ADVERTISEMENT

ADVERTISEMENT

ഹാൻഡ്ബോൾ ചാമ്പ്യൻഷിപ്പിലേക്ക് തെരഞ്ഞെടുത്തു

താമരശേരി: ഹൈദരാബാദിൽ അരങ്ങേറുന്ന 17-ാം മിനി ബോയ്സ് ആൻഡ് ഗേൾസ് നാഷണൽ ഹാൻഡ്‌ബോൾ ചാമ്പ്യൻഷിപ്പിൽ പങ്കെടുക്കാൻ ജില്ലയിൽനിന്ന് മൂന്ന് വിദ്യാർഥികളെ തെരഞ്ഞടുത്തു.

താമരശേരി അൽഫോൻസാ സ്കൂളിലെ ഹന്ന റോസ് ഷെയ്സ്, വേളംങ്കോട് സെന്‍റ് ജോർജ് ഹൈസ്കൂളിലെ കെവിൻ പ്രജോഷ്, എദൻ ഷെറിൻ എന്നിവരെയാണ് കേരള ടീമിലേക്ക് തെരഞ്ഞെടുത്തത്.

ADVERTISEMENT

കിണറിൽ വീണ ആടിനെ രക്ഷപ്പെടുത്തി

പേരാമ്പ്ര: നടുവണ്ണൂർ വാകയാട് വീട്ടുവളപ്പിൽ മേയുന്നതിനിടെ കിണറിൽ വീണ ആടിനെ രക്ഷ‍പ്പെടുത്തി. പടിഞ്ഞാറേവീട്ടിൽ അനിൽ എന്നയാളുടെ ആട് അയൽക്കാരനായ പടിഞ്ഞാറേവീട്ടിൽ കൃഷ്ണന്‍റെ വീട്ടിലെ കിണറിൽ വീഴുകയായിരുന്നു. വിവരമറിയിച്ചതിനെ തുടർന്ന് പേരാമ്പ്രയിൽ നിന്നും അസിസ്റ്റന്‍റ് സ്റ്റേഷൻ ഓഫീസർ എം. പ്രദീപിന്‍റെ നേതൃത്വത്തിൽ എത്തിയ അഗ്നിരക്ഷാ സേനയൂം നാട്ടുകാരും ചേർന്ന് ആടിനെ സുരക്ഷിതമായി കരയ്ക്ക് എത്തിക്കുകയായിരുന്നു.

കേരളത്തിലേത് അഴിമതി ഭരണം: മുല്ലപ്പള്ളി രാമചന്ദ്രൻ

നാദാപുരം: അഴിമതി സ്ഥാപനവൽക്കിരിച്ച സർക്കാരാണ് ഒന്പത് വർഷമായി കേരളം ഭരിക്കുന്നതെന്ന് മുതിർന്ന കോൺഗ്രസ് നേതാവ് മുല്ലപ്പള്ളി രാമചന്ദ്രൻ പറഞ്ഞു. ഇത്രയും അഴിമതി ഭരണം നടത്തി ഒരു സർക്കാർ കേരളം ഭരിച്ചിട്ടില്ല. യുഡിഎഫ് വോട്ടേഴ്‌സ് മീറ്റിന്‍റെ കോഴിക്കോട് ജില്ലാ തല ഉദ്ഘാടനം അരൂർ പെരുമുണ്ടച്ചേരി മാണിക്കോത്ത് മുക്കിൽ നിർവഹിച്ച് പ്രസംഗിക്കുകയായിരുന്നു അദ്ദേഹം. പാർട്ടിയിൽ താഴെ തട്ട് മുതൽ സംസ്ഥാന തലം വരെ അഴിമതിയാണ്. ഒരു പുത്തൻ ധനിക വർഗത്തിന്‍റെ സെൽ ഭരണമാണ് കേരളത്തെ നിയന്ത്രിക്കുന്നത്. അവരാണ് പോലീസ് സ്റ്റേഷനിൽ ഉൾപ്പെടെ എല്ലാ കാര്യവും നിയന്ത്രിക്കുന്നത്. യഥാർത്ഥ സിപിഎമ്മുകാർക്ക് പോലും ഭരണം മടുത്തതായി മുല്ലപ്പള്ളി പറഞ്ഞു. യുഡി.എഫ് ജില്ലാ കൺവീനർ കെ. ബാലനാരായണൻ അധ്യക്ഷത വഹിച്ചു.

വിവരാവകാശ സൗഹൃദ സിവില്‍ സ്‌റ്റേഷന്‍ ; അവലോകന യോഗം ചേര്‍ന്നു

കോഴിക്കോട്: സിവില്‍ സ്‌റ്റേഷന്‍ വിവരാവകാശ സൗഹൃദമാക്കുന്നതിന്‍റെ ഭാഗമായുള്ള പ്രവര്‍ത്തനങ്ങള്‍ വിലയിരുത്തുന്നതിനായി വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍റെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ യോഗം ചേര്‍ന്നു. കളക്ടറേറ്റിലെ പ്രവര്‍ത്തനങ്ങള്‍ എഡിഎം പി. സുരേഷ് വിശദീകരിച്ചു. തുടര്‍ന്ന് വിവിധ ഓഫീസുകളില്‍ ഇതുസംബന്ധിച്ച് സ്വീകരിച്ച നടപടികള്‍ ഉദ്യോഗസ്ഥര്‍ വിശദീകരിച്ചു. വിവരാവകാശ നിയമം പൂര്‍ണമായി നടപ്പാക്കിയ ദിനമായ ഒക്ടോബര്‍ 12ന് കോഴിക്കോട് സിവില്‍ സ്‌റ്റേഷനിലെ എല്ലാ ഓഫീസുകളും വിവരാവകാശ സൗഹൃദമായി പ്രഖ്യാപിക്കുന്നതാണ് പദ്ധതി. വിവരാവകാശ നിയമപ്രകാരം എല്ലാ ഓഫീസുകളിലെയും വിവരങ്ങള്‍ ക്രോഡീകരിച്ച് കാറ്റലോഗ് ചെയ്ത് കമ്പ്യൂട്ടറിലൂടെ ലഭ്യമാക്കല്‍, എല്ലാ ഓഫീസുകളിലും വിവരാവകാശവുമായി ബന്ധപ്പെട്ട ബോര്‍ഡുകള്‍ സ്ഥാപിക്കല്‍, ഓഫീസ് വെബ്സൈറ്റിലെ വിവരങ്ങള്‍ കാലികമാക്കല്‍ ഉള്‍പ്പടെയുള്ള പ്രവര്‍ത്തനങ്ങള്‍ നടപ്പാക്കും. വിവരാവകാശ നിയമത്തിലെ 4 (1) ബി വകുപ്പ് പ്രകാരം വിവരാവകാശ അധികാരികള്‍ സ്വമേധയാ സ്വീകരിക്കേണ്ട 17 ഇന നടപടികളിലെ പുരോഗതി കമ്മീഷണര്‍ വിലയിരുത്തി.

എൽഡിഎഫ് വാഹന പ്രചാരണ ജാഥയ്ക്ക് തുടക്കമായി

കൂരാച്ചുണ്ട്: യുഡിഎഫ് ഭരിക്കുന്ന കൂരാച്ചുണ്ട് പഞ്ചായത്ത് ഭരണസമിതിയുടെ ദുർഭരണത്തിനെതിരേയും വികസന മുരടിപ്പിലും പ്രതിഷേധിച്ച് എൽഡിഎഫ് പഞ്ചായത്ത് കമ്മിറ്റിയുടെ നേതൃത്വത്തിൽ 23ന് നടക്കുന്ന ജനകീയ കുറ്റവിചാരണയുടെ പ്രചാരണാർഥം പഞ്ചായത്തിലുടനീളം നടത്തുന്ന വാഹന പ്രചാരണ ജാഥയ്ക്ക് കക്കയത്ത് തുടക്കമായി. സിപിഎം ഏരിയ സെക്രട്ടറി ടി.കെ സുമേഷ് ഉദ്ഘാടനം ചെയ്തു. കെ.വൈ. ഹനീഫ അധ്യക്ഷത വഹിച്ചു. ജാഥാ ക്യാപ്റ്റൻ കെ.ജി. അരുൺ, വൈസ് ക്യാപ്റ്റൻ വിൽസൺ പാത്തിച്ചാലിൽ, വി.ജെ. സണ്ണി, അശോകൻ കുറുങ്ങോട്ട്, എ.കെ. പ്രേമൻ, മുജീബ് കൊട്ടോല എന്നിവർ പ്രസംഗിച്ചു. മുപ്പതാം മൈൽ, ഇരുപത്തെട്ടാംമൈൽ, കരിയാത്തുംപാറ, കല്ലാനോട്, മണ്ടോപ്പാറ എന്നിവിടങ്ങളിലൂടെ സഞ്ചരിച്ച് പൂവത്തുംചോലയിൽ സമാപന സമ്മേളനം നടന്നു. കേരള കോൺഗ്രസ് -എം ജില്ലാ പ്രസിഡന്‍റ് ടി.എം ജോസഫ് ഉദ്ഘാടനം ചെയ്തു. എ.സി. ഗോപി അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം വി.കെ ഹസീന, ഒ.ഡി. തോമസ്, ജോസഫ് വെട്ടുകല്ലേൽ, കെ.എ ശ്രീജൻ എന്നിവർ പ്രസംഗിച്ചു. ഇന്ന് രാവിലെ ഓട്ടപ്പാലത്ത് നിന്നും ആരംഭിക്കുന്ന വാഹന പ്രചരണ ജാഥ വൈകിട്ട് 5.30ന് കൂരാച്ചുണ്ടിൽ സമാപിക്കും. സിപിഐ ജില്ലാ സെക്രട്ടറി അഡ്വ. പി. ഗവാസ് സമാപന സമ്മേളനം ഉദ്ഘാടനം ചെയ്യും.

ചവറമുഴി റോഡിൽ അപകട ഭീഷണി ഉയർത്തി വൈദ്യുതി ലൈൻ

പെരുവണ്ണാമൂഴി: ചവറമുഴി റോഡിൽ കുരിശുപള്ളിക്കടുത്തായി വൈദ്യുതി ലൈൻ ഓടക്കാടുമായി പിണഞ്ഞു കിടക്കുന്നത് അപകട ഭീഷണി ഉയർത്തുന്നു. സ്കൂൾ കുട്ടികളടക്കം യാത്ര ചെയ്യുന്ന പാതയോരത്താണ് ഈ അപകടം. ചക്കിട്ടപാറ കെഎസ്ഇബി അധികൃതർ എത്രയും വേഗം നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്. photo: ചവറമുഴി റോഡ് ഓരത്ത് വൈദ്യുതി ലൈൻ ഓടക്കാട് മൂടിയ നിലയിൽ

എലത്തൂര്‍ മാട്ടുവയലിലെ പ്രാണിശല്യം: പരിഹാര നടപടികള്‍ ഇന്നാരംഭിക്കും

കോഴിക്കോട്: എലത്തൂര്‍ മാട്ടുവയല്‍ പ്രദേശത്തെ പ്രാണിശല്യത്തിന് അടിയന്തര പരിഹാരം കാണാന്‍ മന്ത്രി എ.കെ. ശശീന്ദ്രന്‍റെ അധ്യക്ഷതയില്‍ ചേര്‍ന്ന ഉദ്യോഗസ്ഥരുടെയും ജനപ്രതിനിധികളുടെയും യോഗത്തില്‍ തീരുമാനം. പ്രത്യേക തരം പ്രാണികള്‍ പെരുകിയത് കാരണം പ്രദേശവാസികള്‍ അനുഭവിക്കുന്ന ദുരിതം പരിഹരിക്കാന്‍ ഇന്ന് രാവിലെ എട്ട് മുതല്‍ പ്രാണി നിര്‍മാര്‍ജന യജ്ഞം ആരംഭിക്കും. ജില്ലാ വെക്ടര്‍ കണ്‍ട്രോള്‍ യൂണിറ്റിന്‍റെയും കോഴിക്കോട് കോര്‍പറേഷന്‍ ആരോഗ്യ വിഭാഗത്തിന്‍റെയും ആഭിമുഖ്യത്തിലാണ് പ്രവര്‍ത്തനങ്ങള്‍ നടത്തുക. പ്രത്യേക മിശ്രിതം ഉപയോഗിച്ച് സ്‌പ്രേയിംഗ് നടത്തുകയും പ്രദേശത്തെ മാലിന്യം കോര്‍പറേഷന്‍ ആരോഗ്യ വിഭാഗത്തിന്‍റെ നേതൃത്വത്തില്‍ നീക്കുകയും ചെയ്യും. അഴുക്കുചാല്‍ പ്രശ്‌നത്തിന് ശാശ്വത പരിഹാരം കാണാന്‍ ശാസ്ത്രീയ പഠനം നടത്തി റിപ്പോര്‍ട്ട് തയാറാക്കാന്‍ എന്‍ഐടിയെ ചുമതലപ്പെടുത്തും. കെട്ടിക്കിടക്കുന്ന വെള്ളം ഒഴുകിപ്പോകുന്നതിനുള്ള താല്‍ക്കാലിക സംവിധാനം ഡ്രഡ്ജിംഗ് പ്രവൃത്തി ഏറ്റെടുത്ത കരാറുകാരന്‍റെ നേതൃത്വത്തില്‍ ഒരുക്കാന്‍ മന്ത്രി നിര്‍ദേശിച്ചു. സംഭവസ്ഥലം സന്ദര്‍ശിച്ച് കളക്ടര്‍ക്ക് റിപ്പോര്‍ട്ട് സമര്‍പ്പിക്കാന്‍ തഹസില്‍ദാറെ ചുമതലപ്പെടുത്തി. പ്രാണിശല്യം ദുരന്തമായി പ്രഖ്യാപിക്കാനുള്ള സാധ്യതയെ കുറിച്ച് മന്ത്രി ജില്ലാ ദുരന്ത നിവാരണ വകുപ്പ് അധ്യക്ഷന്‍ കൂടിയായ കളക്ടറോട് അന്വേഷിച്ചു. മാലിന്യം നീക്കം ചെയ്യുന്നതിന് പുറമെ പ്രദേശത്തെ ജനങ്ങളില്‍ മാലിന്യ സംസ്‌കരണ ബോധവത്കരണം നടത്താനും യോഗം തീരുമാനിച്ചു. കോര്‍പറേഷന്‍ ഓഫീസില്‍ ചേര്‍ന്ന യോഗത്തില്‍ മേയര്‍ ബീന ഫിലിപ്പ്, സ്ഥിരം സമിതി അധ്യക്ഷരായ എസ്. ജയശ്രീ, പി.കെ. നാസര്‍, കൗണ്‍സിലര്‍മാരായ വി.കെ. മോഹന്‍ദാസ്, കെ.സി. ശോഭിത, ജില്ലാ വെക്ടര്‍ കണ്‍ട്രോളര്‍ സീനിയര്‍ ബയോളജിസ്റ്റ് സബിത എന്നിവര്‍ പങ്കെടുത്തു.

പൊന്നാങ്കയത്ത് വാഹനാപകടങ്ങൾ പതിവ്

പുല്ലൂരാംപാറ: മലയോര ഹൈവേ കടന്നുപോകുന്ന പുല്ലൂരാംപാറ പൊന്നാങ്കയം സ്കൂൾ പരിസരത്ത് വാഹനാപകടങ്ങൾ പതിവാകുന്നു. കഴിഞ്ഞ രണ്ടരവർഷത്തിനിടെ ഇരുപത്തിരണ്ടോളം വാഹനാപകടങ്ങളാണുണ്ടായത്. ഏറ്റവുമൊടുവിൽ ഇന്നലെ ഉച്ചയ്ക്ക് മൂന്നിന് ബൊലേറോ ജീപ്പ് നിയന്ത്രണം വിട്ട് മറിയുകയായിരുന്നു. പ്രദേശത്ത് മഴയുണ്ടായിരുന്നു. പുല്ലൂരാംപാറയിലെ ആം ഓഫ് ഹോപ് എന്ന സ്ഥാപനത്തിലെ വാഹനമാണ് അപകടത്തിൽപ്പെട്ടത്. അപകടത്തിൽ ആർക്കും പരിക്കില്ല. ജീപ്പിന്‍റെ മുൻവശം ഭാഗികമായി തകർന്നിട്ടുണ്ട്. തുഷാരഗിരി, അരിപ്പാറ, മറിപ്പുഴ, പൂവാറൻ തോട്, കക്കാടംപൊയിൽ തുടങ്ങിയ മേഖലയിലെ വിനോദസഞ്ചാര കേന്ദ്രങ്ങളിലേക്കും മറ്റുമായി സദാസമയം വാഹനങ്ങളുടെ തിരക്കാണ്. റോഡ് വികസിപ്പിച്ചതോടെ ഒരു നിയന്ത്രണവുമില്ലാതെയാണ് വാഹനങ്ങൾ കുതിച്ചു പായുന്നത്. മലയോരഹൈവേ കോടഞ്ചേരി- കക്കാടംപൊയിൽ റീച്ച് യാഥാർഥ്യമായതോടെ വാഹനങ്ങളുടെ എണ്ണം ഇരട്ടിയായി. കരിങ്കൽക്വാറികളും ക്രഷുകളും ധാരാളമുള്ള കൂടരഞ്ഞി പഞ്ചായത്തിലെ കൂമ്പാറ ഉൾപ്പെടെയുള്ള പ്രദേശങ്ങളിൽ നിന്നുള്ള ടിപ്പറുകൾ ഉൾപ്പെടെ ഭാരവാഹനങ്ങളുടെയും എണ്ണം കൂടിവരുകയാണ്. പൊന്നാങ്കയം, പുല്ലൂരാംപാറ എന്നിവിടങ്ങളിലെ വിവിധ സ്കൂളിലെ വിദ്യാർഥികളുൾപ്പെടെ നൂറുകണക്കിന് കാൽനടയാത്രക്കാർ ആശ്രയിക്കുന്ന റോഡിലാണ് വാഹനങ്ങളുടെ മരണപ്പാച്ചിൽ. ആയതിനാൽ വാഹനാപകടങ്ങൾ നിയന്ത്രിക്കാൻ മുന്നറിയിപ്പ് ബോർഡുകൾ ഉൾപ്പെടെയുള്ള നടപടികൾ സ്വീകരിക്കണമെന്നാണ് നാട്ടുകാരുടെ ആവശ്യം.

കാരക്കുറ്റി ജിഎൽപി സ്കൂളിന് സൗണ്ട് സിസ്റ്റം നൽകി

മുക്കം: കാരക്കുറ്റിയിലേയും പരിസര പ്രദേശങ്ങളിലേയും നിരവധി വിദ്യാർഥികൾക്ക് അക്ഷര വെളിച്ചം പകർന്നു നൽകിയ കാരക്കുറ്റി ജിഎൽപി സ്കൂളിന് പൂർവവിദ്യാർഥികളുടെ കൈതാങ്ങ്. 55,000 രൂപ ചെലവിൽ സ്കൂളിന് പുതിയ സൗണ്ട് സിസ്റ്റമാണ് പൂർവവിദ്യാർഥികൾ വാങ്ങി നൽകിയത്. സ്കൂളിൽ നടന്ന ചടങ്ങിൽ എം.എ അബ്ദുൽ അസീസ് ആരിഫ് സ്കൂൾ അധികൃതർക്ക് സൗണ്ട് സിസ്റ്റം കൈമാറി. പിടിഎ പ്രസിഡന്‍റ് വി.മുഹമ്മദുണ്ണി അധ്യക്ഷത വഹിച്ചു. വാർഡ് മെമ്പർ വി. ഷംലൂലത്ത് മുഖ്യാതിഥിയായി. എസ്എംസി ചെയർമാൻ ഇ.സി സാജിദ്, എംപിടിഎ പ്രസിഡന്‍റ് സി.കെ ജസീല, എംപിടിഎ വൈസ് പ്രസിഡന്‍റ് ഷസ്നിയ, പിടിഎ വൈസ് പ്രസിഡന്‍റ് പി.പി.സി നൗഷാദ്, ഹെഡ്മിസ്റർ ഇൻ ചാർജ് സഫിയ, മുൻ പ്രധാനാധ്യാപകൻ ജി.എ റഷീദ്, അഹമ്മദ് കുട്ടി പൂളക്കത്തടി തുടങ്ങിയവർ സംബന്ധിച്ചു.

നിരന്തര അവഗണന : എൽഡിഎഫ് വികസന മുന്നേറ്റ ജാഥ സിപിഐ ബഹിഷ്കരിക്കും

മുക്കം: ഭരണ തുടർച്ചയുടെ 25 സംവത്സരങ്ങൾ എന്ന മുദ്രാവാക്യമുയർത്തി എൽഡിഎഫ് മുക്കം നഗരസഭ കമ്മിറ്റിയുടെ പേരിൽ നടത്തുന്ന വികസന മുന്നേറ്റ ജാഥയിൽ നിന്ന് വിട്ടു നിൽക്കാൻ പ്രധാന ഘടക കക്ഷിയായ സിപിഐ തീരുമാനിച്ചു. ഈ മാസം 27, 28 തിയതികളിലാണ് ജാഥ. വർഷങ്ങളായി സിപിഐ ഉൾപ്പെടെയുള്ള ഘടകകക്ഷികളോട് സിപിഎം തുടരുന്ന അവഗണനയിൽ പ്രതിഷേധിച്ചാണ് ജാഥ ബഹിഷ്ക്കരിക്കാൻ ഇവർ തീരുമാനമെടുത്തത്. വ്യാഴാഴ്ച നടന്നജാഥയുടെ സ്വാഗതസംഘം രൂപീകരണ യോഗത്തിൽ സിപിഐ പ്രതിനിധികൾ പങ്കെടുത്തില്ല. സിപിഎം തനിച്ച് തീരുമാനമെടുക്കുകയും ബോർഡുകളും ഫ്ലക്സുകളുമെല്ലാം പരക്കെ സ്ഥാപിച്ചതിന് ശേഷം യോഗം വിളിക്കുകയുമാണ് ചെയ്തതെന്നും ഇത് ഏകപക്ഷീയമായ തീരുമാനമാണന്നും സിപിഐ നേതാക്കൾ പറയുന്നു. സിപിഐയുടെ പിൻമാറ്റം ചർച്ചയായതോടെ ആ പാർട്ടിയുമായി ചർച്ചകൾക്ക് ആളെ ചുമതലപ്പെടുത്തിയതായാണ് വിവരം. സിപിഐ എന്ന ഘടക കക്ഷിയെ മുക്കം നഗരസഭയിൽ സിപിഎം നിരന്തരമായി അവഗണിക്കുകയാണന്ന് നേരത്തെ തന്നെ പരാതിയുണ്ട്. കഴിഞ്ഞ തദ്ദേശ സ്വയം ഭരണ തെരഞ്ഞെടുപ്പിലും സിപിഐക്ക് മുക്കം നഗരസഭയിൽ മത്സരിക്കാൻ സീറ്റ് നൽകാൻ സിപിഎം തയാറായിരുന്നില്ല. അവർ പ്രതിഷേധവുമായി രംഗത്തെത്തുകയും എൽഡിഎഫ് ജില്ല കമ്മിറ്റിയിലടക്കം വിഷയം ചർച്ചയാവുകയും ചെയ്തിരുന്നു. 27 ന് നീലേശ്വരത്ത് ലിന്‍റോ ജോസഫ് എംഎൽഎ ഉദ്ഘാടനം ചെയ്യുന്ന ജാഥ 28 ന് വൈകീട്ട് മുക്കം എസ്.കെ പാർക്കിൽ സമാപിക്കും. സമാപന യോഗം സിപിഎം ജില്ല സെക്രട്ടറിയേറ്റംഗം ടി.വിശ്വനാഥൻ ഉദ്ഘാടനം ചെയ്യും.

ജനകീയ ജൈവ വൈവിധ്യ രജിസ്റ്റര്‍ പ്രവര്‍ത്തനം പുരോഗമിക്കുന്നു

ഒക്ടോബറോടെ 30 തദ്ദേശ സ്ഥാപനങ്ങളില്‍ രണ്ടാംഘട്ടം പൂര്‍ത്തിയാകും കോഴിക്കോട്: ജനകീയ ജൈവവൈവിധ്യ രജിസ്റ്ററിന്‍റെ (പിബിആര്‍) പരിഷ്‌കരിച്ച രണ്ടാം ഭാഗത്തിന്‍റെ പ്രകാശനം ജില്ലയിലെ 13 തദ്ദേശ സ്വയംഭരണ സ്ഥാപനങ്ങളില്‍ പൂര്‍ത്തിയായി. ജൈവവിഭവങ്ങളെക്കുറിച്ച് പ്രദേശത്തെ ജനങ്ങള്‍ക്കുള്ള അറിവുകളും പതിറ്റാണ്ടുകളായി പ്രകൃതിയുമായുള്ള ഇടപെടലുകളിലൂടെ ആര്‍ജിച്ച നാട്ടറിവുകളും ശാസ്ത്രീയമായി രേഖപ്പെടുത്തുക എന്ന ലക്ഷ്യത്തോടെയാണ് ജൈവ വൈവിധ്യ രജിസ്റ്റര്‍ തയാറാക്കല്‍ ആരംഭിച്ചത്. 2023 ജൂണില്‍ കടലുണ്ടി പഞ്ചായത്തിലാണ് ജില്ലയില്‍ ആദ്യത്തെ പരിഷ്‌കരിച്ച രജിസ്റ്റര്‍ പുറത്തിറക്കിയത്. രാജ്യത്തെ തന്നെ ആദ്യത്തെ പരിഷ്‌കരിച്ച രജിസ്റ്റര്‍ ആയിരുന്നു ഇത്. അടുത്ത ദിവസങ്ങളില്‍ വില്യപ്പള്ളി, നൊച്ചാട് ഗ്രാമപഞ്ചായത്തുകളില്‍ പ്രകാശനം നടക്കുന്നതോടെ സംസ്ഥാനത്ത് ഏറ്റവും കൂടുതല്‍ രജിസ്റ്ററുകള്‍ പ്രകാശനം ചെയ്ത ജില്ലയാവും കോഴിക്കോട്. പ്രാദേശിക തലത്തില്‍ വിഭവ സമാഹരണം നടത്തുന്നതിനും വികസന പദ്ധതികള്‍ ആസൂത്രണം ചെയ്യുന്നതിനും ഇത്തരം രജിസ്റ്ററുകള്‍ അടിസ്ഥാന രേഖയാണെന്നും ഒക്ടോബറോടെ 30 തദ്ദേശ സ്വയംഭരണ സ്ഥാപനങ്ങളിലെ രണ്ടാംഘട്ട ജൈവ വൈവിധ്യ രജിസ്റ്ററിന്‍റെ പ്രകാശനം പൂര്‍ത്തിയാവുമെന്നും ജൈവ വൈവിധ്യ ബോര്‍ഡ് ജില്ലാ കോഓഡിനേറ്റര്‍ ഡോ. മഞ്ജു പറഞ്ഞു. ജില്ലാ പഞ്ചായത്തിന്‍റെ നിരന്തര ഇടപെടലിലൂടെയാണ് ഇത് സാധ്യമാകുന്നതെന്നും അവര്‍ പറഞ്ഞു. 2009 മുതലാണ് കേരളത്തിലെ എല്ലാ ഗ്രാമപഞ്ചായത്തുകളിലും നഗരസഭകളിലും കോര്‍പറേഷനുകളിലും ജനകീയ ജൈവ വൈവിധ്യ രജിസ്റ്റര്‍ തയാറാക്കല്‍ ആരംഭിച്ചത്. സംസ്ഥാന ജൈവവൈവിധ്യ ബോര്‍ഡിന്‍റെ നേരിട്ടുള്ള സാങ്കേതിക മേല്‍നോട്ടത്തില്‍, തദ്ദേശ സ്വയംഭരണ സ്ഥാപനങ്ങളുടെ ധനസഹായത്തോടെ ജൈവ വൈവിധ്യ പരിപാലന സമിതികളുടെ (ബിഎംസി) നേതൃത്വത്തിലായിരുന്നു പ്രവര്‍ത്തനം. 2019ല്‍ രജിസ്റ്റര്‍ തയാറാക്കല്‍ പൂര്‍ത്തിയാവുകയും മുഖ്യമന്ത്രി പ്രഖ്യാപനം നടത്തുകയും ചെയ്തിരുന്നു. ഇതോടെ ജൈവ വൈവിധ്യ നിയമവും ചട്ടങ്ങളും പ്രകാരം ജൈവ വൈവിധ്യ രജിസ്റ്റര്‍ പൂര്‍ത്തിയാക്കിയ ആദ്യ സംസ്ഥാനമായി കേരളം. ആകെ 1,034 രജിസ്റ്ററുകളാണ് വിവിധ തദ്ദേശ സ്വയംഭരണ സ്ഥാപനങ്ങളിലായി തയാറാക്കിയത്. പിബിആറുകളില്‍ പലതും തയാറാക്കിയിട്ട് പത്ത് വര്‍ഷത്തിലേറെയായതിനാല്‍ അവയിലെ വിവരങ്ങള്‍ പലതും കാലാനുസൃതമായി പുതുക്കേണ്ടതിനാലാണ് രണ്ടാംഘട്ടം ആരംഭിച്ചത്. ആദ്യഘട്ടത്തില്‍ തയാറാക്കിയ പിബിആറുകളിലെ ന്യൂനതകള്‍ പരിഹരിക്കാനും കാലാവസ്ഥാ വ്യതിയാനത്തിന്‍റെ പരിണിതഫലമായുള്ള പ്രളയം, വരള്‍ച്ച ചുഴലിക്കാറ്റ് തുടങ്ങിയ പ്രകൃതി ദുരന്തങ്ങള്‍ മൂലം പരിസ്ഥിതി-ജൈവ-ആവാസവ്യവസ്ഥകള്‍ക്കുണ്ടായ മാറ്റങ്ങള്‍ സംബന്ധിക്കുന്ന വിവരങ്ങള്‍ പ്രാദേശികതലത്തില്‍ ക്രോഡീകരിക്കാനും രണ്ടാം ഭാഗത്തിലൂടെ ലക്ഷ്യമിടുന്നു. തദ്ദേശ സ്വയംഭരണസ്ഥാപനത്തിന്‍റെ പരിധിയിലുള്ള എല്ലാ വിഭാഗം ജനങ്ങളുടെയും പങ്കാളിത്തത്തോടെയാണ് ഇത് നടന്നു വരുന്നത്.

കേരളത്തിലെ ഏറ്റവും വലിയ മൈജി ഫ്യൂച്ചർ ഷോറൂമിന്‍റെ സോഫ്റ്റ് ലോഞ്ച് നടന്നു

കോഴിക്കോട്: കോഴിക്കോടിന് ഏറ്റവും വലിയ കളക്‌ഷനും ലൈവ് എക്സ്പീരിയൻസും ഒരുക്കുന്ന മൈജിയുടെ കേരളത്തിലെ ഏറ്റവും വലിയ ഫ്യൂച്ചർ ഷോറൂമിന്‍റെ സോഫ്റ്റ് ലോഞ്ച് നടന്നു. തൊണ്ടയാട് ആരംഭിച്ച എപിക് ഫ്യൂച്ചർ ഷോറൂമിന്‍റെ സോഫ്റ്റ് ലോഞ്ച് മൈജി ചെയർമാൻ എ.കെ. ഷാജിയും അദ്ദേഹത്തിന്‍റെ മാതാവ് കുഞ്ഞീമ ഹജ്ജുമ്മയും ചേർന്ന് നിർവഹിച്ചു. ഇന്ന് സിനിമാതാരങ്ങളായ കുഞ്ചാക്കോ ബോബനും മഞ്ജുവാര്യരും ചേർന്ന് കോഴിക്കോടിന് ഷോറൂം തുറന്ന് നൽകും. സാധാരണ ഷോപ്പിംഗിൽനിന്ന് വ്യത്യസ്തമായി ഷോറൂമിൽ ഓരോ ഉത്പന്നവും എക്സ്പീരിയൻസ് ചെയ്ത് ഷോപ്പിംഗ് നടത്താൻ കഴിയുന്ന മറ്റൊരിടത്തുമില്ലാത്ത സൗകര്യമാണ് കസ്റ്റമേഴ്സിനായി ഒരുക്കിയിരിക്കുന്നത്. ഏറ്റവും പുതിയ ടെക്നോളജിയുടെയും ഗ്ലോബൽ ബ്രാൻഡുകളുടെയും ഏറ്റവും വലിയ കളക്‌ഷനുകളുള്ള ഒരു അൾട്ടിമേറ്റ് എക്സ്പീരിയൻസ് ഹബായിട്ടാണ് ഈ എപിക് ഷോറൂം എത്തിയിരിക്കുന്നത്. കോഴിക്കോട് ഇതുവരെ അനുഭവിച്ചിട്ടില്ലാത്ത തരത്തിലുള്ള പുതുമകൾക്കൊപ്പം ലോകോത്തര ഷോപ്പിംഗ് അനുഭവമാണ് എപിക് ഷോറൂം സമ്മാനിക്കുന്നത്. ലോകത്തിലെ ഏറ്റവും പുതിയ ടെക്നോളജിയിലുള്ള പുതിയ ഉത്പന്നങ്ങൾ കുറഞ്ഞവിലയിൽ ലഭ്യമാക്കുക എന്നതിനൊപ്പം പ്രീമിയം സർവീസും വേൾഡ് ക്ലാസ് ആമ്പിയൻസുമാണ് മൈജി ഫ്യൂച്ചർ എപിക് ഷോറൂം നൽകുന്നതെന്ന് ചെയർമാൻ എ. കെ ഷാജി പറഞ്ഞു.

കൂടത്തായ് കേസില്‍ സാക്ഷി വിസ്താരം

കോഴിക്കോട്: കൂടത്തായി കൊലപാതക പരമ്പരയില്‍ റോയ് തോമസ് വധക്കേസില്‍ 252-ാം സാക്ഷി ഭാരതി എയര്‍ടെല്‍ കേരള സര്‍ക്കിള്‍ നോഡല്‍ ഓഫീസര്‍ കെ. വാസുദേവന്‍, ഓമശേരി ഗ്രാമപഞ്ചായത്ത് സെക്രട്ടറിയായിരുന്ന ലുക്മാന്‍ എന്നിവരുടെ വിസ്താരം മാറാട് പ്രത്യേക കോടതിയില്‍ പൂര്‍ത്തിയായി. മൂന്നാം പ്രതി പ്രജികുമാറിന്‍റെ എയര്‍ടെല്‍ കമ്പനിയുടെ കണക്‌ഷനുള്ള മൊബൈല്‍ ഫോണില്‍ നിന്നു ജോളി അറസ്റ്റ് ചെയ്യപ്പെടുന്ന തീയതി വരെ പുറത്തേക്കും തിരികെയും ഉള്ള ഫോണ്‍ കോളുകളുടെ വിശദാംശങ്ങളാണ് ജഡ്ജ് കെ. സുരേഷ് കുമാര്‍ മുമ്പാകെ സാക്ഷിമൊഴി നല്‍കിയത്. രണ്ടാം പ്രതിക്ക് വേണ്ടി അഡ്വ. എം.ഷഫീര്‍ സിംഗും മൂന്നാം പ്രതിക്ക് വേണ്ടി അഡ്വ. കെ.രാജേഷ് കുമാറും സാക്ഷിയെ ക്രോസ് വിസ്താരം ചെയ്തു. പ്രോസിക്യൂഷന് വേണ്ടി സ്‌പെഷല്‍ പ്രോസിക്യൂട്ടര്‍ എന്‍. കെ. ഉണ്ണികൃഷ്ണന്‍, അഡീഷണല്‍ സ്‌പെഷല്‍ പ്രോസിക്യൂട്ടര്‍ ഇ.സുഭാഷ് എന്നിവര്‍ ഹാജരായി. വോഡഫോണ്‍, ജിയോ, ബിഎസ്എന്‍എല്‍ കമ്പനികളുടെ നോഡല്‍ ഓഫീസര്‍മാരെ 26ന് വിസ്തരിക്കും.

കോഴിക്കോട് അതിരൂപതയുടെ ഭവന പദ്ധതി: 10 വീടുകളുടെ താക്കോൽദാനം നടത്തി

കോഴിക്കോട്: കോഴിക്കോട് അതിരൂപതയുടെ ശതാബ്ദി ആഘോഷങ്ങളുടെ ഭാഗമായി നടപ്പിലാക്കുന്ന 200 വീടുകളുടെ പദ്ധതിയുടെ ഭാഗമായി വയനാട് പാക്കം പ്രദേശത്ത് നിർമിച്ച 10 ഭവനങ്ങളുടെ താക്കോൽദാനവും ആശീർവാദവും കോഴിക്കോട് ആർച്ച് ബിഷപ് ഡോ. വർഗീസ് ചക്കാലക്കൽ നിർവഹിച്ചു. നിർമാണത്തിനായി സാമ്പത്തികമായി സഹായം നൽകിയ ബഥനി സന്യാസസഭ, അപ്പസ്തോലിക് കാർമൽ സന്യാസസഭ, കോഴിക്കോട് രൂപത സോഷ്യൽ സർവീസ് സൊസൈറ്റി (ജീവന) ഡയറക്ടർ ഫാ. ആൽഫ്രഡ്, കോഴിക്കോട് രൂപത കോർപറേറ്റ് അധ്യാപകർ എന്നിവരുടെ സഹകരണം ചടങ്ങിൽ നന്ദിയോടെ ഓർമിപ്പിച്ചു. ഭവനങ്ങളുടെ നിർമാണത്തിന് ഫാ. ജയ്സൺ കളത്തിൽപ്പറമ്പിലും സിസ്റ്റർ ജോസ്‌ലിനും ചേർന്ന് നേതൃത്വം വഹിച്ചു. ഭവനങ്ങളുടെ സാങ്കേതിക രൂപകല്പനയും മേൽനോട്ടവും വഹിച്ച എൻജിനിയർ രാത്നേഷിനെ, പദ്ധതി വിജയകരമായി പൂർത്തിയാക്കുന്നതിൽ നൽകിയ സേവനത്തിന് ആർച്ച് ബിഷപ് വർഗീസ് ചക്കാലക്കൽ സമ്മാനം നൽകി ആദരിച്ചു. ഒരു മാസം മുമ്പ് കോഴിക്കോട് പൊറ്റമ്മലിൽ 10 ഭവനങ്ങൾ കൈമാറിയതായും ശതാബ്ദി ആഘോഷത്തിന്‍റെ ഭാഗമായി മൊത്തം 200 വീടുകളുടെ പദ്ധതി നടപ്പാക്കുമെന്നും ആർച്ച് ബിഷപ് ഓർമിപ്പിച്ചു. നിരവധി വൈദികരും സന്യസ്തരും വിശ്വാസികളും മറ്റു പ്രമുഖരും ചടങ്ങിൽ പങ്കെടുത്തു. കോഴിക്കോട് രൂപത വികാരി ജനറാൾ മോൺ. ജൻസൻ പുത്തൻവീട്ടിൽ, രൂപത പ്രൊക്യുറേറ്റർ ഫാ. പോൾ പേഴ്സി ഡി സിൽവ എന്നിവർ പ്രസംഗിച്ചു.

"ദീപികയ്ക്കൊപ്പം സത്യത്തിനൊപ്പം'

താമരശേരി: പൊതുസ്ഥലങ്ങളിൽ ദീപികയുടെ സാന്നിധ്യം ഉറപ്പുവരുത്തുന്നതിനായുള്ള "ദീപികയ്ക്കൊപ്പം സത്യത്തിനൊപ്പം' പദ്ധതിയുടെ കോഴിക്കോട് യൂണിറ്റ് തല ഉദ്ഘാടനം താമരശേരിയിൽ നടന്നു. താമരശേരി ബിഷപ് മാർ റെമീജിയോസ് ഇഞ്ചനാനിയിൽ വ്യാപാരിയും ഡിഎഫ്സി ഭാരവാഹിയുമായ ഷിജി കിഴക്കരക്കാട്ടിൽ നിന്ന് ചെക്ക് സ്വീകരിച്ച് ഉദ്ഘാടനം നിർവഹിച്ചു. മുക്കം ഇടവക വികാരി ഫാ. ജോൺ ഒറവുങ്കര, ദീപിക റെസിഡന്‍റ് മാനേജർ ഫാ. ഷെറിൻ പുത്തൻപുരക്കൽ, ഡിഎഫ്സി മുക്കം യൂണിറ്റ് പ്രസിഡന്‍റ് തങ്കച്ചൻ അനുഗ്രഹ, ട്രഷറർ ജോർജ്കുട്ടി പുത്തൻകളം, ദീപിക എജിഎം പ്രിൻസി ജോസ്, ന്യൂസ് എഡിറ്റർ ബിജോയ് ജോസഫ് എന്നിവർ പങ്കെടുത്തു.

ലഹരിക്കെതിരേ കലാ പ്രതിരോധമൊരുക്കി ജില്ലാ ഭരണകൂടം

ശ്രദ്ധേയമായി ഭീമൻ കാൻവാസ് കോഴിക്കോട്: ലഹരിക്കെതിരേ കലയുടെ പ്രതിരോധമൊരുക്കി ജില്ലാ ഭരണകൂടം സംഘടിപ്പിച്ച ‘ആർട്ട് ഓവർ ഡ്രഗ്സ്’. ബീച്ചിലെ ഫ്രീഡം സ്ക്വയറിൽ ഭീമൻ കാൻവാസിൽ ലഹരിവിരുദ്ധ സന്ദേശങ്ങൾ പകരുന്ന ചിത്രം ഒരുക്കിയും കലാപരിപാടികൾ അവതരിപ്പിച്ചുമാണ് പരിപാടി സംഘടിപ്പിച്ചത്. പേരാമ്പ്ര ‘ദി ക്യാമ്പ്’ ചിത്രകാരന്മാരുടെ കൂട്ടായ്മയിലെ അംഗങ്ങളാണ്‌ ഭീമൻ കാൻവാസിൽ വരയൊരുക്കിയത്. വിവിധ കാമ്പസുകളിലെ വിദ്യാർഥികൾ ചേർന്ന് കലാപരിപാടികളും അവതരിപ്പിച്ചു. ലഹരിക്കെതിരേ ഷൂട്ട് ഔട്ട്, പഞ്ച് ദി സിഗരറ്റ്, ഹൈക്കു കവിത രചന മത്സരം, സ്‌പോട്ട് ക്വിസുകൾ, അഭിപ്രായ സർവേകൾ, ‘ഷെയർ ലവ് നോട്ട് ഡ്രഗ്സ്’ സെൽഫി കോർണറുകൾ എന്നിവയും ഒരുക്കി. ‘ആർട്ട് ഓവർ ഡ്രഗ്സ്’ ഉദ്ഘാടനം ജില്ലാ കളക്ടർ സ്നേഹിൽ കുമാർ സിംഗ് നിർവഹിച്ചു. ജില്ലാ സാമൂഹിക നീതി ഓഫീസർ അഞ്ജു മോഹൻ, ആസാദ് സേന ജില്ലാ കോഓർഡിനേറ്റർ ലിജോ ജോസഫ്, ജില്ലാ ഇൻഫർമേഷൻ ഓഫീസർ സി.പി അബ്ദുൾ കരീം, ഡിസിഐപി കോഓർഡിനേറ്റർ ഡോ. നിജീഷ് ആനന്ദ് തുടങ്ങിയവർ സംബന്ധിച്ചു. ജില്ലാ ഭരണകൂടത്തിന്‍റെ നേതൃത്വത്തിലുള്ള "പുതുലഹരിയിലേക്ക്' സമഗ്ര ലഹരിവിരുദ്ധ അവബോധ കാമ്പയിൻ, കേന്ദ്ര സർക്കാരിന്‍റെ "നശാമുക്ത് ഭാരത് അഭിയാൻ' പദ്ധതി എന്നിവയുടെ ഭാഗമായി ജില്ലാ സാമൂഹിക നീതി വകുപ്പിന്‍റെ സഹകരണത്തോടെയാണ് പരിപാടി ഒരുക്കിയത്. കെ.സി. രാജീവൻ, രഞ്ജിത്ത് പട്ടാണിപ്പാറ, പ്രജീഷ് പേരാമ്പ്ര, ബൈജൻസ് ചെറുവണ്ണൂർ, ബഷീർ ചിത്രകൂടം, നിതീഷ് തേക്കേലത്ത് തുടങ്ങിയവരാണ് ചിത്രംവരയ്ക്ക് നേതൃത്വം നൽകിയത്. പ്രൊവിഡൻസ് വിമൻസ് കോളജ്, മലബാർ ക്രിസ്ത്യൻ കോളജ്, സാമൂതിരി ഗുരുവായൂരപ്പൻ കോളജ്, ഐഎച്ച്ആർഡി കോളജ്, ഹോളി ക്രോസ് കോളജ്, മീഞ്ചന്ത ആർട്സ് ആൻ‌ഡ് സയൻസ് കോളജ്, സെന്‍റ് ജോസഫ്സ് ദേവഗിരി കോളജ്, ജെഡിറ്റി പോളിടെക്നിക് കോളജ്, കെഎംസിടി ഡെന്‍റൽ കോളജ്, വടകര പുത്തൂർ ഗവ. ഹയർ സെക്കൻഡറി സ്കൂൾ എന്നിവിടങ്ങളിലെ വിദ്യാർഥികൾ കലാപരിപാടികൾ അവതരിപ്പിച്ചു.

വന്യജീവി നിയമ ഭേദഗതി ബില്‍ ജനങ്ങളുടെ കണ്ണില്‍ പൊടിയിടാന്‍: കത്തോലിക്ക കോണ്‍ഗ്രസ്

കോഴിക്കോട്: സംസ്ഥാന സര്‍ക്കാര്‍ നിയമസഭയില്‍ അവതരിപ്പിച്ച വന്യജീവിനിയമ ഭേദഗതി ബില്‍ തെരഞ്ഞെടുപ്പ് കാലത്ത് ജനങ്ങളെ കബളിപ്പിക്കുന്നതും കണ്ണില്‍ പൊടിയിടാനുള്ളതുമാണെന്ന് കത്തോലിക്ക കോണ്‍ഗ്രസ് താമരശേരി രൂപത. നിലവിലുള്ള കേന്ദ്രനിയമം ഇളവ് ചെയ്യാന്‍ സംസ്ഥാന നിയമസഭ ഒന്നടങ്കം പ്രമേയം പാസാക്കി കേന്ദ്രത്തോട് ആവശ്യപ്പെടണമെന്ന് യോഗം ആവശ്യപ്പെട്ടു. നിലവിലെ നിയമം കേന്ദ്രം ഇളവ് ചെയ്യാതെ സംസ്ഥാനത്തിന് ഭേദഗതി കൊണ്ടുവരാന്‍ ഭരണഘടനാപരമായി സാധിക്കില്ല എന്ന നിബന്ധന തിരുത്തി എടുക്കുവാന്‍ കഴിയണം. അല്ലെങ്കില്‍ ഇത്തരം നിയമഭേദഗതികള്‍ക്ക് യാതൊരു പ്രായോഗിക ഫലവുമുണ്ടാകില്ലെന്ന് യോഗം ചൂണ്ടിക്കാട്ടി. ഇപ്പോഴത്തെ സംസ്ഥാന സര്‍ക്കാരിന്‍റെ കാലത്ത് തന്നെ പാര്‍ലമെന്‍റില്‍ നടത്തിയ വന്യജീവി സംരക്ഷണ നിയമത്തിന്‍റെ ഭേദഗതിയുടെ സമയത്ത് പോലും വേണ്ടവിധത്തില്‍ സംസ്ഥാന സര്‍ക്കാരും എംപിമാരും ഭേദഗതിയില്‍ ഇടപെടാതെ അതിനുള്ള അവസരം നഷ്ടമാക്കി എന്നത് ജനങ്ങളോടുള്ള വഞ്ചന വ്യക്തമാക്കുന്നതാണ്.സംസ്ഥാന സര്‍ക്കാരിന് താല്‍ക്കാലിക പരിഹാരമായി ചില കാര്യങ്ങള്‍ ചെയ്യാന്‍ സാധിക്കും. സെക്‌ഷന്‍ 11 പ്രകാരം ചീഫ് വൈല്‍ഡ് ലൈഫ് വാര്‍ഡന് നല്‍കിയിരിക്കുന്ന അധികാരങ്ങള്‍ പ്രയോഗിച്ചുകൊണ്ട് ഈ പ്രശ്‌നത്തെ പരിഹരിക്കാന്‍ ശ്രമിക്കുക എന്നതാണ് ഒന്ന്. കാട്ടുപന്നിയെ വെടിവയ്ക്കുവാന്‍ പഞ്ചായത്ത് പ്രസിഡന്‍റുമാര്‍ക്ക് ഓണററി വൈല്‍ഡ് ലൈഫ് വാര്‍ഡന്‍റെ പദവി നല്‍കിയതുപോലെ ശല്യക്കാരായ മൃഗങ്ങളെ പിടിച്ചുമാറ്റി പാര്‍പ്പിക്കല്‍, റെസ്‌ക്യൂ സെന്‍ററുകളില്‍ പാര്‍പ്പിക്കല്‍,അത്യാവശ്യ സാഹചര്യങ്ങളില്‍ കേന്ദ്രനിയമ വ്യവസ്ഥകള്‍ക്ക് വിധേയമായി സ്വയംരക്ഷയുടെ ഭാഗമായി വന്യമൃഗത്തെ ഉന്മൂലനം ചെയ്യുന്ന നടപടി സ്വീകരിക്കല്‍ തുടങ്ങിയ മാര്‍ഗങ്ങളാണ് ചിലത്. അതിനായി ചീഫ് ലൈഫ് വാര്‍ഡന്‍റെ അധികാരങ്ങള്‍ പഞ്ചായത്ത് പ്രസിഡന്‍റിനും കളക്ടര്‍ക്കും ബന്ധപ്പെട്ട ഫോറസ്റ്റ് ഉദ്യോഗസ്ഥനും ഓണററി പദവി വഴി കൈമാറി ഇത് നടപ്പിലാക്കുവാന്‍ പരിശ്രമിക്കണം. യുദ്ധകാലാടിസ്ഥാനത്തില്‍ ജനവാസ മേഖലകളിലുള്ള മുഴുവന്‍ കാട്ടുപന്നികളെയും പഞ്ചായത്ത് അധികൃതരുടെയും പോലീസ് ഉദ്യോഗസ്ഥരുടെയും വനംവകുപ്പ് ഉദ്യോഗസ്ഥരുടെയും നേതൃത്വത്തില്‍ ഒരു മാസത്തിനകം ഉന്മൂലനം ചെയ്യണം. ജനവാസ മേഖലകളില്‍ പാര്‍ക്കുന്ന ഇത്തരം കാട്ടുപന്നികള്‍ ഇല്ലാതാകുന്നത് വനത്തിലെ ആവാസവ്യവസ്ഥയ്ക്ക് യാതൊരു കോട്ടവും വരുത്തുന്നില്ല എന്നുള്ള തിരിച്ചറിവ് ഉണ്ടാവണം. ഇതിനൊക്കെ ആവശ്യമായ നിയമനിര്‍മാണമാണ് ഇവിടെ കരണീയം. ഒപ്പം കേന്ദ്ര നിയമം പരിഷ്‌കരിക്കുവാന്‍ നിയമസഭാ ഐകകണ്‌ഠ്യേന പ്രമേയം പാസാക്കി ശാശ്വത പരിഹാരത്തിന് പരിശ്രമിക്കുകയും വേണമെന്ന് യോഗം ആവശ്യപ്പെട്ടു. ഭരണഘടനയിലെ ആര്‍ട്ടിക്കിള്‍ 254 പ്രകാരം കണ്‍കറന്‍റ് ലിസ്റ്റില്‍ പെടുന്ന വിഷയങ്ങള്‍ ആണെങ്കിലും സംസ്ഥാന നിയമം കേന്ദ്രനിയമത്തോട് വൈരുദ്ധ്യമുണ്ടെങ്കില്‍ അത് നിലനില്‍ക്കുകയില്ല. 1972-ലെ വന്യജീവി സംരക്ഷണ നിയമ പ്രകാരം സെക്‌ഷന്‍ 11, 12 വകുപ്പുകളില്‍ സംസ്ഥാനത്തിന്‍റെ ഭേദഗതി ഭരണഘടനാപരമായും നിയമപരമായും നിലനില്‍ക്കാത്തതായത് കൊണ്ടുതന്നെ ഇത് കേന്ദ്രം അംഗീകരിക്കില്ല.അതിനാല്‍ തന്നെ ഗവര്‍ണര്‍ അംഗീകരിക്കുകയില്ല. അംഗീകരിച്ചാലും ബില്ല് രാഷ്ട്രപതിക്ക് അയയ്‌ക്കേണ്ടിവരും എന്ന വസ്തുത നിലനില്‍ക്കുന്നു. കേന്ദ്രവന്യജീവി സംരക്ഷണ നിയമത്തിന്‍റ ഷെഡ്യൂള്‍ രണ്ടില്‍ പെടുന്നതുകൊണ്ടാണ് കാട്ടുപന്നിയെ നിയന്ത്രിതമായി വേട്ടയാടാന്‍ കഴിയുന്നത്. എന്നാല്‍ ഷെഡ്യൂള്‍ ഒന്നിലെ മൃഗങ്ങളെ വേട്ടയാടുന്നത് നിരോധിതമാണ്. കുരങ്ങിനെ നിലവിലുള്ള നിയമത്തിലെ പട്ടിക ഒന്നില്‍ നിന്ന് ഒഴിവാക്കി പട്ടിക രണ്ടില്‍ ചേര്‍ക്കാനുള്ള ബില്ലിലെ ഭേദഗതി കേന്ദ്രനിയമത്തോട് വിരുദ്ധമായതിനാല്‍ നിലനില്‍ക്കില്ല. കേന്ദ്രവന്യജീവി സംരക്ഷണ നിയമത്തിലെ സെക്‌ഷനുകളും ഷെഡ്യൂളുകളും മാറ്റുവാന്‍ കേന്ദ്രസര്‍ക്കാരിന് മാത്രമേ കഴിയൂ എന്ന വസ്തുത നിലനില്‍ക്കെ സെക്‌ഷന്‍ 11, 12 വകുപ്പുകള്‍ സംസ്ഥാനത്തിന് മാറ്റി മറിക്കാന്‍ ഭരണഘടനാപരമായ അധികാരമില്ല എന്നതാണ് വസ്തുത. അതോടൊപ്പം വന്യജീവി സംരക്ഷണ നിയമപ്രകാരം ഒരു ജീവിയുടെ ആവാസവ്യവസ്ഥ അതിനെ കണ്ടുമുട്ടുന്ന ഏത് സ്ഥലവും ആകാം. വനമോ സംരക്ഷിത പ്രദേശമോ മാത്രമാകണമെന്നില്ല എന്നുള്ള യുക്തിക്ക് നിരക്കാത്ത നിര്‍വചനം മാറാതെ ജനവാസ കേന്ദ്രങ്ങളില്‍ പോലും വന്യജീവികളെ വെടിവയ്ക്കാന്‍ സാധിക്കുകയില്ല എന്നതാണ് വസ്തുത. അതിനാല്‍ ഭേദഗതിക്ക് യാതൊരു നിയമ പരിരക്ഷയും ഇല്ല എന്നുവരും. നിലവിലുള്ള വനത്തിനും സംരക്ഷിത മേഖലയ്ക്കും പുറമേ ഫോറസ്റ്റ് പട്ടയത്തിലുള്ള പ്രദേശങ്ങള്‍ ഡിനോട്ടിഫൈ ചെയ്തിട്ടില്ലെങ്കില്‍ അതനുസരിച്ച് അവയും ഇപ്പോഴും വനമായി കണക്കാക്കപ്പെടും എന്ന വിരോധാഭാസവും ഇവിടെ നിലനില്‍ക്കുന്നു. പ്രസിഡന്‍റ് ഡോ. ചാക്കോ കാളംപറമ്പില്‍, ഡയറക്ടര്‍ ഫാ. സബിന്‍ തൂമുള്ളില്‍, ജനറല്‍ സെക്രട്ടറി ഷാജി കണ്ടത്തില്‍, വൈസ് പ്രസിഡന്‍റ് അല്‍ഫോണ്‍സാ മാത്യു, ഗ്ലോബല്‍ വൈസ് പ്രസിഡന്‍റ് ട്രീസാ ലിസ് സെബാസ്റ്റ്യന്‍ തുടങ്ങിയവര്‍ സംസാരിച്ചു.

ബസ് ഇടിച്ച് മഹിളാ കോണ്‍ഗ്രസ് ജില്ലാ സെക്രട്ടറി മരിച്ചു

വടകര: വടകര പുതിയ സ്റ്റാൻഡില്‍ ബസ് ഇടിച്ച് മഹിളാ കോണ്‍ഗ്രസ് ജില്ലാ സെക്രട്ടറി മരിച്ചു. അടക്കാത്തെരുവിലെ പി.കെ. പുഷ്പവല്ലി (65) ആണ് മരിച്ചത്. വെള്ളിയാഴ്ച രാവിലെയാണ് അപകടം. സാരമായി പരിക്കേറ്റ പുഷ്പവല്ലിയെ കണ്ണൂര്‍ മിംസ് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. മകളോടൊപ്പം കണ്ണൂരിലേക്ക് പോകുന്നതിന് ബസ് കയറാന്‍ പുതിയ സ്റ്റാൻഡിലേക്ക് നടന്നുവരുമ്പോള്‍ പയ്യോളി-വടകര റൂട്ടിലോടുന്ന ഹരേറാം ബസ് ഇടിച്ചാണ് അപകടം. കൈക്കും കാലുകള്‍ക്കും സാരമായി പരിക്കേറ്റ ഇവരെ വടകര സഹകരണാശുപത്രിയില്‍ എത്തിച്ചെങ്കിലും സ്ഥിതി ഗുരുതരമായതിനാല്‍ കണ്ണൂര്‍ മിംസ് ആശുപത്രിയിലേക്കു മാറ്റുകയായിരുന്നു. ഇന്നലെ ഉച്ചയ്ക്ക് ഒന്നരയോടെയാണ് മരിച്ചത്. മഹിളാ കോണ്‍ഗ്രസ് ജില്ലാ സെക്രട്ടറിയായ പുഷ്പവല്ലി കോണ്‍ഗ്രസ് വടകര ബ്ലോക്ക് എക്‌സിക്യൂട്ടീവ് അംഗവുമാണ്. രണ്ട് തവണ വടകര മുനിസിപ്പല്‍ കൗണ്‍സിലറായിരുന്നിട്ടുണ്ട്. പരേതനായ ഗംഗാധരനാണ് ഭര്‍ത്താവ്. ലൗലി, അല്‍ക്ക എന്നിവര്‍ മക്കളാണ്.

വിദ്യാർഥിയെ മർദിച്ചതായി പരാതി

കൊയിലാണ്ടി: കോളജ് വിദ്യാർഥിയെ മാനേജർ മർദിച്ചതായി പരാതി. കൊയിലാണ്ടി ആർട്സ് കോളജ് മാനേജർ സ്ഥാപനത്തിലെ പ്ലസ് വൺ വിദ്യാർഥിയായ എസ്.ബി. വൈഷ്ണവിനെ മർദിച്ചതായാണ് പരാതി. വൈഷ്ണവിന്‍റെ മൊബൈൽ ഫോൺ ക്ലാസിലെ ഒരു സഹപാഠിക്ക് വീട്ടുകാരെ ബന്ധപ്പെടാനായി നൽകുകയായിരുന്നു. എന്നാൽ ഇതേ സമയത്ത് ക്ലാസിൽ എത്തിയ പ്രിൻസിപ്പൽ വിദ്യാർഥിയിൽ നിന്ന് ഫോൺ പിടിച്ചെടുത്ത് രക്ഷിതാക്കളോട് കോളജുമായി ബന്ധപ്പെടാൻ ആവശ്യപ്പെടുകയുമായിരുന്നു. തുടർന്ന് ഫോണിന്‍റെ ഉടമയായ വൈഷ്ണവ് കോളജ് ഓഫീസിൽ എത്തി മാനേജരോട് കാര്യം ധരിപ്പിപ്പിക്കുന്നതിനിടെ ഇദ്ദേഹം വിദ്യാർഥിയുടെ കഴുത്തിൽ പിടിച്ചു മർദിച്ചുവെന്നാണ് പരാതി.പരിക്കേറ്റ വിദ്യാർഥി ആശുപത്രിയിൽ ചികിത്സ തേടി.

വികസന മുരടിപ്പ് : ജനകീയ കുറ്റവിചാരണയുമായി എൽഡിഎഫ്

കൂരാച്ചുണ്ട്: യുഡിഎഫ് ഭരണത്തിലുള്ള കൂരാച്ചുണ്ട് പഞ്ചായത്ത് ഭരണസമിതിയുടെ ദുർഭരണത്തിനെതിരേയും വികസന മുരടിപ്പിലും പ്രതിഷേധിച്ച് എൽഡിഎഫ് കൂരാച്ചുണ്ട് പഞ്ചായത്ത് കമ്മിറ്റി ജനകീയ കുറ്റവിചാരണ നടത്തുന്നു. യുഡിഎഫ് ഭരണം അധികാരത്തിലേറി നാലരവർഷം പിന്നിടുമ്പോഴും പ്രധാന കക്ഷിയായ കോൺഗ്രസും മുസ്‌ലിം ലീഗും തമ്മിൽ പ്രസിഡന്‍റ് പദവിയെ ചൊല്ലിയുള്ള തർക്കവും മുന്നണിക്കുള്ളിലെ അധികാര വടംവലിയും പഞ്ചായത്തിന്‍റെ വികസന പ്രവർത്തനങ്ങളെ അട്ടിമറിച്ചു. സർക്കാർ നൽകുന്ന ഫണ്ടുകൾ വീതം വയ്ക്കുന്നതല്ലാതെ ഒരു വികസനങ്ങളും നടപ്പാക്കിയില്ലെന്ന് എൽഡിഎഫ് കൂരാച്ചുണ്ട് പഞ്ചായത്ത് കമ്മിറ്റി ഭാരവാഹികളായ വിൽസൺ പാത്തിച്ചാലിൽ, എ.സി ഗോപി, കെ.ജി അരുൺ, ജോസഫ് വെട്ടുകല്ലേൽ, എ.കെ. പ്രേമൻ, അശോകൻ കുറുങ്ങോട്ട് എന്നിവർ വാർത്താസമ്മേളനത്തിൽ പറഞ്ഞു. സമരത്തിന്‍റെ പ്രചരണാർഥം ഇന്നും നാളെയും പഞ്ചായത്തിലുടനീളം കാൽനട പ്രചരണ ജാഥ സംഘടിപ്പിക്കും. ഇന്ന് കക്കയത്തു നിന്നും ആരംഭിക്കുന്ന ജാഥ സിപിഎം ഏരിയ സെക്രട്ടറി ടി.കെ. സുമേഷ് ഉദ്ഘാടനം ചെയ്യും. വൈകിട്ട് പൂവത്തുംചോലയിൽ നടക്കുന്ന സമാപന സമ്മേളനം കേരള കോൺഗ്രസ് -എം ജില്ലാ പ്രസിഡന്‍റ് ടി.എം. ജോസഫ് ഉദ്ഘാടനം ചെയ്യും. നാളെ ഓട്ടപ്പാലത്തു നിന്നും ആരംഭിക്കുന്ന ജാഥ എൻസിപി നേതാവ് പി. സുധാകരൻ ഉദ്ഘാടനം ചെയ്യും. വൈകിട്ട് 5.30ന് കൂരാച്ചുണ്ടിൽ നടക്കുന്ന സമാപന സമ്മേളനം സിപിഐ ജില്ലാ സെക്രട്ടറി പി. ഗവാസ് ഉദ്ഘാടനം ചെയ്യും. 23ന് രാവിലെ പത്തിന് നടക്കുന്ന ജനകീയ കുറ്റ വിചാരണ സിപിഎം ജില്ലാ സെക്രട്ടറി എം. ഹബൂബ് ഉദ്ഘാടനം ചെയ്യും.

പകൽ വീട് ഉദ്ഘാടനം ചെയ്തു

കോടഞ്ചേരി: കോടഞ്ചേരി പഞ്ചായത്തിനെ വയോജന സൗഹൃദ പഞ്ചായത്താക്കി മാറ്റുന്നതിന്‍റെ ഭാഗമായി മഹിളാ സമാജത്തിൽ നിന്നും വിട്ടു കിട്ടിയ അഞ്ചു സെന്‍റ് സ്ഥലവും കെട്ടിടവും നവീകരിച്ച് പകൽവീടാക്കി മാറ്റി. പകൽ വീടിന്‍റെ ഉദ്ഘാടനം പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി നിർവഹിച്ചു. വാർഡ് മെമ്പർ ജോർജുകുട്ടി വിളക്കുന്നേൽ അധ്യക്ഷത വഹിച്ചു. ചടങ്ങിൽ വൈസ് പ്രസിഡന്‍റ് ജമീല അസീസ് മുഖ്യപ്രഭാഷണം നടത്തി. ഫാ. പോൾ മരിയ പീറ്റർ, ഫാ. റെജി കോലാനിക്കൽ, പഞ്ചായത്ത് മെമ്പർമാരായ ചിന്നമ്മ മാത്യു, ബിന്ദു ജോർജ്,ക്ഷീരോൽപാദന സഹകരണസംഘം പ്രസിഡന്‍റ് ബെന്നി ജേക്കബ്, വ്യാപാര വ്യവസായി ഏകോപന സമിതി യൂണിറ്റ് പ്രസിഡന്‍റ് തമ്പി വായിക്കാട്ട്,ഡോണ ഫ്രാൻസിസ്, സീന ദിലീഷ് എന്നിവർ പ്രസംഗിച്ചു.

പെരുന്തേനീച്ചയുടെ അക്രമണത്തിൽ നിന്ന് രക്ഷതേടി യുവാവ് കിണറ്റിൽ ചാടി

മുക്കം: പെരുന്തേനീച്ചയുടെ അക്രമണത്തിൽ നിന്ന് രക്ഷതേടി ബൈക്ക് യാത്രികനായ യുവാവ് കിണറ്റിൽ ചാടി. മാമ്പറ്റ ചേരികലോട് ബൈക്കിൽ യാത്ര ചെയ്യുകയായിരുന്ന ചാത്തമംഗലം വേങ്ങേരി മഠം പടിഞ്ഞാറേ തൊടികയിൽ ഷാജുവാണ് ഇന്നലെ വൈകുന്നേരം പെരുന്തേനീച്ചയുടെ അക്രമണത്തിൽ നിന്നും രക്ഷനേടാനായി കിണറിലേക്ക് എടുത്തുചാടിയത്. ഇയാൾ ബൈക്കിൽ സഞ്ചരിച്ചു കൊണ്ടിരിക്കുന്നതിനിടയിൽ പെരുന്തേനീച്ച കൂട്ടത്തോടെ വന്ന് കുത്തുകയായിരുന്നു. ഇതോടെയാണ് കിണറ്റിലേക്ക് ചാടിയത്. സംഭവം ശ്രദ്ധയിൽപെട്ട നാട്ടുകാർ വിവരം മുക്കം അഗ്നി രക്ഷാ സേനയെ അറിയിക്കുകയും മുക്കത്തു നിന്നും ഫയർ സ്റ്റേഷൻ ഓഫീസർ എം.എ. അബ്ദുൽ ഗഫൂറിന്‍റെ നേതൃത്വത്തിലുള്ള അഗ്നി രക്ഷാസേന സ്ഥലത്തെത്തി കിണറ്റിൽ ചാടിയ ആളെ റെസ്ക്യു നെറ്റ് ഉപയോഗിച്ച് രക്ഷപെടുത്തി മുക്കം കെഎംസിടി മെഡിക്കൽ കോളജിൽ എത്തിച്ചു. ഇയാളുടെ മുഖമാകെ ഈച്ചയുടെ കുത്തേറ്റ പരുക്കാണ്.

ഹെൽപ് ഡെസ്ക്കുകൾ ആരംഭിച്ചത് കർഷകരെ വിഡ്ഢിയാക്കാൻ: എഎപി

കൂടരഞ്ഞി: തെരഞ്ഞെടുപ്പ് മുന്നിൽ കണ്ട് മനുഷ്യ -വന്യജീവി സംഘർഷ ലഘൂകരണം എന്ന പേരിൽ ഹെൽപ് ഡെസ്ക്കുകൾ ആരംഭിച്ചത് മലയോര കർഷകരെ വിഡ്ഢികളാക്കാനുള്ള നീക്കമാണെന്ന് ആം ആദ്മി പാർട്ടി കൂടരഞ്ഞി പഞ്ചായത്ത് കമ്മിറ്റി ആരോപിച്ചു. കാട്ടുപന്നികളെ വെടിവച്ചു കൊല്ലാൻ പഞ്ചായത്തു പ്രസിഡന്‍റിന് അധികാരം ലഭിച്ചതിനു ശേഷം ഇതുവരെ കൂടരഞ്ഞി പഞ്ചായത്തിൽ പതിമൂന്ന് കാട്ടുപന്നികളെ മാത്രമാണ് വെടിവച്ചു കൊന്നത്. പുലി, കടുവ, കുരങ്ങ്, മയിൽ തുടങ്ങിയ വന്യജീവികളുടെ ശല്യം കൃഷിയിടങ്ങളിൽ മാത്രമല്ല ജന ജീവിതത്തെയും സരമായി ബാധിച്ചിട്ടുണ്ട്. പകൽസമയത്ത് പോലും ജനങ്ങൾക്ക് നേരേ ആക്രമണം ഉണ്ടാകുന്നു. എംപാനൽ ഷൂട്ടർമാർക്ക് മതിയായ പ്രതിഫലം നൽകാത്തതും കാട്ടുപന്നി ശല്യം രൂക്ഷമാകാൻ കാരണമായെന്ന് യോഗം വിലയിരുത്തി. തെരഞ്ഞെടുപ്പുകൾ വരുന്പോൾ ഇത്തരം നീക്കങ്ങളുമായി മുന്നോട്ടുവരാതെ ശാശ്വതമായ പരിഹാരം കാണണമെന്നും യോഗം ആവശ്യപ്പെട്ടു. ജോബി പുളിമൂട്ടിൽ അധ്യക്ഷത വഹിച്ചു. മനു പൈബിളിൽ, ജോസ് മുള്ളനാനിയിൽ, ബാബു ഐക്കര, ജോയി കളത്തിപറമ്പിൽ, ഫ്രാൻസിസ് പുന്നകുന്നേൽ, ബൈജു വരിക്കാനി, ജോഷി തുളുവനാനിക്കൽ തുടങ്ങിയവർ പ്രസംഗിച്ചു.

ലോട്ടറി തൊഴിലാളികള്‍ ആദായനികുതി ഓഫീസ് മാര്‍ച്ച് നടത്തി

കോഴിക്കോട്: കേരള ലോട്ടറിയെ തകര്‍ക്കാനുള്ള കേന്ദ്രസര്‍ക്കാര്‍ നീക്കത്തിനെതിരേ കോഴിക്കോട് ആദായനികുതി ഓഫീസിലേക്ക് ലോട്ടറി തൊഴിലാളികളും ഏജന്‍റുമാരും മാര്‍ച്ച് നടത്തി. സംയുക്ത ട്രേഡ് യൂണിയനുകളുടെ നേതൃത്വത്തിലുള്ള ഭാഗ്യക്കുറി സംരക്ഷണ സമിതി ആഭിമുഖ്യത്തിലായിരുന്നു മാര്‍ച്ചും ധര്‍ണയും സംഘടിപ്പിച്ചത്. ഓള്‍ കേരള ലോട്ടറി ട്രേഡേഴ്‌സ് യൂണിയന്‍ (എഐടിയുസി) സംസ്ഥാന വര്‍ക്കിംഗ് പ്രസിഡന്‍റ് പി.എം. ജമാല്‍ ഉദ്ഘാടനം ചെയ്തു. എ.സി. തോമസ് (ഐഎന്‍ടിയുസി) അധ്യക്ഷത വഹിച്ചു. സി.സി. രതിഷ് (സിഐടിയു),വി.കെ. മോഹന്‍ദാസ് (സിഐടിയു), ഷാജു പൊന്‍പാറ (ഐഎന്‍ടിയുസി), നസുറുദ്ധീന്‍ (വിവിഎസ് - കെഎല്‍എ), ബി.കെ. ബാലകൃഷ്ണന്‍ (സിഐടിയു), വിനയകൃഷ്ണന്‍ (വ്യാപാര സമിതി), കബീര്‍ സലാല (എച്ച്എംഎസ്), പി.കെ. മുഹമ്മദ് (എഐടിയുസി) എന്നിവര്‍ സംസാരിച്ചു. 2017ല്‍ ജിഎസ്ടി ആരംഭിച്ചതുമുതല്‍ 12 ശതമാനമായിരുന്നു നികുതി. എന്നാല്‍ 2020 ആകുമ്പോള്‍ ഇത് 28 ശതമാനമായി. ഇപ്പോള്‍ 40 ശതമാനക്കി വര്‍ധിപ്പിച്ചിരിക്കുകയാണ്. ഈ തീരുമാനം തൊഴിലാളികളുടെ വരുമാനത്തെ സാരമായി ബാധിക്കുകയും ഭിന്നശേഷിക്കാരും പ്രായമായവരും രോഗികളുമായ രണ്ടു ലക്ഷത്തോളം പേരുടെ ഉപജീവനമാര്‍ഗം ഇല്ലാതാക്കുകയുമാണ്. ക്ഷേമനിധി ബോര്‍ഡ് നടപ്പാക്കുന്ന പെന്‍ഷന്‍, ബോണസ് ചികിത്സ ധനസഹായം, മരണാനന്തര കുടുംബസഹായം, വിദ്യാഭ്യാസ ധനസഹായം, പ്രസവ ധനസഹായം, ഭിന്നശേഷിക്കാര്‍ക്കുള്ള മുച്ചക്ര വാഹനങ്ങള്‍ എന്നീ ആനുകൂല്യങ്ങളുടെ വിതരണത്തെയും നികുതി വര്‍ധന പ്രതികൂലമായി ബാധിക്കുകയാണ്. ലോട്ടറിയിലെ വരുമാനം ഉപയോഗിച്ചുള്ള കാരുണ്യ ചികിത്സ പദ്ധതിയേയും ഇത് തകരാറിലാക്കുമെന്ന് സംയുക്ത ട്രേഡ് യൂണിയന്‍ വ്യക്തമാക്കി.

പമ്പ് സെറ്റ് ഉപകരണങ്ങൾ മോഷ്ടിച്ച പ്രതി പിടിയിൽ

പെരുവണ്ണാമൂഴി: ജലജീവൻ കരാറുകാരായ മിഡ്‌ലാൻഡ് കമ്പനിയുടെ ഉടമസ്ഥതയിലുള്ള പെരുവണ്ണാമൂഴി സൈറ്റിൽ നിന്ന് 12 പമ്പ് സെറ്റ് കാരി ചെയിനുകൾ മോഷ്ടിച്ച് വിൽപ്പന നടത്തിയ പ്രതിയെ പെരുവണ്ണാമൂഴി പോലീസ് അറസ്റ്റ്‌ ചെയ്തു. പെരുവണ്ണാമൂഴി പൊന്മലപ്പാറ സ്വദേശി നടേമ്മൽ മൊബിൻ എന്ന കുട്ടാപ്പി (31)യാണ് പിടിയിലായത്. പേരാമ്പ്ര കോടതിയിൽ ഹാജരാക്കിയ പ്രതിയെ റിമാൻഡ് ചെയ്‌തു. ഒരു കാരിചെയിനിന് അൻപതിനായിരം രൂപയോളം വിലവരും. മൊത്തം ആറ് ലക്ഷം രൂപയുടെ ചെയിനാണ് പ്രതി മോഷ്ടിച്ചത്. യഥാർഥ വില അറിയാത്ത പ്രതി ഇത് പേരാമ്പ്ര പുറ്റം പൊയിൽ ഭാഗത്തെ ആക്രികടയിൽ അയ്യായിരം രൂപക്ക് വിൽക്കുകയായിരുന്നു. മിഡ്‌ലാൻഡ് കന്പനിയുടെ മാനേജർ നൽകിയ പരാതിയുടെ അടിസ്ഥാനത്തിലാണ് പ്രതിയെ കസ്റ്റഡിയിലെടുത്തത്.

ടൈഗർ സഫാരി പാർക്കിലേക്ക് ചക്കിട്ടപാറ ഭരണ സമിതി യാത്ര തിരിച്ചു

പേരാമ്പ്ര: ചക്കിട്ടപാറ പഞ്ചായത്തിലെ ടൂറിസം വളർച്ചക്ക് പുത്തനുണർവ് നൽകുന്ന ടൈഗർ സഫാരി പാർക്ക് ആരംഭിക്കുന്നതിനു മുന്നോടിയായി ഇതിന്‍റെ പ്രവർത്തനങ്ങൾ നേരിൽ കാണാൻ പഞ്ചായത്ത് ഭരണ സമിതി അംഗങ്ങൾ കർണാടകയിലെ ബന്നാർഘട്ട ടൈഗർ പാർക്ക്‌ സന്ദർശിക്കാനായി പുറപ്പെട്ടു. പ്രസിഡന്‍റ് കെ. സുനിലിന്‍റെയും വൈസ് പ്രസിഡന്‍റ് ചിപ്പി മനോജിന്‍റെയും നേതൃത്വത്തിൽ 13 അംഗ ജനപ്രതിനിധി സംഘമാണ് സന്ദർശനത്തിനു പോയിരിക്കുന്നത്. ടൈഗർ പാർക്ക് സ്ഥാപിച്ചാലുള്ള ഗുണങ്ങൾ, പ്രശ്നങ്ങൾ എന്നിവയൊക്കെ ഇവർ പഠിക്കും. ചക്കിട്ടപാറ പഞ്ചായത്തിലെ മുതുകാട് പേരാമ്പ്ര എസ്റ്റേറ്റിനു സമീപമാണ് കോഴിക്കോട് ജില്ലയിലെ ടൈഗർ പാർക്കിനായി വനംവകുപ്പ് നിശ്ചയിച്ചിരിക്കുന്നത്. ഭരണ സമിതി കക്ഷി ഭേദമില്ലാതെയാണ് ബംഗളൂരിലെ ബന്നാർ ഘട്ട സഫാരി പാർക്ക് സന്ദർശിക്കുന്നത്.

നിരാഹാര സമരം ഫലം കണ്ടു : കക്കയത്ത് കെഎസ്ഇബിയ്ക്ക് ഭൂമി വിട്ടു നൽകിയ കുടുംബങ്ങൾക്ക് പ്രശ്ന പരിഹാരം

കൂരാച്ചുണ്ട്: കക്കയത്തെ പവർ ഹൗസ് നിർമാണത്തിന്‍റെ ഭാഗമായി ഇരുപത് വർഷം മുമ്പ് കെഎസ്ഇബിയ്ക്ക് പെൻസ്റ്റോക് നിർമാണത്തിനായി ഭൂമി വിട്ടു നൽകിയവർക്ക് സർക്കാർ നഷ്ടപരിഹാരം നൽകാത്ത വിഷയത്തിൽ പ്രശ്നപരിഹാരം. കക്കയത്തെ അഞ്ച് കുടുംബങ്ങൾ ഇന്നലെ കൂരാച്ചുണ്ട് വില്ലേജ് ഓഫീസിനു മുമ്പിൽ നടത്തിയ നിരാഹാര സമരത്തെ തുടർന്നാണ് പ്രശ്നത്തിന് പരിഹാരമായത്. കെഎസ്ഇബി 2005ലാണ് ഭൂമി ഏറ്റെടുത്തത്. എന്നാൽ നഷ്ടപരിഹാരത്തിനായി വർഷങ്ങളോളം കുടുംബങ്ങൾ കെഎസ്ഇബി, റവന്യു ഓഫീസുകൾ കയറിയിറങ്ങിയിട്ടും പരിഹാരമായില്ല. തുടർന്നാണ് സമരവുമായി കുടുംബങ്ങൾ രംഗത്തിറങ്ങിയത്. ജില്ലാ കളക്ടറുടെ ഉത്തരവു പ്രകാരം കൊയിലാണ്ടി തഹസിൽദാർ ജയശ്രീ വാര്യർ, ഡെപ്യൂട്ടി തഹസിൽദാർ കെ.എസ്. സുരേഷ് എം. മാവിലായിൽ എന്നിവർ ഇന്നലെ സ്ഥലത്തെത്തി കുടുംബങ്ങളുമായി നടത്തിയ ചർച്ചയെ തുടർന്ന് ഉച്ചകഴിഞ്ഞതോടെ സമരം അവസാനിപ്പിച്ചു. ഇവരുടെ കൈവശമുള്ള ഭൂമിയുടെ മുഴുവൻ രേഖകളും പരിശോധിച്ച് 30നുള്ളിൽ ആവശ്യമായ നടപടി സ്വീകരിക്കാനാണ് തീരുമാനമായത്. കൂരാച്ചുണ്ട് പഞ്ചായത്തിലെ നാലാം വാർഡ് കക്കയം കോണിപ്പാറ മേഖലയിലെ ലീല കൂവ്വപൊയ്കയിൽ, പ്രജീഷ് പൂവത്തിങ്കൽ, ത്രേസ്യാമ്മ പൂവത്തിങ്കൽ, ജോസ് കുറുമുട്ടത്ത്, മാത്യു കുറുമുട്ടത്ത് എന്നീ കുടുംബങ്ങളുടെ മൂന്ന് ഏക്കറോളം വരുന്ന ഭൂമിയാണ് 2005ൽ കുറ്റ്യാടി അഡീഷണൽ എക്സ്റ്റൻഷൻ ജലവൈദ്യുത പദ്ധതിയുടെ ഭാഗമായുള്ള പെൻസ്റ്റോക് പൈപ്പ് സ്ഥാപിക്കാനായി സർക്കാർ ഏറ്റെടുത്തത്. ഭൂമി കെഎസ്ഇബിക്ക് കൈമാറുന്നതുമായി ബന്ധപ്പെട്ട കാര്യങ്ങൾ നടന്ന് കൊണ്ടിരിക്കുന്നതിനിടയിൽ വനംവകുപ്പ് ഈ ഭൂമിയിൽ അവകാശ വാദം ഉന്നയിച്ചതിനെ തുടർന്ന് തർക്കമാവുകയായിരുന്നു. ചർച്ചയിൽ പഞ്ചായത്ത് പ്രസിഡന്‍റ് ഒ.കെ. അമ്മദ്, പഞ്ചായത്ത് അംഗങ്ങളായ ഡാർളി ഏബ്രഹാം, സണ്ണി പുതിയകുന്നേൽ, വില്ലേജ് ഓഫീസർ പി.വി സുധി, രാഷ്ട്രീയ പാർട്ടി പ്രതിനിധികളായ വി.ജെ. സണ്ണി, ജോസ് വെളിയത്ത്, എ.സി. ഗോപി, എൻ.കെ. കുഞ്ഞമ്മദ് എന്നിവർ പങ്കെടുത്തു.

സ്ത്രീ ക്ലിനിക്ക് ഉദ്ഘാടനം ചെയ്തു

ചെമ്പനോട: ചക്കിട്ടപാറ പഞ്ചായത്ത് തല സ്ത്രീ ക്ലിനിക്കിന്‍റെ ഉദ്‌ഘാടനം ചെമ്പനോടയിൽ ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഇ.എം. ശ്രീജിത്ത്‌ നിർവഹിച്ചു. വാർഡ് മെമ്പർ ലൈസ ജോർജ് അധ്യക്ഷത വഹിച്ചു. മെഡിക്കൽ ഓഫീസർ ഡോ. കെ. വിനോദ് ക്ലാസ് എടുത്തു. ഫ്രാൻസിസ് കിഴക്കരക്കാട്ട്, അവള ഹമീദ്, ജയേഷ് ചെമ്പനോട, ആരോഗ്യ ഉദ്യോഗസ്ഥരായ പ്രീജിത്ത്, എം.വി. വിജി, ജെ. ശ്യാം എന്നിവർ പ്രസംഗിച്ചു.

സംരക്ഷണ ഭിത്തി നിർമിക്കണമെന്ന്

തലയാട്: പനങ്ങാട് പഞ്ചായത്തിലെ തലയാട് - വയലട റോഡിൽ കാവുമ്പുറം ഭാഗത്തു സംരക്ഷണ ഭിത്തി നിർമിക്കാത്തത് അപകട ഭീഷണി ഉയർത്തുന്നു. മാസങ്ങൾക്ക് മുൻപ് റോഡ് പണിക്ക് കൊണ്ടുവന്ന കോൺക്രീറ്റ് മിക്സ്‌ ചെയ്യുന്ന യന്ത്രം റോഡിന്‍റെ സംരക്ഷണ ഭിത്തിയോട് കൂടി മറിയുകയായിരുന്നു. ഇതിന് ശേഷം റോഡിന്‍റെ സംരക്ഷണ ഭിത്തി നിർമിച്ചിട്ടില്ല. ദിവസവും നൂറു കണക്കിനാളുകൾ വയലട വ്യൂ പോയിന്‍റിലേക്ക് ഉൾപ്പെടെ യാത്ര ചെയ്യുന്ന റോഡാണിത്. ഇറക്കമുള്ള റോഡിൽ സംരക്ഷണ ഭിത്തി ഇല്ലാത്തത് വലിയ അപകടങ്ങൾക്ക് വഴിവെക്കുമെന്നും എത്രയും വേഗം അധികാരികൾ സംരക്ഷണ ഭിത്തി നിർമിക്കണമെന്നും നാട്ടുകാർ ആവശ്യപ്പെട്ടു. photo: തലയാട് - വയലട റോഡിൽ സംരക്ഷണ ഭിത്തി നിർമിച്ചിട്ടില്ലാത്ത ഭാഗം

കുടുംബാരോഗ്യ കേന്ദ്രവും പരിസരവും ശുചീകരിച്ചു

തിരുവമ്പാടി: അൽഫോൻസ കോളജ് എൻഎസ്എസ് യൂണിറ്റിന്‍റെ ആഭിമുഖ്യത്തിൽ തിരുവമ്പാടി കുടുംബാരോഗ്യ കേന്ദ്രവും പരിസരവും ശുചീകരിച്ചു. ശുചീകരണ പരിപാടി കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. കെ.വി. പ്രിയ ഉദ്ഘാടനം ചെയ്തു. എൻഎസ്എസ് പ്രോഗ്രാം ഓഫീസർ ഫാ. ഷിജു മാത്യു അധ്യക്ഷത വഹിച്ചു. ഹെൽത്ത് ഇൻസ്പെക്ടർ എം. സുനീർ, നഴ്സിംഗ് ഓഫീസർ ഷീജ, ജെഎച്ച്ഐമാരായ റോഷൻലാൽ, മുഹമ്മദ് മുസ്തഫ ഖാൻ, എൻഎസ്എസ് സ്റ്റാഫ് കോഡിനേറ്റർമാരായ പി. സായന്ത്, കെ. അഞ്ജന, എൻഎസ്എസ് വളണ്ടിയർ സെക്രട്ടറിമാരായ എബിൻ സണ്ണി, ജിയാ ജഗീഷ് എന്നിവർ പ്രസംഗിച്ചു.

കാരശേരിയിൽ മാലിന്യ സംസ്കരണം ഇനി വേഗത്തിലാവും; എംസിഎഫ് നിർമാണത്തിന് സ്വന്തമായി ഭൂമി വാങ്ങി

മുക്കം: കാരശേരി പഞ്ചായത്തിൽ മാലിന്യ സംസ്കരണ നടപടികൾ വേഗത്തിലാക്കാൻ നടപടി സ്വീകരിച്ച് ഭരണസമിതി. ഇതിന്‍റെ ഭാഗമായി എംസിഎഫ് കെട്ടിടം നിർമിക്കുന്നതിന് വേണ്ടി കറുത്തപറമ്പ് എള്ളങ്ങളിൽ സ്വന്തമായി 20 സെന്‍റ് ഭൂമി വാങ്ങി. പഞ്ചായത്തിന്‍റെ 18 വാർഡുകളിലെ വീടുകളിൽ നിന്നും അജൈവ മാലിന്യങ്ങൾ ശേഖരിച്ചത് കൊണ്ടുവെക്കുവാനോ തരംതിരിക്കുവാനോ പഞ്ചായത്തിന് ഇതുവരെ സ്വന്തമായി ഭൂമിയോ കെട്ടിടമോ ഇല്ലായിരുന്നു. ഇതോടെ ഭരണസമിതി നേരിട്ട് നിരവധി പ്രദേശങ്ങൾ സന്ദർശിക്കുകയും അതിന്‍റെ അടിസ്ഥാനത്തിൽ കറുത്തപറമ്പ് എള്ളങ്ങലിൽ പുതിയ സ്ഥലം കണ്ടെത്തുകയും 20 സെന്‍റ് ഭൂമി വാങ്ങുകയുമായിരുന്നു. കറുത്തപറമ്പ് സാംസ്കാരിക നിലയത്തിൽ വച്ച് പഞ്ചായത്ത് പ്രസിഡന്‍റ് സുനിതാ രാജൻ പഞ്ചായത്ത് സെക്രട്ടറി മരിയക്ക് ആധാരം കൈമാറി. വൈസ് പ്രസിഡന്‍റ് ജംഷീദ് ഒളകര അധ്യക്ഷത വഹിച്ചു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ജിജിത സുരേഷ്, വികസന സ്റ്റാൻഡിംഗ് കമ്മിറ്റി ചെയർപേഴ്സൺ ശാന്താദേവി മൂത്തേടത്ത്, പഞ്ചായത്ത് അംഗങ്ങളായ ഷാഹിന, കെ. കൃഷ്ണദാസ്, മുൻ പഞ്ചായത്ത് വൈസ് പ്രസിഡന്‍റ് എം.ടി. അഷ്റഫ്, രാഷ്ട്രീയപ്പാർട്ടി പ്രതിനിധികളായ സമാൻ ചാലൂളി, കെ. കോയ, എ.പി. മോയി, ഇസ്മായിൽ മേച്ചേരി, നടുക്കണ്ടി അബൂബക്കർ, റഹൂഫ് കറുത്തപറമ്പ്, ബാബു തോണ്ടയിൽ, കലന്ദൻക്കുട്ടി കറുത്തപറമ്പ്, മുഹമ്മദ്, റഹൂഫ് കറുത്തപറമ്പ്, ഷൈമ, അസിസ്റ്റന്‍റ് സെക്രട്ടറി ജോസ് തോമസ് എന്നിവർ പ്രസംഗിച്ചു.

വടകര ബീച്ച് പോസ്റ്റോഫീസ് അടച്ചുപൂട്ടുന്നു : പ്രദേശത്തെ ജനങ്ങളെ ദോഷകരമായി ബാധിക്കുമെന്ന്

വടകര: വടകരയുടെ തീരപ്രദേശത്തെ ആയിരക്കണക്കിന് ജനങ്ങള്‍ക്ക് തപാല്‍ സേവനം നല്‍കിക്കൊണ്ടിരിക്കുന്ന ബീച്ച് പോസ്റ്റ് ഓഫീസ് അടച്ചു പൂട്ടുന്നു. ഇതു സംബന്ധിച്ച ഉത്തരവ് ഇറങ്ങി. ഈ മാസം മുപ്പതോടെ ബീച്ച് പോസ്റ്റ് ഓഫീസ് വടകര ഹെഡ്പോസ്റ്റ് ഓഫീസില്‍ ലയിപ്പിക്കുമെന്നാണ് ഉത്തരവില്‍ പറയുന്നത്. ഈ നടപടി ഈ പ്രദേശത്തെ പൊതുജനങ്ങളുടെ ജീവിതത്തെയും ജീവനക്കാരേയും ദോഷകരമായി ബാധിക്കുമെന്ന് ചൂണ്ടിക്കാണിക്കപ്പെടുന്നു. മത്സ്യത്തൊഴിലാളികള്‍, ചെറുകിട വ്യാപാരികള്‍, ദിവസവേതന തൊഴിലാളികള്‍, സഹകരണസംഘങ്ങളുമായി ബന്ധപ്പെട്ടവര്‍, ചെറുകിട വ്യവസായികള്‍ തുടങ്ങിയ നിരവധി വിഭാഗങ്ങള്‍ക്കുള്ള ജീവിതോപാധിയുടെ കേന്ദ്രമാണ് തപാല്‍ ഓഫീസ്. ബാങ്കിംഗ്, ഇന്‍ഷ്വറന്‍സ്, മണി ഓര്‍ഡര്‍ തുടങ്ങിയ പദ്ധതികള്‍ തപാല്‍ ഓഫീസ് വഴി നടപ്പിലാക്കി വരുന്നുണ്ട്. ഓഫീസ് അടച്ചുപൂട്ടുന്നത് ഇത്തരം പ്രവര്‍ത്തനങ്ങളെ ദോഷകരമായി ബാധിക്കും. ഈ പ്രദേശത്ത് നിരവധി വിദ്യാഭ്യാസ സ്ഥാപനങ്ങളും കുടുംബാരോഗ്യ കേന്ദ്രങ്ങളും നഗരാരോഗ്യ ഉപകേന്ദ്രങ്ങളും പ്രവര്‍ത്തിക്കുന്നുണ്ട്. വിദ്യാര്‍ഥികള്‍ക്ക് സ്‌കോളര്‍ഷിപ്പ് തുടങ്ങിയ സേവനങ്ങള്‍ തപാല്‍ ഓഫീസ് ബാങ്കിംഗ് വഴിയാണ് സാധാരണയായി നടക്കുന്നത്. ഓഫീസ് ഇല്ലാതാകുന്നത് ഇത്തരം സേവനങ്ങള്‍ താറുമാറാക്കും. ബീച്ച് തപാല്‍ ഓഫീസ് ഇല്ലാതായാല്‍ ഇവിടത്തെ സാധാരണക്കാര്‍ക്ക് വടകര ഹെഡ് പോസ്റ്റ് ഓഫീസിനെയോ ചോറോട് പോസ്റ്റ് ഓഫീസിനെയോ ആശ്രയിക്കേണ്ടിവരും. ഇവ ദൂരെയായതിനാല്‍ പൊതുജനങ്ങള്‍ക്ക് വലിയ പ്രയാസം വരും. മത്സ്യതൊഴിലാളികള്‍ക്കും മുതിര്‍ന്ന പൗരന്മാര്‍ക്കും സ്ത്രീകള്‍ക്കും വിദ്യാര്‍ഥികള്‍ക്കും രോഗികള്‍ക്കും യാത്ര പ്രയാസം സൃഷ്ടിക്കും. പോസ്റ്റ്മാന്‍ ഡ്യൂട്ടിയിലുള്ളവര്‍ പുതിയ ഓഫീസുകളില്‍ നിന്ന് കൂടുതല്‍ ദൂരം നടന്ന് മെയില്‍ വിതരണം നടത്തേണ്ടിവരും. ഇതോടെ മെയില്‍ ഡെലിവറിയും ജനങ്ങള്‍ക്കുള്ള സേവനവും വൈകും. ആര്‍ഡി ഏജന്‍റുമാര്‍ മറ്റോഫീസുകളില്‍ ചേര്‍ക്കപ്പെടുന്നതോടെ അവിടങ്ങളിലെ കൗണ്ടര്‍ ജീവനക്കാരുടെ ജോലി ഭാരം ഉയരും. തപാല്‍ മേഖലയെ ദോഷകരമായി ബാധിക്കുന്ന നടപടിയാണ് അധികൃതര്‍ കൈക്കൊള്ളുന്നത്.

തൂങ്കുഴി പിതാവ് ലാളിത്യത്തിന്‍റെ ആള്‍രൂപം

എം. ജയതിലകന്‍ കോഴിക്കോട്: കാലം ചെയ്ത ആര്‍ച്ച് ബിഷപ് മാര്‍ ജേക്കബ് തൂങ്കുഴി മാനന്തവാടിയില്‍ ബിഷപായിരുന്ന കാലം. കൃഷിയില്‍ താല്‍പര്യമുള്ള ആളായിരുന്നു പിതാവ്. ഒഴിവു കിട്ടുമ്പോള്‍ കാര്‍ഷിക വൃത്തിയില്‍ ഏര്‍പ്പെടും. ഒരു ദിവസം പിതാവിനെ കാണാന്‍ രണ്ടു പത്രപ്രവര്‍ത്തകര്‍ വന്നു. അദ്ദേഹം അരമനയില്‍ ഉണ്ടായിരുന്നില്ല. കെട്ടിടത്തിന്‍റെ പിറകിലുണ്ടെന്ന് ജീവനക്കാര്‍ പറഞ്ഞു. പത്ര പ്രവര്‍ത്തകര്‍ രണ്ടുപേരും പിന്‍ഭാഗത്ത് ചെന്നു നോക്കി. അവിടെ ആരെയും കണ്ടില്ല. അവര്‍ തിരിച്ചുവന്ന് വിവരം പറഞ്ഞു. പിന്‍ഭാഗത്ത് ഉണ്ടല്ലോ എന്നായി ജീവനക്കാര്‍. പത്രപ്രവര്‍ത്തകര്‍ വീണ്ടും അരമനയുടെ പിന്‍ഭാഗത്തേക്ക് പോയി. അവിടെ ഒരു കര്‍ഷകന്‍ വാഴയ്ക്ക് തടമെടുക്കുന്നുണ്ടായിരുന്നു.കൈലി മുണ്ടും ബനിയനുമാണ് വേഷം. പത്രപ്രവര്‍ത്തകര്‍ തൂങ്കുഴി പിതാവിനെ അവിടെ എവിടെയെങ്കിലും കണ്ടോ എന്ന് അദ്ദേഹത്തോടു തിരക്കി. "അത് ഞാന്‍ തന്നെ' എന്നായിരുന്നു മറുപടി. ഇതു കേട്ട പത്രപ്രവര്‍ത്തകര്‍ അദ്ഭുതസ്തംബ്ധരായി. പിതാവിന്‍റെ ലാളിത്യത്തെക്കുറിച്ച് പറയുമ്പോള്‍ അദ്ദേഹത്തിന്‍റെ സഹോദരപുത്രന്‍ സ്‌കറിയ തൂങ്കുഴിയുടെ കണ്ണുകള്‍ നിറഞ്ഞു. ലാളിത്യത്തിന്‍റെ ആള്‍ രൂപമായിരുന്നു പിതാവെന്ന് അദ്ദേഹം പറഞ്ഞു. ജീവിതത്തില്‍ ഒരിക്കല്‍ പോലും തൂങ്കുഴി പിതാവ് ദേഷ്യപ്പെട്ടിട്ടില്ല. സൗമ്യ സ്വഭാവക്കാരനായിരുന്നു അദ്ദേഹം. സ്‌നേഹം നിറഞ്ഞ പെരുമാറ്റം. പിതാവ് പൗരോഹിത്യം സ്വീകരിച്ച് തലശേരിയില്‍ വൈദികനായിരുന്ന കാലത്താണ് 1968-ല്‍ പാല വിളക്കുമാടത്തുനിന്ന് തിരുവമ്പാടിയിലേക്ക് കുടിയേറിയതെന്ന് സ്‌കറിയ പറഞ്ഞു. അന്ന് അഞ്ചാം ക്‌ളാസിലാണ് താന്‍ പഠിക്കുന്നത്. പിതാവ് തലശേരിയില്‍നിന്ന് വീട്ടില്‍ വരുമ്പോള്‍ വലിയ ആഘോഷമാണ്. വയറു നിറയെ ഭക്ഷണം കിട്ടും.പാട്ടുപാടും. കുര്‍ബാനയുടെ പാട്ടുകളും ക്രിസ്തീയ ഭക്തിഗാനങ്ങളുമാണ് പാടുക. ബിഷപ്പുമാരിലെ ഗായകനും ഗായകരിലെ ബിഷപ്പുമെന്നാണ് തൂങ്കുഴി പിതാവ് അറിയപ്പെട്ടിരുന്നത്. തലശേരിയില്‍നിന്ന് ബൈക്കിലാണ് തിരുവമ്പാടിയിലേക്ക് വരിക. ബൈക്കിന്‍റെ പിറകില്‍ കയറ്റി ഞങ്ങളെയെല്ലാം കൊണ്ടുപോകും. മറക്കാനാവാത്ത അനുഭവമായിരുന്നു അത്. ഡ്രൈവിംഗ് അദ്ദേഹത്തിനു ഹരമായിരുന്നു. പിതാവായപ്പോഴും "അച്ചാ' എന്നാണ് ഞങ്ങളെല്ലാം വിളിച്ചിരുന്നതെന്ന് സ്‌കറിയ പറഞ്ഞു. കൂടുതല്‍ അടുപ്പം സൂക്ഷിക്കാന്‍ "അച്ചാ' എന്ന വിളിക്കാണ് സാധിക്കുക. അതുകൊണ്ട് അദ്ദേഹത്തിന്‍റെ മരണം വരെ അച്ചാ എന്നാണ് വിളിച്ചിരുന്നത്. പുല്ലൂരാംപാറ സെന്‍റ് ജോസഫ്‌സ് ഹൈസ്‌കൂള്‍ ഹെഡ്മാസ്റ്ററായി 2013ലാണ് സ്‌കറിയ തൂങ്കുഴി വിരമിച്ചത്. മാത്യു തൂങ്കുഴിയുടെയും എല്‍സിയുെടയും മകനാണ് സ്‌കറിയ തൂങ്കുഴി.

ക്രിസ്തുദാസികള്‍ക്കു പ്രഭ ചൊരിഞ്ഞ ആത്മീയ ചൈതന്യം : അന്ത്യവിശ്രമം സ്നേഹഭവനിൽ

ബിനു ജോര്‍ജ് കോഴിക്കോട്: ഓരോരുത്തരെയും പേരെടുത്തു വിളിക്കാന്‍ തക്കവണ്ണമുളള ആത്മബന്ധം. ഓരോ തവണ സന്ദര്‍ശനത്തിനെത്തുമ്പോഴും തൂമഞ്ഞുപോലെ ഹൃദയത്തില്‍ സ്‌നേഹം നിറയ്ക്കുന്ന സൗമ്യമായ വാക്കുകള്‍. ജന്മദിനങ്ങളില്‍ കൃത്യമായി വിളിയെത്തും. സുഖവിവരങ്ങള്‍ അന്വേഷിച്ച്‌ പ്രാര്‍ഥനാ ആശംസകള്‍ നേരും. വിശേഷാവസരങ്ങളില്‍ മധുരവും കേക്കും വസ്ത്രങ്ങളുമൊക്കെ പിതാവിന്‍റെ വകയായി എത്തും. ഇനി ആ കരുതല്‍ ഉണ്ടാവില്ലല്ലോ എന്ന ഹൃദയവേദനയിലാണ് ലോകമെമ്പാടുമുള്ള ക്രിസ്തുദാസി സന്യാസിനി സമൂഹ (സൊസൈറ്റി ഓഫ് ക്രിസ്തുദാസി-എസ്‌കെഡി)ത്തിലെ അംഗങ്ങള്‍. ക്രിസ്തുദാസി സന്യാസിനി സമൂഹത്തിന്‍റെ സ്ഥാപകനായ ആര്‍ച്ച് ബിഷപ് എമിരറ്റസ് മാര്‍ ജേക്കബ് തൂങ്കുഴിയുടെ വിയോഗവാര്‍ത്ത അറിഞ്ഞതു മുതല്‍ കോഴിക്കോട് ചേവരമ്പലത്തെ എസ്‌കെഡി ജനറലേറ്റില്‍ രാപകലെന്യേ പ്രാര്‍ഥനയിലാണ് സന്യാസിനികള്‍. എസ്‌കെഡി സന്യാസിനികളും ജനറലേറ്റിനോടനുബന്ധിച്ചു സ്ഥിതി ചെയ്യുന്ന സ്‌നേഹഭവന (ഹോം ഓഫ് ലവ്)ത്തിലെ അന്തേവാസികളും പിതാവിന്‍റെ സ്‌നേഹവും കരുതലും ഇന്നലെയെന്ന പോലെ ഓര്‍ത്തെടുക്കുകയാണ്. നിറയുന്ന കണ്ണുകള്‍, വിതുമ്പുന്ന അധരങ്ങള്‍... കാരുണ്യവാനും സ്‌നേഹസമ്പന്നനുമായ തൂങ്കുഴി പിതാവ് ഇനി ഇല്ലെന്നുള്ള യാഥാര്‍ഥ്യം സൃഷ്ടിക്കുന്ന ഹൃദയവേദനയും ശൂന്യതയും മറികടക്കാന്‍ എസ്‌കെഡി ജനറലേറ്റിലെ ചാപ്പലില്‍ പിതാവിന്‍റെ ഛായാചിത്രത്തിനു മുമ്പില്‍ കണ്ണീര്‍ പ്രണാമം അര്‍പ്പിക്കുകയാണ് സന്യാസിനികള്‍. 1973ലാണ് മാനന്തവാടി രൂപത സ്ഥാപിച്ചത്. പ്രഥമ മെത്രാന്‍ തൂങ്കുഴി പിതാവും. പ്രാരംഭ കാലഘട്ടത്തില്‍ അജപാലന ദൗത്യം നിര്‍വഹിക്കാന്‍ രൂപതയ്ക്ക് ആവശ്യത്തിന് സന്യാസിനികളുണ്ടായിരുന്നില്ല. 70 കാലഘട്ടത്തില്‍ വയനാട്ടിലേക്ക് കാര്യമായ യാത്രാസൗകര്യങ്ങളുമില്ലായിരുന്നു. പ്രതികൂല സാഹചര്യങ്ങള്‍ കാരണം പുറമെ നിന്ന് വയനാട്ടിലേക്ക് സന്യാസിനികളുടെ സേവനം ലഭിക്കാന്‍ ബുദ്ധിമുട്ടായിരുന്നു. പ്രതിസന്ധികളെ അതിജീവിച്ച് മാനന്തവാടി രൂപതയെ വളര്‍ച്ചയിലേക്കു നയിച്ച പ്രഥമ മെത്രാന്‍ കുടിയേറ്റ ജനതയുടെ ആത്മീയ വളര്‍ച്ചയില്‍ ക്രിസ്തുവിന്‍റെ മണവാട്ടിമാരുടെ അനിവാര്യത തിരിച്ചറിഞ്ഞിരുന്നു. അങ്ങനെയാണ് തൂങ്കുഴി പിതാവ് ക്രിസ്തുദാസികളുടെ സമൂഹത്തിനു തുടക്കമിട്ടത്. എസ്‌കെഡിയുടെ പടിപടിയായുള്ള വളര്‍ച്ച തിരിച്ചറിഞ്ഞ വത്തിക്കാന്‍ 1986 സെപ്റ്റംബറില്‍ സന്യാസിനി സമൂഹത്തിന്‍റെ നിയമാവലി അംഗീകരിച്ചു. നിലവില്‍ ഇന്ത്യയിലും വിദേശങ്ങളിലുമായി 317 സന്യാസിനികളാണ് എസ്‌കെഡിക്കുള്ളത്. കേരളത്തിനു പുറമെ നോര്‍ത്ത് ഈസ്റ്റിലും, ഇറ്റലി, ജര്‍മനി, ആഫ്രിക്ക, അമേരിക്ക എന്നീ രാജ്യങ്ങളിലും എസ്‌കെഡി പ്രവര്‍ത്തിക്കുന്നുണ്ട്. 'ഇതാ കര്‍ത്താവിന്‍റെ ദാസി' എന്ന തിരുവചനമാണ് എസ്‌കെഡിയുടെ മുഖമുദ്ര. എവിടെയായാലും ആ നാടിന്‍റെ ആവശ്യമനുസരിച്ച്, സാഹചര്യമനുസരിച്ച് ദൈവഹിതം നിറവേറ്റുകയാണ് എസ്‌കെഡി സന്യാസിനികള്‍. ഇല്ലായ്മകളുടെയും അസൗകര്യങ്ങളുടെയും പ്രാരാബ്ധങ്ങളുടെയും കാലത്ത് മാനന്തവാടി രൂപതയെ വളര്‍ച്ചയിലേക്കു നയിച്ച തൂങ്കുഴി പിതാവിന്‍റെ അജപാലന ദൗത്യത്തിനു കരുത്തുപകരാന്‍ ക്രിസ്തുദാസി സന്യാസിനി സമൂഹത്തിനു കഴിഞ്ഞിട്ടുണ്ട്. തുടക്കത്തില്‍ വയനാട് ദ്വാരകയിലായിരുന്നു എസ്‌കെഡിയുടെ ആസ്ഥാനമായ ജനറലേറ്റ്. പിന്നീടാണ് കോഴിക്കോട് ചേവരമ്പലത്തേക്കു മാറിയത്. ദ്വാരകയിലെ മഠം നിലവില്‍ മദര്‍ ഹൗസായാണ് പ്രവര്‍ത്തിക്കുന്നത്. സ്‌നേഹം തുളുമ്പുന്ന ഭവനം കോഴിക്കോട് ചേവരമ്പലത്തെ എസ്‌കെഡി ജനറലേറ്റിനോടനുബന്ധിച്ച് ‘സ്‌നേഹഭവനം' (ഹോം ഓഫ് ലവ്) തുടങ്ങുമ്പോള്‍ തൂങ്കുഴി പിതാവിന്‍റെ മനസിലുണ്ടായിരുന്നത് അതിമനോഹരമായ ആശയമായിരുന്നു. ആരോരുമില്ലാത്തവര്‍ പാര്‍ക്കുന്ന സ്‌നേഹഭവനം ഒരു വീടിന്‍റെ അന്തരീക്ഷത്തില്‍ പ്രവര്‍ത്തിക്കണം. ആരുമില്ലെന്ന തോന്നല്‍ അഗതികള്‍ക്കും അശരണര്‍ക്കും ഉണ്ടാകരുത്. അതു യാഥാര്‍ഥ്യമായി. നിലവില്‍ 95 അന്തേവാസികളാണ് സ്‌നേഹത്തണലില്‍ പാര്‍ക്കുന്നത്. ജാതി, മതഭേദമെന്യേ ആരോരുമില്ലാത്തവര്‍ക്ക് ആശ്രയമേകുന്ന ആശ്വാസകേന്ദ്രമാണ് സ്‌നേഹഭവനം. ആരുമില്ലാത്തവരെ കണ്ടെത്തിയാല്‍ പോലീസുകാരും സാമൂഹിക ക്ഷേമ വകുപ്പ് ഉദ്യോഗസ്ഥരും ആദ്യം നിര്‍ദേശിക്കുന്ന പേരാണ് സ്‌നേഹഭവനം. ഗവര്‍ണറും മുഖ്യമന്ത്രിയുമടക്കം നിരവധി പ്രമുഖര്‍ സ്‌നേഹഭവനത്തിലെത്തി ആശംസകളറിയിച്ചിട്ടുണ്ട്. സിസ്റ്റര്‍ ടീന കുന്നേല്‍ ആണ് എസ്‌കെഡിയുടെ മദര്‍ ജനറാള്‍. സിസ്റ്റര്‍ ലിന്‍സ മഴൂവഞ്ചേരി അസിസ്റ്റന്‍റ് ജനറാളായി പ്രവര്‍ത്തിക്കുന്നു. ഫിനാന്‍സ് കൗണ്‍സിലര്‍ സിസ്റ്റര്‍ ഗ്‌ളാഡിസ്, കൗണ്‍സിലര്‍മാരായ സിസ്റ്റര്‍ നാന്‍സി ഓരത്ത്, സിസ്റ്റര്‍ മെര്‍ലി മഞ്ഞപ്പള്ളില്‍ എന്നിവരും എസ്‌കെഡി സന്യാസിനി സമൂഹത്തിനു നേതൃത്വം നല്‍കുന്നു. സ്‌നേഹഭവനത്തില്‍ കഴിയണമെന്ന് ആഗ്രഹിച്ച പിതാവ് ചേവരമ്പലത്തെ സ്‌നേഹഭവനത്തില്‍ വിശ്രമജീവിതം നയിക്കണമെന്നായിരുന്നു തൂങ്കുഴി പിതാവിന്‍റെ ആഗ്രഹം. പക്ഷെ പല കാരണങ്ങള്‍ കൊണ്ടും അതു യാഥാര്‍ഥ്യമായില്ലെന്നു ചേവരമ്പലം എസ്‌കെഡി മദര്‍ ജനറലിന്‍റെ കൗണ്‍സിലര്‍മാരായ സിസ്റ്റര്‍ നാന്‍സി ഓരത്തും സിസ്റ്റര്‍ മെര്‍ലി മഞ്ഞപ്പള്ളിയിലും പറഞ്ഞു. പിതാവിനെ തൃശൂര്‍ രൂപതാധികൃതര്‍ സ്‌നേഹം കൊണ്ടു മൂടുകയായിരുന്നു. പിതാവിന്‍റെ എല്ലാ കാര്യങ്ങളും വളരെ ഭംഗിയായാണ് അവര്‍ നിറവേറ്റിയത്. പിതാവ് സ്ഥാപിച്ച തൃശൂര്‍ ജൂബിലി മിഷന്‍ മെഡിക്കല്‍ കോളജില്‍ ചികിത്സക്കുള്ള സൗകര്യവും കൂടി പരിഗണിച്ച് അവിടെ തന്നെ തങ്ങുകയായിരുന്നുവെന്നും കൗണ്‍സിലര്‍മാര്‍ പറഞ്ഞു. 2024 ഏപ്രിലിലാണ് അവസാനമായി പിതാവ് ചേവരമ്പലത്തെ ജനറലേറ്റ് സന്ദര്‍ശിച്ചത്. ദൈവ മഹത്വം ജീവിതത്തിലുടനീളം പ്രകാശിപ്പിച്ച തൂങ്കുഴി പിതാവ് തങ്ങളില്‍ പ്രസരിപ്പിച്ച ഊര്‍ജവും ചൈതന്യവും അവര്‍ണനീയമാണെന്ന് സന്യാസിനികള്‍ സാക്ഷ്യപ്പെടുത്തുന്നു. 317 സന്യാസിനികളെയും പേരെടുത്തുവിളിക്കാന്‍ തക്കവണ്ണമുള്ള ആത്മബന്ധം പിതാവിനുണ്ടായിരുന്നു. സന്യാസിനിമാരുടെ മാതാപിതാക്കളെയും പിതാവിന് അറിയാമായിരുന്നു. ജന്മദിനവേളകളില്‍ പിതാവ് ഫോണില്‍ വിളിച്ച് ആശംസകള്‍ നേരുമായിരുന്നു. ‘അപ്പനെ പോലെ സ്‌നേഹം ചൊരിഞ്ഞ പിതാവ്' ‘എനിക്ക് അപ്പനെ പോലെയായിരുന്നു തൂങ്കുഴി പിതാവ്. പിതാവ് കാലം ചെയ്തുവെന്ന വിവരം സഹിക്കാനാവുന്നില്ല. സ്‌നേഹഭവനത്തിലെ അടുക്കള ജീവനക്കാരിയാണ് ഞാന്‍. പക്ഷെ പിതാവിന് വലുപ്പച്ചെറുപ്പമൊന്നുമില്ല. ഇടയ്ക്ക് ഇവിടെ വരുമ്പോള്‍, ഒരു അപ്പനെ പോലെ എന്‍റെ സുഖവിവരങ്ങള്‍ അന്വേഷിക്കുകയും സമ്മാനങ്ങള്‍ നല്‍കുകയും ചെയ്തിരുന്നു'... 11 വര്‍ഷമായി സ്‌നേഹഭവനത്തില്‍ ജോലിചെയ്യുന്ന കോഴിക്കോട് തിരുവമ്പാടി സ്വദേശിനി ലീല (65) നിറകണ്ണുകളോടെ പറയുന്നു. വിശേഷാവസരങ്ങളില്‍ പിതാവ് കാണാന്‍ വരുമായിരുന്നു. കുടുംബത്തെക്കുറിച്ചൊക്കെ ചോദിക്കും. വസ്ത്രങ്ങള്‍ നല്‍കും. സാമ്പത്തികമായും സഹായിച്ചിട്ടുണ്ട്. ആ കരുതലും വാത്സല്യവും സ്‌നേഹവും ഇനിയില്ലല്ലോ എന്നോര്‍ത്ത് ലീല കണ്ണീര്‍ തുടച്ചു. പിതാവ് രോഗബാധിതനായി കിടപ്പിലാണെന്നറിഞ്ഞപ്പോള്‍ കാണാനായി തൃശൂരില്‍ പോയതിന്‍റെ ഓര്‍മകളും ലീല പങ്കുവച്ചു. എസ്‌കെഡി ജനറലേറ്റ് ചാപ്പലില്‍ കല്ലറ ഒരുങ്ങി ആര്‍ച്ച്ബിഷപ് എമിരറ്റസ് മാര്‍ ജേക്കബ് തൂങ്കുഴിയുടെ ഭൗതീകശരീരം സംസ്‌കരിക്കുന്നത് ചേവരമ്പലത്തെ എസ്‌കെഡി ജനറലേറ്റിലെ ചാപ്പലില്‍. ചാപ്പലില്‍ മാതാവിന്‍റെ തിരുസ്വരൂപത്തിനു മുമ്പിലായി, പിതാവിന്‍റെ ആഗ്രഹമനുസരിച്ച് നേരത്തെ തന്നെ അന്ത്യവിശ്രമത്തിനുള്ള സ്ഥലം നിശ്ചയിച്ചിരുന്നു. തന്‍റെ സംസ്‌കാരം ലളിതമായ രീതിയില്‍, ആര്‍ഭാടം ഒഴിവാക്കി നടത്തണമെന്നു പിതാവ് വില്‍പത്രത്തില്‍ കുറിച്ചതു സാക്ഷാത്കരിക്കാനുള്ള ഒരുക്കങ്ങളിലാണ് എസ്‌കെഡി സന്യാസിനികള്‍. 22ന് എസ്‌കെഡി ജനറലേറ്റില്‍ ഭൗതീകശരീരം പൊതുദര്‍ശനത്തിനു വയ്ക്കുമെന്നാണ് ആദ്യം അറിയിച്ചിരുന്നത്. എന്നാല്‍ പിതാവിനെ അവസാനമായി ഒരു നോക്ക് കാണാന്‍ ആയിരങ്ങള്‍ ഒഴുകിയെത്തുമെന്നതിനാല്‍ ഇതിനുള്ള സൗകര്യം പരിഗണിച്ച്, തൃശൂരില്‍ നിന്ന് എത്തിക്കുന്ന ഭൗതീകശരീരം കോഴിക്കോട് ദേവഗിരി കാമ്പസിലാണ് പൊതുദര്‍ശനത്തിനു വയ്ക്കുക. ദേവഗിരിയില്‍നിന്ന് വൈകുന്നേരം ആറുമണിയോടെ ചേവരമ്പലം ജനറലേറ്റില്‍ എത്തിച്ച് സംസ്‌ക്കരിക്കുമെന്നാണ് നിലവിലുള്ള അറിയിപ്പ്.

സ്ത്രീ കാമ്പയിന്‍ നടത്തി

കൂരാച്ചുണ്ട്: കൂരാച്ചുണ്ട് സാമൂഹിക ആരോഗ്യ കേന്ദ്രത്തിന്‍റെ ആഭിമുഖ്യത്തില്‍ സ്ത്രീകളുടെയും കുട്ടികളുടെയും ആരോഗ്യത്തിനായുള്ള സ്ത്രീ കാമ്പയിന്‍ സിഎച്ച്‌സി തല ക്ലിനിക്കുകളുടെ ഉദ്ഘാടനം ബാലുശേരി ബ്ലോക്ക് പഞ്ചായത്ത് പ്രസിഡന്‍റ് വി.കെ. അനിത നിര്‍വഹിച്ചു. കൂരാച്ചുണ്ട് പഞ്ചായത്ത് പ്രസിഡന്‍റ് ഒ.കെ. അമ്മദ് അധ്യക്ഷത വഹിച്ചു. കൂരാച്ചുണ്ട് സിഎച്ച്‌സി മെഡിക്കല്‍ ഓഫീസര്‍ അസ്‌ലം, ഫറൂഖ്, ആരോഗ്യ സ്റ്റാന്‍ഡിംഗ് കമ്മറ്റി ചെയര്‍പേഴ്‌സണ്‍ സിമിലി ബിജു. ബ്ലോക്ക് പഞ്ചായത്തംഗം വി.കെ. ഹസീന, വാര്‍ഡ് മെമ്പര്‍ വിജയന്‍ കിഴക്കയില്‍മീത്തല്‍, ഹെല്‍ത്ത് ഇന്‍സ്പെക്ടര്‍ എ.സി.അരവിന്ദന്‍, ജെപിഎച്ച്എന്‍ ബുഷ്‌റ എന്നിവര്‍ പ്രസംഗിച്ചു. തിരുവമ്പാടി: ജനകീയ ആരോഗ്യ കേന്ദ്രങ്ങള്‍ കേന്ദ്രീകരിച്ച് സ്ത്രീകള്‍ക്കും കുട്ടികള്‍ക്കുമായി പ്രത്യേക ആരോഗ്യ സേവനങ്ങള്‍ നല്‍കുന്ന സ്ത്രീ ക്യാമ്പയിന്‍റെ തിരുവമ്പാടി പഞ്ചായത്ത്തല ഉദ്ഘാടനം പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍ നിര്‍വഹിച്ചു. പഞ്ചായത്ത് വൈസ് പ്രസിഡന്‍റ് കെ.എ.അബ്ദുറഹിമാന്‍ അധ്യക്ഷനായി. കുടുംബാരോഗ്യ കേന്ദ്രം മെഡിക്കല്‍ ഓഫീസര്‍ ഡോ. കെ.വി. പ്രിയ, ഹെല്‍ത്ത് ഇന്‍സ്‌പെക്ടര്‍ എം. സുനീര്‍, പബ്ലിക് ഹെല്‍ത്ത് നഴ്‌സ് ത്രേസ്യ, ഐസിഡിഎസ് സൂപ്പര്‍വൈസര്‍ ചഷമ ചന്ദ്രന്‍, ജെഎച്ച്‌ഐ മുഹമ്മദ് മുസ്തഫാ ഖാന്‍, എംഎല്‍എസ്പി അഞ്ജന, ലിയ സെബാസ്റ്റ്യന്‍ എന്നിവര്‍ സംസാരിച്ചു.

എസ് പിസി കേഡറ്റുകള്‍ രോഗികള്‍ക്ക് വസ്ത്രങ്ങള്‍ നല്‍കി

താമരശേരി: കൂടത്തായി സെന്‍റ് മേരീസ് ഹൈസ്‌കൂള്‍ എസ്പിസി കേഡറ്റുകള്‍ മെഡിക്കല്‍ കോളജിലെ രോഗികള്‍ക്ക് പുതിയ വസ്ത്രങ്ങള്‍ വാങ്ങി നല്‍കി. മാനേജര്‍ ഫാ. ബിബിന്‍ ജോസ്, ഹെഡ്മാസ്റ്റര്‍ തോമസ് അഗസ്റ്റിന്‍, പിടിഎ പ്രസിഡന്‍റ് സത്താര്‍ പുറായില്‍, എസ് പിസി പിടിഎ പ്രസിഡന്‍റ് ഷനോജ് എന്നിവര്‍ ചേര്‍ന്ന് ശ്രീജ, ശ്രീഷ്മ, വസന്തകുമാരി എന്നിവര്‍ക്ക് കൈമാറി. തുടര്‍ന്ന് നടന്ന മീറ്റിങ്ങില്‍ സിപിഒ റെജി കരോട്ട്, ഹെഡ്മാസ്റ്റര്‍ തോമസ് അഗസ്റ്റിന്‍, പിടിഎ പ്രസിഡന്‍റ് സത്താര്‍ പുറായില്‍, എസ് പിസി പിടിഎ പ്രസിഡന്‍റ് ഷനോജ്, ഡ്രില്‍ ഇന്‍സ്ട്രക്ടര്‍ റെജിലേഷ്, സുമി ഇമ്മാനുവല്‍ എന്നിവര്‍ പ്രസംഗിച്ചു. ശ്രീജ, ശ്രീഷ്മ, വസന്തകുമാരി എന്നിവര്‍ ക്ലാസെടുത്തു.

റോഡരികില്‍ ഭീഷണിയായി മരങ്ങള്‍; മനുഷ്യാവകാശ കമ്മീഷന്‍ കേസെടുത്തു

കോഴിക്കോട്: ബാലുശേരി-കോഴിക്കോട് റോഡരികില്‍ ഭീഷണിയായി നില്‍ക്കുന്ന മരങ്ങള്‍ മുറിച്ചുമാറ്റുന്നില്ലെന്ന പരാതിയില്‍ മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ. ബൈജുനാഥ് സ്വമേധയാ കേസെടുത്ത് ജില്ലാ കളക്ടറില്‍ നിന്നും റിപ്പോര്‍ട്ട് ആവശ്യപ്പെട്ടു. കരിക്കാംകുളം മുതല്‍ ബാലുശേരിമുക്ക് വരെയുള്ള റോഡിന്‍റെ ഇരുവശങ്ങളിലുമായി നില്‍ക്കുന്ന മരങ്ങളാണ് ഭീഷണിയായി മാറുന്നത്. മഴക്കാലത്ത് മരങ്ങള്‍ വീഴുമ്പോള്‍ മാത്രമാണ് നടപടിയെടുക്കുന്നത് എന്നാണ് ആക്ഷേപം. എരക്കുളത്തിന് സമീപം കഴിഞ്ഞ മാസം തെങ്ങ് കടപുഴകി റോഡിലേക്ക് വീണു. കക്കോടി പഞ്ചായത്ത് ഷോപ്പിംഗ് കോംപ്ലക്‌സിന് മുന്നിലുള്ള തണല്‍മരവും അപകടഭീഷണിയിലാണെന്ന് മനസിലാക്കുന്നു. 15 ദിവസത്തിനകം ജില്ലാ കളക്ടര്‍ റിപ്പോര്‍ട്ട് സമര്‍പ്പിക്കണം. ഒക്ടോബര്‍ 28 ന് കോഴിക്കോട് പൊതുമരാമത്ത് വകുപ്പ് റസ്റ്റ് ഹൗസില്‍ നടക്കുന്ന സിറ്റിംഗില്‍ കേസ് പരിഗണിക്കും.

യുഡിഎഫ് ഹെല്‍ത്ത് കമ്മീഷന്‍ സിറ്റിംഗ് 20ന്

കോഴിക്കോട്: യുഡിഎഫ് നിയമിച്ച ഹെല്‍ത്ത് കമ്മിഷന്‍റെ സിറ്റിംഗ് കോഴിക്കോട് ഹോട്ടല്‍ വുഡീസില്‍ 20ന് രാവിലെ 10 മുതല്‍ ഉച്ചയ്ക്ക് ഒന്നുവരെ നടക്കും. കേരളത്തിലെ ആരോഗ്യരംഗത്തെ വീഴ്ചകള്‍ പഠിക്കുന്നതിനും പരിഹാരനിര്‍ദേശം സമര്‍പ്പിക്കുന്നതിനുമാണ് യുഡിഎഫ് ഹെല്‍ത്ത് കമ്മീഷനെ നിയമിച്ചിരിക്കുന്നത്. ഹെല്‍ത്ത് കമ്മിഷന്‍ അധ്യക്ഷന്‍ ഡോ. എസ്.എസ്. ലാല്‍, അംഗങ്ങളായ ഡോ: പി.എന്‍. അജിത, ഡോ: ശ്രീജിത്, എന്‍. കുമാര്‍, ഡോ: രാജന്‍ ജോസഫ് മാഞ്ഞൂരാന്‍, ഡോ. ഒ.റ്റി. മുഹമ്മദ് ബഷീര്‍ എന്നിവരാണ് സിറ്റിംഗില്‍ പങ്കെടുക്കുന്നതെന്ന് യുഡിഎഫ് ജില്ലാ ചെയര്‍മാന്‍ കെ. ബാലനാരായണന്‍, കണ്‍വീനര്‍ അഹമ്മദ് പുന്നക്കല്‍ എന്നിവര്‍ അറിയിച്ചു.

മലയോര ഹൈവേ: റോഡിന്‍റെ സ്‌കെച്ച് പ്രദര്‍ശിപ്പിച്ച് ബിജെപി

ചക്കിട്ടപാറ: 1971ലെ സര്‍വെ പ്രകാരമുള്ള പെരുവണ്ണാമൂഴി - ചക്കിട്ടപാറ - ചെമ്പ്ര പി.ഡബ്ല്യു.ഡി. റോഡിന്‍റെ എഫ്.എം.ബി. സ്‌കെച്ച് പുറത്ത് വിട്ട് ബി.ജെ.പി ചക്കിട്ടപാറ പഞ്ചായത്ത് കമ്മറ്റി. ഇങ്ങനെ ഒരു സ്‌കെച്ചില്ലെന്ന പ്രചരണം നടത്തി ചക്കിട്ടപാറ ടൗണില്‍ റോഡിന്‍റെ നടുവില്‍ നിന്ന് ഇരു ഭാഗത്തേക്കും ആറ് മീറ്റര്‍ വീതം അളന്നു 12 മീറ്റര്‍ വീതി നിര്‍ണയിച്ച് മലയോര ഹൈവേ നിര്‍മ്മിക്കുന്നതിനെതിരെ ചില വ്യാപാരികളും കെട്ടിട ഉടമകളും ഹൈക്കോടതിയില്‍ കേസ് നല്‍കിയിരുന്നു. ഇവരുടെ കെട്ടിട സ്ഥല ഭാഗത്ത് ഹൈവേ നിര്‍മ്മാണം വിലക്കികൊണ്ടുള്ള ഉത്തരവ് നില നില്‍ക്കെയാണ് പാതയുടെ യഥാര്‍ത്ഥമെന്നു പറയുന്ന എഫ്.എം.ബി സ്‌കെച്ച് ബി.ജെ.പി പുറത്തു വിട്ടത്. ഇതിന്‍റെ പകര്‍പ്പ് ബോര്‍ഡ് രൂപത്തിലാക്കി അവര്‍ ചക്കിട്ടപാറ ടൗണില്‍ സ്ഥാപിച്ചു. യഥാര്‍ത്ഥ അളവ് മറച്ച് വച്ച് ഹെവേ നിര്‍മ്മിക്കുന്നത് റോഡ് കൈയേറ്റക്കാരെ സംരംക്ഷിക്കാനാണെന്നും ഇതിനു കൂട്ടു നില്‍ക്കുന്ന ഇടത് വലത് വികസന വിരോധികളെ ജനം തിരിച്ചറിയണമെന്നും ബി.ജെ.പി ആവശ്യപ്പെട്ടു.

എട്ടു വയസുകാരിക്ക് പീഡനം: 64 വയസുകാരന് തടവും പിഴയും

നാദാപുരം: എട്ടു വയസുകാരിക്കു നേരെ ലൈംഗിക അതിക്രമം നടത്തിയ 64 വയസുകാരന് 15 വര്‍ഷം കഠിനതടവും 30000 രൂപ പിഴയും ശിക്ഷ വിധിച്ച് നാദാപുരം ഫാസ്റ്റ് ട്രാക്ക് സ്‌പെഷല്‍ കോടതി ജഡ്ജ് കെ. നൗഷാദ് അലി. പൂതംപാറ സ്വദേശി കുന്നുമ്മല്‍ കുഞ്ഞിരാമനെ(64) യാണ് ശിക്ഷിച്ചത്. 2001 ലാണ് കേസിനാധാരമായ സംഭവം നടന്നത്. വീട്ടുസാധനങ്ങള്‍ വാങ്ങാന്‍ പോയ കുട്ടിയെ കടയില്‍ വച്ചാണ് ലൈംഗികാതിക്രമത്തിന് വിധേയമാക്കിയത്. പീഡിപ്പിച്ച വിവരം വിദ്യാര്‍ഥിനി സ്‌കൂള്‍ കൗണ്‍സിലര്‍ മുഖേന തൊട്ടില്‍പാലം പോലീസ് സ്റ്റേഷനില്‍ അറിയിക്കുകയായിരുന്നു. തൊട്ടില്‍പാലം പോലീസ് സ്റ്റേഷന്‍ സബ് ഇന്‍സ്‌പെക്ടര്‍ എം.പി. വിഷ്ണുവാണ് കോടതിയില്‍ കുറ്റപത്രം സമര്‍പ്പിച്ചത്. പ്രോസിക്യൂഷന്‍ ഭാഗത്തുനിന്ന് 12 സാക്ഷികളെ വിസ്തരിക്കുകയും 14 രേഖകള്‍ ഹാജരാക്കുകയും ചെയ്തു. പ്രതി കട നടത്തിയിട്ടില്ലെന്നും വേറൊരാള്‍ക്ക് വാടകക്ക് കൊടുത്തിരുന്നു എന്നും കാണിച്ച് പ്രതിഭാഗത്ത് നിന്ന് സാക്ഷികളെ വിസ്തരിച്ചിരുന്നു. ഈ വാദം കോടതി തള്ളിക്കളഞ്ഞു. പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ മനോജ് അരൂര്‍ ഹാജരായി. അസി. സബ് ഇന്‍സ്‌പെക്ടര്‍ പി.എം. ഷാനി പ്രോസിക്യൂഷന്‍ നടപടികള്‍ ഏകോപിപ്പിച്ചു.

ജ്വല്ലറിയില്‍ നിന്നു മുക്കുത്തി മോഷ്ടിച്ച യുവതി അറസ്റ്റില്‍

കോഴിക്കോട്: ജ്വല്ലറിയില്‍ നിന്നും സ്വര്‍ണ്ണ മൂക്കുത്തി മോഷ്ടിച്ച യുവതിയെ പോലീസ് അറസ്റ്റു ചെയ്തു. കോഴിക്കോട് തലക്കളത്തൂര്‍ പാലോറമല സ്വദേശിനി ശിവപാര്‍വ്വം വീട്ടില്‍ മാളവിക (24 )യെയാണ് നടക്കാവ് പോലീസ് പിടികൂടിയത്. ഈ മാസം 13ന് അരയിടത്ത് പാലത്തുള്ള തനിഷ്‌ക് ജ്വല്ലറിയില്‍ സ്വര്‍ണ്ണം വാങ്ങാനെന്ന വ്യാജേന എത്തിയ യുവതി ജ്വല്ലറി സെയില്‍മാന്‍മാരുടെ കണ്ണ് വെട്ടിച്ച് സ്വര്‍ണ്ണ മൂക്കുത്തി മോഷ്ടിക്കുകയായിരുന്നു. ജ്വല്ലറിയിലെ സിസി ടിവി ദൃശ്യങ്ങള്‍ പരിശോധിച്ചാണ് പ്രതിയെ തിരിച്ചറിഞ്ഞത്.

ടാലന്‍ഷിയ ക്വിസ് മത്സരത്തിന് ആവേശകരമായ സമാപനം

താമരശേരി: താമരശേരി കോര്‍പറേറ്റ് എഡ്യൂക്കേഷണല്‍ ഏജന്‍സി എല്‍പി, യുപി, ഹൈസ്‌കൂള്‍, ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥികള്‍ക്കായി തിരുവമ്പാടി അല്‍ഫോന്‍സാ കോളജില്‍ നടത്തിയ ടാലന്‍ഷിയ മെഗാ ക്വസ് മത്സരത്തിന്‍റെ ഗ്രാന്‍റ് ഫിനാലെ സമാപിച്ചു. സമാപന സമ്മേളനം ബിഷപ് മാര്‍ റെമീജിയോസ് ഇഞ്ചനാനിയില്‍ ഉദ്ഘാടനം ചെയ്തു. കോര്‍പറേറ്റ് മാനേജര്‍ ഫാ.ജോസഫ് വര്‍ഗീസ് അധ്യക്ഷത വഹിച്ചു. സംസ്ഥാന ചലചിത്ര അക്കാദമി ചെയര്‍മാന്‍ പ്രേംകുമാര്‍ മുഖ്യ പ്രഭാഷണം നടത്തി. ചലചിത്ര അക്കാദമി റീജിയണല്‍ കോര്‍ഡിനേറ്റര്‍ നവീന വിജയന്‍, അല്‍ഫോന്‍സ കോളജ് പ്രിന്‍സിപ്പല്‍ ഡോ. ഷൈജു ഏലിയാസ് എന്നിവര്‍ പ്രസംഗിച്ചു. വിജയികള്‍ക്ക് ക്യാഷ് അവാര്‍ഡുകളും ട്രോഫികളും ബിഷപ് മാര്‍ റെമീജിയോസ് ഇഞ്ചനാനിയില്‍, നടന്‍ പ്രേംകുമാര്‍ എന്നിവര്‍ ചേര്‍ന്ന് സമ്മാനിച്ചു. അല്‍ഫോന്‍സാ കോളേജ് അഡ്മിനിസ്‌ട്രേറ്റര്‍ ഫാ.മനോജ് കൊല്ലംപറമ്പില്‍ ക്വിസ് മത്സരങ്ങള്‍ നിയന്ത്രിച്ചു. ബെന്നി ലൂക്കോസ്,വിപിന്‍ എം. സെബാസ്റ്റ്യന്‍, റോഷിന്‍ മാത്യു, ഷിബു മാത്യു എന്നിവര്‍ നേതൃത്വം നല്‍കി. ഏബല്‍ റിന്‍റോ, പി.ആര്‍.റുഷ്ദ ഫാത്തിമ (സേക്രട്ട് ഹാര്‍ട്ട് എല്‍പി സ്‌കൂള്‍ തിരുവമ്പാടി), എസ്തര്‍ മരിയ, നിയ ഫാത്തിമ (സെന്‍റ് മേരീസ് എച്ച്എസ് കല്ലാനോട്), ക്രിസ്ത്യാനോ ഡെലിന്‍ ഡെന്നീസ്, ഇസബെല്ല വര്‍ഗീസ് (സെന്‍റ് ജോര്‍ജ് എച്ച്എസ് കുളത്തുവയല്‍), അനന്തു സന്തോഷ്, ബ്രിജിത്ത് തോമസ് (ഹോളി ഫാമിലി എച്ച്എസ്എസ് പടത്തുകടവ്) എന്നിവര്‍ ഓരോ വിഭാഗത്തിലും ഒന്നാം സ്ഥാനം കരസ്ഥമാക്കി. വിജയികള്‍ക്ക് യഥാക്രമം 10000, 7000, 5000 രൂപ ക്യാഷ് പ്രൈസും സ്‌കൂളുകള്‍ക്ക് എവറോളിംഗ് ട്രോഫിയും നല്‍കി.

മലയോര ഹൈവേ പ്രവൃത്തി ആരംഭിക്കാത്തതില്‍ പ്രതിഷേധം

കൂരാച്ചുണ്ട്: മലയോര ഹൈവേയുടെ ഭാഗമായുള്ള കൂരാച്ചുണ്ട് പഞ്ചായത്ത് പരിധിയിലുള്ള റീച്ചിന്‍റെ പ്രവര്‍ത്തി ഉദ്ഘാടനം ഉടന്‍ നടത്തണമെന്ന് സിപിഐ കൂരാച്ചുണ്ട് ബ്രാഞ്ച് കമ്മിറ്റി ആവശ്യപ്പെട്ടു. പഞ്ചായത്തിന്‍റെ പരിധിയില്‍ മലയോര ഹൈവേയുടെ ഒരു പ്രവര്‍ത്തിയും ആരംഭിച്ചിട്ടില്ല. റോഡിനായി സ്ഥലം വിട്ടുനല്‍കുന്ന കെട്ടിട ഉടമകളില്‍ നിന്നും സ്ഥല ഉടമകളില്‍ നിന്നും സമ്മതപത്രം വാങ്ങിയിട്ടുണ്ട്. എസ്റ്റിമേറ്റ് നടപടികള്‍ പൂര്‍ത്തീകരിച്ച് ടെന്‍ഡറായി. എന്നാല്‍ മാസങ്ങള്‍ ആയിട്ടും പ്രവര്‍ത്തി ആരംഭിക്കാന്‍ വൈകുകയാണ്. സമീപ പഞ്ചായത്തുകളായ ചക്കിട്ടപാറ, പനങ്ങാട് എന്നിവിടങ്ങളില്‍ മലയോര ഹൈവേയുടെ പ്രവര്‍ത്തികള്‍ ദ്രുതഗതിയില്‍ നടക്കുന്നുണ്ട്.കൂരാച്ചുണ്ട് പഞ്ചായത്തില്‍ പ്രവര്‍ത്തി നടക്കാതിരിക്കാന്‍ കാരണം പഞ്ചായത്ത് ഭരണസമിതിയുടെ അനാസ്ഥയാണെന്ന് യോഗം ആരോപിച്ചു. ടി.കെ.ശിവദാസന്‍ അധ്യക്ഷത വഹിച്ചു. എ.കെ.പ്രേമന്‍, പി.ടി തോമസ്, വിനു മ്ലാക്കുഴിയില്‍, കുട്ടിആലി കുനിയില്‍, ഗോപിനാഥന്‍,പ്രവീണ്‍, ഗോപാലന്‍ മണ്ടോപ്പാറ എന്നിവര്‍ പ്രസംഗിച്ചു.

റോഡ് തകര്‍ച്ച: നൊച്ചാട് പഞ്ചായത്തിനു മുന്നില്‍ കോണ്‍ഗ്രസ് സമരം നടത്തി

പേരാമ്പ്ര: ജലജീവന്‍ പദ്ധതിയിലൂടെ തകര്‍ത്ത ഗ്രാമീണ റോഡുകള്‍ പുനര്‍നിര്‍മിക്കാത്ത നൊച്ചാട് ഗ്രാമ പഞ്ചായത്ത് ഭരണസമിതിക്കെതിരെ കോണ്‍ഗ്രസ് നൊച്ചാട് മണ്ഡലം കമ്മിറ്റിയുടെ നേതൃത്വത്തില്‍ നൊച്ചാട് ഗ്രാമ പഞ്ചായത്ത് ഓഫീസ് മുന്നില്‍ പ്രതിഷേധ ധര്‍ണ്ണ നടത്തി. ബ്ലോക്ക് കോണ്‍ഗ്രസ് പ്രസിഡന്‍റ് കെ. മധു കൃഷ്ണന്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് വി.വി. ദിനേശന്‍ അധ്യക്ഷത വഹിച്ചു. കെ.സി. ഗോപാലന്‍, പി.എം. പ്രകാശന്‍, സി.കെ. അജീഷ്, ഗീത കല്യായി, രഞ്ജിത്ത് തുമ്പക്കണ്ടി, റഷീദ് ചെക്യാലത്ത്, പി.കെ. മോഹനന്‍, രാമചന്ദ്രന്‍ വാളേരി തുടങ്ങിയവര്‍ പ്രസംഗിച്ചു. എം.കെ. ദിനേശന്‍, കെ.വി. ശശികുമാര്‍, എ.ഗോവിന്ദന്‍, വി.ബേബി, കെ. വത്സന്‍, എം.കെ. ഫൈസല്‍ തുടങ്ങിയവര്‍ നേതൃത്വം നല്‍കി.

ദീര്‍ഘകാലസ്വപ്നം സാക്ഷാത്കരിച്ചു : കാറ്റുള്ളമല നിര്‍മ്മല സ്‌കൂളിന് പുതിയ ഗ്രൗണ്ട്

കാറ്റുള്ളമല: നിര്‍മ്മല യുപി സ്‌കൂളിന്‍റെ ദീര്‍ഘകാലത്തെ സ്വപ്‌നത്തിന് സാക്ഷാത്കാരം. പുതിയ ഫുട്‌ബോള്‍ ഗ്രൗണ്ട് ഉദ്ഘാടന ചടങ്ങ് പേരാമ്പ്ര എഇഒ കെ.വി.പ്രമോദ് ഉദ്ഘാടനം ചെയ്തു. സ്വന്തമായ ഗ്രൗണ്ട് ഇല്ലാത്തതിനാല്‍ വര്‍ഷങ്ങളായി നിര്‍മ്മല സ്‌കൂള്‍ മറ്റ് സ്‌കൂള്‍ ഗ്രൗണ്ടുകളെയാണ് കായിക മത്സരങ്ങള്‍ക്ക് ആശ്രയിച്ചിരുന്നത്. ആ പ്രശ്‌നത്തിന് ശാശ്വത പരിഹാരമാണ് പുതിയ ഫുട്‌ബോള്‍ ഗ്രൗണ്ട് ഉദ്ഘാടനം ചെയ്യപ്പെട്ടതിലൂടെ പൂര്‍ത്തിയായിരിക്കുന്നത്. പരിമിതമായ സ്ഥലത്ത് ഫുട്‌ബോള്‍ ഗ്രൗണ്ട് നിര്‍മ്മിക്കുക എന്നത് ശ്രമകരമായ ഒരു ഉദ്യമം ആയിരുന്നു. കാറ്റുള്ളമല സെന്‍റ് മേരീസ് പള്ളി കൈകാരന്മാരുടെയും സ്‌കൂള്‍ പിടിഎ അംഗങ്ങളുടെയും അധ്യാപകരുടെയും അകൈതവമായ സഹകരണം ഉണ്ടായിരുന്നു ഗ്രൗണ്ട് നിര്‍മാണത്തിന്. സ്‌കൂള്‍ മാനേജര്‍ ഫാ. ജോസ് പെണ്ണാപറമ്പിലാണ് സ്വപ്ന സാക്ഷാത്കാരത്തിന് ചുക്കാന്‍ പിടിച്ചത്. ഉദ്ഘാടന ചടങ്ങില്‍ ഫാ. ജോസ് പെണ്ണാപറമ്പില്‍ അധ്യക്ഷനായിരുന്നു. പ്രധാനാധ്യാപിക പി.ശ്രുതി, വാര്‍ഡ് മെമ്പര്‍ പി.കെ.ഷിജു, പിടിഎ പ്രസിഡന്‍റ് സിബി വടക്കേകുന്നേല്‍, സ്റ്റാഫ് പ്രതിനിധി ജസ്‌നി ജോസ് എന്നിവര്‍ പ്രസംഗിച്ചു. പെനാലിറ്റി ഷൂട്ടിലൂടെ ഫാ.ജോസ് പെണ്ണാപറമ്പില്‍ ഗ്രൗണ്ട് ഉദ്ഘാടനം ചെയ്തു.

പയ്യോളി നഗരസഭാ സ്റ്റേഡിയം നിർമാണ സാമഗ്രികളുടെ സൂക്ഷിപ്പ് കേന്ദ്രമായി

പയ്യോളി: പയ്യോളി നഗരസഭയുടെ കീഴിലുള്ള ഇ കെ നായനാർ മിനി സ്റ്റേഡിയം നിർമാണ സാമഗ്രികളുടെ സൂക്ഷിപ്പ് കേന്ദ്രമായി മാറുന്നത് പതിവാകുന്നു. മഴ മാറി കളിസ്ഥലം ഉപയോഗപ്രദമായ സമയത്താണ് കുടിവെള്ള പദ്ധതിക്ക് വേണ്ടിയുള്ള പൈപ്പുകൾ ഇറക്കി കളിസ്ഥലം കരാറുകാർ കയ്യേറിയത്. പൈപ്പിറക്കുന്ന സമയത്ത് തന്നെ നാട്ടുകാർ ഇതിനെ ചോദ്യം ചെയ്തിരുന്നുവെങ്കിലും നഗരസഭയുടെ അനുമതി ഉണ്ടെന്നാണ് കരാറുകാരുടെ വിശദീകരണം. പയ്യോളി നഗരസഭയുടെ കീഴിലുള്ള ഏക കളിസ്ഥലമാണ് ഇത്തരത്തിൽ സ്വകാര്യ വ്യക്തികൾക്ക് വേണ്ടി നശിപ്പിക്കപ്പെടുന്നത്.യുവതലമുറയെ ലഹരിയിൽ നിന്ന് പിന്തിരിപ്പിക്കാനായി കളിസ്ഥലങ്ങളിലേക്ക് ഇവരെ എത്തിക്കാനുള്ള ശ്രമങ്ങൾ നടക്കുന്നതിനിടെയാണ് പയ്യോളി നഗരസഭയുടെ കളിസ്ഥലം പോലും നഷ്ടപ്പെടുന്ന സാഹചര്യമുണ്ടാകുന്നത്. സാധനങ്ങൾ ഇറക്കാൻ വന്നതിനെ തുടർന്ന് ചെളിയിൽ കുളിച്ച നിലയിലാണ് ഇപ്പോൾ മുനിസിപ്പൽ സ്റ്റേഡിയം. നടക്കാൻ പോലും ബുദ്ധിമുട്ടുള്ള ഇവിടെ എങ്ങനെ കളിക്കും എന്നാണ് കുട്ടികളുടെ ചോദ്യം. അതിരാവിലെയും രാത്രിയും വ്യായാമത്തിനായി ഗ്രൗണ്ടിൽ എത്തുന്നവരും ഇതുമൂലം പ്രയാസപ്പെടുകയാണ്.

മെഡിക്കല്‍ കോളജ് മോര്‍ച്ചറിയില്‍ സ്ഥലമില്ല : നഗരസഭാ സെക്രട്ടറിയോട് റിപ്പോര്‍ട്ട് തേടി മനുഷ്യാവകാശ കമീഷന്‍

കോഴിക്കോട്: കോഴിക്കോട് മെഡിക്കല്‍ കോളജ് മോര്‍ച്ചറിയില്‍ നടപടിക്രമങ്ങളില്‍ കുരുങ്ങി 16 അനാഥ മൃതദേഹങ്ങള്‍ സൂക്ഷിക്കുന്നതു കാരണം മോര്‍ച്ചറിയില്‍ സ്ഥലമില്ലെന്ന പരാതിയില്‍ മനുഷ്യാവകാശ കമീഷന്‍ ജുഡീഷ്യല്‍ അംഗം കെ. ബൈജുനാഥ് സ്വമേധയാ കേസെടുത്ത് നഗരസഭാ സെക്രട്ടറിയില്‍ നിന്നും റിപ്പോര്‍ട്ട് ആവശ്യപ്പെട്ടു. ഒരാഴ്ചക്കകം റിപ്പോര്‍ട്ട് സമര്‍പ്പിക്കണം. ഒക്ടോബര്‍ 28ന് കോഴിക്കോട് പൊതുമരാമത്ത് റസ്റ്റ് ഹൗസില്‍ നടക്കുന്ന സിറ്റിംഗില്‍ കേസ് പരിഗണിക്കും. ഓഗസ്റ്റ്, സെപ്റ്റംബര്‍ മാസങ്ങളിലാണ് ഇത്രയധികം മൃതദേഹങ്ങള്‍ മോര്‍ച്ചറിയിലെത്തിയത്. കോഴിക്കോട് ജില്ലയിലെ ആറ് പോലീസ് സ്റ്റേഷനുകളില്‍ നിന്നും മലപ്പുറം, മഞ്ചേരി പോലീസ് സ്റ്റേഷന്‍ പരിധിയില്‍ നിന്നുമാണ് മൃതദേഹങ്ങള്‍ എത്തിയത്. ഇവയില്‍ പലതും ഫ്രീസറുകളില്‍ സൂക്ഷിക്കാനുള്ള സമയപരിധി കഴിഞ്ഞതാണ്. കോഴിക്കോട് മെഡിക്കല്‍ കോളേജ് മോര്‍ച്ചറിയില്‍ നിലവിലുള്ളഏക ഫ്രീസര്‍ യൂണിറ്റില്‍ 18 മൃതദേഹങ്ങള്‍ മാത്രമേ സൂക്ഷിക്കാന്‍ കഴിയുകയുള്ളൂ. മൃതദേഹങ്ങളില്‍ ചിലതെങ്കിലും ഒഴിവാക്കിയില്ലെങ്കില്‍ മോര്‍ച്ചറി നിറയുമെന്നാണ് പരാതി. ഒരു ഫ്രീസര്‍ യൂണിറ്റ് പ്രവര്‍ത്തനക്ഷമമല്ല. അജ്ഞാത മൃതദേഹങ്ങള്‍ സംസ്‌കരിക്കാനുള്ള ചുമതല തദ്ദേശസ്വയംഭരണ സ്ഥാപനങ്ങള്‍ക്കാണ്. മൃതദേഹങ്ങള്‍ ഏറ്റെടുത്ത് സംസ്‌ക്കരിക്കാന്‍ കോര്‍പറേഷനിലേക്ക് മൂന്നു തവണ കത്തു നല്‍കിയതായി പോലീസ് പറയുന്നു.

സംസ്ഥാനത്തെ ചെറുകിട റൈസ് ഫ്‌ളോര്‍ മില്ലുകള്‍ അടച്ചുപൂട്ടല്‍ ഭീഷണിയില്‍

കോഴിക്കോട്: സംസ്ഥാനത്തെ ചെറുകിട റൈസ് ഫ്‌ളോര്‍ ആന്‍ഡ് ഓയില്‍ മില്ലുകള്‍ അടച്ചുപൂട്ടല്‍ ഭീഷണിയിലായി. നിലനില്‍പിനുള്ള പോരാട്ടത്തിലാണ് മിക്ക മില്ലുകളുമെന്ന് സംസ്ഥാന ചെറുകിട റൈസ് ഫ്‌ളോര്‍ ആന്‍ഡ് ഓയില്‍ മില്ലേഴ്‌സ് അസോസിയേഷന്‍ ഭാരവാഹികള്‍ വാര്‍ത്താസേമ്മളനത്തില്‍ പറഞ്ഞു. സംസ്ഥാനത്തെ ഏറ്റവും പഴക്കം ചെന്ന തൊഴില്‍ േമഖലയാണിത്. സംസ്ഥാനത്ത് 45000 ചെറുകിട മില്ലുകളുണ്ട്. ഓരോ ഗ്രാമപഞ്ചായത്തിലും അമ്പതുവരെ മില്ലുകള്‍ പ്രവര്‍ത്തിക്കുന്നുണ്ട്. ഇതില്‍ 70 ശതമാനം മില്ലുകളും വനിതകളാണ് നടത്തുന്നത്. കെട്ടുതാലിയും കിടപ്പാടവുമെല്ലാം പണയം വച്ചാണ് മിക്കവരും മില്ലുകള്‍ തുടങ്ങിയിട്ടുള്ളത്. സര്‍ക്കാറില്‍ നിന്ന് ചെറുകിട വ്യവസായ യൂണിറ്റുകള്‍ക്കു ലഭിക്കേണ്ട ഒരു ആനുകൂല്യവും ലഭിക്കുന്നില്ല. അതുകൊണ്ടുതന്നെ പീഡിത യൂണിറ്റായി മില്ലുകള്‍ ദിനേന മാറിക്കൊണ്ടിരിക്കുകയാണ്. റേഷന്‍ വിതരണ പ്രശ്‌നം, വൈദ്യുത ചാര്‍ജ്, പിഎഫ്എ ലൈസന്‍സ് തുടങ്ങിയ മേഖലകളില്‍ നിന്ന് നേരിടുന്ന ദുരനുഭവങ്ങള്‍ മൂലം മില്ലുകള്‍ നടത്താനാവാതെ പൂട്ടുകയാണ്. ലൈസന്‍സ് പുതുക്കുന്നതിനു വലിയ ബുദ്ധിമുട്ടാണുള്ളത്. ഇപ്പോള്‍ മില്ലുകളില്‍ ഡസ്റ്റ്ബിന്‍ വയ്ക്കണമെന്നാണ് നിര്‍ദേശം. ഹരിതകര്‍മ സേനയ്ക്ക് തുക നല്‍കുകയും അതിന്‍റെ റസീറ്റ് സൂക്ഷിക്കുകയും േവണം. മില്ലുകളില്‍ പ്‌ളാസ്റ്റിക് േവസ്റ്റ് ഇല്ലെങ്കിലും മാലിന്യ സംസ്‌കരണത്തിനു വിഹിതം നല്‍കാനാണ് ഉത്തരവ്. മില്ലുടമകള്‍ നേരിടുന്ന പ്രശ്‌നങ്ങള്‍ ചര്‍ച്ച ചെയ്യുന്നതിനു അസോസിയേഷന്‍ കണ്‍വന്‍ഷന്‍ 21ന് ബീച്ച് േറാഡിലെ ഗുജറാത്തി ഹാളില്‍ നടക്കും. 1200 പേര്‍ സംബന്ധിക്കും. രാവിലെ ഒമ്പതിനു മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്യും.സംസ്ഥാന പ്രസിഡന്‍റ് എന്‍.കെ ഹരീന്ദ്രനാഥ് അധ്യക്ഷത വഹിക്കും. എം.കെ രാഘവന്‍ എംപി, അഹമ്മദ് ദേവര്‍േകാവില്‍ എംഎല്‍എ എന്നിവര്‍ മുഖ്യാതിഥികളായിരിക്കും. സംസ്ഥാന പ്രസിഡന്‍റ് എന്‍.കെ ഹരീന്ദ്രനാഥ്, വൈസ് പ്രസിഡന്‍റ് സെയ്തുട്ടിഹാജി ഒളവണ്ണ, മൊയ്തീന്‍ഹാജി എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

പോലീസുകാരെ കൈകാര്യം ചെയ്യുമെന്ന് വീണ്ടും കെഎസ്‌യു നേതാവ്

കോഴിക്കോട്: കെഎസ്‌യു പ്രവര്‍ത്തകരെ കണ്ടാല്‍ പേപ്പട്ടികളെ പോലെ കടിച്ചു കീറുന്ന പോലീസുകാരെ കൈകാര്യം ചെയ്യുമെന്ന് കെഎസ്‌യു ജില്ല പ്രസിഡന്‍റ് വി.ടി. സൂരജ്. പ്രതിപക്ഷ പോഷക സംഘടനയായതിന്‍റെ പേരില്‍ കഴിഞ്ഞ ഒന്‍പത് വര്‍ഷകാലമായി തങ്ങളെ പോലീസ് വേട്ടയാടുകയാണെന്ന് അദ്ദേഹം വാര്‍ത്താസമ്മേളനത്തില്‍ പറഞ്ഞു. പല സമരങ്ങളിലും ക്രൂരമായി മര്‍ദിച്ചിട്ടും പോലീസുകാര്‍ക്കെതിരെ നടപടിയുണ്ടായില്ല. അതേ സമയം കെഎസ്‌യു പ്രവര്‍ത്തകരെ മര്‍ദിച്ചവര്‍ക്കെതിരേ രോഷം കൊണ്ടതിന്‍റെ പേരില്‍ പരാതിയില്ലാതെ സ്വമേധയ കേസെടുത്തിരിക്കുകയാണ്. കേസിനെ ശക്തമായി നേരിടുമെന്നു വി.ടി സൂരജ് പറഞ്ഞു. കെഎസ്‌യു നേതാക്കളായ ജോയല്‍ ആന്‍റണിയെയും രാഗിനെയും ഉള്‍പ്പെടെ കഴുത്തിന് പിടിച്ച പൊലീസ് ഉദ്യോഗസ്ഥര്‍ക്കെതിരെ പരാതി ഉണ്ടായിട്ടും എന്ത് നടപടിയാണ് എടുത്തത് . ഇത്തരം പോലീസുകാര്‍ക്കെതിരെ നടപടിയെടുക്കാതെ പ്രോല്‍സാഹിക്കുന്ന സര്‍ക്കാര്‍ നയത്തെ വകവച്ചു നല്‍കാന്‍ തയ്യാറല്ല. അകാരണമായി വേട്ടയാടല്‍ തുടര്‍ന്നാല്‍ അത്തരം പൊലീസുകാരെ കൈകാര്യം ചെയ്യുമെന്നും സൂരജ് ആവര്‍ത്തിച്ചു. 2023 ഡിസംബറില്‍ ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട് ഡിഡിഇ ഓഫീസില്‍ എത്തിയതിന്‍റെ പേരിലാണ് കസബ സിഐ കൈലാസ്നാഥിന്റെ നേതൃത്വത്തില്‍ മര്‍ദ്ദിച്ചത്. മര്‍ദനത്തില്‍ മജിസ്ട്രേറ്റിന് മൊഴി നല്‍കിയിരുന്നു. അന്ന് നല്‍കിയ മൊഴി പകര്‍പ്പിനുള്ള അപേക്ഷ നല്‍കിയിട്ടുണ്ട്. കസബ സ്റ്റേഷനിലെ മര്‍ദന ദൃശ്യം ലഭിക്കാന്‍ നിയമനടപടികളിലേക്ക് നീങ്ങുമെന്നും സൂരജ് വ്യക്തമാക്കി.

ക്യുആർ കോഡ് സ്കാൻ; നിര്‍ദേശങ്ങളുമായി പോലീസ്

കോഴിക്കോട്: ക്യുആർ കോഡുകൾ സ്കാൻ ചെയ്യുന്നതുവഴിയുള്ള തട്ടിപ്പുകള്‍ വര്‍ധിച്ചുവരുന്നതായി പോലീസ്. ക്യുആർ കോഡ് ഉപയോഗിച്ച് ഒരു ലിങ്ക് തുറക്കുമ്പോൾ യുആര്‍എല്‍ സുരക്ഷിതമാണെന്നും വിശ്വസനീയമായ ഉറവിടത്തിൽ നിന്നാണ് വരുന്നതെന്നും ഉറപ്പാക്കേണ്ടത് പ്രധാനമാണെന്ന് പോലീസ് ഔദ്യോഗിക ഫേസ്ബുക്ക് പോസ്റ്റില്‍ മുന്നറിയിപ്പ് നല്‍കുന്നു. ഇമെയിലിലെയും എസ്എംഎസിലെയും സംശയകരമായ ലിങ്കുകൾ ക്ലിക്കുചെയ്യുന്നത് അപകടകരമെന്നതുപോലെ ക്യുആർ കോഡുകൾ നയിക്കുന്ന യുആര്‍എല്‍കൾ എല്ലാം ശരിയാകണമെന്നില്ല. ഫിഷിംഗ് വെബ്‌സൈറ്റിലേക്ക് നിങ്ങളെ കൊണ്ടുപോകാൻ അതിനു കഴിഞ്ഞേക്കും. ക്യുആർ കോഡ് സ്കാനർ ആപ് - സെറ്റിംഗ്സിൽ ‘ഓപ്പണ്‍ യുആര്‍എല്‍എസ് ഓട്ടോമാറ്റിക്കലി'എന്ന ഓപ്ഷൻ നമ്മുടെ യുക്താനുസരണം സെറ്റ് ചെയ്യാം. നമ്മുടെ അറിവോടെ വെബ്‌സൈറ്റുകളിൽ പ്രവേശിക്കാനുള്ള അനുമതി നൽകുന്നതാണ് ഉചിതം. അറിയപ്പെടുന്ന സേവന ദാതാക്കളിൽ നിന്ന് മാത്രം ക്യു ആർ കോഡ് ജനറേറ്റ് ചെയ്യുകയാണ് വേണ്ടത്. ക്യു ആർ കോഡ് ഉപയോഗിച്ചുള്ള ഇടപാടുകൾ നടത്തിയ ഉടനെ അക്കൗണ്ടിലെ ട്രാൻസാക്ഷൻ വിശദാംശങ്ങൾ പരിശോധിച്ച് ഉറപ്പുവരുത്തുക, കസ്റ്റം ക്യുആർ കോഡ് ആപ്പുകൾ ഡൗൺലോഡ് ചെയ്യുന്നത് ഒഴിവാക്കുക, ക്യുആർ കോഡ് സ്കാൻ ചെയ്യാൻ കഴിയുന്നതും ഉപകരണ നിർമാതാവ് നൽകുന്ന വിശ്വസനീയമായ ആപ്പുകൾ ഉപയോഗിക്കുക എന്നീ നിര്‍ദേശങ്ങളും പോലീസ് നല്‍കുന്നു.

ദീപിക നമ്മുടെ ഭാഷ പദ്ധതി : പൂതംപാറ സെന്‍റ് ജോസഫ്‌സ് എല്‍പി സ്‌കൂൾ

പൂതംപാറ: പൂതംപാറ സെന്‍റ് ജോസഫ്‌സ് എല്‍പി സ്‌കൂളില്‍ ദീപിക നമ്മുടെ ഭാഷ പദ്ധതി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ജോസ് കരോട്ടുഴുന്നാലില്‍ സ്‌കൂള്‍ ലീഡര്‍ അര്‍ഷിതയ്ക്ക് ദീപിക പത്രം നല്‍കി ഉദ്ഘാടനം ചെയ്തു. അധ്യാപകരായ അനുപ് ജോണ്‍, ഷാര്‍ലറ്റ് സഖറിയാസ് എന്നിവരാണ് പത്രം സ്‌പോണ്‍സര്‍ ചെയ്തത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]