അമ്പലപ്പുഴ: നെല്ലെടുപ്പ് പൂര്‍ത്തിയാക്കി പി ആര്‍എസ് എഴുതി 15 ദിവസത്തിനുള്ളില്‍ കര്‍ഷകരുടെ അക്കൗണ്ടില്‍ തുക എത്തുമെന്ന സര്‍ക്കാര്‍ ഉറപ്പ് പാഴ്‌വാക്കായി. നെല്ലെടുപ്പ് കഴിഞ്ഞ് രണ്ടുമാസം കഴിഞ്ഞിട്ടും നെല്ലുവില കിട്ടിയിട്ടില്ല. പുന്നപ്ര വടക്ക്-തെക്ക് കൃഷിഭവനുകളുടെ പരിധിയിലുള്ള വിവിധ പാടശേഖരങ്ങളിലെ കര്‍ഷകര്‍ക്കാണ് നെല്ലുവില കിട്ടാത്തത്.
കുറുവപ്പാടം, അഞ്ഞൂറ്റിന്‍ പാടം, മുന്നൂറ്റിന്‍ പാടം, വടക്കേപൂന്തുരം, തെക്കേ പൂന്തുരം, പാര്യക്കാടന്‍, പൊന്നാകരി, പരപ്പില്‍ പാടശേഖരങ്ങളില്‍നിന്നു ശേഖരിച്ച നെല്ലിന്‍റെ വിലയാണ് കര്‍ഷകര്‍ക്ക് കിട്ടാനുള്ളത്. ഇതില്‍ പല പാടശേഖരങ്ങളുടെയും പിആര്‍എസ് എഴുതിയിട്ട് ഒരുമാസം മുതല്‍ രണ്ടുമാസം വരെ കഴിഞ്ഞിരിക്കുകയാണ്. തകഴി, കുന്നുമ്മ പ്രദേശങ്ങളില്‍ കൊയ്ത്തുകഴിഞ്ഞ പാടശേഖരങ്ങളില്‍ നിന്നു ശേഖരിച്ച നെല്ലിന്‍റെ വിലയും കിട്ടിയിട്ടില്ലെന്നാണ് കര്‍ഷകരുടെ ആരോപണം.
നെല്ലുവില കിട്ടാന്‍ വൈകിയതുമൂലം കടബാധ്യതയും മാനസിക സംഘര്‍ഷവും കാരണം കര്‍ഷകന്‍ ആത്മഹത്യ ചെയ്ത സംഭവം വരെ ഉണ്ടായിട്ടുണ്ട്. മുതിര്‍ന്ന കര്‍ഷകന്‍ അമ്പലപ്പുഴ വണ്ടാനം നീലിക്കാട്ട് ചിറയില്‍ കെ.ആർ. രാജപ്പനാണ് ആത്മഹത്യ ചെയ്തത്. നെല്ലുവില കിട്ടാതിരുന്നതാണ് ആത്മഹത്യയ്ക്ക് വഴിയൊരുക്കിയത്. തുടർന്നായിരുന്നു സര്‍ക്കാരിന്‍റെ ഇടപെടല്‍. പിആര്‍എസ് എഴുതിയാല്‍ 15 ദിവസത്തിനുള്ളില്‍ നെല്ലുവില കര്‍ഷകന്‍റെ അക്കൗണ്ടില്‍ എത്തുമെന്നായിരുന്നു ഉറപ്പ്.
എന്നാല്‍, ഈ ഉറപ്പ് നടപ്പിലായിട്ടില്ല. കര്‍ഷകരില്‍നിന്നു ശേഖരിച്ച നെല്ലിന്‍റെ വില നല്‍കുന്നത് പിആര്‍എസ് വായ്പയായിട്ട് ബാങ്കുകള്‍ നല്‍കുകയാണെന്നാണ് ഉദ്യോഗസ്ഥര്‍ നല്‍കുന്ന മറുപടി.
2023-24 വര്‍ഷത്തെ വായ്പ കുടിശിഖ സര്‍ക്കാര്‍ ബാങ്കുകള്‍ക്കു നല്‍കിയശേഷമാണ് പുതിയ വായ്പ അനുവദിക്കുന്നത്. ഇത് വൈകിയതാണ് രണ്ടാംകൃഷി വിളവെടുപ്പിലെ നെല്ലുവില വൈകാന്‍ കാരണം. എന്നാല്‍, അതിനു പരിഹാരമായെന്നും വ്യക്തമാക്കി.
കാര്‍ഷികവായ്പയ്ക്കു പുറമേ സ്വകാര്യവ്യക്തികളില്‍നിന്ന് പലിശയ്ക്കും സ്വര്‍ണം പണയംവച്ചുമാണ് പലരും കൃഷി ചെയ്യുന്നത്. ചെറുകിട കര്‍ഷകരായ പലരും പാട്ടകൃഷിയും ചെയ്യുന്നുണ്ട്. ഇവ വാങ്ങുന്നതിനുള്ള തുക പോലും കാര്‍ഷിക വായ്പകൊണ്ട് തികയില്ല. കൂടാതെ കൊയ്ത്ത് യന്ത്രം വാടകയായി മണിക്കൂറിനു 2500 രൂപ വരെ നല്‍കണം.
ഒരു ഏക്കര്‍ കൊയ്തെടുക്കാന്‍ ചില നിലങ്ങളില്‍ ഒന്നര മുതല്‍ രണ്ടു മണിക്കൂര്‍ വരെ വേണ്ടിവരും. കൊയ്ത്തു കഴിഞ്ഞാലുടന്‍ യന്ത്രവാടക നല്‍കണം. ഇങ്ങനെ കൃഷി ചെയ്യുന്ന കര്‍ഷകര്‍ക്ക് നെല്ലുവില കിട്ടണമെങ്കില്‍ മാസങ്ങളോളം കാത്തിരിക്കേണ്ട അവസ്ഥയാണ്.
ഡിസംബര്‍ ആദ്യവാരത്തോടെ പുഞ്ച കൃഷി ഇറക്കാനുള്ള തയാറെടുപ്പിലാണ് കര്‍ഷകര്‍. നിലം ഒരുക്കാനും വിതയ്ക്കാനും തുക കണ്ടെത്താനുള്ള തത്രപ്പാടിലാണ് കര്‍ഷകര്‍. അടുത്ത ദിവസമെങ്കിലും ശേഖരിച്ച നെല്ലിന്‍റെ വില കിട്ടിയില്ലെങ്കില്‍ പുഞ്ചകൃഷി ഇറക്കാന്‍ വൈകും. ഇത് വിളവിനെയും ബാധിക്കും.
ഈര്‍പ്പത്തിന്‍റെ പേരിലും ചൂഷണം
നെല്ലുവില നല്‍കുന്ന കാര്യത്തില്‍ കര്‍ഷകരെ വട്ടം ചുറ്റിക്കുന്നത് പോലെയാണ് കൊയ്ത നെല്ലെടുക്കുന്ന കാര്യത്തില്‍ മില്ലുടമകളുടെ നിലപാട്. കീടങ്ങളുടെ ശല്യം ഉള്‍പ്പെടെ പല പ്രതിസന്ധികളെയും പ്രതിരോധിച്ച് കൊയ്തെടുത്ത നെല്ല് വില്‍ക്കുന്ന കാര്യത്തില്‍ ഇടനിലക്കാരാണ് തീരുമാനം എടുക്കുന്നത്.
പുറക്കാട് കരിനിലങ്ങളില്‍ കഴിഞ്ഞദിവസങ്ങളിലാണ് കൊയ്ത്തുകഴിഞ്ഞത്. കൊയ്തു കൂട്ടിയ നെല്ലെടുക്കാന്‍ പാഡി ഓഫീസറും മില്ലുകളുടെ ഇടനിലക്കാരും എത്തി നെല്ലിന്‍റെ ഗുണനിലവാരം പരിശോധിച്ചു. എന്നാല്‍, നെല്ലിന് ഈര്‍പ്പവും കറുവലും ഉണ്ടെന്ന കാരണം ആരോപിച്ച് ക്വിന്‍റിന് 13 കിലൊ കിഴിവാണ് ആവശ്യപ്പെട്ടത്. ഇതിനോട് കര്‍ഷകര്‍ അനുകൂലിച്ചില്ല. തുടര്‍ന്ന് നെല്ലെടുക്കാതെ മില്ലുടമകള്‍ മടങ്ങി.
സിവിൽ സപ്ലൈസിനുവേണ്ടി നെല്ല് സംഭരിക്കുന്ന മില്ല് ഉടമകളും ഉദ്യോഗസ്ഥരും ചേർന്ന് കര്‍ഷകരെ ചൂഷണം ചെയ്യുന്നത് അവസാനിപ്പിക്കണമെന്ന് കേരള കർഷക യൂണിയൻ (ജേക്കബ്) ആലപ്പുഴ ജില്ലാ കമ്മിറ്റി ആവശ്യപ്പെട്ടു. കൊയ്ത്തുകഴിയുമ്പോള്‍ മില്ലുടമകള്‍ ഏര്‍പ്പെടുത്തുന്ന ഏജന്‍റാണ് നെല്ലിന്‍റെ ഗുണനിലവാരം നിശ്ചയിക്കുന്നത്.
ഇത് കാലങ്ങളായി തുടര്‍ന്നുവരുകയാണ്. തോട്ടപ്പള്ളി പുറക്കാട് അമ്പലപ്പുഴ ഭാഗങ്ങളിലെ കരിനല കർഷകരിൽനിന്നും ഒരു ക്വിന്‍റലിന് 13 കിലോ വരെ കിഴിവ് ആവശ്യപ്പെടുന്നത് അംഗീകരിക്കാനാവില്ല. ക്വിന്‍റലിന് 5 കിലോ വരെ കിഴിവ് നല്‍കാന്‍ കർഷകര്‍ തയാറാണ്. കിഴിവിനത്തില്‍ മില്ലുകാര്‍ ശേഖരിക്കുന്ന നെല്ലിന്‍റെ ചുമട്ടുകൂലി, കയറ്റിയിറക്കുകൂലി എന്നിവയും കര്‍ഷകനാണ് നല്‍കുന്നത്.
കിഴിവിന്‍റെ പേരിൽ സംഭരണം വൈകിപ്പിക്കുന്നത് ഒഴിവാക്കാൻ സർക്കാർ അടിയന്തര ഇടപെടൽ നടത്തണം. കൂടാതെ സംഭരിക്കുന്ന നെല്ലിന്‍റെ വില നൽകാൻ സർക്കാർ തയാറാകണമെന്നും കിഴിവിനത്തില്‍ ശേഖരിക്കുന്ന നെല്ലിന്‍റെ കയറ്റിയിറക്ക് ചുമട്ടുകൂലി ഉൾപ്പെടെയുള്ള ചെലവുകള്‍ മില്ലുകാരില്‍നിന്നും ഈടാക്കണമെന്നും ജില്ലാ കമ്മിറ്റി ആവശ്യപ്പെട്ടു.
കർഷക യൂണിയൻ ജില്ലാ പ്രസിഡന്‍റ് സാബു വള്ളപ്പുരയ്ക്കൽ അധ്യക്ഷത വഹിച്ചു. സംസ്ഥാന വർക്കിംഗ് പ്രസിഡന്‍റ് നൈനാൻ തോമസ് ഉദ്ഘാടനം ചെയ്തു. തോമസ് ചുള്ളിക്കൽ, ഷാജി വാണിയപ്പു രയ്ക്കൽ, കെ.എന്‍. സാംസൺ, സപ്രു പത്തിൽ, സന്തോഷ് പുളിങ്കുന്ന് എന്നിവർ പ്രസംഗിച്ചു.