി റോഡിന് സമീപമുള്ള മിനി എസിഎഫിൽ ദിവസങ്ങളോളം സൂക്ഷിച്ചിരുന്നു. തുടർന്ന് ചാത്തൻപാറയിലെ പ്ലാസ്റ്റിക്ക് സംഭരണ കേന്ദ്രത്തിലേക്ക് മൂന്നാം വാർഡിലെ പ്ലാസ്റ്റിക്കുകൾ അടങ്ങിയ ചാക്കുകൾ മാറ്റി.

ഹരിതകർമസേന ഇന്നലെ രാവിലെ ശേഖരിച്ച പഴയ ബാഗുകൾ തിരഞ്ഞപ്പോഴാണ് പണം ലഭിച്ചത്. പണം കിട്ടിയ വിവരം വാർഡ് അംഗം മഞ്ജു കൃഷ്ണകുമാറിനെ അറിയിച്ചു. മഞ്ജു ഉടനെ വിവരം പണം നഷ്ടപ്പെട്ട കപ്പിലുമാക്കൽ പൊന്നമ്മയെ അറിയിച്ചു.

പഞ്ചായത്ത് പ്രസിഡന്‍റ് അമ്പിളി മാത്യു, വൈസ് പ്രസിഡന്‍റ് ഗോപി ഉല്ലാസ്, പഞ്ചായത്ത് അംഗങ്ങളായ മഞ്ജു കൃഷ്ണകുമാർ, അനിൽ കൂരോപ്പട, സന്ധ്യാ ജി. നായർ , സന്ധ്യാ സുരേഷ്, പഞ്ചായത്ത് സെക്രട്ടറി എസ്. സുനിമോൾ, അസിസ്റ്റന്‍റ് സെക്രട്ടറി സി.എൻ. സിന്ധു, ഹരിത കർമസേനാ സെക്രട്ടറി ശശികല തുടങ്ങിയവരുടെ സാന്നിധ്യത്തിൽ പണം പൊന്നമ്മയുടെ മകൾ സന്ധ്യക്ക് കൈമാറി.

ADVERTISEMENT

പാലാ ടൗണ്‍ കുരിശുപള്ളി വിശ്വാസത്തിന്‍റെ ഉയരം സംസാരിക്കുന്നു: മാര്‍ കല്ലറങ്ങാട്ട്

പാലാ: വിശ്വാസത്തിന്‍റെ ഉയരമാണ് പാലാ ടൗണ്‍ കുരിശുപള്ളി നമ്മോട് സംസാരിക്കുന്നതെന്നും സംസ്‌കാരത്തിന്‍റെയും പാരമ്പര്യത്തിന്‍റെയും പ്രതീകമായ ഈ കുരിശുപള്ളി പൊതുസമൂഹത്തിന്‍റെ സമ്പത്താണെന്നും ബിഷപ് മാര്‍ ജോസഫ് കല്ലറങ്ങാട്ട്. നവീകരിക്കപ്പെട്ട പാലാ ടൗണ്‍ അമലോത്ഭവ ജൂബിലി കുരിശുപള്ളിയുടെ ആശീര്‍വാദകര്‍മം നിര്‍വഹിച്ച് സന്ദേശം നല്‍കുകയായിരുന്നു ബിഷപ്. പാലായുടെ ഹൃദയത്തിലുള്ള ഈ കുരിശുപള്ളി ക്രിസ്തീയതയുടെ തുടര്‍ച്ചയും ദൈവം ഇവിടെയുണ്ടെന്നുള്ള ഓര്‍മപ്പെടുത്തലുമാണ്. പൗരാണിക മഹിമയുള്ള നിരവധിയായ നിര്‍മിതികള്‍ സംരക്ഷിക്കുക എന്നത് നമ്മുടെ കടമയാണ്. നിലനില്‍ക്കുന്ന കാര്യങ്ങളുടെ മഹത്വം മറ്റുള്ളവരെ പറഞ്ഞ് പഠിപ്പിക്കാന്‍ നമുക്ക് ചുമതലയുണ്ട്. ഈ കപ്പേള ഏതു മതവിഭാഗങ്ങളിലുള്ളവരെയും ധാര്‍മികമായി ഉയര്‍ത്തുന്നുവെന്നും വിശാല സമൂഹത്തെ ബലപ്പെടുത്തുന്നുവെന്നും ബിഷപ് പറഞ്ഞു. കത്തീഡ്രല്‍ വികാരി ഫാ. ജോസ് കാക്കല്ലില്‍, ളാലം പഴയപള്ളി വികാരി ഫാ. ജോസഫ് തടത്തില്‍, ളാലം പുത്തന്‍പള്ളി വികാരി ഫാ. ജോര്‍ജ് മൂലേച്ചാലില്‍, ടൗണ്‍ കുരിശുപള്ളി ഇന്‍ ചാര്‍ജ് ഫാ.ജോര്‍ജ് തറപ്പേല്‍, ഫാ.ജോസഫ് ആലഞ്ചേരില്‍, ഫാ.ചെറിയാന്‍ കുന്നക്കാട്ട്, ഫാ.സെബാസ്റ്റ്യന്‍ ആലപ്പാട്ടുകോട്ടയില്‍, ഫാ.സ്‌കറിയ മേനാംപറമ്പില്‍, ഫാ. ഐസക് പെരിങ്ങാമലയില്‍, ഫാ.ആന്‍റണി നങ്ങാപറമ്പില്‍ തുടങ്ങിയവര്‍ പ്രാര്‍ഥനാ ശുശ്രൂഷകള്‍ക്ക് നേതൃത്വം നല്‍കി. ഇന്നലെ വൈകുന്നേരം 5.30 ന് ജപമാല, വണക്കമാസ പ്രാര്‍ഥന സമാപനം, പുറത്ത് നമസ്‌കാരം എന്നിവയും നടന്നു. വൈദികര്‍, സന്യസ്ഥര്‍, വിശ്വാസികള്‍ തുടങ്ങിയവര്‍ പങ്കെടുത്തു. കുരിശുപള്ളി നവീകരണ പ്രവര്‍ത്തനങ്ങള്‍ക്ക് നേതൃത്വം നല്‍കിയവരെ ആദരിച്ചു. ചടങ്ങുകള്‍ക്ക് കൈകാരന്‍മാരായ ജോണി പന്തപ്ലാക്കല്‍, തോമസ് മേനാംപറമ്പില്‍, ജോയി പുളിക്കല്‍, കമ്മിറ്റിയംഗങ്ങള്‍ എന്നിവര്‍ നേതൃത്വം നല്‍കി.

രക്തദാനം നടത്തി ഷിബു തെക്കേമറ്റത്തിന്‍റെ വിരമിക്കല്‍

കൊഴുവനാല്‍: വിളക്കുമാടം സെന്‍റ് ജോസഫ് ഹയര്‍ സെക്കൻഡറി സ്‌കൂള്‍ ലാബ് അസ്സിസ്റ്റന്‍റ് ഷിബു തെക്കേമറ്റത്തിന്‍റെ വിരമിക്കല്‍ വ്യത്യസ്തതയാൽ ശ്രദ്ധേയമായി. പാലാ ബ്ലഡ് ഫോറം ജനറല്‍ കണ്‍വീനര്‍ കൂടിയായ ഷിബു മരിയന്‍ മെഡിക്കല്‍ സെന്‍റര്‍ ബ്ലഡ് ബാങ്കിലെത്തി 127ാം തവണ രക്തം ദാനം ചെയ്തും കൊഴുവനാല്‍ ഗേള്‍സ് ടൗണ്‍ ഓഡിറ്റോറിയത്തില്‍ സ്‌നേഹസംഗമം നടത്തിയുമാണ് വിരമിക്കല്‍ വ്യത്യസ്ഥമാക്കിയത്. മാര്‍ ജേക്കബ് മുരിക്കന്‍, യാക്കോബായ സുറിയാനി സഭയുടെ മുംബൈ ഭദ്രാസനാധിപന്‍ തോമസ് മോര്‍ അലക്‌സന്ത്രയോസ്, ഫ്രാന്‍സിസ് ജോര്‍ജ് എംപി , മാണി സി കാപ്പന്‍ എംഎല്‍ എ, മോന്‍സ് ജോസഫ് എംഎല്‍എ, ജില്ലാ പഞ്ചായത്ത് മെംബര്‍മാരായ ജോസ്മോന്‍ മുണ്ടയ്ക്കന്‍,രാജേഷ് വാളിപ്ലാക്കല്‍, സ്‌കൂള്‍ മാനേജര്‍ ഫാ. ജോര്‍ജ് മണ്ണുകുശുമ്പില്‍, കൊഴുവനാല്‍ പള്ളി വികാരി ഫാ. ജോസ് നെല്ലിക്കത്തെരുവില്‍, ബ്ലോക്ക് പഞ്ചായത്ത് പ്രസിഡന്‍റ് ജസി ജോര്‍ജ്, കൊഴുവനാല്‍ പഞ്ചായത്ത് പ്രസിഡന്‍റ് ലീലാമ്മ ബിജു, മുത്തോലി പഞ്ചായത്ത് പ്രസിഡന്‍റ് രഞ്ജിത്ത് മീനാഭവന്‍, പ്രിന്‍സിപ്പൽ ജോബി സെബാസ്റ്റ്യന്‍ തുടങ്ങിയവര്‍ പ്രസംഗിച്ചു.

വെള്ളക്കെട്ടില്‍ വലഞ്ഞ് നാട്ടുകാര്‍

രാമപുരം: മഴ കനത്തതോടെ രാമപുരം - കൂത്താട്ടുകുളം റോഡില്‍ അമ്പലം ജംഗ്ഷനില്‍ ആര്‍വിഎം ലൈബ്രറിക്ക് സമീപം റോഡില്‍ വെളളക്കെട്ട് രൂപപ്പെട്ടതിനെ തുടർന്ന് വലഞ്ഞ് യാത്രക്കാര്‍. മഴപെയ്യുമ്പോള്‍ സമീപത്തുള്ള വഴികളിലൂടെ ഒഴുകിയെത്തുന്ന വെള്ളം റോഡിലേക്കു നേരിട്ട് എത്തുന്നതിനാലാണ് ഇവിടെ വെള്ളക്കെട്ട് രൂപപ്പെടുന്നത്. റോഡിന് ഇരുവശത്തും ഓടകള്‍ ഉണ്ടെങ്കിലും അവ എക്കല്‍ കയറി അടഞ്ഞാണ് കിടക്കുന്നത്. ഓടയിലൂടെ ഒഴുകി പോകേണ്ട വെള്ളം റോഡില്‍ കെട്ടിക്കിടക്കുകയും ചെയ്യും. ഇരുചക്ര വാഹനങ്ങള്‍ ഇവിടെ അപകടത്തില്‍പ്പെടുന്നത് പതിവാണ്. വേഗത്തിലെത്തുന്ന വലിയ വാഹനങ്ങള്‍ വെള്ളക്കെട്ടില്‍ക്കൂടി പോകുമ്പോള്‍ സമീപത്തുകൂടി സഞ്ചരിക്കുന്ന കാല്‍നടയാത്രക്കാരുടെയും ഇരുചക്ര വാഹന യാത്രക്കാരുടെയും ദേഹത്തേക്കു വെള്ളം തെറിക്കുന്നതും നിത്യസംഭവമാണ്. പിഡബ്ലൂഡി അധികാരികള്‍ ഈ പ്രശ്നത്തില്‍ ഇടപെട്ട് അടിയന്തരമായി ഓടയിലെ എക്കല്‍ നീക്കുകയും ഓട ഇല്ലാത്ത ഭാഗത്ത് പുതിയ ഓട പണിയുകയും ചെയ്യണമെന്ന് നാട്ടുകാര്‍ ആവശ്യപ്പെട്ടു.

തീക്കോയി ഗവണ്‍മെന്‍റ് ടെക്നിക്കല്‍ ഹൈസ്‌കൂള്‍ കെട്ടിടം മന്ത്രി ആര്‍. ബിന്ദു ഉദ്ഘാടനം ചെയ്തു

തീക്കോയി: കാലത്തിന്‍റെ വെല്ലുവിളികളെ നേരിടാന്‍ വരും തലമുറയെ പ്രാപ്തരാക്കുകയെന്ന ലക്ഷ്യത്തോടെയാണ് ഉന്നത വിദ്യാഭ്യാസ രംഗത്ത് സര്‍ക്കാര്‍ മികച്ച സൗകര്യങ്ങളൊരുക്കുന്നതെന്ന് മന്ത്രി ഡോ. ആര്‍. ബിന്ദു. തീക്കോയി ഗവണ്‍മെനന്‍റ് ടെക്നിക്കല്‍ ഹൈസ്‌കൂളിന് 8.5 കോടി രൂപാ ചെലവിട്ടു നിര്‍മിച്ച കെട്ടിടത്തിന്‍റെ ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു മന്ത്രി. സെബാസ്റ്റ്യന്‍ കുളത്തുങ്കല്‍ എം.എല്‍.എ. അധ്യക്ഷത വഹിച്ചു. തീക്കോയി പഞ്ചായത്ത് വൈസ് പ്രസിഡന്‍റ് രാജി തോമസ്, ഈരാറ്റുപേട്ട നഗരസഭാംഗങ്ങളായ സുഹാനാ ജിയാസ്, പി. എം. അബ്ദുള്‍ ഖാദര്‍, തീക്കോയി പഞ്ചായത്തംഗം ജയറാണി തോമസുകുട്ടി, ബിനോയ് ജോസഫ്, മോഹനന്‍ കുട്ടപ്പന്‍, നഗരസഭാംഗം നസീറാ സുബൈര്‍, പഞ്ചായത്തംഗം അമ്മിണി തോമസ്, സാങ്കേതിക വിദ്യാഭ്യാസ ഡയറക്ടറേറ്റ് സീനിയര്‍ ജോയിന്‍റ് ഡയറക്ടര്‍ അനി എബ്രഹാം, റീജണല്‍ ഡയറക്ടറേറ്റ് അസ്സിസ്റ്റന്‍റ് ഡയറക്ടര്‍ ആര്‍. രാജേഷ്, തീക്കോയി ഗവൺമെന്‍റ് ടെക്‌നിക്കല്‍ ഹൈസ്‌കൂള്‍ സൂപ്രണ്ട് കെ. ദാമോദരന്‍ എന്നിവര്‍ പ്രസംഗിച്ചു. സാങ്കേതിക വിദ്യാഭ്യാസ ഡയറക്ടറേറ്റു വഴി സംസ്ഥാന സര്‍ക്കാര്‍ അനുവദിച്ച 7.5 കോടി രൂപയും സെബാസ്റ്റ്യന്‍ കുളത്തുങ്കല്‍ എംഎല്‍എയുടെ ആസ്തി വികസന ഫണ്ടില്‍ നിന്നുള്ള ഒരുകോടി രൂപയും ചെലവിട്ടാണ് പുതിയ കെട്ടിടം നിര്‍മിച്ചത്. പൂഞ്ഞാര്‍ നിയോജക മണ്ഡലത്തിലെ ഏക ടെക്‌നിക്കല്‍ ഹൈസ്‌കൂളായ തീക്കോയി ഗവണ്‍മെന്‍റ് ടെക്നിക്കല്‍ ഹൈസ്‌കൂള്‍ നാലു പതിറ്റാണ്ടായി തീക്കോയി പഞ്ചായത്തിലെ വാടക കെട്ടിടത്തിലാണ് പ്രവര്‍ത്തിച്ചിരുന്നത്. ഈരാറ്റുപേട്ട നഗരസഭയില്‍ ആനിയിളപ്പില്‍ വാങ്ങിയ 2.5 ഏക്കര്‍ സ്ഥലത്താണു സ്‌കൂള്‍ കെട്ടിടം നിര്‍മിച്ചത്.

ഓടകള്‍ വൃത്തിയാക്കും, റോഡിലെ അറ്റകുറ്റപ്പണികള്‍ പൂര്‍ത്തിയാക്കും

പാലാ: മണ്‍സൂണ്‍ ആരംഭിക്കുകയും നാളെ സ്‌കൂള്‍ തുറക്കുകയും ചെയ്യുന്ന സാഹചര്യത്തില്‍ ഓടകള്‍ അടിയന്തരമായി വൃത്തിയാക്കുന്നതിനും റോഡില്‍ നടത്തേണ്ട അറ്റകുറ്റപ്പണികള്‍ അടിയന്തിരമായി പൂര്‍ത്തിയാക്കുന്നതിനും മാണി സി കാപ്പന്‍ എംഎല്‍എ നിര്‍ദ്ദേശം നല്‍കി. പൊതുമരാമത്ത് വകുപ്പ് മുഖേന നടപ്പാക്കുന്ന വിവിധ പദ്ധതികളെ സംബന്ധിച്ച പ്രതിമാസ അവലോകന യോഗത്തിലാണ് നിര്‍ദേശം നല്‍കിയത്. അരുണാപുരം പിഡബ്ല്യുഡി റെസ്റ്റ് ഹൗസില്‍ ചേര്‍ന്ന യോഗത്തില്‍ റോഡ്, പാലം, കെട്ടിട വിഭാഗം, കെഎസ്ടിപി, റോഡ് മെയിന്‍റനന്‍സ്, ജല്‍ ജീവന്‍ മിഷന്‍ ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. പൊതുജനങ്ങളില്‍ നിന്ന് ലഭിച്ച നിവേദനങ്ങള്‍ ബന്ധപ്പെട്ട ഉദ്യോഗസ്ഥരുടെ ശ്രദ്ധയില്‍പ്പെടുത്തുകയും ശ്രദ്ധിക്കേണ്ട നടപടികള്‍ സംബന്ധിച്ച് നിര്‍ദ്ദേശം നല്‍കുകയും ചെയ്തു. റോഡിന്‍റെ വശങ്ങളില്‍ അപകടകരമായി നില്‍ക്കുന്ന വൃക്ഷശിഖരങ്ങള്‍ ഒടിഞ്ഞുവീണ് അപകടങ്ങള്‍ ഉണ്ടാവുകയും പതിവായി വൈദ്യുതി മുടക്കത്തിന് കാരണമാകുകയും ചെയ്യുന്നതിനാല്‍ അവ അടിയന്തരമായി മുറിച്ചുമാറ്റുന്നതിന് നടപടികള്‍ സ്വീകരിക്കാന്‍ പൊതുമരാമത്ത് വകുപ്പ് അസിസ്റ്റന്‍റ് എന്‍ജിനിയര്‍മാരോട് ആവശ്യപ്പെട്ടു. ജല്‍ ജീവന്‍ പദ്ധതിയുടെ ഭാഗമായി തദ്ദേശസ്ഥാപനങ്ങളുടെയും പൊതുമരാമത്ത് വകുപ്പിന്‍റെയും റോഡുകള്‍ ഏറ്റെടുത്ത് നടത്തിവരുന്ന പ്രവര്‍ത്തികള്‍ യുദ്ധകാലാടിസ്ഥാനത്തില്‍ പൂര്‍ത്തിയാക്കുന്നതിനും മുന്നറിയിപ്പ് ബോര്‍ഡുകള്‍ സ്ഥാപിക്കുന്നതിനും ജൽ ജീവന്‍ മിഷന്‍ അധികൃതരോട് ആവശ്യപ്പെട്ടു.

ഡോ. ടി.സി. തങ്കച്ചന്‍ ബിഎഡ് കോളജ് പ്രിന്‍സിപ്പല്‍

പാലാ: സെന്‍റ് തോമസ് കോളജ് ഓഫ് ടീച്ചര്‍ എഡ്യൂക്കേഷന്‍ പ്രിന്‍സിപ്പലായി ഡോ. ടി.സി. തങ്കച്ചന്‍ നിയമിതനായി. അധ്യാപക പരിശീലനത്തില്‍ 25 വര്‍ഷമായി സേവനം ചെയ്തുകൊണ്ടിരിക്കുന്ന ഡോ. ടി. സി തങ്കച്ചന്‍ എംജി യൂണിവേഴ്‌സിറ്റിയില്‍ നിന്ന് പൊളിറ്റിക്കല്‍ സയന്‍സില്‍ ഒന്നാം റാങ്കോടെ ബിരുദാനന്തരബിരുദം കരസ്ഥമാക്കിയിട്ടുണ്ട്. കൂടാതെ ഇംഗ്ലീഷ് സാഹിത്യം, സോഷ്യോളജി, മനഃശാസ്ത്രം, ഫിലോസഫി, ജേര്‍ണലിസം, മാസ് കമ്മ്യൂണിക്കേഷന്‍, വിദ്യാഭ്യാസം എന്നീ വിഷയങ്ങളില്‍ ബിരുദാനന്തര ബിരുദവും വിദ്യാഭ്യാസത്തില്‍ എംഫില്‍, പിഎച്ച്ഡി എന്നിവയും നേടിയിട്ടുണ്ട്. 30 ഗ്രന്ഥങ്ങളുടെയും നൂറിലധികം പ്രബന്ധങ്ങളുടെയും ഇരുപതിലധികം എഡിറ്റഡ് ബുക്കുകളുടെ രചയിതാവും പ്രഭാഷകനും ഗവേഷകനും സംഘാടകനും നിരവധി പുരസ്‌കാരങ്ങള്‍ക്ക് അര്‍ഹനുമായ വ്യക്തിയുമാണ്. എംജി യൂണിവേഴ്സിറ്റി സ്‌കൂള്‍ ഓഫ് പെഡഗോഗിക്കല്‍ സയന്‍സിലെ ഗൈഡൻസായി സേവനം ചെയ്യുന്നു. പൗരസ്ത്യ വിദ്യാപീഠം സെനറ്റ് അംഗം, പാലാ സെന്‍റ് തോമസ് കോളജ്, ചൂണ്ടച്ചേരി സെന്‍റ് ജോസഫ് എൻജിനിയറിംഗ് കോളജ് എന്നിവയില്‍ അക്കാഡമിക് കൗണ്‍സില്‍ അംഗം, സൊസൈറ്റി ഓഫ് ഇന്നോവറ്റീവ് റിസര്‍ച്ചര്‍സ് ആന്‍ഡ് അക്കാഡമിഷ്യന്‍സ് എന്ന സംഘടനയുടെ പ്രസിഡന്‍റ്, സേവ്യര്‍ ബോര്‍ഡ്, ഓള്‍ ഇന്ത്യ അസോസിയേഷന്‍ ഫോര്‍ ക്രിസ്ത്യന്‍ ഹയര്‍ എഡ്യൂക്കേഷന്‍ എന്നിവയുടെ ദക്ഷിണകേരള വൈസ് പ്രസിഡന്‍റ് എന്നീ നിലകളിലും പ്രവര്‍ത്തിക്കുന്നു. 2020 മുതല്‍ കോളജിന്‍റെ വൈസ് പ്രിന്‍സിപ്പലായി സേവനം ചെയ്തുവരികയായിരുന്നു.

വിശ്വാസം ജീവിതസാക്ഷ്യമാണ്: മാര്‍ ജോസ് പുളിക്കല്‍

കാഞ്ഞിരപ്പള്ളി: വിശ്വാസം ജീവിതസാക്ഷ്യമാണെന്നും അനുദിന ജീവിത സാഹചര്യങ്ങളിലാണ് വിശ്വാസം തെളിയിക്കപ്പെടുന്നതെന്നും കാഞ്ഞിരപ്പള്ളി രൂപതാധ്യക്ഷന്‍ മാര്‍ ജോസ് പുളിക്കല്‍. രൂപത വിശ്വാസജീവിത പരിശീലനകേന്ദ്രത്തിന്‍റെയും ചെറുപുഷ്പ മിഷന്‍ലീഗിന്‍റെയും വാര്‍ഷികാഘോഷം കാഞ്ഞിരപ്പള്ളി പാസ്റ്ററല്‍ സെന്‍ററില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. ജീവിതത്തിലെ പ്രശ്‌നങ്ങളിലും പ്രതിസന്ധികളിലും തളരാതെ മുന്നേറാന്‍ വിശ്വാസം അനിവാര്യമാണെന്നും മാര്‍ ജോസ് പുളിക്കല്‍ പറഞ്ഞു. രൂപത പ്രോട്ടോസിഞ്ചെല്ലൂസ് റവ. ഡോ. ജോസഫ് വെള്ളമറ്റം അധ്യക്ഷത വഹിച്ചു. രൂപത സിഞ്ചെല്ലൂസ് ഫാ. സെബാസ്റ്റ്യന്‍ കൊല്ലംകുന്നേല്‍, ഫാ. വര്‍ഗീസ് കൊച്ചുപറമ്പില്‍ എന്നിവര്‍ പ്രസംഗിച്ചു. മതാധ്യാപനരംഗത്ത് 50 വര്‍ഷങ്ങള്‍ പൂര്‍ത്തിയാക്കിയ നാല് അധ്യാപകര്‍ക്കും 25 വര്‍ഷങ്ങള്‍ പൂര്‍ത്തിയാക്കിയ 29 അധ്യാപകര്‍ക്കും പുരസ്‌കാരങ്ങള്‍ നല്‍കുകയും വിവിധ മേഖലകളില്‍ മികവ് തെളിയിച്ച സണ്‍ഡേ സ്‌കൂളുകളെയും കുട്ടികളെയും ആദരിക്കുകയും ചെയ്തു. കഴിഞ്ഞ 12 വര്‍ഷവും മുടങ്ങാതെ എല്ലാ ഞായറാഴ്ചകളിലും വിശ്വാസജീവിത പരിശീലനത്തില്‍ പങ്കെടുത്ത 25 കുട്ടികളെ പ്രത്യേക പുരസ്‌കാരങ്ങള്‍ നൽകി ആദരിച്ചു. തുടര്‍ന്ന് വിശ്വാസജീവിത പരിശീലനകേന്ദ്രം രൂപത ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ പ്രധാനാധ്യാപകര്‍, സ്റ്റാഫ് സെക്രട്ടറിമാര്‍, ഫൊറോന സെക്രട്ടറിമാര്‍ എന്നിവരുടെ സമ്മേളനവും നടത്തി. സമ്മേളനത്തോടനുബന്ധിച്ച് അടുത്ത അധ്യയനവര്‍ഷത്തെ കര്‍മപദ്ധതികളുടെ വിശദീകരണവും ചര്‍ച്ചകളും നടത്തി.

പ്രവേശനോത്സവത്തിന് സ്കൂളുകൾ ഒരുങ്ങി

എരുമേലി: പുതിയ അധ്യായന വർഷത്തിന്‍റെ തുടക്കമായ പ്രവേശനോത്സവത്തിന് എരുമേലിയിൽ സ്കൂളുകൾ ഒരുങ്ങി. മഴ ശക്തമായി തുടർന്നാൽ പ്രവേശനോത്സവം എങ്ങനെ നടത്തുമെന്നത് അധ്യാപകരെ കുഴയ്ക്കുകയാണ്. സ്കൂൾ പരിസരങ്ങളിലെ പൊന്തക്കാടുകൾ വെട്ടിനീക്കി. ഫിറ്റ്നസ് പരിശോധന മുൻനിർത്തി നേരത്തെ തന്നെ ക്ലാസ് മുറികളും അനുബന്ധ കെട്ടിടങ്ങളും നവീകരിച്ചിരുന്നു. ചുവരുകളിൽ പുതിയ ഛായങ്ങളും കാർട്ടൂൺ കഥാപാത്രങ്ങൾ അടക്കം ആകർഷക ചിത്രങ്ങളും പുത്തൻ കളിക്കോപ്പുകളും ഒക്കെയായാണ് ഉൾപ്പടെ വിദ്യാലയങ്ങളെല്ലാം ഒരുങ്ങിയിരിക്കുന്നത്. വർണക്കൂടാരം എന്ന പേരിൽ ഗവൺമെന്‍റ് എൽപി സ്‌കൂളുകളിൽ പ്രത്യേക നിർമാണ പ്രവർത്തനങ്ങൾ നടത്തിയിരുന്നു. ഇന്നലെ മഴയ്ക്ക് ശമനമുണ്ടായത് സ്‌കൂളുകളിൽ ഒരുക്കങ്ങൾ പൂർത്തിയാക്കാൻ സഹായകമായി. പ്രവേശനോത്സവ ദിനമായ നാളെ സ്കൂൾ ജംഗ്ഷനുകളിലും പ്രധാന റോഡുകളിലും ഗതാഗത തിരക്ക് നിയന്ത്രിക്കാൻ രാവിലെ മുതൽ പോലീസിന്‍റെ സേവനമുണ്ടാകുമെന്ന് എരുമേലി പോലീസ് അറിയിച്ചു. മാലിന്യ മുക്ത നവ കേരളം കാമ്പയിന്‍റെ ഭാഗമായി എല്ലാ സ്‌കൂളുകളും ഹരിത വിദ്യാലയ നിലവാരത്തിലാണ്. ഹരിത ചട്ടങ്ങൾ പാലിച്ചാണ് സ്‌കൂളുകളിൽ പ്രവേശനോത്സവം നടക്കുക.

കൊല്ലമുളയിൽ കലുങ്ക് പണി മൂലം ചാത്തൻതറ യാത്ര ദുരിതത്തിൽ

മുക്കൂട്ടതറ: കൊല്ലമുളയിൽ കലുങ്ക് നിർമാണം മൂലം ചാത്തൻതറയിലേക്കുള്ള ഗതാഗതം നിർത്തിവച്ചതോടെ പകരം ഉപയോഗത്തിലുള്ള പലകക്കാവ് പാതയിൽ ഗതാഗതം ദുരിതമായി. കനത്ത മഴയും റോഡിന്‍റെ വീതി കുറവും പലകക്കാവ് പാലത്തിന് സമീപം ചെളിക്കുണ്ടായ ഭാഗത്ത് കുഴി രൂപപ്പെട്ടതുമാണ് യാത്ര ദുരിതത്തിലാക്കിയിരിക്കുന്നത്. കൊല്ലമുളയിൽ കലുങ്ക് നിർമാണം ഒരു മാസത്തിനകം പൂർത്തിയാക്കുമെന്ന് ഉറപ്പ് പറഞ്ഞാണ് മരാമത്ത് അധികൃതർ നിർമാണം തുടങ്ങിയത്. എന്നാൽ, ഇപ്പോൾ പണികൾ നിലച്ച അവസ്ഥയിലാണ്. പൊളിച്ചിട്ട കലുങ്കിന് സമീപം പണിത നടപ്പാലം ഇപ്പോൾ അപകടാവസ്ഥയിലുമാണ്. എരുമേലി, കണമല, ഏഞ്ചൽവാലി, കിസുമം, ഉമിക്കുപ്പ, മുട്ടപ്പള്ളി, വെൺകുറിഞ്ഞി, കൊല്ലമുള, ഇടകടത്തി ഭാഗങ്ങളിൽ നിന്ന് 50 ലധികം സ്കൂൾ ബസുകൾ കടന്നുപോകുന്ന പാതയാണ്. സ്കൂൾ തുറക്കാൻ ഒരു ദിവസം ബാക്കി നിൽക്കെ സമാന്തര പാതയിലെ യാത്ര ദുരിതത്തിലായത് ജനങ്ങളെ കൂടുതൽ വലയ്ക്കും. വളരെ ശോചനീയാസ്ഥയാണ് പലകക്കാവ് പാലത്തിന്‍റേത്. പാലം കഴിഞ്ഞുള്ള കയറ്റത്തിൽ കുഴികളായി തുടങ്ങി. സമാന്തര പാതയുടെ തുടക്കത്തിലുള്ള വലിയ കുഴി നികത്തി സഞ്ചാരയോഗ്യമാക്കിയില്ലെങ്കിൽ അപകടങ്ങൾ ഉണ്ടായേക്കുമെന്ന് നാട്ടുകാർ പറയുന്നു.

കാരുണ്യസ്പർശം പൂഞ്ഞാർ പദ്ധതി ഉദ്ഘാടനം ചെയ്തു

കാഞ്ഞിരപ്പള്ളി: സെബാസ്റ്റ്യൻ കുളത്തുങ്കൽ എംഎൽഎ നേതൃത്വം നൽകുന്ന സേവന-സന്നദ്ധ സംഘടനയായ എംഎൽഎ സർവീസ് ആർമി പൂഞ്ഞാറിന്‍റെ ജീവകാരുണ്യ പ്രവർത്തനങ്ങളുടെ ഭാഗമായി നടപ്പാക്കുന്ന കാരുണ്യസ്പർശം പൂഞ്ഞാർ പദ്ധതി കേരള കോൺഗ്രസ്-എം ചെയർമാൻ ജോസ് കെ. മാണി എംപി ഉദ്ഘാടനം ചെയ്തു. സമൂഹത്തിലെ പാർശ്വവത്കരിക്കപ്പെട്ടവരെയും ആശരണരെയും ചേർത്തുപിടിക്കുന്ന ഇത്തരം പദ്ധതികളിലൂടെ സമൂഹത്തിനാകെ വലിയൊരു സന്ദേശമാണ് നൽകാൻ കഴിയുന്നതെന്ന് ജോസ് കെ. മാണി എംപി പറഞ്ഞു. പൂഞ്ഞാർ നിയോജകമണ്ഡലത്തിലെ ഏറ്റവും നിർധനരായ 100 കിടപ്പുരോഗികൾക്ക് പ്രതിമാസം ആയിരം രൂപ പ്രകാരം ഒരു വർഷത്തേക്ക് ധനസഹായം നൽകുന്നതാണ് പദ്ധതിയാണ് കാരുണ്യസ്പർശം. എംഎൽഎ സർവീസ് ആർമി മുഖ്യ രക്ഷാധികാരി സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിച്ചു. പാറത്തോട് പഞ്ചായത്ത് പ്രസിഡന്‍റ് കെ.കെ. ശശികുമാർ മുഖ്യപ്രഭാഷണം നടത്തി. വെളിച്ചിയാനി സെന്‍റ് തോമസ് പള്ളി വികാരി ഫാ. സെബാസ്റ്റ്യൻ പാലമൂട്ടിൽ, ഇടച്ചോറ്റി ആശ്രമം രക്ഷാധികാരി സരസ്വതി തീർഥപാദസ്വാമികൾ, പാറത്തോട് മുഹിയുദീൻ ജമാഅത്ത് ചീഫ് ഇമാം ജനാബ് അനസ് അൽ ഖാസിമി എന്നിവർ അനുഗ്രഹ പ്രഭാഷണങ്ങൾ നടത്തി. സാജൻ കുന്നത്ത്, ജോർജുകുട്ടി ആഗസ്തി, ബിജോയ് ജോസ്, തോമസ് കട്ടയ്ക്കൽ, ജോണിക്കുട്ടി മഠത്തിനകം, ഡയസ് കോക്കാട്ട്, സോഫി ജോസഫ്, കെ.പി. സുശീലൻ, ജിജിമോൾ ഫിലിപ്പ്, ബാബു ടി. ജോൺ, തോമസ് ചെമ്മരപ്പള്ളിൽ തുടങ്ങിയവർ പ്രസംഗിച്ചു. മുന്പ് 100 കിടപ്പുരോഗികൾക്ക് പ്രതിമാസം ആയിരം രൂപ പ്രകാരം ഒരു വർഷം ധനസഹായം നൽകി വന്നിരുന്നു. ഇപ്പോൾ രണ്ടാംഘട്ടം എന്ന നിലയിലാണ് വീണ്ടും 100 രോഗികൾക്കായി പദ്ധതി ആരംഭിച്ചിട്ടുള്ളതെന്ന് സെബാസ്റ്റ്യൻ കുളത്തുങ്കൽ എംഎൽഎ പറഞ്ഞു. പൂഞ്ഞാർ നിയോജകമണ്ഡലത്തിലെ പത്തു പഞ്ചായത്തുകളിൽനിന്നായി തെരഞ്ഞെടുക്കപ്പെട്ട പത്തു സ്കൂളുകളിൽ നിന്നുള്ള 100 നിർധന വിദ്യാർഥികൾക്ക് സൗജന്യമായി നൽകുന്ന പഠനോപകരണങ്ങളുടെ വിതരണം, 25 നിർധന വൃക്കരോഗികൾക്ക് നൽകുന്ന സൗജന്യ ഡയാലിസിസ് കിറ്റ് വിതരണം എന്നിയുടെ ഉദ്ഘാടനവും ജോസ് കെ. മാണി എംപി നിർവഹിച്ചു.

അപകടകരമായ മരങ്ങള്‍ അടിയന്തരമായി വെട്ടിമാറ്റണം

കോട്ടയം: അപകടകരമായ രീതിയില്‍ വഴിയരികിലും പൊതുസ്ഥലത്തും നില്‍ക്കുന്ന മരങ്ങള്‍ അടിയന്തരമായി വെട്ടിമാറ്റാന്‍ ജില്ലാ കളക്ടര്‍ ജോണ്‍ വി. സാമുവലിന്‍റെ അധ്യക്ഷതയില്‍ ചേര്‍ന്ന ജില്ലാ വികസന സമിതി യോഗത്തില്‍ നിര്‍ദേശം. ദുരന്തനിവാരണ നിയമപ്രകാരം മരങ്ങള്‍ വെട്ടിമാറ്റുന്നതിനടക്കമുള്ള നടപടികള്‍ ആവശ്യപ്പെട്ടുള്ള ഉത്തരവുകള്‍ യഥാസമയം പാലിക്കുന്നുണ്ടെന്ന് നഗരസഭ, ഗ്രാമപഞ്ചായത്ത് സെക്രട്ടറിമാരും മറ്റു ബന്ധപ്പെട്ട ഉദ്യോഗസ്ഥരും ഉറപ്പാക്കണമെന്നും അല്ലാത്തപക്ഷം കര്‍ശന നടപടികള്‍ നേരിടേണ്ടിവരുമെന്നും ജില്ലാ കളക്ടര്‍ യോഗത്തില്‍ അറിയിച്ചു. ജില്ലയില്‍ തദ്ദേശസ്ഥാപനങ്ങള്‍ക്ക് അനുവദിച്ചിട്ടുള്ള ഒരുകോടി രൂപ ഉപയോഗിച്ചു ദുരന്തനിവാരണത്തിന് ആവശ്യമായ ഉപകരണങ്ങള്‍ വാങ്ങാന്‍ തദ്ദേശ സ്വയംഭരണവകുപ്പിന് ജില്ലാ കളക്ടര്‍ നിര്‍ദേശം നല്‍കി. മണിമല വില്ലേജില്‍ ഭിന്നശേഷിക്കാര്‍ക്കായി സംയോജിത പുനരധിവാസ ഗ്രാമപദ്ധതിക്കായി കണ്ടെത്തിയ സ്ഥലം സാമൂഹിക നീതിവകുപ്പിനു കൈമാറുന്നതിനുള്ള നടപടികള്‍ വേഗത്തിലാക്കണമെന്നു ചീഫ് വിപ്പ് ഡോ. എന്‍. ജയരാജ് യോഗത്തില്‍ ആവശ്യപ്പെട്ടു. പുതുതായി അനുവദിക്കുന്ന പാറമടകള്‍ക്കു മൈനിംഗ് പ്ലാന്‍ പ്രകാരം ഉപയോഗശേഷം റീഫില്‍ ചെയ്യാനോ, വേലിക്കെട്ട് സ്ഥാപിക്കാനോ ഉള്ള നിബന്ധനകള്‍ മുന്നോട്ടുവയ്ക്കുന്നുണ്ടെന്ന് ജില്ലാ ജിയോളജിസ്റ്റ് അറിയിച്ചു. ഇറഞ്ഞാല്‍-തിരുവഞ്ചൂര്‍ റോഡില്‍ മോസ്‌കോ ജംഗ്ഷന്‍ വരെയുള്ള ഭാഗത്ത് പൈപ്പ് ലൈന്‍ സ്ഥാപിക്കല്‍ പൂര്‍ത്തിയാക്കി പൊതുമരാമത്ത് വകുപ്പിന് റോഡ് തിരികെ കൈമാറിയിട്ടുണ്ടെന്നു ജല അഥോറിട്ടി അറിയിച്ചു. പുനരുദ്ധാരണം നടന്നുവരുന്ന മറ്റു റോഡുകള്‍ മഴ മാറിയാലുടന്‍ ഒരാഴ്ചയ്ക്കുള്ളില്‍ പൂര്‍ത്തിയാക്കുമെന്നും ജല അഥോറിട്ടി യോഗത്തില്‍ അറിയിച്ചു. മീനച്ചിലാറ്റിലെ വെള്ളത്തില്‍ കോളിഫോം ബാക്ടീരിയയുടെ അളവ് വര്‍ധിക്കുന്നുവെന്ന പരാതി പരിശോധിച്ചു മലിനീകരണ നിയന്ത്രണബോര്‍ഡ് ജില്ലാ വികസന സമിതിക്കു റിപ്പോര്‍ട്ട് സമർപ്പിക്കണമെന്നു തിരുവഞ്ചൂര്‍ രാധാകൃഷ്ണന്‍ എംഎല്‍എ ആവശ്യപ്പെട്ടു. വലിയ തോതില്‍ എക്കല്‍ വന്നടിഞ്ഞിരിക്കുകയാണെന്നും ചെറിയ തോടുകളിലെയും പുഴകളിലെയും മാലിന്യം നീക്കാന്‍ മൈനര്‍ ഇറിഗേഷന്‍ വകുപ്പ് അടിയന്തര നടപടി സ്വീകരിക്കണമെന്നും ചങ്ങനാശേരി താലൂക്ക് ആശുപത്രിയില്‍ രാത്രികാലങ്ങളില്‍ ഒരു ഡോക്ടറുടെ സേവനമേ നിലവിലുള്ളൂവെന്നും കൂടുതല്‍ ഡോക്ടര്‍മാരെ അടിയന്തരമായി നിയമിക്കണമെന്നും അഡ്വ. ജോബ് മൈക്കിള്‍ എംഎല്‍എ ആവശ്യപ്പെട്ടു. ആസൂത്രണസമിതി കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാല, അഡീഷണല്‍ ജില്ലാ മജിസ്ട്രേറ്റ് എസ്. ശ്രീജിത്ത്, ജില്ലാ പ്ലാനിംഗ് ഓഫീസര്‍ എം.പി. അനില്‍കുമാര്‍ എന്നിവര്‍ പങ്കെടുത്തു.

കാറ്റും മഴയും: കെഎസ്ഇബിക്ക് 7.9 കോടി രൂപയുടെ നഷ്ടം

കോട്ടയം: കനത്ത മഴയ്ക്കൊപ്പമുണ്ടായ കാറ്റില്‍ കോട്ടയം, പാലാ സര്‍ക്കിളുകളിലായി 7.9 കോടി രൂപയാണ് കെഎസ്ഇബിയുടെ നഷ്ടം. വൈദ്യുതി വിതരണം ഉറപ്പാക്കാനായി ഉദ്യോഗസ്ഥര്‍ 24 മണിക്കൂറും കഠിനപ്രയത്നത്തില്‍. മരങ്ങള്‍ ഒടിഞ്ഞുവീണ് വൈദ്യുതി ലൈനുകളും പോസ്റ്റുകളും തകര്‍ന്നാണ് നഷ്ടമുണ്ടായത്. കോട്ടയം സര്‍ക്കിളിനു കീഴില്‍ വരുന്ന 31 സെക്‌ഷനുകളിലായി വൈദ്യുതിത്തൂണുകള്‍ ഒടിഞ്ഞ് 2.90 കോടി രൂപയുടെ നഷ്ടമുണ്ടായി. 102 ഹൈ ടെന്‍ഷന്‍ പോസ്റ്റുകളും 396 ലോ ടെന്‍ഷന്‍ പോസ്റ്റുകളും ഒടിഞ്ഞു. 2018ലെ പ്രളയത്തെത്തുടര്‍ന്ന് കുമരകം, തിരുവാര്‍പ്പ്, വെച്ചൂര്‍, കല്ലറ തുടങ്ങിയ സ്ഥലങ്ങളിലെ താഴ്ന്ന പ്രദേശങ്ങളിലുണ്ടായിരുന്ന ട്രാന്‍സ്ഫോര്‍മറുകള്‍ വെള്ളം കയറാത്ത ഭാഗങ്ങളിലേക്ക് മാറ്റിസ്ഥാപിക്കുകയോ ഉയരം കൂട്ടി സ്ഥാപിക്കുകയോ ചെയ്തിരുന്നു. അതുകൊണ്ട് വെള്ളം കയറി ട്രാന്‍സ്ഫോര്‍മറുകള്‍ നശിക്കുന്ന അവസ്ഥ നിലവിലില്ല. ട്രാന്‍സ്ഫോര്‍മറുകള്‍ ദിവസങ്ങളോളം ഓഫ് ചെയ്തിടേണ്ട സ്ഥിതിയുമില്ലെന്ന് കെഎസ്ഇബി കോട്ടയം സര്‍ക്കിള്‍ അസിസ്റ്റന്‍റ് എക്സിക്യൂട്ടീവ് എന്‍ജിനിയര്‍ റിയ ജേക്കബ് പറഞ്ഞു. പാലാ സര്‍ക്കിളിനു കീഴിലുള്ള 21 ഇലക്ട്രിക്കല്‍ സെക്‌ഷനുകളിലായി അഞ്ചുകോടി രൂപയുടെ നഷ്ടമാണുണ്ടായത്. അഞ്ച് ട്രാന്‍സ്ഫോര്‍മറുകള്‍ തകര്‍ന്നു. 70 ഹൈടെന്‍ഷന്‍ പോസ്റ്റുകളും അഞ്ഞൂറിലധികം ലോ ടെന്‍ഷന്‍ പോസ്റ്റുകളും ഒടിഞ്ഞു. 11 കെവി ലൈനുകള്‍ ഉള്‍പ്പെടെ 1700 സ്ഥലങ്ങളില്‍ വൈദ്യുതി ലൈനുകള്‍ പൊട്ടുകയും നാശനഷ്ടങ്ങള്‍ ഉണ്ടാകുകയും ചെയ്തു. നഗരപ്രദേശങ്ങളില്‍ വൈദ്യുതി വിതരണം ഏരിയല്‍ ബഞ്ച്ഡ് കേബിളുകള്‍ (എബിസി) വഴിയാക്കിയതിനാല്‍ വൈദ്യുതി തടസം വലിയൊരളവുവരെ ഒഴിവാക്കാനായി. എസ്എംഎസ് അറിയിപ്പുകള്‍ക്ക്: വൈദ്യുതി തടസം സംബന്ധിച്ച മുന്നറിയിപ്പുകള്‍ എസ്എംഎസ് മുഖേന ലഭ്യമാക്കുന്നതിനായി ഉപഭോക്താക്കള്‍ക്ക് www.kseb.in എന്ന വെബ്സൈറ്റില്‍ പ്രവേശിച്ച് സ്വമേധയാ മൊബൈല്‍ നമ്പര്‍ അപ്ഡേറ്റ് ചെയ്യാം. കണ്‍ട്രോള്‍ റൂമുകള്‍ അടിയന്തര സന്ദേശങ്ങള്‍ നല്‍കുന്നതിനായും പരാതികള്‍ അറിയിക്കുന്നതിനായും പാലാ, കോട്ടയം ഇലക്‌ട്രിക്കല്‍ സര്‍ക്കിള്‍ ഓഫീസുകളില്‍ കണ്‍ട്രോള്‍ റൂം പ്രവര്‍ത്തിക്കുന്നുണ്ട്. ഫോണ്‍: 9496008230 (പാലാ), 9496008063(കോട്ടയം). അതതു സര്‍ക്കിളുകള്‍ക്കു കീഴിലുള്ളവര്‍ക്ക് 24 മണിക്കൂറും വൈദ്യുതി തടസവും അപകടസാധ്യതയും സംബന്ധിച്ച് പരാതികള്‍ അറിയിക്കാന്‍ ബന്ധപ്പെടാം. വൈദ്യുതി സംബന്ധമായ അപകടമോ അപകടസാധ്യതയോ ശ്രദ്ധയില്‍പ്പെട്ടാല്‍ എത്രയും വേഗം അത് സെക്‌ഷന്‍ ഓഫീസുകളിലോ 9496010101 എന്ന എമര്‍ജന്‍സി നമ്പറിലോ അറിയിക്കണം. പരാതികള്‍ അറിയിക്കാന്‍ 1912 എന്ന ടോള്‍ ഫ്രീ നമ്പറിലേക്കും വിളിക്കാം.

സ്‌കൂൾ പ്രവേശനോത്സവം: ജില്ലാതല ഉദ്ഘാടനം നീണ്ടൂരിൽ

കോട്ടയം: ജില്ലാതല സ്‌കൂൾ പ്രവേശനോത്സവം രണ്ടിന് നീണ്ടൂർ എസ്കെവി ഗവൺമെന്‍റ് ഹയർ സെക്കൻഡറി സ്‌കൂളിൽ നടക്കും. രാവിലെ ഒൻപതിന് ജില്ലാതല പ്രവേശനോത്സവവും എസ്എസ്കെ സ്‌കൂളിന് അനുവദിച്ച ടിങ്കറിംഗ് ലാബിന്‍റെ ഉദ്ഘാടനവും മന്ത്രി വി.എൻ. വാസവൻ നിർവഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ അധ്യക്ഷത വഹിക്കും. ചടങ്ങിൽ എസ്എസ്എൽസി, പ്ലസ് ടു പരീക്ഷയിൽ ഫുൾ എ പ്ലസ് കരസ്ഥമാക്കിയ വിദ്യാർഥികൾക്കും യുഎസ്എസ് സ്‌കോളർഷിപ്പ് നേടിയവർക്കും ഉപഹാരം നൽകും. തിരക്കഥാകൃത്തും സാഹിത്യകാരനും പൂർവ വിദ്യാർഥിയുമായ എസ്. ഹരീഷ് കൈയെഴുത്ത് മാഗസിൻ പ്രകാശനം ചെയ്യും. എംപിമാരായ ജോസ് കെ. മാണി, ഫ്രാൻസിസ് ജോർജ്, ജില്ലാ കളക്ടർ ജോൺ വി. സാമുവൽ, ഏറ്റുമാനൂർ ബ്ലോക്ക് പഞ്ചായത്ത് പ്രസിഡന്‍റ് ആര്യ രാജൻ, നീണ്ടൂർ പഞ്ചായത്ത് പ്രസിഡന്‍റ് വി.കെ. പ്രദീപ്, ജില്ലാ പഞ്ചായത്ത് സ്ഥിരം സമിതി അധ്യക്ഷരായ പി.ആർ. അനുപമ, ഹൈമി ബോബി, ബ്ലോക്ക് പഞ്ചായത്തംഗങ്ങളായ തോമസ് കോട്ടൂർ, സബിത ജോമോൻ എന്നിവർ പരിപാടിയിൽ പങ്കെടുക്കും.

മഴക്കെടുതിയില്‍ റബര്‍ ഉത്പാദനം നിലച്ചു

കോട്ടയം: കിഴക്കനേഷ്യന്‍ രാജ്യങ്ങളിലെ പെരുമഴയും കോവിഡ് വ്യാപനവും റബര്‍ ആഭ്യന്തര വില ഉയരാന്‍ വഴിതെളിക്കുന്നു. റബര്‍ ഷീറ്റിനും ലാറ്റക്‌സിനും വില ഇരുന്നൂറിനു മുകളിലെത്തിയെങ്കിലും മഴക്കെടുതിയില്‍ കേരളത്തില്‍ ടാപ്പിംഗ് ഒരാഴ്ചയായി നടക്കുന്നില്ല. നിലവില്‍ തായ്‌ലാന്‍ഡ്, വിയറ്റ്‌നാം, ഇന്തോനേഷ്യ, മലേഷ്യ എന്നീ റബര്‍ ഉത്പാദക രാജ്യങ്ങളിലാണ് ഏറ്റവും കോവിഡ് വ്യാപനമുള്ളത്. ലോക് ഡൗണിനു സമാനമായ നിയന്ത്രണം ഈ രാജ്യങ്ങള്‍ ഏര്‍പ്പെടുത്തിക്കൊണ്ടിരിക്കുന്ന സാഹചര്യത്തില്‍ റബര്‍ ഉത്പാദനത്തില്‍ വലിയ കുറവുണ്ടാകാനാണ് സാധ്യത. ഈ രാജ്യങ്ങളിലെല്ലാം പതിവിനു മുന്നേ മണ്‍സൂണ്‍ എത്തി ശക്തമായി പെയ്യുന്നതിനാല്‍ ഉത്പാദനമില്ല. കിഴക്കനേഷ്യന്‍ രാജ്യങ്ങളില്‍ വെള്ളപ്പൊക്കമുണ്ടായാല്‍ മാസങ്ങളോളം തോട്ടങ്ങളില്‍ വെള്ളക്കെട്ട് രൂപപ്പെടുകയും ടാപ്പിംഗ് നിലയ്ക്കുകയും ചെയ്യുക പതിവാണ്. കേരളത്തില്‍ ജൂണ്‍ പത്ത് വരെ മഴ തുടരുമെന്നാണ് കാലാവസ്ഥാ നിരീക്ഷണം. ജൂണില്‍ ടാപ്പിംഗ് പൂര്‍ണമായി നിലയ്ക്കുകയും ഇറക്കുമതിക്ക് സാധ്യത മങ്ങുകയും ചെയ്താല്‍ വില ഇനിയും ഉയരാനാണ് സാഹചര്യം. റബര്‍ ഷീറ്റിനു മാത്രമല്ല ലാറ്റക്‌സിനും ക്ഷാമം തുടരുകയാണ്. 210 രൂപ വരെ ലാറ്റക്‌സ് വില ഉയരുകയും ചെയ്തിരുന്നു. കേരളത്തില്‍ ഉള്‍പ്പെടെ ചില ഫാക്ടറികള്‍ ശ്രീലങ്കയില്‍ നിന്ന് ലാറ്റക്‌സ് ഇറക്കുമതി ചെയ്യാനുള്ള നീക്കത്തിലാണ്. 203 രൂപയ്ക്ക് വരെ ഇന്നലെ ചില കമ്പനികള്‍ ഡീലര്‍മാരില്‍ നിന്ന് ഷീറ്റ് വാങ്ങാന്‍ താത്പര്യപ്പെട്ടു.

നഗരസഭകളിലെ വാര്‍ഡുവിഭജനം പൂര്‍ത്തിയായി

കോട്ടയം: തദ്ദേശ തെരഞ്ഞെടുപ്പിനു മുന്നോടിയായുള്ള നഗരസഭകളിലെ വാര്‍ഡുവിഭജനവും പൂര്‍ത്തിയായി. അന്തിമ വിജ്ഞാപനം വന്നതോടെ ജില്ലയിലെ ആറു നഗരസഭകളിലായി വാര്‍ഡുകള്‍ 208 ആയി. നേരത്തെ 204 വാര്‍ഡുകളാണുണ്ടായിരുന്നത്. കോട്ടയം, വൈക്കം, ഈരാറ്റുപേട്ട, ഏറ്റുമാനൂര്‍ നഗരസഭകളിലാണ് ഓരോ വാര്‍ഡ് വീതം വര്‍ധിച്ചത്. പാലാ, ചങ്ങനാശേരി നഗരസഭകളില്‍ വാര്‍ഡ് എണ്ണം കൂടിയിട്ടില്ല. എന്നാല്‍ പേരിലും അതിരുകളിലും വ്യത്യാസം വന്നിട്ടുണ്ട്. ചങ്ങനാശേരി നഗരസഭയില്‍ എന്‍എസ്എസ് ആസ്ഥാനം സ്ഥിതി ചെയ്യുന്ന വാര്‍ഡിനു മാറ്റം വന്നു. 14-ാം നമ്പര്‍ എന്‍എസ്എസ് കോളജ് വാര്‍ഡിലായിരുന്നു എന്‍എസ്എസ് ആസ്ഥാനം. പുനര്‍ വിഭജനത്തില്‍ മന്നം നഗര്‍ വാര്‍ഡിലേക്ക് ആസ്ഥാനം മാറി. വാഴൂര്‍ റോഡില്‍ ചങ്ങനാശേരി നഗരസഭയുടെ അതിര്‍ത്തി ഇനി പാറേല്‍പള്ളി വാര്‍ഡാകും. ജില്ലയിലെ 71 പഞ്ചായത്തുകളിലെ വാര്‍ഡ് വിഭജനം കഴിഞ്ഞ ദിവസം പൂര്‍ത്തിയായിരുന്നു. 1140 വാര്‍ഡുകളുണ്ടായിരുന്ന പഞ്ചായത്തു വാര്‍ഡുകള്‍ പുനര്‍വിഭജനത്തില്‍ 1223 വാര്‍ഡുകളായി. ഈ മാസം അവസാനത്തോടെ ബ്ലോക്ക്, ജില്ലാ വാര്‍ഡുകളുടെയും പുനര്‍നിര്‍ണയം പൂര്‍ത്തിയായി വിജ്ഞാപനം ഇറങ്ങും. നാല് നഗരസഭകളില്‍ ഒരു വാര്‍ഡ് കൂടി (നഗരസഭ, ആകെ വാര്‍ഡ്, പുതിയ വാര്‍ഡിന്‍റെ പേര്, നമ്പര്‍ എന്ന ക്രമത്തില്‍) കോട്ടയം-53, ഒരു വാര്‍ഡ് കൂടി, ഈരയില്‍കടവ്-19, ട്രാവന്‍കൂര്‍ സിമന്‍റ്സ്-22, മിനി സിവില്‍ സ്‌റ്റേഷന്‍-47 എന്നീ പേരുകളില്‍ പുതിയ വാര്‍ഡുകളും വന്നു. (കോടിമത സൗത്ത് എന്ന വാര്‍ഡ് പേര് ഇല്ലാതായി) വൈക്കം-27, ഫയര്‍ സ്‌റ്റേഷന്‍-10 ഈരാറ്റുപേട്ട-29, നടയ്ക്കല്‍-13 ഏറ്റുമാനൂര്‍-36, കണ്ണംപുര-13 പാലാ, ചങ്ങനാശേരി നഗരസഭകളില്‍ വാര്‍ഡുകളുടെ എണ്ണത്തില്‍ മാറ്റമില്ല. ജില്ലയില്‍ 450 അധികബൂത്തുകള്‍ വേണ്ടിവരും കോട്ടയം: അടുത്ത പഞ്ചായത്ത്, നിയമസഭാ തെരഞ്ഞെടുപ്പില്‍ ജില്ലയില്‍ പുതുതായി 450 ബൂത്തുകള്‍കൂടി ക്രമീകരിക്കാന്‍ ഒരുക്കങ്ങള്‍ തുടങ്ങി. ഒരു ബൂത്തില്‍ പരമാവധി 1200 വോട്ടര്‍മാര്‍ എന്ന കേന്ദ്ര ഇലക്‌ഷന്‍ കമ്മീഷന്‍റെ നിര്‍ദേശം സംസ്ഥാനത്തും പാലിക്കുമ്പോള്‍ 6500 അധിക ബൂത്തുകളാണ് വേണ്ടിവരിക. ജില്ലയില്‍ കൂടുതല്‍ ബൂത്തുകള്‍ വരുമ്പോള്‍ തെരഞ്ഞെടുപ്പ് ഡ്യൂട്ടിക്ക് രണ്ടായിരത്തോളം ജീവനക്കാരെയും അധികമായി കണ്ടെത്തേണ്ടതുണ്ട്. ബൂത്തുകളായി സ്‌കൂളുകളും കോളജുകളും ഹാളുകളും ഉണ്ടെങ്കില്‍ കൂടുതല്‍ ബൂത്തുകള്‍ ക്രമീകരിക്കുക ദുഷ്‌കരമല്ല. എന്നാല്‍ അങ്കണവാടികള്‍, വായനശാലകള്‍ തുടങ്ങിയ ചെറിയ കെട്ടിടങ്ങള്‍ ഏക ബൂത്തുകളായി പ്രവര്‍ത്തിക്കുന്നിടത്ത് അധികം ബൂത്ത് എളുപ്പമല്ല. താത്കാലിക ഷെഡുകളില്‍ ബൂത്ത് ക്രമീകരിക്കാന്‍ സുരക്ഷാകാര്യങ്ങളാല്‍ അനുവദിക്കില്ല. നിലവില്‍ സംസ്ഥാനത്ത് ആകെയുള്ളത് 25,494 ബൂത്തുകളാണ്.

ചെങ്ങളം സെന്‍റ് ആന്‍റണീസ് തീർഥാടന പള്ളിയിൽ വിശുദ്ധ അന്തോനീസിന്‍റെ തിരുനാളും നവനാൾ നൊവേനയും

ചെങ്ങളം: കേരളത്തിന്‍റെ പാദുവ എന്നറിയപ്പെടുന്ന പുരാതന തീർഥാടന കേന്ദ്രമായ ചെങ്ങളം സെന്‍റ് ആന്‍റണീസ് പള്ളിയിൽ വിശുദ്ധ അന്തോനീസിന്‍റെ തിരുനാളും നവനാൾ നൊവേനയും നാലു മുതൽ 13 വരെ നടക്കുമെന്ന് വികാരി ഫാ. വർഗീസ് പരിന്തിരിക്കൽ, അസിസ്റ്റന്‍റ് വികാരി ഫാ. നോബി വെള്ളാപ്പള്ളി എന്നിവർ അറിയിച്ചു. നാലു മുതൽ 12 വരെ രാവിലെ 5.30ന് വിശുദ്ധ കുർബാന, നൊവേന, 6.30ന് വിശുദ്ധ കുർബാന, 11ന് നൊവേന, വിശുദ്ധ കുർബാന, വൈകുന്നേരം 4.45ന് കരുണക്കൊന്ത, അഞ്ചിന് വചനപ്രഘോഷണം, 5.30ന് നൊവേന, വിശുദ്ധ കുർബാന. 13ന് രാവിലെ 5.30ന് വിശുദ്ധ കുർബാന, നൊവേന, 6.30ന് വിശുദ്ധ കുർബാന, 11ന് നൊവേന, വിശുദ്ധ കുർബാന, വൈകുന്നേരം അഞ്ചിന് പൊന്തിഫിക്കൽ കുർബാന, നൊവേന - മാർ ജോസ് പുളിക്കൽ, 6.45ന് പ്രദക്ഷിണം, നേർച്ച വിതരണം. തിരുനാൾ ദിവസങ്ങളിൽ ഫാ. തോമസ് വാളന്മനാൽ, ഫാ. കുര്യാക്കോസ് വടക്കേടം, ഫാ. ജോസ് ഇടത്തിനകം, ഫാ. ജേക്കബ് പാണ്ടിയാംപറന്പിൽ, ഫാ. മാത്യു പുതുമന, ഫാ. ജേക്കബ് വെള്ളമരുതുങ്കൽ, ഫാ. ജോസഫ് കൊച്ചുവീട്ടിൽ, ഫാ. വിൽഫിച്ചൻ തെക്കേവയലിൽ, ഫാ. തോമസ് പൂവത്താനിക്കുന്നേൽ എന്നിവർ തിരുക്കർമങ്ങൾക്ക് കാർമികത്വം വഹിക്കും.

മേലുകാവിനു കാവലായി ഗൂർഖ നരേഷ് ഭായി

കോട്ടയം: ഗാന്ധിനഗര്‍ സെക്കന്‍ഡ് സ്ട്രീറ്റ് സിനിമയില്‍ മലയാളത്തിന്‍റെ പ്രിയപ്പെട്ട നടന്‍ മോഹന്‍ലാല്‍ ഗൂര്‍ഖയായി എത്തിയ വേഷം ആരും മറന്നിട്ടില്ല. ഇപ്പോഴും നമ്മുടെ സിനിമ ഓര്‍മകളിലെ മനോഹരമായ സീനുകളിലൊന്നാണിത്. ജില്ലയുടെ മലയോര മേഖലയായ മേലുകാവിലുമുണ്ട് ഒരു ഗൂര്‍ഖ- നേപ്പാള്‍ സ്വദേശി നരേഷ് ഭായി. മോഷ്ടാക്കളില്‍നിന്നു സംരക്ഷണം തേടി മേലുകാവ് മര്‍ച്ചന്‍റ്സ് അസോസിയേഷനും പ്രദേശത്തെ റെസിഡന്‍റ്സ് അസോസിയേഷനും ചേര്‍ന്നാണ് ഗൂര്‍ഖയെ നിയമിച്ചിരിക്കുന്നത്. അടുത്ത നാളില്‍ മോഷ്ടാക്കളുടെ ശല്യം വര്‍ധിച്ചതോടെയാണ് അസോസിയേഷന്‍ ഇങ്ങനെയൊരു തീരുമാനമെടുത്തത്. ചാലമറ്റം മുതല്‍ മേലുകാവ് ടൗണ്‍വരെയും പാണ്ടിയാന്‍മാവ്, കുരിശുങ്കല്‍, കോളജ് തുടങ്ങിയ സ്ഥലങ്ങളുമാണ് നരേഷ് ഭായിയുടെ ഏരിയ. രാത്രി 11മുതല്‍ പുലര്‍ച്ചെ നാലുവരെയാണ് ഡ്യൂട്ടി. കാക്കി പാന്‍റ്സും ഷര്‍ട്ടും തൊപ്പിയുമാണ് വേഷം. കൈയില്‍ ലാത്തിയും ടോര്‍ച്ചുമുണ്ട്. രാത്രിയില്‍ തനിക്ക് നിശ്ചയിക്കപ്പെട്ട സ്ഥലങ്ങളിലൂടെ നരേഷ് ഭായി പട്രോളിംഗ് നടത്തും. സംശയം തോന്നുന്ന ആളുകളെ ചോദ്യം ചെയ്യും. ഗൗരവമേറിയ വിഷയമാണെങ്കില്‍ മേലുകാവ് പോലീസുമായി ബന്ധപ്പെടും. 20 വര്‍ഷമായി കേരളത്തിലെ വിവിധ പ്രദേശങ്ങളിലും സ്ഥാപനങ്ങളിലും ജോലി ചെയ്ത നരേഷ് ഭായി ഒരു വര്‍ഷമായി മേലുകാവിലെത്തിയിട്ട്. ടൗണിലെ ഒരു ചെറിയ മുറിയിലാണ് താമസം. ഇവിടെ ഭക്ഷണമൊക്കെ വച്ച് നരേഷ് ഭായി കഴിഞ്ഞുകൂടും. അമ്മയും ഭാര്യയും രണ്ടു മക്കളും നേപ്പാളില്‍ തന്നെയാണ്. വര്‍ഷത്തില്‍ ഒരു മാസം നാട്ടിലേക്ക് പോകും. ബാക്കിയുള്ള സമയം മുഴുവന്‍ ഇവിടെയുണ്ട്. ചുരുങ്ങിയ കാലത്തിനുള്ളില്‍ മേലുകാവ് പോലീസിനും ടൗണിലെ വ്യാപാരികള്‍ക്കും നാട്ടുകാര്‍ക്കും കൊച്ചു കുട്ടികള്‍ക്കുവരെ നരേഷ് ഭായി പരിചയക്കാരനായി മാറിക്കഴിഞ്ഞു. മലയാളം നല്ലതുപോലെ സംസാരിക്കും. പണ്ട് കേരളത്തിന്‍റെ വിവിധ മേഖലകളില്‍ ഏറ്റവും വലിയ സേവനം ചെയ്തിരുന്നവരാണ് നേപ്പാര്‍ ഗൂര്‍ഖകള്‍.

പാലത്തിലെ കുഴികള്‍ യാത്രക്കാരെ വലയ്ക്കുന്നു

പാലാ: വലിയ പാലത്തില്‍ രൂപപ്പെട്ട വലിയ കുഴികള്‍ കാര്‍, ബൈക്ക് തുടങ്ങിയ വാഹനങ്ങള്‍ക്കും വഴിയാത്രക്കാര്‍ക്കും ഒരുപോലെ ബുദ്ധിമുട്ട് സൃഷ്ടിക്കുന്നു. കുഴികളില്‍ കെട്ടിക്കിടക്കുന്ന ചെളിവെള്ളം വഴിയാത്രക്കാരുടെ മേല്‍ വാഹനങ്ങള്‍ കടന്നുപോകുമ്പോള്‍ തെറിക്കുന്നത് പതിവാണ്. പാലാ ടൗണില്‍ നിന്നു പൊന്‍കുന്നം ഭാഗത്തേക്ക് പോകുന്ന വാഹനങ്ങള്‍ വളവ് തിരിഞ്ഞു പാലത്തിലേക്ക് പ്രവേശിക്കുമ്പോള്‍ മുന്നിലെ കുഴികള്‍ ശ്രദ്ധയില്‍പ്പെടാതെ പെട്ടന്ന് കുഴിയില്‍ ചാടുന്നതും കേടുപാട് സംഭവിക്കുന്നതും അപകടത്തില്‍പ്പെടുന്നതും പതിവാണ്. ഇരുചക്ര വാഹന യാത്രക്കാരാണ് കൂടുതലും അപകടത്തില്‍പ്പെടുന്നത്. പാലത്തിലെ കുഴികള്‍ അടച്ചു യാത്രക്കാര്‍ക്കും വാഹനങ്ങള്‍ക്കും ഉണ്ടാകുന്ന ബുദ്ധിമുട്ട് അടിയന്തരമായി പരിഹരിക്കണമെന്ന് നാട്ടുകാര്‍ ആവശ്യപ്പെട്ടു.

കർഷകസദസുകളുമായി പാറത്തോട് സഹകരണബാങ്ക്

പാറത്തോട്: പാറത്തോട് സർവീസ് സഹകരണബാങ്കിന്‍റെ ആഭിമുഖ്യത്തിൽ കാർഷിക മേഖലയ്ക്ക് കരുത്തു പകരുക എന്ന ലക്ഷ്യത്തോടെ കാർഷിക മൂല്യവർധിത ഉത്പന്നങ്ങൾ ഉത്പാദിപ്പിക്കുന്ന പ്രൊജക്‌ടിന് നമ്പാർഡിൽനിന്നു കേരള ബാങ്കുവഴി അനുമതി ലഭിച്ചു. കർഷകരുടെ സഹകരണത്തോടെ നടപ്പാക്കേണ്ട പദ്ധതിയെക്കുറിച്ചു ചർച്ച ചെയ്യുന്നതിനായി ബാങ്ക് ഭരണസമതി അംഗങ്ങളായ ജോർജുകുട്ടി അഗസ്‌തി, ബിജോ ബി. കുറ്റുവേലി, പ്രിൻസ് ജോസഫ്, പി.എൻ. ഗോപിനാഥൻ, സുബിൻ ജോസഫ്, കെ.പി. സുജീലൻ, തോമസുകുട്ടി സെബാസ്റ്റ്യൻ, റെജി ജോസഫ്, വിജയമ്മ വിജയലാൽ, സോഫി ജോസഫ്, ഷേർളി വർഗീസ് എന്നിവരുടെ നേതൃത്വത്തിൽ ഇന്നുമുതൽ നാലുവരെ നാല് മേഖലകളിലായി കർഷകസദസുകൾ സംഘടിപ്പിക്കും. ജനപ്രതിനിധികൾ, സഹകാരി നേതാക്കൾ, കർഷക സംഘടനാ പ്രതിനിധികൾ, പൊതുപ്രവർത്തകർ മുതലായവർ പങ്കെടുക്കുന്ന സദസിൽ ഈ മേഖലയിലെ വിദഗ്ധർ ക്ലാസുകൾ നയിക്കും. കർഷകസദസുകളുടെ ഉദ്ഘാടനം ഇന്ന് ഉച്ചകഴിഞ്ഞ് 2.30ന് വെളിച്ചിയാനി ഹെഡ് ഒഫീസ് ഹാളിൽ സെബാസ്റ്റ്യൻ കുളത്തുങ്കൽ എംഎൽഎ നിർവഹിക്കും. പഞ്ചായത്ത് പ്രസിഡന്‍റ് കെ.കെ. ശശികുമാർ അധ്യക്ഷത വഹിക്കും. ജില്ലാ പഞ്ചായത്തംഗം പി.ആർ. അനുപമ, ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, ബ്ലോക്ക് പഞ്ചായത്തംഗം സാജൻ കുന്നത്ത്, ത്രിതല പഞ്ചായത്ത് മെംബർമാർ തുടങ്ങിയവർ പ്രസംഗിക്കും. പാറത്തോട്, പൊടിമറ്റം, വെളിച്ചിയാനി, പുളിമൂട്, ചോറ്റി, ഊരയ്ക്കനാട് എന്നിവിടങ്ങളിലെ കർഷകസദസ് ഇന്ന് ഉച്ചകഴിഞ്ഞ് 2.30ന് വെളിച്ചിയാനി ബാങ്ക് ഫെഡ് ഓഫീസ് ഹാളിലും ഇടക്കുന്നം, മുക്കാലി, നാടുകാണി, കാരികുളം, വട്ടകാവ് എന്നിവിടങ്ങളിലേത് നാളെ ഉച്ചകഴിഞ്ഞ് 2.30ന് ഇടക്കുന്നം വായനശാലാ ഹാളിലും പാലപ്ര, ചിറഭാഗം പഴുമല ഭാഗങ്ങളിലേത് നാലിന് ഉച്ചകഴിഞ്ഞ് 2.30ന് പാലപ്ര വനിതാ തൊഴിൽ പരിശീലന ഹാളിലും ചിറ്റടി, മാങ്ങാപ്പാറ, വടക്കേമല, ചിറ്റടി എസ്റ്റേറ്റ് എന്നിവിടങ്ങളിലേത് ചിറ്റടി ലൈബ്രറി ഹാളിലും നടക്കും.

ഏഴു ലക്ഷം മുടക്കി പുനരുദ്ധാരണം നടത്തിയ ആശുപത്രി കെട്ടിടം ചോർന്നൊലിക്കുന്നു

മുണ്ടക്കയം: മുണ്ടക്കയം സർക്കാർ ആശുപത്രിക്കായി കോടികൾ മുടക്കി പണിത കെട്ടിടമുണ്ടെങ്കിലും ആശുപത്രിയുടെ പ്രവർത്തനം ഇപ്പോഴും പരിമിതികൾക്ക് നടുവിൽ. പുതിയ കെട്ടിടം പണിയുന്നതിനുമുമ്പ് ഒപി പ്രവർത്തിച്ചിരുന്ന പഴയ കെട്ടിടത്തിൽ ഇപ്പോൾ മാതൃശിശു വിഭാഗമാണ് പ്രവർത്തിക്കുന്നത്. മേൽക്കൂരയിലെ പഴയ ഓടുകൾ അടക്കം മാറ്റി ഏഴു ലക്ഷം രൂപയുടെ നവീകരണ പ്രവർത്തനങ്ങൾ ഇവിടെ നടത്തിയിരുന്നെങ്കിലും കെട്ടിടത്തിന്‍റെ പല ഭാഗങ്ങളും ഇപ്പോഴും ചോർന്നൊലിക്കുകയാണ്. കൂടാതെ പഴയ കെട്ടിടത്തിന്‍റെ ഭിത്തികൾ മഴയിൽ കുതിർന്ന് അപകടാവസ്ഥയും സൃഷ്ടിക്കുന്നുണ്ട്. ഒരു മഴ പെയ്തു കഴിഞ്ഞാൽ മാതൃശിശു ഭാഗം പ്രവർത്തിക്കുന്ന പഴയ കെട്ടിടത്തിന്‍റെ ഉള്ളിൽ വെള്ളം നിറയും. ഇതോടെ രോഗികളും ഒപ്പം ജീവനക്കാരും കടുത്ത ദുരിതത്തിലാകും. കോടികൾ മുടക്കി പുതിയ കെട്ടിടം പണിതിട്ടുണ്ടെങ്കിലും ഇതിന്‍റെ പ്രയോജനം വേണ്ട രീതിയിൽ വിനിയോഗിക്കുവാൻ അധികാരികൾക്ക് കഴിയുന്നില്ല. നാല് നിലകളുള്ള പുതിയ മന്ദിരത്തിൽ ആവശ്യത്തിലധികം സ്ഥലമുണ്ടെന്നിരിക്കെയാണ് ചോർന്നൊലിക്കുന്ന പഴയ കെട്ടിടം അറ്റകുറ്റപ്പണികൾ നടത്തി മാതൃശിശു വിഭാഗം പ്രവർത്തിക്കുന്നത്. മുണ്ടക്കയം സർക്കാർ ആശുപത്രിയെ താലൂക്ക് ആശുപത്രിയാക്കി ഉയർത്തണമെന്ന ആവശ്യത്തിന് വർഷങ്ങളുടെ പഴക്കമുണ്ട്. എന്നാൽ, ഇതിനുള്ള യാതൊരു നടപടിയും അധികാരികളുടെ ഭാഗത്തുനിന്നു ഉണ്ടാകുന്നില്ലെന്ന് മാത്രമല്ല പരിമിതികൾക്ക് നടുവിൽ ചികിത്സ തേടേണ്ട ഗതികേടിലാണ് രോഗികൾ.

കത്തോലിക്ക കോണ്‍ഗ്രസ് അവാര്‍ഡ് വിതരണം ജൂൺ 22ലേക്കു മാറ്റി

ചങ്ങനാശേരി: അതിരൂപത കത്തോലിക്ക കോണ്‍ഗ്രസിന്‍റെ നേതൃത്വത്തില്‍ എക്‌സലന്‍ഷ്യാ മെറിറ്റ് അവാര്‍ഡ്-25 വിതരണവും മാര്‍ ജോസഫ് പവ്വത്തില്‍ സ്മാരക ഹെറിറ്റേജ് ക്വിസ് മത്സരത്തിലെ വിജയികള്‍ക്കുള്ള സമ്മാനദാനവും മഴയും വെള്ളപ്പൊക്കവും കാരണം ജൂണ്‍ 22ന് ഉച്ചയ്ക്ക് ഒന്നിലേക്ക് മാറ്റി. എസ്ബി കോളജിലെ കാവുകാട്ട് ഹാളില്‍ നടക്കുന്ന പരിപാടിയിൽ അവാര്‍ഡ് ഏറ്റുവാങ്ങാന്‍ യോഗ്യരായ വിദ്യാര്‍ഥികള്‍ക്ക് പത്തിനു വൈകുന്നേരം അഞ്ചുവരെ രജിസ്റ്റര്‍ ചെയ്യുവാനുള്ള സൗകര്യവും ഉണ്ടായിരിക്കും. നാളെ നടത്താനാണ് നേരത്തേ നിശ്ചയിച്ചിരുന്നത്.

വെരൂരില്‍ അടഞ്ഞുകിടന്ന വീട്ടില്‍നിന്ന് ആറുപവനും 30,000 രൂപയും മോഷ്ടിച്ചയാൾ അറസ്റ്റില്‍

ചങ്ങനാശേരി: അടഞ്ഞുകിടന്ന വീട്ടില്‍ കയറി ആറുപവന്‍ സ്വര്‍ണവും പണവും കവര്‍ന്നശേഷം കടന്നുകളഞ്ഞ പ്രതിയെ തമിഴ്നാട്ടില്‍നിന്നു ചങ്ങനാശേരി പോലീസ് അറസ്റ്റ് ചെയ്തു. തിരുവനന്തപുരം വെഞ്ഞാറമ്മൂട് മാക്കാകോണം പറമ്പുവിളാകത്ത്‍ ഷിബു സാമുവല്‍ (51) ആണ് പിടിയിലായത്. കഴിഞ്ഞ 11ന് രാത്രിയിലാണ് വെരൂര്‍ ഇന്‍ഡസ്ട്രിയല്‍ നഗര്‍ ഭാഗത്തുള്ള അടച്ചിട്ട വീട്ടില്‍നിന്നും ആറ് പവന്‍ സ്വര്‍ണാഭരണങ്ങളും 30000 രൂപയും 20000 രൂപ വില വരുന്ന സിസിടിവി ഹാര്‍ഡ് ഡിസ്‌കും മോഷണം പോയത്. മോഷണത്തിന് ശേഷം തമിഴ്‌നാട്ടിലേക്ക് കടന്ന പ്രതിയെ എസ്എച്ച്ഒ വിനോദ് കുമാറിന്‍റെ നേതൃത്വത്തിലുള്ള സംഘമാണ് തമിഴ്‌നാട്ടിലെ ഏര്‍വാടിയില്‍ നിന്നു പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. ഇയാൾക്ക് വെഞ്ഞാറമ്മൂട്, നെടുമങ്ങാട്, നെയ്യാറ്റിന്‍കര, തിരുവല്ലം, കിളിമാനൂര്‍, കുമളി, പെരുവന്താനം, ചടയമംഗലം പോലീസ് സ്റ്റേഷനുകളിലായി 35 ഓളം കേസുകളുണ്ട്. പകല്‍ സമയങ്ങളില്‍ ബൈക്കില്‍ കറങ്ങി നടന്ന് അടഞ്ഞു വീടുകള്‍ നോക്കി വയ്ക്കുകയും രാത്രിയിലെത്തി വീട് കുത്തിത്തുറന്ന് മോഷണം നടത്തി തമിഴ്നാട്ടിലേക്ക് കടക്കുകയുമാണ് പതിവ്. അടുത്തനാളുകളില്‍ നടന്ന മോഷണക്കേസുകളിൽ പ്രതിക്ക് പങ്കുണ്ടോയെന്നു പോലീസ് അന്വേഷിച്ചു വരുന്നു.

വെള്ളക്കെട്ടിലകപ്പെട്ട വയോധികയെ ഫയർ ഫോഴ്സ് രക്ഷപ്പെടുത്തി

ചങ്ങനാശേരി: വെള്ളത്താല്‍ ചുറ്റപ്പെട്ട വീട്ടില്‍നിന്ന് ആശുപത്രിയില്‍ പോകാന്‍ കഴിയാതെ കുടുങ്ങിയ വയോധികയെ ചങ്ങനാശേരി അഗ്‌നിരക്ഷാസേന രക്ഷപ്പെടുത്തി. ചങ്ങനാശേരി നഗരസഭ വാര്‍ഡ് 22-ാം വാര്‍ഡില്‍ പെരുന്ന ക്ഷേത്രത്തിനു സമീപം താമസിക്കുന്ന ഇന്ദിരയെയാണ് (73) രക്ഷപ്പെടുത്തിയത്. ഏറെനാളായി ചികിത്സയിലായിരുന്ന ഇവര്‍ക്ക് അസുഖം മൂർച്ഛിച്ചപ്പോള്‍ അഗ്‌നിരക്ഷാ സേനയുടെ സഹായം തേടുകയായിരുന്നു. അഗ്‌നിരക്ഷാ സേന സ്റ്റേഷന്‍ ഓഫീസര്‍ അനൂപ് രവീന്ദ്രന്‍റെ നേതൃത്വത്തില്‍ ഡിങ്കി ബോട്ട് എത്തിച്ചാണ് ഇന്ദിരയെ വെള്ളക്കെട്ടിനു പുറത്തെത്തിച്ചത്. തുടര്‍ന്ന് ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചതായി വാര്‍ഡ് കൗണ്‍സിലര്‍ മുരുകന്‍ പറഞ്ഞു. വെള്ളപ്പൊക്കം മൂലമുള്ള അടിയന്തര സാഹചര്യത്തില്‍ 0481-2420101 എന്ന നമ്പറില്‍ ഫയര്‍ഫോഴ്‌സിനെ വിളിക്കാവുന്നതാണ്.

വെള്ളപ്പൊക്കമുണ്ടായാല്‍ എങ്ങനെ രക്ഷപ്പെടും‍? ദുരിതബാധിതർ ആശങ്കയിൽ ‍

ചങ്ങനാശേരി: ബോട്ടുജെട്ടിയിലും ചങ്ങനാശേരി-ആലപ്പുഴ റോഡരികിലുള്ള എസി കനാലിലും പോള തിങ്ങി. ജലനിരപ്പുയരുന്നതിനനുസരിച്ച് പോളക്കെട്ടും ഉയരുന്നു. ആധുനികമായി നവീകരിച്ച എസി റോഡിന്‍റെ പല ഭാഗങ്ങളും വെള്ളം കയറിയ നിലയിലാണ്. വെള്ളപ്പൊക്കമുണ്ടായാല്‍ ഞങ്ങള്‍ എങ്ങനെ രക്ഷപ്പെടുമെന്നാണ് ദുരിതബാധിത മേഖലയിലെ ജനങ്ങള്‍ ചേദിക്കുന്നത്. ചങ്ങനാശേരിയുടെ പടിഞ്ഞാറന്‍ മേഖലകളിലെ നൂറുകണക്കിനു വീടുകളാണ് വെള്ളത്തിലായത്. ബോട്ടുജെട്ടിയിലും കിടങ്ങറ വരെയുള്ള ജലപാതയിലും പോളക്കൂട്ടം നിറഞ്ഞതുമൂലം ഇരുകരയിലും താമസിക്കുന്നവര്‍ക്ക് വലിയ ദുരിതമാണ്. പോള വളര്‍ന്നതു മൂലം ദുര്‍ഗന്ധവും വെള്ളത്തില്‍ ഇറങ്ങുമ്പോള്‍ ചൊറിച്ചിലും അനുഭവപ്പെടുന്നതായി ആളുകള്‍ പറയുന്നു. ജെട്ടിയുടെ പടിഞ്ഞാറുവശത്ത് താമസിക്കുന്ന പത്ത് കുടുംബങ്ങള്‍ വെള്ളപ്പൊക്കത്തിന്‍റെ കടുത്ത ദുരിതത്തിലാണ്. എസി കോളനിയിലും എസി റോഡിന്‍റെ വശത്തുള്ള വീടുകളിലും വെള്ളം കയറിയ നിലയിലാണ്. മനയ്ക്കച്ചിറ, കോമങ്കേരിച്ചിറ, പൂവം, വെട്ടിത്തുരുത്ത്, പറാല്‍, കുമരങ്കരി, വാഴപ്പള്ളി പുതുച്ചിറ, കുറിച്ചി ആനക്കുഴി, ചാണകക്കുഴി ഭാഗങ്ങളിലെ നൂറുകണക്കിനു വീടുകളും വെള്ളം കയറിയ നിലയിലാണ്. കഴിഞ്ഞവര്‍ഷം സംസ്ഥാന സര്‍ക്കാര്‍ ചങ്ങനാശേരി ജലപാതയിലെ പോള നീക്കം ചെയ്യുന്നതിന് 10 ലക്ഷം രൂപ റണ്ണിംഗ് കോണ്‍ട്രാക്ട് വ്യവസ്ഥയില്‍ അനുവദിച്ചിരുന്നു. ഈ കരാര്‍ പ്രകാരം രണ്ടു തവണ പോള നീക്കം ചെയ്തിരുന്നു. അവസാനമായി ഒരു മാസം മുന്‍പാണ് കരാറുകാരന്‍ പോള നീക്കം ചെയ്തത്. എന്നാല്‍, കഴിഞ്ഞദിവസം തണ്ണീര്‍മുക്കം ബണ്ട് തുറന്നതോടെ മറ്റ് സ്ഥലങ്ങളില്‍നിന്നു പോളക്കൂട്ടം ഒഴുകി വന്നതാണ് ഇപ്പോഴത്തെ പ്രതിസന്ധിക്കു കാരണമെന്ന് അധികൃതര്‍ ചൂണ്ടിക്കാട്ടുന്നു. എസി റോഡിൽ പലയിടത്തും വെള്ളക്കെട്ട് ആധുനിക രീതിയില്‍ ഉയർത്തി നിര്‍മിച്ച എസി റോഡിന്‍റെ പല ഭാഗങ്ങളിലും വെള്ളം കയറിയിട്ടുണ്ട്. പാറയ്ക്കല്‍ മുതല്‍ കിടങ്ങറ വരെയുള്ള ഭാഗത്താണ് റോഡിന്‍റെ വശത്ത് ദീര്‍ഘദൂരം വെള്ളം കയറിയിരിക്കുന്നത്. എസി റോഡരികിലെ പല വീടുകളിലും ജലനിരപ്പുയരുന്നതനുസരിച്ച് അടുപ്പുകളും കട്ടിലുകളും കട്ടപ്പുറത്ത് ഉയര്‍ത്തിക്കൊണ്ടിരിക്കുകയാണ്. വയോജനങ്ങളും രോഗികളും കുട്ടികളുമുള്ള വീടുകളിലെ ജീവിതം ദുരിതപൂര്‍ണമാണ്. പല വീടുകളിലും വൈറല്‍ പനി പടര്‍ന്നിട്ടുണ്ട്. പോള മൂലം വള്ളങ്ങളില്‍പ്പോലും സഞ്ചരിക്കാനാവാത്ത അവസ്ഥയാണെന്ന് ആളുകള്‍ ചൂണ്ടിക്കാട്ടുന്നു. കുട്ടനാടന്‍ പ്രദേശങ്ങളില്‍ വെള്ളപ്പൊക്കം ഉണ്ടാകുമ്പോള്‍ ചെറുവള്ളങ്ങളിലും ബോട്ടുകളിലുമാണ് ആളുകള്‍ ചങ്ങനാശേരിയിലുള്ള ബന്ധുവീടുകളിലേക്ക് എത്തിയിരുന്നത്. പോള നിറഞ്ഞതോടെ ചെറുവള്ളങ്ങള്‍ക്ക് നീങ്ങാനാവാത്ത അവസ്ഥയാണുള്ളത്. മുട്ടാര്‍, തായങ്കരി, എടത്വ റൂട്ടില്‍ കെഎസ്ആര്‍ടിസി സര്‍വീസുകള്‍ നിര്‍ത്തിവച്ചു. കാവാലം, കൃഷ്ണപുരം റൂട്ടില്‍ വൈകുന്നേരം ആറിനുശേഷം സര്‍വീസ് നടത്തുന്നില്ല. ജലനിരപ്പുയര്‍ന്നു കിടങ്ങറ കെസി പാലത്തിനടിയിലൂടെ ബോട്ട് ഗതാഗതം നിലച്ചു. ജലനിരപ്പുയര്‍ന്നതോടെ കിടങ്ങറ കെസി ജെട്ടി പാലത്തിനടിയിലൂടെയുള്ള ബോട്ടുഗതാഗതം നിലച്ചു. കഴിഞ്ഞ ചൊവ്വാഴ്ച-ആലപ്പുഴയ്ക്ക് പോയ ബോട്ട് തിരികെയെത്താന്‍ സാധിക്കാഞ്ഞതുമൂലം കെസി പാലത്തിന് അപ്പുറത്ത് കിടക്കുകയാണ്. ഇതോടെ ചങ്ങനാശേരിയില്‍നിന്ന് ഓപ്പറേറ്റ് ചെയ്തിരുന്ന ഏക ബോട്ട് സര്‍വീസും നിലച്ചു. മുന്‍കാലങ്ങളില്‍ വെള്ളപ്പൊക്ക സമയങ്ങളിൽ ചങ്ങനാശേരി ജെട്ടിയില്‍നിന്നു കിടങ്ങറ കെസി പാലത്തിന് സമീപം വരെ സ്‌പെഷല്‍ സര്‍വീസുകള്‍ നടത്താറുണ്ടായിരുന്നെങ്കിലും ഇത്തവണ നിലവിലുള്ള സര്‍വീസ് പോലും നടത്തുന്നില്ലെന്ന ആക്ഷേപമുണ്ട്. ഇതുമൂലം ജനങ്ങളുടെ യാത്രാദുരിതം ഇരട്ടിയാകുന്നു. കെസി പാലം ഉയര്‍ത്തി നിര്‍മിക്കാനുള്ള നടപടികളും നീളുകയാണ്. കിഴക്കന്‍വെള്ളത്തിന്‍റെ വരവിനു ശക്തിയേറി; അഞ്ച് ദുരിതാശ്വാസ ക്യാമ്പുകള്‍ തുറന്നു ചങ്ങനാശേരി: കനത്ത മഴയെത്തുടര്‍ന്ന് താലൂക്കില്‍ കൂടുതല്‍ ദുരിതാശ്വാസ ക്യാമ്പുകള്‍ തുറന്നു. കിഴക്കന്‍വെള്ളത്തിന്‍റെ വരവ് ശക്തി പ്രാപിച്ചതോടെ താഴ്ന്ന ഭാഗങ്ങളിലെ വീടുകള്‍ വെള്ളത്തില്‍ മുങ്ങി. പെരുന്ന ഗവൺമെന്‍റ് എല്‍പിഎസ്, വാഴപ്പള്ളി വിഎച്ച്എസ്എസ്, പുഴവാത് എല്‍പി സ്‌കൂള്‍, ടൗണ്‍ എല്‍പിഎസ്, പൂവം യുപി സ്‌കൂള്‍ എന്നിവിടങ്ങളിലാണ് പുതുതായി ക്യാമ്പ് ആരംഭിച്ചത്. നീലംപേരൂര്‍ പഞ്ചായത്തിലെ വാലടി പടിഞ്ഞാറ്, പയറ്റുപാക്ക, നാരകത്തറ എന്നിവിടങ്ങള്‍ വെള്ളത്തിനടിയിലായി. ഈര-വാലടി റോഡില്‍ വെള്ളം കയറി. ഈര ലൂര്‍ദ്മാതാ പള്ളി വെള്ളക്കെട്ടിലകപ്പെട്ടു. മാടപ്പള്ളി പഞ്ചായത്തിലെ കൊഴുപ്പക്കളം കുര്യാനിമറ്റം ഭാഗത്തെ പട്ടികജാതി-പിന്നോക്ക വിഭാഗത്തില്‍പ്പെട്ടവര്‍ താമസിക്കുന്ന 20 ഓളം വീടുകളില്‍ വെള്ളം കയറിയിട്ടുണ്ട്. മാന്നിലയില്‍ മതില്‍ ഇടിഞ്ഞുവീണ് രണ്ടു വീടുകള്‍ക്ക് നാശം സംഭവിച്ചു. മാന്നില തോണ്ടു പറമ്പില്‍ വര്‍ഗീസിന്‍റെ വീടിനു വീട്ടിലേക്ക് മുള്ളന്‍കുന്നില്‍ വിജയപ്പന്‍റെ മതിലാണ് ഇടിഞ്ഞുവീണത്. ഇവരുടെ വീടിന്‍റെ വര്‍ക്ക് ഏരിയ ഏതുസമയവും നിലം പതിക്കുന്ന അവസ്ഥയിലാണ്.

വിറകുപുരയിൽ കയറിയ പെരുന്പാമ്പിനെ പിടികൂടി

തലയോലപ്പറമ്പ്: വിറകുപുരയിൽ പെരുന്പാമ്പ് കയറിയത് വീട്ടുകാരെ ഭീതിയിലാക്കി. തലയോലപ്പറമ്പ് ചാലുവേലിൽ ഉദയന്‍റെ വീട്ടിലാണ് കഴിഞ്ഞ ദിവസം രാത്രി പെരുന്പാമ്പ് കയറിയത്. വീട്ടിലെ നായ നിർത്താതെ കുരയ്ക്കുന്നതു കേട്ട് വീട്ടുകാർ ജനലിലൂടെ നോക്കിയപ്പോഴാണ് മുറ്റത്തുനിന്ന് ഇഴഞ്ഞു വന്ന് പെരുമ്പാമ്പ് വിറക് കൂട്ടിയിട്ടിരിക്കുന്ന ഷെഡിലേക്കു കയറുന്നതു കണ്ടത്. തുടർന്ന് തലയോലപ്പറമ്പ് പോലീസിൽ വിവരം അറിയിക്കുകയായിരുന്നു. എസ്ഐ പി.എസ്. സുധീരനും സംഘവും സ്ഥലത്തെത്തി. തുടർന്ന് പാമ്പ് പിടിത്തത്തിൽ പരിശീലനം ലഭിച്ച സർപ്പഗ്രൂപ്പ് അംഗം വെള്ളൂർ സ്വദേശി ആൽബിൻ മാത്യു തോട്ടുപുറത്തെ വിവരം അറിയിക്കുകയുമായിരുന്നു. ആൽബിനെത്തി വിറകുകൾക്കിടയിൽ പതുങ്ങിയിരുന്ന പെരുംപാമ്പിനെ പിടികൂടി ചാക്കിലാക്കുകയായിരുന്നു. പിടികൂടിയ പാമ്പിനെ വനം വകുപ്പിനു കൈമാറും. മൂവാറ്റുപുഴയാറിൽ ജലനിരപ്പ് വർധിച്ചതോടെ പെരുംപാമ്പ് ഒഴുകിയെത്തിയതാണെന്നാണ് കരുതുന്നത്.

കടുത്തുരുത്തി മണ്ഡലത്തിന് ഏഴു കോടി: മോന്‍സ് ജോസഫ്

കടുത്തുരുത്തി: സംസ്ഥാന സര്‍ക്കാര്‍ നടപ്പാക്കിയ നവകേരള സദസിന്‍റെ ഭാഗമായി കേരളത്തിലെ 140 മണ്ഡലങ്ങളിലും ഏതാനും പദ്ധതികള്‍ക്ക് വികസനഫണ്ട് അനുവദിക്കാനുള്ള സംസ്ഥാന മന്ത്രിസഭയുടെ തീരുമാനപ്രകാരം കടുത്തുരുത്തി മണ്ഡലത്തിലേക്ക് ഏഴു കോടി രൂപ അനുവദിച്ചതായി മോന്‍സ് ജോസഫ് എംഎല്‍എ അറിയിച്ചു. കുറുപ്പന്തറ ജംഗ്ഷന്‍ വികസന ടാറിംഗിനും കുറുപ്പന്തറ-മണ്ണാറപ്പാറ-മള്ളിയൂര്‍ ജംഗ്ഷന്‍, കുറുപ്പന്തറ കടവ്-മാന്‍വെട്ടം-കല്ലറ പുത്തന്‍പള്ളി ജംഗ്ഷന്‍ ബിസി ഓവര്‍ലെ ടാറിഗും ഡ്രൈയിനേജ്-ഫുട്പാത്ത് നിര്‍മാണപ്രവര്‍ത്തനങ്ങളും ഉള്‍പ്പെടുത്തിയിട്ടുള്ള പ്രോജക്ടിന് നാലു കോടി രൂപയാണ് അനുവദിച്ചിട്ടുള്ളത്. കടുത്തുരുത്തി മണ്ഡലത്തിലെ വിവിധ ഗ്രാമീണ റോഡുകളുടെ പുനരുദ്ധാരണത്തിന് മൂന്നു കോടി രൂപ അനുവദിച്ചിട്ടുണ്ട്. ബന്ധപ്പെട്ട വകുപ്പുകളുമായി കൂടിയാലോചിച്ചു പ്രവര്‍ത്തി നടപ്പാക്കുന്നതിനുള്ള തുടര്‍നടപടികള്‍ സ്വീകരിക്കുമെന്ന് മോന്‍സ് ജോസഫ് എംഎല്‍എ അറിയിച്ചു.

മലിനജലം ഒഴുക്കിയെന്ന് പരാതി; വൈക്കത്ത് ഹോട്ടൽ അടച്ചുപൂട്ടി

വൈക്കം: പൊതുജനാരോഗ്യത്തിനു ഹാനീകരമായ രീതിയിൽ മലിനജലം ഒഴുക്കൽ, മാലിന്യ സംസ്കരണം എന്നിവ നടത്തിയ ഹോട്ടൽ നഗരസഭ അടപ്പിച്ചു. നഗരസഭ 22-ാം വാർഡിൽ വൈക്കം ആർടി ഓഫീസിനു സമീപത്തായി പ്രവർത്തിക്കുന്ന ബർക്കാസ് ഹോട്ടലിനെതിരേയാണ് നഗരസഭ നടപടി സ്വീകരിച്ചത്. ഹോട്ടലിൽ സ്ഥാപിച്ചിട്ടുള്ള ദ്രവമാലിന്യസംസ്കരണ ടാങ്കിൽനിന്നു മലിനജലം പുറത്തേക്ക് ഒഴുകി അസഹനീയമായ ദുർഗന്ധവും കൊതുകുശല്യവുമേറിയതിനെത്തുടർന്നാണ് ശാസ്ത്രീയമായ രീതിയിൽ ട്രീറ്റ്മെന്‍റ് പ്ലാന്‍റ് നിർമിച്ച് രേഖാമൂലം നഗരസഭയിൽ അറിയിക്കുന്നതുവരെ സ്ഥാപനം അടച്ചുപൂട്ടണമെന്ന് നിർദേശം നൽകുകയായിരുന്നു. വൈക്കം തോട്ടുചിറയിൽ സണ്ണി ഏബ്രഹാം നൽകിയ പരാതിയുടെ അടിസ്ഥാനത്തിൽ വാർഡ് കൗൺസിലർ നേരിട്ട് സ്ഥാപനത്തിലെത്തി ബോധ്യപ്പെട്ട ശേഷം സീനിയർ ഹെൽത്ത് ഇൻസ്പെക്ടർ സ്ഥല പരിശോധന നടത്തിയതിനെത്തുടർന്നാണ് ഹോട്ടൽ അടപ്പിച്ചത്.

മംഗലത്തുകരി പാടം വെള്ളത്തിൽ മുങ്ങി; 60 കുടുംബങ്ങൾ ദുരിതത്തിൽ

തലയാഴം: തലയാഴം പഞ്ചായത്തിലെ എട്ട്, ഒൻപത്, 10 വാർഡുകളുമായി ബന്ധപ്പെട്ട മംഗലത്തുകരി പാടശേഖരം പെയ്ത്തുവെള്ളം നിറഞ്ഞു മുങ്ങിയതിനെത്തുടർന്ന് 60 കുടുംബങ്ങൾ വെള്ളപ്പൊക്ക ദുരിതത്തിലായി. വീടുകളിൽ വെള്ളം കയറിയതോടെ വയോധികരായ രോഗികൾക്കും കുട്ടികൾക്കും പുറത്തിറങ്ങാനോ ഭക്ഷണം പാകം ചെയ്യാനോ പ്രാഥമികാവശ്യങ്ങൾ നടത്താനോ സാധിക്കുന്നില്ല. ടാങ്കുകളിൽവെള്ളം നിറഞ്ഞ് കക്കൂസ് മാലിന്യങ്ങൾ പ്രദേശത്തെ വെള്ളത്തിൽ കലർന്നത് രോഗഭീതി പരത്തുകയാണ്. മഴയുടെ തുടക്കത്തിൽ പാടശേഖരത്തിലെ മോട്ടോർ പ്രവർത്തിപ്പിച്ച് വെള്ളം പമ്പ് ചെയ്തിരുന്നെങ്കിൽ വെള്ളപ്പൊക്ക ദുരിതം ഇത്രയധികം നേരിടേണ്ടിവരില്ലായിരുന്നെന്ന് പ്രദേശവാസികൾ പറയുന്നു. 60 കുടുംബങ്ങളിൽ 40 കുടുംബം പട്ടികജാതി വിഭാഗത്തിൽപ്പെട്ടവരാണ്. പഞ്ചായത്ത്, കൃഷി വകുപ്പ് അധികൃതരെ തങ്ങളുടെ ദുരവസ്ഥ ബോധ്യപ്പെടുത്തിയിട്ടും പരിഹാരം ഉണ്ടായില്ലെന്നാണ് ആരോപണം.

കടുത്തുരുത്തിയുടെ പടിഞ്ഞാറന്‍ മേഖലയും വെള്ളപ്പൊക്ക ഭീഷണിയില്‍

കടുത്തുരുത്തി: കടുത്തുരുത്തിയുടെ പടിഞ്ഞാറന്‍ മേഖലയിലും വീടുകളില്‍ വെള്ളം കയറി. ആപ്പാഞ്ചിറ, മുക്കം, കാന്താരിക്കടവ്, മാന്നാര്‍ മിച്ചഭൂമി എന്നിവിടങ്ങളിലെല്ലാം വീടുകളില്‍ വെള്ളം കയറി. എഴുമാന്തുരുത്ത് ഭാഗത്തും താഴ്ന്ന പ്രദേശങ്ങളിലെ റോഡുകളിലും വീടുകളിലും വെള്ളം കയറിയിട്ടുണ്ട്. ആയാംകുടി-ആപ്പാഞ്ചിറ റോഡില്‍ മുക്കം മുതല്‍ കാന്താരിക്കടവ് വരേയുള്ള ഭാഗത്ത് വെള്ളം കയറിയതിനാല്‍ ഇതുവഴിയുള്ള ഗതാഗതം തടസപ്പെട്ടു. എഴുമാന്തുരുത്തില്‍ തുരുത്ത്, പുലിത്തുരുത്ത്, മാത്താംകരി, പത്തിപ്പാടം പ്രദേശങ്ങളിലെ നിരവധി വീടുകളില്‍ വെള്ളം കയറിയിട്ടുണ്ട്. എഴുമാന്തുരുത്ത് ഗവണ്‍മെന്‍റ് യുപി സ്‌കൂളില്‍ ദുരിതാശ്വാസ ക്യാമ്പ് തുടങ്ങി. കൊല്ലങ്കേരി ഭാഗത്തുള്ള 12 കുടുംബങ്ങള്‍ ക്യാമ്പിലുണ്ട്. കടുത്തുരുത്തി വലിയതോടും ചുള്ളിത്തോടും ആപ്പാഞ്ചിറ തോടും നിറഞ്ഞൊഴുകുകയാണ്. ആപ്പുഴ-കടുത്തുരുത്തി റോഡിലും വെള്ളം കയറിയിട്ടുണ്ട്. കടുത്തുരുത്തി-അറുന്നൂറ്റിമംഗലം റോഡില്‍ കൈലാസപുരം റോഡില്‍ വെള്ളം കയറിയതിനെ തുടര്‍ന്ന് വാഹന ഗാതാഗതം ഭാഗികമാണ്. ചെറുവാഹനങ്ങള്‍ക്ക് ഇതുവഴി സഞ്ചരിക്കാനാകില്ല. ബസുകള്‍ ഉള്‍പെടെയുള്ള വലിയ വാഹനങ്ങള്‍ക്ക് മാത്രമാണ് കടന്നുപോകാനാകുന്നത്.

കല്ലറ മുണ്ടാറില്‍ 150 വീടുകളില്‍ വെള്ളം കയറി; വ്യാപക കൃഷിനാശം

കല്ലറ: കല്ലറ പഞ്ചായത്തിലെ താഴ്ന്ന പ്രദേശങ്ങള്‍ വെള്ളപ്പൊക്ക ഭീഷണിയില്‍. മുണ്ടാര്‍, മണിയന്തുരുത്ത് മേഖലകളില്‍ വീടുകളില്‍ വെള്ളം കയറി. മഴയും വെള്ളപ്പൊക്കവും ശക്തമായാല്‍ കല്ലറ എസ്എംവി എന്‍എസ്എസ് എച്ച്എസ്എസ് സ്‌കൂളില്‍ ദുരിതാശ്വാസ ക്യാമ്പ് തുറക്കാന്‍ പഞ്ചായത്ത് കമ്മിറ്റി യോഗം തീരുമാനിച്ചിട്ടുണ്ട്. മുണ്ടാറില്‍ 150 വീടുകളില്‍ വെള്ളം കയറിയിട്ടുണ്ട്. പലരും ബന്ധുവീടുകളിലേക്കടക്കം താമസം മാറിയിട്ടുമുണ്ട്. വര്‍ഷ കൃഷിക്കായി ഒരുക്കിയിട്ടിരുന്ന മുണ്ടാറിലെ ഒന്നാം നമ്പര്‍ ബ്ലോക്ക് പാടശേഖരത്താണ് ഇന്നലെ പുലര്‍ച്ചെ മടവീഴ്ചയുണ്ടായത്. കരിയാറില്‍ ജലനിരപ്പ് വര്‍ധിച്ചതോടെ പെട്ടിയും പറയും തള്ളിപ്പോയി മട വീഴുകയായിരുന്നു. 114 ഏക്കര്‍ വരുന്ന പാടത്തെ 60 എക്കറിലെ നെല്‍ക്കൃഷി നേരത്തേ വിളവെടുത്തിരുന്നു. 40 ഏക്കറിലെ കപ്പയും പത്ത് ഏക്കറിലെ ഏത്തവാഴക്കൃഷിയും ഇവിടെ പൂര്‍ണമായും നശിച്ചു. 55,000 ചുവട് കപ്പകൃഷി ദിവസങ്ങളായി പെയ്ത മഴയെത്തുടര്‍ന്ന് വെള്ളത്തിലായിരുന്നു. ഒരു ചുവട്ടില്‍ എട്ടു മുതല്‍ 12 കിലോ വരെ തൂക്കം വരുന്ന 7,200 ചുവട് കപ്പകൃഷി നശിച്ചതായി മുണ്ടാറിലെ കപ്പ കര്‍ഷകനായ ഷാജിഭവനില്‍ എ.പി. ഷാജി പറഞ്ഞു. ലക്ഷങ്ങളുടെ നഷ്ടമാണ് കര്‍ഷകര്‍ക്കുണ്ടായിരിക്കുന്നതെന്നും ഷാജി പറയുന്നു. വീട്ടുപകരണങ്ങളടക്കം പലരും വെള്ളം കയറി നശിക്കുമെന്ന് കരുതി വീടിന്‍റെ മുകള്‍ ഭാഗത്തേക്ക് മാറ്റി. ആട്, പശു തുടങ്ങിയ വളര്‍ത്തുമൃഗങ്ങളും കോഴി, താറാവ് എന്നിവയും ഉള്ളതിനാല്‍ ഇവയെ ഉപേക്ഷിച്ചു പലര്‍ക്കും ദുരിതാശ്വാസ ക്യാമ്പിലേക്കു മാറാന്‍ കഴിയാത്ത സാഹചര്യമാണ്.

വൈക്കത്ത് താഴ്ന്ന പ്രദേശങ്ങൾ വെള്ളത്തിൽ

തയോലപ്പറമ്പ്: താഴ്ന്ന പ്രദേശങ്ങളിലെ വീടുകളിൽ വെള്ളം കയറിയതിനെത്തുടർന്ന് തലയോലപ്പറമ്പിൽ ദുരിതാശ്വാസ ക്യാമ്പ് തുടങ്ങി. തലയോലപ്പറമ്പ് എ.ജെ. ജോൺ മെമ്മോറിയൽ ഗേൾസ് സ്കൂളിലാണ് ക്യാമ്പ് ആരംഭിച്ചത്. മൂന്നു കുടുംബങ്ങളിൽനിന്നായി ഏഴു പേരാണ് ക്യാമ്പിൽ കഴിയുന്നത്. തുടർച്ചയായി പെയ്യുന്ന മഴയും മൂവാറ്റുപുഴയാറിലെ ജലനിരപ്പ് ഉയർന്നതിനെയും തുടർന്ന് തലയോലപ്പറമ്പ് പഞ്ചായത്തിലെ കോരിക്കൽ, പഴമ്പെട്ടി, തേവലക്കാട് പ്രദേശത്തെ നിരവധി വീടുകളിൽ വെള്ളം കയറി. താഴ്ന്ന പ്രദേശങ്ങളിലെ വീടുകളിലും ഉൾപ്രദേശത്തെ റോഡുകളിലും വെള്ളം കയറിയതോടെ ചില പ്രദേശങ്ങൾ ഒറ്റപ്പെട്ട നിലയിലായി. വീണ്ടും ജലനിരപ്പ് ഉയർന്നാൽ കൂടുതൽ പേർ ക്യാമ്പുകളിലെത്തും. മൂവാറ്റുപുഴയാറിന്‍റെ കൈവഴികൾ വിവിധ സ്‌ഥലങ്ങളിൽ കരകവിയുന്നത് പ്രദേശവാസികളെ ആശങ്കയിലാഴ്ത്തിയിട്ടുണ്ട്. താലൂക്കിന്‍റെ വിവിധ പ്രദേശങ്ങളിലായി 250ലധികം വീടുകൾക്കുള്ളിൽ വെള്ളം കയറി. നൂറുകണക്കിന് വീടുകൾ വെള്ളക്കെട്ടിലാണ്. വീടുകളിൽ വെള്ളം കയറിയതോടെ ഉദയനാപുരം പഞ്ചായത്തിൽ വ്യാഴാഴ്ച രാത്രിയോടെ ദുരിതാശ്വാസ ക്യാമ്പ് തുടങ്ങിയിരുന്നു. വല്ലകം സെന്‍റ് മേരീസ് സ്കൂളിലാണ് ക്യാമ്പ് ആരംഭിച്ചത്. ഇന്നലെ വൈകുന്നേരത്തോടെ തോട്ടകം ഗവൺമെന്‍റ് എൽപിഎസിൽ ക്യാമ്പ് തുടങ്ങി. മറവൻതുരുത്ത്, വെള്ളൂർ, ചെമ്പ് പഞ്ചായത്ത് പ്രദേശങ്ങളിൽ നിരവധി വീടുകളിൽ വെള്ളം കയറി. ചില കുടുംബങ്ങൾ വീടുകളിൽ വെള്ളം കയറിയതോടെ ബന്ധുവീടുകളിലേക്ക് താമസം മാറ്റി. വീടുകളിൽ വെള്ളം കയറിയെങ്കിലും പലരും ദുരിതാശ്വാസക്യാമ്പിലേക്കു മാറാൻ വിമുഖത കാട്ടുന്നതിനാലാണ് പല സ്ഥലങ്ങളിലും ക്യാമ്പ് തുടങ്ങാൻ കഴിയാത്തത്.

യുവാക്കളുടെ വേര്‍പാട് പാറയ്ക്കല്‍ കടവിന് തീരാനോവായി

കൊല്ലാട്: വര്‍ഷങ്ങള്‍ക്ക് മുന്പ് വള്ളവുമായി കാറില്‍ ഉല്ലാസത്തിനെത്തിയ കുടുംബത്തിലെ രണ്ട് ജീവനുകള്‍ പൊലിഞ്ഞ ഓര്‍മ മായുംമുന്പേയെത്തിയ പരിസരവാസികളായ രണ്ട് യുവാക്കളുടെ വേര്‍പാട് പാറയ്ക്കല്‍ കടവിന് തീരാനോവായി. അന്ന് റോഡിന്‍റെ അപാകതയില്‍ കവിഞ്ഞൊഴുകിയ വെള്ളത്തിന്‍റെ ഒഴുക്കില്‍പ്പെട്ടാണ് അപകടമുണ്ടായത്. പിന്നീട് റോഡ് ഉയര്‍ത്തി വെള്ളം കയറാത്ത നിലയിലാക്കി. ഇതോടെ റോഡിന് കുറുകെയുള്ള കുത്തൊഴുക്ക് നിലച്ചു. ഇതോടെ പ്രദേശത്തെ അപകടാവസ്ഥയ്ക്ക് അറുതിയായിരുന്നു. ഇന്നലെ പാറയ്ക്കല്‍ കടവിലെ പാടശേഖരത്തില്‍ ഉണ്ടായ അപകടത്തില്‍ രണ്ടു പേരുടെ മരണത്തിനിടയാക്കിയത് കനത്ത മഴയ കാറ്റും. കാറ്റുപിടിച്ചാല്‍ നിയന്ത്രണം തെറ്റി മറിയാന്‍ ഏറെ സാധ്യതയുള്ള ഫൈബര്‍ വള്ളത്തിലാണ് സുഹൃത്തുക്കൾ മൂന്നുപേർ മീന്‍ പിടിക്കാനായി പോയത്. വെള്ളത്തിലുള്ള പരിചയക്കുറവും ഇവർക്ക് വിനയായി. അപകടവിവരം നാട്ടുകാരുടെ ശ്രദ്ധയില്‍പ്പെട്ടത് വളരെ വൈകിയാണ്. എപ്പോഴും പരിസരവാസികളെയും ഉല്ലാസത്തിനെത്തുന്നവരെയും കൊണ്ടുനിറയുന്ന പ്രദേശം മഴയും കാറ്റും മൂലം ഇന്നലെ വിജനമായിരുന്നു. കരയില്‍നിന്ന് ചൂണ്ടയിടുന്നവര്‍ അങ്ങിങ്ങായി ഉണ്ടായിരുന്നുവെങ്കിലും അവരും അപകടം കണ്ടില്ല. അപകടം നാട്ടുകാരുടെ ശ്രദ്ധയില്‍ പ്പെട്ടിരുന്നെങ്കില്‍ ഇരുവരുടെ ജീവന്‍ രക്ഷിക്കാമായിരുന്നു. നീന്തലറിയുന്ന ജോഷി കരയ്‌ക്കെത്തി മറ്റുള്ളവരെ വിവരം അറിയിച്ചപ്പോഴേക്കും ഇരുവരും മരണത്തിനു കീഴടങ്ങുകയായിരുന്നു.

തോട് ശുചീകരിക്കാത്തതിൽ പ്രതിഷേധം ശക്തം

അതിരമ്പുഴ: പെണ്ണാർ തോട്ടിലെ പോളയും പായലും നീക്കം ചെയ്യാത്ത അതിരമ്പുഴ പഞ്ചായത്തിന്‍റെ നിലപാടിനെതിരേ വൻ പ്രതിഷേധം. ഒഴുക്കു നിലച്ചതിനെത്തുടർന്ന് തോട് കരകവിഞ്ഞ് വീടുകളിൽ വെള്ളം കയറി. മുപ്പതിലേറെ വീട്ടുകാർ ദുരിതപ്പെടുന്നത് ദീപിക ഇന്നലെ വാർത്തയാക്കിയിരുന്നു. പഞ്ചായത്ത് ഭരണസമിതിയുടെ ജനവിരുധ നിലപാടിനെതിരേ ഇടതുപക്ഷ ജനാധിപത്യ മുന്നണിയുടെ നേതൃത്വത്തിൽ പഞ്ചായത്ത് പടിക്കൽ ഇന്നലെ പ്രതിഷേധ സമരം നടത്തി. പോളയും പായലും നീക്കം ചെയ്യാത്തതിന്‍റെ ഫലമായി പെണ്ണാർ തോട്ടിലെ ജലം ഒഴുക്കു തടസപ്പെട്ട് സമീപപ്രദേശങ്ങളിലെ വീടുകളിൽ വെള്ളം കയറിയതിനെത്തുടർന്ന് കഷ്ടത്തിലായ ജനങ്ങളുടെ ദുരവസ്ഥയ്ക്കു കാരണമായത് പഞ്ചായത്ത് ഭരണസമിതിയുടെ കെടുകാര്യസ്ഥതയും പാവപ്പെട്ട ആളുകളെ അവഗണിക്കുന്ന നിലപാടും മൂലമാണെന്ന് എൽഡിഎഫ് നേതാക്കൾ ആരോപിച്ചു. കേരള കോൺഗ്രസ് എം നിയോജക മണ്ഡലം പ്രസിഡന്‍റ് ജോസ് ഇടവഴിക്കൽ പ്രതിഷേധ സമരം ഉദ്ഘാടനം ചെയ്തു. തുടർന്ന് ചന്തക്കവലയിലേക്കു പ്രതിഷേധ പ്രകടനവും പൊതുസമ്മേളനവും നടത്തി. സിപിഎം ലോക്കൽ സെക്രട്ടറി രതീഷ് രത്നാകരൻ അധ്യക്ഷത വഹിച്ചു. ജോഷി ഇലഞ്ഞിയിൽ, പി.എൻ. സാബു, പി. ശശി ബൈജു മാതിരമ്പുഴ, ബെന്നി തടത്തിൽ, എൻ.എ. മാത്യു, ജോസ് അഞ്ജലി, ബേബിനാസ് അജാസ്, സിനി ജോർജ് കുളംകുത്തിയിൽ, ജോയ് തോട്ടനാനിയിൽ, അമ്പിളി പ്രദീപ് തുടങ്ങിയവർ പ്രസംഗിച്ചു. ഇടതുപക്ഷ ജനാധിപത്യ മുന്നണിയുടെ പ്രവർത്തകർ മടാവേലി പാലത്തിനു സമീപം ജെസിബി ഉപയോഗിച്ച് പെണ്ണാർ തോട്ടിലെ പോള ശ്രമദാനമായി നീക്കം ചെയ്യുന്ന പ്രവർത്തികൾ ആരംഭിച്ചു. എൽഡിഎഫ് നേതാക്കളായ ജിൻസ് കുര്യൻ, മണി അമ്മഞ്ചേരി, ഷാജിമോൻ, ജിക്കു മാത്യു, വിഷ്ണു ബാബു, ടെസിൻ ബെന്നി, സാബു ജോർജ്, കെ.ആർ. ജീമോൻ, സുരേഷ് ബാബു തുടങ്ങിയവർ നേതൃത്വം നൽകി.

പെണ്ണാർ തോട് കവിഞ്ഞൊഴുകി മീൻകുളം തകർന്നു

അതിരമ്പുഴ : പോളയും പായലും നിറഞ്ഞ് ഒഴുക്കു നിലച്ച പെണ്ണാർ തോട് കവിഞ്ഞൊഴുകിയതിനെത്തുടർന്ന് മീൻകുളം തകർന്ന് വൻ നഷ്ടം. അതിരമ്പുഴ പഞ്ചായത്ത് 20-ാം വാർഡിൽ കുറ്റിയേൽ കവലക്കു സമീപം പെണ്ണാർ തോടിനോടു ചേർന്ന് മീൻകൃഷി നടത്തുന്ന നീണ്ടൂർ സ്വദേശി സന്തോഷ് ചെത്തിക്കുഴിയുടെ ഉടമസ്ഥതയിലുള്ള മീൻകുളമാണ് തകർന്നത്. രണ്ട് ഏക്കർ വിസ്തൃതിയിലുള്ള കുളത്തിൽ നിക്ഷേപിച്ചിരുന്ന മുഴുവൻ മീനുകളും നഷ്ടപ്പെട്ടു. വൻ നഷ്ടമാണ് സംഭവിച്ചത്. പെണ്ണാർ തോടിനെ ആശ്രയിച്ച് മത്സ്യബന്ധനം നടത്തി ഉപജീവനം കഴിച്ചിരുന്നവരും ദുരിതത്തിലായി. അഞ്ചു വർഷമായി തോട് ശുചിയാക്കാതെ ഒഴുക്കു നിലയ്ക്കുകയും മാലിന്യങ്ങൾ നിറയുകയും ചെയ്തതോടെ മത്സ്യബന്ധനം നടത്താനാകുന്നില്ലെന്നും തങ്ങളുടെ ഉപജീവനമാർഗം അടഞ്ഞെന്നും ശ്രീകണ്ഠമംഗലം കുറ്റിയേൽ മോഹനൻ, രാജൻ എന്നിവർ പറഞ്ഞു.

തദ്ദേശ തെരഞ്ഞെടുപ്പിനു മുന്നോടിയായി കോട്ടയം

കോട്ടയം: തദ്ദേശ തെരഞ്ഞെടുപ്പിനു മുന്നോടിയായി കോട്ടയം നഗരസഭയിലെ വാര്‍ഡുകള്‍ പുനര്‍ വിഭജിച്ചു. അന്തിമ വിജ്ഞാപന പ്രകാരം നഗരസഭയിലെ വാര്‍ഡുകളും നമ്പറുകളും: ആകെ വാര്‍ഡുകള്‍-53 ഒന്ന്-ഗാന്ധിനഗര്‍ നോര്‍ത്ത്, രണ്ട്-സംക്രാന്തി, മൂന്ന്-പാറമ്പുഴ, നാല്-പള്ളിപ്പുറം, അഞ്ച്-നട്ടാശേരി, ആറ്-പുത്തേട്ട്, ഏഴ്-കുമാരനല്ലൂര്‍ ടൗണ്‍, എട്ട്-എസ്എച്ച് മൗണ്ട്, ഒമ്പത്-പുല്ലരിക്കുന്ന്, 10-മള്ളൂശേരി, 11-നാഗമ്പടം നോര്‍ത്ത്, 13-മുളളന്‍കുഴി, 14-മൗണ്ട് കാര്‍മല്‍, 15-കഞ്ഞിക്കുഴി, 16-ദേവലോകം, 17-മുട്ടമ്പലം, 18-കളക്ടറേറ്റ്, 19-ഈരയില്‍കടവ്, 20-കത്തീഡ്രല്‍, 21-കോടിമത നോര്‍ത്ത്, 22-ട്രാവന്‍കൂര്‍ സിമന്‍റ്സ്, 23-മുപ്പായിക്കാട്, 24-മൂലവട്ടം, 25-കാക്കൂര്‍ മുത്തന്‍മാലി, 26-ചെട്ടിക്കുന്ന്, 27-പവര്‍ഹൗസ്, 28-പന്നിമറ്റം, 29-ചിങ്ങവനം, 30-പാലമൂട്, 31-പുത്തന്‍തോട്, 32-മാവിളങ്ങ്, 33-പള്ളം, 34-കണ്ണാടിക്കടവ്, 35-മറിയപ്പളളി, 36-തുറമുഖം, 37-കാഞ്ഞിരം, 38-പാണംപടി, 39-ഇല്ലിക്കല്‍, 40-പുളിനാക്കല്‍, 41-പള്ളിക്കോണം, 42-താഴത്തങ്ങാടി, 43-പുത്തനങ്ങാടി, 44-തിരുവാതുക്കല്‍, 45-16ല്‍ചിറ, 46-കാരാപ്പുഴ, 47-മിനി സിവില്‍ സ്റ്റേഷന്‍, 48-തിരുനക്കര, 49-പഴയ സെമിനാരി, 50-വാരിശേരി, 51-തൂത്തൂട്ടി, 52-ടെന്പിള്‍ വാര്‍ഡ്, 53-ഗാന്ധിനഗര്‍ സൗത്ത്. വാര്‍ഡുകള്‍ മാറിയവര്‍ അറിയാന്‍ നഗരസഭ വാര്‍ഡ് പുനര്‍നിര്‍ണയത്തിന്‍റെ ഭാഗമായി പുതിയ വാര്‍ഡുകൡലേക്ക് മാറേണ്ടിവരുന്നവര്‍ ഉടന്‍ ഒന്നും ചെയ്യേണ്ടതില്ല. വീടുകളുടെ ഡേറ്റ കംപ്യൂട്ടര്‍ അധിഷ്ഠിതമായി ഉപയോഗിച്ചിരിക്കുന്നതിനാല്‍ പുതിയ നമ്പറിലേക്കു സ്വഭാവികമായി മാറുമെന്നാണ് അധികൃതര്‍ പറയുന്നത്. കരം അടയ്ക്കുന്നതിന് ഇപ്പോഴുള്ള നമ്പര്‍ ഉപയോഗിക്കാം. വിലാസത്തില്‍ അടക്കം വാര്‍ഡ് മാറ്റം പ്രതിഫലിക്കില്ല. പുതിയ വീട്ടുനമ്പര്‍ വീടുകളില്‍ പിന്നീട് പതിപ്പിക്കും.

മെഡി. കോളജിലെ നിർമാണപ്രവർത്തനങ്ങൾ വിലയിരുത്തി മന്ത്രിമാരായ വീണയും വാസവനും

കോട്ടയം: മെഡിക്കൽ കോളജ് ആശുപത്രിയിൽ നടന്നുവരുന്ന നിർമാണ പ്രവർത്തനങ്ങളുടെ പുരോഗതി മന്ത്രിമാരായ വി.എൻ. വാസവനും വീണാ ജോർജും പങ്കെടുത്ത യോഗം വിലയിരുത്തി. സൂപ്പർ സ്പെഷാലിറ്റി ബ്ലോക്ക്, സർജിക്കൽ ബ്ലോക്ക്, കാർഡിയോളജി ബ്ലോക്ക് തുടങ്ങിയവയുടെ നിർമാണ പുരോഗതിയും വിലയിരുത്തി. നിർമാണ പ്രവർത്തനങ്ങൾ സമയബന്ധിതമായി പൂർത്തിയാക്കാൻ കോട്ടയം മെഡിക്കൽ കോളജ് കോൺഫറൻസ് ഹാളിൽ ചേർന്ന യോഗത്തിൽ മന്ത്രിമാർ ബന്ധപ്പെട്ട ഉദ്യോഗസ്ഥർക്കും കരാറുകാർക്കും നിർദേശം നൽകി. സൂപ്പർ സ്പെഷാലിറ്റി ബ്ലോക്കിന്‍റെ നിർമാണം ഡിസംബർ 30നകം പൂർത്തിയാക്കണമെന്നും നിർദേശിച്ചു. നിർമാണം പൂർത്തിയായി വരുന്ന സർജിക്കൽ ബ്ലോക്ക്, കാർഡിയോളജി ബ്ലോക്ക് എന്നിവ യോഗ ശേഷം മന്ത്രിമാർ സന്ദർശിച്ചു. ജില്ലാ കളക്ടർ ജോൺ വി. സാമുവൽ, ആരോഗ്യ വകുപ്പ് ജോയിന്‍റ് ഡയറക്ടർ ഡോ. കെ.വി. വിശ്വനാഥൻ, ജില്ലാ മെഡിക്കൽ ഓഫീസർ ഡോ.എൻ. പ്രിയ, മെഡിക്കൽ കോളജ് ആശുപത്രി സൂപ്രണ്ട് ഡോ.ടി.കെ. ജയകുമാർ, മെഡിക്കൽ കോളജ് പ്രിൻസിപ്പൽ ഡോ. വർഗീസ് പി. പുന്നൂസ് എന്നിവരും വിവിധ വകുപ്പ് ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.

പടിഞ്ഞാറൻ പ്രദേശത്ത് വെള്ളം കയറിത്തുടങ്ങി

ഗാന്ധിനഗർ: കനത്ത മഴയിൽ ജില്ലയുടെ പടിഞ്ഞാറൻ പ്രദേശങ്ങളിൽ വെള്ളം കയറി ജനജീവിതം ദുരിതത്തിലായി. അയ്മനം , പരിപ്പ് തൊള്ളായിരം, ആർപ്പൂക്കര തുടങ്ങിയ പ്രദേശങ്ങളിലാണ് വീടുകളിലും സ്ഥാപനങ്ങളിലും വെള്ളം കയറിയത്. മീനച്ചിലാറിലും കൈവഴികളിലും പുഴകളിലും ജലനിരപ്പ് ഉയർന്നതോടെയാണ് വീടുകളിൽ വെള്ളം കയറിത്തുടങ്ങിയത്. പല കുടുംബഗങ്ങളും ദുരിതാശ്വാസ ക്യാമ്പുകളെയും ബന്ധുവീടുകളെയും ആശ്രയിച്ചിരിക്കുകയാണ്. കൈപ്പുഴയിൽ ശക്തമായ കാറ്റിലും മഴയിലും വീടിനു മുകളിൽ ഒരേ സമയം രണ്ടു തേക്കുമരം വീണു വീടിനു കേടുപാട് സംഭവിച്ചു.

പടിഞ്ഞാറൻ പ്രദേശങ്ങൾ ദുരിതക്കയത്തിൽ : കുമരകത്തും തിരുവാർപ്പിലും അയ്മനത്തും കൂടുതൽ ദുരിതാശ്വാസ ക്യാമ്പുകൾ

കുമരകം: ജില്ലയുടെ പടിഞ്ഞാറൻ പ്രദേശങ്ങൾ വെള്ളപ്പൊക്കത്തെത്തുടർന്ന് ദുരിതക്കയത്തിൽ മുങ്ങി. താഴ്ന്നപ്രദേശങ്ങളിലെ വീടുകളിലും റോഡുകളിലും വെള്ളം കയറിയതോടെ പ്രദേശവാസികൾ പ്രതിസന്ധിയിലായി. തിരുവാർപ്പ്, അയ്മനം, കുമരകം പഞ്ചായത്തുകളിൽ കൂടുതൽ ദുരിതാശ്വാസ ക്യാമ്പുകൾ പ്രവർത്തനം ആരംഭിച്ചു. ആവശ്യത്തിന് ദുരിതാശ്വാസ ക്യാമ്പുകൾ തുടങ്ങാൻ സുരക്ഷിതമായ സ്ഥലങ്ങളും സ്ഥാപനങ്ങളും ലഭ്യമല്ലാത്ത സാഹചര്യവും നിലനിൽക്കുന്നു. 2018നു ശേഷം ദുരിതാശ്വാസക്യാമ്പുകൾ പ്രവർത്തിപ്പിക്കേണ്ടി വരാത്ത കുമരകം പഞ്ചായത്തിൽ ഇക്കുറി രണ്ടു ദുരിതാശ്വാസ ക്യാമ്പുകൾ ഇന്നലെ ആരംഭിച്ചു. കവണാറ്റിൻകര എബിഎം യുപി സ്കൂളിൽ ആരംഭിച്ച ക്യാമ്പിൽ ആറു കുടുംബങ്ങളിൽനിന്നുള്ള 12 പേർ എത്തിയിട്ടുണ്ട്. കുമരകം ഗവ. ഹൈസ്കൂളിൽ പ്രവർത്തിക്കുന്ന ക്യാമ്പിൽ രണ്ടു കുടുംബങ്ങളിൽപ്പെട്ട ആറു പേർ താമസിക്കുന്നു. കുമരകം പഞ്ചായത്തിലെ ഒന്ന്, രണ്ട്,മൂന്ന്,, അഞ്ച്, ആറ് വാർഡുകളിൽപ്പെട്ടവരെയാണ് ദുരിതാശ്വാസ ക്യാമ്പുകളിലേക്കു മാറ്റിയത്. തിരുവാർപ്പ് പഞ്ചായത്തിലും ജലനിരപ്പിലെ വർധന ജനജീവിതത്തെ സാരമായി ബാധിച്ചിട്ടുണ്ട്. ഇവിടെ മൂന്നു ദുരിതാശ്വാസ ക്യാമ്പുകൾ ആരംഭിച്ചു. തിരുവാർപ്പ് യുപി സ്കൂൾ, മർത്തശ് പള്ളി ഹാൾ, കാഞ്ഞിരം എസ്എൻഡിപി സ്കൂൾ എന്നിവിടങ്ങളിലെ ദുരിതാശ്വാസ ക്യാമ്പുകളിലായി 58 പേർ വസിക്കുന്നു. അയ്മനത്തും മൂന്നു ക്യാമ്പികളിലായി 56 ആളുകൾക്ക് താമസസൗകര്യം ഒരുക്കിയിരിക്കുന്നു. പരിപ്പ് ഹൈസ്കൂൾ, സിഎംഎസ് എൽപിഎസ് ഒളശ, സിജെഎം യുപി സ്കൂൾ കല്ലുമട എന്നിവിടങ്ങളിലാണ് ദുരിതാശ്വാസ ക്യാമ്പുകൾ പ്രവർത്തിക്കുന്നത്. വിരിപ്പുകൃഷിക്കായി നിലം ഒരുക്കിക്കൊണ്ടിരുന്ന പല പാടശേഖരങ്ങളിലും മടവീണു. പുറംബണ്ടിലൂടെ പ്രളയജലം ശക്തമായി കവിഞ്ഞൊഴുകി ബണ്ടുകൾ തകർന്നു . റോഡുകൾ വെള്ളത്തിലായതോടെ വാഹന ഗതാഗതം തടസപ്പെട്ടിരിക്കുകയാണ്. ഏറ്റവും കൂടുതൽ വെള്ളം കയറിക്കിടക്കുന്നത് കോട്ടയം - കുമരകം റോഡിലാണ്.

കാട്ടുപന്നിശല്യം: തോക്കെടുത്ത്‌ മുണ്ടക്കയം പഞ്ചായത്ത്

മുണ്ടക്കയം: കാട്ടുപന്നികളെ പിടികൂടാൻ നടപടി ആരംഭിച്ച് മുണ്ടക്കയം പഞ്ചായത്തും. മുണ്ടക്കയം ടൗണിന്‍റെ രണ്ടു കിലോമീറ്റർ മാത്രം ദൂരത്തിൽ പൈങ്ങന, മൂന്നാംമൈൽ ഭാഗങ്ങളിൽ കഴിഞ്ഞ കുറെ മാസങ്ങളായി കാട്ടുപന്നി ശല്യം അതിരൂക്ഷമായിരുന്നു. പകലെന്നോ രാത്രിയെന്നോ വ്യത്യാസമില്ലാതെ കാട്ടുപന്നികൾ ജനവാസ മേഖലയിൽ ഇറങ്ങുന്നത് പതിവു സംഭവമായിരുന്നു. മേഖലയിലെ കർഷകരുടെ കൃഷി വ്യാപകമായി നശിപ്പിക്കുന്ന കാട്ടുപന്നിക്കൂട്ടം മനുഷ്യജീവനും വലിയ ഭീഷണിയാണ് സൃഷ്ടിക്കുന്നത്. ഇത് കഴിഞ്ഞ ദിവസം ദീപിക റിപ്പോർട്ട് ചെയ്തിരുന്നു. ഇതിന്‍റെ അടിസ്ഥാനത്തിലാണ് മുണ്ടക്കയം പഞ്ചായത്തിന്‍റെ നേതൃത്വത്തിൽ കാട്ടുപന്നികളെ പിടികൂടാൻ നടപടി ആരംഭിച്ചത്. വണ്ടൻ സ്വദേശിയായ സജോ വർഗീസിന്‍റെ നേതൃത്വത്തിൽ ലൈസൻസുള്ള തോക്ക് ഉപയോഗിച്ച് കഴിഞ്ഞദിവസം രാത്രിയിൽ കാട്ടുപന്നിയെ വെടിവച്ച് കൊന്നു. ഒരാഴ്ച നടത്തിയ നിരീക്ഷണത്തിനിടെയാണ് ഒരു കാട്ടുപന്നിയെ വെടിവച്ച് കൊല്ലുവാൻ സാധിച്ചത്. വാർഡ് മെംബർ സൂസമ്മ മാത്യുവും വനം വകുപ്പ് ഉദ്യോഗസ്ഥരും സ്ഥലത്തെത്തി മേൽനടപടികൾ സ്വീകരിച്ചു. വരും ദിവസങ്ങളിലും മേഖലയിലെ കാട്ടുപന്നികളെ പിടികൂടുന്നതിനുള്ള നടപടി തുടരുമെന്ന് പഞ്ചായത്ത് പ്രസിഡന്‍റ് രേഖ ദാസ് അറിയിച്ചു. സജോയുടെ നേതൃത്വത്തിൽ 14 പഞ്ചായത്തുകളിലായി 70ലധികം കാട്ടുപന്നികളെയാണ് ഇതിനോടകം പിടികൂടിയത്.

പിപി റോഡിൽ കാർ മറിഞ്ഞ് ആറു പേർക്ക് പരിക്ക്

ഇളങ്ങുളം: പൊൻകുന്നം-പാലാ റോഡിൽ അഞ്ചാംമൈലിൽ കാർ മറിഞ്ഞ് മുണ്ടക്കയം സ്വദേശികളായ ആറുപേർക്ക് പരിക്ക്. പിച്ചകപ്പള്ളിൽ മേഴൂർ നാദിം സജീവ് (17), മടുക്കക്കുഴിയിൽ ജോയൽ ജിബിലി (17), പൂവക്കുളം ജോയൽ ജോസഫ് (17), എലിവാലിക്കൽ ജിഷ്ണു സജി (17), പേരപ്പറമ്പിൽ അലി സക്കീർ (16), ചുങ്കശേരിൽ അത്തീക്ക് (17) എന്നിവർക്കാണ് പരിക്കേറ്റത്. കാറോടിച്ചിരുന്ന മുണ്ടക്കയം പറയരുപറമ്പിൽ ബോണി (19) സാരമായ പരിക്കില്ലാതെ രക്ഷപ്പെട്ടു. ഇവരെ പൊൻകുന്നത്ത് സ്വകാര്യ ആശുപത്രിയിലും പിന്നീട് കാഞ്ഞിരപ്പള്ളി ഇരുപത്താറാംമൈലിലെ സ്വകാര്യ ആശുപത്രിയിലും പ്രവേശിപ്പിച്ചു. ഇന്നലെ ഉച്ചകഴിഞ്ഞ് രണ്ടിന് പാലാ ഭാഗത്തേക്ക് പോകവേയായിരുന്നു അപകടം.

കെഎസ്‌യു ജന്മദിനം ആഘോഷിച്ചു

പൊൻകുന്നം: കെഎസ്‌യു കാഞ്ഞിരപ്പള്ളി നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ കുന്നുംഭാഗം ഓശാന വിദ്യാഭവനിലെ വിദ്യാർഥികൾക്കൊപ്പം 68-ാം ജന്മദിനം ആഘോഷിച്ചു. കേരള കോൺഗ്രസ് സംസ്ഥാന കോ-ഓർഡിനേറ്റർ അപു ജോൺ ജോസഫ് ഉദ്ഘാടനം ചെയ്തു. കെഎസ്‌യു ബ്ലോക്ക് പ്രസിഡന്‍റ് സ്റ്റെഫിൻ ജോസഫ് അധ്യക്ഷത വഹിച്ചു. ജില്ലാ പ്രസിഡന്‍റ് കെ.എൻ. നൈസാം, ഡിസിസി ജനറൽ സെക്രട്ടറി പ്രഫ. റോണി കെ. ബേബി, യൂത്ത് കോൺഗ്രസ് സംസ്ഥാന സെക്രട്ടറി നിബു ഷൗക്കത്ത്, കെഎസ്‌യു സംസ്ഥാന കൺവീനർ സെബാസ്റ്റ്യൻ ജോയി, ബ്ലോക്ക് കോൺഗ്രസ് കമ്മിറ്റി പ്രസിഡന്‍റുമാരായ മനോജ് മാത്യു, ബിനു മറ്റക്കര, ഡിസിസി മെംബർ രഞ്ജു തോമസ്, കോൺഗ്രസ് ചിറക്കടവ് മണ്ഡലം പ്രസിഡന്‍റ സേവ്യർ മൂലകുന്ന്, കെഎസ്‌യു ഭാരവാഹികൾ തുടങ്ങിയവർ പ്രസംഗിച്ചു. വിദ്യാഭ്യാസ പഠനോപകരണ വിതരണ പദ്ധതിയുടെ ജില്ലാതല ഉദ്ഘാടനവും പരിപാടികളുടെ ഭാഗമായി നടത്തി.

പ്രകൃതിക്ഷോഭവും ആരോഗ്യമേഖലയിലെ പ്രശ്നങ്ങളും: കാഞ്ഞിരപ്പള്ളി ബ്ലോക്കിൽ ഹെൽപ്പ് ഡെസ്ക് ആരംഭിച്ചു

കാഞ്ഞിരപ്പള്ളി: കാലാവസ്ഥാ വ്യതിയാനങ്ങളിലും ആരോഗ്യമേഖലയിലെ പ്രശ്നങ്ങൾക്കും അടിയന്തരഘട്ടത്തിൽ സേവനപ്രവർത്തനങ്ങൾ ഏകോപിപ്പിക്കുന്നതിനുവേണ്ടി കാഞ്ഞിരപ്പള്ളി ബ്ലോക്ക് പഞ്ചായത്തിൽ ഹെൽപ്പ് ഡെസ്ക് ആരംഭിച്ചു. പെട്ടെന്നുണ്ടാകുന്ന പ്രകൃതി ദുരന്തങ്ങളിൽ അടിയന്തര സഹായമെത്തിക്കുന്നതിനും ആരോഗ്യരംഗത്ത് ഡെങ്കിപ്പനി, കോളറ, മഞ്ഞപ്പിത്തം. എലിപ്പനി, കോവിഡ് തുടങ്ങിയ പകർച്ചവ്യാധികൾ പടർന്നുപിടിക്കുന്ന സാഹചര്യങ്ങളിലും അടിയന്തര സഹായം എത്തിക്കുന്നതിന് വേണ്ടിയാണ് ഹെൽപ്പ് ഡെസ്ക് പ്രവർത്തിക്കുന്നത്. കാഞ്ഞിരപ്പള്ളി ബ്ലോക്ക് പഞ്ചായത്ത് കാര്യാലയത്തിലാണ് ഹെൽപ്പ് ഡെസ്കിന്‍റെ ഓഫീസ് തുറന്നു പ്രവർത്തിക്കുന്നത്. കാഞ്ഞിരപ്പള്ളി ബ്ലോക്കിന് കീഴിൽ വരുന്ന ഏഴു പഞ്ചായത്തുകളിലും പകർച്ചവ്യാധികലെ പ്രതിരോധിക്കുന്നതിനായി ജൂണ്‍ അഞ്ചിന് ഉച്ചകഴിഞ്ഞ് രണ്ടിന് ബ്ലോക്ക് പഞ്ചായത്ത് ഓഫീസിൽ ആരോഗ്യ ജാഗ്രതാ ക്യാമ്പ് സംഘടിപ്പിക്കും. വിവിധ പഞ്ചായത്ത് പ്രസിഡന്‍റുമാർ, വൈസ് പ്രസിഡന്‍റുമാർ, ആരോഗ്യ സ്റ്റാൻഡിംഗ് കമ്മിറ്റി ചെയർമാന്മാർ, ആരോഗ്യവകുപ്പ് ഉദ്യോഗസ്ഥർ തുടങ്ങിയവർ ക്യാമ്പിൽ പങ്കെടുക്കും. ഹെൽപ്പ് ഡെസ്കിൽ വിളിക്കേണ്ട നമ്പർ: 9961039529, 9496539970, 7907251610.

ഇന്നവേഷൻ ആൻഡ് കൊളാബൊറേഷൻ ഡേ ആഘോഷം സംഘടിപ്പിച്ചു

പെരുവന്താനം: സെന്‍റ് ആന്‍റണീസ് കോളജിന്‍റെ ആഭിമുഖ്യത്തിൽ ഇന്നവേഷൻ ആൻഡ് കൊളാബൊറേഷൻ ഡേ ആഘോഷങ്ങൾ സംഘടിപ്പിച്ചു. വിദ്യാർഥികൾക്ക് ജോലിയും ശമ്പളത്തോടുകൂടി ഇന്‍റേണ്‍ഷിപ്പും പ്രായോഗിക പരിശീലനവും ലഭ്യമാകുന്ന അഞ്ചു ധാരണാപത്രങ്ങൾ ഒപ്പുവയ്ക്കപ്പെട്ടു. പഠിച്ചുകൊണ്ടിരിക്കുമ്പോൾതന്നെ ശമ്പളത്തോടുകൂടി വിദേശത്ത് ഇന്‍റേൺഷിപ്പ് നൽകുന്ന ഹോട്ടൽ മാനേജ്മെന്‍റ് കോഴ്സുകളും തുടർന്ന് സൗദിയിൽ ജോലി ഉറപ്പു നൽകുന്ന ധാരണപത്രം സ്പാഗോ ഇന്‍റർനാഷണലുമായി ധാരണയിലെത്തി. ഇതുപ്രകാരം ഡിഗ്രി, ഡിപ്ലോമ പഠിക്കുന്ന മുഴുവൻ വിദ്യാർഥികൾക്കും മൂന്നുമാസം സൗദിയിൽ പരിശീലനവും തുടർന്ന് ജോലിയും ലഭിക്കും. കൂടാതെ ബിസിഎ വിദ്യാർഥികൾക്ക് സ്റ്റെം റോബോട്ടിക്സുമായി ചേർന്ന് ആർട്ടിഫിഷൽ ഇന്‍റലിജന്‍സും റോബോട്ടിക്സുമുള്ള പരിശീലനവും തുടർന്ന് ജോലിയും ഉറപ്പു നൽകുന്ന ധാരണാപത്രത്തിലും ഏർപ്പെട്ടു. ബിഎസ്‌സി സൈബർ ഫോറൻസിക് വിദ്യാർഥികൾക്കായി നാഷണൽ സൈബർ മോക്ഷയുമായി ചേർന്ന് പോലീസ് സൈബർ വിഭാഗത്തിൽ ഉൾപ്പെടെ പരിശീലനവും തുടർന്ന് ജർമനിയിൽ ജോലി ലഭ്യമാക്കുന്ന ധാരണാപത്രവും ബിബിഎ ഏവിയേഷൻ വിദ്യാർഥികൾക്കായി പരിശീലനം ലഭ്യമാക്കുന്ന ധാരണാപത്രവും വിംസ് ഏവിയേഷനുമായി ചേർന്ന് ഓരോ വർഷവും ഇന്‍റര്‍നാഷണൽ എയർപോർട്ടുകളിൽ അഞ്ചു ദിവസം നീണ്ടുനിൽക്കുന്ന പരിശീലനവും തുടർന്ന് ജോലി ലഭിക്കുന്ന ധാരണാപത്രവും ഒപ്പിട്ടു. ബികോം വിദ്യാർഥികൾക്കായി സിഎംഎ, എസിസിഎ പരിശീലനത്തിനായി ലോജിക് സ്കൂൾ ഓഫ് മാനേജ്മെന്‍റുമായി ചേർന്ന് ധാരണാപത്രപ്രകാരം പ്രായോഗിക പരിശീലനവും ആദ്യ ശ്രമത്തിൽ പരാജയപ്പെടുന്നവർക്ക് തുടർ പരിശീലനവും ലഭ്യമാക്കും. ഹോസ്പിറ്റൽ അഡ്മിനിസ്ട്രേഷൻ രംഗത്ത് സാധ്യതകൾ മനസിലാക്കി കേരളത്തിലെ മുൻനിര ട്രെയിനിംഗ് ടീമായ ഐഎസ്എസ്ഡിയുമായി ചേർന്ന് പരിശീലനവും തുടർന്ന് ഇന്ത്യയിലെ മുൻനിര ആശുപത്രികളിൽ പ്രായോഗിക പരിശീലനം ലഭ്യമാക്കുന്നതിനും കൂടാതെ ഫാഷന്‍ ഡിസൈനിംഗ് കോഴ്സിന് നെറ്റ്‌വര്‍ക്ക് അക്കാദമിയുമായി ചേര്‍ന്ന് ഇല്ല്യുസ്ട്രേറ്റര്‍ കോഴ്സ് ലഭ്യമാക്കുന്ന ധാരണാപത്രവും ഒപ്പിട്ടു. തൊഴില്‍ ഉറപ്പ് നൽകുന്നതിനുവേണ്ടി വ്യാവസായിക മേഖലയുമായി ഏർപ്പെട്ട ഈ ധാരണാപത്രങ്ങൾ വഴി പഠിച്ചിറങ്ങുമ്പോൾ തന്നെ തൊഴിൽ ലഭ്യമാക്കുവാൻ സാധിക്കുമെന്ന് കോളജ് ചെയര്‍മാന്‍ ബെന്നി തോമസ്‌ വ്യക്തമാക്കി. കേരള സർക്കാർ ആരംഭിക്കുന്ന കാമ്പസ് ഇൻഡസ്ട്രിയൽ പാർക്ക് വഴി കാമ്പസിൽ തന്നെ ഇന്‍റേൺഷിപ്പ് നൽകാൻ സാധിക്കും. വ്യവസായ പാർക്ക് ആരംഭിക്കുനനതിനുള്ള ഉത്തരവുകൾ കേരള സർക്കാരിൽനിന്നു ലഭിച്ചിട്ടുള്ള വിവരവും അദ്ദേഹം അറിയിച്ചു. തൊഴിലധിഷ്ഠിത കാമ്പസ്‌ പഠനവും പരിശീലനവുമാണ് ലക്ഷ്യമിടുന്നതെന്ന് ചെയര്‍മാന്‍ വ്യക്തമാക്കി.

സംസ്ഥാന നീന്തല്‍ മത്സരം: തിരുവനന്തപുരം മുന്നില്‍

പാലാ: സെന്‍റ് തോമസ് കോളജ് നീന്തല്‍ക്കുളത്തില്‍ നടക്കുന്ന 72-ാമത് സംസ്ഥാന നീന്തല്‍ മത്സരത്തിന്‍റെ ആദ്യദിനം 242 പോയിന്‍റോടെ തിരുവനന്തപുരം ജില്ലാ മുന്നേറുന്നു. എറണാകുളം ജില്ല 204 പോയന്‍റോടെ രണ്ടാം സ്ഥാനത്തും 42 പോയിന്‍റോടെ പാലക്കാട് ജില്ല മൂന്നാം സ്ഥാനത്തുമാണ്. ഇന്നലെ നാല് പുതിയ റിക്കാര്‍ഡുകള്‍ സ്ഥാപിക്കപ്പെട്ടു. പുരുഷ വിഭാഗം1500 മീറ്റര്‍ ഫ്രീസ്റ്റൈലില്‍ തിരുവനന്തപുരത്തിന്‍റെ ജുഹുനു കൃഷ്ണ, വനിതകളുടെ 800 മീറ്ററില്‍ ഹന്ന എലിസബത്ത് സിയോ, 200 മീറ്റര്‍ ബാക്ക് സ്ട്രോക്കില്‍ അവന്തിക പ്രദീപ്, പുരുഷവിഭഗം 50 മീറ്റര്‍ ബ്രെസ്റ്റ് സ്‌ട്രോക്കില്‍ ക്ലിഫോര്‍ഡ് ജോസഫ് (മൂവരും എറണാകുളം) എന്നിവരാണ് റിക്കാര്‍ഡിനുടമകള്‍. അസോസിയേഷന്‍ പ്രസിഡന്‍റ് അഡ്വ ബിനു പുളിക്കകണ്ടത്തിന്‍റെ അധ്യക്ഷതയില്‍ മന്ത്രി റോഷി അഗസ്റ്റിന്‍ മത്സരം ഉദ്ഘാടനം ചെയ്തു. ഫ്രാന്‍സിസ് ജോര്‍ജ് എപി മുഖ്യാഥിതിയായിരുന്നു. മണി സി. കാപ്പന്‍ എംഎല്‍എ, ടി.ജെ. ജേക്കബ് എന്നിവര്‍ പ്രസംഗിച്ചു.

ചേർപ്പുങ്കൽ പഴയ പാലവും ചകിണിപ്പാലവും തുറന്നു കൊടുത്തു

പാലാ: പൊതുമരാമത്ത് വകുപ്പ് ബ്രിഡ്ജസ് വിഭാഗം നിർമാണം പൂർത്തീകരിച്ച ചേർപ്പുങ്കൽ പഴയ പാലവും ചേർപ്പുങ്കൽ ചകിണിപ്പാലവും ഗതാഗതത്തിന് തുറന്നുകൊടുത്തു. എംഎൽഎമാരായ മോൻസ് ജോസഫും മാണി സി. കാപ്പനും ഉദ്ഘാടനം നിർവഹിച്ചു. മീനച്ചിലാറിനു കുറുകെ ചേര്‍പ്പുങ്കല്‍ സമാന്തരപാലം പുതിയതായി നിര്‍മിച്ചതിനെത്തുടര്‍ന്നു പഴയപാലം അറ്റകുറ്റപ്പണികള്‍ക്കുവേണ്ടി അടച്ചിടുകയുണ്ടായി. പഴയപാലത്തിന്‍റെ കൈവരികള്‍ പല സ്ഥലത്തും തകര്‍ന്നുപോയതുമൂലം അപകടാവസ്ഥ നിലനിന്നിരുന്നു. ചേര്‍പ്പുങ്കല്‍ പള്ളി ഭാഗത്തേക്കു വരുന്ന തീര്‍ഥാടകരും വിവിധ വിദ്യാലങ്ങള്‍, മെഡിസിറ്റി ആശുപത്രി എന്നിവിടങ്ങളിലേക്ക് വരുന്ന ആയിരക്കണക്കിനു യാത്രക്കാരും ആശങ്കയോടെയാണ് പഴയപാലത്തിലൂടെ പൊയ്‌ക്കൊണ്ടിരുന്നത്. ഇപ്രകാരമുള്ള അപകടാവസ്ഥയ്ക്ക് ശാശ്വതപരിഹാരം ഉണ്ടാകുന്നതിന് മോൻസ് ജോസഫും മാണി സി. കാപ്പനും ഇടപെട്ടതിനെത്തുടര്‍ന്നാണ് സര്‍ക്കാര്‍തലത്തില്‍ അനുകൂല തീരുമാനമുണ്ടാകുന്നത്. ചേര്‍പ്പുങ്കല്‍ പഴയപാലത്തിന്‍റെ കൈവരികള്‍ ബലപ്പെടുത്തി സുരക്ഷിതമാക്കി മാറ്റുന്നതിനും നവീകരിക്കുന്നതിനുംവേണ്ടി പൊതുമരാമത്ത് വകുപ്പില്‍നിന്ന് അനുവദിച്ച 20 ലക്ഷം രൂപ വിനിയോഗിച്ചാണ് പഴയപാലം സഞ്ചാരയോഗ്യമാക്കി മാറ്റിയത്. ചേര്‍പ്പുങ്കല്‍ സമാന്തരപാലം പുതിയതായി നിര്‍മിച്ചതിനെത്തുടര്‍ന്ന് ഇരുവശത്തേക്കും വാഹനങ്ങള്‍ക്ക് യാത്രചെയ്യാന്‍ കഴിയുന്ന സൗകര്യം ഉറപ്പുവരുത്തിയിട്ടുണ്ട്. എന്നാല്‍, കാല്‍നടക്കാര്‍ക്കു പുതിയ പാലത്തിലൂടെ സഞ്ചരിക്കുന്നതിനുള്ള ഫുട്പാത്ത് സൗകര്യം ലഭ്യമായിട്ടില്ല. ഇത്തരത്തിലുള്ള പ്രശ്‌നം പരിഹരിക്കുന്നതിനുവേണ്ടി ചേര്‍പ്പുങ്കല്‍ പുതിയതായി നിര്‍മിച്ച സമാന്തരപാലം വാഹനയാത്രയ്ക്കു വേണ്ടിയും അറ്റകുറ്റപ്പണികള്‍ നടത്തി സഞ്ചാരയോഗ്യമാക്കി മാറ്റിയ പഴയപാലം കാല്‍നടയാത്രയ്ക്കുവേണ്ടിയും മാത്രമായി മാറ്റാനുമാണ് തീരുമാനിച്ചിട്ടുള്ളത്. ബ്ലോക്ക് പഞ്ചായത്ത് മെംബർ ഡോ. മേഴ്സിക്കുട്ടി ജോൺ മൂലക്കാട്ട്, കിടങ്ങൂർ പഞ്ചായത്ത് മുൻ പ്രസിഡന്‍റ് തോമസ് മാളിയേക്കൽ, മുത്തോലി പഞ്ചായത്ത് പ്രസിഡന്‍റ് ആദിത്യ സബിൻ തുടങ്ങിയവർ പങ്കെടുത്തു.

സിസ്റ്റര്‍ ഡോ. ബീനാമ്മ മാത്യു പടിയിറങ്ങുന്നു

പാലാ: ഇരുപത്തിമൂന്നു വര്‍ഷത്തെ സ്തുത്യര്‍ഹ സേവനത്തിനു ശേഷം പാലാ സെന്‍റ് തോമസ് കോളജ് ഓഫ് ടീച്ചര്‍ എഡ്യൂക്കേഷൻ പ്രിന്‍സിപ്പല്‍ സിസ്റ്റര്‍ ഡോ. ബീനാമ്മ മാത്യു വിരമിക്കുന്നു. 2002ല്‍ മാത്തമാറ്റിക്‌സ് എഡ്യൂക്കേഷന്‍ അധ്യാപികയായി സര്‍വീസില്‍ പ്രവേശിച്ച സിസ്റ്റര്‍ 2020ല്‍ കോളജിന്‍റെ പ്രിന്‍സിപ്പലായി നിയമിതയായി. നിരവധി ഗവേഷണ പ്രബന്ധങ്ങളും ലേഖനങ്ങളും ദേശീയ-അന്തര്‍ദേശീയ ജേര്‍ണലുകളില്‍ പ്രസിദ്ധീകരിച്ചിട്ടുണ്ട്. നാക് നാലാം സൈക്കിളില്‍ എ പ്ലസ് ഗ്രേഡോടെ റീ അക്രെഡിറ്റേഷന്‍ നേടാനും കേരള റാങ്കിംഗില്‍ ആറാം സ്ഥാനത്തെത്താനും കോളജിന് കഴിഞ്ഞു. കേന്ദ്ര-സംസ്ഥാന സര്‍ക്കാരുകളുടെ റൂസ ഫണ്ട് ഉപയോഗിച്ച് പണികഴിപ്പിച്ച പുതിയ അക്കാദമിക ബ്ലോക്ക്, നവീകരണ പ്രവര്‍ത്തനങ്ങള്‍ എന്നിവ പൂര്‍ത്തിയാക്കി. ഈ കാലയളവില്‍ കോളജ് എംജി സര്‍വകലാശാലയുടെ അംഗീകൃത ഗവേഷണ കേന്ദ്രമാവുകയും ചെയ്തു.

പാലാ സെന്‍റ് തോമസ് കോളജ് സൈക്കോളജി ഡിപ്പാര്‍ട്ടുമെന്‍റും മാര്‍ സ്ലീവാ മെഡിസിറ്റിയും ധാരണാപത്രം ഒപ്പുവച്ചു

പാലാ: സെന്‍റ് തോമസ് കോളജ് ഓട്ടോണമസില്‍ ഈ വര്‍ഷം പുതുതായി ആരംഭിക്കുന്ന ബിഎസ്‌‌സി സൈക്കോളജി പ്രോഗ്രാമിന്‍റെ ഭാഗമായി കോളജിലെ സൈക്കോളജി ഡിപ്പാര്‍ട്ട്‌മെന്‍റും മാര്‍ സ്ലീവാ മെഡിസിറ്റിയിലെ ക്ലിനിക്കല്‍ സൈക്കോളജി ഡിപ്പാര്‍ട്ടുമെന്‍റും തമ്മില്‍ ധാരണാപത്രം ഒപ്പുവച്ചു. ഇന്‍റേണ്‍ഷിപ്പ്, ഫാക്കല്‍റ്റി എക്‌സ്‌ചേഞ്ച്, ക്ലിനിക്കല്‍ പരിശീലനം തുടങ്ങിയ മേഖലകളിലാണ് സഹകരണം ഉറപ്പാക്കിയത്. മാര്‍ സ്ലീവാ മെഡിസിറ്റിയില്‍ വിദ്യാര്‍ഥികള്‍ക്ക് വിദഗ്ധ പരിശീലനത്തിനും മറ്റുമുള്ള അവസരവും ഇതിലൂടെ ലഭിക്കും. ബിഎസ്‌സി സൈക്കോളജിക്ക് പുറമേ എംഎസ്‌‌സി ഫുഡ് സയന്‍സ് ആന്‍ഡ് ടെക്‌നോളജി, ബിഎ ഇംഗ്ലീഷ് ആന്‍ഡ് ജേര്‍ണലിസം തുടങ്ങിയ കോഴ്‌സുകളാണ് ഈ വര്‍ഷം സെന്‍റ് തോമസ് കോളജ് ഓട്ടോണമസില്‍ പുതിയതായി ആരംഭിക്കുന്നത്. അപേക്ഷ സമര്‍പ്പിക്കേണ്ടത് കോളജ് വെബ്‌സൈറ്റ് (www.stcp.ac.in) വഴിയാണ്. മാര്‍ സ്ലീവാ മെഡിസിറ്റി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍, ക്ലിനിക്കല്‍ സൈക്കോളജി വിഭാഗം കോ-ഓര്‍ഡിനേറ്റര്‍ ഫാ. മാത്യു ചേന്നാട്ട്, ബ്രാന്‍ഡിംഗ് ആന്‍ഡ് ഹെല്‍ത്ത് കെയര്‍ പ്രൊമോഷന്‍ എക്‌സിക്യൂട്ടീവ് ജോര്‍ജുകുട്ടി മാത്യു, സെന്‍റ് തോമസ് കോളജ് പ്രിന്‍സിപ്പല്‍ ഡോ. സിബി ജയിംസ്, വൈസ് പ്രിന്‍സിപ്പല്‍ റവ.ഡോ. സാല്‍വിന്‍ തോമസ് കാപ്പിലിപ്പറമ്പില്‍, ബര്‍സാര്‍ ഫാ. മാത്യു ആലപ്പാട്ടുമേടയില്‍, ഫാ. റോഷന്‍ എണ്ണയ്ക്കാപ്പള്ളില്‍ തുടങ്ങിയവര്‍ പങ്കെടുത്തു.

സഹകാരി അഡ്വ. ജോസഫ് മണ്ഡപത്തെ ആദരിച്ചു

പാലാ: സഹകരണരംഗത്ത് തുടര്‍ച്ചയായി അരനൂറ്റാണ്ട് പൂര്‍ത്തിയാക്കിയ അഡ്വ. ജോസഫ് മണ്ഡപത്തിനെ പാലാ മാര്‍ക്കറ്റിംഗ് സൊസൈറ്റിയുടെ ആഭിമുഖ്യത്തില്‍ ആദരിച്ചു. പാലാ മുണ്ടുപാലം അഞ്ചേരില്‍ പവലിയനില്‍ നടന്ന സമ്മേളനം മന്ത്രി റോഷി അഗസ്റ്റിന്‍ ഉദ്ഘാടനം ചെയ്ത് അദ്ദേഹത്തിന് ഉപഹാരവും സമര്‍പ്പിച്ചു. പാലാ മാര്‍ക്കറ്റിംഗ് സഹകരണസംഘം പ്രസിഡന്‍റ് സണ്ണി അഗസ്റ്റിന്‍ പൊരുന്നക്കോട്ട് അധ്യക്ഷത വഹിച്ചു. മാര്‍ക്കറ്റ് ഫെഡ് ചെയര്‍മാന്‍ അഡ്വ. സോണി സെബാസ്റ്റ്യന്‍, അഡ്വ. ജോയി നടുക്കര, മുനിസിപ്പല്‍ ചെയര്‍മാന്‍ തോമസ് പീറ്റര്‍, പ്രഫ. ലോപ്പസ് മാത്യു, ലാലിച്ചന്‍ ജോര്‍ജ്, അഡ്വ. വി.ടി. തോമസ്, അഡ്വ. എസ്. ജയസൂര്യന്‍, അഡ്വ. ജോസ് ടോം, ഫിലിപ്പ് കുഴികുളം, ബേബി ഉഴുത്തുവാല്‍, ടോബിന്‍ കെ. അലക്‌സ്, രാജേഷ് വാളിപ്ലാക്കല്‍, സംഘം വൈസ് പ്രസിഡന്‍റ് ബെന്നി ഈരൂരിക്കല്‍, സുലഭ ഹൈപ്പര്‍ മാര്‍ക്കറ്റ് ജനറല്‍ മാനേജര്‍ ഷാജി ജോസഫ് തുടങ്ങിയവര്‍ പ്രസംഗിച്ചു.

മലനാട് ക്ഷീരശ്രീ സ്വര്‍ണ് പതക് പുരസ്‌കാരം റീജ ബിന്‍സിന്

പാറത്തോട്: മലനാട് മില്‍ക്ക് പ്രൊഡ്യൂസേഴ്‌സ് സൊസൈറ്റിയുടെ ഒരു ലക്ഷം രൂപ സമ്മാനത്തുക ലഭിക്കുന്ന ഫാ. മാത്യു വടക്കേമുറി മെമ്മോറിയല്‍ മലനാട് ക്ഷീരശ്രീ സ്വര്‍ണ് പതക് പുരസ്‌കാര്‍ കൊച്ചറ കണയങ്കല്‍ റീജ ബിന്‍സിന്. 21 പശുക്കളും 10 കന്നുകുട്ടികളും ഉള്‍പ്പെടെ 31 കന്നുകാലികളെ വളര്‍ത്തുന്ന റീജ കഴിഞ്ഞ വര്‍ഷം 88,197 കിലോ പാല്‍ മലനാട് മില്‍ക്കിനു നല്‍കി. ഭര്‍ത്താവ് ബിന്‍സ് ഇമ്മാനുവേല്‍ കണയങ്കലും മക്കളായ ജെറിന്‍, മെറിന്‍, എറിന്‍ എന്നിവരും റീജയോട് ഒപ്പംനിന്നു കരുത്തു പകരുന്നു. 75,000 രൂപ സമ്മാനത്തുകയുള്ള മലനാട് ക്ഷീരശ്രീ രജത് പതക് പുരസ്‌കാറിന് അര്‍ഹനായത് കടുക്കാസിറ്റി ചരട്ടവയലില്‍ ബാബു ജോസഫാണ്. 16 പശുക്കളും മൂന്ന് കന്നുകുട്ടികളും ഉള്‍പ്പെടെ 19 കന്നുകാലികളെ വളര്‍ത്തുന്ന ബാബു ജോസഫ് കഴിഞ്ഞവര്‍ഷം 51,298 കിലോ പാല്‍ മലനാട് മില്‍ക്കിനു നല്‍കി. ഭാര്യ: മോളമ്മ. മക്കള്‍- മിന്‍റു, മിലന്‍. 50,000 രൂപ സമ്മാനത്തുകയുള്ള മലനാട് ക്ഷീരശ്രീ കാന്‍സി പതക് പുരസ്‌കാര്‍ നെറ്റിത്തൊഴു വയലാറ്റുപുത്തന്‍പുരയ്ക്കല്‍ റെജി കുര്യനാണ് ലഭിച്ചത്. 16 പശുക്കളും മൂന്നു കന്നുകുട്ടികളും ഉള്‍പ്പെടെ 19 കന്നുകാലികളെ വളര്‍ത്തുന്ന ഇദ്ദേഹം 70,423 കിലോ പാല്‍ മലനാട് മില്‍ക്കില്‍ അളന്നു. ഡെസിയാണ് ഭാര്യ. മക്കള്‍ - എബിന്‍ മരിയ, ലിബിന മരിയ. മലനാട് ക്ഷീരശ്രീ നക്ഷത്ര പതക് ജേതാക്കളായ 10 പേര്‍ക്ക് 25,000 രൂപ വീതം സമ്മാനമായി ലഭിച്ചു. ബേബി സെബാസ്റ്റ്യന്‍ ഗണപതിപ്ലാക്കല്‍ (മുരിക്കടി), സി.സി. കുര്യന്‍ ചാത്തന്‍പാറ (ചെല്ലാര്‍കോവില്‍), വര്‍ഗീസ് കെ.ജെ. കൂവക്കുന്നേല്‍ (വെസ്റ്റ് പാറ), ലാലിച്ചന്‍ കുര്യാക്കോസ് പെരിയോട്ട് (റോസ് നഗര്‍), റിറ്റു സിബി തകടിയേല്‍ (പത്തുവളവ്), ജൂലിയറ്റ് ജോസഫ് പാണ്ടിയപ്പള്ളില്‍ (ചെങ്ങളം), സഹദേവന്‍ ഗുരുകൃപ (കൊച്ചറ), സുനില്‍കുമാര്‍ പൂവത്തുംമൂട്ടില്‍ (വെള്ളയാംകുടി), അനിതാ മഹേഷ് പാലക്കാട്ടുതെക്കേതില്‍ (സ്‌നേഹഗിരി), വര്‍ഗീസ് ചാക്കോ പൊന്‍പുഴ (അണക്കര) എന്നിവരാണ് അവാര്‍ഡിന് അര്‍ഹരായത്. അവാര്‍ഡുകള്‍ മലനാട് മില്‍ക്ക് പ്രൊഡ്യൂസേഴ്‌സ് സൊസൈറ്റിയുടെ വാര്‍ഷിക പൊതുയോഗത്തില്‍ വിതരണം ചെയ്തു. ഫാ. മാത്യു വടക്കേമുറി മെമ്മോറിയല്‍ മലനാട് മില്‍ക്ക് വിദ്യാശ്രീ പുരസ്‌കാറിന് അര്‍ഹയായ പ്ലസ്ടു പരീക്ഷയില്‍ ഏറ്റവും കൂടുതല്‍ മാര്‍ക്കു നേടിയ കുട്ടിക്ക് 25,000 രൂപയും പത്താം ക്ലാസ് പരീക്ഷയില്‍ എല്ലാ വിഷയങ്ങള്‍ക്കും എ പ്ലസ് നേടിയ ഒമ്പതു പേര്‍ക്ക് 10,000 രൂപ വീതവും കാഷ് അവാര്‍ഡ് നല്‍കി. മികച്ച സംഘങ്ങള്‍ക്കുള്ള എവറോളിംഗ് ട്രോഫിയും ക്ഷീര കര്‍ഷകര്‍ക്കുള്ള വേനല്‍ക്കാല ഇന്‍സെന്‍റീവും യോഗത്തില്‍ വിതരണം ചെയ്തു.

പെരുമഴയ്ക്ക് ശമനമില്ല; പരക്കെ കൃഷിനാശം

കോട്ടയം: പെരുമഴയ്ക്ക് ശമനമില്ല. വിവിധ പ്രദേശങ്ങളിള്‍ ഒറ്റപ്പെട്ട ശക്തമായ മഴയാണു പെയ്യുന്നത്. ഒരാഴ്ചകൂടി പെരുമഴ തുടരുമെന്നാണ് കാലാവസ്ഥാ പ്രവചനം. മണിമല, മീനച്ചില്‍ പുഴകളില്‍ ജലനിരപ്പ് കാര്യമായി ഇന്നലെ ഉയര്‍ന്നില്ല. പമ്പ, അഴുത നദികള്‍ കരകവിഞ്ഞൊഴുകുകയാണ്. മലങ്കര അണക്കെട്ട് ഇന്നലെ തുറന്നതോടെ മൂവാറ്റുപുഴയാറ്റിലെ ജലനിരപ്പ് കൂടി വൈക്കം, തലയോലപ്പറമ്പ് മേഖല പ്രളയഭീഷണിയിലാണ്. മൂവാറ്റുപുഴയാറിന്‍റെ കൈവഴിയായ വടയാര്‍ തോട് ഉദയനാപുരം പഞ്ചായത്തില്‍ മൂത്താകോണില്‍ ഭാഗത്തു കരകവിഞ്ഞു. എസി റോഡിന്‍റെ വശത്ത് എസി കനാലില്‍നിന്നു വെള്ളം ഉയര്‍ന്നു പൂവം ഭാഗത്തെ വീടുകള്‍ക്കുസമീപം വെള്ളക്കെട്ടായി. കൂട്ടിക്കല്‍, ഇളംകാട്, വല്യേന്ത, കൊക്കയാര്‍ പ്രദേശങ്ങളില്‍ ഉരുള്‍പൊട്ടല്‍ ഭീഷണി തുടരുന്നു. മഴയ്‌ക്കൊപ്പമുള്ള കനത്ത കാറ്റില്‍ നിരവധി മരങ്ങള്‍ കടപുഴകി. കപ്പ, ചേന, വാഴ എന്നിവ പരക്കെ നിലംപൊത്തി. നഗരപ്രാന്തങ്ങളില്‍ പതിവ് ദുരിതം കോട്ടയം: കോട്ടയം നഗരപ്രാന്തങ്ങളിലും കുമരകത്തും പ്രളയദുരിതത്തില്‍ ജനം വലയുന്നു. മീനച്ചിലാറ്റില്‍നിന്നുള്ള മലവെള്ളം വീടുകളിലേക്ക് പാഞ്ഞുകയറിയതോടെ നൂറിലേറെ കുടുംബങ്ങള്‍ ക്യാമ്പുകളിലേക്കും ബന്ധുവീടുകളിലേക്കും മാറി. വെള്ളം ഇറങ്ങിയാല്‍തന്നെ വീടും പരിസരവും ശുചീകരിക്കുക ദുഷ്‌കരമായ ജോലിയാണ്. കിടക്ക ഉള്‍പ്പെടെ വീട്ടുപകരണങ്ങള്‍ പ്രളയകാലത്ത് നശിക്കുന്നതും പതിവാണ്. പാറപ്പാടം, താഴത്തങ്ങാടി, കാരാപ്പുഴ, തിരുവാതുക്കല്‍, തിരുവാര്‍പ്പ്, കാഞ്ഞിരം, അയ്മനം, ആര്‍പ്പൂക്കര, മണിയാപറമ്പ് പ്രദേശങ്ങളില്‍ വീടുകളില്‍ വെള്ളം കയറിയിട്ടുണ്ട്. മീനച്ചിലാറിന്‍റെ കൈവഴികളും പ്രദേശത്തെ പാടങ്ങളും നിറഞ്ഞുകവിഞ്ഞു. ചെറുവഴികളിലും തോടുകളിലുമെല്ലാം വെള്ളമാണ്. വീടുകളില്‍ ഒറ്റപ്പെട്ടുപോയവരെ ക്യാമ്പുകളിലേക്കു മാറ്റുന്നുണ്ട്. വെള്ളം വേമ്പനാട്ട് കായലിലേക്ക് ഒഴുകിനീങ്ങാന്‍ വൈകുന്നതാണു വെള്ളം ഉയര്‍ന്നുനില്‍ക്കാന്‍ കാരണം. ഈ സമയം കിഴക്കന്‍ മേഖലയില്‍നിന്നു വന്‍തോതില്‍ വെള്ളം ഒഴുകിയെത്തിയാല്‍ പ്രളയത്തിനു കാരണമാകും. അറയാഞ്ഞിലിമണ്ണ് പാലം മുങ്ങി എരുമേലി: ഇന്നലെ ഉച്ചയോടെ മുക്കൂട്ടുതറ ഇടകടത്തിയില്‍ പമ്പാനദിക്കു കുറുകെയുള്ള അറയാഞ്ഞിലിമണ്ണ് പാലം വെള്ളത്തിനടിയിലായി. രാവിലെ പാലം കടന്നുപോയ നാട്ടുകാര്‍ക്ക് പാലത്തില്‍ വെള്ളം താഴാതെ ഇനി മടങ്ങിയെത്താന്‍ കഴിയില്ല. പ്രദേശത്തെ ഏക ഗതാഗത മാര്‍ഗമായ പാലമാണു മുങ്ങിയത്. മഴയ്‌ക്കൊപ്പം കാട്ടുപന്നിയും മഴ കനത്തതോടെ കാട്ടുപന്നികള്‍ കൂട്ടത്തോടെ നാട്ടിലേക്ക്. പമ്പാവാലി, കണമല, മുണ്ടക്കയം, കണ്ണിമല, കോരുത്തോട് പ്രദേശങ്ങളില്‍ കാട്ടുപന്നികള്‍ വ്യാപകമായി കൃഷി നശിപ്പിക്കുന്നു. ഇന്നലെ മുണ്ടക്കയത്ത് പഞ്ചായത്തിന്‍റെ അനുമതിയില്‍ കാട്ടുപന്നിയെ വെടിവച്ചുകൊന്നു. ഇന്ന് മഞ്ഞ അലര്‍ട്ട് കോട്ടയം: ജില്ലയില്‍ ഇന്നു ശക്തമായ മഴസാധ്യതയുള്ളതിനാല്‍ മഞ്ഞ അലര്‍ട്ട് പ്രഖ്യാപിച്ചു. മഴ മുന്നറിയിപ്പിന്‍റെ പശ്ചാത്തലത്തില്‍ ജനങ്ങള്‍ ജാഗ്രത പാലിക്കണമെന്ന് ജില്ലാ കളക്ടര്‍ അറിയിച്ചു.

ജില്ലയില്‍ 36 ദുരിതാശ്വാസ ക്യാമ്പുകള്‍

210 കുടുംബങ്ങള്‍ സുരക്ഷിത കേന്ദ്രങ്ങളില്‍ കോട്ടയം: കനത്തമഴ, വെള്ളപ്പൊക്കം എന്നിവയെത്തുടര്‍ന്ന് ജില്ലയില്‍ 210 കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റി. ജില്ലയില്‍ 36 ദുരിതാശ്വാസ ക്യാമ്പുകളാണ് പ്രവര്‍ത്തിക്കുന്നത്. കോട്ടയം താലൂക്കിലാണ് കൂടുതല്‍ ക്യാമ്പുകളുള്ളത്, 29. ചങ്ങനാശേരി- അഞ്ച്, വൈക്കം- രണ്ട് എന്നിങ്ങനെയാണ് മറ്റു താലൂക്കുകളിലെ ക്യാമ്പുകളുടെ എണ്ണം. 675 പേരാണ് ക്യാമ്പുകളിലുള്ളത്. 283 സ്ത്രീകളും 261 പുരുഷന്മാരും 131 കുട്ടികളുമുണ്ട്. താഴ്ന്ന പ്രദേശങ്ങള്‍ വെള്ളപ്പൊക്ക ഭീഷണിയില്‍ ചങ്ങനാശേരി: താലൂക്കിലെ താഴ്ന്ന പ്രദേശങ്ങള്‍ വെള്ളപ്പൊക്ക ഭീഷണിയിലാണ്. ചങ്ങനാശേരി- ആലപ്പുഴ റോഡരികിലുള്ള എസി കോളനിയിലെ വീടുകളില്‍ വെള്ളംകയറി. പായിപ്പാട് പഞ്ചായത്തിലെ പൂവം, നക്രാല്‍, കോമങ്കേരിച്ചിറ, വാഴപ്പള്ളി പഞ്ചായത്തിലെ വെട്ടിത്തുരുത്ത്, പറാല്‍, തൂപ്രം, മുളക്കാംതുരുത്തി ഭാഗങ്ങളില്‍ ജലനിരപ്പുയര്‍ന്ന് നിരവധി വീടുകളില്‍ വെള്ളം കയറിയിട്ടുണ്ട്. വെളിയം-ചേന്നമറ്റം-പെരുമ്പനച്ചി തോട് കരകവിഞ്ഞതിനെത്തുടര്‍ന്ന് മാടപ്പള്ളി പഞ്ചായത്തിലെ കൊഴുപ്പക്കളം കുര്യാനിമറ്റം ഭാഗത്തെ ഇരുപതിലേറെ വീടുകളിലും വെള്ളം കയറിയിട്ടുണ്ട്. ചങ്ങനാശേരി കെഎസ്ആര്‍ടിസി ഡിപ്പോയില്‍നിന്നും വെളിയനാടിനുള്ള ബസുകള്‍ സ്വതന്ത്രമുക്കുവരെ മാത്രമേ സര്‍വീസ് നടത്തുന്നുള്ളൂ. മുട്ടാര്‍വഴി എടത്വായ്ക്കുള്ള സര്‍വീസുകള്‍ നിര്‍ത്തിവച്ചു. ഫാമും 25 പശുക്കളും വെള്ളത്തിലായി കോട്ടയം: ഏക വരുമാനമാർഗമായ പശുഫാം വെള്ളത്തിലായതോടെ ആകെ വലയുകയാണ് തങ്കമ്മ. അയ്മനം പഞ്ചായത്ത് നാലാം വാര്‍ഡില്‍ പുതുവാപ്പറമ്പ് തങ്കമ്മയ്ക്ക് ഫാമിലുള്ളത് 25 പശുക്കളാണ്. വ്യാഴാഴ്ച വൈകുന്നേരത്തോടെയാണു മീനച്ചിലാറ്റില്‍നിന്നുള്ള വെള്ളം ഫാമിലേക്ക് ഇരച്ചെത്തിയത്. ഇതോടെ 25 പശുക്കളെയും അഴിച്ച് വെള്ളക്കെട്ടിലൂടെ നടന്ന് തങ്കമ്മ വീടിനുസമീപം ഉയര്‍ന്ന ഭാഗത്ത് ടാര്‍പോളിന്‍ കെട്ടി പാര്‍പ്പിച്ചിരിക്കുകയാണ്. താഴ്ന്ന പ്രദേശങ്ങളും പാടങ്ങളും വെള്ളത്തിലായതോടെ പശുക്കൾക്ക് തീറ്റയും വെള്ളവും കൊടുക്കുക ഏറെ ക്ലേശകരമാണ്. മികച്ച ക്ഷീരകര്‍ഷകയ്ക്കുള്ള പുരസ്‌കാരങ്ങള്‍ തങ്കമ്മ നേടിയിട്ടുണ്ട്.

ദേശീയപാതയോരങ്ങളിൽ നിൽക്കുന്ന മരങ്ങൾ അപകടഭീഷണി ഉയർത്തുന്നു

കാഞ്ഞിരപ്പള്ളി: മഴയ്ക്കൊപ്പം ശക്തമായ കാറ്റും വീശുന്നതു കൊണ്ട് ദേശീയപാതയോരങ്ങളിൽ ഉണങ്ങിയും കേടുപിടിച്ചും നിൽക്കുന്ന മരങ്ങൾ അപകടഭീഷണി ഉയർത്തുന്നുവെന്ന് പരാതി. പൊടിമറ്റത്ത് സെന്‍റ് ഡൊമിനിക്സ് കോളജിനു മുന്പിൽ ദേശീയപാതയുടെ ഇരുവശവും നിൽക്കുന്ന മരങ്ങളിൽ ഇനിയും അപകടഭീഷണിയായി നിൽക്കുന്ന മരങ്ങളുണ്ട്. കാലവർഷം തുടങ്ങി മൂന്നു ദിവസത്തിനുള്ളിൽ കോളജിനു മുന്പിൽ നിന്ന രണ്ടു മരങ്ങൾ ഒടിഞ്ഞും ഒരു മരം കടപുഴകിയും വീണു. തിങ്കളാഴ്ച ഒരു മരത്തിന്‍റെ ശിഖരം ഒടിഞ്ഞു ദേശീയപാതയിലേക്കു വീണ് ഗതാഗതം തടസപ്പെടുകയും മറ്റൊരു മരം കടപുഴകി കോളജ് മൈതാനത്തേക്കു വീഴുകയും ചെയ്തു. ബുധനാഴ്ച ഒരു മരം ഒടിഞ്ഞു കോളജിലെ ബൈക്ക് ഷെഡിലേക്കും വീണു. രണ്ടു വർഷം മുന്പ് ഇവിടെ ഓടിക്കൊണ്ടിരുന്ന ഹൈവേ പോലീസിന്‍റെ വാഹനത്തിനു മേൽ മരം ഒടിഞ്ഞുവീണ് അപകടം ഉണ്ടായിരുന്നു. മഴയും കാറ്റും ഉണ്ടായാൽ കോളജിനു മുന്പിൽ മരം വീഴുമെന്ന സ്ഥിതിയാണ്. കോളജിനു മു‍ന്പിൽ കേടുപിടിച്ചും ഉണങ്ങിയും നിൽക്കുന്ന മരങ്ങൾ വെട്ടിമാറ്റണമെന്ന് ആവശ്യപ്പെട്ട് മുന്പ് പരാതി നൽകിയിട്ടും നടപടിയുണ്ടായില്ല. കഴിഞ്ഞ ദിവസം മൂന്ന് മരങ്ങൾ വീണ സാഹചര്യത്തിൽ നൽകിയ പരാതിയെത്തുടർന്നു ദുരന്ത നിവരാണ നിയമപ്രകാരം ഇന്നലെ കോളജിനു മുന്പിൽ വീഴാറായി നിന്ന മരങ്ങൾ ദേശീയപാത അധികൃതർ വെട്ടിത്തുടങ്ങി. കഴിഞ്ഞ ദിവസം ഒടിഞ്ഞ മരങ്ങളുടെ ബാക്കി ഭാഗവും മൂന്നു മരങ്ങളുടെ ശിഖരങ്ങളുമാണ് വെട്ടിമാറ്റുന്നത്. മരങ്ങളുടെ കാലപ്പഴക്കം മുൻകൂട്ടി കണക്കാക്കി പകരം മരങ്ങൾ വച്ചുപിടിപ്പിച്ച ശേഷം ഇവ വെട്ടിമാറ്റി അപകടങ്ങൾ ഒഴിവാക്കണമെന്ന ആവശ്യം ഇതോടൊപ്പം ശക്തമാണ്. എല്ലാ വർഷവും മലയോര പാതകളിൽ മരങ്ങൾ വീണ് അപകടങ്ങളും ഗതാഗത തടസവും ഉണ്ടാകാറുണ്ട്.

സ്കിൽ ഡെവലപ്മെന്‍റ് സെന്‍റർ ആരംഭിച്ചു

മുരിക്കുംവയൽ: ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിൽ നൈപുണ്യ വികസന കേന്ദ്രവും പ്രവേശനോത്സവവും സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്തു. പിടിഎ പ്രസിഡന്‍റ് കെ.ടി. സനിൽ അധ്യക്ഷത വഹിച്ചു. കംപ്യൂട്ടർ ലാബിന്‍റെ ഉദ്ഘാടനം കോട്ടയം ജില്ലാ പഞ്ചായത്തംഗം ശുഭേഷ് സുധാകരൻ നിർവഹിച്ചു. ജില്ലാ പഞ്ചായത്തംഗം പി.ആർ. അനുപമ മുഖ്യപ്രഭാഷണം നടത്തി. കാഞ്ഞിരപ്പള്ളി ബ്ലോക്ക് പഞ്ചായത്തംഗം പി.കെ. പ്രദീപ്, മുണ്ടക്കയം പഞ്ചായത്തംഗം കെ.എൻ. സോമരാജൻ, കാഞ്ഞിരപ്പള്ളി ബിപിസി അജാസ് വാരിക്കാട്ട്, ഹയർ സെക്കൻഡറി പ്രിൻസിപ്പൽ ഡോ. ഡി.ജെ. സതീഷ്, വിഎച്ച്എസ്ഇ പ്രിൻസിപ്പൽ സുരേഷ് ഗോപാൽ, എസ്എംസി ചെയർമാൻ രാജേഷ് മലയിൽ, സ്കൂൾ എച്ച്എം ഡോ. സ്മിത എസ്. നായർ, സീനിയർ അസിസ്റ്റന്‍റ് എം.പി. രാജേഷ് എന്നിവർ പ്രസംഗിച്ചു. 15 മുതൽ 23 വയസ് വരെയുള്ള യുവജനങ്ങൾക്ക് തൊഴിൽ സാധ്യതയുടെ അറിവും നൈപുണ്യവും നൽകുകയാണ് ലക്ഷ്യം. ഗ്രാഫിക് ഡിസൈനർ, ആനിമേറ്റർ എന്നീ കോഴ്സുകളാണുള്ളത്. സൗജന്യമായി നടത്തുന്ന ഈ കോഴ്സുകൾക്ക് പത്താം ക്ലാസാണ് വിദ്യാഭ്യാസ യോഗ്യത. ശനി, ഞായർ ദിവസങ്ങളിലും മറ്റ് അവധി ദിവസങളിലുമാണ് ക്ലാസുകൾ നടത്തുന്നത്. ഒരു വർഷം 400 മണിക്കൂർ ക്ലാസും 40 മണിക്കൂർ മോട്ടിവേഷൻ ക്ലാസുണുള്ളത്. ഒരു ക്ലാസിൽ 25 പേർക്കാണു പ്രവേശനം.

ദൈവമാതാവിന്‍റെ വിവിധ പ്രത്യക്ഷീകരണങ്ങളെ ദൃശ്യവത്കരിച്ച് കുറവിലങ്ങാട് ഇടവക

കുറവിലങ്ങാട്: ദൈവമാതാവിന്‍റെ പ്രത്യക്ഷീകരണങ്ങളെ ദൃശ്യവത്കരിക്കാൻ തയാറെടുപ്പുകൾ പൂർത്തീകരിച്ച് മേജർ ആർക്കിഎപ്പിസ്‌കോപ്പൽ മർത്ത്മറിയം ഇടവക. ദൈവമാതാവിന്‍റെ വണക്കമാസാചരണത്തോടനുബന്ധിച്ച് ഇടവകയിലെ എസ്എംവൈഎം യൂണിറ്റാണ് ദൈവമാതാവിന്‍റെ പ്രത്യക്ഷീകരണങ്ങളുടെ നേരനുഭവം വിശ്വാസികൾക്ക് സമ്മാനിക്കുന്നത്. ലോകചരിത്രത്തിൽ ആദ്യമായി ദൈവമാതൃപ്രത്യക്ഷീകരണത്തിന് വേദിയായ മണ്ണിലാണ് അമ്മയുടെ വിവിധ രാജ്യങ്ങളിലും കാലങ്ങളിലുമുള്ള പ്രത്യക്ഷീകരണങ്ങളുടെ ഓർമകൾ സമ്മാനിക്കുന്നതെന്നത് ശ്രദ്ധേയമാണ്. ഇടവകയിലെ 28 വാർഡുകളെ പ്രതിനിധീകരിച്ച് 28 പ്രത്യക്ഷീകരണങ്ങളും എസ്എംവൈഎം യൂണിറ്റിന്‍റെ നേതൃത്വത്തിൽ രണ്ട് പ്രത്യക്ഷീകരണങ്ങളും ചേർത്ത് 30 മാതൃപ്രത്യക്ഷീകരണങ്ങളാണ് ദൃശ്യവത്കരിച്ച് കൈമാറുന്നത്. മാർത്തോമ്മാ പാരമ്പര്യങ്ങളെ മുറുകെപ്പിടിച്ചാണ് മാതൃഭക്തിയുടെ നേർക്കാഴ്ച ഒരുക്കുന്നത്. വണക്കമാസാചരണ സമാപനത്തോടനുബന്ധിച്ച് വൈകുന്നേരം അഞ്ചിന് വിശുദ്ധ കുർബാനയും ജപമാല മെഴുകുതിരി പ്രദക്ഷിണവും നടക്കും. ദൈവമാതാവിന്‍റെ പ്രത്യക്ഷീകരങ്ങളുടെ വിശ്വാസതീവ്രത സമ്മാനിച്ച് ദൈവമാതാവിന്‍റെ ഓരോ സ്ഥലങ്ങളിലുമുള്ള പ്രത്യക്ഷീകരണ സന്ദേശങ്ങൾ കൈമാറുംവിധമുള്ള വേഷവിധാനങ്ങളോടെ ഓരോ വാർഡുകളിൽനിന്നുമുള്ള പ്രതിനിധികൾ ജപമാലപ്രദക്ഷിണത്തിൽ അണിചേരും.

പാലായില്‍ മൊബൈല്‍ വെറ്ററിനറി യൂണിറ്റ് പ്രവര്‍ത്തനം ആരംഭിച്ചു

‌പാലാ: വളര്‍ത്തുമൃഗങ്ങള്‍ക്ക് രാത്രികാല ചികിത്സയ്ക്കായി പാലാ സര്‍ക്കാര്‍ മൃഗാശുപത്രിയില്‍ മൊബൈല്‍ വെറ്ററിനറി യൂണിറ്റ് പ്രവര്‍ത്തനം ആരംഭിച്ചു. വൈകുന്നേരം ആറുമുതല്‍ പുലര്‍ച്ചെ അഞ്ചുവരെയാണ് മൊബൈല്‍ യൂണിറ്റിന്‍റെ പ്രവര്‍ത്തനം. രാത്രികാലങ്ങളില്‍ വളര്‍ത്തുമൃഗങ്ങള്‍ക്ക് അടിയന്തര ചികിത്സയ്ക്കായി 1962 എന്ന ടോള്‍ ഫ്രീ നമ്പറിലേക്ക് വിളിക്കാം. ചികിത്സ വീട്ടുമുറ്റത്ത് ലഭിക്കും. ഒരു ഡോക്ടറുടെയും അറ്റന്‍ഡറുടെയും സേവനം മൊബൈല്‍ യൂണിറ്റില്‍ ഉണ്ടാവും. വാഹനത്തില്‍ സജ്ജമാക്കിയിട്ടുള്ള ക്യൂആര്‍ കോഡ് വഴി നേരിട്ട് ഫീസ് അടയ്ക്കാം. മൊബൈല്‍ യൂണിറ്റിന്‍റെ ഉദ്ഘാടനവും ഫ്‌ളാഗ്ഓഫ് കര്‍മവും മാണി സി. കാപ്പന്‍ എംഎല്‍എ നിര്‍വഹിച്ചു. പാലാ മൃഗാശുപതിയില്‍ നടന്ന ചടങ്ങില്‍ നഗരസഭാ ചെയര്‍മാന്‍ തോമസ് പീറ്റര്‍ അധ്യക്ഷത വഹിച്ചു. വൈസ് ചെയര്‍പേഴ്‌സണ്‍ ബിജി ജോജോ, കൗണ്‍സിലര്‍ സാവിയോ കാവുകാട്ട്, ഡോ. കെ.പി. നീതു, സീനിയര്‍ വെറ്ററിനറി സര്‍ജന്‍ ജോജി മാത്യു, ഡോ. ധനേഷ് കൃഷ്ണന്‍ തുടങ്ങിയവര്‍ പങ്കെടുത്തു. മൃഗസംരക്ഷണ വകുപ്പ് ളാലം ബ്ലോക്ക് കേന്ദ്രീകരിച്ച് റീബില്‍ഡ് കേരള ഇനിഷ്യേറ്റീവ് പദ്ധതിയില്‍ ഉള്‍പ്പെടുത്തിയാണ് മൊബൈല്‍ വെറ്ററിനറി യൂണിറ്റ് അനുവദിച്ചത്. ളാലം ബ്ലോക്കിന് അനുവദിച്ച മൊബൈല്‍ സേവനം ഈരാട്ടുപേട്ട ബ്ലോക്ക് ഉള്‍പ്പെടെയുള്ള പഞ്ചായത്തുകള്‍ക്കും ലഭിക്കും.

ഐഎച്ച്ആര്‍ഡി കോളജ് കെട്ടിടനിർമാണത്തിന് ഒരു കോടി അനുവദിക്കുമെന്ന്

കാഞ്ഞിരപ്പള്ളി: ഐഎച്ച്ആര്‍ഡി കോളജിനായി എംഎല്‍എ ഫണ്ടില്‍നിന്ന് അനുവദിക്കുന്ന തുക വിനിയോഗിച്ച് കെട്ടിടനിര്‍മാണം ആരംഭിക്കാന്‍ കോളജ് വികസനസമിതിയില്‍ തീരുമാനം. പൊതുവിദ്യാഭ്യാസ വകുപ്പ് കോളജിന് കെട്ടിടം നിര്‍മിക്കുന്നതിന് 50 സെന്‍റ് സ്ഥലം നല്‍കിയിരുന്നു. ഈ സ്ഥലത്താണ് കെട്ടിടം നിര്‍മിക്കുന്നത്. ആദ്യ ഘട്ടത്തില്‍ എംഎല്‍എ ഫണ്ടില്‍ ഒരു കോടി രൂപ അനുവദിക്കുമെന്ന് ചീഫ് വിപ്പ് ഡോ. എന്‍. ജയരാജ് പറഞ്ഞു. ഒന്നാം നില പൂര്‍ത്തിയാക്കിയ ശേഷം ഐച്ച്ആര്‍ഡിയുടെ അടക്കം ഫണ്ട് ലഭ്യമാക്കുന്നതിനുള്ള ശ്രമങ്ങള്‍ നടത്തുമെന്ന് എംഎല്‍എ പറഞ്ഞു. നിര്‍മാണം സമയബന്ധിതമായി പൂര്‍ത്തിയാക്കുന്നതിന് കോളജ് വികസനസമിതിയെ ചുമതലപ്പെടുത്തി. ചീഫ് വിപ്പ് ഡോ. എന്‍. ജയരാജ് യോഗം ഉദ്ഘാടനം ചെയ്തു. ബ്ലോക്ക് പഞ്ചായത്തംഗം ഷക്കീല നസീര്‍, പഞ്ചായത്തംഗങ്ങളായ പി.എ. ഷെമീര്‍, ബിജു ചക്കാല, കോളജ് പ്രിന്‍സിപ്പല്‍ എസ്. സുരേഷ് കുമാര്‍ തുടങ്ങിയവര്‍ പ്രസംഗിച്ചു.

നിരവധി ലഹരിമരുന്നു കേസുകളിലെ പ്രതി 7.8 കിലോ കഞ്ചാവുമായി അറസ്റ്റില്‍

ചങ്ങനാശേരി: വിശാഖപട്ടണത്തുനിന്നും ട്രെയിന്‍മാര്‍ഗം കഞ്ചാവ് കടത്തിക്കൊണ്ടു വന്നയാളെ ചങ്ങനാശേരി പോലീസ് പിടികൂടി. ഫാത്തിമാപുരം കുന്നക്കാട് മാരിയമ്മന്‍ കോവിലിന് സമീപം വാടകവീട്ടില്‍ താമസിക്കുന്ന ഷെറോണ്‍ നജീബി (44)നെയാണ് ചങ്ങനാശേരി റെയില്‍വേ സ്റ്റേഷന്‍ ഭാഗത്തുനിന്ന് 7.8കിലോ കഞ്ചാവുമായി ചങ്ങനാശേരി പോലീസ് അറസ്റ്റ് ചെയ്തത്. സ്‌കൂള്‍ തുറക്കലിനോടനുബന്ധിച്ച് ലഹരി വ്യാപനം തടയുക എന്ന ഉദ്ദേശത്തോടെ ജില്ലാ പോലീസ് മേധാവിയുടെ നേതൃത്വത്തില്‍ ആസൂത്രണം ചെയ്ത പദ്ധതിയുടെ ഭാഗമായി ചങ്ങനാശേരി പോലീസ് നടത്തിയ പരിശോധനയിലാണ് റെയില്‍വേ സ്റ്റേഷനില്‍നിന്ന് ഇയാളെ പിടികൂടിയത്. കോട്ടയം ജില്ലാ പോലീസ് മേധാവിക്കു ലഭിച്ച രഹസ്യവിവരത്തിന്‍റെ അടിസ്ഥാനത്തില്‍ ഡിവൈഎസ്പി എ.കെ. വിശ്വനാഥന്‍റെ നിര്‍ദേശാനുസരണം പോലീസ് ഇന്‍സ്‌പെക്ടര്‍ ബി. വിനോദ് കുമാറിന്‍റെ നേതൃത്വത്തില്‍ എസ്‌ഐ സന്ദീപ്, എസ്ഐ രാജേഷ്, സീനിയര്‍ സിപിഒ ക്രിസ്റ്റഫര്‍, സിപിഒ പ്രശാന്ത് അഗസ്റ്റിന്‍, രാജീവ്, രഞ്ജിത്ത്, പ്രദീഷ് എന്നിവരടങ്ങുന്ന പോലീസ് സംഘവും കോട്ടയം ജില്ലാ പോലീസ് മേധാവിയുടെ ലഹരിവിരുദ്ധ സ്‌ക്വാഡും ചേര്‍ന്നാണ് ഇയാളെ അറസ്റ്റ് ചെയ്തത്. വന്‍തോതില്‍ കഞ്ചാവ് കടത്തിക്കൊണ്ടുവന്നു ചെറിയ പൊതികളിലാക്കി സ്‌കൂള്‍-കോളജ് വിദ്യാര്‍ഥികള്‍ക്കിടയില്‍ കച്ചവടം നടത്തുന്നതാണ് ഇയാളുടെ രീതി. മുന്‍പ് പലതവണ ഇയാളെ ഇത്തരം കേസില്‍ പിടികൂടിയിട്ടുള്ളതാണ്. ചങ്ങനാശേരി എക്‌സൈസ് സ്റ്റേഷനില്‍ 2016, 2018, 2019, 2024, എന്നീ വര്‍ഷങ്ങളില്‍ രജിസ്റ്റര്‍ ചെയ്തിട്ടുളള എന്‍ഡിപിഎസ് കേസുകളിലെ പ്രതിയാണ്. ഇയാള്‍ക്കെതിരേ ചങ്ങനാശേരി പോലീസ് സ്റ്റേഷനില്‍ 2016 ല്‍ കഞ്ചാവ് കേസും 2009, 2010 വര്‍ഷങ്ങളില്‍ അടിപിടിക്കേസും രജിസ്റ്റര്‍ ചെയ്തിട്ടുണ്ട്.

പുന്നവേലി സെന്‍റ് ജോണ്‍സ് ഓര്‍ത്തഡോക്‌സ് പള്ളി കൂദാശ

പുന്നവേലി: സെന്‍റ് ജോണ്‍സ് ഓര്‍ത്തഡോക്‌സ് ഇടവകയുടെ നവീകരിച്ച ദേവാലയത്തിന്‍റെ കൂദാശ നാളെയും ഞായറാഴചയുമായി നടത്തും. എപ്പിസ്‌കോപ്പല്‍ സുന്നഹദോസ് സെക്രട്ടറിയും നിരണം ഭദ്രാസന മെത്രാപ്പോലീത്തായുമായ ഡോ. യൂഹാനോന്‍ മാര്‍ ക്രിസോസ്റ്റമോസ് മെത്രാപ്പോലീത്ത മുഖ്യകാര്‍മികത്വം വഹിക്കും. നാളെ വൈകുന്നേരം ആറിന് സന്ധ്യാനമസ്‌കാരം, ഏഴിന് വിശുദ്ധ ദേവാലയ കൂദാശ തുടര്‍ന്ന് ആശീര്‍വാദം, സ്‌നേഹസത്കാരം. ഒന്നിനു രാവിലെ ഏഴിന് പ്രഭാത നമസ്‌കാരം തുടര്‍ന്ന് മൂന്നിന്മേല്‍ കുര്‍ബാന, 10ന് പൊതുസമ്മേളനം, ആശീര്‍വാദം, സ്‌നേഹവിരുന്ന്. ഇടവക വികാരി ഫാ. ബബിന്‍ ബാബു, ട്രസ്റ്റി സാജന്‍ ജോണ്‍സണ്‍ ചൊറിക്കാവുങ്കല്‍, സെക്രട്ടറി ഡോ. സജു പി. തോമസ് പരുമല തുടങ്ങിയവര്‍ നേതൃത്വം നല്‍കും.

മുൻസിഫ് കോടതിവളപ്പിലെ മുത്തശി പുളിമരം നിലംപൊത്തി, ആരെയും നോവിക്കാതെ...

ചങ്ങനാശേരി: ഒരു നൂറ്റാണ്ടിലേറെയായി മുനിസിഫ് കോടതി പരിസരത്ത് അഭിഭാഷകര്‍ക്കും കേസുകളിലെ കക്ഷികള്‍ക്കും തണലേകി ആശ്വാസം പകര്‍ന്നുനിന്ന മുത്തശി പുളിമരം നിലംപൊത്തി. മുനിസിഫിന്‍റെ ചേംബറില്‍ മുനിസിഫ് സരിഗയും ബഞ്ച് ക്ലാര്‍ക്കുമുണ്ടായിരുന്നു. കോടതി കെട്ടിടത്തിന്‍റെ മുകളിലെ ഓടുകള്‍ പൊട്ടി വീണിട്ടുണ്ട്. മറ്റ് അപകടങ്ങളോ ആളപായങ്ങളോ സൃഷ്ടിക്കാതെയാണ് പുളിമരം ശാന്തമായി നിലംപൊത്തിയത്. കഴിഞ്ഞ ദിവസങ്ങളിലായി പെയ്ത മഴയിലും കാറ്റിലും അടിപതറി ഇന്നലെ രാവിലെ 10.30നാണ് പുളിമരം വിടവാങ്ങിയത്. കോടതി ആരംഭിക്കുന്നത് രാവിലെ 11നായതിനാല്‍ അഭിഭാഷകരും കക്ഷികളും എത്തുന്നതെ ഉണ്ടായിരുന്നുള്ളു. അതിനാല്‍ വന്‍ദുരന്തം ഒഴിവായി. മുനിസിഫ് കോടതിയുടെ കവാടത്തിലാണ് അനേകം വര്‍ഷങ്ങളായി ഈ പുളിമരം ശാഖകള്‍ വിരിച്ച് തണലും കാറ്റും പകര്‍ന്നു നിന്നത്. പുളിമരച്ചുവട്ടില്‍ കോടതിയില്‍ എത്തുന്ന നിരവധിപ്പേര്‍ വിശ്രമിച്ചിരുന്നു. മുനിസിഫ് കോടതി, മുനിസിഫിന്‍റെ ചേംബര്‍, മുനിസിഫിന്‍റെ ക്വാര്‍ട്ടേഴ്‌സ്, മീഡിയേഷന്‍ സെന്‍റര്‍, പഴയ ബാര്‍ അസോസിയേഷന്‍ ഹാള്‍ തുടങ്ങിയ കെട്ടിടങ്ങളാണ് ഇവിടെയുള്ളത്. ചങ്ങനാശേരിയെ നിയമസാക്ഷരതാ നഗരമായി മുന്‍ കേരള ഗവര്‍ണര്‍ പി. സദാശിവം പ്രഖ്യാപിച്ച ശിലാഫലകം ഈ പുളിമരത്തിനു ചുവട്ടിലാണ് സ്ഥാപിച്ചിരിക്കുന്നത്. ഇതിനും കേടുപാടുകളില്ല. സംഭവം അറിഞ്ഞയുടനെ അഭിഭാഷകര്‍ ഓടിയെത്തി. സമീപത്തുള്ള റവന്യു ടവറില്‍ പ്രവര്‍ത്തിക്കുന്ന താലൂക്ക് ഓഫീസില്‍നിന്നു റവന്യു അധികാരികളുമെത്തി. കെട്ടിടങ്ങള്‍ക്ക് കേടുപാടുകളുണ്ടാകാതെ പുളിമരം മുറിച്ചുമാറ്റുന്ന ജോലികള്‍ തുടരുകയാണ്. രണ്ടുവര്‍ഷം മുമ്പാണ് മുനിസിഫ് കോടതി ശതാബ്ദി ആഘോഷിച്ചത്. കോടതിയോളം പ്രായം പുളിമരത്തിനുമുണ്ടെന്നാണ് സമീപവാസികളും അഭിഭാഷകരും ചൂണ്ടിക്കാട്ടുന്നത്.

ചങ്ങനാശേരി വെറ്ററിനറി പോളി ക്ലിനിക്കില്‍ മൊബൈല്‍ യൂണിറ്റ് അനുവദിച്ചു

ചങ്ങനാശേരി: കേരള സര്‍ക്കാര്‍ മൃഗസംരക്ഷണ വകുപ്പ് റീബിള്‍ഡ് കേരള ഇനിഷ്യേറ്റീവ് പദ്ധതിയില്‍ ഉള്‍പ്പെടുത്തി ചങ്ങനാശേരി ഗവ. വെറ്റിനറി പൊളി ക്ലിനിക് കേന്ദ്രികരിച്ച് മൊബൈല്‍ വെറ്ററിനറി യൂണിറ്റ് അനുവദിച്ചു. ഈ മൊബൈല്‍ വെറ്ററിനറി യൂണിറ്റിന്‍റെ പ്രവര്‍ത്തനം മാടപ്പള്ളി, പാമ്പാടി ബ്ലോക്ക് പഞ്ചായത്തുകളില്‍ക്കുടി ലഭ്യമാണ്. വൈകുന്നേരം ആറു മുതല്‍ പുലര്‍ച്ചെ അഞ്ചുവരെയാണ് മൊബൈല്‍ വെറ്റിനറി യൂണിറ്റിന്‍റെ പ്രവര്‍ത്തനം. മൊബൈല്‍ യൂണിറ്റിന്‍റെ സേവനത്തിനായി 1962 എന്ന ടോള്‍ഫ്രീ നമ്പറും മൃഗസംരക്ഷണ വകുപ്പ് തയാറാക്കിയിട്ടുണ്ട്. വാഹനത്തില്‍ സജ്ജമാക്കിയിരിക്കുന്ന ക്യുആര്‍ കോഡ് വഴി കര്‍ഷകര്‍ക്ക് നേരിട്ട് ഫീസ് അടയ്ക്കാവുന്നതാണ്. മൊബൈല്‍ വെറ്റിനറി യൂണിറ്റിന്‍റെ ഉദ്ഘാടനവും ഫ്‌ളാഗ് ഓഫ് കര്‍മവും ഇന്നു രാവിലെ 11ന് ചങ്ങനാശേരി ഗവ. വെറ്റിനറി പോളിക്ലിനിക്കില്‍ ജോബ് മൈക്കിള്‍ എംഎല്‍എ നിര്‍വഹിക്കും. മുന്‍സിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ അധ്യക്ഷത വഹിക്കും. കോട്ടയം ജില്ലാ മൃഗസംരക്ഷണ വകുപ്പ് ഡെപ്യൂട്ടി ഡയറക്ടര്‍ ഡോ. മാത്യു ഫിലിപ്പ്, മുനിസിപ്പല്‍ വൈസ് ചെയര്‍മാന്‍ മാത്യുസ് ജോര്‍ജ്, മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു, പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയ്, പായിപ്പാട് പഞ്ചായത്ത് പ്രസിഡന്‍റ് കെ.ഡി. മോഹനന്‍, കുറിച്ചി പഞ്ചായത്ത് പ്രസിഡന്‍റ് സുജാത സുശീലന്‍, മാടപ്പള്ളി പഞ്ചായത്ത് പ്രസിഡന്‍റ് മണിയമ്മ രാജപ്പന്‍, വാഴപ്പള്ളി പഞ്ചായത്ത് പ്രസിഡന്‍റ് മിനി വിജയകുമാര്‍, തൃക്കൊടിത്താനം പഞ്ചായത്ത് പ്രസിഡന്‍റ് മോളി ജോസഫ് എന്നിവര്‍ പ്രസംഗിക്കും.

നഗരസഭാ പരിധിയില്‍ അപകടാവസ്ഥയിലുള്ള മരങ്ങളും ശിഖരങ്ങളും വെട്ടിമാറ്റാന്‍ തീരുമാനം

ചങ്ങനാശേരി: മഴക്കാല ദുരന്തനിവാരണത്തിന് കര്‍ശന നടപടികളുമായി നീങ്ങാന്‍ നഗരസഭയില്‍ വിളിച്ചുകൂട്ടിയ യോഗത്തില്‍ തീരുമാനം. യോഗത്തില്‍ പങ്കെടുക്കാതിരുന്ന പൊതുമരാമത്തു വകുപ്പ് ഉദ്യോഗസ്ഥര്‍ക്ക് വിശദീകരണമാവശ്യപ്പെട്ട് നോട്ടീസ് നല്‍കാനും യോഗം തീരുമാനിച്ചു. വാഴൂര്‍ റോഡില്‍ നഗരസഭാ പരിധിയില്‍ പാറേല്‍ പള്ളിക്കു സമീപം തുടര്‍ച്ചയായി രണ്ടുദിവസം റോഡിലേക്കു മരം കടപുഴകിവീണ് ഗതാഗതം തടസപ്പെട്ട സാഹചര്യം പരിഗണിച്ച് വാഴൂര്‍ റോഡില്‍ കുരിശുംമൂടു വരെയും ചങ്ങനാശേരി ബൈപാസ് റോഡിലും അപകടകരമായ സാഹചര്യത്തില്‍ നില്‍ക്കുന്ന മരങ്ങളും ശിഖരങ്ങളും അടിയന്തരമായി വെട്ടിമാറ്റും. ദുരന്തനിവാരണത്തിനായി 37 വാര്‍ഡുകൾക്കും പതിനായിരം രൂപാ വീതം അനുവദിച്ചു. നഗരശുചീകരണത്തിനും ഓടകളിലെ ഒഴുക്ക് തടസം നീക്കുന്നതിനുമായി നിലവിലുള്ള 41 തൊഴിലാളികളെ കൂടാതെ പത്ത് താത്കാലിക തൊഴിലാളികളെക്കൂടി നിയോഗിക്കും. അപകടാവസ്ഥയിലുള്ള വൈദ്യുതി പോസ്റ്റുകളും ലൈനുകളും പരിശോധിച്ച് നടപടി സ്വീകരിക്കാന്‍ യോഗം കെഎസ്ഇബി ജീവനക്കാര്‍ക്കു നിര്‍ദേശം നല്‍കി. ദുരിതാശ്വാസ ക്യാമ്പുകളില്‍ ശുദ്ധജലവും ആഹാരസാധനങ്ങളും മരുന്നും എത്തിക്കാനും തീരുമാനിച്ചു. മുനിസിപ്പല്‍ കൗണ്‍സില്‍ ഹാളില്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍റെ അധ്യക്ഷതയിലാണ് യോഗം ചേര്‍ന്നത്. വൈസ് ചെയര്‍മാന്‍ മാത്യൂസ് ജോര്‍ജ്, സ്റ്റാന്‍ഡിംഗ് കമ്മിറ്റി ചെയര്‍മാന്‍മാര്‍, പോലീസ്, ആരോഗ്യവകുപ്പ്, ഫയര്‍ഫോഴ്‌സ്, റവന്യു, വൈദ്യുതി, വാട്ടര്‍ അഥോറിറ്റി, കൃഷി, മൃഗസംരക്ഷണ വകുപ്പ് ഉദ്യോഗസ്ഥര്‍ പങ്കെടുത്തു.

കൊടുങ്കാറ്റും പേമാരിയും : മരങ്ങള്‍ കടപുഴകുന്നു, വീടുകള്‍ക്ക് നാശം; താഴ്ന്ന പ്രദേശങ്ങള്‍ വെള്ളപ്പൊക്ക ഭീഷണിയില്‍

ചങ്ങനാശേരി: പേമാരിയിലും കൊടുങ്കാറ്റിലും മരങ്ങള്‍ കടപുഴകുന്നു, നിരവധി വീടുകള്‍ക്ക് നാശനഷ്ടം. താലൂക്കിന്‍റെ താഴ്ന്ന പ്രദേശങ്ങളില്‍ ജലനിരപ്പുയരുന്നു. കിഴക്കന്‍വെള്ളം ശക്തിയായി എത്തുന്നു. പായിപ്പാട് പഞ്ചായത്തിലെ പൂവം, പെരുമ്പുഴക്കടവ്, നക്രാല്‍ പ്രദേശങ്ങളിലും വാഴപ്പള്ളി പഞ്ചായത്തിലെ പറാല്‍, വെട്ടിത്തുരുത്ത് മേഖലകളിലും വെള്ളപ്പൊക്കം ദുരിതം വര്‍ധിച്ചിട്ടുണ്ട്. പെരുന്ന ഗവൺമെന്‍റ് യുപി സ്‌കൂള്‍, ഗവൺമെന്‍റ് മോഡല്‍ ഹൈസ്‌കൂള്‍, പണ്ടകശാല സെന്‍റ് ജയിംസ് യുപി സ്‌കൂളുകളില്‍ ദുരിതാശ്വാസ ക്യാമ്പുകള്‍ ആരംഭിച്ചിട്ടുണ്ട്. 20 കുടുംബങ്ങളിലെ അമ്പതോളം പേരെ ക്യാമ്പുകളിലേക്കു മാറ്റിയിട്ടുണ്ട്. പുഴവാത് യുപി സ്‌കൂളും ക്യാമ്പിനായി സജ്ജമാക്കിയിട്ടുണ്ട്. പായിപ്പാട് പഞ്ചായത്തിലെ പൂവം പ്രദേശത്തെ റോഡുകളും നിരവധി വീടുകളും വെള്ളത്തിലായി. മലേപുതുവല്‍, അറുനൂറില്‍ പുതുവല്‍, എടവന്ത്ര, കോമങ്കേരിച്ചിറ, എസി കോളനി, കാവാലിക്കരച്ചിറ,വാഴപ്പള്ളി പഞ്ചായത്തിലെ നത്തനടിച്ചിറ, ഇരത്ര, ചാമ, തൂപ്രം, പുതുച്ചിറ ഭാഗങ്ങളും നഗരപരിധിയിലെ വാലുമ്മേച്ചിറ, മഞ്ചാടിക്കര, കോണത്തോടി ഭാഗങ്ങളും വെള്ളപ്പൊക്ക ഭീഷണിയിലാണ്. എസി റോഡിലെ ആവണി, പൂവം, പാറയ്ക്കല്‍ ഭാഗങ്ങളിലും വെള്ളക്കെട്ട് ഉണ്ടായിട്ടുണ്ട്. എസി കനാലിലും ജലനിരപ്പുയര്‍ന്നിട്ടുണ്ട്. ശക്തമായ കാറ്റിലും മഴയിലും വാഴൂര്‍ റോഡില്‍ പാറേല്‍ പള്ളിക്ക് സമീപം റോഡരികില്‍ നിന്ന തണല്‍ മരം കടപുഴകി വീണു. നൂറുകണക്കിന് വാഹനങ്ങളും യാത്രക്കാരും കടന്നുപോകുന്ന തിരക്കേറിയ റോഡിലാണ് മരം വീണതെങ്കിലും ഭാഗ്യവശാല്‍ അപകടങ്ങളില്ല. മരം വീണതിനെ തുടര്‍ന്ന് റോഡില്‍ ഗതാഗതം തടസപ്പെട്ടു. ചങ്ങനാശേരി ഫയര്‍ ഫോഴ്‌സ് എത്തി മരം മുറിച്ചു മാറ്റിയാണ് ഗതാഗതം പുനഃസ്ഥാപിച്ചത്. ബുധനാഴ്ചയും ഇതിനു സമീപത്തു നിന്ന മറ്റൊരു മരം കാറ്റില്‍ നിലംപതിച്ച് ഗതാഗതം കുരുങ്ങിയിരുന്നു. തുടര്‍ച്ചയായി മരങ്ങള്‍ വീണ് അപകങ്ങള്‍ ഉണ്ടാവുന്ന സാഹചര്യത്തില്‍ പാറേല്‍ പള്ളിക്ക് എതിര്‍വശത്തുള്ള ആല്‍മരവും പൂവാകയും വെട്ടിമാറ്റി പൊതുജനങ്ങളുടെയും വാഹന യാത്രികരുടെയും സുരക്ഷ ഉറപ്പാക്കാന്‍ അധികാരികള്‍ തയാറാകണമെന്ന് ആവശ്യം ഉയര്‍ന്നിട്ടുണ്ട്. സ്‌കൂള്‍ തുറക്കുന്ന സാഹചര്യത്തില്‍ സ്‌കൂള്‍ പരിസരങ്ങളിലെ വെള്ളക്കെട്ട് ഒഴിവാക്കണമെന്ന് അധ്യാപകരും രക്ഷിതാക്കളും ആവശ്യം ഉയര്‍ത്തിയിട്ടുണ്ട്.

മരങ്ങൾ വീണ് വീട് തകർന്നു

വൈക്കം: കൊച്ചുപാലയ്ക്കൽ അടിച്ചത്തറ ലീലാമണിയുടെ വീടിനു മുകളിൽ മരം വീണ് വീട് ഭാഗികമായി തകർന്നു. വീടിന് എതിർവശമുള്ള പുരയിടത്തിലെ ആഞ്ഞിലി മരം തിങ്കളാഴ്ച രാവിലെ വീണിരുന്നു. ഇന്നലെ രാവിലെ 9.30ന് എതിർ ദിശയിലുള്ള മാവും തെങ്ങും ഒരുമിച്ച് വീടിനു മുകളിലേക്ക് വീഴുകയായിരുന്നു. വൈദ്യുതിപോസ്റ്റും തകർന്നു. വീട്ടിൽ ആളുണ്ടായിരുന്നുവെങ്കിലും ആർക്കും പരിക്കില്ല. മരം വീണത് കാൽനട യാത്രക്കാരെയടക്കം ദുരിതത്തിലാക്കി. വൈദ്യുതിയും തടസപ്പെട്ടു. ഫയർഫോഴ്സ് എത്തിയാണ് മരങ്ങൾ മുറിച്ചുമാറ്റിയത്.

വൈദ്യുതിമുടക്കം: നെൽകൃഷി നാശത്തിന്‍റെ വക്കിൽ

തലയോലപ്പറമ്പ്: വൈദ്യുതിമുടക്കം മൂലം125 ഏക്കറിലെ കൃഷി നാശത്തിന്‍റെ വക്കിൽ. വടയാർ പൊന്നുരുക്കുംപാറ പാടശേഖരത്തിലെ വർഷകൃഷിയാണ് വെള്ളത്തിൽ മുങ്ങിയത്. വിത കഴിഞ്ഞ് പത്തു ദിവസം കഴിഞ്ഞ പ്പോൾ മഴ ശക്തമായി. പാടശേഖരത്തിൽ വെള്ളം നിറഞ്ഞതോടെ കിളിർത്ത നെൽവിത്തുകൾ ചീഞ്ഞ് നശിക്കുന്ന സ്ഥിതിയിലാണ്. വൈദ്യുതിമുടക്കം പതിവായതോടെ പമ്പിംഗ് നടക്കുന്നില്ല. 27വർഷമായി മുടങ്ങിക്കിടന്ന വർഷകൃഷി ഇക്കുറിയാണ് പുനരാരംഭിച്ചത്. 80 കർഷകരാണ് കൃഷിയിറക്കിയത്. വൈദ്യുതിവിതരണം കാര്യക്ഷമമാക്കണമെന്ന് കർഷകർ ആവശ്യപ്പെട്ടു.

ഉദയഗിരിയിലെ മാലിന്യകേന്ദ്രം: അധികൃതർ നടപടികളാരംഭിച്ചു

കടുത്തുരുത്തി: മുളക്കുളം പഞ്ചായത്തിലെ ഉദയഗിരിയില്‍ കണ്ടെത്തിയ മാലിന്യ കേന്ദ്രം ഉയര്‍ത്തുന്ന ഗുരുതരമായ ആരോഗ്യ പ്രശ്‌നങ്ങള്‍ നേരിടാന്‍ ജില്ലാകളക്ടറുടെ നിര്‍ദേശപ്രകാരം ഡിഎംഒ ഉള്‍പ്പെടെയുള്ള ആരോഗ്യവകുപ്പ് ഉദ്യോഗസ്ഥരുടെയും ജനപ്രതിനിധികളുടെയും മലിനീകരണ നിയന്ത്രണ വകുപ്പ് ഉദ്യോഗസ്ഥരുടെയും നേതൃത്വത്തില്‍ പ്രതിരോധ പ്രവര്‍ത്തനങ്ങള്‍ സംബന്ധിച്ച് അവലോകനയോഗം നടത്തി. കോഴിഫാമിന്‍റെ മറവില്‍ അനധികൃത മാലിന്യനിക്ഷേപ കേന്ദ്രം നടത്തിയവര്‍ക്കെതിരേ നടപടികളാരംഭിച്ചു. കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളിയുടെ അധ്യക്ഷതയില്‍ ചേര്‍ന്ന വിവിധ വകുപ്പുകളുടെ അടിയന്തരയോഗത്തിലാണ് ഇതുസംബന്ധിച്ച തീരുമാനങ്ങളെടുത്തത്. മാലിന്യനിയമ ലംഘനത്തിന് പഞ്ചായത്ത്, ആരോഗ്യ വകുപ്പ്, പൊലൂഷന്‍ കണ്‍ട്രോള്‍ ബോര്‍ഡ് എന്നീ വകുപ്പുകള്‍ പിഴയുള്‍പ്പെടെയുള്ള നടപടികള്‍ അടിയന്തരമായി സ്വീകരിക്കാന്‍ യോഗം നിര്‍ദേശിച്ചു. ഇതു സംബന്ധിച്ച് കേസെടുക്കാന്‍ പോലീസിനു ബ്ലോക്ക് പഞ്ചായത്തില്‍ ചേര്‍ന്ന് യോഗം നിര്‍ദേശം നല്‍കി. സമീപ പ്രദേശങ്ങളിലെ കിണര്‍ ഉള്‍പ്പെടെയുള്ള കുടിവെള്ള സ്രോതസുകളിലെ ജലം പരിശോധിച്ച് ആരോഗ്യ പ്രശ്‌നങ്ങള്‍ ഉണ്ടോയെന്ന് ഉറപ്പുവരുത്താനും നിര്‍ദേശിച്ചിട്ടുണ്ട്. യോഗത്തില്‍ മാലിന്യസംഭരണ കേന്ദ്രത്തിന്‍റെ നടത്തിപ്പുകാരെ വിളിച്ചുവരുത്തി സംഭവത്തിന്‍റെ ഗുരുതരാവസ്ഥ അറിയിച്ചു. 30 ദിവസത്തിനകം മാലിന്യം നീക്കം ചെയ്യണമെന്നും കര്‍ശന നിര്‍ദേശം നല്‍കി. മുളക്കുളം പഞ്ചായത്തിലെ 11-ാം വാര്‍ഡില്‍ ഉദയഗിരി ഭാഗത്ത് നീരാക്കല്‍ ബൈജുവിന്‍റെ റബര്‍ത്തോട്ടത്തിലാണ് രണ്ടു വര്‍ഷത്തിലേറേയായി മാലിന്യ നിക്ഷേപകേന്ദ്രം പ്രവര്‍ത്തിച്ചിരുന്നത്. നാടന്‍കോഴി വളര്‍ത്തല്‍ കേന്ദ്രമെന്നാണ് പുറത്ത് അറിയിച്ചിരുന്നത്. മഴക്കാലപൂര്‍വ ശുചീകരണ പ്രവര്‍ത്തനങ്ങളുടെ ഭാഗമായി പ്രതിരോധ പ്രവര്‍ത്തനങ്ങള്‍ക്കായെത്തിയ ആരോഗ്യ പ്രവര്‍ത്തകരാണ് ു കേന്ദ്രം കണ്ടെത്തിയത്. ഗുരുതരമായ ആരോഗ്യ, പാരിസ്ഥിതിക പ്രശ്‌നങ്ങളുണ്ടാകുമെന്ന് ബോധ്യപ്പെട്ടതിന്‍റെ അടിസ്ഥാനത്തിലാണ് വിവിധ വകുപ്പ് മേധാവികളുടെ യോഗം അടിയന്തരമായി ചേർന്നത്. ഡിഎംഒ, ബ്ലോക്ക് പഞ്ചായത്ത് മെംബര്‍മാര്‍, മുളക്കുളം പഞ്ചായത്ത് പ്രസിഡന്‍റ്, സെക്രട്ടറി, ആരോഗ്യ വകുപ്പ് ഉദ്യോഗസ്ഥർ‍, പൊലൂഷന്‍ കണ്‍ട്രോള്‍ ബോര്‍ഡ് ഉദ്യോഗസ്ഥര്‍, വെള്ളൂര്‍ പോലീസ്, ശുചിത്വ മിഷന്‍ പ്രവര്‍ത്തകര്‍ തുടങ്ങിയവര്‍ പങ്കെടുത്തു. മാലിന്യസംഭരണ കേന്ദ്രത്തില്‍ അഴുകിയ ജൈവമാലിന്യങ്ങളും പുഴുക്കളും പന്നിയെലികളും മാലിന്യം കലര്‍ന്ന ജലവും പരന്നൊഴുകുന്നതായി ആരോഗ്യവകുപ്പ് ഉദ്യോഗസ്ഥര്‍ റിപ്പോര്‍ട്ട് ചെയ്തിരുന്നു. ജനങ്ങളുടെ ജീവന് വലിയ വെല്ലുവിളി ഉയര്‍ത്തുന്ന സ്ഥിതിവിശേഷമാണ് മാലിന്യ സംഭരണകേന്ദ്രം ഉയര്‍ത്തുന്നതെന്ന് ബ്ലോക്ക് പഞ്ചായത്ത് പ്രസിഡന്‍റ് ജോണ്‍സണ്‍ കൊട്ടുകാപ്പള്ളി പറഞ്ഞു. പ്രസിഡന്‍റിന്‍റെ നേതൃത്വത്തിലുള്ള ജനപ്രതിനിധികളും ഉദ്യോഗസ്ഥരും ബുധനാഴ്ച സ്ഥലം സന്ദര്‍ശിച്ചിരുന്നു. പരിശോധനയില്‍ ഡെങ്കിപ്പനി സാധ്യതകളും ജലജന്യ രോഗങ്ങളും എലിപ്പനിയും പ്ലേഗ് അടക്കമുള്ള പകര്‍ച്ചവ്യാധികള്‍ക്കും കാരണമായേക്കാമെന്ന സാഹചര്യമാണ് ഇവിടെയുള്ളതെന്ന് അവലോകന യോഗം ചൂണ്ടിക്കാട്ടി. അതീവ ഗൗരവമായി വിഷയത്തെ കൈകാര്യം ചെയ്യാനാണ് യോഗം നിര്‍ദേശിച്ചിരിക്കുന്നത്. മാലിന്യമുക്ത പഞ്ചായത്തെന്ന പ്രഖ്യാപനം നടത്തിയ മുളക്കുളം പഞ്ചായത്തിന് പിഴ ചുമത്തുമെന്ന സൂചനയാണ് ജില്ലാ ഭരണകൂടം നല്‍കുന്നത്. എന്നാല്‍ പഞ്ചായത്തിന്‍റെ അറിവോ, അനുമതിയോ യാതൊരുവിധ ലൈന്‍സോ ഇല്ലാതെയാണ് മാലിന്യസംഭരണകേന്ദ്രം പ്രവര്‍ത്തിച്ചിരുന്നതെന്നും സമീപദിവസം മാത്രമാണ് ഇതിനെക്കുറിച്ച് പഞ്ചായത്ത് അധികൃതര്‍ അറിയുന്നതൊന്നും ശക്തമായ നിയമനടപടി സ്വീകരിക്കുമെന്നും പഞ്ചായത്ത് പ്രസിഡന്‍റ് ടി.കെ. വാസുദേവന്‍ നായര്‍ പറഞ്ഞു. കോഴിഫാമിന്‍റെ മറവിലാണ് ഇവിടെ മാലിന്യ സംഭരണം നടന്നിരുന്നത്. പ്രദേശത്ത് അതിരൂക്ഷമായ ദുര്‍ഗന്ധമാണ് വമിക്കുന്നത്. എറണാകുളം ജില്ല അടക്കമുള്ള വിവിധ സ്ഥലങ്ങളില്‍നിന്നും ഹോട്ടലുകള്‍, കാന്‍റീനുകള്‍, കാറ്ററിംഗ് സെന്‍ററുകള്‍, ആശുപത്രികള്‍, അറവുശാലകള്‍ എന്നിവിടങ്ങളില്‍ നിന്നുള്ള മാലിന്യങ്ങളാണ് ഇവിടെ സംഭരിച്ചിരുന്നത്.

വൈക്കം ക്ഷേത്രത്തിലെ ഭീമൻ ആൽമരം മറിഞ്ഞു

വൈക്കം: വൈക്കം മഹാദേവ ക്ഷേത്രത്തിലെ നൂറ്റാണ്ടിലധികം പഴക്കമുള്ള ഭീമൻ ആൽമരം നിലംപൊത്തി. ക്ഷേത്രത്തിന്‍റെ വടക്കുപടിഞ്ഞാറു ഭാഗത്തു നിന്ന കൂറ്റൻ ആൽമരമാണ് ഇന്നലെ പുലർച്ചെ ഏഴോടെ നിലംപൊത്തിയത്. ആൽത്തറയുടെ കൽക്കെട്ടും തകർന്നു. പകൽസമയങ്ങളിൽ ഭക്തർ ആൽത്തറയിൽ ഇരിക്കുക പതിവായിരുന്നു. അപകട സമയത്ത് ഭക്തർ ഇല്ലാതിരുന്നതിനാൽ ദുരന്തമൊഴിവായി.

കരിയാർ കരകവിഞ്ഞു

തലയാഴം: തോരാതെ പെയ്യുന്ന മഴയ്ക്കൊപ്പം കിഴക്കൻ വെള്ളത്തിന്‍റെ വരവ് ശക്തിപ്പെട്ടതോടെ കരിയാർ കരകവിഞ്ഞു. കരിയാർ കടന്നുപോകുന്ന ഉദയനാപുരം,തലയാഴം, തലയോലപറമ്പ്,കല്ലറ,ടിവി പുരംപഞ്ചായത്തുപ്രദേശങ്ങളിലെ ജനങ്ങൾ കടുത്ത വെള്ളപ്പൊക്ക ദുരിതത്തിലായി. വീടുകളിൽ വെള്ളം കയറിയതോടെ കുടുംബങ്ങൾ ബന്ധുവീടുകളിലേക്കും വാടക വീടുകളിലേക്കും താമസം മാറിത്തുടങ്ങി.

തേക്കുമരം വീണ് വൈദ്യുതിപോസ്റ്റ് ഒടിഞ്ഞു

വൈക്കം: തേക്കുമരം കടപുഴകിവീണ് വൈദ്യുതിപോസ്റ്റ് ഒടിഞ്ഞുവീണു. ഗതാഗതം മൂന്നര മണിക്കൂർ തടസപ്പെട്ടു. തോട്ടകം വളഞ്ഞമ്പലത്തിനു സമീപം ഇന്നലെ രാവിലെ 10.15നായിരുന്നു അപകടം. അപകടത്തെത്തുടർന്ന് ബസ് അടക്കമുള്ള വലിയ വാഹനങ്ങൾ ഉല്ലല - കൊതവറവഴി തിരിച്ചുവിട്ടു. ചെറിയ വാഹനങ്ങൾ വളഞ്ഞമ്പലം, തോട്ടകം സ്കൂൾ ജംഗ്ഷൻ വഴി തിരിച്ചുവിട്ടു.

ചുഴലിക്കാറ്റില്‍ കല്ലറയിൽ വൻ നാശം

കല്ലറ: മഴയ്ക്കൊപ്പമെത്തിയ ചുഴലിക്കാറ്റില്‍ കല്ലറ കളമ്പുകാട് വ്യാപക നാശനഷ്ടമുണ്ടായി. മരം മറിഞ്ഞു വീണ് മേഖലയിലെ നാല് വീടുകള്‍ക്ക് കേടുപാട് സംഭവിച്ചു. ഇന്നലെ രാവിലെ 9.45ഓടെ വീശിയടിച്ച കാറ്റാണ് നാശം വിതച്ചത്. പഞ്ചായത്ത് പ്രസിഡന്‍റ് ജോണി തോട്ടുങ്കല്‍, പാലാ ഡിപ്പോയിലെ കെഎസ്ആര്‍ടിസി ജീവനക്കാരന്‍ കെ. സുനില്‍കുമാര്‍ മുക്കില്‍, ജോണ്‍സണ്‍ കളപ്പുരയില്‍, ജോസ്മോന്‍ പുല്‍പ്രയില്‍ എന്നിവരുടെ വീടുകള്‍ മരം വീണു തകർന്നു. തോപ്പുറത്ത് നടേശന്‍റെ പശുത്തൊഴുത്ത് കാറ്റില്‍ മരം വീണു തകര്‍ന്നു. സാബു തറയിലിന്‍റെ പുരയിടത്തിലെ മരങ്ങള്‍ ഒടിഞ്ഞുവീണും നാശനഷ്ടങ്ങളുണ്ടായി. തച്ചേരിമുട്ട്-തറേത്താഴം, പെരിയാര്‍കുളങ്ങര-പറവന്തുരുത്ത് എന്നീ റോഡുകളിലും മരം വീണ് ഗതാഗതം തടസപ്പെട്ടു. വൈദ്യുതി ലൈനുകള്‍ പൊട്ടുകയും തൂണുകള്‍ ഒടിയുകയും ചെയ്തു. കെഎസ്ഇബി അധികൃതരും ഫയര്‍ഫോഴ്‌സും പോലീസും സ്ഥലത്തെത്തി രക്ഷാപ്രവര്‍ത്തനം നടത്തി.

താണ്ഡവമാടി കാറ്റും മഴയും

മാന്‍വെട്ടം: കാറ്റിലും മഴയിലും വ്യാപക നാശം. മാന്‍വെട്ടം, മേമ്മുറി, പൂവാശേരി മേഖലകളിലാണ് കാറ്റ് കനത്ത നാശം വിതച്ചത്. റബര്‍, ആഞ്ഞിലി, തേക്ക്, പ്ലാവ് തുടങ്ങിയ വന്മരങ്ങൾ‍ കാറ്റില്‍ നിലംപൊത്തി. ജാതി, തെങ്ങ്, കമുക്, വാഴ എന്നിങ്ങനെ വ്യാപക കൃഷിനാശമാണ് ഉണ്ടായിരിക്കുന്നത്. ഇന്നലെ രാവിലെ ഒമ്പതോടെയാണ് മേഖലയില്‍ കാറ്റ് നാശം വിതച്ചത്. നിരവധി വീടുകള്‍തകർന്നു. കാറ്റില്‍ മരങ്ങള്‍ വീണാണ് വീടുകള്‍ക്ക് നാശമുണ്ടായത്. കാറ്റില്‍ മേല്‍ക്കൂരയും ഓടും പറന്നും നിരവധി വീടുകള്‍ക്ക് നാശമുണ്ടായി. പൂവാശേരിയിലെ റേഷന്‍കടയ്ക്കും നാശമുണ്ടായി. റേഷന്‍കടയുടെ ഓട് കാറ്റില്‍ പറന്നുപോയി. പുത്തന്‍പുരയില്‍ ജോബി പോളിന്‍റെ പത്ത് ജാതി, നിരവധി വാഴകള്‍, ആഞ്ഞിലി എന്നിവ കാറ്റില്‍ നശിച്ചു. മങ്ങാട്ട് ജോര്‍ജിന്‍റെ നിരവധി ജാതി മരങ്ങള്‍ കാറ്റില്‍ നിലംപൊത്തി. തോപ്പില്‍ ലിയോച്ചന്‍, തോപ്പില്‍ സിബി എന്നിവരുടെ ജാതി, തേക്ക്, വാഴ എന്നിവ നശിച്ചു. പുത്തന്‍പുരയില്‍ മാത്യുവിന്‍റെ വീടിന് കാറ്റില്‍ മരം വീണ് നാശമുണ്ടായി. ഇല്ലിക്കല്‍ സനലിന്‍റെ വീടിന് മരം വീണ് നാശമുണ്ടായി. മ്യാലില്‍ ഇന്ദിരാമ്മയുടെ വീടിന്‍റെ പകുതിഭാഗം മരം വീണു തകര്‍ന്നു. ഇവിടുത്തെ പ്ലാവ്, ആഞ്ഞിലി, തേക്ക് എന്നിവയും കാറ്റില്‍ കടപുഴകി വീണു. മേമ്മുറി വാലുപറമ്പില്‍ ശശിയുടെ വീടിന്‍റെ പകുതിഭാഗത്തെ ഓട് മുഴുവനും കാറ്റില്‍ പറന്നു നശിച്ചു. കുറ്റിപറിച്ചതില്‍ കെ.കെ. സന്തോഷിന്‍റെ വീടിനു മുകളിലേക്ക് പൊങ്ങല്യം വീണു നാശമുണ്ടായി. പുതുപ്പറമ്പില്‍ ജോണി പോളിന്‍റെ പറമ്പിലെ നിരവധി കുലയ്ക്കാറായ വാഴകളും 30 ജാതി, ബഡ് പ്ലാവുകള്‍, മാവുകള്‍, മറ്റു ഫലവൃഷത്തൈകള്‍ ഉള്‍പ്പെടെ വ്യാപക നാശമാണ് കാറ്റിലുണ്ടായത്. സമീപത്തെ പറമ്പില്‍ നിന്നിരുന്ന ആഞ്ഞിലിമരം കടപുഴകി വീണാണ് നാശനഷ്ടമുണ്ടായതെന്ന് ജോണി പോള്‍ പറഞ്ഞു. കുറ്റിപറിച്ചതില്‍ നന്ദകുമാറിന്‍റെ വാഴ, ജാതി, റബര്‍ എന്നിവ കാറ്റില്‍ നിലംപൊത്തി. കൂടാതെ മോട്ടോര്‍പുരയുടെ മുകളിലക്കും മരം വീണ് നാശമുണ്ടായി. രമേശന്‍ കുന്നത്ത് പിഷാരം, സുനുദേവ് മേലുകുന്നേല്‍ എന്നിവരുടെ വീടുകള്‍ക്കും നാശനഷ്ടം സംഭവിച്ചു. അനില്‍ ഇല്ലിക്കല്‍, ജയിംസ് പുല്ലാപ്പള്ളി, മാത്യൂസ് പുത്തന്‍പുര എന്നിവരുടെ ജാതി, വാഴ, റബര്‍, വന്‍മരങ്ങള്‍ എന്നിവ കാറ്റില്‍ കടപുഴകിവീണു. വാര്‍ഡ് മെംബര്‍ സാലിമ്മ ജോളി അപകടസ്ഥലങ്ങൾ സന്ദർശിച്ച് അധികാരികളെ നാശനഷ്ടം സംബന്ധിച്ചു വിവരം ധരിപ്പിച്ചു. കഴിഞ്ഞ ദിവസം പുലർച്ചെ ഉണ്ടായ കാറ്റില്‍ കാപ്പുന്തല പാറത്തൊട്ടിയില്‍ റോസിലിന്‍ ബേബിയുടെ വീടിനു മുകളിലേക്ക് പ്ലാവ് കടപുഴകി വീണ് വീടിന് കനത്ത നാശമുണ്ടായി. വീട്ടമ്മ മകളുടെ വീട്ടില്‍ പോയിരുന്നതിനാല്‍ അപകടത്തിൽ പ്പെടാതെ രക്ഷപ്പെട്ടു.

പാറന്പുഴ കുടുംബാരോഗ്യ കേന്ദ്രത്തിന്‍റെ പുതിയ കെട്ടിടത്തിന് ശിലയിട്ടു

പാറമ്പുഴ: കുടുംബാരോഗ്യ കേന്ദ്രത്തിനു പുതിയ കെട്ടിടം ഒരുങ്ങുന്നു. കെട്ടിടത്തിന്‍റെ നിര്‍മാണോദ്ഘാടനം പാറമ്പുഴ കുടുംബാരോഗ്യ കേന്ദ്രത്തില്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ നിര്‍വഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എയുടെ ആസ്തി വികസന ഫണ്ടില്‍നിന്നും ഒന്നരക്കോടി രൂപ ചെലവഴിച്ചാണ് നിര്‍മാണം. 2000 ചതുരശ്രയടിയില്‍ ഒരു നില കെട്ടിടമാണ് നിര്‍മിക്കുന്നത്. ലാബ്, ഫാര്‍മസി, കാത്തിരിപ്പു സ്ഥലം, ഓഫീസ്, നഴ്സുമാരുടെ മുറി, കുത്തിവയ്പിനുള്ള മുറി, ഡ്രസിംഗിനുള്ള മുറി, ഒബ്സര്‍വേഷന്‍ മുറി, മൂന്ന് കണ്‍സള്‍ട്ടിംഗ് മുറികള്‍ തുടങ്ങി യവയാണ് ഒരുങ്ങുന്നത്. ഒരു വര്‍ഷം കൊണ്ട് നിര്‍മാണം പൂര്‍ത്തീകരിക്കുകയാണു ലക്ഷ്യം. പൊതുസമ്മേളനം ഫ്രാന്‍സിസ് ജോര്‍ജ് എംപി ഉദ്ഘാടനം ചെയ്തു. വിജയപുരം പഞ്ചായത്ത് പ്രസിഡന്‍റ് വി.ടി. സോമന്‍കുട്ടി അധ്യക്ഷത വഹിച്ചു.

പാന്പാടിയിൽ അപകടങ്ങൾ പതിവാകുന്നു

പാമ്പാടി: ദേശീയപാത 183 ല്‍ അപകടങ്ങള്‍ പതിവാകുന്നു. പഞ്ചായത്തിനു മുന്‍വശത്തും ആലാംപള്ളി ഗവണ്‍മെന്‍റ് ഹൈസ്‌കൂള്‍ ജംഗ്ഷനിലും സുരക്ഷാ സംവിധാനങ്ങള്‍ സ്ഥാപിക്കണമെന്ന ആവശ്യം ശക്തമാകുന്നു. പ്രദേശത്ത് സീബ്രാലൈന്‍ വരച്ചിട്ടുണ്ടെങ്കിലും അമിത വേഗത്തിലെത്തുന്ന വാഹനങ്ങള്‍ അപകടം സൃഷ്ടിക്കുന്ന സാഹചര്യമാണ്. ഒരു മാസം മുന്‍പ് പഞ്ചായത്ത് ഓഫീസിനു മുന്നിലെ സീബ്രാലൈന്‍ മുറിച്ചുകടക്കുന്നതിനിടെ പാമ്പാടി സ്വദേശിനി അപകടത്തില്‍പ്പെട്ട് മരിച്ചിരുന്നു. ഇരുസ്ഥലങ്ങളിലും ഡിവൈഡര്‍ അടക്കമുള്ള സുരക്ഷാ മാർഗങ്ങള്‍ സ്ഥാപിച്ച് അപകടം ഒഴിവാക്കണമെന്നാണ് ആവശ്യം. എംജിഎം സ്‌കൂൾ ജംഗ്ഷനിൽ ഒരു മാസത്തിനിടെ നിരവധി അപകടങ്ങളാണുണ്ടായത്.

പെണ്ണാർതോട് കരകവിഞ്ഞു; വീടുകളിൽ വെള്ളം കയറി

അതിരമ്പുഴ: പെണ്ണാർ തോട് കരകവിഞ്ഞതിനെത്തുടർന്ന് മുപ്പതോളം വീടുകളിൽ വെള്ളം കയറി. അതിരമ്പുഴ പഞ്ചായത്ത് 20-ാം വാർഡിൽ ജോണി എടാട്ടുചിറ, ജിജി തോമസ് എടാട്ടുചിറ, പുറക്കരി ചിറ തോമസ് കുര്യൻ, സുഭാഷ്, ജോമോൻ, മോളി, ബേസിൽ, തങ്കച്ചൻ, പാറ്റാച്ചാലിൽ ലൈല, തങ്കച്ചൻ, അപ്പച്ചൻ കൈതക്കരി ചിറ, നടയ്ക്കച്ചിറ സിബി, കുഞ്ഞുവർക്കി, കല്ലുവിരുന്നേൽ സാബു, ബേബി, ബെന്നി, തുരുത്തേൽ സാബു, ഷാജി, വർക്കി ഔസേപ്പ്, ആനക്കല്ലുചിറ റോയി, സജി, തങ്കച്ചൻ ഇടാട്ടുചിറ, ബേബി അറയ്ക്കക്കാല, തെയ്യാമ്മ പാറയിൽ, വലിയ വടക്കേടം അജി, കുഞ്ഞുകൊച്ച്, തോമസ് തിരുമുറ്റം, ജോയി തെക്കെത്തുരുത്തേൽ, സജി വടക്കെത്തുരുത്തേൽ, വാവ പള്ളിച്ചിറ എന്നിവരുടെ വീടുകളിലാണ് വെള്ളം കയറിയത്. പെണ്ണാർ തോട്ടിലെ ഒഴുക്ക് നിലച്ചതാണ് വെള്ളപ്പൊക്കത്തിനിടയാക്കിയതെന്നു നാട്ടുകാർ പറഞ്ഞു. പെണ്ണാർ തോടിന്‍റെ അതിരമ്പുഴ പഞ്ചായത്തിൽ ഉൾപ്പെടുന്ന മുഴുവൻ ഭാഗവും പോളയും പായലും പുല്ലും നിറഞ്ഞ് ഒഴുക്കുനിലച്ച നിലയിലാണ്. തോടിന്‍റെ ഇരുവശവും വെള്ളം കയറി കായൽ പോലെ കിടക്കുകയാണ്. ഇരുവശത്തുമുള്ള പാടങ്ങളും നിറഞ്ഞു കവിഞ്ഞശേഷമാണ് വീടുകളിൽ വെള്ളം കയറിയിരിക്കുന്നത്. നാലു വർഷമായി തോട് വൃത്തിയാക്കിയിട്ടില്ല. പോളയും പുല്ലുമെല്ലാം വളർന്ന് ആഴത്തിൽ വേരിറങ്ങിയതോടെ വെള്ളം ഒഴുകാൻ മാർഗമില്ല. പഞ്ചായത്തിന്‍റെ ഭാഗത്തുനിന്നു ഗുരുതരമായ അലംഭാവമാണ് ഉണ്ടാകുന്നതെന്ന് നാട്ടുകാർ ആരോപിച്ചു. നിരന്തരമായി ആവശ്യപ്പെട്ടിട്ടും പഞ്ചായത്ത് അധികൃതർക്ക് കുലുക്കമില്ല. പെണ്ണാർ തോട് പൂർണ്ണമായും വൃത്തിയാക്കണമെന്ന് അഡ്വ. കെ.എം. സന്തോഷ് കുമാർ ആവശ്യപ്പെട്ടു. അതിരമ്പുഴ പഞ്ചായത്തിന്‍റെ അതിർത്തിയായ മാന്നാനം പാലം മുതൽ അതിരമ്പുഴ ചന്തക്കുളം വരെ പെണ്ണാർ തോട് പൂർണമായും വൃത്തിയാക്കി തൊട്ടിലൂടെ ജലഗതാഗതം പഴയരീതിയിലാക്കാൻ അധികൃതർ മുൻകൈ എടുക്കണം. പെണ്ണാർ തോടിന്‍റെ വശങ്ങളിൽ താമസിക്കുന്നവർ വർഷങ്ങളായി ദുരിതത്തിലാണ്. ഇന്നലെ പഞ്ചായത്ത് പ്രസിഡന്‍റും വാർഡ് മെംബറും ഉൾപ്പെടെയുള്ളവരെ വിളിച്ചിട്ട് ഫോണെടുക്കാൻ പോലും തയാറായില്ലെന്ന് ജിജി തോമസ് എടാട്ടുചിറ പറഞ്ഞു. മാന്നാനം പാലത്തിൽനിന്ന് തോടിന്‍റെ നവീകരണം ആരംഭിച്ച് ചന്തക്കുളത്തിൽ പൂർത്തിയാക്കാൻ നടപടി ഉണ്ടാകണം.

ഏറ്റുമാനൂരിൽ വികസന പദ്ധതികൾക്ക് കിഫ്ബി അനുമതി

ഏറ്റുമാനൂര്‍: ഏറ്റുമാനൂർ അസംബ്ലി മണ്ഡലത്തിലെ വിവിധ വികസന പദ്ധതികള്‍ക്ക് കിഫ്ബി ബോർഡിന്‍റെ അനുമതി. മുഖ്യമന്ത്രിയുടെ അധ്യക്ഷതയില്‍ ചേര്‍ന്ന ബോര്‍ഡ് യോഗമാണ് മഹാത്മാഗാന്ധി സര്‍വകലാശാലയിലെ 122.59 കോടി രൂപയുടേതടക്കമുള്ള വികസന പദ്ധതികള്‍ക്ക് അനുമതി നല്‍കിയത്. ഏറ്റുമാനൂര്‍ റിംഗ് റോഡിന്‍റെ ആദ്യഘട്ടം ടാറിംഗ് ഉള്‍പ്പെടെയുള്ള നിര്‍മാണ പ്രവര്‍ത്തനങ്ങള്‍ പൂര്‍ത്തീകരിക്കുകയും കോട്ടയം-ഇല്ലിക്കല്‍-കുമരകം റോഡ് വീതി കൂട്ടി ആധുനീകരിക്കുകയും ചെയ്യും. മഹാത്മാഗാന്ധി സര്‍വ്വകലാശാലയിലെ നാനോ ടെക്നോളജി ആന്‍ഡ് നാനോ സയന്‍സിൽ മികവിന്‍റെ കേന്ദ്രം സ്ഥാപിക്കുന്നതിന് 61.55 കോടി രൂപയും ആധുനിക ഗവേഷണ പരിശീലന കേന്ദ്രം സ്ഥാപിക്കുന്നതിന് 26.07 കോടി രൂപയും അന്തര്‍ദ്ദേശീയ നിലവാരത്തിലുള്ള ഹോസ്റ്റലിനായി 34.97 കോടി രൂപയുമാണ് അനുവദിച്ചിരിക്കുന്നത്. ഈ പദ്ധതികളെല്ലാം ഒരു വര്‍ഷത്തിനകം പൂര്‍ത്തീകരിക്കാനാണ് ലക്ഷ്യമിടുന്നതെന്ന് മന്ത്രി വി.എൻ. വാസവൻ പറഞ്ഞു.

ഗതാഗതം തടസപ്പെട്ടു

മണര്‍കാട്: മണര്‍കാട് കോളജ് ജംഗ്ഷനില്‍ പൂവാകമരം റോഡിലേക്കു വീണു. ശിഖരങ്ങള്‍ പിക്കപ്പ് വാനിനു മുകളിലേക്കാണു വീണത്. 11 കെവി ലൈനുകള്‍ റോഡിലേക്കു പതിച്ചു. ഇന്നലെ രാവിലെ 10.25 നായിരുന്നു അപകടം. മണര്‍കാട് പഞ്ചായത്ത് പ്രസിഡന്‍റ് കെ.സി. ബിജുവിന്‍റെ നേതൃത്വത്തില്‍ നാട്ടുകാരും ഫയര്‍ ഫോഴ്‌സ് ഉദ്യോഗസ്ഥരും ചേര്‍ന്നു മരം മുറിച്ചുനീക്കി. മരത്തിന്‍റെ ശിഖരങ്ങള്‍ വീണതു മൂലം സമീപത്തെ കടയുടെ ഷീറ്റുകള്‍ക്ക് കേടുപാടുകള്‍ സംഭവിച്ചു. മരംവീണ സമയത്ത് റോഡില്‍ വാഹനങ്ങള്‍ കുറവായതിനാല്‍ വലിയ അപകടം ഒഴിവായി.

അയ്മനം പാടശേഖരത്ത് മടവീണു

അയ്മനം: കനത്ത മഴ തുടരുന്നതിനാൽ ജില്ലയുടെ പടിഞ്ഞാറൻ പ്രദേശങ്ങളിൽ വെള്ളക്കെട്ട് രൂക്ഷം. കർഷകർക്ക് ദുരിതം വിതച്ച് പാടശേഖരങ്ങളിൽ മടവീഴ്ചയും. അയ്മനം ഗ്രാമപഞ്ചായത്തിലെ പരിപ്പ്, മങ്ങാട്ടുകുഴി പുത്തങ്കരി തുമ്പേക്കണ്ടം പാടശേഖരത്തിൽ ഇന്നലെ മട വീണു. 250ൽപരം ഏക്കറുള്ള പാടശേഖരത്തിൽ വിരിപ്പുകൃഷിക്ക് തയാറെടുപ്പു നടക്കുന്നതിനിടെയാണ് മടവീഴ്ച. കിഴക്കൻ വെള്ളത്തിന്‍റെ വരവ് ശക്തമായതാണ് മടവീഴ്ചയ്ക്ക് ഇടയാക്കിയത്. മോട്ടോർപുരയ്ക്ക് കേടുപാടുകൾ സംഭവിച്ചു. ഇനി കൃഷിയിറക്കാൻ കർഷകർ വലിയ പാടുപെടേണ്ടിവരും. ഒരുക്കിയ നിലം പൂർണമായി വെള്ളം കയറി നശിച്ചു. ഇനി മട ഉറപ്പിച്ച ശേഷം പാടത്തെ വെള്ളം പമ്പു ചെയ്ത് പുറത്തു കളഞ്ഞാലേ കൃഷിയിറക്കാൻ സാധിക്കൂ.

പെരുമഴക്കാലം... ഓടിക്കൊണ്ടിരുന്ന എയ്‌സിനു മുകളിലേക്ക് വൈദ്യുതിപോസ്റ്റ് വീണു

ചിങ്ങവനം: പാത്താമുട്ടത്ത് ഓടിക്കൊണ്ടിരുന്ന എയ്‌സിന് മുകളിലേക്ക് വൈദ്യുതി പോസ്റ്റ് മറിഞ്ഞു വീണു. ഡ്രൈവറും കൂടെയുണ്ടായിരുന്ന ആളും അത്ഭുതകരമായി രക്ഷപ്പെട്ടു. ഇന്നലെ ഉച്ചകഴിഞ്ഞ് രണ്ടിന് പാത്താമുട്ടം സെന്‍റ് ഗിറ്റ്‌സ് കോളജിനു മുന്നിലാണ് അപകടം. ചിങ്ങവനം സിപി സ്റ്റോറില്‍ നിന്നും പാത്താമുട്ടം ഭാഗത്തുള്ള കടകളില്‍ സാധനങ്ങള്‍ വിതരണം ചെയ്യാന്‍ പോകുമ്പോഴാണ് അപകടം. പോസ്റ്റ് വീണ ഉടൻ വാഹനം നിര്‍ത്തി ഡ്രൈവർ നിഖിലും കൂടെയുണ്ടായിരുന്ന പ്രദീപും പുറത്തേക്ക് ചാടി. വാഹനത്തിന്‍റെ മുൻഭാഗം തകർന്നു. അപകടത്തെത്തുടര്‍ന്ന് പ്രദേശത്തെ വൈദ്യുതിവിതരണം നിലച്ചു.

കൈപ്പുഴയിൽ മരങ്ങൾ കടപുഴകി വീടിന്‍റെ മേൽക്കൂര തകർന്നു

കൈപ്പുഴ: ഇന്നലെ വൈകുന്നേരമുണ്ടായ ശക്തമായ കാറ്റിലും മഴയിലും രണ്ട് കൂറ്റൻ തേക്കു മരങ്ങൾ കടപുഴകി വീണ് വീടിന്‍റെ മേൽക്കുരയിലെ ഓടുകൾ തകർന്നു. രണ്ട് ഇലക്‌ട്രിക് പോസ്റ്റുകൾ ഒടിഞ്ഞുവീണു. കൈപ്പുഴ കുരിശുപള്ളിക്ക് സമീപം കല്ലുവേലി റോഡിൽ മെത്താനത്ത് റിങ്കുവിന്‍റെ വീടിനു മുകളിലാണ് രണ്ട് കൂറ്റൻ തേക്കുമരങ്ങൾ മരങ്ങൾ കടപുഴകി വീണത്. എന്നാൽ, വീട്ടിലുണ്ടായിരുന്ന കുട്ടികളടക്കമുള്ളവർക്ക് അപകടമുണ്ടായില്ല. തേക്കുമരങ്ങൾ വൈദ്യുതി ലൈനിലും പതിച്ചതിനാൽ രണ്ട് ഇലക്‌ട്രിക് പോസ്റ്റുകളും ഒടിഞ്ഞു. കാഞ്ഞിരപ്പള്ളി ഫയർഫോഴ്സ് ഓഫീസിലെ ജീവനക്കാരനാണ് റിങ്കു.

രാത്രിയായാൽ നാഗന്പടം മാഫിയാത്താവളം

കോട്ടയം: രാത്രിയായാൽ നാഗമ്പടം ലഹരി മാഫിയാസംഘങ്ങളുടെയും മോഷ്ടാക്കളുടെയും സാമൂഹികവിരുദ്ധരുടെയും താവളം. സന്ധ്യകഴിഞ്ഞാല്‍ നാഗമ്പടം ബസ്‌സ്റ്റാന്‍ഡിലും സമീപപ്രദേശങ്ങളിലും യാത്രക്കാര്‍ക്കു പോകാന്‍ പറ്റാത്ത സാഹചര്യമാണ്. ബസുകള്‍ സര്‍വീസ് അവസാനിപ്പിക്കുകയും സ്റ്റാന്‍ഡിലെ കടകള്‍ അടയ്ക്കുകയും ചെയ്യുന്നതോടെ ഇവിടം സാമൂഹികവിരുദ്ധ സംഘങ്ങള്‍ കൈയടക്കുകയാണ്. അടുത്ത നാളില്‍ ഇവിടുത്തെ കടകളില്‍ മോഷ്ടാക്കളുടെ ശല്യവും വര്‍ധിച്ചിരിക്കുകയാണ്. കഴിഞ്ഞദിവസം സ്റ്റാന്‍ഡിലെ മൊബൈല്‍കട കുത്തിത്തുറന്ന് മോഷണം നടന്നിരുന്നു. നഗരസഭയുടെ കെട്ടിടത്തിലുള്ള എസ്.ആര്‍. മൊബൈല്‍സിലായിരുന്നു കവര്‍ച്ച. മൂന്ന് മൊബൈല്‍ ഫോണുകള്‍ മോഷണം പോയി. കടയുടെ മുകള്‍തട്ടിലെ സീലിംഗ് തകര്‍ത്താണ് മോഷ്ടാക്കള്‍ ഉള്ളില്‍ കടന്നത്. പിറ്റേന്ന് രാവിലെ കട തുറക്കാനെത്തിയപ്പോഴാണ് മോഷണം വിവരമറിയുന്നത്. സംഭവത്തില്‍ കോട്ടയം ഈസ്റ്റ് പോലീസ് അന്വേഷണം ആരംഭിച്ചിട്ടുണ്ട്. ഏതാനും നാളുകളായി സ്റ്റാന്‍ഡിലും റെയില്‍വേ‌സ്റ്റേഷന്‍ പരിസരത്തും രാത്രികാലങ്ങളില്‍ മദ്യപാനവും സാമൂഹിക വിരുദ്ധരുടെ ഏറ്റുമുട്ടലുകളും പതിവാണ്. അനാശാസ്യപ്രവര്‍ത്തകരും ബസ്‌സ്റ്റാന്‍ഡ് താവളമാക്കുന്നു. ബസ്‌സ്റ്റാന്‍ഡില്‍ രാത്രികാലത്ത് ‍ മതിയായ വെളിച്ചമില്ലാത്തത് ഇത്തരം സംഘങ്ങള്‍ക്കു സഹായകമാകുന്നു. പലയിടങ്ങളിലെയും ബള്‍ബുകളും മറ്റും സമൂഹവിരുദ്ധര്‍തന്നെയാണ് നശിപ്പിക്കുന്നത്. ബസ്‌സ്റ്റാന്‍ഡില്‍ വെളിച്ചം കിട്ടാൻ നടപടി സ്വീകരിക്കണമെന്ന് പോലീസ് പലവട്ടം നഗരസഭയോട് ആവശ്യപ്പെട്ടെങ്കിലും നടപടിയുണ്ടായില്ല. നാഗമ്പടത്തെ ബിവറേജസില്‍നിന്ന് മദ്യം വാങ്ങിയെത്തുന്നവര്‍ സ്റ്റാന്‍ഡിലെ ഇരിപ്പിടങ്ങളാണ് മദ്യപാനത്തിനുപയോഗിക്കുന്നത്. ഇരുട്ടിന്‍റെ മറവില്‍ ലഹരി കൈമാറ്റവും നടക്കുന്നതായി വ്യാപക പരാതിയുണ്ട്. ഇതിനു പുറമേ റെയില്‍വേ മേല്‍പാലത്തിലും സാമൂഹികവിരുദ്ധര്‍ തമ്പടിക്കുന്നുണ്ട്. രാത്രികാലത്ത് ‍ സ്റ്റാന്‍ഡിലും പരിസരത്തും പോലീസ് പട്രോളിംഗിന് എത്തുന്പോൾ ഇത്തരം സംഘങ്ങള്‍ ഓടിയൊളിക്കും. പോലീസ് പോയിക്കഴിയുമ്പോള്‍ സംഘങ്ങള്‍ തിരികെയെത്തുകയും ചെയ്യും. അടിയന്തരമായി കോട്ടയം ഈസ്റ്റ് പോലീസ് മഫ്തിയില്‍ ഇവിടെ നിരീക്ഷണം നടത്തണമെന്നും ഇത്തരം സംഘങ്ങളെ അമര്‍ച്ച ചെയ്യാൻ പോലീസ് നടപടി സ്വീകരിക്കണമെന്നുമുള്ള ആവശ്യം ശക്തമായിരിക്കുകയാണ്.

ആഫ്രിക്കന്‍ ഒച്ചിനെക്കൊണ്ട് പൊറുതിമുട്ടി

കോട്ടയം: വീട്ടിലും മുറ്റത്തും കൃഷിയിടങ്ങളിലും അഫ്രിക്കന്‍ ഒച്ചിനെക്കൊണ്ട് ജനം തോറ്റു. ജില്ലയിലെ വിവിധ പ്രദേശങ്ങളില്‍ ഒച്ച് പെറ്റുപെരുകുകയാണ്. പച്ചപ്പ് അപ്പാടെ നശിപ്പിക്കാന്‍ ശേഷിയുള്ള ഈ കീടം വീടുകളിലേക്ക് ഇഴഞ്ഞുവരുന്നതും ദുരിതമായി. വിളകളടക്കം സസ്യങ്ങള്‍ തിന്നു നശിപ്പിക്കുക മാത്രമല്ല, കുടിവെള്ള സ്രോതസുകളിലും അടുക്കളയിലും എത്തി വിസര്‍ജ്യവും സ്രവവും കൊണ്ട് മലിനമാക്കുകയും ചെയ്യും. ആറു വര്‍ഷം മുതല്‍ പത്തു വര്‍ഷം വരെ ജീവിക്കുന്ന ഒച്ചുകള്‍ മുട്ടയിടുന്ന സമയമാണിത്. മുട്ടകള്‍ രണ്ടാഴ്ചകൊണ്ട് വിരിയും. ആറു മാസംകൊണ്ട് പ്രായപൂര്‍ത്തിയായി പുതിയ തലമുറ മുട്ടയിട്ടു തുടങ്ങും. വൈകുന്നേരം മുതല്‍ പുറത്തിറങ്ങി പുലര്‍ച്ചെ വരെ ചെടികള്‍ തിന്നുതീര്‍ക്കും. വാഴ, മഞ്ഞള്‍, കൊക്കോ, കാപ്പി, കമുക്, പച്ചക്കറികള്‍ എന്നിവയൊക്കെ കൂട്ടമായി തിന്നുതീര്‍ക്കും. റബര്‍ തോട്ടങ്ങളില്‍നിന്ന് ലാറ്റക്‌സ് വരെ അകത്താക്കും. തെങ്ങിന്‍റെ കൂമ്പ് തിന്നുതീര്‍ക്കും. ഇവ കുട്ടികളുടെ തലച്ചോറിനെ ബാധിക്കുന്ന ഈസ്‌നോഫിലിക് മെനിഞ്ചൈറ്റിസ് എന്ന രോഗത്തിന്‍റെ വാഹകരായതിനാല്‍ ജാഗ്രത വേണം. ഒച്ചിനെ സ്പര്‍ശിക്കുമ്പോള്‍ ചിലരില്‍ ചൊറിച്ചിലും വ്രണങ്ങളും ഉണ്ടാകാറുണ്ട്. അതിനാല്‍ തുണിയോ ഗ്ലൗസോ ഉപയോഗിച്ചുമാത്രമെ ഇവടെ പെറുക്കി മാറ്റാവൂ. ഉപ്പനും പരുന്തും ഇവയെ തീറ്റയാക്കാറുണ്ട്. ബോര്‍ഡോമിശ്രിതം, ഉപ്പ്, കുമ്മായം എന്നിവ തൂവിയാല്‍ കുറെയൊക്കെ നിയന്ത്രിക്കാം. തോട്ടങ്ങളില്‍ കളനാശിനി (റൗണ്ട് അപ്) ഉപ്പുചേര്‍ത്ത് തളിച്ചാല്‍ ചത്തൊടുങ്ങും. കീടനാശിനി ഉപയോഗിച്ചാല്‍ ഉപദ്രവകാരികളല്ലാത്തവയെയും കൊല്ലാന്‍ സാധ്യതയുള്ളതുകൊണ്ട് അതു പോംവഴിയല്ല. ഒച്ചിനെ കൊന്നു നശിപ്പിക്കുക തന്നെ വേണം. നനച്ച ചണച്ചാക്ക് വിരിച്ച് ഇവയെ ആകര്‍ഷിക്കാം. ഇലകള്‍, പഴത്തൊലി തുടങ്ങിയവ വിതറിയിട്ടാല്‍ ഒച്ച് ആകര്‍ഷിച്ചെത്തും. കൂട്ടംകൂടുന്ന ഒച്ചുകളെ പുകയില കഷായം, തുരിശ് മിശ്രിതം തുടങ്ങിയവ തളിച്ച് കൊല്ലാനാണ് വനം വകുപ്പിന്‍റെ നിര്‍ദേശം. പുകയിലക്കഷായത്തിനു പകരം അകാരി എന്ന കീടനാശിനി ഒരു ഗ്രാം ഒരു ലിറ്റര്‍ വെള്ളത്തില്‍ കലര്‍ത്തി തുരിശുലായനിയുമായി ചേര്‍ത്താലും മതി. ഒച്ചുകളെ ഉപ്പ് വിതറിയും നശിപ്പിക്കാം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]