വിക്രം മിസ്രി പുതിയ വിദേശകാര്യ സെക്രട്ടറി : Deepika.com National News |

Click here for detailed news of all items

വിക്രം മിസ്രി പുതിയ വിദേശകാര്യ സെക്രട്ടറി

Saturday, June 29, 2024 1:34 AM IST

ന്യൂഡൽഹി: പുതിയ വിദേശകാര്യ സെക്രട്ടറിയായി ചൈനീസ്കാര്യ വിദഗ്ധനും ദേശീയ സുരക്ഷാ സഹ ഉപദേഷ്‌ടാവുമായ വിക്രം മിസ്രിയെ നിയമിച്ചു.

വിദേശകാര്യ സെക്രട്ടറി വിനയ് ക്വാത്ര ഇന്ത്യയുടെ യുഎസ് അംബാസഡറായി ചുമതലയേൽക്കുന്ന സാഹചര്യത്തിലാണു നിയമനം. അടുത്തമാസം 15ന് പുതിയ വിദേശകാര്യ സെക്രട്ടറി ചുമതലയേൽക്കുമെന്ന് ഇതുസംബന്ധിച്ച വിജ്ഞാപനത്തിൽ പറയുന്നു.

1989 ബാച്ച് ഐഎഫ്എസ് ഉദ്യോഗസ്ഥനായ വിക്രം മിസ്രി തന്ത്രപ്രധാനമായ ഒട്ടേറെ പദവികളിൽ സേവനമനുഷ്ഠിച്ചു പ്രാഗത്ഭ്യം തെളിയിച്ചയാളാണ്. കിഴക്കൻ ലഡാക്കുമായി ബന്ധപ്പെട്ട തർക്കം ഉൾപ്പെടെ ചൈനയുമായുള്ള അഭിപ്രായവ്യത്യാസങ്ങൾ തുടരുന്ന സാഹചര്യത്തിൽക്കൂടിയാണ് നിയമനം.

ഐ.കെ. ഗുജ്റാൾ, ഡോ. മൻമോഹൻ സിംഗ്, നരേന്ദ്രമോദി എന്നിങ്ങനെ മൂന്ന് പ്രധാനമന്ത്രിമാരുടെ പ്രൈവറ്റ് സെക്രട്ടറിയായി പ്രവർത്തിച്ചുവെന്ന അപൂർവ ബഹുമതിയുള്ള മിസ്രി ദേശീയസുരക്ഷാ സഹ ഉപദേഷ്‌ടാവായി നിയമിതനാകും മുന്പ്, 2019 മുതൽ 2021 വരെ ചൈനയിലെ ഇന്ത്യയുടെ അംബാസഡറായിരുന്നു. 2020 ജൂണിലെ ഗാൽവാൻ സംഘർഷത്തെത്തുടർന്ന് താറുമാറായ ഇന്ത്യ-ചൈന ബന്ധം ചർച്ചകളിലൂടെ ലഘൂകരിക്കുന്നതിൽ നിർണായക പങ്ക് വഹിച്ചിരുന്നു.

2014 മുതൽ 16 വരെ സ്പെയിനിലെയും 2016 മുതൽ 2018 വരെ മ്യാന്‍മറിലെയും അംബാസഡറായിരുന്നു. പാക്കിസ്ഥാൻ, യുഎസ്, ജർമനി, ബെൽജിയം, ശ്രീലങ്ക എന്നിവിടങ്ങളിലെ എംബസികളിലും സേവനമനുഷ്ഠിച്ചിട്ടുണ്ട്.

ഇന്ത്യയുടെ ഫ്രഞ്ച് അംബാസഡർ ജാവേദ് അഷ്റഫായിരിക്കും വിക്രം മിസ്രിയുടെ പകരക്കാരനെന്ന് സൂചനകളുണ്ട്.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.