ധൻകറിനെതിരായ അവിശ്വാസപ്രമേയ നോട്ടീസ് തള്ളി : Deepika.com National News |

Click here for detailed news of all items

ധൻകറിനെതിരായ അവിശ്വാസപ്രമേയ നോട്ടീസ് തള്ളി

Friday, December 20, 2024 2:16 AM IST

ന്യൂഡൽഹി: രാജ്യസഭാധ്യക്ഷൻ ജഗ്ദീപ് ധൻകറിനെതിരേ പ്രതിപക്ഷം സമർപ്പിച്ച അവിശ്വാസപ്രമേയ നോട്ടീസ് രാജ്യസഭാ ഡെപ്യൂട്ടി ചെയർമാൻ ഹരിവംശ് തള്ളി. 14 ദിവസം മുന്പ് നോട്ടീസ് നൽകിയില്ലെന്നും ധൻകറിന്‍റെ പേരിലെ സ്പെല്ലിംഗ് തെറ്റിച്ചാണ് എഴുതിയതെന്നും ചൂണ്ടിക്കാട്ടിയാണ് അവിശ്വാസപ്രമേയ നോട്ടീസ് തള്ളിയത്.

കൂടാതെ, രാജ്യത്തെ രണ്ടാമത്തെ ഉയർന്ന ഭരണഘടനാ പദവി വഹിക്കുന്നയാള്‍ക്കു നേരേ വ്യക്തിഹത്യ മാത്രം ലക്ഷ്യമിട്ടാണ് അവിശ്വാസപ്രമേയ നോട്ടീസ് പ്രതിപക്ഷം നൽകിയതെന്നും ഹരിവംശ് ചൂണ്ടിക്കാട്ടി. ഇതിന് ആക്കം കൂട്ടാൻ പ്രതിപക്ഷം സംയുക്ത വാർത്താസമ്മേളനം നടത്തിയെന്നും അദ്ദേഹം ചൂണ്ടിക്കാട്ടി.

60 പ്രതിപക്ഷ എംപിമാർ ഒപ്പിട്ട അവിശ്വാസപ്രമേയ നോട്ടീസ് കഴിഞ്ഞയാഴ്ചയാണു രാജ്യസഭാ സെക്രട്ടറിക്കു കൈമാറിയത്. ഭരണഘടനയുടെ ആർട്ടിക്കിൾ 67 (ബി) പ്രകാരമാണ് അവിശ്വാസപ്രമേയത്തിനുള്ള നോട്ടീസ് സമർപ്പിച്ചത്.

രാജ്യസഭയിൽ ഏകപക്ഷീയ നിലപാടാണ് അധ്യക്ഷൻ സ്വീകരിക്കുന്നതെന്നാരോപിച്ചായിരുന്നു പ്രതിപക്ഷം അദ്ദേഹത്തെ നീക്കം ചെയ്യാൻ അവിശ്വാസപ്രമേയം കൊണ്ടുവരാൻ ശ്രമിച്ചത്.

പ്രമേയം പാസാക്കാനുള്ള അംഗബലം തങ്ങൾക്കില്ലെങ്കിലും അദ്ദേഹത്തിന്‍റെ നിലപാടിനെതിരേയുള്ള പ്രതിഷേധമാണ് ഇതെന്നായിരുന്നു പ്രതിപക്ഷ പാർട്ടികളുടെ വിശദീകരണം.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.