ADVERTISEMENT

ADVERTISEMENT

ലിയോ തേര്‍ട്ടീന്ത് ബാസ്‌കറ്റ്‌ബോള്‍ കോര്‍ട്ട് ഉദ്ഘാടനം ചെയ്തു

ആലപ്പുഴ: ലിയോ തേര്‍ട്ടീന്ത് ഹയര്‍ സെക്കന്‍ഡറി സ്‌കൂളിലെ നവീകരിച്ച ബാസ്‌കറ്റ്‌ബോള്‍ കോര്‍ട്ട് ആലപ്പുഴ ബിഷപ് ഡോ. ജയിംസ് റാഫേല്‍ ആനാപറമ്പില്‍ ഉദ്ഘാടനം ചെയ്തു. ഉദ്ഘാടന സമ്മേളനത്തില്‍ സ്‌കൂള്‍ മാനേജര്‍ ഫാ. ഫ്രാന്‍സിസ് കൊടിയനാട് അധ്യക്ഷത വഹിച്ചു. ബീഡ് ചെയര്‍മാനും കോര്‍പറേറ്റ് മാനേജരുമായ ഫാ. നെല്‍സണ്‍ തൈപ്പറമ്പില്‍ മുഖ്യപ്രഭാഷണം നടത്തി.

കെബിഎ പ്രസിഡന്‍റ് ജേക്കബ് ജോസഫ്, എഡിബിഎ പ്രസിഡന്‍റ് റോണി മാത്യു, പിആര്‍ഒ തോമസ് മത്തായി കരിക്കംപള്ളില്‍, കേരള വ്യാപാരി വ്യവസായി ഏകോപനസമിതി ജില്ലാ ട്രഷറര്‍ ജേക്കബ് ജോണ്‍, പ്രിന്‍സിപ്പാള്‍ പി.ജെ. യേശുദാസ്, ഹെഡ് മാസ്റ്റര്‍ മാനുവല്‍ ജോസ്, മുന്‍ ഹെഡ്മിസ്ട്രസ് ഡാനി നെറ്റോ, പിഇഡി ഇജിന്‍ പി.ബി., പിടിഎ പ്രസിഡന്‍റ് എ.ടി. അനില്‍ ആന്‍റണി, ബാസ്‌കറ്റ് ബോള്‍ പരിശീലകരായ ഷഹബാസ്, നരേഷ് തുടങ്ങിയവര്‍ പങ്കെടുത്തു.

ADVERTISEMENT

മെഡി. കോളജ് ആശുപത്രിയിൽ കാസ്പ് ഓഫീസ് പ്രവർത്തനം താളംതെറ്റുന്നു

അമ്പലപ്പുഴ: ആലപ്പുഴ മെഡിക്കൽ കോളജ് ആശുപത്രിയിൽ കാസ്പ് ഓഫീസ് പ്രവർത്തനം താളം തെറ്റുന്നു. നാഥനില്ലാക്കളരിയായി കാസ്പ് ഓഫീസ് മാറുന്നുവെന്ന് ആക്ഷേപം. സൂപ്രണ്ടിനും അക്കൗണ്ട് ഓഫീസർക്കും ജില്ലാ കളക്ടറുടെ താക്കീത്. ഇവിടത്തെ കരാർ ജീവനക്കാരിയുടെ വീഴ്ച മൂലം സ്വകാര്യ ലാബിനും മറ്റ് സ്ഥാപനങ്ങൾക്കും ലഭിക്കേണ്ട കോടികൾ ലഭിക്കാതെ വന്നതോടെ ആശുപത്രി വികസന സമിതി ചെയർമാൻ കൂടിയായ ജില്ലാ കളക്ടർക്ക് പരാതി ലഭിച്ചിരുന്നു. തുടർന്ന് കഴിഞ്ഞദിവസം കളക്‌ടറേറ്റിൽ വിളിച്ചുവരുത്തിയാണ് ഇരുവർക്കും കളക്ടർ താക്കീത് നൽകിയത്. എന്നാൽ, ജോലിയിൽ വീഴ്ചവരുത്തിയ കരാർ ജീവനക്കാരിക്ക് കാരണം കാണിക്കൽ നോട്ടീസ് നൽകാൻ പോലും അധികൃതർ തയാറായിട്ടില്ല. കാസ്പ് പദ്ധതി പ്രകാരമുള്ള വിവരങ്ങൾ കൃത്യമായി സൂക്ഷിക്കാൻ ഡേറ്റാ എൻട്രി ഓപ്പറേറ്ററായ ജീവനക്കാരി തയാറാകാതെ വന്നതോടെയാണ് വിവിധ സ്ഥാപനങ്ങൾക്ക് ലഭിക്കേണ്ട കോടികൾ നഷ്ടമായത്. കൃത്യമായി ഇതിന്‍റെ രജിസ്റ്ററും സൂക്ഷിച്ചിരുന്നില്ല. ഇവയ്ക്കെല്ലാം മേൽനോട്ടം വഹിക്കേണ്ട എൻഎച്ച്എം. പിആർഒയുടെ ഭാഗത്തുനിന്നു ഗുരുതര വീഴ്ചയുണ്ടായിട്ടുണ്ട്. കഴിഞ്ഞ ഏതാനും നാളായി ഇവിടത്തെ കരാർ ജീവനക്കാരാണ് കാസ്പ് ഓഫീസ് പ്രവർത്തനം നടത്തുന്നത്. ജോലിയിൽ ഗുരുതര ക്രമക്കേട് കാട്ടിയ മറ്റൊരു കരാർ ജീവനക്കാരിയെ ഏതാനും നാൾ മുൻപ് ജോലിയിൽനിന്ന് പിരിച്ചുവിട്ടിരുന്നു. കാരണം കാണിക്കൽ നോട്ടീസ് നൽകിയ ശേഷം മറുപടി തൃപ്തികരമല്ലാതെ വന്നതോടെയാണ് ഈ ജീവനക്കാരിയെ പിരിച്ചു വിട്ടത്. സൂപ്രണ്ട് ഉൾപ്പെടെയുള്ള അധികാരികൾ ഇക്കാര്യങ്ങളിൽ ഗുരുതര വീഴ്ചയാണ് കാട്ടുന്നതെന്നും ആക്ഷേപം.

ഇലിപ്പക്കുളത്ത് വീട് കുത്തിത്തുറന്ന് കവർച്ച: അന്വേഷണം ഊർജിതമാക്കി

കായംകുളം: വള്ളികുന്നം ഇലിപ്പക്കുളത്ത് വീട് കുത്തിത്തുറന്ന് സ്വർണാഭരണങ്ങൾ കവർന്ന സംഭവത്തിൽ സിസിടിവികൾ കേന്ദ്രീകരിച്ച് പോലീസ് അന്വേഷണം ഊർജിതമാക്കി. ഇലിപ്പക്കുളം കിണറുമുക്ക് വടക്കേ ജംഗ്‌ഷനു സമീപം ഹരിനിവാസിൽ രാജമോഹനന്‍റെ വീട്ടിലാണ് കഴിഞ്ഞദിവസം മോഷണം നടന്നത്. നാലേമുക്കാൽ പവൻ സ്വർണാഭരണങ്ങളും പണവുമാണ് കവർന്നത്. ഭാര്യ ശ്രീലതയുടെ ചികിത്സയ്ക്കായി രാജമോഹൻ മകൻ ശ്രീജിത്ത് മോഹനനെയും കൂട്ടി കഴിഞ്ഞ ദിവസം രാവിലെ ആറരയോടെ കരുനാഗപ്പള്ളിയിലെ സ്വകാര്യ ആശുപത്രിയിൽ പോയിരുന്നു . വീടിന്‍റെ മുൻവശത്തെ ലൈറ്റ് രാത്രിയിൽ കത്തിക്കുന്നതിനും രാവിലെ അണയ്ക്കുന്നതിനും അയൽവാസിയെ ചുമതലപ്പെടുത്തിയിരുന്നു. ചൊവ്വാഴ്ച രാവിലെ ലൈറ്റണയ്ക്കുന്നതിന് അയൽവാസി എത്തിയപ്പോൾ മുൻവശത്തെ കതക് ചാരിയിട്ട നിലയിലായിരുന്നു. അയൽവാസി വിവരമറിയിച്ചതനുസരിച്ച് രാജമോഹനന്‍റെ ബന്ധുക്കളെത്തി നടത്തിയ പരിശോധനയിലാണ് മോഷണം നടന്നതറിയുന്നത്. സംഭവമറിഞ്ഞ്, ഭാര്യയ്ക്കൊപ്പം ആശുപത്രിയിലായിരുന്ന രാജമോഹനനും വീട്ടിൽ മടങ്ങിയെത്തി. വീടിന്‍റെ മുൻവാതിൽ കുത്തിപ്പൊളിച്ചാണ് മോഷ്ടാക്കൾ അകത്തുകയറിയത്. കിടപ്പുമുറിയിലെ അലമാര കുത്തിത്തുറന്നാണ് മൂന്നേമുക്കാൽ പവന്‍റെ നെക്ലസ്, ഒരുപവന്‍റെ വള, ബാഗിലുണ്ടായിരുന്ന പണം എന്നിവ കവർന്നത്. വിവാഹക്ഷണക്കത്തിന്‍റെ കവറിലിട്ട് അലമാരയിൽ വച്ചിരുന്ന രണ്ടുപവന്‍റെ താലിമാല മോഷ്ടാക്കളുടെ ശ്രദ്ധയിൽപ്പെടാത്തതിനാൽ അത് മോഷണം പോയില്ല. താഴത്തെയും മുകളിലത്തെയും നിലകളിലെ നാലു കിടപ്പുമുറികളുടെയും കതകുകൾ കുത്തിത്തുറക്കുകയും അലമാരകളിലെ വസ്ത്രങ്ങൾ അടക്കമുള്ളവ വാരിവലിച്ച് താഴെയിട്ട നിലയിലുമാണ്. വള്ളികുന്നം പോലീസാണ് കേസെടുത്ത് അന്വേഷണം നടത്തുന്നത്. സമീപപ്രദേശങ്ങളിലെ വീടുകളിലെയും വ്യാപാരസ്ഥാപനങ്ങളിലെയും സിസിടിവി കാമറ ദൃശ്യങ്ങൾ പോലീസ് ശേഖരിച്ചുവരികയാണ്.

എക്‌സല്‍ ഗ്ലാസസ് ഫാക്ടറി ഓർമയിലേക്ക്

കലവൂര്‍: എക്‌സല്‍ ഗ്ലാസസ് ഫാക്ടറിയുടെ അവസാന ശേഷിപ്പും പൊളിച്ചു തുടങ്ങി. കോടികളുടെ സാമ്പത്തിക ബാധ്യതയെ തുടര്‍ന്ന് 2012ലാണ് 550 തൊഴിലാളികളുണ്ടായിരുന്ന എക്‌സല്‍ ഗ്ലാസസ് ലിമിറ്റഡ് അടച്ചുപൂട്ടിയത്. ദേശീയപാതയോരത്ത് പാതിരപ്പള്ളിയില്‍ സ്ഥിതി ചെയ്തിരുന്ന ഫാക്ടറി കെട്ടിടം വര്‍ഷങ്ങളായി വെറുതേ കിടന്നു നശിക്കുകയായിരുന്നു. തുടര്‍ന്നു നാലു വര്‍ഷം മുന്‍പ് ഫാക്ടറി കെട്ടിടം പൊളിച്ചിരുന്നു. എന്നാല്‍, മെഷനറികളും മറ്റും സൂക്ഷിക്കാനായി ഒരു കെട്ടിടം നിലനിര്‍ത്തിയിരുന്നു. ആ കെട്ടിടമാണ് ഇന്നലെ പൊളിക്കാന്‍ ആരംഭിച്ചത്. ഇതിനിടെ ഫാക്ടറി സര്‍ക്കാര്‍ ഏറ്റെടുക്കുമെന്നു പ്രഖ്യാപനങ്ങള്‍ ഉണ്ടായെങ്കിലും ഒന്നും നടപ്പായില്ല. ഒടുവില്‍ സ്ഥാപനം പൂട്ടി വര്‍ഷങ്ങള്‍ കഴിഞ്ഞിട്ടും ലഭിക്കാനുള്ള ആനുകൂല്യങ്ങള്‍ കിട്ടാന്‍ തൊഴിലാളികള്‍ കോടതി കയറിയിറങ്ങേണ്ട സ്ഥിതിയായി. തുടര്‍ന്നാണ് നാഷനല്‍ കമ്പനി ലോ ട്രൈബ്യൂണല്‍ ഇടപെട്ട് കമ്പനിയുടെ വസ്തുവകകള്‍ വിറ്റു ബാധ്യതകള്‍ തീര്‍ക്കാന്‍ ലിക്വിഡേറ്ററെ നിയമിച്ചു. പൂട്ടുന്ന സമയത്തുണ്ടായിരുന്ന കമ്പനിയിലെ സ്റ്റോക്ക് ഉള്‍പ്പെടെ ലേലം ചെയ്‌തെങ്കിലും ചില സാങ്കേതിക കാരണങ്ങളാല്‍ 17 ഏക്കര്‍ വരുന്ന ഭൂമി ലേലം ചെയ്യാന്‍ സാധിച്ചിരുന്നില്ല. അര്‍ഹമായ ആനുകൂല്യം ലഭിക്കണമെന്നാവശ്യപ്പെട്ട് ഒരു വിഭാഗം തൊഴിലാളികള്‍ ഇപ്പോഴും കേസ് നടത്തുന്നുണ്ട്. എന്നാല്‍, അടുത്തിടെ ഭൂമിയും ലേലത്തില്‍ വിറ്റു. ഇതോടെയാണ് നിലവില്‍ ഇവിടെയുണ്ടായിരുന്ന പഴയ കെട്ടിടം പൊളിക്കാന്‍ തുടങ്ങിയത്. മുംബൈ ആസ്ഥാനമായ സൊമാനി ഗ്രൂപ്പിന്‍റെ ഉടമസ്ഥതയിലായിരുന്നു സ്ഥാപനം. ഭൂമി വിറ്റു പോയിട്ടും തൊഴിലാളികള്‍ക്ക് ലഭിക്കേണ്ട ആനുകൂല്യങ്ങള്‍ പൂര്‍ണമായി ലഭിച്ചിട്ടില്ല.

തദ്ദേശ സ്വയംഭരണ സ്ഥാപനങ്ങളെ സിപിഎമ്മിന്‍റെ ഏജൻസിയാക്കി മാറ്റാൻ ശ്രമിക്കുന്നു: അറിവഴകൻ

കായംകുളം: തദ്ദേശസ്വയംഭരണ സ്ഥാപനങ്ങളെ സിപിഎമ്മിന്‍റെ ഏജന്‍സിയാക്കി മാറ്റാന്‍ നടത്തുന്ന ശ്രമങ്ങള്‍ പഞ്ചായത്തുകളുടെയും നഗരസഭകളുടെയും താളം തെറ്റിച്ചിരിക്കുകയാണെന്ന് എഐസിസി സെക്രട്ടറി ഡോ. വി.കെ. അറിവഴകന്‍ പറഞ്ഞു. തദ്ദേശസ്വയംഭരണ തെരഞ്ഞെടുപ്പിന്‍റെ മുന്നൊരുക്കങ്ങള്‍ക്കായി കെപിസിസി മിഷന്‍ 2025ന്‍റെ ഭാഗമായി കോണ്‍ഗ്രസ് കായംകുളം നിയോജകമണ്ഡലം ഏകദിന ക്യാമ്പ് ഉദ്ഘാടനം ചെയ്യുകയായിരുന്നു അദ്ദേഹം. നോര്‍ത്ത് ബ്ലോക്ക് കോണ്‍ഗ്രസ് പ്രസിഡന്‍റ് ടി. സൈനുലാബ്ദീന്‍ അധ്യക്ഷത വഹിച്ചു. ഡിസിസി പ്രസിഡന്‍റ് ബി. ബാബു പ്രസാദ്, കെപിസിസി ജനറല്‍ സെക്രട്ടറി അഡ്വ. കെ.പി. ശ്രീകുമാര്‍, കെപിസിസി സെക്രട്ടറിമാരായ കറ്റാനം ഷാജി, എന്‍. രവി, എ. ത്രിവിക്രമന്‍തമ്പി, സൗത്ത് ബ്ലോക്ക് പ്രസിഡന്‍റ് ചിറപ്പുറത്ത് മുരളി, ഡിസിസി ഭാരവാഹികളായ എ.ജെ. ഷാജഹാന്‍, വേലഞ്ചിറ സുകുമാരന്‍, എ.പി. ഷാജഹാന്‍, രാജന്‍ ചെങ്കിളി, അലക്‌സ് മാത്യു, അവിനാഷ് ഗംഗന്‍, കെ. പുഷ്പദാസ്, ശ്രീജിത്ത് പത്തിയൂര്‍, എസ്. രാജേന്ദ്രന്‍ എന്നിവര്‍ പ്രസംഗിച്ചു.

വി.എം. ജോയിയുടെ ഒന്നാം ചരമവാർഷികം ആചരിച്ചു

ചേർത്തല: കേരള കോൺഗ്രസ് സംസ്ഥാന സ്റ്റിയറിംഗ് കമ്മിറ്റി അംഗം, ചേർത്തല കാർഡ് ബാങ്ക് ഡയറക്ടർ ബോർഡംഗം എന്നീ നിലകളിൽ പ്രവർത്തിച്ചിരുന്ന വി.എം. ജോയിയുടെ ഒന്നാം ചരമവാർഷികം ആചരിച്ചു. കേരള കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ നടത്തിയ അനുസ്മരണ സമ്മേളനം കേരള കോൺഗ്രസ് എക്സിക്യൂട്ടീവ് ചെയർമാൻ മോൻസ് ജോസഫ് എംഎൽഎ ഉദ്ഘാടനം ചെയ്തു. കേരള കോൺഗ്രസ് ഉന്നതാധികാരസമിതി അംഗം സിറിയക് കാവിൽ അധ്യക്ഷത വഹിച്ചു. യുഡിഎഫ് ജില്ലാ ചെയർമാൻ സി.കെ. ഷാജിമോഹൻ മുഖ്യപ്രഭാഷണം നടത്തി. ഐസക് മാടവന, കെ.സി. ആന്‍റണി, എം.ഇ. കുഞ്ഞ് മുഹമ്മദ് , വി.ടി. ജോസഫ്, കെ.എസ്. സലിം, തമ്പി ചക്കുങ്കൽ, ആർ. ശശിധരൻ, കെ.ജെ. എബിമോൻ, ജോയി കൊച്ചുതറ, ജോസ് കുന്നുമ്മേൽപറമ്പിൽ, തോമസ് വടക്കേക്കരി, തോമസ് വേലിക്കകം, തോമസ് പേരേമഠം, പങ്കജാക്ഷൻ, ചാൾസ് ജോസഫ്, ബെന്നി പാലയ്ക്കൽ, ഉണ്ണികൃഷ്ണൻ എന്നിവർ പ്രസംഗിച്ചു.

ആചാരപ്പെരുമയിൽ ഇന്ന് ഏവൂർ സംക്രമ വള്ളംകളി

കായംകുളം: ഏവൂര്‍ ശ്രീകൃഷ്ണസ്വാമി ക്ഷേത്രവുമായി ബന്ധപ്പെട്ട കര്‍ക്കടക സംക്രമ വള്ളംകളി ഇന്നു നടക്കും. ക്ഷേത്രത്തിലെ വിഗ്രഹപ്രതിഷ്ഠയുമായി ബന്ധപ്പെട്ട് ഉച്ചകഴിഞ്ഞ് മൂന്നോടെ ക്ഷേത്രത്തിന് കിഴക്കുള്ള ഏവൂര്‍ പുഞ്ചയിലാണ് വള്ളംകളി നടക്കുന്നത്. ക്ഷേത്രത്തിലെ മൂന്നു കരകളായ ഏവൂര്‍ വടക്ക്, ഏവൂര്‍ വടക്ക്-പടിഞ്ഞാറ്, ഏവൂര്‍ തെക്ക് എന്നീ കരകളാണ് ചടങ്ങുകള്‍ക്ക് നേതൃത്വം നല്‍കുന്നത്. മൂന്നു കരകളെ പ്രതിനിധീകരിച്ച് മൂന്നു വള്ളങ്ങളാണുണ്ടാകുക. ആചാരം നിലനിർത്തി മത്സരമില്ലാതെയാണ് വള്ളംകളി നടക്കുക. രാവിലെ കരക്കാര്‍ ക്ഷേത്രത്തിലെത്തി വഴിപാടുകള്‍ നടത്തും. തുടര്‍ന്ന് ശ്രീകോവിലില്‍നിന്ന് പൂജിച്ചു നല്‍കുന്ന പൂമാലയുമായി വള്ളക്കടവിലെത്തി മാല വള്ളത്തില്‍ ചാര്‍ത്തും. തുടര്‍ന്ന് വഞ്ചിപ്പാട്ടിന്‍റെ അകമ്പടിയോടെ വള്ളത്തില്‍ പത്തിയൂര്‍ ദേവീക്ഷേത്രത്തിലെത്തി ദര്‍ശനം നടത്തിയ ശേഷം ഏവൂരില്‍ തിരികെയെത്തും. വള്ളത്തില്‍ കണ്ണമംഗലം ക്ഷേത്രത്തിലേക്കുള്ള ഘോഷയാത്ര നടക്കും. കിഴക്ക് കണ്ണമംഗലത്തെ ശ്രീനാരായണപുരം മഹാവിഷ്ണു ക്ഷേത്രത്തിലേക്ക് പാട്ടുപാടി തുഴഞ്ഞു നീങ്ങുന്നതാണ് പതിവ്. ആചാരത്തിന് പ്രാധാന്യം നൽകിയുള്ള ഈ യാത്രയെ കണ്ണമംഗലം ദേശക്കാർ ഭക്തിപൂർവം സ്വീകരിക്കുന്നു. തുടർന്നാണ് മടക്കയാത്ര. ഏവൂർ ആറാട്ട് കൊട്ടാരത്തിൽ നിന്നുള്ള ഉരുളിച്ച വരവും ഉണ്ടായിരിക്കും. കരക്കാര്‍ മടങ്ങിയെത്തിയശേഷം സന്ധ്യക്ക് ക്ഷേത്രത്തിലെ ശ്രീഭൂതനാഥ സന്നിധിയില്‍ നടക്കുന്ന കരിക്കേറോടെ ചടങ്ങുകള്‍ സമാപിക്കും. ഏവൂർ ക്ഷേത്രവുമായി ബന്ധപ്പെട്ട മൂന്നു കരകളിലെ വീടുകളിൽനിന്ന് ഭക്തർ സമർപ്പിക്കുന്ന കരിക്കും നാളികേരവുമാണ് ഇതിനുപയോഗിക്കുന്നത്. ഉച്ചയ്ക്ക് 12ന് വഴിപാട് വള്ളസദ്യ നടക്കും.

വെട്ടിയാറിൽ സ്വകാര്യബസും കാറും കൂട്ടിയിടിച്ച് നിരവധി പേർക്കു പരിക്ക്

മാങ്കാംകുഴി: സ്വകാര്യബസും കാറും കൂട്ടിയിടിച്ചുണ്ടായ അപകടത്തിൽ നിരവധിപ്പേർക്കു പരിക്ക്. കാറോടിച്ച വെട്ടിയാർ നാലുമുക്ക് സ്വദേശി അൻവറി(ദിലീപ് -47)നും സ്വകാര്യബസിലെ യാത്രക്കാർക്കുമാണ് പരിക്കേറ്റത്. ഇവരെ ഇടപ്പോൺ ജോസ്കോ ആശുപത്രിയിൽ പ്രവേശിപ്പിച്ചു. ഇന്നലെ വൈകുന്നേരം ആറോടെ പന്തളം - മാവേലിക്കര റോഡിൽ വെട്ടിയാർ ആയുർവേദ ആശുപത്രിക്കു സമീപമായിരുന്നു അപകടം. ബസിന്‍റെ മുൻ വശത്തേക്ക് കാർ ഇടിച്ചുകയറി. ഇടിയുടെ ആഘാതത്തിൽ കാർ പൂർണമായി തകർന്നു. കുറത്തികാട് പോലീസ് മേൽ നടപടികൾ സ്വീകരിച്ചു.

ആലപ്പുഴ മെഡിക്കൽ കോളജ് ആശുപത്രിയിൽ പത്തുമണിക്കൂർ നീണ്ട ശസ്ത്രക്രിയ നടത്തി

ആലപ്പുഴ: ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ച രോഗിക്ക് പത്തുമണിക്കൂർ നീണ്ട ശസ്ത്രക്രിയ നടത്തി ഡോക്ടർമാർ. കാർത്തികപ്പള്ളി പുത്തൻ മണ്ണേൽ രണദേവി(66)നെയാണ് അത്യപൂർവ ശസ്ത്രക്രിയയിലൂടെ പുതുജീവതത്തിലേക്ക് തിരികെയെത്തിച്ചത്. പത്തുമണിക്കൂർ നീണ്ടുനിന്നതും ഹൃദയം മാറ്റിവയ്ക്കൽ ശസ്ത്രക്രീയയേക്കാൾ അതീവ സങ്കീർണമായതുമായ ശസ്ത്രക്രിയയ്ക്ക് സംസ്ഥാന സർക്കാരിന്‍റെ ആരോഗ്യസംരക്ഷണ പദ്ധതിയിൽ മൂന്നു ലക്ഷം രൂപ മാത്രമാണ് ചെലവുവന്നത്. ശബ്ദ വ്യത്യാസത്തെത്തുടർന്നാണ് രണദേവ് ഇഎൻടി ഒപി യിലെത്തിയത്. വിശദ പരിശോധനയുടെ ഭാഗമായി നെഞ്ചിന്‍റെ സിടി സ്കാനിൽ ഹൃദയത്തിൽനിന്നു ശുദ്ധരക്തം വഹിച്ചു ശരീരഭാഗങ്ങളിലേക്ക് എത്തിക്കുന്ന മഹാധമനിയിൽനിന്നും തലച്ചോറിലേക്കുള്ള രക്തം വഹിക്കുന്ന രക്തധമനിക്ക് സമീപത്ത് വീക്കം (അയോർട്ടിക് ആർച്ച് അന്യൂറിസം) കണ്ടെത്തി. ലക്ഷത്തിൽ ഒരാൾക്കു മാത്രം വരുന്ന രോഗവാസ്ഥ കണ്ടെത്തിയ ഡോക്ടർമാർ രണദേവിനെ സൂപ്പർ സ്പെഷ്യാലിറ്റിയിലെ ഹൃദയശസ്ത്രക്രിയാ വിഭാഗത്തിലേക്ക് മേയ് 12ന് മാറ്റി. തുടർന്ന് ജൂൺ 30ന് ശസ്ത്രക്രീയ നടത്തി. ഇതിനാവശ്യമായ വിലയേറിയ ഉപകരണങ്ങൾ സംസ്ഥാന സർക്കാരിന്‍റെ ആരോഗ്യ സുരക്ഷാ പദ്ധതി(കാസ്പ്)യിൽ ഉൾപ്പെടുത്തിയപ്പോൾ, സ്വകാര്യ ആശുപത്രികളിൽ 15 ലക്ഷം രൂപ ചെലവുവരുന്ന ശസ്ത്രക്രിയ, രോഗിയിൽനിന്ന് മൂന്നു ലക്ഷം രൂപ മാത്രം ചെലവിൽ ഒതുക്കാനുമായി. ശസ്ത്രക്രിയയെ തുടർന്ന് 48 മണിക്കൂർ വെന്‍റിലേറ്ററിൽ തീവ്ര പരിചരണ വിഭാഗത്തിൽ കഴിഞ്ഞ രോഗിയെ പൂർണബോധം തിരിച്ചുകിട്ടിയ ശേഷം വെന്‍റിലേറ്ററിൽനിന്നു മാറ്റി അഞ്ചു ദിവസം നീണ്ട തീവ്ര പരിചരണത്തിനുശേഷം രണദേവ് പൂർണ ആരോഗ്യവാനായി ആശുപത്രി വിട്ടു. ഹൃദയ ശസ്ത്രക്രിയാ വിഭാഗം മേധാവി ഡോ. വി. സുരേഷ് കുമാർ, അസോസിയേറ്റ് പ്രഫസർമാരായ ഡോ. കെ.ടി. ബിജു, ഡോ. ആനന്ദക്കുട്ടൻ, അസി. പ്രഫ. ഡോ. കൊച്ചുകൃഷ്ണൻ, അനസ്തേഷ്യാ വിഭാഗം മേധാവി ഡോ. വീണ, ആശുപത്രി സൂപ്രണ്ടും അസോസിയേഷൻ പ്രഫസറുമായ ഡോ. എ. ഹരികുമാർ, അസി. പ്രഫ. ഡോ. ബിട്ടു തുടങ്ങിയവർ ശസ്ത്രക്രിയയിൽ പങ്കെടുത്തു.

പഴവങ്ങാടി പള്ളിൽ കർമല മാതാവിന്‍റെ തിരുനാൾ

ആലപ്പുഴ: മാർ സ്ലീവാ ഫൊറോന പള്ളിയിലെ പരിശുദ്ധ കർമല മാതാവിന്‍റെ തിരുനാളിന് വികാരി ഫാ. മാത്യു നടമുഖം കൊടിയേറ്റി. 16 മുതൽ 21 വരെയാണ് തിരുനാൾ ദിനങ്ങൾ. ഇന്നു രാവിലെ 6.15ന് സപ്രാ, ഇലക്തോരന്മാരുടെ വാഴ്ച, പരിശുദ്ധ കുർബാന-ഫാ. മാത്യു നടമുഖത്ത്. വൈകുന്നേരം 4.45ന് ജപമാല, നൊവേന, പരിശുദ്ധ കുർബാന-ഫാ. ജയിംസ് കണികുന്നേൽ. 18ന് രാവിലെ 6.15ന് സപ്ര, പരിശുദ്ധ കുർബാന-ഫാ. യോഹന്നാൻ കട്ടത്തറ. വൈകുന്നേരം 4.45ന് ജപമാല, നൊവേന, പരിശുദ്ധ കുർബാന-ഫാ. ഫിലിപ്പ് വൈക്കത്തുകാരൻവീട്ടിൽ. 19ന് രാവിലെ പരിശുദ്ധ കുർബാന-ഫാ. മണിലാൽ ക്രിസ്. വൈകുന്നേരം അഞ്ചിന് രൂപം വാഴ്ത്തൽ, തിരിവഞ്ചരിപ്പ്, പരിശുദ്ധ കുർബാന, സന്ദേശം-ഫാ. ജൂലിയസ് തീമ്പലങ്ങാട്ട് . മെഴുകുതിരി പ്രദക്ഷിണം -ഫാ. നവീൻ മമ്മൂട്ടില്‍, വാഴ്‌വ്, കപ്ലോൻ വികാരി വാഴ്ച, ലൈറ്റ് ആൻഡ് സൗണ്ട് ഷോ, ആകാശദീപക്കാഴ്ച. തിരുനാൾ ദിനമായ 20ന് രാവിലെ 6.15ന് സപ്ര, പരിശുദ്ധ കുർബാന-ഫാ. മാത്യു നടമുഖത്ത്. രാവിലെ 9 .30ന് തിരുനാൾ കുർബാന-ഫാ. ഷാജി തുമ്പേച്ചിറയിൽ. തിരുനാൾ സന്ദേശം-ഫാ. ജോസ് മുകുളേൽ, ദിവ്യകാരുണ്യ പ്രദക്ഷിണം-ഫാ. ജോസഫ് വാണിയപ്പുരയ്ക്കൽ, തിരുനാൾ പ്രദക്ഷിണം-ഫാ. തോമസ് ചൂളപ്പറമ്പിൽ സിഎംഐ. തുടർന്ന് കൊടിയിറക്ക്. 21ന് രാവിലെ സപ്ര, പരിശുദ്ധ കുർബാന-ഫാ. ജയിംസ് കുന്നിൽ. സെമിത്തേരി സന്ദർശനം, ദർശനസമൂഹ സമ്മേളനം.

സർക്കാരിന്‍റെ കരുണയിൽ വിശ്വാസമില്ല; കാരുണ്യ പദ്ധതിയുമായി റേഷൻ വ്യാപാരികൾ

മങ്കൊമ്പ്: സർക്കാരിന്‍റെ ക്ഷേമപദ്ധതികളിൽ വിശ്വാസം നഷ്ടമായതോടെ സ്വന്തം നിലയിൽ ക്ഷേമപദ്ധതികളുമായി റേഷൻ ചില്ലറ വ്യാപാരികൾ. ഓൾ കേരള റീട്ടെയിൽ റേഷൻ ഡീലേഴ്‌സ് അസോസിയേഷനാണ് വ്യാപാരികൾക്കായുള്ള കാരുണ്യ പദ്ധതിക്കു തുടക്കമിട്ടിരിക്കുന്നത്. കുട്ടനാട് താലൂക്കിൽ 126 പേർ പദ്ധതിയിൽ അംഗമായിക്കഴിഞ്ഞതായി ഭാരവാഹികൾ അറിയിച്ചു. പദ്ധതി പ്രകാരം ഓരോ അംഗവും പ്രതിവർഷം മൂവായിരം രൂപ പ്രകാരം അടയ്ക്കണം. ആദ്യഗഡുവായ തുക ഇന്നലെ വ്യാപാരികൾ അടച്ചാണ് പദ്ധതിയുടെ ഭാഗമായത്. മൂവായിരം രൂപ വീതം അഞ്ചു വർഷം അടയ്ക്കണം. ഇങ്ങനെ അടയ്ക്കുന്നവർക്ക് വൈദ്യസഹായമായി ഒരു ലക്ഷം രൂപവരെ പ്രതിവർഷം ലഭിക്കും. ഇതിനു പുറമേ മരണാനന്തര സഹായമായി മൂന്നുലക്ഷം രൂപയും അംഗങ്ങൾക്കു കൊടുക്കും. പദ്ധതിയിൽ അയ്യായിരം പേർ അംഗങ്ങളായാൽ മരണാനന്തര സഹായമായി അഞ്ചുലക്ഷം രൂപ നൽകാനാണ് ലക്ഷ്യമിടുന്നത്. എകെആർആർഡിഎ യിൽ മാത്രം എണ്ണായിരം വ്യാപാരികളാണ് അംഗങ്ങളായിട്ടുള്ളത്. വിവിധ സംഘടനകളിലായി 14,600 ചില്ലറ വ്യാപാരികളുണ്ട്. മറ്റു സംഘടനകളിലുള്ളവരും പദ്ധതിയിൽ അംഗമാകാൻ താത്പര്യം പ്രകടിപ്പിച്ചതായി ഭാരവാഹികൾ പറയുന്നു. സംസ്ഥാനത്തെ റേഷൻ വ്യാപാരികളെല്ലാം സർക്കാരിന്‍റെ ക്ഷേമനിധിയിൽ അംഗങ്ങളാണ്. പ്രതിമാസം 200 രൂപ വീതമാണ് ക്ഷേമനിധി ബോർഡിൽ അടയ് ക്കുന്നത്. തങ്ങളുടെ തന്നെ കോടിക്കണക്കിനു രൂപയാണ് ഇത്തരത്തിൽ ക്ഷേമനിധി ബോർഡിലുള്ളതെന്ന് വ്യാപാരികൾ പറയുന്നു. എന്നാൽ, യാതൊരു വിധ ആനുകൂല്യങ്ങളും ക്ഷേമനിധിയിൽനിന്നു ലഭിക്കുന്നില്ലെന്നും ഇവർ പറയുന്നു. കുട്ടികളുടെ വിദ്യാഭ്യാസ ആവശ്യങ്ങൾ, ശസ്ത്രക്രിയകൾ തുടങ്ങിയ ആവശ്യങ്ങൾക്കായി മത്സ്യത്തൊഴിലാളികളടക്കമുള്ള ഇതര വിഭാഗങ്ങൾക്കായി ക്ഷേമനിധിയിൽ നിന്ന് ആനുകൂല്യങ്ങൾ ലഭിക്കുന്നുണ്ട്. എന്നാൽ, ഇതിന്‍റെ പത്തിലൊന്നു ആനുകൂല്യങ്ങൾ പോലും റേഷൻ വ്യാപാരികൾക്കു നൽകുന്നില്ല. ഈ സാഹചര്യത്തിലാണ് കാരുണ്യ പദ്ധതിയെപ്പറ്റി ആലോചിച്ചതെന്നും വ്യാപാരികൾ പറയുന്നു.

കിടങ്ങാംപറമ്പ് വാര്‍ഡിലെ കൈയേറ്റം ഒഴിപ്പിക്കൽ നടപടികൾ തുടങ്ങി

ആലപ്പുഴ: നഗരഹൃദയത്തിലെ കിടങ്ങാംപറമ്പ് വാര്‍ഡ് കൈയേറ്റം ഒഴിപ്പിച്ച് നീര്‍ച്ചാല്‍ പുനഃസ്ഥാപിക്കുന്ന നടപടി പുനരാരംഭിച്ചു. നാട്ടുകാരെ ബോധിപ്പിക്കാന്‍ പേരിനു ചില ശ്രമം നടത്തിയതല്ലാതെ കൈയേറ്റം പൂര്‍ണമായി ഒഴിപ്പിച്ചില്ലെന്ന പരാതി വ്യാപകമായിരുന്നു. ഇതിനിടെ കുറച്ചു ദിവസത്തെ നടപടികള്‍ക്കുശേഷം പ്രവര്‍ത്തനം നിര്‍ത്തിവച്ചിരുന്നു. ഇത് ദുരുഹതയുണ്ടാക്കി. പ്രവര്‍ത്തനം നിര്‍ത്തിവച്ചതിനെതിരേ പ്രദേശവാസികള്‍ വീണ്ടും പരാതിയുമായി രംഗത്തിറങ്ങി. ഞായറാഴ്ച മുതല്‍ വീണ്ടും നടപടികള്‍ ആരംഭിച്ചു. നീര്‍ച്ചാല്‍ പുനഃസ്ഥാപിക്കുന്നതിനുവേണ്ടി 1,34,000 രൂപയാണ് നഗരസഭ വകയിരുത്തിയിരിക്കുന്നത്. ആദ്യദിനം ജെസിബി എത്തിച്ച് ചില പ്രവൃത്തികള്‍ ചെയ്തു മടങ്ങി. എന്നാല്‍, പിന്നീട് ഒന്നുമുണ്ടായില്ലെന്ന് റെസിഡന്‍റ് സ് അസോസിയേഷന്‍ പറയുന്നു. ബാഹ്യ ഇടപെടലാണ് പ്രവര്‍ത്തനങ്ങള്‍ നിര്‍ത്തിവപ്പിച്ചതെന്നാണ് വിവരം. എന്നാല്‍, കൈയേറ്റം പൂര്‍ണമായി ഒഴിപ്പിച്ചുവെന്ന തരത്തില്‍ ചില കോണുളില്‍നിന്ന് കള്ളപ്രചാരണവുമുണ്ടായി. തുടര്‍ന്നാണ് അധികാരികള്‍ക്ക് മുന്നില്‍ പരാതിയുമായി പ്രദേശവാസികള്‍ വീണ്ടുമെത്തിയത്. കൈയേറ്റക്കാര്‍ ഒരു പ്രദേശവാസിയുടെ മതില്‍ അനുമതിയില്ലാതെ ഷീറ്റ് അടിച്ച് കേടുപാടുവരുത്തിയിരുന്നു. മതില്‍ ഇപ്പോള്‍ വീഴാറായ അവസ്ഥയിലാണ്. ഈ സംഭവത്തില്‍ പോലീസ് നടപടി പുരോഗമിക്കുകയാണ്. സ്ഥലം എംഎല്‍എയെ മാസങ്ങള്‍ക്കുമുമ്പേ നാട്ടുകാര്‍ പ്രശ്‌നം അറിയിച്ചിരുന്നതാണ്. പ്രദേശത്ത് മഴ ശക്തമായാല്‍ വെള്ളക്കെട്ട് രൂക്ഷമായി വീടുകളില്‍വരെ വെള്ളം കയറും.

മാവേലിക്കരയിലെ പൊതുശ്മശാനം എരിയുന്നു

മാവേലിക്കര: വാതക ശ്മശാനം പണിമുടക്കിയതുമായി ബന്ധപ്പെട്ട് ഉയര്‍ന്ന ആരോപണങ്ങള്‍ ചര്‍ച്ച ചെയ്യാന്‍ ചേര്‍ന്ന നഗരസഭിയില്‍ ഇന്നലെ കൂടിയ അടിയന്തര നഗരസഭ കൗണ്‍സില്‍ യോഗത്തില്‍ നാടകീയരംഗങ്ങള്‍. അടിയന്തര കൗണ്‍സിലില്‍ കോണ്‍ഗ്രസ് കൗണ്‍സിലര്‍ അനി വര്‍ഗീസാണ് ശ്മശാനം വിഷയം ഉന്നയിച്ചത്. ഭൂരഹിതരുടെയും പരിമിത ഭൂമിയുള്ളവരുടെയും പൊതുശ്മശാനം വേണമെന്ന പതിറ്റാണ്ടുകളുടെ ആവശ്യത്തെത്തുടര്‍ന്നാണ് രണ്ടു പതിറ്റാണ്ട് മുന്‍പ് മാവേലിക്കരയില്‍ വാതക ശ്മശാനം സ്ഥാപിച്ചത്. എന്നാല്‍, എട്ടു മൃതദേഹങ്ങള്‍ മാത്രമാണ് ഈ ശ്മശാനത്തില്‍ സംസ്‌കരിക്കാനായത്. തുടര്‍ന്ന് ശ്മശാനം പ്രവര്‍ത്തന രഹിതമാവുകയായിരുന്നു. വൈദ്യുതിബന്ധം ഇടക്ക് മുടങ്ങുന്നതായിരുന്നു ശ്മശാനത്തിന്‍റെ പ്രവര്‍ത്തനത്തെ ബാധിച്ചത്. മൃതദേഹങ്ങള്‍ സംസ്‌കരിക്കുമ്പോള്‍ വൈദ്യുതി ലഭിക്കാതെയാകുകയും പകുതി കരിഞ്ഞവ പുറത്തേക്ക് എടുത്ത് കത്തിക്കേണ്ട അവസ്ഥ വരെ ഉണ്ടായി. ഇങ്ങനെ പ്രവര്‍ത്തനം നിലച്ച ശ്മശാനം പിന്നീട് നഗരസഭ ജനറേറ്റര്‍ സ്ഥാപിച്ച് വീണ്ടും തുറന്നു. എന്നാല്‍, അധികകാലം പ്രവര്‍ത്തനം മുന്നോട്ടു പോയില്ല. പുകക്കുഴലായിരുന്നു അടുത്ത വില്ലന്‍. പുകക്കുഴലില്‍നിന്ന് പുക പുറത്തേക്കു പോകാതെ ചൂള പ്രവര്‍ത്തിക്കുന്ന മുറിയില്‍ തങ്ങിനിറഞ്ഞു തുടങ്ങിയതോടെ വീണ്ടും പ്രവര്‍ത്തനം നിശ്ചലമായി. ഭൂരഹിതര്‍ തങ്ങളുടെ ഉറ്റവരുടെ മൃതദേഹം സംസ്‌കരിക്കാനായി അന്യനാടുകളിലേക്കുവരെ കൊണ്ടുപോകേണ്ട അവസ്ഥ സംജാതമായതിനെത്തുടര്‍ന്ന് ദീപികയടക്കമുള്ള മാധ്യമങ്ങള്‍ ഇക്കാര്യം നഗരസഭയുടെ മുന്നിലെത്തിക്കുകയായിരുന്നു. തുടര്‍ന്നു നടന്ന ചര്‍ച്ചയിലാണ് വൈകാരികവും നാടകീയവുമായ രംഗങ്ങള്‍ ഉണ്ടായത്. നഗരസഭയ്ക്കു തൊട്ടുമുന്നില്‍ തന്‍റെ വാര്‍ഡില്‍ സ്വന്തമായി സ്ഥലമില്ലാതിരുന്ന വയോധികനുണ്ടായ ദുരവസ്ഥ ചൂണ്ടാക്കാട്ടിക്കൊണ്ടായിരുന്നു വിഷയം ഉന്നയിച്ചത്. മരണത്തോട് മല്ലടിച്ചു കിടന്നപ്പോള്‍ അയാളുടെ ഭാര്യ തന്നെ വിവരം അറിയിച്ചതും മെയ് ആദ്യവാരം നടന്ന കൗണ്‍സില്‍ വിഷയം ഉന്നയിച്ചതാണെങ്കിലും ഒരു നടപടിയും നഗരസഭ സ്വീകരിച്ചില്ലെന്നു കൗണ്‍സിലര്‍ കുറ്റപ്പെടുത്തി. പിന്നീട് അദ്ദേഹം മരിച്ചപ്പോള്‍ തിരുവല്ലയില്‍ കൊണ്ടുപോയി സംസ്‌കാരം നടത്തേണ്ടിവന്നതുമായ കാര്യങ്ങള്‍ ചൂണ്ടിക്കാട്ടിയാണ് അനി വര്‍ഗീസ് വിഷയം ഉന്നയിച്ചത്. ശ്മശാനം സജ്ജമാക്കാന്‍ നഗരസഭയില്‍ പണമില്ലായെങ്കില്‍ താന്‍ പോര്‍ട്ടബിള്‍ ഫര്‍ണറിനായുള്ള തുക സ്വന്തം കയ്യില‍നിന്ന് നഗരസഭയില്‍ ഇന്ന് അടയ്ക്കാന്‍ തയാറെന്നും അനി വര്‍ഗീസ് പറഞ്ഞു. ഇതിനു പിന്നാലെ കൗണ്‍സിലില്‍ ഡയസിലിരുന്ന വൈസ് ചെയര്‍പേഴ്സണ്‍ കൃഷ്ണ കുമാരി പൊടുന്നനെ എഴുന്നേക്കുകയും ഇനിയൊരു ഭൂരഹിതന്‍ മരിച്ചാല്‍ നഗരസഭ ഓഫീസിനു മുന്‍പില്‍ മൃതദേഹവുമായി വന്ന് സമരം ചെയ്യാന്‍ തയാറാകുമെന്ന് പറഞ്ഞു. ഇതോടെ കൗണ്‍സില്‍ ഒന്നടങ്കം ശ്മശാനവുമായി ബന്ധപ്പെട്ട ഫയല്‍ ചര്‍ച്ചയ്‌ക്കെടുക്കണമെന്ന് ആവശ്യപ്പെട്ടു. തുടര്‍ന്ന് ഫയല്‍ എടുത്തപ്പോള്‍ നഗരസഭയുടെ ശ്മശാനം നവീകരണത്തിനും തുടര്‍ന്ന് പ്രവര്‍ത്തിപ്പിക്കുന്നതിനുമായി പത്തു ലക്ഷം രൂപ അനുവദിച്ചതായി 23-5-2025ല്‍ ജില്ലാ ആസൂത്രണ സമിതിയുടെ കുറിപ്പും 29-05-2025ല്‍ കൗണ്‍സിലിന്‍റെ അഡ്മിനിസ്ട്രേറ്റീവ് അനുമതി ലഭിച്ചതിന്‍റെ രേഖയും ചര്‍ച്ചയ്‌ക്കെടുത്തു. എന്നാല്‍, ഈ രണ്ടു കാര്യങ്ങള്‍ പൂര്‍ത്തിയായിട്ടും നഗരസഭ തുടര്‍നടപടി കൈക്കൊണ്ടിരുന്നില്ല. കൗണ്‍സിലിന് ഇനിയൊരു ടെണ്ടര്‍ വിളിച്ച് ചെയ്യാനുള്ള സമയമില്ലാത്തതിനാല്‍ ശ്മശാനത്തിന്‍റെ നവീകരണം കണ്ണൂര്‍ റീജണല്‍ അഗ്രോ ഇന്‍ഡസ്ട്രിയല്‍ ഡവലപ്മെന്‍റ് കോ-ഓപ്പറേറ്റീവ് കേരള ലിമിറ്റഡിന് കൈമാറാനും തീരുമാനം ഉണ്ടായിരുന്നതും നഗരസഭ നടപ്പാക്കിയില്ല. ഇതിനെത്തുടർന്ന് പ്രക്ഷുബന്ധമായ സഭയില്‍ നിര്‍വഹണ ഉദ്യാഗസ്തരുടെ വീഴ്ചയെ ഭരണ പ്രതിപക്ഷ ഭേദമെന്യേ കൗണ്‍സിലര്‍മാര്‍ വിമര്‍ശിച്ചു. സെക്രട്ടറിയുടെ അഭാവത്തില്‍ സഭയിലെത്തേണ്ട മുനിസിപ്പല്‍ എന്‍ജിനിയര്‍ ഓഫീസില്‍ എത്തിച്ചേര്‍ന്നില്ലെന്ന പരാമര്‍ശവും ചില കൗണ്‍സിലര്‍മാരുടെ ഭാഗത്തു നിന്നുണ്ടായി. അനുമതികളെല്ലാമായ ശ്മശാനത്തിന്‍റെ പണി അടിയന്തരമായി ഏജന്‍സിയെ ഏല്‍പ്പിച്ച് ശ്മശാനം പ്രവര്‍ത്തന സജ്ജമാക്കണമെന്ന് കൗണ്‍സിലില്‍ ഏകകണ്ഠമായി ആവശ്യപ്പെട്ടു. ഈ തീരുമാനം ഉടന്‍തന്നെ നടപ്പാക്കുമെന്ന് ചെയര്‍മാനും കൗണ്‍സിലില്‍ അറിയിച്ചു. പുതിയ ചെയര്‍മാന്‍ അധികാരത്തില്‍ വന്നതിന് ശേഷം പ്രധാന വിഷയമായി ശ്മശാനത്തിന്റെ കാര്യം കൗണ്‍സിലില്‍ ഉന്നയിച്ചിരുന്നു. അപ്പോള്‍ത്തന്നെ നടപടി എടുക്കാമെന്ന് ചെയര്‍മാന്‍ ഉറപ്പ് നല്‍കിയതുമാണ്. ഇതിന്റെ അടിസ്ഥാനത്തില്‍ ഡിപിസിയുടെയും കൗണ്‍സിലിന്റെയും അംഗീകാരം നേടിയെടുക്കാനും ചെയര്‍മാന്‍ തയാറായി. തുടര്‍നടപടികള്‍ കൗണ്‍സിലിനെ അറിയിക്കാതിരുന്നത് ഉദ്യോഗസ്ഥ വീഴ്ചയാണ്. ചെയര്‍മാന്‍ കൃതയമായി നടപടികള്‍ സ്വീകരിച്ചത് സ്വാഗതാര്‍ഹമാണ്. അനി വര്‍ഗീസ് കൗണ്‍സിലര്‍, ബ്ലോക്ക് കോണ്‍ഗ്രസ് പ്രസിഡന്‍റ് നഗരസഭ ഭരണസമിതിക്ക് വിഷയത്തില്‍ കാര്യ നിര്‍വഹണത്തില്‍ വീഴ്ച പറ്റി. കോറം നാളുകളായി വിഷയം ഉന്നയിച്ചുകൊണ്ടിരിക്കയാണ്. അഡ്മിനിസ്ട്രേറ്റീവ് അനുമതിയും ജില്ലാ ആസൂത്രണ വകുപ്പിന്റെ അനുമതിയും ലഭിച്ച ശ്മശാന നവീകരണം വൈകിയതിന് കാരണക്കാര്‍ ആരെന്ന് കണ്ടെത്തി അടിയന്തിര നടപടി സ്വീകരിക്കണമെന്നും ശ്മശാനം പൂര്‍ത്തായാക്കുന്നതുവരെ സംസ്‌കാരത്തിനായി താത്കാലിക സംവിധാനം ഉണ്ടാക്കണം. കെ.പി. വിദ്യാധരന്‍ ഉണ്ണിത്താന്‍ കോറം പ്രസിഡന്‍റ്, മുന്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍ കഴിഞ്ഞ നാലേമുക്കാല്‍ വര്‍ഷമായി തികച്ചും പരാജയമാണ് യുഡിഎഫ് ഭരണസമിതി എന്ന് അവര്‍ തെളിയിച്ചു. കഴിഞ്ഞ ഭരണ സമിതി ആരംഭിച്ചു പൂര്‍ത്തിയാക്കി, അവാര്‍ഡുകള്‍ നഗരസഭ വാരിക്കൂട്ടിയ മാലിന്യ മുക്ത പദ്ധതിപോലും നശിപ്പിച്ചു. പുതിയ പദ്ധതി കൊണ്ടുവരുവാനോ നിലവിലുള്ളത് നിലനിര്‍ത്താനോ ഇവര്‍ക്ക് സാധിക്കില്ലായെന്ന് ഇതിലടെ പൊതുജനത്തിന് വ്യക്തമാകും. കഴിഞ്ഞ ഭരണ സമിതിയുടെ ഒരു പ്രധാന പദ്ധതിയായിരുന്നു ശ്മശാനം അതു കൃത്യമായ നടത്തിക്കൊണ്ടു പോകാനും അവര്‍ക്കായില്ല. ലീലാ അഭിലാഷ് കൗണ്‍സിലര്‍, മുന്‍ ചെയര്‍പേഴ്സണ്‍

ചെങ്ങന്നൂർ നൂറ്റവൻപാറ നിവാസികൾ കുടിയിറക്ക് ഭീഷണിയിൽ

ചെങ്ങന്നൂർ: പുലിയൂർ പഞ്ചായത്തിലെ നാലാം വാർഡിൽ സ്ഥിതി ചെയ്യുന്ന നൂറ്റവൻപാറ പ്രദേശത്ത് നൂറ്റാണ്ടുകളായി താമസിച്ചുവരുന്ന നൂറിലേറെ കുടുംബങ്ങൾ കുടിയിറക്ക് ഭീഷണിയിൽ. ഈ പ്രദേശത്തെ ടൂറിസ്റ്റ് കേന്ദ്രമാക്കാനുള്ള സർക്കാർ നീക്കത്തിനെതിരേ ശക്തമായ പ്രതിഷേധമാണ് ഉയരുന്നത്. ആത്മ ബോധോദയ സംഘം ശ്രീശുഭാനന്ദ വിശ്രമാശ്രമം ട്രസ്റ്റ്, പ്രദേശത്തെ വിവിധ സാമുദായിക സംഘടനകളുടെ ശാഖായോഗങ്ങൾ തുടങ്ങിയവയുടെ സംയുക്തയോഗമാണ് ഈ വിഷയത്തിൽ പ്രതിഷേധവുമായി രംഗത്തെത്തിയിട്ടുള്ളത്. നൂറ്റാണ്ടുകളായി തങ്ങളുടെ തലമുറകൾ കൈവശാവകാശത്തിലും ഉടമസ്ഥതയിലും അധിവസിച്ചുവരുന്ന ഈ ഭൂമിയിൽനിന്ന് കുടിയിറക്കുന്നത് തങ്ങളുടെ ഭൂവുടമാവകാശവും വീടുകളടക്കമുള്ള സ്വത്തും സമ്പാദ്യവും ഇല്ലാതാക്കി വഴിയാധാരമാക്കുമെന്നും അതിനാൽ സർക്കാരും ടൂറിസം വകുപ്പും ഈ തീരുമാനം പുനഃപരിശോധിക്കണമെന്നും പ്രദേശവാസികൾ ഉൾപ്പെട്ട കർമസമിതി ആവശ്യപ്പെട്ടു. ചെങ്ങന്നൂർ താലൂക്കിൽ പുലിയൂർ വില്ലേജിൽപ്പെട്ട പഴയ സർവേ പ്രകാരം 44/1 (റീസർവേ 392/34) ഉൾപ്പെട്ട നൂറ്റവൻപാറയും സമീപ പ്രദേശം ഏകദേശം 7 ഏക്കർ 64 സെന്‍റ് ഭൂമിയാണ് ടൂറിസം പദ്ധതിക്കായി സർക്കാർ നിർദേശിച്ചിരിക്കുന്നത്. പാറക്കെട്ടുകൾ നിറഞ്ഞ ഈ പ്രദേശം രാജഭരണകാലത്ത് പട്ടികജാതി കുടുംബങ്ങൾക്കായി പതിച്ചു നൽകിയിട്ടുള്ളതാണ്. കൂടാതെ, നൂറ്റവൻപാറ കേന്ദ്രീകരിച്ച് പ്രാഥമിക വിദ്യാഭ്യാസത്തിനും സമൂഹ ആരാധനയ്ക്കും സാംസ്കാരിക പ്രവർത്തനങ്ങൾക്കുമായി മറ്റ് അനുബന്ധ സ്ഥാപനങ്ങൾക്കും അനുമതി ലഭിച്ചിരുന്നു. എന്നാൽ, ഈ സ്കൂളിന്‍റെ പ്രവർത്തനം പിൽക്കാലത്ത് നിലച്ചുപോവുകയും അതിന്‍റെ സ്ഥാനത്ത് നാനാജാതി മതസ്ഥരുടെയും ആത്മീയ കേന്ദ്രമായി ശ്രീശുഭാനന്ദ വിശ്രമാശ്രമവും അനുബന്ധ സ്ഥാപനങ്ങളും 110 വർഷമായി പ്രവർത്തിച്ചുവരികയുമാണ്. ആത്മീയകേന്ദ്രം എന്നതിലുപരി, കുട്ടികളുടെ വിവാഹച്ചടങ്ങുകൾ, വിദ്യാരംഭം, നൂലുകെട്ട് തുടങ്ങിയ കാര്യങ്ങൾക്കും ശുഭാനന്ദാശ്രമ സങ്കേതം പ്രയോജനപ്പെടുത്തിവരുന്നുണ്ട്. എല്ലാ വർഷവും മേടമാസത്തിൽ 10 ദിവസം നീണ്ടുനിൽക്കുന്ന പൂരം ജന്മനക്ഷത്ര മഹോത്സവവും മറ്റ് വിവിധ ആട്ടവിശേഷങ്ങളും മുടങ്ങാതെ ഇവിടെ നടത്താറുണ്ട്. നാനാജാതി മതസ്ഥരുടെ സഹകരണത്തോടെ നടത്തുന്ന ഈ ആഘോഷങ്ങൾ മതമൈത്രിയുടെ മകുടോദാഹരണമായി കണക്കാക്കപ്പെടുന്നു. നിലവിൽ ജീർണാവവസ്ഥയിലായ ശുഭാനന്ദാശ്രമ മന്ദിരത്തിന്‍റെ പുനർനിർമാണം ഭക്തജനങ്ങളുടെയും പൊതുജനങ്ങളുടെയും സഹകരണത്തോടെ അവസാനഘട്ടത്തിലണ്. ഇങ്ങനെയുള്ള ഒരു ഭൂപ്രദേശത്തുനിന്ന് താമസക്കാരെ പൊടുന്നനെ ഒഴിപ്പിക്കുകയും കാലങ്ങളായി അവർ അനുഭവിച്ചുവരുന്ന സ്വാതന്ത്ര്യാവകാശങ്ങൾ നിഷേധിക്കുകയും ചെയ്ത് ടൂറിസ്റ്റ് കേന്ദ്രമാക്കാനുള്ള സർക്കാർ തീരുമാനം പുനഃപരിശോധിക്കണമെന്നും അല്ലാത്തപക്ഷം ജനാധിപത്യ രീതിയിലുള്ള ശക്തമായ സമരപരിപാടികളിലൂടെ ഇതിനെ നേരിടുമെന്നും കർമസമിതി അറിയിച്ചു. സംസ്ഥാന മുഖ്യമന്ത്രി, ടൂറിസം മന്ത്രി, സ്ഥലം എംഎൽഎ തുടങ്ങിയ അധികാരികൾക്ക് നിവേദനം നൽകിയിട്ടുണ്ടെന്നും ശുഭാനന്ദ വിശ്രമാശ്രമം, ചെയർമാനും മഠാധിപതിയുമായ സ്വാമി ബ്രഹ്മചൈതന്യ, വൈസ് ചെയർമാൻമാരായ എം.എൻ. ചന്ദ്രൻ, എൻ. നാരായണൻ, കൺവീനർ റോയി മാത്യു, ജോയിന്‍റ് കൺവീനേഴ്‌സ് എം.സി. സുരേഷ്, ഓമന അച്യുതൻ, കമലാ ശിവൻ, ട്രഷറർ സൂസൻ കല്ലുഴത്തിൽ എന്നിവർ പറഞ്ഞു.

മൗണ്ട് കാര്‍മല്‍ കത്തീഡ്രലിൽ 200-ാമത്തെ തിരുനാൾ

ആലപ്പുഴ: ഔവര്‍ ലേഡി ഓഫ് മൗണ്ട് കാര്‍മല്‍ കത്തീഡ്രലിൽ 200-ാമത്തെ തിരുനാൾ ആഘോഷങ്ങൾക്കു ഇന്നു കൊടിയേറും. ലത്തീന്‍ പള്ളി എന്ന അപരനാമധേയത്തിലും ദേവാലയം അറിയപ്പെടുന്നു. ആലപ്പുഴ പട്ടണത്തിന്‍റെ ചരിത്രവുമായി ദേവാലയം ഏറെ ബന്ധപ്പെട്ടു കിടക്കുന്നു. വിശ്വാസികളുടെ സഹായത്തോടെയും പ്രൊപ്പഗന്ത മിഷന്‍റെ ആഭിമുഖ്യത്തിലും തിരുവിതാംകൂര്‍ മഹാരാജാവിന്‍റെ അനുമതിയോടെ 1809 ജൂണ്‍ 8ന് മലബാറിലെ വികാര്‍ അപ്പോസ്തലിക്കായ ബിഷപ് റവ.ഡോ. റൈമണ്ട് തിരുമേനിയാണ് ദേവാലയത്തിന്‍റെ ശിലാസ്ഥാപനം നടത്തിയത്. തുടർന്ന് വ്യത്യസ്ത കാലയളവിലെ പുനർനിർമാണങ്ങൾ നടന്നു. 1926ല്‍ സി.പി. സേവ്യര്‍ ഇംഗ്ലണ്ടില്‍നിന്നു വരുത്തി സംഭാവന ചെയ്ത കുരിശിന്‍റെ വഴി ചിത്രങ്ങളും എ.ടി. ജോണ്‍ വരച്ച അന്ത്യത്താഴം, ജപമാലരഹസ്യ ചിത്രങ്ങളും, ചമ്പക്കുളം ചാക്കോ രൂപകല്‍പ്പന ചെയ്ത മനോഹരമായ കുരിശുരൂപവും ദേവാലയത്തെ ആകര്‍ഷകമാക്കുന്നു. 1952ല്‍ പന്ത്രണ്ടാം പീയൂസ് പാപ്പ, ഈ ദേവാലയം കത്തീഡ്രല്‍ പദവിയിലേക്ക് ഉയര്‍ത്തി. കത്തീഡ്രല്‍ ദേവാലയം 1995ല്‍ നിപതിക്കാനിടയായി. പുനര്‍നിര്‍മിച്ച കത്തീഡ്രല്‍ ദേവാലയം 1999 ഫെബ്രുവരി രണ്ടിന് വത്തിക്കാനിലെ പൗരസ്ത്യതിരുസംഘം അധ്യക്ഷന്‍ അത്യുന്നത കര്‍ദിനാള്‍ ലൂര്‍ദ് സ്വാമി ആശീര്‍വദിച്ചു. വിശുദ്ധ മദര്‍ തെരേസയുടെ സന്ദര്‍ശനത്താല്‍ പുണ്യപാദസ്പര്‍ശമേറ്റ കത്തീഡ്രലില്‍ ഒട്ടേറെ കര്‍ദിനാള്‍മാരും മെത്രാപ്പോലീത്തമാരും വിശിഷ്ട വ്യക്തികളും സന്ദര്‍ശിച്ചിട്ടുണ്ട്. എല്ലാ വര്‍ഷവും ജൂലൈ മാസത്തിലാണ് തിരുനാള്‍ ആചരിച്ചുപോരുന്നത്. ഇന്ന് വൈകിട്ട് അഞ്ചിന് പ്രസുദേന്തിമാരുടെ വാഴ്ചയും തിരുനാൾ കൊടി ഉയർത്തലും ഫാ. ഫ്രാൻസിസ് കൊടിയനാട് നിർവഹിക്കും. ഫാ. ജൂഡ് ജോസഫ് കൊണ്ടപ്പശേരിയുടെ നേതൃത്വത്തിൽ വിശുദ്ധ കുർബാനയും ഫാ. യേശുദാസ് പഴമ്പള്ളി വചനപ്രഘോഷണവും നടത്തും. നാളെ വൈകിട്ട് 5.30ന് ജപമാല, പ്രസംഗം-മോൺ. ജോയ് പുത്തൻവീട്ടിൽ, വചനപ്രഘോഷണം ഫാ. രഞ്ജിത്ത് മഠത്തിൽക്കണ്ടത്തിൽ. 18ന് വൈകിട്ട് 5.30ന് ജപമാല, വാഴ്ച, ലിറ്റനി, ദിവ്യബലി-ഫാ. സ്റ്റാൻലി പുളിമൂട്ടുപറമ്പിൽ. വചനപ്രഘോഷണം-ഫാ. ജോൺസൺ തൗണ്ടയിൽ.19ന് വൈകിട്ട് 5.30ന് ജപമാല, വേസ്പര, ദിവ്യബലി, പ്രദക്ഷിണം. മുഖ്യകാർമികൻ മോൺ. ഷൈജു പര്യാത്തുശേരി. വചനപ്രഘോഷണം - ഫാ. സെബാസ്റ്റ്യൻ വലിയവീട്ടിൽ. 20ന് രാവിലെ ഏഴിന് 9ന് ദിവ്യബലി. വൈകുന്നേരം 4.30ന് ആലപ്പഴ ബിഷപ് ഡോ. ജയിംസ് ആനാപറമ്പിലിന്‍റെ മുഖ്യകാർമികത്വത്തിൽ ദിവ്യബലി, തിരുനാൾ പ്രദക്ഷിണം, പരിശുദ്ധ കുർബാനയുടെ ആശീർവാദം. 27നാണ് എട്ടാമിടം.

പുലിമുട്ട് നിർമാണം രണ്ടു ദിവസത്തിനുള്ളിൽ പുനരാരംഭിക്കും

അമ്പലപ്പുഴ: പുലിമുട്ട് നിർമാണം രണ്ട് ദിവസത്തിനുള്ളിൽ പുനരാരംഭിക്കും. അമ്പലപ്പുഴ മണ്ഡലത്തിൽ കാക്കാഴം നീർക്കുന്നം ഭാഗത്ത് നിർത്തിവച്ചിരുന്ന പുലിമുട്ട് നിർമാണം രണ്ട് ദിവസത്തിനുള്ളിൽ പുനരാരംഭിക്കുവാൻ ഇറിഗേഷൻ മന്ത്രി റോഷി അഗസ്റ്റിന്‍റെ അധ്യക്ഷതയിൽ ചേർന്ന യോഗം തീരുമാനിച്ചു. ടെട്രാപോഡ് ഉപയോഗിച്ചുള്ള പുലിമുട്ട് നിർമാണത്തിന്‍റെ രണ്ടാം ഘട്ടം മേയ് മാസത്തോടെയാണ് ആരംഭിച്ചത്. ഫേസ് രണ്ടിൽ 60 കോടി രൂപ ചെലവിൽ കാക്കാഴം- നീർക്കുന്നം തീരത്താണ് പുലിമുട്ട് നിർമിക്കുന്നത്. 70 കോടി രൂപ ചെലവിൽ കോമനമുതൽ കാക്കാഴം വരെയും വണ്ടാനം പുന്നപ്ര ഭാഗത്തുമായി 30 പുലിമുട്ടുകളും 40 മീറ്റർ കടൽ ഭിത്തിയും ഒന്നാം ഘട്ടത്തിൽ പൂർത്തിയാക്കിയിരുന്നു. രണ്ടാം ഘട്ടത്തിൽ 1.8 കിലോമീറ്റർ നീളത്തിൽ 19 പുലിമുട്ടുകളാണ് ഇപ്പോൾ പൂർത്തിയാക്കുന്നത്. ഒന്നര വർഷം മുമ്പ് കിഫ്ബിയിൽനിന്ന് പണം അനുവദിച്ച് ടെൻഡർ നടപടികൾ പൂർത്തിയായെങ്കിലും കടലിലെ ആഴത്തിൽ വന്ന വ്യത്യാസവും പാറയുടെ ലഭ്യതക്കുറവും വിലയിൽ വന്ന വ്യത്യാസവും നിർമാണത്തിന് തടസമായി. നിരവധി സാങ്കേതിക പ്രശ്നങ്ങളും പുലിമുട്ടുകളുടെ നിർമാണത്തിന് തടസമായി. തുടർന്ന് എച്ച്. സലാം എംഎൽഎ യുടെ കത്തിന്‍റെ അടിസ്ഥാനത്തിൽ കിഫ്ബിയിലും മന്ത്രിതലത്തിലും പലതവണ യോഗം ചേർന്നു. മൂന്ന് വകുപ്പുകളുടെയും സെക്രട്ടറിതല യോഗവും ചേർന്നു. തുടർന്ന് കോന്നി മെഡിക്കൽ കോളജ് സ്ഥലത്ത് സൂക്ഷിച്ചിരുന്ന പാറക്കല്ലുകൾ എടുക്കുന്നതിന് സർക്കാർ തീരുമാനിച്ചു. ഇറിഗേഷൻ, റവന്യൂ, ആരോഗ്യ വകുപ്പുകൾ സംയുക്ത യോഗം ചേർന്ന് കൈക്കൊണ്ട നിർദേശം സർക്കാർ അംഗീകരിച്ച് ഉത്തരവാകുകയും ചെയ്തു. കല്ല് എത്തിക്കുന്നതിനുള്ള സാങ്കേതിക നടപടികളെല്ലാം പൂർത്തിയാക്കിയതിനെ തുടർന്ന് പാറക്കല്ലുകൾ എത്തിച്ച് നിർമാണം കഴിഞ്ഞ മാസം ആരംഭിച്ചെങ്കിലും കാലവർഷത്തിലെ നിർമാണ നിരോധനം പറഞ്ഞുകൊണ്ട് നിർവഹണ ഏജൻസിയായ കിഡ്ക് നിർമാണം നിർത്തിവയ്ക്കുകയായിരുന്നു. നിരന്തരം കടലാക്രമണത്തിൽ വീടുകൾ നഷ്ടപ്പെടുന്ന ഇവിടത്തെ അടിയന്തര സാഹചര്യം ചൂണ്ടിക്കാട്ടി എംഎൽഎ മന്ത്രിക്ക് കത്ത് നൽകിയതിനെത്തുടർന്ന് മന്ത്രിയുടെ ചേംബറിൽ അടിയന്തര യോഗം വിളിക്കുകയായിരുന്നു. യോഗത്തിൽ എച്ച്. സലാം എംഎൽഎ, കിഡ്ക്ക് ചീഫ് എക്സിക്യൂട്ടീവ് ഓഫീസർ എസ്. തിലകൻ, ചീഫ് എൻജിനിയർ പ്രകാശ് ഇടിക്കുള, ജനറൽ മാനേജർ കെ.എസ്. ശോഭ, ഡെപ്യൂട്ടി ജനറൽ മാനേജർ ഹൺ ബാബു എന്നിവർ പങ്കെടുത്തു.

എംഡിഎംഎയും കഞ്ചാവുമായി യുവാക്കള്‍ പിടിയില്‍

മാവേലിക്കര: എംഡിഎംഎയും കഞ്ചാവുമായി യുവാക്കള്‍ പിടിയില്‍. പത്തിയൂര്‍ എരുവ പോക്കാട്ട് പറമ്പില്‍ അജ്മല്‍ (22), എരുവ വലിയവീട്ടില്‍ വിഷ്ണു (21) എന്നിവരാണ് പിടിയിലായത്. ചെട്ടികുളങ്ങര ചന്തയ്ക്കു സമീപം തിങ്കളാഴ്ച വൈകുന്നേരത്തോടെയാണ് എക്‌സൈസിന്‍റെ വലയിലാകുന്നത്. മാസങ്ങളായി ഇവര്‍ എക്‌സൈസ് സംഘത്തിന്‍റെ നിരീക്ഷണത്തിലായിരുന്നു. 0.713 ഗ്രാം എംഡിഎംഎ, 2.1 ഗ്രാം കഞ്ചാവ്, ഇവര്‍ സഞ്ചരിച്ചിരുന്ന കെടിഎം ഡ്യൂക്ക് ബൈക്ക് എന്നിവ പിടിച്ചെടുത്തിട്ടുണ്ട്. റേഞ്ച് എക്‌സൈസ് ഇന്‍സ്‌പെക്ടര്‍ പി.എസ്. കൃഷ്ണരാജ്, എക്‌സൈസ് ഇന്‍സ്‌പെക്ടര്‍ അന്‍വര്‍, പ്രിവന്‍റീവ് ഓഫീസര്‍ ജി. ജയകൃഷ്ണന്‍, സിവില്‍ എക്‌സൈസ് ഓഫീസര്‍മാരായ ശ്യാം, ഷിതിന്‍, പ്രതീഷ്, ഷഹീന്‍ എന്നിവരടങ്ങുന്ന സംഘമാണ് പ്രതികളെ പിടികൂടിയത്.

സംസ്ഥാനപാതയിലെ കുഴികള്‍ അപകടക്കെണിയാകുന്നു

എടത്വ: എടത്വ-തകഴി സംസ്ഥാന പാതയിലെ കുഴികള്‍ അപകടക്കെണിയാകുന്നു. ജല അഥോറിറ്റിയുടെ അനാസ്ഥയെത്തുടര്‍ന്നാണ് കുഴി രൂപപ്പെട്ടത്. കുഴിയില്‍ ചെടിവച്ച് അപായ മുന്നറിയിപ്പ് നല്‍കിയിരിക്കുകയാണ് നാട്ടുകാര്‍. കോടികള്‍ മുടക്കി നിര്‍മിച്ച് പരിപാലനച്ചുമതല കഴിഞ്ഞതോടെ എടത്വ-തകഴി സംസ്ഥാനപാതയില്‍ പലസ്ഥലങ്ങളിലായി കുഴികള്‍ രൂപപ്പെട്ടു. കേളമംഗലം ജംഗ്ഷൻ, ചെക്കിടിക്കാട് പറത്തറ പാലം, ചെക്കിടിക്കാട് മില്‍മ ജംഗ്ഷന് കിഴക്കുവശം, പച്ച സ്‌കൂളിനു സമീപം, കോഴിമുക്ക് പമ്പ് ഹൗസിന് മുന്‍വശം, എടത്വ പാലം തുടങ്ങി നിരവധി സ്ഥലങ്ങളിലാണ് കുഴിയുള്ളത്. ഇരുചക്രവാഹനങ്ങള്‍, ഓട്ടോ എന്നിവ കുഴിയില്‍ വീണ് നിയന്ത്രണം വിടുന്നത് പതിവാണ്. രാത്രിയില്‍ വരുന്ന ചെറുവാഹനങ്ങള്‍ കുഴി കാണാതെ അപകടത്തില്‍പ്പെടുന്നതായി പരാതിയുണ്ട്. പച്ച സ്‌കൂളിനു സമീപത്ത് ഒരുവര്‍ഷമായി കുഴി രൂപപ്പെട്ടു കിടക്കുകയാണ്. നഴ്‌സറി സ്‌കൂള്‍ കുട്ടികള്‍ മുതല്‍ പ്ലസ് ടു വിദ്യാര്‍ഥികള്‍ വരെ കടന്നുപോകുന്ന പാതയിലാണ് അപകടക്ക െണിയായി കുഴിയുള്ളത്. വാഹനങ്ങള്‍ നിയന്ത്രണം വിട്ടാല്‍ വന്‍ അപകടത്തിന് സാധ്യതയുണ്ട്. 2025 ജനുവരി 31 ഓടെ സംസ്ഥാന പാതയുടെ പരിപാലന ചുമതല അവസാനിച്ചിരുന്നു. പിന്നീടുള്ള പരിപാലനം പിഡബ്ല്യുഡി ഏറ്റെടുക്കേണ്ടതാണ്. ഒട്ടുമിക്ക കുഴികളും ജലഅഥോറിറ്റിയുടെ പൈപ്പ് ലൈന്‍ ചോര്‍ന്നാണ് രൂപപ്പെട്ടത്. പൈപ്പ്‌ലൈന്‍ പൊട്ടി വെള്ളം ചോര്‍ന്ന ഭാഗങ്ങള്‍ പുനര്‍നിര്‍മിക്കാന്‍ ജല അഥോറിറ്റിയോ നിര്‍ദേശം നല്‍കാന്‍ പിഡബ്ല്യുഡി ഉദ്യോഗസ്ഥരോ തയാറാകുന്നില്ല. മഴ ശക്തി പ്രാപിച്ചതോടെ കുഴിയുടെ വ്യാപ്തിയും കൂടി. ചോര്‍ച്ചയുള്ള ഭാഗത്തുകൂടി ആയിരക്കണക്കിന് ലിറ്റര്‍ വെള്ളമാണ് പാഴാകുന്നത്.

മാന്നാറിൽ സിഐമാർ തമ്മിൽതല്ലി

മാന്നാർ: പോലീസ് ഇൻസ്പെകടർമാർ മാന്നാറിൽ തമ്മിൽ തല്ലിയതായി ആക്ഷേപം. ചെങ്ങന്നൂർ ഡിവൈഎസ്പിയുടെ യാത്രയയപ്പിനിടെയാണ് ഇൻസ്പെക്ടർമാർ തമ്മിൽ വാക്കേറ്റവും കൈ യാങ്കളിയും ഉണ്ടായതത്രേ. ഡി വൈഎസ്പിയുടെ യാത്രയയപ്പുമായി ബന്ധപ്പെട്ട് നടന്ന സൽക്കാരത്തിൽ അഞ്ചു സ്റ്റേഷനുകളിലെ എസ്എച്ച്ഒമാരും സബ് ഇൻസ്പെകടർമാരും സിപിഒമാരും ഉൾപ്പെടെ 20 പോലീസ് ഉദ്യോഗസ്ഥരുമാണ് പങ്കെടുത്ത്. ചെങ്ങന്നൂർ ഡിവൈഎസ്പിയുടെ ഡിവിഷനുകിഴിലുള്ള ചെങ്ങന്നൂർ, മാന്നാർ, മാവേലിക്കര വെൺമണി, കുത്തികാട് എന്നീ പോലീസ് സ്റ്റേഷനിൽനിന്നുള്ളവരാണ് പങ്കെടുത്തത്. കഴിഞ്ഞ 10ന് രാത്രിയിൽ മാന്നാർ സ്റ്റേഷൻ ഹൗസ് ഓഫീസർ രജീഷ് കുമാർ. വാടകയ്ക്ക് താമസിക്കുന്ന വീട്ടിലാണ് സത്കാ രം നടന്നത്. സത്കാരത്തിനിടയിൽ ചെങ്ങന്നൂർ, കുറത്തിയാട് എസ് എച്ച്ഒമാർ തമ്മിൽ വാക്കേറ്റം ഉണ്ടാകുകയും തുടർന്ന് കൈയാങ്കളിയിലേക്ക് മാറുകയുമായിരുന്നു. ഇവരെ പിടിച്ചുമാറ്റാൻ ശ്രമിച്ച രണ്ട് സിപിഒമാർക്ക് ചെറിയ പരിക്കു പറ്റുകയും ചെയ്തു. സത്കാരം കഴിഞ്ഞ് കുറെ ഉദ്യോഗസ്ഥർ പോയതിനുശേഷമാണ് കയ്യാങ്കളി അരങ്ങേറിയത്. സംഭവം പുറംലോകം അറിയാതിരിക്കാൻ സ്പെഷൽ ബ്രാഞ്ച്ഉൾപ്പെടെയുള്ളവർ മൂടിവയ്ക്കുകയായിരുന്നു. എന്നാൽ, ഇന്നലെയാണ് സംഭവം എസ്പിയുടെ മുന്നിലെത്തിയത്. ഇതുമായി ബന്ധപ്പെട്ട മാന്നാർ സ്റ്റേഷൻ ഹൗസ് ഓഫീസറെ എസ്പി ഓഫിസിലേക്ക് വിളിപ്പിക്കുകയും റിപ്പോർട്ട് തേടുകയും ചെയ്തു.

മാലിന്യം തള്ളിയതായി പരാതി

മാന്നാർ: രാത്രിയുടെ മറവിൽ വ്യാപാരസ്ഥാപനത്തിനുള്ളിൽ മാലി ന്യം തള്ളി. സിസിടിവി തെളിവ് ഉൾപ്പെടെ ഉടമ പോലീസിൽ പരാതി നൽകി. മാന്നാർ കുറ്റിയിൽ മുക്കിൽ പ്രവർത്തിക്കുന്ന അമ്പാടി ബേക്കറി ആൻഡ് കഫെ എന്ന സ്ഥാപനത്തിന് മുമ്പിലും ഗേറ്റിനുള്ളിലുമാണ് മീൻ വേസ്റ്റുകളും മറ്റ് മാലിന്യങ്ങളും തള്ളിയത്. മാന്നാർ പോളയിൽ തെക്കേതിൽ രാധാകൃഷ്ണനെതിരെയാണ് പരാതി നൽകിയത്. സിസിടിവി ദൃശ്യങ്ങൾ പരിശ്രാധിച്ചതിലൂടെയാണ് മാലിന്യം നിക്ഷേപിച്ച വ്യക്തിയെ തിരിച്ചറിഞ്ഞത്. ഇതുപോലെ പൊതു ഇടങ്ങളിൽ മാലിന്യങ്ങൾ നിക്ഷേപിക്കുന്നവർക്കെതിരേ നടപടി സ്വീകരിക്കുമെന്ന് വാർഡ് മെമ്പർ ശാലിനി രഘുനാഥ് പറഞ്ഞു.

നാട്ടുകാര്‍ സംഘടിച്ചു; വെള്ളക്കെട്ടുള്ള റോഡ് സഞ്ചാരയോഗ്യമായി

ഹരിപ്പാട്: തുടരെയുണ്ടായ വെള്ളപ്പൊക്കംകൊണ്ട് കുണ്ടും കുഴിയുമായ റോഡ് നാട്ടുകാര്‍ സഞ്ചാരയോഗ്യമാക്കി. വീയപുരം പഞ്ചായത്ത് അഞ്ചാം വാര്‍ഡിലെ അങ്കണവാടി-മുട്ടായിപ്പടി റോഡാണ് നാട്ടുകാര്‍ സംഘടിച്ച് പാറക്കഷണങ്ങളും മെറ്റിലും ഗ്രാവലും ഉപയോഗിച്ച് ഉയര്‍ത്തി സഞ്ചാരയോഗ്യമാക്കിയത്. ഇവിടെ കുഴി രൂപപ്പെട്ട് വെള്ളക്കെട്ട് ഉണ്ടായതുമൂലം യാത്രയ്ക്ക് വളരെ ബുദ്ധിമുട്ടായിരുന്നു. ഒരുലക്ഷം രൂപയോളം റോഡ് നിര്‍മാണത്തിനായി നാട്ടുകാര്‍ പിരിച്ചെടുത്തു. ഈ തുക കൊണ്ടാണ് 300 മീറ്റര്‍ റോഡ് സഞ്ചാരയോഗ്യമാക്കിയത്. 120 കുടുംബങ്ങളുടെ ഏക ആശ്രയമാണ് ഈ റോഡ്. അങ്കണവാടി കുട്ടികള്‍, സ്കൂള്‍ കുട്ടികള്‍ തൊട്ടടുത്ത പാടശേഖരത്തിലെത്തുന്ന കര്‍ഷകര്‍, കര്‍ഷകതൊഴിലാളികള്‍ എന്നിവരുടെ ഏക ആശ്രയമായ റോഡാണ് സഞ്ചാരയോഗ്യമാക്കിയത്. വീയപുരം, മാന്നാര്‍ പഞ്ചായത്തുകളെ തമ്മില്‍ ബന്ധിപ്പിക്കുന്ന റോഡിന് രണ്ടു കിലോമീറ്റര്‍ ദൈര്‍ഘ്യമുണ്ട്. റീബില്‍ഡ് കേരള പദ്ധതിയില്‍ ഉള്‍പ്പെടുത്തി 48 ലക്ഷം രൂപ അനുവദിച്ചതായി വാര്‍ഡ് മെംബര്‍ ജിറ്റു കുര്യന്‍ അറിയിച്ചു. ടെന്‍ഡര്‍ നടപടികള്‍ പൂര്‍ത്തീകരിച്ചതായും റോഡ് പണി ഉടന്‍ തുടങ്ങുമെന്നും വാര്‍ഡ് മെംബര്‍ പറഞ്ഞു.

കാട്ടുപന്നി ശല്യം നിയന്ത്രിക്കാൻ അടിയന്തര നടപടി വേണം: കർഷക കോൺഗ്രസ്

ആലപ്പുഴ: മാവേലിക്കര, കാർത്തികപ്പള്ളി, കരുനാഗപ്പള്ളി താലൂക്കുകളിലായി വ്യാപിച്ചുകിടക്കുന്ന ഓണാട്ടുകര പ്രദേശത്തെ പാലമേൽ, നൂറനാട്, താമരക്കുളം, വള്ളികുന്നം, കൃഷ്ണപുരം, ഭരണിക്കാവ്, തെക്കേക്കര, തഴക്കര, ഓച്ചിറ, കായംകുളം നഗരസഭാ പരിധിയിൽപ്പെട്ട കൃഷിയിടങ്ങളിൽ കാട്ടുപന്നി ശല്യം അനുദിനം വർധിച്ചു വരുന്നതായും ഈ സ്ഥിതി തുടർന്നാൽ സംസ്ഥാനത്തിനുതന്നെ മാതൃകയായ വ്യത്യസ്തങ്ങളായ കൃഷികളുള്ള ഓണാട്ടുകര പ്രദേശത്തെ കൃഷിയിടങ്ങൾ കർഷകർ ഉപേക്ഷിക്കുമെന്ന് കർഷക കോൺഗ്രസ് ആലപ്പുഴ ജില്ലാ കമ്മിറ്റി ചൂണ്ടിക്കാട്ടി. കഴിഞ്ഞവർഷം നൂറനാട് ലെപ്രസി സാനിറ്റോറിയത്തിലെ കൃഷിയിടത്തിൽ കാട്ടുപന്നിയെ പിടിക്കാൻ നിയമവിരുദ്ധമായി വച്ച കെണിയിൽ പെട്ട് മാവേലിക്കര താലൂക്കിലെ രണ്ടു മനുഷ്യജീവനാണ് നഷ്ടപ്പെട്ടത്. വാഹന യാത്രക്കാരെയും കാൽനടക്കാരെയും ആക്രമിക്കുന്നത് നിത്യ സംഭവമായി മാറിയിരിക്കുന്നു. വനം ഇല്ലാത്ത ആലപ്പുഴ ജില്ലയിൽ പോലും ഇത്തരത്തിൽ കാട്ടുപന്നി ശല്യം രൂക്ഷമാകുന്നത് കൃഷിക്കും മനുഷ്യജീവനും ഭീഷണിയായി മാറിയിരിക്കുന്നു. ഇവയെ നിയന്ത്രിക്കാൻ തദ്ദേശ വകുപ്പ് സ്ഥാപനങ്ങളും വനംവകുപ്പും സംസ്ഥാന സർക്കാരും ആവശ്യമായ നടപടി അടിയന്തരമായി കൈക്കൊള്ളണമെന്ന് കർഷക കോൺഗ്രസ് ജില്ലാ കമ്മിറ്റി പ്രസിഡന്‍റ് മാത്യു ചെറുപറമ്പനും സംസ്ഥാന ജനറൽ സെക്രട്ടറി ചിറപ്പുറത്ത് മുരളിയും മുഖ്യമന്ത്രിക്കും കൃഷി, വനം മന്ത്രിമാർക്കും അയച്ച നിവേദനത്തിൽ ആവശ്യപ്പെട്ടു.

ചുനക്കരയിൽ കാത്തിരിപ്പ് കേന്ദ്രം കാഴ്ച വസ്തു

ചാരുംമൂട്: ചുനക്കര പഞ്ചായത്ത് ജംഗ്‌ഷനിൽ സ്ഥാപിച്ച ബസ് കാത്തിരിപ്പ് കേന്ദ്രം കാഴ്ചവസ്തുവായി മാറിയതോടെ ബസ് കാത്ത് ജനം പാതയോരത്ത് നിൽക്കേണ്ട ഗതികേടിൽ. മഴയും വെയിലുമേറ്റ് യാത്രക്കാർ പാതയോരത്താണ് ബസുകൾ കാത്തുനിൽക്കുന്നത്. ചുനക്കര പഞ്ചായത്ത് ജംഗ്‌ഷനിൽ പഞ്ചായത്ത് നിർമിച്ച കാത്തിരിപ്പ് കേന്ദ്രമാണ് ജനങ്ങൾക്ക് പ്രയോജനമില്ലാതായി മാറിയിരിക്കുന്നത്. ഇവിടെ തെരുവുനായ്ക്കളും മറ്റും വിശ്രമ സ്ഥലമാക്കിയിരിക്കുകയാണ്. നിർമാണം പൂർത്തിയായ കാലത്ത് ആളുകൾ കുറച്ചുനാൾ ഇത് ഉപയോഗിച്ചു. എന്നാൽ, ചാരുംമൂട് ഭാഗത്തേക്കു വരുന്ന ബസുകൾ കാത്തിരിപ്പ് കേന്ദ്രത്തിന് നൂറുമീറ്റർ അകലെ മാറി നിർത്താൻ തുടങ്ങിയതോടെ ജനം കാത്തിരിപ്പ് കേന്ദ്രം ഉപേക്ഷിക്കാൻ നിർബന്ധിതരായി. ചുനക്കര പഞ്ചായത്ത് ഓഫീസ് കെട്ടിടത്തിന്‍റെ മതിലിനോട് ചേർന്നുനിർമിച്ച ഈ കാത്തിരിപ്പു കേന്ദ്രത്തിൽ ഇപ്പോൾ മാലിന്യങ്ങൾ നിറഞ്ഞിരിക്കുകയാണ്. ശുചീകരണം നടത്തി ഇതു യാ ത്രക്കാർക്ക് ഉപകാരപ്രദമായ നിലയിൽ മാറ്റിയെടുക്കണമെന്ന ആവശ്യം നിരന്തരം ഉയർന്നെങ്കിലും പഞ്ചായത്തോ ജനപ്രതിനിധികളോ കാര്യമായ ഇടപെടൽ നടത്തിയിട്ടില്ല എത്രയും വേഗം ശുചീകരണം നടത്തി കാത്തിരിപ്പ് കേന്ദ്രം പ്രവർത്തനക്ഷമമാക്കാൻ വേണ്ട നടപടി വേണമെന്നാണ് വിദ്യാർഥികൾ ഉൾപ്പെടെയുള്ള യാത്രക്കാരുടെ ആവശ്യം.

അന്തർജില്ലാ സബ് ജൂണിയർ ഫുട്ബോൾ ചാമ്പ്യൻഷിപ്പിനു തുടക്കമായി

അമ്പലപ്പുഴ: സംസ്ഥാന അന്തർജില്ലാ സബ് ജൂണിയർ ഫുട്ബോൾ ചാമ്പ്യൻഷിപ്പിന് ആലപ്പുഴ വണ്ടാനം മെഡിക്കൽ കോളജ് ഗ്രൗണ്ടിൽ തുടക്കമായി. എച്ച്. സലാം എംഎൽഎ ഉദ്ഘാടനം നിർവഹിച്ചു. ഫുട്ബോൾ അസോസിയേഷൻ പ്രസിഡന്‍റ് അഡ്വ. കുര്യൻ ജയിംസ് അധ്യക്ഷനായി. ഒളിമ്പിക്സ് അസോസിയേഷൻ പ്രസിഡന്‍റ് വി.ജി. വിഷ്ണു, കേരള ഫുട്ബോൾ അസോസിയേഷൻ സെൻട്രൽ കൗൺസിൽ അംഗം റെംജി ഓസ്കാർ, വൈസ് പ്രസിഡന്‍റുമാരായ സി.എ. ജോസഫ്, കെ. എ. വിജയകുമാർ, എച്ച്. ഷാജഹാൻ, സെക്രട്ടറി ബി.എച്ച്. രാജീവ്, ബി. അനസ്മോൻ എന്നിവർ പ്രസംഗിച്ചു. ചാമ്പ്യൻഷിപ്പ് 20ന് സമാപിക്കും.

കായംകുളം താലൂക്ക് ആശുപത്രിക്കും ചേരാവള്ളി പ്രാഥമിക ആരോഗ്യകേന്ദത്തിനും അഭിമാനനേട്ടം

കായംകുളം: ആരോഗ്യരംഗത്ത് മികവിന്‍റെ കേന്ദ്രമായി കായംകുളം താലൂക്ക് ആശുപത്രിയെയും ചേരാവള്ളി അർബൻ പ്രാഥമിക ആരോഗ്യ കേന്ദ്രത്തെയും വീണ്ടും തെരഞ്ഞെടുത്തു. ഇത് തുടർച്ചയായി രണ്ടാം തവണയാണ് സംസ്ഥാന കായകൽപ്പ് അവാർഡ് കായംകുളം നഗരസഭയുടെ നിയന്ത്രണത്തിലുള്ള താലൂക്ക് ആശുപത്രിക്ക് ലഭിക്കുന്നത്. ഒരു ലക്ഷം രൂപ അവാർഡ് തുക ലഭിക്കുന്ന ബഹുമതി ലഭിച്ച ജില്ലയിലെ ഏക താലൂക്ക് ആശുപത്രിയാണ് കായംകുളം. കഴിഞ്ഞ നാലരവർഷത്തിനിടയിൽ സംസ്ഥാന സർക്കാരിന്‍റെയും യു. പ്രതിഭ എംഎൽഎയുടെയും നഗരസഭയുടെയും നേതൃത്വത്തിൽ നിരവധിയാർന്ന വികസന പദ്ധതികളാണ് താലൂക്ക് ആശുപത്രിക്കായി നടപ്പിലാക്കാൻ കഴിഞ്ഞതെന്നും അതിനുള്ള അംഗീകാരമാണ് ബഹുമതിയെന്നും നഗരസഭാ ചെയർപേഴ്‌സൺ പി. ശശികല പറഞ്ഞു. എംഎൽഎ ഫണ്ടിൽനിന്ന് ഒരുകോടി രൂപ മുടക്കി ലാബിനുള്ള കെട്ടിടം പൂർത്തീകരിച്ചുനൽകി. കിഫ്ബി പദ്ധതിയിൽ ഉൾപ്പെടുത്തി ആധുനിക രീതിയിൽ 45 കോടി രൂപയുടെ അഞ്ചുനിലക്കെട്ടിടനിർമാണം അന്തിമ ഘട്ടത്തിലാണ്. മൂന്നേകാൽ കോടി രൂപ ചെലവഴിച്ച് എംസിഎച്ച് ബ്ലോക്കിന്‍റെയും ഒരു കോടി രൂപ ചെലവഴിച്ച് ഐസി യൂണിറ്റിന്‍റെയും പണി പൂർത്തീകരിച്ചു. എംഎൽഎ ഫണ്ടിൽനിന്നും ആംബുലൻസും മുൻ എ.എം. ആരിഫ്, എംപിയുടെ വികസന ഫണ്ടിൽനിന്നും ഒരു ആംബുലൻസും രണ്ടു വെന്‍റിലേറ്ററും നൽകി. മോർച്ചറി നവീകരണത്തിനായി 30 ലക്ഷം രൂപയും അനുവദിച്ചിട്ടുണ്ട്. സംസ്ഥാന സർക്കാരിന്‍റെ ഒട്ടനവധി സഹായങ്ങളും ലഭ്യമായി. കായംകുളം നഗരസഭയും കോടിക്കണക്കിന് രൂപയാണ് ആശുപത്രിക്കായി ചെലവഴിക്കുന്നതെന്ന് ചെയർപേഴ്‌സൺ പറഞ്ഞു. ഡയാലിസിസ് യൂണിറ്റ്, എക്സ്റേ യൂണിറ്റ്, ഫാർമസി, ലാബ്, ഇസിജി, ആംബുലൻസ് സേവനം തുടങ്ങിയവയെല്ലാം ഇരുപത്തിനാലു മണിക്കൂറും പ്രവർത്തനസജ്ജമാക്കി. വൈദ്യുതി പ്രശ്നം പരിഹരിക്കാൻ 58 ലക്ഷം രൂപ ചെലവഴിച്ച് ഹൈടെൻഷൻ ട്രാൻസ്ഫോർമർ സ്ഥാപിച്ചു. ഒപി, ഫാർമസി, ലാബ്, ഡോക്ടേഴ്സ് ക്യാബിൻ തുടങ്ങിയ സ്ഥലങ്ങളിൽ ഓട്ടോമാറ്റിക് ടോക്കൺ സിസ്റ്റം നടപ്പിലാക്കി. ആശുപത്രിയിൽ എല്ലാ സ്ഥലങ്ങളിലും സിസിടിവി സ്ഥാപിച്ചു. വിവിധ ഭാഗങ്ങളിലായി വാട്ടർ ക്രിയോസ്കറുകൾ സ്ഥാപിച്ചു. രോഗികൾക്കും കൂട്ടിരിപ്പുകാർക്കും വിശ്രമിക്കാൻ ഇരിപ്പിട സൗകര്യങ്ങൾ ഒരുക്കി. പ്രതിമാസം 1,20,000 രൂപ നഗരസഭ ഫണ്ടിൽനിന്നും ചെലവഴിച്ച് വൈകിട്ട് നാലുമുതൽ പത്തുവരെ രണ്ടു ഡോക്ടർമാരെ വച്ച് സായാഹ്ന ഒപി പ്രവർത്തിപ്പിച്ചുവരുന്നു. നഗരസഭ മുൻകൈയെടുത്ത് ഡോക്ടേഴ്സ് ഫോർ യു സംഘടനയമായി ചേർന്ന് ഒരു കോടി പത്തു ലക്ഷം രൂപ മുടക്കി ഓക്സിജൻ പ്ലാന്‍റ് സ്ഥാപിച്ചു. ആശുപത്രിയിലെ എല്ലാ കിടക്കകളും ഓക്സിജൻ ബെഡുകളാക്കി. താലൂക്ക് ആശുപത്രിയെയും ചേരാവള്ളി അർബൻ പ്രാഥമികാരോഗ്യ കേന്ദ്രത്തെയും മികവിന്‍റെ കേന്ദ്രമാക്കി കായകൽപ്പ് കമന്‍ററേഷൻ അവാർഡ് നേടുന്നതിനുവേണ്ടി പ്രവർത്തിച്ച ആശുപത്രി സൂപ്രണ്ട്, ഡോക്ടറന്മാർ, നഴ്സന്മാരാടക്കമുള്ള ജീവനക്കാർ, ഓഫീസ് ജീവനക്കാർ എച്ച് എംസി അംഗങ്ങൾ തുടങ്ങിയവ രെ അഭിനന്ദിക്കുന്നതായി നഗരസഭാ ചെയർപേഴ്സൺ പി. ശശികല പ്രസ്താവനയിൽ പറഞ്ഞു.

പായൽക്കുളങ്ങരയിൽ ദേശീയപാതാ നിർമാണം തടഞ്ഞു: പ്രദേശത്ത് സംഘർഷം

അമ്പലപ്പുഴ: പായൽക്കുളങ്ങരയിൽ അടിപ്പാത ഒഴിവാക്കിയുള്ള ദേശീയപാതാ നിർമാണം തടഞ്ഞതോടെ പ്രദേശത്ത് സംഘർഷം. ചൊവാഴ്ച ഉച്ചയോടെയാണ് ദേശീയപാത വികസന അഥോറിറ്റി ഉദ്യോഗസ്ഥരുടെയും കരാർ കമ്പനിയുടെയും നേതൃത്വത്തിൽ ഇവിടെ റോഡ് നിർമാണമാരംഭിച്ചത്. ഇത് തടഞ്ഞ സ്ത്രീകൾ ഉൾപ്പെടെയുള്ളവരെയാണ് അമ്പലപ്പുഴ പോലീസ് അറസ്റ്റ് ചെയ്തു നീക്കിയത്. അടിപ്പാത വേണമെന്ന ആവശ്യവുമായി ജനകീയ സമരസമിതിയുടെ നേതൃത്വത്തിൽ നടക്കുന്ന റിലേ സത്യഗ്രഹം 230 ദിവസം പിന്നിട്ടപ്പോഴാണ് സംഘർഷമുണ്ടായത്. നിലവിൽ പുറക്കാടിനും അമ്പലപ്പുഴയ്ക്കുമിടയിലുള്ള നാലു കി.മീ. ദൂരത്തിലെങ്ങും അടിപ്പാതയില്ല. മത്സ്യത്തൊഴിലാളികളടക്കം ആയിരക്കണക്കിന് പേർ നാലു കി. മീ. ചുറ്റിവേണം സഞ്ചരിക്കാൻ. ഇതിനു പരിഹാരമായി പായൽക്കുളങ്ങരയിൽ അടിപ്പാത വേണമെന്ന ആവശ്യവുമായാണ് സമരസമിതിയുടെ നേതൃത്വത്തിൽ റിലേ സത്യഗ്രഹം ആരംഭിച്ചത്. സമരം ആരംഭിച്ചതോടെ നിർത്തിവച്ച നിർമാണപ്രവർത്തനമാണ് അപ്രതീക്ഷിതമായി ചൊവ്വാഴ്ച ആരംഭിച്ചത്. പിന്നീട് കൂടുതൽ പ്രവർത്തകരെത്തിയതോടെ കൂടുതൽ പോലീസും ഇവരെ നേരിടാൻ സ്ഥലത്തെത്തി. തുടർന്ന് അമ്പലപ്പുഴ സിഐ പ്രതീഷ്കുമാറും ഉദ്യോഗസ്ഥരും സമരസമിതി ഭാരവാഹികളുമായി നടത്തിയ ചർച്ചയെത്തുടർന്ന് 15 ദിവസത്തേക്ക് നിർമാണപ്രവർത്തനങ്ങൾ നിർത്തിവയ്ക്കാൻ തീരുമാനിച്ചു. 15 ദിവസത്തിനുള്ളിൽ അടിപ്പാതയുമായി ബന്ധപ്പെട്ട അന്തിമതീരുമാനമെടുക്കണമെന്നും പോലീസ് നിർദേശം നൽകി.

തൈക്കാട്ടുശേരി ആശുപത്രി രോഗക്കിടക്കയിൽ

പൂച്ചാക്കൽ: 125 വർഷത്തോളം പഴക്കമുള്ള തൈക്കാട്ടുശേരി സാമൂഹിക ആരോഗ്യകേന്ദ്രത്തിലെ കെട്ടിടങ്ങൾ ഏതു നിമിഷവും നിലംപൊത്താവുന്ന നിലയിൽ. സ്ത്രീകളുടെയും പുരുഷന്മാരുടെയും വാർഡായി ഉപയോഗിച്ചിരുന്ന പ്രധാന കെട്ടിടമാണ് അപകടാവസ്ഥയിലായത്. കെട്ടിടം അപകടാവസ്ഥയിലാണെന്ന നോട്ടീസ് അധികൃതർ തന്നെ പതിപ്പിച്ചിട്ടുണ്ട്. ഒരുമാസം മുൻപുവരെ പകൽ കിടത്തിച്ചികിത്സ ഉണ്ടായിരുന്നു. രാത്രി ഡോക്ടർ ഇല്ലാത്തതിനാൽ അത്യാവശ്യക്കാരെ മാത്രമേ ഡോക്ടർ ഓൺ കോൾ സംവിധാനത്തിൽ കിടത്തി ചികിത്സിക്കുമായിരുന്നുള്ളു. ഉപയോഗയോഗ്യമല്ലാത്ത കെട്ടിടങ്ങളിൽ കട്ടിലുകൾ, കിടക്കകൾ ഉൾപ്പെടെ ഒട്ടേറെ ഉപകരണങ്ങൾ നശിക്കുകയാണ്. പഴയ പേ വാർഡും ഉപയോഗിക്കുന്നില്ല. ഒപി, ഫാർമസി, അഡ്മിനിസ്ട്രേഷൻ, നിരീക്ഷണം, ലാബ് തുടങ്ങിയവ ഇപ്പോഴും ഈ കെട്ടിടത്തിലാണ് പ്രവർത്തിക്കുന്നത്. തൈക്കാട്ടുശേരി ബ്ലോക്ക് പഞ്ചായത്തിന്‍റെ നിയന്ത്രണത്തിലാണ് ആശുപത്രിയുള്ളത്. സാങ്കേതിക കുരുക്ക് നിലവിൽ അപകടാവസ്ഥയിലുള്ള കെട്ടിടം പൊടിച്ചുപണിയാൻ ബ്ലോക്ക് പഞ്ചായത്തിൽ ഫണ്ട് ഉണ്ട്. ജില്ലാ പഞ്ചായത്ത് എൻജിനിയറിംഗ് വിഭാഗത്തിന്‍റെ പരിശോധനയിലാണ് പഴയ നിർമിതികൾ പുതുക്കി നിർമിക്കാൻ സാധ്യമല്ലെന്നും സ്ഥലത്തിന്‍റെ കൈവശാവകാശം സ്വകാര്യവ്യക്തിയുടെ പേരിലാണെന്നും വർഷങ്ങൾ പഴക്കമുള്ള കെട്ടിടം പൊളിച്ച് പണിയുന്നതിനു പുരാവസ്തുവകുപ്പിന്‍റേത് അടക്കം അനുമതി വേണമെന്നുമാണ് അറിയിച്ചത്. പ്രവർത്തനം താത്കാലിക ഒപി കെട്ടിടത്തിൽ അപകടാവസ്ഥയിലെ തൈക്കാട്ടുശേരി സിഎച്ച്സിലെ കെട്ടിടത്തിൽനിന്നു താത്കാ ലികമായി ഒപി സംവിധാനം പുതിയ കെട്ടിടത്തിലേക്ക് ഇന്നലെ മുതൽ പ്രവർത്തനം ആരംഭിച്ചു. തൈക്കാട്ടുശേരി ബ്ലോക്ക് പഞ്ചായത്തിന്‍റെ വാർഷിക പദ്ധതിയിൽപ്പെടുത്തി ആറു ലക്ഷം രൂപ ചെലവഴിച്ചാണ് പുതിയ താത്കാലിക ഒപി കെട്ടിടം നിർമിച്ചത്. ഇന്നലെ നടന്ന ഉദ്ഘാടനച്ചടങ്ങിൽ ബ്ലോക്ക് വൈസ് പ്രസിഡന്‍റ് ദീപ സജീവ് അധ്യക്ഷത വഹിച്ചു. പ്രസിഡന്‍റ് വി.ആർ. രജിത ഉദ്ഘാടനം ചെയ്തു. രാജേഷ് വിവേകാനാന്ദ, എൻ.കെ. ജനാർദനൻ എന്നിവർ പങ്കെടുത്തു. സാധാരണക്കാരായ ജനങ്ങൾ ആശ്രയിക്കുന്ന തൈക്കാട്ടുശേരി സിഎച്ച്സിയി ലെ നൂറുവർഷം പഴക്കമുള്ള കെട്ടിടം പൊളിച്ചുമാറ്റുന്നതിനുള്ള നിയമ നടപടികൾ പൂത്തിയാക്കി കൂടുതൽ ഉയർന്ന നിലവാരമുള്ള പുതിയ കെട്ടിടം നിർമിച്ച് കൂടുതൽ ഉയർന്ന മെച്ചപ്പെട്ട ചികിത്സ സംവിധാനം എത്രയും വേഗം നടപ്പിലാക്കാനുള്ള നടപടികളുമായി ബ്ലോക്ക് പഞ്ചായത്ത് മുന്നോട്ടുപോകുകയാണ്. അഡ്വ. വി.ആർ. രജിത (പ്രസിഡന്‍റ്, തൈക്കാട്ടുശേരി ബ്ലോക്ക് പഞ്ചായത്ത്)

യുവതിക്ക് ഓടയില്‍ വീണു പരിക്കേറ്റു

എടത്വ: സ്‌കൂട്ടറില്‍ യാത്ര ചെയ്ത യുവതിക്ക് ഓടയില്‍ വീണു പരിക്ക്. എടത്വ സ്വദേശി സുബിയാണ് പരിക്കേറ്റത്. കൈയ്ക്കും കാലിനും തലയ്ക്കും പരിക്കേറ്റിട്ടുണ്ട്. എടത്വ പള്ളിക്ക് വടക്ക് വശമുള്ള പാലത്തിനു സമീപത്തായിരുന്നു അപകടം. പരിക്കേറ്റ യുവതിയെ ഓടിക്കൂടിയവര്‍ ആശുപത്രിയില്‍ എത്തിച്ചു. ഈ സ്ഥലത്ത് ഓടനിര്‍മിച്ചിട്ടുണ്ടെങ്കിലും മൂടിയിട്ടില്ല. സ്‌കൂള്‍, ഐടിഐ വിദ്യാര്‍ഥികളും നിരവധി യാത്രക്കാരും കടന്നുപോകുന്ന സ്ഥലമാണ്. നിരവധി അപകടങ്ങള്‍ നടന്നിട്ടുണ്ട്. അടിയന്തരമായി ഓടയ്ക്കു മൂടി സ്ഥാപിക്കണമെന്ന് നാട്ടുകാര്‍ ആവശ്യപ്പെട്ടു.

അനധികൃത ഹൗസ് ബോട്ടുകള്‍ക്ക് ലൈസന്‍സ് നല്‍കാന്‍ നീക്കമെന്ന്

ആലപ്പുഴ: ജില്ലയില്‍ 2014 ജനുവരി മുതല്‍ പുതിയ ഹൗസ് ബോട്ടുകള്‍ക്ക് അനുമതി നല്‍കേണ്ടെന്ന് സര്‍ക്കാര്‍ തീരുമാനിച്ചിരുന്നു. വേമ്പനാട്ടുകായലിന്‍റെ വാഹകശേഷിയേക്കാള്‍ ഹൗസ്‌ബോട്ടുകള്‍ ഇവിടെ സര്‍വീസ് നടത്തുന്നുണ്ടെന്നും ഇതു കായല്‍മലിനീകരണത്തിനു കാരണമാകുന്നു എന്നുമുള്ള സിഡബ്ല്യുആര്‍ഡിഎം പഠന റിപ്പോര്‍ട്ട് ചൂണ്ടിക്കാട്ടിയായിരുന്നു നടപടി. എന്നാൽ, വേമ്പനാട്ടുകായലില്‍ അനധികൃതമായി സര്‍വീസ് നടത്തുന്ന ഹൗസ് ബോട്ടുകള്‍ക്ക് ഹൈക്കോടതി ഉത്തരവ് മറികടന്നു ലൈസന്‍സ് നല്‍കാന്‍ നീക്കം നടക്കുന്നതായി ആരോപണം. വേമ്പനാട്ടുകായലിന്‍റെ വാഹനശേഷിയേക്കാള്‍ ഇരട്ടിയിലേറെ ഹൗസ്‌ബോട്ടുകള്‍ സര്‍വീസ് നടത്തുന്നുണ്ടെന്നു ജലവിഭവവിനിയോഗകേന്ദ്രം (സിഡബ്ല്യുആര്‍ഡിഎം) പറഞ്ഞത് കണക്കിലെടുക്കാതെയാണിത്. മലിനീകരണ നിയന്ത്രണ ബോര്‍ഡ് ഉള്‍പ്പെടെയുള്ള ഏജന്‍സികള്‍ റിപ്പോര്‍ട്ട് നല്‍കിയിട്ടും അനധികൃത ജലയാനങ്ങള്‍ക്കെതിരേ നടപടിയെടുക്കാന്‍ തുറമുഖ വകുപ്പ് തയാറാകുന്നില്ലെന്നും അംഗീകൃത ഹൗസ് ബോട്ടുടമകള്‍ ആരോപിച്ചു. 350 ഹൗസ് ബോട്ടുകള്‍ സര്‍വീസ് നടത്താന്‍ മാത്രം വാഹകശേഷിയുള്ള വേമ്പനാട്ടുകായലില്‍ അതിന്‍റെ ഇരട്ടി ഹൗസ് ബോട്ടുകള്‍ സര്‍വീസ് നടത്തുന്നുണ്ടെന്നായിരുന്നു റിപ്പോര്‍ട്ട്. ബോട്ടുകള്‍ പെരുകി ആലപ്പുഴയിലെ രജിസ്‌ട്രേഷന്‍ നിര്‍ത്തിവച്ചതോടെ ഹൗസ് ബോട്ടുകള്‍ മറ്റു ജില്ലകളില്‍ രജിസ്റ്റര്‍ ചെയ്ത് ആലപ്പുഴയില്‍ സര്‍വീസ് നടത്താന്‍ തുടങ്ങി. ചിലര്‍ രജിസ്‌ട്രേഷന്‍ നടത്താതെയും സര്‍വീസ് ആരംഭിച്ചു. വേമ്പനാട്ടുകായലില്‍ നൂറുകണക്കിനു അനധികൃത ബോട്ടുകള്‍ പെരുകി. വേമ്പനാട്ടുകായലില്‍ സര്‍വീസ് നടത്തുന്ന വള്ളങ്ങളുടെ കണക്കെടുപ്പ് മാത്രമാണ് ഇപ്പോള്‍ നടക്കുന്നത് എന്നാണു തുറമുഖ വകുപ്പിന്‍റെ വിശദീകരണം. അനധികൃതമായി സര്‍വീസ് നടത്തുന്ന വള്ളങ്ങള്‍ ഉണ്ടോ എന്നറിയാനാണ് ഈ പരിശോധന. അനധികൃത വള്ളങ്ങള്‍ക്കു പിഴ ഈടാക്കി രജിസ്‌ട്രേഷന്‍ നല്‍കുന്നുണ്ട്. അനധികൃത ബോട്ടുകള്‍ക്കെതിരേ നടപടിയെടുക്കണമെന്നു 2021ല്‍ ഹൈക്കോടതി ഉത്തരവിട്ടെങ്കിലും കാര്യമായ നടപടിയുണ്ടായില്ല. പകരം ഇത്തരം ഹൗസ് ബോട്ടുകളെ ഒറ്റത്തവണ പിഴ ഈടാക്കി നിയമവിധേയമാക്കാന്‍ 2024 ജനുവരി 22നു മുഖ്യമന്ത്രിയുടെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനമെടുത്തു. ഫീസും പിഴയും എന്നാല്‍, കേരള ഹൗസ് ബോട്ട് ഓണേഴ്‌സ് അസോസിയേഷന്‍ കോ ഓര്‍ഡിനേഷന്‍ കമ്മിറ്റി നല്‍കിയ ഹര്‍ജിയില്‍ ഈ യോഗത്തിന്‍റെ തീരുമാനങ്ങള്‍ മരവിപ്പിക്കാന്‍ ഹൈക്കോടതി ഉത്തരവിട്ടു. പക്ഷേ, ഈ യോഗത്തിലെ തീരുമാനങ്ങള്‍ തുറമുഖ വകുപ്പും കേരള മാരിടൈം ബോര്‍ഡും ഇപ്പോഴും നടപ്പാക്കുകയാണെന്നാണ് ആരോപണം. അനധികൃതമായി പ്രവര്‍ത്തിക്കുന്ന വള്ളങ്ങള്‍ക്ക് ഫീസും പിഴയും ഈടാക്കി രജിസ്‌ട്രേഷന്‍ അനുവദിക്കാമെന്ന് 2024 ജൂലൈയില്‍ തുറമുഖ വകുപ്പ് ഉത്തരവിറക്കി. 2024 ജനുവരിയില്‍ മുഖ്യമന്ത്രിയുടെ അധ്യക്ഷതയില്‍ ചേര്‍ന്ന യോഗത്തിലെ തീരുമാനങ്ങള്‍ മരവിപ്പിച്ച ഉത്തരവ് നിലനില്‍ക്കുമെന്നും കോടതി ആവര്‍ത്തിച്ചിരിക്കുന്നതിനാൽ അനധികൃത വള്ളങ്ങള്‍ക്ക് ലൈസന്‍സ് നല്‍കാനുള്ള നീക്കം ഉപേക്ഷിക്കണമെന്നാണ് ആവശ്യം. 2024 ജനുവരിയില്‍ മുഖ്യമന്ത്രിയുടെ അധ്യക്ഷതയില്‍ ചേര്‍ന്നയോഗത്തിലെ തീരുമാനങ്ങള്‍ നടപ്പിലാക്കുന്നതു ഹൈക്കോടതി മരവിപ്പിച്ചതാണെന്നും ആ യോഗത്തിലെ തീരുമാനത്തിന്‍റെ അടിസ്ഥാനത്തിലാണെന്ന് പറയുന്ന പരിശോധന നിലനിൽക്കുന്നതല്ലെന്നും ഹൗസ് ബോട്ടുടമകള്‍ ചൂണ്ടിക്കാട്ടുന്നു.

കത്തോലിക്ക കോണ്‍ഗ്രസ് കാനാന്‍ മിഷന്‍ 2കെ25 സംഗമം 30ന്

ങ്ങനാശേരി: കത്തോലിക്ക കോണ്‍ഗ്രസ് ചങ്ങനാശേരി അതിരൂപത സമിതിയുടെ നേതൃത്വത്തില്‍ സംഘടിപ്പിക്കുന്ന സമുദായ ശക്തീകരണ ശില്പശാല കാനാന്‍ മിഷന്‍ 2കെ25 20ന് രാവിലെ ഒമ്പതുമുതല്‍ വൈകുന്നേരം 4.30വരെ സെന്‍റ് മേരീസ് കത്തീഡ്രല്‍ പാരിഷ് ഹാളില്‍ നടക്കും. കത്തോലിക്ക കോണ്‍ഗ്രസിന്‍റെ മുഴുവന്‍ യൂണിറ്റുകളിലെയും പ്രസിഡന്‍റുമാര്‍, സെക്രട്ടറിമാര്‍, ട്രഷറര്‍മാര്‍, അതിരൂപത പ്രതിനിധികള്‍, യൂത്ത്-വനിത-മീഡിയ കൗണ്‍സില്‍ പ്രതിനിധികള്‍, ഫൊറോനാ ഭാരവാഹികള്‍, അതിരൂപത സമിതിയംഗങ്ങള്‍ എന്നിവര്‍ പങ്കാളികളാകും. സമുദായ ശക്തീകരണ ചിന്തകള്‍, അനുകാലിക രാഷ്‌ട്രീയ വിഷയങ്ങള്‍, മതസ്വാതന്ത്ര്യം, നസ്രാണി മുന്നേറ്റത്തിന്‍റെ തുടര്‍പ്രവര്‍ത്തന പരിപാടികള്‍, കുട്ടനാടും കാര്‍ഷിക മേഖലയുമായും ബന്ധപ്പെട്ടുള്ള പ്രവര്‍ത്തനങ്ങള്‍ തുടങ്ങിയവ സംബന്ധിച്ചിട്ടുള്ള ക്ലാസുകള്‍, ചര്‍ച്ചകള്‍, നയരൂപീകരണം എന്നിവ ശില്പശാലയുടെ ഭാഗമായി നടക്കും. പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍, അതിരൂപത ഡയറക്ടര്‍ ഫാ. സെബാസ്റ്റ്യന്‍ ചാമക്കാല, ഗ്ലോബല്‍ ജനറല്‍ സെക്രട്ടറി ഡോ. ജോസുകുട്ടി ജെ. ഒഴുകയില്‍, വൈസ് പ്രസിഡന്‍റ് ബെന്നി ആന്‍റണി എന്നിവര്‍ വിവിധ സെഷനുകള്‍ നയിക്കും. അതിരൂപത ജനറല്‍ സെക്രട്ടറി ബിനു ഡൊമിനിക്, ഭാരവാഹികളായ ജോസ് വെങ്ങാന്തറ, സി.ടി. തോമസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസ്‌ലിന്‍ കുരുവിള, രാജേഷ് ജോണ്‍, ടോമിച്ചന്‍ അയ്യരുകുളങ്ങര, ജേക്കബ് നിക്കോളാസ്, ചാക്കപ്പന്‍ ആന്‍റണി, ജോസി ഡൊമിനിക്, കെ.എസ്. ആന്‍റണി, പി.സി. കുഞ്ഞപ്പന്‍, ജോര്‍ജ് വര്‍ക്കി, ജെസി ആന്‍റണി, സിസി അമ്പാട്ട് എന്നിവര്‍ പ്രസംഗിക്കും.

തണ്ണീര്‍മുക്കം പഞ്ചായത്ത് കെട്ടിടം നവീകരണം: അശാസ്ത്രീയത ആരോപിച്ച് കോണ്‍ഗ്രസ് മാര്‍ച്ച്

ചേർത്തല: തണ്ണീര്‍മുക്കം പഞ്ചായത്ത് കെട്ടിടത്തിന്‍റെ നവീകരണത്തില്‍ അശാസ്ത്രീയത ആരോപിച്ച് കോണ്‍ഗ്രസ് തണ്ണീര്‍മുക്കം പഞ്ചായത്ത് കമ്മിറ്റിയുടെ നേതൃത്വത്തിൽ മാര്‍ച്ചും ധര്‍ണയും നടത്തി. നിര്‍മാണം നിര്‍ത്തിവച്ച് വിദഗ്ധസമതി പഠനം നടത്തണമെന്നാണ് കോണ്‍ഗ്രസിന്‍റെ ആവശ്യം. ഇക്കാര്യം ചൂണ്ടിക്കാട്ടി കോണ്‍ഗ്രസ് പഞ്ചായത്ത് സെക്രട്ടറിക്ക് കത്തുനല്‍കുകയും ചെയ്തു. കെപിസിസി ജനറല്‍ സെക്രട്ടറി എ.എ. ഷുക്കൂര്‍ മാര്‍ച്ച് ഉദ്ഘാടനം ചെയ്തു. തണ്ണീര്‍മുക്കം മണ്ഡലം പ്രസിഡന്‍റ് ടി.ടി. സാജു അധ്യക്ഷത വഹിച്ചു. ആര്‍. ശശിധരന്‍, സജി കുര്യാക്കോസ്, സി.വി. തോമസ്, സുബ്രഹ്‌മണിദാസ്, അജയകുമാര്‍ മാത്യു‍, ഗോപി കണ്ണാട്ടേരി, ജി സോമകുമാര്‍, സില്‍വി ഫ്രാന്‍സിസ് സദാശിവന്‍ തുടങ്ങിയവര്‍പ്രസംഗിച്ചു. ലൈഫ് പദ്ധതിയിലെ വീട് നിര്‍മിച്ചവര്‍ക്ക് മുഴുവന്‍ പണം അനുവദിക്കുക, തൊഴിലുറപ്പ് പദ്ധതി ആരംഭിക്കുക, തെരുവുനായ ശല്യത്തിന് അടിയന്തര നടപടി സ്വീകരിക്കുക, പഞ്ചായത്ത് ഫണ്ട് രണ്ടു ലക്ഷം ഉപയോഗിച്ച് ടൂര്‍ നടത്തിയ കൃഷി ഓഫീസര്‍ക്കെതിരേ നടപടി എടുക്കുക തുടങ്ങിയ ആവശ്യങ്ങളും ധര്‍ണയില്‍ കോണ്‍ഗ്രസ് ഉയര്‍ത്തി.

സ്‌കൂളുകളിൽ ഇൻസിനറേറ്ററുകള്‍ വിതരണം ചെയ്തു

‌ചേർത്തല: കഞ്ഞിക്കുഴി ബ്ലോക്ക് പഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തി സ്‌കൂളുകളിൽ ഇൻസിനറേറ്റർ വിതരണം ചെയ്യുന്ന പദ്ധതി ആരംഭിച്ചു. പദ്ധതിയുടെ ബ്ലോക്കുതല ഉദ്ഘാടനം മന്ത്രി പി. പ്രസാദ് നിർവഹിച്ചു. തങ്കി സെന്‍റ് ജോർജ് ഹൈസ്കൂളില്‍ നടന്ന സമ്മേളനത്തിൽ ബ്ലോക്ക് പ്രസിഡന്‍റ് വി.ജി. മോഹനൻ അധ്യക്ഷത വഹിച്ചു. സ്കൂളിന്‍റെ നേതൃത്വത്തിൽ നടത്തിയ ഓണക്കാല പച്ചക്കറി കൃഷിയും പൂകൃഷിയുടെ നടീലും ജില്ലാ പഞ്ചായത്ത് വൈസ് പ്രസിഡന്‍റ് എൻ.എസ്. ശിവപ്രസാദ് നിർവഹിച്ചു. ബ്ലോക്ക് പഞ്ചായത്ത് സെക്രട്ടറി സി.വി. സുനിൽ, തങ്കി ഫെറോനാ പള്ളി വികാരി ഫാ. ജോർ‍ജ് എടേഴത്ത്, ബ്ലോക്ക് പഞ്ചായത്തംഗം എസ്. ഷിജി, തീരദേശ വികസന ബോർഡ് അംഗം പി.ഐ. ഹാരീസ്, കടക്കരപ്പള്ളി കൃഷി ഓഫീസർ ജീഷ്മ ഷാജി, ടി.കെ. സത്യാനന്ദൻ, പി.ഡി. ഗഗാറിൻ, കെ.എസ്. സുധീഷ്, കെ.കെ. പ്രഭു, അഭിലാഷ് മാമ്പറമ്പിൽ എന്നിവർ പ്രസംഗിച്ചു.

മൈക്കിള്‍സ് കോളജില്‍ ഇഗ്‌നെറ്റ്-2025 ആരംഭിച്ചു

ചേര്‍ത്തല: സെന്‍റ് മൈക്കിള്‍സ് കോളജില്‍ ഒന്നാം വര്‍ഷം പ്രവേശനം ലഭിച്ച ബിരുദ വിദ്യാര്‍ഥികള്‍ക്കായി ത്രിദിന ഇന്‍ഡക്ഷന്‍ പ്രോഗ്രാം ഇഗ്‌നെറ്റ്-2025 ആരംഭിച്ചു. കോളജ് ഓഡിറ്റോറിയത്തില്‍ നടന്ന സമ്മേളനം മന്ത്രി പി. പ്രസാദ് ഉദ്ഘാടനം ചെയ്തു. പ്രിന്‍സിപ്പല്‍ ഡോ. സിന്ധു എസ്. നായര്‍ അധ്യക്ഷത വഹിച്ചു. അസി. മാനേജര്‍ ഫാ. ഡെന്‍സി ബെഞ്ചമിന്‍ കാട്ടുങ്കല്‍, സ്മൃതി വൈസ് പ്രസിഡന്‍റ് അഡ്വ.എസ്. ശരത്, പിടിഎ വൈസ് പ്രസിഡന്‍റ് പയസ് ജോസഫ്, പ്രോഗ്രം കോ-ഓര്‍ഡിനേറ്റര്‍ യു. ഹരി തുടങ്ങിയവര്‍ പ്രസംഗിച്ചു. മോട്ടിവേഷണല്‍ സ്പീക്കര്‍ ഡൊമിനിക് വര്‍ഗീസ് ക്ലാസെടുത്തു. 16 ന് സമാപിക്കുന്ന പരിപാടിയില്‍ വിദ്യാര്‍ഥികള്‍ക്കായി വിവിധ സെഷനുകള്‍ ക്രമീകരിച്ചിട്ടുണ്ട്.

അമ്മയെയും മകനെയും കെഎസ്ആർടിസി ബസിൽനിന്ന് രാത്രി ഇറക്കിവിട്ടതായി പരാതി

കായംകുളം: കെഎസ്ആർടിസി ബസിൽ യാത്ര ചെയ്ത അമ്മയെയും മകനെയും രാത്രി വഴിമധ്യേ കണ്ടക്‌ടർ ഇറക്കിവിട്ടതായി പരാതി. കായംകുളം മലമേൽഭാഗം കൊച്ചുവീട്ടിൽ റഷീദിന്‍റെ ഭാര്യ ഹസീനയാണ് ഹരിപ്പാട് പോലീസ് സ്‌റ്റേഷനിൽ പരാതി നൽകിയത്. കഴിഞ്ഞദിവസം രാത്രി ഹസീനയും പതിനൊന്ന് വയസുള്ള മകനും കായംകുളം കെഎസ്ആർടിസി ബസ് സ്റ്റാൻഡിൽ നിന്നുമാണ് ചേർത്തല തുറവൂരിലേക്ക് പോകാൻ കെഎസ്ആർടിസി സൂപ്പർ ഫാസ്റ്റ് ബസിൽ കയറിയത്. ഇവർ ബസിന്‍റെ മുൻവശത്തെ ഒഴിഞ്ഞ സീറ്റിൽ ഇരിക്കുകയും ചെയ്തു. ഹരിപ്പാട് നങ്ങ്യാർകുളങ്ങരയിൽ എത്തിയപ്പോൾ യാത്രക്കാർക്ക് ഭക്ഷണം കഴിക്കാനായി ബസ് നിർത്തി. തുടർന്ന് ബസ് പുറപ്പെടാൻ നേരം ഹസീനയെയും മകനെയും എഴുന്നേൽപ്പിച്ച ശേഷം മറ്റൊരു യാത്രക്കാരിക്ക് കണ്ടക്‌ടർ സീറ്റ് നൽകി. ഇതിനെ ചോദ്യം ചെയ്തപ്പോഴാണ് ഹരിപ്പാട് ബസ് നിർത്തിച്ച് ഹസീനയെയും മകനെയും കണ്ടക്ടർ ബസിൽനിന്ന് ഇറക്കിവിട്ടത്. തുടർന്നാണ് ഹസീന ഹരിപ്പാട് പോലീസിൽ പരാതി നൽകിയത്. കണ്ടകട്ർ അപമര്യാദയായി പെരുമാറിയെന്നും മകന്‍റെ മുന്നിൽവച്ച് അപമാനിച്ചെന്നും പരാതിയിലുണ്ട്. പോലീസ് അന്വേഷണം ആരംഭിച്ചു.

ആധുനിക പരിചരണ സംവിധാനങ്ങളൊരുക്കി വണ്ടാനം ഗവ. മെഡിക്കൽ കോളജ് ആശുപത്രി

അന്പലപ്പുഴ: ആലപ്പുഴ വണ്ടാനം ഗവ. മെഡിക്കൽ കോളജ് ആശുപത്രിയിൽ ആധുനിക സൗകര്യങ്ങളോടെ ഒ ആൻഡ് ജി (ഒബ് സ്റ്റെട്രിക് ആൻഡ് ഗൈനക്കോളജി) പ്രവർത്തനത്തിനു തുടക്കമായി. നവജാതശിശുക്കൾക്കും അമ്മമാർക്കും മികച്ച പരിചരണം ലഭ്യമാക്കുന്നതിന് സ്വകാര്യ ആശുപത്രികളെ വെല്ലുന്ന അത്യാധുനിക ചികിത്സാ സൗകര്യങ്ങളാണ് ഇവിടെ ഒരുക്കിയിട്ടുള്ളത്. ഇതിന്‍റെ പ്രവർത്തനോദ്ഘാടനം എച്ച്. സലാം എംഎൽഎ നിർവഹിച്ചു. വേദനരഹിത പ്രസവം, ഒരേസമയം ആറു പ്രസവത്തിന് ആവശ്യമായ സൗകര്യം, പ്രസവ വാർഡിൽ 24 കിടക്ക സൗകര്യങ്ങൾ, എമർജൻസി ഓപ്പറേഷൻ തിയറ്ററുകൾ, ഒബ്സർവേഷന് വിശാലമായ സൗകര്യം, മരുന്നുവിതരണത്തിനുള്ള സൗകര്യം എന്നിവയും ഇവിടെ സജ്ജമാക്കിയിട്ടുണ്ട്. നവജാത ശിശു വിഭാഗത്തിൽ മൂന്ന് ഐസിയു സംവിധാനമാണുള്ളത്. 17 കിടക്ക സൗകര്യങ്ങളുമുണ്ട്. മാസം തികയാതെ പ്രസവിക്കുന്ന കുട്ടികൾ, അണുബാധയേറ്റ കുട്ടികൾ, സാധാരണ നിലയിൽ മതിയായ ആരോഗ്യത്തോടെയുള്ള കുട്ടികൾ എന്നിവർക്കുള്ള ചികിത്സയ്ക്കും പരിചരണത്തിനുമായി പ്രത്യേക സജ്ജീകരണങ്ങളുമുണ്ട്. ഒപ്പം അമ്മമാർക്കും നവജാത ശിശുക്കൾക്കുമായി 20 കിടക്ക സൗകര്യങ്ങളുള്ള ഒരു വാർഡുമുണ്ട്. പ്രസവസംബന്ധമായ ചികിത്സയ്ക്കും അനുബന്ധ പരിചരണത്തിനും സ്വകാര്യ ആശുപത്രികളിൽ ലക്ഷങ്ങൾ ചെലവുവരുന്ന സംവിധാനങ്ങളാണ് ഇവ. 30 കോടി രൂപ ചെലവിൽ പൂർത്തിയാക്കിയ ബഹുനില മന്ദിരം ആരോഗ്യ മന്ത്രി വീണാ ജോർജ് നേരത്തെ ഉദ്ഘാടനം ചെയ്തിരുന്നു. ഗവ. ടിഡി മെഡിക്കൽ കോളജ് പ്രിൻസിപ്പൽ ഡോ. ബി. പത്മകുമാർ, ആശുപത്രി സൂപ്രണ്ട് ഡോ. എ. ഹരികുമാർ, ആർഎംഒ ഡോ. പി. എൽ. ലക്ഷ്മി, ഗൈനക്കോളജി വിഭാഗം മേധാവി ഡോ. സംഗീത മേനോൻ, അസോസിയേറ്റ് പ്രഫസർമാരായ ഡോ. ഒ. ജോസ്, ഡോ. പി.എസ്. അനസൂയ, ഡോ. റെയ്ച്ചൽ അലക്സാണ്ടർ, അസി. പ്രഫ. ഡോ. തോമസ് കോശി, അസോസിയേറ്റ് പ്രഫസർമാരായ ഡോ. എം. പി. സലിം, ഡോ. പി. ആർ. ശ്രീലത, ഡോ. ഗോമതി, ഡോ. പി. എസ്. ഷാജഹാൻ എന്നിവർ പങ്കെടുത്തു.

പാദപൂജ വിവാദം: പ്രതിഷേധം ഇരമ്പി ; ഏഴു പ്രവര്‍ത്തകര്‍ക്കു പരിക്കേറ്റു: നേതാക്കന്മാരെ അറസ്റ്റ് ചെയ്തു

മാവേലിക്കര: വിദ്യാധിരാജ സെന്‍ട്രല്‍ ആൻഡ് സൈനിക സ്‌കൂളില്‍ ഗരുപൗര്‍ണമി ആഘോഷങ്ങളുമായി ബന്ധപ്പെട്ടു നടന്ന പാദപൂജയില്‍ ഉയര്‍ന്നുവന്ന വിവാദത്തെത്തുടര്‍ന്ന് യുവജന സംഘടനകളുടെ പ്രതിഷേധം ഇരമ്പി. എഐവൈഎഫ്-എഐഎസ്എഫ്, ഡിവൈഎഫ്‌ഐ എന്നീ സംഘടനകളുടെ നേതൃത്വത്തിലാണ് പ്രതിഷേധ സമരങ്ങള്‍ നടന്നത്. ഐവൈഎഫ്-എഐഎസ്എഫ് നേതൃത്വത്തില്‍ മാവേലിക്കര വിദ്യാധിരാജ സെന്‍ട്രല്‍ ആൻഡ് സൈനിക് സ്‌കൂളിലേക്കു പാദപൂജ വിവാദത്തെത്തുടര്‍ന്ന് പ്രതിഷേധ മാര്‍ച്ച് നടത്തി. ബുദ്ധജംഗ്ഷനില്‍നിന്ന് ആരംഭിച്ച് മാര്‍ച്ച് സ്‌കൂളിന് മുന്‍വശം പോലീസ് ബാരിക്കേട് വച്ച് തടഞ്ഞു. പ്രവര്‍ത്തകര്‍ ബാരിക്കേട് മറികടന്ന് പോകാന്‍ ശ്രമിച്ചത് അല്പസമയം ഉന്തും തള്ളുമുണ്ടാക്കിയെങ്കിലും പ്രവര്‍ത്തകരുടെ ശ്രമം പോലീസ് പരാജയപ്പെടുത്തി. സമരത്തിനിടെ ബാരിക്കേട് ഉയര്‍ത്താന്‍ ശ്രമിച്ച ഹരിലാല്‍, അംജാത് സുബൈര്‍, റഫീക്ക, ഹനീഷ് മുഹമ്മദ്, ഷരീഫ്, ആരോമല്‍, അനു കാരക്കാട് എന്നിവര്‍ക്ക് കൈക്കു പരിക്കേറ്റിട്ടുണ്ട്. തുടര്‍ന്ന് എഐവൈഎഫ് ജില്ലാ പ്രസിഡന്‍റ് ബൈരഞ്ജിത്ത് പ്രതിഷേധ സമരം ഉദ്ഘാടനം ചെയ്തു. എഐവൈഎഫ് മാവേലിക്കര മണ്ഡലം പ്രസിഡന്‍റ് അംജാത് സുബൈര്‍ അധ്യക്ഷത വഹിച്ചു. എഐവൈഎഫ് സംസ്ഥാന കമ്മിറ്റി അംഗം അനു ശിവന്‍ സ്വാഗതം പറഞ്ഞു. എഐഎസ്എഫ് ജില്ലാ പ്രസിഡന്‍റ് അജയ്കൃഷ്ണന്‍, സിപിഐ മാവേലിക്കര മണ്ഡലം സെക്രട്ടറി എം.ഡി. ശ്രീകുമാര്‍, എഐവൈഎഫ് ഭരണിക്കാവ് മണ്ഡലം സെക്രട്ടറി ആദര്‍ശ് ശിവന്‍ എന്നിവര്‍ പ്രസംഗിച്ചു. ഡിവൈഎഫ്‌ഐ മാവേലിക്കര ഏരിയ കമ്മിറ്റിയുടെ നേതൃത്വത്തില്‍ കാട്ടുവള്ളി ജംഗ്ഷനില്‍നിന്ന് ആരംഭിച്ച മാര്‍ച്ച് സ്‌കൂളിന് ഏതാനും മീറ്റര്‍ മുന്നില്‍ പോലീസ് ബാരിക്കേടുകള്‍ ഉപയോഗിച്ച് തടഞ്ഞു. പോലീസ് ബാരിക്കേടിനെ മറികടക്കാന്‍ പ്രവര്‍ത്തകര്‍ ശ്രമിച്ചത് കുറച്ചു നേരത്തെ സംഘര്‍ഷത്തിനിടയാക്കി. പ്രവര്‍ത്തകരും പോലീസും തമ്മില്‍ ഉയര്‍ത്തിയ ബാരിക്കേടുമായി ഉന്തും തള്ളുമുണ്ടായി. ബാരിക്കേട് മറികടക്കാന്‍ ഏറെനേരം ശ്രമിച്ചെങ്കിലും പോലീസ് ശ്രമം പരാജയപ്പെടുത്തി. തുടര്‍ന്ന് നടന്ന പ്രതിഷേധ യോഗം ഡിവൈഎഫ്‌ഐ കേന്ദ്ര കമ്മിറ്റി അംഗം ആര്‍. രാഹുല്‍ ഉദ്ഘാടനം ചെയ്തു. സംഭവം അങ്ങേയറ്റം അപരിഷ്‌കൃതവും ജനാധിപത്യ സമൂഹത്തിന് അപമാനകരവും ആണെന്ന് രാഹുല്‍ പറഞ്ഞു. ജില്ലാ പ്രസിഡന്‍റ് എസ്. സുരേഷ് കുമാര്‍ അധ്യക്ഷത വഹിച്ചു. ബ്ലോക്ക് സെക്രട്ടറി വിഷ്ണു ഗോപിനാഥ് സ്വാഗതം പറഞ്ഞു. അനസ്, രഞ്ജിത്ത്, അനുപമ സൈജു, സെന്‍ സോമന്‍എന്നവര്‍ പ്രസംഗിച്ചു. ആര്‍. രാഹുല്‍, എസ്. സുരേഷ്‌കുമാര്‍ അടക്കമുള്ള നേതാക്കളെ പോലീസ് അറസ്റ്റ് ചെയ്തു നീക്കി.

ട്രെയിനുകൾ കുറവ്; തീരദേശപാതയിൽ യാത്രക്കാർ ദുരിതത്തിൽ

കായംകുളം: തീരദേശ പാതയില്‍ ആലപ്പുഴ വഴിയുള്ള ട്രെയിനുകളുടെ കുറവ് യാത്രക്കാരെ ദുരിതത്തിലാക്കുന്നു. നിരവധി യാത്രക്കാരാണ് ദിവസവും ആലപ്പുഴയില്‍നിന്ന് കായംകുളത്തേക്കും തിരിച്ചും ട്രെയിന്‍ മാര്‍ഗം യാത്ര ചെയ്യുന്നത്. എന്നാല്‍ ട്രെയിനുകളുടെ കുറവ് യാത്രക്കാരുടെ ബുദ്ധിമുട്ട് വര്‍ധിപ്പിക്കുകയാണ്. ആലപ്പുഴയില്‍നിന്നു രാവിലെ 6.30 ന് ശേഷം കായംകുളം ഭാഗത്തേക്കുള്ള ഇന്‍റര്‍സിറ്റി പുറപ്പെട്ട് കഴിഞ്ഞാല്‍ പിന്നീട് ഈവഴി മറ്റ് ട്രെയിനുകളില്ല. രാവിലെ 9.30 ന് ആലപ്പുഴയിലെത്തുന്ന എറണാകുളം-ആലപ്പുഴ പാസഞ്ചര്‍ കായംകുളത്തേക്ക് നീട്ടുകയാണെങ്കില്‍ യാത്രക്കാര്‍ക്ക് ഏറെ ഗുണം ചെയ്യും. രാവിലെ 11.30 ന് കായംകുളത്ത് എത്തുന്ന നേത്രാവതി എക്‌സ്പ്രസ് കഴിഞ്ഞാല്‍ വൈകുന്നേരം 6.30 ന് മാത്രമേ ആലപ്പുഴ ഭാഗത്തേക്ക് ട്രെയിന്‍ സര്‍വീസ് ഉള്ളൂ. കോവിഡ് കാലത്ത് നിര്‍ത്തിവച്ച എറണാകുളം- കായംകുളം പാസഞ്ചര്‍ ഇതുവരെ പുനരാരംഭിച്ചിട്ടില്ല. മാത്രമല്ല, റെയില്‍വേക്ക് ഏറ്റവും കൂടുതല്‍ വരുമാനം നേടിത്തരുന്ന മധ്യതിരുവിതാംകൂറിലെ പ്രധാന സ്റ്റേഷനുകളില്‍ ഒന്നായ കായംകുളത്ത് വന്ദേഭാരത് ട്രെയിനിന് സ്റ്റോപ്പ് അനുവദിച്ചിട്ടില്ല. കോവിഡിന് ശേഷം പാസഞ്ചര്‍ ട്രെയിന്‍ നിര്‍ത്തലാക്കിയതും ട്രെയിനുകളുടെ സ്റ്റോപ്പുകള്‍ വെട്ടി ക്കുറച്ചതും ദുരിതത്തിന് കാരണമായി. ദേശീയപാതയില്‍ നിര്‍മാണം നടക്കുന്നതിനാല്‍ യാത്ര ദുഷ്‌കരമായതിനാല്‍ യാത്രക്കാര്‍ കൂടുതലായും ട്രെയിനുകളിലാണ് സഞ്ചരിക്കു ന്നത്. ഹരിപ്പാടുനിന്നു രാവിലെ 11.30നുള്ള നേത്രാവതി എക്‌സ്പ്രസ് പോയതിനുശേഷം അടുത്ത ട്രെയിന്‍ ഏഴു മണിക്കൂറിനു ശേഷം വൈകിട്ട് 6 30നാണുള്ളത്. ഇതിനിടയില്‍ ഹരിപ്പാട്, അമ്പലപ്പുഴ സ്റ്റേഷനുകളില്‍ സ്റ്റോപ്പ് ഇല്ലാത്ത നിരവധി ട്രെയിനുകള്‍ കടന്നുപോകുന്നുണ്ട്. തിങ്കള്‍, ചൊവ്വ ദിവസങ്ങളില്‍ ജാം നഗര്‍ എക്‌സ്പ്രസ്, വ്യാഴം ഗാന്ധിധാം ഹംസഫര്‍ എക്‌സ്പ്രസ്, വെള്ളി ഇന്‍ഡോര്‍ എക്‌സ്പ്രസ്, ഞായറാഴ്ച പോര്‍ബന്ധര്‍ എക്‌സ്പ്രസ് ഇങ്ങനെ അഞ്ചുദിവസങ്ങളില്‍ ഉച്ചയ്ക്ക് 2.45ന് കായംകുളം-ആലപ്പുഴ വഴി എറണാകുളത്തേക്ക് ട്രെയിനുകള്‍ ഉണ്ട്. എന്നാല്‍, ഇവയ്‌ക്കൊന്നും ഹരിപ്പാട്, അമ്പലപ്പുഴ തുടങ്ങിയ സ്റ്റേഷനുകളില്‍ സ്റ്റോപ്പുകള്‍ ഇല്ല. ചൊവ്വാഴ്ചകളില്‍ വൈകിട്ട് 3.45നുള്ള നിസാമുദ്ദീന്‍ സ്വര്‍ണ ജയന്തി എക്‌സ്പ്രസ്, വ്യാഴാഴ്ചകളില്‍ 4.13 നുള്ള നിസാമുദ്ദീന്‍ സൂപ്പര്‍ഫാസ്റ്റ് എക്‌സ്പ്രസ് എന്നിവയ്ക്കും കായംകുളം കഴിഞ്ഞാൽ പിന്നീട് സ്റ്റോപ്പ് ആലപ്പുഴയാണ്. രാത്രി 9.30 നുള്ള മാവേലി എക്‌സ്പ്രസ് ഹരിപ്പാട്‌നിന്നു പോയതിനുശേഷം പിന്നീട് എറണാകുളത്തേക്ക് പോകണമെങ്കില്‍ നേരിട്ടുള്ള ട്രെയിന്‍ രാവിലെ 5.30 നുള്ള ഏറനാട് എക്‌സ്പ്രസ് ആണ്. അമ്പലപ്പുഴ സ്റ്റേഷന്‍റെയും അവസ്ഥ ഇതുതന്നെയാണ്. അതായത് എട്ടുമണിക്കൂറോളം സമയം ട്രെയിനുകള്‍ ഇല്ല. എന്നാല്‍ ദിവസേന രാത്രി 2.30 ഓടെ ഇതുവഴി കടന്നുപോകുന്ന ചെന്നൈ-ഗുരുവായൂര്‍ എക്‌സ്പ്രസ് ഉണ്ട്. ഇതിനാവട്ടെ ഹരിപ്പാടും അമ്പലപ്പുഴയിലും കോവിഡിന് മുമ്പ് സ്റ്റോപ്പുകള്‍ ഉണ്ടായിരുന്നതാണ്. ഇത് പുനഃസ്ഥാപിക്കുകയാണെങ്കില്‍ പുലര്‍ച്ചെ എറണാകുളത്തുനിന്നു പോകുന്ന ദീര്‍ഘദൂര ട്രെയിനുകളിൽ പോകേണ്ടവര്‍ക്ക് വലിയ സഹായമാകും. നിലവില്‍ രാത്രി 8 മണിക്ക് എറണാകുളത്തുനിന്നുള്ള മെമു കഴിഞ്ഞാല്‍ 1.50നുള്ള മാവേലി എക്‌സ്പ്രസാണുള്ളത്. ആറുമണിക്കൂറോളം ആണ് ട്രെയിനുകള്‍ തമ്മിലുള്ള ഇടവേള. അതുപോലെ എറണാകുളത്തുനിന്നു രാവിലെ 6.30 നുള്ള തിരുവനന്തപുരം ഇന്‍റര്‍സിറ്റിക്ക് ശേഷം അടുത്ത ട്രെയിന്‍ 12.30 നുള്ള നേത്രാവതിയാണ്. എന്നാല്‍, ഞായര്‍, ചൊവ്വ, ബുധന്‍, ശനി ദിവസങ്ങളില്‍ രാവിലെ 11ന് എറണാകുളത്ത് എത്തി അമ്പലപ്പുഴ, ഹരിപ്പാട് വഴി തിരുവനന്തപുരം പോകുന്ന ട്രെയിനുകള്‍ ഉണ്ട്. എന്നാല്‍, ഇവ മൂന്നും നാലും ദിവസങ്ങള്‍ ഓടിയാണ് എറണാകുളം എത്തുന്നത്. അതിനാല്‍ത്തന്നെ പലപ്പോഴും മണിക്കൂറുകള്‍ വൈകിയാണ് ഇവയുടെ യാത്ര. തീരദേശ പാതയിലെ പ്രധാന റെയില്‍വേ സ്റ്റേഷനുകള്‍ ഏറെനേരവും ട്രെയിനുകള്‍ ഇല്ലാതെ വിജനമായിക്കിടക്കുകയാണ്. കൂടുതല്‍ ട്രെയിനുകളും സ്റ്റോപ്പുകളും അനുവദിച്ച് യാത്രാദുരിതം ഒഴിവാക്കണമെന്നും പാത ഇരട്ടിപ്പിക്കല്‍ വേഗത്തില്‍ ആക്കണമെന്നുമാണ് യാത്രക്കാരുടെ ആവശ്യം. റെയിൽവേ മന്ത്രിക്ക് കത്തു നൽകി കായംകുളം: ആലപ്പുഴ, കായംകുളം ഭാഗത്തേക്ക് സഞ്ചരിക്കുന്ന തീവണ്ടി യാത്രക്കാരുടെ യാത്രാക്ലേശം പരിഹരിക്കുന്നതിനും കായംകുളത്ത് വന്ദേഭാരത് ട്രെയിനിന് സ്റ്റോപ്പ് അനുവദിക്കുന്നതിന് നടപടി സ്വീകരിക്കണമെന്നും ആവശ്യപ്പെട്ട് യു. പ്രതിഭ എംഎൽഎ കേന്ദ്ര റെയിൽവേ മന്ത്രിക്കും സംസ്ഥാന പൊതുമരാമത്ത് വകുപ്പ് മന്ത്രിക്കും കേരളത്തിന്‍റെ റെയിൽവേയുടെ ചുമതല വഹിക്കുന്ന മന്ത്രിക്കും കത്തു നൽകി. തീരദേശപാതയിൽ കൂടുതൽ ട്രെയിനുകൾ അനുവദിക്കണമെന്നും കത്തിൽ ആവശ്യപ്പെട്ടു.

മതാധ്യാപക കൺവൻഷൻ

ചേർത്തല: എറണാകുളം-അങ്കമാലി അതിരൂപത വിശ്വാസ പരിശീലന വിഭാഗത്തിന്‍റെ ആഭിമുഖ്യത്തിൽ ചേർത്തല, പള്ളിപ്പുറം, വൈക്കം ഫൊറോനകളുടെ സഹകരണത്തോടെ നെെപുണ്യ കോളജിൽ മതാധ്യാപക കൺവൻഷൻ നടത്തി. വികാരി ജനറാൾ റവ.ഡോ. ആന്‍റോ ചേരാംതുരുത്തി ഉദ്‌ഘാടനം ചെയ്തു. മുട്ടം ഫൊറോന വികാരി ഫാ. ജോഷി വേഴപറമ്പിൽ അധ്യക്ഷത വഹിച്ചു. വൈക്കം ഫൊറോന ഡയറക്ടർ ഫാ. ടോണി കോട്ടയ്ക്കൽ, നൈപുണ്യ കോളജ് ഡയറക്ടർ ഫാ. വർഗീസ് പാലാട്ടി, അതിരൂപത ഡയറക്ടർ ഫാ. പോൾ മോറലി, ചേർത്തല ഫൊറോന ഡയറക്ടർ ഫാ. ജോസഫ് തെക്കിനേടത്ത് പള്ളിപ്പുറം ഫൊറോന ഡയറക്ടർ ഫാ. ജേക്കബ് കൊഴുവള്ളി, സിസ്റ്റർ അനി ജോർജ്, സജി വർഗീസ്, ജിജി മാത്യു, സജിത്ത് തോമസ് എന്നിവർ പ്രസംഗിച്ചു. റവ.ഡോ. മാർട്ടിൻ ശങ്കുരിക്കൽ, ഫാ. ആന്‍റണി നടുവത്തുശേരി, ബ്രദർ ആൻസൺ എന്നിവർ ക്ലാസുകൾ നയിച്ചു. സമാപന സമ്മേളനം മാർ തോമസ് ചക്യാത്ത് ഉദ്ഘാടനം ചെയ്തു.

ദാമോദരൻ കാളാശേരി അനുസ്മരണം നടത്തി

തുറവൂര്‍: മുന്‍ മന്ത്രിയും കെപിസിസി ജനറല്‍ സെക്രട്ടറിയുമായിരുന്ന ദാമോദരന്‍ കാളാശേരിയുടെ ആറാമത് അനുസ്മരണ സമ്മേളനം എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപി ഉത്ഘാടനം ചെയ്തു. പിന്നാക്കം നിൽക്കുന്ന ജനതയുടെ ഉന്നമനത്തിനായി ധീരമായി പോരാടിയ നേതാവായിരുന്നു കാളാശേരിയെന്നും അവരെ എന്നും ചേര്‍ത്തുനിര്‍ത്തുന്ന പാര്‍ട്ടിയാണെന്നുള്ളതിന്‍റെ തെളിവാണ് മല്ലികാര്‍ജുന ഖാര്‍ഗെ കോണ്‍ഗ്രസ് പ്രസിഡന്‍റായി തെരഞ്ഞെടുക്കപ്പെട്ടതെന്നും അദ്ദേഹം പറഞ്ഞു. ടൗണ്‍ ഈസ്റ്റ് മണ്ഡലം കോണ്‍ പ്രസിഡന്‍റ് പി. വിശ്വംഭരന്‍ പിള്ള അധ്യക്ഷത വഹിച്ചു. യുഡിഎഫ് ജില്ലാ ചെയര്‍മാന്‍ സി. ഷാജി മോഹന്‍, കെപിസിസി സെക്രട്ടറിമാരായ ബി. ബൈജു, എസ്.ശരത്, ഡിസിസി ജനറല്‍ സെക്രട്ടറിമാരായ അഡ്വ. സി.ഡി. ശങ്കര്‍, ആര്‍. ശശിധരന്‍, സജി കുര്യാക്കോസ് എന്നിവര്‍ പ്രസംഗിച്ചു.

ചേര്‍ത്തല താലൂക്ക് ആശുപത്രി; ആറുനില കെട്ടിടത്തിന്‍റെ നിര്‍മാണം പൂര്‍ത്തീകരണത്തിലേക്ക്

ആലപ്പുഴ: ചേര്‍ത്തല താലൂക്ക് ആശുപത്രിയുടെ നവീകരണ പ്രവ ൃത്തികളുടെ ഭാഗമായി നിര്‍മിക്കുന്ന ആറുനിലകളുള്ള അത്യാധുനിക ചികിത്സാസൗകര്യങ്ങളോടെയുള്ള കെട്ടിട സമുച്ചയത്തിന്‍റെ നിര്‍മാണം അവസാനഘട്ടത്തിലെത്തി. സെപ്റ്റംബര്‍ മാസത്തോടെ കെട്ടിട സമുച്ചയത്തിന്‍റെ ഉദ്ഘാടനം നടത്താനാണ് ലക്ഷ്യമിടുന്നതെന്ന് ആശുപത്രി അധികൃര്‍ അറിയിച്ചു. 80 ശതമാനം നിര്‍മാണവും പൂര്‍ത്തിയായി. കിഫ്ബിക്കാണ് നിര്‍മാണച്ചുമതല. 84 കോടി രൂപയാണ് നിര്‍മാണത്തിന് അനുവദിച്ചത്. ഒ.പി അനുബന്ധ സേവനങ്ങള്‍, കിടത്തിച്ചികിത്സാ സംവിധാനം, സര്‍ജറി വിഭാഗം, നാല് ഓപ്പറേഷന്‍ തിയേറ്ററുകള്‍, 30 കിടക്കകളുള്ള മൂന്ന് ഐസിയു, ജനറല്‍ സര്‍ജറി, ഓര്‍ത്തോ, ജനറല്‍ മെഡിസിന്‍, ഒഫ്താല്‍മോളജി, ഇഎന്‍ടി പീഡിയാട്രിക്, അനസ്‌തേഷ്യ, ഡെന്‍റല്‍, ഡെര്‍മറ്റോളജി വിഭാഗങ്ങള്‍, ഓക്‌സിലറി സേവനങ്ങള്‍, ലാബ്, എക്‌സ് റേ, ഫാര്‍മസി എന്നിവയാണു പുതിയതായി നിര്‍മിക്കുന്ന കെട്ടിട സമുച്ചയത്തില്‍ ഉണ്ടാവുകയെന്ന് ആശുപത്രി അധികൃതര്‍ അറിയിച്ചു. ചേര്‍ത്തല താലൂക്ക് ആശുപത്രിയില്‍ ദിനംപ്രതി 1500 ഓളം രോഗികള്‍ എത്തുന്നുണ്ട്. ചേര്‍ത്തലയിലെയും അരൂരിലെയും പാവപ്പെട്ട ജനങ്ങളുടെ ആശ്രയമാണ് ചേര്‍ത്തല താലൂക്ക് ആശുപത്രി. മുന്നൂറോളം ക്യാഷ്വാലിറ്റി, നൂറോളം കിടത്തിച്ചികിത്സ, ചെറുതും വലുതുമായി അറുപതോളം സര്‍ജറികള്‍ തുടങ്ങിയവ ദിനംപ്രതി ചേര്‍ത്തല ആശുപത്രിയില്‍ നടക്കുന്നുണ്ട്. നിലവില്‍ രോഗികളുടെ ആധിക്യം മൂലം വീര്‍പ്പുമുട്ടുന്ന സാഹചര്യത്തിലാണ് രോഗികള്‍ക്ക് മികച്ച സൗകര്യങ്ങള്‍ ഉറപ്പാക്കുന്നതിന്‍റെ ഭാഗമായി പുതിയ കെട്ടിടം നിര്‍മിക്കുന്നത്. മൂന്നുവര്‍ഷം മുമ്പ് ആരംഭിച്ച കെട്ടിട സമുച്ചയത്തിന്‍റെ സ്ട്രക്ചറല്‍ വര്‍ക്കുകള്‍ പൂര്‍ത്തിയായി. പെയിനന്‍റിംഗ് ഉള്‍പ്പെടെയുള്ള അനുബന്ധ ജോലികള്‍ മാത്രമാണ് ഇനി ബാക്കിയുള്ളതെന്നും അധികൃതര്‍ അറിയിച്ചു. ആശുപത്രിക്കു മുഴുവനായി വൈദ്യുതി കിട്ടുന്നതിനുള്ള സോളാര്‍ പാനലും പുതിയ കെട്ടിടത്തില്‍ ഒരുക്കും. ഇതിന്‍റെ നിര്‍മാണവും പുരോഗമിക്കുകയാണ്. മുഴുവന്‍ പ്രവര്‍ത്തനങ്ങളും എത്രയും വേഗം പൂര്‍ത്തിയാക്കി സെപ്റ്റംബറോടെ കെട്ടിടം നാടിന് സമര്‍പ്പിക്കുവാനാണ് അധികൃതര്‍ ലക്ഷ്യമിടുന്നത്.

കാത്തിരിപ്പ് കേന്ദ്രത്തിന് കളക്ടറേറ്റ് അനുമതി നിഷേധിച്ചു, യാത്രക്കാർ ദുരിതത്തിൽ ‌

ചെങ്ങന്നൂര്‍: കെഎസ്ആര്‍ടിസിയില്‍ താല്കാലിക കാത്തിരുപ്പ് കേന്ദ്രത്തിന്‍റെ നിര്‍മാണ പ്രവര്‍ത്തനങ്ങളുടെ അനുമതി കളക്ടര്‍ നിഷേധിച്ചു. കാത്തിരിപ്പുകേന്ദ്രം ഒരുക്കാന്‍ എംഎല്‍എയുടെ പ്രത്യേക വികസന ഫണ്ടില്‍നിന്ന് 4.40 ലക്ഷം രൂപയുടെ പദ്ധതിക്ക് അനുമതി തേടിയെങ്കിലും കളക്ടര്‍ ഇത് നിഷേധിച്ചു. എംഎല്‍എയുടെ പ്രത്യേക വികസന ഫണ്ടിന്‍റെ പരിധിയില്‍ കെഎസ്ആര്‍ടിസി ഉള്‍പ്പെടാത്തതാണ് അനുമതി നിഷേധിക്കാന്‍ കാരണമെന്ന് അദ്ദേഹം അറിയിച്ചു. യാത്രക്കാര്‍ ദുരിതത്തില്‍; വാഗ്ദാനങ്ങള്‍ പാഴ്‌വാക്ക് പുതിയ കെട്ടിടത്തിന്‍റെ നിര്‍മാണം തുടങ്ങുന്നതിനു മുന്നോടിയായി പഴയ കെട്ടിടം പൊളിച്ചുമാറ്റിയതോടെയാണ് യാത്രക്കാര്‍ക്ക് ആശ്രയമില്ലാതായത്. വെയിലില്‍നിന്നും മഴയില്‍നിന്നും രക്ഷപ്പെടാന്‍ സമീപത്തെ കടത്തിണ്ണകളിലും കെഎസ്ആര്‍ടിസിയുടെ ഗ്യാരേജിലേക്കും ഓടിക്കയറേണ്ട അവസ്ഥയിലാണ് ജനങ്ങള്‍. കൈക്കുഞ്ഞുങ്ങളുമായി യാത്ര ചെയ്യുന്നവരാണ് ഏറ്റവുമധികം ബുദ്ധിമുട്ടുന്നത്. കൂടാതെ, വെയിലും മഴയുമേല്‍ക്കാതെ ഒഴിഞ്ഞുമാറി നില്‍ക്കുന്നതിനാല്‍ ബസ് വരുമ്പോള്‍ പിന്നാലെ ഓടേണ്ടി വരുന്നതും അപകടകാരണമാകുന്നു. കെട്ടിടം പൊളിച്ചുമാറ്റിയ സ്ഥലം പൂര്‍ണമായും ചെളിക്കുണ്ടായി മാറിയിരിക്കുകയാണ്. യാത്രക്കാര്‍ക്ക് ആകെയുള്ള ആശ്വാസം ഒരു തണല്‍മരം മാത്രമാണ്, അതും ഏതു നിമിഷവും നിലംപൊത്താവുന്ന അവസ്ഥയിലാണെന്ന് യാത്രക്കാര്‍ ആശങ്കപ്പെടുന്നു. നിലവില്‍ ടാര്‍പോളിന്‍ വലിച്ചുകെട്ടിയ ഒരു ചെറിയ ഷെഡ് മാത്രമാണുള്ളത്. അതില്‍ നാല് പേര്‍ക്കുപോലും നില്‍ക്കാന്‍ കഴിയില്ല. മുന്‍പുണ്ടായിരുന്ന ഇരിപ്പിടങ്ങള്‍ പൊട്ടിപ്പൊളിഞ്ഞ നിലയില്‍ തുറന്ന സ്ഥലത്താണ് കിടക്കുന്നത്. കെട്ടിടം പൊളിച്ചാലുടന്‍ ദിവസങ്ങള്‍ക്കുള്ളില്‍ താല്‍ക്കാലിക ഷെഡ് നിര്‍മിക്കുമെന്ന അധികൃതരുടെ വാഗ്ദാനം പാഴ്‌വാക്കായി. വകുപ്പുമന്ത്രിക്ക് ഉള്‍പ്പെടെ നിരവധി പരാതികള്‍ അയച്ചിട്ടും ഒരു പരിഹാരവും നാളിതുവരെയായിട്ടും ഉണ്ടായിട്ടില്ല. കാത്തിരുപ്പ് കേന്ദ്രം നിര്‍മിക്കണമെന്നാവശ്യപ്പെട്ട് വിവിധ രാഷ്ട്രീയ സംഘടനകളുടെ നേതൃത്വത്തില്‍ സമരപരിപാടികളും നടന്നിരുന്നു. പുതിയ കെട്ടിടം; പുതിയ പ്രതീക്ഷകള്‍ 11.5 കോടി രൂപ ചെലവില്‍ 32,000 ചതുരശ്ര അടി വിസ്തീര്‍ണത്തിലാണ് പുതിയ കെട്ടിടസമുച്ചയം നിര്‍മിക്കുന്നത്. എംസി റോഡിന് അഭിമുഖമായി ഇരുനിലകളില്‍ സൂപ്രണ്ട് ബ്ലോക്കും, ബഥേല്‍ ജംഗ്ഷന്‍ - റെയില്‍വേ സ്റ്റേഷന്‍ റോഡരികില്‍ നാലുനിലകളില്‍ മെയിന്‍ ബ്ലോക്കുമാണു പുതുതായി നിര്‍മിക്കുക. ഫ്രണ്ട് ബ്ലോക്കിന്‍റെ മേല്‍ക്കൂര നിര്‍മാണം സിംഗപ്പൂര്‍ മാതൃകയിലാണ്. സ്റ്റേഷന്‍ മാസ്റ്റര്‍, കണ്‍ട്രോളിംഗ് ഇന്‍സ്‌പെക്ടര്‍ എന്നിവരുടെ ഓഫീസുകള്‍ ഗാരേജ് കം ഓഫീസ് കെട്ടിടത്തിലാണ് നിലവില്‍ പ്രവര്‍ത്തിക്കുന്നത്. 43 ബസുകളും രണ്ടു സ്വിഫ്റ്റ് ബസുകളുമായി 42 ഷെഡ്യൂളുകള്‍ ഇവിടെനിന്ന് ഓപ്പറേറ്റ് ചെയ്യുന്നുണ്ട്. തിങ്കള്‍, ശനി ദിവസങ്ങളില്‍ രണ്ട് അധിക സര്‍വീസുകളുമുണ്ട്. കാത്തിരിപ്പു കേന്ദ്രം അടിയന്തരമായി നിര്‍മിക്കും: മന്ത്രി സജി ചെറിയാന്‍ ചെങ്ങന്നൂര്‍ കെഎസ്ആര്‍ടിസിയില്‍ യാത്രക്കാര്‍ അനുഭവിക്കുന്ന ബുദ്ധിമുട്ടുകള്‍ക്ക് പരിഹാരമായി എംഎല്‍എയുടെ പ്രത്യേക വികസന ഫണ്ടില്‍ നിന്ന് 4.40 ലക്ഷം രൂപ മുടക്കി താല്‍ക്കാലിക കാത്തിരിപ്പ് കേന്ദ്രം നിര്‍മിക്കാനുള്ള പദ്ധതിക്ക്, എംഎല്‍എയുടെ പ്രത്യക വികസന ഫണ്ടിന്‍റെ പരിധിയില്‍ കെഎസ്ആര്‍ടിസി ഉള്‍പ്പെടാത്തതിനാലാണ് കളക്ടര്‍ അനുമതി നിഷേധിച്ചത്. ജനങ്ങളുടെ ബുദ്ധിമുട്ട് ധനകാര്യ വകുപ്പിന്‍റെ ശ്രദ്ധയില്‍പ്പെടുത്തി പ്രത്യേക അനുമതി വാങ്ങി കാത്തിരിപ്പു കേന്ദ്രം അടിയന്തരമായി നിര്‍മിക്കാനാണ് നിലവിലെ ശ്രമം. ഇതിന് സാധിച്ചില്ലായെങ്കില്‍ സ്‌പോണ്‍സര്‍മാരെ കണ്ടെത്തിയാണെങ്കിലും കാത്തിരിപ്പു കേന്ദ്രം അടിയന്തരമായി നിര്‍മിക്കും.

ഹോട്ടൽ ഉടമയുടെ കുടുംബത്തിന് പത്തു ലക്ഷം ധനസഹായം നൽകി കെഎച്ച്ആർഎ

കായംകുളം: സുരക്ഷാ പദ്ധതിയിൽ അംഗമായിരിക്കെ മരണപ്പെട്ട ഹോട്ടൽ ഉടമയുടെ കുടുംബത്തിനു പത്തുലക്ഷം രൂപയുടെ ധനസഹായം നൽകി കേരള ഹോട്ടൽ ആൻഡ് റസ്റ്ററന്‍റ് അസോസിയേഷന്‍റെ കൈത്താങ്ങ്. കായംകുളത്ത് ഹോട്ടൽ വ്യാപാരം നടത്തി മരണപ്പെട്ട ശശിധരൻ പിള്ളയുടെ കുടുംബത്തിനാണ് സുരക്ഷാ പദ്ധതി വഴി പത്തുലക്ഷം രൂപയുടെ ധനസഹായം നൽകിയത്. കെഎച്ച്ആർഎ കായംകുളം യൂണിറ്റ് സംഘടിപ്പിച്ച യോഗത്തിൽ ശശിധരൻ പിള്ളയുടെ കുടുംബത്തിന് അഡ്വ. യു. പ്രതിഭ എംഎൽഎ ധനസഹായം കൈമാറി. ഉന്നത വിജയം നേടിയ വിദ്യാർഥികൾക്കുള്ള അനുമോദനവും എംഎൽഎ നിർവഹിച്ചു . മെറിറ്റ് അവാർഡ് വിതരണം കായംകുളം ഡിവൈഎസ്പി ബാബുക്കുട്ടൻ നിർവഹിച്ചു. നഗരസഭ ചെയർപേഴ്‌സൺ പി. ശശികല മുഖ്യ അതിഥിയായി. കെഎച്ച്ആർഎ യൂണിറ്റ് പ്രസിഡന്‍റ് എസ്.കെ. നസീർ അധ്യക്ഷത വഹിച്ചു. സുരക്ഷാ പദ്ധതിയെ കുറിച്ച് സംസ്ഥാന സെക്രട്ടറി റോയ് മഡോണ വിശദീകരിച്ചു. ജില്ലാ സെക്രട്ടറി നാസർ ബി. താജ് മുഖ്യ പ്രഭാഷണം നടത്തി. ഉന്നത വിജയം നേടിയ ഹോട്ടൽ ഉടമകളുടെ മക്കൾക്കുള്ള അവാർഡ് വിതരണം ജില്ലാ പ്രസിഡന്‍റ് മനാഫ് എസ്. കുബാബ നിർവഹിച്ചു. മുതിർന്ന ഹോട്ടൽ ഉടമകളെ ചടങ്ങിൽ ആദരിച്ചു.

പുരസ്‌കാരം ലഭിച്ച അര്‍ത്തുങ്കല്‍ പോലീസ് സ്റ്റേഷന് ആദരവുമായി അര്‍ത്തുങ്കല്‍ സ്‌കൂളിലെ കുട്ടിപ്പട്ടാളം

ചേര്‍ത്തല: പ്രവര്‍ത്തന മികവിനുള്ള ബ്യൂറോ ഓഫ് ഇന്‍ഡ്യന്‍ സ്റ്റാന്‍ഡേര്‍ഡിന്‍റെ ഐഎസ്ഒ അംഗീകാരം ലഭിച്ച അര്‍ത്തുങ്കല്‍ പോലീസ് സ്റ്റേഷനിലെ ഉദ്യോഗസ്ഥരെ അര്‍ത്തുങ്കല്‍ സെന്‍റ് ഫ്രാന്‍സിസ് അസീസി ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികളും അധ്യാപകരും ചേര്‍ന്ന് ആദരിച്ചു. സ്‌കൂളിലെ ആര്‍മി എന്‍സിസി വിംഗ് കേഡറ്റ്‌സ്, സ്റ്റുഡന്‍റ് പോലീസ്, ജൂനിയര്‍ റെഡ്‌ക്രോസ്, സ്‌കൗട്ട് ആൻഡ് ഗൈഡ് എന്നീ സേനാ വിഭാഗങ്ങളില്‍ നിന്നുള്ള ഇരുനൂറോളം കേഡറ്റുകള്‍ വര്‍ണാഭമായ സല്യൂട്ടിനോടൊപ്പം പൊന്നാടയും പൂക്കളും നല്‍കി പോലീസ് ഉദ്യോഗസ്ഥരെ ആദരിച്ചു. സര്‍ക്കിള്‍ ഇന്‍സ്‌പെക്ടര്‍ പി.ജി. മധു, എസ്‌ഐ ഡി. സജീവ്കുമാര്‍ എന്നിവര്‍ ചേര്‍ന്ന് സ്റ്റേഷന്‍ പ്രവര്‍ത്തനങ്ങളെക്കുറിച്ചും നേട്ടത്തിനായി പിന്നിട്ട വഴികളെക്കുറിച്ചും കേഡറ്റുകളോട് സംവദിച്ചു. കുട്ടികള്‍ കലാപരിപാടികള്‍ അവതരിപ്പിച്ചും മധുര പലഹാരങ്ങള്‍ നല്‍കിയും വര്‍ണശബളമാക്കി. പ്രിന്‍സിപ്പല്‍ കെ.ജെ. നിക്‌സണ്‍, ഹെഡ്മാസ്റ്റര്‍ പി.എ. ജാക്‌സണ്‍, പിടിഎ പ്രസിഡന്‍റ് സുരേഷ് സെബാസ്റ്റ്യന്‍, എന്‍സിസി ഓഫീസര്‍ അലോഷ്യസ് ജോസഫ്, മെരിറ്റ ആന്‍റണി, സിനി, കെ.ഡബ്ല്യു. സെബാസ്റ്റ്യന്‍, സി.ജെ റോഷൻ‍, അനിമോള്‍, കെ.സി. മേരി ഗ്രെയ്‌സ്, കെ.എ. ഇഗ്‌നേഷ്യസ്, എ.എക്‌സ്. ജോസഫ്, നിഷ യേശുദാസ്, ആന്‍റണി ക്ലിന്‍റ്്, ടി.ജെ. തെരേസ, എ.എം. പ്രിന്‍സി, ആസ്റ്റ മരിയ എന്നിവര്‍ നേതൃത്വം നല്‍കി.

അര്‍ത്തുങ്കല്‍ പോലീസ് സ്റ്റേഷന് ദേശീയ പുരസ്‌കാരം

ചേര്‍ത്തല: ഐഎസ്ഒ മാനദണ്ഡങ്ങള്‍ പാലിച്ചു രാജ്യത്തു പ്രവര്‍ത്തിക്കുന്ന പോലീസ് സ്റ്റേഷനുകള്‍ക്ക് നല്‍കുന്ന ബിഐഎസ് അംഗീകാരം അര്‍ത്തുങ്കല്‍ പോലീസ് സ്റ്റേഷന് ലഭിച്ചതിന്‍റെ ഉദ്ഘാടനം സംസ്ഥാന പോലീസ് മേധാവി റവാഡ ആസാദ് ചന്ദ്രശേഖര്‍ നിര്‍വഹിച്ചു. കേന്ദ്ര സര്‍ക്കാരിന്‍റെ കീഴില്‍ പ്രവര്‍ത്തിക്കുന്ന ബ്യൂറോ ഓഫ് ഇന്ത്യന്‍ സ്റ്റാന്‍ഡേഡ്സ് രാജ്യത്തെ മികച്ച പോലീസ് സ്റ്റേഷനുകള്‍ക്ക് നല്‍കുന്ന അംഗീകാരമാണ് അര്‍ത്തുങ്കല്‍ പോലീസ് സ്റ്റേഷന് ലഭിച്ചിരിക്കുന്നത്. ഉന്നത പോലീസ് ഉദ്യോഗസ്ഥരുടെ സാന്നിധ്യത്തില്‍ നടന്ന പരിപാടിയില്‍ ബിഐഎസ് ഡപ്യൂട്ടി ഡയറക്ടര്‍ ജനറല്‍ സതേണ്‍ റീജിയണ്‍ പ്രവീണ്‍ ഖന്ന അര്‍ത്തുങ്കല്‍ പോലീസ് സ്റ്റേഷനില്‍ നടന്ന പരിപാടിയില്‍ സര്‍ട്ടിഫിക്കറ്റ് കൈമാറി. ക്രമസമാധാന ചുമതലയുള്ള എഡിജിപി എച്ച്. വെങ്കിടേഷ് അധ്യക്ഷനായി. സൗത്ത് സോണ്‍ ഐജി എസ്. ശ്യാം സുന്ദര്‍, എറണാകുളം റേഞ്ച് ഡിഐജി ഡോ. എസ്. സതീഷ് ബിനോ, ജില്ലാ പോലീസ് മേധാവി എം.പി. മോഹനചന്ദ്രന്‍, ചേര്‍ത്തല എഎസ്പി ഹരിഷ് ജയിന്‍ തുടങ്ങിയവര്‍ പങ്കെടുത്തു. അംഗീകാരത്തിനു മുന്നോടിയായി ചെന്നൈയിലെ ദക്ഷിണമേഖല ബ്യൂറോ ഓഫ് ഇന്ത്യന്‍ സ്റ്റാന്‍ഡേഡ്സ് ഓഫിസിലെ വിദഗ്ധ സംഘം ആറുമാസം മുന്‍പ് സ്റ്റേഷനിലെത്തി ആദ്യഘട്ട പരിശോധന നടത്തി. തുടര്‍ന്ന് ഒട്ടേറെ പരിശോധനകള്‍ക്കുശേഷം കഴിഞ്ഞ ദിവസമാണ് അംഗീകാരം നല്‍കിയത്. ക്രമസമാധാനപാലനം ഉള്‍പ്പെടെയുള്ള പ്രവര്‍ത്തനങ്ങളിലെ ഗുണമേന്മ, പരാതികള്‍ തീര്‍പ്പാക്കുന്നതിലെ വേഗത, അടിസ്ഥാന സൗകര്യങ്ങള്‍, ശുചിത്വം, ഹരിത പെരുമാറ്റച്ചട്ടം, ഫയലുകള്‍ സൂക്ഷിക്കുന്നതിലെ കൃത്യത, ഉദ്യോഗസ്ഥരുടെ മികച്ച പെരുമാറ്റം, ദൈനംദിന പ്രവര്‍ത്തനങ്ങളില്‍ ആധുനിക സംവിധാനം പ്രയോജനപ്പെടുത്തല്‍ തുടങ്ങിയ ഘടകങ്ങള്‍ പരിഗണിച്ചാണ് അംഗീകാരം.

മാന്നാര്‍ ബസ് സ്റ്റാന്‍ഡ് മോട്ടോർ വെഹിക്കിൾ ഉദ്യോഗസ്ഥർ എത്തി പരിശോധിച്ചു

മാന്നാര്‍: കാല്‍നൂറ്റാണ്ടു പിന്നിട്ടിട്ടും റോഡ് ട്രാന്‍സ്‌പോര്‍ട്ട് അഥോറിറ്റിയുടെ അംഗീകാരം ലഭിക്കാതിരുന്ന മാന്നാര്‍ ബസ് സ്റ്റാന്‍ഡ് മോട്ടോര്‍ വെഹിക്കിള്‍ ഉദ്യോഗസ്ഥര്‍ നേരിട്ടെത്തി പരിശോധിച്ചു. ആലപ്പുഴ ആര്‍ടിഒ ഡി. ജയരാജ്, ജോയിന്‍റ് ആര്‍ടിഒ പ്രസാദ് എന്നിവരാണ് മാന്നാര്‍ പഞ്ചായത്ത് പ്രസിഡന്‍റ് ടി.വി. രത്‌നകുമാരി, സെക്രട്ടറി ബോബി ഫ്രാന്‍സിസ്, മറ്റ് ഉദ്യോഗസ്ഥര്‍ എന്നിവരോടൊപ്പം സ്റ്റാന്‍ഡിലെത്തി പരിശോധന നടത്തിയത്. ഉദ്യോഗസ്ഥര്‍ ബസ് സ്റ്റാന്‍ഡില്‍ വരുത്തേണ്ട മാറ്റങ്ങള്‍ നിര്‍ദേശിച്ചു. പ്രവര്‍ത്തനം നിശ്ചലമായിരുന്ന ബസ് സ്റ്റാന്‍ഡിന്‍റെ പ്രവര്‍ത്തനം പുനരാരംഭിക്കുന്നതിനുള്ള യോഗം പഞ്ചായത്ത് ഓഫീസില്‍ നടന്നു. പഞ്ചായത്ത് പ്രസിഡന്‍റ് ടി.വി. രത്‌നകുമാരി അധ്യക്ഷയായി. അടിയന്തരമായി ചില പ്രവൃത്തികള്‍ നടപ്പിലാക്കുന്നതിനായി പഞ്ചായത്ത് ഫണ്ടില്‍ 10 ലക്ഷം രൂപ വകയിരുത്തിയതായി പ്രസിഡന്‍റ് യോഗത്തിൽ അറിയിച്ചു. ഈ പ്രവൃത്തികള്‍ കഴിഞ്ഞാലുടന്‍ ബസ് സ്റ്റാന്‍ഡിന്‍റെ പ്രവര്‍ത്തനം പുനരാരംഭിക്കുന്നതിന് താത്കാലിക അനുമതി ലഭിക്കുന്നതിന് ശിപാര്‍ശ ചെയ്യണമെന്ന് പ്രസിഡന്‍റ് ഉദ്യോഗസ്ഥരോട് ആവശ്യപ്പെട്ടു. ആര്‍ടിഒ ഡി. ജയരാജ്, ജോയിന്‍റ് ആര്‍ടിഒ പ്രസാദ്, മാന്നാര്‍ എസ്‌ഐ പ്രദീപ് ലാല്‍, സെക്രട്ടറി ബോബി ഫ്രാന്‍സിസ്, പിഡബ്ല്യുഡി ചെങ്ങന്നൂര്‍ എഇ എസ്. അഭിലാഷ്, പിഡബ്ല്യുഡി ഓവര്‍സിയര്‍ രാജ്‌മോഹന്‍, എംഎംബി ശ്യാംകുമാര്‍ എന്നിവര്‍ പങ്കെടുത്തു എം. ദേവരാജന്‍ നായര്‍ പഞ്ചായത്ത് പ്രസിഡന്‍റായിരിക്കെ 2000-ല്‍ പഞ്ചായത്ത് വാങ്ങിയ സ്ഥലത്ത് എസ്. രാമചന്ദ്രന്‍ പിള്ള എംപിയുടെ പ്രാദേശിക വികസന ഫണ്ടുപയോഗിച്ച് നിര്‍മിച്ച ബസ് സ്റ്റാന്‍ഡിന് 25 വയസായിട്ടും റോഡ് ട്രാന്‍സ്പോര്‍ട്ട് അഥോറിറ്റിയുടെ അംഗീകാരം ലഭിച്ചിട്ടില്ല. 2023-ല്‍ ആണ് അംഗീകാരത്തിനായി പഞ്ചായത്തധികൃതര്‍ അപേക്ഷ സമര്‍പ്പിച്ചത്. അന്ന് മോട്ടോര്‍ വെഹിക്കിള്‍ ഉദ്യോഗസ്ഥര്‍ സ്റ്റാന്‍ഡ് പരിശോധിച്ചിരുന്നു. തുടര്‍നടപടികള്‍ ഉണ്ടായില്ല. സാമൂഹിക പ്രവര്‍ത്തകനായ കുട്ടമ്പേരൂര്‍ സുരഭിയില്‍ പീടിയേക്കല്‍ പി. സുരേഷ് കുമാര്‍ ഹൈക്കോടതിയില്‍ ഹര്‍ജി നല്‍കിയിരുന്നു. ഹൈക്കോടതി ഇതിന്‍റെ വിവരങ്ങള്‍ കളക്ടറോട് ആവശ്യപ്പെട്ടതിനെത്തുടര്‍ന്നാണ് തുടര്‍ നടപടികള്‍ക്ക് വീണ്ടും ജീവന്‍വച്ചത്.

രണ്ട് പല്ല് അടപ്പിക്കാൻ ഇംഗ്ലണ്ടിൽനിന്ന് വിമാനം പിടിച്ച് ആളുകൾ കേരളത്തിൽ വരികയാണെന്ന് ധനമന്ത്രി കെ.എൻ. ബാലഗോപാൽ

ആലപ്പുഴ: കേരളത്തിന്‍റെ ആരോഗ്യമേഖലയെ പ്രകീര്‍ത്തിച്ച് ധനകാര്യ മന്ത്രി കെ.എന്‍. ബാലഗോപാല്‍. രണ്ടു പല്ലിന്‍റെ കേടടപ്പിക്കാന്‍ ഇംഗ്ലണ്ടില്‍ നിന്ന് വിമാനം പിടിച്ച് ആളുകള്‍ കേരളത്തില്‍ വരുന്നുണ്ടെന്ന് മന്ത്രി. വിദേശ രാജ്യത്തെ ചികിത്സാ ചെലവ് നോക്കുകയാണെങ്കില്‍ വിമാന ടിക്കറ്റും പിന്നെ മിച്ചവും വരുമെന്നും കെ .എന്‍ ബാലഗോപാല്‍ പറഞ്ഞു. സൗദി അറേബ്യയില്‍ വെച്ച് പൂച്ച മാന്തിയ തന്‍റെ ഒരു സുഹൃത്തിന്‍റെ കുട്ടിയുമായി ആ കുടുംബം വാക്‌സിനെടുക്കാന്‍ കേരളത്തിലാണ് വന്നതെന്നും മന്ത്രി ആലപ്പുഴയില്‍ പറഞ്ഞു. എച്ച്. സലാം എംഎല്‍എയുടെ വിദ്യാഭ്യാസ മെറിറ്റ് അവാര്‍ഡ് പൊന്‍തിളക്കം പരിപാടി ആലപ്പുഴ മെഡിക്കല്‍ കോളജ് ഓഡിറ്റോറിയത്തില്‍ ഉദ്ഘാടനം ചെയ്യുകയായിരുന്നു മന്ത്രി. വിദേശരാജ്യങ്ങളില്‍ ചികിത്സ ലഭിക്കണമെങ്കില്‍ മാസങ്ങളോളം കാത്തിരിക്കേണ്ടി വരുന്ന സാഹചര്യമുണ്ട്. കേരളത്തിലെ ആരോഗ്യമേഖലയെ കുറിച്ച് ഇപ്പോള്‍ ധാരാളം ചര്‍ച്ചകളാണ് നടക്കുന്നത്. എന്നാല്‍ നമ്മുടെ ആരോഗ്യരംഗം മികച്ച നേട്ടങ്ങളാണ് കൈവരിച്ചിട്ടുള്ളത് അദ്ദേഹം പറഞ്ഞു. സംസ്ഥാനത്തെ ആരോഗ്യ രംഗത്തിനു പുറമേ വിദ്യാഭ്യാസ രംഗത്തെ കുറിച്ചും മന്ത്രി പറയുകയുണ്ടായി. കേരളത്തില്‍ അങ്ങോളം വിദ്യാഭ്യാസ സ്ഥാപനങ്ങള്‍ നിർമിക്കാന്‍ കഴിഞ്ഞിട്ടുണ്ട്. സംസ്ഥാനം ഒരു വിദ്യാഭ്യാസ ഹബ്ബായി മാറിക്കഴിഞ്ഞു. കുട്ടികള്‍ക്കു ലോകത്ത് എവിടെ വേണമെങ്കിലും പോകാനുള്ള വിദ്യാഭ്യാസമാണ് നല്‍കുന്നത്. പണ്ടുള്ളതിനേക്കാള്‍ കൂടുതല്‍ പഠന സൗകര്യങ്ങളാണ് സംസ്ഥാനത്ത് ഇപ്പോള്‍ ഉള്ളതെന്നും മന്ത്രി കൂട്ടിച്ചേര്‍ത്തു. 2500 ഓളം കുട്ടികള്‍ വിദേശ രാജ്യങ്ങളില്‍നിന്ന് കേരളത്തിലെ സര്‍വകലാശാലയിലെത്തിയാണ് എൻറോള്‍ ചെയ്യുന്നത്. ലോകത്തെ ഏറ്റവും വലിയ കപ്പലടുക്കുന്ന വിഴിഞ്ഞം തുറമുഖം നിര്‍മിക്കാന്‍ കേന്ദ്ര സര്‍ക്കാരില്‍നിന്ന് ഒരു രൂപ പോലും കിട്ടിയില്ലെന്നും മന്ത്രി പറഞ്ഞു. എച്ച്.സലാം എംഎല്‍എ അധ്യക്ഷത വഹിച്ചു.

വനിതാ ശിൽപശാല സംഘടിപ്പിച്ചു

പൂച്ചാക്കല്‍: സിപിഎം ചേര്‍ത്തല ഏരിയ കമ്മിറ്റിയുടെ നേതൃത്വത്തിൽ ഏരിയാ വനിതാ ശില്പശാല സംഘടിപ്പിച്ചു. ഏരിയ, മേഖല തലത്തിലുള്ള മഹിളാ അസോസിയേഷന്‍ അംഗങ്ങളും ജനപ്രതിനിധികളും പങ്കെടുത്തു. ഒറ്റപ്പുന്നയിലെ തിരുനെല്ലൂര്‍ ബാങ്ക് ഓഡിറ്റോറിയത്തില്‍ നടന്ന പരിപാടി സിപിഎം സംസ്ഥാന കമ്മറ്റിയംഗം അഡ്വ. കെ. പ്രസാദ് ഉദ്ഘാടനം ചെയ്തു. അസോസിയേഷന്‍ ഏരിയാ പ്രസിഡന്‍റ് ധന്യാ ജയദേവ് അധ്യക്ഷയായി. ജില്ലാ സെക്രട്ടേറിയറ്റ് അംഗം എ.എം. ആരിഫ്, ഏരിയാ സെക്രട്ടറി ബി. വിനോദ്, പി.എം. പ്രമോദ്, ഷേര്‍ളി ഭാര്‍ഗവന്‍, ഏലിക്കുട്ടി ടീച്ചര്‍ എന്നിവര്‍ സംസാരിച്ചു. ചടങ്ങില്‍ മഹിളാ അസോസിയന്‍ ഏരിയാ സെക്രട്ടറി ദീപാ സജീവ് നന്ദി പറഞ്ഞു.

തണ്ണീര്‍മുക്കം പഞ്ചായത്ത് മന്ദിരനവീകരണം ആരംഭിച്ചു; അശാസ്ത്രീയത ആരോപിച്ച് കോണ്‍ഗ്രസും ബിജെപിയും

ചേര്‍ത്തല: തണ്ണീര്‍മുക്കം ഗ്രാമപഞ്ചായത്തിന്‍റെ പുതിയ മന്ദിരത്തിന്‍റെ നിര്‍മാണവുമായി ബന്ധപ്പെട്ട് ഭരണ-പ്രതിപക്ഷ തര്‍ക്കം. ഗ്രാമപഞ്ചായത്തിന്‍റെ തനതു ഫണ്ടില്‍നിന്ന് 50 ലക്ഷം രൂപ മുടക്കിയാണ് മന്ദിരം നിര്‍മിക്കുന്നത്. പണി ആരംഭിക്കുകയും ചെയ്തു. ഈ ഘട്ടത്തിലാണ് കോണ്‍ഗ്രസും ബിജെപിയും നിര്‍മാണത്തിലെ അശാസ്ത്രീയത ചൂണ്ടിക്കാട്ടി രംഗത്തെത്തിയിരിക്കുന്നത്. ഇക്കാര്യം ചൂണ്ടിക്കാട്ടി ഇരുപാര്‍ട്ടികളും പഞ്ചായത്തു സെക്രട്ടറിക്കു കത്തു നല്‍കിയതോടെ നിര്‍മാണം പ്രതിസന്ധിയിലാകുന്ന സാഹചര്യം ഉടലെടുത്തു. അപകടകരമായ നിര്‍മാണമാണ് നടക്കുന്നതെന്നും ഇതിന് കോണ്‍ഗ്രസ് പിന്തുണ നല്‍കില്ലെന്നും കാട്ടി മാത്യു കൊല്ലേലി, ടി.ടി. സാജു, കെ.ജെ. ഷീല, പി.ജെ. തോമസ്, സി.എ. ഗ്രേസി എന്നിവരും ബിജെപി അംഗങ്ങളായ കെ.ബി. ഷാജിമോന്‍, ഗിരീഷ് മാലേപറമ്പില്‍, ഇ.പി. ബിനു എന്നിവരുമാണ് പഞ്ചായത്തു സെക്രട്ടറിക്കു കത്തു നല്‍കിയിരിക്കുന്നത്. വിദഗ്ധ സമിതി പരിശോധിക്കണമെന്ന് നിലവിലെ മന്ദിരത്തിനു മുകളിലേക്കാണ് നിര്‍മാണം നടക്കുന്നത്. നാല്പതിലേറെ വര്‍ഷം പഴക്കമുള്ള കെട്ടിടത്തിന്‍റെ മുകളിലേക്ക് പണിയുന്നതു തീര്‍ത്തും അശാസ്ത്രീയവും അത് കെട്ടിടത്തിനു ബലക്ഷയം വരുത്തുമെന്നുമാണ് പ്രതിപക്ഷത്തിന്‍റെ നിലപാട്. മണ്‍കട്ടയും കുമ്മായവും ഉപയോഗിച്ച് പണിതിരിക്കുന്ന മന്ദിരം സ്ഥിതി ചെയ്യുന്നത് വേമ്പനാട്ടു കായൽ തീരത്താണ്. ഇത് അപകടമാകുന്ന സാഹചര്യമാണെന്നാണ് പ്രതിപക്ഷ കക്ഷികള്‍ ചൂണ്ടിക്കാട്ടുന്നത്. ഇക്കാര്യത്തില്‍ വിദഗ്ധ സമിതി രൂപീകരിച്ച് പഠനം നടത്തണമെന്നാണ് കോണ്‍ഗ്രസും ബിജെപിയും ആവശ്യപ്പെടുന്നത്. നിര്‍മാണ പ്രവൃത്തികള്‍ നിര്‍ത്തിവയ്ക്കണമെന്നും പഞ്ചായത്ത് കമ്മിറ്റി വിളിച്ചു ചേര്‍ത്ത് വിഷയം ചര്‍ച്ച ചെയ്യണമെന്നും ഇരു പാര്‍ട്ടികളും കത്തില്‍ ആവശ്യപ്പെട്ടിട്ടുണ്ട്. പ്രതിപക്ഷവും അംഗീകരിച്ചത് നിലവില്‍ നടക്കുന്നത് പ്രതിപക്ഷവും അംഗീകരിച്ച നിര്‍മാണ പ്രവ ൃത്തികളാണെന്ന് സിപിഎം ഭരണസമിതി വ്യക്തമാക്കി. നിലവിലെ നിര്‍മാണ പ്രവൃ‍ത്തികള്‍ അംഗീകരിച്ച പഞ്ചായത്തു കമ്മിറ്റിയില്‍ പ്രതിപക്ഷ കക്ഷികളാരും എതിരഭിപ്രായം രേഖപ്പെടുത്തിയിട്ടില്ലെന്നും ഭരണ സമിതി അറിയിച്ചു. എന്‍ജിനിയറിംഗ് വിഭാഗത്തിന്‍റെ പരിശോധനയ്ക്കുശേഷവും അവരുടെ നിര്‍ദേശങ്ങള്‍ സ്വീകരിച്ചുമാണ് നിര്‍മാണം നടക്കുന്നതെന്നും നിര്‍മാണം ആരംഭിച്ച ഉന്നയിക്കുന്ന ഈ ആരോപണങ്ങളില്‍ കഴമ്പില്ലെന്നും ഭരണ സമിതി വാദിക്കുന്നു. സാങ്കേതിക കാര്യങ്ങളെല്ലാം പരിശോധിച്ച് വിദഗ്ധരുടെ മേല്‍നോട്ടത്തില്‍ പ്രവര്‍ത്തനം പുരോഗമിക്കുന്ന ഘട്ടത്തിലെ പരാതിക്കു പിന്നില്‍ തിരഞ്ഞെടുപ്പ് അടുത്തതിന്‍റെ രാഷ്ട്രീയക്കളിയാണെന്നും ഭരണ സമിതി കുറ്റപ്പെടുത്തുന്നു. നാടിന്‍റെ വികസനത്തിനായി നടത്തുന്ന പദ്ധതികള്‍ക്ക് ജനകീയ പിന്തുണയേറുന്ന സാഹചര്യത്തില്‍ ആശയക്കുഴപ്പുമുണ്ടാക്കാനുള്ള രാഷ്ട്രീയക്കളിയാണ് പരാതികള്‍ക്കു പിന്നിലെന്നും സിപിഎം ഭരണസമിതി പറഞ്ഞു. മന്ദിരത്തില്‍ നേരിടുന്ന അസൗകര്യങ്ങളെക്കുറിച്ച് പരാതിയുയര്‍ത്തിയവര്‍ അവരുള്‍പ്പെടുന്ന പഞ്ചായത്ത് കമ്മിറ്റി അനുമതി നല്‍കിയ പ്രവര്‍ത്തനത്തിനെതിരേയാണ് നിലവില്‍ രംഗത്തു വന്നിരിക്കുന്നതെന്നും ആരോപണങ്ങള്‍ക്കു മറുപടിയായി ഭരണ സമിതി അറിയിച്ചു.

കെപി റോഡ് ദേശീയപാതയായി പ്രഖ്യാപിക്കണമെന്ന ആവശ്യവുമായി സർക്കാർ ‌

ചാരുംമുട്: തിരക്കേറിയ കായംകുളം-പുനലൂര്‍ കെ.പി റോഡിനെ ദേശീയപാതയായി പ്രഖ്യാപിക്കണമെന്ന ആവശ്യവുമായി സംസ്ഥാന സര്‍ക്കാര്‍ കേന്ദ്രസര്‍ക്കാരിനു കത്തു നല്‍കി. വിശദമായ റിപ്പോര്‍ട്ട് സഹിതം മുഖ്യമന്ത്രി പിണറായി വിജയന്‍ കേന്ദ്ര ഉപരിതല ഗതാഗത മന്ത്രി നിധിന്‍ ഗഡ്കരിക്കാണ് കത്ത് നല്‍കിയത്. ഭാരത്‌മാല പദ്ധതിയില്‍ കെ.പി റോഡ് 30 മീറ്റര്‍ വീതിയില്‍ നിര്‍മിക്കുമെന്ന് കേന്ദ്രം രണ്ടുവര്‍ഷം മുമ്പ് പ്രഖ്യാപിച്ചിരുന്നു. ഭാരത് മാല പദ്ധതി നിര്‍ത്തലാക്കിയെങ്കിലും സാധ്യതാ സര്‍വേ ദേശീയപാത അധികൃതര്‍ പൂര്‍ത്തിയാക്കിയിരുന്നു. ആലപ്പുഴ, പത്തനംതിട്ട, കൊല്ലം ജില്ലകളിലൂടെ കടന്നുപോകുന്ന കെപി റോഡ് സംസ്ഥാനപാത അഞ്ച്, എട്ട്, ദേശീയപാതകളായ 66, 183, 183 എ 744, എംസി റോഡ് എന്നിവയെ ബന്ധിപ്പിച്ചാണ് കടന്നുപോകുന്നത്. കെപി റോഡിന്‍റെ വികസനം തടസപ്പെടാതെ ദേശീയപാത 66ലേക്ക് നേരിട്ടു കടക്കുന്ന തരത്തില്‍ ദേശീയപാത 66ന്‍റെ രൂപകല്പനയില്‍ മാറ്റം വരുത്തണമെന്ന് കേന്ദ്ര ഉപരിതല ഗതാഗത മന്ത്രിക്ക് കൊടിക്കുന്നില്‍ സുരേഷ് എംപി നേരത്തേ കത്തു നല്‍കിയിരുന്നു. മധ്യതിരുവിതാംകൂറിലെ ഏറ്റവും പ്രധാനപ്പെട്ടതും തിരക്കേറിയതുമായ കായംകുളത്തുനിന്ന് ആരംഭിച്ച്, ചാരുംമൂട്, അടൂര്‍, പത്തനാപുരം, പുനലൂര്‍ വഴി തൂത്തുക്കുടിയിലേക്ക് പുതിയ ദേശീയപാത എന്ന ആവശ്യമാണ് കേന്ദ്രമന്ത്രി നിതിന്‍ ഗഡ്കരിക്ക് മുന്നില്‍ കൊടിക്കുന്നില്‍ നല്‍കിയ നിവേദനത്തില്‍ ആവശ്യപ്പെട്ടത്. ഇപ്പോള്‍ സംസ്ഥാന സര്‍ക്കാരും കത്ത് നല്‍കിയതോടെ കെ.പി റോഡ് ദേശീയപാത ആക്കാനുള്ള നടപടികള്‍ വേഗത്തിലാകുമെന്ന പ്രതീക്ഷയാണുള്ളത്. കായംകുളം മുതല്‍ പുനലൂര്‍ വരെയുള്ള 57 കിലോമീറ്റര്‍ ദൂരത്തിന്‍റെ പ്രാഥമിക സര്‍വ്വേ നടപടികള്‍ ദേശീയപാത വിഭാഗം നടത്തിയിരുന്നു. ദേശീയപാത 66 ല്‍ നിന്നും കായംകുളം കെഎസ്ആര്‍ടിസി ജംഗ്ഷനില്‍നിന്ന് ആരംഭിച്ച് ചാരുംമൂട്, നൂറനാട്, ആദിക്കാട്ടുകുളങ്ങര, പഴകുളം, അടൂര്‍, ഏഴംകുളം, പത്തനാപുരം വഴി പുനലൂരില്‍ എത്തിച്ചേരുന്ന തരത്തിലാണ് അലൈന്‍മെന്‍റ് സര്‍വേ നടന്നത്. തമിഴ്‌നാടിന്‍റെ ഭാഗമായ തൂത്തുക്കുടി, തിരുനെല്‍വേലി, മധുരൈ രാജപാളയം, തെങ്കാശി എന്നിവിടങ്ങളെ മധ്യകേരളത്തിലെ പ്രധാന പാതയായ ദേശീയപാത 66 ലേക്ക് നേരിട്ട് ബന്ധിപ്പിക്കുന്ന റോഡ് കൊല്ലം-തേനി ദേശീയപാത 183, ഭരണിക്കാവ്- മുണ്ടക്കയം ദേശീയപാത 183 എ, തിരുവനന്തപുരം- അങ്കമാലി മെയിന്‍ സെന്‍ട്രല്‍ റോഡ്, പുനലൂര്‍ മൂവാറ്റുപുഴ സംസ്ഥാനപാത, കൊല്ലം - തിരുമംഗലം ദേശീയപാ 744 എന്നീ പാതകളില്‍ വേഗത്തിലുള്ള കണക്ടിവിറ്റി ലഭ്യമാക്കും. തൂത്തുക്കുടിയില്‍ ദേശീയപാത 138 വഴിയാണ് പാത കടന്നു പോകുന്നത്. കേരളത്തിന്‍റെ ഭാഗത്ത് കായംകുളം മുതല്‍ പുനലൂര്‍ വരെയുള്ള ഭാഗത്തെ റോഡാണ് ദേശീയപാതയായി ഉയര്‍ത്തേണ്ടത്. ദേശീയപാത വിഭാഗം നടത്തിയ സര്‍വേയില്‍ നിലവിലുള്ള റോഡില്‍ വാഹനഗതാഗതം വളരെക്കൂടുതലായതിനാല്‍ പുതുതായി നാലുവരിപ്പാതയ്ക്കാണു പദ്ധതി തയാറാക്കുന്നത്. പാതയില്‍ രണ്ടു പ്രധാന പാലങ്ങള്‍ പുതുതായി വേണ്ടിവരും. ചാരുംമൂട് ജംഗ്ഷനില്‍ ഫ്‌ളൈ ഓവറോടുകൂടിയ റോഡും അടൂര്‍ ഹൈസ്‌കൂള്‍ ജംഗ്ഷന്‍ വികസനവും പാതയുടെ ഭാഗമായി വേണ്ടി വരുമെന്ന് സര്‍വേയില്‍ പറഞ്ഞിരുന്നു.

അച്ഛൻ പ്ലസ് ടു തുല്യതാ പരീക്ഷ എഴുതുന്ന അതേ സ്കൂളിൽ മകൾ പത്താം ക്ലാസ് തുല്യതാ പരീക്ഷ പരിശീലന ക്ലാസിൽ

ആലപ്പുഴ: അച്ഛൻ പ്ലസ് ടൂ തുല്യതാ പരീക്ഷ എഴുതുന്ന അതേ സ്കൂളിൽ മകൾ പത്താം ക്ലാസ് തുല്യതാ പരീക്ഷ പരിശീലന ക്ലാസിൽ. പുറക്കാട് പഞ്ചായത്ത് 11ആം വാർഡിൽ മല്ലേപ്പള്ളി എം.കെ രമണനാ(72) ണ് അമ്പലപ്പുഴ കെ.കെ.ക ുഞ്ചുപിള്ള ഹയർ സെക്കൻഡറി സ്കൂളിൽ ഞായറാഴ്ച പ്ലസ് ടു തുല്യത രണ്ടാമത്തെ പരീക്ഷ എഴുതാൻ എത്തിയത്. ഇതേ സ്കൂളിലെ മറ്റൊരു കെട്ടിടത്തിലാണ് മകൾ സുമോൾ(44) പത്താം ക്ലാസ് തുല്യതാ പരീക്ഷ പരിശീലന ക്ലാസിനെത്തിയത്. പത്താം ക്ലാസ് ജയിച്ചശേഷം ഡിഗ്രിക്കും തുടര്‍ന്ന് എൽഎൽബിക്കും പഠിക്കണമെന്നായിരുന്നു രമണന്‍റെ ആഗ്രഹം. എന്നാൽ വീട്ടിലെ പ്രാരാബ്ധങ്ങൾ കാരണം പഠനം മതിയാക്കേണ്ടി വന്നു. തന്‍റെ ആഗ്രഹം ഇനിയെങ്കിലും പൂർത്തിയാക്കണമെന്ന ദൃഡനിശ്ചയത്തോടെയാണ് പ്ലസ് ടു തുല്യതാ പരീക്ഷ എഴുതുന്നത്. ശേഷം ഡിഗ്രിയും എല്‍എല്‍ബിയും എടുക്കുമെന്ന ആത്മവിശ്വാസത്തിലാണ് രമണന്‍. ഭാര്യ രത്നമ്മയുടെയും മക്കളുടെയും പിന്തുണ കൂടിയായപ്പോൾ തുടർപഠനത്തിനൊരു ആവേശവുമായി. പല്ലന എംകെകെഎംഎച്ച്എസിൽനിന്ന് ഒമ്പതാം ക്ലാസ് വിജയിച്ചെങ്കിലും അമ്മ രത്നമ്മയുടെ ആരോഗ്യപ്രശ്നങ്ങളാൽ സുമോളിന്‍റെ തുടർപഠനം പ്രതിസന്ധിയിലായി. കിടപ്പിലായ അമ്മയുടെ പരിചരണത്തിനായാണ് തുടർ പഠനം മതിയാക്കേണ്ടിവന്നത്. കൂട്ടുകാരികൾ സ്കൂളിൽ പോകുമ്പോൾ തന്‍റെ വിധിയെ പഴിക്കാനേ സുമോൾക്കായുള്ളു. വിവാഹശേഷവും തന്‍റെ ആഗ്രഹം ഭർത്താവ് അനുജയുമായി പങ്കിടുമായിരുന്നു. ഭർത്താവിന്‍റെ നിർബന്ധത്തിലാണ് പത്താം ക്ലാസ് എഴുതിയെടുക്കണമെന്ന ആഗ്രഹം നാമ്പിട്ടത്. ഇതിനുശേഷം പ്ലസ് ടു തുല്യതയും പഠിക്കും. സുമോളിന്‍റെ മകള്‍ ആര്യ ബംഗളരൂരില്‍ നഴ്സിംഗ് പഠിക്കുകയാണ്. അമ്മയുടെ ആഗ്രഹത്തിന് പ്രേരണയായി മകളുമുണ്ട്.

ഖാദി നെയ്ത്തുതറ കാടുപിടിച്ചു; പ്രവർത്തനം നിലച്ചിട്ട് 20 വർഷം

പൂച്ചാക്കൽ: പള്ളിപ്പുറത്ത് കളത്തിൽ കലുങ്കിനു സമീപത്തെ ഖാദി ആൻഡ് വില്ലേജ് ഇൻഡസ്ട്രീസ് ബോർഡിന്‍റെ സഹകരണ സംഘത്തിൽ കുറേ വർഷങ്ങളായി വിളയുന്നത് കശുവണ്ടിയും മുന്തിയ ഇനം വിഷമുള്ള പാമ്പും. പ്രവർത്തനം നിലച്ചിട്ട് 20 വർഷം കഴിയുന്നു. സ്ഥാപനത്തിന്‍റെ മേൽക്കൂരയും നിലംപൊത്തി. ഇനി അവശേഷിക്കുന്ന കെട്ടിടത്തിന്‍റെ ചുവരുകൾ മാത്രം. 1982ൽ തൈക്കാട്ടുശേരി ബ്ലോക്ക് പഞ്ചായത്ത് പരിധിയിൽ പള്ളിപ്പുറത്ത് 110 അംഗങ്ങൾ ചേർന്ന് 25 സെന്‍റ് സ്ഥലം വാങ്ങി ഖാദി ആൻഡ് വില്ലേജ് ഇൻഡസ്ട്രിസ് ബോർഡിൽ അഫിലിയേറ്റ് ചെയ്യുകയും വായ്പ എടുത്ത് കെട്ടിടം നിർമിച്ച് തറിയും മുസ്‌ലിൻ ചർക്ക ഉൾപ്പെടെയുള്ള ഉപകരണങ്ങൾ വാങ്ങി പ്രവർത്തനം ആരംഭിച്ചു. മാറ്റം വരുത്തിയില്ല ബോർഡിൽനിന്നു പഞ്ഞി വാങ്ങി നൂലുണ്ടാക്കി വസ്ത്രം നെയ്തെടുക്കുന്ന പ്രവർത്തനമാണ് ഇവിടെ നടന്നിരുന്നത്. രാഘവേന്ദ്ര കമ്മത്ത് മാനേജരായും കമലാക്ഷൻ പിള്ള, സി.കെ. സദാശിവൻ തുടങ്ങിയവരുടെ നേതൃത്വത്തിലാണ് ആദ്യകാല പ്രവർത്തനം മുന്നോട്ടുപോയിരുന്നത്. നൂറുകണക്കിന് തൊഴിലാളികൾക്ക് തൊഴിൽ നൽകി പ്രവർത്തിച്ചുവന്ന സംഘത്തിന്‍റെ പ്രവർത്തനം കൂടുതൽ വിപുലമാക്കാൻ വേണ്ടി പാണാവള്ളി ഓടമ്പള്ളിയിൽ 10 സെന്‍റ് സ്ഥലം വാങ്ങി. എന്നാൽ, കാലാനുസൃതമായ മാറ്റം വരുത്താനോ പുരോഗമന ആശയങ്ങൾ നടപ്പിലാക്കാൻ ഖാദി ബോർഡ് തയാറാകാതെ വന്നതോടെ ഉത്പന്നങ്ങൾക്ക് വിപണി കൈയടക്കാൻ പറ്റാതെവന്നു. അതൊടെ ലക്ഷങ്ങളുടെ നഷ്ടങ്ങൾ ഉണ്ടായി. അതോടെ 20 വർഷങ്ങൾക്ക് മുമ്പ് സംഘത്തിന്‍റെ പ്രവർത്തനം പൂർണമായുംനിന്നു. ഖാദി ബോർഡ് ചേർത്തല താലൂക്കിൽ സമാനമായി പ്രവർത്തിച്ചുവന്ന തുറവൂരിലെയും ചേർത്തല സൗത്തിലെയും സംഘങ്ങൾ അടച്ചുപൂട്ടി. പള്ളിപ്പുറത്തെ സംഘത്തിന് ഖാദി ബോർഡിൽനിന്നെടുത്ത 10 ലക്ഷം രൂപയുടെ വായ്പ കുടിശിക നിലനിൽക്കുന്നുണ്ട്. എന്നാൽ, സംഘത്തിന് എഴുപത് ലക്ഷത്തിൽ മേൽവിലയുള്ള ഭൂമി സ്വന്തമായിട്ടുണ്ട്. സഘം ഖാദി ബോർഡ് ഏറ്റെടുത്ത് പ്രവർത്തനം ആരംഭിക്കണമെന്നാണ് നിലവിലെ അംഗങ്ങളുടെ ആവശ്യം. പരമ്പരാഗതമായ രീതിയിൽ പൂർണമായും മനുഷ്യ അധ്വാനം കൊണ്ടു മാത്രമാണ് ഖാദി സംഘങ്ങളിൽ ഉത്പാദനം നടക്കുന്നത്. എന്നാൽ, ഇത് ഉത്പാദനച്ചെലവ് കൂടുകയും ഉത്പന്നങ്ങൾക്ക് മറ്റു കമ്പനികളുമായി വിലയിൽ മത്സരിക്കാൻ കഴിയാതാവുകയും ചെയ്തു. തൊഴിലാളികൾക്ക് മെച്ചപ്പെട്ട കൂലികൊടുക്കാൻ പറ്റാതെവന്നതോടെ തൊഴിലാളികൾ മറ്റു തൊഴിൽ തേടിപ്പോയതോടെ സംഘം തകർച്ചയ്ക്കു കാരണമായി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]