ഡോ. എം. ജുനൈദ് ബുഷ്റി കുസാറ്റ് വൈസ് ചാൻസലർ : Deepika.com Kerala News |

Click here for detailed news of all items

ഡോ. എം. ജുനൈദ് ബുഷ്റി കുസാറ്റ് വൈസ് ചാൻസലർ

Saturday, September 21, 2024 3:22 AM IST

തിരുവനന്തപുരം: കൊച്ചിൻ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജി (കുസാറ്റ്) വൈസ് ചാൻസലറുടെ ചുമതല ഡോ. എം. ജുനൈദ് ബുഷ്റിക്കു നൽകി ചാൻസലർ കൂടിയായ ഗവർണർ ഉത്തരവിറക്കി. നിലവിൽ കുസാറ്റ് വൈസ് ചാൻസലറുടെ ചുമതല വഹിക്കുന്ന ഡോ.പിജി. ശങ്കരൻ ഇന്നു സർവീസിൽനിന്ന് വിരമിക്കുന്ന സാഹചര്യത്തിലാണ് ഉത്തരവ്.

കുസാറ്റ് ഫിസിക്സ് വിഭാഗം പ്രഫസറായ ഡോ. എം. ജുനൈദ് ബുഷ്റി ഇന്നു ചുമതലയേൽക്കും.

ഇന്ന് 60 വയസ് പൂർത്തിയാകുന്ന ഡോ. പി.ജി. ശങ്കരൻ വിസി സ്ഥാനത്ത് തുടരുമെന്ന സൂചനകളുണ്ടായിരുന്നെങ്കിലും ഒട്ടേറെ പരാതികൾ ലഭിച്ച സാഹചര്യത്തിലാണു പുതിയ വിസിയെ നിയമിച്ചതെന്നാണു സൂചന. കുസാറ്റ് പ്രോ-വൈസ് ചാൻസലറായിരുന്ന ഡോ. ശങ്കരൻ 2023ഏപ്രിൽ മുതൽ വിസിയുടെ ചുമതല വഹിക്കുകയായിരുന്നു.

കേരള സർവകലാശാലയിൽനിന്ന് 2000ൽ പിഎച്ച്ഡി നേടിയ ഡോ. ജുനൈദ് വിദേശ സർവകലാശാലകളിൽ അടക്കം പഠിപ്പിച്ചിട്ടുണ്ട്. 2006 മുതൽ കുസാറ്റിൽ ഫിസിക്സ് പ്രഫസറാണ്. 2016 മുതൽ 2019 വരെ കുസാറ്റ് ഫിസിക്സ് വിഭാഗം മേധാവിയായിരുന്നു. 2015 മുതൽ മുതൽ കുസാറ്റ് സെനറ്റ് അംഗവുമാണ്.

സ്ഥിരം വിസിയെ നിയമിക്കാനുള്ള സേർച്ച് കമ്മിറ്റി ചേരാൻ സർക്കാർ വിസമ്മതിച്ചതോടെയാണു കുസാറ്റ് അടക്കമുള്ള സർവകലാശാലകളിലെ വൈസ് ചാൻസലർ നിയമനം അവതാളത്തിലായത്. കുസാറ്റ് വിസിയുടെ ചുമതലയിൽ പുതിയയാളെ നിയമിക്കുന്ന ഫയലിൽ ഒപ്പുവച്ചശേഷം ഗവർണർ ആരിഫ് മുഹമ്മദ്ഖാൻ ഇന്നലെ ചെന്നൈക്കു പോയി. 24ന് മടങ്ങിയെത്തും.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.