വെബ്സൈറ്റിൽ അടിയന്തരപ്രമേയ നോട്ടീസ് നൽകാനുള്ള ഓപ്ഷൻ നീക്കി ലോക്സഭ : Deepika.com National News |

ന്യൂഡൽഹി: അടിയന്തര പ്രമേയത്തിനുള്ള നോട്ടീസ് നൽകാനുള്ള ലോക്സഭാ വെബ്സൈറ്റിലെ ഓപ്ഷൻ ഒഴിവാക്കിയെന്ന ആരോപണവുമായി പ്രതിപക്ഷം.

നീറ്റ് ചോദ്യപേപ്പർ ചോർച്ചയുമായി ബന്ധപ്പെട്ട വിഷയം സഭയിൽ അടിയന്തരപ്രമേയമായി അവതരിപ്പിക്കാനിരിക്കെയാണ് ഈ ഓപ്ഷൻ മനഃപൂർവം നീക്കം ചെയ്തുവെന്ന ആരോപണവുമായി പ്രതിപക്ഷം രംഗത്തുവന്നത്.

സംഭവം അവിശ്വസനീയമാണെന്നും എംപിമാർക്ക് അടിയന്തരപ്രമേയം സമർപ്പിക്കാൻ സാധിക്കാത്ത ഒരു പാർലമെന്‍റിലേക്കാണോ പോകുന്നതെന്നും കോണ്‍ഗ്രസ് എംപി മാണിക്കം ടാഗോർ സമൂഹമാധ്യമത്തിൽ കുറിച്ചു. തെരഞ്ഞെടുപ്പിൽ ജനവിധി എതിരായിട്ടും എൻഡിഎയുടെ സ്വഭാവം അതേപടി തുടരുന്നുവെന്നും അദ്ദേഹം കുറ്റപ്പെടുത്തി .

അടിയന്തരപ്രമേയ നോട്ടീസുകൾ മുൻകൂട്ടി സ്പീക്കർക്കു ലഭ്യമാക്കിയാലേ സഭയിൽ അവതരിപ്പിക്കാൻ സാധിക്കുകയുള്ളൂ. കാലങ്ങളായി വെബ്സൈറ്റ് വഴിയാണ് ഇതു ചെയ്തിരുന്നത്. എന്നാൽ ഇന്നലെ പെട്ടെന്ന് ഈ ഓപ്ഷൻ വെബ്സൈറ്റിൽനിന്ന് അപ്രത്യക്ഷമായി. തുടർന്ന് എൻ.കെ. പ്രേമചന്ദ്രൻ എംപി ഉൾപ്പെടെയുള്ള പ്രതിപക്ഷ എംപിമാർ സ്പീക്കറുടെ ഓഫീസിൽ നേരിട്ടെത്തിയാണ് അടിയന്തരപ്രമേയത്തിനുള്ള നോട്ടീസ് നൽകിയത്.