പത്തനംതിട്ട: ജില്ലാ രൂപീകരണ ദിനമായ നാളെ സിനിമ പ്രേക്ഷക കൂട്ടായ്മയുടെ നേതൃത്വത്തിൽ സിനിമരംഗത്ത് നിന്നു വിടവാങ്ങിയ ജില്ലയിൽ നിന്നുള്ള കലാകാരൻമാരെ അനുസ്മരിക്കുന്ന " ഓർമപ്പൂക്കൾ’ സംഘടിപ്പിക്കുമെന്ന് സിനിമ പ്രേക്ഷക കൂട്ടായ്മ ഭാരവാഹികൾ പത്രസമ്മേളനത്തിൽ അറിയിച്ചു.
നാളെ രാവിലെ 10.30 മുതൽ ഉച്ചയ്ക്ക് ഒന്നുവരെ പത്തനംതിട്ട മിനി സിവിൽ സ്റ്റേഷന് മുന്നിലാണ് "ഓർമപ്പൂക്കൾ’ സംഘടിപ്പിക്കുന്നത്. ഡോ. ജിതേഷ്ജി സ്മരണാഞ്ജലി ഉദ്ഘാടനം ചെയ്യും . ജില്ലയുടെ പിതാവ് കെ.കെ. നായരെ ഷബീർ അഹമ്മദ് അനുസ്മരിക്കും.
ഓമല്ലൂർ ചെല്ലമ്മ, അടൂർ ഭാസി, എം.ജി. സോമൻ , പ്രതാപചന്ദ്രൻ, കവിയൂർ രേണുക, അടൂർ ഭവാനി , അടൂർ പങ്കജം , ആറൻമുള പൊന്നമ്മ, തിലകൻ, ക്യാപ്റ്റൻ രാജു, ആയിരൂർ സദാശിവൻ, കെ.ജി ജോർജ് ,ഗാന്ധിമതി ബാലൻ, കെ.കെ ഹരിദാസ്, കോന്നിയൂർ ഭാസ്, പി . അയ്യനേത്ത്, കവിയൂർ പൊന്നമ്മ , ഇ.കെ ശിവറാം,
പുല്ലംപള്ളിൽ പി.വി. ഏബ്രഹാം, പന്തളം ത്രിലോക് സുരേന്ദ്രൻ പിള്ള, എം.ജി. ഗോപിനാഥ്, നിസാം റാവുത്തർ എന്നിവർക്ക് സ്മരണാഞ്ജലി അർപ്പിക്കും . സിനിമാ പ്രേക്ഷക കൂട്ടായ്മ ജില്ലാ ചെയർമാൻ സലിം പി. ചാക്കോയും , ജനറൽ കൺവീനർ പി. സക്കീർ ശാന്തിയും പത്രസമ്മേളനത്തിൽ പങ്കെടുത്തു.