ADVERTISEMENT

ADVERTISEMENT

കോണ്‍ഗ്രസ് മുള്ളൻകൊല്ലി മണ്ഡലം: ഭാരവാഹികൾ ചുമതലയേറ്റു

മുള്ളൻകൊല്ലി: കോണ്‍ഗ്രസ് മണ്ഡലം കമ്മിറ്റിയുടെ പുതിയ ഭാരവാഹികൾ ചുമതലയേറ്റു. സ്ഥാനാരോഹണച്ചടങ്ങ് ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ഷിനോ തോമസ് കടുപ്പിൽ അധ്യക്ഷത വഹിച്ചു.

കെപിസിസി നിർവാഹക സമിതി അംഗം കെ.എൽ. പൗലോസ്, ഡിസിസി സെക്രട്ടറിമാരായ അഡ്വ.പി.ഡി. സജി, ബീന ജോസ്, മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ്, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് വർഗീസ് മുരിയൻകാവിൽ എന്നിവർ പ്രസംഗിച്ചു.

ADVERTISEMENT

ബത്തേരി ഗവ.കോളജ് യാഥാർഥ്യമാക്കണം: കെ.ജെ. ദേവസ്യ

സുൽത്താൻ ബത്തേരി: 2016-17ൽ എൽഡിഎഫ് സർക്കാർ ബജറ്റിൽ പ്രഖ്യാപിച്ച ബത്തേരി ഗവ.ആർട്സ് ആൻഡ് സയൻസ് കോളജ് യാഥാർഥ്യമാക്കണമെന്ന് കേരള കോണ്‍ഗ്രസ്-എം സംസ്ഥാന ജനറൽ സെക്രട്ടറി കെ.ജെ. ദേവസ്യ പ്രസ്താവനയിൽ ആവശ്യപ്പെട്ടു. ഇക്കാര്യത്തിൽ ഉദാസീനത തുടർന്നാൽ ശക്തമായ സമരം സംഘടിപ്പിക്കും. തത്പര കക്ഷികൾ നടത്തുന്ന ചരടുവലികളാണ് ഗവ.കോളജ് പ്രവർത്തനം ആരംഭിക്കാത്തതിന് കാരണം. കോളജ് വിഷയത്തിൽ സ്ഥലം എംഎൽഎ ഉൾപ്പെടെ ജനപ്രതിനിധികൾ ഉത്തരവാദിത്തം നിറവേറ്റുന്നില്ല. കോളജിനാവശ്യമായ സ്ഥലം നഗരത്തിനടുത്ത് സർക്കാർ ഉടമസ്ഥതയിൽ ഉണ്ട്. കോളജിന് താത്കാലിക സൗകര്യം ഒരുക്കാൻ തദ്ദേശ സ്ഥാപനങ്ങളും സുമനസുകളും ഒരുക്കമാണ്. ബന്ധപ്പെട്ടവർ ഇത് കണ്ണുതുറന്ന് കാണണമെന്നും ദേവസ്യ ആവശ്യപ്പെട്ടു.

അനിശ്ചിതകാല സ്വകാര്യ ബസ് സമരം വിജയിപ്പിക്കാൻ തീരുമാനം

കൽപ്പറ്റ: വിദ്യാർഥികളുടെ യാത്രാനിരക്ക് കാലോചിതമാക്കുക, ജീവനക്കാർക്ക് പോലീസ് ക്ലിയറൻസ് സർട്ടിഫിക്കറ്റ് നിർബന്ധമാക്കാതിരിക്കുക, ദീർഘദൂര ബസുകളുടെ പെർമിറ്റ് പുതുക്കുക, ഈ ചെലാൻ വഴി ഭീമമായ തുക പിഴി ഈടാക്കുന്നത് അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ച് സ്വകാര്യ ബസ് ഉടമകളുടെ സംയുക്ത സമര സമിതി 22 മുതൽ നടത്തുന്ന അനിശ്ചിതകാല പണിമുടക്ക് വിജയിപ്പിക്കാൻ പ്രൈവറ്റ് ബസ് ഓപ്പറേറ്റേഴ്സ് ഓർഗനൈസേഷൻ ജില്ലാ കമ്മിറ്റി തീരുമാനിച്ചു. പ്രസിഡന്‍റ് ആർ. സദാശിവൻ അധ്യക്ഷത വഹിച്ചു. സംസ്ഥാന സെക്രട്ടറിമാരായ കെ.വി. പൗലോസ്, കെ. രാധാകൃഷ്ണൻ, ജില്ലാ ജനറൽ സെക്രട്ടറി സിൽജോ മാത്യു, കെ.ജെ. വിനോദ്, ജോസ് തണ്ണിക്കോട് എന്നിവർ പ്രസംഗിച്ചു.

കെ.ടി. ഹംസ മുസ്ലിയാരെ എസ്‌വൈഎസ് ആദരിച്ചു

കണിയാന്പറ്റ: സമസ്ത കേരള ജംഇയ്യത്തുൽ ഉലമയുടെ കേന്ദ്ര മുശാവറയിൽ 40 വർഷം പൂർത്തിയാക്കിയ കെ.ടി. ഹംസ മുസ്ലിയാരെ സുന്നി യുവജന സംഘം(എസ്‌വൈഎസ് )ജില്ലാ കമ്മിറ്റി ആദരിച്ചു. മില്ലുമുക്ക് ബിച്ചാസ് ഓഡിറ്റോറിയത്തിൽ സംഘടിപ്പിച്ച ചടങ്ങിൽ എസ്‌വൈഎസ് സംസ്ഥാന വൈസ് പ്രസിഡന്‍റ് ഇബ്രാഹിം ഫൈസി പേരാൽ അധ്യക്ഷത വഹിച്ചു. കോഴിക്കോട് ഖാസിയും സുന്നി യുവജന സംഘം സംസ്ഥാന ജനറൽ സെക്രട്ടറിയുമായ സയ്യിദ് മുഹമ്മദ് കോയ തങ്ങൾ ജമലുല്ലൈലി മെമന്‍റോ നൽകി. മലബാർ ഭദ്രാസനാധിപൻ ഡോ.ഗീവർഗീസ് മോർ സ്തേഫാനോസ്, സയ്യിദ് കെ.കെ.എസ്. തങ്ങൾ, ഇന്പിച്ചിക്കോയ തങ്ങൾ പേരാൽ, ഹംസ റഹ്മാനി കൊണ്ടിപ്പറന്പ്, ഈശ്വരൻ നന്പൂതിരി കൽപ്പറ്റ തുടങ്ങിയവർ പ്രസംഗിച്ചു.

കുന്നൂരിൽ പുലി വൈദ്യുതി കന്പിയിൽ നിന്ന് ഷോക്കേറ്റ് ചത്തു

ഊട്ടി: കുന്നൂരിൽ പുലി വൈദ്യുതി കന്പിയിൽ നിന്ന് ഷോക്കേറ്റ് ചത്തു. പാറൽസ്റ്റേൽ സ്പ്രിങ്ക് ഭാഗത്താണ് സംഭവം. കരടി പുലിയെ ആക്രമിക്കാൻ ശ്രമിക്കുന്നതിനിടെ വൈദ്യുതി തൂണിലേക്ക് പുലി ഓടിക്കയറുകയായിരുന്നു. അതിനിടയ്ക്കാണ് ഷോക്കേറ്റത്. രണ്ട് വയസ് പ്രായം തോന്നിക്കുന്ന പെണ്‍ പുള്ളിപുലിയാണ് ചത്തത്. വിവരമറിഞ്ഞ് ഉന്നത വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. ഡോ. രാജേഷ്കുമാർ പോസ്റ്റ്മോർട്ടം നടത്തി.

ജസ്റ്റിസ് ജെ.ബി. കോശി കമ്മീഷൻ റിപ്പോർട്ട് പുറത്തുവിടണം: എകെസിസി

തവിഞ്ഞാൽ: ജസ്റ്റിസ് ജെ.ബി. കോശി കമ്മീഷൻ റിപ്പോർട്ട് പുറത്തുവിടണമെന്ന് സെന്‍റ് മേരീസ് പള്ളി ഓഡിറ്റോറിയത്തിൽ ചേർന്ന എകെസിസി യൂണിറ്റ് യോഗം സർക്കാരിനോട് ആവശ്യപ്പെട്ടു. കേരളത്തിലെ ക്രൈസ്തവ ന്യൂനപക്ഷത്തിന്‍റെ പിന്നാക്കാവസ്ഥ പഠിച്ച് റിപ്പോർട്ട് സമർപ്പിക്കാനാണ് കമ്മീഷനെ നിയോഗിച്ചത്. നിരവധി ശിപാർശകൾ അടങ്ങുന്ന റിപ്പോർട്ട് കമ്മീഷൻ സമർപ്പിച്ച് വർഷങ്ങൾ കഴിഞ്ഞു. എന്നിട്ടും സർക്കാർ തലത്തിൽ നടപടി ഉണ്ടാകാത്തത് അപലപനീയമാണ്. മത പരിവർത്തന നിരോധന നിയമം നടപ്പാക്കുന്നതിന് മഹാരാഷ്ട്ര ഉൾപ്പെടെ ചില സംസ്ഥാനങ്ങൾ നടത്തുന്ന ശ്രമം ഭരണഘടനാവിരുദ്ധമാണെന്ന് യോഗം അഭിപ്രായപ്പെട്ടു. കർഷകരുടെ കടങ്ങൾ എഴുതിത്തള്ളുക, തെരുവുനായ ശല്യത്തിന് പരിഹാരം കാണുക എന്നീ ആവശ്യങ്ങളും ഉന്നയിച്ചു. എകെസിസി മേഖലാ ഡയറക്ടർ ഫാ. ജയിംസ് പുത്തൻപറന്പിൽ അധ്യക്ഷത വഹിച്ചു. യൂണിറ്റ് സെക്രട്ടറി ജോണി കുര്യൻ, വൈസ് പ്രസിഡന്‍റ് കെ.ജെ. ദേവസ്യ, തങ്കച്ചൻ, സിസ്റ്റർ ഫിൽസി മരിയ, കെ.ജെ. ഫ്രാൻസിസ്, മോളി ദേവസ്യ, എ.ജെ. ജോസഫ് എന്നിവർ പ്രസംഗിച്ചു.

വാകേരി - മൂടക്കൊല്ലി റോഡ് തകർന്നു; ഗതാഗതം ദുഷ്കരമായി

സുൽത്താൻ ബത്തേരി: വാകേരി - കൂടല്ലൂർ റോഡ് തകർന്ന് കുണ്ടും കുഴിയുമായതോടെ കാൽനട യാത്രയും വാഹന യാത്രയും ദുഷ്കരമായി തീർന്നു. വാകേരി - താഴത്തങ്ങാടി - കൂടല്ലൂർ - മൂടക്കൊല്ലി റോഡാണ് പൊട്ടിപ്പൊളിഞ്ഞു തകർന്ന് കിടക്കുന്നത്. വാകേരി മുതൽ കൂടല്ലൂർ വരെയുള്ള നാല് കിലോമീറ്റർ റോഡാണ് വർഷങ്ങളായി തകർന്ന് കിടക്കുന്നത്. യഥാ സമയം റോഡിന്‍റെ അറ്റകുറ്റപ്പണി നടക്കാത്തതിനാൽ കാലവർഷം ശക്തമായതോടെ റോഡ് തകർന്ന് വൻ ഗർത്തങ്ങളായി. റോഡിൽ വൻ കുഴികൾ രൂപപ്പെട്ടതോടെ വാഹനങ്ങൾക്ക് ഇതുവഴി കടന്ന് പോകാനും ബുദ്ധിമുട്ടായി. രണ്ട് വർഷം മുന്പ് കൂടല്ലൂരിലെ പ്രജീഷ് എന്ന ക്ഷീര കർഷകനെ കടുവ കൊന്നു തിന്നപ്പോൾ സ്ഥലത്തെത്തിയ അധികൃതർ നിരവധി ഉറപ്പുകൾ പ്രദേശവാസികൾക്ക് നൽകിയാണ് പ്രതിഷേധത്തെ തണുപ്പിച്ചത്. വർഷങ്ങളായി പൊട്ടിപ്പൊളിഞ്ഞു കിടക്കുന്ന ഈ റോഡ് യുദ്ധകാലാടിസ്ഥാനത്തിൽ നന്നാക്കുമെന്നായിരുന്നു അധികൃതർ നൽകിയ ഉറപ്പ്. എന്നാൽ ഇതുവരെയായിട്ട് ഒന്നും നടന്നില്ലെന്ന് മാത്രമല്ല റോഡ് കാൽനട യാത്രയ്ക്ക് പോലും പറ്റാത്ത അവസ്ഥയായി.വന്യമൃഗ ശല്യം രൂക്ഷമായ പ്രദേശത്ത് പകൽ പോലും വാഹനത്തിലൂടെയല്ലാതെ സഞ്ചരിക്കാൻ പറ്റാത്ത സാഹചര്യമാണ്. റോഡ് തകർന്നതോടെ വാഹനങ്ങൾ ഇതുവഴി ഓട്ടം പോകാനും വിസമ്മതിക്കുകയാണ്. ഇരുചക്ര വാഹനയാത്രക്കാരാണ് ഏറെ ബുദ്ധിമുട്ടുന്നത്. കനത്ത മഴയിൽ റോഡിലെ കുഴിയിൽ വെള്ളം കെട്ടിനിൽക്കുന്നതിൽ ഇരുചക്ര വാഹനങ്ങൾ വീണ് അപകടം സംഭവിക്കുന്നതും നിത്യസംഭവമായി. റോഡ് എത്രയും വേഗം ഗതാഗതത്തിന് സജ്ജമാക്കണമെന്നാണ് പ്രദേശവാസികളുടെ ആവശ്യം.

വെങ്ങപ്പള്ളിയിൽ 11 അങ്കണവാടികൾ സ്മാർട്ട്

കൽപ്പറ്റ: വെങ്ങപ്പള്ളി ഐസിഡിഎസിനു കീഴിൽ പ്രവർത്തിക്കുന്ന 14 അങ്കണവാടികളിൽ 11 എണ്ണവും സ്മാർട്ടായി. മൂന്ന് അങ്കണവാടികൾ സ്മാർട്ടാക്കുന്നതിന് പ്രവർത്തനം പുരോഗതിയിലാണ്. പഠനമുറി, വിശ്രമമുറി, ഭക്ഷണമുറി, അടുക്കള, സ്റ്റോർ റൂം, ഇൻഡോർ-ഒൗട്ട്ഡോർ കളിസ്ഥലം, ഹാൾ, പൂന്തോട്ടം തുടങ്ങിയവ സ്മാർട്ട് അങ്കണവാടിയുടെ ഭാഗമാണ്. ശിശു സൗഹൃദമാകുന്നതിനാണ് അങ്കണവാടികളെ സ്മാർട്ടാക്കിയതെന്ന് വെങ്ങപ്പള്ളി പഞ്ചായത്ത് പ്രസിഡന്‍റ് ഇ.കെ. രേണു പറഞ്ഞു.

വ്യാപാരി വ്യവസായി ഏകോപന സമിതി പുൽപ്പള്ളി യൂണിറ്റിനെ അപകീർത്തിപ്പെടുത്താൻ അനുവദിക്കില്ലെന്ന്

പുൽപ്പള്ളി: വ്യാപാരി വ്യവസായി ഏകോപന സമിതി പുൽപ്പള്ളി യൂണിറ്റിനെതിരെ സമൂഹമാധ്യമങ്ങളിലൂടെ ചിലർ പ്രചരിപ്പിക്കുന്ന ആരോപണങ്ങൾ അടിസ്ഥാനരഹിതമാണെന്ന് യൂണിറ്റ് ഭാരവാഹികൾ വാർത്താസമ്മേളനത്തിൽ പറഞ്ഞു. യൂണിറ്റ് കമ്മിറ്റിയുടെ ട്രഷറർ രാജിവയ്ക്കുന്നുവെന്ന് പറഞ്ഞുകൊണ്ടിറക്കിയ കത്തിലെ വിവരങ്ങൾ വസ്തുതകൾക്ക് നിരക്കാത്തതാണ്. യൂണിറ്റ് ട്രഷററാണ് വരവ് ചെലവു കണക്കുകൾ കൈകാര്യം ചെയ്യേണ്ടത്. ട്രഷറർ മാത്രം കൈകാര്യം ചെയ്ത കണക്കുകളിലെ അവ്യക്തത മറ്റുള്ളവരുടെ പേരിൽ കെട്ടിവയ്ക്കാൻ ശ്രമിക്കുന്നത് അംഗീകരിക്കാനാവില്ല. സാന്പത്തിക ക്രമക്കേടിന്‍റെ പൂർണ ഉത്തരവാദിത്വം ട്രഷറർ എം.കെ. ബേബിക്കാണ്. കണക്കിലെ അവ്യക്തത ചർച്ച ചെയ്യാൻ പ്രവർത്തക സമിതി യോഗം വിളിച്ചപ്പോൾ അതിൽ പങ്കെടുക്കാതെ തലേദിവസം രാജിവച്ചുപോയ ട്രഷററുടെ നടപടി ഒട്ടേറെ സംശയങ്ങൾക്ക് കാരണമായിട്ടുണ്ട്. യോഗത്തിൽ അവതരിപ്പിച്ച കണക്കിലെ ക്രമക്കേടുകൾ കൃത്യമായി ചൂണ്ടിക്കാണിച്ചപ്പോൾ തൃപ്തികരമായ മറുപടി നൽകാൻപോലും ട്രഷറർക്ക് കഴിഞ്ഞിട്ടില്ല. യൂണിറ്റ് ഭാരവാഹികളുടെ നേതൃത്വത്തിൽ ഈ പ്രശ്നം ചർച്ച ചെയ്യുകയും പണം ട്രഷറർ തിരികെ വയ്ക്കണമെന്ന് ഒന്നിലധികംതവണ ആവശ്യപ്പെടുകയും ചെയ്തതാണ്. എന്നാൽ ട്രഷറർ തന്‍റെ കൈയ്യിൽ പണമില്ലെന്ന് പറഞ്ഞ് പ്രസിഡന്‍റിനേയും സെക്രട്ടറിയേയും പഴിചാരിയ സാഹചര്യത്തിൽ ഈ വിഷയം ജില്ലാ കമ്മിറ്റിക്ക് വിടുകയായിരുന്നു. ഓഡിറ്റ് റിപ്പോർട്ടിന്േ‍റയും അന്വേഷണ റിപ്പോർട്ടിന്േ‍റയും അടിസ്ഥാനത്തിൽ ജില്ലാ കമ്മിറ്റി പ്രശ്ന പരിഹാരത്തിനായി യോഗം വിളിച്ചെങ്കിലും പണം തിരിച്ചുനൽകേണ്ടിവരുമെന്ന് ബോധ്യപ്പെട്ട ട്രഷറർ യോഗത്തിൽ പങ്കെടുത്തില്ല. ജില്ലാ നേതൃത്വത്തിന്‍റെ സാന്നിധ്യത്തിൽ ചേർന്ന യോഗത്തിൽ ട്രഷറർ സംഘടനയ്ക്ക് നൽകാനുള്ള തുക എത്രയും പെട്ടന്ന് തിരിച്ച് നൽകാൻ നടപടി സ്വീകരിക്കുമെന്നും ഭാരവാഹികൾ അറിയിച്ചു. യൂണിറ്റ് പ്രസിഡന്‍റ് മാത്യു മത്തായി ആതിര, ജനറൽ സക്രട്ടറി കെ.എസ്. അജിമോൻ, ജോസ് കുന്നത്ത്, പി.എ. ഷാജിമോൻ, കെ. ജോസഫ്, കെ.വി. റഫീക്ക് എന്നിവർ വാർത്താസമ്മേളനത്തിൽ പങ്കെടുത്തു.

ഉമ്മൻ ചാണ്ടി അനുസ്മരണം നടത്തി

കൽപ്പറ്റ: ജില്ലാ കോണ്‍ഗ്രസ് കമ്മിറ്റി മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷികദിനത്തിൽ അനുസ്മരണം സംഘടിപ്പിച്ചു. ഡിസിസി ഓഫീസിൽ പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. ഉമ്മൻ ചാണ്ടിയുടെ ജീവിതം ഭരണാധികാരികൾക്കും പൊതുപ്രവർത്തകർക്കും മാതൃകയാണെന്നു അദ്ദേഹം പറഞ്ഞു. കേരളത്തിന്‍റെ വികസനത്തിന് വിലമതിക്കാനാകാത്ത സംഭാവനകളാണ് ഉമ്മൻ ചാണ്ടി നൽകിയതെന്നു അദ്ദേഹം അനുസ്മരിച്ചു. ഉമ്മൻ ചാണ്ടിയുടെ ഛായാചിത്രത്തിൽ നേതാക്കളും പ്രവർത്തകരും പുഷ്പാർച്ചന നടത്തി. ഡിസിസി വൈസ് പ്രസിഡന്‍റ് ഒ.വി. അപ്പച്ചൻ അധ്യക്ഷത വഹിച്ചു. നേതാക്കളായ പി.കെ. ജയലക്ഷ്മി, ടി.ജെ. ഐസക്, എൻ.കെ. വർഗീസ്, എം.എ. ജോസഫ്, പി.ടി. ഗോപാലക്കുറുപ്പ്, ബിനു തോമസ്, നിസി അഹമ്മദ്, എം. വേണുഗോപാൽ, ഒ.ആർ. രഘു, പി.കെ. അബ്ദുറഹ്മാൻ, പി.വി. ജോർജ്, സി. ജയപ്രസാദ്, വിജയമ്മ, ബീന ജോസ്, കമ്മന മോഹനൻ, ഇ.എ. ശങ്കരൻ, കെ.വി. പോക്കർ ഹാജി, സുരേഷ് ബാബു, പോൾസണ്‍ കൂവക്കൽ, ജിനി തോമസ്, ഇ.വി. ഏബ്രഹാം, സുരേഷ് ബാബു വാളാൽ, ഡിന്േ‍റാ ജോസ് എന്നിവർ പ്രസംഗിച്ചു. കൽപ്പറ്റ: മണ്ഡലം കോണ്‍ഗ്രസ് കമ്മിറ്റി സംഘടിപ്പിച്ച അനുസ്മരണ സദസ് സംഘടിപ്പിച്ചു. കെപിസിസി മെംബർ പി.പി. ആലി ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് ജനറൽ സെക്രട്ടറി കെ.കെ. രാജേന്ദ്രേൻ അധ്യക്ഷത വഹിച്ചു. ഡിസിസി ജനറൽ സെക്രട്ടറി സി. ജയപ്രസാദ്, യൂത്ത് കോണ്‍ഗ്രസ് ജില്ലാ ജനറൽ സെക്രട്ടറി ഹർഷൽ കോന്നാടൻ, കെ. അജിത, കെ. ശശികുമാർ, സുനീർ ഇത്തിക്കൽ, മുഹമ്മദ് ഫെബിൻ, മാടായി ലത്തീഫ്, ഷബീർ പുത്തൂർവയൽ, പി.എം. മാത്യു, ലത്തീഫ് കാരാട്ട്, എം.വി. ഷനൂബ് എന്നിവർ പ്രസംഗിച്ചു. കോട്ടത്തറ: കോണ്‍ഗ്രസ് മണ്ഡലം കമ്മിറ്റി ഉമ്മൻ ചാണ്ടി അനുസ്മരണം നടത്തി. പ്രസിഡന്‍റ് സി.സി. തങ്കച്ചൻ ഛായാചിത്രത്തിൽ പുഷ്പാർച്ചന നടത്തി ഉദ്ഘാടനം ചെയ്തു. സുരേഷ് ബാബു വാളൽ, എം.വി. ടോമി, സി.കെ. ഇബ്രായി, ടി. ഇബ്രാഹിം, ഇ.എഫ്. ബാബു, പി.എൽ. അനീഷ്, പി.ഇ. വിനോജ്, വി.കെ. ശങ്കരൻകുട്ടി, ജോസഫ് ആന്‍റണി, രാജേഷ് പോൾ, വി.ജെ. സ്റ്റീഫൻ, പ്രജീഷ് ജയിൻ എന്നിവർ പ്രസംഗിച്ചു. കൽപ്പറ്റ: കേരള എൻജിഒ അസോസിയേഷൻ സിവിൽ സ്റ്റേഷനിൽ ഉമ്മൻ ചാണ്ടി അനുസ്മരണം നടത്തി. സംസ്ഥാന സെക്രട്ടേറിയറ്റംഗം മോബിഷ് പി. തോമസ് ഉദ്ഘാടനം ചെയ്തു. കേരളീയരുടെ മനസുകൾ കീഴടക്കിയ ജനകീയ നേതാവായിരുന്നു ഉമ്മൻ ചാണ്ടിയെന്ന് അദ്ദേഹം അനുസ്മരിച്ചു. ടി. പരമേശ്വരൻ അധ്യക്ഷത വഹിച്ചു. സംസ്ഥാന സെക്രട്ടേറിയറ്റ് അംഗം സി.കെ. ജിതേഷ്, ലൈജു ചാക്കോ, എൻ.വി. അഗസ്റ്റിൻ, ഇ.വി. ജയൻ, ശരത് ശശിധരൻ, കെ.ജി. പ്രശോഭ്, നിഷ മണ്ണിൽ, വി. മുരളി, കെ.സി. ജിനി, റെജീസ് കെ. തോമസ്, സി.ആർ. രമ്യ എന്നിവർ പ്രസംഗിച്ചു. വൈത്തിരി: എൻജിഒ അസോസിയേഷൻ ജില്ലാ കമ്മിറ്റിയുടെ നേതൃത്വത്തിൽ വൈത്തിരി താലൂക്ക് ഓഫീസിനു മുന്പിൽ ഉമ്മൻചാണ്ടി അനുസ്മരണം നടത്തി. ജില്ലാ സെക്രട്ടറി പി.ജെ. ഷൈജു ഉദ്ഘാടനം ചെയ്തു. പത്താം ശന്പള പരിഷ്കരണം ഉൾപ്പെടെ ജീവനക്കാരെ വിശ്വാസത്തിലെടുത്തുള്ള സമീപനം സ്വീകരിച്ച മുഖ്യമന്ത്രിയായിരുന്നു ഉമ്മൻ ചാണ്ടിയെന്നു അദ്ദേഹം പറഞ്ഞു. കൽപ്പറ്റ ബ്രാഞ്ച് പ്രസിഡന്‍റ് ബെൻസി ജേക്കബ് അധ്യക്ഷത വഹിച്ചു. സംസ്ഥാന സെക്രട്ടേറിയറ്റ് അംഗം ഹനീഫ ചിറയ്ക്കൽ അനുസ്മരണ പ്രഭാഷണം നടത്തി. കെ. രമേശ്, കെ.ജി. വേണു, ബി. നാരായണൻ, ടി.ജെ. വക്കച്ചൻ, സാബു ഏബ്രഹാം, എ.എൻ. സന്തോഷ്, രാജേഷ്കുമാർ, ഫെമിൻ ഫ്രാൻസിസ്, എം. അനിൽ, ആർ. രംഗീഷ്, കെ. ഷെമീർ, ആൻസി തോമസ്, പി. സിന്ധു, എം. മിഖ എന്നിവർ പ്രസംഗിച്ചു. ചീരാൽ: മണ്ഡലം കോണ്‍ഗ്രസ് കമ്മിറ്റി ഉമ്മൻ ചാണ്ടി അനുസ്മരണം നടത്തി. ഡിസിസി ജനറൽ സെക്രട്ടറി ഡി.പി. രാജശേഖരൻ ഉദ്ഘാടനം ചെയ്തു. മണ്ഡലം പ്രസിഡന്‍റ് അജയ് മാങ്കൂട്ടത്തിൽ അധ്യക്ഷത വഹിച്ചു. എസ്എഫ്സടിഎ സംസ്ഥാന പ്രസിഡന്‍റ് ഷാഫി പുൽപ്പാറ അനുസ്മരണ പ്രഭാഷണം നടത്തി. യൂത്ത് കോണ്‍ഗ്രസ് ജില്ലാ പ്രസിഡന്‍റ് അമൽ ജോയി, രാഹുൽ കൊഴുവണ, സി.എം. ഷിജു, കെ.ആർ. സാജൻ, വി.ടി. ബേബി, കെ.വി. ശശി, പ്രസന്ന ശശീന്ദ്രൻ, വി.ജെ. തോമസ്, കെ.സി.കെ. തങ്ങൾ, ലളിത, ഷീജ രാജു, യശോധരൻ, പദ്മനാഭൻ, ഷിബു എന്നിവർ പ്രസംഗിച്ചു. പുൽപ്പള്ളി: മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി അനുസ്മരണം നടത്തി. കെപിസിസി എക്സിക്യുട്ടീവ് കമ്മിറ്റിയംഗം കെ.എൽ. പൗലോസ് ഉദ്ഘാടനം ചെയ്തു. മണ്ഡലം പ്രസിഡന്‍റ് പി.ഡി. ജോണി അധ്യക്ഷത വഹിച്ചു. ഡിസിസി ജനറൽ സെക്രട്ടറി എൻ.യു. ഉലഹന്നാൻ, ബ്ലോക്ക് പ്രസിഡന്‍റ് വർഗീസ് മുരിയൻകാവിൽ, വർക്കി പാലക്കാട്ട്, കെ.എം. എൽദോസ്, ജോമറ്റ് കോതവഴിക്കൽ, മാത്യു ഉണ്ടശാൻപറന്പിൽ, ടി.പി. ശശിധരൻ, മുരളി പുറത്തൂട്ട്, കെ.എം. ജോസഫ്, സാബു ഫിലിപ്പ്, വി.ജെ. ലൂക്കോസ്, ടി.പി. മർക്കോസ്, ബിനോണ്‍സണ്‍ നാമറ്റത്തിൽ, കൃഷ്ണൻകുട്ടി മഞ്ഞപ്പിള്ളി, ഷിബു തേൻകുന്നേൽ, കെ.എഫ്. വിനോദ് ,ചെറിയാൻ തളികപ്പറന്പിൽ എന്നിവർ പ്രസംഗിച്ചു.

പുതിയ അണക്കെട്ടുകൾ നിർമിക്കരുത്: ആം ആദ്മി പാർട്ടി

മാനന്തവാടി: വയനാട്ടിൽ പുതിയ അണക്കെട്ടുകൾ നിർമിക്കരുതെന്ന് ആം ആദ്മി പാർട്ടി നിയോജകമണ്ഡലം കമ്മിറ്റി ആവശ്യപ്പെട്ടു. എടവക തൊണ്ടാർ, പുൽപ്പള്ളി കടമാൻതോട് ജലസേചന പദ്ധതികൾക്ക് ഡിപിആർ തയാറാക്കാൻ ഭരണാനുമതി നൽകിയത് സർക്കാർ പുനഃപരിശോധിക്കണം. ജില്ലയിൽ കാരാപ്പുഴയിലും പടിഞ്ഞാറത്തറയിലും നിലവിലുള്ള വൻകിട അണക്കെട്ടുകൾ പാരിസ്ഥിതിക പ്രശ്നങ്ങൾക്കും മഴക്കാലങ്ങളിൽ അപകടങ്ങൾക്കും കാരണമാകുന്നുണ്ട്. വയനാടിന് ഏറെ അകലെയല്ല കർണാടകയിലെ ബീച്ചനഹള്ളി ഡാം. വലിയ അണക്കെട്ടുകൾ പുതുതായി നിർമിച്ച ജലം കെട്ടിനിർത്തുന്നത് പ്രകൃതിദുരന്തങ്ങൾ വിളിച്ചുവരുത്തുമെന്ന് യോഗം അഭിപ്രായപ്പെട്ടു. തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് മുന്നിൽക്കണ്ട് പ്രവർത്തനം ശക്തമാക്കാൻ തീരുമാനിച്ചു. പ്രസിഡന്‍റ് പി.ടി. മനോജ്കുമാർ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് അജി കൊളോണിയ, ബാബു തച്ചറോത്ത്, മനു മത്തായി, ജോണ്‍സണ്‍ ജോർജ്, പി.എ. ജയിംസ് എന്നിവർ പ്രസംഗിച്ചു. ’കമാൻതോട്, തൊണ്ടാർ പദ്ധതികൾ വെല്ലുവിളി’ കൽപ്പറ്റ: പുൽപ്പള്ളി കടമാൻ തോട്, എടവക തൊണ്ടാർ ജലസേചന പദ്ധതികളുടെ ഡിപിആർ തയാറാക്കുന്നതിനു ഭരണാനുമതി നൽകിയ സർക്കാർ നടപടി ജനങ്ങളോടുള്ള വെല്ലുവിളിയാണെന്നും പദ്ധതികൾ ഉപേക്ഷിക്കണമെന്നും എസ്ഡിപിഐ ജില്ലാ വൈസ് പ്രസിഡൻറ് എൻ. ഹംസ ആവശ്യപ്പെട്ടു. ജില്ലയിൽ കാരാപ്പുഴ, ബാണാസുരസാഗർ അണകൾ കൃഷിക്കാവശ്യമായ ജലം ലഭ്യമാക്കുമെന്ന വാഗ്ദാനം നൽകി നിർമിച്ചതാണ്. പതിറ്റാണ്ടുകൾ കഴിഞ്ഞിട്ടും പദ്ധതികൾ പൂർത്തിയാക്കാനും കൃഷി ആവശ്യത്തിന് ജലം ലഭ്യമാക്കാനും കഴിഞ്ഞിട്ടില്ല. കടമാൻതോട് പദ്ധതിയുടെ ഭൂപ്രകൃതി, ലിഡാർ സർവേകൾ 2023ൽ പൂർത്തിയായതാണ്. പദ്ധതിയുടെ വ്യാപ്തി, കുടിയൊഴിപ്പിക്കേണ്ട ജനങ്ങൾ, ജലമെത്തിക്കാൻ കഴിയുന്ന പ്രദേശങ്ങൾ, ഉപേക്ഷിക്കേണ്ടിവരുന്ന സർക്കാർ-സർക്കാരിത സ്ഥാപനങ്ങൾ, വീടുകൾ, ആരാധനലയങ്ങൾ തുടങ്ങിയ വിശദവിവരങ്ങൾ സർക്കാരിന് സമർപ്പിച്ച റിപ്പോർട്ടിലുണ്ട്. ആദ്യഘട്ട സർവേകൾ പൂർത്തിയാക്കിയശേഷം പദ്ധതിയുടെ വിശദാംശങ്ങൾ പൊതുജനങ്ങൾക്കു മുന്പിൽ അവതരിപ്പിക്കുമെന്ന് ഉദ്യോഗസ്ഥരും ജനപ്രതിനിധികളും ഉറപ്പുനൽകിയെങ്കിലും പാലിക്കാതെ ഡിപിആറിന് ഭരണാനുമതി നൽകിയതിൽ ദുരൂഹതയുണ്ട്. താരതമ്യേന ചെറിയ ജില്ലയായ വയനാടിന് ഇനിയും വൻകിട ജലസംഭരണികൾ താങ്ങാൻ സാധിക്കുമോ എന്നത് വിശദ പഠനത്തിനു വിധേയമാക്കണം. വന്യജീവി ശല്യം, മെഡിക്കൽ കോളജ്, ഉരുൾ ദുരന്തബാധിതരുടെ പുനരധിവാസം, വിദ്യാർഥികളുടെ തുടർപഠന പ്രതിസന്ധി തുടങ്ങി ജില്ലയിലെ പ്രധാന പ്രശ്നങ്ങൾക്കുനേരേ കണ്ണടയ്ക്കുന്ന സർക്കാർ വൻകിട ഡാം പദ്ധതികളുമായി മുന്നിട്ടിറങ്ങുന്നതിൽ വൈരുദ്ധ്യമുണ്ട്. കബനി ജലത്തിൽ കേരളത്തിന് അർഹമായ വിഹിതം ചെറുകിട പദ്ധതികളിലൂടെ ഉപയോഗപ്പെടുത്തണമെന്നും ഹംസ പറഞ്ഞു. കടമാൻതോട് പദ്ധതി: സർക്കാർ പിൻമാറണമെന്ന് പുൽപ്പള്ളി: കടമാൻതോട് പദ്ധതി നടപ്പിലാക്കാനുള്ള സർക്കാർ തീരുമാനം പിൻവലിക്കണമെന്ന് പുൽപ്പള്ളി ദീപം സ്വശ്രയ സംഘം യോഗം ആവശ്യപ്പെട്ടു. പുൽപ്പള്ളി പഞ്ചായത്തിന്‍റെ ജനങ്ങൾ തിങ്ങിപ്പാർക്കുന്ന പ്രദേശത്ത് പദ്ധതി ആരംഭിക്കാനുള്ള നീക്കമുണ്ടായാൽ നൂറുകണക്കിന് കുടുംബങ്ങൾ കുടിയിറങ്ങേണ്ടിവരും. സർക്കാർ അനാവശ്യമായി ജനങ്ങളെ ബുദ്ധിമുട്ടിക്കുന്ന നിലപാടാണ് സ്വീകരിക്കുന്നതെന്നും യോഗം കുറ്റപ്പെടുത്തി. കടമാൻതോട് പദ്ധതി ഒരു കാരണവശാലും അനുവദിക്കില്ലെന്ന് ജലസേചനമന്ത്രി ഉറപ്പ് നൽകിയിട്ടും അതെല്ലാം മറികടന്ന് ഇപ്പോൾ ഡിപിആർ തയാറാക്കാൻ ഭരണാനുമതി നൽകിയതോടെ പ്രദേശത്തെ ജനങ്ങൾ ആശങ്കയിലാണ്. കുടിയേറ്റ മേഖലയിലെ ജനജീവിതം ഏറെ ദോഷകരമാകുന്ന പദ്ധതി ഉപേക്ഷിക്കണമെന്നും ജില്ലയിൽ കാരാപ്പുഴ, ബാണാസുര സാഗർ ഡാമുകൾ മൂലമുണ്ടായ ദുരിതങ്ങൾ ഇപ്പോഴും ജനങ്ങൾ അനുഭവിക്കുകയാണെന്നും ഇനി ജില്ലയിൽ മറ്റൊരു ഡാം കൂടി അനുവദിക്കാനുള്ള നീക്കത്തിൽനിന്നും സർക്കാർ പിൻമാറണമെന്നും ആവശ്യപ്പെട്ട് മുഖ്യമന്ത്രി ഉൾപ്പെടെയുള്ളവർക്ക് പരാതി നൽകുവാനും യോഗം തീരുമാനിച്ചു. ഡാമിന് പകരം പ്രദേശത്ത് ജലസേചന സൗകര്യമെത്തിക്കുന്നതിന് ചെറുകിട ജലസേചന പദ്ധതികളാണ് മേഖലയിൽ ആവശ്യമെന്നും യോഗം നിർദേശിച്ചു. ബിജുമോൻ അധ്യക്ഷത വഹിച്ചു. ബാബുരാജ്, ടി.കെ. ശശി, ബിജു മാത്യു, പി.കെ. ഹരിദാസ് എന്നിവർ പ്രസംഗിച്ചു.

അരിവാൾ കോശ രോഗിയിൽ ഇടുപ്പ് മാറ്റിവയ്ക്കൽ ശസ്ത്രക്രിയ വിജയകരമായി നടത്തി

മാനന്തവാടി: ഗവ.മെഡിക്കൽ കോളജ് ആശുപത്രിയിൽ അരിവാൾ കോശ രോഗിയായ 26കാരന്‍റെ ഇടുപ്പ് ശസ്ത്രക്രിയയിലൂടെ വിജയകരമായി മാറ്റിവച്ചു. ഇതോടെ ചേകാടി സ്വദേശിയായ യുവാവിന് ദുരിതപൂർണമായ ജീവിതത്തിൽനിന്നു മോചനമായി. 2021ൽ മെഡിക്കൽ കോളജ് ആയി ഉയർത്തിയ ആശുപത്രിയിൽ ഇതിനകം മൂന്ന് അരിവാൾകോശ രോഗികളിലാണ് അതിസങ്കീർണമായ ഇടുപ്പ് മാറ്റിവയ്ക്കൽ ശസ്ത്രക്രിയ വിജയകരമായി പൂർത്തിയാക്കിയത്. ഓർത്തോപീഡിക്സ് വിഭാഗത്തിലെ ഡോക്ടർമാരായ അനീൻ എൻ. കുട്ടി, കെ. സുരേഷ്, വി. ശശികുമാർ, ഡിജോ, ഇർഫാൻ, അനസ്തേഷ്യ വിഭാഗം ഡോക്ടർമാരായ ബഷീർ, ചന്ദൻ, ഉസ്മാൻ വയൽപറന്പത്ത്, മുനീർ, സർജറി വിഭാഗം ഡോക്ടർമാർ എന്നിവരുടെ നേതൃത്വത്തിൽ നഴ്സിംഗ് ജീവനക്കാരും ശസ്ത്രക്രിയയിൽ പങ്കാളികളായി. സംസ്ഥാനത്തെ ഏക ആധുനിക സിക്കിൾ സെൽ യൂണിറ്റാണ് മാനന്തവാടി മെഡിക്കൽ കോളജ് ആശുപത്രിയിൽ പ്രവർത്തിക്കുന്നത്. വിദഗ്ധ പരിശീലനം ലഭിച്ച ഡോക്ടർമാർ, നഴ്സിംഗ് ഓഫീസർമാർ, ലാബ് ടെക്നീഷ്യൻ, ഫിസിയോ തെറാപ്പിസ്റ്റ്, ഡാറ്റ എൻട്രി ജീവനക്കാർ എന്നിവരുടെ സേവനം യൂണിറ്റിൽ ലഭ്യമാണ്.

പുഞ്ചിരിമട്ടം ദുരന്തം: പട്ടികവർഗ ഉന്നതികളിലെ കുടുംബങ്ങളെ പുനരധിവസിപ്പിക്കുന്നു

കൽപ്പറ്റ: ഉരുൾ ദുരന്തബാധിത പ്രദേശങ്ങളായ പുഞ്ചിരിമട്ടം, ഏറാട്ടുകുണ്ട്, പുതിയ വില്ലേജ് ഉന്നതികളിലെ 13 കുടുംബങ്ങളെ പുനരധിവസിപ്പിക്കുന്നു. വെള്ളരിമല പുതിയ വില്ലേജ് പരിസരത്ത് സർവേ നന്പർ 126ൽപ്പെട്ട അഞ്ച് ഹെക്ടറിലാണ് ഇത്രയും കുടുംബങ്ങളിലെ 57 പേരെ പുനരധിവസിപ്പിക്കുന്നത്. വനം വകുപ്പ് നിക്ഷിപ്ത വനഭൂമിയായി ഏറ്റെടുത്തതാണ് പുനരധിവാസത്തിന് ഉപയോഗപ്പെടുത്തുന്ന സ്ഥലം. പുഞ്ചിരിമട്ടം, ഏറാട്ടുകുണ്ട് ഉന്നതികളിലെ അഞ്ച് വീതവും പുതിയ വില്ലേജിലെ മൂന്നും കുടുംബങ്ങൾക്കാണ് വീടും അനുബന്ധ സൗകര്യവും ഒരുക്കുന്നത്. പുഞ്ചിരിമട്ടം, പുതിയ വില്ലേജ് ഉന്നതികളിലെ എട്ട് കുടുംബങ്ങൾ സർക്കാരിന്‍റെ ബി 2 പട്ടികയിൽ ഉൾപ്പെട്ടതാണ്. ദുരന്തമേഖലയിൽ ഭൗമശാസ്ത്രജ്ഞൻ ജോണ്‍ മത്തായി പഠനം നടത്തി സമർപ്പിച്ച റിപ്പോർട്ട് പ്രകാരം ഉന്നതികൾ വാസയോഗ്യമായ പ്രദേശങ്ങളിലാണ്. എന്നാൽ ഉന്നതി നിവാസികൾക്ക് നോ ഗോ സോണിലൂടെ മാത്രമാണ് സഞ്ചാരപാത. ഏറാട്ടുകുണ്ട് ഉന്നതിയിലെ അഞ്ചു കുടുംബങ്ങൾ റെഡ് സോണിലാണുള്ളത്. കാലവർഷങ്ങളിൽ ഈ കുടുംബങ്ങളെ താത്കാലികമായി മാറ്റിപ്പാർപ്പിക്കേണ്ടിവരുന്നുണ്ട്. കുടുംബങ്ങളെ ദുരന്തനിവാരണഅഥോറിറ്റിയുടെ പ്രത്യേക ഉത്തരവ് പ്രകാരവും സർക്കാരിന്‍റെ അനുമതിയോടെയുമാണ് പുനരധിവാസ പദ്ധതിയിൽ ഉൾപ്പെടുത്തിയത്. ജില്ലാ ഭരണകൂടം, വനം വകുപ്പ്, ഉൗര് നിവാസികൾ, പട്ടികവർഗ വികസന ഉദ്യോഗസ്ഥർ എന്നിവരുടെ നേതൃത്വത്തിൽ സ്ഥലം പരിശോധിച്ച് സർവേ പൂർത്തിയാക്കി ഭൂമിയുടെ അവകാശം റവന്യു വകുപ്പിന് കൈമാറിയിട്ടുണ്ട്. പുനരധിവസിപ്പിക്കുന്ന ഓരോ കുടുംബത്തിനും 10 സെന്‍റ് ഭൂമിയും വീടും നൽകും. എല്ലാ സൗകര്യങ്ങളും ഒരുക്കി പുനരധിവാസം നടത്താനാണ് തീരുമാനമെന്ന് പട്ടികവർഗ വികസന ഓഫീസർ ജി. പ്രമോദ് പറഞ്ഞു. സർക്കാർ എൽസ്റ്റൻ എസ്റ്റേറ്റിൽ തയാറാക്കുന്ന ടൗണ്‍ഷിപ്പിൽ ഓരോ കുടുംബത്തിനും 1,000 ചതുരശ്ര അടി വീടാണ് നിർമിക്കുന്നത്.

ബാണാസുരസാഗർ അണയുടെ ഒരു ഷട്ടർ തുറന്നു

പടിഞ്ഞാറത്തറ: ബാണാസുരസാഗർ അണയുടെ ഒരു ഷട്ടർ ഇന്നലെ ഉച്ചകഴിഞ്ഞ് രണ്ടോടെ തുറന്ന് വെള്ളം പുറത്തേക്ക് ഒഴുക്കി. ഷട്ടർ 15 സെന്‍റി മീറ്ററാണ് ഉയർത്തിയത്. വെള്ളം പുഴയിലൂടെ ഒഴുകിയെത്തുന്ന പടിഞ്ഞാറത്തറ, കോട്ടത്തറ, പനമരം, പുൽപ്പള്ളി, മുള്ളൻകൊല്ലി, വെള്ളമുണ്ട പഞ്ചായത്ത് ഭാഗങ്ങളിലും മാനന്തവാടി മുനിസിപ്പാലിറ്റിയിലെ പ്രദേശങ്ങളിലും താമസിക്കുന്നവർക്ക് അധികൃതർ ജാഗ്രതാനിർദേശം നൽകിയിട്ടുണ്ട്. ഡാം സ്പിൽവേയുടെ മുന്പിൽ പുഴയിൽ ആളുകൾ ഇറങ്ങരുത്. വെള്ളം കയറുന്ന ഭാഗങ്ങളിൽ ജനങ്ങളെ ആവശ്യമെങ്കിൽ ഒഴിപ്പിച്ച് ക്യാന്പുകളിലേക്ക് മാറ്റാൻ അതത് തദ്ദേശസ്ഥാപനങ്ങൾക്ക് നിർദേശം നൽകി. മുന്നറിയിപ്പ് മറികടന്ന് സ്പിൽവേയ്ക്കു സമീപം ഇറങ്ങിയ മൊതക്കര സ്വദേശികളായ റംഷാദ്, അഖിൽ എന്നിവർക്കെതിരേ പോലീസ് കേസെടുത്തു.

ജില്ലയിലെ വിദ്യാഭ്യാസ സ്ഥാപനങ്ങൾക്ക് ഇന്ന് അവധി

കൽപ്പറ്റ: കേന്ദ്ര കാലാവസ്ഥ വകുപ്പ് ജില്ലയിൽ ഇന്ന് റെഡ് അലർട്ട് പ്രഖ്യാപിച്ചതിനാൽ വിദ്യാഭ്യാസ സ്ഥാപനങ്ങൾക്ക് ജില്ലാ കളക്ടർ ഡി.ആർ. മേഘശ്രീ ഇന്ന് അവധി പ്രഖ്യാപിച്ചു. പ്രഫഷണൽ കോളജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾ, അങ്കണവാടികൾ, ട്യൂഷൻ സെന്‍ററുകൾ, മതപഠന ക്ലാസുകൾ, സ്പെഷൽ ക്ലാസുകൾക്ക് അവധിയായിരിക്കും. പിഎസ്‌സി പരീക്ഷകൾ, റസിഡൻഷൽ സ്കൂളുകൾ, കോളജുകൾക്ക് അവധി ബാധകമല്ല.

പുലി വിശ്രമിക്കുന്ന വീഡിയോ വൈറലായി

ഗൂഡല്ലൂർ: ഉൗട്ടി-മൈസൂർ ദേശീയ പാതയിൽ ഗൂഡല്ലൂരിനടുത്ത് റോഡിൽ പുലി വിശ്രമിക്കുന്ന വീഡിയോ വൈറലായി. പുലി റോഡിൽ കിടക്കുന്ന വീഡിയോ സമൂഹ മാധ്യമങ്ങളിൽ പ്രചരിച്ചിരുന്നു. ഇതുവഴി വന്ന വിനോദ സഞ്ചാരികളാണ് ചിത്രം മൊബൈലിൽ പകർത്തിയത്. പുലി ദീർഘനേരം റോഡിൽ നിലയുറപ്പിച്ചത് ഡ്രൈവർമാരെ ഭീതിയിലാക്കി. ഇരുചക്രവാഹന യാത്രക്കാരാണ് ഏറെ പ്രയാസത്തിലായത്.

നാല് കോണ്‍ഗ്രസ് പ്രവർത്തകർക്ക് സസ്പെൻഷൻ

പുൽപ്പള്ളി: കോണ്‍ഗ്രസ് മുള്ളൻകൊല്ലി മണ്ഡലം കമ്മിറ്റി പാടിച്ചിറയിൽ സംഘടിപ്പിച്ച വികസന സെമിനാറിനിടെ ഉണ്ടായ അനിഷ്ടസംഭവങ്ങളുമായി ബന്ധപ്പെട്ട് നാലു പേർക്ക് സസ്പെൻഷൻ. സാജൻ കടുപ്പിൽ, തോമസ് പാഴുക്കാല, ജോർജ് ഇടപ്പാട്, സുനിൽ പാലമറ്റം എന്നിവരെയാണ് പാർട്ടിയുടെ പ്രാഥമികാംഗത്വത്തിൽനിന്നു കെപിസിസി പ്രസിഡന്‍റ് സണ്ണി ജോസഫ് സസ്പെൻഡ് ചെയ്തത്. പൊതുസമൂഹത്തിൽ പാർട്ടിക്ക് അവമതിപ്പ് ഉണ്ടാകുന്ന വിധത്തിൽ പ്രവർത്തിച്ചതിനാണ് നടപടി. സെമിനാറിനിടെ ഡിസിസി പ്രസിഡന്‍റിനെ കൈയേറ്റം ചെയ്യാൻ ശ്രമം നടന്നിരുന്നു. മുള്ളൻകൊല്ലി മണ്ഡലം കമ്മിറ്റി പാർട്ടി നേതൃത്വം മരവിച്ചു. കമ്മിറ്റി ചുമതല ഡിസിസി ജനറൽ സെക്രട്ടറി കെ. രാജേഷ്കുമാറിന് നൽകി.

വന്യമൃഗ ആക്രമണം: സെമിനാർ നാളെ

കൽപ്പറ്റ: ജില്ലയിൽ ജനവാസ കേന്ദ്രങ്ങൾ ഉൾപ്പെടെ വർധിച്ചു വരുന്ന വന്യമൃഗ ശല്യവും അതിനുള്ള പരിഹാരവും സംബന്ധിച്ച് സീനിയർ ജേർണലിസ്റ്റ്സ് ഫോറം ജില്ലാ കമ്മിറ്റിയുടെ ആഭിമുഖ്യത്തിൽ സെമിനാർ നടത്തും. നാളെ ഉച്ചയ്ക്ക് ശേഷം 2.30ന് കൈനാട്ടി പത്മപ്രഭാ ലൈബ്രറിയിലെ എം.പി. വീരേന്ദ്രകുമാർ ഹാളിലാണ് സെമിനാർ നടത്തുക. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്യും. പ്രസിഡന്‍റ് പി.കെ. അബ്ദുൾ അസീസ് അധ്യക്ഷത വഹിക്കും. സെക്രട്ടറി ടി.വി. രവീന്ദ്രൻ പരിപാടി വിശദീകരിക്കും. കെ. റഫീഖ് (സിപിഎം), കെ.ഇ. വിനയൻ (കോണ്‍ഗ്രസ്), ടി. മുഹമ്മദ് (മുസ്ലിം ലീഗ്), കെ.കെ. ഹംസ (ആർജെഡി), പി.എം. ജോയ് (സിപിഐ), കെ. സദാനന്ദൻ (ബിജെപി), കെ.ജെ. ദേവസ്യ (കേരള കോണ്‍ഗ്രസ്) എന്നിവർ പ്രസംഗിക്കും. വയനാട് വൈൽഡ് ലൈഫ് ഡിവിഷനിലെ കണ്‍സർവേഷൻ ബയോളജിസ്റ്റ് വിഷ്ണു ഓമനക്കുട്ടൻ വിഷയാവതരണം നടത്തും. ഡോ.ടി.ആർ. സുമ (ഹ്യൂം സെന്‍റർ ഫോർ എക്കോളജിക്കൽ ആൻഡ് വൈൽഡ് ലൈഫ് ബയോളജി) മോഡറേറ്ററായിരിക്കും. പി. രാജഗോപാലൻ, സെബാസ്റ്റ്യൻ ജോസഫ്, സി.കെ. നളിനാക്ഷൻ, പ്രദീപ് മാനന്തവാടി, കെ. സജീവൻ എന്നിവർ സംബന്ധിക്കും.

വിദ്യാർഥികളും പിടിഎയും പ്രതിസന്ധിയിൽ : പുതിയ യുപി സ്കൂളുകളിൽ അധ്യാപക തസ്തികകൾ സൃഷ്ടിച്ചില്ല

വെള്ളമുണ്ട: ജില്ലയിൽ പുതുതായി ആരംഭിച്ച ജിയുപി സ്കൂളുകളിൽ അധ്യാപക തസ്തികകൾ സൃഷിക്കാത്തത് വിദ്യാർഥികൾക്കും പിടിഎകൾക്കും പ്രതിസന്ധിയായി. കഴിഞ്ഞവർഷം യുപി വിഭാഗം അനുവദിച്ച പുളിഞ്ഞാൽ, അതിരാറ്റുകുന്ന്, വാളവയൽ എൽപി സ്കൂളുകളിലാണ് അധ്യാപക തസ്തികകൾ സൃഷ്ടിക്കാത്തത്.എൽപി, ഹൈസ്കൂൾ വിഭാഗങ്ങൾ ഉണ്ടായിട്ടും യുപി പഠനത്തിന് വിദ്യാർഥികൾ ദൂരസ്ഥലങ്ങളിലേക്ക് പോകേണ്ട സാഹചര്യത്തിലാണ് ഈ വിദ്യാലയങ്ങളിൽ യുപി ക്ലാസുകൾ തുടങ്ങിയത്. എൽപി പഠനം കഴിഞ്ഞ് മറ്റിടങ്ങളിലെ വിദ്യാലയങ്ങളെ യുപി പഠനത്തിന് ആശ്രയിച്ച് ഹൈസ്കൂൾ പഠനത്തിനു തിരിച്ചെത്തേണ്ട അവസ്ഥയിലായിരുന്നു ഇവിടങ്ങളിലെ കുട്ടികൾ. കഴിഞ്ഞവർഷം അഞ്ചാംക്ലാസോടെ യുപി വിഭാഗം ആരംഭിച്ച മൂന്നു വിദ്യാലയങ്ങളിലും ബിആർസിയിൽനിന്നുള്ള അധ്യാപകരെയാണ് വിന്യസിച്ചത്. പുളിഞ്ഞാലിൽ മാനന്തവാടി ബിആർസിയിലെ രണ്ട് ക്ലസ്റ്റർ കോ ഓർഡിനേറ്റർമാരെരയും അതിരാറ്റുകുന്ന്, വാളവയൽ എന്നിവിടങ്ങളിൽ ബത്തേരി ബിആർസിയിലെ അധ്യാപകരെയുമാണ് വിന്യസിച്ചത്. ഈ അധ്യയനവർഷം അതിരാറ്റുകുന്ന്, വാളവയൽ സ്കൂളുകളിൽ അഞ്ച്, ആറ് ക്ലാസുകളിൽ ഓരോ ഡിവിഷനും പുളിഞ്ഞാൽ സ്കൂളിൽ രണ്ടു വീതം ഡിവിഷനുമാണുള്ളത്. പുളിഞ്ഞാലിൽ നാലും വാളവയൽ, അതിരാറ്റുകുന്ന് എന്നിവിടങ്ങളിൽ രണ്ടു വീതവും അധ്യാപക തസ്തികകളാണ് വേണ്ടത്. ബിആർസിയിൽനിന്നു ഈ വർഷം കൂടുതൽ പേരെ നിയോഗിച്ചിട്ടില്ല. കഴിഞ്ഞവർഷം നിയോഗിച്ചവരാകട്ടെ ബിആർസിയിൽനിന്നു യഥാസമയം ശന്പളം ലഭിക്കാത്തതിനാൽ ജോലി നിർത്താനുള്ള തയാറെടുപ്പിലാണ്. പുളിഞ്ഞാൽ സ്കൂളിൽ ഒരു അധ്യാപിക ജോലി ഒഴിവാക്കി. സമീപത്തെ സർക്കാർ എൽപി സ്കൂൾ യുപിയാക്കിയത് രക്ഷിതാക്കൾക്ക് പ്രതീക്ഷയായിരുന്നു. പൊതുവിദ്യാലയത്തിലേക്ക് മക്കളെ അയച്ച ഇവർ നിരാശയിലാണ്. അധ്യാപകരില്ലാത്തതിനാൽ കുട്ടികൾ ക്ലാസിൽ വെറുതേ ഇരിക്കേണ്ട അവസ്ഥ മൂന്നു വിദ്യാലയങ്ങളിലുമുണ്ട്. തസ്തികകൾ സൃഷ്ടിക്കാത്തത് നിലവിലുള്ള അധ്യാപകരുടെ ജോലിഭാരം വർധിക്കുന്നതിനും കാരണമായി. വലിയ സാന്പത്തിക ബാധ്യതയാകുന്നതിനാൽ സ്വന്തം ചെലവിൽ അധ്യാപകരെ ജോലിക്കുവയ്ക്കാൻ പിടിഎകൾക്ക് കഴിയുന്നില്ല. മൂന്നു വിദ്യാലയങ്ങളിലും പഠിക്കുന്ന കുട്ടികളിൽ അധികവും സാധാരണ കുടുംബങ്ങളിൽനിന്നുള്ളവരാണ്. അതിനാൽ പിടിഎ ഫണ്ടിലേക്ക് വലിയ തുക വാങ്ങാൻ കഴിയില്ല. മറ്റു സ്കൂളുകളിൽ താത്കാലിക നിയമം ലഭിക്കുന്ന അധ്യാപകർക്കു ലഭിക്കുന്ന ശന്പളം പിടിഎ നിയമനത്തിന് കിട്ടില്ല. അതിനാൽ പിടിഎ നിയമനത്തിൽ ഉദ്യോഗാർഥികൾക്ക് താത്പര്യം കുറവാണ്. തസ്തികകൾ സൃഷ്ടിക്കുന്നതിന് ധനമന്ത്രാലയം പച്ചക്കൊടി കാണിച്ചാൽ മാത്രമേ കുട്ടികളുടെ പഠനം സുഗമമാകൂവെന്ന് പുളിഞ്ഞാൽ സ്കൂൾ പിടിഎ ഭാരവാഹികൾ പറഞ്ഞു. പുതുതായി യുപി വിഭാഗം ആരംഭിച്ചതടക്കം വിദ്യാലയങ്ങളിലെ തസ്തിക നിർണയവുമായി ബന്ധപ്പെട്ട പ്രവർത്തനങ്ങൾ നടന്നുവരികയാണെന്ന് ജില്ലാ വിദ്യാഭ്യാസ ഓഫീസർ സി.വി. മൻമോഹൻ അറിയിച്ചു. ആറാം പ്രവൃത്തി ദിനത്തിൽ ലഭിച്ച വിവരങ്ങൾ അനുസരിച്ച് സ്കൂളുകളിൽ സന്ദർശനം നടത്തി തുടർ നടപടിസ്വീകരിക്കും.

വന്യമൃഗ ഭീതി ;ചീരാലിൽ സർവകക്ഷി യോഗം ചേർന്നു

സുൽത്താൻ ബത്തേരി: തുടർച്ചയായി ഉണ്ടാകുന്ന വന്യമൃഗ ശല്യത്തിന് ശാശ്വത പരിഹാരം കാണണമെന്ന് ആവശ്യപ്പെട്ട് ചീരാലിൽ സർവകക്ഷി യോഗം ചേർന്നു. സൗത്ത് വയനാട് ഡിഎഫ്ഒ അജിത് കെ. രാമൻ പങ്കെടുത്തു. പ്രദേശത്തെ വന്യമൃഗശല്യത്തിന്‍റെ രൂക്ഷതയും ആശങ്കകളും ഉദ്യോഗസ്ഥരെ അറിയിച്ചു. പ്രദേശത്തെ വന്യമൃഗ ഭീതി അകറ്റാൻ ഫലപ്രദമായ ഇടപെടൽ വനംവകുപ്പിന്‍റെ ഭാഗത്തുനിന്ന് വേണമെന്ന് യോഗത്തിൽ ആവശ്യമുയർന്നു. വിവിധ വകുപ്പുകളുടെ ഏകോപനത്തിലൂടെ മാത്രമേ വന്യമൃഗ ശല്യം പരിഹരിക്കാനാവു എന്നും അതിനായി എല്ലാവരുടെയും സഹകരണം വേണമെന്നും ഡിഎഫ്ഒ അജിത് കെ. രാമൻ പറഞ്ഞു. ചീരാൽ വില്ലേജ് തോട്ടാമൂല ഫോറസ്റ്റ് സ്റ്റേഷൻ പരിധിയിലേക്ക് മാറ്റുന്നതിനുള്ള നടപടികൾ സ്വീകരിക്കും. ചീരാലിൽ ഫോറസ്റ്റ് ഒൗട്ട് പോസ്റ്റ് സ്ഥാപിക്കുന്നതിനുള്ള നടപടികൾ സ്വീകരിക്കും. പ്രദേശത്തെ സ്വകാര്യ തോട്ടങ്ങളിൽ കാടു വെട്ടുന്നതിനുള്ള ഇടപെടൽ നടത്തും, പ്രദേശങ്ങളിൽ കൂടുതൽ കാമറകൾ സ്ഥാപിച്ച് നരിക്ഷണം ശക്തമാക്കാനും ആവശ്യമെങ്കിൽ കൂടുതൽ കൂടുകളൾ സ്ഥാപിക്കാനും യോഗത്തിൽ തീരുമാനിച്ചു. നെൻമേനി പഞ്ചായത്ത് പ്രസിഡന്‍റ് ബിന്ദു അനന്തൻ അധ്യക്ഷത വഹിച്ചു. വിവിധ രാഷ്ട്രീയ കക്ഷി നേതാക്കളായ വി.ടി. ബേബി, എം.എസ്. ഫെബിൻ, എം.എ. സുരേഷ്, കെ.ആർ. സാജൻ, പ്രസന്ന ശശീന്ദ്രൻ, പ്രശാന്ത് എന്നിവർ പ്രസംഗിച്ചു. വനം, പോലീസ്, പഞ്ചായത്ത് വകുപ്പ് ഉദ്യോഗസ്ഥർ യോഗത്തിൽ പങ്കെടുത്തു.

ഹോസ്റ്റലിലെ വിദ്യാർഥികൾ മയങ്ങി വീണത് ആശങ്കക്കിടയാക്കി

ഗൂഡല്ലൂർ: ഗൂഡല്ലൂർ നഗരത്തിനോട് ചേർന്ന ഗവ. ഹയർസെക്കൻഡറി സ്കൂളിന് സമീപത്തെ ആദിവാസി വിദ്യാർഥികളുടെ ഹോസ്റ്റലിൽ വിദ്യാർഥികൾ മയങ്ങി വീണത് ആശങ്കക്കിടയാക്കി. ഇന്നലെ രാവിലെ പ്രഭാത ഭക്ഷണം കഴിച്ചതിന് ശേഷമാണ് കുട്ടികൾ മയങ്ങി വീണത്. 33 കുട്ടികളാണ് ഈ ഹോസ്റ്റലിൽ താമസിച്ച് പഠിക്കുന്നത്. ഇതിൽ നാല് കുട്ടികൾക്കാണ് ഛർദ്ദിയും ക്ഷീണവും അനുഭവപ്പെട്ടത്. വിവരമറിഞ്ഞ് അധ്യാപകരും ഹോസ്റ്റൽ ജീവനക്കാരും സ്ഥലത്തെത്തി വിദ്യാർഥികളെ ഗൂഡല്ലൂർ ഗവ. ആശുപത്രിയിലേക്ക് മാറ്റി. എല്ലാ വിദ്യാർഥികളെയും ആശുപത്രിയിൽ എത്തിക്കുകയും പരിശോധന നടത്തുകയും ചെയ്തു. വിദ്യാർഥികൾക്ക് കുഴപ്പങ്ങളില്ലെന്ന് പരിശോധനയിൽ കണ്ടെത്തി. പിന്നീട് വിദ്യാർഥികളെ ആശുപത്രിയിൽ നിന്ന് മാറ്റി. ഭക്ഷ്യവിഷബാധയാകാമെന്ന് സംശയിക്കുന്നു. സംഭവം രക്ഷിതാക്കളെയും നാട്ടുകാരെയും ഭീതിയിലാക്കി. വിവരമറിഞ്ഞ് പോലീസ്, റവന്യു, വിദ്യാഭ്യാസ വകുപ്പ് ഉദ്യോഗസ്ഥർ സ്ഥലത്തെത്തി ആവശ്യമായ നടപടികൾ സ്വീകരിച്ചു.

മൂടക്കൊല്ലിയിൽ കാട്ടാനശല്യം തുടരുന്നു

സുൽത്താൻ ബത്തേരി: വാകേരി മൂടക്കൊല്ലിയിൽ കാട്ടാനശല്യം തുടരുന്നു. പ്രദേശത്ത് കാവൽ നിൽക്കുന്ന വനം ജീവനക്കാരെയും കുംകിയാനകളെയും വെട്ടിച്ചാണ് കാട്ടാനകൾ ജനവാസകേന്ദ്രത്തിൽ എത്തുന്നത്. കഴിഞ്ഞരാത്രി മൂടക്കൊല്ലിയിൽ ഇറങ്ങിയ ആന നെടിയാക്കൽ വിനുവിന്‍റെ കോഴിക്കൂടും കൊല്ലംപറന്പിൽ ഗോപിനാഥ്, മാവത്ത് ബിനു, കുന്നേൽ പുഷ്പാകരൻ തുടങ്ങിയവരുടെ കൃഷികളും നശിപ്പിച്ചു. കഴിഞ്ഞദിവസം കുംകിയാനകളുടെ സഹായത്തോടെ ഉൾക്കാട്ടിലേക്ക് തുരത്തിയ കാട്ടാനകളാണ് തിരിച്ചെത്തി കൃഷനാശം വരുത്തിയത്. കാട്ടാനകളുടെ സാന്നിധ്യം ജനങ്ങളുടെ സ്വൈരം കെടുത്തുകയാണ്.

കർഷക കടാശ്വാസ കമ്മീഷൻ അദാലത്ത്; 2.30 കോടി അനുവദിച്ചു

കൽപ്പറ്റ: ജില്ലയിൽ മൂന്ന് ദിവസങ്ങളിലായി സംസ്ഥാന കർഷക കടാശ്വാസ കമ്മീഷൻ നടത്തിയ അദാലത്തിൽ 284 പേർക്ക് കടാശ്വാസം അനുവദിച്ചു. ആകെ 1531 അപേക്ഷകളാണ് പരിഗണിച്ചത്. 2020 ഓഗസ്റ്റ് 31 വരെയുള്ള അപേക്ഷകൾ പരിഗണിച്ചതിൽ 2,30,43744 രൂപ കടാശ്വാസമായി സർക്കാർ ബാങ്കുകൾക്ക് നൽകും. അദാലത്തിൽ പങ്കെടുക്കുന്നതിനായി അപേക്ഷകർക്കും ധനകാര്യ സ്ഥാപനങ്ങൾക്കും നേരത്തെ നോട്ടീസ് അയച്ചിരുന്നു. ജില്ലയിലെ അടുത്ത സിറ്റിംഗ് ഓഗസ്റ്റ് 20, 21, 22 തീയതികളിൽ നടത്തും. സംസ്ഥാന കർഷക കടാശ്വാസ കമ്മീഷൻ ചെയർമാൻ ഏബ്രഹാം മാത്യു അധ്യക്ഷത വഹിച്ചു. കമ്മീഷൻ അംഗങ്ങളായ ജോസ് പാലത്തിനാൽ, കെ.എം. ഇസ്മായിൽ, എൻ.യു. ജോണ്‍കുട്ടി, കെ.ആർ. രാജൻ, കെ.സി. വിജയൻ, വകുപ്പ് ഉദ്യോഗസ്ഥർ എന്നിവർ പങ്കെടുത്തു.

ഡോ.ജസ്റ്റി ജോസഫിന് വി.പി.പി. മേനോൻ സ്വർണമെഡൽ

സുൽത്താൻ ബത്തേരി: രാജ്യത്തെ ഐഐടികളിലെ ഏറ്റവും മികച്ച ഗവേഷണ പ്രബന്ധത്തിനുള്ള(2024-25) വി.പി.പി.മേനോൻ സ്വർണ മെഡൽ വയനാട് വടുവഞ്ചാൽ സ്വദേശിനി ഡോ.ജസ്റ്റി ജോസഫിന് ലഭിച്ചു. നിലവിൽ ഐഐടി ഇൻഡോറിൽ റിസർച്ച് അസിസ്റ്റന്‍റാണ്. മുടകര എം.പി. ജോസഫിന്‍റെയും ബത്തേരി സെന്‍റ് ജോസഫ്സ് ഇംഗ്ലീഷ് മീഡിയം ഹയർ സെക്കൻഡറി സ്കൂൾ അധ്യാപിക എ.എം. ശോശാമ്മയുടെയും മകളാണ്.

ഉമ്മൻചാണ്ടി അനുസ്മരണം നടത്തി

കൽപ്പറ്റ: രാഷ്ട്രീയ പ്രവർത്തകരുടെ മാന്യത സമൂഹത്തിൽ നിലനിർത്തിയ മഹാ വ്യക്തിത്വമായിരുന്നു ഉമ്മൻചാണ്ടിയെന്ന് ടി. സിദ്ദിഖ് എംഎൽഎ. ഐഎൻടിയുസി ജില്ലാ കമ്മിറ്റി സംഘടിപ്പിച്ച മുൻ മുഖ്യമന്ത്രി ഉമ്മൻചാണ്ടിയുടെ അനുസ്മരണ സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കല്ലെറിഞ്ഞവരോട് ക്ഷമിക്കുവാനും രാഷ്ട്രീയത്തിൽ പകയല്ല സ്നേഹവും ആർദ്രതയും ആണ് വേണ്ടതെന്ന് സ്വന്തം ജീവിതത്തിലൂടെ കാണിച്ചുതന്ന നേതാവായിരുന്നു ഉമ്മൻചാണ്ടി. കേരളത്തിൽ ഏറ്റവും കൂടുതൽ അടിസ്ഥാന വികസനം നടന്ന വർഷം ഉമ്മൻചാണ്ടി ഭരിക്കുന്ന സമയത്താണ്. കൊച്ചി മെട്രോ, കണ്ണൂർ വിമാനത്താവളം, വിഴിഞ്ഞം തുറമുഖം, സ്മാർട്ട് സിറ്റി, തുടങ്ങിയ എണ്ണിയാൽ ഒടുങ്ങാത്ത വികസന പ്രവർത്തനങ്ങൾക്ക് നേതൃത്വം കൊടുത്ത നേതാവാണ് ഉമ്മൻചാണ്ടി. ജനസന്പർക്ക പരിപാടി ഒരു ഭരണാധികാരി കെട്ടിടത്തിൽ മാത്രം നിൽക്കൽ അല്ല ജനങ്ങൾക്കിടയിലേക്ക് ഇറങ്ങി അവരുടെ വേദനകൾ അറിയൽ കൂടിയാണ് ഒരു ഭരണാധികാരിയുടെ ഉത്തരവാദിത്വം എന്ന് കേരളത്തിലെ പൊതുസമയത്തിന് കാണിച്ചുകൊടുത്ത നേതാവായിരുന്നു ഉമ്മൻചാണ്ടി എന്നും അദ്ദേഹം കൂട്ടിച്ചേർത്തു. ഐഎൻടിയുസി ജില്ലാ പ്രസിഡന്‍റ് പി.പി. ആലി അധ്യക്ഷത വഹിച്ചു. ബി. സുരേഷ് ബാബു, ടി. ഉഷാകുമാരി, മായ പ്രദീപ്, താരീഖ് കടവൻ, ഒ. ഭാസ്കരൻ, എൻ.കെ. ജ്യോതിഷ് കുമാർ, മോഹൻദാസ് കോട്ടക്കൊല്ലി, കെ.ടി. നിസാം, വർഗീസ് നെൻമേനി, കെ.കെ. രാജേന്ദ്രൻ, സി.എ. ഗോപി, കെ.വി. ഷിനോജ്, കെ. അജിത, ശ്രീനിവാസൻ തൊവരിമല, നജീബ് പിണങ്ങോട്, പി.എൻ. ശിവൻ, ജിനി തോമസ്, ജയമുരളി, സി.എ. അരുണ്‍ദേവ്, ഹർഷൽ കോന്നാടൻ, എസ്. മണി, കെ.യു. മാനു, ആർ. ഉണ്ണികൃഷ്ണൻ തുടങ്ങിയവർ പ്രസംഗിച്ചു.

വയനാട്ടിൽ മഴയളവിൽ വലിയ ഏറ്റക്കുറച്ചിൽ

കൽപ്പറ്റ: ബുനാഴ്ച പകലും രാത്രിയും ജില്ലയിലെ പടിഞ്ഞാറത്തറയിൽ പെയ്തത് കനത്ത മഴ. ജില്ലയിൽ ഇന്നലെ രാവിലെ എട്ടിന് അവസാനിച്ച 24 മണിക്കൂറിൽ ഏറ്റവും കൂടുതൽ മഴ രേഖപ്പെടുത്തിയത് പടിഞ്ഞാറത്തറ കണ്‍ട്രോൾ ഷാഫ്റ്റ് ഭാഗത്ത്-333 മില്ലി മീറ്റർ. കോട്ടത്തറ പഞ്ചായത്തിലെ കുറുന്പാലക്കോട്ടയിൽ 234 എംഎം മഴ രേഖപ്പെടുത്തി. മുട്ടിൽ പഞ്ചായത്ത് പരിധിയിലെ കാരാപ്പുഴ ഓട്ടോമാറ്റിക് വെതർ സ്റ്റേഷനിലാണ് കുറഞ്ഞ മഴ രേഖപ്പെടുത്തിയത്-2 എംഎം. മറ്റുചില സ്ഥലങ്ങളിൽ ലഭിച്ച മഴയുടെ കണക്ക്: കുഞ്ഞാം-210 എംഎം, വാളാംതോട്-208, അയനിക്കൽ-186, നിരവിൽപുഴ-183, തൊണ്ടർനാട് വില്ലേജ് ഓഫീസ്-182, ലക്കിടി-172, മക്കിയാട്-161, ആലാറ്റിൽ വട്ടോളി-154, എടവക ഒരപ്പ്-153, കാപ്പിക്കളം-145, കോറോം-145, തേറ്റമല എസ്റ്റേറ്റ്-138, പുത്തുമല-137, കള്ളാടി-137, തവിഞ്ഞാൽ എസ്റ്റേറ്റ്-136, പൊഴുതന മേൽമുറി-135, വൈത്തിരി മാങ്ങാടൻകുന്ന്-135, പടിഞ്ഞാറത്തറ അരിച്ചൽ കവല-134, വരയാൽ-134, കുറിച്യർമല എസ്റ്റേറ്റ്-133, കാപ്പാട്ടുമല-133, മണിക്കുന്നുമല-126, തലമല-126, മംഗലശേരിമല-124, തരിയോട് എട്ടാംമൈൽ-119, വൈത്തിരി വട്ടപ്പാറ-117, പഴയ വൈത്തിരി-116, വേങ്ങാക്കോട്-113, എടവക പാലമുക്ക്-113, വെങ്ങപ്പള്ളി വാവാടി-112, മാടക്കുന്ന്-110, തവിഞ്ഞാൽ വില്ലേജ് ഓഫീസ്-110, മേപ്പാടി എളന്പിലേരി-105, പാലവയൽ-10-5, തൃക്കൈപ്പറ്റ വില്ലേജ് ഓഫീസ്-104, ഒഴുക്കൻമൂല-103, ബേങ്ങത്തോട്-102, പാലേരി-102, വെള്ളന്പാടി-102, തലപ്പുഴ-101, ചിറക്കര-99, മണിയങ്കോട്-98, അട്ടമല-97, കൽപ്പറ്റ ഹൈഡ്രോളജി-97, ചെന്പ്ര എസ്റ്റേറ്റ്-97, ആനോത്ത്-96, തരിയോട്-94, മുണ്ടക്കൈ ഫോറസ്റ്റ് സ്റ്റേഷൻ-92, നീലിക്കാപ്പ്-89, ചൂരൽമല-88, നന്പ്യാർകുന്ന്-87, കരടിപ്പാറ-86, ചിറക്കര യുഡി-86, താഴത്തൂർ-84, നീലിമല-83, അന്പലവയൽ മഞ്ഞപ്പാറ-83, പാണ്ടിക്കടവ്-83, കൽപ്പറ്റ ഗവ.കോളജ്-83, പനങ്കണ്ടി-81, കാരക്കാമല-80, മാനന്തവാടി-80, കരണി-77, ജസി എസ്റ്റേറ്റ്-77, ഓടവയൽ-76, ചീരാൽ-76, ബത്തേരി ശ്രേയസ്-75, മീനങ്ങാടി 54-72, തരുവണ-71, കാരാപ്പുഴ ഡാം-71, കൊയിലേരി-70, വാഴവറ്റ-70, പനമരം-69, പൂതാടി സിസി-68, തിരുനെല്ലി-66, എടവക ഹിൽബ്ലൂംസ് സ്കൂൾ-65, നെല്ലിക്കര-62, മൊതക്കര-61, നീർവാരം പാലം-59, മൂലങ്കാവ്-57, നായ്ക്കെട്ടി-57, പുഞ്ചവയൽ-56, കേണിച്ചിറ-56, ചീയന്പം-55, കല്ലൂർ-51, ഏച്ചോം തുടി-52, പുൽപ്പള്ളി ആനപ്പാറ-49, ബത്തേരി പഴേരി-48, കാട്ടിക്കുളം-47, ബാവലി-42, മുള്ളൻകൊല്ലി കടന്പൂർ-41, പാൽവെളിച്ചം-36, മുള്ളൻകൊല്ലി-33, മരക്കടവ്-27, അപ്പപ്പാറ-24, കബനിഗിരി-20, ഓടപ്പള്ളം ഗവ.സ്കൂൾ-16, കുപ്പാടി എഡബ്ല്യുഎസ്-5 എംഎം.

വയലുകളിൽ മീൻപിടുത്തം സജീവം

സുൽത്താൻ ബത്തേരി: മഴ ശക്തമായതോടെ വയലുകളിലും തോടുകളിലും വെള്ളംനിറഞ്ഞത് മീൻപിടിത്തക്കാർക്ക് അനുഗ്രഹമായി. വയലുകളിലേക്ക് കയറിയ മീനുകളെ പിടിക്കാനെത്തുവരാൽ സജീവമായിരിക്കുകയാണ് വയലുകളും പുഴയോരങ്ങളും. കുത്തുവലയും തണ്ടാടിയുമൊക്കെയായാണ് ഇവർ മീൻ പിടിക്കാനെത്തുന്നത്. മഴ ശക്തമായതിനെ തുടർന്ന് സ്കൂളുകൾക്ക് അവധിയായതിനാൽ കുട്ടികളും സ്ത്രീകളും മീൻപിടിക്കാൻ സജീവമാണ്. സമീപത്തെ ഉന്നതികളിൽ നിന്നെത്തിയവരാണ് രാവിലെ മുതൽ മിൻപിടിത്തത്തിൽ ഏർപ്പെട്ടിരിക്കുന്നത്. പരൽ, തിലോപ്പിയ, വരാൽ, ചക്കമുള്ളൻ തുടങ്ങിയ മീനുകളാണ് വെള്ളംകയറുന്ന വയലുകളിൽ നിന്ന് ഇവർക്ക് ലഭിക്കാറ്.

കൈത്തോട് ഗതിമാറി ഒഴുകി; നെൽക്കൃഷി നശിച്ചു

സുൽത്താൻ ബത്തേരി: കനാലിന്‍റെ കല്ലുകൾ ഇളകിവീണതിനെത്തുടർന്നു കൈത്തോട് ഗതിമാറി ഒഴുകി നെൽക്കൃഷി നശിച്ചു. പൂളവയലിലാണ് സംഭവം. വട്ടുളി അനന്തന്‍റെ 20 സെന്‍റ് നെൽക്കൃഷിയാണ് നശിച്ചത്. ദിവസങ്ങൾ മുന്പാണ് വയൽ ഒരുക്കി വിത്ത് വിതച്ചത്. വലിയ നഷ്ടമാണ് കർഷകനുണ്ടായത്. കാലപ്പഴക്കം മൂലമാണ് ചെറുകിട ജലസേചന വകുപ്പിനു കഴീലുള്ള കനാലിലെ കല്ലുകൾ ഇളകിവീണത്. പതിറ്റാണ്ടുകൾ മുന്പ് നിർമിച്ച കനാൽ ഇതുവരെ പൂളവയവൽ പാടശേഖരത്തിലെ കർഷകർക്ക് ഉപകാരപ്പെട്ടിട്ടില്ല. ക നാൽ പൊളിച്ചുമാറ്റണമെന്ന് കർഷകർ അധികൃതരോട് ആവശ്യപ്പെട്ടിരുന്നു. കൃഷിനാശത്തിന് അനന്തന് നഷ്ടപരിഹാരം അനുവദിക്കണമെന്നും കനാൽ പൊളിച്ച് കൈത്തോടിന്‍റെ വശങ്ങൾ സുരക്ഷിതമാക്കണമെന്നും കർഷകർ ആവശ്യപ്പെട്ടു.

കുന്താണി സ്കൂളിൽ മഴയുത്സവം നടത്തി

സുൽത്താൻ ബത്തേരി: കുന്താണി ഗവ.എൽപി സ്കൂളിൽ പഠനപ്രവർത്തനങ്ങളുടെ ഭാഗമായി മഴയുത്സവം നടത്തി. നഴ്സറി മുതൽ നാലു വരെ ക്ലാസുകളിലെ കുട്ടികൾ ആടിയും പാടിയും മഴയുത്സവം കേമമാക്കി. കുട്ടികളും അധ്യാപകരും രക്ഷിതാക്കളും ചേർന്ന് തയാറാക്കിയ മഴപ്പുസ്തകം സ്കൂൾ ലീഡർ ഡാൻ തോമസിന് കൈമാറി പ്രധാനാധ്യാപകൻ എം.ടി. ബിജു പ്രകാശനം ചെയ്തു. വി.എ. അനിഷ മോൾ, ബിന്ദു കെ. ജോസ് എന്നിവർ നേതൃത്വം നൽകി.

ശക്തമായ മഴ: നൂൽപ്പുഴയിൽ താഴ്ന്ന പ്രദേശങ്ങൾ വെള്ളത്തിൽ

സുൽത്താൻ ബത്തേരി: കഴിഞ്ഞദിവസം രാത്രിയിൽ പെയ്ത ശക്തമായ മഴയിൽ നൂൽപ്പുഴയിലെ കല്ലൂർ പുഴയും ചെറുംതോടുകളും കരകവിഞ്ഞു. ഇതോടെ പുഴയോരങ്ങളിലെ പാടശേഖരങ്ങളടക്കം താഴ്ന്ന പ്രദേശങ്ങൾ വെള്ളത്തിലായി. ശക്തമായ മഴവെള്ളപ്പാച്ചിലിൽ ചെറുതോടുകളുടെ വരുന്പുകൾ തകർന്ന് വയലുകളിലേക്ക് വെള്ളവും മണ്ണും കുത്തിയൊഴുകി കൃഷിനാശം സംഭവിച്ചു. വിത്തിറക്കിയവർ വീണ്ടും കൃഷിയിറക്കേണ്ട സാഹചര്യമാണ്. പ്രദേശത്തെ നിരവധി വീടുകളും വെള്ളപൊക്ക ഭീതിയിലാണ്. കല്ലൂർ പുഴയുടെ ഓരത്തുള്ള പുഴംകുനി ഉന്നതിയിലേക്ക് ഇന്നലെ രാവിലെയോടെയാണ് വെള്ളം ഇരച്ചെത്തിയത്. ജില്ലയിൽ റെഡ് അലേർട്ട് പ്രഖ്യാപിച്ചതിനാലും വീണ്ടും മഴപെയ്താൽ രാത്രിയിൽ ഉന്നതിയിലേക്ക് വീണ്ടും വെള്ളംകയറാനുമുള്ള സാധ്യത കണക്കിലെടുത്തും ഇവിടെയുള്ള കുടുംബങ്ങളെ സുരക്ഷിതസ്ഥാനത്തേക്ക് മാറ്റി. ശക്തമായ മഴയിൽ നന്പിക്കൊല്ലി, കണ്ണംകോട്, മണ്ണൂർകുന്ന്, കോളിപ്പാളി കോട്ടൂർ, കല്ലൂർ പാടശേഖരങ്ങളിൽ വെള്ളംകയറി. നെൻമേനി പഞ്ചായത്തിലെ വലിയവട്ടം തോട് കരകവിഞ്ഞ് തവനി, വലിയവട്ടം, ചെറുമാട് പാടശേഖരങ്ങളിലും വെള്ളംകയറി. നൂൽപ്പുഴയിൽ മുത്തങ്ങ - ആലത്തൂർ - മ·ഥൻമൂല റോഡിൽ വെള്ളംകയറിയതോടെ ആലത്തൂർ, ചെണ്ടക്കുനി അടക്കമുള്ള പ്രദേശങ്ങൾ ഒറ്റപ്പെട്ടനിലയിലാണ്. മുത്തങ്ങപുഴ കരകവിഞ്ഞാണ് ഇവിടേക്ക് വെള്ളം കയറിയത്. മഴ ശക്തമായി തുടർന്നാൽ ദേശീയപാത 766ൽ തകരപ്പാടി, പൊൻകുഴി ഭാഗങ്ങളിൽ വെള്ളംകയറാനും ഗതാഗത തടസത്തിനുകാരണമാകും.

ചൂരൽമല, മുണ്ടക്കൈ പ്രദേശത്ത് നിരോധനം

കൽപ്പറ്റ: ജില്ലയിൽ വരും ദിവസങ്ങളിൽ ശക്തമായ മഴ മുന്നറിയിപ്പ് ലഭിച്ചതിനാൽ മുണ്ടക്കൈ, ചൂരൽമല പ്രദേശത്തേക്കുള്ള പ്രവേശനം നിരോധിച്ചതായി ജില്ലാ കളക്ടർ ഡി.ആർ. മേഘശ്രീ അറിയിച്ചു. മുണ്ടക്കൈ, ചൂരൽമല ഉരുൾപൊട്ടലിന്‍റെ ശേഷിപ്പുകൾ ശക്തമായ മഴയിൽ ഇടിഞ്ഞ് പുന്നപ്പുഴയിൽ കുത്തൊഴുക്കും ജലനിരപ്പ് ഉയരാനും സാധ്യതയുള്ളതിനാലാണ് നിരോധനം ഏർപ്പെടുത്തിയത്. ഗോ സോണ്‍, നോ ഗോ സോണ്‍ ഭാഗങ്ങളിലേക്കും പ്രദേശത്തെ തോട്ടം മേഖലയിലേക്കും പ്രവേശനം കർശനമായി നിരോധിച്ചതായി ജില്ലാ കളക്ടർ അറിയിച്ചു.

കാരുണ്യസ്പർശം ചാരിറ്റബിൾ ട്രസ്റ്റ് പഠനോപകരണങ്ങൾ വിതരണം ചെയ്തു

സുൽത്താൻ ബത്തേരി: മലങ്കര ഓർത്തഡോക്സ് സുറിയാനി സഭ ബത്തേരി ഭദ്രാസനത്തിനു കീഴിൽ പ്രവർത്തിക്കുന്ന കാരുണ്യസ്പർശം ചാരിറ്റബിൾ ട്രസ്റ്റ് പുന്നപ്പാലം എംജിഎം പബ്ലിക് സ്കൂൾ, ബത്തേരി നിർമലമാതാ പബ്ലിക് സ്കൂൾ, ഗോവിന്ദമൂല ഉന്നതി എന്നിവിടങ്ങളിൽനിന്നു തെരഞ്ഞെടുത്ത 85 വിദ്യാർഥികൾക്ക് പഠനോപകരണങ്ങൾ വിതരണം ചെയ്തു. ഭദ്രാസന മെത്രാപ്പോലീത്തയും ട്രസ്റ്റ് മാനേജിംഗ് ട്രസ്റ്റിയുമായ ഡോ.ഗീവർഗീസ് മാർ ബർന്നബാസ് ഉദ്ഘാടനം ചെയ്തു. ഭദ്രാസന സെക്രട്ടറി ഫാ.ബേബി ജോണ്‍, മത്തായി നെടിയാനക്കുഴി, ഉന്നതി മൂപ്പൻ ജി. പാലൻ എന്നിവർ പ്രസംഗിച്ചു. വൈദികർ, ട്രസ്റ്റ് ഭാരവാഹികൾ എന്നിവർ പങ്കെടുത്തു.

റോട്ടറി കബനി വാലി: ഭാരവാഹികൾ ചുമതലേയേറ്റു

മാനന്തവാടി: റോട്ടറി കബനി വാലി ഭാരവാഹികളായി ഷാജി ഏബ്രഹാം(പ്രസിഡന്‍റ്), കെ.പി. റിൻസ്(സെക്രട്ടറി), ജോബി കെ. ജോസ്(ട്രഷറർ) എന്നിവർ ചുമതലയേറ്റു. ഫേണ്‍ ട്രീ റിസോർട്ടിൽ നടന്ന ചടങ്ങിൽ ജില്ലയിൽനിന്നുള്ള ആദ്യ റോട്ടറി ഗവർണർ ബിജോഷ് മാനുവേൽ മുഖ്യ പ്രഭാഷണം നടത്തി. റൊട്ടേറിയൻ ദീപക് കുമാർ കൊറോത്ത് മുഖ്യാതിഥിയായി. ജോണ്‍സൻ ജോണ്‍, കെ.ടി. പ്രാഭിലാഷ്, കെ.ജി. സുനിൽ, ഡോ. രമേഷ്കുമാർ, രവീന്ദ്രനാഥ്, കെ.കെ. പ്രവീണ്‍, സി.കെ. സണ്ണി, ഡോ.സന്തോഷ് സ്കറിയ, വിനീത് വയനാട് എന്നിവർ പ്രസംഗിച്ചു. ജില്ലയിലെ വിവിധ റോട്ടറി ക്ലബ് അംഗങ്ങൾ പങ്കെടുത്തു. വിദ്യാഭ്യാസ, പരിസ്ഥിതി സംരക്ഷണ പദ്ധതികൾ നടപ്പാക്കുമെന്ന് പ്രസിഡന്‍റ് പ്രഖ്യാപിച്ചു.

വിദ്യാഭ്യാസ സ്ഥാപനങ്ങൾക്ക് ഇന്ന് അവധി

കൽപ്പറ്റ: കേന്ദ്ര കാലാവസ്ഥ വകുപ്പ് ജില്ലയിൽ ഓറഞ്ച് അലർട്ട് പ്രഖ്യാപിച്ചതിനാൽ ഇന്ന് ജില്ലയിലെ വിദ്യാഭ്യാസ സ്ഥാപനങ്ങൾക്ക് ജില്ലാ കളക്ടർ ഡി.ആർ. മേഘശ്രീ അവധി പ്രഖ്യാപിച്ചു. പ്രഫഷണൽ കോളജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾ, അങ്കണവാടികൾ, ട്യൂഷൻ സെന്‍ററുകൾ, മതപഠന ക്ലാസുകൾ, സ്പെഷൽ ക്ലാസുകൾക്ക് അവധി ബാധകമാണ്. പിഎസ്‌സി പരീക്ഷകൾ, റസിഡൻഷൽ സ്കൂളുകൾ, കോളജുകൾക്ക് അവധി ബാധകമല്ല.

’പീപ് ഫോർ ഓൾ’ ഉദ്ഘാടനം

സുൽത്താൻ ബത്തേരി: വടക്കനാട് എൽപി സ്കൂളിൽ ’പീപ് ഫോർ ഓൾ’ നൂൽപ്പുഴ പഞ്ചായത്ത് പ്രസിഡന്‍റ് ഷീജ സതീഷ് ഉദ്ഘാടനം ചെയ്തു. ആൽബി എൽദോസ് സക്കറിയാസ് അധ്യക്ഷത വഹിച്ചു. ഫാ.ജോസ് മോളോപറന്പിൽ ലോഗോ പ്രകാശനം ചെയ്തു. പ്രധാനാധ്യാപിക വി. മീനാക്ഷി, ജോയിന്‍റ് സെക്രട്ടറി ശ്രീഷ, അഞ്ജന സോമൻ, നിഖില, സിതാര, അൽജോസ് എന്നിവർ പ്രസംഗിച്ചു. അനു തോമസ് സ്വാഗതം പറഞ്ഞു.

ബത്തേരിയിൽ നവീകരിച്ച ലിങ്ക് റോഡ് ഉദ്ഘാടനം ചെയ്തു

സുൽത്താൻ ബത്തേരി: നഗരസഭയിലെ നവീകരിച്ച മിനി ബൈപാസ്-സ്റ്റേഡിയം ലിങ്ക് റോഡ് ചെയർമാൻ ടി.കെ. രമേശ് ഉദ്ഘാടനം ചെയ്തു. വൈസ് ചെയർപേഴ്സണ്‍ എൽസി പൗലോസ് അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി അധ്യക്ഷരായ ലിഷ, ടോം ജോസ്, വാർഡ് വികസന സമിതി കണ്‍വീനർ പി.ജെ. ജോസഫ് എന്നിവർ പ്രസംഗിച്ചു. പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ കെ. റഷീദ് സ്വാഗതം പറഞ്ഞു.

പുഞ്ചിരിമട്ടം ദുരന്തം അതിജീവിച്ച കുട്ടികൾ കിൻഷിപ്പ് ഫോസ്റ്റർ കെയർ പദ്ധതിക്ക് കീഴിൽ

കൽപ്പറ്റ: കരൾ പിളരും വേദന നൽകിയ പുഞ്ചിരിമട്ടം ദുരന്തത്തിന് ഒരു വയസാകുന്നു. നാട് ഇതുവരെ കാണാത്ത കനത്ത ആഘാതത്തിന്‍റെയും സങ്കടക്കടലിന്‍റെയും മുഖത്തു നിന്നും അതിജീവിതരും ബന്ധുക്കളും നാടും പതിയെ ഉയിർത്തെഴുന്നേൽക്കുകയാണ്. കൽപ്പറ്റ എൽസ്റ്റണ്‍ എസ്റ്റേറ്റിലെ പുനരധിവാസ ടൗണ്‍ഷിപ്പിൽ ഉയരുന്ന പുതിയ വീടും പുതിയ ജീവിതവുമായി പുത്തൻ പ്രതീക്ഷകൾ തുന്നുകയാണ് അവർ. ദുരന്തത്തിൽ ഏഴ് കുട്ടികൾക്കാണ് മാതാപിതാക്കളെ ഒന്നിച്ചു നഷ്ടപ്പെട്ടത്. ഇതിൽ രണ്ട് പേർക്ക് 18 വയസ് പൂർത്തിയാകാൻ ഏതാനും മാസങ്ങളെ ഉണ്ടായിരുന്നുള്ളൂ. അവർക്ക് ഇപ്പോൾ പ്രായപൂർത്തിയായി. ബാക്കി അഞ്ചു കുട്ടികളും അടുത്ത ബന്ധുക്കളുടെ കൂടെ ഒരു വർഷത്തെ കിൻഷിപ്പ് ഫോസ്റ്റർ കെയർ പദ്ധതിയിലാണ്. ജില്ലാ ശിശു സംരക്ഷണ യൂണിറ്റ് ഉദ്യോഗസ്ഥർ ഓരോ ആഴ്ച്ചയും ഫോണ്‍ വഴിയും ഓരോ മാസവും നേരിട്ടും അവരെ സന്ദർശിച്ച് സുഖവിവരം ഉറപ്പാക്കുന്നുണ്ട്. അഞ്ച് മുതൽ 16 വയസ് വരെയുള്ളവരാണിവർ. അഞ്ചു പേരിൽ മൂന്നും പെണ്‍കുട്ടികളാണ്. എല്ലാവരും സ്കൂളിൽ പോകുന്നു. ചെറിയച്ഛന്‍റെയോ വലിയച്ഛന്‍റെയോ അതുപോലുള്ള അടുത്ത ബന്ധുക്കളുടെയോ വീടുകളിലാണ് അവർ കഴിയുന്നത്. ഇതിൽ ഏറ്റവും പ്രായക്കുറവുള്ള അഞ്ച് വയസുകാരിക്ക് ബന്ധുവീട്ടിൽ സന്തോഷമായത് അമ്മയുടെ സഹോദരി അടുത്തിടെ ജൻമം നൽകിയ കുഞ്ഞാണ്. മറ്റൊരു എട്ട് വയസുകാരിയുടെ ബന്ധുവീട്ടിൽ മൂന്ന് കുട്ടികളുണ്ട്. അവരുടെ ലോകത്തിലെ കളിചിരി വിശേഷങ്ങളാണ് അവളുടെ ജീവിതത്തിൽ നിറങ്ങൾ തിരികെ കൊണ്ടുവന്നത്. പ്രായപൂർത്തിയായ രണ്ട് പേരിൽ ഒരാളുടെ ഡിഗ്രി വിദ്യാഭ്യാസത്തിന്‍റെ മുഴുവൻ ചെലവുകളും സുൽത്താൻ ബത്തേരി ഡോണ്‍ ബോസ്കോ കോളജ് മാനേജ്മെന്‍റാണ് വഹിക്കുന്നത്. മറ്റൊരാൾ പ്ലസ് വണ്ണിന് കോഴിക്കോട് ജില്ലയിലാണ് പഠിക്കുന്നത്. നേരത്തെ ഡ്രോപ്പ് ഒൗട്ട് ആയ ഇദ്ദേഹം ദുരന്തത്തിന് ശേഷം പഠനം പുനരാരംഭിക്കുകയായിരുന്നു. ഈ വിദ്യാർഥി ഒഴികെ എല്ലാവരും വയനാട്ടിൽ തന്നെയാണ്. വേറെ 11 കുട്ടികളുടെ അച്ഛനെയും മൂന്ന് കുട്ടികളുടെ അമ്മയെയും ഉരുളെടുത്തു. അച്ഛനെ നഷ്ടപ്പെട്ടവർ അമ്മയുടെ കൂടെയും അമ്മയെ നഷ്ടപ്പെട്ടവർ അച്ഛന്‍റെ കൂടെയുമാണ് നിലവിൽ കഴിയുന്നത്. ഇതിൽ വെറും രണ്ട് മാസം പ്രായമുള്ള അച്ഛനെ നഷ്ടപ്പെട്ട കുഞ്ഞും ഉൾപ്പെടുന്നു. ഈ 14 പേരിൽ രണ്ട് പേർ തമിഴ്നാട് സ്വദേശികളാണ്. ഇവരുടെയും മാനസിക, ഉല്ലാസ, പഠന, പാഠ്യേതര കാര്യങ്ങളും കൃത്യമായി ശിശു സംരക്ഷണ യൂണിറ്റ് ശ്രദ്ധിക്കുന്നു. കുട്ടികൾ പഠിക്കുന്ന സ്കൂളുകളിലെ കൗണ്‍സലർമാർക്ക് പ്രത്യേക നിർദേശം നൽകിയിട്ടുണ്ട്. അച്ഛനും അമ്മയും നഷ്ടപ്പെട്ടവർക്ക് 10 ലക്ഷം രൂപയും ആരെങ്കിലും ഒരാൾ നഷ്ടപ്പെട്ടവർക്ക് 5 ലക്ഷം രൂപയും സംസ്ഥാന സർക്കാർ സാന്പത്തിക സഹായം നൽകിയിട്ടുണ്ട്. ഇത് കുട്ടിയുടെയും ജില്ലാ ശിശു സംരക്ഷണ ഓഫീസറുടെയും പേരിൽ തുടങ്ങിയ ജോയിന്‍റ് അകൗണ്ടിൽ സ്ഥിരനിക്ഷേപമായി ഇട്ടിരിക്കുകയാണ്. അതിന്‍റെ പലിശ അവർക്ക് ലഭിക്കുന്നുണ്ട്. 19 കുട്ടികൾക്ക് കേന്ദ്രസർക്കാറിന്‍റെ സ്പോണ്‍സർഷിപ്പ് പദ്ധതിയിൽ പ്രതിമാസം 4,000 രൂപ ലഭിക്കുന്നു. ഇതിന് പുറമെ മാതാപിതാക്കൾ ഇരുവരും നഷ്ടപ്പെട്ട ആറ് കുട്ടികൾക്ക് സ്വകാര്യ സംഘടനകളും വ്യക്തികളും സംസ്ഥാന സർക്കാർ മുഖാന്തിരം 31.24 ലക്ഷം രൂപയും കൈമാറി.

തേങ്ങയുടെ വില സർവകാല റിക്കാർഡിൽ: പിടിച്ചുനിൽക്കാൻ കഴിയാതെ ഹോട്ടൽ മേഖല

മാനന്തവാടി: തേങ്ങയുടെയും വെളിച്ചെണ്ണയുടെയുംവില സർവകാല റിക്കാർഡിൽ എത്തിയതോടെ പിടിച്ചുനിൽക്കാൻ കഴിയാതെ ഹോട്ടൽ മേഖല. ഇതോടൊപ്പം അവശ്യസാധനങ്ങളുടെവില ഉയർന്നതും ഹോട്ടൽ മേഖലയെ കടുത്ത പ്രതിസന്ധിയിലാക്കുന്നു. വിപണിയിൽ സർക്കാർ ഇടപെടൽ അത്യാവശ്യമെന്ന് ഹോട്ടൽ വ്യാപാരികൾ പറയുന്നു. തേങ്ങയുടെയും വെളിച്ചെണ്ണയുടെയുംവില സർവകാല റിക്കാർഡിൽ എത്തിയതോടെ പിടിച്ചുനിൽക്കാൻ പാടുപെടുകയാണ് ഹോട്ടൽ മേഖല. ഒരുകിലോ തേങ്ങയ്ക്ക് 90 രൂപവരെയാണ് ഇപ്പോൾ വില. ചെറിയ ഹോട്ടലിൽപ്പോലും ദിവസം കുറഞ്ഞത് 20 തേങ്ങയെങ്കിലും വേണ്ടിവരുന്നുണ്ട്. വെജിറ്റേറിയൻ ഹോട്ടലുകളിൽ പലഹാരങ്ങൾക്കും കറികൾക്കുമെല്ലാം തേങ്ങ അത്യാവശ്യമാണ്. വെളിച്ചെണ്ണയ്ക്ക് 420 മുതൽ 440 രൂപ വരെയാണ് വില. അരിവിലയും 15 രൂപയോളം ഉയർന്നു. ചെറുപയറിന് കിലോയ്ക്ക് 2020ൽ 80 രൂപയായിരുന്നത് ഇപ്പോൾ 150 രൂപയിലെത്തി. ഉഴുന്നിനും തുവരയ്ക്കും കടലയ്ക്കും സൂര്യകാന്തി എണ്ണയ്ക്കും ഉണക്കമുളകിനും മല്ലിക്കും റവയ്ക്കും ആട്ടയ്ക്കും മൈദയ്ക്കുമെല്ലാം 20 മുതൽ 40 രൂപവരെ കൂടി. പാചകവാതകത്തിന് 700 രൂപയോളം വർധിച്ചു. നിത്യോപയോഗ സാധനങ്ങളുടെയും വിലയിൽ അടുത്തിടെ ഉണ്ടായ വിലവർധനയിൽ ഒരാഴ്ചയിൽ നാൽപ്പതിനായിരം രൂപയുടെ ചെലവ് അധികം വന്നതായി ഹോട്ടൽവ്യാപാരികൾ പറയുന്നു. നിത്യോപയോഗ സാധനങ്ങളുടെയും വിലവർധനമൂലം ഹോട്ടലുകൾ നടത്തിക്കൊണ്ടുപോകാൻ പ്രയാസമാണ്. വിപണിയിൽ സർക്കാരിന്‍റെ അടിയന്തര ഇടപെടലുണ്ടാകണമെന്നാണ് ഹോട്ടൽ വ്യാപാരികൾ ആവശ്യപ്പെടുന്നത്.

ഉന്നതിയിൽ ലഹരിവിരുദ്ധ ബോധവത്കരണം നടത്തി

തരിയോട്: ’നവജീവ് 2025’ എന്ന പേരിൽ നടത്തുന്ന ലഹരിവിരുദ്ധ പ്രവർത്തനങ്ങളുടെ ഭാഗമായി സെന്‍റ് മേരീസ് യുപി സ്കൂൾ അധ്യാപകരും വിദ്യാർഥികളും ചെക്കണ്ണിക്കുന്ന് ഉന്നതിയിൽ ബോധവത്കരണം നടത്തി. ’ലഹരിപദാർഥങ്ങളെ പൂർണമായി ഉപേക്ഷിക്കാം, ആരോഗ്യത്തോടെ ജീവിക്കാം’ എന്ന സന്ദേശം ഉൾകൊള്ളുന്ന ലീഫ്ലെറ്റ് വിതരണം ചെയ്തു.

ആസ്പിരേഷണൽ ജില്ലകളിൽ വയനാട് മാതൃക: ജില്ലാ കളക്ടർ

കൽപ്പറ്റ: ആസ്പിരേഷണൽ ജില്ലകളിൽ മികച്ച വികസന മുന്നേറ്റം നടത്തുന്ന വയനാട് മാതൃകയാണെന്നും വിവിധ വകുപ്പുകളുടെ പങ്കാളിത്തത്തോടെ പ്രവർത്തനങ്ങൾ മികവുറ്റതാക്കണമെന്നും ജില്ലാ കളക്ടർ ഡി.ആർ. മേഘശ്രീ. ജില്ലാ ഭരണകൂടം, ആരോഗ്യ വകുപ്പ്, ആരോഗ്യ കേരളം എന്നിവയുടെ സംയുക്താഭിമുഖ്യത്തിൽ ആസ്പിരേഷണൽ ബ്ലോക്ക് പദ്ധതിയുടെ ഭാഗമായി ആരോഗ്യ മേഖലയിലെ കാര്യക്ഷമമായ തുടർപ്രവർത്തനങ്ങൾക്കായി ജില്ലയിലെ മെഡിക്കൽ ഓഫീസർമാർ, പ്രോഗ്രാം ഓഫീസർമാർ, ആരോഗ്യ മേഖലയിലെ ജീവനക്കാർ എന്നിവർക്ക് സംഘടിപ്പിച്ച ശിൽപ്പശാല ഉദ്ഘാടനം ചെയ്യുകയായിരുന്നു അവർ. തരിയോട് പരിശീലന കേന്ദ്രത്തിൽ നടന്ന ശിൽപ്പശാലയിൽ ജില്ലാ മെഡിക്കൽ ഓഫീസർ ഡോ.ടി. മോഹൻദാസ് അധ്യക്ഷത വഹിച്ചു. ജില്ലാ ആർസിഎച്ച് ഓഫീസർ ഡോ.ജെറിൻ എസ്. ജെറോഡ് ആരോഗ്യ മേഖലയിലെ ലക്ഷ്യങ്ങൾ വിശദീകരിച്ചു. ജില്ലാ പ്ലാനിംഗ് ഓഫീസർ എം. പ്രസാദൻ, ദേശീയ ആരോഗ്യ ദൗത്യം ജില്ലാ പ്രോഗ്രാം മാനേജർ ഡോ.സമീഹ സെയ്തലവി, ജില്ലാ എഡ്യുക്കേഷൻ ആൻഡ് മീഡിയ ഓഫീസർ കെ.എം. മുസ്തഫ, ആസൂത്രണ വകുപ്പ് റിസർച്ച് അസിസ്റ്റന്‍റ് കെ.എം. ഷംസുദ്ദീൻ എന്നിവർ പ്രസംഗിച്ചു.

എബിസി പദ്ധതി: പുൽപ്പള്ളിയിൽ തെരുവുനായ പിടിത്തം തുടങ്ങി

പുൽപ്പള്ളി: മൃഗസംരക്ഷണ വകുപ്പും തദ്ദേശ സ്വയംഭരണ സ്ഥാപനങ്ങളും ചേർന്ന് നടപ്പാക്കുന്ന അനിമൽ ബർത്ത് കണ്‍ട്രോൾ പ്രോഗ്രാമിൽ(എബിസി) ടൗണിലും സമീപങ്ങളിലും തെരുവുനായ പിടിത്തം തുടങ്ങി. ബത്തേരി എബിസി സെന്‍റർ കേന്ദ്രീകരിച്ച് പ്രവർത്തിക്കുന്ന ഡോഗ് ക്യാച്ചർമാരുടെ സംഘം പഞ്ചായത്തിലെ വിവിധ ഭാഗങ്ങളിൽനിന്നു 30 ഓളം നായ്ക്കളെ കഴിഞ്ഞ ദിവസം പിടികൂടി. വിജയ സ്കൂൾ, കളനാടിക്കൊല്ലി, ജയശ്രീ സ്കൂൾ, മത്സ്യ-മാംസ മാർക്കറ്റ്, പോലീസ് സ്റ്റേഷൻ, ചുണ്ടക്കൊല്ലി, ബസ്‌സ്റ്റാൻഡ് പരിസരങ്ങളിൽ നിന്നാണ് നായകളെ പിടിച്ചത്. ഇവയെ ബത്തേരി എബിസി സെന്‍ററിൽ വന്ധ്യംകരണ ശസ്ത്രക്രിയയ്ക്ക് വിധേയമാക്കും. മൂന്ന് ദിവസത്തെ ചികിത്സക്കും നിരീക്ഷണത്തിനും ശേഷം പേവിഷ പ്രതിരോധ കുത്തിവയ്പ് നൽകി ചെവിയിൽ അടയാളമിട്ട് പിടിച്ച പ്രദേശങ്ങളിൽ തുറന്നുവിടും. മൃഗസംരക്ഷണ വകുപ്പിന്‍റെ കണക്കനുസരിച്ച് പഞ്ചായത്തിൽ 185 ഓളം തെരുവു നായകളാണുള്ളത്. ബത്തേരി എബിസി സെന്‍ററിൽ രണ്ട് ഡോക്ടർമാരും സഹായികളും ഉൾപ്പെടുന്ന സംഘമാണ് ശസ്ത്രക്രിയയ്ക്ക് നേതൃത്വം നൽകുന്നത്. പെണ്‍ നായകളെ ഗർഭപാത്രവും ആണ്‍ നായകളെ വൃക്ഷണവും നീക്കം ചെയ്താണ് തിരികെ വിടുന്നത്. ജൂണ്‍ 20ന് പ്രവർത്തനം തുടങ്ങിയ ബത്തേരി എബിസി യൂണിറ്റിൽ 500 ഓളം നായകളെയാണ് ശസ്ത്രക്രിയയ്ക്ക് വിധേയമാക്കിയത്.

ലഹരിവിരുദ്ധ സായാഹ്ന സദസ് നടത്തി

മുള്ളൻകൊല്ലി: സെന്‍റ് തോമസ് എയുപി സ്കൂളിൽ ലഹരിവിരുദ്ധ വാരം ആചരിച്ചു. ഇതിന്‍റെ ഭാഗമായി സ്കൂൾ ലഹരിവിരുദ്ധ ക്ലബിന്‍റെ നേതൃത്വത്തിൽ സന്ദേശ പ്രചാരണ യാത്ര, ഫ്ളാഷ് മോബ്, ലഹരിവിരുദ്ധ പ്രതിജ്ഞയെടുപ്പ്, സായാഹ്ന സദസ് എന്നിവ നടത്തി. പഞ്ചായത്തംഗം മഞ്ജു ഷാജി ഉദ്ഘാടനം ചെയ്ത, പഞ്ചായത്തിന്‍റെ വിവിധ ഭാഗങ്ങളിൽ പര്യടനം നടത്തിയ ദ്വിദിന സന്ദേശ പ്രചാരണ യാത്രയുടെ സമാപനത്തോടനുബന്ധിച്ചായിരുന്നു സായാഹ്ന സദസ്. പഞ്ചായത്ത് പ്രസിഡന്‍റ് പി.കെ. വിജയൻ ഉദ്ഘാടനം ചെയ്തു. പിടിഎ പ്രസിഡന്‍റ് നോബി പള്ളിത്തറ അധ്യക്ഷത വഹിച്ചു. വാർഡ് അംഗം പി.കെ. ജോസ് ലഹരിവിരുദ്ധ സന്ദേശം നൽകി. ഹെഡ്മിസ്ട്രസ് മിനി ജോണ്‍, അധ്യാപകരായ ജോയ്സി ജോർജ്, എം.എം. ആന്‍റണി, കെ.എം. നൗഫൽ, ധന്യ സഖറിയാസ്, സിസ്റ്റർ മെറിൻ, അലീന വർഗീസ്, കെ.ജെ. എൽദോസ്, സജി വർഗീസ് എന്നിവർ നേതൃത്വം നൽകി.

കടമാൻതോട് പദ്ധതിയുമായി സർക്കാർ മുന്നോട്ട്: വീണ്ടും തീപിടിച്ച് വാദപ്രതിവാദം

കൽപ്പറ്റ: കബനി ജലത്തിൽ കേരളത്തിനു അവകാശപ്പെട്ട വിഹിതത്തിന്‍റെ ഭാഗം ഉപയോഗപ്പെടുത്തുന്നതിനും പുൽപ്പള്ളി, മുള്ളൻകൊല്ലി പഞ്ചായത്തുകളിൽ വേനലിലും ജല ലഭ്യത ഉറപ്പുവരുത്തുന്നതിനും വിഭാവനം ചെയ്ത കടമാൻതോട് പദ്ധതിയുമായി ജലവിഭവ വകുപ്പും സർക്കാരും മുന്നോട്ടുപോകുന്നതിനെ അനുകൂലിച്ചും എതിർത്തും ജനം. കടമാൻതോട് പദ്ധതിക്കു ഡിപിആർ തയാറാക്കുന്നതിന് സർക്കാർ ഭരണാനുമതി നൽകിയ വിവരം പുറത്തുവന്നതോടെ പുൽപ്പള്ളി, മുള്ളൻകൊല്ലി പഞ്ചായത്തുകളിൽ ആളുകൾ ഭിന്ന ചേരികളിലായി. സർക്കാർ നടപടി സ്വാഗതം ചെയ്യുന്ന ഒരു വിഭാഗം പദ്ധതി അടിയന്തര പ്രാധാന്യത്തോടെ നടപ്പാക്കണമെന്ന നിലപാടിലാണ്. എന്നാൽ കുടിയേറ്റപ്രദേശങ്ങളിൽ ജനജീവിതത്തിന്‍റെ ഗതിമാറ്റത്തിനു കാരണമാകുന്ന പദ്ധതി ഉപേക്ഷിക്കണമെന്ന പക്ഷത്തിലാണ് മറുവിഭാഗം. 1990ൽ രൂപീകരിച്ച കാവേരി നദീജലതർക്ക ട്രിബ്യൂണലിന്‍റെ 2007ലെ അന്തിമ വിധിയനുസരിച്ച് കബനി ജലത്തിൽ 21 ടിഎംസി വയനാടിനു അവകാശപ്പെട്ടതാണ്. ഇതിൽ ഏകദേശം ഒന്പത് ടിഎംസി വെള്ളമാണ് ബാണാസുര, കാരാപ്പുഴ അണകളിലടക്കം ജില്ലയിൽ ഉപയോഗപ്പെടുത്തുന്നത്. ബാക്കി ജലം പ്രയോജനപ്പെടുത്തുന്നതിന് വിഭാവനം ചെയ്തതിൽ പ്രധാനപ്പെട്ടതാണ് കടമാൻ തോട് പദ്ധതി. മാനന്തവാടി എടവക തൊണ്ടാർ പദ്ധതിയും ജലിവിഭവ വകുപ്പിന്‍റെ സജീവ പരിഗണനയിലുണ്ട്. ഈ പദ്ധതിക്കു ഡിപിആർ തയാറാക്കുന്നതിനും ഭരണാനുമതിയായിട്ടുണ്ട്. ജില്ലയുടെ മറ്റുഭാഗങ്ങളെ അപേക്ഷിച്ച് വളരെ കുറഞ്ഞ അളവിൽ മഴ ലഭിക്കുന്നതാണ് കർണാടകയോടു ചേർന്നുള്ള മുള്ളൻകൊല്ലി, പുൽപ്പള്ളി പഞ്ചായത്തുകൾ. വേനൽക്കാലങ്ങളിൽ രണ്ട് പഞ്ചായത്തുകളിലെയും പല പ്രദേശങ്ങളും വരൾച്ചയുടെയും കുടിവെള്ള ക്ഷാമത്തിന്‍റെയും പിടിയിലാകാറുണ്ട്. അതിനാൽ കടമാൻ തോട് പദ്ധതി അനിവാര്യതയാണെന്നാണ് മുള്ളൻകൊല്ലി പഞ്ചായത്തിലെ ജനങ്ങളുടെ പൊതു അഭിപ്രായം. പുൽപ്പള്ളി പഞ്ചായത്ത് നിവാസികളിൽ ഭൂരിപക്ഷവും ഇതോടു യോജിക്കുന്നവരാണ്. എന്നാൽ പുൽപ്പള്ളി ആനപ്പാറയ്ക്കു സമീപം അണക്കെട്ട് നിർമിക്കുന്നതോടെ മുങ്ങിപ്പോകുന്ന പ്രദേശങ്ങളിൽ താമസിക്കുന്നവരിൽ നല്ലൊരു പങ്കും പദ്ധതിക്ക് എതിരാണ്. ഡാം വിരുദ്ധ സമിതി രൂപീകരിച്ച് പ്രവർത്തിക്കുന്ന ഇവർക്ക് പുൽപ്പള്ളിയിലെ കോണ്‍ഗ്രസ് നേതാക്കളിൽ ചിലരുടെയും വയനാട് പ്രകൃതി സംരക്ഷണ സമിതി ഉൾപ്പെടെ ഏതാനും പരിസ്ഥിതി സംഘടനകളുടെയും പിന്തുണയുണ്ട്. കടമാൻതോട് പദ്ധതിയുടെ ഭൂതല, ലിഡാർ സർവേ നേരത്തേ പൂർത്തിയായതാണ്. 2023 നവംബറിലാണ് ലിഡാർ സർവേ അവസാനിച്ചത്. ജലവിഭവ വകുപ്പ് ഉദ്യോഗസ്ഥരുടെ മേൽനോട്ടത്തിൽ ഡൽഹി ആസ്ഥാനമായുള്ള സ്വകാര്യ കന്പനിയാണ് സർവേ നടത്തിയത്. പ്രദേശത്തിന്‍റെ ഭൂഘടന, കെട്ടിടങ്ങൾ, റോഡുകൾ, തോടുകൾ, കൃഷിസ്ഥലങ്ങൾ, ആയക്കെട്ട് ഏരിയ തുടങ്ങിയവ സംബന്ധിച്ച വിവരശേഖരണം സർവേയുടെ ഭാഗമായി നടന്നു. ഭൂതല, ലിഡാർ സർവേ റിപ്പോർട്ടുകൾ സംയോജിപ്പിച്ചണ് പദ്ധതിയുടെ അന്തിമ രൂപരേഖ തയാറാക്കേണ്ടത്. കടമാൻതോട് പദ്ധതി നടപ്പാക്കണമെന്നാണ്പുൽപ്പള്ളി, മുള്ളൻകൊല്ലി പ്രദേശങ്ങളിലെ എൽഡിഎഫ് നേതക്കളുടെയും പ്രവർത്തകരുടെയും അഭിപ്രായം. നാടിന്‍റെയും ജനങ്ങളുടെയും ഭാവിയെ സംബന്ധിച്ചിടത്തോളം പദ്ധതി സുപ്രധാനമാണെന്ന് സിപിഎം ജില്ലാ കമ്മിറ്റിയംഗവും പുൽപ്പള്ളി ഏരിയ മുൻ സെക്രട്ടറിയുമായ എം.എസ്. സുരേഷ്ബാബു പറഞ്ഞു. ജനങ്ങളുടെ ആശങ്ക ദൂരീകരിച്ചും മുങ്ങിപ്പോകുന്ന പ്രദേശങ്ങളിലെ ജനങ്ങളുടെ കൈവശമുള്ള ഭൂമിയും മറ്റു സ്വത്തുക്കളും ഏറ്റവും ഉയർന്ന വിലയും നഷ്ടപരിഹാരവും നൽകി ഏറ്റെടുത്തും പദ്ധതി നടപ്പാക്കണമെന്ന് അദ്ദേഹം ആവശ്യപ്പെട്ടു. ജനഹിതം കണക്കിലെടുക്കാതെയാണ് പദ്ധതി പ്രവർത്തനങ്ങളുമായി സർക്കാർ മുന്നോട്ടുപോകുന്നതെന്ന് ഡാം വിരുദ്ധ കർമ സമിതി ചെയർമാൻ ബേബി തയ്യിൽ പറഞ്ഞു. സമിതി എല്ലാ സാധ്യതകളും ഉപയോഗപ്പെടുത്തി പദ്ധതിയെ എതിർക്കുമെന്ന് അദ്ദേഹം വ്യക്തമാക്കി. പുൽപ്പള്ളി, മുള്ളൻകൊല്ലി പഞ്ചായത്തുകളിൽ കാർഷിക, ഗാർഹിക ആവശ്യങ്ങൾക്കുള്ള ജല ലഭ്യത ഉറപ്പുവരുത്തുന്നതിന് ചെറുകിട പദ്ധതികൾ പര്യാപ്തമാണെന്ന് ബേബി പറഞ്ഞു. വയനാടിനും കർഷകർക്കും ആവശ്യമുള്ളതല്ല കടമാൻതോട്, തൊണ്ടാർ പദ്ധതികളെന്ന് പ്രകൃതി സംരക്ഷണ സമിതി പ്രസിഡന്‍റ് എൻ. ബാദുഷ, സെക്രട്ടറി തോമസ് അന്പലവയൽ എന്നിവർ പറഞ്ഞു. ജില്ലയിൽ കാരാപ്പുഴയിലും പടിഞ്ഞാറത്തറയിലും വൻകിട ജല പദ്ധതികളുണ്ട്. മുള്ളൻകൊല്ലി പഞ്ചായത്ത് അതിർത്തിയിൽനിന്നു ഏറെ അകലെയല്ല കർണാടകയിലെ ബീച്ചനഹള്ളി ഡാം. ഇനിയും വൻകിട അണകളെ താങ്ങാനുള്ള ശേഷി ജില്ലയ്ക്കില്ല. ഗൂഢ താത്പര്യങ്ങൾ ഉള്ളവർക്കാണ് കടമാൻതോട് പദ്ധതി നടപ്പാക്കണമെന്ന നിർബന്ധം. ഇക്കൂട്ടത്തിൽ അഴിമതിക്കാരായ ഉദ്യോഗസ്ഥരും രാഷ്ട്രീയ നേതാക്കളും കരാറുകാരും ഉണ്ട്. കബനി ജലം പ്രയോജനപ്പെടുത്തുന്നതിന് ചെറുകിട കുടിവെള്ള, ജലസേചന പദ്ധതികളാണ് ആവശ്യമെന്നും സമിതി ഭാരവാഹികൾ പറഞ്ഞു.

ഇഞ്ചിക്കർഷകർക്കു മറ്റൊരു പ്രഹരമായി പൈറിക്കുലാരിയ രോഗവ്യാപനം

കൽപ്പറ്റ: വയനാട്ടിലും കർണാടകയുടെ വിവിധ ഭാഗങ്ങളിലുമുള്ള ഇഞ്ചിക്കർഷകർക്ക് മറ്റൊരു പ്രഹരമായി പൈറിക്കുലാരിയ രോഗ വ്യാപനം. ജില്ലയുടെ വിവിധ ഭാഗങ്ങളിലും കർണാടകയിലെ കൂർഗ്, മൈസൂരു, ഹാസൻ, ചാമരാജ്നഗർ, ഷിമോഗ ജില്ലകളിലും ഇഞ്ചിക്കൃഷിയിടങ്ങളെ രോഗം കടന്നാക്രമിക്കുകയാണ്. രോഗബാധയേറ്റ ഇഞ്ചിച്ചെടിയുടെ ഇലകളും തണ്ടും മഞ്ഞനിറമാകുകയും പിന്നീട് കരിയുകയുമാണ്. രോഗബാധയുള്ള ചെടിയുടെ വേരിലും കിഴങ്ങിലും പ്രത്യക്ഷത്തിൽ കുഴപ്പം കാണുന്നില്ലെങ്കിലും കനത്ത ഉത്പാദനനഷ്ടം നേരിടേണ്ടിവരുമെന്ന ആശങ്കയിലാണ് കർഷകർ. ഇഞ്ചിച്ചെടികളിൽ കിഴങ്ങിന്‍റെ വളർച്ചാഘട്ടത്തിലാണ് ഇലകളും തണ്ടും നശിക്കുന്നത്. ഇത് കിഴങ്ങിന്‍റെ വളർച്ച മുരടിക്കുന്നതിനിടയാക്കുമെന്ന് കർഷകർ പറയുന്നു. കർണാടകയിൽ പൊതുവെ നവംബർ, ഡിസംബർ മാസങ്ങളിലാണ് ഇഞ്ചി വിളവെടുപ്പിന് പാകമാകുന്നത്. ഇഞ്ചിക്ക് ഉത്പാദനച്ചെലവിന് ആനുപാതികമായ വില ഇല്ലാത്തതിന്‍റെ വേദനയിൽ കഴിയുന്പോഴാണ് പൈറിക്കുലാരിയ രോഗം കർഷകർക്ക് തലവേദനയായത്. ഈ രോഗം കർണാടകയിൽ ചോളം കൃഷിയെയും ബാധിക്കുന്നുണ്ട്. ചോളത്തിന്‍റെ ഇലകളിൽ വെളുപ്പുനിറമാണ് പടരുന്നത്. അരി, ഗോതന്പ്, ബാർലി തുടങ്ങിയ മോണോകോട്ട് സസ്യങ്ങളിൽ ബ്ലാസ്റ്റ് രോഗത്തിനു ഇടയാക്കുന്ന പൈറികുലാരിയ ഫംഗസ് രോഗം ഇഞ്ചിപ്പാടങ്ങളിൽ കണ്ടെത്തിയിട്ട് അധികകാലമായില്ല. കഴിഞ്ഞവർഷം കൂർഗ് ജില്ലയുടെ വിവിധ ഭാഗങ്ങളിൽ ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പൈസസ് റിസർച്ചിലെ(കോഴിക്കോട്) വിദഗ്ധർ ഈ രോഗം തിരിച്ചറിഞ്ഞിരുന്നു. ഒരു ചെടിയിൽ പിടിപെട്ടാൽ മണിക്കൂറുകൾക്കുള്ളിൽ കൃഷിയിടമാകെ വ്യാപിക്കുന്നതാണ് രോഗം. മാസങ്ങൾ നീണ്ട പരിശ്രമത്തിലൂടെയാണ് കൂർഗിൽ ഇഞ്ചിക്കൃഷിക്ക് പുതിയ ഭീഷണിയായത് പൈറിക്കുലാരിയ ഫംഗസ് രോഗമാണെന്ന് വിദഗ്ധർ സ്ഥിരീകരിച്ചത്. കൂർഗിലെ പ്രത്യേക കാലാവസ്ഥയാണ് രോഗത്തിനും വ്യാപനത്തിനും കാരണമെന്നാണ് വിദഗ്ധർ അഭിപ്രായപ്പെട്ടത്. കർണാടകയുടെ മറ്റു ഭാഗങ്ങളിലും കേരളത്തിലും ഈ രോഗം ഉപദ്രവമാകില്ലെന്നായിരുന്നു അവരുടെ അനുമാനം. ഇതിനു വിരുദ്ധമായാണ് രോഗവ്യാപനം. രോഗനിയന്ത്രണത്തിന് പ്രത്യേക ഇനം കുമിൾനാശിനികളുടെ നിശ്ചിത അളവിലും സമയങ്ങളിലുമുള്ള പ്രയോഗമാണ് വിദഗ്ധർ ശിപാർശ ചെയ്യുന്നത്.

കോണ്‍ഗ്രസുകാർ വി.എസ്. ജോയിയെ മാതൃകയാക്കണം: കെപിസിസി പ്രസിഡന്‍റ്

കൽപ്പറ്റ: തദ്ദേശ തെരഞ്ഞെടുപ്പിന് ഒരുങ്ങുന്ന കോണ്‍ഗ്രസുകാർ മലപ്പുറം ഡിസിസി പ്രസിഡന്‍റ് വി.എസ്. ജോയിയെ മാതൃകയാക്കണമെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. ചന്ദ്രഗിരി ഓഡിറ്റോറിയത്തിൽ കോണ്‍ഗ്രസ് ജില്ലാ സമരസംഗമവും വാർഡ് പ്രസിഡന്‍റുമാർക്കുള്ള തിരിച്ചറിയൽ കാർഡ് വിതരണവും ഉദ്ഘാടനം ചെയ്യുകയായിരുന്നു അദ്ദേഹം. നിലന്പൂർ ഉപതെരഞ്ഞെടുപ്പിൽ സ്ഥാനാർഥിയാക്കുന്നതിന് വി.എസ്. ജോയിയുടെയും ആര്യാടൻ ഷൗക്കത്തിന്‍റെയും പേരുകളാണ് ഉയർന്നുവന്നത്. വിവിധതലങ്ങളിൽ കൂടിയാലോചനയ്ക്കുശേഷം ആര്യാടൻ ഷൗക്കത്തിനെ സ്ഥാനാർഥിയായി പ്രഖ്യാപിച്ചു. സ്ഥാനാർഥിത്വം ലഭിക്കാതിരുന്ന വി.എസ്. ജോയി പ്രവർത്തനത്തിൽനിന്നു പിന്നാക്കം പോകുകയല്ല ചെയ്തത്. യുഡിഎഫ് സ്ഥാനാർഥിയുടെ വിജയത്തിന് മുൻനിരയിൽനിന്ന് കഠിനാധ്വാനം ചെയ്തു. ഇത് മാതൃകയാണ്. തദേശ തെരഞ്ഞെടുപ്പിൽ ത്രിതല പഞ്ചായത്ത് വാർഡുകളിലും മുനിസിപ്പാലിറ്റികളിലും സ്ഥാനാർഥിയാക്കുന്നതിന് ഒന്നിലധികം പേരുകൾ നിർദേശിക്കപ്പെട്ടേക്കാം. സ്ഥാനാർഥിയെ തീരുമാനിച്ചുകഴിഞ്ഞാൽ പ്രവർത്തനം ഒറ്റക്കെട്ടാകണം. അർഹത മാത്രം മാനദണ്ഡമാക്കിയായിരിക്കും സ്ഥാനാർഥി നിർണയം. ഒരാളെയും നൂലിൽക്കെട്ടി ഇറക്കില്ല. കുറ്റമറ്റ വോട്ടർ പട്ടിക ഉണ്ടാകുന്നതിലടക്കം കോണ്‍ഗ്രസ് പ്രവർത്തകർ ജാഗ്രത പുലർത്തണം. ജനകീയ പ്രശ്നങ്ങൾ ഏറ്റെടുക്കുന്നതിന്‍റെ ഭാഗമായാണ് പാർട്ടി ജില്ലകൾ തോറും സമരസംഗമം സംഘടിപ്പിക്കുന്നത്. ഇതിനകം നടന്ന സമരസംഗമങ്ങളിൽ ഏറ്റവും മികച്ചത് മൂന്നു അസംബ്ലി മണ്ഡലങ്ങൾ മാത്രമുള്ള വയനാട്ടിലേതാണ്. കാർഷിക മേഖലയിലെ പ്രതിസന്ധി, അനുദിനം വർധിക്കുന്ന വന്യജീവി ശല്യം, നിത്യോപയോഗസാധനങ്ങളുടെ വിലക്കയറ്റം, തൊഴിലില്ലായ്മ, പട്ടികവർഗക്കാർക്കിടയിലെ ഭൂ, ഭവന രാഹിത്യം... ഇങ്ങനെ നീളുന്നതാണ് ജില്ലയിലെ ജനകീയ പ്രശ്നങ്ങൾ. ഇതിനൊന്നും പരിഹാരം കാണാൻ ഇടതുസർക്കാരിനു കഴിയുന്നില്ല. വന്യജീവി ആക്രമണ പ്രശ്നത്തിൽ പലപ്പോഴായി കോണ്‍ഗ്രസ് പ്രതിനിധികൾ നിയമസഭയിൽ കൊണ്ടുവന്ന അടിയന്തര പ്രമേയത്തിന് അവതരണാനുമതി ലഭിച്ചില്ല. ഇടതു സർക്കാർ ബജറ്റുകളിൽ വയനാട് പാക്കേജ് ആവർത്തിച്ച് പ്രഖ്യാപിച്ചെങ്കിലും ഒന്നും നടന്നില്ലെന്നും കെപിസിസി പ്രസിഡന്‍റ് പറഞ്ഞു. ഡിസിസി പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു. കെപിസിസി വർക്കിംഗ് പ്രസിഡന്‍റുമാരായ ഷാഫി പറന്പിൽ എംപി, എ.പി. അനിൽകുമാർ എംഎൽഎ, ജില്ലയുടെ ചുമതലയുള്ള കെപിസിസി ജനറൽ സെക്രട്ടറി അഡ്വ.സജീവ് ജോസഫ് എംഎൽഎ, ടി. സിദ്ദിഖ് എംഎൽഎ, ഐ.സി. ബാലകൃഷ്ണൻ എംഎൽഎ, കെപിസിസി രാഷ്ടീയകാര്യ സമിതിയംഗം പി.കെ. ജയലക്ഷ്മി, കെപിസിസി എക്സിക്യുട്ടീവ് കമ്മിറ്റിയംഗങ്ങളായ കെ.എൽ. പൗലോസ്, കെ.ഇ. വിനയൻ, കെപിസിസി സെക്രട്ടറിമാരായ ടി.ജെ. ഐസക്, എൻ.കെ. വർഗീസ്, നേതാക്കളായ പി.ടി. ഗോപാലക്കുറുപ്പ്, സംഷാദ് മരക്കാർ, എം.ജി. ബിജു, എം.എ. ജോസഫ്, അമൽ ജോയി, ചിന്നമ്മ ജോസ്, സജീവൻ മടക്കിമല തുടങ്ങിയവർ പ്രസംഗിച്ചു.

റവന്യു ഡിജിറ്റൽ കാർഡ് നവംബറോടെ നടപ്പാക്കും: മന്ത്രി കെ. രാജൻ

കൽപ്പറ്റ: സംസ്ഥാനത്ത് റവന്യു ഡിജിറ്റൽ കാർഡ് 2025 നവംബറോടെ നടപ്പാക്കുമെന്ന് റവന്യു ഭവന നിർമാണ മന്ത്രി കെ. രാജൻ. പൊതുജനങ്ങൾക്ക് ഒരേ സർട്ടിഫിക്കറ്റ് ഒരേ ആവശ്യത്തിന് ഒരേ സ്ഥാപനത്തിൽ നിന്നും ഒന്നിലധികം തവണ ലഭ്യമാക്കേണ്ട സാഹചര്യം ശ്രദ്ധയിൽപ്പെട്ടതിനാൽ ഭൂമി സംബന്ധമായ 14 ഓളം വിവരങ്ങൾ അടങ്ങിയ കാർഡ് ലഭ്യമാക്കുകയാണ് സർക്കാരിന്‍റെ ലക്ഷ്യം. മീനങ്ങാടി ഗ്രാമപ്പഞ്ചായത്ത് ഹാളിൽ നടന്ന ജില്ലാതല പട്ടയമേള ഓണ്‍ലൈനായി ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. സംസ്ഥാനത്തെ 312 വില്ലേജുകളിൽ ഡിജിറ്റൽ സർവേ പൂർത്തിയാവുകയാണ്. സർവേ പൂർത്തിയാകുന്ന മുറയ്ക്ക് എല്ലാ വില്ലേജുകളിലെയും ജനങ്ങൾക്ക് അവരുടെ ഭൂമിയും കെട്ടിടവും ഉൾപ്പെടുന്ന സന്പൂർണ വിവരങ്ങൾ അടങ്ങിയ ഡിജിറ്റൽ റവന്യു കാർഡ് വിതരണം ചെയ്യുകയാണ് ലക്ഷ്യം. ഒരു വ്യക്തിയുടെ പേരിലുള്ള ഭൂമിയുടെ നികുതി, ഭൂമിയുടെ തരം, സ്വഭാവം തുടങ്ങി ഭൂമിയുമായി ബന്ധപ്പെട്ട് ലഭിക്കേണ്ട എല്ലാ വിവരങ്ങളും ചിപ്പ് ഘടിപ്പിച്ച ഡിജിറ്റർ കാർഡ് മുഖേന ലഭിക്കും. വില്ലേജ് ഓഫീസർ ഒപ്പിടുന്ന വിശ്വസ്തതയോടെ കാർഡ് വിതരണം ചെയ്യാനുള്ള നടപടികളാണ് സ്വീകരിക്കുന്നത്. ഘട്ടംഘട്ടമായി ഡിജിറ്റൽ ലോക്കർ സംവിധാനത്തിൽ ഓരോ കുടുംബങ്ങളെ സംബന്ധിക്കുന്ന വിവരങ്ങൾ ഉൾപ്പെടുത്തും. സംസ്ഥാനത്ത് കുറഞ്ഞ കാലയളവിൽ റവന്യു വകുപ്പ് വിതരണം ചെയ്തത് 12 കോടി ഇ സർട്ടിഫിക്കറ്റുകളാണ്. ഡിജിറ്റൽ സർവേയുടെ ഭാഗമായി കണ്ടെത്തുന്ന കൈവശമുള്ളതും എന്നാൽ ആരുടെയും പേരിലല്ലാത്ത ഭൂമിയുടെ ഉടമസ്ഥതയും അർഹതയും പരിശോധിച്ച് പട്ടയം വിതരണം ചെയ്യാനുള്ള ക്രമീകരണങ്ങളും നടത്തുന്നുണ്ട്. ഭൂരഹിതരായ ഒരാളുമില്ലാത്ത കേരളം കെട്ടിപ്പടുക്കുകയാണ് സർക്കാരെന്നും മന്ത്രി കൂട്ടിച്ചേർത്തു. ഭൂരഹിതരായ മുഴുവൻ ആളുകളെയും ഭൂവുടമകളാക്കുകയാണ് സർക്കാർ. കഴിഞ്ഞ ഒന്പത് വർഷക്കാലം 4,09,000 പട്ടയങ്ങൾ വിതരണം ചെയ്തു. രണ്ടാം പിണറായി സർക്കാർ നാല് വർഷം പിന്നിടുന്പോൾ 2,02,300 പട്ടയങ്ങളും വിതരണം ചെയ്തു. 50 വർഷക്കാലമായുള്ള വിവിധ ഭൂമി പ്രശ്നങ്ങൾ പരിഹരിക്കാൻ പട്ടയ ഡാഷ് ബോർഡിലൂടെ സാധിച്ചിട്ടുണ്ടെന്നും മന്ത്രി കൂട്ടിച്ചേർത്തു. സാധാരണക്കാരായ അർഹരായ ആളുകൾക്ക് ഭൂമി ലഭിക്കാൻ നിയമങ്ങളിലോ ചട്ടങ്ങളിലോ മാറ്റം വരുത്തേണ്ടതുണ്ടെങ്കിൽ ആവശ്യമായ ഭേദഗതി വരുത്താൻ സർക്കാർ മടിക്കില്ല. അർഹതപ്പെട്ടവന് ഭൂമി എന്നതിൽ സർക്കാരിന് കൃത്യമായ ധാരണയുണ്ട്. കൈവശക്കാർ, കുടിയേറ്റക്കാർ, കയ്യേറ്റക്കാർ എന്നിവരെ ഒരു പോലെയല്ല സർക്കാർ കാണുന്നത്. കുടിയേറ്റക്കാരായ മനുഷ്യർ മറ്റു നിവർത്തികളില്ലാതെ ജീവിത ലക്ഷ്യത്തിനായി പണിയെടുക്കാനും താമസിക്കാനും കുടിയേറിയവരാണ്. പട്ടയ അർഹതയുടെ വരുമാനപരിധി രണ്ടര ലക്ഷം രൂപയായി ഉയർത്താൻ സർക്കാർ നടപടി സ്വീകരിക്കുമെന്നും മന്ത്രി പറഞ്ഞു. ലാൻഡ് അസൈൻമെന്‍റ് വിഭാഗത്തിൽ 141, മിച്ചഭൂമി ഇനത്തിൽ 66, ക്രയ സർട്ടിഫിക്കറ്റ്, ലാൻഡ് ട്രൈബ്യൂണൽ പട്ടയമായി 785, കൈവശ രേഖ (വനാവകാശം)അഞ്ച് പട്ടയങ്ങളാണ് ഇന്നലെ വിതരണം ചെയ്തത്.

ഫുട്ബോൾ താരത്തിന് നിർമിച്ച വീട് കൈമാറി

കൽപ്പറ്റ: 2022ൽ സന്തോഷ് ട്രോഫി നേടിയ കേരള ടീം അംഗം റാഷിദിന് ടി. സിദ്ദിഖ് എംഎൽഎയുടെ കെയർ പദ്ധതിയിൽ മുണ്ടേരിയിൽ നിർമിച്ച ഉമ്മൻചാണ്ടി ഭവനം കൈമാറി. വിവിധ സംഘടനകളുടെയും ഉദാരമനസ്കരുടെയും ഖത്തർ ഇൻകാസിന്‍റെയും സഹകരണത്തോടെ നിർമാണം പൂർത്തിയാക്കിയ വീടിന്‍റെ താക്കോൽദാനം കെപിസിസി പ്രസിഡന്‍റ് സണ്ണി ജോസഫ് എംഎൽഎയും ആധാര കൈമാറ്റം എ.പി. അനിൽകുമാർ എംഎൽഎയും നിർവഹിച്ചു. ടി. സിദ്ദിഖ് എംഎൽഎ അധ്യക്ഷത വഹിച്ചു. സജീവ് ജോസഫ് എംഎൽഎ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, പി.പി. ആലി, ടി. ഹംസ, റസാഖ് കൽപ്പറ്റ, പി.ടി. ഗോപാലകുറുപ്പ്, ടി.ജെ. ഐസക്, എം.എ. ജോസഫ്, ചന്ദ്രിക കൃഷ്ണൻ, ഹാരിസ് കണ്ടിയൻ, കെ.ഇ. വിനയൻ, കെ.കെ. ഉസ്മാൻ, സിദ്ദിഖ് കുറായിൽ തുടങ്ങിയവർ പങ്കെടുത്തു.

സഹപാഠി സംഗമം വേറിട്ടതായി

വാഴവറ്റ: മാനസിക അസ്വാസ്ഥ്യവും വൈഷ്യമ്യങ്ങളും അനുഭവിക്കുന്ന സഹോദരരെ പുനരധിവസിപ്പിച്ചിരിക്കുന്ന അഗതിമന്ദിരത്തിൽ സഹായമെത്തിച്ച് സഹപാഠികളുടെ വേറിട്ട ഒത്തുചേരൽ. മേപ്പാടി ഗവ. ഹൈസ്കൂളിൽ 1986 - 1987 ബാച്ചിലെ സഹാപാഠികളുടെ കൂട്ടായ്മ ഓർമ്മച്ചെപ്പിന്‍റെ ആഭിമുഖ്യത്തിലാണ് വിജയ മംഗളം എന്ന പേരിൽ വാഴവറ്റ ജ്യോതി നിവാസ് അഗതിമന്ദിരത്തിൽ ഒത്തുചേരൽ സംഘടിപ്പിച്ചത്. ഐ.സി. ബാലകൃഷ്ണൻ എംഎൽഎ പരിപാടി ഉദ്ഘാടനം ചെയ്തു. കൂട്ടായ്മയിലെ അംഗങ്ങളുടെ മക്കളിൽ എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം നേടിയവർക്ക് അദ്ദേഹം മെമന്‍റോ നൽകി. പോലീസ് ഓഫീസർ ജബലുറഹ്മാൻ, ജ്യോതി നിവാസ് ഡയറക്ടർ ജോണി, കലാകാരനും എഴുത്തുകാരനുമായ റഷീദ് എന്നിവരെ ആദരിച്ചു. ഓർമ്മച്ചെപ്പ് കൂട്ടായ്മ പ്രസിഡന്‍റ് വി.എസ്. ബെന്നി അധ്യക്ഷത വഹിച്ചു. മുട്ടിൽ ഗ്രാമപ്പഞ്ചായത്ത് അംഗങ്ങളായ സുമ, പി.ജി. സജീവ്, ഭാരവാഹികളായ ടി.കെ. നാസർ, കെ.കെ. പ്രസാദ്, സാഹിറാബാനു, പുഷ്പ, വി. റഷീദ്, വിജയ, കെ. അഷ്റഫ്, എ.എം. നാസർ, ജോണി പള്ളിത്താഴത്ത്, അഡ്വ. മരിയാ ലൂയിസ്, നിഖിൽ എന്നിവർ പ്രസംഗിച്ചു.

അച്ചടക്ക നടപടി ചോദിച്ചുവാങ്ങരുത്: നേതാക്കൾക്ക് താക്കീതുമായി കെപിസിസി അധ്യക്ഷൻ

കൽപ്പറ്റ: കോണ്‍ഗ്രസിൽ അനൈക്യത്തിനു വളമിടുന്ന നേതാക്കൾക്കും പ്രവർത്തകർക്കും കെപിസിസി അധ്യക്ഷൻ സണ്ണി ജോസഫ് എംഎൽഎയുടെ താക്കീത്. അച്ചടക്ക നടപടി ചോദിച്ചുവാങ്ങരുതെന്ന് ചന്ദ്രഗിരി ഓഡിറ്റോറിയത്തിൽ കോണ്‍ഗ്രസ് ജില്ലാ സമരസംഗമവും വാർഡ് പ്രസിഡന്‍റുമാർക്കുള്ള തിരിച്ചറിയൽ കാർഡ് വിതരണവും ഉദ്ഘാടനം ചെയ്യവേ കെപിസിസി പ്രസിഡന്‍റ് മുന്നറിയിപ്പുനൽകി. പാടിച്ചിറയിൽ പാർട്ടി മുള്ളൻകൊല്ലി മണ്ഡലം വികസന സെമിനാറിനിടെ ഡിസിസി പ്രസിഡന്‍റ് എൻ.ഡി. അപ്പച്ചനുനേരേയുണ്ടായ കൈയേറ്റ ശ്രമത്തിന്‍റെയും ഇതേത്തുടർന്നു പാർട്ടി ജില്ലാ ഘടകത്തിലുണ്ടായ പ്രശ്നങ്ങളുടെയും പശ്ചാത്തലത്തിലായിരുന്നു കെപിസിസി അധ്യക്ഷന്‍റെ താക്കീത്. പാർട്ടിയുമായി ബന്ധപ്പെട്ട് സമീപ ദിവസങ്ങളിൽ മാധ്യമങ്ങളിൽ വരുന്നത് സന്തോഷകരമല്ലാത്ത വാർത്തകളാണ്. പാർട്ടിയിൽ ഐക്യം പരമപ്രധാനമാണ്. ഐക്യത്തിനു പോറൽ ഏൽപ്പിക്കുന്ന ഇടപെടലുകൾ നേതാക്കളുടെയും പ്രവർത്തകരുടെയും ഭാഗത്ത് ഉണ്ടാകരുത്. കോണ്‍ഗ്രസ് സമ്മേളനങ്ങളിൽ പതിവായി പങ്കെടുക്കുന്നതിലും വളരെ അധികം അണികളും അനുഭാവികളും പുറത്തുണ്ട്. അവരാണ് തെരഞ്ഞെടുപ്പുകളിൽ പാർട്ടിക്ക് വലിയ വിജയം സമ്മാനിക്കുന്നത്. നേതാക്കൾ നന്നാകണമെന്ന്് അവരെക്കൊണ്ട് പറയിക്കരുത്. പാർട്ടി അച്ചടക്കം ഓരോ കോണ്‍ഗ്രസുകാരന്‍റെയും കടമയും ഉത്തരവാദിത്വവുമാണ്. തെറ്റുകൾ സംഭവിച്ചാൽ തിരുത്തണം. സംസ്ഥാനത്ത് കോണ്‍ഗ്രസിന് ഏറ്റവും ശക്തിയുള്ള ജില്ല വയനാടാണ്. ഈ ശക്തി നിലനിർത്താനും വർധിപ്പിക്കാനും പാർട്ടി പ്രവർത്തകർ പരിശ്രമിക്കണമെന്നും സണ്ണി ജോസഫ് പറഞ്ഞു. ഡിസിസി പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു.

തിക്താനുഭവം പരാമർശിക്കാതെ എൻ.ഡി. അപ്പച്ചൻ

കൽപ്പറ്റ: പാടിച്ചിറയിൽ കോണ്‍ഗ്രസ് മുള്ളൻകൊല്ലി മണ്ഡലം വികസന സെമിനാറിനിടെ തനിക്കുനേരേ ഉണ്ടായ കൈയേറ്റ ശ്രമം ചന്ദ്രഗിരി ഓഡിറ്റോറിയത്തിൽ ജില്ലാ കോണ്‍ഗ്രസ് സമരസംഗമത്തിൽ പരാമർശിക്കാതെ ഡിസിസി പ്രസിഡന്‍റ് എൻ.ഡി. അപ്പച്ചൻ. ആരെയും കുത്തിനോവിക്കാതെയും പാർട്ടിയോടുള്ള പ്രതിബദ്ധത വ്യക്തമാക്കിയുമായിരുന്നു അദ്ദേഹത്തിന്‍റെ അധ്യക്ഷ പ്രസംഗം. അവസാന ശ്വാസം വരെ പാർട്ടിക്കുവേണ്ടി പ്രവർത്തിക്കണമെന്നാണ് ആഗ്രഹം. പാർട്ടിയിലെ സ്ഥാനം അപ്രധാനമാണ്. ഇപ്പോൾ വഹിക്കുന്ന ഡിസിസി പ്രസിഡന്‍റ് സ്ഥാനം ആഗ്രഹിക്കാതെയും പരിശ്രമിക്കാതെയും വന്നുചേർന്നതാണ്. മുന്പ് ഡിസിസി അധ്യക്ഷനായിരുന്നപ്പോഴും ഉത്തരവാദിത്വം സാധ്യമായവിധം നിറവേറ്റിയിട്ടുണ്ട്. ജില്ലയിലെ കോണ്‍ഗ്രസ് പ്രവർത്തകരുമായുള്ളത് ആത്മബന്ധമാണ്. ഇതാണ് ഈ പ്രായത്തിലും ഓടിനടന്നു പ്രവർത്തിക്കുന്നതിനു പ്രചോദനമാകുന്നത്. വരുന്ന തദ്ദേശ തെരഞ്ഞെടുപ്പിൽ ജില്ലയിലെ 23 പഞ്ചായത്തുകളിലും മൂന്നു മുനിസിപ്പാലിറ്റികളിലും മികച്ച പ്രകടനം കാഴ്ചവയ്ക്കാൻ കോണ്‍ഗ്രസിനും യുഡിഎഫിനും കഴിയണം. അടുത്ത നിയമസഭാ തെരഞ്ഞെടുപ്പ് കഴിയുന്പോൾ കോണ്‍ഗ്രസിൽനിന്നുള്ള ഒരു നേതാവ് മുഖ്യമന്ത്രിയാകണം. തെരഞ്ഞെടുപ്പ് വിജയത്തിന് ഓരോ കോണ്‍ഗ്രസ് പ്രവർത്തകനും കഠിനപ്രയത്നം നടത്തണമെന്നും അപ്പച്ചൻ പറഞ്ഞു.

കെഎസ്ടിജിഎ വിദ്യാഭ്യാസ അവാർഡുകൾ വിതരണം ചെയ്തു

കയ്യൂന്നി: കെഎസ്ടിജിഎ(കയ്യൂന്നി ചെറുകിട തേയില കർഷക സംഘം) കരിയർ സെൽ വിദ്യാഭ്യാസ അവാർഡുകൾ വിതരണം ചെയ്തു. സംഘത്തിന്‍റെ പ്രവർത്തന പരിധിയിലുള്ള കയ്യൂന്നി ജിഎച്ച്എസ്, ചേരന്പാടി ജിഎച്ച്എസ്എസ്, എരുമാട് ജിഎച്ച്എസ്എസ്, എരുമാട് നീലഗിരി മെട്രിക്യുലേഷൻ സ്കൂൾ, കയ്യൂന്നി സേക്രഡ് ഹാർട്ട് മെട്രിക്കുലേഷൻ സ്കൂൾ എന്നിവിടങ്ങളിൽ കഴിഞ്ഞ അധ്യയന വർഷം എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ 16 കുട്ടികൾക്കും വിവിധ വിഷയങ്ങളിൽ പിഎച്ച്ഡി നേടിയ അരുണ്‍ ജോണ്‍, ബി. ശ്രീനയന, ലിന്േ‍റാ സിബി, പി.ടി. അനുമോൾ, എം.ആർ. മഞ്ജുഷ എന്നിവർക്കുമാണ് അവാർഡ് നൽകിയത്. പൊത്തുകൊല്ലി കഐസ്ടിജിഎ ഹാളിൽ നടന്ന ചടങ്ങ് ചേരന്പാടി ഗവ.ഹയർ സെക്കൻഡറി സ്കൂൾ ഹെഡ്മാസ്റ്റർ ഡോ.സി.എ. കൃഷ്ണദാസ് ഉദ്ഘാടനം ചെയ്തു. കരിയർ സെൽ കണ്‍വീനർ എ.ഒ. ജോയി അധ്യക്ഷത വഹിച്ചു. കൂട് ട്രസ്റ്റ് ഡയറക്ടർ ഡോ.കെ.ജെ. സണ്ണി മുഖ്യാതിഥിയായി. റിട്ട.അധ്യാപകൻ കെ.പി. ജാഫർ, ഡോ.കെ.ജെ. സണ്ണി എന്നിവരെ ആദരിച്ചു. ഡോ.സി.എ. കൃഷ്ണദാസ്, ഡോ.കെ.ജെ. സണ്ണി, ഭാസ്കരൻ മാസ്റ്റർ, ടി.ജെ. പവീണ്‍, ഫിലിപ്പ് മാസ്റ്റർ, മുൻ വർഷത്തെ പ്ലസ് ടു സ്റ്റേറ്റ് അവാർഡ് ജേത്രി അഭിയ അലക്സ് എന്നിവർ അവാർഡ് വിതരണം നിർവഹിച്ചു. കെഎസ്ടിജിഎ പ്രസിഡന്‍റ് ജോസ് കുര്യൻ സ്വാഗതവും സെക്രട്ടറി എം. രാജീവ് നന്ദിയും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]