പുതുശേരിക്കര-വാലാച്ചിറ റോഡ് തകർന്ന് യാത്രാദുരിതം : Deepika.com Nattu Visesham

KOTTAYAM

പുതുശേരിക്കര-വാലാച്ചിറ റോഡ് തകർന്ന് യാത്രാദുരിതം

Saturday, June 29, 2024 6:49 AM IST

കടുത്തുരുത്തി: പുതുശേരിക്കര- വാലാച്ചിറ റോഡു തകര്‍ന്ന് യാത്ര ദുരിതത്തില്‍. വര്‍ഷങ്ങളായി റോഡ് തകര്‍ന്ന് കിടക്കുകയാണെന്ന് നാട്ടുകാര്‍. രണ്ട് പതിറ്റാണ്ടിനിടെ റോഡില്‍ അറ്റകുറ്റ പണികള്‍ നടത്തിയതല്ലാതെ മുഴുവനായി ടാറിംഗ് നടത്തിയിട്ടില്ലെന്നും ആക്ഷേപമുണ്ട്. ആയാംകുടി ഹൈസ്‌കൂളിന് സമീപത്തുനിന്ന് ആരംഭിച്ചു പുതുശേരിക്കരകൂടി വാലാച്ചിറ റെയില്‍വേ ഗേറ്റിന് സമീപമെത്തുന്ന പിഡബ്യുഡി റോഡാണ് തകര്‍ന്ന് തരിപ്പണമായി കിടക്കുന്നത്.

ഇതേ റോഡില്‍ വാലാച്ചിറ ഗേറ്റ് മുതല്‍ സെന്‍റ് ക്രൂസ് എല്‍പി സ്‌കൂളിന് സമീപം വരെ കഴിഞ്ഞവര്‍ഷം ടാറിംഗ് നടത്തിയിരുന്നു. മുമ്പ് പഞ്ചായത്ത് റോഡായിരുന്നത് പിന്നീട് വാലാച്ചിറ എഫ്സി കോണ്‍വെന്‍റിന് സമീപത്തായി പാലവും ഇതുവഴി റോഡും വന്നതോടെ ഈ റോഡ് പിഡബ്യുഡി ഏറ്റെടുക്കുകയായിരുന്നു. അതോടെ റോഡിന്‍റെ കാലക്കേടും ആരംഭിച്ചു.

പണ്ടൊക്കെ റോഡിലെ കുഴിയടയ്ക്കലെങ്കിലും നടത്തിയിരുന്നതായി നാട്ടുകാര്‍ പറയുന്നു. പിന്നീട് അതും നിലച്ചു. എഴുമാന്തുരുത്ത്, ആപ്പുഴ പ്രദേശത്തുള്ളവര്‍ക്ക് മുട്ടുചിറ ആശുപത്രിയില്‍ ഉള്‍പ്പെടെ എത്തണമെങ്കില്‍ ആയാംകുടി കപ്പേള, ആദിത്യപുരം വഴിയെക്കാള്‍ എളുപ്പത്തില്‍ ഇതുവഴിയെത്താമായിരുന്നു.

കല്ലറ പഞ്ചായത്തിലേക്കു കുടിവെള്ള വിതരണത്തിനായി കഴിഞ്ഞവര്‍ഷം പൈപ്പിട്ടതോടെയാണ് റോഡ് കൂടുതല്‍ തകര്‍ച്ചയിലായത്. അതോടെ റോഡ് പരിപൂര്‍ണമായി ഗതാഗതത്തിന് പറ്റാതായി. റോഡ് കുത്തിപ്പോളിച്ചതുമായി ബന്ധപ്പെട്ട് വാട്ടര്‍ അഥോറിറ്റി, പിഡബ്യൂഡിയിലേക്ക് അടയ്ക്കാനുള്ള തുക അടച്ചാല്‍ റോഡിന്‍റെ നിര്‍മാണ പ്രവര്‍ത്തനങ്ങള്‍ വേഗത്തിലാകുമെന്നുമാണ് ജനപ്രതിനിധികള്‍ പറയുന്നത്.