എറണാകുളം-അങ്കമാലി അതിരൂപതയിൽ അച്ചടക്ക നടപടികള്‍ക്കായി പ്രത്യേക ട്രൈബ്യൂണൽ : Deepika.com Kerala News |

Click here for detailed news of all items

എറണാകുളം-അങ്കമാലി അതിരൂപതയിൽ അച്ചടക്ക നടപടികള്‍ക്കായി പ്രത്യേക ട്രൈബ്യൂണൽ

Friday, December 20, 2024 2:16 AM IST

കാക്കനാട്: സീറോമലബാര്‍ സഭയുടെ ആരാധനാക്രമ വിഷയവുമായി ബന്ധപ്പെട്ട് എറണാകുളം-അങ്കമാലി അതിരൂപതയില്‍ നടന്നുകൊണ്ടിരിക്കുന്ന അച്ചടക്കരാഹിത്യ പ്രവൃത്തികളെ സഭാപരമായ കാനോനികനടപടികളിലൂടെ ക്രമപ്പെടുത്തുന്നതിനായി സഭാ ആസ്ഥാനമായ മൗണ്ട് സെന്‍റ് തോമസില്‍ പ്രത്യേക ട്രൈബ്യൂണൽ ഈ മാസം 18നു നിലവില്‍വന്നു.

സഭാ തലവനായ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടിലാണ് ട്രൈബ്യൂണൽ സ്ഥാപിച്ച് ഉത്തരവ് നൽകിയത്. പൗരസ്ത്യ സഭകള്‍ക്കായുള്ള കാനന്‍ നിയമത്തിന്‍റെ 89-ാം നമ്പര്‍ പ്രകാരം പൗരോഹിത്യശുശ്രൂഷകരുടെ അച്ചടക്ക മേല്‍നോട്ടം നടത്താനുള്ള അവകാശവും കടമയും മേജര്‍ ആര്‍ച്ച്ബിഷപ്പില്‍ നിക്ഷിപ്തമാണ്.

കല്പനകളും മുന്നറിയിപ്പുകളും നിരാകരിക്കപ്പെട്ടാല്‍ നിയമപ്രകാരം അച്ചടക്കനടപടികള്‍ കൈക്കൊള്ളുന്നതിനായി മേജര്‍ ആര്‍ച്ച്ബിഷപ് സ്ഥാപിക്കുന്ന പ്രത്യേക ട്രൈബ്യൂണലാണ് നിലവില്‍ വന്നിരിക്കുന്നത്.

കാനന്‍ നിയമപണ്ഡിതരായ ഫാ. ഡോ. ജെയിംസ് മാത്യു പാമ്പാറ സിഎംഐ പ്രിസൈഡിംഗ് ജഡ്ജിയായ ട്രൈബ്യൂണലിൽ ഫാ. ജോസ് മാറാട്ടില്‍, ഫാ. ജോയ് പാലിയേക്കര എന്നിവര്‍ ജഡ്ജിമാരായിരിക്കും.

ഫാ. ഗര്‍വാസീസ് ആനിത്തോട്ടത്തില്‍ നീതിസംരക്ഷകനായും ഫാ. ജോസഫ് കാമിച്ചേരി നോട്ടറിയായും പ്രവര്‍ത്തിക്കും. കൂടാതെ, അഭിഭാഷകരായി ഫാ. ജോസഫ് പരുവുമ്മേല്‍, ഫാ. ഫ്രാന്‍സിസ് ആളൂര്‍, ഫാ. മാത്യു കല്ലറയ്ക്കല്‍‍ എന്നിവരെയും നിയമിച്ചിട്ടുണ്ട്.

വിശുദ്ധ കുര്‍ബാനയര്‍പ്പണത്തിന്‍റെ ഏകീകൃതരീതി സീറോമലബാര്‍ സഭയില്‍ നിലവില്‍ വന്നത് 2021 നവംബര്‍ 28നാണ്. മാര്‍പാപ്പയും പൗരസ്ത്യ സഭകള്‍ക്കായുള്ള കാര്യാലയവും സഭാ സിനഡും മേജര്‍ ആര്‍ച്ച്ബിഷപ്പും അപ്പസ്‌തോലിക് അഡ്മിനിസ്‌ട്രേറ്ററും പൊന്തിഫിക്കല്‍ ഡെലഗേറ്റും ഉപദേശരൂപേണയും കല്പനകളായും ഏകീകൃത കുര്‍ബാനയര്‍പ്പണം നടപ്പിലാക്കാന്‍ ശ്രമിച്ചിട്ടും വിശ്വാസികള്‍ക്കിടയില്‍ ഭിന്നതയ്ക്കും പൊതുസമൂഹത്തില്‍ വലിയ ഉതപ്പിനും ഇടയാകുന്ന വിധത്തില്‍ അച്ചടക്കലംഘനം തുടരുന്നതിനാലാണു പ്രത്യേക ട്രൈബ്യൂണലിന്‍റെ സ്ഥാപനം അനിവാര്യമായിവന്നതെന്ന് സീറോമലബാർ സഭാ മീഡിയ കമ്മീഷൻ സെക്രട്ടറിയും പിആർഒയുമായ റവ ഡോ. ആന്‍റണി വടക്കേക്കര വാർത്താക്കുറിപ്പിൽ അറിയിച്ചു.

രൂപതാ കേന്ദ്രങ്ങളിലാണ് ഇത്തരം കോടതികള്‍ സാധാരണഗതിയില്‍ പ്രവര്‍ത്തിക്കേണ്ടത്. എന്നാല്‍, എറണാകുളം- അങ്കമാലി അതിരൂപതയുടെ നിലവിലെ സാഹചര്യത്തില്‍ ഇത്തരമൊരു കോടതി തുറന്നു പ്രവര്‍ത്തിക്കാന്‍ സാധ്യമല്ലെന്ന കാര്യം അപ്പസ്‌തോലിക് അഡ്മിനിസ്‌ട്രേറ്റര്‍ മേലധികാരികളെ അറിയിച്ചിരുന്നു. അതിനാല്‍, മാര്‍ ബോസ്‌കോ പുത്തൂരിന്‍റെ അഭ്യര്‍ഥനപ്രകാരവും വത്തിക്കാനിലെ പൗരസ്ത്യ കാര്യാലയത്തിന്‍റെ നിര്‍ദേശാനുസരണവുമാണ് മേജര്‍ ആര്‍ച്ച്ബിഷപ് പ്രത്യേക ട്രൈബ്യൂണൽ സ്ഥാപിച്ചിരിക്കുന്നത്.

അച്ചടക്കലംഘനം നടത്തുന്ന അതിരൂപതയിലെ വൈദികര്‍, സന്യസ്തര്‍, അല്മായര്‍ എന്നിവര്‍ക്കെതിരേ സഭാ നിയമപ്രകാരം നടപടി സ്വീകരിക്കാന്‍ ഈ ട്രൈബ്യൂണലിന് അധികാരമുണ്ടായിരിക്കും. പൗരസ്ത്യ സഭകളുടെ കാനന്‍ നിയമസംഹിതയും മറ്റു സഭാ നിയമങ്ങളും അനുസരിച്ചായിരിക്കും ട്രൈബ്യൂണൽ പ്രവര്‍ത്തിക്കുക.

പൗരസ്ത്യ കാനന്‍ നിയമ സംഹിതയനുസരിച്ച് ട്രൈബ്യൂണൽ നടപടികളും ശിക്ഷ വിധിക്കലും, രോഗത്തിനുള്ള ചികിത്സയായും രോഗം മാറ്റാനുള്ള മരുന്നായുമാണ് വിവക്ഷിച്ചിരിക്കുന്നത്. കാരുണ്യത്തിന്‍റെയും സ്‌നേഹത്തിന്‍റെയും ഉപദേശത്തിന്‍റെയും വഴികള്‍ അടയുമ്പോഴാണ് സഭ നീതിന്യായ നടപടികള്‍ കൈക്കൊള്ളുന്നത്.

ഈ പ്രത്യേക ട്രൈബ്യൂണൽ സഭാ കുറ്റങ്ങള്‍ ചെയ്തിട്ടുള്ളവര്‍ക്കെതിരേ ശിക്ഷ നല്‍കാന്‍ അധികാരമുള്ള സംവിധാനമാണെന്നും നീതിന്യായ അധികാരം ഉപയോഗിച്ച് ട്രൈബ്യൂണൽ നടപടികളിലൂടെയാണു വ്യക്തികള്‍ ചെയ്ത കുറ്റത്തിന്‍റെ കാഠിന്യാനുസരണം ന്യായാധിപന്മാര്‍ ശിക്ഷ വിധിക്കുകയെന്നും പത്രക്കുറിപ്പിൽ പറയുന്നു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.