മലപ്പുറം: 35-ാമത് മലപ്പുറം റവന്യൂ ജില്ലാ കായികോത്സവം ഒക്ടോബര് 21, 22, 23 തിയതികളിലായി കാലിക്കട്ട് യൂണിവേഴ്സിറ്റി സ്റ്റേഡിയത്തില് നടക്കും. ജില്ലയിലെ 17 ഉപജില്ലകളില് നിന്നായി 5000ത്തിലധികം വിദ്യാര്ഥികള് മേളയില് മാറ്റുരയ്ക്കും.
കായികോത്സവത്തിന്റെ നടത്തിപ്പിനായി ജില്ലയുടെ ചുമതലയുള്ള കായിക മന്ത്രി വി. അബ്ദുറഹിമാന്, ജില്ലയിലെ എംപിമാര്, എംഎല്എമാര്, ജില്ലാ പഞ്ചായത്ത് പ്രസിഡന്റ്, കളക്ടര്, ജില്ലാ പോലീസ് മേധാവി എന്നിവര് രക്ഷാധികാരികളായും വള്ളിക്കുന്ന് മണ്ഡലം എംഎല്എ പി. അബ്ദുള്ഹമീദ് ചെയര്മാനുമായി സംഘാടകസമിതി രൂപീകരിച്ചു.
സ്വാഗതസംഘ രൂപീകരണ യോഗം ജിഎംഎച്ച്എസ്എസ് സിയു കാമ്പസ് സ്കൂളില് പി. അബ്ദുള്ഹമീദ് എംഎല്എ ഉദ്ഘാടനം ചെയ്തു. ജില്ലാ പഞ്ചായത്ത് വികസന സ്റ്റാന്ഡിംഗ് കമ്മിറ്റി ചെയര്പേഴ്സണ് സെറീന ഹസീബ് അധ്യക്ഷത വഹിച്ചു. മലപ്പുറം ഡിഡിഇ കെ.പി. രമേഷ്കുമാര്, സ്കൂള് ഹെഡ്മിസ്ട്രസ് കെ. ബി. മിനി എന്നിവര് പ്രസംഗിച്ചു.
ജില്ലാ പഞ്ചായത്ത് അംഗങ്ങളായ പി. കെ. സി. അബ്ദുറഹിമാന്, ടി. പി. എം. ബഷീര്, വി. കെ. എം. ഷാഫി, തേഞ്ഞിപ്പലം ഗ്രാമപഞ്ചായത്ത് വിദ്യാഭ്യാസ ആരോഗ്യ സ്റ്റാന്ഡിംഗ് കമ്മിറ്റി ചെയര്മാന് പീയുഷ്, ഹയര് സെക്കന്ഡറി അസിസ്റ്റന്റ് കോ ഓര്ഡിനേറ്റര് ഇസാക്ക് കാലടി, തിരൂരങ്ങാടി ഡിഇഒ എം. പി. അനിത, സ്കൂള് പ്രിന്സിപ്പല് കെ. പ്രതാപ്, ജനപ്രതിനിധികള്, പ്രധാനാധ്യാപകര്, വിവിധ അധ്യാപക സംഘടനാ പ്രതിനിധികള് എന്നിവര് പങ്കെടുത്തു.