ചിങ്ങവനം: ജില്ലാ പഞ്ചായത്ത് കുറിച്ചി ഡിവിഷനിൽ വിവിധ പദ്ധതികൾക്ക് 1.47 കോടിയുടെ അംഗീകാരം. ആരോഗ്യം, വിദ്യാഭ്യാസം, വെളിച്ചം, റോഡ്, സാംസ്കാരിക മേഖലകളിലാണ് ഫണ്ടുകൾ വിനിയോഗിക്കുന്നതെന്ന് ജില്ലാ പഞ്ചായത്തംഗം പി.കെ. വൈശാഖ് അറിയിച്ചു.
കുറിച്ചി ഗവ. ഹയർ സെക്കൻഡറി സ്കൂൾ നവീകരണത്തിന് 20 ലക്ഷം, ചിങ്ങവനം എൻഎസ്എസ് ഹയർസെക്കൻഡറി സ്കൂൾ ആധുനിക ടോയ്ലറ്റ് ബ്ലോക്കിന് 10 ലക്ഷം രൂപ അനുവദിച്ചു.
പനച്ചിക്കാട് മലമേൽക്കാവ്-പുളിമൂട്-കല്ലുങ്കൽ കടവ് റോഡിന് 15 ലക്ഷം, കുറിച്ചി ചിറവുമുട്ടം-മലകുന്നം റോഡിന് 20 ലക്ഷം രൂപയും നീക്കിവച്ചു.
പനച്ചിക്കാട് കുടുംബാരോഗ്യ കേന്ദ്രത്തിൽ ജനറേറ്റർ വാങ്ങുന്നതിന് ഏഴ് ലക്ഷം, കുറിച്ചി ഹോമിയോ മെഡിക്കൽ കോളജിൽ ഫിസിയോ തെറാപ്പി യൂണിറ്റ് സ്ഥാപിക്കാൻ അഞ്ച് ലക്ഷവും അനുവദിച്ചു.
കേളൻകവല, സ്വാമികവല, ചിറവുമുട്ടം, കുഴിമറ്റം, മാളികക്കടവ്, ഓട്ടകാഞ്ഞിരം, ചോഴിയക്കാട്, കണിയാമല, സായിപ്പുകവല, പടിയിക്കടവ്, പൂവൻ തുരുത്ത് പ്ലാമൂട്, കടുവാക്കുളം, പാറയ്ക്കൽക്കടവ്, കണ്ണംകുളം തുടങ്ങിയ സ്ഥലങ്ങളിൽ മിനി മാസ്റ്റ് ലൈറ്റുകൾ സ്ഥാപിക്കാൻ 22 ലക്ഷം രൂപയും എസ്സി കോളനികളിൽ വഴിവിളക്കുകൾ സ്ഥാപിക്കുന്നതിന് 30 ലക്ഷം രൂപയും അനുവദിച്ചു.
പുന്നയ്ക്കൽ പബ്ലിക് ലൈബ്രറിക്കു പുതിയ കെട്ടിടം നിർമിക്കാൻ 18 ലക്ഷം രൂപയും അനുവദിച്ചു. 1.47 കോടിയുടെ ടെൻഡർ നടപടികൾക്ക് അംഗീകാരം നേടിയ പ്രൊജക്ടുകൾ മാർച്ചിനു മുൻപ് പൂർത്തിയാക്കും.
നിലവിൽ അംഗീകാരം ലഭിച്ച് പണികൾ നടക്കുന്ന ദിവാൻ കവല-കാലായിക്കവല റോഡ്, മലവേടർ കോളനി കുടിവെള്ള പദ്ധതി, എവിഎച്ച്എസ്എസ് സ്കൂൾ മഴവെള്ള സംഭരണി, ഇത്തിത്താനം ഹയർസെക്കൻഡറി സ്കൂൾ ഷീ ടോയ്ലറ്റ് തുടങ്ങിയ നിർമാണങ്ങളും മാർച്ചിനു മുൻപ് പൂർത്തീകരിക്കുമെന്ന് ജില്ലാ പഞ്ചായത്ത് അംഗം പി.കെ. വൈശാഖ് പറഞ്ഞു.