കാർഷിക വിപണന നയം: കിസാൻസഭ രാജ്യവ്യാപക പ്രതിഷേധത്തിന് : Deepika.com National News |

Click here for detailed news of all items

കാർഷിക വിപണന നയം: കിസാൻസഭ രാജ്യവ്യാപക പ്രതിഷേധത്തിന്

Saturday, December 21, 2024 2:40 AM IST

ന്യൂഡൽഹി: കാർഷിക വിപണനത്തിനായി കേന്ദ്രസർക്കാർ ആവിഷ്കരിച്ച പുതിയ നയത്തിനെതിരേ രാജ്യവ്യാപക പ്രതിഷേധത്തിനൊരുങ്ങി ഓൾ ഇന്ത്യ കിസാൻ സഭ (എഐകെഎസ്).

വിവാദ കാർഷികനിയമങ്ങൾ തിരികെ കൊണ്ടുവരാനുള്ള നീക്കമാണു കേന്ദ്രം അവതരിപ്പിച്ച കാർഷികവിപണനത്തിനായുള്ള പുതിയ ചട്ടക്കൂടെന്ന് കിസാൻ സഭ ആരോപിച്ചു.

ഈ മാസം 23ന് രാജ്യത്തെ വിവിധ ജില്ലകളിൽ പുതിയ കരട് നയത്തിന്‍റെ പകർപ്പുകൾ കത്തിച്ച് പ്രതിഷേധിക്കുമെന്ന് എഐകെഎസ് ജനറൽ സെക്രട്ടറി വിജു കൃഷ്ണൻ അറിയിച്ചു.

നവംബർ 25ന് കേന്ദ്രസർക്കാർ പുറപ്പെടുവിച്ച കരട് രാഷ്‌ട്രീയ നയത്തിനെതിരേ രാജ്യവ്യാപകമായി കർഷകരുടെ വലിയ പ്രതിഷേധമുണ്ടാകുന്പോഴാണ് എഐകെഎസും നിലപാട് വ്യക്തമാക്കി പ്രതിഷേധത്തിനൊരുങ്ങുന്നത്.

കേന്ദ്രസർക്കാരിന്‍റെ പുതിയ നയം കർഷകരുടെ താത്പര്യങ്ങൾ ബലി നൽകി കോർപറേറ്റ് കന്പനികളുടെ ലാഭം വർധിപ്പിക്കാനാണ്. വിവിധ ആവശ്യങ്ങളുയർത്തി കർഷകർ ഉയർത്തുന്ന പ്രതിഷേധങ്ങൾക്കു കേന്ദ്രം ശ്രദ്ധ നൽകിയിട്ടില്ലെന്ന് വ്യക്തമാക്കുന്നതാണ് പുതിയ കരട് നയം.

പുതിയ കരട് നയം പിൻവലിച്ച് കർഷകസംഘടനകളുമായും സംസ്ഥാന സർക്കാരുകളുമായും കേന്ദ്രം ചർച്ചയ്ക്കു തയാറാകണമെന്നും എഐകെഎസ് ആവശ്യപ്പെട്ടു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.