കുരുന്നുകൾക്ക് കളിവീടൊരുങ്ങി; നാലു കുടുംബങ്ങൾക്ക് വീടുകളും

കോട്ടയം: പാറമ്പുഴ ബേത്‌ലഹേം ഇടവകയിലെ മുൻകാല യുവദീപ്തി-എസ്‌എംവൈഎം പ്രവർത്തകരുടെ കൂട്ടായ്മയായ ഹെൽപ്പിംഗ് ഹാൻഡ് പാറമ്പുഴയുടെ നേതൃത്വത്തിൽ പൂർത്തിയാക്കിയ നാലു വീടുകളുടെ താക്കോൽ ദാനവും അതോടൊപ്പം തങ്ങളുടെ മാതൃവിദ്യാലയത്തിലെ പുതുതലമുറയിലെ കുരുന്നുകൾക്കായി നിർമിക്കുന്ന ‘കളിവീട്’ ചിൽഡ്രൻസ് പാർക്കിന്‍റെ വെഞ്ചരിപ്പും ഇന്ന് ഉച്ചകഴിഞ്ഞു 2:30ന് പാറമ്പുഴ ഹോളി ഫാമിലി ഹൈസ്‌കൂൾ ഓഡിറ്റോറിയത്തിൽ നടക്കും. കഴിഞ്ഞ അഞ്ചു വർഷമായി പ്രവർത്തിക്കുന്ന ഈ കൂട്ടായ്മയുടെ ഇരുപതാമത്തെ ചാരിറ്റി ഭവനമാണ് ഇത്.

കർദിനാൾ മാർ ജോർജ് ആലഞ്ചേരി സമ്മേളനത്തിൽ മുഖ്യാതിഥിയായി പങ്കെടുക്കും. സ്‌കൂൾ മാനേജർ ഫാ. മാത്യു ചൂരവടി അധ്യക്ഷത വഹിക്കും. എംഎസ്എം സെർവന്‍റ് ജനറൽ ഫാ. സെബാസ്റ്റ്യൻ മണപ്പാത്തുപറമ്പിൽ അനുഗ്രഹപ്രഭാഷണം നടത്തും. നഗരസഭാധ്യക്ഷ ബിൻസി സെബാസ്റ്റ്യൻ മുഖ്യപ്രഭാഷണം നടത്തും.

മുൻ ഹെഡ്മാസ്റ്റർ വി.എം. തോമസിന്‍റെ ഭാര്യ മേരി തോമസ് വടക്കേഅയ്മനംകുഴി താക്കോൽ സമർപ്പണം നടത്തും. ഗാന്ധിനഗർ സ്റ്റേഷൻഹൗസ് ഓഫീസർ ടി. ശ്രീജിത്ത് എസ്പിസി ക്യാമ്പ് ഉദ്ഘാടനം ചെയ്യും. നഗരസഭാ കൗൺസിലർമാരായ സാബു മാത്യു, എം.എ. ഷാജി, സ്‌കൂൾ ഹെഡ്മിസ്ട്രസ് ജാൻസിമോൾ അഗസ്റ്റിൻ, പേരൂർ സഹകരണ ബാങ്ക് പ്രസിഡന്‍റ് റെജി പ്രദീപ്,

ചങ്ങനാശേരി അതിരൂപത ലിറ്റർജിക്കൽ ആർട്ട് ഡയറക്ടർ ഫാ. ജേക്കബ് കൂരോത്ത്, അസിസ്റ്റന്‍റ് മാനേജർ ഫാ. സിറിയക് കാഞ്ഞിരത്തുംമൂട്ടിൽ, പിടിഎ പ്രസിഡന്‍റ് ബിജോ ജോസഫ്, സ്‌കൂൾ പൂർവവിദ്യാർഥി പ്രിൻസ് ലൂക്കോസ്, ഹെൽപ്പിംഗ് ഹാൻഡ് മെംബർ പ്രിൻസ്മോൻ ഏബ്രഹാം, പാറമ്പുഴ ബേത്‌ലഹേം ചർച്ച് ട്രസ്റ്റി ഷാജി ജോസഫ് ചുങ്കക്കരോട്ട് എന്നിവർ പ്രസംഗിക്കും.

ADVERTISEMENT

കൊമ്പുകുത്തിയിൽ കാട്ടാന ആക്രമണം

മുണ്ടക്കയം: കോരുത്തോട് പഞ്ചായത്തന്‍റെ കൊമ്പുകുത്തിയിൽ കാട്ടാനശല്യം രൂക്ഷം. കഴിഞ്ഞ ദിവസം രാത്രി കൊമ്പുകുത്തിയിൽ പുളിക്കൽ പത്മനാഭപിള്ളയുടെ വീട്ടുമുറ്റത്ത് കാട്ടാനയെത്തി. ആനയെ കണ്ട് ഭയന്ന് വീട്ടുകാർ നിലവിളിച്ചതോടെ ആന വീടിന്‍റെ കതക് കുത്തിപ്പൊളിച്ചു. വീടിനകത്തുണ്ടായിരുന്ന കട്ടിൽ, മേശ, ടിവി അടക്കമുള്ള ഗൃഹോപകരണങ്ങളും നശിപ്പിച്ചു. വീട്ടുകാർ പരിക്കേൽക്കാതെ അത്ഭുതകരമായി രക്ഷപ്പെട്ടു. ഏറെനേരം ഭീകരാന്തരീക്ഷം സൃഷ്ടിച്ച ശേഷമാണ് കാട്ടാന ഇവിടെനിന്നു മടങ്ങിയത്. മേഖലയിൽ ഏറെനാളായി കാട്ടാനശല്യം അതിരൂക്ഷമാണ്. നാട്ടുകാർ പരാതിപ്പെടുമ്പോൾ പേരിന് വനംവകുപ്പ് ഉദ്യോഗസ്ഥരെത്തി ആനകളെ കാട്ടിലേക്ക് തുരത്തുമെങ്കിലും മണിക്കൂറുകൾക്ക് ശേഷം ഇവ വീണ്ടും ജനവാസ മേഖലയിലേക്ക് മടങ്ങുകയാണ്. സംരക്ഷണവേലികൾ നിർമിക്കുമെന്ന് അധികാരികൾ വാഗ്ദാനം നൽകുന്നുണ്ടെങ്കിലും ഇതൊന്നും പ്രാവർത്തികമാകുന്നില്ലെന്നു മാത്രമല്ല ഓരോ ദിവസവും വന്യമൃഗശല്യം വർധിക്കുകയാണ്.

നടൻ വിജയരാഘവനെ ആദരിച്ചു

കോട്ടയം: ദേശീയ ചലച്ചിത്ര അവാര്‍ഡ് ജേതാവായ വിജയരാഘവനെ കോട്ടയം സിറ്റസണ്‍ ഫോറം ആദരിച്ചു. നഗരസഭ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ അധ്യക്ഷതവഹിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ വിജയരാഘവനെ പൊന്നാട അണിയിച്ചു. കോട്ടയം അതിരൂപത വികാരി ജനറാള്‍ ഫാ. മൈക്കിള്‍ വെട്ടിക്കാട്ട് മുഖ്യപ്രഭാഷണം നടത്തി. കാരിത്താസ് ആശുപത്രി ഡറക്ടര്‍ റവ. ഡോ. ബിനു കുന്നത്ത്, മാന്നാനം കെഇ സ്‌കൂള്‍ പ്രിന്‍സിപ്പല്‍ റവ.ഡോ. ജയിംസ് മുല്ലശേരി, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, പ്രോഗ്രാം കോ-ഓര്‍ഡിനേറ്റര്‍ മാത്യു കൊല്ലമലക്കരോട്ട് എന്നിവര്‍ പ്രസംഗിച്ചു.

കോട്ടയം അതിരൂപത ദിനാഘോഷം ഇന്ന്

കോട്ടയം: കോട്ടയം ക്‌നാനായ അതിരൂപതാദിനാചരണം ഇന്നു രാവിലെ 10ന് ഇടയ്ക്കാട്ട് സെന്‍റ് ജോര്‍ജ് ക്നാനായ കത്തോലിക്കാ ഫൊറോന പള്ളിയില്‍ നടക്കും. പുരാതന പാട്ടുകള്‍ പാടി നടവിളിയോടെ ബിഷപ്പുമാരെ സ്വീകരിക്കും. ആര്‍ച്ച്ബിഷപ് മാര്‍ മാത്യു മൂലക്കാട്ട് ദീപം തെളിക്കും. തുടര്‍ന്ന് ആര്‍ച്ച്ബിഷപ് മാര്‍ തോമസ് തറയിലിന്‍റെ മുഖ്യകാര്‍മികത്വത്തില്‍ വിശുദ്ധ കുര്‍ബാന. മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം, വൈദികര്‍ തുടങ്ങിയവര്‍ കൃതജ്ഞതാബലിയില്‍ പങ്കെടുക്കും. പൊതുസമ്മേളനം മാര്‍ മാത്യു മൂലക്കാട്ട് ഉദ്ഘാടനം ചെയ്യും. ഗീവര്‍ഗീസ് മാര്‍ അപ്രേം അനുഗ്രഹപ്രഭാഷണം നടത്തും. വ്യത്യസ്ത മേഖലകളില്‍ പ്രാഗല്ഭ്യം തെളിയിച്ചവരെ പാസ്റ്ററല്‍ കൗണ്‍സില്‍ സെക്രട്ടറി സാബു കരിശേരിക്കല്‍ പരിചയപ്പെടുത്തി മാര്‍ മാത്യു മൂലക്കാട്ട് ആദരിക്കും. അതിരൂപതയില്‍ ഒരു വര്‍ഷത്തില്‍ നടത്തപ്പെട്ട പരിപാടികളുടെ അവതരണം പാസ്റ്ററല്‍ കോ-ഓര്‍ഡിനേറ്റര്‍ ഫാ. മാത്യു മണക്കാട്ട് നിര്‍വഹിക്കും. പ്രെസ്ബിറ്ററല്‍ കൗണ്‍സില്‍ സെക്രട്ടറി ഫാ. ഏബ്രാഹാം പറമ്പേട്ട്, കെസിസി പ്രസിഡന്‍റ് ബാബു പറമ്പടത്തുമലയില്‍, സമര്‍പ്പിത സമൂഹങ്ങളുടെ പ്രതിനിധി സിസ്റ്റര്‍ ഇമ്മാക്കുലേറ്റ് എസ്‌വിഎം, കെസിഡബ്ല്യുഎ പ്രസിഡന്‍റ് ഷൈനി ചൊള്ളമ്പേല്‍, കെസിവൈഎല്‍ പ്രസിഡന്‍റ് ജോണിസ് പി. സ്റ്റീഫന്‍ എന്നിവര്‍ പ്രസംഗിക്കും. മാര്‍ ജോസഫ് പണ്ടാരശേരില്‍ സ്വാഗതവും പ്രൊ-പ്രോട്ടോസിഞ്ചെല്ലൂസ് ഫാ. തോമസ് ആനിമൂട്ടില്‍ കൃതജ്ഞതയും അര്‍പ്പിക്കും.

ജെയ്‌നമ്മ കൊലപാതകം: ഡിഎന്‍എ ഫലത്തിനുശേഷം തുടരന്വേഷണം

കോട്ടയം: അതിരമ്പുഴ സ്വദേശി ജെയ്‌നമ്മയുടെ കൊലപാതകത്തില്‍ കൂടുതല്‍ അന്വേഷണം ഡിഎന്‍എ ഫലം വന്നതിനു ശേഷമെന്ന് ക്രൈംബ്രാഞ്ച്. കേസില്‍ അറസ്റ്റിലായ ചേര്‍ത്തല പള്ളിപ്പുറം ചൊങ്ങുംതറ സി.എം. സെബാസ്റ്റ്യന്‍റെ വീട്ടുവളപ്പില്‍നിന്നു കണ്ടെടുത്ത അസ്ഥിക്കഷ്ണങ്ങളുടെ ഡിഎന്‍എ ഫലത്തിനായി പോലീസ് കാത്തിരിക്കുകയാണ്. അസ്ഥിക്കഷ്ണങ്ങള്‍ കരിഞ്ഞ നിലയിലായതിനാലാണ് ഡിഎന്‍എ വൈകുന്നത്. ഇത് സ്ത്രീയുടെ അസ്ഥിയാണെന്നു വ്യക്തമായിട്ടുണ്ട്. ജെയ്‌നമ്മയെ കൂടാതെ ചേര്‍ത്തല വാരനാട് സ്വദേശി ഐഷ, കടക്കരപ്പള്ളി സ്വദേശി ബിന്ദു പത്മനാഭന്‍ എന്നിവരുടെ തിരോധാനത്തിലും ദുരൂഹത നിലനില്‍ക്കുകയാണ്. ബിന്ദുവിനെയും ഐഷയെയും സെബാസ്റ്റ്യന്‍ വകവരുത്തിയതായാണ് സാഹചര്യത്തെളിവുകള്‍. എന്നാല്‍ തുടര്‍ച്ചയായ ചോദ്യംചെയ്യലില്‍, ഇരുവര്‍ക്കും എന്തു സംഭവിച്ചെന്ന് പ്രതി പറയുന്നില്ല. ഡിഎന്‍എ ഫലം ജെയ്‌നമ്മയുടേതാണെങ്കില്‍ കേസില്‍ വ്യക്തമായ തെളിവാകും. സെബാസ്റ്റ്യന്‍റെ വീട്ടിലെ കുളിമുറിയില്‍ കണ്ടെത്തിയ രക്തത്തുള്ളികള്‍ ജെയ്‌നമ്മയുടേതാണെന്ന് ഫോറന്‍സിക് പരിശോധനയില്‍ തെളിഞ്ഞിരുന്നു. അസ്ഥിക്കഷ്ണങ്ങള്‍ ജെയ്‌നമ്മയുടേതല്ലെങ്കില്‍ മൃതദേഹം എവിടെ മറവുചെയ്തുവെന്നത് കണ്ടെത്തണം. ഐഷയും ബിന്ദുവും എവിടെയെന്നതിലും തുടരന്വേഷണം നടത്തണം. ജെയ്‌നമ്മ തിരോധാനത്തില്‍ തുടരെ പതിനാറ് ദിവസം സെബാസ്റ്റ്യനെ ചോദ്യം ചെയ്തിട്ടും പരസ്പരവിരുദ്ധമായ മറുപടിയാണ് ഇയാള്‍ പോലീസിനു നല്‍കുന്നത്.

ഇന്നു ജലപ്പൂരം

എം.ജെ. ജോസ് ആലപ്പുഴ: ആലപ്പുഴയിൽ ഇന്നു ജലപ്പൂരം. പുരുഷാരം വഞ്ചിപ്പാട്ടും തുഴത്താളവുമായി പുന്നമടക്കായലിൽ ഇന്നു ഒന്നു ചേരും. വള്ളംകളി പ്രേമികൾക്ക് ഇന്ന് ഉത്സവദിനം. 2025ലെ നെഹ്റു ട്രോഫി ആരടിക്കും? ആലപ്പുഴ കാത്തിരിക്കുന്നു. ആയിരക്കണക്കിനു സഞ്ചാരികൾ ഇന്നു പുന്നമടയിൽ ഒത്തുചേരും. ജലപൂരത്തിൽ തുഴവെഞ്ചാമരം വീശി കൊമ്പ് കുലുക്കി പായുന്ന ഗജചുണ്ടന്മാരെ കണ്ട് ഇരുകരകളിലെയും പുരുഷാരം ആരവം മുഴക്കും. നെഹ്‌റു ട്രോഫി വള്ളംകളി എന്നത് ഒരു മത്സരത്തേക്കാൾ വള്ളങ്ങളുടെ കണ്ണും മനസും നിറയ്ക്കുന്ന ഒരു ഘോഷയാത്രയാണ്. ചുണ്ടൻ വള്ളങ്ങൾ , മറ്റുതരം വള്ളങ്ങൾ, നൂറുകണക്കിനു തുഴക്കാർ എന്നിങ്ങനെ അണിനിരക്കുന്ന മനോഹര ഘോഷയാത്ര. ഒരുമയുടെയും സ്നേഹത്തിന്‍റെയും ഐക്യത്തിന്‍റെയും സന്ദേശം വിളിച്ചോതി കേരളം ഇന്നു നെഹ്റു ട്രോഫി ജലമേളയ്ക്കു സാക്ഷ്യം വഹിക്കും. ഇന്നു നടക്കുന്ന 71-ാമത് നെഹ്‌റു ട്രോഫി വള്ളംകളി ലോഗോ ആരോഗ്യ, വനിതാ, ശിശുക്ഷേമ മന്ത്രി വീണ ജോർജും ചലച്ചിത്ര താരം കാളിദാസ് ജയറാമും സംയുക്തമായി അനാച്ഛാദനം ചെയ്തായിരുന്നു പ്രചാരണങ്ങളുടെ തുടക്കം. കാക്കത്തമ്പുരാട്ടി വള്ളം തുഴയുന്ന ചിത്രമാണത്. ആലപ്പുഴ വട്ടായലിലെ കാക്കരിയിൽനിന്നുള്ള എസ്. അനുപമയാണ് ലോഗോ രൂപകല്പന ചെയ്തത്. ആലപ്പുഴയ്ക്ക് ഇനി ഉദ്വേഗം ജനിപ്പിക്കുന്ന കാത്തിരിപ്പിന്‍റെ നിമിഷങ്ങളാണ്. 2025ലെ നെഹ്റുട്രോഫിയിൽ ആരു മുത്തമിടുമെന്ന ആകാംക്ഷ ഒാളമടിക്കുന്ന പുന്നമടയിലേക്ക് എല്ലാ ചുവടുകളും എല്ലാ കണ്ണുകളും. സമയത്തിന്‍റെ അടിസ്ഥാനത്തില്‍ ആദ്യമെത്തുന്ന 16 ചുണ്ടന്‍ വള്ളങ്ങളാണ ഫൈനലില്‍ മാറ്റുരയ്ക്കുക. ട്രാക്ക് ചുവടെ: ചുണ്ടന്‍ 16,15,14,13 തേർഡ് ലൂസേഴ്‌സ് ഫൈനൽ ട്രാക്ക് 1- 13 ട്രാക്ക് 2- 15 ട്രാക്ക് 3- 14 ട്രാക്ക് 4- 16 ചുണ്ടന്‍ 12,11,10,09 സെക്കന്റ് ലൂസേഴ്‌സ് ഫൈനൽ ട്രാക്ക് 1- 9 ട്രാക്ക് 2- 12 ട്രാക്ക് 3- 10 ട്രാക്ക് 4- 11 ചുണ്ടന്‍ 08,07,06,05 ലൂസേഴ്‌സ് ഫൈനൽ ട്രാക്ക് 1- 06 ട്രാക്ക് 2- 07 ട്രാക്ക് 3- 05 ട്രാക്ക് 4-08 ചുണ്ടന്‍ 04,03,02,01 ഫൈനൽ ട്രാക്ക് 1- 04 ട്രാക്ക് 2- 02 ട്രാക്ക് 3- 01 ട്രാക്ക് 4- 03 ഇരുട്ടുകുത്തി സി ഫൈനല്‍ ട്രാക്ക് 1- 04 ട്രാക്ക് 2- 02 ട്രാക്ക് 3- 01 ട്രാക്ക് 4- 03 ഇരുട്ടുകുത്തി ബി ഫൈനല്‍ ട്രാക്ക് 1- 01 ട്രാക്ക് 2- 04 ട്രാക്ക് 3- 03 ട്രാക്ക് 4- 0 വള്ളങ്ങളുടെ ഹീറ്റ്‌സുകളും ട്രാക്കുകളും ചുണ്ടന്‍ ഹീറ്റ്സ് 1 ട്രാക്ക് 1- ആനാരി ചുണ്ടൻ ട്രാക്ക് 2- വെള്ളംകുളങ്ങര ട്രാക്ക് 3- ശ്രീവിനായകൻ ട്രാക്ക് 4- കാരിച്ചാൽ ഹീറ്റ്സ് 2 ട്രാക്ക് 1- കരുവാറ്റ ട്രാക്ക് 2- ചെറുതന പുത്തൻചുണ്ടൻ ട്രാക്ക് 3- നടുവിലെ പറമ്പൻ ട്രാക്ക് 4- പായിപ്പാടൻ 2 ഹീറ്റ്സ് 3 ട്രാക്ക് 1- ചമ്പക്കുളം ട്രാക്ക് 2- തലവടി ചുണ്ടന്‍ ട്രാക്ക് 3- മേൽപ്പാടം ചുണ്ടൻ ട്രാക്ക് 4- ആലപ്പാടൻ ഹീറ്റ്സ് 4 ട്രാക്ക് 1- സെന്‍റ് ജോർജ് ട്രാക്ക് 2- നടുഭാഗം ട്രാക്ക് 3- നിരണം ട്രാക്ക് 4- വലിയ ദിവാൻജി ഹീറ്റ്സ് 5 ട്രാക്ക് 1- സെൻറ് പയസ് ടെൻത് ട്രാക്ക് 2- ജവഹർ തായങ്കരി ട്രാക്ക് 3- പായിപ്പാടൻ ട്രാക്ക് 4- വള്ളമില്ല ഹീറ്റ്സ് 6 ട്രാക്ക് 1- വീയപുരം ട്രാക്ക് 2- ആയാപറമ്പ് പാണ്ടി ട്രാക്ക് 3- വള്ളമില്ല ട്രാക്ക് 4- വള്ളമില്ല ചുരുളന്‍ ഫൈനല്‍ മാത്രം ട്രാക്ക് 1- വേലങ്ങാടന്‍ ട്രാക്ക് 2- കോടിമത ട്രാക്ക് 3- മൂഴി ട്രാക്ക് 4- വള്ളമില്ല ഇരുട്ടുകുത്തി എ ഗ്രേഡ്‌ (ഫൈനല്‍ മാത്രം) ട്രാക്ക് 1- തുരുത്തിത്തറ ട്രാക്ക് 2- പി.ജി. കർണ്ണന്‍ ട്രാക്ക് 3- പടക്കുതിര ട്രാക്ക് 4- മൂന്ന് തൈക്കൽ ട്രാക്ക് 5-മാമ്മുടൻ ഇരുട്ടുകുത്തി ബി ഗ്രേഡ് ഹീറ്റ്സ് 1 ട്രാക്ക് 1- തുരുത്തിപ്പുറം ട്രാക്ക് 2- താണിയൻ ദ ഗ്രേറ്റ് ട്രാക്ക് 3- ശ്രീഭദ്ര ട്രാക്ക് 4- ഗോതുരുത്ത് പുത്രന്‍ ഹീറ്റ്സ് 2 ട്രാക്ക് 1- സെൻറ് ആൻറണീസ് ട്രാക്ക് 2- സെൻറ് സെബാസ്റ്റ്യൻ നമ്പർ 1 ട്രാക്ക് 3- ശ്രീമുത്തപ്പൻ ട്രാക്ക് 4- ഹനുമാൻ നമ്പർ 1 ഹീറ്റ്സ് 3 ട്രാക്ക് 1- ദാനിയേൽ ട്രാക്ക് 2- സെന്റ് ജോസഫ് ട്രാക്ക് 3- പുത്തൻ പറമ്പൻ ട്രാക്ക് 4- പൊഞ്ഞനത്തമ്മ ഹീറ്റ്സ് 4 ട്രാക്ക് 1- കുറുപ്പ് പറമ്പന്‍ ട്രാക്ക് 2- വള്ളമില്ല ട്രാക്ക് 3- വെണ്ണക്കലമ്മ ട്രാക്ക് 4- ജലറാണി ഹീറ്റ്സ് 5 ട്രാക്ക് 1- ശ്രീ ഗുരുവായൂരപ്പന്‍ ട്രാക്ക് 2- വലിയ പണ്ഡിതൻ ട്രാക്ക് 3- വള്ളമില്ല ട്രാക്ക് 4- രവണൻ ഇരുട്ടുകുത്തി സി ഗ്രേഡ് ഹീറ്റ്്സ് 1 ട്രാക്ക് 1- ചെറിയപണ്ഡിതൻ ട്രാക്ക് 2- പമ്പാവാസൻ ട്രാക്ക് 3- മയിൽവാഹനൻ ട്രാക്ക് 4- തട്ടകത്തമ്മ ഹീറ്റ്സ് 2 ട്രാക്ക് 1- ഹനുമാൻ നമ്പർ 2 ട്രാക്ക് 2- ശ്രീ മുരുകൻ ട്രാക്ക് 3- മയില്‍പ്പീലി ട്രാക്ക് 4- വടക്കുംപുറം ഹീറ്റ്സ് 3 ട്രാക്ക് 1- സെൻറ് ജോസഫ് നമ്പർ 2 ട്രാക്ക് 2- -- സെൻറ് സെബാസ്റ്റ്യൻ നമ്പർ 2 ട്രാക്ക് 3- കാശിനാഥൻ ട്രാക്ക് 4- വള്ളമില്ല ഹീറ്റ്സ് 4 ട്രാക്ക് 1- -- മാടപ്ലാത്തുരുത്ത് ട്രാക്ക് 2- ജിബി തട്ടകൻ ട്രാക്ക് 3- വള്ളമില്ല ട്രാക്ക് 4- ഗോതുരുത്ത് വെപ്പ് എ ഗ്രേഡ് ഹീറ്റ്സ് 1 ട്രാക്ക് 1- ആശ പുളിക്കക്കളം ട്രാക്ക് 2- ജയ് ഷോട്ട് ട്രാക്ക് 3- നെപ്പോളിയൻ ട്രാക്ക് 4- അമ്പലക്കടവൻ ട്രാക്ക് 5 ഷോട്ട് പുളിക്കത്തറ വെപ്പ് ബി ഗ്രേഡ് ഫൈനല്‍ മാത്രം ട്രാക്ക് 1- പി.ജി കരിപ്പുഴ ട്രാക്ക് 2- വള്ളമില്ല ട്രാക്ക് 3- പുന്നത്രപുരയ്ക്കൽ ട്രാക്ക് 4- ചിറമേൽ തോട്ടുകടവൻ

മുണ്ടക്കയത്ത് ഇറങ്ങിയാൽ നായകടി സൗജന്യം!

മുണ്ടക്കയം: മുണ്ടക്കയം ടൗണിലും സമീപപ്രദേശങ്ങളിലും തെരുവുനായശല്യം കാരണം ജനങ്ങൾക്കു വഴി നടക്കാൻ കഴിയാത്ത സ്ഥിതി. രാത്രിയെന്നോ പകലെന്നോ വ്യത്യാസമില്ലാതെ തെരുവുനായ്ക്കൾ ജനവാസ മേഖലയിൽ തമ്പടിക്കുന്നത് പൊതുജനങ്ങൾക്കു ഭീഷണിയായി മാറുകയാണ്. കഴിഞ്ഞ ദിവസം മുണ്ടക്കയം പൈങ്ങനായിൽ രണ്ടുപേർക്കു തെരുവുനായയുടെ കടിയേറ്റിരുന്നു. ഇന്നലെ രാത്രി മുണ്ടക്കയം ഇളംബ്രാമല സ്വദേശി സതീഷിന്‍റെ ഓട്ടോറിക്ഷയുടെ സീറ്റും പടുതയും കൂട്ടമായെത്തിയ നായ്ക്കൾ കടിച്ചുകീറി നശിപ്പിച്ചു. പൈങ്ങന, 31-ാംമൈൽ, വരിക്കാനി, ചെളിക്കുഴി അടക്കമുള്ള പ്രദേശങ്ങളിൽ തെരുവുനായ്ക്കൾ ഭീഷണി ഉയർത്തുന്നുണ്ട്. രാത്രികാലങ്ങളിൽ മുണ്ടക്കയം ടൗണും ബൈപാസും തെരുവുനായ്ക്കളുടെ വിഹാരകേന്ദ്രമാണ്. നായ്ക്കളെ ഇറക്കിവിടുന്നോ? പലപ്പോഴും തെരുവുനായ്ക്കളുടെ ആക്രമണത്തിൽനിന്നു പലരും ഭാഗ്യംകൊണ്ടാണ് രക്ഷപ്പെടുന്നത്. വൈകുന്നേരങ്ങളിലും പ്രഭാതത്തിലും വ്യായാമത്തിനും വിശ്രമത്തിനുമൊക്കെയായി നിരവധി ആളുകൾ മുണ്ടക്കയം ബൈപാസ് തെരഞ്ഞെടുക്കുന്നുണ്ട്. എന്നാൽ, തെരുവുനായ്ക്കളെ പേടിച്ചുവേണം ഇവിടെ ഇറങ്ങി നടക്കാൻ. തെരുവനായ്ക്കളെ സംരക്ഷിക്കാനോ നിയന്ത്രിക്കാനോ ഉള്ള സംവിധാനങ്ങളൊന്നും മുണ്ടക്കയം മേഖലയിലോ സമീപ പ്രദേശങ്ങളിലോ ഇല്ല. ഇതിനിടെ, മറ്റു സ്ഥലങ്ങളിൽനിന്നു തെരുവുനായ്ക്കളെ കൂട്ടത്തോടെ മുണ്ടക്കയം മേഖലയിൽ കൊണ്ടുവന്ന് ഇറക്കിവിടുന്നതായും പരാതിയുണ്ട്. രാത്രികാലങ്ങളിൽ വിജനമാകുന്ന മുണ്ടക്കയം ബൈപാസിൽ തെരുവുനായ്ക്കളെ കൂട്ടത്തോടെ ഇറക്കിവിടുന്നുണ്ടെന്നാണ് നാട്ടുകാരുടെ ആരോപണം. ജനങ്ങളുടെ സുരക്ഷ ഉറപ്പാക്കുവാൻ അധികൃതർ നടപടിയെടുക്കണമെന്ന ആവശ്യമാണ് ഉയരുന്നത്.

ടി.കെ. ലതികയ്ക്ക് ലോംഗ് സർവീസ് അവാർഡ്

കാഞ്ഞിരപ്പള്ളി: കേരള സ്റ്റേറ്റ് ഭാരത് സ്കൗട്ട്സ് ആൻഡ് ഗൈഡ്സ് സംസ്ഥാനതലത്തിൽ നൽകുന്ന ലോംഗ് സർവീസ് ഡെക്കറേഷൻ അവാർഡിന് കാഞ്ഞിരപ്പള്ളി എകെജെഎം ഹയർ സെക്കൻഡറി സ്കൂൾ അധ്യാപിക ടി.കെ. ലതിക അർഹയായി. തിരുവനന്തപുരം ശിക്ഷക്സദനിൽ നടന്ന ചടങ്ങിൽ സ്കൗട്ട്സ് ആൻഡ് ഗൈഡ്സ് സംസ്ഥാന ചീഫ് കമ്മീഷണറും സംസ്ഥാന പൊതുവിദ്യാഭ്യാസ ഡയറക്ടറുമായ എൻ.എസ്. ഉമേഷിൽനിന്ന് അവാർഡ് ഏറ്റുവാങ്ങി. കാഞ്ഞിരപ്പള്ളി വിദ്യാഭ്യാസ ജില്ലാ കബ് ബുൾബുൾ കമ്മീഷണറായും എകെജെഎം ഹയർ സെക്കൻഡറി സ്കൂൾ ഗൈഡ് ക്യാപ്റ്റനായും സേവനം ചെയ്യുന്ന ടി.കെ. ലതികയ്ക്ക് ഗൈഡ് ക്യാപ്റ്റനായി ദീർഘകാലം നൽകിയ സേവനത്തിനാണ് അവാർഡ്. സ്കൂളിൽ ചേർന്ന അനുമോദന യോഗത്തിൽ സ്കൂൾ മാനേജർ ഫാ. പീറ്റർ മുല്ലൂപറമ്പിൽ, പ്രിൻസിപ്പൽ ഫാ. അഗസ്റ്റിൻ പീടികമലയിൽ, സ്കൗട്ട് അഡൾട്ട് റിസോഴ്സ് ജില്ലാ കമ്മീഷണർ ഫാ. വിൽസൺ പുതുശേരി, പിടിഎ പ്രസിഡന്‍റ് ജോജി ജോസഫ് തുടങ്ങിയവർ പ്രസംഗിച്ചു.

ഓണം മൂഡിലായി നാട്, എങ്ങും ആഘോഷങ്ങള്‍

കാഞ്ഞിരപ്പള്ളി: തിരുവോണത്തെ വരവേല്‍ക്കാന്‍ ഒരുങ്ങുകയാണ് മലയാളികള്‍. സ്‌കുളുകളിലും കോളജുകളിലും വിവിധ സ്ഥാപനങ്ങളിലും ഓണാഘോഷങ്ങള്‍ വിവിധ രീതികളില്‍ നടക്കുന്നു. ഇളങ്ങുളം: രണ്ടാംമൈൽ ഒരുമ പുരുഷസ്വയംസഹായ സംഘത്തിന്‍റെ വാർഷികവും ഓണാഘോഷവും നാളെ നടക്കും. വൈകുന്നേരം നാലിന് സാംസ്‌കാരിക സമ്മേളനം ജോസ് കെ. മാണി എംപി ഉദ്ഘാടനം ചെയ്യും. കുട്ടികൾക്കും മുതിർന്നവർക്കും വിവിധ മത്സരങ്ങൾ നടത്തും. രാത്രി എട്ടിന് നാടകം. കാഞ്ഞിരപ്പള്ളി: കുന്നുംഭാഗം സെന്‍റ് ജോസഫ്‌സ് പബ്ലിക് സ്‌കൂളിലെ ഓണാഘോഷം സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് ഭരണസമിതി അംഗവും കഥാകാരിയും കവയിത്രിയുമായ സിജിത അനില്‍ ഉദ്ഘാടനം ചെയ്തു. ഡോ. സിസ്റ്റർ ലിസ് മരിയ, സിസ്റ്റർ മെര്‍ലിന്‍ കാഞ്ഞിരത്തിങ്കല്‍, വൈസ് പ്രിന്‍സിപ്പല്‍ സിസ്റ്റർ റോസ്‌ബെല്‍ എന്നിവര്‍ പ്രസംഗിച്ചു. മെഗാ തിരുവാതിര, കുട്ടികളുടെ വിവിധ കലാപരിപാടികൾ എന്നിവ നടത്തി. പൊന്‍കുന്നം: ജനകീയ വായനശാലയുടെ ഓണാഘോഷം സെപ്റ്റംബര്‍ മൂന്നിന് രാവിലെ ഒന്പതിന് നടക്കും. ലൈബ്രറി കൗണ്‍സില്‍ പഞ്ചായത്ത് നേതൃസമിതി പ്രസിഡന്‍റ് ഒ.എം.എ. കരീം ഉദ്ഘാടനം ചെയ്യും.

ഓണസദ്യയുടെ കൂറ്റൻ മാതൃകയൊരുക്കി ആനക്കല്ല് സെന്‍റ് ആന്‍റണീസ് പബ്ലിക് സ്‌കൂൾ

കാഞ്ഞിരപ്പള്ളി: സ്‌കൂൾ അങ്കണത്തിൽ ഓണസദ്യയുടെ കൂറ്റൻ മാതൃകയൊരുക്കി ആനക്കല്ല് സെന്‍റ് ആന്‍റണീസ് പബ്ലിക് സ്‌കൂൾ. പാഴ്‌വസ്‌തുക്കൾ ഉപയോഗിച്ച് 25 അടി നീളത്തിലും പത്തടി വീതിയിലും വാഴയിലയുടെ മാതൃകയുണ്ടാക്കി അതിൽ ഓണസദ്യയുടെ വിഭവങ്ങളാണ് ഒരുക്കിയിരിക്കുന്നത്. പപ്പടം, പഴം, പായസം തുടങ്ങി 21 വിഭവങ്ങളുടെ മാതൃകയാണ് ആകർഷണീയമായ രീതിയിൽ തയാറാക്കിയിരിക്കുന്നത്. എൽകെജി മുതൽ പന്ത്രണ്ടാം ക്ലാസ് വരെയുള്ള കുട്ടികൾ ഏറെ കൗതുകത്തോടെയാണ് സ്‌കൂൾ അങ്കണത്തിലൊരുക്കിയിരിക്കുന്ന ഓണസദ്യ യുടെ മാതൃക കാണാനും ആസ്വദിക്കാനും എത്തുന്നത്. സ്കൂ‌ളിലെ കലാധ്യാപകരായ കെ.കെ. ജയിംസുകുട്ടി, അലൻ കെ. ജോസഫ് എന്നിവരുടെ നേതൃത്വത്തിലാണ് ഓണസദ്യയുടെ കൂറ്റൻ മാതൃക തയാറാക്കിയത്. ഇതോടൊപ്പം മനോഹരമായ പൂക്കളവും ഒരുക്കിയിട്ടുണ്ട്. ഓണാഘോഷ പരിപാടികളോടനുബന്ധിച്ച് മുഴുവൻ കുട്ടികളെയും പങ്കെടുപ്പിച്ചു വിവിധയിനം മത്സരങ്ങൾ നടത്തി. പായസവിതരണത്തോടെയാണ് ആഘോഷങ്ങൾ സമാപിച്ചത്. പ്രിൻസിപ്പൽ ഫാ. ആന്‍റണി തോക്കനാട്ട് ഓണസന്ദേശം നൽകി.

കേരള കോൺഗ്രസ്-എം മണ്ഡലം കൺവൻഷൻ

കാഞ്ഞിരപ്പള്ളി: കേരള കോൺഗ്രസ്-എം കാഞ്ഞിരപ്പള്ളി മണ്ഡലം കൺവൻഷൻ നാളെ വൈകുന്നേരം 5.30ന് കാഞ്ഞിരപ്പള്ളി സർക്കിൾ സഹകരണ യൂണിയൻ ഹാളിൽ നടക്കും. ചീഫ് വിപ്പ് ഡോ. എൻ. ജയരാജ്‌ കൺവൻഷൻ ഉദ്ഘാടനം ചെയ്യും. മണ്ഡലം പ്രസിഡന്‍റ ഷാജൻ മണ്ണംപ്ലാക്കൽ അധ്യക്ഷത വഹിക്കും. സെബാസ്റ്റ്യൻ കുളത്തുങ്കൽ എംഎൽഎ മുഖ്യപ്രഭാഷണം നടത്തും. ജോബ് മൈക്കിൾ എംഎൽഎ മുഖ്യാതിഥിയായിരിക്കും. പ്രഫ. ലോപ്പസ് മാത്യു, എ.എം. മാത്യു, ജെസി ഷാജൻ, ജോളി മടുക്കക്കുഴി, റിജോ വളാന്തറ, ബിജു ചക്കാല, റോസമ്മ പുളിക്കൽ, ജോയി നെല്ലിയാനി, ടി.ജെ. മോഹനൻ, ദിലീപ് ആന്‍റണി, ജോഷി അഞ്ചനാട്ട്, ഷാജി പുതിയാപറമ്പിൽ, കെ.ആർ. സജി, അജു പനക്കൽ, മനോജ്‌ ചീരാംകുഴി എന്നിവർ പ്രസംഗിക്കും. കാഞ്ഞിരപ്പള്ളിയിലെ പാർട്ടിയുടെ മുതിർന്ന നേതാക്കളെ ആദരിക്കും. പൊൻകുന്നം: കേരള കോൺഗ്രസ്-എം ചിറക്കടവ് മണ്ഡലം കൺവൻഷൻ നാളെ വൈകുന്നേരം 4.30ന് പടനിലം കെ.എം. മാണി നഗറിൽ നടക്കും. ചീഫ് വിപ്പ് ഡോ. എൻ. ജയരാജ് കൺവൻഷൻ ഉദ്ഘാടനം ചെയ്യും. മണ്ഡലം പ്രസിഡന്‍റ് ഷാജി നല്ലേപ്പറമ്പിൽ അധ്യക്ഷത വഹിക്കും. ജോബ് മൈക്കിൾ എംഎൽഎ മുഖ്യപ്രഭാഷണം നടത്തും. എ.എം. മാത്യു ആനിത്തോട്ടം, ഷാജി പാമ്പൂരി, സുമേഷ് ആൻഡ്രൂസ്, ആന്‍റണി മാർട്ടിൻ, കെ.എ. ഏബ്രഹാം, ഫിനോ പുതുപ്പറമ്പിൽ, രാഹുൽ ബി. പിള്ള എന്നിവർ പ്രസംഗിക്കും. പാർട്ടിയുടെ ആദ്യകാല പ്രവർത്തകരെയും വിവിധ മേഖലകളിൽ വിജയം കൈവരിച്ച പ്രമുഖരെയും ചടങ്ങിൽ ആദരിക്കും.

കാർഷിക തൊഴിൽ പരിശീലന പരിപാടി

വെളിച്ചിയാനി: പാറത്തോട് സർവീസ് സഹകരണബാങ്കിന്‍റെ നേതൃത്വത്തിൽ വെളിച്ചിയാനി സെന്‍റ് ജോസഫ്സ് സ്കൂൾ ഹാളിൽ കാർഷിക തൊഴിൽ പരിശീലന പരിപാടി നടത്തി. നബാർഡ് ഡിഡിഎം റജി വർഗീസ് ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.കെ. ശശികുമാർ അധ്യക്ഷത വഹിച്ചു. ബാങ്ക് പ്രസിഡന്‍റ് ജോർജുകുട്ടി ആഗസ്തി, ഡയറക്ടർ ബോർഡ് അംഗങ്ങളായ റെജി അങ്ങേവീട്ടിൽ, കെ.പി. സുജിലൻ, ഗോപിനാഥ്, സുബിൻ കല്ലൂക്കുന്നേൽ, പ്രിൻസ് വെട്ടം, വിജയമ്മ വിജയലാൽ, ഷേർളി വർഗീസ്, സെക്രട്ടി രേഖാമോൾ, പ്രോജക്‌ട് കോ-ഓർഡിനേറ്റർ ബിബിൻ ജോസഫ് തുടങ്ങിയർ പ്രസംഗിച്ചു. ആൻസി മാത്യു ക്ലാസ് നയിച്ചു. നൂറിലധികം കർഷക പ്രതിനിധികൾ പങ്കെടുത്തു.

മാർ സെബാസ്റ്റ്യൻ വാണിയപ്പുരയ്ക്കലിന് ആശംസകളർപ്പിച്ച് കാഞ്ഞിരപ്പള്ളി രൂപത

കാഞ്ഞിരപ്പള്ളി: കല്യാൺ അതിരൂപതയുടെ മെത്രാപ്പോലീത്തയായി നിയമിതനായ മാർ സെബാസ്റ്റ്യൻ വാണിയപ്പുരയ്ക്കലിന് ആശംസകളറിച്ച് മാതൃരൂപതയായ കാഞ്ഞിരപ്പള്ളി. തീക്ഷ്ണതയോടെ അജപാലന ശുശ്രൂഷ നിർവഹിക്കുന്ന മാർ വാണിയപ്പുരയ്ക്കലിന് ഏൽപ്പിക്കപ്പെട്ട പുതിയ ശുശ്രൂഷയിൽ കാഞ്ഞിരപ്പള്ളി രൂപതയൊന്നാകെ സന്തോഷിക്കുകയും പ്രാർഥനാശംസകൾ നേരുകയും ചെയ്യുന്നതായി കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. മാർ വാണിയപ്പുരയ്ക്കലിലൂടെ കല്യാൺ അതിരൂപത ദൈവഹിതാനുസരണം തുടർന്നും മുന്നേറാനിടയാകട്ടെയെന്നും മാർ ജോസ് പുളിക്കൽ ആശംസിച്ചു. പുതിയ അതിരൂപതയായി ഉയർത്തപ്പെട്ട കല്യാൺ അതിരൂപത മെത്രാപ്പോലീത്ത മാർ സെബാസ്റ്റൻ വാണിയപ്പുരയ്ക്കലിനൊപ്പം നിയുക്ത മെത്രാപ്പോലിത്തമാരായ മാർ സെബാസ്റ്റ്യൻ വടക്കേൽ, മാർ പ്രിൻസ് പാണേങ്ങാടൻ, മാർ കുര്യാക്കോസ് ഭരണികുളങ്ങര, ബൽത്തങ്ങാടി അദിലാബാദ് രൂപതകളുടെ മെത്രാന്മാരായി നിയുക്തരായ ഫാ. ജയിംസ് പട്ടേലിൽ, ഫാ. ജോസഫ് തച്ചാറാത്ത് എന്നിവർക്കും മാർ മാത്യു അറയ്ക്കലിനൊപ്പം രൂപത കുടുംബത്തിന്‍റെ ആശംസകളറിയിക്കുന്നതായി മാർ ജോസ് പുളിക്കൽ പറഞ്ഞു.

ഇങ്ങനെ വേണോ? അല്പം വെയ്റ്റ് ചെയ്യൂ!

എലിവാലി: കൊല്ലപ്പള്ളി-മേലുകാവ് റോഡില്‍ എലിവാലി പള്ളി ജംഗ്ഷനിലെ വെയ്റ്റിംഗ് ഷെഡിന്‍റെ നിര്‍മാണം അശാസ്ത്രീയമെന്നു നാട്ടുകാരുടെ പരാതി. റോഡില്‍നിന്നു നിശ്ചിത അകലം പാലിക്കാതെയാണ് വെയ്റ്റിംഗ് ഷെഡ് നിർമിക്കുന്നതെന്നാണ് ആക്ഷേപം. യാത്രക്കാര്‍ക്കു ബസില്‍ കയറാനും ഇറങ്ങാനും സാധിക്കാത്ത വിധത്തിലാണ് പണികള്‍ ആരംഭിച്ചിരിക്കുന്നത്. അതുപോലെ യാത്രക്കാര്‍ വെയ്റ്റിംഗ് ഷെഡില്‍ കയറണമെങ്കിലും ഗോവണി വയ്‌ക്കേണ്ട സ്ഥിതിയാണെന്നു ചൂണ്ടിക്കാണിക്കപ്പെടുന്നു. പിഡബ്ല്യുഡി റോഡിലേക്കു തള്ളിനിൽക്കുന്നതിനാല്‍ അപകടത്തിനും വാഹനങ്ങൾക്കു മാർഗതടസത്തിനും വഴിവയ്ക്കും. ജിയോവാലി പള്ളി വക ഷോപ്പിംഗ് കോംപ്ലക്‌സ് മറച്ചാണ് നിർമാണമെന്ന പരാതിയും ഉയർന്നിട്ടുണ്ട്. വെയ്റ്റിംഗ് ഷെഡ് നിര്‍മാണത്തിനു മുമ്പും ശേഷവും ബന്ധപ്പെട്ട അധികാരികള്‍ക്കു പരാതി നൽകിയിട്ടും യാതൊരു നടപടിയും സ്വീകരിച്ചിട്ടില്ലെന്നു നാട്ടുകാര്‍ പറയുന്നു. അശാസ്ത്രീയ നിര്‍മാണത്തിനെതിരേ നാളെ രാവിലെ എട്ടിന് എലിവാലി ജംഗ്ഷനില്‍ ആം ആദ്മി പാര്‍ട്ടി നേതൃത്വത്തില്‍ പ്രതിഷേധയോഗം സംഘടിപ്പിക്കും. പാര്‍ട്ടി ജില്ലാ വൈസ് പ്രസിഡന്‍റ് റോയി വെള്ളരിങ്ങാട്ട് വിഷയാവതരണം നടത്തും.

കുടുംബങ്ങൾ സ്വർഗമെന്ന് അറിയപ്പെടണം: മോൺ. സെബാസ്റ്റ്യൻ വേത്താനത്ത്

കുറവിലങ്ങാട്: കുടുംബങ്ങൾ സ്വർഗമെന്ന് അറിയപ്പെടണമെന്നു പാലാ രൂപത വികാരി ജനറാൾ മോൺ. സെബാസ്റ്റ്യൻ വേത്താനത്ത് പറഞ്ഞു. പത്താമത് കുറവിലങ്ങാട് ബൈബിൾ കൺവൻഷന്‍റെ രണ്ടാം ദിനത്തിൽ വിശുദ്ധ കുർബാന അർപ്പിച്ച് സന്ദേശം നൽകുകയായിരുന്നു അദ്ദേഹം. മൂന്നാം ദിനമായ ഇന്നു വൈകുന്നേരം നാലിന് ജപമാല പ്രദക്ഷിണം. പള്ളിയോഗ പ്രതിനിധികളും കുടുംബകൂട്ടായ്മ ഭാരവാഹികളും നേതൃത്വം നൽകും. 4.30ന് വികാരി ജനറാൾ മോൺ. ജോസഫ് കണിയോടിക്കൽ വിശുദ്ധ കുർബാന അർപ്പിച്ചു സന്ദേശം നൽകും. തുടർന്ന് ഫാ. സേവ്യർഖാൻ വട്ടായിലും ഫാ. ബിനോയി കരിമരുതുങ്കലും നേതൃത്വം നൽകുന്ന വചനപ്രഘോഷണം. നാളെ 4.30ന് വികാരി ജനറാൾ മോൺ. ജോസഫ് മലേപ്പറമ്പിൽ വിശുദ്ധ കുർബാന അർപ്പിച്ചു സന്ദേശം നൽകും. സമാപന ദിനമായ സെപ്റ്റംബർ ഒന്നിന് 4.30ന് മുട്ടുചിറ പരിശുദ്ധ റൂഹാദ്ക്കുദിശ ഫൊറോന വികാരി ഫാ. ഏബ്രഹാം കൊല്ലിത്താനത്തുമലയിൽ വിശുദ്ധ കുർബാന അർപ്പിക്കും.

മാര്‍ സ്ലീവാ മെഡിസിറ്റിയില്‍ ഡിമന്‍ഷ്യ കെയര്‍ പ്രോഗ്രാം

പാലാ: മാര്‍ സ്ലീവാ മെഡിസിറ്റിയുടെ നേതൃത്വത്തില്‍ ഡിമന്‍ഷ്യ ബാധിച്ചവര്‍ക്കു വേണ്ടി ദി റീ കണക്‌ട് എന്ന പേരില്‍ ഡിമന്‍ഷ്യ കെയര്‍ പ്രോഗ്രാം ആരംഭിച്ചു. ജില്ലാ കളക്ടര്‍ ചേതന്‍കുമാര്‍ മീണ ഉദ്ഘാടനം നിര്‍വഹിച്ചു. പ്രായമായവര്‍ നേരിടുന്ന ആരോഗ് പ്രശ്‌നം മാത്രമല്ല ഒരു സാമൂഹികപ്രശ്‌നം കൂടിയാണ് ഡിമന്‍ഷ്യ എന്ന് കളക്ടര്‍ പറഞ്ഞു. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ അധ്യക്ഷത വഹിച്ചു. നൂതന ചികിത്സാമാര്‍ഗങ്ങളിലൂടെ മറവിരോഗത്തിന് പ്രതിരോധം സൃഷ്ടിക്കാനുള്ള മാര്‍ഗങ്ങളാണ് മാര്‍ സ്ലീവാ മെഡിസിറ്റിയുടെ നേതൃത്വത്തില്‍ നടപ്പാക്കുന്നതെന്ന് അദ്ദേഹം പറഞ്ഞു. ഡിമന്‍ഷ്യ കെയര്‍ പ്രോഗ്രാമിന്‍റെ ഭാഗമായുള്ള വിആർ ടൂള്‍ ആന്‍ഡ് ന്യൂറോബ്ലൂം, എല്‍ഡേഴ്‌സ് മെമ്മറി വര്‍ക്ക് ബുക്ക് എന്നിവയുടെ പ്രകാശനവും മുഖ്യപ്രഭാഷണവും പാലാ നഗരസഭാ ചെയര്‍പേഴ്‌സണ്‍ തോമസ് പീറ്റര്‍ നിര്‍വഹിച്ചു. റീ കണക്‌ട് പ്രോഗ്രാമിനെക്കുറിച്ച് ന്യൂറോളജി വിഭാഗം കണ്‍സള്‍ട്ടന്‍റ് ഡോ. ജോസി ജെ. വള്ളിപ്പാലം വിശദീകരിച്ചു. ന്യൂറോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. അരുണ്‍ ജോര്‍ജ് തറയാനില്‍, ഈസ്ഡിമന്‍ഷ്യ ടെക്‌നോളജീസ് പ്രൈവറ്റ് ലിമിറ്റഡ് സിഇഒ ജോസ് ജോളി പൈനാടത്ത്, ചീഫ് ഓഫ് മെഡിക്കല്‍ സര്‍വീസസ് എയര്‍ കോമഡോര്‍ ഡോ. പോളിന്‍ ബാബു എന്നിവര്‍ പ്രസംഗിച്ചു.

ഓണം മൂഡിലായി നാട്, എങ്ങും ആഘോഷങ്ങള്‍

പാലാ: തിരുവോണത്തെ വരവേല്‍ക്കാന്‍ ഒരുങ്ങുകയാണ് മലയാളികള്‍. സ്‌കുളുകളിലും കോളജുകളിലും വിവിധ സ്ഥാപനങ്ങളിലും ഓണാഘോഷങ്ങള്‍ വിവിധ രീതികളില്‍ നടക്കുന്നു. പാലാ: സെന്‍റ് തോമസ് ഹയര്‍ സെക്കന്‍ഡറി സ്‌കൂളില്‍ ഓണാഘോഷം വിവിധ പരിപാടികളോടെ നടത്തി. പാലാ മുനിസിപ്പല്‍ വൈസ് ചെയര്‍പേഴ്‌സണ്‍ ബിജി ജോജോ ഉദ്ഘാടനം ചെയ്തു. സ്‌കൂള്‍ അങ്കണത്തില്‍നിന്ന് ആരംഭിച്ച വിളംബരറാലി പിടിഎ പ്രസിഡന്‍റ് വി.എം. തോമസ് ഫ്‌ളാഗ് ഓഫ് ചെയ്തു. വാദ്യമേളത്തിന്‍റെ അകമ്പടിയോടെ നടന്ന റാലിയില്‍ ഓണവുമായി ബന്ധപ്പെട്ട ഐതിഹ്യത്തിലെ കഥാപാത്രങ്ങളുടെ വേഷമണിഞ്ഞ് കുട്ടികള്‍ പങ്കെടുത്തു. പൊതുസമ്മേളനത്തില്‍ ഫാ. മാത്യു വെണ്ണായിപ്പള്ളില്‍ സന്ദേശം നൽകി. പ്രിന്‍സിപ്പല്‍ റെജിമോന്‍ കെ. മാത്യു, ചെയര്‍പേഴ്‌സണ്‍ അനീഷ് മാത്യൂസ് എന്നിവര്‍ പ്രസംഗിച്ചു. കുട്ടികളുടെ വിവിധ കലാപരിപാടികളും ഉണ്ടായിരുന്നു. രാമപുരം: മാര്‍ ആഗസ്തീനോസ് കോളജില്‍ സ്റ്റാഫ് അംഗങ്ങള്‍ക്കായി ഓറിയന്‍റേഷന്‍ പ്രോഗ്രാം സംഘടിപ്പിച്ചു. ഓണസംസ്‌കാരം വിജ്ഞാനത്തിലേക്ക് എന്ന വിഷയത്തില്‍ നടത്തിയ ബോധവത്കരണ പരിപാടി മുന്‍ എംജി യൂണിവേഴ്‌സിറ്റി വൈസ് ചാന്‍സലറും ദേശീയ വിദ്യാഭ്യാസ ന്യൂനപക്ഷ കമ്മീഷന്‍ അംഗവുമായ ഡോ. സിറിയക് തോമസ് ഉദ്ഘാടനം ചെയ്തു. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം അധ്യക്ഷത വഹിച്ചു. പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍, വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്ട്രേറ്റീവ് ഓഫീസര്‍മാരായ രാജീവ് ജോസഫ്, പ്രകാശ് ജോസഫ്, ഐക്യുഎസി കോ-ഓര്‍ഡിനേറ്റര്‍ കിഷോര്‍, സ്റ്റാഫ് സെക്രട്ടറി സുനില്‍ കെ. ജോസഫ് തുടങ്ങിയവര്‍ പ്രസംഗിച്ചു. കുര്യനാട്: സെന്‍റ് ആൻസ് ഹയർ സെക്കൻഡറി സ്‌കൂളിൽ ഓണാഘോഷം - ആരവം 2025 നടത്തി. മലയാളി മങ്ക, കസേരകളി, ചാക്കിൽച്ചാട്ടം, തിരി കത്തിച്ചോട്ടം, ബോംബിംഗ് ദ സിറ്റി, വടംവലി തുടങ്ങിയ മത്സരങ്ങൾ കുട്ടികൾ ആവേശത്തോടെ ഏറ്റുവാങ്ങി. കുട്ടികളും അധ്യാപികമാരും അമ്മമാരും ചേർന്നൊരുക്കിയ മെഗാ തിരുവാതിര വേറിട്ട അനുഭവമായി. സാംസ്‌കാരിക സമ്മേളനത്തിൽ സാഹിത്യകാരൻ തേക്കിൻകാട് ജോസഫ് സന്ദേശം നൽകി. പഞ്ചായത്തംഗം സാബു തെങ്ങുംപള്ളിൽ, പ്രിൻസിപ്പൽ ഫാ. ജോബി മാത്തൻകുന്നേൽ, വൈസ് പ്രിൻസിപ്പൽ ജാൻസി തോമസ്, പിടിഎ പ്രസിഡന്‍റ് എൻ.ഡി. പൈലി എന്നിവർ പ്രസംഗിച്ചു.

പൂഞ്ഞാർ ഫൊറോന പള്ളിയിൽ മാതാവിന്‍റെ പിറവിത്തിരുനാളും എട്ടുനോമ്പാചരണവും

പൂഞ്ഞാർ: സെന്‍റ് മേരീസ് ഫൊറോന പള്ളിയിൽ മാതാവിന്‍റെ പിറവിത്തിരുനാളും എട്ടുനോമ്പാചരണവും നാളെ മുതൽ സെപ്റ്റംബർ ഒന്പതു വരെ ആഘോഷിക്കും. നാളെ രാവിലെ 5.30നും ഏഴിനും 9.45നും 11.30 നും വിശുദ്ധ കുർബാന, വൈകുന്നേരം നാലിന് വിശുദ്ധ കുർബാന, സന്ദേശം, കൊടിയേറ്റ് - ബിഷപ് മാർ ജോസഫ് സ്രാമ്പിക്കൽ. ആറിനു പുറത്തുനമസ്കാരം - ഫാ. അഗസ്റ്റിൻ കണ്ടത്തിൽക്കുടിലിൽ. സെപ്റ്റംബർ ഒന്നുമുതൽ ആറുവരെ എല്ലാ ദിവസവും രാവിലെ 5.30നും 6.30നും പത്തിനും വൈകുന്നേരം 4.30നും വിശുദ്ധ കുർബാന. വൈകുന്നേരത്തെ വിശുദ്ധ കുർബാനയ്ക്കു ശേഷം ജപമാല-മെഴുകുതിരി പ്രദക്ഷിണം. ഏഴിനു രാവിലെ 5.30നും ഏഴിനും 9.45നും 11.30നും വൈകുന്നേരം 4.30നും വിശുദ്ധ കുർബാന, സന്ദേശം, നൊവേന. ഉച്ചകഴിഞ്ഞ് മൂന്നിന് തിരുസ്വരൂപ പ്രതിഷ്ഠ. വൈകുന്നേരം ആറിന് തിരുനാൾ പ്രദക്ഷിണം. സന്ദേശം - റവ. ഡോ. കുര്യൻ മുക്കാംകുഴി യിൽ. ഒന്പതിനു പ്രദക്ഷിണം സമാപനം. എട്ടിനു രാവിലെ 5.30നും 6.30നും വിശുദ്ധ കുർബാന, നൊവേന. 9.30ന് മേരീനാമധാരീ സംഗമം. പത്തിന് തിരുനാൾ കുർബാന - ഫാ. മാത്യു വെണ്ണായിപ്പള്ളി. സന്ദേശം - റവ.ഡോ. ഷീൻ പാലയ്ക്കത്തടത്തിൽ. 12ന് തിരുനാൾ പ്രദക്ഷിണം. ഒന്നിന് സ്നേഹവിരുന്ന്. വൈകുന്നേരം 5.30ന് വിശുദ്ധ കുർബാന, സന്ദേശം, നൊവേന - ഫാ. ജോസഫ് കദളിയിൽ. 6.30ന് തിരുസ്വരൂപ പുനഃപ്രതിഷ്ഠ. ഒന്പതിനു രാവിലെ 5.30നു വിശുദ്ധ കുർബാന, സെമിത്തേരി സന്ദർശനം. തുടർന്ന് കൊടിയിറക്ക്.

പാലാ രൂപതയും വിളക്കുമാടവും ആഹ്ലാദത്തില്‍

പാലാ: ഉജ്ജൈന്‍ ആര്‍ച്ച്ബിഷപ്പായി മാര്‍ സെബാസ്റ്റ്യന്‍ വടക്കേല്‍ (72) നിയമിതനായതിന്‍റെ ആഹ്ലാദത്തിൽ പാലാ രൂപതയും ജന്മനാടായ വിളക്കുമാടവും വടക്കേല്‍ കുടുംബവും. പാലാ രൂപതയില്‍പ്പെട്ട വിളക്കുമാടം സെന്‍റ് ഫ്രാന്‍സിസ് സേവ്യര്‍ ഇടവകാംഗമാണ്. ആത്മീയചൈതന്യം നിറഞ്ഞു നില്‍ക്കുന്ന പ്രാര്‍ഥനാനിരതമായ ജീവിതമാണ് അദ്ദേഹത്തിന്‍റേതെന്നു നാട്ടുകാരും വിശ്വാസികളും സാക്ഷ്യപ്പെടുത്തുന്നു. കഴിഞ്ഞ മാസം ഭരണങ്ങാനത്ത് വിശുദ്ധ അല്‍ഫോന്‍സാമ്മയുടെ തിരുനാളില്‍ പങ്കെടുക്കുന്നതിനും വിശുദ്ധ കുര്‍ബാന അര്‍പ്പിച്ച് സന്ദേശം നല്‍കുന്നതിനും അദ്ദേഹം എത്തിയിരുന്നു. നാട്ടിലെത്തുമ്പോഴൊക്കെ അയല്‍വാസികളോടും ബന്ധുമിത്രാദികളോടും കൂടാതെ പാലാ ബിഷപ്സ് ഹൗസിലെത്തി മാര്‍ ജോസഫ് പള്ളിക്കാപറമ്പിലിനോടും മാര്‍ ജോസഫ് കല്ലറങ്ങാട്ടിനോടും സ്‌നേഹാന്വേഷണങ്ങള്‍ നടത്തിയേ മടങ്ങാറുള്ളൂ. വിളക്കുമാടം വടക്കേല്‍ പരേതരായ ദേവസ്യയുടെയും മേരിയുടെയും മകനായി 1952 ഒക്ടോബര്‍ ഏഴിനാണ് ജനനം. പത്താം ക്ലാസ് വരെ വിളക്കുമാടം സെന്‍റ് ജോസഫ്‌സ് ഹൈസ്‌കൂളില്‍ പഠനം. തുടര്‍ന്ന് സെന്‍റ് തോമസ് മിഷനറി സൊസൈറ്റി വൈദിക വിദ്യാര്‍ഥിയായി മേലമ്പാറ ദീപ്തിയില്‍ പഠനം. 1979 ഏപ്രില്‍ 19നു വൈദികനായി. മേലമ്പാറ ദീപ്തി സെമിനാരിയില്‍ പ്രഫസര്‍, റെക്ടര്‍ എന്നീ നിലകളില്‍ പ്രവര്‍ത്തിച്ചു. റോമില്‍നിന്നു കാനന്‍ നിയമത്തില്‍ പിഎച്ച്ഡി നേടിയ അദ്ദേഹം ഉജ്ജൈന്‍ കത്തീഡ്രല്‍ വികാരി, എംഎസ്ടി സഭാ ഡയറക്ടര്‍ ജനറല്‍ തുടങ്ങിയ നിലകളിലും പ്രവര്‍ത്തിച്ചു. 1998 സെപ്റ്റംബര്‍ എട്ടിന് ഉജ്ജൈന്‍ രൂപതയുടെ അധ്യക്ഷനായി നിയമിതനായി. ഇപ്പോള്‍ മെത്രാപ്പോലീത്ത പദവിയിലേക്ക്. വി.ഡി.തോമസ്, റോസമ്മ ചെത്തിമറ്റത്തില്‍, ജോസ്, മാത്യു, ജെസി കാരക്കാട്ട് എന്നിവരാണു സഹോദരങ്ങള്‍.

ഓർമകളുടെ ട്രെയിൻ കയറി കുറവിലങ്ങാട്ടേക്ക് വീണ്ടും മാർ പട്ടേരിൽ

കുറവിലങ്ങാട്: ജീവിതത്തിൽ ആദ്യമായി ട്രെയിനിൽ കയറിയത് മംഗലാപുരത്തുനിന്നു കുറവിലങ്ങാട്ടേക്കായിരുന്നുവെന്ന് നിയുക്ത മെത്രാൻ മാർ ജയിംസ് പട്ടേരിൽ. വൈദിക വിദ്യാർഥിയായി ക്ലാരറ്റ്ഭവനിലേക്കുള്ള യാത്ര. കൂത്താട്ടുകുളം വടകരയിൽനിന്നു മംഗലാപുരത്തേക്കു കുടിയേറിയ കുടുംബത്തെ കുറവിലങ്ങാടുമായും പ്രത്യേകിച്ച് മുത്തിയമ്മയുമായി വിളക്കിച്ചേർത്ത യാത്രകളുടെ തുടക്കമായിരുന്നു അത്. ബൽത്തങ്ങാടി രൂപത നിയുക്ത മെത്രാനായി തെരഞ്ഞെടുക്കപ്പെട്ട ശേഷം ആദ്യമായി കുറവിലങ്ങാട് പള്ളിയിലെത്തിയ മാർ ജയിംസ് പട്ടേരിയുടെ വാക്കുകളിൽ കുറവിലങ്ങാടിനോടും മുത്തിയമ്മയോടുമുള്ള സ്നേഹം നിറഞ്ഞുനിന്നു. ഭാരതത്തിൽ ആദ്യമായി കുറവിലങ്ങാട് പ്രവർത്തനം തുടങ്ങിയ ക്ലാരീഷ്യൻ സഭയ്ക്ക് കുറവിലങ്ങാട് മുത്തിയമ്മ തെളിച്ചുനൽകിയ നീരുറവ ഉള്ളിടത്തോളം കാലം ദൈവവിളിക്കു കുറവുണ്ടാകില്ലെന്ന് ഉറപ്പുണ്ടെന്നു മാർ പട്ടേരിൽ പറഞ്ഞു. വൈദികനായ ശേഷം മൂന്നു വർഷം ക്ലാരറ്റ് ഭവനിലെ സേവനത്തിനിടെ മുത്തിയമ്മയുടെ അരികിലെത്താനും പള്ളിയിലെ ശുശ്രൂഷകളിൽ പങ്കുചേരാനുമായി. കുറവിലങ്ങാട് മൂന്നുനോമ്പ് തിരുനാളിലെത്തി വാങ്ങിയ ഒരു പെട്ടി ഇപ്പോഴും വീട്ടിലുണ്ടെന്നും മാർ ജയിംസ് പറഞ്ഞു. മാർ ജയിംസ് പട്ടേരിയെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ, കൈക്കാരന്മാർ, പള്ളിയോഗാംഗങ്ങൾ, കുടുംബകൂട്ടായ്മ ഭാരവാഹികൾ എന്നിവർ ചേർന്നു സ്വീകരിച്ചു. ക്ലരീഷ്യൻ സഭ പ്രൊവിൻഷ്യൽ സുപ്പീരിയർ ഫാ. സിബി ഞാവള്ളിക്കുന്നേൽ, ക്ലാരറ്റ് ഭവൻ സുപ്പീരിയർ ഫാ. തോമസ് പൈങ്ങോട്ടൂർ എന്നിവരും നിയുക്ത മെത്രാനൊപ്പം എത്തിയിരുന്നു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അദ്ദേഹത്തെ സ്വാഗതം ചെയ്തു. സെക്രട്ടറി ബെന്നി കോച്ചേരി ആശംസ നേർന്നു.

വടക്കേക്കര സ്‌കൂളില്‍ ഭക്ഷ്യമേള

വടക്കേക്കര: ഗവൺമെന്‍റ് ഹയര്‍ സെക്കന്‍ഡറി സ്‌കൂളില്‍ പോഷകാഹാര പ്രദര്‍ശനവും ഭക്ഷ്യ മേളയും മാടപ്പള്ളി ബ്ലോക്ക് പഞ്ചായത്ത് മെംബര്‍ വര്‍ഗീസ് ആന്‍റണി ഉദ്ഘാടനം ചെയ്തു. ഹെഡ്മിസ്ട്രസ് എന്‍. നൂര്‍ജഹാന്‍ അധ്യക്ഷത വഹിച്ചു. സുജ മേരി ജോര്‍ജ്, സുമിത ഐസക് എന്നിവര്‍ പ്രസംഗിച്ചു.

ഇത്തിത്താനം പള്ളിയില്‍ ഇടവകത്തിരുനാള്‍

ഇത്തിത്താനം: ഇത്തിത്താനം സെന്‍റ് മേരീസ് പള്ളിയില്‍ എട്ടുനോമ്പാചരണവും ഇടവക തിരുനാളും 31 മുതല്‍ സെപ്റ്റംബര്‍ എട്ടുവരെ നടക്കും. 31ന് വൈകുന്നേരം നാലിന് വികാരി ഫാ. ഫ്രാന്‍സിസ് പുല്ലുകാട്ട് കൊടിയേറ്റും. തുരുത്തി ഫെറോനാപള്ളി വികാരി ഫാ. ജേക്കബ് ചീരംവേലില്‍ വിശുദ്ധ കുര്‍ബാനയര്‍പ്പിക്കും. സെപ്റ്റംബര്‍ ഒന്നുമുതല്‍ ഏഴുവരെ തീയതികളില്‍ രാവിലെ ആറിനും വൈകുന്നേരം 4.30ന് വിശുദ്ധകുര്‍ബാന. വിവിധ ദിവസങ്ങളില്‍ ഫാ. വില്‍സണ്‍ ചാവറക്കുടിലില്‍, ഫാ. മാത്യു വടക്കേടത്ത്, ഫാ. ജേക്കബ് അഞ്ചുപങ്കില്‍, റവ.ഡോ. സാവിയോ മാനാട്ട്, റവ.ഡോ. സിറിയക് വലിയകുന്നുംപുറം, റവ.ഡോ. ജോസ് തെക്കേപ്പുറത്ത്, ഫാ. ആന്‍റണി പോരൂക്കര, ഫാ. ആന്‍സിലോ തുരുത്തിപ്പറമ്പില്‍ എന്നിവര്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കും. പ്രധാന തിരുനാള്‍ ദിനമായ എട്ടിന് വൈകുന്നേരം 4.30ന് മോണ്‍. ജോണ്‍ തെക്കേക്കര ആഘോഷമായ തിരുനാള്‍ കുര്‍ബാനയര്‍പ്പിക്കും. ഫാ. ആന്‍റണി കാച്ചാംകോട്, ഫാ. ഡെന്‍സി മുണ്ടുനടയ്ക്കല്‍ എന്നിവര്‍ സഹകാര്‍മികരായിരിക്കും. ആറിന് പള്ളിയില്‍നിന്നാരംഭിച്ച് കുതിരപ്പടി, കല്ലുകടവ്, ചാലച്ചിറവഴി തിരുനാള്‍ പ്രദക്ഷിണം. തുടര്‍ന്ന് ആകാശവിസ്മയം, താളമേള പ്രദര്‍ശനം, ആദ്യഫലലേലം. അഞ്ചിന് വൈകുന്നേരം വിശുദ്ധകുര്‍ബാനയ്ക്കുശേഷം പൂര്‍വികസ്മരണ, 6.45ന് ഇടവകാംഗങ്ങള്‍ അവതരിപ്പിക്കുന്ന വിവിധകലാപരിപാടികള്‍, ഏഴിന് വൈകുന്നേരം അഞ്ചിന് ഗാനസന്ധ്യ.

കോണ്‍ഗ്രസ് ജനസമ്പര്‍ക്ക പരിപാടി ഇന്നുമുതല്‍

കോട്ടയം: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രചരണവുമായി കോണ്‍ഗ്രസ് ജനസമ്പര്‍ക്ക പരിപാടി ഇന്നുമുതല്‍ സെപ്റ്റംബര്‍ രണ്ടു വരെ നടക്കും. ജില്ലയിലെ 1431 വാര്‍ഡുകളിലും ഇന്നു രാവിലെ എട്ടുമുതല്‍ ഗൃഹസമ്പര്‍ക്ക പരിപാടി ആരംഭിക്കും. ജില്ലയിലെ എല്ലാ നേതാക്കളും അവരവരുടെ വാര്‍ഡുകളില്‍ ഭവന സന്ദര്‍ശനത്തില്‍ പങ്കാളികളാകുമെന്നും തദ്ദേശ തെരഞ്ഞെടുപ്പില്‍ ജില്ലയില്‍ മികച്ച വിജയം ഉണ്ടാകുമെന്നും ഡിസിസി പ്രസിഡന്‍റ് നാട്ടകം സുരേഷ് പറഞ്ഞു.

കുറിച്ചിയില്‍ ബന്ദിപ്പൂ ഉത്സവം

കുറിച്ചി: ഓണവിപണി ലക്ഷ്യമിട്ട് കുറിച്ചി പഞ്ചായത്ത് വാര്‍ഡ് 12ലെ മഹാദേവന്‍ വയോജന അയല്‍ക്കൂട്ടം അംഗങ്ങളുടെ നേതൃത്വത്തില്‍ നടത്തിയ ബന്ദിപ്പൂ കൃഷിയുടെ വിളവെടുപ്പ് പഞ്ചായത്ത് പ്രസിഡന്‍റ് സുജാത സുശീലന്‍ ഉദ്ഘാടനം ചെയ്തു. വാര്‍ഡ് മെംബര്‍ ബിജു എസ്. മേനോന്‍ അധ്യക്ഷത വഹിച്ച ചടങ്ങില്‍ വിവിധ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍മാരായ പ്രീതാകുമാരി കെ., പ്രശാന്ത് മനന്താനം, പഞ്ചായത്തംഗം അനീഷ് തോമസ്, അയല്‍ക്കൂട്ടം ഭാരവാഹികളായ കെ.കെ. രാജു, പൊന്നമ്മ രാജപ്പന്‍ തുടങ്ങിയവര്‍ പ്രസംഗിച്ചു. കുറിച്ചി പഞ്ചായത്ത് 2025-26 വാര്‍ഷിക പദ്ധതിയില്‍ ഉള്‍പ്പെടുത്തി 1,38,000 രൂപ സബ്‌സിഡി നല്‍കിയാണ് ബന്ദി വിവിധ വാര്‍ഡുകളിലെ കുടുംബശ്രീ മുഖേന കൃഷി ഇറക്കിയത്. ഈ വര്‍ഷത്തെ പ്രതികൂല കാലാവസ്ഥ അതിജീവിച്ച് നൂറുമേനി വിളവാണ് കുടുംബശ്രീ അംഗങ്ങള്‍ നേടിയത്. ബന്ദിപ്പൂ ആവശ്യമുള്ളവര്‍ക്ക് +91 8139018484 നമ്പരില്‍ വിളിക്കാം.

കുടുംബശ്രീ ജില്ലാതല ഓണം വിപണനമേള നാളെ മുതല്‍ ചങ്ങനാശേരിയില്‍

ചങ്ങനാശേരി: കുടുംബശ്രീ ജില്ലാതല ഓണം വിപണന മേള നാളെ മുതല്‍ സെപ്റ്റംബര്‍ മൂന്നുവരെ ചങ്ങനാശേരി പിഎംജെ ഗ്രൗണ്ടില്‍ സംഘടിപ്പിക്കും. സംരംഭകര്‍, ഉപഭോക്താക്കള്‍, കുടുംബശ്രീ പ്രവര്‍ത്തകര്‍, തദ്ദേശസ്വയംഭരണ സ്ഥാപനങ്ങള്‍ കുടുംബശ്രീ ഉദ്യോഗസ്ഥര്‍ എന്നിവരുടെ സാന്നിധ്യവും സഹകരണവും കുടുംബശ്രീ വിപണന മേളയിലുണ്ടാകും. തനിമയും പരിശുദ്ധിയും കേരളീയതയുമുള്ള ഗുണനിലവാരമുള്ളതും മായം കലരാത്തതുമായ ഉത്പന്നങ്ങള്‍ മിതമായ നിരക്കില്‍ ലഭ്യമാക്കുക എന്ന ഉദ്ദേശത്തോടെയാണ് ഓണം വിപണനമേളകള്‍ സംഘടിപ്പിക്കുന്നത്. ഓണം കുടുംബശ്രീക്കൊപ്പം എന്ന ടാഗ് ലൈനോടെ ചങ്ങനാശേരി നഗരസഭാ കുടുംബശ്രീ സിഡിഎസിന്‍റെ ആഭിമുഖ്യത്തിലാണ് ഈ വര്‍ഷത്തെ ജില്ലാതല ഓണം വിപണനമേള ചങ്ങനാശേരിയില്‍ സംഘടിപ്പിക്കുന്നത്. നാളെ രാവിലെ 9.30ന് ചങ്ങനാശേരി നഗരസഭാ വൈസ് ചെയര്‍മാന്‍ മാത്യൂസ് ജോര്‍ജിന്‍റെ അധ്യക്ഷതയില്‍ ജോബ് മൈക്കിള്‍ എംഎല്‍എ ജില്ലാതല മേളയുടെ ഉദ്ഘാടനം നിര്‍വഹിക്കും. നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ ആദ്യ വില്പന നിര്‍വഹിക്കും. കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ അഭിലാഷ് ദിവാകര്‍ മുഖ്യപ്രഭാഷണം നടത്തും. കുടുംബശ്രീ ഗ്രൂപ്പുകള്‍ തയാറാക്കിയ ചിപ്‌സുകള്‍, നാടന്‍ പലഹാരങ്ങള്‍ ശുദ്ധമായ വെളിച്ചെണ്ണയില്‍ തയാറാക്കിയ ചിപ്‌സ്, നാടന്‍ പലഹാരങ്ങള്‍, കറിപൗഡറുകള്‍, ധാന്യപ്പൊടികള്‍, വെളിച്ചെണ്ണ, പലതരം അച്ചാറുകള്‍, കരകൗശല വസ്തുക്കള്‍, ഏത്തക്കുല, പുളി, പപ്പടം, സോപ്പ്, സോപ്പ് ഉല്‍പന്നങ്ങള്‍, പച്ചക്കറികള്‍ തുടങ്ങി നിരവധി ഉത്പന്നങ്ങള്‍ മേളയില്‍ ലഭ്യമാണ്. കൂടാതെ 15 ഇനം ഉത്പന്നങ്ങള്‍ അടങ്ങിയ കുടുംബശ്രീ ഓണക്കിറ്റ് 750 രൂപ നിരക്കില്‍ മേളയില്‍ നിന്നും ലഭിക്കും. പായസമേളയും അച്ചാര്‍ മേളയും ഒരുക്കിയിട്ടുണ്ട്. എല്ലാ ദിവസവും കുടുംബശ്രീ അംഗങ്ങളുടെ വിവിധ കലാപരിപാടികള്‍ ഉണ്ടായിരിക്കും. ചങ്ങനാശേരി നഗരസഭയിലും മാടപ്പള്ളി ബ്ലോക്കിലും ഉള്‍പ്പെട്ട കുടുംബശ്രീ സിഡിഎസുകളിലെ 35ലധികം സംരംഭകര്‍ മേളയില്‍ പങ്കെടുക്കും. തൊഴില്‍ രജിസ്‌ട്രേഷന്‍ കൗണ്ടര്‍ തൊഴില്‍ രഹിതരായ യുവതിയുവാക്കള്‍ക്കു തൊഴില്‍ നല്‍കുന്നതിന് വേണ്ടി കുടുംബശ്രീ വിജ്ഞാന കേരളം ഓണത്തിന് ഒരു ലക്ഷം തൊഴില്‍ പദ്ധതിയുടെ ഭാഗമായി പ്രത്യേക രജിസ്‌ട്രേഷന്‍ കൗണ്ടറും മേളയില്‍ പ്രവര്‍ത്തിക്കും. രജിസ്ട്രേഷന്‍ നടത്തുന്നവര്‍ക്ക് വിവിധ സ്ഥാപനങ്ങള്‍ മുഖാന്തിരം തൊഴില്‍ ലഭ്യമാക്കുന്നതാണ്.

കേരളത്തിലെ 80 നോണ്‍-ഡെലിവറി പോസ്റ്റ് ഓഫീസുകള്‍ അടച്ചുപൂട്ടുന്നു

ചങ്ങനാശേരി: കേരളത്തില്‍ ഏകദേശം 80ഓളം നോണ്‍-ഡെലിവറി പോസ്റ്റ് ഓഫീസുകള്‍ അടച്ചുപൂട്ടാനുള്ള നീക്കം ഡിപ്പാര്‍ട്ട്‌മെന്‍റ് ആരംഭിച്ചു. ചങ്ങനാശേരി പരിധിയിലെ പെരുന്ന, മാര്‍ക്കറ്റ്, കോളജ് പോസ്റ്റ് ഓഫീസുകള്‍ അടക്കം നിരവധി ഓഫീസുകള്‍ അടച്ചുപൂട്ടാനുള്ള പട്ടികയില്‍ ഉള്‍പ്പെടുത്തിയിട്ടുണ്ട്. വിദ്യാര്‍ഥികള്‍ക്കും വ്യാപാരികള്‍ക്കും ചെറുകിട സംരംഭകര്‍ക്കും മുതിര്‍ന്ന പൗരന്മാര്‍ക്കും ഉള്‍പ്പെടെ നിരവധി വിഭാഗങ്ങള്‍ക്ക് ഇത്തരം നോണ്‍-ഡെലിവറി പോസ്റ്റ് ഓഫീസുകള്‍ അനിവാര്യമായ സേവനങ്ങള്‍ നല്‍കുന്നുണ്ട്. പൊതുജനങ്ങളുടെ സാമ്പത്തിക ഇടപാടുകള്‍ക്കും ആശയവിനിമയത്തിനും വിവിധ സര്‍ക്കാര്‍ പദ്ധതികളുടെ ആനുകൂല്യങ്ങള്‍ ലഭ്യമാക്കുന്നതിനും തപാല്‍ സേവനങ്ങളുടെ സാന്നിധ്യം അത്യന്താപേക്ഷിതമാണ്. പൂട്ടരുത്, നവീകരിച്ച് നിലനിര്‍ത്തണം നോണ്‍-ഡെലിവറി പോസ്റ്റ് ഓഫീസുകള്‍ അടച്ചുപൂട്ടുന്നത് പൊതുജനങ്ങള്‍ക്ക് വലിയ ബുദ്ധിമുട്ടുകള്‍ സൃഷ്ടിക്കും. അടിസ്ഥാന തപാല്‍ സേവനങ്ങള്‍ക്കായി ആളുകള്‍ക്കു ദൂരെയുള്ള ഓഫീസുകളെ ആശ്രയിക്കേണ്ടി വരും. അടച്ചുപൂട്ടല്‍ നടപടികള്‍ക്കു പകരം ഇത്തരം ഓഫീസുകള്‍ നവീകരിച്ച് ജനങ്ങള്‍ക്ക് കൂടുതല്‍ കാര്യക്ഷമമായ സേവനങ്ങള്‍ നല്‍കുന്ന രീതിയില്‍ ശക്തിപ്പെടുത്തണം. കൊടിക്കുന്നില്‍ സുരേഷ് എംപി മാവേലിക്കര പാര്‍ലമെന്‍റ് നിയോജകമണ്ഡലം

വലിയകുളം ബ്ലാക്ക്‌സ്‌പോട്ട് ജംഗ്ഷനില്‍ ഇനിയെങ്കിലും വേണ്ടേ സുരക്ഷ?

ചങ്ങനാശേരി: നാറ്റ്പാക് അപകടമേഖലയായി പ്രഖ്യാപിച്ചിരിക്കുന്ന ചങ്ങനാശേരി-വാഴൂര്‍ റോഡിലെ വലിയകുളം ജംഗ്ഷനില്‍ സുരക്ഷാ ക്രമീകരണങ്ങള്‍ വൈകരുതെന്ന അഭിപ്രായം ഉയരുന്നു. ചീരഞ്ചിറ, പുതുച്ചിറ റോഡുകള്‍ വാഴൂര്‍ റോഡില്‍ സംഗമിക്കുന്ന ജംഗ്ഷനാണിത്. കുരിശുംമൂട്, തെങ്ങണ ഭാഗങ്ങളില്‍നിന്നും അതിവേഗതയില്‍ വാഹനങ്ങളെത്തുമ്പോള്‍ ചീരഞ്ചിറ റോഡില്‍നിന്നും ജംഗ്ഷനിലേക്കു പ്രവേശിക്കുന്ന വാഹനങ്ങള്‍ അപകടത്തില്‍പ്പെടുന്നത് പതിവാണ്. ചീരഞ്ചിറ റോഡില്‍നിന്നു വരുന്ന വാഹനങ്ങളുടെ കാഴ്ചമറയ്ക്കുന്ന തരത്തിലാണ് ജംഗ്ഷനിലെ തടിമില്ല് സ്ഥിതി ചെയ്യുന്നത്. ഈ റോഡില്‍നിന്നു തെങ്ങണ, കുരിശുംമൂട് ഭാഗങ്ങളിലേക്കു തിരിയുമ്പോള്‍ വാഴൂര്‍ റോഡിലൂടെ വേഗത്തില്‍ എത്തുന്ന വാഹനങ്ങളുമായി കൂട്ടിയിടിക്കുന്നതും പതിവാണ്. ഈ ജംഗ്ഷനില്‍ വിവിധ അപകടങ്ങളിലായി ഒരു ഡസനോളം ആളുകള്‍ മരണപ്പെടുകയും പരിക്കേറ്റ ഏതാനുംപേര്‍ ചികിത്സയിലുമാണ്. ദിശാബോര്‍ഡുകള്‍ മാഞ്ഞു ജംഗ്ഷനാണെന്ന് അറിയിക്കുന്ന ദിശാബോര്‍ഡുകള്‍ ഇവിടെയില്ല. ചങ്ങനാശേരി -വാഴൂര്‍ റോഡില്‍ ഡിവൈഡര്‍, സീബ്രാ ലൈനുകളും അപ്രത്യക്ഷമാണ്. മടുക്കമൂടിനും വലിയകുളത്തിനുമിടയിലുള്ള നേരിയ വളവും കയറ്റവും അപകടസാധ്യത വര്‍ധിപ്പിക്കുന്നു. അനധികൃത കൈയേറ്റങ്ങളും പാര്‍ക്കിംഗും ഏറെ പ്രശ്‌നങ്ങള്‍ സൃഷ്ടിക്കുന്നു. വലിയകുളം-ചീരഞ്ചിറ-പാറപ്പാട്ടുപടി റോഡ് വികസനസാധ്യതാ പട്ടികയില്‍ വലിയകുളത്തുനിന്നുമാരംഭിച്ച് ചീരഞ്ചിറവഴി തെങ്ങണ-ഏറ്റുമാനൂര്‍ റോഡില്‍ പ്രവേശിക്കുന്ന റോഡും പാത്തിക്കല്‍മുക്ക്-പുതുച്ചിറ-ഏനാചിറ റോഡും വികസന സാധ്യതാപട്ടികയിലുള്ളതാണ്. ഈ റോഡുകളുടെ വികസനം സാധ്യമായാല്‍ കുരിശുംമൂട്, തെങ്ങണ ജംഗ്ഷനുകളിലെ ഗതാഗതക്കുരുക്കും തടസങ്ങളും ഒരു പരിധിവരെ ഒഴിവാക്കാനാകുമെന്നാണ് വിദഗ്ധര്‍ ചൂണ്ടിക്കാട്ടുന്നത്. ഈ റോഡുകളുടെ വികസനത്തിന് വലിയകുളം ജംഗ്ഷന്‍റെ വളര്‍ച്ച അനിവാര്യമാണ്. വലിയകുളം ജംഗ്ഷനടുത്തുള്ള സ്വകാര്യഫ്‌ളാറ്റും ചീരഞ്ചിറ ബാങ്കിനു സമീപത്ത് ആരംഭിക്കുന്ന സ്വകാര്യ ഗോഡൗണും പ്രവര്‍ത്തനക്ഷമമാകുമ്പോള്‍ വലിയകുളത്തെ തിരക്ക് വര്‍ധിക്കാനിടയുണ്ട്. ഈ സാഹചര്യങ്ങള്‍ മുന്‍കൂട്ടി കണ്ട് നടപടികള്‍ സ്വീകരിക്കാന്‍ വാഴപ്പള്ളി പഞ്ചായത്ത്, പൊതുമരാമത്തുവകുപ്പ്, ജനപ്രതിനിധികള്‍ തുടങ്ങിയവര്‍ കൂട്ടായ ആലോചനകള്‍ നടത്തണമെന്ന നിര്‍ദേശവും ഉയര്‍ന്നിട്ടുണ്ട്.

അയ്യന്‍കാളി ജന്മദിനം ആഘോഷിച്ചു

കോട്ടയം: അഖില കേരള ചേരമര്‍ ഹിന്ദു മഹാസഭ സംസ്ഥാന കമ്മിറ്റിയുടെ നേതൃത്വത്തില്‍ കോട്ടയത്ത് നടത്തിയ അയ്യന്‍കാളിയുടെ 162-ാം ജന്മദിനാഘോഷം തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. സംസ്ഥാനത്ത് കിഫ്ബി ഫണ്ട് വിനിയോഗത്തില്‍ പട്ടികജാതി സമൂഹത്തെ പരിഗണിക്കാത്തത് ഇവരോടു കാണിച്ച വഞ്ചനയാണെന്നും ഈ ഫണ്ട് പട്ടിക വിഭാഗങ്ങളുടെ ഉന്നമനത്തിനായി ഉപയോഗിച്ചിരുന്നെങ്കില്‍ ലൈഫ് അടക്കമുള്ള ഭവന പദ്ധതികളിലുള്ള പരാതികള്‍ക്കു പരിഹാരം കാണാമായിരുന്നുവെന്നും അദ്ദേഹം പറഞ്ഞു. മഹാസഭ പ്രസിഡന്‍റ് എസ്. ബാബു അധ്യക്ഷത വഹിച്ചു. എസ്എസ്എല്‍സി, പ്ലസ്ടു വിദ്യാഭ്യാസ അവാര്‍ഡ് വിതരണം കോട്ടയം മുനിസിപ്പല്‍ ചെയര്‍പേഴ്‌സന്‍ ബിന്‍സി സെബാസ്റ്റ്യന്‍ നിര്‍വഹിച്ചു. സംസ്ഥാന ജനറല്‍ സെക്രട്ടറി സി.കെ. സനില്‍കുമാര്‍, സംസ്ഥാന വൈസ് പ്രസിഡന്‍റ് മുട്ടമ്പലം ശ്രീകുമാര്‍, ഓര്‍ഗനെെസിംഗ് സെക്രട്ടറി എസ്. കൃഷ്ണകുമാര്‍, യൂത്ത് മൂവ്‌മെന്‍റ് ജനറല്‍ സെക്രട്ടറി എസ്. കണ്ണന്‍, മഹിളാസമാജം സംസ്ഥാന പ്രസിഡന്‍റ്, രാധാമണി പൊന്നന്‍, വൈസ് പ്രസിഡന്‍റ് മഞ്‌ജു ചന്ദ്രബാബു, ഖജാന്‍ജി ശോഭന ഗോപി, ജോയിന്‍റ് സെക്രട്ടറി അമ്മിണി സുകുമാരന്‍ തുടങ്ങിയവര്‍ പ്രസംഗിച്ചു.

നാടെങ്ങും ഓണാഘോഷം

കല്ലറ: കേരള സാമൂഹ്യ സുരക്ഷാ മിഷന്‍ വയോമിത്രം പദ്ധതിയുടെയും കല്ലറ സഹൃദയ പകല്‍വീട് വയോജന ക്ലബ്ബിന്‍റെയും നേതൃത്വത്തില്‍ ഓണാഘോഷം നടത്തി. കല്ലറ പഞ്ചായത്ത് പ്രസിഡന്‍റ് ജോണി തോട്ടുങ്കല്‍ ഉദ്ഘാടനം ചെയ്തു. വയോജന ക്ലബ് പ്രസിഡന്‍റ് ടി.ഐ. ദാമോധരന്‍ അധ്യക്ഷത വഹിച്ചു. ഡോ. രാധാമണി, ഡോ.ജോയല്‍, സാമൂഹ്യ സുരക്ഷാ മിഷന്‍ കോ-ഓര്‍ഡിനേറ്റര്‍ ജോജി ജോസഫ്, ഐസിഡിഎസ് സൂപ്പര്‍വൈസര്‍ കെ. ശ്രീജിഷ, അജിത് കുമാര്‍, തോമസ് മണപ്പാടാന്‍ എന്നിവര്‍ പ്രസംഗിച്ചു. കടുത്തുരുത്തി: കാണക്കാരി പഞ്ചായത്ത് എട്ടാം വാര്‍ഡിലെ മൈത്രിനഗര്‍ റസിഡനന്‍റ്സ് വെല്‍ഫെയര്‍ അസോസിയേഷന്‍റെ ഓണാഘോഷവും കുടുംബമേളയും 30ന് കാണക്കാരി ആശുപത്രിപ്പടി ജംഗ്ഷനിലുളള എസ്എന്‍ഡിപി ഓഡിറ്റോറിയത്തില്‍ നടക്കും. രാവിലെ ഒമ്പതു മുതല്‍ കായിക കലാമത്സരങ്ങളും ഉച്ചയ്ക്ക് ഓണസദ്യയും തുടര്‍ന്ന് പൊതുസമ്മേളനവും നടക്കും. അസോസിയേഷന്‍ പ്രസിഡന്‍റ് കാണക്കാരി അരവിന്ദാക്ഷന്‍ അധ്യക്ഷത വഹിക്കും. ആഘോഷപരിപാടികള്‍ മന്ത്രി വി.എന്‍. വാസവന്‍ ഉദ്ഘാടനം ചെയ്യും. സംസ്ഥാന മന്ത്രിസഭയിലെ ഏറ്റവും നല്ല ജനകീയ മന്ത്രിക്കുളള അസോസിയേഷന്‍റെ പുരസ്‌കാരം മന്ത്രി വി.എന്‍. വാസവന് യോഗത്തില്‍ സമ്മാനിക്കും. മോന്‍സ് ജോസഫ് എംഎല്‍എയ്ക്കും പുരസ്‌കാരം സമ്മാനിക്കും. ലഹരിക്കെതിരേ ഓട്ടന്‍തുളളല്‍ നടത്തുന്ന എക്സൈസ് ഇന്‍സ്പെക്ടര്‍ വി. ജയരാജിനെയും വിദ്യാഭ്യാസ രംഗത്തെ ഉന്നതവിജയം നേടിയ കുട്ടികളെയും മന്ത്രി പുരസ്‌കാരം നല്‍കി ആദരിക്കും. പഞ്ചായത്ത് പ്രസിഡന്‍റ് അംബിക സുകുമാരന്‍ കലാകായിക മത്സരവിജയികള്‍ക്ക് സമ്മാനം നല്‍കും. എക്സൈസ് ഇന്‍സ്പെക്ടര്‍ ജയരാജിന്‍റെ ഓട്ടന്‍തുളളല്‍, സിം ദക്ഷിണകലാസമിതിയുടെ കൈകൊട്ടിക്കളി, പ്രഫ. സാം രാജിന്‍റെ മാജിക് ഷോ, ധ്വനി മ്യൂസിക്കിന്‍റെ ഗാനമേള തുടങ്ങിയ പരിപാടികളും നടക്കും.

തലയോലപ്പറമ്പിൽ കാർഷിക ഗ്രാമോത്സവം നാളെ

തലയോലപ്പറമ്പ്: തലയോലപ്പറമ്പ് സെന്‍റ് ജോര്‍ജ് പള്ളി ഫാമിലി യൂണിറ്റിന്‍റെ നേതൃത്വത്തില്‍ സഹൃദയ വെല്‍ഫെയര്‍ സര്‍വീസസ് എറണാകുളത്തിന്‍റെയും തലയോലപ്പറമ്പ് പൗരാവലിയുടെയും സഹകരണത്തോടെ നടത്തുന്ന സമൃദ്ധി -2025 കാര്‍ഷിക ഗ്രാമോത്സവം നാളെ രാവിലെ എട്ടിന് ആരംഭിക്കും. കാര്‍ഷിക വിപണന പ്രദര്‍ശന വേദികള്‍, വിഷയാധിഷ്ഠിത, കലാ, സാംസ്‌കാരിക സംഗമം, ബിരിയാണി ചലഞ്ച്,ഭക്ഷണ, പാനീയ കൗണ്ടറുകള്‍ എന്നിവ മേളയുടെ ഭാഗമായുണ്ടാകും.11.30ന് ഗ്രാമോത്സവം മന്ത്രി വി.എന്‍.വാസവന്‍ ഉദ്ഘാടനംചെയ്യും. ചെയര്‍മാന്‍ റവ.ഡോ. ബെന്നി മാരാപറമ്പിലിന്‍റെ അധ്യക്ഷതയില്‍ ചേരുന്ന യോഗത്തില്‍ ഫാ. ജോസ് കൊളുത്തുവള്ളില്‍ ആമുഖ പ്രസംഗം നടത്തും. സി.കെ. ആശ എംഎല്‍എ മുഖ്യാതിഥിയായിരിക്കും.തലയോലപ്പറമ്പ് പഞ്ചായത്ത് പ്രസിഡന്റ് ഷിജി വിന്‍സെന്‍റ്, കൈക്കാരന്‍ തങ്കച്ചന്‍ കളമ്പുകാട്,ജനറല്‍ കണ്‍വീനര്‍ ഇമ്മാനുവേല്‍ അരയത്തേല്‍, ഷേര്‍ളി ജോസ് വേലിക്കകത്ത് എന്നിവര്‍ പ്രസംഗിക്കും. തുടര്‍ന്ന് വിവിധ വിഷയങ്ങളില്‍ സെമിനാര്‍ നടക്കും. വൈകുനേരം 6.30ന് ചലച്ചിത്രനടന്‍ ജയന്‍ ചേര്‍ത്തല കലാസന്ധ്യ ഉദ്ഘാടനം ചെയ്യും.സിസ്റ്റര്‍ മെര്‍ലിന്‍ ഫ്രാന്‍സിസ് അധ്യക്ഷത വഹിക്കും.സുഭാഷ് പുഞ്ചക്കോട്ടില്‍, ജെറിന്‍ പാറയില്‍ എന്നിവര്‍ പ്രസംഗിക്കും. 31ന് രാവിലെ 9.30ന്ഫാ.ജോസ് കൊളുത്തുവള്ളിലിന്‍റെ അധ്യക്ഷതയില്‍ ചേരുന്ന യോഗത്തില്‍ ബിഷപ് മാര്‍ തോമസ് ചക്യത്ത് മികച്ച കര്‍ഷകരെ ആദരിക്കും. റിന്‍സണ്‍ പന്നിക്കോട്ടില്‍, ആന്‍റണി കളമ്പുകാടന്‍ എന്നിവര്‍ പ്രസംഗിക്കും.11ന് ഹരിത കര്‍മസേന അംഗങ്ങളെ ഡോ.ജോസ് പുഞ്ചക്കോട്ടില്‍ ആദരിക്കും. വൈകുന്നേരം ആറിന് സഹവികാരി ഫാ. ആല്‍ജോ കളപ്പുരയ്ക്കലിന്‍റെ അധ്യക്ഷതയില്‍ ചേരുന്ന സമാപന സമ്മേളനത്തില്‍ കെ. ഫ്രാന്‍സിസ് ജോര്‍ജ് എംപി ആരോഗ്യപ്രവര്‍ത്തകരെ ആദരിക്കും. വികാരി റവ. ഡോ.ബെന്നി ജോണ്‍ മാരാംപറമ്പില്‍, ഫാ.ജോസ് കൊളുത്തുവള്ളില്‍,സഹവികാരി ഫാ. ആല്‍ജോ കളപ്പുരയ്ക്കല്‍, ഇമ്മാനുവേല്‍ അരയത്തേല്‍, കൈക്കാരന്‍മാരായ റിന്‍സന്‍പന്നിക്കോട്ടില്‍, തങ്കച്ചന്‍ കളമ്പുകാട് എന്നിവര്‍ നേതൃത്വം നല്‍കും.

കെവി കനാൽ ശുചീകരണം തുടങ്ങി

വൈക്കം: ചെളിയും മാലിന്യങ്ങളും പോളയും അടിഞ്ഞ് നീരൊഴുക്ക് തടസപ്പെട്ട കെവി കനാൽ ശുചീകരിച്ച് നീരൊഴുക്ക് സുഗമമാക്കി. കനത്ത തോതിൽ ചെളി അടിഞ്ഞും മരങ്ങൾ കടപുഴകിവീണും കനാലിലെ നീരൊഴുക്ക് തടസപ്പെട്ട നിലയിലായിരുന്നു.മാലിന്യങ്ങൾ അടിഞ്ഞ് തോട്ടുവക്കം പാലത്തിനടിയിലൂടെ വെള്ളം ഒഴുകിപ്പോകാത്ത സ്ഥിതിയിലായിരുന്നത് ദീപികയടക്കമുള്ള മാധ്യമങ്ങൾ റിപ്പോർട്ട് ചെയ്തിരുന്നു. വിവിധ കർഷക സംഘടനകളും രാഷ്‌ട്രീയ പാർട്ടികളും കെവി കനാലിലെ മാലിന്യം നീക്കി നീരൊഴുക്കു ശക്തമാക്കണമെന്നാവശ്യപ്പെട്ട് സമരങ്ങൾ സംഘടിപ്പിച്ചിരുന്നു. തലയോലപ്പറമ്പ്, കല്ലറ, ഉദയനാപുരം പഞ്ചായത്തിലെ കർഷകർക്ക് ശുദ്ധജല ലഭ്യത ഉറപ്പാക്കാനും ഉൾപ്രദേശത്തെ ജനങ്ങളുടെ വെള്ളപ്പൊക്ക കെടുതികളുടെ രൂക്ഷത കുറക്കാനും കെവി കനാൽ ആഴംകൂട്ടി ശുചീകരിച്ചതുമൂലംകഴിയും.

മു‌ട്ടുചിറ, കടുത്തുരുത്തി പള്ളികളിൽ എട്ടുനോമ്പ് തിരുനാള്‍

മുട്ടുചിറ: റൂഹാദ്കുദിശാ ഫൊറോനാ പള്ളിയില്‍ പരിശുദ്ധ ദൈവമാതാവിന്‍റെ ജനനത്തിരുനാളിനൊരുക്കമായുള്ള എട്ടുനോമ്പ് സെപ്റ്റംബർ ഒന്നിന് ആരംഭിക്കും. നോമ്പ് ദിനങ്ങളില്‍ വിശുദ്ധ കുര്‍ബാനയ്‌ക്കൊപ്പം ദൈവമാതാവിന്‍റെ നൊവേനയും ഉണ്ടായിരിക്കും. ‍ ദിവസവും വൈകുന്നേരം അഞ്ചിന് റംശ, 5.30ന് നൊവേന, തുടര്‍ന്ന് വിശുദ്ധ കുര്‍ബാന, ജപമാല പ്രദക്ഷിണം എന്നീ തിരുക്കർമ ങ്ങൾ നടക്കും. എല്ലാ ദിവസവും വൈകുന്നേരം നാലു മുതലും എട്ടിന് തിരുനാള്‍ ദിനം മുഴുവനും പരിശുദ്ധ അമ്മയുടെ മുടി എഴുന്നള്ളിക്കുന്നതിന് സൗകര്യം ഉണ്ടായിരിക്കും. ഒന്നിന് രോഗീദിനമായും മൂന്നിന് ആരാധനാ ദിനമായും നാലിന് അഖണ്ഡ ജപമാല പ്രാര്‍ഥനാ ദിനമായും അഞ്ചിന് ബൈബിള്‍ പാരായണ ദിനമായും ആചരിക്കും. മാതാവ് പ്രത്യക്ഷപ്പെട്ട കുറവിലങ്ങാട് മുത്തിയമ്മയുടെ സവിധത്തിലേക്ക് പരിശുദ്ധ ദൈവമാതാവിന്‍റെ പിറവിത്തിരുനാളിന് ഒരുക്കമായി മുട്ടുചിറ ഫൊറോനയുടെ മുത്തിയമ്മ തീര്‍ഥാടനം നടത്തും. രണ്ടിനു രാവിലെ 10.30ന് വിവിധ ഇടവകകളില്‍ നിന്നുള്ള തീര്‍ഥാടകര്‍ പനങ്കുഴയ്ക്കല്‍ സ്മാരക പാര്‍ക്കില്‍ സംഗമിക്കും. തുടര്‍ന്ന് ജപമാല ചൊല്ലി പദയാത്രയായി മുത്തിയമ്മയുടെ സവിധത്തിലെത്തി 11 മണിക്ക് ദിവ്യബലി അര്‍പ്പിക്കും. മാതൃവേദി മുട്ടുചിറ ഫൊറോനയുടെ ആഭിമുഖ്യത്തില്‍ മുട്ടുചിറ ഫൊറോന വിധവാസംഗമം മൂന്നിനു രാവിലെ 9.30ന് ആരംഭിച്ച് 12.30ന് സമാപിക്കും. പ്രധാന തിരുനാള്‍ ദിനമായ എട്ടിന് വൈകുന്നേരം 4.30ന് ഇടവകയിലെ മേരീ നാമധാരികളുടെ സംഗമം നടക്കും. വികാരി ജനറാള്‍ മോണ്‍ ജോസഫ് കണിയോടിക്കല്‍ വിശുദ്ധ കുര്‍ബാനയര്‍പ്പിച്ചു സന്ദേശം നല്‍കും. തുടര്‍ന്ന് ജപമാല പ്രദക്ഷിണം, ലദീഞ്ഞ്. കടുത്തുരുത്തി: കടുത്തുരുത്തി വലിയപള്ളിയില്‍ പരിശുദ്ധ കന്യകമറിയത്തിന്‍റെ പിറവിത്തിരുനാളും എട്ടുനോമ്പാചരണവും പള്ളിയുടെ കല്ലിട്ട തിരുനാളും സെപ്റ്റംബര്‍ ഒന്നു മുതല്‍ എട്ടു വരെ ആചരിക്കും. ഒന്നിനു രാവിലെ ആറിന് ജപമാല. തുടര്‍ന്ന് വികാരി ഫാ. ജോണ്‍സണ്‍ നീലനിരപ്പേല്‍ കൊടിയേറ്റും. 6.30ന് വിശുദ്ധ കുര്‍ബാന. രണ്ടിനു രാവിലെ ആറിന് ജപമാല, തുടര്‍ന്ന് വിശുദ്ധ കുര്‍ബാന, സന്ദേശം - ഫാ.ജോണി നടുത്തടം. മൂന്നിനു രാവിലെ ആറിന് ജപമാല, 6.30 ന് വിശുദ്ധ കുര്‍ബാന, സന്ദേശം - ഫാ. ജസ്റ്റിന്‍ പെരിയപ്പുറം. നാലിനു രാവിലെ ആറിന് ജപമാല തുടര്‍ന്ന് വിശുദ്ധ കുര്‍ബാന, സന്ദേശം - ഫാ. ബാബു പാറത്തോട്ടുംകരയില്‍. അഞ്ചിനു രാവിലെ 5.45ന് ജപമാല, കുമ്പസാരം, 6.15ന് വിശുദ്ധ കുര്‍ബാന, സന്ദേശം - ഫാ. സ്റ്റാന്‍ലി മങ്ങാട്ട്, 7.15 നും, വൈകുന്നേരം അഞ്ചിനും വിശുദ്ധ കുര്‍ബാന ഉണ്ടായിരിക്കും. ആറിനു രാവിലെ ആറിന് ജപമാല, വിശുദ്ധ കുര്‍ബാന, സന്ദേശം - ഫാ. ബിനോ ചേരിയില്‍. ഏഴിന് രാവിലെ 6.30 ന് ജപമാല, വിശുദ്ധ കുര്‍ബാന - ഫാ. ബൈജു മുകളേല്‍, 9.30ന് വിശുദ്ധ കുര്‍ബാന. എട്ടിന് പരിശുദ്ധ കന്യകമറിയത്തിന്‍റെ ജനനത്തിരുനാളും ദേവാലയത്തിന്‍റെ കല്ലിട്ട തിരുനാളും ആഘോഷിക്കും. രാവിലെ ആറിന് ജപമാല, തിരുനാള്‍ പാട്ടുകുര്‍ബാന, സന്ദേശം - ഫാ. ബോബി കൊച്ചുപറമ്പില്‍. തുടര്‍ന്ന് പ്രദക്ഷിണം സമാപനാശീര്‍വാദം.

അപകടത്തിലായ അരയാലിന് അന്ത്യം

കുറുപ്പന്തറ: മാഞ്ഞൂര്‍ ഗവണ്‍മെന്‍റ് എല്‍പി സ്‌കൂളിന് മുന്നില്‍ റോഡിനോട് ചേര്‍ന്നുള്ള നടപ്പാതയില്‍ അടിഭാഗം ദ്രവിച്ച് അപകടാവസ്ഥയിലായിരുന്ന അരയാല്‍ വെട്ടിനീക്കാൻ തുടങ്ങി. മരം അപകട ഭീഷണിയുയര്‍ത്തുന്നതായി കഴിഞ്ഞ ദിവസം ദീപിക റിപ്പോര്‍ട്ട് ചെയ്തിരുന്നു. അവധിദിവസമായ ഇന്നലെ രാവിലെ മുതല്‍ പോലീസിന്‍റെ സഹായത്തോടെ ഗതാഗതം നിയന്ത്രിച്ചാണ് മരം വെട്ടൽ ആരംഭിച്ചത്. തിരക്കേറിയ ഏറ്റുമാനൂര്‍-വൈക്കം റോഡിന്‍റെ ഓരത്ത് നില്‍ക്കുന്ന മരമായതിനാല്‍ ഗതാഗതം നിയന്ത്രിച്ചാണ് മരം വെട്ടുന്നത്. കമ്പുകള്‍ വെട്ടി വടത്തില്‍ കെട്ടിയാണ് താഴെയിറക്കുന്നത്. ഇന്നലെ കനത്ത മഴയായതിനാല്‍ പണികള്‍ ഉദ്ദേശിച്ച വേഗത്തില്‍ നടന്നില്ല. എങ്കിലും മരത്തിന്‍റെ വലിയ ശിഖരങ്ങള്‍ പലതും വെട്ടിയിറക്കാനായി. പിഡബ്ല്യുഡിയുടെ നേതൃത്വത്തിലാണ് മരം വെട്ടിനീക്കുന്നത്. സ്‌കൂളിനു മുന്നിലെ മരം അപകടാവസ്ഥയിലാണെന്നും മരം വെട്ടി നീക്കണമെന്നും ആവശ്യപെട്ട് പ്രധാനാധ്യാപിക പഞ്ചായത്തിന് അപേക്ഷ നല്‍കിയിരുന്നു. പഞ്ചായത്ത് അപേക്ഷ പിഡബ്യൂഡിക്ക് കൈമാറി. പിഡബ്ല്യുഡി അപേക്ഷ ജില്ലാ പഞ്ചായത്തിന്‍റെ ട്രീ കമ്മിറ്റിക്ക് കൈമാറുകയും അടിയന്തര സ്വഭാവമുള്ളതിനാല്‍ ട്രീ കമ്മിറ്റി മരം വെട്ടി നീക്കാന്‍ അനുമതി നല്‍കുകയുമായിരുന്നു. മരത്തിന്‍റെ അടിഭാഗത്ത് ആഴത്തിലുള്ള വിടവുണ്ടായിരുന്ന അവസ്ഥയിലായിരുന്നു. പാമ്പുകളടക്കമുള്ള ഇഴജന്തുക്കള്‍ മരത്തിനു ചുവട്ടിലുള്ള ഈ വിടവ് താവളമാക്കിയിരുന്നു. പുറമേയുള്ള വേരിലാണ് മരം നിന്നിരുന്നത്. സ്‌കൂള്‍ കുട്ടികളും കാല്‍നടയാത്രക്കാരും ഉള്‍പ്പെടെ മരത്തിനു ചുവട്ടിലൂടെയാണ് സഞ്ചരിച്ചിരുന്നത്. മരം മറിഞ്ഞാല്‍ സ്‌കൂള്‍ കെട്ടിടത്തിന് മുകളിലേക്കോ കോട്ടയം-എറണാകുളം സംസ്ഥാന പാതയിലേക്കോ വീഴു ന്ന സ്ഥിതിയായിരുന്നു. റോഡരികില്‍ നില്‍ക്കുന്ന ഈ മരം കൂടാതെ സ്‌കൂള്‍ കോമ്പൗണ്ടിലും അപകടാവസ്ഥയില്‍ ഒരു പാഴ്മരം സ്ഥിതി ചെയ്യുന്നുണ്ട്. ഇതും ഈ അവധിക്കാലത്തുതന്നെ വെട്ടിനീക്കുമെന്ന് പഞ്ചായത്ത് വൈസ്പ്രസിഡന്‍റ് ബിജു കൊണ്ടുകാലാ അറിയിച്ചു.

ആറ്റില്‍ ചാടിയ യുവതിയെ രക്ഷപ്പെടുത്തി

കോട്ടയം: കോടിമത പാലത്തില്‍നിന്നു യുവതി ആറ്റില്‍ ചാടി. ഇന്നലെ വൈകുന്നേരം 5.30 നായിരുന്നു സംഭവം. യുവതിയെ പോലീസും നാട്ടുകാരും ചേര്‍ന്നു രക്ഷപ്പെടുത്തി. പരിക്കേറ്റ ഇവരെ ജില്ലാ ജനറല്‍ ആശുപത്രിയില്‍ പ്രവേശിപ്പിച്ചു. കോടിമത പാലത്തില്‍നിന്ന് യുവതി ആറ്റിലേക്ക് ചാടുന്നതു കണ്ട നാട്ടുകാരിലൊരാള്‍ ഒപ്പം ചാടിയാണ് യുവതിയെ രക്ഷപ്പെ ടുത്തിയത്. വെസ്റ്റ് പോലീസ് സ്ഥലത്തെത്തി.

കളഞ്ഞുകിട്ടിയ പഴ്സ് തിരികെക്കൊടുത്ത് ഇതരസംസ്ഥാന തൊഴിലാളി

പാമ്പാടി: കളഞ്ഞുകിട്ടിയ പണമടങ്ങിയ പഴ്‌സ് ഉടമയ്ക്കു തിരികെക്കൊടുത്ത് ബംഗാള്‍ സ്വദേശിയായ അജിത് ഒറാവു മാതൃകയായി. കഴിഞ്ഞദിവസം പൊന്‍കുന്നം-കോട്ടയം റൂട്ടില്‍ സർവീസ് നടത്തുന്ന ബസിലാണ് അരീപ്പറമ്പ് സ്വദേശി കെ.എന്‍. സോമന്‍റെ പഴ്‌സ് നഷ്ടപ്പെട്ടത്. തുടര്‍ന്ന് സോമന്‍ പാമ്പാടി പോലീസില്‍ പരാതിപ്പെട്ടിരുന്നു. പഴ്‌സ് ബംഗാള്‍ സ്വദേശിയായ അജിത്തിനാണ് ലഭിച്ചത്. തുടര്‍ന്ന് പഴ്‌സില്‍നിന്ന് ലഭിച്ച ഫോണ്‍ നമ്പര്‍ ഉപയോഗിച്ചു മലയാളം വശമില്ലാത്ത അജിത് സോമനെ വിളിച്ച് ബംഗാളി ഭാഷയില്‍ വിവരമറിയിച്ചു. ഭാഷ വശമില്ലാത്ത സോമന്‍ ഉടന്‍തന്നെ പാമ്പാടി സ്റ്റേഷന്‍ എസ്‌ഐ ഉദയകുമാറിനു തന്നെ വിളിച്ച ബംഗാള്‍ സ്വദേശിയുടെ നമ്പര്‍ കൈമാറി. തുടര്‍ന്ന് സ്റ്റേഷനിൽനിന്ന് അജിത്തുമായി ബന്ധപ്പെട്ട് കൂടുതല്‍ വിവരങ്ങള്‍ മനസിലാക്കുകയായിരുന്നു. തുടര്‍ന്ന് ഇന്നലെ രാവിലെ ബംഗാള്‍ സ്വദേശിയുടെ കോണ്‍ട്രാക്‌ടര്‍ പഴ്‌സുമായി സ്റ്റേഷനിലെത്തി പണവും വിലപ്പെട്ട രേഖകളുമടങ്ങിയ പഴ്‌സ് സോമന് കൈമാറുകയായിരുന്നു.

മലരിക്കല്‍ അദ്ഭുതപ്പെടുത്തുന്ന വിജയം: സി.ടി. അരവിന്ദ് കുമാര്‍

കോട്ടയം: മലരിക്കല്‍ അദ്ഭുതപ്പെടുത്തുന്ന വിജയം, കേരളമാകെ ഏറ്റെടുക്കണമെന്നു എംജി യൂണിവേഴ്‌സിറ്റി വൈസ് ചാന്‍സലര്‍ സി.ടി. അരവിന്ദ് കുമാര്‍. മീനച്ചിലാര്‍ മീനന്തറയാര്‍ കൊടുരാര്‍ പുനര്‍ സംയോജന പദ്ധതിയുടെ എട്ടാം വാര്‍ഷികാഘോഷം കോട്ടയം അര്‍ബന്‍ ബാങ്ക് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഡോ. ജേക്കബ് ജോര്‍ജ് അധ്യക്ഷത വഹിച്ചു. പദ്ധതി കോ-ഓര്‍ഡിനേറ്റര്‍ കെ അനില്‍കുമാര്‍, നഗരസഭാ പ്രതിപക്ഷ നേതാവ് ഷീജാ അനില്‍, നാസര്‍ ചാത്തന്‍ കോട്ടുമാലിയില്‍, ഗോപു നട്ടാശേരി, ഷാജിമോന്‍ വട്ടപ്പള്ളില്‍, നഗരസഭാ പ്രതിപക്ഷ നേതാവ് ഷീജാ അനില്‍, എബ്രഹാം കുര്യന്‍, ബി. ശശികുമാര്‍ തുടങ്ങിയവര്‍ പ്രസംഗിച്ചു. മലരിക്കല്‍ മോഡല്‍ ഗ്രാമീണ ടൂറിസം കേന്ദ്രങ്ങള്‍ സാധ്യമായ എല്ലാ സ്ഥലങ്ങളിലും ഹരിതകേരളം മിഷന്‍റെ ഭാഗമായി ഉയര്‍ത്തിക്കൊണ്ടു വരുമെന്നും പദ്ധതി കോ-ഓര്‍ഡിനേറ്റര്‍ കെ.അനില്‍കുമാര്‍ അറിയിച്ചു.

മൊബൈല്‍ ഫോണ്‍ മോഷ്ടിച്ച ബംഗാൾ സ്വദേശി അറസ്റ്റിൽ

കോട്ടയം: റെയില്‍വേ സ്റ്റേഷനിൽനിന്ന് യാത്രക്കാരന്‍റെ മൊബൈല്‍ ഫോണ്‍ മോഷ്ടിച്ച കേസില്‍ വെസ്റ്റ് ബംഗാള്‍ സ്വദേശി അറസ്റ്റിലായി. വെസ്റ്റ് ബംഗാള്‍ ഉത്തര്‍ ദീജാപൂര്‍ ജില്ലയില്‍ ബലിജോലെയില്‍ നജീറുല്‍ ഹഖി (31)നെയാണ് കോട്ടയം റെയില്‍വേ പോലീസ് സംഘം പിടികൂടിയത്. ഇക്കഴിഞ്ഞ 23നായിരുന്നു കേസിനാസ്പദമായ സംഭവം. പുലര്‍ച്ചെ നാലോടെ സ്റ്റേഷനിലെ വിശ്രമമുറിയില്‍ വിശ്രമിക്കുകയായിരുന്ന യാത്രക്കാരന്‍റെ മൊബൈല്‍ ഫോണ്‍ മോഷ്ടിച്ച് പ്രതി കടന്നുകളയുകയായിരുന്നു. ഇന്നലെ നാഗമ്പടം റെയില്‍വേ പ്ലാറ്റ്ഫോമിലൂടെ നടക്കുകയായിരുന്ന ഇയാളെ ചോദ്യം ചെയ്തപ്പോഴാണ് മോഷണവിവരം പുറത്തറിയുന്നത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

വ്യാപാരിയെ ഭീഷണിപ്പെടുത്തി പണം തട്ടിയ പ്രതികള്‍ അറസ്റ്റില്‍

കോട്ടയം: ചങ്ങനാശേരി സ്വദേശിയെ തടഞ്ഞുവച്ച് ഭീഷണിപ്പെടുത്തി പണം തട്ടിയ കേസിലെ പ്രതികള്‍ അറസ്റ്റില്‍. ആനിക്കാട് ചെങ്ങളം നായിപ്ലാവ് സാജന്‍ ജോര്‍ജ് (47), കൂരോപ്പട ളാക്കാട്ടൂര്‍ ഉള്ളന്നൂര്‍ അനൂപ് ജി. നായര്‍ (47) എന്നിവരെയാണ് പള്ളിക്കത്തോട് പോലീസ് അറസ്റ്റ് ചെയ്തത്. ഇക്കഴിഞ്ഞ് ജൂണ്‍ 18ന് വൈകുന്നേരം പള്ളിക്കത്തോട് സമോവര്‍ ഗ്രാന്‍ഡ് റെസ്റ്ററന്‍റിലായിരുന്നു സംഭവം. ഇവിടെത്തിയ ചങ്ങനാശേരി സ്വദേശിയായ ബിസിനസുകാരനെ വ്യാപാരസ്ഥാപനങ്ങള്‍ പൂട്ടിക്കുമെന്നും മറ്റും ഭീഷണിപ്പെടുത്തുകയും രണ്ടു കോടി രൂപ ആവശ്യപ്പെടുകയും കൈയില്‍ ഉണ്ടായിരുന്ന ഒരു ലക്ഷം രൂപ തട്ടിയെടുക്കുകയുമായിരുന്നു പ്രതികള്‍. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

നീണ്ടൂർ തൃക്കേൽ സ്റ്റേഡിയം നവീകരണം തുടങ്ങി

ഏറ്റുമാനൂര്‍: കോട്ടയം ജില്ലയില്‍ വിവിധ കായിക പദ്ധതികള്‍ക്കായി 64 കോടി രൂപയുടെ ഭരണാനുമതി ലഭിച്ചിട്ടുണ്ടെന്ന് മന്ത്രി വി.എന്‍. വാസവന്‍. നീണ്ടൂരില്‍ ഒരു പഞ്ചായത്ത് ഒരു കളിക്കളം പദ്ധതിയുടെ ഭാഗമായി തൃക്കേല്‍ സ്റ്റേഡിയത്തിന്‍റെ നിര്‍മാണോദ്ഘാടനം നിര്‍വഹിച്ചു പ്രസംഗിക്കുകയായിരുന്നു മന്ത്രി. ഒരു കോടി രൂപ മുടക്കിയാണ് സ്റ്റേഡിയം നിർമിക്കുന്നത്. സംസ്ഥാന കായിക വകുപ്പിന്‍റെ 50 ലക്ഷം രൂപയും ഏറ്റുമാനൂര്‍ എംഎല്‍എ കൂടിയായ മന്ത്രി വാസവന്‍റെ വികസന ഫണ്ടില്‍നിന്ന് 50 ലക്ഷം രൂപയും ചെലവിട്ടാണ് നിര്‍മാണം. ഒരേക്കറോളം വരുന്ന ഗ്രൗണ്ടില്‍ ഫെന്‍സിങ്, സ്ട്രീറ്റ് ലൈറ്റ്, ഡ്രെയ്‌നേജ് സംവിധാനം, ഓപ്പണ്‍ ജിം എന്നിവയും ഇന്‍ഡോര്‍ സ്‌പോര്‍ട്ട്‌സ് ഫ്‌ളോറിംഗും സജ്ജീകരിക്കും. ഫുട്‌ബോള്‍, ക്രിക്കറ്റ് എന്നീ ഇനങ്ങള്‍ക്കായി ഏകദേശം 90 മീറ്റര്‍ നീളത്തിലും 35 വീതിയിലുമാണ് ഗ്രൗണ്ട് നിര്‍മിക്കുന്നത്. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ് അധ്യക്ഷത വഹിച്ചു. വൈസ് പ്രസിഡന്‍റ് ആലീസ് ജോസഫ്, ജില്ലാ പഞ്ചായത്ത് പൊതുമരാമത്ത് സ്ഥിരംസമിതി അധ്യക്ഷ ഹൈമി ബോബി, എം.കെ. ശശി, പി.ടി. ബാബു, തോമസ് കോട്ടൂര്‍, ഷൈനി ഷാജി എന്നിവര്‍ പ്രസംഗിച്ചു.

നാടെങ്ങും ഓണാഘോഷം

മാലം: തണല്‍ റെസിഡന്‍റ്സ് അസോസിയേഷന്‍റെ രണ്ടാം ഓണാഘോഷം 30ന് കുന്നത്തുമാലിയില്‍ എലിസബത്ത് ഇട്ടിയുടെ പുരയിടത്തില്‍ ഉച്ചകഴിഞ്ഞു മൂന്നു മുതല്‍ അസോസിയേഷന്‍ പ്രസിഡന്‍റ് ടി.വി. നാരായണ ശര്‍മയുടെ അധ്യക്ഷതയില്‍ നടക്കും. പഞ്ചായത്ത് പ്രസിഡന്‍റ് കെ.സി. ബിജു ഉദ്ഘാടനം ചെയ്യും. സംസ്ഥാന വെയ്റ്റ് ലിഫ്റ്റിംഗ് ചാന്പ്യന്‍ഷിപ്പിലെ ഗോള്‍ഡ് മെഡല്‍ ജേതാവ് റവ.ജെ. മാത്യു കോര്‍എപ്പിസ്‌കോപ്പ മണവത്ത്, ദേശീയ ത്രോബോള്‍ ചാന്പ്യന്‍ഷിപ്പില്‍ കേരള ടീമിനെ നയിച്ച അമല്‍ രതീഷ് വലിയവീട്ടില്‍ തുടങ്ങിയവരെ അനുമോദിക്കും. എസ്എന്‍ പുരം: സിജെഎം പബ്ലിക് ലൈബ്രറി ആന്‍ഡ് ആര്‍ട്‌സ് ക്ലബിന്‍റെ ഓണാഘോഷം ആറിന് ലൈബ്രറിയില്‍ നടക്കും. രാവിലെ 8.30 മുതല്‍ വിവിധ മത്സരങ്ങള്‍ നടത്തും. വൈകുന്നേരം 5.30ന് ലൈബ്രറി പ്രസിഡന്‍റ് ശ്രീകുമാര്‍ ഗോകുലം അധ്യക്ഷത വഹിക്കും. ചാണ്ടി ഉമ്മന്‍ എംഎല്‍എ പൊതുസമ്മേളനം ഉദ്ഘാടനം ചെയ്യും. ജില്ലാ പഞ്ചായത്ത് വൈസ്പ്രസിഡന്‍റ് ടി.എന്‍. ഗിരീഷ് കുമാര്‍ വിദ്യാഭ്യാസ അവാര്‍ഡുകളുടെ വിതരണോദ്ഘാടനവും പൊന്നോണ സമ്പാദ്യപദ്ധതിയുടെ ഉദ്ഘാടനം ബ്ലോക്ക് പഞ്ചായത്തംഗം ജിജി അഞ്ചാനിയും നിര്‍വഹിക്കും. പഞ്ചായത്ത് പ്രസിഡന്‍റ് അമ്പിളി മാത്യു മുതിര്‍ന്ന അംഗങ്ങളെ ആദരിക്കും.

മണര്‍കാട് പള്ളി പെരുന്നാളിന് വിപുലമായ ക്രമീകരണങ്ങൾ

മണര്‍കാട്: സെന്‍റ് മേരീസ് യാക്കോബായ സുറിയാനി കത്തീഡ്രലില്‍ വിശുദ്ധ ദൈവമാതാവിന്‍റെ ജനനപ്പെരുന്നാളിനോട് അനുബന്ധിച്ചുള്ള എട്ടുനോമ്പ് പെരുന്നാളിന്‍റെ ക്രമീകരണങ്ങള്‍ പൂര്‍ത്തിയായി. വ്രതശുദ്ധിയോടെ എട്ടുനോമ്പ് ആചരിച്ച് പെരുന്നാളില്‍ പങ്കെടുക്കാന്‍ ആയിരങ്ങളാണ് ഒഴുകിയെത്തുക. ഏകദേശം 60 ലക്ഷം വിശ്വാസികള്‍ പെരുന്നാള്‍ ദിനങ്ങളില്‍ മണർകാട് പള്ളിയിൽ എത്തിച്ചേരുമെന്ന് പ്രതീക്ഷിക്കുന്നത്. സര്‍ക്കാര്‍ വകുപ്പുകളുടെ ഏകോപനത്തോടെ വിപുലമായ ക്രമീകരണങ്ങളാണ് പെരുന്നാളിനായി ഒരുക്കിയിരിക്കുന്നത്. പള്ളിയിലേക്കുള്ള റോഡുകളുടെ അറ്റകുറ്റപ്പണികള്‍ ത്വരിതഗതിയില്‍ നടന്നുകൊണ്ടിരിക്കുന്നു. ഭക്തജനങ്ങളുടെ സൗകര്യാര്‍ഥം പെരുന്നാളിനോടനുബന്ധിച്ച് പള്ളി പരിസരത്ത് പോലീസ്, എക്സൈസ്, ഫയര്‍ഫോഴ്സ്, റവന്യു, ഹെല്‍ത്ത് ഡിപ്പാര്‍ട്ട്മെന്‍റുകള്‍ക്കായി വിവിധ കൗണ്ടറുകള്‍ പ്രവര്‍ത്തിക്കുന്നതിനുള്ള ക്രമീകരണങ്ങള്‍ ചെയ്തു. പെരുന്നാളിനോടനുബന്ധിച്ച് പള്ളിയുടെ വടക്കുവശത്തെ മൈതാനത്ത് താത്കാലിക ബസ് സ്റ്റാന്‍ഡ് പ്രവര്‍ത്തിക്കും. സംസ്ഥാനത്തിന്‍റെ വിവിധ ഭാഗങ്ങളില്‍നിന്നു കെഎസ്ആര്‍ടിസി പ്രത്യേക സര്‍വീസ് നടത്തും. സുരക്ഷ, ഗതാഗത നിയന്ത്രണം പെരുന്നാള്‍ ദിനങ്ങളില്‍ പ്രത്യേക സുരക്ഷയ്ക്കായി പള്ളിയിലും പരിസരങ്ങളിലും നിലവിലുള്ള സിസിടിവി കാമറകള്‍ക്കു പുറമേ കൂടുതല്‍ കാമറകള്‍ സ്ഥാപിച്ചു പോലീസ് നിരീക്ഷണം ശക്തമാക്കും. വാഹന ഗതാഗതം നിയന്ത്രിക്കുന്നതിനുള്ള ക്രമീകരണങ്ങള്‍ പോലീസ് ഉദ്യോഗസ്ഥരുടെ നേതൃത്വത്തില്‍ തയാറാക്കി. സെപ്റ്റംബര്‍ ആറ്, ഏഴ്, എട്ട് തീയതികളില്‍ വണ്‍വേ സംവിധാനം നടപ്പിലാക്കുന്നതിനുള്ള നടപടികള്‍ ക്രമീകരിച്ചു. പെരുന്നാള്‍ ദിനങ്ങളില്‍ പള്ളിയില്‍ എത്തിച്ചേരുന്ന ഭക്തജനങ്ങള്‍ക്ക് വിപുലമായ പാര്‍ക്കിംഗ് സൗകര്യമാണ് ഒരുക്കിയിരിക്കുന്നത്. തെക്കുവശത്തും വടക്കുവശത്തുമുള്ള മൈതാനങ്ങളിലും സെന്‍റ് മേരീസ് കോളജ് ഗ്രൗണ്ട്, സെന്‍റ് മേരീസ് ഐടിഐ ഗ്രൗണ്ട് എന്നിവിടങ്ങളിലും പാര്‍ക്കിംഗ് സൗകര്യം സജ്ജീകരിച്ചിട്ടുണ്ട്. ചടങ്ങുകൾ തത്സമയം കത്തീഡ്രലിന്‍റെ ഔദ്യോഗിക ഫേസ്ബുക്ക് പേജിലും യൂട്യൂബ് ചാനലിലും വെബ്സൈറ്റിലും പെരുന്നാളിന്‍റെ പ്രധാന ചടങ്ങുകള്‍ തത്സമയം സംപ്രേക്ഷണം ചെയ്യും. എട്ടുനോമ്പ് പെരുന്നാളിന്‍റെ പ്രധാന ചടങ്ങുകള്‍ എസിവി, ഗ്രീന്‍ ചാനല്‍ മണര്‍കാട് എന്നീ ടെലിവിഷന്‍ ചാനലുകളിലും ലഭ്യമാണ്. നേര്‍ച്ച-വഴിപാടുകള്‍, പെരുന്നാള്‍ ഓഹരി എന്നിവയ്ക്ക് ഓണ്‍ലൈനിലൂടെ പണം അടയ്ക്കാം. വിശ്വാസികളുടെ പ്രാര്‍ഥനാ ആവശ്യങ്ങള്‍ കത്തീഡ്രലിന്‍റെ ഇ-മെയില്‍ വിലാസത്തിലോ വാട്സ്ആപ്പ് നമ്പറിലേക്കോ അയയ്ക്കാം. പെരുന്നാളിന് എത്തിച്ചേരുന്ന ഭക്തജനങ്ങള്‍ക്കു ശുചിത്വവും മെച്ചപ്പെട്ടതുമായ ഭക്ഷണ പദാര്‍ഥങ്ങള്‍ മിതമായ നിരക്കില്‍ ലഭ്യമാക്കാന്‍ പള്ളിവക താത്കാലിക കാന്‍റീന്‍ പ്രവര്‍ത്തിക്കും. എല്ലാ ഭക്തജനങ്ങള്‍ക്കും സെപ്റ്റംബര്‍ ഒന്നു മുതല്‍ ഏഴു വരെ വടക്കുവശത്തെ പാരീഷ് ഹാളില്‍ സൗജന്യ നേര്‍ച്ചക്കഞ്ഞി ലഭിക്കും. എട്ടുനോമ്പ് പെരുന്നാളിനോടനുബന്ധിച്ചുള്ള വൈദ്യുത ദീപാലങ്കാരങ്ങള്‍ സെപ്റ്റംബര്‍ ഒന്നു മുതല്‍ 14 വരെ ഉണ്ടായിരിക്കുമെന്നു ഭാരവാഹികള്‍ പറഞ്ഞു.

ബസ് തടഞ്ഞുനിർത്തി ഡ്രൈവറെയും കണ്ടക്ടറെയും മർദിച്ചു

പാമ്പാടി: ബൈക്കിന് സൈഡ് കൊടുക്കാന്‍ വൈകിയതിന് സ്വകാര്യബസ് തടഞ്ഞുനിര്‍ത്തി ഡ്രൈവറെയും കണ്ടക്ടറെയും ക്രൂരമായി മര്‍ദിച്ചു. കഴിഞ്ഞദിവസം രാത്രി 8.45നു പാമ്പാടി മാക്കപ്പടിയിലാണ് സംഭവം. കോട്ടയം-പള്ളിക്കത്തോട് റൂട്ടില്‍ സര്‍വീസ് നടത്തുന്ന മേരിമാത ബസിലെ ജീവനക്കാര്‍ക്കുനേരേയായിരുന്നു അക്രമം. ഡ്രൈവര്‍ മറ്റക്കര സ്വദേശി വിഷ്ണു (29), കണ്ടക്ടര്‍ മറ്റക്കര സ്വദേശി അഖില്‍ (28) എന്നിവര്‍ക്കാണ് മര്‍ദനമേറ്റത്. ഇരുവരും കോട്ടയം ജില്ലാ ആശുപത്രിയില്‍ ചികിത്സയിലാണ്. അക്രമം തടയാൻ ശ്രമിച്ച സ്ത്രീകളടക്കമുള്ള യാത്രക്കാരെയും കൈയേറ്റം ചെയ്തു തെറിയഭിഷേകം നടത്തി. പോലീസെത്തി കണ്ടക്ടറെയും ഡ്രൈവറെയും രക്ഷപ്പെടുത്തി സ്റ്റേഷനില്‍ എത്തിച്ചപ്പോള്‍ അക്രമി സംഘം പിന്തുടര്‍ന്ന് സ്റ്റേഷനിലെത്തി ബസുടമയെ ഭീഷണിപ്പെടുത്തിയതായും പറയുന്നു. സംഭവത്തിൽ ബസ് ജീവനക്കാരും ഉടമയും പാമ്പാടി സര്‍ക്കിള്‍ ഇന്‍സ്‌പെക്ടര്‍ക്ക് പരാതി നല്‍കി. യാത്രക്കാരായ സ്ത്രീകളും പരാതി നല്‍കിയിട്ടുണ്ട്. പ്രശ്‌നം പറഞ്ഞുതീര്‍ക്കാന്‍ ചില പോലീസുകാര്‍ ശ്രമിച്ചതായി ബസുടമ ആരോപിച്ചു. ബസ് ഓപ്പറേറ്റേഴ്‌സ് അസോസിയേഷന്‍ സംഭവത്തില്‍ പ്രതിഷേധം രേഖപ്പെടുത്തി. പ്രതികളെ അറസ്റ്റ് ചെയ്ത് നടപടി സ്വീകരിച്ചില്ലെങ്കില്‍ ജില്ലാ പോലീസ് മേധാവിക്ക് അസോസിയേഷന്‍ പരാതി നല്‍കുകയും സമരം അടക്കമുള്ള കാര്യങ്ങളിലേക്കു നീങ്ങുകയും ചെയ്യുമെന്ന് ബസ് ഓപ്പറേറ്റേഴ്‌സ് അസോസിയേഷന്‍ ജില്ലാ സെക്രട്ടറി സുരേഷ് പറഞ്ഞു. ബസ് ജീവനക്കാർ മർദിച്ചെന്ന് ആരോപിച്ചു ബൈക്ക് യാത്രികരും പരാതി നൽകിയതായി പോലീസ് പറഞ്ഞു.

ബോട്ട് ക്ലബിനു പിന്നാലെ ചങ്ങനാശേരിയിൽ ടർഫ് വരുന്നു, കായികമേഖലയിൽ കൂടുതൽ പദ്ധതികൾക്കു സിബിസി

ജോൺസൺ പൂവന്തുരുത്ത് കോട്ടയം: നെഹ്റുട്രോഫി ജലമേളയ്ക്കു മണിക്കൂറുകൾ ശേഷിക്കെ അവസാനവട്ട തയാറെടുപ്പിന്‍റെയും ഒരുക്കങ്ങളുടെയും ആരവമാണെങ്ങും. കേരളത്തിന്‍റെ സാംസ്കാരികത്തനിമയുടെ പ്രതീകമായ വള്ളംകളിയുടെ ആരവങ്ങളിൽ അലിഞ്ഞുചേരുകയെന്നത് ഏതൊരു മലയാളിയുടെയും മോഹമാണ്. കോട്ടയം ജില്ലയിലെ നഗരമാണെങ്കിലും ആലപ്പുഴ ജില്ലയോടും ഹൃദയബന്ധം സൂക്ഷിക്കുന്ന പ്രദേശമാണ് ചങ്ങനാശേരി. പ്രളയം പോലെയുള്ള ദുരന്തങ്ങൾ തേടിയെത്തിയ കാലത്തൊക്കെ ആലപ്പുഴയ്ക്കു താങ്ങും തണലും അഭയവുമായി മാറിയതും ചങ്ങനാശേരിയാണ്. അപ്പോൾ ആലപ്പുഴയുടെ ഹൃദയത്തുടിപ്പായ നെഹ്റുട്രോഫി വള്ളം കളിയിൽനിന്നു ചങ്ങനാശേരിക്ക് എങ്ങനെ മാറിനിൽക്കാനാകും. അങ്ങനെയാണ് രണ്ടു വർഷം മുന്പ് ചങ്ങനാശേരി ബോട്ട് ക്ലബി(സിബിസി)ന്‍റെ പിറവി. റേഡിയോ മീഡിയ വില്ലേജിന്‍റെ നേതൃത്വത്തിൽ ചങ്ങനാശേരിയിലെയും സമീപപ്രദേശങ്ങളിലെയും നാനാജാതി മതസ്ഥരായ സംരംഭകരെയും വള്ളംകളി പ്രേമികളെയുമൊക്കെ ഒറ്റ ചരടിൽ കോർത്തായിരുന്നു ചങ്ങനാശേരി ബോട്ട് ക്ലബിന്‍റെ രൂപീകരണം. പണ്ടേ വള്ളംകളി പ്രേമിയും കഴിഞ്ഞ അഞ്ചു വർഷമായി വള്ളംകളി രംഗത്ത് സജീവ സാന്നിധ്യവുമായ ഇടിമണ്ണിക്കൽ ജ്വല്ലറി ഗ്രൂപ്പിന്‍റെ അമരക്കാരൻ സണ്ണി തോമസ് ഇടിമണ്ണിക്കൽ ക്യാപ്റ്റൻസ്ഥാനം ഏറ്റെടുത്തതോടെ ആവേശം പതിന്മടങ്ങായി. ആ ആവേശം ഹൃദയത്തിലേറ്റിയാണ് കഴിഞ്ഞ തവണ കന്നി മത്സരത്തിൽ ആദ്യ ഒൻപതിൽ എത്തി സിബിഎല്ലിനു യോഗ്യത നേടിയത്. ഇത്തവണ ചന്പക്കുളം ചുണ്ടനിലേറിയാണ് സിബിസി പോരാട്ടത്തിന് ഇറങ്ങുന്നത്. മീഡിയ വില്ലേജ് എക്സിക്യൂട്ടീവ് ഡയറക്ടർ ഫാ. ജോബി പുതുപ്പറന്പ്, ബർസാർ ഫാ. ലിബിൻ തുണ്ടുകളം, സിബിസി രക്ഷാധികാരി ഫാ. സെബാസ്റ്റ്യൻ പുന്നശേരി എന്നിവരുടെ നേതൃത്വത്തിലാണ് പരിശീലനവും ഒരുക്കങ്ങളും. ഒാർഗനൈസിംഗ് കമ്മിറ്റി അംഗങ്ങളും ഡയറക്ടർ ബോർഡ് അംഗങ്ങളും ഒപ്പമുണ്ട്. ബൈജപ്പനാണ് ലീഡിംഗ് ക്യാപ്റ്റൻ. കിടങ്ങറ സെന്‍റ് ഗ്രിഗോറിയോസ് പള്ളി പാരീഷ്ഹാളിൽ നടന്ന ചിട്ടയായ പരിശീലനത്തിനു ശേഷമാണ് പുന്നമടയിലേക്ക് എത്തുന്നത്. പരിശീലന സമയത്ത് ആവേശം പകരാൻ നൂറുകണക്കിനു പേർ ഇരുകരകളിലുമെത്തിയിരുന്നു. എന്നാൽ, വള്ളംകളിയിൽ മാത്രം ഒതുങ്ങുകയല്ല ഈ കൂട്ടായ്മയുടെ ലക്ഷ്യമെന്നു ക്യാപ്റ്റൻ സണ്ണി തോമസ് ഇടിമണ്ണിക്കൽ പറയുന്നു. അദ്ദേഹത്തിന്‍റെ പ്രതികരണത്തിലേക്ക്. ചങ്ങനാശേരിയും വള്ളംകളിയും തമ്മിൽ? ഒരേ മനസും താളവുമാണ് ആലപ്പുഴയ്ക്കും ചങ്ങനാശേരിക്കും. വള്ളംകളിയുടെ കാര്യത്തിലും അങ്ങനെ തന്നെ. കുട്ടനാട് മേഖലയിൽനിന്നു കുടിയേറിയ നൂറു കണക്കിനു കുടുംബങ്ങൾ ചങ്ങനാശേരിക്കു പരിസരത്തുണ്ട്. അവരുടെയെല്ലാം സ്വപ്നസാഫല്യമായിരുന്നു ചങ്ങനാശേരിക്ക് ഒരു ബോട്ട് ക്ലബ്. ഒരു മികച്ച വള്ളംകളി ടീമിനെയും വാർത്തെടുക്കാൻ അതുവഴി കഴിഞ്ഞു. ബിസിനസുകാർ പലരും വള്ളംകളി രംഗത്ത് ഇടയ്ക്കൊക്കെ മിന്നിമറയാറുണ്ട്. എന്നാൽ, കഴിഞ്ഞ കുറെ വർഷങ്ങളായി അങ്ങ് ഈ രംഗത്ത് സജീവസാന്നിധ്യമാണല്ലോ? ബിസിനസ് പ്രമോഷൻ മാത്രം ലക്ഷ്യമിട്ട് ഈ രംഗത്തേക്കു വന്ന ആളല്ല ഞാൻ. ചങ്ങനാശേരി ബോട്ട് ക്ലബിനു മുന്പ് കൈനകരി എസ്എച്ച് ബോട്ട് ക്ലബ് ആയിരുന്നു എന്‍റെ പ്രവർത്തന രംഗം. ജനത്തിന്‍റെ കൂട്ടായ്മയും മതസൗഹാർദവും നാടിന്‍റെ പുരോഗതിയും ലക്ഷ്യമാക്കിയാണ് ഈ രംഗത്തു സജീവമായി നിൽക്കുന്നത്. ചങ്ങനാശേരി ബോട്ട് ക്ലബിന്‍റെ ലക്ഷ്യം വള്ളംകളി മാത്രമാണോ? ഒരിക്കലുമല്ല. എല്ലാവരെയും കോർത്തിണക്കി പുതിയൊരു കായികസംസ്കാരം രൂപപ്പെടുത്തിയെടുക്കാനുള്ള പരിശ്രമങ്ങളിലാണ് ഞങ്ങൾ. വള്ളംകളിക്ക് അപ്പുറത്തേക്ക് യുവതലമുറയെ ആകർഷിക്കുന്ന മറ്റു കായിക മേഖലകളിലും വരും വർഷങ്ങളിൽ ബോട്ട് ക്ലബ് സജീവമാകും. ചങ്ങനാശേരിക്ക് ഒരു ടർഫ് എന്നത് ആലോചനയിലുണ്ട്. വൈകാതെ അതു സഫലമാകുമെന്നാണ് പ്രതീക്ഷ. ഇതോടെ ചങ്ങനാശേരി, ആലപ്പുഴ മേഖലയിലെ കായികരംഗം കൂടുതൽ മെച്ചപ്പെടും. വള്ളംകളി മേഖലയിൽ സജീവമായി ഇറങ്ങിയപ്പോഴുള്ള അനുഭവം? ഒരു കായിക വിനോദം എന്നതിനേക്കാൾ നമ്മുടെ നാടിനോടുള്ള സ്നേഹവും കൂട്ടായ്മയും ഉള്ളിലുറപ്പിക്കാനുള്ള അവസരംകൂടിയാണിത്. ഇത്തരം വിനോദങ്ങളിൽ യുവതലമുറയെ കൂടുതൽ ഉൾപ്പെടുത്തണം. ഇതിന്‍റെ ഹരം ഉള്ളിൽ പതിഞ്ഞാൽ ലോകത്ത് ഏതു കോണിലേക്കു പറന്നാലും ഈ നാട്ടിലേക്കു തിരിച്ചുവരാനുള്ള മോഹം ഉണ്ടാകും. ലഹരിവിപത്ത് യുവതയ്ക്കു മേൽ കരിനിഴൽ വീഴ്ത്തുകയല്ലേ? ലഹരിയെ പ്രതിരോധിക്കാനുള്ള ഏറ്റവും മികച്ച മാർഗം യുവതലമുറയെ കായികവിനോദങ്ങളിലേക്കു കൊണ്ടുവരിക എന്നതാണ്. എസ്ബി കോളജും അസപ്ഷനുമൊക്കെ കായികരംഗത്തു നിരവധി പ്രതിഭകളെ സമ്മാനിച്ച കലാലയങ്ങളാണ്. അതേ മാതൃകയിൽ കൂടുതൽ പേരെ കായികരംഗത്തേക്ക് ആകർഷിക്കാൻ സിബിസി പദ്ധതിയൊരുക്കും. ടർഫ് അത്തരമൊരു കാൽവയ്പാണ്. കുട്ടികൾക്ക് ഇത്തരം കാര്യങ്ങൾ കൂടുതൽ സൗകര്യവും പ്രോത്സാഹനവും നൽകുക എന്നതാണ് പ്രധാനം. യുവതലമുറയിൽ വലിയൊരു വിഭാഗം മറ്റു രാജ്യങ്ങളിലേക്കു കുടിയേറുകയാണല്ലോ? അവിടെയാണ് ഈ വള്ളംകളി പോലുള്ള കൂട്ടായ്മകളുടെ പ്രാധാന്യം. മികച്ച ജോലിയും സൗകര്യങ്ങളും തേടി യുവാക്കൾ പൊയ്ക്കൊള്ളട്ടെ. എന്നാൽ, കാശും സൗകര്യങ്ങളുമൊക്കെ മെച്ചപ്പെടുന്പോൾ നാട്ടിലേക്കു തിരികെ വരാൻ പ്രേരിപ്പിക്കുന്ന ഒരു ഇന്ധനം അവർക്കുള്ളിലുണ്ടാകണം. ആ ഇന്ധനമാണ് ഇതുപോലുള്ള വിനോദങ്ങൾ ആളുകളുടെ ഉള്ളിൽ നിറയ്ക്കുന്നത്. നാടിനോടും രാജ്യത്തോടുമുള്ള കലർപ്പില്ലാത്ത സ്നേഹത്തിന്‍റെ ആവേശത്തുഴകൾ പുന്നമടയിൽ ഉയരട്ടെ.

നെഹ്‌റു ട്രോഫിയിൽ കുമരകം പെരുമ

കുമരകം: നാളെ ആലപ്പുഴ പുന്നമടക്കായലില്‍ നടക്കുന്ന നെഹ്‌റു ട്രോഫി വള്ളംകളി മത്സരത്തില്‍ 21 ജലരാജാക്കന്മാര്‍ ഏറ്റുമുട്ടുമ്പോള്‍ ഏഴു ചുണ്ടനുകളുടെയും ഒന്നാം അമരത്ത് അണിനിരക്കുന്നത് കുമരകത്തെ താരങ്ങള്‍. മേല്‍പ്പാടം ചുണ്ടന്‍: പ്രസന്നന്‍ കല്ലുപുരയ്ക്കല്‍ കഴിഞ്ഞ അഞ്ചു വര്‍ഷങ്ങളിലെ ജേതാക്കളായ പള്ളാത്തുരുത്തി ബോട്ട് ക്ലബ് ഇക്കുറി മത്സരിക്കുന്ന മേല്‍പ്പാടന്‍ ചുണ്ടന്‍റെ ഒന്നാം അമരത്ത് തുഴയെറിയുന്നത് കുമരകം കല്ലുപുരയ്ക്കല്‍ പ്രസന്നന്‍ ആണ്. കുമരകത്തെ ചെറിയ കളിവള്ളങ്ങളില്‍ തുഴഞ്ഞായിരുന്നു രംഗപ്രവേശം. കഴിഞ്ഞ വര്‍ഷം കാരിച്ചാല്‍ചുണ്ടനില്‍ ക്ലബ് വിജയിച്ചപ്പോഴും ഒന്നാം അമരത്ത് പ്രസന്നന്‍ ആയിരുന്നു. വീയപുരം ചുണ്ടന്‍: രാജീവ് രാജു കൈനകരി ബോട്ട് ക്ലബ്ബിന്‍റെ വീയപുരം ചുണ്ടന്‍റെ ഒന്നാം അമരം കാക്കുന്നത് കുമരകം കായിപ്പുറം രാജീവ് രാജുവാണ്. കഴിഞ്ഞ വര്‍ഷം മുതലാണ് രാജീവ് ക്ലബ്ബിനുവേണ്ടി തുഴയാന്‍ എത്തുന്നത്. അതിനു മുമ്പ് പള്ളാത്തുരുത്തി ബോട്ട് ക്ലബ്ബിന്‍റെ രണ്ടാം അമരക്കാരനായിരുന്നു. നിരണം ചുണ്ടന്‍: സതീഷ്, സുരേഷ് നിരണം ബോട്ട് ക്ലബ് അണിനിരക്കുന്ന നിരണം ചുണ്ടന്‍റെ ഒന്നാം അമരത്തും രണ്ടാം അമരത്തും പങ്കായം പിടിക്കുന്നത് സഹോദരങ്ങളായ കുമരകം കരിവേലില്‍ സതീഷും സുരേഷുമാണ്. സതീഷാണ് ഒന്നാം പങ്കായക്കാരന്‍. കുമരകം വേമ്പനാട് ബോട്ട് ക്ലബ് രണ്ടു തവണ കപ്പ് നേടിയപ്പോഴും സതീഷും സുരേഷുമായിരുന്നു അമരത്ത്. ജവഹര്‍ തായങ്കരി: പൊന്നപ്പന്‍ കരീത്ര തായങ്കരി ഫ്രണ്ട്‌സ് ബോട്ട് ക്ലബ്ബിന്‍റെ ജവഹര്‍ തായങ്കരി ചുണ്ടന്‍റെ ഒന്നാം അമരത്ത് നിലയുറപ്പിക്കുന്നത് പൊന്നപ്പന്‍ കരീത്രയാണ്. കുട്ടനാട്ടിലെ നിരവധി ബോട്ട് ക്ലബ്ബുകള്‍ക്കുവേണ്ടി കളിവള്ളങ്ങളില്‍ അമരക്കാനായി സേവനം അനുഷ്ഠിച്ച താരമാണ് പൊന്നപ്പന്‍ കരീത്ര. ചുണ്ടന്‍ വള്ളങ്ങളുടെ അമരക്കാരനായി നിലയുറപ്പിക്കാന്‍ തുടങ്ങിയിട്ട് വര്‍ഷങ്ങളേറെയായി. നടുഭാഗം ചുണ്ടന്‍: സുരേഷ് നാഷ്ണാന്ത്ര പുന്നമട ബോട്ട് ക്ലബ്ബിന്‍റെ നടുഭാഗം ചുണ്ടനില്‍ ഒന്നാം അമരക്കാരനായ സുരേഷ് നാഷ്ണാന്ത്രയും കുമരകം നിവാസിയാണ്. കെടിബിസിയില്‍ തുഴഞ്ഞുതുടങ്ങിയ സുരേഷ് അമരക്കാരനായി നില ഉറപ്പിച്ചിട്ട് 17 വര്‍ഷങ്ങള്‍ പിന്നിടുന്നു. പായിപ്പാടന്‍ ചുണ്ടന്‍: അനൂപ് തട്ടേല്‍ കുമരകം ടൗണ്‍ ബോട്ട് ക്ലബ്ബിന്‍റെ പായിപ്പാടന്‍ ചുണ്ടനില്‍ ഒന്നാം അമരക്കാരന്‍ അനൂപ് തട്ടേലാണ്. കേരള പോലീസ് ബോട്ട് ക്ലബ്ബിന്‍റെ അമരക്കാരനായിരുന്നു അനൂപ്. ഇക്കുറി പോലീസ് ബോട്ട് ക്ലബ് ചുണ്ടൻ തുഴയാത്തതിനാല്‍ അനൂപ് ടൗണ്‍ ബോട്ട് ക്ലബ്ബില്‍ ഒന്നാം അമരത്തെത്തുകയായിരുന്നു. നടുവിലേപ്പറമ്പന്‍ ചുണ്ടന്‍: ജിഫി ഫെലിക്‌സ് കുമരകത്തിന്‍റെ സ്വന്തം ചുണ്ടനായ നടുവിലേപ്പറമ്പന്‍ ചുണ്ടന്‍റെ ഒന്നാം അമരക്കാരന്‍ വള്ളത്തിന്‍റെ ഉടമയായ ജിഫി ഫെലിക്‌സ് നടുവിലേപ്പറമ്പിലാണ്. വള്ളംകളിയുടെ ആവേശം മൂത്ത് സ്വന്തമായി ചുണ്ടന്‍ വള്ളം വാങ്ങുകയായിരുന്നു. ഇല്ലിക്കളം ചുണ്ടന്‍ വാങ്ങി പുതുക്കി പണിതിറക്കിയതാണ് നടുവിലേപ്പറമ്പന്‍ ചുണ്ടന്‍. വള്ളംകളിക്കുന്നതിനായി എല്ലാവര്‍ഷവും വിദേശത്തുനിന്നും എത്തുകയാണ് ഈ വള്ളംകളിപ്രേമി.

കോട്ടയം അതിരൂപത ദിനാഘോഷം നാളെ ഇടയ്ക്കാട്ട് പള്ളിയില്‍

കോട്ടയം: കോട്ടയം അതിരൂപത ദിനാഘോഷങ്ങള്‍ നാളെ ഇടയ്ക്കാട്ട് സെന്‍റ് ജോര്‍ജ് ക്‌നാനായ കത്തോലിക്ക ഫൊറോന പള്ളിയില്‍ നടത്തും. രാവിലെ 10ന് സമ്മേളന നഗറില്‍ ആര്‍ച്ച്ബിഷപ് മാര്‍ മാത്യു മൂലക്കാട്ട് പതാക ഉയര്‍ത്തും. തുടര്‍ന്ന് നടവിളിയും പുരാതനപാട്ടുകളും പാടി പ്രദക്ഷിണത്തിനായി പള്ളി ഹാളില്‍ എത്തിച്ചേരും. തുടര്‍ന്ന് നടക്കുന്ന കൃതജ്ഞതാ ബലിയില്‍ ആര്‍ച്ച്ബിഷപ് മാര്‍ മാത്യു മൂലക്കാട്ട് മുഖ്യകാര്‍മികത്വം വഹിക്കും. സഹായ മെത്രാന്‍മാരായ മാര്‍ ജോസഫ് പണ്ടാരശേരില്‍, ഗീവര്‍ഗീസ് മാര്‍ അപ്രേം, വികാരി ജനറാള്‍മാരായ ഫാ. തോമസ് ആനിമൂട്ടില്‍, ഫാ. മൈക്കിള്‍ വെട്ടിക്കാട്ട് എന്നിവരും രൂപതയിലെ വൈദികരും സഹകാര്‍മികരാകും. തുടര്‍ന്നു നടക്കുന്ന പൊതുസമ്മേളനത്തില്‍ ചങ്ങനാശേരി ആര്‍ച്ച് ബിഷപ് മാര്‍ തോമസ് തറയില്‍ മുഖ്യാതിഥിയായിരിക്കും. സമ്മേളനത്തില്‍ വിവിധ മേഖലകളില്‍ പ്രതിഭകളായവരെ ആദരിക്കും. അതിരൂപതാദിനത്തിന്‍റെ ഭാഗമായി ഇന്ന് അതിരൂപതയിലെ എല്ലാ ഇടവകകളിലും സ്ഥാപനങ്ങളിലും കൃതജ്ഞതാബലി അര്‍പ്പിക്കും. തുടര്‍ന്ന് അതിരൂപത പതാക ഉയര്‍ത്തും.

ഗുഡ്‌വില്‍ തിയറ്റർ കല്ലറയില്‍ പ്രവർത്തനമാരംഭിച്ചു

കോട്ടയം: അത്യാധുനിക സാങ്കേതിക സംവിധാനങ്ങളും വൈവിധ്യമാര്‍ന്ന അനുബന്ധ സൗകര്യങ്ങളുമുള്ള വലിയ മള്‍ട്ടിപ്ലക്സ് തിയറ്റർ ഗുഡ്‌വില്‍ സിനിമാസ് കല്ലറയില്‍ പ്രവർത്തനമാരംഭിച്ചു. വിവിധ വ്യവസായ വാണിജ്യ മേഖലകളില്‍ സാന്നിധ്യമറിയിച്ച ഗുഡ്‌വില്‍ ഗ്രൂപ്പിന്‍റെ പുതിയ സംരംഭമാണിത്. ലേസര്‍ പ്രൊജക്ഷനു മാത്രമുള്ള ഹാര്‍ക്നസ് ഹ്യൂഗോ സ്‌ക്രീനുകള്‍ സ്ഥാപിച്ചിട്ടുള്ള ജെ 1, ജെ 2, ജെ 3 മൂന്നു തിയറ്ററുകളാണ് ഗുഡ്‌വില്‍ സിനിമാസിലുള്ളത്. 289 സീറ്റുകളുള്ള ജെ ഒന്നില്‍ ക്രിസ്റ്റി 4420 ലേസര്‍ പ്രൊജക്ടര്‍ പ്രവര്‍ത്തിക്കുന്നു. 38 ചാനലുകളുള്ള 4 കെ ഡോള്‍ബി അറ്റ്മോസ് സിസ്റ്റം ഇവിടെ ദൃശ്യ-ശ്രാവ്യ മാസ്മരികപ്രപഞ്ചം സൃഷ്ടിക്കും. 200 സീറ്റുകള്‍ വീതമുള്ള മറ്റു രണ്ട് തിയറ്ററുകളില്‍ ബാര്‍കോ 2 കെ പ്രൊജക്ടര്‍, ഡോള്‍ബി 7.1 സൗണ്ട് സിസ്റ്റം എന്നിവ സജ്ജമാക്കിയിരിക്കുന്നു. കൃത്യവും സൂക്ഷ്മവുമായ വര്‍ണാനുഭവം സാധ്യമാക്കുന്ന ആര്‍ജിബി ലേസര്‍ സംവിധാനം മൂന്നു സ്‌ക്രീനുകളിലും പ്രവര്‍ത്തിക്കും. നവീന ഡിസൈനര്‍ സീറ്റുകളാണ് മൂന്നു തിയറ്ററിലും ഒരുക്കിയിരിക്കുന്നത്. പ്രേക്ഷകര്‍ ഇഷ്‌ടപ്പെടുന്ന എന്‍റര്‍ടെയ്ന്‍മെന്‍റ്/റിഫ്രഷ്മെന്‍റ് സൗകര്യങ്ങളും സജ്ജമാക്കിയിട്ടുണ്ട്. 30-ല്‍ പരം ഗെയിമുകള്‍ കളിക്കാവുന്ന ഫണ്‍ ഗാലക്സി, ചായയ്ക്കും കാപ്പിക്കും ഗുഡ്‌വില്‍ ദെ ചായ്, ജ്യൂസ്-ഫല കൗണ്ടര്‍, സ്നാക്സ്/ഡ്രിങ്ക്സ് പാന്‍ട്രി കിച്ചന്‍, ടൂക്സി സ്‌നോ ബാര്‍, ഐസ്‌ക്രീം കിയോസ്‌ക് എന്നിവയ്ക്കു പുറമെ ഇവിടെ ഈവി ചാര്‍ജിംഗ് സ്റ്റേഷനുമുണ്ട്. വൈവിധ്യവും വിശാലവും സമ്പൂര്‍ണവുമായ ഒരു സിനിമാനുഭവം നല്‍കാനാണ് ശ്രമിക്കുന്നതെന്ന് ഗുഡ്‌വില്‍ സിനിമാസ് മാനേജിംഗ് ഡയറക്ടര്‍ ജോബി ജോര്‍ജ് പറഞ്ഞു. ഹൃദയപൂര്‍വം, ലോക, ഓടും കുതിര ചാടും കുതിര, മേനേ പ്യാര്‍ കിയാ എന്നീ സിനിമകളാണ് ആദ്യ ദിവസങ്ങളില്‍ പ്രദര്‍ശിപ്പിക്കുക. ബുക്മൈ ഷോ യിലൂടെ ഓണ്‍ലൈനായും നേരിട്ട് കൗണ്ടറിലും ടിക്കറ്റെടുക്കാം. 04812924444, 2364444.

മാങ്ങാനം മോഷണം: പ്രതിയുടെ കൂട്ടാളികള്‍ ഉടന്‍ പിടിയിലാകും

കോട്ടയം: മാങ്ങാനത്ത് അമ്പുങ്കയത്ത് അന്നമ്മ തോമസിന്‍റെ സ്‌കൈലൈന്‍ വില്ലയിലും സമീപത്തെ ക്ലിനിക്കിലും ഈ മാസം ഒന്‍പതിന് പുലര്‍ച്ചെ മോഷണം നടത്തിയ കേസില്‍ പിടിയിലായ കൊള്ളത്തലവന്‍റെ കൂട്ടാളികളും ഉടന്‍ പിടിയിലാകും. മധ്യപ്രദേശിലെ ഗാന്ധ്വാനി താലൂക്കില്‍ ജെംദാ ഗ്രാമത്തിലെ ഗുരു സജനെ (മഹേഷ്-41) യാണ് ജില്ലാ പോലീസ് ചീഫ് എ. ഷാഹുല്‍ ഹമീദിന്‍റെ സ്‌ക്വാഡും ഈസ്റ്റ് പോലീസും ഉള്‍പ്പെട്ട സംഘം ഗുജറാത്തില്‍നിന്ന് കഴിഞ്ഞ ദിവസം പിടികൂടിയത്. മാങ്ങാനത്തെത്തിയ ജെംദാ ഗ്രാമത്തില്‍ നിന്നുതന്നെയുള്ള നാലംഗ കൂട്ടാളികളെപ്പറ്റി വിവരം ലഭിച്ചിട്ടുണ്ട്. കൊള്ളയും കൊലയും പതിവാക്കിയ സംഘങ്ങളുടെ താവളമാണ് ജെംദാ വനപ്രദേശം. പോലീസിനും പുറത്തുനിന്നുള്ളവര്‍ക്കും ഇവിടെയെത്തി പ്രതികളെ പിടികൂടാന്‍ സാധിക്കാത്ത കാര്യമാണ്. ഒട്ടേറെ ക്രിമിനലുകളും വിവിധ സംസ്ഥാനങ്ങളില്‍ മോഷണം, കൊള്ള, കൊലപാതകം ഉള്‍പ്പെടെ നടത്തിയവരും ഇവിടെ ഒളിവില്‍ കഴിയുന്നുണ്ട്. ഇവരെ കൂട്ടിയാണ് ഗുരുസജന്‍ കേരളത്തിലും മോഷണത്തിനു എത്തുന്നത്. മോഷണ മുതല്‍ പങ്കിട്ട ശേഷം പലതായി ഇവര്‍ മടങ്ങുന്നതാണ് പതിവ്. പിടിയിലാകുമ്പോള്‍ ഗുരു സജന്‍ ഗുജറാത്തില്‍ ഹോളോ ബ്രിക്‌സ് കമ്പനിയിലായിരുന്നു ജോലി ചെയ്തിരുന്നത്. കുടുംബവും അവിടെ കഴിയുന്നു. ജോലിക്കടിയില്‍ അവധിയെടുത്ത് ജെംദായില്‍ നിന്നുള്ള സുഹൃത്തുക്കളെ വരുത്തിയാണ് മോഷണത്തിനു പോകുന്നത്. മുന്‍പ് ആലപ്പുഴയിലും കോട്ടയത്തും മോഷണം നടത്താന്‍ ശ്രമിച്ചതായി പോലീസിനോടു സമ്മതിച്ചിട്ടുണ്ട്.

അഖില്‍ സി. വര്‍ഗീസിന്‍റെ അറസ്റ്റ്: തട്ടിയെടുത്ത കോടികൾ ഒളിപ്പിച്ചതെവിടെ...?

കോട്ടയം: നഗരസഭയില്‍ 2.4 കോടി രൂപ തട്ടിയെടുത്ത അഖില്‍ സി. വര്‍ഗീസ് പിടിയിലായതോടെ പുറത്തറിയേണ്ടതു തട്ടിയെടുത്ത വന്‍ തുക എങ്ങനെ ചെലവഴിച്ചുവെന്ന വിവരം. തട്ടിയെടുത്ത പണം ഉപയോഗിച്ചു രണ്ട് ആഡംബര ബൈക്കുകളും കാറും കൊല്ലത്ത് സ്ഥലവും വാങ്ങിയതായാണ് പോലീസ് കണ്ടെത്തിയിരിക്കുന്നത്. പിടികൂടുമ്പോള്‍ ഇയാളുടെ പക്കല്‍ വെറും 2000ല്‍പ്പരം രൂപ മാത്രമാണുണ്ടായിരുന്നത്. മുമ്പു കൊല്ലത്ത് ജോലി ചെയ്യുമ്പോഴും ഇയാള്‍ സാമ്പത്തിക തട്ടിപ്പ് നടത്തിയിട്ടുണ്ട്. തട്ടിപ്പ് തുടർക്കഥ ജോലി ചെയ്ത സ്ഥലങ്ങളിലെല്ലാം അഖില്‍ സാമ്പത്തിക തട്ടിപ്പ് നടത്തിയിട്ടുണ്ടെന്നാണ് പോലീസിന്‍റെ കണ്ടെത്തല്‍. ആശ്രിത നിയമനത്തിലാണ് ഇയാള്‍ക്കു കൊല്ലം കോര്‍പറേഷനില്‍ ജോലി ലഭിക്കുന്നത്. അഖിലിനു 18 വയസ് മാത്രം പ്രായമുള്ളപ്പോള്‍ പിതാവ് മരിച്ചപ്പോള്‍ ആശ്രിത നിയമനത്തിന്‍റെ ഭാഗമായിട്ടാണ് കോര്‍പറേഷനില്‍ ജോലി ലഭിക്കുന്നത്. ഇവിടെ അക്കൗണ്ട് വിഭാഗത്തില്‍ ജോലി ലഭിക്കുമ്പോള്‍ സാമ്പത്തിക തട്ടിപ്പ് കണ്ടെത്തിയതോടെ നടപടിയെടുക്കുന്നതിന്‍റെ ഭാഗമായിട്ട് ഈരാറ്റുപേട്ട നഗരസഭയിലേക്ക് സ്ഥലം മാറ്റുകയായിരുന്നു. ഈരാറ്റുപേട്ടയിലും പരാതിയുണ്ടായതോടെയാണ് 2020ല്‍ അഖില്‍ കോട്ടയം നഗരസഭയില്‍ എത്തുന്നത്. തുടര്‍ന്നു നീണ്ട നാലു വര്‍ഷം കോട്ടയം നഗരസഭയിലുണ്ടായിരുന്ന ഇയാള്‍ 2.4 കോടി രൂപയുടെ ക്ഷേമ പെന്‍ഷനാണു തട്ടിയെടുത്തത്. പെന്‍ഷന്‍ ലഭിക്കുന്നവരുടെ പേരുകളുടെ കൂട്ടത്തിലേക്കു സ്വന്തം അമ്മയുടെ പേരായ പി. ശ്യാമള എന്ന് കൂട്ടിച്ചേര്‍ത്താണ് ഇയാള്‍ തട്ടിപ്പ് നടത്തിയത്. ആദ്യകാലങ്ങളില്‍ ചെറിയ തുകയായിരുന്നു ശ്യാമളയുടെ പേരിലേക്കു മാറ്റിയിരുന്നത്. തട്ടിപ്പ് നടത്തുന്ന കാര്യം ആരും അറിയുന്നില്ലെന്ന് ബോധ്യപ്പെട്ടതോടെ വലിയ തുക പി. ശ്യാമളയുടെ പേരിലേക്കു മാറ്റുകയായിരുന്നു. ഒടുവില്‍ അഞ്ചു ലക്ഷം രൂപവരെ മാറ്റിയതായിട്ടാണ് കണ്ടെത്തിയിരിക്കുന്നത്. പെന്‍ഷന്‍ വിഭാഗം കൈകാര്യം ചെയ്ത ക്ലാര്‍ക്കിന്‍റെ മേല്‍വിലാസത്തിലാണ് അഖില്‍ നഗരസഭയുടെ പെന്‍ഷന്‍ അക്കൗണ്ടിലുടെ പണം മാറ്റിയിരുന്നത്. സ്ഥലം മാറിയിട്ടും... നഗരസഭാ സെക്രട്ടറിയുടെ പക്കല്‍നിന്നും ചെക്ക് ഒപ്പിട്ടു വാങ്ങിശേഷമാണ് അഖില്‍ വഴിവിട്ട് പണം മാറ്റിയിരുന്നതെന്നും ഉദ്യോഗസ്ഥര്‍ കണ്ടെത്തിയിരുന്നു. കോട്ടയം നഗരസഭയില്‍നിന്നും വൈക്കത്തേക്ക് സ്ഥലം മാറിപ്പോയിട്ടും ഇയാള്‍ വിവിധ ആവശ്യങ്ങള്‍ പറഞ്ഞു കോട്ടയം നഗരസഭയില്‍ എത്തി തട്ടിപ്പ് നടത്തിയിരുന്നുവെന്നും കണ്ടെത്തിയിരുന്നു. പുതുതായി കോട്ടയത്ത് എത്തിയ ഉദ്യോഗസ്ഥരെ സഹായിക്കാനെന്ന വ്യാജേനയാണ് ഇയാള്‍ എത്തിയിരുന്നത്. വൈക്കത്തെ ഓഫീസിലും പെന്‍ഷന്‍ വിഭാഗത്തില്‍ അഖിലിനെതിരേ പരാതി ഉയര്‍ന്നതോടെ ഇയാളെ കാഷ് വിഭാഗത്തിലേക്കു മാറ്റിയിരുന്നു. ഒളിവിലും സഹായമെത്തി വന്‍ സാമ്പത്തിക തട്ടിപ്പ് നടത്തി ഒരു വര്‍ഷം ഒളിവില്‍ കഴിഞ്ഞപ്പോഴേക്കും അഖിലിനു വിവിധ കോണുകളില്‍നിന്നു ലഭിച്ചുകൊണ്ടിരുന്ന സഹായങ്ങള്‍ നിലച്ചു. സംഭവം പുറത്തുവന്നതോടെ തട്ടിപ്പ് നടത്തിയ പണത്തില്‍നിന്നു പിന്‍വലിച്ച ഏഴു ലക്ഷം രൂപയുമായി ഇയാള്‍ തമിഴ്‌നാട്, കര്‍ണാടക എന്നിവിടങ്ങളില്‍ ഒളിവില്‍ കഴിയുകയായിരുന്നു. ഇതിനുശേഷം നിരവധി ബന്ധുവീടുകളിലും സുഹൃത്തുക്കളുടെ വീടുകളിലും ഒളിവില്‍ കഴിഞ്ഞിരുന്നു. ആദ്യഘട്ടത്തില്‍ സഹായങ്ങള്‍ ചെയ്തുനല്കിയ ബന്ധുവിനെ ക്രൈംബ്രാഞ്ച് അറസ്റ്റ് ചെയ്യുകയും ചെയ്തിരുന്നു. ഇതര സംസ്ഥാനങ്ങളില്‍ എല്ലാം ഒളിവില്‍ കഴിഞ്ഞെങ്കിലും ഒടുവില്‍ ഇയാള്‍ സ്വദേശമായി കൊല്ലത്തേക്കു തന്നെ മടങ്ങിയെത്തുകയായിരുന്നു. ഒളിവിൽ കഴിയുന്ന സമയത്ത് മൊബൈല്‍ ഫോണും എടിഎം കാര്‍ഡും ഉപയോഗിച്ചിരുന്നില്ല. എന്നാല്‍ ലാപ്‌ടോപ്പിൽ വിവിധ സ്ഥലങ്ങളിലെ വൈഫൈ ഉപയോഗിച്ചു ജിമെയിലും ഇന്‍റര്‍നൈറ്റ് ബാങ്കിംഗും നടത്തിയിരുന്നതായി പോലീസ് കണ്ടെത്തിയിരുന്നു. അഖിലിനു വിവിധ ബാങ്കുകളുടെ നാലു ക്രെഡിറ്റ് കാര്‍ഡുകള്‍ ഉണ്ടായിരുന്നു. ഒളിവുകാലത്തും അതിനു മുമ്പും നടത്തിയ പണ മിടപാടുകള്‍ പോലീസ് പരിശോധിച്ചുവരികയാണ്. ഒളിവില്‍ പോയശേഷം കൊല്ലത്ത് എത്തി അഖില്‍ ഭാര്യയെയും കുഞ്ഞിനെയും കാണാന്‍ ശ്രമം നടത്തിയിരുന്നു. എന്നാല്‍ തനിക്ക് കാണേണ്ടെന്ന നിലപാടായിരുന്നു ഭാര്യ സ്വീകരിച്ചത്. അഖില്‍ കൊല്ലത്തുള്ളതായി വിജിലന്‍സിനു പല തവണ രഹസ്യവിവരം ലഭിച്ചിരുന്നു. എന്നാല്‍ വിജിലന്‍സ് സംഘം സ്ഥലത്തെത്തുമ്പോഴേക്കും ഇയാള്‍ രക്ഷപ്പെടുന്നതും പതിവായിരുന്നു. പ്രതി കൊല്ലത്തുള്ളതായും വിവിധ സ്ഥലങ്ങളിലെ വൈഫൈ ഉപയോഗിക്കുന്നതായും വിവരം ലഭിച്ചതോടെ പ്രത്യേക പദ്ധതി തയാറാക്കിയ പോലീസ് സംഘം ലോഡ്ജില്‍നിന്നും ഇയാളെ പിടികൂടുകയായിരുന്നു.

ഓട്ടോറിക്ഷ കത്തി നശിച്ചു

കടനാട്: വീടിന്‍റെ പോര്‍ച്ചില്‍ കിടന്ന ഓട്ടോറിക്ഷ കത്തി നശിച്ചു. അയല്‍വാസിയുടെ ആള്‍ത്താമസമില്ലാതിരുന്ന വീടിന്‍റെ പോര്‍ച്ചില്‍ കിടന്ന ഓട്ടോറിക്ഷയാണ് കത്തിനശിച്ച നിലയില്‍ കണ്ടെത്തിയത്. കടനാട് - പിഴക് റോഡ് സൈഡില്‍ പാലസ് ജംഗ്ഷനില്‍ കുന്നത്ത് കെ.കെ. സുകുമാരന്‍റെ ഓട്ടോറിക്ഷയാണ് പൂര്‍ണമായും കത്തി നശിച്ചത്. വീടിനും കേടുപാടുകളുണ്ടായിട്ടുണ്ട്. പുലര്‍ച്ചെ രണ്ടോടെയായിരുന്നു സംഭവമെന്നും വലിയ ശബ്ദം കേട്ടതായും അയല്‍വാസികള്‍ പറഞ്ഞു. മേലുകാവ് പോലീസ് സ്ഥലത്തെത്തി അന്വേഷണം ആരംഭിച്ചു. ഫോറന്‍സിക് വിദഗ്ധര്‍ പരിശോധനയ്ക്ക് എത്തുമെന്ന് പോലീസ് പറഞ്ഞു.

നീതി ലഭിക്കാന്‍ ചാക്കോ നടത്തിയത് 18 വര്‍ഷത്തെ പോരാട്ടം

പാലാ: ബധിരനും മൂകനും 78 വയസ് പ്രായവുമുള്ള നീലൂര്‍ പൂവേലില്‍ ചാക്കോയും ഭാര്യ ഡെയ്‌സിയും നീതിക്കുവേണ്ടി നടത്തിയത് പതിനെട്ട് വര്‍ഷത്തെ പോരാട്ടം. സ്വന്തം ഭൂമി പോക്കുവരവ് ലഭിച്ച് കിട്ടുന്നതിനു വേണ്ടിയാണ് ഇവര്‍ ഇത്രയും നാള്‍ പോരാട്ടം നടത്തിയത്. പാലാ പൗരാവകാശ സമിതിയുടെയും ഹൈക്കോടതിയുടെയും ഇടപെടലുകളാണ് ഇവര്‍ക്ക് തുണയായത്. 1988 ല്‍ വിലയാധാരപ്രകാരം നീലൂര്‍ പൂവേലില്‍ ചാക്കോയുടെ പേരില്‍ രാമപുരം സബ് രജിസ്ട്രാര്‍ ഓഫീസില്‍ രജിസ്റ്റര്‍ ചെയ്ത് വാങ്ങിയ നാല് ഏക്കര്‍ ഭൂമിയാണ് ഇതുവരെ പോക്കുവരവ് ചെയ്ത് നല്‍കാതെയിരുന്നത്. 1991ലെ റീസര്‍വേ സമയത്ത് മറ്റുചിലരുടെ പേരില്‍ ചാക്കോയുടെ ഭൂമി പോക്കുവരവ് ചെയ്ത് നല്‍കിയതോടെയാണ് കുടുംബം പ്രതിസന്ധിയിലായത്. നഷ്ടപ്പെട്ട ഭൂമി തിരികെ ലഭിക്കാനായി വിവിധ സര്‍ക്കാര്‍ ഓഫീസുകളിലും ഭരണാധികാരികള്‍ക്കും പലതവണ നിരവധി പരാതികള്‍ നല്കിയെങ്കിലും യാതൊരു നടപടിയും ഉണ്ടായില്ല. 2017ല്‍ പാലാ പൗരാവകാശ സമിതി പ്രസിഡന്‍റ് ജോയി കളരിക്കല്‍ പ്രശ്‌നത്തില്‍ ഇടപെടുകയും തുടര്‍ന്ന് താലൂക്ക് ഓഫീസ് പടിക്കല്‍ സമരം നടത്തുകയും ചെയ്തു. ജില്ലാ കളക്ടറുടെയും ഹൈക്കോടതിയുടെയും ഉത്തരവും ലഭിച്ചിട്ടും ചാക്കോയ്ക്ക് പോക്കുവരവ് ചെയ്ത് നല്‍കാതെ വന്നതിനെ തുടര്‍ന്ന് ഈ മാസം 19ന് വീണ്ടും താലൂക്ക് ഓഫീസില്‍ സമരം നടത്തി. സമര സ്ഥലത്ത് എത്തിയ മീനച്ചില്‍ തഹസില്‍ദാര്‍ ലിറ്റിമോള്‍ ജോസഫ്, ഭൂരേഖ തഹസില്‍ദാര്‍ സീമ ജോസഫ് എന്നിവര്‍ ഒരാഴ്ചയ്ക്കുള്ളില്‍ പോക്കുവരവ് ചെയ്ത് നല്കാമെന്ന അറിയിക്കുകയും അവരുടെ ഉറപ്പിന്‍മേല്‍ സമരം അവസാനിപ്പിക്കുകയും ചെയ്തു. കഴിഞ്ഞ ദിവസം കടനാട് വില്ലേജ് ഓഫീസില്‍ ചാക്കോയുടെ പേരില്‍ കരം അടച്ചു.

കുറവിലങ്ങാട് വചനവിരുന്നിന് തിരിതെളിഞ്ഞു; ആദ്യദിനം പതിനായിരങ്ങൾ

കുറവിലങ്ങാട്: പതിനായിരങ്ങളിലേക്ക് തിരുവചനം സമ്മാനിച്ച് പത്താമത് കുറവിലങ്ങാട് ബൈബിൾ കൺവൻഷന് തുടക്കമായി. ആദ്യദിനം പതിനായിരത്തിലേറെപ്പേരാണ് വചനം സ്വീകരിക്കാനെത്തിയത്. പള്ളിയും പള്ളിയങ്കണത്തിലെ കൂറ്റൻ പന്തലും നിറഞ്ഞുകവിഞ്ഞാണ് വിശ്വാസസാഗരം ഒഴുകിയെത്തിയത്. രാവിലെ മുതൽ പെയ്തിറങ്ങിയ പ്രകൃതിയെ അനുഗ്രഹമായി ഏറ്റുവാങ്ങിയാണ് അയൽ ജില്ലകളിൽ നിന്നടക്കമുള്ളവർ എത്തിയത്. ആദ്യദിനത്തിൽ ഫാ. സേവ്യർ ഖാൻ വട്ടായിൽ, ഫാ. ബിനോയി കരിമരുതുങ്കൽ എന്നിവർ വചനശുശ്രൂഷയ്ക്ക് നേതൃത്വം നൽകി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രം സീനിയർ അസിസ്റ്റന്‍റ് വികാരി ഫാ. ജോസഫ് മണിയഞ്ചിറ വിശുദ്ധ കുർബാനയർപ്പിച്ചു. പാലാ രൂപത വികാരി ജനറാൾ മോൺ. ഡോ. ജോസഫ് തടത്തിൽ കൺവൻഷൻ ഉദ്ഘാടനം ചെയ്തു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി പ്രസംഗിച്ചു. വചനവിരുന്നിൽ ദൈവകൃപയുടെ നീർച്ചാലൊഴുകും: മോൺ. ഡോ. ജോസഫ് തടത്തിൽ കുറവിലങ്ങാട്: വചനപ്രഘോഷണവേദികളിൽ ദൈവകൃപയുടെ നീർച്ചാലുകളൊഴുകുമെന്ന് പാലാ രൂപത മുഖ്യവികാരി ജനറാൾ മോൺ. ഡോ. ജോസഫ് തടത്തിൽ പറഞ്ഞു. പത്താമത് കുറവിലങ്ങാട് ബൈബിൾ കൺവൻഷൻ ഉദ്ഘാടനം ചെയ്ത് സന്ദേശം നൽകുകയായിരുന്ന മുഖ്യവികാരി ജനറാൾ. ദൈവസ്‌നേഹത്തിന്‍റെ കല്പനകൾ പാലിക്കപ്പെടണം. വെറുപ്പും വിദ്വേഷവും വെടിഞ്ഞ് ദൈവസ്‌നേഹത്തിന്‍റെ വക്താക്കളാകണം. ഉത്തരവാദിത്വത്തോടെ ദൈവമക്കളായിരിക്കാൻ ശ്രദ്ധിക്കണം. ഏറ്റവും വലിയ പ്രേഷിതവേദി കുടുംബങ്ങളാണെന്നും മോൺ. ഡോ. ജോസഫ് തടത്തിൽ പറഞ്ഞു.

ഇരുട്ടിൽ മുങ്ങി മാറിയിടം!

മാറിയിടം: മാറിയിടം ട്രാന്‍സ്ഫോർമറിന്‍റെ വിതരണ ശൃംഖലയില്‍പ്പെട്ട ഉപഭോക്താക്കൾ വൈദ്യുതി മുടക്കം മൂലം വലയുന്നു. പ്രദേശത്തെ കുടിവെള്ള വിതരണം പോലും തടസപ്പെടുന്ന രീതിയിലാണ് വൈദ്യുതി മുടക്കം. ഇടവിട്ട സമയങ്ങളില്‍ വൈദ്യുതി വിതരണം തടസപ്പെടുകയാണ്. കറന്‍റ് വന്നാൽ തന്നെ പലപ്പോഴും വോള്‍ട്ടേജ് കുറവാണ് മറ്റൊരു പ്രശ്നം. ഇതിനാല്‍ പമ്പു ഹൗസുകളിലെ മോട്ടോര്‍ പ്രവര്‍ത്തിപ്പിക്കാന്‍ സാധിക്കുന്നില്ലെന്നു വിവിധ കുടിവെള്ള പദ്ധതികളുടെ ഭാരവാഹികള്‍ പറയുന്നു. കിടങ്ങൂര്‍ കെഎസ്ഇബി ഓഫീസില്‍ തുടര്‍ച്ചയായി പരാതിപ്പെട്ടിട്ടും അധികൃതര്‍ ശാശ്വത പരിഹാരമുണ്ടാക്കുന്നില്ല. 250ല്‍പരം വീടുകളില്‍ കുടിവെള്ളമെത്തിക്കുന്ന നാലു കുടിവെള്ള പദ്ധതികളാണ് പ്രദേശത്തുള്ളത്. ഇവയുടെ പ്രവര്‍ത്തനം നിലച്ച മട്ടാണ്. മാറിയിടം ഭാഗത്തെ വോള്‍ട്ടേജ് ക്ഷാമത്തിനും വൈദ്യുതി മുടക്കത്തിനും ശാശ്വത പരിഹാരമുണ്ടാക്കണമെന്നു നാട്ടുകാര്‍ ആവശ്യപ്പെട്ടു.

വൻമരം കടപുഴകി വീണ് അഞ്ചു വാഹനങ്ങൾ തകർന്നു

ഈരാറ്റുപേട്ട: വൻമരം കടപുഴകി വാഹനങ്ങളുടെ മേൽ ഒടിഞ്ഞു വീണ് വാഹനങ്ങൾ തകർന്നു. ഈരാറ്റുപേട്ട വടക്കേക്കരയിൽ പോലീസ് ക്വാർട്ടേഴ്‌സിനു സമീപം പാർക്ക് ചെയ്തിരുന്ന വാഹനങ്ങളുടെ മുകളിലേക്കാണ് മരം വീണ് അപകടമുണ്ടായത്. ഇന്നലെ രാവിലെ പത്തോടെയാണ് സംഭവം. മരത്തിനടിയിൽ നാല് കാറുകളും ഒരു ബൈക്കും കുടുങ്ങി. അപകടത്തിൽ ആർക്കും പരിക്കില്ല. ഈരാറ്റുപേട്ട പോലീസും ഫയർഫോഴ്സും സ്ഥലത്തെത്തി.

ഓണത്തിന് പൂപ്പാടങ്ങളൊരുങ്ങി

പാലാ: ഓണം വര്‍ണാഭമാക്കുവാന്‍ ചെണ്ടുമല്ലിത്തോട്ടം നിര്‍മിച്ച് പാലാ സെന്‍റ് തോമസ് ഹയര്‍ സെക്കൻഡറി സ്‌കൂളിലെ കുട്ടികള്‍. സ്‌കൂള്‍ റോവര്‍ ലീഡര്‍ നോബി ഡൊമിനികിന്‍റെ നേതൃത്വത്തില്‍ പ്ലസ് വണ്‍, പ്ലസ് ടു ക്ലാസുകളിലെ കുട്ടിക്കര്‍ഷകരാണ് ഓണപ്പൂക്കളമൊരുക്കാന്‍ ചെണ്ടുമല്ലി കൃഷി നടത്തിയത്. കഴിഞ്ഞ ദിവസം നടന്ന പൂ നുള്ളല്‍ ചടങ്ങ് പാലാ മുനിസിപ്പല്‍ കൗണ്‍സിലര്‍ വി.സി. പ്രിന്‍സ് തയ്യില്‍ ഉദ്ഘാടനം ചെയ്തു. ഒഴിവു സമയങ്ങളിലും ക്ലാസുകള്‍ക്ക് ശേഷവുമാണ് വിദ്യാര്‍ഥികള്‍ കൃഷി പരിപാലിക്കുന്നത്. വിത്തുനടീല്‍ മുതല്‍ വിളവെടുപ്പ് വരെ എല്ലാ ഘട്ടങ്ങളിലും അധ്യാപകരുടെ നേതൃത്വത്തില്‍ വിദ്യാര്‍ത്ഥികള്‍ സ്‌കൂളിനോട് ചേര്‍ന്നുള്ള തോട്ടത്തില്‍ സജീവമാണ്. ജമന്തി പൂവ് വസന്തം രാമപുരം: രാമപുരം പഞ്ചായത്ത് ഒരേക്കര്‍ സ്ഥലത്ത് ജമന്തി കൃഷി ചെയ്ത് മനോഹരമായ പൂന്തോട്ടം ഒരുക്കി. പഞ്ചായത്തിനൊപ്പം കൃഷി വകുപ്പും തൊഴിലുറപ്പ് അംഗങ്ങളും കുടുംബശ്രീയും ചേര്‍ന്നാണ് പദ്ധതി വിജയകരമായി നടപ്പാക്കിയത്. ടൗണ്‍ വാര്‍ഡില്‍ കോലത്ത് അരുണ്‍ തോമസ് സൗജന്യമായി നല്‍കിയ ഒരേക്കര്‍ സ്ഥലത്താണ് കൃഷി ചെയ്തത്. പഞ്ചായത്ത് പ്രസിഡന്‍റ് ലിസമ്മ മത്തച്ചന്‍ പുതിയിടത്തുചാലില്‍, വൈസ് പ്രസിഡന്‍റ് സണ്ണി അഗസ്റ്റ്യന്‍ പരുന്നക്കോട്ടിന് പൂവ് കൈമാറി വിളവെടുപ്പ് ഉദ്ഘാടനം നടത്തി. പഞ്ചായത്ത് മെംബര്‍ ജെയ്മോന്‍ മുടയാരത്ത്, അരുണ്‍ തോമസ് കോലത്ത്, കുടുംബശ്രീ പ്രവര്‍ത്തകര്‍, തൊഴിലുറപ്പ് തൊഴിലാളികള്‍ എന്നിവരടക്കം നിരവധി ആളുകള്‍ പങ്കെടുത്തു. ചെണ്ടുമല്ലിപ്പൂവ് വസന്തം പാലാ: മുരിക്കുംപുഴയില്‍ കാഴ്ചയ്ക്ക് വിരുന്നൊരുക്കി ചെണ്ടുമല്ലി പൂവുകള്‍ വിരിഞ്ഞു. മുരിക്കുംപുഴ സ്വദേശി അജിത് പനയ്ക്കലും ഭാര്യ രമ്യയും നാലു വയസുകാരന്‍ മകന്‍ ആദിദേവും ചേര്‍ന്ന് ഒരുക്കിയത് ചെണ്ടുമല്ലി വസന്തമാണ്. വീടിന് സമീപത്ത് പാട്ടത്തിനെടുത്ത 60 സെന്‍റ് സ്ഥലത്ത് 4000ത്തോളം ചെണ്ടുമല്ലി ചെടികള്‍ പൂവിട്ടത് മനോഹരമായ കാഴ്ചയാണ്. ഓറഞ്ച്, മഞ്ഞ നിറങ്ങളിലുള്ള ചെണ്ടുമല്ലി ചെടികളാണ് ഓണത്തിന് പൂക്കളം ഒരുക്കുന്നതിനായി വിരിഞ്ഞത്. നിരവധി ആളുകളാണ് ഇതു കാണാനും ചെടികള്‍ക്കൊപ്പംനിന്ന് ഫോട്ടോയെടുക്കാനുമായി എത്തുന്നത്. പൂവിന്‍റെ വിപണി അവരവര്‍ തന്നെ കണ്ടെത്തണമെന്നതാണ് ചെണ്ടുമല്ലി കര്‍ഷകര്‍ നേരിടുന്ന ഏറ്റവും വലിയ പ്രശ്‌നമെന്ന് അജിത് പറയുന്നു. കൃഷിക്കാവശ്യമായ മാര്‍ഗനിര്‍ദേശങ്ങള്‍ നല്‍കുന്നത് പാലാ കൃഷിഭവനിലെ ഉദ്യോഗസ്ഥരാണ്. കൂടാതെ ഈ പ്രാവശ്യം ഓണസദ്യ ഉണ്ണാന്‍ നാടന്‍ വാഴയിലയും അജിത് വിപണിയില്‍ എത്തിക്കുന്നുണ്ട്

എരുമേലി കാരിത്തോട് പാലം റോഡ് മാലിന്യങ്ങളിൽ

എരുമേലി: നിർദിഷ്‌ട ശബരിമല വിമാനത്താവള പദ്ധതി പ്രദേശമായ ചെറുവള്ളി എസ്റ്റേറ്റിന്‍റെ അതിർത്തിയിലുള്ള കനകപ്പലം കാരിത്തോട് കല്യാണിമുക്ക് റോഡിലെ പാലം ഭാഗത്ത്‌ മാലിന്യങ്ങൾ നിറഞ്ഞ നിലയിൽ. വിജനമായ പ്രദേശമായതിനാൽ മാലിന്യങ്ങൾ ഇടാൻ ഇവിടേക്കാണ് പലരും എത്തുന്നത്. സമീപ പ്രദേശമായ കനകപ്പലം - വെച്ചൂച്ചിറ റോഡിലെ വനപാതയിൽ നിരീക്ഷണ കാമറകൾ സ്ഥാപിച്ചതോടെ പിൻവലിഞ്ഞ മാലിന്യമിടീൽ ഇപ്പോൾ കല്യാണിമുക്ക് പാലം ഭാഗത്താണ്. കനകപ്പലം, കരിമ്പിൻതോട് വന ഭാഗത്ത്‌ നിന്നുമുള്ള തോട് കല്യാണിമുക്ക് പാലത്തിനടിയിലൂടെയാണ് ഒഴുകുന്നത്. മാലിന്യങ്ങൾ തോട്ടിലേക്ക് പതിക്കുന്നുണ്ട്. ഈ തോട് സമീപത്തെ പഞ്ചതീർഥ ക്ഷേത്രത്തിന് മുന്നിലൂടെ എത്തി മണിമലയാറിലാണ് ചേരുന്നത്. ഒട്ടേറെ കുടിവെള്ള പദ്ധതികൾ പ്രവർത്തിക്കുന്നതാണ് മണിമലയാർ. മാലിന്യങ്ങൾ ഇടുന്നതിനെതിരെ പഞ്ചായത്തും പോലീസും ഇടപെട്ട് കർശന നടപടികൾ സ്വീകരിക്കണമെന്ന് ആവശ്യം ശക്തമായി.

ഓണാഘോഷം

കാഞ്ഞിരപ്പള്ളി: ഹോളി എയ്ഞ്ചൽസ് കോളജിൽ ഓണാഘോഷപരിപാടികൾ നടത്തി. അസിസ്റ്റന്‍റ് മാനേജർ സിസ്റ്റർ മെർളിൻ കാഞ്ഞിരത്തിങ്കൽ ഉദ്ഘാടനം ചെയ്തു. വാർഡ് മെംബർ മഞ്ജു മാത്യു സന്ദേശം നൽകി. പ്രിൻസിപ്പൽ സിസ്റ്റർ മേഴ്സി വളയം, സിസ്റ്റർ ആൻസ്, അധ്യാപകരായ ജുബിൻ തോമസ്, വി.എം. സുനിൽ, ജൂലി ജോസഫ് എന്നിവർ പ്രസംഗിച്ചു. ഓണസദ്യയും ഓണക്കളികളും കലാപരിപാടികളും നടത്തി. കോരുത്തോട്: സെന്‍റ് ജോർജ് പബ്ലിക് സ്കൂളിൽ ഓണാഘോഷം നടത്തി. സ്കൂൾ മാനേജർ ഫാ. സക്കറിയാസ് ഇല്ലിക്കമുറി ഉദ്ഘാടനം ചെയ്തു. കുട്ടികളും അധ്യാപകരും ഒരുമിച്ച് മെഗാ തിരുവാതിരയും നാടൻ പാട്ടും അവതരിപ്പിച്ചു. തുടർന്ന് കുട്ടികളെ വിവിധ ഗ്രൂപ്പുകളായി തിരിച്ച് മത്സരങ്ങൾ സംഘടിപ്പിച്ചു. ഓണാഘോഷത്തോടനുബന്ധിച്ച് ഓണസദ്യ, കുട്ടികളുടെ വടം വലി മത്സരം എന്നിവ നടത്തി. പ്രിൻസിപ്പൽ ഫാ. മനു കെ. മാത്യു, സ്റ്റാഫ് സെക്രട്ടറി കെ.എസ്. രഘു, പിടിഎ പ്രസിഡന്‍റ് സെബാസ്റ്റ്യൻ ജോസഫ്, പിടിഎ കമ്മിറ്റി അംഗങ്ങൾ തുടങ്ങിയവർ നേതൃത്വം നൽകി. പൂക്കൃഷി വിളവെടുപ്പ് എലിക്കുളം: പഞ്ചായത്തിലെ കുടുംബശ്രീ നടപ്പാക്കിയ ഓണക്കനി - നിറപ്പൊലിമ പദ്ധതിയിൽ ഏഴാംവാർഡിലെ വഞ്ചിമലയിൽ വിളവെടുപ്പ് നടത്തി. പച്ചക്കറി, ബന്ദിപ്പൂ കൃഷികളാണ് നടത്തിയത്. സിഡിഎസ് അംഗം സന്ധ്യാ രാധാകൃഷ്ണന്‍റെ നേതൃത്വത്തിൽ തളിർസംഘമാണ് കൃഷി ചെയ്തത്. പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് വിളവെടുപ്പ് ഉദ്ഘാടനം ചെയ്തു. സിഡിഎസ് ചെയർപേഴ്‌സൺ പി.എസ്. ഷെഹ്ന അധ്യക്ഷത വഹിച്ചു. പഞ്ചായത്ത് വൈസ്പ്രസിഡന്‍റ് സൂര്യമോൾ, അഖിൽ അപ്പുക്കുട്ടൻ, ജിഷമോൾ ടി. ചന്ദ്രൻ, വി.കെ. സിന്ധു, മഞ്ജു പ്രസാദ് എന്നിവർ പങ്കെടുത്തു.

ജനകീയ ഹോട്ടൽ തുറക്കാൻ പഞ്ചായത്ത്‌ കമ്മിറ്റി വോട്ടിട്ടു

എരുമേലി: മുപ്പത് രൂപയ്ക്ക് ഊണ് മതിയെന്ന് ഭരണ പ്രതിപക്ഷ ഭേദമന്യേ ഒരു വിഭാഗം മെംബർമാർ. 40 രൂപ വേണമെന്ന് കുറച്ചു മെംബർമാർ. ഒടുവിൽ അഭിപ്രായ വോട്ടെടുപ്പ് നടത്തിയപ്പോൾ മുപ്പത് രൂപ ഊണിന് ഭൂരിപക്ഷം. എരുമേലി പഞ്ചായത്ത്‌ കമ്മിറ്റിയിലാണ് ജനകീയ ഹോട്ടലിലെ ഊണിന് വില നിശ്ചയിക്കുന്നതിനെ ചൊല്ലിയുണ്ടായ തർക്കം അഭിപ്രായ വോട്ടെടുപ്പ് നടത്തി തീരുമാനിക്കുന്നതിലേക്ക് എത്തിയത്. മാസങ്ങളായി എരുമേലി ടൗണിലെ കുടുംബശ്രീ ജനകീയ ഹോട്ടൽ പ്രവർത്തിക്കുന്നില്ല. ഇത് തുറന്നു പ്രവർത്തിപ്പിക്കുന്നത് സംബന്ധിച്ച് കഴിഞ്ഞ ദിവസം നടന്ന പഞ്ചായത്ത്‌ കമ്മിറ്റി അജണ്ടയിൽ ഉൾപ്പെടുത്തി വിഷയം ചർച്ച ചെയ്തപ്പോഴാണ് ഊണിന്‍റെ വില തർക്കമായി മാറിയത്. മുക്കൂട്ടുതറ ടൗണിലും കുടുംബശ്രീ ജനകീയ ഹോട്ടൽ പ്രവർത്തിക്കുന്നുണ്ട്. ഇവിടെ ഉച്ചയൂണിന് ഈടാക്കുന്നത് 30 രൂപയാണ്. ഈ ഹോട്ടലിന്‍റെ കെട്ടിടത്തിന് മാസം പതിനായിരം രൂപയാണ് വാടക. പഞ്ചായത്താണ് വാടക നൽകുന്നത്. എരുമേലി ടൗണിൽ സ്വകാര്യ കെട്ടിടത്തിൽ ജനകീയ ഹോട്ടൽ പ്രവർത്തിച്ചിരുന്നത് മാസം 12000 രൂപ വാടക നൽകിയാണ്. ഈ വാടകയും പഞ്ചായത്താണ് നൽകിയിരുന്നത്. എന്നാൽ എരുമേലിയിൽ വാടക അൽപം കൂടുതൽ ആയതിനാൽ ഊണിന്‍റെ നിരക്ക് വർധിപ്പിക്കണമെന്ന് ചില മെംബർമാർ കമ്മിറ്റിയിൽ ആവശ്യപ്പെട്ടതാണ് തർക്കമായത്. എരുമേലിയിലും മുക്കൂട്ടുതറയിലും വ്യത്യസ്ത നിരക്കിൽ ഊണ് നൽകുന്നത് തെറ്റാണെന്ന് ചില മെംബർമാർ പറഞ്ഞു. രണ്ടിടത്തും ഒരേ നിരക്ക് മതിയെന്ന് ഇവർ വാദിച്ചതോടെ ഭൂരിപക്ഷ തീരുമാനത്തിന് വേണ്ടി അഭിപ്രായ വോട്ടെടുപ്പ് നടത്തുകയായിരുന്നു. കമ്മിറ്റിയിൽ പങ്കെടുത്ത 20 അംഗങ്ങളിൽ 12 പേർ മുപ്പത് രൂപ നിരക്കിന് അനുകൂലിച്ചു അഭിപ്രായം അറിയിച്ചു. എട്ട് പേർ 40 രൂപ മതിയെന്ന് അറിയിച്ചു. വൈകാതെ ഹോട്ടൽ തുറന്നു പ്രവർത്തിപ്പിക്കാൻ കമ്മിറ്റി തീരുമാനിച്ചു.

ഇടകടത്തിയിൽ വോട്ടിന് ഇനി ദൂരമില്ല : പോളിംഗ് ബൂത്ത്‌ അടുത്താക്കി

മുക്കൂട്ടുതറ: എരുമേലി പഞ്ചായത്തിലെ ഇടകടത്തി ഉമ്മിക്കുപ്പ വാർഡിൽ അടുത്ത് പോളിംഗ് ബൂത്ത്‌ ഉണ്ടായിട്ടും ഏഴ് കിലോമീറ്റർ അകലെയുള്ള ബൂത്തിലേക്ക് വോട്ട് മാറ്റിയത് മൂലം വോട്ടർമാർ അനുഭവിച്ചു കൊണ്ടിരുന്ന ബുദ്ധിമുട്ടുകൾക്ക് പരിഹാരമായി. രണ്ടു പോളിംഗ് ബൂത്തുകളിലെ വോട്ടർമാർ ആണ് ബൂത്ത് അടുത്തുണ്ടായിട്ടും ഏഴ് കിലോമീറ്റർ താണ്ടി വോട്ട് ചെയ്യേണ്ടി വന്നിരുന്നത്. ഇനി ഇവർക്ക് തൊട്ടടുത്തുള്ള ബൂത്തിൽ വോട്ട് ചെയ്യാം. ഇതിനായി ഇവർക്ക് അടുത്തുള്ള ബൂത്തിലേക്ക് വോട്ട് മാറ്റിയെന്ന് തെരഞ്ഞെടുപ്പ് ഉദ്യോഗസ്ഥർ അറിയിച്ചു. ഇടകടത്തിയിലെ ടികെഎംഎം യുപി സ്കൂളിലും പാണപിലാവിൽ എംജിഎം ഗവൺമെന്‍റ് എൽപി സ്കുളുകളിലുമാണ് രണ്ടു ബൂത്തുകൾ ഉണ്ടായിരുന്നത്. കഴിഞ്ഞ തെരഞ്ഞെടുപ്പ് കാലയളവിൽ സങ്കേതിക കാരണങ്ങൾ പ്രകാരം വോട്ടർമാരെ മാറ്റിയതാണ് ബുദ്ധിമുട്ട് സൃഷ്ടിച്ചത്. ഇടകടത്തി ബൂത്തിലെ 460 മുതൽ 499 വരെയും 601 മുതൽ 767 വരെയുള്ള വോട്ടർമാരും പാണപിലാവ് ബൂത്തിലാണ് ഉൾപ്പെടുത്തിയിരുന്നത്. പാണപിലാവ് ബൂത്തിലെ 546 മുതൽ 659 വരെയും 680 മുതൽ 773 വരെയുമുള്ള വോട്ടർമാരാണ് ഇടകടത്തി ബൂത്തിലും ഉൾപ്പെടുത്തിയിരുന്നു. ബൂത്തിലെ വോട്ടർ പട്ടിക തയാറാക്കിയതിൽ സംഭവിച്ച പിഴവുകളാണ് ബൂത്ത്‌ ദൂരെയായി മാറിയത്. പരാതിയെ തുടർന്ന് കളക്ടർ ഇടപെട്ടതോടെയാണ് പിഴവ് പരിഹരിച്ച് വോട്ടർമാരെ തൊട്ടടുത്തുള്ള ബൂത്തിലേക്ക് ഇപ്പോൾ മാറ്റി ഉത്തരവായിരിക്കുന്നത്.

ട്രാൻസ്‌പോർട്ട് വർക്കേഴ്‌സ് യൂണിയൻ സമ്മേളനം

പൊൻകുന്നം: കെഎസ്ആർടിസി പൊൻകുന്നം ഡിപ്പോയിൽ നിന്നുള്ള ദീർഘദൂര സർവീസുകൾ ബസുകളുടെ കാലപ്പഴക്കം മൂലം മിക്ക ദിവസങ്ങളിലും ബ്രേക്ക് ഡൗണായി വഴിയിൽ കിടക്കുകയാണെന്നും സമയത്തിനെത്താത്തതിനാൽ യാത്രക്കാർ കുറഞ്ഞ് വരുമാനനഷ്ടമുണ്ടാകുന്നുവെന്നും കേരള സ്റ്റേറ്റ് ട്രാൻസ്‌പോർട്ട് വർക്കേഴ്‌സ് യൂണിയൻ -ഐഎൻടിയുസി യൂണിറ്റ് സമ്മേളനം ആരോപിച്ചു. പുതിയ ബസുകൾ അനുവദിച്ച് പരിഹാരം കാണണമെന്ന് യോഗം ആവശ്യപ്പെട്ടു. കോൺഗ്രസ് ചിറക്കടവ് മണ്ഡലം പ്രസിഡന്‍റ് സേവ്യർ മൂലകുന്ന് ഉദ്ഘാടനം ചെയ്തു. പ്രസിഡന്‍റ് പി.ടി. ബാബു അധ്യക്ഷത വഹിച്ചു. യൂണിയൻ സംസ്ഥാനസെക്രട്ടറി പി.എസ്. സജി മുഖ്യപ്രഭാഷണം നടത്തി. കെ.എസ്. ജയരാജ്, പി.എസ്. അജീഷ്‌കുമാർ, അൻസാരി ചേനപ്പാടി തുടങ്ങിയവർ പ്രസംഗിച്ചു.

ദേശീയ പാതയിൽ ഇടിയോടിടി

മുണ്ടക്കയം ഈസ്റ്റ്: മഴ കനത്തതോടെ കൊട്ടാരക്കര - ദിണ്ഡിഗൽ ദേശീയപാതയിൽ മുണ്ടക്കയം 35-ാം മൈലിനും കുട്ടിക്കാനത്തിനുമിടയിൽ അപകടങ്ങൾ പെരുകി. ഇന്നലെ രാവിലെ 11 ാടെ മരുതുംമൂടിനു സമീപം രണ്ട് കാറുകളും ഓട്ടോറിക്ഷയും കൂട്ടിയിടിച്ചുണ്ടായ അപകടത്തിൽ യാത്രക്കാർക്കു പരിക്കേറ്റു. ഇരു കാറുകൾക്കും സാരമായ കേടുപാട് സംഭവിച്ചു. കുട്ടിക്കാനം ഭാഗത്തുനിന്നു വന്ന ഇന്നോവ കാർ എതിർ ദിശയിൽ വന്ന മറ്റൊരു കാറിൽ ഇടിക്കുകയായിരുന്നു. ഇടിയുടെ ആഘാതത്തിൽ റോഡിൽ വട്ടംതിരിഞ്ഞ കാർ മറ്റൊരു ഓട്ടോറിക്ഷയിലും ഇടിച്ചു. ബസും കാറും ഇതിന് അര കിലോമീറ്ററിൽ താഴെ മാത്രം ദൂരത്തിൽ കെഎസ്ആർടിസി ബസും കാറും കൂട്ടിയിടിച്ചു. കുട്ടിക്കാനം ഭാഗത്തുനിന്നു മുണ്ടക്കയത്തേക്കു വന്ന കാറിനു മുന്നിൽ മറ്റൊരു വാഹനം ബ്രേക്ക് ചവിട്ടിയപ്പോൾ നിയന്ത്രണംവിട്ട കാർ റോഡിൽ വട്ടംതിരിയുകയും കെഎസ്ആർടിസി ബസിൽ ഇടിക്കുകയുമായിരുന്നു. അപകടത്തിൽ ആർക്കും പരിക്കില്ല. വാഹനത്തിനു സാരമായ കേടുപാട് സംഭവിച്ചിട്ടുണ്ട്. കുഴിയിലേക്ക് ദേശീയപാതയിൽ മുറിഞ്ഞപുഴ വളഞ്ഞങ്ങാനം വെള്ളച്ചാട്ടത്തിനു സമീപം നിയന്ത്രണംവിട്ട മാരുതി 800 കാർ കുഴിയിലേക്കു പതിച്ചു. ബസിനെ മറികടക്കുന്നതിനിടെ എതിർ ദിശയിൽ വന്ന വാഹനം ഇടിക്കാതിരിക്കാൻ വെട്ടിച്ചുമാറ്റിയപ്പോഴാണ് അപകടമുണ്ടായതെന്നു പറയുന്നു. റോഡിനു താഴ്ഭാഗത്തുള്ള ഇല്ലിക്കൂട്ടത്തിലേക്കാണ് കാർ നിയന്ത്രണം വിട്ട് മറിഞ്ഞത്. അപകടത്തിൽ കാർ യാത്രക്കാരൻ അദ്ഭുതകരമായി രക്ഷപ്പെട്ടു. ഉടൻതന്നെ ഹൈവേ പോലീസ് സ്ഥലത്തെത്തി. ചാറ്റൽ മഴയും മൂടൽ മഞ്ഞും അമിത വേഗതയും അശ്രദ്ധയുമാണ് അപകടങ്ങൾ പെരുകാൻ പ്രധാന കാരണം. ദേശീയ പാതയിൽ ഒരാഴ്ചയായി ചാറ്റൽ മഴയും മൂടൽ മഞ്ഞുമുണ്ട്. ഇതു കണക്കാതെ വാഹനങ്ങൾ വേഗമെടുക്കുന്നതാണ് പലപ്പോഴും അപകടം ക്ഷണിച്ചുവരുത്തുന്നത്. ഓണ അവധിക്കാലം ആരംഭിച്ചതോടെ റോഡുകളിൽ വാഹനങ്ങളുടെ എണ്ണവും കൂടിയിട്ടുണ്ട്.

ചങ്ങനാശേരി ബോട്ട് ക്ലബ് നാളെ പുന്നമടയിലേക്ക്

ചങ്ങനാശേരി: 71-ാമത് നെഹ്‌റു ട്രോഫി ജലോത്സവത്തില്‍ മത്സരിക്കുന്ന സിബിസിയുടെ ചമ്പക്കുളം ചുണ്ടന്‍റെ വിജയത്തിന് ചങ്ങനാശേരിക്കാരുടെ അനുഗ്രഹങ്ങള്‍ സ്വീകരിച്ചുകൊണ്ട് സംഘടിപ്പിക്കുന്ന ജലോത്സവ വിളംബര പ്രയാണം ഇന്ന് നടക്കും. വൈകുന്നേരം അഞ്ചിന് മീഡിയാ വില്ലേജില്‍നിന്ന് ആരംഭിക്കുന്ന വര്‍ണ ശബളമായ ഘോഷയാത്ര ഡിവൈഎസ്പി കെ.പി. ടോംസണ്‍ ഫ്ലാഗ് ഓഫ് ചെയ്യും. എന്‍എസ്എസ് സെക്രട്ടറി ഹരികുമാര്‍ കോയിക്കല്‍, എസ്എന്‍ഡിപി യോഗം യൂണിയന്‍ പ്രസിഡന്‍റ് ഗിരീഷ് കോനാട്ട്, പഴയ പള്ളി മുസ്‌ലിം ജമാഅത് പ്രസിഡന്‍റ് മുഹമ്മദ് ഫുവാദ്, സിബിസി ഡയറക്ടര്‍മാരായ ഫാ. സബാസ്റ്റ്യന്‍ പുന്നശേരി, ഫാ. ജോഫി പുതുപ്പറമ്പ് എന്നിവര്‍ പ്രസംഗിക്കും. സെന്‍ട്രല്‍ ജംഗ്ഷന്‍വഴി അഞ്ചുവിളക്ക് സ്‌ക്വയറില്‍ റാലി സമാപിക്കുമ്പോള്‍ അവിടെ നടക്കുന്ന പൊതുസമ്മേളനം ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. സിബിസി ക്യാപ്റ്റന്‍ സണ്ണി തോമസ് ഇടിമണ്ണിക്കല്‍, മര്‍ച്ചന്‍റ്സ് അസോസിയേഷന്‍ പ്രസിഡന്‍റ് ജോണ്‍സണ്‍ പ്ലാന്തോട്ടം, ബോട്ട് ജെട്ടി വികസന സമിതി എക്‌സിക്യുട്ടീവ് അംഗം റോഷന്‍ വാടാപറമ്പില്‍, മീഡിയാ വില്ലേജ് ബര്‍സാര്‍ ഫാ. ലിപിന്‍ തുണ്ടുകളം, ജോബി തൂമ്പുങ്കല്‍ എന്നിവര്‍ പ്രസംഗിക്കും.

കേരള കോണ്‍ഗ്രസ് ധര്‍ണ നടത്തി

ചങ്ങനാശേരി: ചങ്ങനാശേരി നഗരത്തിലെ വിവിധ റോഡുകളുടെ ശോചനീയാവസ്ഥയ്ക്ക് പരിഹാരം കാണുക, ഗതാഗതക്കുരുക്കു പരിഹരിക്കുക, വഴി വിളക്കുകള്‍ പ്രകാശിപ്പിക്കുക, തെരുവുനായകളുടെ ശല്യമൊഴിവാക്കാന്‍ നടപടി സ്വീകരിക്കുക തുടങ്ങി ആവശ്യങ്ങള്‍ ഉന്നയിച്ചുകൊണ്ട് ടൗണ്‍ ഈസ്റ്റ് വെസ്റ്റ് മണ്ഡലം കമ്മിറ്റികളുടെ നേതൃത്വത്തില്‍ മുനിസിപ്പല്‍ ജംഗ്ഷനില്‍ ധര്‍ണ നടത്തി. ഈസ്റ്റ് മണ്ഡലം പ്രസിഡന്‍റ് മാത്യു വര്‍ഗീസ് അധ്യക്ഷത വഹിച്ചു. വെസ്റ്റ് മണ്ഡലം പ്രസിഡന്‍റ് സിബിച്ചന്‍ ഇടശേരിപ്പറമ്പില്‍ വിഷയാവതരണം നടത്തി. പാര്‍ട്ടി സംസ്ഥാന വൈസ് ചെയര്‍മാന്‍ കെ.എഫ്. വര്‍ഗീസ് സമരം ഉദ്ഘാടനം ചെയ്തു. മാത്തുക്കുട്ടി പ്ലാത്താനം, വി.ജെ. ലാലി, സി.ഡി. വത്സപ്പന്‍, ജോര്‍ജുകുട്ടി മാപ്പിളശേരി, ആര്‍. ശശിധരന്‍ നായര്‍, സിബി ചാമക്കാല, മുകുന്ദന്‍ രാജു, ജോബിന്‍ എസ്. കൊട്ടാരം, ജോസുകുട്ടി നെടുമുടി, സന്തോഷ് ആന്‍റണി, സച്ചിന്‍ സാജന്‍, കുര്യൻ, ബേബിച്ചന്‍ സഎന്നിവര്‍ പ്രസംഗിച്ചു.

മാവേലി ഈ വഴി എങ്ങനെ വരും ?

ചങ്ങനാശേരി: നാടും നഗരവും തിരുവോണത്തിമിര്‍പ്പിലേക്കു നീങ്ങുമ്പോള്‍ നഗരത്തിലെ ഒട്ടുമിക്ക റോഡുകളും തകര്‍ച്ചയില്‍. പല റോഡുകളും തകര്‍ന്ന് ഗട്ടറുകള്‍ രൂപപ്പെട്ട് ചെളിക്കുളമാണ്. വാഹനങ്ങളില്‍ വന്നാല്‍ തെന്നി മറിയും. നടന്നാല്‍ കാല്‍തട്ടി വീഴും. ഭൂരിപക്ഷം റോഡുകളുടെയും അവസ്ഥ ഇതുതന്നെ. കഴിഞ്ഞ രണ്ടുവര്‍ഷക്കാലമായി റോഡുകള്‍ക്ക് കാര്യമായ അറ്റകുറ്റപ്പണികള്‍ നടത്താന്‍ നഗരഭരണാധികാരികള്‍ വേണ്ടത്ര നടപടികള്‍ സ്വീകരിക്കാഞ്ഞതാണ് റോഡുകളുടെ അവസ്ഥ ഇത്രയേറെ ശോചനീയമാകാന്‍ കാരണം. നഗരസഭ അധികാരത്തില്‍വന്ന ആദ്യവര്‍ഷങ്ങളില്‍ 37 വാര്‍ഡുകള്‍ക്കും പത്തുലക്ഷം രൂപവീതം ഫണ്ട് അനുവദിച്ച് റോഡ് നിര്‍മാണം നടത്തിയിരുന്നു. തുടര്‍ന്നുള്ള വര്‍ഷങ്ങളില്‍ ഫണ്ട് ഇല്ലാത്തതിന്‍റെ പേരില്‍ നിര്‍മാണ നടപടികള്‍ മന്ദീഭവിച്ചു. ടെന്‍ഡര്‍ നടപടികള്‍ പൂര്‍ത്തീകരിച്ചപ്പോള്‍ കരാര്‍ ഏറ്റെടുക്കാന്‍ കരാറുകാര്‍ വൈമനസ്യം കാട്ടിയതും ഏറ്റെടുത്ത കരാറുകാര്‍ക്ക് മഴ പ്രതിസന്ധിയായതും റോഡ് അറ്റകുറ്റപ്പണികളെ ബാധിച്ചു. പൈപ്പുകള്‍ സ്ഥാപിക്കാന്‍ കുഴിച്ച റോഡുകളും തകര്‍ച്ച നേരിട്ട അവസ്ഥയിലാണ്. മതുമൂല-മോര്‍ക്കുളങ്ങര, അസംപ്ഷന്‍- എസ്ബി കോളജ് റോഡ്, പെരുന്ന മന്നംനഗര്‍, ബോട്ടുജെട്ടി-വണ്ടിപ്പേട്ട തുടങ്ങിയ തകര്‍ന്ന റോഡുകളില്‍ പ്രധാനപ്പെട്ടതാണ്. എന്തേ വഴിവിളക്കുകള്‍ തെളിയാന്‍ ഇത്ര താമസം? നഗരത്തിലെ 37 വാര്‍ഡുകളിലായി അയ്യായിരത്തി അറുനൂറോളം വഴിവിളക്കുകളാണുള്ളത്. ഇതില്‍ മൂവായിരത്തിലേറെ വിളക്കുകള്‍ തെളിഞ്ഞിട്ട് മാസങ്ങളേറെയായി. ളായിക്കാട് മുതല്‍ പാലാത്രച്ചിറവരെയുള്ള എന്‍എച്ച്-183, ചങ്ങനാശേരി കുരിശുംമൂട്, മാര്‍ക്കറ്റ് റോഡ്, പെരുന്ന റെഡ്‌സ്‌ക്വയര്‍ ബൈപാസ് റോഡ് തുടങ്ങിയ റോഡുകളിലെയും ളായിക്കാട്- പാലാത്രച്ചിറ ബൈപാസിലെയും ഭൂരിപക്ഷം വഴിവിളക്കുകളും പ്രകാശിക്കുന്നില്ല. കഴിഞ്ഞ ക്രിസ്മസ് കാലത്തിനുശേഷം വഴിവിളക്ക് തെളിക്കുന്നതിനുള്ള നടപടികള്‍ നടന്നിട്ടില്ല. പല വഴിവിളക്കുകളുടെയും കണക്‌ഷനുകളും തകരാറിലാണ്. ചില വാര്‍ഡുകളില്‍ കൗണ്‍സിലര്‍മാര്‍ ജോലിക്കാരെ നിയോഗിച്ച് വഴിവിളക്കുകള്‍ തെളിക്കുന്ന സാഹചര്യങ്ങളുമുണ്ട്. വഴിവിളക്കുകളില്ലാത്തതുമൂലം നഗരത്തിന്‍റെ പലഭാഗങ്ങളിലും ഇരുട്ടാണ്. വ്യാപാര സ്ഥാപനങ്ങളിലെ ലൈറ്റുകള്‍ അണയ്ക്കുന്നതോടെ നഗരം കൂരിരുട്ടിലാകുകയാണ് പതിവ്. വഴിവിളക്കുകള്‍ തെളിക്കുന്ന ചുമതല പഴയ കരാറുകാരനെ ഏല്‍പ്പിക്കാന്‍ ജൂലൈയില്‍ ചേര്‍ന്ന കൗണ്‍സില്‍യോഗം തീരുമാനിച്ചിരുന്നു. വിളക്കു കത്തിയില്ലെങ്കിലും ലക്ഷക്കണക്കിനു രൂപ നഗരസഭ വൈദ്യുതി ബോര്‍ഡിന് അടയ്‌ക്കേണ്ടി വരുന്നുണ്ട്.

മൂലേക്കടവ് പാലം: സ്ഥലം വിട്ടൊഴിയൽ രേഖകൾ കൈമാറി

ചെമ്പ്: ചെമ്പ് - മറവന്‍തുരുത്ത് പഞ്ചായത്തുകളെ തമ്മില്‍ ബന്ധിപ്പിച്ച് മൂവാറ്റുപുഴയാറിനു കുറകെ നിര്‍മിക്കുന്ന മൂലേക്കടവ് പാലത്തിന്‍റെ സമീപറോഡിന്‍റെ ഭൂമി ഏറ്റെടുക്കല്‍ നടപടികള്‍ പൂര്‍ത്തികരിച്ചു. പാലത്തിന്‍റെ സമീപ റോഡ് നിര്‍മാണത്തിനായി 23 ഭൂവുടമകളില്‍നിന്നായി 48.79 ആര്‍ വസ്തുവാണ് ഏറ്റെടുത്തത്. ഭൂവുടമകള്‍ക്ക് വിതരണം ചെയ്യേണ്ട 2,54,84,451 രൂപ ഭൂവുടമകള്‍ക്ക് കൈമാറിയിരുന്നു. പാലത്തിന്‍റെ ഇരു കരകളില്‍നിന്നുള്ള ഭൂവുടമകളില്‍നിന്ന് ഭൂമിവിട്ടൊഴിയല്‍ രേഖകള്‍ എല്‍എ (കിഫ്ബി) സ്‌പെഷല്‍ തഹസില്‍ദാരുടെ സാന്നിദ്ധ്യത്തില്‍ ഇന്നലെ ഏറ്റുവാങ്ങി കെആര്‍എഫ്ബി അധികൃതര്‍ക്കു കൈമാറി. കിഫ്ബിയില്‍നിന്ന് 25 കോടി രൂപയാണ് പാലം നിര്‍മിക്കുന്നതിനായി അനുവദിച്ചിരിക്കുന്നത്. 210 മീറ്റര്‍ നീളമുള്ള പാലത്തിനു 11 മീറ്റര്‍ വീതിയുണ്ടാകും. ചെമ്പ് പഞ്ചായത്തിലെ അവികസിത പ്രദേശമായി തുടരുന്ന ഏനാദിയിലെ ജനങ്ങള്‍ക്ക് പാലം യാഥാര്‍ഥ്യമാകുന്നതോടെ ഗതാഗതസൗകര്യം വര്‍ധിക്കും. സാധാരണ തൊഴിലാളികളും ഇടത്തരക്കാരും താമസിക്കുന്ന ഏനാദിയുടെ വികസനത്തിനു സഹായകരമായ പാലം താമസിയാതെ യാഥാര്‍ഥ്യമാകുമെന്നതിനാല്‍ ഏനാദിനിവാസികള്‍ വലിയ ആഹ്ലാദത്തിലാണ്. പാലം പൂര്‍ത്തിയാകുന്നതോടെ തലയോലപ്പറമ്പ്, മറവന്‍തുരുത്ത് നിവാസികള്‍ക്ക് മൂലേക്കടവ് പാലത്തിലൂടെ ബ്രഹ്‌മമംഗലത്തെത്തി അരയന്‍കാവ് വഴി എറണാകുളത്തേക്കു പോകാനാകും. ഗതാഗതകുരുക്കില്‍നിന്ന് ഒഴിഞ്ഞിമാറി ഒരു എളുപ്പമാര്‍ഗമായി ഈ പാലവും പാതയും മാറുന്നതോടെ ഏനാദിയുടെ വികസനത്തിനും ആക്കംകൂടും. ജില്ലാ പഞ്ചായത്ത് അംഗം പി.എസ്.പുഷ്പമണി, മറവന്‍തുരുത്ത് പഞ്ചായത്ത് പ്രസിഡന്‍റ് പ്രീതി, വൈസ് പ്രസിഡന്‍റ് വി.ടി. പ്രതാപന്‍, ചെമ്പ് പഞ്ചായത്ത് പ്രസിഡന്‍റ് സുകന്യ സുകുമാരന്‍, വൈസ് പ്രസിഡന്‍റ് കെ.കെ. രമേശന്‍ തുടങ്ങി നിരവധിപേര്‍ ഒപ്പമുണ്ടായിരുന്നു. പാലത്തിന്‍റെ 80 ശതമാനം നിര്‍മാണപ്രവര്‍ത്തനങ്ങള്‍ പൂര്‍ത്തീകരിച്ചുകഴിഞ്ഞു. സമീപറോഡിന്‍റെ ഫൈനല്‍ ഡിസൈനു വരുന്ന കിഫ്ബി മീറ്റിംഗിന്‍ അംഗീകാരം ലഭിച്ചാലുടന്‍ ശേഷിക്കുന്ന നിര്‍മാണപ്രവര്‍ത്തനങ്ങള്‍ കൂടി പൂര്‍ത്തീകരിച്ച് പാലം നാടിനു സമര്‍പ്പാക്കാനാകുമെന്ന് സി.കെ. ആശ എംഎല്‍എ അറിയിച്ചു.

11 ലക്ഷം തട്ടി മുങ്ങിയ പ്രതിയെ ഗുജറാത്തിലെത്തി പോലീസ് പിടികൂടി

കടുത്തുരുത്തി: വെര്‍ച്വല്‍ അറസ്റ്റിലൂടെ വയോധികനായ വൈദികന്‍റെ 11 ലക്ഷം തട്ടിയെടുത്ത കേസിലെ പ്രതിയെ ഗുജറാത്തിലെത്തി പോലീസ് അറസ്റ്റ് ചെയ്തു. സിബിഐ ഉദ്യോഗസ്ഥന്‍ ചമഞ്ഞ് വയോധികനായ വൈദികന്‍റെ പണം തട്ടിയെടുത്ത കേസിലെ പ്രതിയെയാണ് കടുത്തുരുത്തി പോലീസ് അറസ്റ്റ് ചെയ്തത്. ഗുജറാത്ത് വഡോദര ന്യൂ സാമ റോഡില്‍ പഞ്ചം ഹൈറ്റ്‌സിനു സമീപം ഹരികപുര്‍ സൊസൈറ്റിയില്‍ 108ല്‍ മന്ദീപ് സിംഗിനെയാണ് കടുത്തുരുത്തി എസ്എച്ച്ഒ റെനീഷ് ഇല്ലിക്കലിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. ആറിനായിരുന്നു കേസിനാസ്പദമായ സംഭവം. സിബിഐ ഉദ്യോഗസ്ഥരാണെന്നും വൈദീകന്‍റെ അക്കൗണ്ട് വഴി കള്ളപ്പണ ഇടപാട് നടന്നതായും ധരിപ്പിച്ച് വ്യാജ രേഖകള്‍ കാട്ടി ഭീഷണിപ്പെടുത്തിയാണ് തട്ടിപ്പുസംഘം വൈദികനെ കുടുക്കിയത്. തുടര്‍ന്ന് ഇദേഹത്തിന്‍റെ അക്കൗണ്ടില്‍നിന്ന് 11 ലക്ഷം രൂപ ട്രാന്‍സ്ഫര്‍ ചെയ്ത് എടുക്കുകയും ചെയതു. രണ്ടാം ദിവസം വീണ്ടും തട്ടിപ്പുസംഘം വൈദികനെ ഫോണില്‍ ബന്ധപ്പെട്ട് പണം ആവശ്യപ്പെട്ടു. ഇതേത്തുടര്‍ന്ന് വൈദികന്‍ കടുത്തുരുത്തി പോലീസിനെ വിവരം അറിയിച്ചു. ഇതോടെ ജില്ലാ പോലീസ് ചീഫ് എ. ഷാഹുല്‍ ഹമീദിന്‍റെ നിര്‍ദേശാനുസരണം കേസ് അന്വേഷിക്കുന്നതിനായി പ്രത്യേക സംഘം രുപീകരിക്കുകയായിരുന്നു. ഗുജറാത്ത് വഡോദരയിലെ ആക്‌സിസ് ബാങ്കിലെ അക്കൗണ്ടിലാണ് വൈദികന്‍റെ പണം എത്തിയിരുന്നത്. തുടര്‍ന്ന് ഈ അക്കൗണ്ട് പരിശോധിച്ചപ്പോള്‍ 11 ലക്ഷം രൂപ പിന്‍വലിച്ചതായി കണ്ടെത്തി. ഗുജറാത്തില്‍ താമസിക്കുന്ന ഹരിയാന സ്വദേശിയായ മന്ദീപ് സിംഗാണ് പണം പിന്‍വലിച്ചത്. രണ്ടു ചെക്കുകള്‍ ഉപയോഗിച്ച് ബാങ്കില്‍ നേരിട്ടെത്തി ഇയാള്‍ പണം പിന്‍വലിക്കുകയായിരുന്നെന്ന് പോലീസ് അന്വേഷണത്തില്‍ കണ്ടെത്തി. തുടര്‍ന്ന് പോലീസ് സംഘം ഇയാളെ അറസ്റ്റ് ചെയ്യുകയായിരുന്നു. പ്രതിയെ ഗുജറാത്ത് കോടതിയില്‍ ഹാജരാക്കിയ ശേഷം കേരളത്തിലേക്ക് എത്തിക്കും.

ബിന്ദുവിന്‍റെ കുടുംബത്തിന് വീട് നിർമിച്ചു നൽകുന്നു

തലയോലപ്പറമ്പ്: കോട്ടയം മെഡിക്കൽ കോളജ് ആശുപത്രിയിൽ ശുചിമുറി സമുച്ചയം തകർന്നു വീണതിനെത്തുടർന്ന് മരണപ്പെട്ട തലയോലപ്പറമ്പ് സ്വദേശി ഡി. ബിന്ദുവിന്‍റെ കുടുംബത്തിന് വിദ്യാഭ്യാസ വകുപ്പിനു കീഴിലുള്ള എൻഎസ്എസ് പണിതു നൽകുന്ന വീടിന്‍റെ നിർമാണം ആരംഭിച്ചു. ബിന്ദുവിന്‍റെ മരണത്തെത്തുടർന്ന് നിർധന കുടുംബത്തിന് വാസയോഗ്യമായ വീട് നിർമിച്ചുനൽകുമെന്ന് മന്ത്രി ആർ. ബിന്ദു മരണപ്പെട്ട ബിന്ദുവിന്‍റെ വീട് സന്ദർശിച്ചപ്പോൾ വാഗ്ദാനം നൽകിയിരുന്നു. 12.50 ലക്ഷം രൂപ വിനിയോഗിച്ചാണ് വീട് നവീകരിക്കുന്നത്. വീടിന്‍റെ ആസ്ബറ്റോസ് ഷീറ്റ് മേൽക്കൂരയുള്ള അടുക്കളയായി ഉപയോഗിച്ചിരുന്ന ഭാഗം പൂർണമായും പൊളിച്ചുമാറ്റി കുളിമുറിയും ശൗചാലയവും ഉൾപ്പെടുന്ന ഒരു മുറിയും അടുക്കളയും വർക്ക് ഏരിയയും തീർത്ത് നിലവിലുള്ള വീടിനോടു കൂട്ടിച്ചേർത്ത് കോൺക്രീറ്റ് ചെയ്യും. മോശമായ കട്ടിളകളും, വാതിലുകളും, ജനലുകളുമെല്ലാം ഇളക്കിമാറ്റി പുതിയവ യഥാസ്ഥാനത്ത് ഉറപ്പിച്ചുകഴിഞ്ഞു. വീടിന്‍റെ സൺഷെയ്ഡ് ഭാഗം പുതുക്കി. കാലാവസ്ഥ അനുകൂലമായാൽ ഒരു മാസത്തിനകം വീടിന്‍റെ നിർമാണം പൂർത്തിയാക്കാനാകുമെന്നാണ് കരുതുന്നതെന്ന് നിർമാണപ്രവർത്തനങ്ങൾ ഏകോപിപ്പിക്കുന്ന സിപിഎം തലയോലപ്പറമ്പ് ഏരിയാ സെക്രട്ടറി ഡോ. സി.എം. കുസുമൻ പറഞ്ഞു.

യൂത്ത് ഫ്രണ്ട്-എം മഹാറാലിയും പൊതുസമ്മേളനവും 30ന്

കടുത്തുരുത്തി: യൂത്ത് ഫ്രണ്ട് എം കടുത്തുരുത്തി നിയോജക മണ്ഡലം റാലിയും സമ്മേളനവും 30ന് കടുത്തുരുത്തിയില്‍ നടക്കുമെന്ന് യൂത്ത് ഫ്രണ്ട്-എം നിയോജക മണ്ഡലം പ്രസിഡന്‍റ് ബിബിന്‍ വെട്ടിയാനിക്കല്‍, പാര്‍ട്ടി നിയോജകമണ്ഡലം പ്രസിഡന്‍റ് തോമസ് ടി. കീറപ്പുറം എന്നിവര്‍ അറിയിച്ചു. യുവജനശക്തി വിളിച്ചോതുന്ന റാലിയും പൊതുസമ്മേളനവും കേരള യൂത്ത് ഫ്രണ്ട്-എം കടുത്തുരുത്തി നിയോജകമണ്ഡലം കമ്മിറ്റിയുടെ ആഭിമുഖ്യത്തിലാണ് ഒരുക്കിയിട്ടുള്ളതെന്ന് ഭാരവാഹികള്‍ പറഞ്ഞു. 30ന് നാലിന് നിയോജക മണ്ഡലത്തിലെ 11 പഞ്ചായത്തുകളില്‍ നിന്ന് 12 മണ്ഡലം കമ്മിറ്റികളിലെ ആയിരക്കണക്കിന് പ്രതിനിധികള്‍ പരിപാടിയില്‍ പങ്കെടുക്കും. 2,500ലേറെ യുവജനങ്ങള്‍ പങ്കെടുക്കുമെന്ന് ഭാരവാഹികള്‍ അറിയിച്ചു. നാലിന് കടുത്തുരുത്തി ബ്ലോക്ക് ജംഗ്ഷനില്‍നിന്ന് റാലി ആരംഭിക്കും. മണ്ഡലം പ്രസിഡന്‍റുമാരുടെ പിന്നില്‍ നേതാക്കന്മാരും തുടര്‍ന്ന് പ്രവര്‍ത്തകരും അണിനിരക്കും. റാലി കടുത്തുരുത്തി ടൗണിലൂടെയെത്തി തളിയില്‍ ക്ഷേത്രകവാടം വഴി പഞ്ചായത്ത് പാര്‍ക്കിംഗ് ഗ്രൗണ്ടില്‍ സമാപിക്കും. റാലിക്കു ശേഷം ടൗണിലെ പഞ്ചായത്ത് പാര്‍ക്കിംഗ് ഗ്രൗണ്ടില്‍ പ്രത്യേകം തയാറാക്കിയ പന്തലില്‍ പാര്‍ട്ടി ചെയര്‍മാന്‍ ജോസ് കെ. മാണി എംപി സമ്മേളനം ഉദ്ഘാടനം ചെയ്യും. യൂത്ത് ഫ്രണ്ട്-എം കടുത്തുരുത്തി നിയോജകമണ്ഡലം പ്രസിഡന്‍റ് ബിബിന്‍ വെട്ടിയാനിക്കല്‍ അധ്യക്ഷത വഹിക്കും. കേരള കോണ്‍സ്-എം പാര്‍ട്ടി എംഎല്‍എമാരും പാര്‍ട്ടിയുടെയും യൂത്ത് ഫ്രണ്ടിന്‍റെയും സംസ്ഥാന -ജില്ലാ നേതാക്കന്മാരും പങ്കെടുക്കും. ‌ റാലിക്കും പൊതുസമ്മേളനത്തിനും മുന്നോടിയായി 12 മണ്ഡലങ്ങളിലും യൂത്ത് ഫ്രണ്ടിന്‍റെ മേഖലാ സമ്മേളനങ്ങള്‍ നടത്തിയിരുന്നു.

തത്തപ്പള്ളി ക്ഷേത്രത്തില്‍ മോഷണം: പണവും മൊബൈല്‍ ഫോണും നഷ്ടപ്പെട്ടു

കടുത്തുരുത്തി: തത്തപ്പള്ളി വേണുഗോപാല-അന്തിമഹാകാള ക്ഷേത്രത്തില്‍ മോഷണം. സഹശാന്തിയുടെ മൊബൈല്‍ ഫോണും 500 രൂപയും മോഷണം പോയി. ഇന്നലെ പുലര്‍ച്ചെ രണ്ടോടെയാണ് സംഭവം. വിനായക ചതുര്‍ഥി ആഘോഷത്തോടനുബന്ധിച്ചുള്ള അഷ്ടദ്രവ്യ മഹാഗണപതി ഹോമത്തിനുള്ള പ്രസാദ സാധനങ്ങള്‍ തയാറാക്കുവാന്‍ മേല്‍ശാന്തി മുള്ളന്‍കുഴിമന പ്രസാദ് നമ്പൂതിരി, സഹശാന്തി ഇരുവായ്ക്കല്‍ രാജഗോപാല്‍ നമ്പൂതിരി എന്നിവര്‍ പുലര്‍ച്ചെ ഒന്നരയോടെതന്നെ ഉണര്‍ന്നിരുന്നു. തിടപ്പള്ളിയില്‍ പ്രസാദം തയാറാക്കിക്കൊണ്ടിരുന്നപ്പോള്‍ ഇതുവഴി നടന്നുവന്ന ഒരു യുവാവ് തിടപ്പള്ളിയുടെ അടുത്ത മുറിയില്‍ ഇരുന്ന സഹശാന്തിയുടെ മൊബൈല്‍ ഫോണും പാത്രത്തില്‍ സൂക്ഷിച്ചിരുന്ന വഴിപാടായി ലഭിച്ച തുകയും മോഷ്ടിക്കുകയാണുണ്ടായതെന്ന് പോലീസില്‍ നല്‍കിയ പരാതിയില്‍ പറയുന്നു. എന്തോ ശബ്ദംകേട്ടു മേല്‍ശാന്തി ഇറങ്ങിവന്നപ്പോള്‍ മോഷ്ടാവ് ഓടി മറയുകയാണുണ്ടായത്. ഓടിപ്പോകുന്ന വഴി അയയില്‍ കിടന്ന ഉടയാട എടുത്തു തലയിൽ ഇടുകയും ചെയ്തു. ശാന്തിമാര്‍ പിറകേ ചെന്നെങ്കിലും മോഷ്ടാവ് ഓടി മറഞ്ഞു. പെട്ടിയില്‍ക്കിടന്ന ആറായിരത്തോളം വരുന്ന തുക തലേന്ന് വൈകൂന്നേരം ഇവിടെനിന്നു മാറ്റിയിരുന്നു. അതിനാല്‍ ചെറിയ തുകയും 10,000 രൂപ വിലവരുന്ന മൊബൈല്‍ ഫോണും മാത്രമേ നഷ്ടമായുള്ളൂ. തത്തപ്പള്ളി ക്ഷേത്രാങ്കണത്തിലും സമീപത്തുള്ള പുരയിടത്തിലും അസമയങ്ങളില്‍ ബൈക്കിലെത്തുന്ന യുവാക്കള്‍ കൂട്ടംകൂടിയിരിക്കുന്നത് പതിവാണെന്ന് ക്ഷേത്രോപദേശക ഭാരവാഹികള്‍ പറയുന്നു. ക്ഷേത്രത്തിനു ചുറ്റുമതില്‍ പൂര്‍ണമല്ലാത്തതിനാല്‍ അസമയത്തു ക്ഷേത്രത്തില്‍ ആളുകള്‍ കടന്നുകയറുന്നതു തടയ‌ാന്‍ സാധിക്കുന്നില്ലെന്ന് ഉപദേശക സമിതി സെക്രട്ടറി സി.എന്‍. രാജീവ് പറഞ്ഞു. ചുറ്റുമതില്‍ നിര്‍മാണം പൂര്‍ത്തിയാക്കാന്‍ തിരുവിതാംകൂര്‍ ദേവസ്വം ബോര്‍ഡ് നടപടിയെടുക്കണമെന്നും അദേഹം ആവശ്യപ്പെട്ടു. മോഷണം സംബന്ധിച്ച് ദേവസ്വം ബോര്‍ഡ് അധികൃതരും ശാന്തിമാരും ക്ഷേത്രോപദേശക സമിതിയും കടുത്തുരുത്തി പോലീസില്‍ പരാതി നല്‍കി.

കടുത്തുരുത്തി-പിറവം റോഡിൽ കൈലാസപുരത്ത് കലുങ്ക് നിര്‍മാണം ആരംഭിച്ചു

കടുത്തുരുത്തി: മഴക്കാലത്ത് വെള്ളക്കെട്ട് പ്രശ്‌നം മൂലം സ്ഥിരമായി യാത്രാദുരിതം അനുഭവിക്കുന്ന കടുത്തുരുത്തി-പിറവം റോഡിലെ പ്രതിസന്ധി പരിഹരിക്കുന്നതിനു വേണ്ടി കൈലാസപുരം ക്ഷേത്രത്തിനു സമീപത്ത് കലുങ്ക് നിര്‍മാണ പ്രവര്‍ത്തനങ്ങള്‍ക്കു തുടക്കം കുറിച്ചതായി മോന്‍സ് ജോസഫ് എംഎല്‍എ അറിയിച്ചു. രണ്ടു മാസത്തിനുള്ളില്‍ കലുങ്ക് നിര്‍മാണ പ്രവര്‍ത്തനങ്ങള്‍ പൂര്‍ത്തീകരിക്കും. കൈലാസപുരം ക്ഷേത്രഭാഗത്ത് വെള്ളക്കെട്ടു മൂലം സ്ഥിരമായി യാത്രാക്ലേശം നേരിടുന്ന പ്രതിസന്ധിക്ക് പുതിയ കലുങ്ക് നിര്‍മാണത്തിലൂടെ കഴിയുമെന്നാണ് കരുതുന്നത്. ‌കടുത്തുരുത്തി - പിറവം റോഡില്‍ നടന്നുവരുന്ന നിര്‍മാണ പ്രവര്‍ത്തനങ്ങള്‍ വരുംദിവസങ്ങളില്‍ ത്വരിതപ്പെടുത്തും. റോഡ് നിര്‍മാണ സാധനസാമഗ്രികളുടെ ലഭ്യതക്കുറവ് ഇപ്പോള്‍ പ്രതിസന്ധി ഉണ്ടാക്കിയിട്ടുണ്ട്. ഇക്കാര്യങ്ങള്‍ പരിഹരിച്ച് അടുത്തഘട്ട നിര്‍മാണ പ്രവര്‍ത്തനങ്ങള്‍ സമയ ബന്ധിതമായി നടപ്പാക്കുന്നതിന് നടപടി സ്വീകരിച്ചിട്ടുണ്ട്. റോഡ് നിര്‍മാണ പ്രവര്‍ത്തനങ്ങള്‍ ബലവത്തായി നടപ്പാക്കുന്നതിനും പൊടിശല്യം ഒഴിവാക്കുന്നതിനും ഉപകരിക്കുന്ന വിധത്തില്‍ വരുംദിവസങ്ങളില്‍ റോഡ് വികസന ജോലികള്‍ നടപ്പാക്കും. കടുത്തുരുത്തി മുതല്‍ അറുനൂറ്റിമംഗലം വരെയുള്ള റോഡ് നിര്‍മാണ പ്രവര്‍ത്തനങ്ങള്‍ ത്വരിതപ്പെടുത്തുന്നതിന് പൊതുമരാമത്ത് വകുപ്പിന്‍റെ മേല്‍നോട്ടത്തില്‍ നടപടി സ്വീകരിച്ചിട്ടുണ്ട്.

എംഡിഎംഎയുമായി യുവാവ് പിടിയിൽ

വൈക്കം: വൈക്കത്ത് എംഡിഎംഎയുമായി യുവാവ് പിടിയിൽ. വൈക്കം വൈക്കപ്രയാർ കൊച്ചുകണിയാംതറ വിഷ്ണുവി.ഗോപാലി (32) നെയാണ് 34.28 ഗ്രാം എംഡിഎംഎയുമായി ജില്ലാ പോലീസ് മേധാവിയുടെ ലഹരിവിരുദ്ധ സ്ക്വാഡും വൈക്കം പോലീസും ചേർന്ന് വൈക്കപ്രയാറിലെ വീട്ടിൽനിന്നാണ് അറസ്റ്റ് ചെയ്തത്. ഇയാളുടെ വീട്ടിലെ അടുക്കളയിൽ മസാലകൾ സൂക്ഷിക്കുന്ന ടിന്നിൽ ഒളിപ്പിച്ചുവച്ചനിലയിലാണ് നിരോധിത ലഹരിവസ്തുവായ എംഡിഎംഎ കണ്ടെടുത്തത്. ഇയാളുടെ പക്കൽനിന്ന് എംഡിഎംഎ നിശ്ചിത അളവിൽ തൂക്കുന്നതിനുള്ള കാൽക്കുലേറ്ററിന്‍റെ വലിപ്പമുള്ള ഡിജിറ്റൽ ത്രാസ്, ലഹരിവസ്തു നിറയ്ക്കാനുള്ള ചെറിയ പ്ലാസ്റ്റിക് കവർ, ലഹരിവസ്തു വലിക്കുന്നതിനുള്ള വസ്തുവടക്കം പോലീസ് വീട്ടിൽനിന്നു പിടികൂടി. ബംഗളൂരുവിൽ തങ്ങുന്ന ഇയാൾ ഇന്നലെ നാട്ടിലെത്തുമെന്നും വിൽപ്പനക്കായിലഹരിവസ്തുക്കൾ കൊണ്ടുവരുമെന്നും പോലീസിന് രഹസ്യവിവരം ലഭിച്ചതിനെത്തുടർന്ന് ഇയാളുടെ നീക്കങ്ങൾ പോലീസ് നിരീക്ഷിച്ചുവരികയായിരുന്നു.ഇന്നലെ ഉച്ചകഴിഞ്ഞ് 2.30ന് പോലീസ് എത്തി നടത്തിയ പരിശോധനയിലാണ് ലഹരിവസ്തുകണ്ടെത്തിയത്. ബംഗളൂരുവിൽനിന്ന് വിൽപനയ്ക്കായാണ് എംഡിഎംഎ കൊണ്ടുവന്നതെന്ന് ചോദ്യം ചെയ്യലിൽ ഇയാൾ പോലീസിനോടു പറഞ്ഞു. 2023ൽ അരലിറ്റർ ഹാഷിഷ് ഓയിൽ കൈവശം വച്ചതുമായി ബന്ധപ്പെട്ട് ബാംഗ്ലൂർ ദേവനഹള്ളി പോലീസ് ഇയാൾക്കെതിരേ കേസെടുത്തിട്ടുണ്ട്. 2024ൽ ഇയാളെ എംഡിഎംഎയുമായി വൈക്കം എക്സൈസും പിടികൂടിയിരുന്നു. കോട്ടയം ജില്ലാ പോലീസ് മേധാവി ഷാഹുൽ ഹമീദിനു ലഭിച്ച രഹസ്യവിവരത്തിന്‍റെ അടിസ്ഥാനത്തിൽ വൈക്കം ഡി വൈ എസ്പി പി.ബി. വിജയന്‍റെ നിർദേശപ്രകാരം വൈക്കം എസ്എച്ച്ഒ എസ്. സുകേഷിന്‍റെ നേതൃത്വത്തിൽ ജൂണിയർ എസ്ഐ ജി. വിഷ്ണു, എഎസ്ഐ പ്രീതിജ്, സീനിയർ സിവിൽ പോലീസ് ഓഫീസർമാരായ വിജയശങ്കർ, ജോസ് മോൻ, ഷാമോൻ, സിവിൽ പോലീസ് ഓഫീസർമാരായ സുധീഷ്, രതീഷ്, വനിതാ സിവിൽ പോലീസ് ഓഫീസർ നെയ്തിൽ ജ്യോതി എന്നിവരടങ്ങുന്ന സംഘവും ജില്ലാ പോലീസ് മേധാവിയുടെ ഡാൻസാഫ് ടീമും ചേർന്നാണ് പ്രതിയെ അറസ്റ്റ് ചെയ്തത്. പ്രതിയെ കോടതിയിൽ ഹാജരാക്കും. വിപണിയിൽ ലക്ഷങ്ങൾ വില വരുന്ന മയക്കുമരുന്നാണ് കണ്ടെത്തിയത്.

ഓമല്ലൂര്‍ കനാല്‍ സൗന്ദര്യവത്കരിക്കുന്നു

കുറുപ്പന്തറ: ഓമല്ലൂര്‍ കനാല്‍ സൗന്ദര്യവത്കരണത്തടൊപ്പം ഓമല്ലൂര്‍ കനാല്‍ പ്രദേശത്ത് കിഡ്‌സ് പാര്‍ക്കും ഓപ്പണ്‍ ജിം ഉള്‍പ്പെടുന്ന വിനോദ-വിജ്ഞാന ഹാപ്പിനസ് പാര്‍ക്കെന്ന സ്വപ്നവും പൂവണിയുന്നു. ഓമല്ലൂര്‍ കനാല്‍ പ്രദേശത്ത് ഉഴവൂര്‍ ബ്ലോക്ക് പഞ്ചായത്ത് വിഭാവനം ചെയ്യുന്ന പാര്‍ക്കിന‌ു വേണ്ടിയുള്ള പ്രവര്‍ത്തനം അവസാന റീച്ചിലാണ്. 1.5 കിലോമീറ്റര്‍ ദൈര്‍ഘ്യം വരുന്ന കനാലും പരിസരവും മോടിപിടിപ്പിച്ചു സൗന്ദര്യവത്കരിക്കാന്‍ പരിസരവാസികളായ നാല്പ തോളം കുടുംബങ്ങള്‍ ചേര്‍ന്നുണ്ടാക്കിയ വീ കാന്‍ സര്‍വീസ് ആന്‍ഡ് ചാരിറ്റബിള്‍ ഫൗണ്ടേഷനാണ് പ്രവര്‍ത്തനങ്ങള്‍ ഏകോപിപ്പിക്കുന്നത്. ജില്ലാ പഞ്ചായത്തിന്‍റെ ആഭിമുഖ്യത്തില്‍ കനാല്‍ പരിസരം ശുചികരിക്കുന്നതിനും മാനസികോല്ലാസത്തിനുമായി ടൈലുകള്‍ വിരിച്ചു മനോഹരമാക്കാനുള്ള പദ്ധതിക്കു സാങ്കേതികാനുമതി ലഭ്യമായിട്ടുണ്ട്. കനാല്‍പ്രദേശം ഫലവൃക്ഷത്തൈകളും തണല്‍മരങ്ങളും ഉദ്യാനങ്ങളും നട്ടുപരിപാലിച്ചു ചിത്രശലഭങ്ങളെയും മറ്റും ആകര്‍ഷിക്കാന്‍ ഉദ്ദേശിച്ചുള്ള മാഞ്ഞൂര്‍ പഞ്ചായത്തിന്‍റെ പദ്ധതിയും പുരോഗമിക്കുന്നു. കനാല്‍ വശങ്ങളില്‍ മണ്ണൊലിപ്പു തടയുന്നതിനുള്ള കയര്‍ ഭൂവസ്ത്രം ധരിക്കുന്നതിനുള്ള അനുമതി ലഭിച്ചതോടെ, ഇറിഗേഷന്‍ വകുപ്പുമായി മാഞ്ഞൂര്‍ പഞ്ചായത്ത് ധാരണാപത്രത്തില്‍ ഒപ്പുവച്ചു. കയര്‍ ഭൂവസ്ത്രത്തിനിടെയില്‍ പേള്‍ ഗ്രാസ് വച്ചുപിടിപ്പിച്ചുകൊണ്ട് കനാല്‍ പരിസരം പച്ചപ്പരവതാനി വിരിച്ചു സൗന്ദര്യവത്കരണത്തിന് മാറ്റുകൂട്ടുന്നതിനുള്ള ശ്രമങ്ങളും നടത്തിവരികയാണ്. കനാല്‍ പ്രദേശത്തുള്ള അപകടസാധ്യത നിറഞ്ഞ ചില പ്രദേശങ്ങളില്‍ മോന്‍സ് ജോസഫ് എംഎൽഎ നല്‍കുന്ന ഫണ്ടുപയോഗിച്ചു ക്രാഷ് ബാരിയര്‍ സ്ഥാപിക്കാനുള്ള പദ്ധതിയുടെ എസ്റ്റിമേറ്റ് എടുത്തു ഭരണാനുമതിക്കായി കാത്തിരിക്കുകയാണ്. ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാല മുന്‍കൈയെടുത്ത് പദ്ധതി പ്രദേശത്തിന്‍റെ പാലാ റോഡ് ജംഗ്ഷനില്‍ മിനി ഹൈമാസ്റ്റിനുള്ള അനുമതി ലഭ്യമാക്കിയിട്ടുണ്ട്. കോണ്‍ക്രീറ്റ് പൊളിഞ്ഞുപോയ കാനാലിനുള്ളിലെ ഭാഗം നന്നാക്കുന്നതിനായി മന്ത്രി റോഷി അഗസ്റ്റിന്‍ പത്തു ലക്ഷം രൂപ അനുവദിച്ചിട്ടുണ്ട്. ഇതിന്‍റെ എസ്റ്റിമേറ്റെടുത്ത് കൈമാറിയിട്ടുണ്ട്. നടപ്പു വര്‍ഷം വിവിധ പദ്ധതികള്‍ക്കായി ഉഴവൂര്‍ ബ്ലോക്ക് പഞ്ചായത്ത് പത്തു ലക്ഷം രൂപയും ജില്ലാ പഞ്ചായത്ത് 15 ലക്ഷം രൂപയും എംഎല്‍എയുടെ ആസ്തി വികസനഫണ്ടില്‍നിന്നു ക്രാഷ് ബാരിയര്‍ സ്ഥാപിക്കാനുള്ള നടപടകളുമാണ് പുരോഗമിക്കുന്നത്. പദ്ധതി പ്രദേശത്തുണ്ടായിരുന്ന അനധികൃത കൃഷികള്‍ ഫൗണ്ടേഷനംഗങ്ങളുടെ ശ്രമഫലമായി മാറ്റുകയും നിലവില്‍ വഴിയാത്രക്കാര്‍ക്കു തടസമായി നില്‍ക്കുന്ന വൈദ്യുതി പോസ്റ്റുകള്‍ വശങ്ങളിലേക്കു മാറ്റിസ്ഥാപിക്കുവാനുള്ള ശ്രമങ്ങളും ഫൗണ്ടേഷന്‍ നടത്തുന്നുണ്ട്. പദ്ധതി പ്രദേശത്തിന് സമ്മര്‍ ഗ്രീന്‍ - വേനല്‍ പച്ച എന്നാണ് നാമകരണം ചെയ്തിട്ടുള്ളത്. കുട്ടികള്‍ക്ക് കളിക്കാനും ഉല്ലസിക്കാനും പദ്ധതി പ്രദേശം അന്തരീക്ഷ മലിനീകരണത്തില്‍നിന്നു തടയുന്നതിനുമായുള്ള വിവിധ പദ്ധതികളുടെ പണിപ്പുരയിലാണെന്ന് ഫൗണ്ടേഷന്‍ ഭാരവാഹികളായ അഡ്വ. ജെയ്‌സണ്‍ പാളിയില്‍, ഡോ. ജെയ്‌സണ്‍ പി. ജേക്കബ്, പീറ്റര്‍ ജോസ്, അപ്പച്ചായി പാളിയില്‍, പി.ടി. മനുരാജ് എന്നിവര്‍ അറിയിച്ചു.

മെഡി. കോളജിൽ വിദ്യാർഥിനിക്ക് തെരുവുനായയുടെ കടിയേറ്റു

ഗാന്ധിനഗർ: കോട്ടയം മെഡിക്കൽ കോളജ് ആശുപത്രി പരിസരത്തെ തെരുവ് നായ്ക്കളുടെ ശല്യം രൂക്ഷമാകുന്നു. കഴിഞ്ഞ ദിവസം അഞ്ചാം വർഷ മെഡിക്കൽ വിദ്യാർഥിനിയെ നായ കടിച്ചു. ലേഡീസ് ഹോസ്റ്റലിൽനിന്നു കോളജിലേക്ക് വരുമ്പോൾ കൂട്ടംകൂടിനിന്ന തെരുനായ്ക്കളിൽ ഒന്ന് വിദ്യാർഥിനിയെ കടിക്കുകയായിരുന്നു. ഭീതിയിലായ വിദ്യാർഥി സഹപാഠികളെ വിളിച്ചാണ് അത്യാഹിത വിഭാഗത്തിൽ പ്രവേശിക്കപ്പെട്ടത്.

സര്‍ക്കാരിന്‍റെ നെല്ലുനയത്തിനെതിരേ മങ്കൊമ്പില്‍ നെല്‍കര്‍ഷക പ്രതിഷേധം

ചങ്ങനാശേരി: കേന്ദ്രസര്‍ക്കാര്‍ അരിയുടെ വില നല്‍കുമ്പോള്‍ നെല്ലിന്‍റെ വില നല്‍കാമെന്നു വ്യക്തമാക്കിയുള്ള സംസ്ഥാന സര്‍ക്കാറിന്‍റെ പുതിയ നെല്ലുസംഭരണ നയപ്രഖ്യാപനം ഒരു രീതിയിലും നെല്‍ കര്‍ഷകര്‍ക്ക് അംഗീകരിക്കാനാവില്ലെന്ന് നെല്‍ കര്‍ഷക സംരക്ഷണ സമിതി രക്ഷാധികാരി വി.ജെ. ലാലി സപ്ലൈകോ പാഡിയുടെ 2025-26 വര്‍ഷത്തെ നെല്ല് സംഭരണ നയത്തിലെ വികലതകള്‍ക്കെതിരേ നെല്‍ കര്‍ഷക സംരക്ഷണ സമിതി സംസ്ഥാന ഭാരവാഹികള്‍ മങ്കൊമ്പ് പാഡി മാര്‍ക്കറ്റിംഗ് ഓഫീസിന് മുന്നില്‍ സംഘടിപ്പിച്ച സമര പരിപാടി പ്രതിഷേധാഗ്‌നി-ആഗ് ഉദ്ഘാടനം ചെയ്യുകയായിരുന്നു അദ്ദേഹം. വൈസ് പ്രസിഡന്‍റ് കെ.ബി. മോഹനന്‍ അധ്യക്ഷത വഹിച്ചു. ജനറല്‍ സെക്രട്ടറി സോണിച്ചന്‍ പുളുങ്കുന്ന്, വര്‍ക്കിംഗ് പ്രസിഡന്‍റ് പി.ആര്‍. സതീശന്‍, ലാലിച്ചന്‍ പള്ളിവാതുക്കല്‍, പി. വേലായുധന്‍ നായര്‍, ഷാജി മുടന്താഞ്ഞിലി, ജോസി കുര്യന്‍, റോയി ഊരാംവേലി, വിശ്വനാഥപിള്ള ഹരിപ്പാട്, തോമാച്ചന്‍ ഇല്ലിക്കല്‍, കറിയാച്ചന്‍ ചേന്നങ്കര, സുഭാഷ് പറമ്പിശേരി, ജി. സൂരജ്, റാഫി ജോസ് മോഴൂര്‍, ജോജി തോമസ് തുടങ്ങിയവര്‍ പ്രസംഗിച്ചു.

അധിക ഡ്യൂട്ടി: മെഡി. കോളജ് ആശുപത്രിയിൽ സെക്യൂരിറ്റി ജീവനക്കാർ പണിമുടക്കി

ഗാന്ധിനഗർ: കോട്ടയം മെഡിക്കൽ കോളജിൽ സ്വകാര്യ ഏജൻസി മുഖേന നിയമിക്കപ്പെട്ട സെക്യൂരിറ്റി ജീവനക്കാർ പണിമുടക്കി. അഞ്ച് സ്ത്രീകളടക്കം 15 പേരാണ് ഡ്യൂട്ടി ചെയ്യുന്നത്. എട്ടു മണിക്കൂർ ഡ്യൂട്ടിയും 18,000 രൂപയും നാല് ഓഫ് എന്നുമായിരുന്നു സ്വകാര്യ മാനേജ്മെന്‍റുമായി സെക്യൂരിറ്റിക്കാർ വാക്കാൽ ഉടമ്പടി ഉണ്ടാക്കിയിരുന്നത്. എന്നാൽ ചൊവ്വാഴ്ച രാത്രി മാനേജ്മെന്‍റ് പ്രതിനിധികൾ മെഡിക്കൽ കോളജിൽ എത്തുകയും 12 മണിക്കൂർ ജോലി ചെയ്യണമെന്ന് ഡ്യൂട്ടിയിലുള്ളവരോട് ആവശ്യപ്പെടുകയും ചെയ്തു. ഇന്നലെ രാവിലെ ഡ്യൂട്ടിക്കായി ഇവർ എത്തിയപ്പോഴാണ് രാത്രിയിൽ ഡ്യൂട്ടിയിലുണ്ടായിരുന്നവർ ഏജൻസി പറഞ്ഞ കാര്യം സഹപ്രവർത്തകരെ അറിയിച്ചത്. തുടർന്ന് മുഴുവൻ പേരും ഡ്യൂട്ടി ബഹിഷ്കരിച്ചു. പിന്നീട് രാവിലെ 11 ഓടെ ഏജൻസി മാനേജർ മെഡിക്കൽ കോളജിലെത്തി പണിമുടക്കിയ സെക്യൂരിറ്റി ജീവനക്കാരുമായി സംസാരിച്ചു. തുടർന്ന് 12 മണിക്കൂർ ഡ്യൂട്ടിയും 23,000 രൂപ ശബളവും നാല് ഓഫും കൊടുക്കാമെന്ന ധാരണയിൽ ഇവർ ഡ്യൂട്ടിക്ക് കയറി. ‌ ഡ്യൂട്ടിയിൽ കയറി ഒരു മണിക്കൂർ കഴിഞ്ഞപ്പോഴാണ് അറിയുന്നത് അഞ്ചു സ്ത്രീ ജീവനക്കാരിൽ രണ്ടു പേർ വേണ്ടെന്നും സ്ത്രീ ജീവനക്കാർക്ക് രാത്രികാല ഡ്യൂട്ടി വേണ്ടെന്നുമാണ് ഏജൻസി തീരുമാനമെന്നത്. വളരെ കുറഞ്ഞ തുകയ്ക്കാണ് മെഡിക്കൽ കോളജിലെ സെക്യൂരിറ്റിക്കാരെ നിയമിക്കുന്നതിന് ക്വട്ടേഷൻ പിടിച്ചത്. അതുകൊണ്ട് കൂടുതൽ തുക വേതനമായി നൽകാൻ കഴിയില്ല. വനിതാ സെക്യൂരിറ്റിക്കാർക്ക് ആശുപത്രി അധികൃതർ താമസസൗകര്യം ക്രമീകരിച്ചു തരാത്തതിനാൽ ദിവസേന പോയി വരുന്ന വനിതകൾക്ക് മാത്രമേ ഡ്യൂട്ടി അവസരം നൽകാൻ പറ്റുകയുള്ളൂവെന്നും ഏജൻസി മാനേജർ എ.വി. തോമസ് പറഞ്ഞു

വാകത്താനം സെന്‍റ് ജയിംസ് പള്ളിയിലെ ‌മോഷണം: പ്രതികൾ പിടിയിൽ

വാകത്താനം: വാകത്താനത്തെ പള്ളിയില്‍നിന്നു സ്വര്‍ണവും പൂജാപാത്രങ്ങളും മോഷ്ടിച്ച കേസിലെ പ്രതികളെ പിടികൂടി. തിരുനെല്‍വേലി തെങ്കാശി ലക്ഷ്മിഭവനത്തില്‍ വസന്തകുമാര്‍ (54), പേരൂര്‍ പുട്ടത്തങ്കല്‍ വി.എസ്. ശശി(71), അതിരമ്പുഴ പേമലമുകളില്‍ ഉദയകുമാര്‍ (61) എന്നിവരെയാണ് വാകത്താനം- കോട്ടയം വെസ്റ്റ് പോലീസ് സംഘങ്ങളുടെ നേതൃത്വത്തില്‍ അറസ്റ്റ് ചെയ്തത്. വാകത്താനം തൃക്കോതമംഗലം സെന്‍റ് ജയിംസ് ഓര്‍ത്തഡോക്‌സ് പള്ളിയുടെ ഓഫീസ് മുറിയും വികാരിയുടെ മുറിയും കുത്തിത്തുറന്ന് പൂജാ പാത്രവും അലമാരയില്‍ സൂക്ഷിച്ചിരുന്ന 10 സ്വര്‍ണ താലിയും മോഷ്ടിച്ചു കളയുകയായിരുന്നു സംഘം. ഇക്കഴിഞ്ഞ ജൂണ്‍ 28, 29 തീയതികളിലാണ് പ്രതികള്‍ മോഷണം നടത്തിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

അക്ഷരനഗരിക്ക് ഇത്തവണ ഹൈടെക് ഓണം : ഓണം ഫെസ്റ്റിന് ഇന്നു തുടക്കം

കോട്ടയം: അക്ഷരനഗരിയായ കോട്ടയത്തിന് ഇത്തവണത്തെ ഓണം ഹൈടെക്. ഇന്നു മുതല്‍ നാഗമ്പടം മൈതാനത്ത് ആരംഭിക്കുന്ന കോട്ടയം ഓണം ഫെസ്റ്റില്‍ കാഴ്ചകള്‍ എല്ലാം നിര്‍മിത ബുദ്ധിയുടെയും റോബോട്ടിക്‌സിന്‍റെയും സഹായത്തോടെ തയാറാക്കിയിട്ടുള്ളതാണ്. ഇന്ത്യയില്‍ ഏറ്റവും വലിയ സൂപ്പര്‍ റിയാലിറ്റി ഡോം തിയറ്റര്‍, മനുഷ്യ റോബോട്ടുകള്‍, റോബോ നായകുട്ടികള്‍, അന്യഗ്രഹ ജീവികളുടെ ലോകമായ അവതാര്‍ വേള്‍ഡ് തുടങ്ങി അനവധി മായിക കാഴ്ചകളാണ് ഓണം ഫെസ്റ്റ് പവലിയനില്‍ ഒരുക്കിയിട്ടുള്ളത്. ഇന്ന് ഉച്ചകഴിഞ്ഞ് 3.30ന് കോട്ടയം നഗരസഭാ അധ്യക്ഷ ബിന്‍സി സെബാസ്റ്റ്യന്‍ ഓണം ഫെസ്റ്റ് ഉദ്ഘാടനം ചെയ്യും. ഫെസ്റ്റിനോടനുബന്ധിച്ചു വ്യാപാര വാണിജ്യ മേള, വിശാലമായ ഫുഡ് കോര്‍ട്ട്, ഹൈടെക് അമ്യൂസ്‌മെന്‍റ് പാര്‍ക്ക്, നഴ്‌സറി എന്നിവയും സജ്ജീകരിച്ചിട്ടുണ്ട്. വ്യാപാര മേളയില്‍ ഫര്‍ണിച്ചര്‍, കിച്ചന്‍ ടൂള്‍സ്, ക്രോക്കറി, ബെഡ് ഷീറ്റ്, ഫാന്‍സി, കിഡ്സ് ടോയ്സ്, കോഴിക്കോടന്‍ ഹല്‍വ, പഴയകാല മിഠായി തുടങ്ങിയ സാധനങ്ങള്‍ ആദായ വിലയ്ക്ക് വാങ്ങാന്‍ കഴിയും. വിവിധയിനം തൈകളുടെയും വിത്തുകളുടെയും വില്‍പനയുണ്ട്. സെപ്റ്റംബര്‍ 14വരെ എല്ലാ ദിവസവും രാവിലെ 11 മുതല്‍ രാത്രി 10വരെയാണ് ഫെസ്റ്റ്. ടിക്കറ്റ് നിരക്ക് 100 രൂപ. അഞ്ചുവയസു വരെയുള്ള കുട്ടികള്‍ക്ക് പ്രവേശനം സൗജന്യമാണ്. ഫോൺ - 9747964954, 7306513972, 9846890290

അഖില്‍ സി. വര്‍ഗീസ്- അവിശ്വസനീയ തട്ടിപ്പുകഥയിലെ നായകൻ

കോട്ടയം: നഗരസഭയിലെ രണ്ടരക്കോടി തട്ടിപ്പുകാരന്‍ അഖില്‍ സി. വര്‍ഗീസ് നയിച്ചത് ആഡംബരജീവിതം. അമ്മ പി. ശ്യാമളയുടെ അക്കൗണ്ടില്‍ ലഭിച്ചിരുന്ന തട്ടിപ്പുപണം ഓരോ മാസവും കൃത്യമായി തന്‍റെ പല അക്കൗണ്ടുകളിലേക്കു മാറ്റിയിരുന്ന പ്രതി, ഈ തുക ഉപയോഗിച്ച് ആഡംബര ജീവിതമാണ് നയിച്ചിരുന്നതെന്നു പോലീസ് സംഘം കണ്ടെത്തി. നാലു വര്‍ഷം തുടര്‍ന്ന തട്ടിപ്പ് വഴിയാണ് കൊല്ലം സ്വദേശിയായ അഖില്‍ കോട്ടയം നഗരസഭ ഓഫീസിലെ പെന്‍ഷന്‍ ഫണ്ടില്‍നിന്നും 2.40 കോടി അപഹരിച്ചത്. തട്ടിയെടുത്ത പണം ഉപയോഗിച്ച് മൂന്ന് ബൈക്കുകളാണ് അഖില്‍ സി. വര്‍ഗീസ് വാങ്ങിയത്. ഇതില്‍ ലക്ഷങ്ങള്‍ വിലവരുന്ന ഒരു ഹാര്‍ലി ഡേവിഡ്സണ്‍ ബൈക്കും ഉള്‍പ്പെടുന്നു. ഒരു കാറും ഇയാള്‍ വാങ്ങിയിട്ടുണ്ട്. ഇതുകൂടാതെ കൊല്ലത്ത് ഏഴു സെന്‍റ് സ്ഥലവും വാങ്ങി. ഈരാറ്റുപേട്ടയിലെ ബാങ്കില്‍ ഇയാള്‍ക്ക് വായ്പയുണ്ടായിരുന്നു. തട്ടിച്ചെടുത്ത പണമാണ് ഈ വായ്പ കുടിശിക അടച്ചുതീര്‍ക്കാന്‍ പ്രതി ഉപയോഗിച്ചിരുന്നതെന്ന് വിജിലന്‍സ് കണ്ടെത്തിയിട്ടുണ്ട്. ‌ ഇതുകൂടാതെയാണ് പ്രതി നാല് ക്രെഡിറ്റ് കാര്‍ഡുകള്‍ ഉപയോഗിച്ചിരുന്നത്. ഈ കാര്‍ഡുകള്‍ ഉപയോഗിച്ചും വന്‍ തുക ചെലവഴിച്ചിരുന്നു. ഈ കാര്‍ഡുകളുടെ ബില്ലടയ്ക്കാനും തട്ടിപ്പുതുകയാണ് ഇയാള്‍ ഉപയോഗിച്ചിരുന്നതെന്നും കണ്ടെത്തിയിട്ടുണ്ട്. കോട്ടയത്ത് വിവിധ ജ്വല്ലറികളില്‍നിന്നും സ്വര്‍ണം വാങ്ങിയതായും വിജിലന്‍സിനോട് സമ്മതിച്ചു. നാലു വര്‍ഷമാണ് അഖില്‍ സി. വര്‍ഗീസ് കോട്ടയം നഗരസഭയില്‍ ജോലി ചെയ്തിരുന്നത്. കഴിഞ്ഞ വര്‍ഷം നഗരസഭാ സെക്രട്ടറിയാണ് തട്ടിപ്പ് സംബന്ധിച്ചു നഗരസഭാ കൗണ്‍സില്‍ യോഗത്തില്‍ റിപ്പോര്‍ട്ട് ചെയ്തത്.

പെരുന്തേനീച്ചപ്പട തോറ്റോടും ജോഷിയുടെ പച്ചമരുന്നില്‍

കോട്ടയം: അപകടകാരിയായ പെരുന്തേനീച്ചക്കൂട്ടമുണ്ടോ, പേടിക്കേണ്ട ജോഷിയെ വിളിക്കാം. പൂഞ്ഞാറില്‍നിന്നു ജോഷി പാഞ്ഞെത്തിയാല്‍ പെരുന്തേനീച്ചകള്‍ പറന്നകലും. പാലാ കുരിശുപള്ളിയുടെ മുകളിലും അരുവിത്തുറ പള്ളിയിലെ സെന്‍റ് ജോര്‍ജിന്‍റെ രൂപത്തിനു സമീപവും കുറവിലങ്ങാട് സയന്‍സ് സിറ്റി കെട്ടിടത്തിന്‍റെ മുകളിലും മാത്രമല്ല പെരുമരങ്ങള്‍ക്കു മുകളിലും കൈപ്പൊക്കത്തിലുമൊക്കെ കൂടുകൂട്ടിയ തേനീച്ചക്കൂട്ടത്തെയാണ് പൂഞ്ഞാര്‍ പനച്ചിപ്പാറ മൂഴിയാങ്കല്‍ ജോഷി ജോര്‍ജ് നൊടിയിടയില്‍ തുരത്തിയത്. ഏറ്റവും ഒടുവില്‍ ചൂണ്ടച്ചേരി കോളജില്‍ ഓണാഘോഷത്തിനിടെ ഇളകിയെത്തിയ തേനീച്ചക്കൂട്ടത്തെയും ളാക്കാട്ടൂര്‍ എന്‍എസ്എസ് സ്‌കൂളിലെ തേനീച്ചകളെയും ജോഷി പറപ്പിച്ചു. ജോഷിക്ക് കോളജ് വിദ്യാഭ്യാസ കാലത്ത് വീട്ടില്‍ വന്‍തേനീച്ച വളര്‍ത്തലുണ്ടായിരുന്നു. പാലക്കാട് അട്ടപ്പാടിയിലെ സ്ഥലത്തെ കൃഷികാര്യങ്ങള്‍ നോക്കാന്‍ പോയ സമയത്ത് അവിടത്തെ ആദിവാസികളില്‍നിന്നാണ് പെരുന്തേനീച്ചക്കൂട്ടത്തെ തുരത്തുന്നതിനുള്ള രീതി മനസിലാക്കിയത്. കിട്ടിയ അറിവ് നാട്ടില്‍ പരീക്ഷിച്ചപ്പോള്‍ വിജയം. അതോടെ പെരുന്തേനീച്ച കൂടുവച്ചിരിക്കുന്നിടത്തൊക്കെനിന്നും ജോഷിക്ക് വിളിയെത്തി. എട്ടു കൂട്ടം പച്ചമരുന്നുകള്‍ ചേര്‍ത്തുണ്ടാകുന്ന മരുന്ന് പുകച്ചാണ് തേനീച്ചകളെ തുരത്തുന്നത്. ആദ്യം അടുത്തെത്തി അക്രമകാരികളാണോ ശാന്തരാണോ എന്ന് നിരീക്ഷിക്കും. ഇതിനനുസരിച്ചാണ് മരുന്നു പ്രയോഗം. ചൂട്ടില്‍ ചകിരി വച്ച് അതിലാണ് മരുന്ന് വയ്ക്കുന്നത്. മരുന്നില്‍വച്ച് ഉണക്കിയെടുത്ത ചകിരിയാണ് ഉപയോഗിക്കുന്നത്. പുക എത്തുമ്പോള്‍ ശേഷിയും ഓര്‍മയും നഷ്ടപ്പെട്ട തേനീച്ചകള്‍ പറന്നകലും. മരുന്നിന്‍റെ കൂട്ട് ജോഷിയുടെ രഹസ്യമാണ്. ഉയരമുള്ള സ്ഥലങ്ങളിലാണെങ്കില്‍ കൈവശമുള്ള 18 അടി ഉയരമുള്ള തോട്ടി ഉപയോഗിക്കും. മുകളില്‍ കയറാന്‍ ബുദ്ധിമുട്ടാണെങ്കില്‍ ജെസിബി, ക്രെയിന്‍ എന്നിവയില്‍ തോട്ടി കെട്ടിയും മരുന്ന് പുകയ്ക്കും. ആരു വിളിച്ചാലും അവിടെയെത്തി ഈച്ചയെ തുരത്തും. പെട്രോള്‍ കൂലി ഉള്‍പ്പെടെയുളള ചെറിയ ഫീസ് വാങ്ങും. പെരുന്തേനീച്ചയെ മാത്രമല്ല കടന്നലിനെയും മരുന്നില്‍ പുകച്ചു തുരത്തും. വനം വകുപ്പിന്‍റെയും ജില്ലാ കളക്ടറുടെയും ലൈസന്‍സും ജോഷിക്കുണ്ട്. 2010-15 കാലഘട്ടത്തില്‍ പൂഞ്ഞാർ‍ ഗ്രാമപഞ്ചായത്ത് പ്രസിഡന്‍റായിരുന്ന ജോഷി അറിയപ്പെടുന്ന പൊതു പ്രവര്‍ത്തകനുമാണ്. പെരുന്തേനീച്ചയില്‍നിന്ന് നാട്ടുകാരെ രക്ഷിക്കുന്ന ജോഷിക്ക് ഉമ്മന്‍ ചാണ്ടി സര്‍ക്കാരിന്‍റെ കാലത്ത് ജീവന്‍ രക്ഷാ പുരസ്‌കാരം ലഭിച്ചിട്ടുണ്ട്. കേരള കോണ്‍ഗ്രസ്-എം പൂഞ്ഞാര്‍ മണ്ഡലം പ്രസിഡന്‍റു കൂടിയായ ജോഷിക്ക് ഭാര്യയും മൂന്നു മക്കളുമാണുള്ളത്.

മണര്‍കാട് കത്തീഡ്രലില്‍ എട്ടുനോമ്പ് പെരുന്നാളിന് ഒന്നിനു കൊടിയേറും

കോട്ടയം: മരിയന്‍ തീര്‍ഥാടന കേന്ദ്രമായ മണര്‍കാട് സെന്‍റ് മേരീസ് യാക്കോബായ സുറിയാനി കത്തീഡ്രലില്‍ എട്ടുനോമ്പ് പെരുന്നാളിന് സെപ്റ്റംബര്‍ ഒന്നിന് കൊടിയേറും. 31നു വൈകുന്നേരം സന്ധ്യാപ്രാര്‍ഥനയോടെ നോമ്പാചരണത്തിനു തുടക്കമാകും. സന്ധ്യാപ്രാര്‍ഥനയെത്തുടര്‍ന്ന് വൈദികരുടെയും കത്തീഡ്രല്‍ ഭാരവാഹികളുടെയും മാനേജിംഗ് കമ്മിറ്റി അംഗങ്ങളുടെയും നേതൃത്വത്തില്‍ കല്‍ക്കുരിശില്‍ തിരിതെളിക്കും. തുടര്‍ന്ന് പെരുന്നാളിനോട് അനുബന്ധിച്ച് ആരംഭിച്ചിരിക്കുന്ന വിവിധ കൗണ്ടറുകളുടെ ഉദ്ഘാടനം നിര്‍വഹിക്കും. ഇലുമിനേഷന്‍ ലൈറ്റുകളുടെ സ്വിച്ച് ഓണ്‍ കര്‍മവും പോലീസ് കണ്‍ട്രോള്‍ റൂമിന്‍റെ ഉദ്ഘാടനവും ജില്ലാ പോലീസ് മേധാവി ഷാഹുല്‍ ഹമീദ് നിര്‍വഹിക്കും. കരോട്ടെ പള്ളിയില്‍ സെപ്റ്റംബര്‍ ഒന്നുമുതല്‍ എട്ടുവരെ രാവിലെ ആറിന് വിശുദ്ധ കുര്‍ബാനയും കത്തീഡ്രലില്‍ രാവിലെ 7.30ന് പ്രഭാത പ്രാര്‍ഥനയും 8.30ന് വിശുദ്ധ കുര്‍ബാനയും വൈകുന്നേരം അഞ്ചിന് സന്ധ്യാപ്രാര്‍ഥനയും ഉണ്ടായിരിക്കും. സെപ്റ്റംബര്‍ ഒന്നുമുതല്‍ അഞ്ചുവരെ ഉച്ചയ്ക്ക് 12ന് മധ്യാഹ്ന പ്രാര്‍ഥനയും രാവിലെ 11നും ഉച്ചകഴിഞ്ഞ് 2.30നും പ്രസംഗവും സെപ്റ്റംബര്‍ ഒന്നു മുതല്‍ രണ്ടുവരെ വൈകുന്നേരം ആറിന് ധ്യാനവും ഉണ്ടായിരിക്കും. സെപ്റ്റംബര്‍ ഒന്നിന് മൂന്നിന്മേല്‍ കുര്‍ബാനയ്ക്ക് ഡോ. തോമസ് മാര്‍ തീമോത്തിയോസ് മുഖ്യകാര്‍മികത്വം വഹിക്കും. ഉച്ചകഴിഞ്ഞ് രണ്ടിന് കൊടിമരഘോഷയാത്രയ്ക്കായി പള്ളിയില്‍നിന്ന് പുറപ്പെടും. വൈകുന്നേരം 4.30ന് ഡോ. തോമസ് മാര്‍ തീമോത്തിയോസ് മെത്രാപ്പോലീത്തയുടെ നേതൃത്വത്തില്‍ പ്രാര്‍ഥനയ്ക്കുശേഷം കൊടിമരം ഉയര്‍ത്തും. കുര്യാക്കോസ് മാര്‍ ഈവാനിയോസ് സെപ്റ്റംബര്‍ രണ്ടിനും പൗലോസ് മാര്‍ ഐറേനിയോസ് സെപ്റ്റംബര്‍ മൂന്നിനും മൂന്നിന്മേല്‍ കുര്‍ബാനയ്ക്ക് മുഖ്യകാര്‍മികത്വം വഹിക്കും. മെറിറ്റ് ഡേയും വയോജനങ്ങളെ ആദരിക്കലും മൂന്നിന് വൈകുന്നേരം ആറിന് നടക്കും. സെപ്റ്റംബര്‍ നാലിന് മൂന്നിന്മേല്‍ കുര്‍ബാനയ്ക്ക് ഐസക് മാര്‍ ഒസ്താത്തിയോസ് മുഖ്യകാര്‍മികത്വം വഹിക്കും. വൈകുന്നേരം ആറിന് ആധ്യാത്മിക സംഘടനകളുടെ പൊതുസമ്മേളനം. സെപ്റ്റംബര്‍ അഞ്ചിന് മൂന്നിന്മേല്‍ കുര്‍ബാനയ്ക്ക് മര്‍ക്കോസ് മാര്‍ ക്രിസോസ്റ്റമോസ് പ്രധാന കാര്‍മികത്വം വഹിക്കും. സെപ്റ്റംബര്‍ ആറിന് കുര്യാക്കോസ് മാര്‍ തെയോഫിലോസിന്‍റെ പ്രധാന കാര്‍മികത്വത്തില്‍ അഞ്ചിന്മേല്‍ കുര്‍ബാന. ഉച്ചകഴിഞ്ഞ് രണ്ടിന് കുരിശുപള്ളികളിലേക്കുള്ള ഭക്തിനിര്‍ഭരമായ റാസ. സെപ്റ്റംബര്‍ ഏഴിന് ശ്രേഷ്ഠ കാതോലിക്കാ ബസേലിയോസ് ജോസഫ് ബാവാ മൂന്നിന്മേല്‍ കുര്‍ബാനയ്ക്കു പ്രധാന കാര്‍മികത്വം വഹിക്കും. 11.30ന് ഉച്ചനമസ്‌കാരത്തെത്തുടര്‍ന്ന് ശ്രേഷ്ഠ കാതോലിക്കാ ബാവായുടെ മുഖ്യകാര്‍മികത്വത്തില്‍ നടതുറക്കല്‍ ശുശ്രൂഷ. തുടര്‍ന്ന് കറിനേര്‍ച്ചയ്ക്കുള്ള പന്തിരുനാഴി ഘോഷയാത്ര. വൈകുന്നേരം 7.30ന് കരോട്ടെ പള്ളി ചുറ്റിയുള്ള പ്രദക്ഷിണം. 8.45ന് ആകാശവിസ്മയം. 10ന് പരിചമുട്ടുകളി, മാര്‍ഗം കളി. രാത്രി 12ന് ശേഷം കറിനേര്‍ച്ച വിതരണം. പ്രധാന പെരുന്നാള്‍ ദിനമായ സെപ്റ്റംബര്‍ എട്ടിന് മൂന്നിന്മേല്‍ കുര്‍ബാനയ്ക്ക് മാത്യൂസ് മാര്‍ അപ്രേം മുഖ്യകാര്‍മികത്വം വഹിക്കും. ഉച്ചകഴിഞ്ഞ് രണ്ടിന് കരോട്ടെ പള്ളി ചുറ്റിയുള്ള പ്രദക്ഷിണം, ആശീര്‍വാദം. വൈകുന്നേരം മൂന്നിന് നടക്കുന്ന നേര്‍ച്ചവിളമ്പോടെ പെരുന്നാള്‍ സമാപിക്കും. പത്രസമ്മേളനത്തില്‍ കത്തീഡ്രല്‍ സഹവികാരിയും പ്രോഗ്രാം ജോയിന്‍റ് കണ്‍വീനറുമായ ഫാ. ലിറ്റു തണ്ടാശേരില്‍, കത്തീഡ്രല്‍ ട്രസ്റ്റിമാരായ സുരേഷ് കെ. ഏബ്രഹാം കണിയാംപറമ്പില്‍, ബെന്നി ടി. ചെറിയാന്‍ താഴത്തേടത്ത്, ജോര്‍ജ് സഖറിയ ചെമ്പോല, കത്തീഡ്രല്‍ സെക്രട്ടറി പി.എ. ചെറിയാന്‍ പാണാപറമ്പില്‍, പ്രോഗ്രാം കോ-ഓര്‍ഡിനേറ്റര്‍ ഡീക്കന്‍ ഡോ. ജിതിന്‍ കുര്യന്‍ ആന്‍ഡ്രൂസ് എന്നിവര്‍ പങ്കെടുത്തു.

കുറ്റ്യാടി തെങ്ങിനു ഭൗമസൂചികാപദവി പരിഗണനയില്‍

കോട്ടയം: മണ്ഡരിയെയും ചെള്ളിനെയും ചെറുക്കുന്ന പ്രതിരോധശേഷിയും മികച്ച വിളവും ലക്ഷ്യമിട്ട് കര്‍ഷകർ നട്ടുവരുന്ന കുറ്റ്യാടി തെങ്ങിനു ഭൗമസൂചികാപദവി പരിഗണനയില്‍. കേരള കാര്‍ഷിക സര്‍വകലാശാലയും കോഴിക്കോട് ജില്ലയിലെ കാവിലുംപാറ പഞ്ചായത്തും ചേര്‍ന്നാണ് നാട്ടുപെരുമയുള്ള കുറ്റ്യാടി തെങ്ങിനെ തനിമയുള്ള ഫലവൃക്ഷമായി അറിയപ്പെടാനുള്ള സാധ്യത തേടുന്നത്. ജിയോഗ്രഫിക്കല്‍ ഇന്‍ഡിക്കേഷന്‍ അഥവാ ഭൗമസൂചികാപദവി ലഭിക്കുന്ന കേരളത്തിലെ ആദ്യ തെങ്ങിനമായി ഇത് മാറും. നട്ട് അഞ്ചാം വര്‍ഷം കായ്ഫലവും നൂറു വര്‍ഷം ആയുസുമുള്ള ഈ ഇനത്തിന് പ്രതിരോധശേഷി കൂടുതലുണ്ട്. വലിയ തേങ്ങയും കഴമ്പുള്ള അകവും മറ്റ് തനിമകളാണ്. തേങ്ങ വില്‍ക്കുന്നതിനെക്കാള്‍ തേങ്ങ നന്നായി ഉണക്കി മുളപ്പിച്ച് തൈകളായി വിറ്റ് കൂടുതല്‍ ലാഭമുണ്ടാക്കാനാണ് കുറ്റ്യാടി കര്‍ഷകര്‍ക്ക് താത്പര്യം. ഭൗമസൂചിക ലഭ്യമാക്കാന്‍ കാവിലുംപാറ പഞ്ചായത്ത് മൂന്നു ലക്ഷം രൂപ വിനിയോഗിച്ചാണ് കാര്‍ഷിക സര്‍വകലാശാലയുടെ സഹകരണത്തോടെ ഫയല്‍ നടപടികള്‍ നീക്കുന്നത്. കേന്ദ്ര നാണ്യവിള ഗവേഷണകേന്ദ്രമാണ് ഭൗമസൂചിക പ്രഖ്യാപിക്കുന്നത്. മൂന്നു വര്‍ഷത്തിനുള്ളില്‍ അംഗീകാരം ലഭിക്കുമെന്നാണ് പ്രതീക്ഷ.

അധിക തസ്തികനിര്‍ണയം അംഗീകാരം : സര്‍ക്കാര്‍ അടിയന്തര പരിഹാരം കാണണമെന്ന് പ്രൈവറ്റ് സ്‌കൂള്‍ മാനേജേഴ്‌സ് അസോ.

കോട്ടയം: വിദ്യാര്‍ഥികളുടെ വര്‍ധനമൂലം ഉണ്ടാകുന്ന അധിക തസ്തികനിര്‍ണയം അംഗീകാരം സംബന്ധിച്ച വിഷയത്തില്‍ സര്‍ക്കാര്‍ അടിയന്തര പരിഹാരം കാണണമെന്ന് കേരള പ്രൈവറ്റ് സ്‌കൂള്‍ മാനേജേഴ്‌സ് അസോസിയേഷന്‍. 2010ല്‍ സര്‍ക്കാര്‍ ഇറക്കിയ 1:1 ഉത്തരവിനെതിരേ എയ്ഡഡ് സ്‌കൂള്‍ മാനേജര്‍മാര്‍ സുപ്രീം കോടതിയില്‍ നല്‍കിയ കേസ് തീര്‍പ്പാക്കാത്തതിനാല്‍ 2021ല്‍ സര്‍ക്കാര്‍ ഇറക്കിയ പുതിയ ഉത്തരവിലൂടെ താത്കാലിക പരിഹാരം കണ്ടിരുന്നു. ആയതിനാല്‍ 2021 ലെ ഇടതു സര്‍ക്കാര്‍ ചെയ്തതുപോലെ സുപ്രീം കോടതി കേസ് തീര്‍പ്പാക്കാത്തതിനാല്‍ സമാനമായ ഒരുത്തരവിലൂടെ വിദ്യാര്‍ഥികളുടെ വര്‍ധനമൂലം ഉണ്ടാകുന്ന അധിക തസ്തിക പ്രതിസന്ധിക്ക് പരിഹാരം കാണണമെന്നാണ് മാനേജേഴ്‌സ് അസോസിയേഷന്‍ ആവശ്യപ്പെട്ടത്. സുപ്രീം കോടതി ഉത്തരവില്‍ പറഞ്ഞിരിക്കുന്നതുപോലെ ഭിന്നശേഷി സംവരണം നടപ്പാക്കുന്നത് ഹൊറിസോണ്ടല്‍ റിസര്‍വേഷന്‍ കാറ്റഗറിയില്‍ ഉള്‍പ്പെടുത്തി ഒരു സ്ഥാപനത്തിലെ മുഴുവന്‍ ഒഴിവുകളെയും ഒറ്റ കേഡറായി പരിഗണിച്ച് നല്‍കിയാല്‍ തീരാവുന്ന കാര്യം മാത്രമാണ്. ഇങ്ങനെ ചെയ്താല്‍ നിലവില്‍ സംസ്ഥാനത്ത് ഉടലെടുത്തിരിക്കുന്ന വിദ്യാഭ്യാസ മേഖലയിലെ നിയമനങ്ങളുമായി ബന്ധപ്പെട്ട ഭൂരിപക്ഷം ഭിന്നശേഷിക്കാരെയും ഉള്‍ക്കൊണ്ടു പരിഹരിക്കാന്‍ സാധിക്കും. കൂടാതെ കോടതി ഉത്തരവുകള്‍ പ്രകാരം സ്‌കൂളുകളിലെ ഭിന്നശേഷി നിയമനത്തിന് ഒരു സ്റ്റേറ്റ് ലെവല്‍ സെലക്‌ഷന്‍ കമ്മിറ്റി ഉണ്ടാക്കുവാനും അവര്‍ നല്‍കുന്ന ഉദ്യോഗാര്‍ഥികളുടെ ലിസ്റ്റില്‍നിന്നും മാനേജര്‍മാര്‍ ഉദ്യോഗാര്‍ഥികളെ നിയമിക്കുന്നത് ഉറപ്പുവരുത്താനുമാണ് പറഞ്ഞിരിക്കുന്നത്. എന്നാല്‍ ഇതുമായി ബന്ധപ്പെട്ട് വിദ്യാഭ്യാസ വകുപ്പ് ഇറക്കിയ ഉത്തരവില്‍ പ്രസ്തുത കമ്മിറ്റികള്‍ ഉദ്യോഗാര്‍ഥികളുടെ റാങ്ക് ലിസ്റ്റ് പ്രസിദ്ധീകരിക്കാനും അതുപ്രകാരം മാനേജര്‍മാര്‍ അപ്പോയിന്‍റ്മെന്‍റുകള്‍ നടത്താനുമാണ് പറഞ്ഞിരിക്കുന്നത്. ഇത് മാനേജ്‌മെന്‍റുകളുടെ ഉദ്യോഗാര്‍ഥികളെ തെരഞ്ഞെടുക്കാനുള്ള അവകാശത്തിന്മേലുള്ള കടന്നുകയറ്റമാണെന്നും മാനേജേഴ്‌സ് അസോസിയേഷന്‍ കുറ്റപ്പെടുത്തി. പത്രസമ്മേളനത്തില്‍ ജില്ലാ പ്രസിഡന്‍റ് ആര്‍. ഗോപീകൃഷ്ണന്‍, വൈസ്പ്രസിഡന്‍റ് കെ.ആര്‍. വിജയന്‍, ട്രഷറര്‍ ആര്‍. മധുലാല്‍, എക്‌സിക്യൂട്ടീവ് അംഗം അരുണ്‍ വാസുദേവന്‍ എന്നിവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]