ADVERTISEMENT

ADVERTISEMENT

ഫ്രാൻ കേന്ദ്ര കമ്മിറ്റി ഓഫീസ് ഉദ്ഘാടനം ചെയ്തു

നെയ്യാറ്റിൻകര: റസിഡന്‍റ്സ് അസോസിയേഷനുകളുടെ കേന്ദ്ര സംഘടനയായ ഫ്രാനിന്‍റെ കേന്ദ്ര കമ്മിറ്റി ഓഫീസ് നെയ്യാറ്റിൻകര കോടതിക്കു സമീപം മെയിൻ റോഡിൽ പൂമുഖം കെട്ടിടത്തിൽ പ്രവർത്തനം ആരംഭിച്ചു. നെയ്യാറ്റിൻകര ഡിവൈഎസ്പി എസ്. ചന്ദ്രദാസ് ഉദ്ഘാടനം നിർവഹിച്ചു. ഫ്രാൻ പ്രസിഡന്‍റ് എസ്.കെ. ജയകുമാർ അധ്യക്ഷനായി. നഗരസഭ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയർമാൻ ഡോ. എം.എ. സാദത്ത് മുഖ്യപ്രഭാഷണം നടത്തി.

ബിജെപി സംസ്ഥാന കമ്മിറ്റി അംഗം ആര്‍. നടരാജൻ, ഫ്രാൻ ജനറൽ സെക്രട്ടറി അഡ്വ. തലയൽ പ്രകാശ്, ടി. മുരളീധരൻ, എം. രവീന്ദ്രൻ, ബി. ശശികുമാരൻനായർ, ജി. പരമേശ്വരൻനായർ എന്നിവർ സംബന്ധിച്ചു.

ADVERTISEMENT

ആംബുലൻസ് കത്തിച്ചു; വീടുകൾക്കും വാഹനങ്ങൾക്കും നേരേ ആക്രമണം

നെടുമങ്ങാട്: നെടുമങ്ങാട് സിപിഎം-എസ്ഡിപിഐ സംഘർഷം രൂക്ഷമായി. എസ്ഡിപിഐയുടെ ആംബുലൻസ് തകർത്തപ്പോൾ ഡിവൈഎഫ്ഐയുടെ ആംബുലൻസ് കത്തിച്ചു. സംഘർഷ സാധ്യത കണക്കിലെടുത്തു സ്ഥലത്തു പോലീസ് ക്യാമ്പു ചെയ്യുന്നുണ്ട്. കഴിഞ്ഞദിവസം രാത്രി പത്തോടെ സിപിഎം മുല്ലശേരി ബ്രാഞ്ച് സെക്രട്ടറി ദീപുവിനെ ഒരു സംഘം എസ്ഡിപിഐ പ്രവർത്തകർ ആക്രമിച്ചതായിരുന്നു സംഘർഷത്തിനു തുടക്കം. അഴീക്കോട് ജംഗ്ഷനിൽവച്ചു ദീപുവിനെ എസ്ഡിപിഐ പ്രവർത്തകർ കമ്പിപ്പാര കൊണ്ടു മർദിക്കുകയായിരുന്നു. ദീപു പേരൂർക്കട ആശുപത്രിയിൽ ചികിത്സ തേടി. ഇതിനുതുടർച്ചയായി കായ്പ്പാടി - കുമ്മിപള്ളി പള്ളിമുക്ക് ജംഗ്ഷനിൽ എസ്.എൻ. മൻസിലിൽ നാദിർഷായുടെ വീടിന്‍റെ ജനൽ ചില്ലുകളും സമദിന്‍റെ വീടിനുമുന്നിനു പാർക്ക് ചെയ്തിരുന്ന എസ്ഡിപിഐയുടെ ആംബുലൻസിന്‍റെ ചില്ലുകളും മാരുതി ആൾട്ടോ കാറിന്‍റെ ചില്ലുകളും ചെടിച്ചട്ടികളും അടിച്ചു തകർത്തു. ആക്രമണം നടത്തിയത് സിപിഎം പ്രവർത്തകർ ആണെന്ന് പറയുന്നു. രാത്രി ഒരു മണിയോടുകൂടി നെടുമങ്ങാട് ജില്ലാ ആശുപത്രിക്ക് മുൻവശത്ത് ആംബുലൻസ് സ്റ്റാൻഡിൽ പാർക്ക് ചെയ്തിരുന്ന നെടുമങ്ങാട് ഡിവൈഎഫ്ഐ മേഖല കമ്മിറ്റിയുടെ ആംബുലൻസ് കത്തിച്ചു. എസ്ഡിപിഐക്കാരാണു പിന്നിലെന്നു സിപിഎം പോലീസിൽ പരാതി നൽകി. സിപിഎം ബ്രാഞ്ച് സെക്രട്ടറിയെ ആക്രമിച്ചതിനു എസ്ഡിപിഐ പ്രവർത്തകരായ നിസാം, റഫീഖ്, സമദ്, കണ്ടാല റിയാവുന്ന ഒരാൾ എന്നിവർക്കെതിരെ അരുവിക്കര പോലീസ് കേസെടുത്തു. ആംബുലൻസ് കത്തിച്ച സംഭവത്തിൽ നെടുമങ്ങാട് പോലീസ്സ് കേസെടുത്ത് അന്വേഷണം ആരംഭിച്ചു. എസ് ഡിപിഐക്കാരുടെ വീടും ആംബുലൻസും ആക്രമിച്ചതിനു സിപിഎം പ്രവർത്തകർക്കെതിരെയും കേസെടുത്തിട്ടുണ്ട്. സ്ഥലത്തു സംഘർഷ സാധ്യത നിലനിൽക്കുകയാണ്.

കുട്ടിപ്പോരാട്ടത്തിന് അണിഞ്ഞൊരുങ്ങി അനന്തപുരി

തിരുവനന്തപുരം: ഒരാഴ്്ച്ചക്കാലം നീണ്ടു നില്ക്കുന്ന സംസ്ഥാന സ്കൂൾ കായികമേളയ്ക്കുള്ള തയാറെടുപ്പുകൾ എല്ലാം തലസ്ഥാനത്ത് പൂർത്തിയായി. ഇന്നു വൈകുന്നേരം മുഖ്യമന്ത്രി ഉദ്ഘാടനം ചെയ്യുന്നതോടെ സംസ്ഥാന സ്കൂൾ കായിക മാമാങ്കത്തിനു തുടക്കമാകും. ഇന്നു നടക്കുന്ന ഉദ്ഘാടനച്ചടങ്ങിനോടനുബന്ധിച്ചുള്ള കലാപരിപാടികളുടെയും മാസ്ഡ്രില്ലിന്‍റെയും റിഹേഴ്സൽ ഇന്നലെ പൂർത്തിയാക്കി മന്ത്രി വി. ശിവൻകുട്ടി നേരിട്ടെത്തി വിലയിരുത്തി. പൊതുവിദ്യാഭ്യാസ ഡയറക്ടർ എൻഎസ്കെ ഉമേഷും മന്ത്രിക്കൊപ്പമുണ്ടായിരുന്നു. ജില്ലയിവെ വിവിധ സ്കൂളുകളിൽ നിന്നുള്ള വിദ്യാർഥികളുടെ നേതൃത്വത്തിലാണ് വർണ ശബളമായ കലാപരിപാടികൾ ഉദ് ഘാടന ചടങ്ങിനോട് അനുബന്ധിച്ചു നടത്തുന്നത്. 3,000 ത്തോളം വിദ്യാർഥികൾ അണിനിരക്കുന്ന കലാപരിപാടികൾ കേരളത്തിന്‍റെ സാംസ്കാരിക തനിമ വിളിച്ചോതുന്നതാവും. മേളയുടെ വിജയത്തിനായി 16 സബ്് കമ്മിറ്റികൾ തിരുവനന്തപുരം: സ്കൂൾ കായികമേളയുടെ വിജയത്തിനായി 16 സബ് കമ്മിറ്റികളാണ്് പ്രവർത്തിക്കുന്നത്. റിസപ് ഷൻ കമ്മിറ്റി, ഫുഡ് കമ്മിറ്റി, മീഡിയ ആൻഡ് പബ്ലിസിറ്റി, ട്രാൻസ്പോർട്ട്, വെൽഫെയർ, ലോ ആൻഡ് ഓർഡർ, രജിസ്ട്രേഷൻ, അക്കോമഡേഷൻ, സ്റ്റേജ് ആൻഡ് പന്തൽ, ട്രോഫി എന്നി കമ്മിറ്റികളുണ്ട്. കൂടാതെ സുവനീർ, ഫിനാൻസ് ആൻഡ് സ്പോണ്‍സർഷിപ്പ്, മെഡിക്കൽ, ഗ്രീൻ പ്രോട്ടോക്കോൾ, ലൈറ്റ് ആൻഡ് സൗണ്ട്, സെറിമണി കമ്മിറ്റി എന്നിവയും മേളയുടെ വിജയത്തിനായി പ്രവർത്തിക്കുന്നുണ്ട്. പുത്തരിക്കണ്ടത്ത് ഭക്ഷണപ്പുര സജ്ജമായി തിരുവനന്തപുരം: ഒരേ സമയം 2,500 പേർക്കു ഇരുന്നു ഭക്ഷണം കഴിക്കാവുന്ന തരത്തിലുള്ള പ്രധാന ഭക്ഷണപ്പുരയാണ് പുത്തരിക്കണ്ടം മൈതാനത്ത് ക്രമീകരിച്ചിട്ടുള്ളത്. ഇന്നലെ വൈകുന്നേരം മന്ത്രി വി. ശിവൻകുട്ടി ഭക്ഷണപ്പുരയുടെ പാലുകാച്ചൽ ചടങ്ങ് നടത്തി. പൊതുവിദ്യാഭ്യാസ ഡയറക്ടർ, കോർപ്പറേഷൻ ക്ഷേമകാര്യ സ്റ്റാൻഡിംഗ് കമ്മിറ്റി അധ്യക്ഷൻ മേടയിൽ വിക്രമൻ തുടങ്ങിയവർ പങ്കെടുത്തു.

പഴയിടം മോഹനൻ നന്പൂതിരിയുടെ നേതൃത്വത്തിലാണ് ഭക്ഷണപ്പുരയുടെ പ്രവർത്തനം. പ്രധാന ഭക്ഷണപ്പുര കൂടാതെ പാകം ചെയ്ത ഭക്ഷണം മറ്റ് നാലിടങ്ങളിൽ എത്തിച്ചുനൽകാനുള്ള സൗകര്യവും ഒരുക്കിയിട്ടുണ്ട്. കായിക നേട്ടങ്ങളെക്കുറിച്ചുള്ള സമഗ്ര എക്സിബിഷനും അതിന്‍റെ ഭാഗമായുള്ള ചെറിയ കായിക വിനോദങ്ങളും പുത്തരിക്കണ്ടത്ത് ഭക്ഷണശാലയ്ക്കൊപ്പം ഒരുക്കിയിട്ടുണ്ട്. കായിക താരങ്ങളുടെ താമസത്തിനായി 74 സ്കൂളുകളാണ് സജ്ജീകരിച്ചിരിക്കുന്നത്. കുട്ടികളുടെ സഞ്ചാരത്തിനായി 142 ബസുകൾ വിവിധ സ്കൂളുകളിൽ നിന്നും സജ്ജമാക്കിയിട്ടുണ്ട്. സ്വർണക്കപ്പ് ഘോഷയാത്ര ഗംഭീരമായി പൂർത്തിയാക്കി തിരുവനന്തപുരം: കലോത്സവത്തിന്‍റെ ചരിത്രത്തിൽ ആദ്യമായി ചാന്പ്യൻജില്ലയ്ക്ക് പ്രഖ്യാപിച്ചിട്ടുള്ള സ്വർണക്കപ്പ് എല്ലാ ജില്ലകളിലും പര്യടനം നടത്തിയ ശേഷം തിരുവനന്തപുരത്ത് എത്തിച്ചു. ഈ മാസം 16ന് കാസർകോഡ് നീലേശ്വരത്ത് നിന്ന് ആരംഭിച്ച ചീഫ് മിനിസ്റ്റേഴ്സ് ട്രോഫിയുടെ പര്യടനം 19ന് ജില്ലയിൽ പ്രവേശിച്ചു. ഇന്നലെ തിരുവനന്തപുരം ജില്ലയിലെ മുഴുവൻ മണ്ഡലങ്ങളിലൂടെയും സ്വർണക്കപ്പുമായുള്ള ഘോഷയാത്ര സഞ്ചരിച്ചു. ഇന്നു രാവിലെ 10ന് പട്ടം ഗേൾസ് ഗവണ്‍മെന്‍റ് ഹയർ സെക്കൻഡറി സ്കൂളിൽ എത്തിച്ചേരുന്ന സ്വർണക്കപ്പ് ഘോഷയാത്ര അവിടെ നിന്നും ഉദ്ഘാടന വേദിയായ യൂണിവേഴ്സിറ്റി സ്റ്റേഡിയത്തിലേക്ക് എത്തും. 19ന് എറണാകുളത്തുനിന്നും ആരംഭിച്ച ദീപശിഖാ പ്രയാണം തിരുവനന്തപുരം നഗരത്തിലെ വിവിധ സ്കൂളുകളിൽ സ്വീകരണം ഏറ്റുവാങ്ങി പട്ടം ഗേൾസ് ഗവണ്‍മെന്‍റ് ഹയർ സെക്കൻഡറി സ്കൂളിൽ വച്ച് ട്രോഫി ഘോഷയാത്രയുമായി ചേരും.

സംസ്ഥാന സ്കൂൾ കായികമേള: സ്വർണക്കപ്പിന് നേമത്ത് സ്വീകരണം

നേമം: സ്കൂൾ കായികമേളയിലെ വിജയികൾക്ക് സമ്മാനിക്കാനുള്ള സ്വർണക്കപ്പിന് ബാലരാമപുരത്തും നേമത്തും സ്വീകരണം നൽകി. ബാലരാമപുരത്തെ വരവേല്പിന് ശേഷം നേമത്ത് നേമം ഗവ. യുപിഎസ്, വിക്ടറി ബോയ്സ് ഹയർ സെക്കൻഡറി സ്കൂൾ, ഗേൾസ് ഹയർ സെക്കൻഡറി സ്കൂൾ എന്നിവർ സംയുക്തമായാണ് വരവേറ്റത്. നേമം പോലീസ് സ്റ്റേഷനു മുന്നിൽനിന്ന് എസ്പിസി, എൻസിസി കേഡറ്റുകളുടെ നേതൃത്വത്തിൽ അധ്യാപകരും വിദ്യാർഥികളും ചേർന്ന് സ്വർണകപ്പിനെ സ്കൂളിലേയ്ക്ക് ആനയിച്ചു. സമ്മേളനം ഐ.ബി. സതീഷ് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ. രാകേഷ് അധ്യക്ഷനായി. നേമം ബ്ലോക്ക് പഞ്ചായത്ത് പ്രസിഡന്‍റ് എസ്.കെ. പ്രീജ, പഞ്ചായത്ത് അംഗങ്ങളായ ടി. മല്ലിക, ഇ.ബി. വിനോദ് കുമാർ, പരീക്ഷാഭവൻ ജോയിന്‍റ് കമ്മീഷണർ ഡോ. വി. ഗിരീഷ് ചോലയിൽ, ജില്ലാ വിദ്യാഭ്യാസ ഉപ ഡയറക്ടർ ഷീബാഗോപിനാഥ്, ഷീബ, ഉപജില്ലാ വിദ്യാഭ്യാസ ഓഫീസർ കെ. ബിനു, പിടിഎ പ്രസിഡന്‍റു മാരായ കവിതാഉണ്ണി, പ്രഭാത്, എസ്എംസി ചെയർമാൻ എസ്. പ്രേംകുമാർ, വിക്ടറി സ്കൂൾ ഹെഡ്മിസ്ട്രസ് എസ്. ഷീബ, നേമം ഗവ. യുപിഎസ് ഹെഡ് മാസ്റ്റർ എ.എസ്. മൻസൂർ എന്നിവർ പ്രസംഗിച്ചു.

സ്വന്തമായി ഭൂമിയും ഫണ്ടും ഉണ്ടായിട്ടും ആദിവാസി സ്‌കൂൾ ഇപ്പോഴും വാടക കെട്ടിടത്തിൽ

കോട്ടൂർ: സ്വന്തമായി ഭൂമിയും കെട്ടിട നിർമാണത്തിനായി ഫണ്ടും ഉള്ളപ്പോൾ ആദിവാസി സ്‌കൂൾ പ്രവർത്തിക്കുന്നത് വാടക കെട്ടിടത്തിൽ. കുറ്റിച്ചലിൽ 14 വർഷം മുൻപ് അനുവദിച്ച ജി. കാർത്തികേയൻ മെമ്മോറിയൽ മോഡൽ റസിഡൻഷ്യൽ സ്‌കൂളാണ് വാടക കെട്ടിടത്തിൽ പ്രവർത്തിക്കുന്നത്. അരുവിക്കര നിയമസഭാ മണ്ഡലത്തിൽ പ്രവർത്തിക്കേണ്ട സ്‌കൂൾ പ്രവർത്തിക്കുന്നത് കാട്ടാക്കട നിയമസഭാ മണ്ഡലത്തിലെ മണലിയിൽ. 2011-ലെ യുഡിഎഫ് സർക്കാരിന്‍റെ കാലത്ത് അനുവദിച്ച സ്‌കൂളാണ് ഇപ്പോഴും മണലിയിലെ പഴയൊരു സ്വകാര്യ സ്‌കൂൾ വാടകയ്ക്കെടുത്ത് പ്രവർത്തിക്കുന്നത്. എന്നാൽ പുതിയ മന്ദിരം പണിയാനോ സ്‌കൂൾ ഇവിടെ എത്തിക്കാനോ തയാറാകാത്തിൽ പ്രതിഷേധിച്ചു സമരത്തിനൊരുങ്ങുകയാണ് ആദിവാസികൾ അടക്കമുള്ള നാട്ടുകാർ. 2011 ൽ യുഡിഎഫ് സർക്കാരിന്‍റെ കാലത്ത് ജി. കാർത്തികേയൻ എംഎൽഎ ആയിരിക്കെയാണ് പട്ടികവർഗ വിദ്യാർഥികൾക്കായി മോഡൽ റസിഡൻഷ്യൽ സ്‌കൂൾ കോട്ടൂർ കേന്ദ്രമാക്കി അനുവദിച്ചത്. ജി. കാർത്തികേയന്‍റെ മരണശേഷം സ്‌കൂളിന് അദ്ദേഹത്തിന്‍റെ പേരും നൽകി. സ്കൂളിനായി വനം വകുപ്പ് രണ്ടര ഏക്കർ ഭൂമിയും കൈമാറി. ഇവിടെ കെട്ടിടം പണിയാൻ 27.30 കോടി രൂപ കിഫ്ബിയിൽനിന്ന് അനുവദിക്കുകയും ഭൂമിയിലെ 190 മരങ്ങൾ മുറിച്ചുനീക്കുകയും ചെയ്തിരുന്നു. സ്‌കൂൾ വന്നാൽ അതിനോടനുബന്ധിച്ച് അധ്യാപകർക്ക് പ്രത്യേകിച്ച് താമസസ്ഥലം, വിദ്യാർഥികൾക്കുള്ള ഹോസ്റ്റൽ സൗകര്യങ്ങൾ, ക്ലാസ് മുറി, കോൺഫറൻസ് ഹാൾ, പഠനമുറി, കളിസ്ഥലം, ആരോഗ്യകേന്ദ്രം തുടങ്ങിയവ ഉൾപ്പെടുത്തി ടൗൺ ഷിപ്പ് സ്ഥാപിക്കാൻ ഉദ്ദേശിക്കുന്ന വിധത്തിലാണ് റെസിഡൻഷ്യൽ സ്‌കൂൾ പദ്ധതി ചിട്ടപ്പെടുത്തിയത്. പദ്ധതി ആരംഭിച്ചുകഴിഞ്ഞാൽ തദ്ദേശസ്വയംഭരണ സ്ഥാപനത്തിന്‍റെയും, വനം വകുപ്പിനെറയും, പട്ടികവർഗ വിഭാഗത്തിൻറയും സഹായ സഹകരണത്തോടെ കൂടുതൽ ഭൂമി ലഭ്യമാക്കി സ്‌കൂളിന്‍റെ പ്രവർത്തനങ്ങൾ കാര്യക്ഷമമാക്കാൻ കഴിയുമെന്നു നാട്ടുകാർ ചൂണ്ടികാട്ടുന്നു. എന്നാൽ പദ്ധതിയുമായി മുന്നോട്ട് പോയപ്പോഴാണ് തടസവാദങ്ങളുമായി ഉദ്യോഗസ്ഥർ എത്തുന്നതും പദ്ധതി പാതി വഴിയിൽ നിലച്ചതും. ഇതിനിടയ്ക്കാണ് സ്‌കൂൾ ഇവിടെ നിന്നുംമാറ്റി ആറളത്തേക്ക് കൊണ്ടു പോകാൻ ശ്രമം നടന്നത്. പിന്നീട് യാതൊന്നും നടന്നുമില്ല.

മലയോര മേഖലയില്‍ മഴ ശക്തം: വ്യാപക നഷ്ടം; വീട്ടില്‍ വെള്ളം കയറി

വെള്ളറട: വെള്ളറട അമ്പൂരി പഞ്ചായത്ത് പരിധിയില്‍ ശക്ത മായി തുടരുന്ന മഴയില്‍ വ്യാപക നാശനഷ്ടം. ഇന്നലെ പുലര്‍ച്ചെ അഞ്ചുമണി മുതല്‍ തുടങ്ങിയ മഴ രാവിലെ 8.30 മണി വരെ നീണ്ടു. പ്രദേശത്ത് വ്യാപകമായ വെള്ളക്കെട്ട് അനുഭവപ്പെട്ടു. അമ്പൂരി ഗ്രാമപഞ്ചായത്തിലെ തുടിയാംങ്കോണം വാര്‍ഡില്‍ ചപ്പാത്തിന്‍കര ശീമോന്‍റെ (44) വീട്ടിനുള്ളില്‍ വെള്ളം കയറി. പഞ്ചായത്ത് നല്‍കിയ വീടാണ് തകര്‍ച്ചയുടെ വക്കിലായത്. ചോര്‍ന്നൊലിക്കുന്ന ദ്രവിച്ച വീടിനുള്ളില്‍ വെള്ളം കയറിയതോടെ കിടന്നുറങ്ങാൻപോലും കഴിയാത്ത അവസ്ഥയിലായി. രണ്ടുദിവ സം മുന്പും ഇവിടെ വെള്ളം കയറിയിരുന്നതിനാൽ ശീമോന്‍ സമീപത്തെ വെയിറ്റിംഗ് ഷെഡി ലാണ് കിടന്നുറങ്ങി നേരം വെളുപ്പിച്ചത്. പ്രദേശത്തെ കൃഷിഭൂമികള്‍ മിക്കതും വെള്ളത്തില്‍ മുങ്ങിയിട്ടുണ്ട്. വെള്ളറട പഞ്ചായത്തിലും താഴ്ന്ന പ്രദേശങ്ങള്‍ മിക്കതും വെള്ളത്തില്‍ മുങ്ങി. കളത്തറ പാടശേഖരം വെള്ളത്തില്‍ മുങ്ങി. സമീപത്തെ മരിച്ചീനി, വാഴ കൃഷികള്‍ മിക്കതും നശിച്ചു. വ്യാപകമായ കൃഷിനാശമാണ് പ്രദേശത്ത് സംഭവിച്ചിട്ടുകൊണ്ടിരിക്കുന്നത്. തുടര്‍ച്ചയായി പെയ്തുകൊണ്ടിരിക്കുന്ന മഴയില്‍ പ്രദേശത്ത് റബര്‍ ടാപ്പിംഗ് പൂര്‍ണമായും നിലച്ചിരിക്കുകയാണ്. പ്രദേശമാകെ കടുത്ത വറുതിയിലുമാണ്. മഴ ഇതേ രീതിക്ക് തുടര്‍ന്നാല്‍ തൊഴിലവസരങ്ങള്‍ നഷ്ടപ്പെടും എന്നുള്ള ആശങ്കയിലാണ് ജനങ്ങള്‍. അമ്പൂരി ആദിവാസി മേഖലയിലും കടുത്ത വറുതിയിലാണ്. തൊഴിലുകളൊന്നും നടക്കുന്നില്ല. കാട്ടു വര്‍ഗങ്ങള്‍ ശേഖരിച്ചു ഭക്ഷിക്കുന്ന ഇവര്‍ക്ക് കാട്ടുവിളകള്‍ ശേഖരിക്കാനും കഴിയുന്നില്ല. ആദിവാസി മേഘലയില്‍ നിന്നും വിഷകൂണ്‍ ശേഖരിച്ചു കഴിച്ച ആറുപേര്‍ ഇപ്പോഴും കാരക്കോണം മെഡിക്കല്‍ കോളേജില്‍ ചികിത്സയിലാണ്. പറമ്പില്‍നിന്നും കിഴങ്ങ് വര്‍ഗങ്ങള്‍ ഒന്നും ശേഖരിക്കാന്‍ കഴിയാത്ത അവസ്ഥയിലാണ്.

കഴക്കൂട്ടത്തെ പീഡനം: പ്രതിയെ യുവതി തിരിച്ചറിഞ്ഞു

കഴക്കൂട്ടം: ഐടി ജീവനക്കാരിയായ യുവതിയെ ഹോസ്റ്റൽ മുറിയിൽ കയറി പീഡിപ്പിച്ച കേസിൽ അറസ്റ്റിലായ പ്രതിയെ യുവതി തിരിച്ചറിഞ്ഞു. ട്രക്ക് ഡ്രൈവറും മധുര സ്വദേശിയുമായ ബെഞ്ചമിൻ (35) ആണ് കഴക്കൂട്ടം പോലീസിന്‍റെ പിടിയിലായത്. സംഭവത്തിനുശേഷം തമിഴുനാട്ടിലേക്കു കടന്ന പ്രതിയെ ഞായറാഴ്ച കഴക്കൂട്ടം പോലീസും ഡാൻസാഫ് സംഘവും ചേർന്നാണു മധുരയിൽനിന്നും പിടികൂടിയത്. ആറ്റിങ്ങൽ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. തുടർന്ന് കൂടുതൽ തെളിവെടുപ്പിനും ചോദ്യം ചെയ്യുന്നതിനുമായി പ്രതിയെ കസ്റ്റഡിയിൽ വാങ്ങുമെന്ന് പൊലീസ് പറഞ്ഞു. ഹോസ്റ്റലിലെ ബലാത്സംഗത്തിന് മുൻപ് സമീപത്തെ മൂന്നു വീടുകളിൽ പ്രതി മോഷണശ്രമം നടത്തിയിരുന്നതായി പോലീസ് പറഞ്ഞു. സിസിടിവിയിൽ പ്രത്യക്ഷപ്പെടാതിരിക്കാൻ ഒരു വീട്ടിൽനിന്ന് കുടയെടുത്തു മുഖം മറച്ചായിരുന്നു ഹോസ്റ്റലിൽ കയറിയത്. മറ്റുരണ്ടു വീടുകളിൽ നിന്നായി തൊപ്പിയും ഹെഡ് ഫോണും എടുത്തിരുന്നു. തമിഴ്നാട്ടിൽ ബഞ്ചമിന് നിരവധി കേസുകളുണ്ടെന്നു കഴക്കൂട്ടം പോലീസ് പറഞ്ഞു. വിവരങ്ങൾ ശേഖരിച്ചു വരുന്നുണ്ട്. തെരുവിൽ ഉറങ്ങുന്ന സ്ത്രീകളെ ഉപദ്രവിക്കുന്നത് ഇയാളുടെ സ്ഥിരം രീതിയാണ്. കഴിഞ്ഞ വെള്ളിയാഴ്ച വെളുപ്പിനു രണ്ടു മണിയോടുകൂടിയാണ് കഴക്കൂട്ടത്ത് യുവതി താമസിക്കുന്ന ഹോസ്റ്റൽ മുറിയിൽ കയറി പീഡനം നടത്തിയത്. ഹോസ്റ്റലിൽ സിസി കാമറ ഇല്ലാത്തതിനാൽ പ്രതിയെപ്പറ്റി യാതൊരു വിവരവും പോലീസിനു ലഭിച്ചിരുന്നില്ല. തുടർന്ന് പ്രത്യേക സംഘം രൂപീകരിച്ചായിരുന്നു അന്വേഷണം നടത്തിയത്. കഴക്കൂട്ടം അസിസ്റ്റന്‍റ് കമ്മീഷണർ പി. അനിൽകുമാറിന്‍റെ നേതൃത്വത്തിൽ കഴക്കൂട്ടം, തുമ്പ, പേരൂർക്കട സ്റ്റേഷനുകളിലെ ഇൻസ്പെക്ടർ, സിറ്റി ഡാൻസ് ഓഫ് സംഘവും ചേർന്നാണ് പ്രതിയെ പിടികൂടിയത്.

രാഷ്‌‌‌ട്രപതിയുടെ സന്ദര്‍ശനം: നഗരത്തില്‍ ഗതാഗത നിയന്ത്രണം

തിരുവനന്തപുരം: നാലു ദിവസത്തെ ഔദ്യോഗിക സന്ദര്‍ശനത്തിനായി രാഷ്‌ട്രപതി ദ്രൗപതി മുർമു ഇന്നു കേരളത്തിലെത്തുന്നതിനെതുടര്‍ന്നു തിരുവനന്തപുരത്ത് ഇന്നും നാളെയും മറ്റന്നാളും ഗതാഗത നിയന്ത്രണം ഏര്‍പ്പെടുത്തി. ഇന്ന് ഉച്ചകഴിഞ്ഞു രണ്ടു മുതല്‍ രാത്രി എട്ടു വരെയും നാളെ രാവിലെ ആറു മുതല്‍ രാത്രി 10 വരെയും മറ്റന്നാള്‍ രാവിലെ ആറു മുതല്‍ ഉച്ചയ്ക്ക് 12.30 വരെയുമാണ് ഗതാഗത നിയന്ത്രണങ്ങള്‍ ഏര്‍പ്പെടുത്തിയിരിക്കുന്നത്. ഗതാഗത നിയന്ത്രണവുമായി ബന്ധപ്പെട്ട് നഗരത്തിലെ റോഡുകളില്‍ ഗതാഗത തിരക്ക് അനുഭവപ്പെടാന്‍ സാധ്യതയുണ്ട്.ഇന്ന് ഉച്ചയ്ക്ക് രണ്ടുമുതല്‍ രാത്രി എട്ടു വരെ ശംഖുംമുഖം ആള്‍സെയിന്‍റ്‌സ്, ചാക്ക, പേട്ട, പള്ളിമുക്ക്, പാറ്റൂര്‍, ജനറല്‍ ആശുപത്രി, ആശാന്‍ സ്‌ക്വയര്‍, യുദ്ധസ്മാരകം, വെള്ളയമ്പലം, കവടിയാര്‍ റോഡിന്‍റെ ഇരുവശങ്ങളിലും വാഹനങ്ങള്‍ പാര്‍ക്ക് ചെയ്യാന്‍ അനുവദിക്കില്ല. നാളെ രാവിലെ ആറു മുതല്‍ വൈകുന്നേരം ആറു വരെ ശംഖുംമുഖം, ആള്‍ സെയിന്‍റ്സ്, ചാക്ക, പേട്ട, പള്ളിമുക്ക്, പാറ്റൂര്‍, ജനറല്‍ ആശുപത്രി, ആശാന്‍ സ്‌ക്വയര്‍, വിജെടി ഹാള്‍, യുദ്ധസ്മാരകം, മ്യൂസിയം, വെള്ളയമ്പലം, കവടിയാര്‍ റോഡിന്‍റെ ഇരുവശങ്ങളിലും, വൈകുന്നേരം നാലു മുതല്‍ രാത്രി 10 വരെ കവടിയാര്‍, വെള്ളയമ്പലം, ആല്‍ത്തറ, ശ്രീമൂലം ക്ലബ്, വഴുതക്കാട്, വിമന്‍സ്‌ കോളജ്, ജംഗ്ഷന്‍, മേട്ടുക്കട വരെയുള്ള റോഡിന്‍റെ ഇരുവശങ്ങളിലും വാഹനങ്ങള്‍ പാര്‍ക്ക് ചെയ്യാന്‍ അനുവദിക്കുന്നതല്ല. മറ്റന്നാള്‍ രാവിലെ ആറുമുതല്‍ ഉച്ചയ്ക്ക് 12.30 വരെ കവടിയാര്‍, വെള്ളയമ്പലം, മ്യൂസിയം, പാളയം, വിജെടി, ആശാന്‍ സ്‌ക്വയര്‍, ജനറല്‍ ആശുപത്രി, പാറ്റൂര്‍, പള്ളിമുക്ക്, പേട്ട, ചാക്ക, ആള്‍സെയിനന്‍റ്‌സ്, ശംഖുംമുഖം റോഡിന്‍റെ ഇരുവശങ്ങളിലും വാഹനങ്ങള്‍ പാര്‍ക്ക് ചെയ്യാന്‍ അനുവദിക്കുന്നതല്ല. ഇന്നും നാളെയും മറ്റന്നാളും ശംഖമുഖം, പൊന്നറ, കല്ലുംമൂട്, ഈഞ്ചയ്ക്കല്‍, അനന്തപുരി ആശുപത്രി, ഈഞ്ചയ്ക്കല്‍, മിത്രാനന്ദപുരം, എസ്പി ഫോര്‍ട്ട്, ശ്രീകണ്ഠേശ്വരം പാര്‍ക്ക്, തകരപ്പറമ്പ്, മേല്‍പ്പാലം, ചൂരക്കാട്ടുപാളയം, തമ്പാനൂര്‍ ഫ്‌ളൈഓവര്‍, തൈക്കാട്, വഴുതയ്ക്കാട്, വെള്ളയമ്പലം റോഡിലും നാളെ വെള്ളയമ്പലം, മ്യൂസിയം, കോര്‍പ്പറേഷന്‍ ഓഫീസ്, രക്തസാക്ഷി മണ്ഡപം, ബേക്കറി ജംഗ്ഷന്‍, വിമന്‍സ്‌ കോളജ് റോഡിലും മറ്റന്നാള്‍ വെള്ളയമ്പലം, കവടിയാര്‍, കുറവന്‍കോണം, പട്ടം, കേശവദാസപുരം, ഉള്ളൂര്‍, ആക്കുളം, കുഴിവിള, ഇന്‍ഫോസിസ്, കഴക്കൂട്ടം, വെട്ടുറോഡ് റോഡിലും വാഹനങ്ങള്‍ക്ക് നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. റൂട്ട് സമയത്ത് പ്രധാന റോഡില്‍ വന്നു ചേരുന്ന ഇടറോഡുകളിലെ വാഹന ഗതാഗതത്തിനു നിയന്ത്രണമേര്‍പ്പെടുത്തും. വിമാനത്താവളത്തിലേക്കു വരുന്ന യാത്രക്കാര്‍ മുന്‍കൂട്ടി യാത്രകള്‍ ക്രമീകരിക്കണം. ഡൊമസ്റ്റിക് എയര്‍പോര്‍ട്ടിലേക്കു പോകുന്ന യാത്രക്കാര്‍ വെണ്‍പാലവട്ടം, ചാക്ക ഫ്‌ളൈ ഓവര്‍, ഈഞ്ചക്കല്‍ കല്ലുംമൂട്, പൊന്നറ പാലം, വലിയതുറ വഴിയും ഇന്‍റര്‍നാഷണല്‍ ടെര്‍മിനലിലേക്കു പോകുന്ന യാത്രക്കാര്‍ വെണ്‍പാലവട്ടം ചാക്ക ഫ്‌ളൈ ഓവര്‍, ഈഞ്ചക്കല്‍, കല്ലുംമ്മൂട്, അനന്തപുരി ആശുപത്രി സര്‍വീസ് റോഡ് വഴിയും യാത്രകൾ ക്രമീകരിക്കേണ്ടതുമാണ്. സ്കൂൾ കായിക മേള: നഗരത്തിൽ 28 വരെ ഗതാഗത ക്രമീകരണം ഏർപ്പെടുത്തി തിരുവനന്തപുരം: സംസ്ഥാന സ്കൂൾ കായിക മേള നടക്കുന്നതിനാൽ നഗരത്തിൽ ഇന്നു മുതൽ 28 വരെ ഗതാഗത ക്രമീകരണങ്ങൾ ഏർപ്പെടുത്തി. പുത്തരിക്കണ്ടം മൈതാനത്തിൽ പ്രവർത്തിക്കുന്ന ഭക്ഷണശാലയിലേക്കു വരുന്ന വാഹനങ്ങൾ കുട്ടികളെ ഇറക്കിയ ശേഷം ആറ്റുകാൽ ക്ഷേത്ര പാർക്കിംഗ് ഗ്രൗണ്ടിലോ ഐരാണിമുട്ടം ഹോമിയോ ആശുപത്രി പാർക്കിംഗ് ഗ്രൗണ്ടിലോ പാർക്ക് ചെയ്യണം. കായികവേദികളിലേയ്ക്ക് വരുന്ന വാഹനങ്ങൾ കുട്ടികളെ ഇറക്കിയ ശേഷം അനുവദിച്ചിട്ടുള്ള പാർക്കിംഗ് ഗ്രൗണ്ടുകളിൽ നിർത്തിയിടേണ്ടതാണ്. പ്രധാനറോഡുകളിലോ ഇടറോഡുകളിലോ ഗതാഗത തടസം സൃഷ്ടിച്ച് വാഹനങ്ങൾ പാർക്ക് ചെയ്യാൻ പാടില്ല.

ഭാരത അൽമായൻ വിശുദ്ധ ദേവസഹായം പ്രഖ്യാപനാഘോഷം നടത്തി

തിരുവനന്തപുരം: ഭാരത അൽമായരുടെ മധ്യസ്ഥനായുള്ള വിശുദ്ധ ദേവസഹായത്തിന്‍റെ പ്രഖ്യാപനാഘോഷം തിരുവനന്തപുരം ലത്തീൻ അതിരൂപത അൽമായ സമൂഹം ആചരിച്ചു. പാളയം കത്തീഡ്രൽ ദേവാലയ ഹാളിൽ നടന്ന പൊതുസമ്മേളനം അതിരൂപത അൽമായ ശുശ്രൂഷ ഡയറക്ടർ ഫാ. ബിഡ് മനോജ് അമാദോ ഉദ്ഘാടനം ചെയ്തു. ആധുനിക കാലഘട്ടത്തിൽ വിശുദ്ധ ദേവസഹായത്തിന്‍റെ ജീവിതമാതൃക നാം ഓരോരുത്തരും മാതൃക ആക്കേണ്ടതും സഭയോടും സമൂഹത്തോടും കൂറും വിശ്വസ്തതയുമുള്ള നല്ല അൽമായ സമൂഹവും ഇവരെ നയിക്കാനുള്ള അൽമായ നേതാക്കളും രൂപപ്പെടേണ്ട സമയം അതിക്രമിച്ചിരിക്കുന്നു എന്ന ഈ വിശുദ്ധന്‍റെ വിശ്വസ്ത ജീവിതമാതൃക വെളിപ്പെടുത്തുന്നു എന്ന് അദ്ദേഹം പറഞ്ഞു. പ്രഫ. ഐറിസ് കൊയ്‌ലോ വിശുദ്ധന്‍റെ ജീവചരിത്രത്തെ ആസ്പദമാക്കി മുഖ്യപ്രഭാഷണവും പാളയം ഇടവക വികാരി മോണ്‍. ഇ. വിൽഫ്രഡ് അനുഗ്രഹ പ്രഭാഷണവും നടത്തി. അതിരൂപത അൽമായ ശുശ്രൂഷ കണ്‍വീനർ ആന്‍റണി ആൽബർട്ടിന്‍റെ അധ്യക്ഷതയിൽ കൂടിയ പൊതുസമ്മേളനത്തിന് അസിസ്റ്റന്‍റ് ഡയറക്ടർ നിക്സണ്‍ ലോപ്പസ് സ്വാഗതവും സെക്രട്ടറി റീന ഷാജി നന്ദിയും പറഞ്ഞു. സമുദായ-ഭക്തസംഘടനാ ഭാരവാഹികളായ പാട്രിക് മൈക്കിൾ, ജോളി പത്രോസ്, ജോർജ് പള്ളിത്തറ, ഡി. ഫ്രാൻസിസ്, എൻ. ക്രിസ്തുദാസ്, ഷാജി ഫെർണാണ്ടസ് എന്നിവർ പങ്കെടുത്തു. തുടർന്ന് കത്തീഡ്രൽ ദേവാലയത്തിൽ ബലിയർപ്പണവും നടന്നു. മോണ്‍. ഇ. വിൽഫ്രഡ്, റവ.ഡോ. ലോറൻസ് കുലാസ്, ഫാ. ബിഡ് മനോജ്, ഫാ. അലോഷ്യസ്, ഫാ. മാർത്തോമ, ഫാ. മനീഷ് പീറ്റർ, ഫാ. ദീപു, ഫാ. ദേവസ്യ എന്നിവർ കാർമികരായിരുന്നു.

സിപിഎം പ്രതിഷേധിച്ചു

നെടുമങ്ങാട്: ജില്ലാ ആശുപത്രിയുടെ മുന്നിൽ പാർക്ക് ചെയ്തിരുന്ന ഡിവൈഎഫ്ഐ യുടെ ആംബുലൻസ് എസ്ഡിപിഐ പ്രവർത്തകർ അഗ്നിക്കിരയാക്കിയതിൽ പ്രതിഷേധിച്ച് സിപിഎം നേതൃത്വത്തിൽ പ്രതിഷേധ പ്രകടനവും യോഗവും സംഘടിപ്പിച്ചു. സിപിഎം ഏരിയാ സെക്രട്ടറി കെ.പി. പ്രമോഷ് ഉദ്ഘാടനം ചെയ്തു. സിപിഎം ജില്ലാ കമ്മിറ്റി അംഗവും ഡിവൈഎഫ്ഐ ജില്ലാ സെക്രട്ടറിയുമായ ഷിജുഖാൻ അധ്യക്ഷനായി. സിപിഎം ജില്ലാ കമ്മിറ്റി അംഗം അഡ്വ. ആർ. ജയദേവൻ, ഡിവൈഎഫ്ഐ ജില്ലാ പ്രസിഡന്‍റ് വി. അനൂപ് എന്നിവർ സംസാരിച്ചു. ഡിവൈഎഫ് ഐ സംസ്ഥാന കമ്മിറ്റി അംഗം എൽഎസ് ലിജു നന്ദി പറഞ്ഞു. പ്രകടനത്തിന് എസ്എസ് ബിജു, പി. ഹരികേശൻ മന്നൂർക്കോണം രാജേന്ദ്രൻ, എസ്.ആർ. ഷൈൻലാൽ, ഗിരീഷ്കുമാർ, കെ.എ. അസീസ്, എൻ.ആർ. ബൈജു, ആർ. മധു, പത്മകുമാർ, ബി. നജീബ് എന്നിവർ നേതൃത്വം നൽകി.

ഗുരുജ്യോതി അധ്യാപക പുരസ്കാര വിതരണം 23ന്

നേമം: സുഗതവനം ചാരിറ്റബിൾ ട്രസ്റ്റ് വിദ്യാഭ്യാസ ഓൺലൈൻ ചാനലായ പള്ളിക്കുടം ടിവിയുടെ സഹകരണത്തോടെ സംസ്ഥാനത്തെ മികച്ച അധ്യാപകർക്ക് നൽകി വരുന്ന ഗുരുജ്യോതി പുരസ്കാരത്തിന്‍റെ സമർപ്പണം 23നു നടക്കും. പ്രസ് ക്ലബിനു സമീപമുള്ള ജോയിന്‍റ് കൗൺസിൽ ഹാളിൽ ഉച്ചയ്ക്കു മൂന്നി നടക്കുന്ന അവാർഡു ദാന സമ്മേളനം മന്ത്രി പി. പ്രസാദ് ഉദ്ഘാടനം ചെയ്യും. ട്രസ്റ്റ് ഡയറക്ടർ ഡോ. ജിതേഷ്‌ജി അധ്യക്ഷത വഹിക്കും. ട്രസ്റ്റ് ചെയർമാൻ എൽ. സുഗതൻ സ്വാഗതം പറയും. പൊതു വിദ്യാഭ്യാസ സെക്രട്ടറി ഡോ. കെ. വാസുകി അധ്യാപകരുമായി സംവദിക്കും. പൊതു വിദ്യാഭ്യാസ ഡയറക്റ്റർ എൻ.എസ്.കെ ഉമേഷ് മുഖ്യപ്രഭാഷണം നടത്തും. ചലച്ചിത്ര അക്കാദമി ചെയർമാനും ചലച്ചിത്ര നടനും എഴുത്തുകാരനും സുഗതവനം ചാരിറ്റബിൾ ട്രസ്റ്റ് ബ്രാൻഡ് അംബാസിഡറുമായ പ്രേംകുമാർ, എസ്‌സിആർടി ഡയറക്ടർ ആർ.കെ. ജയപ്രകാശ്, എസ്ഐടി ഡയറക്ടർ ബി. അബുരാജ് തുടങ്ങിയവർ പങ്കെടുക്കും. സംസ്ഥാനത്തെ എൽപി, യുപി, എച്ച്എസ്, എച്ച്എസ്എസ്, വിഎച്ച്എസ്എസ് തലങ്ങളിലെ 24 അധ്യാപകർക്കാണ് പുരസ്കാരം നൽകുന്നത്. മൂന്ന് അധ്യാപകർക്ക് സ്പെഷൽ ജ്യൂറി അവാർഡും നൽകും. സംസ്ഥാനത്തെ ഏറ്റവും മികച്ച സ്കൂളിനുള്ള ഈ വർഷത്തെ അക്ഷര ജ്യോതി അവാർഡ് മലപ്പുറം എടരിക്കോട് പികെഎംഎം എച്ച്എസ്എസ് ഏറ്റുവാങ്ങും. 10,001 രൂപയും പ്രശസ്തി പത്രവുമാണ് അവാർഡ്. മികച്ച ശിശുക്ഷേമ സമിതിക്കുള്ള പ്രഥമ അക്ഷയജ്യോതി പുരസ്കാരം കൊല്ലം ജില്ലാ ശിശുക്ഷേമ സമിതിക്കു സമ്മാനിക്കും.

കരകുളം പഞ്ചായത്ത്‌ വികസന സദസ് സംഘടിപ്പിച്ചു

നെടുമങ്ങാട്: അഞ്ച് വർഷക്കാലം ആരോഗ്യ- വിദ്യാഭ്യാസ-ക്ഷേമ-വികസന മേഖലയിൽ കൈവരിച്ചിട്ടുള്ള നേട്ടങ്ങൾ പൊതുജന സമക്ഷത്തിൽ അവതരിപ്പിച്ചു കരകുളം പഞ്ചായത്തിൽ വികസന സദസ് സംഘിടിപ്പിച്ചു. മന്ത്രി ജി.ആർ. അനിൽ ഉദ്‌ഘാടനം ചെയ്തു. കരകുളം ഹയർസെക്കൻഡറി സ്കൂൾ ഓഡിറ്റോറിയത്തിൽ നടന്ന യോഗത്തിൽ പഞ്ചായത്ത് പ്രസിഡന്‍റ് യു. ലേഖ റാണി അധ്യക്ഷത വഹിച്ചു. വൈസ് പ്രസിഡന്‍റ് ടി. സുനിൽകുമാർ, പഞ്ചായത്ത് സെക്രട്ടറി ബി. സജി കുമാർ, വിവിധ സ്റ്റാൻഡിംഗ് കമ്മിറ്റി ചെയർപേഴ്സൺമാർ എന്നിവർ യോഗത്തിൽ പങ്കെടുത്തു.

പനന്തടിക്കോണം അങ്കണവാടി മന്ദിരം ഉദ്ഘാടനം ചെയ്തു

പാറശാല: പാറശാല പഞ്ചായത്തില്‍ പരശുവയ്ക്കല്‍ പനന്തടിക്കോണത്ത് പണികഴിപ്പിച്ച 158-ാം നമ്പര്‍ അങ്കണവാടി മന്ദിരം പഞ്ചായത്ത് പ്രസിഡന്‍റ് എല്‍. മഞ്ജുസ്മിത ഉദ്ഘാടനം ചെയ്തു. വൈസ് പ്രസിഡന്‍റ് ആര്‍. ബിജു അധ്യക്ഷത വഹിച്ചു. പഞ്ചായത്ത് സ്ഥിരം സമിതി അധ്യക്ഷരായ അനിതാറാണി, വീണ, പഞ്ചായത്ത് അംഗങ്ങളായ ഓമന, ജയകുമാര്‍, അനിത, മായ, സെയ്ദാലി, മഹിളകുമാരി, പഞ്ചായത്ത് സെക്രട്ടറി ജി.എസ്. ഹരി, ഐ സിഡിഎസ് സൂപ്പര്‍വൈസര്‍മാരായ ഡോ. മഞ്ചു, സോണിയ, എ.ഇ. അമ്പിളി, ബിനിറ്റ, കൃഷ്ണകുമാരി തുടങ്ങിയവര്‍ സംസാരിച്ചു.

ഓപ്പണ്‍ എയര്‍ ഓഡിറ്റോറിയം, വയോജനപാര്‍ക്ക് ഉദ്ഘാടനം

നെയ്യാറ്റിൻകര : പെരുമ്പഴുതൂർ ജംഗ്ഷനിൽ നിന്നാരംഭിച്ച് കളത്തുവിള - അരുവിപ്പുറം റോഡുമായി ബന്ധിപ്പിക്കുന്ന പുതിയ റോഡിന്‍റെയും വയോജന പാർക്കിന്‍റെയും നിർമാണ പ്രവർത്തനങ്ങൾക്ക് നെയ്യാറ്റിൻകര നഗരസഭ തുടക്കം കുറിച്ചു. 12 ലക്ഷം രൂപ ചെലവഴിച്ച് നിർമിക്കുന്ന വയോജന പാർക്കിൽ ഇരിപ്പിടങ്ങളും പൂന്തോട്ടവും മാനസിക ഉല്ലാസത്തിനുള്ള അടിസ്ഥാന സൗകര്യങ്ങളും ഒരുക്കുമെന്ന് നഗരസഭാ ചെയർമാൻ പി.കെ. രാജമോഹനൻ അറിയിച്ചു. പെരുമ്പഴുതൂരിൽ നിലവിൽ നിർമാണ ഘട്ടത്തിലുള്ള ഓപ്പൺ എയർ ഓഡിറ്റോറിയത്തിന്‍റെയും വയോജന പാർക്കിന്‍റെയും ഉദ്ഘാടനം ഈ മാസം അവസാനം നടക്കും. നിലവിലുള്ള പെരുമ്പഴുതൂർ മാർക്കറ്റിനെ പൊളിച്ചുമാറ്റി പുതിയ മാർക്കറ്റ് കോംപ്ലക്സിന്‍റെ ശിലാസ്ഥാപനം നടത്തുമെന്നും ചെയർമാൻ വ്യക്തമാക്കി. 2.25 കോടി രൂപ ചെലവിൽ ചണ്ഡീഗഡ് മാതൃകയിലുള്ള ആധുനിക മാർക്കറ്റിന്‍റെ ടെൻഡർ നടപടികൾ പൂർത്തിയായിട്ടുണ്ടെന്നും ഉടൻ നിർമാണ പ്രവർത്തനങ്ങൾ ആരംഭിക്കുമെന്നും അദ്ദേഹം കൂട്ടിച്ചേര്‍ത്തു.

റോഡില്‍ നിര്‍ത്തിയിരുന്ന ആംബുലന്‍സില്‍ ലോറി ഇടിച്ചു

വെള്ളറട : പനച്ചമൂട്ടില്‍ റോഡില്‍ നിര്‍ത്തിയിരുന്ന ആംബുലന്‍സില്‍ മീന്‍ ലോറി ഇടിച്ച് ആംബുലന്‍സിനും മീന്‍ ലോറിക്കും കേടുപാട് സംഭവിച്ചു. ഇന്നലെ പുലര്‍ച്ചെ 3:00 മണിക്ക് ആയിരുന്നു സംഭവം. മേഖലയിലെ തിരക്കുള്ള സ്ഥലമായ പനച്ചമൂടിനും -പുളിമൂട് ജംഗ്ഷനും ഇടയ്ക്കാണ് ആംബുലന്‍സ് രാത്രിയിലും പകലും നിർത്തിയിടു ന്നത്. ഇന്നലെ പുലര്‍ച്ചെ മത്സ്യം കയറ്റിവന്ന ലോറി തിരിക്കാന്‍ ശ്രമിക്കുന്നതിനിടെ നിയന്ത്രണം വിട്ട് ആംബുലന്‍സില്‍ ഇടിക്കുകയായിരുന്നു. ആംബുലന്‍സിനും മീന്‍ ലോറിക്കും കേടുപാട് സംഭവിച്ചിട്ടുണ്ട്. ഉടന്‍ തന്നെ മത്സ്യ വ്യാപാരികള്‍ ഇടപെട്ട് മിനി ലോറിയെ അവിടെനിന്നു മാറ്റിയ ശേഷമാണ് തടസപ്പെട്ട വാഹനഗതാഗതം പുനഃസ്ഥാപിക്കാന്‍ കഴിഞ്ഞത്.

പള്ളിച്ചൽ പഞ്ചായത്തിന് പുതിയ മന്ദിരം

നേമം: സാധാരണ ജനങ്ങളുടെ മനസറിഞ്ഞ് പ്രവര്‍ത്തിക്കാന്‍ കഴിയുന്നതാണ് പദവിയാണു പഞ്ചായത്ത് പ്രസിഡന്‍റിന്‍റേതെന്നു മന്ത്രി വി. ശിവന്‍കുട്ടി. പള്ളിച്ചല്‍ പഞ്ചായത്തിന്‍റെ പുതിയ മന്ദിരം ഉദ്ഘാടനം ചെയ്യുകയായിരുന്നു മന്ത്രി. ഐ.ബി. സതീഷ് എംഎല്‍എ അധ്യക്ഷനായി. മന്ത്രി ജി.ആര്‍. അനില്‍, പള്ളിച്ചല്‍ പഞ്ചായത്ത് പ്രസിഡന്‍റ് കെ. രാകേഷ്, ബ്ലോക്ക് പ്രസിഡന്‍റ് എസ്.കെ. പ്രിജ, ജില്ലാ പഞ്ചായത്ത് അംഗം ഭഗത് റൂഫസ്, പഞ്ചായത്ത് വൈസ് പ്രസിഡന്‍റ് ബി. ശശികല, സി.ആര്‍. സുനു, വി. വിജയന്‍, ടി. മല്ലിക, എ.ടി. മനോജ് തുടങ്ങിയവര്‍ പ്രസംഗിച്ചു. കരമന-കളിയിക്കാവിള ദേശീയപാത വികസനവുമായി ബന്ധപ്പെട്ട് നേരത്തെ ഉണ്ടായിരുന്ന പഞ്ചായത്ത് ഓഫീസിന്‍റെ പൊളിച്ചുമാറ്റിയ സ്ഥലവും കൂടുതലായി വാങ്ങിയ രണ്ടു സെന്‍റു സ്ഥലവും ഉപയോഗിച്ചാണ് ആധുനിക സൗകര്യങ്ങളോടെ പുതിയ കെട്ടിടം നിര്‍മിച്ചിരിക്കുന്നത്. പഞ്ചായത്തിന്‍റെ തനത് ഫണ്ടും എംഎല്‍എ ഫണ്ടും ഉപയോഗിച്ചായിരുന്നു നിര്‍മാണം.

അദ്വൈതയ്്ക്കു കൈത്താങ്ങുമായി എം.എ. യൂസഫ് അലി

തിരുവനന്തപുരം: കരയുന്പോൾ കണ്ണുകൾ പുറത്തേക്കു തള്ളുന്ന രോഗത്തോടു മല്ലിടുന്ന നെയ്യാറ്റിൻകര വെണ്‍പകൽ സ്വദേശി ഒരുവയസുകാരി അദ്വൈതയ്ക്ക് ചികിത്സാ സഹായവുമായി ലുലു ഗ്രൂപ്പ് ചെയർമാൻ എം.എ. യൂസഫ് അലി. ശസ്ത്രക്രിയക്കായി പത്തുലക്ഷം രൂപ കുഞ്ഞിന്‍റെ കുടുംബത്തിനു കൈമാറി. കുഞ്ഞിന്‍റെ രോഗാവസ്ഥയും ശസ്ത്രക്രിയക്കുവേണ്ട ഭാരിച്ച പണം കണ്ടെത്താനാകാത്ത കുടുംബത്തിന്‍റെ സാഹചര്യവും വാർത്തകളിലൂടെ ശ്രദ്ധയിൽപ്പെട്ടതിനെ തുടർന്നാണ് യൂസഫ് അലിയുടെ ഇടപെടൽ. എം.എ. യൂസഫ് അലിക്ക് വേണ്ടി ലുലു ഗ്രൂപ്പ് ഡയറക്ടർ ജോയ് ഷഡാനന്ദൻ, കുഞ്ഞിന്‍റെ വീട്ടിലെത്തി മാതാപിതാക്കൾക്ക് പത്തുലക്ഷം രൂപയുടെ ചെക്ക് കൈമാറി. പബ്ലിക് റിലേഷൻസ് മാനേജർ സൂരജ് അനന്തകൃഷ്ണൻ, മീഡിയ കോർഡിനേറ്റർ എം.അൽ. അമീൻ എന്നിവരും ഒപ്പമുണ്ടായിരുന്നു.

അമ്മായിയമ്മയുടെ 24 പവന്‍ സ്വര്‍ണം കാണാനില്ലെന്ന പരാതിയില്‍ മരുമകള്‍ അറസ്റ്റില്‍

വലിയതുറ: ഭര്‍തൃമാതാവിന്‍റെ 24 പവന്‍ സ്വര്‍ണം കാണാനില്ലെന്ന പരാതിയില്‍ മരുമകളെ വലിയതുറ പോലീസ് അറസ്റ്റ് ചെയ്തു. ആറ്റിപ്ര വില്ലേജില്‍ പള്ളിത്തുറ വാര്‍ഡില്‍ കഴക്കൂട്ടം സ്റ്റേഷന്‍കടവ് ശ്രീനാരായണ ഗുരുമന്ദിരം വീട്ടില്‍ ലക്ഷ് മി (33) യെ ആണ് പോലീസ് അറസ്റ്റ് ചെയ്തത്. വലിയതുറ വെട്ടുകാട് ബാലനഗറില്‍ ഭര്‍ത്താവിനൊപ്പം താമസിച്ചുവരികയായിരുന്നു അറസ്റ്റിലായ ലക്ഷ്മി. ഈ വീട്ടില്‍ തന്നെയാണ് പരാതിക്കാരിയായ ഭാര്‍ത്താവിന്‍റെ അമ്മയും താമസിച്ചുവരുന്നത്. ആഭരണം നഷ്ടപ്പെട്ടത് ഏതു മാസത്തിലാണെന്നള്ള കാര്യം പരാതിക്കാരിക്ക് വ്യക്തമായി അറിയില്ലെന്നു പോലീസ് പറഞ്ഞു. അടുത്തിടെ ആഭരണങ്ങള്‍ വെച്ചിരുന്ന അലമാര പരിശോധിച്ചപ്പോഴാണ് സ്വര്‍ണം നഷ്ടമായ വിവരം ഇവര്‍ അറിയിന്നത്. തുടര്‍ന്ന് ലക്ഷ്മിയോട് ഇവര്‍ ചോദിച്ചെങ്കിലും സ്വര്‍ണം തിരികെ നല്‍കാന്‍ തയാറാകാത്ത സാഹചര്യത്തിലാണ് പോലീസില്‍ പരാതി നല്‍കിയത്. പോലീസ് ലക്ഷ് മിയെ ചോദ്യം ചെയ്തതില്‍ ഇവര്‍ ആഭരണം പണയം വെച്ചതായും വിറ്റതായും പറയുന്നു. ലക്ഷ്മിയെ കൂടുതല്‍ ചോദ്യം ചെയ്താല്‍ മാത്രമേ വ്യക്തമായ വിവരം ലഭിക്കുകയുള്ളൂവെന്നു പോലീസ് പറഞ്ഞു. വലിയതുറ എസ്എച്ച്ഒ അശോക കുമാര്‍, എസ്ഐ ഇന്‍സമാം എന്നിവരുടെ നേതൃത്വത്തില്‍ അറസ്റ്റ് ചെയ്ത പ്രതിയെ ചൊവ്വാഴ്ച കോടതിയില്‍ ഹാജരാക്കും.

തിരുവല്ലം ക്ഷേത്രോത്സവം ഇന്നു കൊടിയേറും

തിരുവല്ലം: പരശുരാമസ്വാമി ക്ഷേത്രതിലെ ഉത്സവത്തിന് ഇന്നു കൊടിയേറും. ഉച്ചയ്ക്ക് 12.25ന് നടക്കുന്ന ചടങ്ങിൽ ക്ഷേത്രം തന്ത്രി കെ.എം. മന മാധവന്‍ നമ്പൂതിരിയുടെ കാര്‍മികത്വത്തിലാണു കൊടിയേറ്റം. പഞ്ചവാദ്യം, പഞ്ചാരി മേളം എന്നിവയുണ്ടാവും. എല്ലാ ദിവസവും രാവിലെ 10.45ന് ആനപ്പുറത്ത് എഴുന്നള്ളത്ത്, 12.30ന് അന്നദാന സദ്യ. 21 ന് വൈകുന്നേരം 6.30ന് നാമമധുരം, രാത്രി 8.00 ന് ക്ലാസിക്കല്‍ ഡാന്‍സ്. 22ന് രാവിലെ 7.30ന് ഗീതാപാരായണം. വൈകുന്നേരം 6.30 ന് ഫ്യൂഷന്‍, രാത്രി 8.00 ന് ഡാന്‍സ്. 23ന് രാവിലെ 7.00ന് നാരായണീയ പരായണം. വൈകുന്നേ രം 6.30 ന് ഡാന്‍സ് , രാത്രി 8.00 ന് കഥകളി എന്നിവയുണ്ടാകും.

ഗാലത്തിയോൺ 2025 മെഗാ എക്സിബിഷൻ 23 മുതൽ 29 വരെ

വെഞ്ഞാറമൂട് : വൈദ്യശാസ്ത്ര ലോകത്തെ പുത്തൻ അറിവുകളും അത്ഭുതക്കാഴ്ചകളുമായി ശ്രീ ഗോകുലം മെഡിക്കൽ കോഴജ് കാമ്പസ് സ്റ്റുഡന്‍റ്സ് യൂണിയൻ സംഘടിപ്പിക്കുന്ന "ഗാലത്തിയോൺ 2025 മെഗാ എക്സിബിഷന് 23 മുതൽ 29 വരെ വെഞ്ഞാറമ്മൂടുള്ള കോളജ് കാമ്പസിൽ നടത്തും. മെഡിക്കൽ പ്രദർശനങ്ങൾക്കു പുറമെ വിനോദത്തിനും വിജ്ഞാനത്തിനുമായി വിപുലമായ സൗകര്യങ്ങളാണ് ഇവിടെ ഒരുക്കിയിരിക്കുന്നത്. രുചികരമായ വിഭവങ്ങളുമായി ഫുഡ് ഫെസ്റ്റിവൽ, ആവേശം പകരാൻ എആർ-വിആർ ഗെയിമുകൾ, ഷോപ്പിംഗിനായി ഫ്ലീ മാർക്കറ്റ് എന്നിവ പ്രധാനയും പ്രധാന ആകർഷണങ്ങളാണ്.

ബോധവത്കരണ കാമ്പയിൽ

വെഞ്ഞാറമൂട്: രാജ്യത്ത് സ്ത്രീകൾക്കെതിരേ നടക്കുന്ന ആക്രമണങ്ങളെ ചെറുക്കുക, അന്ധവിശ്വാസങ്ങളുടെയും അനാചാരങ്ങളുടെയും മറവിൽ നടക്കുന്ന സ്ത്രീവിരുദ്ധ പ്രവർത്തനങ്ങളെ തടയുക, കേരള സർക്കാരിന്‍റെ സ്ത്രീപക്ഷ നിലപാടുകൾക്ക് കരുത്ത് പകരുക, തുടങ്ങി വിവിധ ആവശ്യങ്ങൾ ഉന്നയിച്ച് ജോയിന്‍റ് കൗൺസിൽ വനിതാ കമ്മിറ്റി സംഘടിപ്പിക്കുന്ന 'ഭയരഹിത ജീവിതം സുരക്ഷിത തൊഴിലിടം' എന്ന കാമ്പയിന്‍റെ ഭാഗമായി നോർത്ത് ജില്ലാ വനിതാ കമ്മിറ്റിയുടെ ആഭിമുഖ്യത്തിൽ വാമനപുരം മേഖലയിൽ കാമ്പയിൻ സംഘടിപ്പിച്ചു. മേഖലയിലെ വിവിധ ഓഫീസ് സമുച്ചയങ്ങൾ കേന്ദ്രീകരിച്ച് ലഘുലേഖ വിതരണം, വിശദീകരണ യോഗങ്ങൾ, ോധവത്കരണ ക്ലാസുകൾ, ജാഗ്രത സദസുകൾ, പോസ്റ്റർ പ്രചാരണം എന്നിവ സംഘടിപ്പിച്ചു. ജോയിന്‍റ് കൗൺസിൽ മേഖല വനിതാ കമ്മിറ്റി സെക്രട്ടറി ‌എസ്. ദിവ്യ ബോധവത്കരണ പരിപാടികൾ ഉദ്ഘാടനം ചെയ്തു.

ധനുവച്ചപുരം ഭാഗത്ത് ദുരിത യാത്ര തുടരുന്നു

പാറശാല: ധനുവച്ചപുരം കേന്ദ്രീകരിച്ചുള്ള ബസ് സര്‍വീസുകള്‍ വെട്ടിക്കുറച്ചതായി നാട്ടുകാരുടെ പരാതി. ദേശീയ നിലവാരത്തില്‍ പ്രവര്‍ത്തിക്കുന്ന ധനുവച്ചപുരം ഗവണ്‍മെന്‍റ് ഐടിഐ ആര്‍. ഡി. കോളജ് ആര്‍ട്‌സ് ആന്‍ഡ് സയന്‍സ് കോളജ്, ഹയര്‍സെക്കന്‍ഡറി സ്‌കൂള്‍, യുപിഎല്‍പി എല്‍കെജി വരെയുള്ള ക്ലാസുകളിലായി വിദ്യാര്‍ഥികളും അധ്യാപകരും അനധ്യാപകരും ഉള്‍പ്പെടെ പതിനായിരത്തോളം പേരാണ് ധനുച്ചപുരം കേന്ദ്രീകരിച്ച് വിവിധ മേഖലകളിലായി പ്രവര്‍ത്തിക്കുന്നത്. നെയ്യാറ്റിന്‍കര താലൂക്കിലെ വിവിധ മേഖലകളില്‍നിന്ന് എത്തുന്ന വിദ്യാർഥികള്‍ പൊതുഗതാഗത സംവിധാനത്തെയാണ് ആശ്രയിക്കുന്നത്. ആവശ്യത്തിന് ബസ് സര്‍വീസുകള്‍ ഇല്ലാത്തത് വിദ്യാര്‍ഥികളെ വലയ്ക്കുന്ന അവസ്ഥയാണ്. വൈകുന്നേരം ഏഴ് മണികഴിഞ്ഞാല്‍ നെയ്യാറ്റിന്‍കരനിന്നും ധനുവച്ചപുരത്തേക്കുള്ള സര്‍വീസുകള്‍ അകാരണമായി നിറുത്തിവക്കുന്നതായി വിദ്യാർഥികള്‍ പറയുന്നു.

മെഗാ തൊഴില്‍മേള രണ്ടാം ഘട്ടം ഇന്ന്

നെയ്യാറ്റിൻകര : നെയ്യാറ്റിന്‍കര നഗരസഭ 2025-26 പദ്ധതിയിലുള്‍പ്പെടുത്തി നടപ്പാക്കുന്ന മെഗാ തൊഴില്‍മേളയുടെ രണ്ടാം ഘട്ടം ഇന്ന്. നഗരസഭ സ്റ്റേഡിയത്തില്‍ രാവിലെ പത്തിന് ആരംഭിക്കുന്ന തൊഴില്‍മേള കെ. ആന്‍സലന്‍ എംഎല്‍എ ഉദ്ഘാടനം ചെയ്യും. വിജ്ഞാനകേരളം ക്യാന്പിന്‍റെ ഭാഗമായി നഗരസഭയും കുടുംബശ്രീമിഷനും സംയുക്തമായി ഒരുക്കുന്ന തൊഴില്‍മേളയില്‍ 1500 ലേറെ തൊഴിലവസരങ്ങളുണ്ടെന്ന് സംഘാടകര്‍ അറിയിച്ചു.

കരമനയാറ്റിൽ അജ്ഞാത മൃതദേഹം

പേരൂർക്കട: കരമനയാറ്റിൽ അജ്ഞാത മൃതദേഹം കണ്ടെത്തി. ഇന്നലെ ഉച്ചയ്ക്ക് 12 നാണ് 65 വയസ്സ് പ്രായം തോന്നിക്കുന്ന പുരുഷന്‍റെ മൃതദേഹം ആനന്ദ് നഗർ ഭാഗത്ത് ആറ്റിൽ കണ്ടെത്തിയത്. കമിഴ്ന്നു കിടക്കുന്ന നിലയിലായിരുന്നു മൃതദേഹം. മൃതദേഹത്തിന് മൂന്ന് ദിവസത്തെ പഴക്കം വരുമെന്ന് പോലീസ് അറിയിച്ചു. മൃതദേഹം തിരുവനന്തപരം മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി.

പഞ്ചായത്ത് രക്ഷാ യാത്ര സംഘടിപ്പിച്ചു

പാറശാല: പാറശാല ഗ്രാമ-ബ്ലോക്കു പഞ്ചായത്തുകള്‍ ഭരിക്കുന്ന എല്‍ഡിഎഫ് ഭരണസമിതിയുടെ അഴിമതിക്കെതിരെ പാറശാല - പരശുവയ്ക്കല്‍ മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തില്‍ പഞ്ചായത്ത് രക്ഷാ യാത്ര സംഘടിപ്പിച്ചു. പഞ്ചായത്ത് രക്ഷാ യാത്ര പവതിയാന്‍വിളയില്‍ കെപിസിസി സെക്രട്ടറി ഡോ.ആര്‍.വല്‍സലന്‍ ഉത്ഘാടനം ചെയ്തു. ജാഥ ക്യാപ്റ്റന്‍മാരായ കൊറ്റാമം ലിജിത്ത്, ജെ.കെ. ജസ്റ്റിന്‍രാജ്, എ.ടി.ജോര്‍ജ് , പാശാല സുധാകരന്‍, കൊറ്റാമം വിനോദ്, അഡ്വ.എസ്.ജോണ്‍, കൊല്ലിയോടു സത്യനേശന്‍ , വേലപ്പന്‍ നായര്‍, കൊറ്റാമം മോഹനന്‍, മധു, അരുണ്‍, ലെല്‍വിന്‍ ജോയ്, പവതിയന്‍വിള സുരേന്ദ്രന്‍ എന്നിവര്‍ പ്രസംഗിച്ചു.

കനത്ത മഴയിൽ കള്ളിക്കാട് ജംഗ്ഷൻ വെള്ളത്തിലായി; പലയിടത്തും നാശനഷ്ടം

കള്ളിക്കാട് : കഴിഞ്ഞ രണ്ടു ദിവസമായി പെയ്ത മഴയിൽ കള്ളിക്കാട് ജംഗ്ഷൻ വെള്ളത്തിലായി. പലയിടത്തും നാശനഷ്ടമുണ്ടായി. മലയോര ഹൈവ കടന്നുപോകുന്ന സ്ഥലമാണ് കള്ളിക്കാട് ജംഗ്ഷൻ. ഇവിടെയാണ് മണിക്കൂറുകളോളം വെള്ളം കെട്ടി നിന്നത്. വാഹനങ്ങളിലും കച്ചവട സ്ഥാപനങ്ങളിലും വെള്ളം കയറി. പഞ്ചായത്തിലെ പല ഭാഗത്തും നാശനഷ്ടമുണ്ട്. തുറന്ന ജയിൽ അനക്‌സ് ഭാഗത്തെ റോഡിൽ മരം വീണതോടെ ഇതുവഴിയുള്ള ഗതാഗതവും തടസ്സപ്പെട്ടു. വാഴിച്ചൽ, പേരെക്കോണം, വാവോട്, മൈലക്കര, പന്ത , മരകുന്നം എന്നിവിടങ്ങളിലും മരങ്ങൾ കടപുഴകി വീണു. തോട് കരകവിഞ്ഞതോടെ വീടുകളിലും കൃഷിയിടങ്ങളിലും വെള്ളം കയറി. നെയ്യാർഡാമിലും നല്ല നീരൊഴുക്കാണ്. ഡാം തുറന്നുവിട്ടതിനാൽ വെള്ളപ്പൊക്ക ഭീഷണിയില്ല. കുറ്റിച്ചൽ പരുത്തിപ്പള്ളി ഭാഗത്തെ ശാസ്താക്ഷേത്രത്തിൽ വെള്ളം കയറി. ചപ്പാത്ത്, ഉത്തരം കോട്, മലവിള, തച്ചൻകോട് തുടങ്ങിയ ഇടങ്ങളിലും നാശമുണ്ടായി. കാര്യോട്, കുമ്പിൾമൂട് തോട് നിറഞ്ഞുകവിഞ്ഞു. ഇരുകരകളിലെയും കൃഷിയിടങ്ങൾക്ക് നാശം സംഭവിച്ചു. കാപ്പുകാട് ഭാഗത്ത് നിരവധി വീടുകളിൽ വെള്ളം കയറി. മൈലക്കരയിൽ വാഴതോപ്പുകളിൽ വെള്ളം കയറിയതോടെ വൻ നാശനഷ്ടവും സംഭവിച്ചു.

സ്‌പെഷല്‍ സ്‌കൂള്‍ ബാഡ്മിന്‍റണ്‍ ടൂര്‍ണമെന്‍റ് : അമ്പൂരി നവജ്യോതിയ്ക്ക് തിളക്കം

വെള്ളറട: ചെങ്ങന്നൂരിൽ നടന്ന ഡോ. എ.പി.ശ്രീകുമാര്‍ മെമ്മോറിയല്‍ സൗത്ത് കേരള സ്‌പെഷല്‍ സ്‌കൂള്‍ ബാഡ്മിന്‍റണ്‍ ടൂര്‍ണമെന്‍റില്‍ അമ്പൂരി നവജ്യോതിയ്ക്ക് തിളക്കം. പതിനാറിലധികം ടീമുകളുമായി മത്സരിച്ചതില്‍ ഡബിള്‍സ് ഒന്നാം സ്ഥാനവും ട്രോഫിയും കാഷ് അവാര്‍ഡും സിംഗിള്‍സ് മത്സരത്തില്‍ ഒന്നാം സ്ഥാനവും കരസ്ഥമാക്കി. നവ ജ്യോതിയുടെ അദ്വൈത്- അജോ ടീമിന് ഡബിള്‍സിലും അദ്വൈതിന് സിംഗിള്‍സ് മത്സരത്തിലുമാണ് ഒന്നാം സ്ഥാനം.

വേട്ടമുക്ക് പാർക്ക് നവീകരണം തുടങ്ങി

പേരൂര്‍ക്കട: വേട്ടമുക്കിലെ പാര്‍ക്കിന്‍റെ നവീകരണ പ്രവര്‍ത്തനങ്ങളുടെ ഉദ്ഘാടനം വി.കെ പ്രശാന്ത് എംഎല്‍എ നിര്‍വ്വഹിച്ചു. ആസ്തി വികസന ഫണ്ടില്‍ നിന്നു 15 ലക്ഷം രൂപ ചെലവിട്ടാണ് പാര്‍ക്ക് നവീകരിക്കുന്നത്. പാര്‍ക്കിന്‍റെ ചുറ്റുമതില്‍ പൂര്‍ണമായും പുനര്‍നിര്‍മിക്കും. ചവിട്ടുപടികളില്‍ ഗ്രാനൈറ്റ് സ്ഥാപിക്കും. പ്രകാശ സംവിധാനം, ഊഞ്ഞാല്‍, ഇരിപ്പിടങ്ങള്‍ എന്നിവയും പാര്‍ക്കില്‍ ഒരുക്കും. രണ്ടുമാസത്തിനുള്ളില്‍ പാര്‍ക്കിന്‍റെ നവീകരണം പൂര്‍ത്തീകരിക്കുമെന്നും എംഎല്‍എയുടെ ഓഫീസ് അറിയിച്ചു. താലൂക്ക് ലൈബ്രറി കൗണ്‍സില്‍ അംഗം കെ.ആര്‍ മധുസൂദനന്‍, പൊതുജന സമാജം ഗ്രന്ഥശാല പ്രസിഡന്‍റ് കെ.എന്‍ ആനന്ദന്‍ എന്നിവര്‍ പങ്കെടുത്തു.

വൈദ്യുത ശ്മശാനം തകരാറിലായിട്ട് രണ്ടു വർഷം

മാറനല്ലൂർ: വൈദ്യുതശ്മശാനം തകരാറിലായിട്ട് രണ്ടു വർഷമായിട്ടും ശരിയാക്കിയെടുക്കാനുള്ള നടപടി എങ്ങുമെത്തിയില്ല. വാതകശ്മശാനത്തിന്‍റെ പ്രവർത്തനം മാത്രമാണ് ഇപ്പോൾ മാറനല്ലൂരിലെ പൊതുശ്മശാനത്തിൽ നടക്കുന്നത്. വൈദ്യുതശ്മശാനം തകരാറിലായത് സംസ്‌കാരത്തിനായി എത്തുന്നവരെ ബുദ്ധിമുട്ടിലാക്കിയിരിക്കുകയാണ്. ഇതു തകരാറിലായിട്ട് രണ്ടു വർഷം പിന്നിട്ടെങ്കിലും അറ്റകുറ്റപ്പണികൾ നടത്താൻ പഞ്ചായത്തധികൃതർ തയ്യാറാകുന്നില്ല. ഒരു മൃതദേഹം സംസ്‌കരിക്കുന്നതിന് രണ്ടു മണിക്കൂർ വേണ്ടിവരും. ഒരു ദിവസം അഞ്ചിൽക്കൂടുതൽ മൃതദേഹങ്ങൾ സംസ്‌കരിക്കാൻ കഴിയില്ല. കൂടുതൽ മൃതദേഹങ്ങൾ സംസ്‌കരിക്കേണ്ട സാഹചര്യം വന്നാൽ മറ്റെവിടെയെങ്കിലും പോകേണ്ട അവസ്ഥയാണുള്ളത്. കഴിഞ്ഞ ദിവസങ്ങളിൽ മാറനല്ലൂരിലെ പൊതുശ്മശാനത്തിൽ പത്തിൽ കൂടുതൽ മൃതദേഹങ്ങളാണ് സംസ്‌കാരത്തിനായി എത്തിച്ചത്. പലർക്കും തൈക്കാട് ശാന്തികവാടത്തിലേക്ക് മൃതദേഹങ്ങൾ കൊണ്ടുപോകേണ്ടിവന്നു. പഞ്ചായത്തിലെ മലവിള കുക്കിരിപാറയ്ക്കു സമീപം ഒരേക്കർ അറുപതിയഞ്ച് സെന്‍റ് സ്ഥലത്താണ് വൈദ്യുതശ്മശാനം 2020 ൽ പ്രവർത്തനം തുടങ്ങിയത്. കോവിഡ് കാലത്ത് മൃതദേഹങ്ങൾ സംസ്‌കരിക്കാൻ കഴിയാതെവന്നതു കാരണമാണ് വൈദ്യുതശ്മശാനത്തോടൊപ്പം വാതകശ്മശാനവും പ്രവർത്തനം തുടങ്ങിയത്. ജില്ലാപ്പഞ്ചായത്തിന്‍റെ ഫണ്ടും പഞ്ചായത്തിന്റെ തനത് ഫണ്ടും ചേർത്ത് വാതകശ്മശാനം പ്രവർത്തനമാരംഭിച്ചു. വാതകശ്മശാനത്തിന്റെ പ്രവർത്തനം തുടങ്ങി ആഴ്ചകൾ പിന്നിട്ടപ്പോൾത്തന്നെ വൈദ്യുതശ്മശാനം തകരാറിലായി. മെഷീനുകൾക്ക് കേടുപാട് സംഭവിച്ചതു കാരണം അറ്റകുറ്റപ്പണികൾ നടത്തുന്നതിന് ഭീമമായ തുക വേണ്ടിവരും. അതു കണ്ടെത്താൻ കഴിയാത്തതിനാലാണ് വൈദ്യുതശ്മശാനം പ്രവർത്തിപ്പിക്കാൻ കഴിയാതെപോകുന്നതെന്നാണ് പഞ്ചായത്തധികൃതർ പറയുന്നത്. മാറനല്ലൂരിൽ പൊതുശ്മശാനം യാഥാർഥ്യമായത് നാട്ടുകാർക്കും സമീപ പഞ്ചായത്തുകളിലുള്ളവർക്കും ഏറെ ആശ്വാസമായിരുന്നു. സംസ്‌കാരം നടത്താനെത്തുമ്പോൾ കാത്തിരിക്കേണ്ടിവരുന്നതും മടങ്ങിപ്പോകേണ്ടിവരുന്നതും ഒഴിവാക്കാൻ വൈദ്യുതശ്മശാനത്തിന്‍റെ പ്രവർത്തനംകൂടി ആരംഭിക്കണമെന്ന് നാട്ടുകാർ ആവശ്യപ്പെടുന്നു.

കാട്ടാക്കട ഡിപ്പോയിൽ നിന്നും പുതിയ സർവീസ് തുടങ്ങി

കാട്ടാക്കട: കെഎസ്ആർടിസി കാട്ടാക്കട ഡിപ്പോയിൽ നിന്നും സർവീസ് ആരംഭിക്കുന്ന പുതിയ ബസുകളുടെ ഫ്ലാഗ് ഓഫും ഇ-ഓഫീസ് ഉദ്‌ഘാടനവും ഐ.ബി.സതീഷ് എംഎൽഎ നിർവഹിച്ചു. കാട്ടാക്കട പഞ്ചായത്ത് പ്രസിഡന്‍റ് കെ.അനിൽകുമാർ അധ്യക്ഷനായി. മൂന്ന് ബസുകളിൽ ഒരെണ്ണം നിലവിലെ അമൃത ആശുപത്രി സർവീസിനും രണ്ട് ബസുകൾ നെടുമങ്ങാട്, പൂവാർ ഫാസ്റ്റ് സർവീസിനുമായാണ് ഉപയോഗിക്കുക. കോർപ്പറേഷന്‍റെ ആധുനികീകരണത്തിന്‍റെ ഭാഗമായാണ് പേപ്പർരഹിത ഇടപാടുകൾക്കായി ഇ- ഓഫീസ് സംവിധാനം വരുന്നതെന്ന് കെഎസ്ആർടിസി സിഎംഡി പി.എസ്.പ്രമോദ് ശങ്കർ പറഞ്ഞു. പഞ്ചായത്ത് വൈസ് പ്രസിഡൻറ് എ.മഞ്ജുഷ, പഞ്ചായത്ത് അംഗങ്ങൾ, ഉദ്യോഗസ്ഥർ തുടങ്ങിയവർ സംസാരിച്ചു.

നഗരത്തിൽ ഇന്ന് ഗതാഗത നിയന്ത്രണം

വലിയതുറ: രാഷ്ടപതിയുടെ സന്ദര്‍ശനത്തോടനുബന്ധിച്ചുളള റിഹേഴ്‌സലുമായി ബന്ധപ്പെട്ട് തിരുവനന്തപുരം നഗരത്തില്‍ ഇന്ന് ഗതാഗത നിയന്ത്രണം. ഇന്ന് രാവിലെ 11 മുതൽ ശംഖുംമുഖം -ഓള്‍സെയിന്‍റ്സ് - ചാക്ക - പേട്ട - ജനറല്‍ ആശുപത്രി - ആശാന്‍ സ്‌ക്വയര്‍ -വേള്‍ഡ് വാര്‍ മ്യൂസിയം -വെളളയമ്പലം -കവടിയാര്‍ റോഡിലും , ശംഖുംമുഖം-വലിയതുറ , പൊന്നറ , കല്ലുംമൂട്-ഈഞ്ചയ്ക്കല്‍-അനന്തപുരി ആശുപത്രി-ഈഞ്ചയ്ക്കല്‍-മിത്രാനന്ദപുരം-എസ്പി ഫോര്‍ട്ട്-ശ്രീകണ്‌ഠേശ്വരം പാര്‍ക്ക്-തകരപ്പറമ്പ് മേല്‍പ്പാലം-ചൂരക്കാട്ടുപാളയം-തമ്പാനൂര്‍ ഫ്‌ളൈ ഓവര്‍-തൈക്കാട്-വഴുതയ്ക്കാട്-വെളളയമ്പലം റോഡിലും , വെളളയമ്പലം-മ്യൂസിയം-കോര്‍പ്പറേഷന്‍ ഓഫീസ് -രക്തസാക്ഷി മണ്ഡപം-ബേക്കറി ജങ്ഷന്‍-വിമന്‍സ് കോളജ് റോഡിലും കവടിയാര്‍-കുറവന്‍കോണം-പട്ടം-കേശവദാസപുരം-ഉളളൂര്‍-ആക്കുളം-കുഴിവിള-ഇന്‍ഫോസിസ്-കഴക്കൂട്ടം-വെട്ടുറോഡ് റോഡിലും ഗതാഗത നിയന്ത്രണമേർപ്പെടുത്തി. വിമാനത്താവളത്തിലും റയില്‍വേ സ്റ്റേഷനിലേയ്ക്കും വരുന്ന യാത്രക്കാര്‍ മുന്‍കൂട്ടി യാത്രകള്‍ ക്രമീകരിക്കേണ്ടതാണ്. കൂടുതൽ വിവരങ്ങള്‍ അറിയുന്നതിന് 9497930055 , 0471-25588731 എന്നീ നമ്പരുകളില്‍ ബന്ധപ്പെടാവുന്നതാണ്.

യുവാക്കളെ കൊലപ്പെടുത്താന്‍ ശ്രമം: ഒന്നാംപ്രതി പിടിയില്‍

പേരൂര്‍ക്കട: യുവാക്കളെ കുത്തിക്കൊലപ്പെടുത്താന്‍ ശ്രമിച്ച സംഘത്തിലെ ഒന്നാം പ്രതി പിടിയിൽ. വിളവൂര്‍ക്കല്‍ വിഴവൂര്‍ പെന്തക്കോസ്ത് പള്ളിക്കു സമീപം ചരുവിള വീട്ടില്‍ ഫെബിന്‍ (24) ആണ് പിടിയിലായത്. പൂജപ്പുര സിഐ പി. ഷാജിമോന്‍, എസ്ഐ അഭിജിത്ത്, സിപിഒമാരായ ഉണ്ണികൃഷ്ണന്‍, അനുരാഗ് എന്നിവരാണ് പ്രതിയെ എറണാകുളത്തുനിന്നു പിടികൂടിയത്. ഈമാസം 5നാണ് നെട്ടയം കാച്ചാണി തേജസ് നഗര്‍ പൊയ്കയില്‍ വീട്ടില്‍ മുഹമ്മദ് ഹാരിസ് (23), കാച്ചാണി സ്വദേശി സെയ്ദ് മുഹമ്മദ് (22) എന്നിവരെ കുത്തിക്കൊലപ്പെടുത്താന്‍ ശ്രമിച്ചത്. വിഴിഞ്ഞത്ത് സ്വകാര്യാവശ്യങ്ങള്‍ക്കു പോയശേഷം രണ്ടു ബൈക്കുകളിലായി വീട്ടിലേക്കു തിരികെ പോകുകയായിരുന്നു നാലു യുവാക്കള്‍. പ്രതികള്‍ കൂട്ടംകൂടി നിന്നതു കണ്ടപ്പോള്‍ എന്തിനാണ് ഇവിടെ നില്‍ക്കുന്നതെന്ന് മുഹമ്മദ് ഹാരിസും സെയ്ദ് മുഹമ്മദും ചോദിച്ചു. ഇതില്‍ പ്രകോപിതരായ പ്രതികള്‍ യുവാക്കളുമായി വാക്കുതര്‍ക്കത്തിലേര്‍പ്പെട്ടു. നാലുപേര്‍ കമ്പുകളും ഹെല്‍മെറ്റുകളും ഉപയോഗിച്ച് യുവാക്കളെ അടിച്ചുപരിക്കേല്‍പ്പിച്ചു. ഫെബിന്‍ അരയില്‍ തിരുകിയിരുന്ന കത്തിയെടുത്ത് യുവാക്കളെ മുതുകില്‍ കുത്തിപ്പരിക്കേല്‍പ്പിച്ചു. കുത്തേറ്റവര്‍ തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സ തേടി. സംഭവത്തിൽ അന്വേഷണം നടന്നുവരുന്നതിനിടെ തൃക്കണ്ണാപുരം സ്വദേശി സഞ്ജിത്ത് (18), പുന്നയ്ക്കാമുകള്‍ സ്വദേശികളായ അരുണ്‍ (18), അലന്‍ അബി (18), മലയിന്‍കീഴ് സ്വദേശി ഗൗരി ശങ്കര്‍ (21) എന്നിവര്‍ പിടിയിലായിരുന്നു. ഫെബിനെ റിമാന്‍ഡ് ചെയ്തു.

കാട്ടുപന്നിയുടെ ആക്രമണത്തിൽ രണ്ട് വനം ജീവനക്കാർക്കു പരിക്ക്

നെയ്യാർഡാം: കാട്ടുപന്നിയുടെ ആക്രമണത്തിൽ നെയ്യാർ വൈൽഡ് ലൈഫ് സാങ്ച്വറിയിലെ രണ്ട് ജീവനക്കാർക്ക് പരിക്കേറ്റു. കോട്ടൂർ സെക്‌ഷനിലെ ബീറ്റ് ഫോറസ്റ്റ് അസിസ്റ്റന്‍റ് രാജേന്ദ്രൻ കാണി, ജീവനക്കാരനായ ഷൈജു സതീശൻ എന്നിവർക്കാണ് ആണ് ഡ്യൂട്ടി സമയത്ത് കാട്ടു പന്നിയുടെ ആക്രമണത്തിൽ പരിക്കേറ്റത്. ഇവരുടെ തലയിലും കൈയിലും വയറിലും പരിക്കുണ്ട്. ശനിയാഴ്ച രാത്രി 9നായിരുന്നു ഇവർക്കു നേരെ കാട്ടുപന്നിയുടെ ആക്രമണം ഉണ്ടായത്. ഡ്യൂട്ടിക്കിടെ കാപ്പി കുടിക്കാൻ ഇറങ്ങിയപ്പോൾ കാപ്പ് കാട് ആനപരിപാലന കേന്ദ്രത്തിന്‍റെ പ്രവേശന കവാടത്തിന് സമീപമാണ് കാട്ടുപാന്നിയുടെ ആക്രമണം ഉണ്ടായത്. രാജേന്ദ്രൻ കാണിയും ഷൈജു സതീശനും ബൈക്കിൽ സഞ്ചരിക്കവെ കാട്ടുപന്നി ആക്രമിക്കുകയായിരുന്നു. ഇരുവരും നെയ്യാർ ഡാം , ആര്യനാട് ഗവ.ആശുപത്രികളിൽ ചികിത്സതേടി . ബൈക്കിന് സാരമായ തകരാറുണ്ട്.

കേരള സ്കൂൾ കായികമേള തീം സോംഗ് പുറത്തിറക്കി

തിരുവനന്തപുരം: സംസ്ഥാന സ്കൂൾ കായികമേളയുടെ തീം സോംഗ് പുറത്തിറക്കി. പൊതുവിദ്യാലയങ്ങളിലെ വിദ്യാർഥികൾ ഗാനരചനയും സംഗീത സംവിധാനവും ഗാനാലാപനവും നിർവഹിച്ചതെന്ന സവിശേഷതയും ഈ തീം സോംഗിനുണ്ട്. "പടുത്തുയർത്താം കായിക ലഹരി' എന്ന് തുടങ്ങുന്ന ഗാനത്തിന്‍റെ രചന പാലക്കാട് പൊറ്റശേരി ഗവണ്‍മെന്‍റ് ഹയർ സെക്കൻഡറി സ്കൂളിലെ പന്ത്രണ്ടാം ക്ലാസ് വിദ്യാർഥി വി. പ്രഫുൽദാസ് ആണ്. കോട്ടണ്‍ഹിൽ ഗവണ്‍മെന്‍റ് ഗേൾസ് ഹയർ സെക്കൻഡറി സ്കൂളിലെ ഒന്പതാം ക്ലാസ് വിദ്യാർഥിനിയായ ശിവങ്കരി പി.തങ്കച്ചി സംഗീത സംവിധാനവും ഇതേ സകൂളിലെ വിദ്യാർഥികളായ നവമി ആർ.വിഷ്ണു, അനഘ എസ്.നായർ, ലയ വില്യം, എ.പി.കീർത്തന, തൈക്കാട് മോഡൽ ബോയ്സ് ഹയർ സെക്കൻഡറി സ്കൂളിലെ കെ.ആർ. നന്ദകിഷോർ, പി.ഹരീഷ്. ആർ. അഥിത്ത് എന്നിവർ ചേർന്നാണ് ഗാനം ആലപിച്ചത്. കൈറ്റ് വിക്ടേഴ്സ് വീഡിയോ പ്രൊഡക്ഷൻ ചെയ്ത ഗാനത്തിന്‍റെ ഗിറ്റാർ സുരേഷ് പരമേശ്വറും കീബോർഡ് ആന്‍റ് മിക്സിംഗ് രാജീവ് ശിവയുമാണ് നിർവഹിച്ചത്. പൊതുവിദ്യാഭ്യാസ ഡയറക്ടർ എൻ.എസ്.കെ ഉമേഷ്, ഐ.ബി സതീഷ് എംഎൽഎ തുടങ്ങിയവർ പങ്കെടുത്ത ചടങ്ങിൽ ഗാനം ഒരുക്കിയ വിദ്യാർഥികളെ മന്ത്രി അനുമോദിച്ചു.

"പ്രത്യാശയുടെ നടത്തം' സംഘടിപ്പിച്ചു

തിരുവനന്തപുരം: ലോക സ്തനാർബുദ ബോധവത്ക്കരണ ദിനത്തോടനുബന്ധിച്ച് ആശ്രയ സന്നദ്ധ സംഘടനയുടെ നേതൃത്വത്തിൽ മാനവീയം വീഥിയിൽ "പ്രത്യാശയുടെ നടത്തം' സംഘടിപ്പിച്ചു. എഐജി മെറിൻ ജോസഫ് "പ്രത്യാശയുടെ നടത്തം' ഫ്ലാഗ് ഓഫ് ചെയ്തു. ആർസിസി സർജിക്കൽ ഓങ്കോളജി വിഭാഗം മേധാവി ഡോ. പോൾ അഗസ്റ്റിൻ ബോധവത്ക്കരണ പരിപാടി ഔദ്യോഗികമായി ഉദ്ഘാടനം ചെയ്തു. ചടങ്ങിൽ ആർസിസി മുൻ അഡീഷണൽ ഡയറക്ടർ ഡോ. കുസുമകുമാരി, കമ്മ്യൂണിറ്റി മെഡിസിൻ പ്രൊഫസറും സ്നേഹിത ഡയറക്ടറുമായ ഡോ. റെജി ജോസ് എന്നിവർ ആശംസകൾ അർപ്പിച്ചു സംസാരിച്ചു. ആശ്രയയുടെ സ്ഥാപക പ്രസിഡന്‍റ് ശാന്ത ജോസിന്‍റെ നേതൃത്വത്തിൽ നടന്ന പരിപാടിയിൽ പൊതുജനങ്ങളും സന്നദ്ധപ്രവർത്തകരും ആശ്രയയുടെ സർവൈവർ സപ്പോർട്ട് ഗ്രൂപ്പിലെ അംഗങ്ങളും സജീവമായി പങ്കെടുത്തു.

തിക്കുറിശി അനുസ്മരണവും പ്രതിഭാ സംഗമവും

തിരുവനന്തപുരം: മലയാളത്തിന്‍റെ മഹാനടന്‍ തിക്കുറിശി സുകുമാരന്‍ നായരുടെ 109 ാം ജന്മദിനത്തോടനുബന്ധിച്ച് തിക്കുറിശി ഫൗണ്ടേഷന്‍റെ ആഭിമുഖ്യത്തില്‍ തിരുവനന്തപുരം പ്രസ് ക്ലബ്ബില്‍ തിക്കുറിശി അനുസ്മരണവും പ്രതിഭാ സംഗമവും സംഘടിപ്പിച്ചു. മലയാളം മിഷന്‍ മുന്‍ രജിസ്ട്രാര്‍ വിനോദ് വൈശാഖി ഉദ്ഘാടനം ചെയ്തു. ഫൗണ്ടേഷന്‍ പ്രസിഡന്‍റ് ബി. മോഹന ചന്ദ്രന്‍ നായര്‍ അധ്യക്ഷത വഹിച്ചു. സെക്രട്ടറി രാജന്‍ വി. പൊഴിയൂര്‍ തിക്കുറിശി അനുസ്മരണ പ്രഭാഷണം നടത്തി. തുടര്‍ന്ന് സാഹിത്യവും സമൂഹവും എന്ന വിഷയത്തില്‍ സെമിനാറും നടന്നു. ഫൗണ്ടേഷന്‍ അംഗം വസന്ത എസ്. പിള്ളയുടെ ശിശിരകാല പ്രണയം എന്ന പുസ്തക ചര്‍ച്ചയില്‍ എ.പി. ജിനന്‍, വി. സുരേശന്‍ നര്‍മ കൈരളി, അജിതാ രതീഷ് എന്നിവര്‍ പങ്കെടുത്തു. ഡാന്‍സര്‍ ചിത്രമോഹന്‍റെ അധ്യക്ഷതയില്‍ നടന്ന കവിയരങ്ങില്‍ തലയല്‍ മനോഹരന്‍ നായര്‍, ദിന കവി, മധു വണ്ടന്നൂര്‍, ബിനു കല്‍പ്പകശ്ശേരി, പേയാട് വിനയന്‍, വള്ളക്കടവ് ഷാഫി, വി.ഡഗ്ലസ്സ്, ഹരിഹരപുരം, ടി.എല്‍. സ്മിത, ഗീതകുമാരി, ഛായാറാണി തുടങ്ങിയവര്‍ പങ്കെടുത്തു.

വയലാർ ഗാനസാഗരവും സ്നേഹസാഗരവും: പി.എസ്.ശ്രീധരൻ പിള്ള

തിരുവനന്തപുരം: വയലാർ എന്നും വിസ്മയമാണെന്നും അദ്ദേഹം ഒരുപോലെ ഗാനസാഗരവും സ്നേഹ സാഗരവുമായിരുന്നെന്നും മുൻ ഗോവ ഗവർണർ അഡ്വ.പി.എസ്.ശ്രീധരൻ പിള്ള പറഞ്ഞു. വയലാർ രാമവർമ്മയുടെ 50-ാം ചരമവാർഷികത്തോടനുബന്ധിച്ച് വയലാർ സാംസ്കാരിക വേദിയുടെ ആഭിമുഖ്യത്തിൽ പുത്തരിക്കണ്ടം ഇ.കെ.നായനാർ പാർക്കിൽ നടക്കുന്ന ദശദിന വയലാർ സാംസ്ക്കാരികോത്സവത്തിന്‍റെ രണ്ടാം ദിനത്തിലെ സാംസ്കാരിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. പ്രശസ്ത ചലച്ചിത്ര പിന്നണിഗായകൻ ജി.വേണുഗോപാൽ മുഖ്യാതിഥിയായിരുന്നു. വയലാർ സുവർണ സ്മൃതി കവിത പുരസ്കാരം നേടിയ കവി സുമേഷ് കൃഷ്ണനും വയലാർ ചെറുകഥാ സാഹിത്യ പുരസ്കാരം നേടിയ തലയൽ മനോഹരൻ നായരും പി.എസ്.ശ്രീധരൻ പിള്ളയിൽ നിന്നും പുരസ്ക്കാരങ്ങൾ ഏറ്റുവാങ്ങി. തലയൽ മനോഹരൻ നായർ രചിച്ച ‘മുല്ലവള്ളിയും മാൻകിടവും’ നാടക പുസ്തകം പി.എസ്. ശ്രീധരൻപിള്ള ഡോ.എം.ആർ തമ്പാന് നൽകി പ്രകാശനം നിർവഹിച്ചു. ചലച്ചിത്ര ക്യാമറമാൻ പുഷ്പൻ വേണുഗോപാൽ,സംവിധായകൻ ബാലുകിരിയത്ത്,സംവിധായകൻ രാധാകൃഷ്ണൻ മംഗലത്ത്, അപ്പുവിന്‍റെ ഒഴിവു കാലം എന്ന മികച്ച ടെലിഫിലിമിന് ജയശ്രീ ഗോപാലകൃഷ്ണൻ എന്നിവരെ ചടങ്ങിൽ പി.എസ്.ശ്രീധരൻപിള്ള ആദരിച്ചു. ചടങ്ങിൽ വയലാർ സ്മൃതി വർഷ ആഘോഷ കമ്മിറ്റി ചെയർമാൻ മുക്കംപാലമൂട് രാധാകൃഷ്ണൻ അധ്യക്ഷനായി. പ്രമുഖ സാഹിത്യകാരൻ ഡോ.എം.ആർ.തമ്പാൻ, അഡ്വ.ജെ.ആർ.പത്മകുമാർ,സിഎംപി ജില്ലാ പ്രസിഡന്‍റ് മനോജ്,സാഹിത്യകാരൻ സബീർ തിരുമല,വയലാർ രാമവർമ്മ സാംസ്കാരിക വേദി സെക്രട്ടറി മണക്കാട് രാമചന്ദ്രൻ എന്നിവർ ആശംസകൾ അർപ്പിച്ചു. ജനറൽ കൺവീനർ ജി.വിജയകുമാർ സ്വാഗതം പറഞ്ഞു.

കൊല്ലത്ത് സിപിഐയിൽ പൊട്ടിത്തെറി : കുണ്ടറയ്ക്കു പിന്നാലെ കടയ്ക്കലിലും കൂട്ടരാജി

കൊല്ലം : തദ്ദേശ സ്വയം ഭരണ സ്ഥാപങ്ങളിലേക്കുള്ള തെരഞ്ഞെടുപ്പ് പടിവാതിൽക്കൽ എത്തിയിരിക്കേ കൊല്ലത്ത് സിപി ഐയിൽ വിഭാഗീയത കനത്തു. പൊട്ടിത്തെറിയിൽ കടയ്‌ക്കലിലും സിപിഐ അംഗങ്ങളുടെ കൂട്ടരാജി ഉണ്ടായി. കുണ്ടറയ്ക്ക് പിറകെ കടയ്‌ക്കലിലും സിപി ഐയുടെ നേതാക്കളും പ്രവർത്തകരും അടക്കം രാജിവച്ചത് എൽഡിഎഫ് ജില്ലാ നേതൃത്വത്തിന് ആശങ്കയ്ക്ക് ഇടയാക്കിയിട്ടുണ്ട്. വിവിധ സ്ഥാനങ്ങൾ വഹിച്ചിരുന്ന 112 പേരാണ് കടയ്‌ക്കലിൽ പാർട്ടിവിട്ടത്. മന്ത്രി ജെ.ചിഞ്ചുറാണിയുടെ ചടയമംഗലം നിയോജക മണ്ഡലത്തിലാണ് സിപിഐ ജില്ലാ നേതൃത്വം പ്രതീക്ഷിക്കാത്ത കൂട്ടത്തോടെ രാജി ഉണ്ടായിരിക്കുന്നത്. 10 മണ്ഡലം കമ്മിറ്റി അംഗങ്ങൾ, 45 ലോക്കൽ കമ്മിറ്റി അംഗങ്ങൾ, 48 ബ്രാഞ്ച് സെക്രട്ടറിമാർ, ഒമ്പത് ബ്ലോക്ക് -ഗ്രാമ പഞ്ചായത്ത്‌ അംഗങ്ങൾ എന്നിവർ രാജിവച്ചവരിൽ ഉൾപ്പെടും. ജില്ലാ നേതൃത്വത്തോടുള്ള അതൃപ്തി അറിയിച്ചു കൊണ്ടാണ് രാജി പ്രഖ്യാപനം നടന്നിരിക്കുന്നത്. 700ൽ അധികം പാർട്ടി അംഗങ്ങൾ രാജിവച്ചതായാണ് വിമത നേതാക്കൾ അവകാശപ്പെടുന്നത്. ഉൾപാർട്ടി പ്രശ്നങ്ങളാണ് തീരുമാനത്തിന് കാരണമെന്നും അവർ പറയുന്നു. എന്നാൽ അഴിമതി നടത്തിയതിന് സംഘടനാ നടപടി നേരിട്ടയാൾ അടക്കമാണ് രാജിവച്ചതെന്ന് സിപിഐ ജില്ലാ നേതൃത്വം പറയുന്നുണ്ട്. എം എൻ സ്മാരകത്തിനായി ഫണ്ട് പിരിവു നടത്തിയതിൽ അഴിമതി നടത്തിയതായി ആരോപണ വിധേയനായ മണ്ഡലം സെക്രട്ടറിയുടെ പേരിൽ പാർട്ടി ഡിസിയും എക്സിക്യൂട്ടീവും നടപടിയെടുക്കാനിരിക്കെയാണ് കൂട്ടരാജി സംഭവം. പ്രവർത്തകർ പാർട്ടിവിട്ടെന്ന പ്രചാരണം അടിസ്ഥാന രഹിതമെന്നാണ് സിപി ഐ ജില്ലാ നേതൃത്വം പ്രതികരിച്ചത്. അതേസമയം, വിഭാഗീയതയെത്തുടർന്നു കുണ്ടറ മണ്ഡലം കമ്മിറ്റിയിൽ നിന്നു കൂട്ട രാജി‍ ഉണ്ടായതിന് പിറകെയാണ് കടയ്‌ക്കലും രാജി ഉണ്ടായിരിക്കുന്നത്. മുൻ മണ്ഡലം സെക്രട്ടറി ഉൾപ്പെടെ മുന്നൂറോളം പേർ ആണ് കുണ്ടറയിൽ ഒരാഴ്ച മുൻപ് രാജി വെച്ചത്. മുൻ പാർട്ടി മണ്ഡലം സെക്രട്ടറി ടി.സുരേഷ്, ഇളമ്പ‌ ള്ളൂർ മുൻ വൈസ് പ്രസിഡന്‍റും മണ്ഡലം അസി. സെക്രട്ടറിയുമായ ജലജ ഗോപൻ, സെക്രട്ടേറിയറ്റ് അംഗം സോണി വി.പള്ളം, സെക്രട്ടേറിയറ്റ് അംഗവും കുണ്ടറ ലോക്കൽ കമ്മിറ്റി സെക്രട്ടറിയുമായ എം.ഗോപാലകൃഷ്ണൻ, പേരയം എൽസി സെക്രട്ടറി ജോൺ വിൻസന്‍റ്, ഇളമ്പള്ളൂർ എൽസി സെക്രട്ടറി ഒ.എസ്.വരുൺ, എഐവൈഎഫ് കുണ്ടറ മണ്ഡലം സെക്രട്ടറി മുഹമ്മദ് ഷാൻ, മഹിള സംഘം ഭാരവാഹികളായ ജയ, പ്രിഷിൽഡ വിൽസൺ എന്നിവരാണ് കുണ്ടറയിൽ സി പി ഐ വിട്ട പ്രാദേശിക നേതാക്കൾ. 28 എൽസി അംഗങ്ങളും 22 ബ്രാഞ്ച് സെക്രട്ടറിമാരും രാജി വെച്ചിരുന്നെങ്കിലും ഇവരിൽ 17 ഓളം എൽ സി അംഗങ്ങളും എട്ടു ബ്രാഞ്ച് സെക്രട്ടറിമാരും പിന്നീട് പാർട്ടി ജില്ലാ നേതൃത്വവുമായി സമവായത്തിലെത്തുകയായിരുന്നു. 25 അംഗങ്ങൾ അടങ്ങുന്ന മണ്ഡലം കമ്മിറ്റിയിലെ മൂന്നു പേർക്കെതിരെ നടപടി എടുത്തതാണ് പ്രശ്നങ്ങൾക്ക് തുടക്കം. കഴിഞ്ഞ മണ്ഡലം സമ്മേളനത്തിലാണു കുണ്ടറയിൽ സി പി ഐ യിലെ വിഭാഗീയത പുറത്ത് വരുന്നത്. സെക്രട്ടറി തെരഞ്ഞെടുപ്പുമായി ബന്ധപ്പെട്ട് ഉപരിനേതൃത്വത്തിന്‍റെ നിർദേശം ഒരു വിഭാഗം എതിർത്തതോടെ സമ്മേളനം അടികൂടി പിരിയുന്ന സാഹചര്യമാണ് ഉണ്ടായത്. സെക്രട്ടറിയായിരുന്ന ടി.സുരേഷ് കുമാറിനെ മാറ്റി സേതുനാഥിനെ നിയമിക്കണമെന്നു ജില്ല സെക്രട്ടറി നിർദേശം നൽകിയതാണ് ചിലരെ ചൊടിപ്പിക്കുന്നത്. മുന്പ് എട്ടു തവണ സെക്രട്ടറിയായ സേതുനാഥിനെ സെക്രട്ടറിയായി തെരഞ്ഞെടുക്കുന്നതു ഭൂരിപക്ഷ പ്രതിനിധികളും എതിർത്തു. സുരേഷ് കുമാറിനെ തന്നെ നിലനിർത്തണം എന്നായിരുന്നു ആവശ്യം. സമ്മേളനത്തിൽ പങ്കെടുത്ത സംസ്ഥാന എക്സിക്യൂട്ടീവ് അംഗം കെ.ആർ.ചന്ദ്രമോഹനൻ, ജില്ലാ സെക്രട്ടറി പി.എസ്.സുപാൽ,അസി.സെക്രട്ടറിമാരായ സാം കെ.ഡാനിയൽ, എം.എസ്.താര, ജില്ലാ നേതാക്കളായ മന്മഥൻ നായർ, ആർ.എസ്.അനിൽ, ജി.ബാബു, ജഗദമ്മ എന്നിവരാണു ജില്ലാ എക്സിക്യൂട്ടീവ് തീരുമാനമായി സെക്രട്ടറി സ്ഥാനത്തേക്കു സേതുനാഥിന്‍റെ പേര് നിർദേശിച്ചത്. തീരുമാനം ക്രമവിരുദ്ധമാണെന്ന് ആരോപിച്ചായിരുന്നു അംഗങ്ങൾ സമ്മേളനം ബഹിഷ്കരിച്ചത്. തുടർന്നാണ് ജില്ലാ നേതൃത്വം മൂന്നു പേർക്കെതിരെ അച്ചടക്ക നടപടി സ്വീകരിക്കുന്നത്. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് അടുത്ത സാഹചര്യത്തിൽ കൂട്ടരാജി സിപിഐ സംഘടനാ സംവിധാനത്തെ ദുർബലമാക്കുമെന്ന കാര്യം ഉറപ്പാണ്.

സംസ്ഥാനത്ത് മൊബിലിറ്റി രംഗത്ത് വിപ്ലവം: ധാരണാപത്രം ഒപ്പുവച്ചു

തിരുവനന്തപുരം: കേരളത്തിന്‍റെ ഇന്നൊവേഷൻ ഇക്കോസിസ്റ്റത്തിന് ഉണർവേകുന്നതിന് ട്രെസ്റ്റ് റിസർച്ച് പാർക്ക്, ഓട്ടോമോട്ടീവ് റിസർച്ച് അസോസിയേഷൻ ഓഫ് ഇന്ത്യ (എആർഎഐ), കേരള ഡെവലപ്മെന്‍റ് ആൻഡ് ഇന്നൊവേഷൻ സ്ട്രാറ്റജിക് കൗണ്‍സിൽ (കെഡിസ്ക്) എന്നീ സ്ഥാപനങ്ങൾ ധാരണാപത്രം ഒപ്പുവച്ചു. ഇലക്ട്രിക്, സ്മാർട്ട് മൊബിലിറ്റി സാങ്കേതിക വിദ്യകളിൽ സംസ്ഥാനത്തെ ഒരു ഗവേഷണവികസന കേന്ദ്രമാക്കി മാറ്റാൻ ലക്ഷ്യമിട്ടുള്ളതാണ് ഈ പങ്കാളിത്തം. മൊബിലിറ്റി സാങ്കേതികവിദ്യകളിൽ ഫണ്ടിംഗോടെയുള്ള പ്രോജക്റ്റുകൾ ആരംഭിക്കുന്നതിനായി സംയുക്ത ഗവേഷണം, പവർ ഇലക്ട്രോണിക്സ്, ബാറ്ററി സാങ്കേതികവിദ്യകൾ എന്നിവയിൽ പ്രവർത്തിക്കുന്ന സ്റ്റാർട്ടപ്പുകൾക്ക് ഇൻകുബേഷൻ, മാർഗനിർദ്ദേശം, വ്യവസായ ബന്ധങ്ങൾ എന്നിവ ഉറപ്പാക്കുന്നതിന് സ്റ്റാർട്ടപ്പ് പിന്തുണ എന്നിങ്ങനെ നാല് പ്രധാന മേഖലകളിൽ ശ്രദ്ധ കേന്ദ്രീകരിക്കുന്നതാണ് ധാരണാപത്രം. മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി ഡോ. കെ. എം. എബ്രഹാം, കെഡിസ്ക് മെന്പർ സെക്രട്ടറി ഡോ. പി. വി. ഉണ്ണികൃഷ്ണൻ, എആർഎഐ ഡയറക്ടർ ഡോ. റെജി മത്തായി , ഡോ. എം.എസ്.രാജശ്രീ (സിഇഒ, ട്രെസ്റ്റ് റിസർച്ച് പാർക്ക്), ഡോ. വി. ചന്ദ്രശേഖർ(സീനിയർ ഡയറക്ടർ, സിഡാക്ക്) പി.സതീഷ് കുമാർ(എംഡി, ട്രാവൻകൂർ ടൈറ്റാനിയം പ്രോഡക്ട്സ് ലിമിറ്റഡ്) ഡോ. എ.അശോക് കുമാർ(കണ്‍സൾട്ടന്‍റ്,കെഡിസ്ക്) , സുദീപ് അംബാരെ (സിഇഒ, എആർഎഐ), ബോബിൻ സാജി ജോർജ്( ടെക്നിക്കൽ ഹെഡ്, ട്രെസ്റ്റ് റിസർച്ച് പാർക്ക്), വി. ശ്രീകുമാർ(സെക്രട്ടറി, ജിടെക് ഗ്രൂപ്പ് ഓഫ് കന്പനീസ്, സെന്‍റർ ഹെഡ് ടാറ്റാ എൽക്സി) ഡോ. പുഷ്പരാജൻ ജോസഫ്( ഡെപ്യൂട്ടി മാനേജർ, ട്രാവൻകൂർ ടൈറ്റാനിയം പ്രോഡക്ട്സ് ലിമിറ്റഡ്)എന്നിവർ ചടങ്ങിൽ പങ്കെടുത്തു.

സിനിമകൾക്ക് ചെയ്യാനാകാത്ത സാമൂഹ്യ ധർമം പ്രഫഷണൽ നാടകങ്ങൾ നിർവഹിക്കുന്നു: കെ. ജയകുമാർ

തിരുവനന്തപുരം: പ്രശ്നങ്ങളെ അഭിമുഖീകരിക്കാൻ സമൂഹത്തെ സജ്ജമാക്കുക എന്ന, സിനിമകൾക്ക് ചെയ്യാൻ സാധിക്കാത്ത വലിയ ധർമം പ്രഫഷണൽ നാടകങ്ങൾ നിർവഹിച്ചു കൊണ്ടിരിക്കുകയാണെന്ന് കവിയും മുൻ ചീഫ് സെക്രട്ടറിയുമായ കെ. ജയകുമാർ. സംസ്കാര സാഹിതി പ്രഥമ നാടകോത്സവത്തിന്‍റെ രണ്ടാം ദിനത്തിലെ സാംസ്‌കാരിക സമ്മേളനം ഉത്ഘാടനം ചെയ്ത് സംസാരിക്കുകയായിരുന്നു അദ്ദേഹം. സമൂഹത്തിലെ ധാർമിക സമസ്യകളെ ചലച്ചിത്ര മേഖല വളരെ ഉദാസീനമായി അഭിമുഖീകരിക്കുമ്പോൾ നാടകങ്ങളാണ് ഏറ്റവും ധീരമായി അവയെ അരങ്ങത്ത് അവതരിപ്പിക്കുന്നത്. എഐ പോലുള്ള ടെക്നോളജികൾ എല്ലാ മേഖലയെയും കീഴടക്കുന്ന ഈ കാലത്ത് നാടകം മാത്രമാണ് ഇന്നൊരു ശുദ്ധകല എന്ന് പറയാവുന്ന ഏകകലയെന്നും അദ്ദേഹം പറഞ്ഞു. ചടങ്ങിൽ, ലളിതകല അക്കാദമി മുൻ ചെയർമാനും കാർട്ടൂണിസ്റ്റുമായ കാട്ടൂർ നാരായണപിള്ള, സംരംഭക ഷീല ജെയിംസ്, നാടക കലാ പ്രവർത്തകൻ ചെറുന്നിയൂർ നമശിവായൻ, സംസ്കാര സാഹിതി സംസ്ഥാന വൈസ് ചെയർമാൻ കെ.ആർ.ജി ഉണ്ണിത്താൻ, സംസ്ഥാന സെക്രട്ടറി മണ്ണാന്മൂല രാജേഷ്, ജില്ലാ സെക്രട്ടറിമാരായ എം. രാജേഷ് കുമാർ, കുറ്റിച്ചൽ രാജേഷ് രാജേഷ് തുടങ്ങിയവർ പങ്കെടുത്തു. സംസ്കാര സാഹിതിയുടെ ഇന്നത്തെ ലോഗോയും ജവഹർലാൽ ബാലജനവേദി എന്ന അഖിലേന്ത്യ സംഘടനയുടെ ലോഗോയും തയ്യാറാക്കിയ കാട്ടൂർ നാരായണപിള്ള പഴയ അനുഭവങ്ങൾ വിവരിച്ചത് സദസിന് കൗതുകമായി. ശേഷം കൊല്ലം അനശ്വര തിയേറ്ററിന്‍റെ "ആകാശത്തൊരു കടൽ' നാടകം അവതരിപ്പിച്ചു. ഇന്ന് വൈകിട്ട് 5.30ന് ഭാരത്‌ഭവൻ മണ്ണരങ്ങിൽ അടൂർ പ്രകാശ് എംപി, സിനിമ സംവിധായകൻ ശ്യാമ പ്രസാദ്, സിനിമ- നാടക പ്രവർത്തകൻ അലൻസിയർ തുടങ്ങിയർ പങ്കെടുക്കുന്ന സംസ്‌കാരിക സമ്മേളനം. തുടർന്ന് തിരുവനന്തപുരം സൗപർണിക തിയേറ്ററിന്‍റെ അവതരിപ്പിക്കുന്ന നാടകം "താഴ്‌വാരം’.

നിർദേശങ്ങൾക്ക് പുല്ലുവില; വഴുതക്കാട്, ശാസ്തമംഗലം ഭാഗങ്ങളിൽ ഫുട്പാത്ത് തട്ടുകടകൾ സജീവം

പേരൂർക്കട: പൊതുജനങ്ങൾക്ക് യാത്രാ തടസം ഉണ്ടാക്കിയിരുന്ന റോഡ് വക്കിലെയും ഫുട്പാത്തിലെയും തട്ടുകടകൾക്ക് പോലീസ് ഏർപ്പെടുത്തിയ വിലക്കിന് പുല്ലുവില. രണ്ടാഴ്ച മുമ്പാണ് വഴുതക്കാട്, ശാസ്തമംഗലം ഭാഗങ്ങളിലായി പ്രവർത്തിച്ചുവരുന്ന ഇരുപതോളം തട്ടുകടകൾക്ക് പോലീസ് വിലക്ക് ഏർപ്പെടുത്തി കൊണ്ടുള്ള നോട്ടീസ് നൽകിയത്. രണ്ടുദിവസത്തിനുള്ളിൽ തട്ടുകടകളുടെ പ്രവർത്തനം നിർത്തണമെന്നതായിരുന്നു പോലീസിന്‍റെ നിർദേശം. നിർദ്ദേശം നൽകിയ ദിവസവും അതിനടുത്ത ദിവസവും തട്ടുകടകൾ പ്രവർത്തിച്ചില്ല. എന്നാൽ മൂന്നാമത്തെ ദിവസം മുതൽ സജീവമായ തട്ടുകടകൾ ഇപ്പോഴും പ്രവർത്തിച്ചുവരുന്നുണ്ട്. പോലീസ് പരിശോധനയ്ക്ക് എത്തിയ ദിവസം തട്ടുകട ഉടമകളുടെ പ്രതിഷേധം ഉണ്ടായിരുന്നു. തിരുവനന്തപുരം നഗരസഭ ഇടപെട്ടാൽ മാത്രമേ രാത്രികാല തട്ടുകടകളുടെ പ്രവർത്തനങ്ങൾക്ക് നിയന്ത്രണം ഏർപ്പെടുത്താനോ അവസാനിപ്പിക്കുവാനോ സാധിക്കുകയുള്ളൂ എന്ന് മ്യൂസിയം പോലീസ് പറയുന്നു. വൈകുന്നേരം അഞ്ച് മുതൽ സജീവമാകുന്ന തട്ടുകടകൾ രാത്രി 12 വരെ പ്രവർത്തിക്കാറുണ്ട്. ഇക്കാരണത്താൽ വഴുതക്കാട്, ശാസ്തമംഗലം റോഡുകളിൽ അനധികൃത വാഹന പാർക്കിംഗും ഗതാഗതക്കുരുക്കും വർധിക്കുന്നതായി പൊതുജനങ്ങൾ ആക്ഷേപം ഉന്നയിച്ചിരുന്നു. ഇതിനിടെയാണ് മ്യൂസിയം പോലീസ് പരിശോധനയ്ക്ക് എത്തിയത്.

നെയ്യാറ്റിന്‍കര രൂപതയുടെ പുതിയ മെത്രാൻ കത്തീഡ്രൽ പള്ളിയിൽ ദിവ്യബലി അർപ്പിച്ചു

നെയ്യാറ്റിന്‍കര : നെയ്യാറ്റിന്‍കര രൂപതയുടെ പുതിയ മെത്രാനായി ചുമതലയേറ്റ ബിഷപ്പ് ഡോ.സെല്‍വരാജന്‍ നെയ്യാറ്റിന്‍കര രൂപതയുടെ ഭദ്രാസന ദേവാലയമായ അമലോത്ഭവമാതാ കത്തിഡ്രല്‍ പളളിയില്‍ രൂപതയുടെ പുതിയ ഇടയെനെന്ന നിലയില്‍ ആദ്യദിവ്യബലി അര്‍പ്പിച്ചു. മുന്‍ മെത്രാന്‍ ഡോ.വിന്‍സന്‍റ് സാമുവല്‍ സഹകാര്‍മികനായി. കരുണയോടെ ശ്രുശ്രൂഷകള്‍ക്ക് നേതൃത്വം നല്‍കുമ്പോള്‍ എന്നും വെല്ലുവിളികളാണ് നേരിടുന്നതെന്നും ദൗത്യ ബോധ്യത്തില്‍ നിന്ന് പിന്‍മാറാതെ വെല്ലുവിളികളെ തരണം ചെയ്ത് മുന്നോട്ട് പോകണമെന്നും വചന സന്ദേശത്തില്‍ മുന്‍ മെത്രാന്‍ വിന്‍സന്‍റ് സാമുവല്‍ പറഞ്ഞു. രൂപതക്കൊപ്പം വെല്ലുവിളികള്‍ നേരിട്ട് അജപാലന ദൗത്യം തുടരുമെന്ന് ബിഷപ്പ് ഡോ.സെല്‍വരാജന്‍ പറഞ്ഞു. രൂപതയിലെ പാസ്റ്ററല്‍ കൗണ്‍സില്‍ അംഗങ്ങളും കൂരിയ അംഗങ്ങളും വൈദികരും സന്യസ്തരും വിശ്വാസി സമൂഹവും ദിവ്യബലിയില്‍ പങ്കെടുത്തു.

സംസ്ഥാന സ്കൂൾ കായികമേള : ഒരേ സമയം 2,500 പേർക്ക് ഭക്ഷണം കഴിക്കാനുള്ള പന്തൽ പുത്തരിക്കണ്ടത്ത്

തിരുവനന്തപുരം: സംസ്ഥാന സ്കൂൾ കായികമേളയിൽ ഒരേ സമയം 2,500 പേർക്ക് ഭക്ഷണം കഴിക്കാനുള്ള വിശാലമായ പന്തലാണ് പുത്തരിക്കണ്ടം മൈതാനത്ത് ഒരുങ്ങിയിട്ടുള്ളത്. കൂടാതെ മറ്റ് അഞ്ച് അടുക്കളകളും പ്രവർത്തിക്കുന്നുണ്ട്. പുത്തരിക്കണ്ടെത്തെ പ്രധാന ഭക്ഷണശാലയോട് അനുബന്ധിച്ച് കായിക നേട്ടങ്ങളെ കുറിച്ചുള്ള സമഗ്ര എക്സിബിഷനും അതിന്‍റെ ഭാഗമായുള്ള ചെറിയ കായിക വിനോദങ്ങളും ഒരുക്കും.74 സ്കൂളുകളിലായി ആണ് കുട്ടികളുടെ താമസം ക്രമീകരിച്ചിട്ടുള്ളത്. മൈതാനങ്ങളിലും താമസ സ്ഥലത്തും പോലീസിന്‍റെ നേതൃത്വത്തിൽ സുരക്ഷ ക്രമീകരിച്ചു. നിരോധിത ഉൽപ്പന്നങ്ങൾ വിറ്റഴിക്കുന്നില്ല എന്ന് ഉറപ്പാക്കാൻ ഗ്രൗണ്ടുകളിലും താമസ സ്ഥലത്തും എക്സൈസിന്‍റെ പ്രത്യേക ജാഗ്രതാ നിരീക്ഷണം ഉണ്ടായിരിക്കും. മെഡിക്കൽ കമ്മിറ്റിയുടെ നേതൃത്വത്തിൽ കായിക താരങ്ങൾക്ക് കളിസ്ഥലങ്ങളിലും താമസ സ്ഥലത്തും ജില്ലാ മെഡിക്കൽ ഓഫീസറുടെ നേതൃത്വത്തിൽ അലോപ്പതി, ആയുർവേദം, ഹോമിയോപ്പതി, സ്പോർട്സ് ആയുർവേദ, ഫിസിയോ തെറാപ്പി, സ്പോർട്സ് മെഡിസിൻ എന്നിവയുടെ സൗകര്യവും ആംബുലൻസ് സർവീസും പ്രത്യേക മെഡിക്കൽ ടീം സേവനവും ഏർപ്പാടാക്കിയിട്ടുണ്ട്. രജിസ്ട്രേഷൻ കമ്മിറ്റിയുടെ നേതൃത്വത്തിൽ കായിക താരങ്ങളുടെ രജിസ്ട്രേഷൻ പൂർത്തിയാക്കാനുള്ള നടപടികൾ തുടരുകയാണെന്നു വിദ്യാഭ്യാസ മന്ത്രി പത്രസമ്മേളനത്തിൽ അറിയിച്ചു.

യാത്രക്കാരന് ദേഹാസ്വാസ്ഥ്യം: സൗദി വിമാനം തിരുവനന്തപുരത്ത് അടിയന്തര ലാന്‍ഡിംഗ് നടത്തി

വലിയതുറ: യാത്രക്കാരന് ദേഹാസ്വാസ്ഥ്യം അനുഭവപ്പെട്ടതിനെത്തുടര്‍ന്ന് മദീനയിലേയ്ക്കുളള സൗദി എയര്‍ലൈന്‍സ് വിമാനം തിരുവനന്തപുരം രാജ്യാന്തര വിമാനത്താവളത്തില്‍ അടിയന്തരമായി ലാന്‍ഡിംഗ് നടത്തി. ഇന്നലെ വൈകുന്നേരം 6.30നാണ് സൗദി എയര്‍ലൈന്‍സ് വിമാനമായ 821 - ബി 77 ഡബ്ല്യൂ തിരുവനന്തപുരത്ത് ഇറക്കിയത്. ജക്കാര്‍ത്തയില്‍ നിന്നും മദീനയിലേയ്ക്കാണ് വിമാനം പോകേണ്ടിയിരുന്നത്. വിമാനത്തിലെ യാത്രക്കാരനായ ഇന്ത്യോനേഷ്യന്‍ സ്വദേശിയായ 29 കാരൻ ബോധരഹിതനായതിനെത്തുടര്‍ന്നാണ് വിമാനം നടപടിക്രമങ്ങള്‍ക്ക് ശേഷം തിരുവനന്തപുരം വിമാനത്താവളത്തില്‍ അടിയന്തരമായി ഇറക്കിയത്. തുടര്‍ന്ന് യുവാവിനെ ആംബുലന്‍സില്‍ അനന്തപുരി ആശുപത്രിയിലേയ്ക്ക് മാറ്റുകയായിരുന്നു.

ഇറ്റലിയിയിലേക്ക് വ്യാജവീസ നൽകി തട്ടിപ്പ്: ഇടുക്കി സ്വദേശി അറസ്റ്റിൽ

മെഡിക്കല്‍കോളജ്: ഇറ്റലിയിയിലേക്ക് കെയര്‍ടേക്കറിന്‍റെ വ്യാജ വീസ നല്‍കി പറ്റിച്ചയാളെ അറസ്റ്റു ചെയ്തു. ഇടുക്കി തങ്കമണി നെല്ലിപ്പാറ ആര്‍സി പള്ളിക്കു സമീപം കാരിക്കക്കുന്നേല്‍ വീട്ടില്‍ റോബിന്‍ ജോസ് (35) ആണ് വ്യാജ വീസ തട്ടിപ്പിന് അറസ്റ്റിലായത്. മെഡിക്കല്‍കോളജ് സിഐ ബി.എം.ഷാഫി, എസ്ഐ വിഷ്ണു, സിപിഒമാരായ വിനോദ്, പ്രശാന്ത്, ബല്‍റാം എന്നിവര്‍ എറണാകുളത്തുനിന്നാണ് കസ്റ്റഡിയിലെടുത്തത്. മെഡിക്കല്‍കോളജിനു സമീപം ഉള്ളൂരില്‍ താമസിച്ചുവരുന്ന തൃശൂര്‍ ഇടക്കുന്നി പനക്കുട്ടിച്ചിറ കാരക്കാട് വീട്ടില്‍ ബൈജു (50) വാണ് പറ്റിക്കപ്പെട്ടത്. സംഭവത്തെക്കുറിച്ച് പോലീസ് പറയുന്നത്: ഒരു പരസ്യം ശ്രദ്ധയില്‍പ്പെട്ടതിനെത്തുടര്‍ന്നാണ് ബൈജു പ്രതിയുമായി ബന്ധപ്പെടുന്നത്. 2023 ജനുവരി മാസത്തിലാണ് തട്ടിപ്പ് നടന്നത്. ഇറ്റലിയിലേക്ക് പ്രത്യേക ജോബ് വീസയ്ക്കായി വിവിധ കാലയളവുകളിലായി 6,50,000 രൂപ പ്രതി തട്ടിയെടുക്കുകയായിരുന്നു. 2023 ജനുവരി മാസത്തില്‍ 50,000 രൂപയും മാര്‍ച്ച് മാസത്തില്‍ വീണ്ടും 50,000 രൂപയും നല്‍കിയ ബൈജു ഏപ്രില്‍ മാസത്തില്‍ താന്‍ ബാങ്കില്‍ നിന്നു പിന്‍വലിച്ച 4,50,000 രൂപ പ്രതിക്ക് നേരിട്ടു നല്‍കി. ഇതേവര്‍ഷം മെയ്മാസത്തില്‍ വീണ്ടമൊരു 50,000 രൂപ പ്രതിയുടെ അക്കൗണ്ടിലേക്ക് അയച്ചുകൊടുത്തു. മെയ്മാസത്തില്‍ത്തന്നെ വീണ്ടുമൊരു 50,000 രൂപ പ്രതിയുടെ അക്കൗണ്ടിലേക്ക് ട്രാന്‍സ്ഫര്‍ ചെയ്തു നല്‍കി. വലിയൊരു തുക വിവിധ അക്കൗണ്ടുകളിലേക്ക് അയച്ചുകൊടുത്ത ബൈജു ഏഴുമാസത്തോളം വിസയ്ക്കായി കാത്തിരുന്നു. ഒടുവില്‍ നിരന്തരം ബന്ധപ്പെട്ടതിന്‍റെ അടിസ്ഥാനത്തില്‍ ഒരു വീസ ബൈജുവിന് ലഭിച്ചു. വിസയുമായി എയര്‍പോര്‍ട്ടില്‍ എത്തിയപ്പോഴാണ് അതു വ്യാജവീസയാണെന്നു തിരിച്ചറിയുന്നത്. ഇതിനെത്തുടര്‍ന്നാണ് ബൈജു പോലീസില്‍ പരാതി നല്‍കിയത്. മാസങ്ങള്‍ നീണ്ട അന്വേഷണത്തിനൊടുവില്‍ എറണാകുളത്തെ ഒരു സ്ഥാപനത്തില്‍ നിന്നാണ് റോബിന്‍ ജോസിനെ പോലീസ് കസ്റ്റഡിയിലെടുത്തത്. ഇയാളെ കോടതി റിമാന്‍ഡ് ചെയ്തു.

സർക്കാർ ജീവനക്കാർക്കായി സാലറി പാക്കേജുമായി ഇന്ത്യൻ ബാങ്ക്

തിരുവനന്തപുരം: ഇന്ത്യൻ ബാങ്കിന്‍റെ ഇൻഡ് സന്പൂർണ്ണ പ്ലസ് പദ്ധതിയിലൂടെ ജീവനക്കാർക്ക് സീറോ ബാലൻസ് അക്കൗണ്ട് ലഭ്യമാക്കുന്നു. ഈ അക്കൗണ്ടിനൊപ്പം 2.57 കോടി രൂപയുടെ അപകട ഇൻഷ്വറൻസ്, പത്തുലക്ഷം രൂപയുടെ ടേം ലൈഫ് ഇൻഷ്വറൻസ് എന്നിവ സൗജന്യമായി നൽകുന്നു. മെഡിസെപ്പ് ഉൾപ്പെടെയുള്ള മെഡിക്കൽ ഇൻഷ്വറൻസുകൾക്ക് വർഷത്തിൽ വെറും 749 രൂപ ചെലവിൽ 15 ലക്ഷം രൂപവരെ ടോപ്പ് -അപ്പ് സൗകര്യവും ഉണ്ട്. ഭവന വായ്പകൾക്ക് പലിശ 7.40 % മുതലും വാഹനവായ്പകൾക്ക് 7.15% മുതലും ലഭ്യമാണ്.

ദേവാലയ നിര്‍മാണത്തിന് ശിലാസ്ഥാപനം

തിരുവനന്തപുരം: പരിശുദ്ധ യല്‍ദോ മാര്‍ ബസേലിയോസ് ബാവായുടെ നാമത്തില്‍ രൂപീകരിച്ച കഴക്കൂട്ടം യാക്കോബായ ഇടവകയുടെ ദേവാലയ നിര്‍മാണത്തിന്‍റെ ശിലാസ്ഥാപനം യാക്കോബായ സുറിയാനി സഭയുടെ കൊല്ലം ഭദ്രാസനാധിപന്‍ മാത്യൂസ് മാര്‍ തേവോദോസിയോസ് മെത്രപ്പോലീത്ത നിര്‍വഹിച്ചു. ബഥേല്‍ മാര്‍ത്തോമാ ദേവാലയ ത്തില്‍ നടന്ന വിശുദ്ധ കുര്‍ബാനയ്ക്ക് മെത്രാപ്പോലീത്ത കാര്‍മികത്വം വഹിച്ചു. പരിശുദ്ധ അന്ത്യോഖ്യാ പാത്രിയര്‍ക്കീസ് ബാവായുടെ മലങ്കര സന്ദര്‍ശനവേളയില്‍ ആശീര്‍വദിച്ച അടിസ്ഥാനശിലയാണ് സ്ഥാപിച്ചത്. ഇതോടനുബന്ധിച്ചു ചേര്‍ന്ന സമ്മേളനത്തില്‍ ബഥേല്‍ മാര്‍ത്തോമ്മാ ഇടവക വികാരി റവ. ഡോ. രഞ്ചന്‍ ജോണ്‍ നെല്ലിമൂട്ടില്‍, യാക്കോബായ ഇടവക വികാരി ഫാ. പോപ്‌സണ്‍ വര്‍ഗീസ്, ഐഎസ്ആര്‍ഒ. മുന്‍ ഡപ്യൂട്ടി ഡയറക്ടര്‍ ഷെവ. ഡോ. കോശി എം. ജോര്‍ജ് എന്നിവര്‍ പ്രസംഗിച്ചു.

ജെ.സി.ഡാനിയേൽ മെമ്മോറിയൽ ഓപ്പൺ എയർ തിയറ്റർ ഉദ്ഘാടനം 22ന്

നെയ്യാറ്റിന്‍കര : മലയാള ചലച്ചിത്രലോകത്തിന്‍റെ പിതാവ് ജെ.സി ഡാനിയലിന്‍റെ സ്മരണാര്‍ഥം സാംസ്കാരിക വകുപ്പിന്‍റെ സഹായത്തോടെ നെയ്യാറ്റിന്‍കര നഗരസഭ നിര്‍മിച്ച ജെ.സി.ഡാനിയല്‍ ഓപ്പണ്‍ തിയറ്റര്‍ 22 ന് മന്ത്രി സജി ചെറിയാന്‍ നാടിന് സമര്‍പ്പിക്കും. നെയ്യാറ്റിന്‍കര നഗരസഭ സ്റ്റേഡിയത്തില്‍ ഒരേ സമയം 250 പേര്‍ക്ക് ഇരിക്കാവുന്ന വിധത്തില്‍ ബാല്‍ക്കണി സംവിധാനത്തോടെയുള്ള ഓപ്പണ്‍ തിയറ്ററാണ് നിര്‍മിച്ചിരിക്കുന്നത്. സമീപത്തെ പാര്‍ക്കില്‍ ജെ.സി ഡാനിയലിന്‍റെ പൂര്‍ണകായ പ്രതിമയുമുണ്ട്. ജെ.സി ഡാനിയല്‍ പ്രതിമ സ്ഥാപിച്ചതു പോലെ തന്നെ ഓപ്പണ്‍ തിയറ്റര്‍ പ്രവര്‍ത്തനക്ഷമമാകുന്പോള്‍ മലയാള സിനിമയുടെ പിതാവിനുള്ള ജന്മനാടിന്‍റെ ആദരസൂചകമായ സ്മാരകമാണെന്ന ചാരിതാര്‍ഥ്യം നഗരസഭ ചെയര്‍മാന്‍ പി.കെ രാജമോഹനനും അദ്ദേഹം നയിക്കുന്ന ഭരണസമിതിക്കുമുണ്ട്. മലയാളത്തിലെ ആദ്യചലച്ചിത്രമായ വിഗതകുമാരന്‍റെ പ്രഥമ പ്രദര്‍ശനം തിരുവനന്തപുരത്ത് കാപ്പിറ്റോള്‍ തിയറ്ററില്‍ നടന്നതിന്‍റെ 97 -ാം വാര്‍ഷികം അടുത്ത മാസമാണ്. സാംസ്കാരിക പരിപാടികള്‍ക്കും സിനിമാ പ്രദര്‍ശനത്തിനും ലക്ഷ്യമിട്ടാണ് ഓപ്പണ്‍ തിയറ്റര്‍ രൂപകല്‍പ്പന ചെയ്തിട്ടുള്ളത്. മലയാള സിനിമയുടെ പിതാവിന്‍റെ ജന്മനാട്ടില്‍ ഒരു തിയറ്റര്‍ പോലുമില്ലല്ലോ എന്നൊരു പരാതി ഇവിടുത്തെ ചലച്ചിത്രപ്രേമികള്‍ക്കുണ്ടായിരുന്നു. തിയറ്റര്‍ സ്ഥാപിക്കാന്‍ ഉചിതമായ സ്ഥലം കണ്ടെത്താനടക്കമുള്ള നടപടികള്‍ നടക്കുകയുമുണ്ടായി. നെയ്യാറ്റിന്‍കര അക്ഷയ ഷോപ്പിംഗ് കോംപ്ലക്സിന്‍റെ മുകള്‍വശം, ആറാലുംമൂട് മാര്‍ക്കറ്റ് ഗ്രൗണ്ട് മുതലായവിടങ്ങളിലൊക്കെ വിദഗ്ധര്‍ പ്രാഥമിക പരിശോധന നടത്തുകയും ചെയ്തു. വിവിധ കാരണങ്ങളാല്‍ തിയറ്റര്‍ എന്നത് ഇപ്പോഴും സ്വപ്നമായി അവശേഷിക്കുന്നു. ഈ സാഹചര്യം നിലനില്‍ക്കെയാണ് ഓപ്പണ്‍ തിയറ്റര്‍ എന്ന ആശയം സാക്ഷാത്കരിക്കപ്പെട്ടിരിക്കുന്നത്. ജെ.സി.ഡാനിയേൽ ഫൗണ്ടേഷൻ സ്ഥാപിച്ച മലയാള സിനിമയുടെ പിതാവിന്‍റെ പൂർണകായ പ്രതിമയ്ക്ക് സമീപത്താണ് തീയറ്റർ നിർമിച്ചത്. ജെ.സി.ഡാനിയേലിന്‍റെ സ്മരണ നിലനിർത്തുന്നതിനു വേണ്ടി നിർമിച്ച പ്രതിമ സ്ഥാപിക്കുന്നതിന് ഇടം കിട്ടാതെ മൂന്നുവർഷത്തോളം ഒരു ഓഡിറ്റോറിയത്തിൽ വച്ചിരിക്കുകയായിരുന്നു. ഫൗണ്ടേഷൻ ചെയർപേഴ്സൺ സോന എസ്.നായർ ഇക്കാര്യം നെയ്യാറ്റിൻകര നഗരസഭ ചെയർമാന്‍റെ ശ്രദ്ധയിൽപ്പെടുത്തിയപ്പോൾ നഗരസഭ ചെയർമാൻ പൂർണ സമ്മതത്തോടെ ജെ.സി.ഡാനിയേലിന്‍റെ ജന്മനാടായ നെയ്യാറ്റിൻകരയിൽ തന്നെ പ്രതിമ സ്ഥാപിക്കുവാൻ അനുവാദം നൽകുകയായിരുന്നു.

റോഡുപരോധം: എം.വിജയകുമാർ ഉൾപ്പെടെ 20 പേരെ വെറുതെ വിട്ടു

നെടുമങ്ങാട്: റോഡുകളുടെ ശോച്യാവസ്ഥയിൽ പ്രതിഷേധിച്ച് റോഡുപരോധിച്ച കേസിൽ മുൻ സ്പീക്കറും സിപിഎം നേതാവുമായ എം.വിജയകുമാർ ഉൾപ്പടെ 20 പൊതുപ്രവർത്തകരെ നെടുമങ്ങാട് ഒന്നാംക്ലാസ് മജിസ്‌ട്രേട്ട് റൂബി ഇസ്മായിൽ വെറുതെ വിട്ടു. 2015-ൽ അരുവിക്കര മണ്ഡലത്തിലെ റോഡുകളുടെ ശോച്യാവസ്ഥയ്‌ക്കെതിരെ വിജയകുമാറിന്‍റെ നേതൃത്വത്തിൽ റോഡ് ഉപരോധിച്ച പങ്കജാക്ഷൻ നായർ,കുമാരദാസ്,ശോഭനകുമാർ, എം.രാജേന്ദ്രൻ,സതീഷ്‌കുമാർ,മണിക്കുട്ടൻ,മോഹനൻ,ശാലിനി, ഉണ്ണിക്കുട്ടൻ, ബാലു,ഷൈജു,നാരായണൻ നായർ, ശശീന്ദ്രൻ,വിജയകുമാർ,ഹരികുമാർ,മനോഹരൻ നായർ എന്നീ സി.പി.എം പ്രവർത്തകരെയാണ് കോടതി വെറുതെ വിട്ടത്. പ്രതികൾക്ക് വേണ്ടി അഭിഭാഷകരായ എം.എ.കാസിം, എസ്.എസ്.ബിമൽ,ഹലീനാമുഹമ്മദ്,ആരാധനാ വാസുദേവൻ,എ.അബ്ദുൽസലാം,കെ.എസ്.അലിഫ്, ജെ.അമല, എ.എൽ.ലിജിത, പി.സി.അരവിന്ദ് എന്നിവർ ഹാജരായി.

തൊണ്ടിമുതൽ തിരിമറി കേസ്: അന്തിമവാദം തുടങ്ങി

നെടുമങ്ങാട്: മുൻ മന്ത്രിയും എംഎൽഎയുമായ ആന്‍റണി രാജുവിനെതിരായ തൊണ്ടി മുതലിൽ തിരിമറി നടത്തിയെന്ന കേസിൽ അന്തിമവാദം നെടുമങ്ങാട് ജുഡീഷ്യൽ ഫസ്‌റ്റ് ക്ലാസ് മജിസ്ട്രേറ്റ് കോടതി ഒന്നിൽ തുടങ്ങി. കഴിഞ്ഞദിവസം ഉച്ചകഴിഞ്ഞാണ്‌ പ്രോസിക്യൂഷൻ വാദം ആരംഭിച്ചത്.പബ്ലിക് പ്രോസിക്യൂട്ടർ മൻമോഹന്‍റെ വാദം രണ്ട് മണിക്കൂറോളം നീണ്ടു. വാദം വൈകിട്ട് 5.45 വരെ നീണ്ടു. കഴിഞ്ഞ മൂന്നിന് നെടുമങ്ങാട് ജുഡീഷ്യൽ ഫസ്‌റ്റ് ക്ലാസ് മജിസ്ട്രേറ്റ് കോടതി ഒന്നിൽ ഹാജരായ ഒന്നാം പ്രതി ജോസിനും രണ്ടാം പ്രതി ആന്‍റണി രാജു എംഎൽഎയ്ക്കും പ്രോസിക്യൂഷൻ നൽകിയ തെളിവുകൾ മജിസ്ട്രേറ്റ് വായിച്ചു കേൾപ്പിച്ചിരുന്നു. തുടർന്നാണ് അന്തിമ വാദം ആരംഭിച്ചത്.കേസിൽ 29 സാക്ഷികൾ ഉണ്ടെങ്കിലും 19 പേരെ മാത്രമാണ് വിസ്‌തരിച്ചത്. മരണപ്പെട്ടതിനെ തുടർന്നും അസുഖത്തെ തുടർന്നും 8 പേരെയും 2 പേരെ പ്രോസിക്യൂഷനും ഒഴിവാക്കിയിരുന്നു. വരുംദിവസങ്ങളിൽ വാദം തുടരും.

ജനാര്‍ദനപുരം ഹയര്‍ സെക്കൻഡറി സ്‌കൂളില്‍ സ്‌നേഹാമൃതം പദ്ധതി

വെള്ളറട: നിരവധി ചാരിറ്റി പ്രവര്‍ത്തനങ്ങള്‍ നടപ്പാക്കി വരുന്ന ഒറ്റശേഖരമംഗലം ജനാര്‍ദനപുരം ഹയര്‍ സെക്കൻഡറി സ്‌കൂളില്‍ മെഡിക്കല്‍ കോളജ്, ആര്‍സിസി ആശുപത്രികളില്‍ ചികിത്സയില്‍ കഴിയുന്ന അശരണരും ആലംബഹീനരുമായ രോഗികള്‍ക്കും കൂട്ടിരിപ്പുകാര്‍ക്കും ഒരു നേരത്തെ ഭക്ഷണപ്പൊതി നല്‍കുന്ന പദ്ധതിയായ സ്‌നേഹാമൃതം പദ്ധതിയ്ക്ക് ഇന്ന് തുടക്കമിട്ടു. കുട്ടികളുടേയും രക്ഷിതാക്കളുടേയും സഹകരണത്തോടെ എല്ലാ മാസവും 1500 പേര്‍ക്ക് ഭക്ഷണപ്പൊതി നല്‍കാനാണ് ലക്ഷ്യം. ഉദ്ഘാടനത്തോടനുബന്ധിച്ച് ആര്‍സിസിയില്‍ ചികിത്സയില്‍ കഴിയുന്ന രോഗികള്‍ക്കും കൂട്ടിരിപ്പുകാര്‍ക്കുമായി 1000 പേര്‍ക്ക് ഭക്ഷണപ്പൊതി വിതരണം നടത്തി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]