മുംബൈയിൽ നാവികസേനാ സ്പീഡ്ബോട്ട് ഇടിച്ചുകയറി യാത്രാബോട്ട് മുങ്ങി 13 പേർ മരിച്ചു : Deepika.com National News |

Click here for detailed news of all items

മുംബൈയിൽ നാവികസേനാ സ്പീഡ്ബോട്ട് ഇടിച്ചുകയറി യാത്രാബോട്ട് മുങ്ങി 13 പേർ മരിച്ചു

Thursday, December 19, 2024 2:23 AM IST

മുംബൈ: മുംബൈയിൽ ഗേറ്റ്‌വേ ഓഫ് ഇന്ത്യയിൽനിന്ന്എലഫന്‍റാ ഐലൻഡിലേക്കു പോകുകയായിരുന്ന യാത്രാബോട്ടും നാവികസേനയുടെ സ്പീഡ് ബോട്ടും കൂട്ടിയിടിച്ചുണ്ടായ അപകടത്തിൽ 13 പേർ മരിച്ചു.

അപകടമേഖലയിൽനിന്ന് 101 പേരെ രക്ഷപ്പെടുത്തി. എലഫന്‍റാ ഐലൻഡിലേക്കു പോയ "നീൽകമൽ’എന്ന ബോട്ടാണ് ഇന്നലെ വൈകുന്നേരം നാലോടെ അറബിക്കടലിൽ ഉറാന മേഖലയിൽ അപകടത്തിൽപ്പെട്ടത്. മരിച്ചവരിൽ രണ്ടുപേർ നാവികസേനാംഗങ്ങളാണ്.

നൂറ്റിപ്പത്തോളം പേർ യാത്രാബോട്ടിലുണ്ടായിരുന്നു. നാവികസേനയുടെ സ്പീഡ്ബോട്ടിൽ രണ്ട് നാവികസേനാംഗങ്ങളും സേനയിലേക്ക് എൻജിനുകൾ വിതരണം ചെയ്യുന്ന കന്പനിയുടെ നാല് ജീവനക്കാരുമാണുണ്ടായിരുന്നത്. നിയന്ത്രണം നഷ്‌ടമായ സ്പീഡ്ബോട്ട് ഇടിച്ചതോടെ യാത്രാബോട്ടിന്‍റെ ഒരുഭാഗം മുങ്ങി. സ്പീഡ് ബോട്ട് ഇടിച്ചുകയറുന്ന ദൃശ്യങ്ങൾ പുറത്തുവന്നതോടെയാണ് അപകടകാരണം വ്യക്തമായത്.

നാവികസേന, തീരസംരക്ഷണസേന, മറൈന്‍ പോലീസ് എന്നിവരുടെ നേതൃത്വത്തിലാണു രക്ഷാപ്രവര്‍ത്തനം. 11 നാവികസേനാ ബോട്ടുകളും മൂന്ന് മറൈന്‍ പോലീസ് ബോട്ടുകളും കോസ്റ്റ്ഗാര്‍ഡ് കപ്പലും അപകടമേഖലയില്‍ വിന്യസിച്ചിട്ടുണ്ട്. ഇതിനുപുറമെ നിരീക്ഷണത്തിനും മറ്റുമായി നാല് ഹെലികോപ്റ്ററുകളും സജ്ജമാക്കിയിരുന്നു.

എൻജിൻ പരിശോധനയ്ക്കിടെ സ്പീഡ് ബോട്ടിന്‍റെ നിയന്ത്രണം നഷ്ടമായതാണ് അപകടകാരണമെന്നു സംശയിക്കുന്നതായി നാവികസേന അറിയിച്ചു. അപകടത്തിൽ 13 പേർ മരിച്ചതായി മുഖ്യമന്ത്രി ദേവേന്ദ്ര ഫഡ്‌നാവിസ് നിയമസഭയെ അറിയിച്ചു. ‌സ്പീഡ് ബോട്ടിന്‍റെ നിയന്ത്രണം നഷ്‌ടമായതാണ് അപകടകാരണം.

മരിച്ചവരുടെ ആശ്രിതർക്ക് അഞ്ചു ലക്ഷം രൂപ വീതം ധനസഹായം നൽകുമെന്നും മുഖ്യമന്ത്രി പറഞ്ഞു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.