കെ.വി. തോമസ് വാർത്താ സമ്മേളനം മാറ്റി; ശനിയാഴ്ച ഗലോട്ടുമായി ചർച്ച |

കൊച്ചി: കോണ്‍ഗ്രസ് നേതൃത്വവുമായി ഇടഞ്ഞുനില്‍ക്കുന്ന മുൻമന്ത്രി കെ.വി. തോമസ് വാർത്താ സമ്മേളനം മാറ്റി. ശനിയാഴ്ച നടത്താനിരുന്ന വാർത്താ സമ്മേളനമാണ് മാറ്റിയത്. തിരുവനന്തപുരത്ത് എത്തിയ രാജസ്ഥാൻ മുഖ്യമന്ത്രി അശോക് ഗലോട്ടുമായി ചർച്ചയ്ക്കു ക്ഷണിച്ചതിനു പിന്നാലെയാണ് വാർത്താ സമ്മേളനം മാറ്റിയത്. നാളെ തിരുവനന്തപുരത്തെത്തുന്ന കെ.വി തോമസ് അശോക് ഗലോട്ടുമായി ചർച്ച നടത്തും.

പാർട്ടിയിൽ അവഗണന നേരിടുന്നുവെന്നാണു കെ.വി. തോമസിന്‍റെ പ്രധാന പരാതി. എറണാകുളത്തെ സിറ്റിംഗ് എംപിയായിരുന്നിട്ടും കഴിഞ്ഞ ലോക്സഭാ തെരഞ്ഞെടുപ്പിൽ സീറ്റ് നിഷേധിക്കപ്പെട്ട തനിക്കു നിയമസഭാ സീറ്റ് വേണമെന്ന ആവശ്യവും അദ്ദേഹം ഉയർത്തുന്നു.

പാർട്ടി വിട്ട് ഇടതുപക്ഷത്തേക്കു മാറുമെന്ന വിധത്തിൽ വാർത്തകൾ പ്രചരിച്ചപ്പോൾ അതു നിഷേധിക്കാൻ അദ്ദേഹം തയാറായുമില്ല. അതിനിടെ കോണ്‍ഗ്രസ് വിട്ടുവന്നാൽ സ്വാഗതം ചെയ്യുമെന്നു സിപിഎം ജില്ലാ നേതൃത്വം പരസ്യമായി പറയുകയും ചെയ്തു.

കോണ്‍ഗ്രസ് വിടാനുള്ള നീക്കത്തിൽനിന്നു ‌കെ.വി. തോ മസ് പിന്നോട്ടു പോയതായാണ് ഒടുവിലെ സൂചനകൾ. സീറ്റിന്‍റെ കാര്യത്തിൽ അന്തിമതീരുമാനം വന്നശേഷമായിരിക്കും ഭാവിതീരുമാനങ്ങൾ പ്രഖ്യാപിക്കുകയെന്നും അദ്ദേഹത്തിൻ അടുത്തവൃത്തങ്ങൾ പറയുന്നു.

സിപിഎം ജില്ലാ നേതൃത്വം സ്വാഗതം ചെയ്തെങ്കിലും സീറ്റ് ഉൾപ്പെടെയുള്ള കാര്യങ്ങളിൽ വ്യക്തത വരാത്തതും പാർട്ടി വിടാനുള്ള പ്രഖ്യാപനത്തിൽനിന്നു കെ.വി. തോമസിനെ തടയുന്നുണ്ടെന്നാണ് അറിയുന്നത്. വീണ്ടും മത്സരിക്കാനുള്ള അദ്ദേഹത്തിന്‍റെ ആഗ്രഹത്തെ സിപിഎമ്മിന്‍റെ മുതിർന്ന നേതാവ് എം.എം. ലോ റന്‍സ് വിമര്‍ശിച്ചതും തിരിച്ചടിയാണ്.