ADVERTISEMENT

ADVERTISEMENT

ദീപിക നമ്മുടെ ഭാഷാ പദ്ധതി

കട്ടിപ്പാറ: കട്ടിപ്പാറ ഹോളി ഫാമിലി ഹൈസ്കൂളിൽ ദീപിക നമ്മുടെ ഭാഷാ പദ്ധതിയുടെ ഉദ്ഘാടനം സ്കൂൾ മാനേജർ ഫാ. മിൽട്ടൺ മുളങ്ങാശേരി സ്കൂൾ ലീഡർ പർവീൺ മഹ്സൂദയ്ക്ക് ദീപിക പത്രം നൽകി നിർവഹിച്ചു.

പിടിഎ പ്രസിഡന്‍റ് ജോഷി മണിമല, ഹെഡ്മിസ്ട്രസ് കെ.യു. ബെസി, രവീന്ദ്രൻ തളീക്കര, ലിഷ തെരേസ് തോമസ്, സി.ജെ. ഷിനോജ്, കെ.എം. സിനി എന്നിവർ പ്രസംഗിച്ചു.

ADVERTISEMENT

ഉന്നത വിജയികളെ ആദരിച്ചു

തിരുവമ്പാടി: ഓയിസ്ക തിരുവമ്പാടി ചാപ്റ്ററിന്‍റെ ആഭിമുഖ്യത്തിൽ എസ്എസ്എൽസി പരീക്ഷയിൽ ഉന്നത വിജയം കരസ്ഥമാക്കിയ പുന്നക്കൽ ഒളിക്കൽ ഉന്നതിയിലെ നാലു വിദ്യാർഥികളെയും അവരുടെ ട്യൂഷൻ ടീച്ചറെയും ആദരിച്ചു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ പരിപാടി ഉദ്ഘാടനം ചെയ്തു. ഓയിസ്ക തിരുവമ്പാടി ചാപ്റ്റർ പ്രസിഡന്‍റ് റോബർട്ട് നെല്ലിക്ക തെരുവിൽ അധ്യക്ഷത വഹിച്ചു. സണ്ണി തോമസ്, പഞ്ചായത്ത് മെമ്പർമാരായ ഷൈനി ബെന്നി, ലിസി സണ്ണി, ട്യൂഷന് വേണ്ട സാമ്പത്തിക സഹായം ചെയ്ത സൗപർണിക ക്ലബ് ഭാരവാഹി സജി, ഓയിസ്ക മെമ്പർ ലിബീഷ് പുരിയിടം എന്നിവർ പ്രസംഗിച്ചു.

പോക്സോ കേസിൽ പിടിയിൽ

കോഴിക്കോട് : വിദ്യാര്‍ഥിനിക്കെതിരേ ലൈംഗിക പ്രദർശനം നടത്തിയ 19 കാരൻ പിടിയിൽ.ഒളവണ്ണ മാത്തറ സ്വദേശി പുൽപറമ്പിൽ വീട്ടിൽ അബിൻ ചന്ദ് കൃഷ്ണനെയാണ് പന്തീരാങ്കാവ് പോലീസ് പോക്സോ നിയമപ്രകാരം അറസ്റ്റ് ചെയ്തത്. മെയ് 28 ന് 11 വയസ് പ്രായമുള്ള വിദ്യാര്‍ഥിയുടെ വീട്ടിലേക്ക് പ്രതി അതിക്രമിച്ച് കയറി ലൈംഗിക പ്രദർശനം നടത്തുകയായിരുന്നു. അറസ്റ്റ് രേഖപ്പെടുത്തിയ ശേഷം കോടതിയിൽ ഹാജരാക്കി.

കർഷക സഭയും ഞാറ്റുവേല ചന്തയും പച്ചക്കറിത്തൈ വിതരണവും

താമരശേരി: ഓമശേരി പഞ്ചായത്തിന്‍റെ നേതൃത്വത്തിൽ ഓമശ്ശേരിയിൽ കർഷക സഭയും ഞാറ്റുവേല ചന്തയും സംഘടിപ്പിച്ചു. കാർഷിക വികസന സമിതി അംഗങ്ങളുൾപ്പടെ നൂറിലധികം കർഷകർ പഞ്ചായത്തിലെ വിവിധ വാർഡുകളിൽ നിന്നായി കർഷക സഭയിൽ പങ്കെടുത്തു. കർഷക സഭാംഗങ്ങൾക്ക്‌ ഞാറ്റു വേല ചന്തയുടെ ഭാഗമായി അഞ്ചിനം ഗുണമേന്മയുള്ള പച്ചക്കറിത്തൈകൾ സൗജന്യമായി വിതരണവും ചെയ്തു. മുളക്‌,വഴുതന,തക്കാളി,വെണ്ട,പയർ തുടങ്ങിയവയുടെ തൈകളാണ്‌ കർഷകർക്ക്‌ നൽകിയത്‌.പഞ്ചായത്ത്‌ പ്രസിഡന്‍റ് കെ.കരുണാകരൻ ഉദ്ഘാടനം ചെയ്തു.വൈസ്‌ പ്രസിഡന്‍റ് ഫാത്വിമ അബു അദ്ധ്യക്ഷത വഹിച്ചു..

പൂപ്പൊലി 2025 ഉദ്ഘാടനം ചെയ്തു

ആനക്കാംപൊയിൽ: ആനക്കാംപൊയിൽ സെന്‍റ് മേരീസ് യുപി സ്കൂളിൽ പൂപ്പൊലി 2025 ചെണ്ടുമല്ലി കൃഷി സ്കൂൾ അങ്കണത്തിൽ മാനേജർ ഫാ. അഗസ്റ്റിൻ പാട്ടാനിയിൽ ഉദ്ഘാടനം ചെയ്തു. പിടിഎ പ്രസിഡന്‍റ് വി.ജെ. ഫ്രിജിൽ അധ്യക്ഷനായി. തിരുവമ്പാടി റോട്ടറി ക്ലബ്ബിന്‍റെ സഹായത്തോടെയാണ് ചെണ്ടുമല്ലി കൃഷി നടത്തുന്നത്. ചടങ്ങിൽ ഹെഡ്മാസ്റ്റർ റോയി ജോസ്, റോട്ടറി ക്ലബ് ഭാരവാഹികളായ ഡോ. ബെസ്റ്റി ജോസ്, ഡോ. സന്തോഷ് സ്കറിയ, പി.ഹാരിസ് , എൽദോസ് ബേസിൽ, തങ്കച്ചൻ ചേന്നമ്പള്ളി അധ്യാപകരായ എബി ദേവസ്യ, ആലീസ് വി തോമസ്, എൻ.ജെ. ദീപ , ശിവനന്ദ ബിബിൻ, ഹവ്വ സൈനബ് എന്നിവർ പ്രസംഗിച്ചു.

വായന മനുഷ്യനെ നന്മയിലേക്ക് നയിക്കണം: എം.എൻ. കാരശേരി

മുക്കം: വായന മനുഷ്യനെ നന്മയിലേക്ക് നയിക്കണമെന്നും എല്ലാം വായിക്കുന്നതിനു പകരം തെരഞ്ഞെടുത്ത് വായിക്കുന്നതാണ് ഗുണകരമാവുകയെന്ന് എഴുത്തുകാരൻ എം.എൻ. കാരശേരി പറഞ്ഞു. സമൂഹ തിന്മക്കെതിരേ പ്രതികരിക്കുന്നവരാവണം എഴുത്തുകാർ. ഒഴുക്കിനെതിരേ നീന്താനാണ് സമൂഹം ആവശ്യപ്പെടുന്നത്. തിന്മ വർധിക്കുമ്പോൾ നന്മയെ കണ്ടെത്താനും അവ പ്രചരിപ്പിക്കാനും എഴുത്തുകാർ സമയം കണ്ടെത്തണമെന്നും അദ്ദേഹം അഭിപ്രായപ്പെട്ടു. കാരശേരിയുടെ എഴുപത്തിയഞ്ചാം ജന്മദിനത്തോടനുബന്ധിച്ച് കാരശേരി ബാങ്ക് സംഘടിപ്പിച്ച ആദരം ചടങ്ങിൽ പ്രസംഗിക്കുകയായിരുന്നു അദ്ദേഹം. ബാങ്ക് ഡയറക്ടർ ഗസീബ് ചാലൂളി അധ്യക്ഷത വഹിച്ചു. കാഞ്ചനമാല മുഖ്യ പ്രഭാഷണം നടത്തി. സി.കെ. കാസിം, സിറാജുദ്ദീൻ, എ.വി. സുധാകരൻ, മുക്കം വിജയൻ, മുക്കം ബാലകൃഷ്ണൻ, റീനപ്രകാശ്, ഡെന്നി ആന്‍റണി, കണ്ടൻ പട്ടർച്ചോല, കാരശേരി ബാങ്ക് ഡയറക്ടർമാരായ വിനോദ് പുത്രശേരി, കാരാട്ട് കൃഷ്ണൻകുട്ടി, റോസമ്മ ബാബു, അലവിക്കുട്ടി പറമ്പാടൻ എന്നിവർ പ്രസംഗിച്ചു.

ഐഐഎസ്ആര്‍ ഗോള്‍ഡന്‍ ജൂബിലി ആഘോഷങ്ങള്‍ക്ക് സമാപനം

കോഴിക്കോട്: സുഗന്ധവ്യഞ്ജന ഗവേഷണ മേഖലയില്‍ അമ്പതുവര്‍ഷം പൂര്‍ത്തീകരിച്ച് ഐസിഎആര്‍ ഭാരതീയ സുഗന്ധവിള ഗവേഷണ സ്ഥാപനം.ഒരുവര്‍ഷം നീണ്ട സുവര്‍ണജൂബിലി ആഘോഷങ്ങള്‍ക്ക് ഐഐഎസ്ആറിലെ മുന്‍ ജീവനക്കാരെ ആദരിച്ചുകൊണ്ടായിരുന്നു സമാപനം.കേരള കാര്‍ഷിക സര്‍വകലാശാല വൈസ് ചാന്‍സലര്‍ ഡോ. ബി. അശോക് മുഖ്യാതിഥയായിരുന്നു. ഡെപ്യൂട്ടി ഡയറക്ടര്‍ ജനറല്‍ ഡോ. സഞ്ജയ് കുമാര്‍ സിംഗ് അധ്യക്ഷത വഹിച്ചു. കാലിക്കറ്റ് സര്‍വകലാശാല വൈസ് ചാന്‍സലര്‍ പ്രഫ. പി.രവീന്ദ്രന്‍, ഐസിഎആര്‍ അസിസ്റ്റന്റ് ഡയറക്ടര്‍ ജനറല്‍ ഡോ. സുധാകര്‍ പാണ്ഡെ എന്നിവര്‍ വിശിഷ്ടാതിഥികളായി. പുതിയതായി സ്ഥാപിച്ച അഡ്വാന്‍സ്ഡ് ബയോകണ്‍ട്രോള്‍ ലബോറട്ടറിയുടെ ഉദ്ഘാടനം, സുവര്‍ണ ജൂബിലി ഹാളിന്റെ ശിലാസ്ഥാപനം എന്നിവ ഡോ. അശോക് നിര്‍വഹിച്ചു. ഐഐഎസ്ആര്‍ ഡയറക്ടര്‍ ഡോ. ആര്‍ ദിനേശ്, ഡോ. ബാലചന്ദ്ര ഹെബ്ബാര്‍ , ഡോ. ജി. ബൈജു,ഡോ. ഹോമി ചേറിയാന്‍, ഡോ. മനോജ് പി. സാമുവല്‍, രാംകുമാര്‍ മേനോന്‍ , ഡോ. വി.എ. പാര്‍ത്തസാരഥി, ഡോ. കെ. നിര്‍മല്‍ ബാബു എന്നിവര്‍ പ്രസംഗിച്ചു.

കൊടിയത്തൂരിൽ ഞാറ്റുവേല ചന്തയും കർഷക സഭയും ആരംഭിച്ചു

മുക്കം: തിരുവാതിര ഞാറ്റുവേലയോടനുബന്ധിച്ച് കൊടിയത്തൂരിൽ ഞാറ്റുവേല ചന്തയും കർഷക സഭയും ആരംഭിച്ചു. കൃഷിഭവന്‍റെ ആഭിമുഖ്യത്തിലാണ് ചന്തയാരംഭിച്ചത്. കാർഷിക വിളകൾ നടുന്നതിനും വിത്ത് പാകുന്നതിനും തിരുവാതിര ഞാറ്റുവേല കാലയളവ് വളരെ ഉത്തമമാണെന്ന് കരുതപ്പെടുന്നു. ഈ സമയത്ത് കർഷകർക്ക് നടീൽ വസ്ത്തുക്കൾ ലഭ്യമാക്കുക എന്ന ലക്ഷ്യത്തോടെയാണ് ഞാറ്റുവേല ചന്തകൾ സംഘടിപ്പിക്കുന്നത്. മികച്ചയിനം ഫലവൃക്ഷ തൈകൾ, നടീൽ വസ്തുക്കൾ, തെങ്ങിൻ തൈകൾ, പച്ചക്കറിതൈകൾ എന്നിവ മിതമായ നിരക്കിൽ ചന്തയിൽ ലഭിക്കും. ഞാറ്റുവേല ചന്ത പഞ്ചായത്ത്‌ പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർമാൻമാരായ ബാബു പൊലുകുന്ന്, ആയിഷ ചേലപ്പുറത്ത്, മറിയം കുട്ടി ഹസൻ, പഞ്ചായത്ത് അംഗങ്ങളായ വി. ഷംലൂലത്ത്, ഫാത്തിമ നാസർ, കൃഷി അസിസ്റ്റന്‍റുമാരായ കെ. നിഷ, എം.എസ്. നഷിദ, എ.പി. ബീന, എഡിസി അംഗങ്ങൾ തുടങ്ങിയവർ പങ്കെടുത്തു.

കക്കയം ഡാം റോഡിൽ മരം വീണ് ഗതാഗതം തടസപ്പെട്ടു

കൂരാച്ചുണ്ട്: കക്കയം ഡാം സൈറ്റ് റോഡിൽ ശക്തമായ കാറ്റിലും മഴയിലും മരം വീണ് ഗതാഗതം തടസപ്പെട്ടു. ഇന്നലെ രാവിലെ പതിനൊന്നോടുകൂടി കക്കയം ഒന്നാം പാലത്തിന് സമീപമാണ് മരം വീണത്. ഇതേ തുടർന്ന് രണ്ട് മണിക്കൂറോളം ഗതാഗതം തടസപ്പെട്ടു. ഡാം സൈറ്റിലുള്ള കെഎസ്ഇബി ഉദ്യോഗസ്ഥർ, വനം വകുപ്പ് ഉദ്യോഗസ്ഥർ, പ്രദേശവാസികൾ എന്നിവരുടെയും വിനോദ സഞ്ചാരികളുടെയും വാഹനങ്ങൾ കുടുങ്ങി. തുടർന്ന് കക്കയം ഫോറസ്റ്റ് ഡെപ്യൂട്ടി റേഞ്ച് ഓഫീസർ സി. വിജിത്തിന്‍റെ നേതൃത്വത്തിൽ വനംവകുപ്പിന്‍റെ റാപ്പിഡ് റെസ്പോൺസ് ടീം അംഗങ്ങളും നാട്ടുകാരും സ്ഥലത്തെത്തി മരം മുറിച്ചു നീക്കി ഗതാഗതം പുനസ്ഥാപിച്ചു. ഡാം സൈറ്റ് റോഡ് അരികിൽ ഇത്തരത്തിൽ നിലം പതിക്കാറായി നിൽക്കുന്ന നിരവധി മരങ്ങളുണ്ട്. ഇവയെല്ലാം യാത്രക്കാർക്ക് ഭീഷണിയായി തീർന്നിട്ടുണ്ട്.

കോഴിക്കോട് സെന്‍ട്രല്‍ ഫിഷ്മാര്‍ക്കറ്റ്: പഴയ കെട്ടിടം പൊളിക്കല്‍ ടെന്‍ഡര്‍ നടപടികളിലേക്ക്

കോഴിക്കോട്: കോഴിക്കോട് സെന്‍ട്രല്‍ മാര്‍ക്കറ്റില്‍ മത്സ്യകച്ചവടത്തിനായി നിര്‍മിക്കുന്ന ആധുനിക ഷോപ്പിങ് മാളിന്‍റെ പ്രവൃത്തി ഉടന്‍ ആരംഭിക്കും. പഴയ കെട്ടിടം പൊളിച്ചുമാറ്റാന്‍ ടെന്‍ഡര്‍ നടപടികളിലേക്ക് കടക്കാന്‍ ജില്ലാ കളക്ടര്‍ സ്‌നേഹില്‍ കുമാര്‍ സിങ്ങിന്‍റെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. കോഴിക്കോട് സെന്‍ട്രല്‍ ഫിഷ് മാര്‍ക്കറ്റ് നിര്‍മാണം, ചാലിയം ഫിഷിംഗ് വില്ലേജ് എന്നീ പദ്ധതികളുമായി ബന്ധപ്പെട്ടാണ് യോഗം ചേര്‍ന്നത്. 55.17 കോടി ചെലവിട്ടാണ് മാര്‍ക്കറ്റ് നിര്‍മിക്കുക. കോര്‍പറേഷന്‍ വാടകക്കെടുത്ത സ്ഥലത്തേക്ക് മത്സ്യകച്ചവടക്കാരെ പുനരധിവസിപ്പിച്ചുവരികയാണെന്നും കോര്‍പറേഷന്‍ കണ്ടെത്തി നല്‍കിയ സ്ഥലത്ത് താല്‍ക്കാലിക സംവിധാനം ഒരുക്കല്‍ നടപടികള്‍ പൂര്‍ത്തിയാകുന്നതായും അധികൃതര്‍ അറിയിച്ചു. 2.50 കോടി ചെലവില്‍ നിര്‍മിക്കുന്ന ഫിഷറീസ് ട്രെയിനിങ് സെന്‍റര്‍ കം റീഹാബിലിറ്റേഷന്‍ സെന്ററിനായി കടലുണ്ടി ഗ്രാമപഞ്ചായത്തില്‍ കണ്ടെത്തിയ 26 സെന്‍റ് ഭൂമിയുടെ കൈമാറ്റ നടപടികള്‍ പുരോഗമിക്കുകയാണ്. ചാലിയം ഫിഷ്‌ലാന്‍ഡിങ് സെന്‍റര്‍ സ്ഥാപിക്കുന്ന ഭൂമിക്ക് വനംവകുപ്പിന്‍റെ അനുമതി ലഭ്യമാക്കാന്‍ അപേക്ഷ സമര്‍പ്പിച്ചിട്ടുണ്ട്. നടപടികള്‍ വേഗത്തിലാക്കുമെന്ന് വനം വകുപ്പ് അധികൃതര്‍ യോഗത്തെ അറിയിച്ചു. 84 ലക്ഷം രൂപ ചെലവില്‍ നടപ്പാക്കുന്ന ഫിഷ് വെന്‍റിങ് കം ഫുഡ് ട്രക്ക് പദ്ധതി ഉടന്‍ യാഥാര്‍ഥ്യമാകും. മത്സ്യത്തൊഴിലാളികള്‍ക്ക് ഗുണമേന്മയുള്ള മത്സ്യം ഇടനിലക്കാരില്ലാതെ വിപണിയില്‍ എത്തിക്കാന്‍ ഇതിലൂടെ സാധിക്കും.

വുഷു ചാമ്പ്യന്മാര്‍ക്ക് പുതിയ കരുത്ത്

കോഴിക്കോട്: ഇടിക്കൂട്ടില്‍ പുതിയ പോരാളികളെ വാര്‍ത്തെടുക്കാന്‍ പുതിയ വുഷു പ്ലാറ്റ്‌ഫോം ഒരുക്കി കുന്നമംഗലം ആര്‍ട്‌സ് ആന്‍ഡ് സയന്‍സ് കോളേജ്. അന്താരാഷ്ട്ര നിലവാരത്തില്‍ കേരളത്തിലെ തന്നെ ഏറ്റവും മികച്ച പ്ലാറ്റ്‌ഫോമാണ് ഇവിടെ ഒരുക്കിയിരിക്കുന്നത്. പരമ്പരാഗതമായ ചൈനീസ് ആയോധന കലയായ വുഷുവില്‍ നിലവില്‍ കാലിക്കറ്റ് യൂണിവേഴ്‌സിറ്റി ചാമ്പ്യന്മാരാണ് കുന്നമംഗലം കോളേജ്. മികച്ച നിലവാരത്തിലുള്ള വുഷു പ്ലാറ്റ്‌ഫോം ഒരുങ്ങിയതിലൂടെ ഈ രംഗത്ത് ജില്ലയ്ക്ക് കൂടുതല്‍ നേട്ടങ്ങള്‍ കൊയ്യാന്‍ സാധിക്കുമെന്നാണ് പ്രതീക്ഷ. പരിമിതമായ സൗകര്യങ്ങളില്‍ നിന്നുകൊണ്ട് സാധാരണ വുഷു മാറ്റ് ഉപയോഗിച്ചാണ് ഇതുവരെ കോളേജില്‍ പരിശീലനം നല്‍കിവന്നത്. ഇതില്‍ 20 പേര്‍ ദേശീയതല മത്സരങ്ങളില്‍ പങ്കെടുക്കുകയും അഞ്ച് പേര്‍ മെഡലുകള്‍ നേടുകയും ചെയ്തിട്ടുണ്ട്. മൂന്ന് യുജി കോഴ്‌സും ഒരു പിജി കോഴ്‌സും മാത്രമായി 2014 ല്‍ ആരംഭിച്ച കോളജ് 2020 മുതല്‍ തുടര്‍ച്ചയായി മൂന്ന് വര്‍ഷം വൂഷുവില്‍ യൂണിവേഴ്‌സിറ്റി ചാമ്പ്യന്മാരുമായിരുന്നു.

ഹൗസ് സര്‍ജന്‍മാരെ കാത്ത് കോഴിക്കോട് ഗവ. മെഡിക്കല്‍ കോളജ്

മെഡിക്കല്‍ കോളജില്‍ ഹൗസ് സര്‍ജന്‍മാരുടെ കുറവ് പ്രതിസന്ധിയാവുന്നു കോഴിക്കോട്: കോഴിക്കോട് ഗവ. മെഡിക്കല്‍ കോളജില്‍ ഹൗസ് സര്‍ജന്‍മാരുടെ കുറവ് പ്രതിസന്ധി സൃഷ്ടിക്കുന്നു.ഹൗസ് സർജൻമാർ പ്രധാനമായും ഡ്യൂട്ടി ചെയ്യുന്ന അത്യാഹിത വിഭാഗത്തിലാണ് പ്രതിസന്ധി രൂക്ഷം. ഹൗസ് സർജൻസി പൂർത്തിയാക്കിയ 242 ഡോക്ടർമാരാണ് കഴിഞ്ഞ ആഴ്ച സേവന കാലയളവ് പൂര്‍ത്തിയാക്കി ഇറങ്ങിയത്. അത്യാഹിത വിഭാഗത്തിൽ ഒരേസമയം പതിനഞ്ചോളം ഡോക്ടർമാർ കുറഞ്ഞതോടെ രോഗികളാണ് ദുരിതത്തിലായത്. രോഗികളിൽ നിന്നു വിവരം തിരക്കിയശേഷം എല്ലുരോഗ, സർജറി, മെഡിസിൻ തുടങ്ങി ആവശ്യമായ വിഭാഗങ്ങളിലേക്ക് വിടുന്നത് നഴ്‌സുമാരാണ്. മുൻപ് ഡോക്ടർമാർ രോഗനിർണയം നടത്തിയാണ് ഇതു ചെയ്തിരുന്നത്. അടുത്ത ബാച്ചിലെ ജയിച്ചു വരുന്നവരുടെ എണ്ണത്തിന് അനുസരിച്ചാണ് ഹൗസ് സർജൻസി കഴിഞ്ഞ ഡോക്ടർമാരെ മൂന്ന് മാസത്തേക്ക് പ്രതിമാസം 45,000 രൂപ നൽകി സർക്കാർ നിയമിക്കുന്നത്. 125 പേരെ വരെ നിയമിക്കാനാണ് സർക്കാർ അനുവാദം നൽകിയത്. ഇവർക്ക് മാസം നൽകുന്ന തുക വർധിപ്പിക്കണമെന്ന ആവശ്യവും ശക്തമാണ്. അടുത്ത ബാച്ച് വരാന്‍ മൂന്നുമാസം കഴിയും. പ്രവേശന പരീക്ഷയിലെ കാലതാമസം, കോഴ്‌സ് തുടങ്ങാൻ വൈകിയത്, എംബിബിഎസ് പരീക്ഷ വൈകിയത്, ഫലം വരാൻ വൈകിയത് തുടങ്ങിയവ പ്രതിസന്ധി സൃഷ്ടിക്കുന്നുണ്ട്. അടുത്ത ബാച്ച് ഡ്യൂട്ടിയിൽ പ്രവേശിക്കാൻമൂന്നുമാസംവരെ താമസിക്കുന്ന സ്ഥിതിയാണ്. ആ കാലത്തേക്ക് സാധാരണ ഹൗസ് സർജൻസി കഴിഞ്ഞവരെയാണ് നിയോഗിക്കുന്നത്.എന്നാൽ ഈ സേവനം നിർബന്ധം അല്ലാത്തതിനാൽ ആളെ കിട്ടാൻ പ്രയാസമാണ്. ഇത്തവണ ഇതുവരെ 28 പേരാണ് റജിസ്റ്റർ ചെയ്തത്. ജോലിയുടെ സേവന താൽപര്യം കൂടി കണക്കിലെടുത്ത് കൂടുതൽ പേർ തയാറാകുമെന്ന പ്രതീക്ഷയാണ് ആശുപത്രി അധികൃതര്‍ പങ്കുവയ്ക്കുന്നത്.

നിവേദനം നല്‍കി

കോഴിക്കോട്: കോഴിക്കോട് ബീച്ച് ഫയർ സ്റ്റേഷൻ പണിതീരുന്നത് വരെ താത്കാലിക സ്റ്റേഷൻ ആരംഭിക്കണമെന്നും റോഡപകടങ്ങളും വാഹന തീപിടിത്തങ്ങളും ദേശീയ പാത 66 - ൽ വർധിച്ച സാഹചര്യത്തില്‍ അടിയന്തര രക്ഷാപ്രവർത്തനങ്ങൾക്ക് അണ്ടർപാസിലെ സ്ഥാലസൗകര്യം ഉപയോഗപ്പെടുത്തണമെന്നും മലബാർ ഡവലപ്മെന്‍റ് കൗൺസിൽ, കൺസ്യൂമർ ഗുഡ്സ് ഡിസ്ട്രിബ്യൂട്ടേഴ്സ് അസോസിയേഷൻ സംഘടനാ ഭാരവാഹികള്‍ ആവശ്യപ്പെട്ടു. നിശ്ചിത അകലം പാലിച്ച് ഫയർ യൂണിറ്റുകൾ സ്ഥാപിക്കുക, ഉയരം കൂടിയ കെട്ടിടങ്ങളിലെ തീ അണക്കുന്നതിന് പ്രധാന നഗരങ്ങളിൽ അഗ്നിശമന സേനയ്ക്ക് സ്കൈ ലിഫ്റ്റ് നൽകുക, തുടങ്ങിയ ആവശ്യങ്ങളും ഉന്നയിച്ചു. ആവശ്യങ്ങൾ ഉൾപെടുത്തി തയാറാക്കിയ നിവേദനം ഫയർ ആന്‍ഡ് റസ്‌ക്യൂ ഡയറക്ടർ യോഗേഷ് ഗുപ്തയ്ക്ക് കൈമാറി.

കപ്പൽച്ചാൽ : ബേപ്പൂർ തുറമുഖത്തെ ആഴംകൂട്ടൽ ഫെബ്രുവരിയിൽ തീരും

കോഴിക്കോട്: തുറമുഖത്തെ കപ്പൽച്ചാൽ ആഴം കൂട്ടുന്ന പ്രവൃത്തി 2026 ഫെബ്രുവരിയോടെ പൂർത്തിയാക്കാൻ ധാരണ. മുഖ്യമന്ത്രി പിണറായി വിജയന്‍റെ അധ്യക്ഷതയിൽ കണ്ണൂരിൽ ചേർന്ന മേഖലാതല അവലോകന യോഗത്തിലാണു തീരുമാനം. കപ്പൽച്ചാൽ ഡ്രഡ്ജിംഗ് നടത്തുന്നതിനു നേരത്തേ 11.80 കോടി രൂപയുടെ ഭരണാനുമതി ലഭിക്കുകയും സർക്കാർ ഫണ്ട് അനുവദിക്കുകയും ചെയ്തിരുന്നു. എന്നാൽ പ്രവൃത്തി ആരംഭിച്ചപ്പോൾ അടിത്തട്ടിൽ പാറയുടെ സാന്നിധ്യം കാരണം ഡ്രഡ്ജിംഗ് പൂർത്തിയാക്കാനായില്ല. മാരിടൈം ബോർഡ് നടത്തിയ പഠന റിപ്പോർട്ട് പ്രകാരം ചെങ്കൽ പാറകൾ നീക്കി കപ്പൽച്ചാൽ ആഴം കൂട്ടാൻ ഹാർബർ എന്‍ജിനിയറിംഗ് വകുപ്പ് 82.80 കോടിയുടെ എസ്റ്റിമേറ്റ് തയാറാക്കി ധനവകുപ്പിന് സമർപ്പിച്ചിട്ടുണ്ട്. സാഗർമാല പദ്ധതിയിൽ ഉൾപ്പെടുത്തുന്നതിനു ശുപാർശയും സമർപ്പിച്ചതായി തുറമുഖ വകുപ്പ് അധികൃതർ അറിയിച്ചു.ഇതോടൊപ്പം കോഴിക്കോട് ഭട്ട് റോഡ് ബീച്ചില്‍ പുലിമുട്ടുകള്‍ നിര്‍മിക്കാന്‍ ഏഴ് കോടിയുടെ പുതുക്കിയ എസ്റ്റിമേറ്റ് സമര്‍പ്പിച്ചു. ഫണ്ട് ലഭ്യമായാലുടന്‍ പ്രവൃത്തി തുടങ്ങുമെന്ന് ജലവിഭവ വകുപ്പ് അറിയിച്ചു. പദ്ധതിക്ക് മൂന്ന് കോടിയുടെ ഭരണാനുമതി ലഭിച്ചിരുന്നു.

ഓൺലൈൻ തട്ടിപ്പ്: റിട്ട. അധ്യാപകന് നഷ്ടമായത് 7.14 ലക്ഷം

നാദാപുരം: ഇരട്ടിയിലധികം പണംലാഭം തരാമെന്ന് വിശ്വസിപ്പിച്ച് റിട്ട. അധ്യാപകന്‍റെ ഏഴ് ലക്ഷത്തിൽ പരം രൂപ തട്ടി എടുത്തതായി പരാതി വളയം പോലീസ് കേസെടുത്തു. റിട്ട. അധ്യാപകൻ ചെക്യാട് വിപഞ്ചിക വീട്ടിൽ കെ. ശശിധരനാണ് പരാതിക്കാരൻ. 2025 ജനുവരി 24 മുതൽ ജൂൺ ആറ് വരെയുള്ള കാലയളവിൽ 714036 രൂപ എ.എസ്. സഞ്ജന എന്നയാൾ തട്ടിയെടുത്തതായാണ് പരാതി. ടാറ്റ പ്രോപ്പർട്ടി ഹൗസിംഗ് സൈറ്റ് പ്രോജക്ട് എന്ന സൈറ്റിൽ ലാഭം തരാമെന്ന് വിശ്വസിപ്പിച്ച് പണം നിക്ഷേപിപ്പിച്ച് മുതലും ലാഭവും തരാതെ വഞ്ചിച്ചെന്ന് പരാതിയിൽ പറയുന്നു.

സ്കൂട്ടറിൽനിന്ന് തെറിച്ച് വീണത് ജീപ്പിന് അടിയിലേക്ക് : യുവാവ് അദ്ഭുതകരമായി രക്ഷപ്പെട്ടു

നാദാപുരം: നിയന്ത്രണംവിട്ട സ്കൂട്ടർ മറ്റൊരു സ്കൂട്ടറിലിടിച്ച് മറിഞ്ഞു യാത്രക്കാരൻ തെറിച്ച്‌ വീണത് ഓടിക്കൊണ്ടിരുന്ന ഥാർ ജീപ്പിനടിയിൽ. യുവാവ് അദ്ഭുതകരമായി രക്ഷപ്പെട്ടു. കല്ലാച്ചി സ്വദേശി മബ്രൂക്ക് (20) ആണ് ഥാർ ജീപ്പിന്‍റെ ടയറിനുള്ളിൽനിന്ന് അദ്ഭുതകരമായി രക്ഷപ്പെട്ടത്. മുട്ടുങ്ങൽ നാദാപുരം സംസ്ഥാന പാതയിൽ എടച്ചേരി ടൗണിൽ ബുധനാഴ്ച്ച രാവിലെയാണ് അപകടം. വടകര ഭാഗത്തേക്ക് സഞ്ചരിക്കുന്നതിനിടയിൽ സ്കൂട്ടർ നിയന്ത്രണം വിട്ട് മറ്റൊരു സ്കൂട്ടറിൽ ഇടിക്കുകയും എതിർ ദിശയിൽ വരികയായിരുന്ന ഥാർ ജീപ്പിന്‍റെ ടയറിനുള്ളിലേക്ക് അകപ്പെടുകയുമായിരുന്നു. ജീപ്പ് ഡ്രൈവർ പെട്ടെന്ന് ബ്രെയ്ക്ക് ചെയ്തതിനാൽ യുവാവ് ഗുരുതര പരിക്കേൽക്കാതെ രക്ഷപ്പെട്ടു. ഓടിക്കൂടിയ നാട്ടുകാർ ഏറെ ശ്രമിച്ചാണ് ടയറിന് ഉള്ളിൽ നിന്ന് ഇയാളെ പുറത്തെടുത്തത്. യുവാവ് വടകരയിലെ സ്വകാര്യ ആശുപത്രിയിൽ ചികിത്സ തേടി.

എട്ടിന് സ്വകാര്യ ബസുകള്‍ സര്‍വിസ് നിര്‍ത്തിവയ്ക്കുന്നു

കോഴിക്കോട്: വിവിധ ആവശ്യങ്ങള്‍ ഉന്നയിച്ച് കോഴിക്കോട് ജില്ലയിലെ സ്വകാര്യ ബസുകള്‍ എട്ടിന് സര്‍വീസ് നിര്‍ത്തിവയ്ക്കും.സം‌സ്ഥാന വ്യാപക സമരത്തിന്‍റെ ഭാഗമാണ് പണിമുടക്ക്. ജൂലൈ 22 മുതല്‍ അനിശ്ചിത കാലത്തേക്കു സ്വകാര്യ ബസുകളുടെ സര്‍വീസ് നിര്‍ത്തിവയ്ക്കാനും ബസുടമ സംഘടനകളുടെ കൂട്ടാഴ്മയായ ബസുടമ സംയുക്ത സമിതി തീരുമാനിച്ചിട്ടുണ്ട്. ദീര്‍ഘകാലമായി സര്‍വീസ് നടത്തിക്കൊണ്ടിരിക്കുന്ന ലിമിറ്റഡ് സ്റ്റോപ്പ് ബസുകളുടെയും ദീര്‍ഘ ദൂര ബസുകളുടെയും പെര്‍മിറ്റുകള്‍ അതേപടി യഥാസമയം പുതുക്കി നല്‍കുക, അര്‍ഹതപ്പെട്ട വിദ്യാര്‍ഥികള്‍ക്ക് മാത്രം കണ്‍സഷന്‍ ലഭ്യമാക്കുക, വിദ്യാര്‍ഥികളുടെ യാത്ര നിരക്ക് കാലോ ചിതമായി വര്‍ധിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം. സമരം വിജയിപ്പിക്കാന്‍ ബസുടമകളുടെ യോഗം തീരുമാനിച്ചു. ജില്ലാ ജനറല്‍ സെക്രട്ടറി ടി.കെ.ബീരാന്‍കോയ, ചെയര്‍മാന്‍ കെ.ടി.വാസുദേവന്‍, രാധാകൃഷ്ണന്‍, ഇ.റിനിഷ്, എം.എസ്.സാജു,സി കെ.അബ്ദുറഹിമാന്‍,എന്‍.വി.അബ്ദുല്‍ സത്താര്‍,എം. തുളസീദാസ് തുടങ്ങിയവര്‍ പ്രസംഗിച്ചു.

അച്ഛനു സമര്‍പ്പണവുമായി ഗോപിനാഥ് മുതുകാട്; കോഴിക്കോട്ട് വീണ്ടും കോട്ടണിയുന്നു

കോഴിക്കോട്: ഇന്ദ്രജാല രംഗത്ത് അച്ഛന്‍റെ പ്രചോദനത്തിനു സ്‌നേഹാര്‍ദ്ര സമര്‍പ്പണവുമായി മാജിക്ക് ഷോ അവതരിപ്പിക്കാന്‍ മജീഷ്യന്‍ ഗോപിനാഥ് മുതുകാട്. അച്ഛന്‍റെ സ്മരണകളുണര്‍ത്തി ഓഗസ്റ്റ് ഒമ്പതിനു കോഴിക്കോട്ട് ‘ഇല്യൂഷന്‍ ടു ഇന്‍സ്പിരേഷന്‍' എന്ന പരിപാടിയുമായാണ് മുതുകാട് എത്തുന്നത്. ദീര്‍ഘകാലത്തെ ഇടവേളയ്ക്കുശേഷമാണ് അദ്ദേഹം മജീഷ്യന്‍റെ വേഷമണിയുന്നത്. മുതുകാടിനു കോഴിക്കോടുമായി ആത്മബന്ധമാണള്ളത്. അദ്ദേഹത്തിന്‍റെ അച്ഛന്‍ മരിച്ചത് കോഴിക്കോട്ടുവച്ചാണ്. മാജിക് ട്രൂപ്പ് ഉണ്ടാക്കിയപ്പോള്‍ 1987 ഫെബ്രുവരി 20ന് കോഴിക്കോട് ടാഗോര്‍ ഹാളിലാണ് ആദ്യ പരിപാടി അവതരിച്ചിച്ചത്. കടലുകാണാന്‍ മുതുകാടിനെ അച്ഛന്‍ കൂട്ടിക്കൊണ്ടുവന്നതും കോഴിക്കോട്ടേക്കാണ്. പത്താം വയസില്‍ ജാലവിദ്യയില്‍ േകന്ദ്രീകരിച്ച മുതുകാട് നിയമം പഠിക്കാനായി ബംഗളൂരുവില്‍ ചേര്‍ന്നെങ്കിലും മാജിക്കിനോടുള്ള അഭിനിവേശം കാരണം പഠനം പാതിവഴയില്‍ ഉപേക്ഷിക്കുകയായിരുന്നു. മകന്‍റെ താത്പര്യം മനസിലാക്കിയ പിതാവ്, ഏറ്റെടുത്ത കര്‍മപാതയില്‍നിന്ന് പിന്തിരിയരുതെന്ന് ഉപദേശിച്ച് മാജിക്കിന് പൂര്‍ണ പിന്തുണ നല്‍കിയിരുന്നു. ഈ പ്രോത്സാഹനം മുതുകാടിന്‍റെ 56 വര്‍ഷത്തെ മാജിക് ജീവിതത്തിനു വഴിയൊരുക്കി. അച്ഛനോടുള്ള കടപ്പാട് വെളിപ്പെടുത്തുന്നതായിരിക്കും മാജിക് ഷോയെന്ന് മുതുകാട് വാര്‍ത്താസമ്മേളനത്തില്‍ പറഞ്ഞു. പ്രൊവിഡന്‍സ് കോളജ് ഓഡിറ്റോറിയത്തില്‍ വൈകുന്നേരം അഞ്ചരയ്ക്കാണ് ഷോ. മുപ്പത് ആര്‍ട്ടിസ്റ്റുകള്‍ അണിനിരക്കും. ഇന്ത്യന്‍ മാന്ത്രിക ലോകത്തെ അതികായന്‍ പി.സി. സര്‍ക്കാര്‍ ഉദ്ഘാടനം നിര്‍വഹിക്കും.ഐവൈഎ, മലബാര്‍ ചേംബര്‍ ഓഫ് കൊേമഴ്‌സ്, മുതുകാട് നേതൃത്വം നല്‍കുന്ന ഡിഫറന്‍റ് ആര്‍ട്‌സ് സെന്‍റര്‍ എന്നിവ സംയുക്തമായാണ് പരിപാടി സംഘടിപ്പിക്കുന്നത്. പ്രവേശനം സൗജന്യമാണ്. ഭിന്നശേഷി വിഭാഗത്തിന്‍റെ സമഗ്ര വികസനത്തിനുവേണ്ടിയാണ് താനിപ്പോള്‍ പ്രവര്‍ത്തിക്കുന്നതെന്ന് മുതുകാട് പറഞ്ഞു. കാസര്‍കോട്ട് ഇന്‍റര്‍നാഷണല്‍ ഇന്‍സ്റ്റിട്യൂട്ട് ഫോര്‍ പീപ്പിള്‍ വിത്ത് ഡിസബിലിറ്റീസ് എന്ന ബൃഹദ് പദ്ധതിയുമായി മൂന്നോട്ടുപോകുകയാണ്. 30 ഏക്കര്‍ സ്ഥലത്താണ് പദ്ധതി വരുന്നത്. ഐവൈഎ പ്രസിഡന്‍റ് ടി.ഡി. ഫ്രാന്‍സിസ്, ഒയിസ്‌ക ഇന്‍റര്‍നാഷണല്‍ െസക്രട്ടറി ജനറല്‍ അരവിന്ദ്ബാബു, സൗത്ത് ഇന്ത്യന്‍ ചാപ്റ്റര്‍ പ്രസിഡന്‍റ് ഫിലിപ്പ് മാത്യു, മലബാര്‍ ചേംബര്‍ പ്രസിഡന്‍റ് നിത്യാനന്ദ കമ്മത്ത് എന്നിവരും വാര്‍ത്താസമ്മേളനത്തില്‍ സംബന്ധിച്ചു.

തീപിടിത്തം: മെഡിക്കല്‍ കോളജിലെ അത്യാഹിത വിഭാഗം പ്രവര്‍ത്തന സജ്ജമായില്ല

കോഴിക്കോട്: തീപിടിത്തത്തിന് ശേഷം ശേഷം അടച്ചിട്ട കോഴിക്കോട് മെഡിക്കൽ കോളജ് ആശുപത്രിയിലെ അത്യാഹിത വിഭാഗം ഇതുവരെ പ്രവർത്തനസജ്ജമായില്ല. മൂന്ന് ദിവസംകൊണ്ട് ശരിയാക്കുമെന്ന് ആരോഗ്യവകുപ്പ് മന്ത്രി ഉറപ്പ് നൽകിയ കാഷ്വാലിറ്റി ബ്ലോക്ക് ആണ് രണ്ടുമാസമായി അടഞ്ഞുകിടക്കുന്നത്. മേയ് രണ്ടിനുണ്ടായ തീപിടിത്തത്തെ തുടർന്ന് ഇലക്ട്രിക് ഇൻസ്പെക്ടറേറ്റ് വിഭാഗം പരിശോധന നടത്തി റിപ്പോർട്ട് ആരോഗ്യവകുപ്പിന് കൈമാറിയിരുന്നു.കെട്ടിടത്തിലെ മുഴുവൻ ബ്ലോക്കിലെയും വയറിങ്ങുകൾ പരിശോധിക്കുകയും ആവശ്യമുള്ളവ റിപ്പയർ ചെയ്ത് ശരിയാകുകയും വേണം. അതിനുശേഷം പിഡബ്ല്യുഡിയുടെ പരിശോധനകൾ നടക്കണം. പണി പൂർത്തിയായാൽ ഇലക്ട്രിക് ഇൻസ്പെക്ടറേറ്റ് വിഭാഗം പരിശോധന നടത്തണം. ഫയർ ഓഡിറ്റിംഗ് കഴിഞ്ഞ് ഇനിയൊരു പ്രശ്നവും ഉണ്ടാവില്ലെന്ന് ബോധ്യപ്പെട്ടാൽ മാത്രമേ കെട്ടിടത്തിന് വീണ്ടും എൻഒസി ലഭിക്കുകയുള്ളൂ. 195 കോടിയിൽ പിഎംഎസ്എസ് വൈ വഴി ബ്ലോക്കിന്‍റെ നിർമ്മാണം പൂർത്തിയാക്കിയ എച്ച്എൽഎൽ ഹെറ്റ്സ് എന്ന ഏജൻസി തന്നെയാണ് അറ്റകുറ്റപ്പണികൾ നടത്തുന്നത്. എന്നാൽ, അറ്റകുറ്റപ്പണികൾ പൂർത്തിയാക്കുന്നതിൽ മെല്ലെപ്പോക്ക് തുടരുകയാണ്. ഇതിന്‍റെ ദുരിതം അനുഭവിക്കുന്നതാവട്ടെ രോഗികളും. താത്കാലികമായി ഒരുക്കിയ കാഷ്വാലിറ്റിയിൽ അസൗകര്യങ്ങളിൽ വീർപ്പുമുട്ടി കഴിയേണ്ട അവസ്ഥയിലാണ് രോഗികളും കൂട്ടിരിപ്പുകാരും.

നാലുവര്‍ഷമായിട്ടും കരിങ്കൽ ഭിത്തി നിർമിച്ചില്ല : പുഴയോരം ഇടിഞ്ഞ് കൃഷിയിടങ്ങള്‍ നശിക്കുന്നു; കര്‍ഷക കണ്ണീര്‍ കാണാതെ അധികൃതര്‍

ജോൺസൺ പൂകമല കൂരാച്ചുണ്ട്: ശക്തമായ മഴയെ തുടർന്നുണ്ടാകുന്ന പ്രളയങ്ങളിലും മറ്റും പുഴയോരം ഇടിയുന്നതിനെ തുടർന്ന് കൃഷിയിടങ്ങൾ തകരുന്ന കൂരാച്ചുണ്ട് ഓഞ്ഞിൽ പുഴയോരത്തെ സംരക്ഷിക്കാനുള്ള നടപടികള്‍ കടലാസില്‍. കരിങ്കൽ ഭിത്തി നിർമിച്ച് സംരക്ഷിക്കാനായി ചെറുകിട ജലസേചന വകുപ്പ് എസ്റ്റിമേറ്റ് തയ്യാറാക്കി നൽകിയിട്ട് നാലുവര്‍ഷമായിട്ടും ഒന്നും നടപ്പിലായില്ല. പുഴയുടെ മൂന്നാംമുക്ക് മുതൽ മുളവട്ടംകടവ് വരെയുള്ള ഒരു കിലോമീറ്റർ ദൂരത്തിലുള്ള പുഴയോരം ഭാഗം കരിങ്കൽ ഭിത്തി കെട്ടി സംരക്ഷിക്കുന്നതിനായി ചെറുകിട ജലസേചന വകുപ്പ് ഉദ്യോഗസ്ഥർ 2021 സെപ്റ്റംബറിൽ സ്ഥലത്തെത്തി എസ്റ്റിമേറ്റ് തയാറാക്കി സർക്കാരിന് നൽകിയിരുന്നു. പ്രാഥമിക ഘട്ടത്തിൽ ഒരു കോടിയുടെ എസ്റ്റിമേറ്റാണ് തയാറാക്കി നൽകിയിട്ടുള്ളത്. എന്നാൽ തുടർനടപടികളൊന്നുമുണ്ടായില്ല. പ്രളയത്തത്തുടർന്ന് കാലങ്ങളായി പുഴയോരം ഇടിഞ്ഞ് ഏക്കറുകളോളം കൃഷിയിടങ്ങളാണ് നശിച്ചത്. മാത്രമല്ല പുഴ കരകവിഞ്ഞത് തീരങ്ങളില്‍ താമസിക്കുന്നവരുടെ വീടുകൾക്കും ഭീഷണിയാണ്. ഇതേ തുടർന്ന് രാഷ്ട്രീയ പാർട്ടി പ്രതിനിധികൾ ജലവിഭവ വകുപ്പ് മന്ത്രിക്ക് നിവേദനം നൽകി. അതിന്‍റെ അടിസ്ഥാനത്തിലായിരുന്നു ഉദ്യേഗസ്ഥർ എസ്റ്റിമേറ്റ് സമർപ്പിച്ചത്. എന്നാൽ സർക്കാർ തലത്തിൽ ഒരു നടപടിയുമാകാത്തത് കർഷകരെ പ്രതിസന്ധിയിലാക്കിയിരിക്കുകയാണ്. ഈ പ്രദേശങ്ങളിലെ ഒട്ടനവധി കൃഷിയിടങ്ങളാണ് വർഷങ്ങളായി കാലവർഷത്തെ തുടർന്നുള്ള പ്രളയങ്ങളിൽ ഇടിഞ്ഞ് നശിച്ചു കൊണ്ടിരിക്കുന്നത്. കൂരാച്ചുണ്ട് പഞ്ചായത്തിലെ ഒന്ന്, രണ്ട് വാർഡുകൾ ഉൾപ്പെടുന്ന മൂന്നാംമുക്ക് , പുളിവയൽ, ഓഞ്ഞിൽ തുടങ്ങി ചെറുപുഴയോട് ചേർന്നു കിടക്കുന്ന കൃഷിയിടങ്ങളിലെ തെങ്ങ്, കമുക്, റബ്ബർ, കൊക്കോ തുടങ്ങിയ കാർഷിക വിളകൾക്കാണ് നാശം സംഭവിച്ചുകൊണ്ടിരിക്കുന്നത്. ചില ഭാഗങ്ങളിൽ പുഴ ഗതിമാറി ഒഴുകിയതും വൻതോതിൽ കൃഷിയിടങ്ങൾ തകർന്നടിയുന്നതിന് ഇടയാക്കുന്നു. കൂടാതെ പുഴയൊഴുകുന്ന പതിമൂന്നാം വാർഡിലെ മുളവട്ടംകടവ് മുതൽ കരിമ്പനക്കുഴി താഴെ വരെയുള്ള ഭാഗങ്ങളിലും പുഴയോരം ഇടിഞ്ഞു കൃഷിയിടങ്ങൾ നശിച്ചിട്ടുണ്ട്. കൃഷിയിടങ്ങൾക്ക് സുരക്ഷിതത്വവും പുഴയോരം കെട്ടി സംരക്ഷിക്കുന്നതിനും ചെറുകിട ജലസേചന വകുപ്പ് സർക്കാരിന് സമർപ്പിച്ചിട്ടുള്ള എസ്റ്റിമേറ്റ് സംബന്ധിച്ചുള്ള തുടർനടപടികൾ സ്വീകരിച്ച് പദ്ധതി എത്രയും വേഗത്തിൽ നടപ്പാക്കാൻ നടപടികൾ വേണമെന്നാണ് പ്രദേശവാസികളായ കർഷക സമൂഹം ആവശ്യപ്പെടുന്നത്. സംരക്ഷണ ഭിത്തി നിർമാണം ഫലം കണ്ടില്ല തുടർച്ചയായി മഴക്കാലങ്ങളിലുണ്ടാകുന്ന പ്രളയങ്ങളിൽ വർഷങ്ങളായി ഇടിഞ്ഞു കൊണ്ടിരിക്കുന്ന ഓഞ്ഞിൽ പുഴയോരത്തെ കാർഷിക വിളകൾക്കും കൃഷിയിടങ്ങൾക്കും കനത്ത നഷ്ടങ്ങളാണ് വരുത്തിക്കൊണ്ടിരിക്കുന്നത്. പുഴയോരത്ത് കരിങ്കൽ ഭിത്തി കെട്ടി സംരക്ഷിക്കാനായി സർക്കാർ കൈക്കൊണ്ട നടപടികളുടെ ഭാഗമായി നടത്തിയ കാര്യങ്ങൾ വർഷങ്ങൾ കഴിഞ്ഞും കടലാസിൽ ഒതുങ്ങിയതല്ലാതെ നാളിന്നേവരെ യാതൊരു ഫലവും കണ്ടിട്ടില്ല. സത്വര നടപടികൾ വേണം ഓഞ്ഞിൽ പുഴയോരങ്ങളിലായി ഒട്ടനവധി കർഷക കുടുംബങ്ങൾ കൃഷി ചെയ്ത് താമസിച്ചുവരുന്നുണ്ട്. ഓഞ്ഞിൽ, പുളിവയൽ, മൂന്നാം മുക്ക് മേഖലകളിലെ ഏക്കറുകളോളം കൃഷിയിടങ്ങളാണ് കഴിഞ്ഞ കാലങ്ങളിലായി വെള്ളപ്പൊക്കത്തെ തുടർന്നും മറ്റും നശിച്ചുകൊണ്ടിരിക്കുന്നത്. ഇതിനു ശാശ്വത പരിഹാരം കാണണമെന്ന് ആവശ്യപ്പെട്ടതിനെത്തുടർന്നാണ് പുഴയ്ക്ക് സംരക്ഷണഭിത്തി നിർമിക്കാനുള്ള പ്രാരംഭ നടപടികൾ ചെറുകിട ജലസേചന വകുപ്പ് ആരംഭിച്ചത്. എന്നാൽ നാലു വർഷം കഴിഞ്ഞും തുടർ നടപടിയില്ലാത്തത് കർഷകരെ സംബന്ധിച്ച് ഖേദകരമായ കാര്യമാണ്.

ശലഭോദ്യാനം ഉദ്ഘാടനം ചെയ്തു

പുല്ലൂരാംപാറ: പുല്ലൂരാംപാറ സെന്‍റ് ജോസഫ്സ് യുപി സ്കൂളിൽ ഒരുക്കിയ ശലഭോദ്യാനം ഉദ്ഘാടനം ചെയ്തു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ ഉദ്ഘാടനകർമ്മം നിർവഹിച്ചു. ഹെഡ്മാസ്റ്റർ സിബി കുര്യാക്കോസ്, പിടിഎ പ്രസിഡന്‍റ് സിജോയ് മാളോല, എംപിടിഎ പ്രസിഡന്‍റ് ജിൻസ് മാത്യു തുടങ്ങിയവരും അധ്യാപകരും വിദ്യാർഥികളും ചടങ്ങിൽ പങ്കെടുത്തു.

കടിയങ്ങാട് ബസ് അപകടം; ഡ്രൈവറുടെ ലൈസന്‍സ് സസ്പെൻഡ് ചെയ്തു

പേരാമ്പ്ര: കഴിഞ്ഞ ദിവസം കടിയങ്ങാട് പെട്രോൾ പമ്പിന് സമീപം സ്വകാര്യ ബസ് ടിപ്പറിന് പിന്നിൽ ഇടിച്ച് അപകടമുണ്ടാക്കിയ ഡ്രൈവറുടെ ലൈസൻസ് സസ്പെൻഡ് ചെയ്തു. ഞായറാഴ്ച രാവിലെയാണ് കുറ്റ്യാടി പേരാമ്പ്ര സംസ്ഥാന പാതയില്‍ കടിയങ്ങാട് വച്ച് ടിപ്പറിന് പുറകില്‍ ബസ് ഇടിച്ച് അപകടം ഉണ്ടായത്. അപകടം വരുത്തിയ കെ എൽ 56 എം 8199 എസാർ ബസിന്‍റെ ഡ്രൈവര്‍ മരുതോങ്കര സ്വദേശി കുനിയിൽ കെ. വിപിന്‍റെ ഡ്രൈവിംഗ് ലൈസന്‍സാണ് ആറുമാസത്തേക്ക് സസ്പെൻഡ് ചെയ്തത്. എടപ്പാൾ ഐആർഡിഎയിൽ അഞ്ച് ദിവസത്തെ പരിശീലനത്തിനും ജോയിന്‍റ് ആര്‍ടിഒ ടി.കെ പ്രഗീഷ് ഉത്തരവ് നല്‍കി. ഡ്രൈവര്‍ വിപിന്‍ കുറ്റസമ്മതം നടത്തി. എംവിഐയുടെ അന്വേഷണ റിപ്പോര്‍ട്ടില്‍ വാഹനം അശ്രദ്ധമായും അമിത വേഗത്തിലുമാണ് ഓടിച്ചിരുന്നതെന്ന് കണ്ടെത്തിയതിന്‍റെ അടിസ്ഥാനത്തിലാണ് നടപടി. ഈ റൂട്ടിലെ സ്വകാര്യ ബസുകളുടെ അമിത വേഗത നിയന്ത്രിക്കാൻ കർശന നടപടികൾ തുടരുമെന്ന് മോട്ടോർ വാഹന വകുപ്പ് അധികൃതർ അറിയിച്ചു.

മേപ്പയൂരിൽ വിറകുപുരയ്ക്ക് തീ പിടിച്ചു

പേരാമ്പ്ര: വീടിനോടനുബന്ധിച്ചുള്ള വിറകുപുരയ്ക്ക് തീ പിടിച്ചു. മേപ്പയ്യൂർ പഞ്ചായത്ത് വാർഡ് പത്തിൽ ചാവട്ടു പള്ളി താഴെ എം.കെ. ഹൗസിൽ അബ്ദുറഹിമാന്‍റെ വീടിനോടനുബന്ധിച്ചുള്ള വിറകുപുരയ്ക്കാണ് തീ പിടിച്ചത്. അടുപ്പിൽ നിന്ന് പടർന്നാണ് തീ പിടിച്ചത്. കെട്ടിടത്തിന്‍റെ മേൽ കൂരയും അതിനകത്തുണ്ടായിരുന്ന വിറകും ഭാഗികമായി കത്തി നശിച്ചു. ഇന്നലെ രാവിലെ പത്തരയോടെയാണ് സംഭവം. പേരാമ്പ്ര അഗ്നി രക്ഷാനിലയത്തിലെ അസി. സ്റ്റേഷൻ ഓഫീസർ പ്രദീപന്‍റെ നേതൃത്വത്തിലുള്ള രണ്ടു യൂണിറ്റ് സ്ഥലത്തെത്തി തീയണച്ചു. ഫയർഫോഴ്സ് അംഗങ്ങളായ ബൈജു, നിഗേഷ്കുമാർ, ശ്രീകാന്ത്, ധീര ജ്‌ലാൽ, സനൽ രാജ്, ബബീഷ്, ജിനേഷ്, ഹൃദിൻ, രജീഷ്, ആരാധ്കുമാർ, രാജീവൻ, മുരളീധരൻ എന്നിവരും രക്ഷാ പ്രവർത്തനത്തിൽ പങ്കാളികളായി.

കാട്ടാന ശല്യം രൂക്ഷം രൂക്ഷം ; കൃഷി നശിപ്പിച്ചു

കോഴിക്കോട്: ജില്ലയിലെ മൈലള്ളംപാറ പ്രദേശത്ത് കാട്ടാനശല്യം രൂക്ഷം. ഒരാഴ്ചയായി 11 ന്നോളംകാട്ടാനകൾ ഉൾപ്പെടുന്നകൂട്ടം പ്രദേശത്ത് നിലയുറപ്പിച്ചിരിക്കുകയാണ്. മാത്യു തെക്കേക്കര, ജോസഫ് കൊണ്ടോടി, ബിനോയ്‌, ആനിയമ്മ, കുഞ്ഞികണാരൻ, ടോമിച്ചൻ, ജമീല, ബെന്നിമാത്യു,അരുൻതോമസ് തുടങ്ങി പതിനഞ്ചോളാം കർഷകരുടെ കൃഷികളാണ് ആനക്കൂട്ടം നശിപ്പിച്ചിരിക്കുന്നത്. അധികൃതരുടെ ഭാഗത്തുനിന്നും ഇവയെ തുരത്താനുള്ള കൃത്യമായ നടപടികൾ ഉണ്ടാകുന്നില്ല. ആർആർടി അംഗങ്ങൾ പടക്കം പൊട്ടിക്കുന്നുണ്ടെങ്കിലും കാട്ടാനകൾ കാടുകയറുന്നില്ല. വർഷങ്ങൾക്കുമുമ്പുള്ള ഫെൻസിംഗ് റിപ്പയർ ചെയ്യാത്തതിനാൽ ഉപയോഗശൂന്യമാണ്. ഇതിനെതിരേ ശക്തമായ നടപടി ഉണ്ടാകണമെന്ന് കിഫ മൈലളളാംപാറ യൂണിറ്റ് ആവശ്യപ്പെട്ടു. അല്ലാത്തപക്ഷം ശക്തമായ ജനകീയ പ്രക്ഷോഭം തുടങ്ങാനാണ് പ്രദേശവാസികളുടെ തീരുമാനം. കക്കയത്ത് കൃഷി നശിപ്പിച്ചു കൂരാച്ചുണ്ട്: കക്കയം ജനവാസ കേന്ദ്രത്തിൽ കാട്ടാനയിറങ്ങി കൃഷി നശിപ്പിച്ചു. പഞ്ചായത്ത് നാലാം വാർഡ് കക്കയം പഞ്ചവടി ഇല്ലി തോട്ടത്തിന് സമീപം താമസിക്കുന്ന കർഷകൻ പാറക്കൽ കുട്ടിയാലിയുടെ കൃഷിയിടത്തിലാണ് കാട്ടാന വാഴകൃഷി നശിപ്പിച്ചത്. കഴിഞ്ഞ ദിവസം രാത്രിയിലാണ് സംഭവം. ഈ മേഖലയിൽ സ്ഥാപിച്ചിട്ടുള്ള സോളാർ ഫെൻസിംഗ് തകർത്തശേഷമാണ് കാട്ടാന കൃഷിയിടത്തിലേക്ക് പ്രവേശിച്ചത്. കക്കയം മേഖലയുടെ വിവിധ ഭാഗങ്ങളിൽ വന്യമൃഗ ശല്യം രൂക്ഷമാണ്. വന്യമൃഗങ്ങളെ വനത്തിൽ തടയാൻ ശാശ്വതമായ പരിഹാരം കാണാൻ വനം വകുപ്പ് തയാറാകണമെന്നാണ് നാട്ടുകാർ ആവശ്യപ്പെടുന്നത്. കാട്ടുപോത്തുകളും നാട്ടുകാർക്ക് ഭീഷണിയായി മാറിയിട്ടുണ്ട്. കാട്ടാന അടക്കമുള്ള വന്യമൃഗങ്ങളെ ഏറെ ഭയപ്പെട്ടാണ് പ്രദേശവാസികൾ ഇപ്പോൾ കഴിഞ്ഞുകൂടുന്നത്. കൃഷി നാശത്തിന് തക്കതായ നഷ്ടപരിഹാരം നൽകണമെന്നുമാണ് ആവശ്യം ഉയരുന്നത്. വന്യമൃഗ ശല്യത്തിനെതിരേ കത്തോലിക്ക കോൺഗ്രസ് കൂരാച്ചുണ്ട്: മലയോര മേഖലയായ ചക്കിട്ടപാറ, പെരുവണ്ണാമുഴി, ചെമ്പനോട, മുതുകാട്, കക്കയം, കൂരാച്ചുണ്ട് എന്നിവിടങ്ങളിൽ നിരന്തരമായി വന്യമൃഗശല്യം രൂക്ഷമായിട്ടും വനം വകുപ്പ് നടപടി സ്വീകരിക്കാത്തതിൽ കത്തോലിക്കാ കോൺഗ്രസ് കൂരാച്ചുണ്ട് ഫൊറോന കമ്മിറ്റി യോഗം പ്രതിഷേധിച്ചു. ഇതിനെതിരേ ശക്തമായ നടപടി സ്വീകരിക്കാത്ത പക്ഷം അടുത്ത മാസം ആദ്യവാരത്തിൽ പെരുവണ്ണാമൂഴി ഫോറസ്റ്റ് റെയിഞ്ച് ഓഫീസിലേക്ക് കത്തോലിക്ക കോൺഗ്രസ് കൂരാച്ചുണ്ട്, മരുതോങ്കര ഫൊറോന കമ്മിറ്റികളുടെ നേതൃത്വത്തിൽ മാർച്ച് നടത്താൻ യോഗം തീരുമാനിച്ചു. ഫൊറോന ഡയറക്ടർ ഫാ. വിൻസെന്‍റ് കണ്ടത്തിൽ ഉദ്ഘാടനം ചെയ്തു. ഫൊറോന പ്രസിഡന്‍റ് ജോസ് ചെറുവള്ളിൽ അധ്യക്ഷത വഹിച്ചു. ഭാരവാഹികളായ ജോൺസൺ കക്കയം, ദാസ് കാനാട്ട്, ബോബൻ പുത്തൂർ, നിമ്മി പൊതയിട്ടേൽ, സണ്ണി എമ്പ്രയിൽ എന്നിവർ പ്രസംഗിച്ചു.

മുസ്ലീം ലീഗിൽ വിഭാഗീയത പുകയുന്നു

തിരുവമ്പാടി: മുസ്ലീം ലീഗ് നേതൃത്വത്തെ വെല്ലുവിളിച്ച് കെഎംസിസി കുടുംബ സംഗമം നടത്തിയതുൾപ്പെടെ തിരുവമ്പാടി മുസ്ലീം ലീഗിൽ നിലനിൽക്കുന്ന വിഭാഗീയത കൂടുതൽ രൂക്ഷമാവുന്നു. കഴിഞ്ഞ ദിവസം മുസ്ലിം ലീഗ് നിയോജക മണ്ഡലം നേതൃത്വത്തിനെതിരേ ഗുരുതരമായ ആരോപണങ്ങളുമായി വിമതപക്ഷം രംഗത്തെത്തിയിരുന്നു. ഇതിന് പിന്നാലെയാണ് മറുപടിയുമായി പഞ്ചായത്ത് ലീഗ് ഭാരവാഹികൾ രംഗത്തെത്തിയത്. സംസ്ഥാന സെക്രട്ടറിയും കഴിഞ്ഞ തവണ യുഡിഎഫ് സ്ഥാനാർഥിയുമായ സി.പി. ചെറിയ മുഹമ്മദിനെ പരാജയപ്പെടുത്തിയത് നിലവിലെ മണ്ഡലം പ്രസിഡന്‍റും സെക്രട്ടറിയുമാണന്നായിരുന്നു പ്രധാന ആരോപണം. എന്നാൽ പരാജയം പഠിക്കാനായി സംസ്ഥാന കമ്മിറ്റി നിയോഗിച്ച അന്വേഷണ കമ്മീഷനായ അഡ്വ. എൻ. ശംസുദ്ധീൻ, പി.എം സാദിഖലി എന്നിവർ പോലും കണ്ടെത്താത്ത ആരോപണമുന്നയിച്ച സാഹചര്യത്തിൽ സംസ്ഥാന സെക്രട്ടറി സി.പി. ചെറിയ മുഹമ്മദ് മറുപടി പറയണമെന്ന് തിരുവമ്പാടി പഞ്ചായത്ത് മുസ്ലീം ലീഗ് ജനറൽ സെക്രട്ടറി ഷൗക്കത്തലി കൊല്ലളത്ത് പറഞ്ഞു. കഴിഞ്ഞ ലോക്സഭാ തെരഞ്ഞെടുപ്പിൽ പ്രിയങ്ക ഗാന്ധി മത്സര രംഗത്തുണ്ടായിട്ടും തെരഞ്ഞെടുപ്പ് പ്രചരണ രംഗത്ത് നിന്ന് വിട്ടു നിന്നവരാണ് ഇപ്പോൾ ആരോപണവുമായി രംഗത്ത് വന്നിരിക്കുന്നത്. പാർട്ടിയിൽ നിന്ന് പുറത്താക്കിയവരുടെ രാജി പ്രഖ്യാപനം അപഹാസ്യമാണന്നും അദ്ദേഹം പറഞ്ഞു. അൽപ്പമെങ്കിലും ധാർമ്മികതയുണ്ടങ്കിൽ കെ.എ അബ്ദുറഹിമാൻ തിരുവമ്പാടി പഞ്ചായത്ത് വൈസ് പ്രസിഡന്‍റ് സ്ഥാനം രാജിവെക്കണമെന്നും ഷൗക്കത്തലി ആവശ്യപ്പെട്ടു.

എല്‍ഡിഎഫ് സര്‍ക്കാരിനെ ജനം കടലില്‍ താഴ്ത്തും: ഷാഫി പറമ്പില്‍

കോഴിക്കോട്: എല്‍ഡിഎഫ് സര്‍ക്കാരിനെ ജനം അറബി കടലില്‍ താഴ്ത്തുമെന്നും സര്‍ക്കാരിന്‍റെ എക്സിറ്റ് ഓഡര്‍ ജനങ്ങള്‍ ഒപ്പിട്ടു കഴിഞ്ഞുവെന്നും കെപിസിസി വര്‍ക്കിംഗ് പ്രസിഡന്‍റ് ഷാഫി പറമ്പില്‍ എംപി പറഞ്ഞു. ശസ്ത്രക്രിയ ഉപകരണങ്ങളുടെയും മരുന്നിന്‍റെയും ക്ഷാമം മൂലം ഗവ. മെഡിക്കല്‍ കോളജ് നേരിടുന്ന ദുരവസ്ഥക്കെതിരേ കോളജിന് മുന്നില്‍ ജില്ല കോണ്‍ഗ്രസ് കമ്മിറ്റി സംഘടിപ്പിച്ച ധര്‍ണ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കേരളത്തിലെ ആരോഗ്യ മന്ത്രി അനാരോഗ്യമന്ത്രിയായി മാറിയെന്നും കേരളത്തിലെ ആരോഗ്യവകുപ്പിനെ പിടികൂടിയിരിക്കുന്ന ഗുരുതരമായ രോഗമാണ് പിആര്‍ അഡിക്ഷനെന്നും ഷാഫി പറമ്പില്‍ വിമര്‍ശിച്ചു. ഡോ. ഹാരിസിന്‍റെ ഫേസ്ബുക്ക് പോസ്റ്റ്, ഭരണത്തെക്കുറിച്ചുള്ള കറകളഞ്ഞ സഖാവിന്‍റെ വിലയിരുത്തലാണ്. പോരാളി ഷാജി തോറ്റുപോകുംവിധം നിലമ്പൂര്‍ ഉപതെരഞ്ഞെടുപ്പിലെ പരാജയത്തെ ന്യായീകരിച്ചയാളാണ് ആശുപത്രിയിലെ ദുരിതം കാണിച്ച് പോസ്റ്റ് ഇട്ടത്. മെഡിക്കല്‍ കോളജിലെ കാഷ്വാലിറ്റി വിഷയത്തില്‍ കോണ്‍ഗ്രസ് പ്രതിഷേധവുമായി രംഗത്തുണ്ടാകുമെന്നും ഷാഫി പറമ്പില്‍ പറഞ്ഞു. ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അധ്യക്ഷത വഹിച്ചു. കെപിസിസി ജനറല്‍ സെക്രട്ടറിമാരായ അഡ്വ. കെ. ജയന്ത്, അഡ്വ. പി.എം നിയാസ്, മുന്‍ ഡിസിസി പ്രസിഡന്‍റ് കെ.സി അബു, യുഡിഎഫ് ജില്ലാ ചെയര്‍മാന്‍ കെ. ബാലനാരായണന്‍, ഡികെടിഎഫ് സംസ്ഥാന പ്രസിഡന്‍റ് യു.വി ദിനേശ് മണി എന്നിവര്‍ പ്രസംഗിച്ചു.

പുസ്തക നിറവ് ഉദ്ഘാടനം ചെയ്തു

പാറോപ്പടി: സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് കോഴിക്കോട് ജില്ലയില്‍ സംഘടിപ്പിച്ച പുസ്തകപ്രദര്‍ശനവും വിപണനവും "പുസ്തകനിറവ് 2025' ന്‍റെ ജില്ലാതല ഉദ്ഘാടനം സില്‍വര്‍ ഹില്‍സ് ഹയര്‍ സെക്കൻഡറി സകൂളില്‍ നടന്നു. മഹിതമലയാളത്തിന്‍റെ പ്രാധാന്യം വിദ്യാർഥികളില്‍ എത്തിക്കുന്നതിനും വായനാശീലം പ്രോത്സാഹിപ്പിക്കുന്നതിനുമായി സംസ്ഥാന ബാല സാഹിത്യ ഇന്‍സ്റ്റിറ്റ്യൂട്ട് സംഘടിപ്പിച്ച പരിപാടിയുടെ ഉദ്ഘാടനം പ്രശസ്ത എഴുത്തുകാരൻ എം.എന്‍. കാരശേരി നിര്‍വഹിച്ചു. കുട്ടികള്‍ സംസ്‌കാര സമ്പന്നരും മൂല്യബോധമുള്ളവരുമായി വളരുവാന്‍ വായന അനിവാര്യമാണെന്ന് അദ്ദേഹം ഓര്‍മ്മപ്പെടുത്തി. "എഴുത്തും സംസ്‌കാരവും' എന്ന വിഷയത്തില്‍ കുട്ടികളുമായി അദ്ദേഹം സംവദിക്കുകയും ചെയ്തു. സ്‌കൂളുമായി ബന്ധപ്പെട്ട് സാമൂഹിക സാംസ്‌കാരിക രംഗത്ത് ശ്രദ്ധേയമായ സംഭാവന നല്‍കിയ മുന്‍ മലയാളം അധ്യാപിക വി. ശശികലയെ ചടങ്ങില്‍ ആദരിച്ചു. സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട് ഡയറക്ടര്‍ പള്ളിയറ ശ്രീധരന്‍ അധ്യക്ഷത വഹിച്ചു. ബാലസാഹിത്യ ഇന്‍സ്റ്റിറ്റ്യൂട്ട് എഡിറ്റര്‍ രാധികാനായര്‍ ആമുഖ പ്രഭാഷണം നടത്തി. ബാല സാഹിത്യ ഇന്‍സ്റ്റിറ്റ്യൂട്ട് ഭരണസമിതി അംഗം ജാനമ്മ കുഞ്ഞുണ്ണി, സ്‌കൂള്‍ പ്രിന്‍സിപ്പല്‍ ഫാ. ജോണ്‍ മണ്ണാറത്തറ, മലയാളം അധ്യാപകന്‍ വി.പി. മനോജ് എന്നിവർ‌ പ്രസംഗിച്ചു.

കക്കയത്തെ ടൂറിസം വികസനം മുരടിപ്പിലെന്ന് ആരോപണം

കൂരാച്ചുണ്ട്: നിത്യേന നൂറു കണക്കിന് വിനോദസഞ്ചാരികൾ വന്നുപോകുന്ന കക്കയം ടൂറിസം പദ്ധതിയിൽ നിന്നും പ്രതിമാസം ലക്ഷങ്ങൾ വരുമാനം ലഭിക്കുന്നുണ്ടെങ്കിലും കക്കയം ടൂറിസം പദ്ധതി മുരടിപ്പിന്‍റെ പടുകുഴിയിലാണെന്ന് കക്കയം ടൂറിസം വികസന സമിതി. ടൂറിസം പദ്ധതിയുടെ ആരംഭകാലത്തുണ്ടായിരുന്ന സൗകര്യങ്ങൾ ഓരോന്നായി നശിച്ചതോടെ സന്ദർശകരുടെ ആസ്വാദനത്തിനും മങ്ങലേറ്റു. വനംവകുപ്പിന്‍റെ അധീനതയിലുള്ള ഉരക്കുഴി ഇക്കോ ടൂറിസം കേന്ദ്രത്തിൽ സന്ദർശകർക്കായി ഒരുക്കിയിരുന്ന തൂക്കുപാലം തകർന്നിട്ട് വർഷങ്ങൾ പിന്നിട്ടെങ്കിലും പുനർനിർമ്മാണം നടത്തിയിട്ടില്ല. ഇവിടുത്തെ നടപ്പാത പൊട്ടിപ്പൊളിഞ്ഞു. മേഖലയിൽ ഇരിപ്പടങ്ങളില്ല, പൂന്തോട്ടങ്ങൾ നശിച്ചു, കൂടാതെ ഡാമിൽ നടത്തിയിരുന്ന ബോട്ടിംഗ് സർവീസും ഇപ്പോൾ കട്ടപ്പുറത്താണുള്ളത്. വനംവകുപ്പിന്‍റെയും, കെഎസ്ഇബിയുടെയും കീഴിലുള്ള രണ്ട് പദ്ധതികളും നാശത്തിന്‍റെ വക്കിലാണ്. രണ്ടു പദ്ധതികളിലായി ഏകദേശം മുപ്പതോളം ഗൈഡുമാരുടെ ജീവിതം ദുരിതപൂർണമാണ്. വൈദ്യുതി ബോർഡിന്‍റെ പുതിയ പ്രഖ്യാപന പ്രകാരം പഴയ കെട്ടിടങ്ങൾ അറ്റകുറ്റപ്പണികൾ നടത്തി ടൂറിസ്റ്റുകൾക്ക് നൽകാൻ തയാറാകണം. അതിനായി നിരവധി കെട്ടിടങ്ങൾ നിലവിലുണ്ട്. കക്കയത്തും കക്കയം ഡാം മേഖലയിലും ആവശ്യമായ സുരക്ഷാ സംവിധാനങ്ങൾ ഏർപ്പെടുത്തണമെന്നും വികസന സമിതി ആവശ്യപ്പെട്ടു. കെഎസ്ആർടിസി വയനാട്ടിലും മറ്റും നടപ്പാക്കിയ പോലെ ആവശ്യമായ സുരക്ഷാ സംവിധാനം ഒരുക്കിക്കൊണ്ട് ബസുകളിൽ താമസം ഏർപ്പെടുത്താൻ കഴിയും. ഇവയെല്ലാം പരിഗണിച്ച് കക്കയത്ത് ടൂറിസ്റ്റ് വികസനത്തിന് ആവശ്യമായ ശ്രദ്ധ ചൊലുത്തുവാൻ ബന്ധപ്പെട്ട വകുപ്പുകൾ ഉടൻ തയാറാകണമെന്നും ടൂറിസം വികസന സമിതി ആവശ്യപ്പെട്ടു. പ്രസിഡന്‍റ ആൻഡ്രൂസ് കട്ടിക്കാന അധ്യക്ഷത വഹിച്ചു. വാർഡ് മെമ്പർ ഡാർലി ഏബ്രഹാം, സലോമി തോമസ്, ഷമീർ പിച്ചൻ, ചാക്കോ വല്ലയിൽ, ഷൈജ കാരിവേലി എന്നിവർ പ്രസംഗിച്ചു.

റോഡിൽ സീബ്രാ ലൈനില്ല,നിയന്ത്രിക്കാൻ പോലീസുമില്ല

കൂരാച്ചുണ്ടിൽ യാത്രാ ദുരിതം ; വിദ്യാർഥികൾ വലയുന്നു കൂരാച്ചുണ്ട്: കൂരാച്ചുണ്ട് മേലെ അങ്ങാടിയിലെ റോഡിൽ സീബ്രാ ലൈനില്ലാത്തത് യാത്രക്കാ‌ർക്ക് പ്രതിസന്ധിയാവുന്നു. മേലെ അങ്ങാടിയിൽ റോഡ് മുറിച്ച് കടക്കുന്ന ഭാഗത്ത് സീബ്രാ ലൈൻ ഉണ്ടായിരുന്നു. ഇപ്പോൾ പൂർണമായും മാഞ്ഞ് അപ്രത്യക്ഷമായതോടെയാണ് വിദ്യാർഥികൾ ഉൾപ്പടെ പ്രയാസത്തിലായി. നേരത്തെ ഇവിടെ സ്കൂൾ വിടുന്ന സമയങ്ങളിൽ വാഹനങ്ങളെ നിയന്ത്രിക്കാന്‍ പോലീസിനെ ഡ്യൂട്ടിക്ക് ഇടുന്ന സംവിധാനവുമുണ്ടായിരുന്നു. എന്നാൽ ഇപ്പോൾ പോലീസും ഇവിടെ ഇല്ലാതായതോടെ ചെറിയ കുട്ടികൾ അടക്കമുള്ള വിദ്യാർഥികൾ ഭയത്തോടെയും ബുദ്ധിമുട്ടിയുമാണ് റോഡ് മുറിച്ച് കടക്കുന്നത്. വാഹനങ്ങളെല്ലാം വേഗതയിൽ കടന്നു പോകുന്നത് ഭീഷണിയായി മാറിയിട്ടുണ്ട്. സീബ്രാ ലൈൻ മാഞ്ഞുപോയത് വീണ്ടും പുനസ്ഥാപിക്കാൻ ബാലുശേരി പിഡബ്ല്യൂഡി അധികൃതർക്ക് സിപിഐ കൂരാച്ചുണ്ട് ബ്രാഞ്ച് കമ്മിറ്റി പരാതി നൽകിയിരുന്നെങ്കിലും ഇതുവരെയും നടപടി ഉണ്ടായിട്ടില്ല. വിദ്യാർഥികളും യാത്രക്കാരും റോഡ് മുറിച്ച് കടക്കുന്ന ഭാഗങ്ങളിൽ സീബ്രാ ലൈൻ സ്ഥാപിക്കാനും സ്ഥിരമായി പോലീസ് സംവിധാനം ഏർപ്പെടുത്താനും നടപടി സ്വീകരിക്കണമെന്ന് സിപിഐ കൂരാച്ചുണ്ട് ബ്രാഞ്ച് കമ്മിറ്റി അധികൃതരോട് ആവശ്യപ്പെട്ടു. ടി.കെ. ശിവദാസൻ അധ്യക്ഷത വഹിച്ചു. എ.കെ. പ്രേമൻ, കെ.എം. പീറ്റർ, വിനു മ്ലാക്കുഴിയിൽ,പി.ടി. തോമസ്, ഗോപിനാഥൻ, പ്രവീൺ എന്നിവർ പ്രസംഗിച്ചു.

മാനാഞ്ചിറ സ്‌ക്വയറിലെ വെള്ളക്കെട്ട്പരിഹരിക്കാനുള്ള നടപടി തുടങ്ങി

ഓവുചാലിന്‍റെ ആഴം കൂട്ടും കോഴിക്കോട്: നഗരത്തിലെ പ്രധാന േകന്ദ്രമായ മാനാഞ്ചിറ സ്‌ക്വയറിലെ വെള്ളക്കെട്ടിനു പരിഹാരമാകുന്നു.പ്രശ്‌നം പരിഹരിക്കുന്നതിനു നടപടി തുടങ്ങി. മാനാഞ്ചിറ സെന്‍ട്രല്‍ ലൈബ്രറിക്ക് മുന്നിലും എസ്‌കെ പ്രതിമയ്ക്കു സമീപവുമാണ് ദുരിതം വിതച്ച് വെള്ളക്കെട്ട് ഉള്ളത്. നിരവധി യാത്രികര്‍ക്ക് അപകടം ഉണ്ടായതിന് ശേഷമണ് അറ്റകുറ്റപ്പണി ആരംഭിച്ചത്. കോര്‍പറേഷന്‍ 50 ലക്ഷം വ കയിരുത്തിയാണ് റോഡ് ഉയര്‍ത്തിയും ഓവുചാല്‍ ആഴം കൂട്ടിയും വെള്ളക്കെട്ടിന് പരിഹാരം കാണാന്‍ ശ്രമിക്കുന്നത്. സ്ലാബിന് മുകളില്‍ ടൈല്‍ പാകിയ ഓവുചാലില്‍ ചളിയും മാ ലിന്യങ്ങളും അടിഞ്ഞുകൂടി ഒഴുക്ക് നഷ്ടപ്പെട്ടതും ഓവുചാലിനെ ക്കാള്‍ താഴ്ന്നുള്ള റോഡിന്‍റെ കിടപ്പുമാണ് വെള്ളക്കെട്ടിന് കാരണ മായത്.ഇതിനു പരിഹാരമായാണ് സ്റ്റാബുകള്‍ നീക്കി ഓവുചാലിന്‍റെ ആഴം കൂട്ടുന്നത്. ഇതിനുശേഷം ഓവുചാലിന്‍റെ നിരപ്പിന് സമാനമാ യി റോഡ് ഉയര്‍ത്തി ഇന്‍റര്‍ലോക്ക് പാകും. മൊയ്തീന്‍ പള്ളിമുതല്‍ സ്‌പോട്‌സ് കൗണ്‍സല്‍ ഓഫീസിന്‍റെ ഭാഗംവരെയാണ് അറ്റകുറ്റപ്പണികള്‍ നടത്തുക. നിലവില്‍ ഓവുചാലിലെ വെള്ളം ഒരുഭാഗം കമീഷണര്‍ ഓഫിസിന് സമീപത്തുകൂടെ പാളയം ഭാഗത്തേക്കും ഒരു ഭാഗം മാനാഞ്ചിറ ഗ്രൗണ്ടിന് നടുവിലൂടെ ബിഇഎം സ്‌കൂള്‍ ഭാഗത്തുകൂടെ ബീച്ചിലേക്കുമാണ് ഒഴുകുന്നത്. നവീകരണത്തിന് മൂന്നാഴ്ചയോളം വേണ്ടി വരുമെന്നാണ് പ്രതീക്ഷിക്കുന്നത്. റോഡ് പണി ആരംഭിച്ചാല്‍ കണ്ണൂര്‍ റോഡിലേക്കുള്ള ഗതാഗതം നി യന്ത്രിക്കും. റോഡ് ഉയര്‍ത്തുന്നതിനാണ് തുക വകയിരുത്തിയ തെങ്കിലും ഓവുചാലിന്‍റെ അറ്റ കുറ്റപ്പണികള്‍ക്കുള്ള തുകയും വ കയിരുത്തുമെന്ന് കോര്‍പറേഷന്‍ കൗണ്‍സിലര്‍ എസ്.കെ. അബൂബക്കര്‍ പറഞ്ഞു.

പത്രവിതരണക്കാരനെ വാഹനം ഇടിച്ചു തെറിപ്പിച്ചു

പേരാമ്പ്ര: കുറ്റ്യാടി- പേരാമ്പ്ര സംസ്ഥാനപാതയില്‍ പത്ര വിതരണക്കാരനെ ഇടിച്ച് തെറിപ്പിച്ച് വാഹനം നിര്‍ത്താതെ പോയി. പാറക്കടവ് സ്വദേശിയായ തയ്യില്‍ കുഞ്ഞികൃഷ്ണനെ (65) യാണ് ഇടിച്ച് തെറിപ്പിച്ചു വാഹനം നിര്‍ത്താതെ പോയത്. പാലേരി പാറക്കടവ് അരിയന്താരി ക്ഷേത്ര ബസ് സ്റ്റോപ്പിന് സമീപത്താണ് സംഭവം. ഇന്നലെ പുലര്‍ച്ചെ അഞ്ചിന് പത്ര വിതരണത്തിനായി പോവുന്നതിനിടയിലാണ് വാഹനം ഇടിച്ചത്. ഗുരുതരമായി പരിക്കേറ്റ ഇയാളെ കോഴിക്കോട് മെഡിക്കല്‍ കോളജ് ആശുപത്രിയിൽ പ്രവേശി പ്പിച്ചു.

സംസ്ഥാന പാതയിൽ വീണ്ടും അപകടം : കാറും ഓട്ടോയും കൂട്ടിയിടിച്ച് രണ്ടുപേർക്ക് പരിക്ക്

മുക്കം: എടവണ്ണ- കൊയിലാണ്ടി സംസ്ഥാന പാതയിലെ അപകടങ്ങൾക്ക് അറുതിയാവുന്നില്ല. ചൊവ്വാഴ്ച മുത്തേരി കപ്പുമല വളവിലുണ്ടായ വാഹനാപകടത്തിൽ രണ്ട് പേർക്ക് പരിക്കേറ്റു. കാറും ഓട്ടോറിക്ഷയും കൂട്ടി ഇടിച്ചാണ് അപകടമുണ്ടായത്. കാറിൽ യാത്ര ചെയ്ത സ്ത്രീക്കും ഓട്ടോ ഡ്രൈവർക്കുമാണ് പരിക്ക്. പരിക്കേറ്റ സ്ത്രീയെ ഓമശേരിയിലെ സ്വകാര്യ ആശുപത്രിയിലും കാലിന് പരിക്കേറ്റ ഓട്ടോ ഡ്രൈവർ മുക്കം പൂളപ്പൊയിൽ സ്വദേശി ചെട്ടിയാം ചാലിൽ അബ്ദുറഹിമാനെ മുക്കത്തെ സ്വകാര്യ മെഡിക്കൽ കോളജിലും പ്രവേശിപ്പിച്ചു. അപകടത്തിൽ കാറിന്‍റെയും ഓട്ടോറിക്ഷയുടെയും മുൻഭാഗം പൂർണമായും തകർന്നിട്ടുണ്ട്. ഇവിടെ നേരത്തെയും നിരവധി അപകടങ്ങൾ നടന്നിട്ടുള്ളതായി നാട്ടുകാർ പറഞ്ഞു. സംസ്ഥാന പാതയിൽ കഴിഞ്ഞ രണ്ട് ആഴ്ചക്കിടെ മാത്രം ചെറുതും വലുതുമായ പത്തോളം അപകടങ്ങളാണ് നടന്നത്. റോഡിന്‍റെ അശാസ്ത്രീയ നിർമാണമാണ് അപകടങ്ങൾക്ക് കാരണമെന്നാണ് ആക്ഷേപം.

സ്‌കൂട്ടര്‍ യാത്രക്കാരനെ ഇടിച്ചുതെറിപ്പിച്ച് കടന്നുകളഞ്ഞ ബൈക്ക് പിടികൂടി

കോഴിക്കോട്: ബാലുശേരി കോക്കല്ലൂർ - മുത്തപ്പൻ തോടില്‍ സ്‌കൂട്ടര്‍ യാത്രക്കാരനെ ഇടിച്ചുതെറിപ്പിച്ച് കടന്നുകളഞ്ഞ ബൈക്ക് യാത്രക്കാരനായ ഒമ്പതുവയസുകാരനായ വിദ്യാര്‍ഥി പിടിയില്‍. വിദ്യാര്‍ഥിക്കെതിരേ തുടര്‍ നടപടി സ്വീകരിക്കുമെന്ന് ബാലുശേരി പോലീസ് അറിയിച്ചു. വിദ്യാര്‍ഥിയുടെ പിതാവിന്‍റെ പേരിലാണ് ബൈക്ക്. ഇദ്ദേഹത്തെിനെതിരേയും കേസ് എടുക്കും. അപകടം വരുത്തിയ ഗ്ലാമർ ബൈക്ക് പോലീസ് കസ്റ്റഡിയില്‍ എടുത്തിട്ടുണ്ട്. ഈ മാസം 17-ന് വൈകുന്നേരമാണ് അപകടമുണ്ടായത്. വിദ്യാര്‍ഥിക്കൊപ്പം സഹപാഠിയും ബൈക്കില്‍ സഞ്ചരിച്ചിരുന്നു. തെറ്റായ സൈഡിലൂടെ എത്തിയ ഇവരുടെ ബൈക്ക് തൊട്ടെതിരേ വരികയായിരുന്ന സ്‌കൂട്ടറിനെ ഇടിച്ചുതെറിപ്പിക്കുകയായിരുന്നു. നിയന്ത്രണംവിട്ട ബൈക്ക് തൊട്ടുമുന്നിലുണ്ടായിരുന്ന ഇലക്ട്രിക് പോസ്റ്റിലിടിക്കാതെ ഭാഗ്യം കൊണ്ടാണ് രക്ഷപ്പെട്ടത്.അപകടം വരുത്തിയശേഷം അവിടെ നില്‍ക്കാതെ ബൈക്കില്‍ രക്ഷപ്പെടുകയായിരുന്നു. അപകടസമയത്ത് ശക്തമായ മഴയുണ്ടായിരുന്നു. അപകടത്തിന്‍റെ സിസിടിവി ദൃശ്യങ്ങള്‍ പരിേശാധിച്ച് പോലീസ് നടത്തിയ അന്വേഷണത്തിലാണ് ബൈക്കും അത് ഓടിച്ചയാളെയും മനസിലായത്. പിതാവ് അറിയാതെയാണ് കുട്ടി ബൈക്ക് ഉപയോഗിച്ചതെന്നാണ് പോലീസ് നല്‍കുന്ന സൂചന.

സ്കൂട്ടർ മോഷ്ടാവ് പിടിയിൽ

കോഴിക്കോട്: കുന്നമംഗലത്ത്നിന്നും സ്കൂട്ടർ മോഷ്ടിച്ച ആന്ധ്രാപ്രദേശ് സ്വദേശി മണിക്കൂറുകൾക്കുള്ളിൽ പിടിയിൽ. കല്ലുരു ഒബ്ലേസു (40 ) വിനെയാണ് കുന്നമംഗലം പോലീസ് അറസ്റ്റ് ചെയ്തത്. 30ന് രാത്രി കുന്നമംഗലം സംഗമം ഹോട്ടലിന് മുൻവശം ചാവിയോടെ നിർത്തിയിട്ടിരുന്ന വെള്ളന്നൂർ സ്വദേശിയായ അരുണിന്‍റെ പേരിലുള്ള സ്കൂട്ടർ പ്രതി മോഷ്ടിച്ചു കൊണ്ടു പോകുകയായിരുന്നു. തുടർന്ന് കുന്നമംഗലം പോലീസ് കേസ് രജിസ്റ്റർ ചെയ്ത് അന്വേഷണം നടത്തുകയും സമീപപ്രദേശങ്ങളിലെ സിസിടിവി ദൃശ്യങ്ങൾ പരിശോധിച്ച് പ്രതിയെ പിടികൂടുയുമായിരുന്നു. പ്രതിയെ അടിവാരത്ത് വച്ച് മോഷ്ടിച്ച സ്കൂട്ടറുമായി കസ്റ്റഡിയിൽ എടുത്തു. പ്രതി കുന്നമംഗലം ഐഐഎമ്മിൽ കാന്‍റീൻ ഡ്രൈവറായി ജോലിചെയ്യുകയായിരുന്നു.

കംപ്യൂട്ടർ സയന്‍സിനോട് താത്പര്യം, മൂന്നാം റാങ്കിന്‍റെ മധുരത്തില്‍ അക്ഷയ് ബിജു

കോഴിക്കോട്: കീം പരീക്ഷയിൽ എന്‍ജിനിയറിംഗ് വിഭാഗത്തിൽ മൂന്നാം റാങ്ക് കരസ്ഥമാക്കിയതിന്‍റെ സന്തോഷത്തിലാണ് കോഴിക്കോട് കാക്കൂർ സ്വദേശി അക്ഷയ് ബിജു. ജെഇഇ മെയിൻ പരീക്ഷയിൽ കേരളത്തിൽ ഒന്നാമനായ അക്ഷയ് ബിജുവിന്‍റെ (98 റാങ്ക് )കഠിനാധ്വാനത്തിന് ഇരട്ടി മധുരം നൽകുന്നതാണ് ഈ നേട്ടം. കാൺപൂർ ഐഐടിയിൽ കംപ്യൂട്ടർ സയൻസിന് ചേരണമെന്നാണ് ആഗ്രഹം. ആറാം ക്ലാസ് മുതൽ ഐഐടി പ്രവേശനം ലക്ഷ്യമിട്ടു പരിശീലനത്തിനു പോയിരുന്നു. സ്കൂള്‍ ദിവസങ്ങളിൽ ഏഴു മണിക്കൂറോളം വീട്ടിൽ ഇരുന്ന് പഠിക്കാൻ അക്ഷയ് സമയം കണ്ടെത്തിയിരുന്നു. പുലർച്ചെ 4.30 മുതൽ സ്കൂളിലേക്ക് പോകും വരെയായിരുന്നു പഠനം. സ്കൂൾ വിട്ടുവന്ന ശേഷം വൈകിട്ട് 6.30 മുതൽ രാത്രി 10 വരെ പഠിക്കും. സ്കൂൾ ഇല്ലാത്ത ദിവസങ്ങളിൽ 13 മണിക്കൂറായിരുന്നു പഠനം. കോഴിക്കോട് മാനാഞ്ചിറ അഡീഷണൽ സബ് ട്രഷറി ജൂണിയര്‍ സൂപ്രണ്ടായ എൻ.ബിജുവിന്‍റെയും ആലപ്പുഴയില്‍ ആയൂര്‍ വേദ ഡോക്ടറായ സി.കെ.നിഷയുടെയും മകനായ അക്ഷയ്‌ കോഴിക്കോട് മലാപ്പറമ്പ് വേദവ്യാസ വിദ്യാലയത്തിലാണ് പത്താം ക്ലാസ് പൂർത്തിയാക്കിയത്. തുടർന്ന് കോട്ടയം മാന്നാനം കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂളിൽ നിന്നും പ്ലസ് ടു പൂർത്തിയാക്കി. ചെറുപ്പം മുതലേ കൃത്യമായ ലക്ഷ്യമിട്ടായിരുന്നു മകന്‍റെ പഠനമെന്നാണ് രക്ഷിതാക്കൾ പറയുന്നത്. അതിന്‍റെ വിജയമാണ് മകൻ നേടിയതെന്നും ബിജുവും നിഷയും പറയുന്നു. പഠനത്തിനു പുറമെ ചിത്രരചനയും ചെസുമാണ് അക്ഷയ്ക്ക് ഇഷ്ടം. സേലം മെഡിക്കല്‍ കോളജിലെ എംബിബിഎസ് വിദ്യാര്‍ഥിനിയായ ബി.എന്‍. ഗോപിക ഏക സഹോദരിയാണ്.പിതാവ് ബിജു മുന്‍പ് ദീപിക ദിനപത്രത്തില്‍ കണ്ണൂര്‍ യൂണിറ്റില്‍ ടെക്‌നിക്കല്‍ സ്റ്റാഫായി ജോലി ചെയ്തിരുന്നു.

മെഡിക്കല്‍ കോളജിലെ കുടിശിക :ചികിത്സാ ഉപകരണ വിതരണക്കാരുടെ നിര്‍ണായകയോഗം 10ന്

കോഴിക്കോട്: തിരുവനന്തപുരം മെഡിക്കല്‍ കോളജിലെ ശസ്ത്രക്രിയ മാറ്റിവയ്ക്കല്‍ വിവാദം ആരോഗ്യ വകുപ്പിനെ പ്രതിസന്ധിയിലാക്കിയിരിക്കേ കോഴിക്കോട് മെഡിക്കല്‍ കോളജും സമാന അവസ്ഥയിലേക്ക്. മെഡിക്കല്‍ കോളജിലേക്കുള്ള സ്‌റ്റെന്‍ഡ്, വാൽവ്, പേസ് മേക്കർ വിതരണം പ്രതിസന്ധിയിലേക്ക് നീങ്ങുകയാണ്. ഹൃദയ ചികിത്സയ്ക്കായി കാർഡിയോളജി, ഇന്‍റർവെൻഷനൽ റേഡിയോളജി വിഭാഗത്തിലേക്കുള്ള സ്‌റ്റെന്‍റ്, വാൽവ്, പേസ് മേക്കർ, ബലൂൺ, കത്തീറ്റർ വയർ, ഗൈഡ് വയർ തുടങ്ങിയ ഉപകരണങ്ങൾ നൽകിയ വകയിൽ കോഴിക്കോട് മെഡിക്കൽ കോളജിൽനിന്ന് മാത്രം 30 കോടിയിലേറെ കുടിശികയുണ്ടെന്ന് സ്‌റ്റെന്‍റ്, വാൽവ് വിതരണക്കാരുടെ സംഘടനയായ ചേംബർ ഓഫ് ഡിസ്ട്രിബ്യൂട്ടേഴ്‌സ് ഓഫ് മെഡിക്കൽ ഇംപ്ലാന്‍റ്സ് ആൻഡ് ഡിസ്‌പോസബിൾസ് ഭാരവാഹികൾ പറയുന്നു. 10ന് സ്‌റ്റെന്‍റ് വിതരണ സംഘടനയുടെ സംസ്ഥാന പ്രവർത്തകസമിതി യോഗം നടക്കും. ഈ യോഗത്തിൽ വിതരണം നിർത്തുന്നത് സംബന്ധിച്ച് അന്തിമ തീരുമാനമെടുക്കുമെന്ന് ഭാരവാഹികൾ പറഞ്ഞു. അതേസമയം ഇതുവരെ ആരോഗ്യ വകുപ്പ് വിഷയത്തില്‍ ഇടപെട്ടിട്ടില്ല. ആശുപത്രിയിലേക്കുള്ള മരുന്ന്, സർജിക്കൽ ഉപകരണങ്ങൾ വിതരണം ചെയ്ത വകയിൽ കോടികൾ കുടിശികയെന്നു വിതരണക്കാർ. മരുന്നു വിതരണക്കാർക്കു 65 കോടിയോളം രൂപയും ഉപകരണങ്ങൾ വിതരണം ചെയ്തതിൽ 30 കോടിയോളം രൂപയുമാണു കുടിശിക. ഒരു മാസം ഏകദേശം മൂന്ന്കോടിയാണ് കുടിശിക. ആരോഗ്യ മന്ത്രി അനാരോഗ്യമന്ത്രിയായി മാറി: ഷാഫി പറമ്പില്‍ എംപി കോഴിക്കോട്: എല്‍ഡിഎഫ് സര്‍ക്കാരിനെ ജനം അറബി കടലില്‍ താഴ്ത്തുമെന്നും സര്‍ക്കാരിന്‍റെ എക്‌സിറ്റ് ഓഡര്‍ ജനങ്ങള്‍ ഒപ്പിട്ടു കഴിഞ്ഞുവെന്നും കെപിസിസി വര്‍ക്കിംഗ് പ്രസിഡന്‍റ് ഷാഫി പറമ്പില്‍ എംപി. ശസ്ത്രക്രിയ ഉപകരണങ്ങളുടെയും മരുന്നിന്‍റെയും ക്ഷാമം മൂലം ഗവ.മെഡിക്കല്‍ കോളജ് നേരിടുന്ന ദുരവസ്ഥക്കെതിരേ കോളജിന് മുന്നില്‍ ജില്ല കോണ്‍ഗ്രസ് കമ്മിറ്റി സംഘടിപ്പിച്ച ധര്‍ണ ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിലെ ആരോഗ്യ മന്ത്രി അനാരോഗ്യമന്ത്രിയായി മാറിയെന്നും കേരളത്തിലെ ആരോഗ്യവകുപ്പിനെ പിടികൂടിയിരിക്കുന്ന ഗുരുതരമായ രോഗമാണ് പിആര്‍ അഡിക്ഷനെന്നും ഷാഫി പറമ്പില്‍ വിമര്‍ശിച്ചു. ആ അസുഖം മാറുമെന്ന് തോന്നുന്നില്ല. കാരണം അതാണ് നിലനില്‍പ്പ് എന്നു കരുതുന്നയാളാണ് കേരളം ഭരിക്കുന്നത്. ആരോഗ്യമേഖലയില്‍ ഉണ്ടായ അടിസ്ഥാന വികസനം കേരളം കാലാകാലങ്ങളായി ഉണ്ടാക്കിയെടുത്തതാണ്. അതിനുമുകളിലുള്ള പിആര്‍ എക്‌സസൈസ് ആണ് കഴിഞ്ഞ ഒന്‍പത് വര്‍ഷമായി കേരളത്തിലെ ആരോഗ്യവകുപ്പ് ചെയ്തുകൊണ്ടിരിക്കുന്നത്. ആരോഗ്യമന്ത്രി ആ സ്ഥാനത്ത് തുടരാന്‍ യോഗ്യയല്ല. തീപിടിത്തത്തത്തുടര്‍ന്ന് അടച്ചിട്ട കോഴിക്കോട് മെഡിക്കല്‍ കോളജിലെ കാഷ്വാലിറ്റി ബ്ലോക്ക് ഇതുവരെ തുറക്കാത്തത് എന്തുകൊണ്ട് എന്നതിന് മറുപടിയില്ലെന്നും എംപി പറഞ്ഞു. കോളജിലെ കാഷ്വാലിറ്റി വിഷയത്തില്‍ കോണ്‍ഗ്രസ് പ്രതിഷേധവുമായി രംഗത്തുണ്ടാകുമെന്നും ഷാഫി പറമ്പില്‍ പറഞ്ഞു. ഡിസിസി പ്രസിഡന്‍റ് കെ. പ്രവീണ്‍കുമാര്‍ അധ്യക്ഷത വഹിച്ചു.

സോളാര്‍ ഫെന്‍സിംഗ് പദ്ധതി പാളി: കക്കയത്ത് വീണ്ടും ഭീഷണി വിതച്ച് കാട്ടുപോത്തുകള്‍

കൂരാച്ചുണ്ട്: കക്കയത്ത് ഭീഷണി വിതക്കുന്ന കാട്ടുപോത്ത് അടക്കമുള്ള വന്യജീവികളെ പ്രതിരോധിക്കാനായി വനംവകുപ്പ് ആരംഭിച്ച ഫെന്‍സിംഗ് പദ്ധതി പാതിവഴിയില്‍. കൂരാച്ചുണ്ട് പഞ്ചായത്ത് നാലാം വാര്‍ഡ് കക്കയം ഡാംസൈറ്റ് റോഡിലെ ജനവാസ കേന്ദ്രത്തില്‍ തുടര്‍ച്ചയായി കാട്ടുപോത്തിറങ്ങി ജനജീവിതത്തിനു ഭീഷണി സൃഷ്ടിച്ചതിനെ തുടര്‍ന്നായിരുന്നു വനാതിര്‍ത്തിയില്‍ 2.5 കിലോമീറ്റര്‍ ദൂരത്തില്‍ ഫെന്‍സിംഗ് സ്ഥാപിക്കല്‍ പ്രവൃത്തി കഴിഞ്ഞ മെയ് 21ന് ആരംഭിച്ചത്. ചുരുങ്ങിയ ദിവസം മാത്രമാണ് പ്രവൃത്തി നടന്നത്. ഫെന്‍സിംഗ് വനാതിര്‍ത്തിയില്‍ സ്ഥാപിക്കാനായിരുന്നു തീരുമാനം. പക്ഷെ ഫെന്‍സിംഗ് റോഡരികില്‍ സ്ഥാപിച്ചതോടെയാണ് പ്രശ്‌നമായത്. ഫെന്‍സിംഗ് സ്ഥാപിച്ച സ്ഥലം പൊതുമരാമത്ത് വക സ്ഥലത്തായതാണ് പ്രതിസന്ധിക്കിടയാക്കിയത്. ഫെന്‍സിംഗ് റോഡരികില്‍ സ്ഥാപിച്ചാല്‍ വാഹനങ്ങള്‍ കടന്നു പോകുന്നതിനു േറാഡിന് വീതി കുറയുമെന്ന ആക്ഷേപവും ഉയര്‍ന്നിരുന്നു. ഇപ്പോള്‍ ഒരു മാസത്തിലേറെയായി പ്രവൃത്തി മുടങ്ങിക്കിടക്കുകയാണ്. അതിനിടെ ഈ മേഖലയിലെ കൃഷിയിടങ്ങളില്‍ കാട്ടുപോത്തുകള്‍ വീണ്ടും പ്രത്യക്ഷപ്പെട്ടു തുടങ്ങി. കര്‍ഷകര്‍ ഏറെ ആശങ്കയിലാണ്. കൃഷിയിടത്തില്‍ ജോലി ചെയ്യാന്‍ ആളുകള്‍ ഭയപ്പെടുകയാണ്. അടുത്തിടെ ഡാം റോഡില്‍ യാത്ര ചെയ്തവര്‍ കാട്ടുപോത്ത് കൂട്ടത്തെ കണ്ടിരുന്നു. കക്കയത്ത് കാട്ടുപോത്ത് ആക്രമണത്തില്‍ കര്‍ഷകന്‍ കൊല്ലപ്പെട്ടതിനെ തുടര്‍ന്ന് നിരവധി സമരങ്ങള്‍ അരങ്ങേറി ഒരു വര്‍ഷം കഴിഞ്ഞാണ് വനം വകുപ്പ് വനാതിര്‍ത്തിയില്‍ ഫെന്‍സിംഗ് സ്ഥാപിക്കാനുള്ള നടപടികള്‍ ആരംഭിച്ചത്. ഭൂമി സംബന്ധമായ പ്രശ്‌നങ്ങള്‍ പരിഹരിച്ച് അടിയന്തരമായി വനഭൂമിയില്‍ തന്നെ സോളാര്‍ ഫെന്‍സിംഗ് സ്ഥാപിച്ച് എത്രയും വേഗം വന്യമൃഗ ഭീഷണിക്ക് പരിഹാരം കാണണമെന്നാണ് ആവശ്യം ഉയരുന്നത്. ജനങ്ങളുടെ ജീവന്‍ പന്താടരുത് കക്കയത്ത് കാട്ടുപോത്ത് ആക്രമണത്തില്‍ കര്‍ഷകന്‍ കൊല്ലപ്പെട്ടതിനു ശേഷം ഫെന്‍സിംഗ് നിര്‍മിക്കുമെന്ന് അധികൃതര്‍ നല്‍കിയ ഉറപ്പ് ഇതുവരെ പാലിക്കപ്പെട്ടിട്ടില്ല. കരാറുകാരന്‍ സാങ്കേതിക കാരണത്തിന്‍റെ പേരില്‍ പ്രവര്‍ത്തി ഇടയ്ക്ക് വച്ച് നിര്‍ത്തി പോവുകയാണുണ്ടായത്. ജനങ്ങളുടെ ജീവന്‍ വെച്ച് അധികാരികള്‍ പന്താടുകയാണ്. പൊതുവഴിയില്‍ നിന്നും വനാതിര്‍ത്തിയിലേക്ക് ഫെന്‍സിംഗ് മാറ്റി സ്ഥാപിക്കണമെങ്കില്‍ കേന്ദ്രത്തിന്‍റെ അംഗികാരം ഇനിയും വാങ്ങണമെന്നാണ് കക്കയത്തെ വനം ഉദ്യോഗസ്ഥരുടെ നിലപാട്. പേപ്പട്ടികളെയും വന്യമൃഗങ്ങളെയും സംരക്ഷിക്കാന്‍ ചിലവഴിക്കുന്ന കോടിക്കണക്കിന് രൂപയുടെ ചെറിയ ശതമാനമെങ്കിലും ജനങ്ങളുടെ ജീവനും സ്വത്തിനും സംരക്ഷിക്കാന്‍ വിനിയോഗിക്കണം. വന്യമൃഗങ്ങള്‍ കൃഷി നശിപ്പിക്കുന്നത് അര്‍ഹമായ നഷ്ടപരിഹാരവും നല്‍കണം. ജോണ്‍സണ്‍ കക്കയം. ( എകെസിസി രൂപതാ സെക്രട്ടറി) വനംവകുപ്പ് പരാജയം കക്കയത്ത് ജനവാസ കേന്ദ്രങ്ങളില്‍ കാട്ടുപോത്ത് അടക്കമുള്ള വന്യമൃഗങ്ങള്‍ ജനങ്ങള്‍ക്ക് കടുത്ത ഭീഷണി സൃഷ്ടിക്കുകയാണ്. ജനങ്ങളുടെ ജീവനും സ്വത്തിനും സംരക്ഷണം നല്‍കുന്നതില്‍ വനംവകുപ്പ് പരാജയപ്പെടുകയാണ്. സോളാര്‍ ഫെന്‍സിംഗ് പദ്ധതി എങ്ങുമെത്തിയില്ല. പ്രശ്‌നത്തിന് പരിഹാരം കാണാന്‍ ഇനിയും വൈകരുത്. ജോണ്‍ വേമ്പുവിള. (കക്കയത്തെ കര്‍ഷകന്‍)

മുത്തശ്ശിപ്പാറ ഇക്കോ ടൂറിസം പദ്ധതിയില്‍

കോഴിക്കോട്: പ്രകൃതിയിലേക്ക് വാതില്‍ തുറക്കുന്ന മുഖമാണ് കായണ്ണ ഗ്രാമപഞ്ചായത്തിലെ മുത്തശ്ശിപ്പാറക്ക്. ഇക്കോടൂറിസം പദ്ധതിയില്‍ ഉള്‍പ്പെടുത്തിയതോടെ മുഖം മിനുക്കലിനൊരുങ്ങുകയാണ് വിനോദ സഞ്ചാരികളുടെ ഇഷ്ട ഇടങ്ങളിലൊന്നായ മുത്തശ്ശിപ്പാറ. വനം വകുപ്പുമായി കായണ്ണ ഗ്രാമപഞ്ചായത്ത് അധികൃതര്‍ നടത്തിയ ചര്‍ച്ചയിലാണ് ഇക്കോ ടൂറിസം പദ്ധതിയില്‍ ഉള്‍പ്പെടുത്താന്‍ ധാരണയായത്. പാറയുടെ മുകളിലെത്തിയാല്‍ അറബിക്കടലും മലനിരകളും കാണാം. കൂടുതല്‍ ഹരിതഭംഗിയോടെ വയനാടിന്‍റെ വനപ്രദേശങ്ങളും വയലടയും ദൃശ്യമാകും. പയ്യോളി കടല്‍ തീരമാണ് മറുവശം. ശൈത്യകാലത്തെ കാഴ്ചകളാണ് കൂടുതല്‍ മനോഹരം. ടൂറിസം കേന്ദ്രത്തിന്‍റെ വികസനത്തിന് 10 ലക്ഷം രൂപയാണ് വനം വകുപ്പ് അനുവദിച്ചത്. ഇതുപയോഗിച്ച് നടപ്പാത, ഹാന്‍ഡ് റെയില്‍, ഇരിപ്പിടം തുടങ്ങിയവ നിര്‍മിക്കും. ടിക്കറ്റ് കൗണ്ടര്‍ സ്ഥാപിക്കുന്നതോടൊപ്പം മൂന്ന് ടൂറിസം ഗൈഡുകളെയും അനുവദിക്കും. കുടിവെള്ളം, ശുചിമുറി എന്നിവക്കായി കായണ്ണ ഗ്രാമപഞ്ചായത്ത് 10 ലക്ഷം രൂപയാണ് വകയിരുത്തിയത്. ഈ കേന്ദ്രത്തിലെത്തുന്ന 800 മീറ്റര്‍ റോഡ് വികസനത്തിന് 10 ലക്ഷവും നീക്കിവെച്ചു. സംരക്ഷണ വേലി, ഇരിപ്പിടം, സോളാര്‍ ലൈറ്റ്, പ്രവേശന കവാടം, ടിക്കറ്റ് കൗണ്ടര്‍ ശില്‍പം എന്നിവ വനം വകുപ്പ് ഒരുക്കും. റോഡ്, കുടിവെള്ളം, ടോയ്ലറ്റ്, വേസ്റ്റ് ബിന്‍ എന്നിവ പഞ്ചായത്തും നിര്‍മിക്കും. മുത്തശ്ശിപ്പാറയുടെ സമീപത്തെ ഗുഹയും ടൂറിസം സാധ്യത പരിശോധിച്ച് വികസിപ്പിക്കും. കുത്തനെയുള്ള പാറയിലൂടെ മുകളില്‍ കയറാന്‍ ട്രക്കിങ് സൗകര്യം ഒരുക്കും. നാടന്‍ ഭക്ഷണം നല്‍കുന്ന കഫറ്റീരിയ, ഹോം സ്റ്റേ തുടങ്ങിയ സൗകര്യങ്ങളും പൊതുജന പങ്കാളിത്തത്തോടെ നടപ്പാക്കുമെന്ന് കായണ്ണ ഗ്രാമപഞ്ചായത്ത് പ്രസിഡന്‍റ് സി.കെ. ശശി പറയുന്നു.

സരോവരം പാര്‍ക്ക് വികസന പ്രവൃത്തികള്‍ അന്തിമഘട്ടത്തില്‍

കോഴിക്കോട്: ജില്ലയിലെ പ്രധാന വിനോദസഞ്ചാര കേന്ദ്രങ്ങളിലൊന്നായ സരോവരം ബയോപാര്‍ക്ക് നവീകരണം അവസാനഘട്ടത്തില്‍. ജില്ലയിലെ മികച്ച വിനോദസഞ്ചാര കേന്ദ്രമായി പാര്‍ക്കിനെ മാറ്റുന്നതിന്റെ ഭാഗമായാണ് ടൂറിസം വകുപ്പ് വിവിധ പ്രവൃത്തികള്‍ നടത്തുന്നത്. നവീകരണത്തിന്‍റെ ഭാഗമായ ചുറ്റുമതില്‍ നിര്‍മാണവും കുട്ടികളുടെ പാര്‍ക്കിന്‍റെ പ്രവൃത്തികളും ഗ്രീന്‍ ഷെല്‍ട്ടറുകള്‍ മാറ്റിസ്ഥാപിക്കലും പുരോഗമിക്കുകയാണ്. കുട്ടികളുടെ കളിസ്ഥലത്ത് പുതിയ ഉപകരണങ്ങള്‍ സ്ഥാപിക്കും. പാര്‍ക്കിലെ പഴയ ബള്‍ബുകളും വിളക്കുകാലുകളും മാറ്റും. റെയിന്‍ ഷെല്‍ട്ടറുകളുടെ നവീകരണവും പഴയ ഓട് മാറ്റിസ്ഥാപിക്കലും പെയിന്‍റങ്, വെല്‍ഡിങ് പ്രവൃത്തികളുമാണ് പൂര്‍ത്തിയായത്. 40 സിസിടിവി കാമറകളും 30 വേസ്റ്റ് ബിന്നും പാര്‍ക്കിന്‍റെ വിവിധയിടങ്ങളിലായി ഉടന്‍ സജ്ജീകരിക്കും. ഓപണ്‍ എയര്‍ തിയറ്റര്‍, കല്ലുപാകിയ നടപ്പാത, മരംകൊണ്ടുള്ള ചെറുപാലങ്ങള്‍, സെക്യൂരിറ്റി ക്യാബിന്‍, കവാടം എന്നിവയെല്ലാം മനോഹരമാക്കും. തകര്‍ന്നതും തുരുമ്പെടുത്തതുമായ ഇരിപ്പിടങ്ങള്‍, അമിനിറ്റി സെന്‍റര്‍, കഫറ്റീരിയ, ടോയ്ലറ്റ് ബ്ലോക്ക് എന്നിവയും നവീകരിക്കും. 2024ലാണ് നവീകരണത്തിനായി 2.19 കോടിയുടെ പദ്ധതിക്ക് ഭരണാനുമതി ലഭിച്ചത്. ഓപണ്‍ ജിം, ബോട്ടിങ് സൗകര്യം, ചിത്രശലഭ പാര്‍ക്ക്, പക്ഷിസങ്കേതം, ബോര്‍ഡ്-വാക്ക് എന്നിവയും പാര്‍ക്കിലെ ആകര്‍ഷണങ്ങളാണ്.

ജീവനക്കാരുടെ സര്‍ക്കാര്‍ ക്ഷേമം അട്ടിമറിച്ചു: എന്‍ജിഒ അസോ.

താമരശേരി: സംസ്ഥാന ജീവനക്കാരുടെയും അധ്യാപകരുടെയും ശമ്പളപരിഷ്‌കരണവും ക്ഷാമബത്തയും സര്‍ക്കാര്‍ അട്ടിമറിച്ചിരിക്കുകയാണെന്ന് എന്‍ജിഒ അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശ്ശേരി പറഞ്ഞു. എന്‍ജിഒ അസോസിയേഷന്‍റെ നേതൃത്വത്തില്‍ താമരശേരി താലൂക്ക് ഓഫീസിന് മുന്‍പില്‍ നടത്തിയ പ്രതിഷേധ കൂട്ടായ്മ ഉദ്ഘാടനം ചെയ്യുകയായിരുന്നു അദ്ദേഹം. ബ്രാഞ്ച് പ്രസിഡന്‍റ് പി.അരുണ്‍ അധ്യക്ഷനായി. സെറ്റോ ജില്ലാ ചെയര്‍മാന്‍ സിജു കെ. നായര്‍, കെ. അജിത് കുമാര്‍, കെ.ഫവാസ്, ബി.സി. സാജേഷ്, കെ.കെ. ഷൈജേഷ്, കെ. സുധീര, സി.ബിനീഷ് എന്നിവര്‍ പ്രസംഗിച്ചു. പ്രതിഷേധ പ്രകടനത്തിന് കെ. അബ്ദുള്‍ റഹീം, പി.വി. സന്ദീഷ്, പി. ഉണ്ണികണ്ണന്‍, ഷാബി പെരുവയല്‍ കെ.ആയിഷകുട്ടി, പി. ഷമീര്‍ എന്നിവര്‍ നേതൃത്വം നല്‍കി.

സ്‌കൂളുകളില്‍ പേവിഷ ബോധവത്ക്കരണ പരിപാടികള്‍ക്ക് തുടക്കം

കോഴിക്കോട്: പേവിഷബാധക്കെതിരെ ആരോഗ്യ വകുപ്പിന്‍റെയും വിദ്യാഭ്യാസ വകുപ്പിന്‍റെയും ആഭിമുഖ്യത്തില്‍ ജില്ലയിലെ സ്‌കൂളുകളില്‍ നടത്തുന്ന ബോധവത്കരണ പരിപാടികള്‍ക്ക് തുടക്കമായി. ആദ്യഘട്ടമായി സ്‌കൂള്‍ അസംബ്ലികളില്‍ ബോധവത്കരണ ക്ലാസ് സംഘടിപ്പിച്ചു. മൃഗങ്ങളുടെ കടിയോ മാന്തലോ പോറലോ ഏറ്റാല്‍ രോഗപ്രതിരോധത്തിന്റെ ഭാഗമായി നല്‍കേണ്ട പ്രഥമ ശുശ്രൂഷ, വാക്സിനേഷന്‍, മൃഗങ്ങളോട് ഇടപഴകുമ്പോള്‍ ശ്രദ്ധിക്കേണ്ട കാര്യങ്ങള്‍ എന്നിവയിലായിരുന്നു ക്ലാസ്. പരിപാടിയുടെ ജില്ലാതല ഉദ്ഘാടനം കോഴിക്കോട് പ്രൊവിഡന്‍സ് ഗേള്‍സ് ഹയര്‍സെക്കന്‍ഡറി സ്‌കൂളില്‍ ജില്ലാ മെഡിക്കല്‍ ഓഫീസര്‍ ഡോ.കെ.കെ.രാജാറാം നിര്‍വഹിച്ചു. പ്രധാനാധ്യാപിക സിസ്റ്റര്‍ എ.സി.മിനിഷ അധ്യക്ഷത വഹിച്ചു. ജില്ലാ എഡ്യൂക്കേഷന്‍ ആന്‍ഡ് മീഡിയ ഓഫീസര്‍ ഡോ. എല്‍. ഭവില പ്രതിജ്ഞ ചൊല്ലിക്കൊടുത്തു. ഡോ. കെ.ടി. മുഹ്സിന്‍, സി. ദിവ്യ, പിടിഎ പ്രസിഡന്‍റ് സജീവ് കുമാര്‍ തുടങ്ങിയവര്‍ സംസാരിച്ചു.

ക്രൈസ്തവ പീഡനത്തിനെതിരെ എകെസിസിയുടെ പ്രതിഷേധം

നെല്ലിപ്പൊയില്‍: നൈജീരിയയിലും സിറിയയിലും ക്രിസ്തുമതത്തില്‍പ്പെട്ടവരെ കൂട്ടക്കൊല ചെയ്തതിലും മധ്യപ്രദേശ് ഉള്‍പ്പെടെയുള്ള സംസ്ഥാനങ്ങളില്‍ നടക്കുന്ന ക്രിസ്തുമത വിശ്വാസികള്‍ക്കെതിരേയുള്ള പീഡനങ്ങളിലും പ്രതിഷേധിച്ച് കത്തോലിക്ക കോണ്‍ഗ്രസ് മഞ്ഞുവയല്‍ യൂണിറ്റ് പ്രകടനവും പൊതുയോഗവും സംഘടിപ്പിച്ചു. കത്തോലിക്ക കോണ്‍ഗ്രസ് കോടഞ്ചേരി ഫൊറോന പ്രസിഡന്‍റ് ജോസഫ് ആലവേലിയില്‍ യോഗം ഉദ്ഘാടനം ചെയ്തു. കത്തോലിക്ക കോണ്‍ഗ്രസ് രൂപത സോഷ്യല്‍ മീഡിയ കോ ഓര്‍ഡിനേറ്റര്‍ ജോസഫ് മൂത്തേടത്ത്, യൂത്ത്‌വിംഗ് രൂപതാ എക്‌സിക്യൂട്ടീവ് അംഗം ലൈജു അരീപ്പറമ്പില്‍, ഷിന്‍റോ കുന്നപ്പള്ളിയില്‍, ഡെല്ലീസ് കാരിക്കുഴിയില്‍, മാത്യു തേക്കുംകാട്ടില്‍, ബേബി ആലവേലിയില്‍, ബിനോയ് തുരുത്തിയില്‍, ചാക്കോ ഓരത്ത്, സണ്ണി വെള്ളക്കാക്കൂടിയില്‍ തുടങ്ങിയവര്‍ പ്രസംഗിച്ചു. കെ.എല്‍. ജോസഫ്, ജോയ് ഇല്യാരത്ത്, ബിജു പഞ്ഞിക്കാരന്‍, അനൂപ് മുണ്ടിയാങ്കല്‍, ഷാരോണ്‍ പേണ്ടാനത്ത്, ആല്‍ബിന്‍ മൈലക്കല്‍, മിനി ഊന്നുകല്ലേല്‍, ജോസഫ് തൂങ്കുഴിയില്‍, തങ്കച്ചന്‍ കുന്നത്തേട്ട് എന്നിവര്‍ നേതൃത്വം നല്‍കി.

ഹോട്ടലില്‍ കയറി തൊഴിലാളിയെ മര്‍ദിച്ചു

കൂടരഞ്ഞി: ലഹരിക്ക് അടിമയായ നേപ്പാള്‍ സ്വദേശിയായ യുവാവ് കൂടെ ജോലി ചെയ്തിരുന്ന വെസ്റ്റ് ബംഗാള്‍ സ്വദേശിയായ ജീവനക്കാരനെ ഹോട്ടലില്‍ കയറി മര്‍ദിച്ചു. ലഹരി ഉപയോഗം കാരണം ഹോട്ടല്‍ ജോലിയില്‍ നിന്നും പുറത്താക്കിയ വൈരാഗ്യത്തെ തുടര്‍ന്ന് കമല്‍ എന്ന യുവാവാണ് ഹോട്ടലില്‍ കയറി സന്ദീപിനെ ആക്രമിച്ചത്. കൂടരഞ്ഞിയിലെ വിജയ് ഹോട്ടലില്‍ ഇന്നലെ രാത്രി പത്തുമണിയോടെയാണ് സംഭവം. നാലു ദിവസം മാത്രമാണ് നേപ്പാള്‍ സ്വദേശിയായ കമല്‍ ഹോട്ടലില്‍ ജോലിക്ക് നിന്നത്. യുവാവ് ലഹരിക്കടിമയാണെന്നു മനസിലാക്കിയ ഉടമ ഇയാളെ പറഞ്ഞു വിടുകയായിരുന്നു. തുടര്‍ന്ന് രാത്രിയില്‍ ഹോട്ടലില്‍ എത്തിയ യുവാവ് അവിടെ ജോലി ചെയ്തിരുന്ന സന്ദീപിനെ പുറത്തേക്ക് വിളിച്ച് മര്‍ദ്ദിച്ചു. കൈയ്ക്കും മുഖത്തും പരിക്കേറ്റ സന്ദീപിനെ ആശുപത്രിയില്‍ പ്രവേശിപ്പിച്ചു. ഹോട്ടല്‍ അധികൃതര്‍ തിരുവമ്പാടി പോലീസ് സ്റ്റേഷനില്‍ പരാതിയും മര്‍ദനത്തിന്‍റെ സിസിടിവി ദൃശ്യങ്ങളും നല്‍കി. പ്രതിക്ക് വേണ്ടി പോലീസ് അന്വേഷണം ആരംഭിച്ചു.

മണ്ണിടിച്ചില്‍ ദുരന്തം: പ്രതിഷേധ ധര്‍ണ്ണ നടത്തി

കോഴിക്കോട്: ബൈപ്പാസില്‍ നെല്ലിക്കോട് നിര്‍മ്മിക്കുന്ന ബഹുനില കെട്ടിടത്തിന്‍റെ ചുറ്റുമതില്‍ ഇടിഞ്ഞ് വീണ് ബംഗാള്‍ സ്വദേശിയായ തൊഴിലാളി മരിക്കാന്‍ ഇടയായ സംഭവത്തില്‍ സ്ഥാപന ഉടമക്കെതിരെ കൊലക്കുറ്റത്തിന് കേസ് എടുക്കണമെന്ന് ആവിശ്യപ്പെട്ട് നടക്കാവ് വണ്ടിപെട്ടയില്‍ ബിള്‍ഡേഴ്‌സ് ഓഫിസിന് മുന്‍പില്‍ പ്രതിഷേധ ധര്‍ണ്ണ സംഘടിപ്പിച്ചു. നവ ജനശക്തി കോണ്‍ഗ്രസ്സ് ദേശീയ പ്രസിഡന്‍റ് മനോജ് ശങ്കരനെല്ലൂര്‍ ഉദ്ഘാടനം ചെയ്തു. ജില്ലാ പ്രസിഡന്‍റ് ഗണേഷ് ബാബു പാലത്ത് അധ്യക്ഷത വഹിച്ചു. നബില്‍ അഹമ്മദ്, ടി.കെ.രവീന്ദ്രന്‍, ബാലകൃഷ്ണ കുറുപ്പ്, ഇര്‍ഷാദ് മീഞ്ചന്ത, ഉമ്മര്‍ മേത്തോട്ടത്താഴം, പത്മാവതി കുറ്റിക്കാട്ടൂര്‍, സജി പൂക്കാട്, രാമകൃഷ്ണന്‍ ചീക്കിലോട് തുടങ്ങിയവര്‍ പങ്കെടുത്തു

കൃഷിനാശ നഷ്ടപരിഹാര തുക വര്‍ധിപ്പിക്കണം: കര്‍ഷക സംഘം

കൂടരഞ്ഞി: വന്യമൃഗശല്യം, പ്രകൃതി ക്ഷോഭം എന്നിവ മൂലം നശിക്കുന്ന കൃഷിക്കും വിളകള്‍ക്കും നല്‍കുന്ന നഷ്ടപരിഹാരം കാലാനുസൃതമായി വര്‍ധിപ്പിക്കണമെന്ന് കര്‍ഷകസംഘം കൂടരഞ്ഞി മേഖല സമ്മേളനം ആവശ്യപ്പെട്ടു. കേന്ദ്ര വനം- വന്യജീവി സംരക്ഷണ നിയമം ഭേദഗതി ചെയ്യാന്‍ ശക്തമായ പ്രക്ഷോഭത്തിന് കര്‍ഷകസംഘം നേതൃത്വം നല്‍കും. മലയോര മേഖലയില്‍ തെങ്ങുകള്‍ക്ക് മഞ്ഞളിപ്പ് രോഗം ബാധിക്കുന്ന വിഷയം കൃഷി വകുപ്പ് പരിശോധനക്ക് വിധേയമാക്കണമെന്നും സമ്മേളനം ആവശ്യപ്പെട്ടു. ജില്ലാ കമ്മിറ്റിയംഗം ലിന്‍റോ ജോസഫ് എംഎല്‍എ ഉദ്ഘാടനം ചെയ്തു. ജിജി കട്ടക്കയം അധ്യക്ഷത വഹിച്ചു.കെ.എം. മോഹനന്‍,സി.എന്‍. പുരുഷോത്തമന്‍, തിരുവമ്പാടി കൃഷിഭവന്‍ ഓഫീസര്‍ ഫൈസല്‍, ജെറീന റോയി, കെ.എം.പ്രണുപ്, സെബാസ്റ്റ്യന്‍ പുളിക്കകണ്ടം എന്നിവര്‍ സംസാരിച്ചു. ഭാരവാഹികള്‍: ജിജി കട്ടക്കയം(പ്രസിഡന്‍റ്),കെ.എം. മോഹനന്‍ (സെക്രട്ടറി).

ചരക്കുലോറികള്‍ വഴിയില്‍ കുടുങ്ങി: വടകരയില്‍ ബസ് സര്‍വീസ് നിര്‍ത്തിവച്ചു

വടകര: ദേശീയപാതയില്‍ ചരക്കുലോറികള്‍ വഴിയില്‍ കുടുങ്ങിയതോടെ രൂക്ഷമായ ഗതാഗത കുരുക്ക്. കൈനാട്ടിക്കും ചോറോട് ഗേറ്റിനുമിടയിലാണ് ലോറികള്‍ അകപ്പെട്ടത്. ലോറികള്‍ നിശ്ചലമായതോടെ ഗതാഗത കുരുക്ക് മുര്‍ച്ഛിച്ചു. രാവിലെ ആറു മണിക്ക് തുടങ്ങിയ കുരുക്ക് മണിക്കൂറുകള്‍ പിന്നിട്ട ശേഷമാണ് സാധാരണ നിലയിലായത്. പാലത്തിന്‍റെ പണി നടക്കുന്നിടത്ത് റോഡിന്‍റെ ശോചനീയാവസ്ഥ കാരണം ഒരു ലോറിയാണ് ആദ്യം കുടുങ്ങിയത്. ഇതിന് തൊട്ടടുത്ത് തന്നെയാണ് മറ്റൊരു ചരക്കു ലോറിയും കുടുങ്ങിയത്. ഇതോടെ ഇതുവഴിയുള്ള ഗതാഗതം പൂര്‍ണമായും താറുമാറായി. വിദ്യാലയങ്ങളിലും ഓഫീസുകളിലും എത്തിപ്പെടേണ്ടവരെല്ലാം വഴിയില്‍ അകപ്പെട്ടു. ഗതാഗത കുരുക്കിനെ തുടര്‍ന്ന് വടകരയില്‍ ബസ് സര്‍വീസ് നിര്‍ത്തി. തലശേരി, നാദാപുരം റൂട്ടുകളിലെ മിക്ക ബസുകളും ഓട്ടം നിര്‍ത്തി വച്ചു. ഇതോടെ യാത്രക്കാര്‍ വലഞ്ഞു.

കായികതാരങ്ങളെ ആദരിച്ചു

കോഴിക്കോട്: ഉസ്ബെക്കിസ്ഥാനിലെ താഷ്‌കന്‍റില്‍ നടന്ന കാന്‍വാ നേഷന്‍സ് ലീഗ് വോളിബോള്‍ ടൂര്‍ണമെന്‍റില്‍ സില്‍വര്‍ മെഡല്‍ നേടിയ ഇന്ത്യന്‍ ടീമിലെ അംഗങ്ങളായിരുന്ന ദേവഗിരി സെന്‍റ് ജോസഫ്‌സ് (ഓട്ടോണമസ്) കോളജിലെ കെ.ആനന്ദ് , ഇ.ജെ. ജോണ്‍ ജോസഫ് , ചൈനയിലെ ഹോംങ്കോങില്‍ നടന്ന ഏഷ്യ കോര്‍ഫ്‌ബോളില്‍ ഇന്ത്യന്‍ ടീമിലെ അംഗമായിരുന്ന ജിയാ സെബാസ്റ്റ്യന്‍ എന്നിവരെയും വോളിബോള്‍ കോച്ച് ലിജോ.ഇ.ജോണിനെയും ദേവഗിരി കോളജില്‍ ആദരിച്ചു. പ്രിന്‍സിപ്പല്‍ ഫാ.ഡോ. ബിജു ജോസഫ് ഉപഹാരങ്ങള്‍ കൈമാറി.ഒന്നാം വര്‍ഷ ഡിഗ്രി പ്രവേശനം ലഭിച്ച 1300 കുട്ടികള്‍ക്കും അവരുടെ രക്ഷിതാക്കള്‍ക്കുമായി കോളജില്‍ സംഘടിപ്പിച്ച ഓറിയന്‍റേഷന്‍ ചടങ്ങില്‍ വച്ചാണ് കായികതാരങ്ങളെ ആദരിച്ചത്.മാനേജര്‍ ഫാ.ബിജു.കെ.ഐസക്, വൈസ് പ്രിന്‍സിപ്പല്‍ ഫാ.ഡോ.സുനില്‍ ജോസ്, ഫിസിക്കല്‍ എഡ്യുക്കേഷന്‍ വിഭാഗം മേധാവി ഫാ.ബോണി അഗസ്റ്റ്യന്‍, സ്റ്റാഫ് സെക്രട്ടറി ഷിന്റോ.പി.മാത്യു എന്നിവരും സന്നിഹിതരായിരുന്നു.

വികസന കുതിപ്പിനൊരുങ്ങി കുന്നമംഗലം ഗവ. കോളേജ്

കോഴിക്കോട്:ഉന്നത വിദ്യാഭ്യാസ മേഖലയില്‍ വികസനക്കുതിപ്പിനൊരുങ്ങി കുന്നമംഗലം ഗവ. ആര്‍ട്സ് ആന്‍ഡ് സയന്‍സ് കോളജ്. വെള്ളനൂര്‍ കോട്ടോല്‍കുന്നില്‍ ചാത്തമംഗലം പഞ്ചായത്ത് ഏറ്റെടുത്തുനല്‍കിയ 5.1 ഏക്കര്‍ ഭൂമിയില്‍ പ്രവര്‍ത്തിക്കുന്ന കോളേജില്‍ 12 ക്ലാസ് മുറികളും വിശാലമായ സെമിനാര്‍ ഹാളും രണ്ട് കമ്പ്യൂട്ടര്‍ ലാബുകളും ഉള്‍ക്കൊള്ളുന്ന മൂന്നുനില അക്കാദമിക് ബ്ലോക്ക് ഇന്ന് വൈകുന്നേരം മൂന്നിന് ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു ഉദ്ഘാടനം ചെയ്യും. കാന്‍റിന്‍, പെണ്‍കുട്ടികള്‍ക്കുള്ള ഹോസ്റ്റല്‍, ഓപണ്‍ എയര്‍ ഓഡിറ്റോറിയം, വുഷു പ്ലാറ്റ്ഫോം എന്നിവയും മന്ത്രി സമര്‍പ്പിക്കും. സംസ്ഥാന സര്‍ക്കാര്‍ കിഫ്ബി പദ്ധതിയില്‍ ഉള്‍പ്പെടുത്തി അനുവദിച്ച 10 കോടി രൂപ ഉപയോഗപ്പെടുത്തിയാണ് പുതിയ അക്കാദമിക് ബ്ലോക്കും കാന്‍റിനും ഹോസ്റ്റലും നിര്‍മിച്ചത്. പി.ടി.എ. റഹീം എംഎല്‍എയുടെ മണ്ഡലം ആസ്തി വികസന ഫണ്ടില്‍നിന്ന് അനുവദിച്ച 25 ലക്ഷം രൂ വിനിയോഗിച്ചാണ് വുഷു പ്ലാറ്റ്ഫോം നിര്‍മിച്ചത്. ഇതോടെ സ്വന്തമായി വുഷു പ്ലാറ്റ്ഫോം ഉള്ള സംസ്ഥാനത്തെ ആദ്യ കോളേജ് എന്ന നേട്ടവും സ്വന്തമായി. നിലവില്‍ കാലിക്കട്ട് യൂണിവേഴ്സിറ്റി ഇന്‍റര്‍ കോളജ് വുഷു ചാമ്പ്യന്മാരാണ്. സ്വന്തമായി ഫുട്ബോള്‍ ടര്‍ഫ് ഒരുക്കിയ ആദ്യ സര്‍ക്കാര്‍ കോളജ് കൂടിയാണിത്. സംസ്ഥാന സര്‍ക്കാര്‍ അനുവദിച്ച 92 ലക്ഷം രൂപ ഉപയോഗപ്പെടുത്തിയാണ് ഓപണ്‍ എയര്‍ ഓഡിറ്റോറിയം നിര്‍മിച്ചത്. ഇംഗ്ലീഷ്, ഇക്കണോമിക്സ്, കൊമേഴ്സ് വിഷയങ്ങളിലായി മൂന്ന് യു ജി പ്രോഗ്രാമുകളും ഗണിത വിഷയത്തില്‍ ഒരു പി ജി പ്രോഗ്രാമുമാണ് കോളജില്‍ നിലവിലുള്ളത്.

സ്വകാര്യ ബസും പിക്കപ്പ് ലോറിയും കൂട്ടിയിടിച്ച് നിരവധി പേര്‍ക്ക് പരിക്ക്

കോഴിക്കോട്: കാക്കൂരില്‍ സ്വകാര്യ ബസും പിക്കപ്പ് ലോറിയും കൂട്ടിയിടിച്ച് നിരവധി പേര്‍ക്ക് പരിക്ക്. ഇന്നെല ഉച്ചയ്ക്ക് രണ്ടരയോടെയാണ് അപകടം. കോഴിക്കോട്ടുനിന്ന് ബാലുശേരിയിലേക്ക് പോകുകയായിരുന്ന സ്വകാര്യ ബസും എതിര്‍ദിശയില്‍നിന്ന് വരികയായിരുന്ന മരം കയറ്റിയ പിക്കപ്പ് ലോറിയും തമ്മിലാണ് കൂട്ടിയിടിച്ചത്. കാക്കൂര്‍ പോലീസ് സ്‌റ്റേഷനു സമീപമാണ് അപകടം.സമീപത്തെ ഗ്രാനൈറ്റ് കടയുടെ മതിലില്‍ ഇടിച്ചാണ് ബസ് നിന്നത്. പരിക്കേറ്റവരെ സമീപത്തെ സ്വകാര്യ ആശുപത്രിയിലും ബാലുശേരി താലൂക്ക് ആശുപത്രിയിലും പ്രവേശിപ്പിച്ചു.

വടകര നഗരസഭ ഓഫീസ് കെട്ടിടം മുഖ്യമന്ത്രി നാടിന് സമര്‍പ്പിച്ചു

വടകര: ആധുനിക രീതിയില്‍ പണി കഴിപ്പിച്ച വടകര നഗരസഭ ഓഫീസ് കം ഷോപ്പിംഗ് കോംപ്ലക്സ് മുഖ്യമന്ത്രി പിണറായി വിജയന്‍ നാടിന് സമര്‍പ്പിച്ചു. 15 കോടി രൂപ ചെലവില്‍ നാലു നിലകളിലായി നിര്‍മിച്ച കെട്ടിടത്തില്‍ നഗരസഭ ഓഫീസ് കെട്ടിടം, കൗണ്‍സില്‍ ഹാള്‍, ലിഫ്റ്റുകള്‍, അഗ്നി ശമന നിയന്ത്രണ സംവിധാനം, പാര്‍ക്കിംഗ് സൗകര്യം, വിവിധ വകുപ്പുകള്‍ക്ക് പ്രത്യേകം മുറികള്‍ തുടങ്ങിയ സൗകര്യങ്ങളുണ്ട്. കേരള നിയമസഭയെ അനുസ്മരിപ്പിക്കുന്ന വിധത്തിലാണ് കൗണ്‍സില്‍ ഹാള്‍ സജീകരിച്ചിരിക്കുന്നത്. നെറ്റ് സീറോ ക്യാമ്പയിന്‍ പദ്ധതി ഏറ്റെടുത്ത കേരളത്തിലെ ആദ്യത്തെ നഗരസഭയയുടെ കെട്ടിടമായതിനാല്‍ ഹരിത, നെറ്റ് കാര്‍ബണ്‍ മാനദണ്ഡം പാലിച്ചാണ് കെട്ടിടം പരിപാലിക്കുക. മന്ത്രി പി.എ.മുഹമ്മദ് റിയാസ് അധ്യക്ഷത വഹിച്ചു. കെ.ജി.സന്ദീപ് റിപ്പോര്‍ട്ട് അവതരിപ്പിച്ചു. കെ.കെ.രമ എംഎല്‍എ, ഷാഫി പറമ്പില്‍ എംപി, കെ.പി.കുഞ്ഞമ്മദ് എംഎല്‍എ, മുന്‍ മന്ത്രി സി.കെ.നാണു എന്നിവര്‍ മുഖ്യാതിഥികളായി.

ജില്ലയില്‍ പുതിയ പോളിംഗ് ബൂത്തുകള്‍ സ്ഥാപിക്കും

കോഴിക്കോട്: പുതിയ പോളിങ് ബൂത്തുകള്‍ സ്ഥാപിക്കല്‍, വോട്ടര്‍ പട്ടിക പുതുക്കല്‍, ബൂത്ത് ലെവല്‍ ഏജന്‍റുമാരുടെ നിയമനം, ബിഎല്‍എ-ബിഎല്‍ഒ യോഗം തുടങ്ങിയവയുമായി ബന്ധപ്പെട്ട് രാഷ്ട്രീയ പാര്‍ട്ടി പ്രതിനിധികളുടെ യോഗം ചേര്‍ന്നു. 1200 വോട്ടര്‍മാര്‍ക്ക് ഒന്ന് അടിസ്ഥാനത്തില്‍ പുതിയ പോളിങ് ബൂത്തുകള്‍ സ്ഥാപിക്കുന്നതിനാവശ്യമായ നടപടികള്‍ സ്വീകരിക്കണമെന്നും ഇതിനുള്ള സ്ഥലങ്ങള്‍ ബന്ധപ്പെട്ട ഓഫീസര്‍ പരിശോധിക്കണമെന്നും യോഗത്തില്‍ അധ്യക്ഷത വഹിച്ച ജില്ലാ കളക്ടര്‍ സ്‌നേഹില്‍ കുമാര്‍ സിംഗ് ആവശ്യപ്പെട്ടു. വോട്ടര്‍പട്ടിക ശുദ്ധീകരണവുമായി ബന്ധപ്പെട്ട് പുതുതായി പേര് ചേര്‍ക്കുന്നതിനും അനര്‍ഹരെ ഒഴിവാക്കുന്നതിനും പ്രത്യേക പരിശോധന വേണമെന്നും കളക്ടര്‍ നിര്‍ദേശിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]