കൽപ്പറ്റ: ആധുനിക ഇന്ത്യയുടെ മുഖ്യ ശിൽപികളിലൊരാളായ മുൻ പ്രധാനമന്ത്രി രാജീവ് ഗാന്ധിയുടെ 80-ാം ജൻമവാർഷിക ദിനത്തിൽ ജില്ലാ കോണ്ഗ്രസ് കമ്മിറ്റി ഓഫീസിൽ അനുസ്മരണം നടത്തി.
രാജ്യത്തിന്റെ ഐക്യത്തിനും അഖണ്ഡതയ്ക്കുംവേണ്ടി ജീവൻ ബലിയർപ്പിച്ച നേതാവും ശാസ്ത്ര സാങ്കേതിക രംഗത്ത് ഇന്ത്യയുടെ മുഖവുമായിരുന്നു അദ്ദേഹം. ഇന്ത്യയുടെ ഭാവി രൂപപ്പെടുത്തുന്നതിൽ അദ്ദേഹത്തിന്റെ പുരോഗമനപരമായ കാഴ്ചപ്പാടും യുവത്വം തുളുന്പിയ നേതൃത്വവും വഹിച്ച നിർണായക പങ്കിനെ രാഷ്ട്രം നന്ദിയോടെ സ്മരിക്കുന്നു.
ഇന്ത്യയെ ലോകശക്തിയാക്കി മാറ്റുന്നതിനായി അദ്ദേഹം അക്ഷീണം പ്രയത്നിച്ചുവെന്ന് യോഗം അനുസ്മരിച്ചു.ആധുനിക ചിന്തകൾ വച്ചുപുലർത്തുകയും യഥാസമയം തീരുമാനങ്ങൾ കൈക്കൊള്ളുകയും ചെയ്തിരുന്ന അദ്ദേഹം ശാസ്ത്ര സാങ്കേതിക രംഗത്ത് നൽകിയ പിന്തുണയും പ്രോത്സാഹനവും മറക്കുവാൻ സാധിക്കില്ല.
സമൂഹത്തിലെ എല്ലാ വിഭാഗം ജനങ്ങളെയും ചേർത്ത് നിർത്തുവാൻ അദ്ദേഹത്തിന്റെ കീഴിലുള്ള ഭരണത്തിന് കഴിഞ്ഞിട്ടുണ്ട്. ഇന്ത്യയിൽ നിന്നു ദാരിദ്യ്രം തുടച്ചുനീക്കുവാനായി അദ്ദേഹം നടത്തിയ ശ്രമങ്ങൾ എടുത്തു പറയേണ്ടതാണ്. ഇന്ത്യയുടെ ചരിത്രത്തിലെ ഏറ്റവും പ്രായം കുറഞ്ഞ പ്രധാനമന്ത്രിയായിരുന്ന അദ്ദേഹത്തിന്റെ കാലയളവിലാണ് യുവാക്കൾക്കും സ്ത്രീകൾക്കുമായി ഏറ്റവുമധികം പദ്ധതികൾക്ക് രൂപം നൽകി നടപ്പാക്കിയതെന്നും അനുസ്മരണ യോഗം വിലയിരുത്തി.
ഡിസിസി പ്രസിഡന്റ് എൻ.ഡി. അപ്പച്ചൻ, ടി. സിദ്ദിഖ് എംഎൽഎ എന്നിവർ അനുസ്മരണ പ്രഭാഷണം നടത്തി. പി.പി. ആലി, കെ.വി. പോക്കർ ഹാജി, വി.എ. മജീദ്, ബിനു തോമസ്, നിസി അഹമ്മദ്, ജി. വിജയമ്മ, സി. ജയപ്രസാദ്, ഗൗതം ഗോകുൽദാസ്, മാണി ഫ്രാൻസിസ്, ഗിരീഷ് കൽപ്പറ്റ, ആർ. രാജൻ, ഇ.വി. ഏബ്രഹാം, ഡിന്റോ ജോസ്, ടി.കെ. മമ്മൂട്ടി, ഷാജി ജേക്കബ്, ഹർഷൽ കോന്നാടൻ, സെബാസ്റ്റ്യൻ കൽപ്പറ്റ, അരുണ് രവീന്ദ്രൻ തുടങ്ങിയവർ പ്രസംഗിച്ചു.
ഗൂഡല്ലൂർ: കോണ്ഗ്രസിന്റെ നേതൃത്വത്തിൽ പാട്ടവയൽ കോണ്ഗ്രസ് ഭവനിൽ മുൻ പ്രധാനമന്ത്രി രാജീവ് ഗാന്ധിയുടെ ജൻമദിനം ആഘോഷിച്ചു. ഫോട്ടോയിൽ പുഷ്പാർച്ചന നടത്തി. മധുരം വിതരണം ചെയ്തു. കോണ്ഗ്രസ് സംസ്ഥാന കമ്മിറ്റി അംഗം എൻ.എ. അഷ്റഫ് അധ്യക്ഷത വഹിച്ചു.
എം.എസ്. വിഷ്ണുജിത്ത്, എൻ.ഐ. കുര്യാക്കോസ്, എം.ഡി. മൈക്കിൾ, കെ.എച്ച്. സബാദ്, സുകുമാരൻ, പഞ്ചായത്ത് യൂണിയൻ കൗണ്സിലർ ലിസി ഷാജി, നെല്ലാക്കോട്ട പഞ്ചായത്ത് കൗണ്സിലർ അനു ജോസഫ്, ഹസൻകുട്ടി, നാസർ, ഹനീഫ, ഹംസകുട്ടി, സതീഷ്, ബാബു, ഏലിയാസ്, ഹകീം, ഷിൻഡോ തുടങ്ങിയവർ സംബന്ധിച്ചു.