ADVERTISEMENT

ADVERTISEMENT

ബി.പി. മൊയ്തീൻ അനുസ്മരണം സംഘടിപ്പിച്ചു

മുക്കം: ബി.പി. മൊയ്തീന്‍റെ 43-ാം ചരമ വാർഷികം ബി.പി. മൊയ്തീൻ സേവാ മന്ദിറും ബി.പി. മൊയ്തീൻ ലൈബ്രറിയും ചേർന്ന് വിവിധ പരിപാടികളോടെ ആചരിച്ചു. അനുസ്മരണ സമ്മേളനംഡോ. എം.എൻ. കാരശേരി ഉദ്ഘാടനം ചെയ്തു.

പ്രഫ. ഹമീദ് ചേന്ദമംഗല്ലൂർ അധ്യക്ഷത വഹിച്ചു. കേരള സംഗീത നാടക അക്കാദമിയുടെ ഗുരുപൂജ അവാർഡ് നേടിയ മുക്കം സലിം, എഴുത്തുകാരനും കലാകാരനുമായ മുക്കം ഭാസി എന്നിവരെ അഡ്വ. ആനന്ദ കനകം ഷാളണിയിച്ചാദരിച്ചു. മുക്കം ഭാസിയുടെ പുതിയ പുസ്തകം "മുക്കത്തിന്‍റെ ചരിത്ര വീഥികളിലൂടെ' കഥാകൃത്ത് എ.വി. സുധാകരൻ പരിചയപ്പെടുത്തി. സി.ഡി. വർക്കി, എം. സുകുമാരൻ, മുക്കം ബാലകൃഷ്ണൻ, നാസർ കൊളായി, എ.എം. ജമീല, കെ. രവീന്ദ്രൻ, വി. ഇന്ദിര, കെ.വി. ജസിമോൾ, ദാമോദരൻ കോഴഞ്ചേരി, പ്രഭാകരൻ മുക്കം, ബി. അലി ഹസൻ, ഡോ. ബേബി ഷക്കീല എന്നിവർ പ്രസംഗിച്ചു.

ADVERTISEMENT

കുളത്തുവയലിലെ ഗ്രോട്ടോകൾ നശിപ്പിച്ച സംഭവം: പോലീസ് അന്വേഷണം ആരംഭിച്ചു

കുളത്തുവയൽ: കുളത്തുവയൽ സെന്‍റ് ജോർജ് തീർഥാടന കേന്ദ്രം ഇടവകയുടെ കീഴിൽ റോഡരികിൽ സ്ഥാപിച്ച രണ്ട് ഗ്രോട്ടോകളുടെ ചില്ലുകൾ സാമൂഹിക വിരുദ്ധർ അക്രമിച്ച് തകർത്ത സംഭവത്തിൽ പെരുവണ്ണാമൂഴി പോലീസ് സ്ഥലത്തെത്തി പരിശോധന നടത്തി. ഇതു സംബന്ധിച്ച് പള്ളി കമ്മിറ്റി പോലീസിന് പരാതി നൽകിയിരുന്നു. ചെമ്പ്ര ടൗണിൽ നിന്നും ആരംഭിച്ച് തീർഥാടന കേന്ദ്രംവരെ പതിനാല് സ്ഥലങ്ങളിൽ സ്ഥാപിച്ചിട്ടുള്ള ഗ്രോട്ടോകളിൽ ആറും ഏഴും സ്ഥലത്തെ ഗ്രോട്ടോകളുടെ ചില്ലുകളാണ് തകർത്തത്. ഇതിനുള്ളിൽ എറിഞ്ഞ കല്ലുകളുമുണ്ട്. ഈ മേഖലയിൽ താമസക്കാർ കുറവായതിനാൽ ചില്ലുകൾ തകർത്തതിന്‍റെ ശബ്ദം ആരും കേട്ടിട്ടില്ലെന്നാണ് പറയുന്നത്. രാത്രി സമയങ്ങളിൽ ഇതുവഴി നിരവധി ഇരുചക്രവാഹന യാത്രക്കാർ പോകാറുള്ളതായും പറയുന്നുണ്ട്. വർഷങ്ങൾക്കു മുമ്പും ചെമ്പ്ര ടൗണിന് സമീപത്തെ ഗ്രോട്ടോയുടെ ചില്ല് തകർത്ത സംഭവം ഉണ്ടായിട്ടുണ്ട്‌. പെരുവണ്ണാമൂഴി പോലീസ് സബ് ഇൻസ്പെക്ടർ കെ. ജിതിൻ വാസിന്‍റെ നേതൃത്വത്തിൽ അഡീഷണൽ സബ് ഇൻസ്പെക്ടർ രജിത്ത് നാഥ്, സീനിയർ പോലീസ് ഓഫീസർ കെ.കെ. സമീർ എന്നിവരാണ് സംഭവസ്ഥലത്ത് പരിശോധന നടത്തിയത്. ‌ അതിക്രമം കാട്ടിയ കുറ്റക്കാരെ കണ്ടെത്തി ശക്തമായ നടപടി സ്വീകരിക്കണമെന്നാണ് വ്യാപകമായി ആവശ്യം ഉയരുന്നത്. ഈ പ്രദേശത്ത് പോലീസ് രാത്രികാല പട്രോളിംഗ് ശക്തമാക്കണമെന്നും നാട്ടുകാർ ആവശ്യപ്പെട്ടു. കുറ്റവാളികളെ നിയമത്തിനു മുമ്പിൽ കൊണ്ടുവരണമെന്ന് എകെസിസി കൂരാച്ചുണ്ട്: കുളത്തുവയൽ സെന്‍റ് ജോർജ് തീർഥാടന കേന്ദ്രത്തിലെ ഗ്രോട്ടോകൾ സാമൂഹിക വിരുദ്ധർ നശിപ്പിച്ച സംഭവത്തിൽ കത്തോലിക്ക കോൺഗ്രസ് കൂരാച്ചുണ്ട് ഫൊറോന കമ്മിറ്റി ശക്തമായി അപലപിച്ചു. കുറ്റക്കാർക്കെതിരേ ശക്തമായ നടപടികൾ സ്വീകരിക്കണമെന്നും സ്ഥലം സന്ദർശിച്ച നേതാക്കൾ ആവശ്യപ്പെട്ടു. ഓരോ വ്യക്തികളുടെയും വിശ്വാസത്തെയും ആരാധനാലയങ്ങളെയും സംരക്ഷിക്കാൻ സർക്കാർ പ്രതിജ്ഞാബദ്ധമാണ്. അക്കാര്യത്തിൽ സർക്കാർ നീതി പുലർത്തണമെന്നും അഭിപ്രായപ്പെട്ടു. തുടർന്നും ഇത്തരത്തിലുള്ള അനിഷ്ട സംഭവങ്ങൾ ഉണ്ടാകാതിരിക്കാൻ ബന്ധപ്പെട്ടവർ ആവശ്യമായ നടപടികൾ കൈക്കൊള്ളണമെന്നും അല്ലാത്തപക്ഷം ശക്തമായ പ്രതിഷേധം ഉയരുമെന്നും നേതാക്കൾ അറിയിച്ചു.

കത്തോലിക്ക കോൺഗ്രസ് ഫൊറോന ഡയറക്ടർ ഫാ. വിൻസെന്‍റ് കണ്ടത്തിൽ, രൂപത ജനറൽ സെക്രട്ടറി ജോൺസൺ കക്കയം, ഫൊറോന വൈസ് പ്രസിഡന്‍റ് നിമ്മി പൊതിയിട്ടേൽ, കമ്മിറ്റി അംഗം വി.ടി. തോമസ് വെളിയംകുളം, കല്ലാനോട് യൂണിറ്റ് പ്രസിഡന്‍റ് ദാസ് കാനാട്ട്, ജെയിംസ് കൂരാപ്പിള്ളിൽ എന്നിവർ സംഭവസ്ഥലം സന്ദർശിച്ചു.

കലാകാരന്മാരെ പ്രോത്സാഹിപ്പിക്കുന്നതിലൂടെ‌ ലക്ഷ്യമിടുന്നത് നാടിന്‍റെ പുരോഗതി: മന്ത്രി സജി ചെറിയാന്‍

കൊയിലാണ്ടി: കലകളെയും കലാകാരന്മാരെയും പ്രോത്സാഹിപ്പിക്കുന്നത് വഴി നാടിന്‍റെ സാംസ്‌കാരിക പുരോഗതിയാണ് സര്‍ക്കാര്‍ ലക്ഷ്യമിടുന്നതെന്ന് സാംസ്‌കാരിക മന്ത്രി സജി ചെറിയാന്‍. പത്മശ്രീ മാണി മാധവ ചാക്യാര്‍ കലാപഠന കേന്ദ്രം ഉദ്ഘാടനം ചെയ്യുകയായിരുന്നു അദ്ദേഹം. കലാകാരന്മാര്‍ നമ്മുടെ സംസ്‌കാരത്തിന്‍റെ വേരുകളാണ്. അവരെ ഓര്‍മിക്കുകയും ആദരിക്കുകയും ചെയ്യേണ്ടത് നമ്മുടെ കടമയാണ്. കേരളത്തിലെ സാംസ്‌കാരിക പൈതൃകത്തിന് മാണി മാധവ ചാക്യാര്‍ നല്‍കിയ സംഭാവനകള്‍ക്ക് പകരം വയ്ക്കാനാകില്ലെന്നും മന്ത്രി കൂട്ടിച്ചേര്‍ത്തു. ചടങ്ങില്‍ ടി.പി. രാമകൃഷ്ണന്‍ എംഎല്‍എ അധ്യക്ഷത വഹിച്ചു. ടി.പി. രാമകൃഷ്ണന്‍ എംഎല്‍എയുടെ പ്രാദേശിക വികസന നിധിയില്‍നിന്ന് അനുവദിച്ച 75 ലക്ഷം രൂപ ചെലവില്‍ ജന്മദേശമായ അരിക്കുളം പഞ്ചായത്തിലെ കാരയാട് തിരുവങ്ങായൂര്‍ ശിവക്ഷേത്രത്തിന് സമീപമാണ് സാംസ്‌കാരിക പഠനകേന്ദ്രം നിര്‍മിച്ചത്. മാണി മാധവ ചാക്യാരുടെ കുടുംബം സൗജന്യമായി നല്‍കിയ പത്തുസെന്‍റ് സ്ഥലത്താണ് കെട്ടിടം. സാംസ്‌കാരിക കേന്ദ്രത്തിലെ ഫര്‍ണിച്ചറുകള്‍ക്കായി മൂന്ന് ലക്ഷം രൂപ പന്തലായനി ബ്ലോക്ക് പഞ്ചായത്ത് അനുവദിച്ചിട്ടുണ്ട്. അരിക്കുളം ഗ്രാമപഞ്ചായത്ത് അസി. എന്‍ജിനീയര്‍ അഖില ഉണ്ണികൃഷ്ണന്‍ റിപ്പോര്‍ട്ട് അവതരിപ്പിച്ചു. സാഹിത്യ അക്കാദമി സെക്രട്ടറി സി.പി. അബൂബക്കര്‍, പത്മാവതി ഇലോടമ്മ, മാണി നീലകണ്ഠന്‍ ചാക്യാര്‍, പൊതിയില്‍ നാരായണ ചാക്യാര്‍, പി.കെ. ഹരീഷ് നമ്പ്യാര്‍, മാണി മാധവാനന്ദ് ചാക്യാര്‍ എന്നിവര്‍ വിശിഷ്ടാതിഥികളായി. പന്തലായനി ബ്ലോക്ക് പഞ്ചായത്ത് പ്രസിഡന്‍റ് പി. ബാബുരാജ്, അരിക്കുളം പഞ്ചായത്ത് പ്രസിഡന്‍റ് എ.എം. സുഗതന്‍, വൈസ് പ്രസിഡന്‍റ് കെ.പി. രജനി, ജില്ലാ പഞ്ചായത്ത് അംഗം എം.പി. ശിവാനന്ദന്‍, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷന്‍ കെ. അഭിനീഷ്, അംഗം ടി.എം. രജില തുടങ്ങിയവര്‍ പ്രസംഗിച്ചു.

ഗാന്ധിജിയും ഗുരുവും വിവേചനരഹിതമായ സമൂഹത്തിനുവേണ്ടി നിലക്കൊണ്ടു: സമദാനി

കോഴിക്കോട്: മഹാത്മാഗാന്ധിയും ശ്രീനാരായണഗുരുവും മനുഷ്യത്വത്തിന്‍റെയും സാമൂഹിക സഹവര്‍ത്തിത്വത്തിന്‍റെയും തത്വവും പ്രയോഗവും നിറവേറ്റിയ മഹാപുരുഷന്മാരായിരുന്നുവെന്ന് എം.പി.അബ്ദുസമദ് സമദാനി എംപി. ജവഹര്‍ലാല്‍ നെഹ്‌റു നാഷണല്‍ ലീഗല്‍ ആന്‍ഡ് സോഷ്യല്‍ ഫോറം കോഴിക്കോട്ട് സംഘടിപ്പിച്ച ദേശീയ സംവാദം ഉദ്ഘാടനം ചെയ്യുകയായിരുന്നു അദ്ദേഹം. ദര്‍ശനങ്ങളുടെയും രീതിശാസ്ത്രങ്ങളുടെയും കാര്യത്തില്‍ വിശദാംശങ്ങളുടെ വ്യത്യാസങ്ങളുണ്ടാകാമെങ്കിലും ഇരുവരും ജാതീയതയുടെ ഉന്മൂലനത്തിനും വിവേചനരഹിതമായ സമൂഹത്തിനും വേണ്ടിയാണ് നിലകൊണ്ടത്. വിവിധങ്ങളായ രീതികളില്‍ വിവേചനങ്ങള്‍ തലപൊക്കുന്ന ഇക്കാലത്ത് ഇരുവരുടെയും സന്ദേശങ്ങളും കര്‍മ മാര്‍ഗങ്ങളും കൂടുതല്‍ പഠിക്കുകയും പ്രചരിപ്പിക്കുകയും ചെയ്യേണ്ടതുണ്ടെന്ന് അദ്ദേഹം പറഞ്ഞു. മഹാത്മാഗാന്ധിയും ഗുരുവും നല്‍കിയ ദര്‍ശനങ്ങള്‍ വര്‍ത്തമാന കാലഘട്ടത്തില്‍ ഏറെ പ്രസക്തമാണെന്നും അവയുടെ യഥാര്‍ഥത്തിലുള്ള നടത്തിപ്പാണ് വര്‍ത്തമാനകാല പ്രശ്‌നങ്ങള്‍ക്കുള്ള ഏക പരിഹാരമെന്നും ഡോ. എം.എന്‍ കാരശേരി പറഞ്ഞു. സൂംബാ ഡാന്‍സിന് എതിരേയുള്ള അഭിപ്രായപ്രകടനങ്ങളും സിനിമയില്‍ ജാനകി എന്ന പേര് ഉപയോഗിക്കുന്നതിന് എതിരേയുള്ള പ്രതികരണളും രാജ്യത്തെ 100 വര്‍ഷം പിന്നോട്ട് നയിക്കുമെന്ന് അദ്ദേഹം പറഞ്ഞു. ഫോറം പ്രസിഡന്‍റ് അഡ്വ. പി.വി. മോഹന്‍ലാല്‍ അധ്യക്ഷത വഹിച്ചു. യുഡിഎഫ് ജില്ലാ ചെയര്‍മാന്‍ കെ. ബാലനാരായണന്‍, ഡിസിസി ഭാരവാഹികളായ അഡ്വ.എം. രാജന്‍, പി. മുഹമ്മദ് കോയ, ബി.പി. റഷീദ്, ടി.കെ. സത്യനാഥന്‍, ആയിഷ മുഹമ്മദ് , നിസാര്‍ പുനത്തില്‍, ടി.പി. നസീര്‍ ഹുസൈന്‍ എന്നിവര്‍ പ്രസംഗിച്ചു.

ദൃശ്യം മോഡല്‍ കൊലപാതകം: മുഖ്യപ്രതിയുടെ കാര്‍ കസ്റ്റഡിയിലെടുത്തു

കോഴിക്കോട്: സാമ്പത്തിക പണിമിടപാടുമായി ബന്ധപ്പെട്ട തര്‍ക്കത്തെ തുടര്‍ന്ന് ബത്തേരി പൂമല ചെട്ടിമൂല സ്വദേശി ഹേമചന്ദ്രനെ ദൃശ്യം മോഡലില്‍ കൊലപ്പെടുത്തി കുഴിച്ചിട്ട കേസിലെ മുഖ്യപ്രതി ബത്തേരി പഴുപ്പത്തൂര്‍ സ്വദേശി പുല്ലമ്പി വീട്ടില്‍ നൗഷാദി (33)ന്‍റെ ഉടമസ്ഥയിലുള്ള കാര്‍ പോലീസ് മലപ്പുറത്തുനിന്നു പോലീസ് കണ്ടെടുത്തു. ഹേമചന്ദ്രനെ കൊലപ്പെടുത്തി മൃതദേഹം െകാണ്ടുപോയത് ഈ കാറിലാണെന്നാണ് പോലീസ് സംശയിക്കുന്നത്. കാര്‍ ഫോറന്‍സിക്‌ പരിശോധനയ്ക്ക് വിധേയമാക്കും. കാറിന്‍റെ ഡിക്കിയില്‍ പെയിന്‍റടിച്ചിട്ടുണ്ട്. മൃതദേഹം കൊണ്ടുപോയതിന്‍റെ തെളിവുകള്‍ നശിപ്പിക്കാനാണോ പെയിന്‍റടിച്ചതെന്നു പോലീസ് അന്വേഷിക്കുന്നുണ്ട്. നൗഷാദിന്‍റെ ഉടമസ്ഥതയിലുള്ള കാര്‍ മലപ്പുറം സ്വദേശിക്ക് പണയത്തിന് കൊടുത്തിരിക്കുകയായിരുന്നു. കോഴിക്കോട് മെഡിക്കല്‍ കോളജ് ഇന്‍സ്‌പെക്ടര്‍ കെ.കെ. ആഗേഷിന്‍റെ നേതൃത്വത്തില്‍ ഡാന്‍സാഫ് അംഗങ്ങള്‍ കാര്‍ കസ്റ്റഡിയിലെടുത്ത് മെഡിക്കല്‍ കോളജ് പോലീസ് സ്റ്റേഷനില്‍ എത്തിച്ചു. ഹേമചന്ദ്രന്‍റെ മൃതദേഹം കഴിഞ്ഞമാസം 28നാണ് നീലഗിരിയിലെ ചേരമ്പാടി വനമേഖലയില്‍ കുഴിച്ചിട്ടനിലയില്‍ കണ്ടെത്തിയത്. സാമ്പത്തിക ഇടപാടിന്‍റെ പേരില്‍ സ്ത്രീകളെ ഉള്‍പ്പെടെ ഉപയോഗിച്ച് ഹേമചന്ദ്രനെ കെണിയില്‍പെടുത്തി വയനാട്ടിലേക്ക് കൊണ്ടുപോയി കൊലപ്പെടുത്തുകയായിരുന്നുവെന്നാണ് പോലീസ് കണ്ടെത്തിയിരിക്കുന്നത്. ഒന്നരവര്‍ഷം മുമ്പ് കോഴിക്കോട്ടുനിന്നാണ് ഹേമചന്ദ്രനെ കാണാതായത്. കോഴിക്കോട് മെഡിക്കല്‍ കോളജിന് സമീപമുള്ള മായനാട് നടപ്പാലത്തുള്ള വാടകവീട്ടില്‍നിന്ന് ടൗണിലേക്കാണെന്നു പറഞ്ഞ് പോയ ഹേമചന്ദ്രനെ കാണാനില്ലെന്ന് ചൂണ്ടിക്കാട്ടി 2024 ഏപ്രില്‍ ഒന്നിന് ഭാര്യ മെഡിക്കല്‍ കോളജ് പോലീസില്‍ പരാതിനല്‍കിയിരുന്നു. തുടര്‍ന്നുള്ള അന്വേഷണത്തിലാണ് ഹേമചന്ദ്രന്‍ കൊല്ലപ്പെട്ടുവെന്ന സൂചനയിലേയ്‌ക്കെത്തിയത്. റിയല്‍ എസ്റ്റേറ്റ്, സ്വകാര്യ ചിട്ടി കമ്പനി, റെന്‍റ് എ കാര്‍ തുടങ്ങിയ ഇടപാടുകള്‍ നടത്തിയിരുന്ന ഹേമചന്ദ്രന്‍ 20 ലക്ഷത്തോളം രൂപ പലര്‍ക്കും നല്‍കാനുണ്ടായിരുന്നതായാണ് പോലീസിനു ലഭിച്ചിരിക്കുന്ന സൂചന.

മലബാര്‍ റിവര്‍ ഫെസ്റ്റിവല്‍: മഴയും കോടയും നിറഞ്ഞ വീഥിയിലൂടെ മണ്‍സൂണ്‍ ട്രക്കിംഗ്

കോടഞ്ചേരി: പാട്ടുപാടിയും കഥ പറഞ്ഞും കോട നിറഞ്ഞ മലകളുടെ ഭംഗി ആസ്വദിച്ചും മണ്‍സൂണ്‍ ട്രക്കിംഗില്‍ പങ്കെടുക്കാനെത്തിയവര്‍ തുഷാരഗിരിയിലെ നീരാറ്റ്കുന്ന് കയറി. 24 മുതല്‍ 27 വരെ തുഷാരഗിരിയില്‍ ചാലിപ്പുഴയിലും ഇരുവഞ്ഞിപ്പുഴയിലും നടക്കുന്ന മലബാര്‍ റിവര്‍ ഫെസ്റ്റിവലിന്‍റെ പതിനൊന്നാം പതിപ്പിന്‍റെ ഭാഗമായാണ് കോടഞ്ചേരി പഞ്ചായത്തിന്‍റെ ആഭിമുഖ്യത്തില്‍ ട്രക്കിംഗ് സംഘടിപ്പിച്ചത്. പരിപാടിയുടെ ഫ്‌ളാഗ് ഓഫ് കേരള ടൂറിസം ഇന്‍ഫ്രാസ്ട്രക്ചര്‍ ചെയര്‍മാന്‍ എസ്.കെ. സജീഷ് നിര്‍വഹിച്ചു. കോടഞ്ചേരി ഗ്രാമപഞ്ചായത്ത് പ്രസിഡന്‍റ് അലക്‌സ് തോമസ് ചെമ്പകശേരി അധ്യക്ഷത വഹിച്ചു. നാലാം വാര്‍ഡ് മെമ്പര്‍ സിസിലി ജേക്കബ്, ഡിടിപിസി ഡെസ്റ്റിനേഷന്‍ മാനേജര്‍ ഷെല്ലി മാത്യു, വിവിധ ഉപസമിതി അംഗങ്ങളായ സി.എസ്. ശരത്, എം.എസ്. ഷെജിന്‍, പോള്‍സണ്‍ അറയ്ക്കല്‍, വനസംരക്ഷണ സമിതി പ്രസിഡന്‍റ് ബേബി കോട്ടപ്പുള്ളി, അധ്യാപകരായ ശില്‍പ, നിധിന്‍ എന്നിവര്‍ നേതൃത്വം നല്‍കി. കോടഞ്ചേരി ഗവ. കോളജിലെയും കൈതപ്പൊയില്‍ ലിസ കോളജിലെയും വിദ്യാര്‍ഥികളുള്‍പ്പെടെ നൂറിലധികം പേര്‍ പരിപാടിയില്‍ പങ്കാളികളായി.

കുറ്റിച്ചിറ കുളത്തിലെ സുരക്ഷാവീഴ്ച: കേസെടുത്തു

കോഴിക്കോട്: കുറ്റിച്ചിറ കുളത്തിൽ യാതൊരു സുരക്ഷാ മുന്നറിയിപ്പും സ്ഥാപിക്കാത്തതു കാരണം കുളിക്കാനിറങ്ങിയ വിദ്യാർഥി മുങ്ങിമരിച്ചതായി പരാതിയുയർന്ന സാഹചര്യത്തിൽ കോഴിക്കോട് നഗരസഭാ സെക്രട്ടറി വിശദമായ അന്വേഷണം നടത്തി റിപ്പോർട്ട് സമർപ്പിക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ് നിർദേശം നൽകി.15 ദിവസത്തിനകം റിപ്പോർട്ട് സമർപ്പിക്കണം. ഓഗസ്റ്റിൽ നടക്കുന്ന സിറ്റിംഗിൽ കേസ് പരിഗണിക്കും. മഴക്കാലമായതിനാൽ കുളത്തിൽ മൂന്നാൾപൊക്കത്തിൽ വെള്ളമുണ്ട്. കുളിക്കാനും നീന്തൽ പരിശീലനത്തിനുമായി ആളുകൾ എത്തുന്ന ഇവിടെ സുരക്ഷാ ഉപകരണങ്ങളോ മുന്നറിയിപ്പ് ബോർഡോ ഇല്ല. വെള്ളത്തിൽ വീണാൽ രക്ഷപ്പെടുത്താനാവശ്യമായ ഉപകരണങ്ങൾ മുമ്പുണ്ടായിരുന്നെങ്കിലും നഷ്ടമായതായി മനസിലാക്കുന്നു. കുളം നവീകരിച്ചതോടെ നിരവധിയാളുകൾ ഇവിടെയെത്തുന്നുണ്ട്. കുളത്തിന്‍റെ സ്വഭാവം മനസിലാക്കാത്തവർ കുളത്തിലിറങ്ങുന്നത് പതിവാണ്. ലൈറ്റുകൾ കേടായി കത്താത്ത നിലയിലാണ്. ഇക്കഴിഞ്ഞ ദിവസം ടി.ടി. യഹിയ എന്ന വിദ്യാർഥിയാണ് ഇവിടെ മുങ്ങി മരിച്ചത്.

ആരോഗ്യ മേഖല തകര്‍ന്നതിനുത്തരവാദി സംസ്ഥാന സര്‍ക്കാര്‍: പി.എം.എ. സലാം

കോഴിക്കോട്: ലോകത്ത് തന്നെ മാതൃകായിരുന്ന കേരളത്തിലെ ആരോഗ്യ രംഗം തകര്‍ന്നതിനുത്തുരവാദി സംസ്ഥാന സര്‍ക്കാരാണെന്നും മന്ത്രി വീണാ ജോര്‍ജിന് മന്ത്രി സ്ഥാനത്ത് തുടരാന്‍ അര്‍ഹതയില്ലെന്നും മുസ്ലിം ലീഗ് സംസ്ഥാന ജനറല്‍ സെക്രട്ടറി പി.എം.എ. സലാം. സാധാരണക്കാരായ ജനങ്ങള്‍ ആശ്രയിക്കുന്ന സര്‍ക്കാര്‍ ആശുപത്രികള്‍ ഇന്ന് ആവശ്യത്തിന് ഡോകര്‍മാരും ജീവനക്കാരും ഇല്ലാതെ ബുദ്ധിമുട്ട് അനുഭവിക്കുകയാണെന്നും ആവശ്യത്തിന് മരുന്നുകളോ ഉപകരണങ്ങളോ ലഭ്യമല്ലെന്നും അദ്ദേഹം ചൂണ്ടിക്കാട്ടി. ആരോഗ്യ വകുപ്പിലെ കെടുകാര്യസ്ഥതയില്‍ ആരോഗ്യ മന്ത്രി രാജി വയ്ക്കുക,അടച്ച് പൂട്ടിയ പിഎംഎസ്എസ്‌വൈ ബ്ലോക്ക് അടിയന്തിരമായി തുറക്കുക തുടങ്ങിയ ആവശ്യങ്ങള്‍ ഉന്നയിച്ച് മുസ്ലിം ലീഗ്് കോഴിക്കോട് ജില്ലാ കമ്മിറ്റി കോഴിക്കോട് മെഡിക്കല്‍ കോളജ് പരിസരത്ത് നടത്തിയ ബഹുജന പ്രക്ഷോഭം ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് എം.എ. റസാഖ് അധ്യക്ഷനായിരുന്നു. ജില്ലാ ജനറല്‍ സെക്രട്ടറി ടി.ടി. ഇസ്മായില്‍,ട്രഷറര്‍ സൂപ്പി നരിക്കാട്ടേരി , ഉമ്മര്‍ പാണ്ടികശാല, സി.പി. ചെറിയ മുഹമ്മദ്, സി.കെ.സുബൈര്‍, അഹമ്മദ് പുന്നക്കല്‍, വി.എം ഉമ്മര്‍, എം.സി വടകര, പി.കെ.ഫിറോസ്, നൂര്‍ബിന റഷീദ് എന്നിവര്‍ പ്രസംഗിച്ചു.

കടലിൽ കുടുങ്ങിയ തൊഴിലാളികളെ രക്ഷപ്പെടുത്തി

കൊയിലാണ്ടി: മത്സ്യബന്ധനത്തിന് പോയി വഞ്ചിയു‌ടെ എൻജിൻ തകരാറായി കടലിൽ കുടുങ്ങിയ 30 തൊഴിലാളികളെ സുരക്ഷിതരായി കരയ്ക്കെത്തിച്ചു. കൊയിലാണ്ടിയിൽ നിന്നും മത്സ്യബന്ധനത്തിന് പോയ വിഷ്ണുമൂർത്തി എന്ന വഞ്ചിയാണ് എൻജിൻ തകരാറിനെ തുടർന്ന് കടലിൽ കുടുങ്ങിയത്. ഫിഷറീസ് അസി. ഡയറക്ടർ സുനീറിന്‍റെ നിർദേശപ്രകാരം സബ് ഇൻസ്പെക്ടർ രാജൻ, എസ്‌സിപിഒ ബൈജു, റസ്ക്യു ഗാർഡുമാരായ നിധിഷ്, ജിജിൻ എന്നിവർ ചേർന്നാണ് വഞ്ചി കൊയിലാണ്ടി ഹാർബറിൽ സുരക്ഷിതമായി എത്തിച്ചത്.

ആശുപത്രിയിൽ ചികിത്സക്കെത്തിയ രോഗിയുടെ ബാഗ് മോഷണംപോയി

കൊയിലാണ്ടി: താലൂക്ക് ആശുപത്രിയിൽ ചികിത്സക്കെത്തിയ രോഗിയുടെ ബാഗ് മോഷണം പോയി. ഉള്ളൂർ സ്വദേശി ബീനയുടെ ബാഗാണ് മോഷ്ടിക്കപ്പെട്ടത്. ചൊവ്വാഴ്ച രാവിലെയാണ് സംഭവം. ഒപി വിഭാഗത്തിൽ കാണിക്കാനായി എത്തിയപ്പോൾ വെയിറ്റിംഗ് ഏരിയയിൽ കസേരയിൽ ബാഗ് വയ്ക്കുകയും ഡോക്ടറെ കാണിക്കാനായി അകത്ത് കയറിയപ്പോൾ എടുക്കാൻ മറക്കുകയുമായിരുന്നു. തിരിച്ചെത്തിയപ്പോഴാണ് ബാഗ് നഷ്ടമായെന്ന് മനസിലായത്. 2000 രൂപയും, മൊബൈൽ ഫോണും ഒരു മോതിരവുമാണ് ബാഗിൽ ഉണ്ടായിരുന്നത്. സംഭവത്തിന്‍റെ സിസിടിവി ദൃശ്യങ്ങൾ പുറത്ത് വന്നിട്ടുണ്ട്. പ്രായമുള്ള ഒരാൾ തന്‍റെ കൈയിലുള്ള കുട ബാഗിൽ വച്ചാണ് മോഷണം നടത്തിയത്.

രാസവള വില വർധന; ‌കർഷകർ പോസ്റ്റ് ഓഫീസ് മാർച്ച് നടത്തി

താമരശേരി: രാസവള വില വർധനവ് തടയുക, സബ്സിഡി വെട്ടിക്കുറച്ച കേന്ദ്രസർക്കാർ നടപടി പിൻവലിക്കുക എന്നീ ആവശ്യങ്ങൾ ഉന്നയിച്ച് കേരള കർഷക സംഘം താമരശേരി ഏരിയാ കമ്മിറ്റിയുടെ നേതൃത്വത്തിൽ കർഷകർ താമരശേരി പോസ്റ്റ് ഓഫീസ് മാർച്ചും ധർണയും നടത്തി. കർഷക സംഘം ജില്ലാ കമ്മിറ്റി അംഗം ടി.കെ. അരവിന്ദാക്ഷൻ ഉദ്ഘാടനം ചെയ്തു. പി.സി. അബ്ദുൾ അസീസ് അധ്യക്ഷത വഹിച്ചു. പി.സി. വേലായുധൻ, കെ.കെ. വിജയൻ, കെ.എസ്. മനോജ്, കെ. ജമീല, എൻ.വി. രാജൻ, കെ.പി.സുബീഷ് എന്നിവർ പ്രസംഗിച്ചു.

വന്യജീവി ആക്രമണം : ‘ജനങ്ങളെ രക്ഷിക്കാൻ സർക്കാർ അടിയന്തര നടപടി സ്വീകരിക്കണം’

പെരുവണ്ണാമൂഴി: വന്യജീവികളുടെ ആക്രമണത്തിൽ നിന്ന് ജനങ്ങളുടെ ജീവനും സ്വത്തിനും സംരക്ഷണം നൽകാൻ സർക്കാർ അടിയന്തര നടപടി സ്വീകരിക്കണമെന്ന് ബിജെപി ജില്ല സെക്രട്ടറി കെ.കെ. രജീഷ് ആവശ്യപ്പെട്ടു. കാട്ടാനകളുടെ ആക്രമണമുണ്ടായ ചക്കിട്ടപാറ പഞ്ചായത്തിലെ പെരുവണ്ണാമൂഴി, പന്നിക്കോട്ടൂർ, ചെമ്പനോട പ്രദേശങ്ങളിൽ കൃഷിനാശമുണ്ടായ ഇടങ്ങൾ അദ്ദേഹവും സംഘവും സന്ദർശിച്ചു. പ്രശ്‌നത്തിൽ സർക്കാർ അടിയന്തരമായി ഇടപെട്ടില്ലെങ്കിൽ പെരുവണ്ണാമൂഴി ഫോറസ്റ്റ് ഓഫീസിലേക്ക് ബഹുജന മാർച്ച് സംഘടിപ്പിക്കുമെന്നും രജീഷ് മുന്നറിയിപ്പ് നൽകി. ബിജെപി ജില്ലാ സെക്രട്ടറി തറമൽ രാഗേഷ്, പാർട്ടി ചക്കിട്ടപാറ പഞ്ചായത്ത് കമ്മിറ്റി പ്രസിഡന്‍റ് ബാബു പുതുപ്പറമ്പിൽ, ശ്രീനിവാസൻ മനയ്ക്കൽ, വി.വി. രാജൻ, അനൂപ് പറമ്പിൽ, സിബി പന്നിക്കോട്ടൂർ, ചോയി പൂക്കോട്ട്ചാലിൽ എന്നിവരും സന്ദർശക സംഘത്തിൽ ഉണ്ടായിരുന്നു.

പേരാമ്പ്രയിൽ വനിതാ വെൽനസ് സെന്‍റർ തുറന്നു

പേരാമ്പ്ര: ആരോഗ്യ മുന്നേറ്റത്തിലേക്കുള്ള പ്രധാന ചുവടുവയ്പ്പായ വനിതാ വെൽനസ് സെന്‍റർ പേരാമ്പ്ര പൈതോത്ത് റോഡിൽ പഞ്ചായത്ത് പ്രസിഡന്‍റ് വി.കെ. പ്രമോദ് ഉദ്ഘാടനം ചെയ്തു. സ്ത്രീകളിൽ പൊതുവെ കണ്ടുവരുന്ന ജീവിത ശൈലീ രോഗങ്ങൾക്കും വർധിച്ചുവരുന്ന മാനസിക സമ്മർദത്തിനും ഉത്തമ പരിഹാരമാണ് വെൽനസ് സെന്‍റർകൊണ്ട് ലക്ഷ്യമിടുന്നതെന്ന് അദ്ദേഹം പറഞ്ഞു. ഇരുപതോളം ആധുനിക വ്യായാമ ഉപകരണങ്ങളും യോഗ, സൂംബ ഡാൻസ് തുടങ്ങിയ വ്യായാമമുറകൾ ചെയ്യുന്നതിനുമുള്ള പ്രത്യേക സൗകര്യവും വനിതകൾക്കായി ഇവിടെ ഒരുക്കിയിട്ടുണ്ട്. 14,12937രൂപ പഞ്ചായത്ത് ഫണ്ടും അഞ്ച് ലക്ഷം രൂപ ജില്ലാ പഞ്ചായത്ത് ഫണ്ടും ഉപയോഗിച്ചാണ് സെന്‍റർ പണി പൂർത്തീകരിച്ചത്. ചടങ്ങിൽ പഞ്ചായത്ത് വൈസ് പ്രസിഡന്‍റ് കെ.എം. റീന അധ്യക്ഷത വഹിച്ചു. ഐസിഡിഎസ് സൂപ്പർ വൈസർ കെ. രേഷ്മ റിപ്പോർട്ട് അവതരിപ്പിച്ചു.

കാർ വൈദ്യുത പോസ്റ്റിൽ ഇടിച്ചുതകർന്നു

കൂടരഞ്ഞി: കക്കാടംപൊയിൽ-കോടഞ്ചേരി മലയോര ഹൈവേയിൽ വാഹനാപകടം. കൂടരഞ്ഞി പോസ്റ്റോഫീസ് ജംഗ്ഷന് സമീപം കൂമ്പാറയിൽ നിന്നും ഇറക്കം ഇറങ്ങിവരികയായിരുന്ന കാർ നിയന്ത്രണംവിട്ട് വീട്ടുമതിലിലും വൈദ്യുത പോസ്റ്റിലും ഇടിക്കുകയായിരുന്നു. ഇന്നലെ രാവിലെ 11നാണ് സംഭവം. പരിക്കേറ്റ കക്കാടംപൊയിൽ സ്വദേശി രജീഷ്, കൂമ്പാറ സ്വദേശി ബിനു എഴുത്താണിക്കുന്നേൽ എന്നിവരെ കൂടരഞ്ഞിയിലെ സ്വകാര്യ ആശുപത്രിയിലും തുടർന്ന് മണാശേരിയിലെ മെഡിക്കൽ കോളജ് ആശുപത്രിയിലും പ്രവേശിപ്പിച്ചു. ഇരുവരുടെയും പരിക്ക് ഗുരുതരമല്ല. അപകടത്തിൽ കാറിന്‍റെ മുൻഭാഗം തകർന്നു.

പാരീഷ് കൗൺസിൽ യോഗം പ്രതിഷേധിച്ചു

കുളത്തുവയൽ: സെന്‍റ് ജോർജ് തീർഥാടന കേന്ദ്രത്തിലെ കുരിശിന്‍റെ വഴികളിൽ സ്ഥാപിച്ച രണ്ട് ഗ്രോട്ടോകളുടെ ചില്ലുകൾ സാമൂഹിക വിരുദ്ധർ തകർത്ത സംഭവത്തിൽ കുളത്തുവയൽ ഇടവകയിൽ ചേർന്ന പാരീഷ് കൗൺസിൽ യോഗം പ്രതിഷേധിച്ചു. കുറ്റക്കാരെ എത്രയും വേഗത്തിൽ കണ്ടെത്തണമെന്നും യോഗം ആവശ്യപ്പെട്ടു. തീർഥാടന കേന്ദ്രം റെക്ടർ ഫാ. തോമസ് കളരിക്കൽ അധ്യക്ഷത വഹിച്ചു. പാരീഷ് സെക്രട്ടറി ഷാജു കണക്കഞ്ചേരി, ട്രസ്റ്റിമാരായ ജോജോ നെല്ലിവേലി, നോബി കുമ്പുക്കൽ, സിജോ സ്രാമ്പിക്കൽ, സജി മലയാറ്റിൽ, മുൻ കമ്മിറ്റി അംഗങ്ങളായ ജോർജ് പാറത്താഴത്ത്, ഡി. ജോസഫ്, സിബി വേങ്ങപ്പള്ളി എന്നിവർ പ്രസംഗിച്ചു.

ക്രിയേറ്റീവ് കോര്‍ണർ ഉദ്ഘാടനം ചെയ്തു

കോഴിക്കോട്: ഇരുവള്ളൂര്‍ ഗവ. യുപി സ്‌കൂളിലെ ക്രിയേറ്റീവ് കോര്‍ണറും ചുറ്റുമതിലും മന്ത്രി എ.കെ. ശശീന്ദ്രന്‍ ഉദ്ഘാടനം ചെയ്തു. പഠനത്തിനൊപ്പം തൊഴില്‍ നൈപുണ്യം വളര്‍ത്തുകയെന്ന ലക്ഷ്യത്തോടെ സമഗ്രശിക്ഷ കേരളയുടെ നേതൃത്വത്തില്‍ കൊച്ചി ശാസ്ത്ര സാങ്കേതിക സര്‍വകലാശാലയുമായി സഹകരിച്ചാണ് ക്രിയേറ്റീവ് കോര്‍ണര്‍ പ്രവര്‍ത്തനം. 2023-24 വര്‍ഷത്തെ എസ്എസ്‌കെ ഫണ്ട് ഉപയോഗിച്ചാണ് ചുറ്റുമതില്‍ നിര്‍മാണം. ചടങ്ങില്‍ ചേളന്നൂര്‍ പഞ്ചായത്ത് പ്രസിഡന്‍റ് പി.പി. നൗഷീര്‍ അധ്യക്ഷത വഹിച്ചു. പ്രധാനാധ്യാപിക എം.കെ. റാണി ഷര്‍മിള റിപ്പോര്‍ട്ട് അവതരിപ്പിച്ചു. യുഎസ്എസ് ജേതാക്കളെ ചേളന്നൂര്‍ പഞ്ചായത്ത് വൈസ് പ്രസിഡന്‍റ് ഗൗരി പുതിയോത്ത് അനുമോദിച്ചു. സ്ഥിരംസമിതി അധ്യക്ഷരായ പി.കെ. കവിത, സി.പി. നൗഷീര്‍, മടവൂര്‍ പഞ്ചായത്ത് അംഗം എം.പി. ബാബു, ചേളന്നൂര്‍ ബിപിസി പി. അഭിലാഷ്‌കുമാര്‍, പിടിഎ പ്രസിഡന്‍റ് സി.പി. മനോജ് കുമാര്‍, എംപിടിഎ പ്രസിഡന്‍റ് റുബിന, സ്റ്റാഫ് സെക്രട്ടറി എം. സുധന്യ എന്നിവര്‍ പ്രസംഗിച്ചു.

മാവൂരിൽ അഞ്ചുകടകളിൽ മോഷണം

മുക്കം: മാവൂരിൽ മോഷണ പരമ്പര. അഞ്ചുകടകളിൽ മോഷണവും രണ്ട് കടകളിൽ മോഷണ ശ്രമവും നടന്നു. ബസ് സ്റ്റാൻഡിന് പിന്നിലെ ഫെമി ഇന്നർ വെയേഴ്സ്, ടോയ്സ് ഗാലറി, മെയിൻ റോഡിലെ മിലാനോ മെറ്റൽസ് ഗിഫ്റ്റ് ഹൗസ്, പൈപ്പ് ലൈൻ ജംഗ്ഷനിലെ വീ വൺ സൂപ്പർ മാർക്കറ്റ്, അടുവാടുള്ള "ഹരിദാസിന്‍റെ മസാല കട' എന്നിവിടങ്ങളിലാണ് മോഷണം നടന്നത്. കെട്ടാങ്ങൽ റോഡിലെ പുഞ്ചിരി ഫാൻസി ആൻഡ് ഫൂട്‌‌വെയർ, മാവൂർ ബസ് സ്റ്റാൻഡിന് എതിർവശത്തെ ഡിസൈൻസ് ടെക്സ്റ്റൈൽസ് എന്നീ കടകളിൽ മോഷണ ശ്രമവും നടന്നു. പൂട്ട് തകർത്ത് അകത്ത് കയറിയാണ് മോഷണം നടത്തിയത്. കടകളുടെ അകത്ത് മേശയിലുണ്ടായിരുന്ന പണമാണ് കവർന്നത്. വീ വൺ സൂപ്പർ മാർക്കറ്റിൽനിന്ന് 12,500 ലധികം രൂപ കവർന്നിട്ടുണ്ട്. പുഞ്ചിരിയിലെയും വീ വൺ സൂപ്പർമാർക്കറ്റിലെയും സിസിടിവിയിൽ യുവാവിന്‍റെ ദൃശ്യങ്ങൾ പതിഞ്ഞിട്ടുണ്ട്. മാവൂർ പോലീസ് കേസെടുത്ത് അന്വേഷണം ആരംഭിച്ചു. വിരലടയാള വിദഗ്ധരെത്തി തെളിവെടുത്തിട്ടുണ്ട്.

കോര്‍പറേഷനിലേക്കുള്ള ബിജെപി മാര്‍ച്ചില്‍ സംഘര്‍ഷം

കോഴിക്കോട്: കോഴിക്കോട് കോര്‍പറേഷനിലെ അഴിമതിയും ദുര്‍ഭരണവും അവസാനിപ്പിക്കണമെന്നാവശ്യപ്പെട്ടും കേന്ദ്ര വികസന പദ്ധതികള്‍ കോര്‍പറേഷന്‍ അട്ടിമറിക്കുന്നതിനെതിരെയും ബിജെപി നടത്തിയ കോര്‍പറേഷന്‍ ഓഫീസ് മാര്‍ച്ചില്‍ സംഘര്‍ഷം. പോലീസ് ബാരിക്കേഡുകള്‍ മറികടന്ന് കോര്‍പറേഷന്‍ ഓഫീസ് േകാമ്പൗണ്ടില്‍ പ്രവര്‍ത്തകര്‍ കയറി. സ്ത്രീകളടക്കമുള്ള പ്രവര്‍ത്തകെര പിന്നീട് പോലീസ് അറസ്റ്റ് ചെയ്തു നീക്കി. പ്രവര്‍ത്തകരും പോലീസും തമ്മില്‍ ഉന്തും തള്ളും നടന്നു. ബിജെപി സിറ്റി ഉപജില്ല കമ്മിറ്റിയുടെ നേതൃത്വത്തില്‍ കോര്‍പറേഷന്‍ ഓഫീസിലേക്ക് നടന്ന പ്രതിഷേധ മാര്‍ച്ച് ദേശീയ നിര്‍വാഹക സമിതി അംഗം പി.കെ. കൃഷ്ണദാസ് ഉദ്ഘാടനം ചെയ്തു. നാലര പതിറ്റാണ്ടുകാലമായി കോഴിക്കോട് കോര്‍പറേഷനില്‍ സിപിഎമ്മിന്‍റെ ദുര്‍ഭരണം നടക്കുകയാണെന്നും ഈ അഴിമതി ഭരണത്തുടര്‍ച്ചയ്ക്ക് അറുതിവരുത്തുന്നതു വരെ സമരം തുടരുമെന്നും കൃഷ്ണദാസ് പറഞ്ഞു. സിപിഎമ്മിന് കോര്‍പറേഷന്‍ ഭരണം കറവപ്പശുവാണ്. വോട്ട് ചെയ്ത് ഭരണത്തിലേറ്റിയ ജനങ്ങളെ കറിവേപ്പില പോലെയാണ് കണക്കാക്കുന്നത്. നിര്‍മാണ കുംഭകോണം, നികുതി കുംഭകോണം, നിയമന കുംഭകോണം എന്നിങ്ങനെ കോടികളുടെ കുംഭകോണമാണ് കോര്‍പറേഷനില്‍ നടക്കുന്നതെന്ന് അദ്ദേഹം പറഞ്ഞു. ബിജെപി സിറ്റി ജില്ല പ്രസിഡന്‍റ് കെ.പി. പ്രകാശ്ബാബു അധ്യക്ഷത വഹിച്ചു. നേതാക്കളായ വി. ഉണ്ണികൃഷ്ണന്‍, കെ.പി. ശ്രീശന്‍, നവ്യ ഹരിദാസ്, ടി.വി. ഉണ്ണികൃഷ്ണന്‍, എം. സുരേഷ്, എന്‍.പി. രാധാകൃഷ്ണന്‍, കെ. ഗണേഷ് എന്നിവര്‍ പ്രസംഗിച്ചു.

നിപ്പ: അനാവശ്യ ആശുപത്രി സന്ദര്‍ശനം ഒഴിവാക്കണം

കോഴിക്കോട്: സംസ്ഥാനത്ത് വീണ്ടും നിപ്പ രോഗബാധ റിപ്പോര്‍ട്ട് ചെയ്ത സാഹചര്യത്തില്‍ അനാവശ്യ ആശുപത്രി സന്ദര്‍ശനങ്ങള്‍ ഒഴിവാക്കണമെന്ന് കോഴിക്കോട് ജില്ലാ മെഡിക്കല്‍ ഓഫീസര്‍ ഡോ. കെ കെ രാജാറാം. ആശുപത്രിയില്‍ ചികിത്സയിലുള്ള ബന്ധുക്കളെയും സുഹൃത്തുക്കളെയും സന്ദര്‍ശിക്കുന്നത് പരമാവധി ഒഴിവാക്കണം. രോഗികളോടൊപ്പം സഹായിയായി ഒരാള്‍ മാത്രം നില്‍ക്കണം. ആരോഗ്യ പ്രവര്‍ത്തകരും ആശുപത്രിയിലെത്തുന്ന രോഗികളും കൂട്ടിരിപ്പുകാരും മാസ്‌ക് ധരിക്കണം. ആശുപത്രി സന്ദര്‍ശനത്തിന് ശേഷം കൈകള്‍ സോപ്പും വെള്ളവും ഉപയോഗിച്ച് വൃത്തിയാക്കണമെന്നും ഡിഎംഒ അറിയിച്ചു. ആശുപത്രിയില്‍ നേരിട്ട് പോകേണ്ടതില്ലാത്ത ചെറിയ ആരോഗ്യ പ്രശ്‌നങ്ങള്‍ക്ക് ഫോണിലൂടെ ഇ സഞ്ജീവനി വഴി ഡോക്ടറുടെ സൗജന്യ സേവനം ലഭ്യമാണ്. ഇതിലൂടെ രോഗപ്പകര്‍ച്ച ഇല്ലാതാക്കാനാകും. ഇ-സഞ്ജീവനി ടെലിമെഡിസിന്‍ സേവനങ്ങള്‍ക്കായി https://esanjeevani.mohfw.gov.in സന്ദര്‍ശിക്കുകയോ ഇ-സഞ്ജീവനി ആപ്ലിക്കേഷന്‍ മൊബൈലില്‍ ഡൗണ്‍ലോഡ് ചെയ്ത് ഉപയോഗിക്കുകയോ ചെയ്യാം. വീഡിയോ കോണ്‍ഫറന്‍സ് വഴി ഡോക്ടറോട് നേരിട്ട് രോഗവിവരം സംസാരിക്കാനും അവസരമുണ്ട്. നിപ പ്രത്യേക ഒ പി സേവനങ്ങള്‍ രാവിലെ എട്ട് മുതല്‍ വൈകിട്ട് എട്ട് വരെ ഇ-സഞ്ജീവനിയില്‍ ലഭ്യമാണ്. കൂടുതല്‍ വിവരങ്ങള്‍ക്കും സംശയങ്ങള്‍ക്കുമായി 104/1056/04712552056 എന്നീ ദിശ ടോള്‍ ഫ്രീ നമ്പറുകളില്‍ ബന്ധപ്പെടാം. നിപ്പ: കോഴിക്കോട്ടെ സമ്പര്‍ക്ക പട്ടികയില്‍ 114 പേര്‍ കോഴിക്കോട്: കോഴിക്കോട് ജില്ലയില്‍ നിപ സമ്പര്‍ക്കപ്പട്ടികയിലുള്ളത് 114 പേരെന്ന് ആരോഗ്യ മന്ത്രി വീണാ ജോര്‍ജ് അറിയിച്ചു. വിവിധ ജില്ലകളിലായി സമ്പര്‍ക്കപ്പട്ടികയില്‍ 609 പേരാണുള്ളത്. ഇതില്‍ 112 പേര്‍ പാലക്കാട് രണ്ടാമത് നിപ റിപ്പോര്‍ട്ട് ചെയ്തയാളുടെ സമ്പര്‍ക്കപ്പട്ടികയിലുള്ളവരാണ്. പാലക്കാട് 286, മലപ്പുറം 207, എറണാകുളം 2 എന്നിങ്ങനെയാണ് മറ്റു ജില്ലകളില്‍ സമ്പര്‍ക്കപ്പട്ടികയിലുള്ളവര്‍. മലപ്പുറത്ത് എട്ടുപേര്‍ ഐസിയു ചികിത്സയിലാണ്. മലപ്പുറം ജില്ലയില്‍ ഇതുവരെ 72 സാമ്പിളുകള്‍ നെഗറ്റീവ് ആയിട്ടുണ്ട്. പാലക്കാട് 5 പേര്‍ ഐസൊലേഷനില്‍ ചികിത്സയിലാണ്.

നമ്പികുളം മലയിലെ വാറ്റ്‌കേന്ദ്രം തകര്‍ത്തു

കൂരാച്ചുണ്ട്: എരപ്പാന്‍തോട് നമ്പികുളം മലയില്‍ പ്രവര്‍ത്തിച്ചിരുന്ന വ്യാജമദ്യ വാറ്റ്‌കേന്ദ്രം പേരാമ്പ്ര എക്‌സൈസ് സംഘം തകര്‍ത്തു. റെയ്ഡില്‍ 300 ലിറ്റര്‍ വാഷും 30 ലിറ്റര്‍ സ്‌പെന്‍ഡ് വാഷും 20 ലിറ്റര്‍ ചാരായവും വാറ്റുപകരണങ്ങളും കണ്ടെത്തി. നമ്പികുളം മലയില്‍ വ്യാജവാറ്റ് നടക്കുന്നതായി രഹസ്യ വിവരം ലഭിച്ചതിനെ തുടര്‍ന്ന് എക്‌സൈസ് സംഘം രണ്ടര കിലോമീറ്ററോളം കാല്‍നടയായി ഉള്‍ക്കാട്ടിലെത്തിയാണ് റെയ്ഡ് നടത്തിയത്. പേരാമ്പ്ര എക്‌സൈസ് സര്‍ക്കിള്‍ ഓഫീസിലെ അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ ചന്ദ്രന്‍ കുഴിച്ചാലില്‍, അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍മാരായ പി.സി.ബാബു, എ.കെ.പ്രകാശന്‍, പ്രിവന്‍റിവ് ഓഫീസര്‍ പി.ജെ. ബേബി എന്നിവരാണ് റെയ്ഡ് നടത്തിയത്.

സ്പീഡ് ബ്രേക്ക് ബാരിയര്‍ നശിപ്പിച്ചതില്‍ പ്രതിഷേധം

കൂടരഞ്ഞി: മലയോര ഹൈവേയില്‍ കരിങ്കുറ്റി സെന്‍റ് ജോസഫസ് ആശുപത്രിക്കും സ്റ്റെല്ല മാരിസ് സ്‌കൂളിനും മുന്‍പില്‍ സ്ഥാപിച്ച സ്പീഡ് ബ്രേക്ക് ബാരിയര്‍ സാമൂഹിക വിരുദ്ധ നശിപ്പിക്കുന്നത് പതിവാകുന്നു. അപകട സാധ്യതയേറിയ ഈ സ്ഥലത്ത് മൂന്നു മാസം മുമ്പാണ് സ്വകാര്യ വ്യക്തിയുടെ സഹായത്തോടെ സപീഡ് ബ്രേക്കര്‍ സ്ഥാപിച്ചത്. സ്‌കൂളിലേക്കും ആശുപത്രിയിലേക്കും വരുന്നവരുടെ സുരക്ഷ ഉറപ്പാക്കുന്നതിനും അപകടങ്ങള്‍ കുറക്കുന്നതിനും വേണ്ടി പഞ്ചായത്ത് പ്രസിഡന്‍റ് ആദര്‍ശ് ജോസഫിന്‍റെ നിര്‍ദേശപ്രകാരം സ്ഥാപിച്ച ബാരിയറാണ് നശിപ്പിച്ചത്. മുന്‍പ് മൂന്ന് തവണ ബാരിയര്‍ വാഹനമിടിച്ചു നശിപ്പിച്ചു. മറ്റൊരു തവണ ബൈക്ക് യാത്രക്കാരന്‍ ബാരിയര്‍ കല്ലുകൊണ്ട് ഇടിച്ച് നശിപ്പിക്കുകയും ചെയ്തു. തകരാര്‍ പരിഹരിച്ച് പുന:സ്ഥാപിച്ച ബോര്‍ഡാണ് കഴിഞ്ഞദിവസം ഇരുട്ടിന്‍റെ മറവില്‍ നശിപ്പിച്ചത്. ഇത് ചെയ്തവരെ നിയമത്തിന്‍റെ മുന്‍പില്‍ കൊണ്ടുവരണമെന്ന് ജനകീയ കമ്മിറ്റി ആവശ്യപ്പെട്ടു.

സ്വകാര്യ ആശുപത്രികള്‍ക്കായി മെഡി.കോളജിനെ സര്‍ക്കാര്‍ തകര്‍ക്കുന്നു: മുസ്ലിംലീഗ്

കോഴിക്കോട്: രാജ്യത്ത് തന്നെ ഏറ്റവുമധികം സാധാരണക്കാര്‍ ആശ്രയിക്കുന്ന കോഴിക്കോട് ഗവ.മെഡിക്കല്‍ കോളജിന്‍റെ പുരോഗതി തടസ്സപ്പെടുത്തി സംസ്ഥാന സര്‍ക്കാര്‍ തകര്‍ക്കുകയാണെന്ന് മുസ്ലിംലീഗ് ജില്ലാ ഭാരവാഹികള്‍ വാര്‍ത്താ സമ്മേളനത്തില്‍ ആരോപിച്ചു. സ്വകാര്യ ആശുപത്രികളുമായുള്ള ഒത്തുകളിയും കനത്ത അഴിമതിയുമാണ് ഗവ.മെഡിക്കല്‍ കോളജിനെ രോഗാതുരമാക്കുന്നതെന്ന നേതാക്കള്‍ പറഞ്ഞു. രോഗികളും കൂട്ടിരുപ്പുകാരും കൂടാതെ ആുപത്രി ജീവനക്കാരും ഒന്നടങ്കം പ്രതിസന്ധിയിലാണ്. സാധാരണക്കാരായ ഏറ്റവും കൂടുതല്‍ ആളുകള്‍ ആശ്രയിക്കുന്ന മെഡിക്കല്‍ കോളജ് പ്രശ്നങ്ങളുടേയും പ്രയാസങ്ങളുടേയും പടുകുഴിയിലാണ്. വിവാദങ്ങളും ദുരന്തങ്ങളും വാര്‍ത്തയില്‍ ഇടം പിടിച്ചു തുടങ്ങിയിട്ട് കുറച്ചു വര്‍ഷങ്ങളായി. തിരുവന്തപുരത്തെയും കോട്ടയത്തെയും അനുഭവങ്ങള്‍ പാഠമായെടുത്ത് കോഴിക്കോട് മെഡിക്കല്‍ കോളജിന്റെ കാര്യത്തില്‍ അടിയന്തിരമായ ഇടപെടലുകള്‍ ഒട്ടും വൈകിക്കൂട. ഇന്ന് മെഡിക്കല്‍ കോളജിന് മുമ്പില്‍ നടക്കുന്ന പ്രക്ഷോഭ സംഗമം പുതിയ സമരമുഖം തുറക്കും. രാവിലെ 10 മണിക്ക് മെഡിക്കല്‍ കോളജിന് മുമ്പില്‍ നടക്കുന്ന പ്രക്ഷോഭ സംഗമം സംസ്ഥാന ജനറല്‍ സെക്രട്ടറി പി.എം.എ സലാം ഉദ്ഘാടനം ചെയ്യും. ജില്ലാ പ്രസിഡന്റ് എം.എ റസാഖ്, ജനറല്‍ സെക്രട്ടറി ടി.ടി ഇസ്്മായില്‍, ട്രഷറര്‍ സൂപ്പി നരിക്കാട്ടേരി എന്നിവര്‍ വാര്‍ത്താ സമ്മേളനത്തില്‍ സംബന്ധിച്ചു.

കുളത്തുവയലില്‍ ഗ്രോട്ടോകള്‍ക്കു നേരെ ആക്രമണം

കൂരാച്ചുണ്ട്: കുളത്തുവയല്‍ സെന്‍റ് ജോര്‍ജ് തീര്‍ഥാടന കേന്ദ്രം ഇടവകയുടെ കീഴില്‍ റോഡരികില്‍ സ്ഥാപിച്ച ഗ്രോട്ടോകള്‍ക്കു നേരെ സാമൂഹിക വിരുദ്ധരുടെ ആക്രമണം. ഗ്രോട്ടോകളുടെ ചില്ലുകള്‍ തകര്‍ത്തു. രണ്ടു ദിവസങ്ങളിലായാണ് അതിക്രമം നടത്തിയത്. ചെമ്പ്ര ടൗണില്‍ നിന്നും തീര്‍ത്ഥാടന കേന്ദ്രത്തിലേക്കുള്ള റോഡില്‍ കുരിശിന്‍റെ വഴി നടത്തുന്നതിനായി ആറും ഏഴും സ്ഥലത്ത് സ്ഥാപിച്ചിട്ടുള്ള ഗ്രോട്ടോകളുടെ ചില്ലുകളാണ് തകര്‍ത്ത നിലയില്‍ കണ്ടത്. ഒരു ഗ്രോട്ടോയുടെ ഉള്ളില്‍ കല്ലും കണ്ടെത്തിയിട്ടുണ്ട്. ഞായറാഴ്ചയാണ് ഒരു ഗ്രോട്ടോയുടെ ചില്ല് തകര്‍ത്ത നിലയില്‍ ഇടവകക്കാര്‍ കണ്ടത്. മറ്റെന്തെങ്കിലും വീണു ചില്ല് തകര്‍ന്നതെന്നാണ് കരുതിയിരുന്നത്. ഇന്നലെ വൈകിട്ട് വീണ്ടും സമീപത്തുള്ള മറ്റൊരു ഗ്രോട്ടോയുടെ ചില്ലും തകര്‍ത്ത നിലയില്‍ കണ്ടതോടെയാണ് അതിക്രമം നടന്നതായി മനസിലായത്. തുടര്‍ന്ന് പള്ളി കമ്മിറ്റി പെരുവണ്ണാമൂഴി പോലീസില്‍ പരാതി നല്‍കി. സംഭവത്തില്‍ പ്രതിഷേധം ശക്തമായിട്ടുണ്ട്. കുറ്റവാളികളെ ഉടന്‍ പിടികൂടണമെന്ന് നാട്ടുകാര്‍ ആവശ്യപ്പെട്ടു.

എന്‍ജിഒ അസോസിയേഷന്‍ സി.രവീന്ദ്രന്‍ സ്മൃതി സദസ്സ്

കോഴിക്കോട് : സംഘടനാ രംഗത്ത് അതുല്യ നേതൃത്വത്തിന് ഉടമയായിരുന്നു സി. രവീന്ദ്രനെന്ന് എന്‍ജിഒ. അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശ്ശേരി പറഞ്ഞു. മാത്തോട്ടം വനശ്രീയില്‍ കേരള എന്‍ജിഒ അസോസിയേഷന്‍ സംഘടിപ്പിച്ച സി. രവീന്ദ്രന്‍ സ്മൃതി സദസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ബ്രാഞ്ച് പ്രസിഡന്‍റ് കെ.വി. ബാലകൃഷ്ണന്‍ അധ്യക്ഷനായി. സംസ്ഥാന കൗണ്‍സില്‍ അംഗം എം. വി. ബഷീര്‍, കെ.ജോതിഷ്‌കുമാര്‍, കെ. അഫ്‌സല്‍, കെ.കെ.അശോകന്‍ , മനോജ് പുളിക്കല്‍ എന്നിവര്‍ സംസാരിച്ചു. അനുസ്മരണ സദസ്സിന് ടി.വി. ശ്രീജ കെ.എന്‍ സാബിറ , കെ.ടി. നിഖില്‍ എന്നിവര്‍ നേതൃത്വം നല്‍കി.

തിരുവമ്പാടി ലയണ്‍സ് ക്ലബ് ഭാരവാഹികള്‍ സ്ഥാനമേറ്റു

തിരുവമ്പാടി: തിരുവമ്പാടി ലയണ്‍സ് ക്ലബ്ബിന്‍റെ 2025-26 വര്‍ഷത്തെ ഭാരവാഹികളുടെ സ്ഥാനാരോഹണ ചടങ്ങ് മുന്‍ ഡിസ്ട്രിക്ട് ഗവര്‍ണര്‍ അഡ്വ. ഡെന്നിസ് തോമസ് ഉദ്ഘാടനം ചെയ്തു. ക്ലബ് പ്രസിഡന്‍റ് അഡ്വ. ജിമ്മി ജോര്‍ജ് അധ്യക്ഷത വഹിച്ചു. പുതിയ പ്രസിഡന്‍റായി സണ്ണി തോമസ്, സെക്രട്ടറിയായി ഷാര്‍ലറ്റ് പോള്‍, ട്രഷററായി അഡ്വ.മോഹന്‍ കെ. ജോസ് തുടങ്ങിയവര്‍ അടങ്ങിയ 11 അംഗ കമ്മറ്റി ചുമതല ഏറ്റെടുത്തു. മറ്റു ഭാരവാഹികള്‍: വൈസ് പ്രസിഡന്‍റന്റുമാര്‍- സജന്‍ കുമാര്‍, അഡ്വ. സിബിന്‍ വി. ജോസ്. കമ്മിറ്റി ചെയര്‍മാന്‍മാര്‍ - ഡോ. പി.എം. മത്തായി, സാന്‍റി കളത്തിപറമ്പില്‍, റഹ്‌മത്തുല്ല, പ്രഫ. പി.എ. മത്തായി. ഡയറക്ടര്‍മാര്‍: ഇ.കെ. സെബാസ്റ്റ്യന്‍, ജയേഷ് സ്രാമ്പിക്കല്‍, കെ.സി.ജോണ്‍, എന്‍.കെ.ജോയ്. ക്ലബിന്‍റെ പുതിയ സേവന പദ്ധതിയുടെ ഉദ്ഘാടനം മുന്‍ ഡിസ്ട്രിക്ട് ഗവര്‍ണര്‍ അഡ്വ. വര്‍ഗീസ് സൈമണ്‍ നിര്‍വഹിച്ചു. റീജിയന്‍ ചെയര്‍മാന്‍ പി. വി. മോഹന്‍ദാസ്, സോണ്‍ ചെയര്‍പേഴ്‌സണ്‍ ഷീല പോള്‍, നാല് സത്യജിത് റേ അവാര്‍ഡുകള്‍ കരസ്ഥമാക്കിയ സജന്‍ കുമാര്‍, പ്ലസ്ടു പരീക്ഷയില്‍ മുഴുവന്‍ മാര്‍ക്കും വാങ്ങിയ ലീയാന്ദ്ര ഷെര്‍ലറ്റ് എന്നിവരെയും ആദരിച്ചു. ചാര്‍ട്ടര്‍ പ്രസിഡന്‍റ് ഡോ. പി.എം. മത്തായി, അഡ്വ. സിബിന്‍ വി. ജോസ്, പ്രഫ. പി.എ. മത്തായി, സാന്‍റി മൈക്കിള്‍, അന്ന മരിയ മത്തായി, ഷാര്‍ലെറ്റ് പോള്‍ എന്നിവര്‍ സംസാരിച്ചു. അഡ്വ. ജയേഷ് സ്രാമ്പിക്കല്‍, അഡ്വ. മോഹന്‍ കെ. ജോസ്, ഡോ. പി.എ. മത്തായി എന്നിവര്‍ നേതൃത്വം നല്‍കി.

കേരള കോണ്‍ഗ്രസ് ധര്‍ണ്ണ നടത്തി

ബാലുശ്ശേരി: ആരോഗ്യമന്ത്രി വീണാ ജോര്‍ജ് രാജിവയ്ക്കണമെന്ന് ആവശ്യപ്പെട്ട് കേരള കോണ്‍ഗ്രസ് (ജേക്കബ്) കോഴിക്കോട് ജില്ല കമ്മിറ്റി ബാലുശ്ശേരി താലൂക്ക് ആശുപത്രിക്ക് മുന്നില്‍ ധര്‍ണ്ണ നടത്തി. ജില്ല പ്രസിഡന്‍റ് കെ.പി. രാധാകൃഷ്ണന്‍ ഉദ്ഘാടനം ചെയ്തു. ജനറല്‍ സെക്രട്ടറി രാജന്‍ വര്‍ക്കി അധ്യക്ഷത വഹിച്ചു. പ്രദീപ് ചോമ്പാല, മനോജ് ആവള, ആഷിക്ക് അശോക്, സലീം പുല്ലടി, പൗലോസ് കരിപ്പാക്കുടി, തോമസ് പീറ്റര്‍, വി.ഡി.ജോസ്, ഷാര്‍ളി ഫിലിപ്പ് എന്നിവര്‍ പ്രസംഗിച്ചു.

കക്കയത്ത് വൈദ്യുതി മുടക്കം പതിവാകുന്നു

കൂരാച്ചുണ്ട്: മലബാറിലെ പ്രധാനപ്പെട്ട വൈദ്യുതി ഉല്‍പാദന കേന്ദ്രങ്ങള്‍ പ്രവര്‍ത്തിക്കുന്ന കക്കയത്ത് പകല്‍ സമയങ്ങളിലും രാത്രി കാലങ്ങളിലും വൈദ്യുതി വിതരണം പതിവായി തകരാറിലാകുന്നതായി പരാതി. മഴക്കാലമായതോടെ വൈദ്യുതി തകരാര്‍ നിത്യസംഭവമാണ്. നാട്ടുകാര്‍ ഏറെ ദുരിതത്തിലാണ്. നിലവിലുണ്ടായിരുന്ന വൈദ്യുതിലൈനുകള്‍ നീക്കി കേബിള്‍ സംവിധാനം മുഖേനയാണ് ഇപ്പോള്‍ വൈദ്യുതി വിതരണം നടത്തുന്നത്. അതിനു ശേഷമാണ് സ്ഥിരമായി വൈദ്യുതി മുടങ്ങാന്‍ തുടങ്ങിയതെന്നാണ് പ്രദേശവാസികളുടെ പരാതി. കക്കയത്തെ വൈദ്യുതി വിതരണത്തിലുള്ള സാങ്കേതിക തകരാര്‍ ഉടന്‍ പരിഹരിക്കണമെന്ന് മാനസ കക്കയം ആവശ്യപ്പെട്ടു. ജോണ്‍സണ്‍ കക്കയം അധ്യക്ഷത വഹിച്ചു. സുനില്‍ പാറപ്പുറത്ത് തോമസ്, വെളിയംകുളം തോമസ് പോക്കാട്ട് എന്നിവര്‍ പ്രസംഗിച്ചു.

കേരള ബാങ്ക് പന്തീരങ്കാവ് ശാഖ പുതിയ കെട്ടിടത്തിലേക്ക് മാറി

കോഴിക്കോട് : പ്രവര്‍ത്തനരംഗത്ത് 20 വര്‍ഷം പിന്നിടുന്ന കേരള ബാങ്ക് പന്തീരാങ്കാവ് ശാഖ ഇടപാടുകാര്‍ക്ക് മെച്ചപ്പെട്ട സൗകര്യങ്ങള്‍ ലഭ്യമാക്കുന്നതിന്റെ ഭാഗമായി പുതിയ കെട്ടിടത്തിലേക്ക് മാറി. മരക്കാട്ടുപുറത്ത് അര്‍ക്കേഡില്‍ സജ്ജീകരിച്ച ശാഖ കേരള ബാങ്ക് പ്രസിഡന്‍റ് ഗോപി കോട്ടമുറിക്കല്‍ ഉദ്ഘാടനം ചെയ്തു. ഡയറക്ടര്‍ ഇ.രമേശ് ബാബു അധ്യക്ഷത വഹിച്ചു. ഇടപാടുകാരായ ഡോ.ഗ്രേസ് ജോബ്,ടി.വി. ഗംഗാധരന്‍, ദേശീയ ഗെയിംസ് തൈക്കോണ്ടോയില്‍ വെങ്കല മെഡല്‍ നേടിയ സഹോദരങ്ങളായ ലയ ഫാത്തിമ, സെബ എന്നിവരെ ഗോപി കോട്ടമുറിക്കല്‍ ആദരിച്ചു.

ബേപ്പൂരിലെ ഏഴ് കുടുംബങ്ങള്‍ക്ക് ഭൂമി പതിച്ചുനല്‍കും

കോഴിക്കോട്: ബേപ്പൂര്‍ വില്ലേജിലെ പുലിമുട്ട് ഭാഗത്ത് താമസിക്കുന്ന ഏഴ് കുടുംബങ്ങള്‍ക്ക് പട്ടയം അനുവദിക്കാന്‍ തീരുമാനം. മന്ത്രി പി.എ.മുഹമ്മദ് റിയാസിന്‍റെ നേതൃത്വത്തില്‍ ജില്ലാ കളക്ടര്‍ സ്‌നേഹില്‍ കുമാര്‍ സിങ്ങിന്‍റെ അധ്യക്ഷതയില്‍ ചേര്‍ന്ന കോര്‍പറേഷന്‍തല ഭൂമി പതിവ് കമ്മിറ്റി യോഗത്തിലാണ് തീരുമാനം. സര്‍വേ നമ്പര്‍ 96ലെ പുറമ്പോക്കില്‍ 25 വര്‍ഷത്തിലേറെയായി ഭൂമി കൈവശം വച്ചുവരുന്ന ഏഴ് മത്സ്യത്തൊഴിലാളി കുടുംബങ്ങള്‍ക്കാണ് ഭൂമി പതിച്ചുനല്‍കുന്നത്. ജൂലൈ 16ന് കോവൂര്‍ കൃഷ്ണപിള്ള മെമ്മോറിയല്‍ ഹാളില്‍ നടക്കുന്ന പട്ടയമേളയില്‍ രേഖകള്‍ കൈമാറും. ഇതുമായി ബന്ധപ്പെട്ട നടപടിക്രമങ്ങള്‍ പൂര്‍ത്തിയായിട്ടുണ്ട്. 1995ലെ മുനിസിപ്പല്‍ കോര്‍പ്പറേഷന്‍ പ്രദേശങ്ങളിലെ ഭൂമി പതിവ് ചട്ടങ്ങള്‍ പ്രകാരമാണ് ഭൂമി പതിച്ച് നല്‍കുന്നത്. യോഗത്തില്‍ ഭൂപരിഷ്‌കരണ വിഭാഗം ഡെപ്യൂട്ടി കലക്ടര്‍ പി എന്‍ പുരുഷോത്തമന്‍, രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുത്തു.

കോഴിക്കോട് കളക്ടറേറ്റിനെ വിവരാവകാശ സൗഹൃദമായി പ്രഖ്യാപിക്കും

കോഴിക്കോട്: വിവരാവകാശ നിയമം പൂര്‍ണമായി നടപ്പാക്കിയ ദിനമായ ഒക്ടോബര്‍ 12ന് കോഴിക്കോട് കളക്ടറേറ്റിനെ വിവരാവകാശ സൗഹൃദമായി പ്രഖ്യാപിക്കുമെന്നു സംസ്ഥാന വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍ പറഞ്ഞു. വിവരാവകാശ സൗഹൃദ കളക്ടറേറ്റ് പ്രഖ്യാപനത്തിന്‍റെ പ്രാരംഭ നടപടികളുടെ ഭാഗമായി സംസ്ഥാന വിവരാവകാശ കമ്മീഷനും ജില്ലാ ഭരണകൂടവും ചേര്‍ന്ന് സംഘടിപ്പിച്ച വിവരാവകാശ നിയമ സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. എല്ലാ സര്‍ക്കാര്‍ ഓഫീസുകളിലെയും ജീവനക്കാര്‍ക്ക് വിവരാവകാശ നിയമത്തെക്കുറിച്ച് വ്യക്തമായ ധാരണ ഉണ്ടാവുകയും കൃത്യമായ വിവരങ്ങള്‍ വേഗത്തില്‍ അപേക്ഷകന് ലഭ്യമാക്കുകയും വേണം. ഇതില്ലാതാവുമ്പോഴാണ് തെറ്റായ വാര്‍ത്തകളും വിവരങ്ങളും പ്രചരിക്കുന്നതെന്നും കമ്മീഷണര്‍ പറഞ്ഞു. സെമിനാറില്‍ സിവില്‍ സ്റ്റേഷനിലെ വിവിധ വകുപ്പ് മേധാവികളും അപ്പലേറ്റ് അഥോറിറ്റി, പബ്ലിക് ഇന്‍ഫര്‍മേഷന്‍ ഓഫീസര്‍മാര്‍ എന്നിവരും പങ്കാളികളായി. വിവരാവകാശ നിയമം വകുപ്പ് നാലില്‍ പ്രതിപാദിച്ച പ്രകാരം എല്ലാ ഓഫീസുകളിലെയും വിവരങ്ങള്‍ ക്രോഡീകരിച്ച് കാറ്റലോഗ് ചെയ്ത് കമ്പ്യൂട്ടറിലൂടെ ലഭ്യമാക്കല്‍, ഓഫീസ് വെബ്‌സൈറ്റിലെ വിവരങ്ങള്‍ കാലികമാക്കല്‍, വിവരാവകാശവുമായി ബന്ധപ്പെട്ട ബോര്‍ഡുകള്‍ സ്ഥാപിക്കല്‍ ഉള്‍പ്പടെയുള്ള പ്രവര്‍ത്തനങ്ങള്‍ ക്യാമ്പയിന്‍ കാലയളവില്‍ നടത്തും. കമ്മീഷന്‍റെ നേതൃത്വത്തില്‍ ആക്ഷന്‍ പ്ലാന്‍ തയാറാക്കി എല്ലാ ഓഫീസുകളിലും പരിശോധനയും നടത്തും. സെമിനാറില്‍ ജില്ലാ കളക്ടര്‍ സ്നേഹില്‍ കുമാര്‍ സിംഗ് അധ്യക്ഷത വഹിച്ചു.

കൊയിലാണ്ടിയില്‍ മിനി എംസിഎഫ്

കൊയിലാണ്ടി: കൊയിലാണ്ടി നഗരസഭയില്‍ മിനി എംസിഎഫുകള്‍ (മെറ്റീരിയല്‍ കളക്ഷന്‍ ഫെസിലിറ്റി സെന്‍റര്‍) സ്ഥാപിച്ചു. എംസിഎഫിന്‍റെ നഗരസഭതല ഉദ്ഘാടനം കണയംകോട് സുധ കിഴക്കേപാട്ട് നിര്‍വഹിച്ചു. നഗരസഭയിലെ 44 വാര്‍ഡുകളില്‍ നിന്നും ഹരിത കര്‍മ്മ സേന ശേഖരിക്കുന്ന പാഴ് വസ്തുക്കള്‍ സൂക്ഷിക്കുന്നതിനാണ് എംസിഎഫ് സ്ഥാപിച്ചത്. പൊതുമേഖല സ്ഥാപനമായ കേരള സ്റ്റീല്‍ ഇന്‍ഡസ്ട്രീസ് കോര്‍പ്പറേഷനാണ് എംസിഎഫിന്‍റെ പ്രവര്‍ത്തി ഏറ്റെടുത്ത് നടപ്പിലാക്കുന്നത്.

വിവരാവകാശ സൗഹൃദ കളക്ടറേറ്റ്: സെമിനാര്‍ ഇന്ന്

കോഴിക്കോട്: കളക്ടറേറ്റിലെ എല്ലാ ഓഫീസുകളും വിവരാവകാശ സൗഹൃദമാക്കുന്നതിനുള്ള ക്യാമ്പയിന്‍റെ ഭാഗമായി സംസ്ഥാന വിവരാവകാശ കമ്മീഷനും ജില്ലാ ഭരണകൂടവും ചേർന്ന് സംഘടിപ്പിക്കുന്ന സെമിനാർ ഇന്ന് കളക്ടറേറ്റ് കോൺഫറൻസ് ഹാളിൽ നടക്കും. രാവിലെ വകുപ്പ് മേധാവികള്‍ക്കും ഉച്ചക്ക് ശേഷം പബ്ലിക് ഇന്‍ഫര്‍മേഷന്‍ ഓഫീസര്‍മാര്‍, അപ്പീല്‍ അധികാരികള്‍ എന്നിവര്‍ക്കുമായാണ് സെമിനാര്‍ നടത്തുക. സംസ്ഥാന വിവരാവകാശ കമ്മീഷണര്‍ അഡ്വ. ടി.കെ. രാമകൃഷ്ണന്‍ ഉദ്ഘാടനം നിർവഹിക്കും. ജില്ലാ കളക്ടര്‍ സ്നേഹില്‍ കുമാര്‍ സിംഗ് അധ്യക്ഷത വഹിക്കും. വിവരാവകാശ നിയമത്തെ കുറിച്ച് ഉദ്യോഗസ്ഥര്‍ക്കും പൊതുജനങ്ങള്‍ക്കും അവബോധമുണ്ടാക്കുകയും സിവില്‍ സ്റ്റേഷനിലെ മുഴുവന്‍ ഓഫീസുകളെയും വിവരാവകാശ സൗഹൃദ ഓഫീസാക്കി മാറ്റുകയും ലക്ഷ്യമിട്ട് ഒക്ടോബര്‍ 12 വരെയാണ് ക്യാമ്പയിൻ നടത്തുന്നത്.‍ വിവരാവകാശ നിയമപ്രകാരം എല്ലാ ഓഫീസുകളിലെയും വിവരങ്ങള്‍ ക്രോഡീകരിച്ച് കാറ്റലോഗ് ചെയ്ത് കമ്പ്യൂട്ടറിലൂടെ ലഭ്യമാക്കാനുള്ള നടപടികള്‍, എല്ലാ ഓഫീസുകളിലും വിവരാവകാശവുമായി ബന്ധപ്പെട്ട ബോര്‍ഡുകള്‍ സ്ഥാപിച്ചിട്ടുണ്ടെന്ന പരിശോധന, ഓഫീസ് വെബ്‌സൈറ്റിലെ വിവരങ്ങള്‍ കാലികമാക്കുന്നത് ഉള്‍പ്പടെയുള്ള പ്രവര്‍ത്തനങ്ങള്‍ ക്യാമ്പയിന്‍ കാലയളവില്‍ നടത്തും. ഒക്ടോബര്‍ 12ന് വിവരാവകാശ സൗഹൃദ കളക്ടറേറ്റ് പ്രഖ്യാപനം നടത്തും.

ലോഗോ പ്രകാശനം ചെയ്തു

താമരശേരി: കോഴിക്കോട് മെഡിക്കൽ കോളജ് സ്റ്റേഡിയത്തിൽ ആഗസ്റ്റ് 16 മുതൽ 19 വരെ നടക്കുന്ന സംസ്ഥാന അത്‌ലറ്റിക് ചാമ്പ്യൻഷിപ്പിന്‍റെ ലോഗോ പ്രകാശനം മേയർ ഡോ. ബീന ഫിലിപ്പ് നിർവഹിച്ചു. സംസ്ഥാന സ്പോർട്സ് കൗൺസിൽ മെമ്പർ ടി.എം. അബ്ദുറഹിമാൻ അധ്യക്ഷത വഹിച്ചു. അത്‌ലറ്റിക് അസോസിയേഷൻ കോഴിക്കോട് ജില്ലാ സെക്രട്ടറി കെ.എം. ജോസഫ്, കൗൺസിലർ ഇ.എം. സോമൻ, കൗൺസിലർ കെ. മോഹനൻ, കെ.തങ്കച്ചൻ, നൂറുദ്ദീൻ, സി.ടി. ഇല്യാസ്, ഇബ്രാഹിം ചീനിക്ക, വിനോദ് ജോസ്, മുഹമ്മദ് ഹസൻ, എ. കെ. മുഹമ്മദ് അഷ്റഫ് എന്നിവർ പ്രസംഗിച്ചു.

വൻ മരം അപകട ഭീഷണി ഉയർത്തുന്നു

ചക്കിട്ടപാറ: പഞ്ചായത്ത് സ്റ്റേഡിയം കവാടത്തിനു സമീപം പാതയോരത്ത് നിൽക്കുന്ന വൻ മരം അപകട ഭീഷണി ഉയർത്തുന്നതായി പരാതി. ചെരിഞ്ഞു നിൽക്കുന്ന മരത്തിനു ചുവട്ടിലാണ് ഗാന്ധി പ്രതിമയുള്ളത്. ശിഖരം പൊട്ടി വീണാൽ പോലും പ്രതിമ തകരും. സമീപത്തുള്ള കെട്ടിടങ്ങൾക്കും മരം ഭീഷണിയാണ്. പഞ്ചായത്തിന്‍റെ സ്ഥലത്തു തന്നെയാണ് ഇത് നിൽക്കുന്നത്. വലിയ അപകടം സംഭവിക്കുന്നതിനു മുമ്പ് മുറിച്ചു നീക്കണമെന്നാണ് പൊതു ആവശ്യമുയരുന്നത്.

കാട്ടുപന്നികൾ കൃഷി നശിപ്പിച്ചു

പെരുവണ്ണാമൂഴി: ചക്കിട്ടപാറ പഞ്ചായത്ത് വാർഡ് ഏഴിൽപെട്ട മുതുകാട് റോഡ് എസ്റ്റേറ്റ് മുക്കിനു സമീപം താമസിക്കുന്ന വടക്കേടത്ത് തങ്കമ്മയുടെ കൃഷി കാട്ടുപന്നികൾ നശിപ്പിച്ചു. കായ്‌ഫലം ആകാറായ തെങ്ങും തൈകളാണ് കഴിഞ്ഞ ദിവസം നശിപ്പിച്ചത്. സ്ഥലത്തെ വാഴകളും കാമുകിൻ തൈകളും നശിപ്പിക്കൽ ഭീഷണി നേരിടുന്നുണ്ട്.

സാധാരണക്കാരുടെ ആശ്രയം സഹകരണ സംഘങ്ങൾ: രാജു അപ്സര

മുക്കം: പ്രാഥമിക സഹകരണ സംഘങ്ങളും സഹകരണ ബാങ്കുകളുമാണ് സാധാരണക്കാരും പാവപ്പെട്ടവരും ഉൾപ്പെടെയുള്ള ജനങ്ങൾക്ക് വായ്പയുടെ കാര്യത്തിൽ ഉപകാര പ്രദമാകുന്നതെന്ന് വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റ് രാജു അപ്സര പറഞ്ഞു. മുക്കം അർബൻ കോ ഓപ്പറേറ്റീവ് സൊസൈറ്റി മണാശേരി ബ്രാഞ്ച് ആരംഭിച്ച ഗോൾഡ് ലോൺ പദ്ധതിയുടെ ഉദ്ഘാടനം നിർവഹിക്കുകയായിരുന്നു അദ്ദേഹം. ദേശസാൽകൃത ബാങ്കുകളും മറ്റു കൊമേഴ്സ്യൽ ബാങ്കുകളും ഏറ്റവും കൂടുതൽ വായ്പകൾ നൽകി സഹായിക്കുന്നത് വൻകിട കമ്പനികളെയും സ്ഥാപനങ്ങളെയും വ്യക്തികളെയും ഒക്കെയാണ്. ചെറുകിട ഇടത്തരം വ്യാപാരികൾക്കും കർഷകർക്കും തൊഴിലാളികൾക്ക് ഒക്കെ ഏറെ ആശ്രയമായിട്ടുള്ളത് പ്രാഥമിക സഹകരണ സംഘങ്ങളാണെന്നും അദ്ദേഹം പറഞ്ഞു. സൊസൈറ്റി പ്രസിഡന്‍റ് കപ്പിയേടത്ത് ചന്ദ്രൻ അധ്യക്ഷനായി. സഹകരണ വകുപ്പ് അസിസ്റ്റന്‍റ് രജിസ്ട്രാർ ബിജി മുഖ്യ അതിഥിയായി. വിവിധ രംഗങ്ങളിൽ ഉന്നത വിജയം നേടിയവരെയും സൊസൈറ്റി അംഗങ്ങളുടെ മക്കളിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവരെയും ചടങ്ങിൽ ആദരിച്ചു. സഹകരണവകുപ്പ് സീനിയർ ഇൻസ്പെക്ടർ കെ. സബീഷ് കുമാർ, വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് ബാപ്പു ഹാജി, ജില്ലാ വൈസ് പ്രസിഡന്‍റ് റഫീഖ് മാളിക, സൊസൈറ്റി വൈസ് പ്രസിഡന്‍റ് കെ. കമലാക്ഷി, പി. പ്രേമൻ, ദീപു പ്രേംനാഥ്, എം.കെ. ബാലൻ, ടി.കെ. സാമി, പി. അലി അക്ബർ, സൊസൈറ്റി സെക്രട്ടറി വി. സച്ചിൻ തുടങ്ങിയവർ പ്രസംഗിച്ചു. ഡയറക്ടർമാരായ വി.ആർ അജയചന്ദ്രൻ, എം.പി. മാധവൻ, ഡോ. ഗീത തിലക്, ഇ.കെ. ബഷീർ തുടങ്ങിയവർ നേതൃത്വം നൽകി.

വിദ്യാര്‍ഥിക്ക് ക്രൂര മര്‍ദനമേറ്റെന്ന് പരാതി‌

അത്തോളി: ഗവ. വൊക്കേഷണല്‍ ഹയര്‍ സെക്കൻഡറി സ്‌കൂളില്‍ വിദ്യാര്‍ഥിക്ക് ക്രൂര മര്‍ദനമേറ്റെന്ന് പരാതി. മുഹമ്മദ് അമീന്‍ എന്ന വിദ്യാര്‍ഥിക്കാണ് സീനിയർ വിദ്യാര്‍ഥികളില്‍നിന്ന് മര്‍ദനമേറ്റത്. സീനിയര്‍ വിദ്യാര്‍ഥികള്‍ പാട്ടുപാടാനും ഡാന്‍സ് ചെയ്യാനും നിര്‍ബന്ധിച്ചതിന് തയാറാകാതിരുന്നതോടെയാണ് സംഘം ചേർന്ന് സ്കൂളിന് സമീപമുള്ള ഇടവഴിയില്‍ വച്ച് അടിച്ചുവീഴ്ത്തുകയും നിലത്തിട്ട് ചവിട്ടുകയും ചെയ്തത്. തുടർന്ന് അമീൻ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സ തേടി.‌ വിദ്യാര്‍ഥിയുടെ രക്ഷിതാക്കള്‍ അത്തോളി പോലീസിലും, സ്കൂൾ പ്രിൻസിപ്പലിനും പരാതി നല്‍കി.

യൂത്ത് കോൺഗ്രസ്‌ ധർണ സംഘടിപ്പിച്ചു

മുക്കം: നഗരസഭയിലെ അഗസ്ത്യൻമുഴിയിലെയും മണാശേരിയിലെയും ഗതാഗത കുരുക്ക് പരിഹരിക്കാൻ ബദൽ സംവിധാനങ്ങൾ ഒരുക്കണം എന്നാവശ്യപ്പെട്ട് യൂത്ത് കോൺഗ്രസ്‌ മുക്കം മണ്ഡലം കമ്മിറ്റിയുടെ നേതൃത്വത്തിൽ അഗസ്ത്യൻമുഴി അങ്ങാടിയിൽ സായാഹ്ന ധർണ സംഘടിപ്പിച്ചു. പരിപാടി യൂത്ത് കോൺഗ്രസ്‌ ജില്ലാ പ്രസിഡന്‍റ് ആർ. ഷഹിൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ലെറിൻ റാഹത്ത് അധ്യക്ഷനായി. യൂത്ത് കോൺഗ്രസ്‌ സംസ്ഥാന ജനറൽ സെക്രട്ടറി അഡ്വ. സൂഫിയാൻ ചെറുവാടി, നിയോജക മണ്ഡലം പ്രസിഡന്‍റ് അഡ്വ. മുഹമ്മദ്‌ ദിഷാൽ, വൈസ് പ്രസിഡന്‍റ് നിഷാദ് വീച്ചി, ജനറൽ സെക്രട്ടറി മുൻദിർ ചേന്നമംഗല്ലൂർ, മുക്കം മണ്ഡലം കോൺഗ്രസ്‌ പ്രസിഡന്‍റ് എം. മധു, കെ.ടി മൻസൂർ, വേണു കല്ലുരുട്ടി തുടങ്ങിയവർ പ്രസംഗിച്ചു.

ജില്ലാ സബ് ജൂനിയർ ഫെൻസിംഗ് ചാമ്പ്യൻഷിപ്പ് ആരംഭിച്ചു

കോഴിക്കോട്: ജില്ലാ ഫെൻസിംഗ് അസോസിയേഷൻ സംഘടിപ്പിക്കുന്ന ജില്ലാ സബ് ജൂനിയർ ഫെൻസിംഗ് ചാമ്പ്യൻഷിപ്പ് എളേറ്റിൽ എംജെ ഹയർ സെക്കൻഡറി സ്കൂൾ ഗ്രൗണ്ടിൽ ആരംഭിച്ചു. ജില്ലാ അസോസിയേഷൻ ചെയർമാൻ കെ. മുസ്തഫ ചാമ്പ്യൻഷിപ്പ് ഉദ്ഘാടനം ചെയ്തു. സ്കൂൾ ഹെഡ്മാസ്റ്റർ പി.പി. മുഹമ്മദ്‌ ഇസ്മായിൽ അധ്യക്ഷത വഹിച്ചു. ജില്ലാ സ്പോർട്സ് കൗൺസിൽ അംഗം എം.പി. മുഹമ്മദ്‌ ഇസ്ഹാഖ്, പി.കെ. അബ്ദുൽ ജലീൽ, പി.ടി. അബ്ദുൽ അസീസ്, കെ.കെ. ഖമറുദ്ധീൻ, പി.കെ. സുകുമാരൻ, എ.എം. ഷംസീന, ഷബീർ ചുഴലിക്കര എന്നിവർ പ്രസംഗിച്ചു.

സ്വയം പ്രതിരോധ ബോധവത്കരണ ക്ലാസ് സംഘടിപ്പിച്ചു

നെല്ലിപ്പൊയിൽ: സെന്‍റ് ജോൺസ് ഹൈസ്കൂളിൽ ഡിസിഎൽ ക്ലബിന്‍റെ ആഭിമുഖ്യത്തിൽ പോലീസ് വകുപ്പിന്‍റെ സഹകരണത്തോടെ സ്വയം പ്രതിരോധ ബോധവത്കരണ ക്ലാസ് സംഘടിപ്പിച്ചു. സ്ത്രീ സുരക്ഷയുടെ പ്രാധാന്യം മനസിലാക്കി വിദ്യാർഥികളിൽ ആത്മവിശ്വാസം വർധിപ്പിക്കുക, സ്വയം പ്രതിരോധ വിദ്യകൾ അഭ്യസിപ്പിക്കുന്നതിലൂടെ പെൺകുട്ടികളിലെ ആശങ്കകളും ഭയങ്ങളും കുറയ്ക്കുക എന്നീ ലക്ഷ്യത്തോടെയാണ് ക്ലാസ് സംഘടിപ്പിച്ചത്. താമരശേരി അസിസ്റ്റന്‍റ് സബ് ഇൻസ്പെക്ടർ ഷീജ വിദ്യാർഥികൾക്കായി ക്ലാസ് നയിച്ചു. സീനിയർ സിവിൽ പോലീസ് ഓഫീസർ കെ.ജി. ജീജയുടെ നേതൃത്വത്തിൽ സ്വയം പ്രതിരോധ പ്രായോഗിക പരിശീലനം നടത്തി. സ്കൂൾ ഹെഡ്മിസ്ട്രസ് ഷില്ലി സെബാസ്റ്റ്യൻ, ഡിസിഎൽ കൺവീനർ ട്രിഫ്റ്റി സെബാസ്റ്റ്യൻ, ഡിസിഎൽ സ്കൂൾ ഡെപ്യൂട്ടി ലീഡർ അന്ന ബെൻ എന്നിവർ നേതൃത്വം നൽകി.

കരിയാത്തുംപാറയിലെത്തിയ ടൂറിസ്റ്റുകൾ നിരാശരായി മടങ്ങുന്നു

കൂരാച്ചുണ്ട്: ജലസേചന വകുപ്പിന്‍റെ അധീനതയിലുള്ള വിനോദ സഞ്ചാര കേന്ദ്രമായ കൂരാച്ചുണ്ട് പഞ്ചായത്തിലെ കരിയാത്തുംപാറ ടൂറിസം കേന്ദ്രത്തിൽ എത്തുന്ന വിനോദ സഞ്ചാരികൾ നിരാശരായി മടങ്ങുന്നു. മഴ ശക്തമായതിനെ തുടർന്ന് കേന്ദ്രം ഒരു മാസമായി അടച്ചിട്ട നിലയിലാണ്. എന്നാൽ സമീപമുള്ള തോണിക്കടവ്, കക്കയം ടൂറിസം കേന്ദ്രങ്ങൾ തുറന്നു പ്രവർത്തനം ആരംഭിച്ചിരുന്നു. വിവിധ പ്രദേശങ്ങളിൽ നിന്നെത്തുന്നവർ കരിയാത്തുംപാറയിലും സന്ദർശിക്കുന്നതിനു കൂടിയാണ് എത്തുന്നത്. എന്നാൽ ഏറെ നിരാശയോടെയാണ് പലരും മടങ്ങുന്നത്. കൂടുതൽ സുരക്ഷാ സംവിധാനമൊരുക്കി കേന്ദ്രം തുറക്കണമെന്നാണ് ആവശ്യം ഉയരുന്നത്. മാത്രമല്ല കരിയാത്തുംപാറയിൽ കേന്ദ്രത്തെ ആശ്രയിച്ചു പ്രവർത്തിക്കുന്ന വ്യാപാര സ്ഥാപനങ്ങൾ നിരവധിയുണ്ട്. അവരുടെ ജീവിതവും വഴിമുട്ടിയ നിലയിലാണ്. എത്രയും വേഗം തുറന്നു പ്രവർത്തിക്കാൻ ആവശ്യമായ നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.

കെഎസ്ആർടിസി ബസിന് പിറകിൽ പിക്കപ്പ് വാൻ ഇടിച്ചു

കൊയിലാണ്ടി: കെഎസ്ആർടിസി ബസും മിനി പിക്കപ്പും കൂട്ടിയിടിച്ച് ഒരാൾക്ക് പരിക്ക്. ഇന്നലെ പുലർച്ചെ അഞ്ചോടെയാണ് അപകടം. പൂക്കാട് പെട്രോൾ പമ്പിന് സമീപം നാഷണൽ ഹൈവേയിൽ കൊയിലാണ്ടി ഭാഗത്തേക്ക് വരികയായിരുന്നു കെഎസ്ആർടിസി ബസിന്‍റെ പിറകിൽ മിനി പിക്കപ്പ് വാൻ ഇടിക്കുകയായിരുന്നു. അപകടത്തിൽ ഡ്രൈവറുടെ കൂടെ ഉണ്ടായിരുന്ന വയനാട് സ്വദേശിയായ ജോബി (40)ക്ക് കാലിന് പരിക്കേറ്റു. കൊയിലാണ്ടിയിൽ നിന്നും അഗ്നിരക്ഷാസേന എത്തി പരിക്കേറ്റയാളെ കൊയിലാണ്ടി ആശുപത്രിയിൽ എത്തിച്ചു.

കക്കാടംതോട് നവീകരണം നീളുന്നു; ഇനി വേണ്ടത് മൂന്ന് കോടി കൂടി

കർഷകരുടെ ആവശ്യം പരിഗണിച്ചത് ജില്ലാ പഞ്ചായത്ത് മാത്രം കാരശേരി: മണ്ണും കല്ലും ചെളിയും മാലിന്യങ്ങളുമെല്ലാം അടിഞ്ഞുകൂടി കിടന്ന കക്കാടം തോട് നവീകരിക്കാനുള്ള കർഷകരുടെ ആവശ്യം പരിഹരിക്കാതെ തുടരുന്നു. ജില്ലാ പഞ്ചായത്ത് മാത്രമാണ്എന്തെങ്കിലും ഇടപെടൽ നടത്തിയത് . തോട് നവീകരിക്കാൻ 25 ലക്ഷം രൂപ അനുവദിച്ചതായി വികസനകാര്യ സ്ഥിരം സമിതി അധ്യക്ഷ വി.പി.ജമീല അറിയിച്ചു. കഴിഞ്ഞ വർഷവും 25 ലക്ഷം അനുവദിച്ചിരുന്നു. എന്നാൽ തോടു നവീകരിക്കാൻ വേണ്ടത് 3.5 കോടി ആണ്. ഇതുവരെ ആകെ ലഭിച്ചത് അര കോടി മാത്രം. മൂന്നു കോടി രൂപ കൂടി ലഭിച്ചാലേ തോട് നവീകരിച്ച് പൂർണമായും കർഷകർക്കും നാട്ടുകാർക്കും ഉപയോഗപ്രദമാകൂ. കഴിഞ്ഞവർഷം അനുവദിച്ച തുക കൊണ്ട് 150 മീറ്ററോളമാണ് തോടു നവീകരിക്കാൻ സാധിച്ചത്. ഇപ്പോൾ അനുവദിച്ച തുകകൊണ്ട് ഇത്രയും കൂടിയേ നവീകരിക്കാൻ സാധ്യതയുള്ളൂ. മുഖ്യമന്ത്രിയുടെ 2023 ലെ നവകേരള സദസിൽ ഇത് സംബന്ധിച്ച് നിവേദനം നൽകിയിരുന്നു.ഇതിന്‍റെ അടിസ്ഥാനത്തിൽ ബന്ധപ്പെട്ട ഉദ്യോഗസ്ഥർ സ്ഥലം പരിശോധിക്കുകയും രണ്ടു കിലോമീറ്റർ നീളത്തിൽ തോട്ടിലെ മണ്ണും ചെളിയും മാലിന്യങ്ങളും നീക്കം ചെയ്ത് രണ്ടു മീറ്റർ ഉയരത്തിൽ ഇരുവശങ്ങളിലും കരിങ്കൽ ഭിത്തി കെട്ടി തോട് സംരക്ഷിക്കേണ്ടതാണെന്ന് ചെറുകിട ജലസേചന വകുപ്പിന് റിപ്പോർട്ട് നൽകിയിരുന്നു. ഇതിന്‍റെ അടിസ്ഥാനത്തിൽ പ്രവർത്തിക്ക് 3.5 കോടി രൂപ വേണ്ടിവരുമെന്നും ഫണ്ട് ലഭ്യമാകുന്ന മുറക്ക് പ്രവൃത്തി ഏറ്റെടുത്തു നടത്തുന്നതാണെന്ന് ചെറുകിട ജലസേചന വകുപ്പ് കോഴിക്കോട് ഡിവിഷൻ എക്സിക്യൂട്ടീവ് എൻജിനീയർ നിവേദനം നൽകിയവർക്ക് മറുപടിയും നൽകിയിരുന്നു. പക്ഷേ ഇതുവരെയും ഇതു സംബന്ധിച്ച മറ്റു നടപടികളൊന്നും ഉണ്ടായിട്ടില്ല. കൊടിയത്തൂർ പഞ്ചായത്തിലെ തോണിച്ചാൽ, ബെല്ലാറ മലകളിൽ നിന്നും ഉത്ഭവിച്ച് രണ്ട് തോടുകളായി ഒഴുകി കൊയിലാണ്ടി -എടവണ്ണ സംസ്ഥാന പാതയിലെ രണ്ട് കലുങ്ക് വഴി കടന്ന് ശേഷം ഒന്നായി സംഗമിച്ച് കൊടിയത്തൂർ, കാരശേരി പഞ്ചായത്തുളിലൂടെ ഒഴുകി കോട്ടമുഴിൽവച്ച് ഇരുവഞ്ഞിപ്പുഴയിൽ സംഗമിക്കുന്നതാണ് കക്കാടം തോട്. നിരവധി കൈത്തോടുകളും ഈ തോട്ടിൽ വന്നുചേരുന്നുണ്ട്. കൃഷിക്കും മീൻ പിടിക്കാനും അലക്കാനും കുളിക്കാനും കുട്ടികൾക്ക് നീന്തൽ പഠിക്കാനും ഒരു പ്രദേശത്തിന്‍റെ മുഴുവനും കിണറുകളിലെ ജല ശ്രോതസായും നിലനിന്നതാണ് ഈ തോട്. ആവശ്യമായ തുക അനുവദിച്ച് തോട് സംരക്ഷിക്കാനാവശ്യമായ നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.

ഹിന്ദു മതമല്ല, ധര്‍മമാണ്: ആഷാ മേനോന്‍

കോഴിക്കോട്: ഹിന്ദു മതമല്ല, ധര്‍മമാണെന്ന് പ്രമുഖ സാഹിത്യകാരനും നിരൂപകനുമായ ആഷാ മേനോന്‍ അഭിപ്രായപ്പെട്ടു. കാശ്യപ വേദ റിസര്‍ച്ച് ഫൗണ്ടേഷന്‍റെ ഗുരുപൂര്‍ണിമ ആഘോഷത്തില്‍ മുഖ്യാതിഥിയായി സംസാരിക്കുകയായിരുന്നു അദ്ദേഹം. ധര്‍മം എന്നത് രഹസ്യാത്മകമാണ്. ഇത് ഉള്‍ക്കൊള്ളാതെ വേദങ്ങളെയും ഉപനിഷത്തുക്കളെയും വളച്ചൊടിക്കുകയും തരംതാഴ്ത്തുകയുമാണ് മാക്സ് മുള്ളറിനെപ്പോലുള്ളവര്‍ ചെയ്തത്. വലിയ പ്രതിഭകളെപ്പോലും അദ്ദേഹം വഴിതെറ്റിച്ചുവെന്നും ആഷാ മേനോന്‍ പറഞ്ഞു. ചടങ്ങില്‍, ആചാര്യശ്രീ രാജേഷ് രചിച്ച ‘ഹിന്ദുധര്‍മരഹസ്യം' പുസ്തകത്തിന്‍റെ ഇരുപതാം പതിപ്പിന്‍റെ പ്രകാശനവും നടന്നു. നെഹ്‌റു ഗ്രൂപ്പ് ഓഫ് ഇന്‍സ്റ്റിറ്റിയൂഷന്‍സ് ചെയര്‍മാനും മാനേജിംഗ് ട്രസ്റ്റിയുമായ അഡ്വ. ഡോ. പി. കൃഷ്ണദാസ് റിലയന്‍സ് ജിയോ (കേരളം) സീനിയര്‍ വൈസ് പ്രസിഡന്‍റ് കെ. സി. നരേന്ദ്രന് പുസ്തകം കൈമാറി. കാശ്യപ വേദ റിസര്‍ച്ച് ഫൗണ്ടേഷന്‍ ഏര്‍പ്പെടുത്തിയ വിദ്യാജ്യോതി പുരസ്‌ക്കാരം അഡ്വ. ഡോ. പി. കൃഷ്ണദാസിന് ആചാര്യശ്രീ രാജേഷ് സമ്മാനിച്ചു. മീര കെ. രാജേഷ്, വിവേക് ഡി. ഷേണായ്, എം.ആര്‍. വേദലക്ഷ്മി, ഡോ.ബി. മനീഷ് എന്നിവര്‍ പങ്കെടുത്തു.

സി. രവീന്ദ്രന്‍ സ്മാരക പുരസ്‌കാരം സമര്‍പ്പിച്ചു

കോഴിക്കോട്: മുന്‍ ഡിസിസി ജനറല്‍ സെക്രട്ടറിയും എന്‍ജിഒ അസോസിയേഷന്‍ സംസ്ഥാന നേതാവുമായിരുന്ന സി. രവീന്ദ്രന്‍റെ മൂന്നാം ചരമ വാര്‍ഷികവും അദ്ദേഹത്തിന്‍റെ സ്മരണാര്‍ഥം ആക്ടീവ് കോഴിക്കോട് ഏര്‍പ്പെടുത്തിയ പുരസ്‌കാര സമര്‍പ്പണവും മുന്‍ കെപിസിസി പ്രസിഡന്‍റ് മുല്ലപ്പള്ളി രാമചന്ദ്രന്‍ ഉദ്ഘാടനം ചെയ്തു. ഡിസിസി ജനറല്‍ സെക്രട്ടറി പി.എം. അബ്ദുറഹിമാൻ പുരസ്‌കാരം സമ്മാനിച്ചു. ഡിസിസി പ്രസിഡന്‍റ് കെ. പ്രവീണ്‍ കുമാര്‍ പൊന്നാട അണിയിച്ചു. കെപിസിസി ജനറല്‍ സെക്രട്ടറി കെ. ജയന്ത് പ്രശസ്തി പത്രം സമര്‍പ്പിച്ചു. ആക്ടീവ് കോഴിക്കോട് പ്രസിഡന്‍റ് എം.പി. രാമകൃഷ്ണന്‍ അധ്യക്ഷത വഹിച്ചു. ബോണി വര്‍ഗീസ്, ഡോ.എം.പി.പത്മനാഭന്‍, എം. രാജന്‍, എം.കെ.ബീരാന്‍, കെ. പത്മകുമാര്‍, എ.കെ. മുഹമ്മദാലി, എം.എ.പ്രഭാകരന്‍, പി.എം. അബ്ദുറഹിമാന്‍ എന്നിവര്‍ പങ്കെടുത്തു.

വടകരയില്‍ മാവോവാദി അനുകൂല പോസ്റ്ററുകള്‍

വടകര: വടകരയിലും ഓര്‍ക്കാട്ടേരിയിലും മാവോവാദി അനുകൂല പോസ്റ്ററുകള്‍. വടകര പഴയ ബസ് സ്റ്റാന്‍റ്ന പരസരത്തും ഓര്‍ക്കാട്ടേരി ടൗണിലുമാണ് പോസ്റ്ററുകള്‍ പ്രത്യക്ഷപ്പെട്ടത്. മുതിര്‍ന്ന വോവാദി നേതാവ് രൂപേഷിന് അനുകൂലമായാണ് ജസ്റ്റിസ് ഫോര്‍ പ്രിസണേഴ്സ് എന്ന സംഘടനയുടെ പേരില്‍ പോസ്റ്റര്‍ പ്രത്യക്ഷപ്പെട്ടത്. പുതിയ കേസ് ചുമത്തിയ കര്‍ണാടക സര്‍ക്കാര്‍ നടപടി പിന്‍വലിക്കണമെന്ന് പോസ്റ്ററില്‍ പറയുന്നു. 10 വര്‍ഷമായി ജയിലിലടക്കപ്പെട്ട രൂപേഷിന്‍റെ മോചനം തടയാനുളള ഈ കള്ളക്കേസ് കേന്ദ്ര സര്‍ക്കാരിന്‍റെ അടിച്ചമര്‍ത്തല്‍ നയത്തിന്‍റെ ഭാഗം എന്ന ആരോപണവും പോസ്റ്ററില്‍ ഉന്നയിച്ചിട്ടുണ്ട്. ആരൊക്കെയാണ് പോസ്റ്ററിനു പിന്നിലെന്ന് പോലീസിന് സൂചന ലഭിച്ചിട്ടുണ്ട്. ഇതു സംബന്ധിച്ച് അന്വേഷണം നടക്കുന്നതായി സ്പെഷ്യല്‍ ബ്രാഞ്ച് വൃത്തങ്ങള്‍ അറിയിച്ചു.

രാമാശ്രമം ഉണ്ണീരിക്കുട്ടി പുരസ്‌കാരം ഡോ. എസ്. സോമനാഥിന്

കോഴിക്കോട്: കഴിഞ്ഞ വര്‍ഷത്തെ രാമാശ്രമം ഉണ്ണീരിക്കുട്ടി പുരസ്‌കാരം ഐഎസ്ആര്‍ഒ മുന്‍ ചെയര്‍മാന്‍ ഡോ. എസ്. സോമനാഥിന്. അരലക്ഷം രൂപയും ഫലകവുമടങ്ങുന്ന പുരസ്‌കാരം ഓഗസ്റ്റ് അവസാനത്തില്‍ കോഴിക്കോട്ടുനടക്കുന്ന ചടങ്ങില്‍ സമ്മാനിക്കുമെന്ന് രാമാശ്രമം ട്രസ്റ്റ് ചെയര്‍മാന്‍ എം. മുകുന്ദന്‍ വാര്‍ത്താസേമ്മളനത്തില്‍ അറിയിച്ചു. ബഹിരാകാശ ശാസ്ത്രമേഖലയ്ക്ക് ഡോ. എസ്. സോമനാഥ് നല്‍കിയ സംഭാവനകള്‍ പരിഗണിച്ചാണ് പുരസ്‌കാരം. ബഹിരാകാശ ശാസ്ത്രമേഖലയില്‍ രാജ്യത്തിന്റെ യശസ് വാനോളമുയര്‍ത്തിയ മഹത് വ്യക്തിയാണ് സോമനാഥ്. അതിസങ്കീര്‍ണമായ ഈ രംഗത്ത് ചുരുങ്ങിയ കാലത്തിനുള്ളില്‍ അദ്ദേഹം നല്‍കിയ സംഭാവനകള്‍ സമാനതകളില്ലാത്തതാണ്. അതു ലോകം അംഗീകരിച്ചുകഴിഞ്ഞുവെന്ന് അദ്ദേഹം പറഞ്ഞു. ശിഷന്‍ ഉണ്ണീരിക്കുട്ടി, എ.അഭിലാഷ് ശങ്കര്‍ എന്നിവരും വാര്‍ത്താസേമ്മളനത്തില്‍ സംബന്ധിച്ചു.

സ്കൂൾ സമയമാറ്റം: പ്രശ്ന പരിഹാരത്തിന് ശ്രമിക്കുമെന്ന് കാരാട്ട് റസാഖ്

താമരശേരി: സ്കൂൾ സമയമാറ്റവുമായി ബന്ധപ്പെട്ട് മദ്രസാ മാനേജ്മെന്‍റുകളും മുസ്ലീം സംഘടനകളും സർക്കാരുമായി ഉടലെടുത്തിരിക്കുന്ന പ്രശ്നത്തിന് അടിയന്തര പരിഹാരം അനിവാര്യമാണെന്ന് മദ്രസാധ്യാപക ക്ഷേമനിധി ബോർഡ് ചെയർമാൻ കാരാട്ട് റസാഖ് പറഞ്ഞു. വിദ്യാഭ്യാസ മേഖലയുടെ പുരോഗതി ലക്ഷ്യമാക്കി കോടതി വിധിയുടെയും ദേശീയ വിദ്യാഭ്യാസ നയത്തിന്‍റെയും അടിസ്ഥാനത്തിൽ പരിഷ്കരണങ്ങൾ നടത്താൻ സർക്കാരിന് ബാധ്യതയുണ്ട്. എന്നാൽ നൂറ്റാണ്ടുകളായി തുടർന്നു വരുന്ന മദ്രസാ വിദ്യാഭ്യാസം അട്ടിമറിക്കപ്പെടുമോ എന്ന സംഘടനകളുടെ ആശങ്ക സ്വാഭാവികവും പരിഹരിക്കപ്പെടേണ്ടതുമാണ്. വിഷയം പർവതീകരിച്ച് സാമൂഹിക അന്തരീക്ഷം കലുഷിതമാക്കാൻ ശ്രമിക്കുന്ന ചിദ്രശക്തികളെ ഒറ്റപ്പെടുത്തണം. ജാഗ്രതയും വിട്ടുവീഴ്ചയും അനിവാര്യമാണ്. കൂട്ടായ ചർച്ചയിലൂടെ പ്രശ്ന പരിഹാരം കാണുന്നതിന് മദ്രസാധ്യാപക ക്ഷേമനിധി ബോർഡ് നേതൃത്വം നൽകുമെന്നും അദ്ദേഹം പറഞ്ഞു.

നീന്തല്‍ പരിശീലനത്തിനിടെ വിദ്യാര്‍ഥി കുളത്തില്‍ മുങ്ങി മരിച്ചു

കോഴിക്കോട്: കുറ്റിച്ചിറ കുളത്തില്‍ നീന്തല്‍ പരിശീലനത്തിനിടെ വിദ്യാര്‍ഥി മുങ്ങി മരിച്ചു. പയ്യാനക്കല്‍ കപ്പക്കല്‍ സ്വദേശി യഹിയ (17) ആണ് മരിച്ചത്. ഇന്നലെ രാവിലെ ഒമ്പതരയോടെയായിരുന്നു അപകടം. ഫയര്‍ ഫോഴ്‌സ് എത്തി കുട്ടിയെ ബീച്ച് ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാന്‍ സാധിച്ചില്ല. ബീച്ചില്‍ ഫുട്‌ബോള്‍ കളിച്ചശേഷം കൂട്ടുകാര്‍ക്കൊപ്പം കുറ്റിച്ചിറയില്‍ നീന്താന്‍ എത്തിയതായിരുന്നു യഹിയ. കുറ്റിച്ചിറയില്‍ മതിയായ സുരക്ഷാ സംവിധാനങ്ങളില്ലാത്തതാണ് വിദ്യാര്‍ഥിയുടെ മരണത്തിന് കാരണമായതെന്ന് നാട്ടുകാര്‍ ആരോപിച്ചു. ഞായറാഴ്ചകളിലും അവധി ദിവസങ്ങളിലും വിദ്യാര്‍ഥികളടക്കം ഇവിടെ നിരവധി പേര്‍ നീന്താനും നീന്തല്‍ പരിശീലനത്തിനും എത്താറുണ്ട്. ലൈഫ് ജാക്കറ്റുകളടക്കം ആവശ്യത്തിന് സംവിധാനങ്ങളില്ലാതെയാണ് നീന്തല്‍ പരിശീലനമെന്നും ഭാവിയിലും ദുരന്തങ്ങള്‍ സംഭവിക്കാന്‍ സാധ്യതയുണ്ടെന്നുമാണ് പ്രദേശവാസികള്‍ ചൂണ്ടിക്കാട്ടുന്നത്. യഹിയ ഇത്തവണ പയ്യാനക്കല്‍ ഗവ. ഹയര്‍ സെക്കന്‍ഡറി സ്‌കൂളില്‍ നിന്ന് എസ്എസ്എല്‍സി പരീക്ഷ ജയിച്ചിരുന്നു. മാതാവ്: ആയിഷ. സഹോദരങ്ങള്‍: അക്ബര്‍, സാഹില്‍.

കായകൽപ് പുരസ്കാര നിറവിൽ വീണ്ടും കോട്ടപ്പറമ്പ് ആശുപത്രി

കോഴിക്കോട്: കായകൽപ് പുരസ്കാര നിറവിൽ വീണ്ടും കോട്ടപ്പറമ്പ് സ്ത്രീകളുടെയും കുട്ടികളുടെയും ആശുപത്രി. സ്ത്രീകളുടെയും കുട്ടികളുടടെയും ആശുപത്രി വിഭാഗത്തിൽ മലപ്പുറം നിലമ്പൂര്‍ ജില്ലാ ആശുപത്രി രണ്ടാംസ്ഥാനം (20 ലക്ഷം രൂപ) പങ്കിട്ടത്. 92 മാർക്കാണ് നേടിയത്. മാസം 300മുതൽ 350വരെ ജില്ലയിൽ ഏറ്റവും കൂടുതൽ പ്രസവം നടക്കുന്ന ആശുപത്രികളിലൊന്നാണിത്. വിക്ടോറിയ രാജ്ഞിയുടെ സ്മരണയ്ക്കായി ആരംഭിച്ച മലബാറിലെ ആദ്യത്തെ എൻഎബിഎച്ച് അക്രഡിറ്റഡ് ആശുപത്രിയും കോട്ടപ്പറമ്പാണ്. നഗരത്തിന്‍റെ ഹൃദയഭാഗത്ത് 3.12 ഏക്കറിൽ അതിമനോഹരമായ പൂന്തോട്ടങ്ങൾക്കിടയിലുള്ള ആശുപത്രി രോഗികൾക്ക്‌ ആശ്വാസമാണ്. 345 കിടക്കകളുണ്ട്‌. സംസ്ഥാന മലിനീകരണ നിയന്ത്രണ ബോർഡിന്‍റെ പുരസ്കാരങ്ങൾ, എൻഎബിഎച്ച് അക്രഡിറ്റേഷൻ, ലക്ഷ്യ, എൻക്യുഎഎസ്, മികച്ച ബ്ലഡ് ബാങ്കിനുള്ളവ തുടങ്ങി നിരവധി അംഗീകാരങ്ങൾ ഇതിനകം ആശുപത്രിയെ തേടിയെത്തി. 2022ൽ സ്ഥാപിച്ച വന്ധ്യതാനിവാരണ ക്ലിനിക്കിലെ ചികിത്സയിലൂടെ നാൽപ്പതോളം സ്ത്രീകളാണ് പ്രസവിച്ചത്. സംസ്ഥാനത്താകെ അഞ്ച് സർക്കാർ ആശുപത്രികളിലാണ് ക്ലിനിക്കുള്ളത്. ലെവൽ രണ്ടിലേക്ക് ക്ലിനിക്കിനെ ഉയർത്താനുള്ള നടപടി പുരോഗമിക്കയാണ്. അമ്മയുടെ പാൽ ശേഖരിച്ചുവച്ച് കുഞ്ഞിന് നൽകുന്ന ലാക്ടേഷൻ മാനേജ്മെന്‍റ് യൂണിറ്റും ഇവിടെയുണ്ട്. പ്രസവത്തോടനുബന്ധിച്ച് സൗജന്യ യാത്രാസൗകര്യവുമുണ്ട്. ഹോർമോൺ അനലൈസർ ഉൾപ്പെടെ നൂതന ഉപകരണങ്ങളും ലഭ്യമാണ്. സ്ത്രീകളുടെ വിഭാഗത്തിൽ എട്ടും കുട്ടികളുടെ വിഭാഗത്തിൽ നാലും ഡോക്ടർമാരാണുള്ളത്. ദിവസേന കാൻസർ സ്‌ക്രീനിംഗും നടക്കുന്നു. ശുചിത്വം, മാലിന്യ പരിപാലനം, അണുബാധാ നിയന്ത്രണം എന്നിവ വിലയിരുത്തി പ്രോത്സാഹിപ്പിക്കുന്നതിനായാണ് കായകൽപ് പുരസ്കാരം നൽകുന്നത്.

മലബാർ റിവർ ഫെസ്റ്റിവൽ : കൃഷിവൈവിധ്യങ്ങളെ ചേർത്തുപിടിച്ച് കാർഷിക ടൂറിസം സർക്യൂട്ട് യാത്ര

കോടഞ്ചേരി: 11-ാം മലബാർ റിവർ ഫെസ്റ്റിവൽ രാജ്യാന്തര വൈറ്റ് വാട്ടർ കയാക്കിംഗ് ചാമ്പ്യൻഷിപ്പിന്‍റെ പ്രീ ഇവന്‍റുകളുടെ ഭാഗമായി പഞ്ചായത്തും തിരുവമ്പാടി കലാ-സാംസ്കാരിക സമിതിയും ഇരവഞ്ഞിവാലി ടൂറിസം ഫാർമർ ഇന്‍ററസ്റ്റ് ഗ്രൂപ്പും ചേർന്ന് തിരുവമ്പാടി ഫാം ടൂറിസം സർക്യൂട്ടിലേക്ക്‌ ഏകദിന യാത്ര സംഘടിപ്പിച്ചത്. പെരുമാലിപ്പടിയിൽ പ്ലാത്തോട്ടത്തിൽ ജയ്സന്‍റെ ഉടമസ്ഥതയിലുള്ള ലെയ്ക് വ്യൂ ഫാം സ്റ്റേയിൽ നിന്നാരംഭിച്ച യാത്ര പഞ്ചായത്ത് പ്രസിഡന്‍റ് ബിന്ദു ജോൺസൺ ഫ്ലാഗ് ഓഫ്‌ ചെയ്തു. കൃഷിയെ കലയുമായി ബന്ധിപ്പിക്കുന്നതിന്‍റെ ഉദാഹരണമായ മുട്ടത്തുകുന്നേൽ ബോണിയുടെ ഗ്രെയ്സ് ഗാർഡൻ, മൂന്ന് തവണ സംസ്ഥാന അവാർഡ് നേടിയ കൈതക്കുളം സെലിൻ വിൽസന്‍റെ മലബാർ എഗർ ഫാം, പുരയിടത്തിൽ ജോസിന്‍റെ ആടുവളർത്തൽ ഫാം, കർഷകശ്രീ ജേതാവായ സാബു തറക്കുന്നേലിന്‍റെ തറക്കുന്നേൽ ഗാർഡൻസ്, കേരകേസരി, കർഷകോത്തമ ജേതാവ് ഡൊമിനിക് മണ്ണുക്കുശുമ്പിലിന്‍റെ സമ്മിശ്ര കൃഷിയിടമായ കാർമൽ അഗ്രോ ഫാം, ദേവസ്യ മുളക്കലിന്‍റെ ഗ്രീൻ ഫാം വില്ലാസ് എന്നിവിടങ്ങളിലൂടെയായിരുന്നു യാത്ര. ഓരോ കൃഷിയിടത്തെയും ഓരോ ടൂറിസം കേന്ദ്രങ്ങളാക്കി മാറ്റുക വഴി കർഷകരുടെയും നാടിന്‍റെ പൊതുവായുമുള്ള വരുമാന വർധന ലക്ഷ്യമിട്ടാണ് ജില്ലാ പഞ്ചായത്തിന്‍റെ നേതൃത്വത്തിലുള്ള കാഫ്റ്റ് സൊസൈറ്റിയുടെ കീഴിൽ നടത്തി വരുന്ന ഫാം ടൂറിസം പദ്ധതി. ഇതിന്‍റെ ഏറ്റവും ജനകീയവും ആകർഷകവുമായ പതിപ്പാണ് ഇപ്പോൾ തിരുവമ്പാടി പഞ്ചായത്തിൽ നടപ്പാക്കി വരുന്നത്. കാഴ്ചയുടെ മനോഹാരിതക്കും മാനസിക ഉല്ലാസത്തിനുമൊപ്പം കൃഷി സംബന്ധമായ ആധികാരിക പഠനവും ഈ യാത്രയിലൂടെ സാധ്യമാകുന്നു. തെങ്ങ്, ജാതി, സമ്മിശ്ര കൃഷികൾ, അലങ്കാര ചെടികൾ, മത്സ്യ കൃഷി, അലങ്കാര മത്സ്യകൃഷി, ആട് കൃഷി തുടങ്ങി വിവിധ കാർഷിക ഫാമുകളിലേക്കാണ് സന്ദർശനം ഒരുക്കുന്നത്. കാർഷികവൃത്തി നടത്തുന്നതിനൊപ്പം കൃഷിയിടത്തെ എങ്ങനെ ടൂറിസം കേന്ദ്രമാക്കി മാറ്റാം എന്നതിന്‍റെ മികച്ച ഉദാഹരണമായി മാറിക്കൊണ്ടിരിക്കുകയാണ് തിരുവമ്പാടി ഫാം ടൂറിസം സർക്യൂട്ട് ഫാമുകൾ. കേരളത്തിന്‍റെ വിവിധ ഭാഗങ്ങളിൽനിന്നും കേരളത്തിന് പുറത്ത് നിന്നും ധാരാളം ആളുകൾ ഇവിടെ സന്ദർശനത്തിനായി എത്തുന്നുണ്ട്. പരിപാടിക്ക്‌ വാർഡ് മെമ്പർമാരായ ലിസി മാളിയേക്കൽ, അപ്പു കോട്ടയിൽ, ലിസി സണ്ണി, ഷൈനി ബെന്നി, ഫെഡറൽ ബാങ്ക് മാനേജർ രഞ്ജിത്ത്, കാവാലം ജോർജ്, അജു എമ്മാനുവൽ തുടങ്ങിയവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]