കേന്ദ്രം നിഷ്കർഷിച്ച വ്യവസ്ഥകൾ പാലിക്കുന്നതിലുണ്ടായ വീഴ്ചകൊണ്ടാണ് യുജിസി കുടിശിക ഇനത്തിലുള്ള 750.93 കോടി രൂപ നഷ്ടമായത്. സമയപരിധി 2022 മാർച്ച് 31ന് തീർന്നതിനാൽ ഇത് ഇനി ലഭിക്കാൻ സാധ്യത കുറവാണെന്നു കഴിഞ്ഞ ദിവസം കേന്ദ്രമന്ത്രി വി. മുരളീധരനും പറഞ്ഞിരുന്നു.
39 മാസത്തെ ശന്പള കുടിശിക കണക്കിൽ അപാകതയുണ്ടെന്ന് കേന്ദ്രം പറയുന്പോൾ അനാവശ്യ തടസവാദങ്ങളുയർത്തി കേന്ദ്രം പ്രതിരോധിക്കുകയാണെന്നാണ് സംസ്ഥാനത്തിന്റെ നിലപാട്. ഏഴാം ശന്പള കമ്മീഷൻ നടപ്പാക്കിയ ശന്പള പരിഷ്കരണ കുടിശികയെ ചൊല്ലിയാണ് തർക്കം.
സംസ്ഥാനത്തെ സർവകലാശാലകളിലെയും അഫിലിയേറ്റഡ് കോളജുകളിലെയും അധ്യാപകർക്ക് ലഭിക്കേണ്ട ആനുകൂല്യങ്ങളാണ് ത്രിശങ്കുവിലായത്. 2016 ജനുവരി മുതൽ 2019 മാർച്ച് വരെ 39 മാസത്തെ അരിയർ തുക 1,500 കോടി വരും. ഇതിൽ 750 കോടിയാണ് കേന്ദ്രവിഹിതം.