ചാത്തന്നൂർ: എസ്എൻഡിപി യോഗം ആർ. ശങ്കർ മെമോറിയൽ ചാത്തന്നൂർ യൂണിയനിൽ ശ്രീനാരായണ ഗുരുദേവന്റെ 170-ാമത് ജയന്തി ഇന്ന് ലളിതമായ ചടങ്ങുകളോടെ ആഘോഷിക്കും.
വൈകുന്നേരം നാലിന് കാരംകോട് എമ്പയർ ഓഡിറ്റോറിയത്തിൽ നടക്കുന്ന ജയന്തി സമ്മേളനവും പ്രതിഭാ സംഗമവും കാലടി സർവകലാശാല മുൻ വിസി ഡോ. കെ.എസ്. രാധാകൃഷ്ണൻ ഉദ്ഘാടനം ചെയ്യും. യൂണിയൻ പ്രസിഡന്റ് ബി.ബി. ഗോപകുമാർ അധ്യക്ഷത വഹിക്കും. 54 ശാഖായയോഗങ്ങളിൽ നിന്നുള്ള പ്രവർത്തകർ പങ്കെടുക്കും.
പിജി, ഡിഗ്രി വിഷയങ്ങളിൽ റാങ്ക് നേടിയവർ, ഡോക്ടറേറ്റ് നേടിയവർ, എസ്എസ്എൽസി, പ്ലസ് ടു പരീക്ഷ കളിൽ ഫുൾ എപ്ലസ് നേടിയവർ, കലാ-കായിക മേഖലയിൽ മികവ് പുലർത്തിയവർ, വനിതാ സംഘം കേന്ദ്ര സമിതി നടത്തിയ കലോത്സവത്തിൽ വിജയിച്ചവർ തുടങ്ങിയവരെ ചടങ്ങിൽ അനുമോദിക്കും.
എസ്എൻ കോളജ് പ്രിൻസിപ്പൽ എസ്. അംജിത്, എസ്എൻ പോളിടെക്നിക് പ്രിൻസിപ്പൽ വി. സന്ദീപ്, എസ്എൻടിഎച്ച്എസ്എസ് പ്രിൻസിപ്പൽ എസ്. പ്രിയദർശിനി, എസ്എൻടി ഐടിഐ പ്രിൻസിപ്പൽ കനകജ എന്നിവർ അവാർഡുകൾ വിതരണം ചെയ്യും.
യൂണിയൻ വൈസ് പ്രസിഡന്റ് ഡി. സജീവ്, വനിതാ സംഘം പ്രസിഡന്റ് ചിത്ര മോഹൻദാസ്, സെക്രട്ടറി ബീനാ പ്രശാന്ത്, യൂത്ത് മൂവ്മെന്റ് ചെയർമാൻ അശ്വിൻ അശോക്, കൺവീനർ ആരോമൽ, യൂണിയൻ സെക്രട്ടറി കെ. വിജയകുമാർ, അസിസ്റ്റന്റ് സെക്രട്ടറി കെ. നടരാജൻ, യൂണിയൻ കൗൺസിൽ അംഗങ്ങൾ എന്നിവർപ്രസംഗിക്കും.
കുണ്ടറയിൽ ഗുരുജയന്തി ഘോഷയാത്ര ഇന്ന്
കുണ്ടറ: ശ്രീനാരായണഗുരു ജയന്തിയോടനുബന്ധിച്ച് എസ്എൻഡിപി യോഗം കുണ്ടറ യൂണിയൻ ഇന്ന് ഘോഷയാത്രയും പൊതു സമ്മേളനവും നടത്തും.
രാവിലെ ഒമ്പതിന് ഇളമ്പള്ളൂരിലെ യൂണിയൻ ഓഫീസിൽ ഗുരുപൂജയും പതാക ഉയർത്തലും നടക്കും. വൈകുന്നേരം 3.30 ന് ആറു മുറിക്കട മാർത്തോമാ സ്കൂൾ അങ്കണത്തിൽ നിന്ന് ഘോഷയാത്ര ആരംഭിച്ച് ഇളമ്പള്ളൂർ ക്ഷേത്ര മൈതാനിയിൽ സമാപിക്കും. കുണ്ടറ യൂണിയൻ പരിധിയിലെ 44 ശാഖകളിലെ പ്രവർത്തകർ ഘോഷയാത്രയിൽ പങ്കെടുക്കും.
വാദ്യഘോഷങ്ങൾ, കലാരൂപങ്ങൾ തുടങ്ങിയവ ഘോഷയാത്രയ്ക്ക് കൊഴുപ്പേകും. പൊതുസമ്മേളനം എസ്എൻഡിപി യോഗം വൈസ് പ്രസിഡന്റ് തുഷാർ വെള്ളാപ്പള്ളി ഉദ്ഘാടനം ചെയ്യും. പ്രസിഡന്റ് ഡോ. ജി. ജയദേവൻ അധ്യക്ഷത വഹിക്കും.
ശ്രീനാരായണഗുരു ഓപ്പൺ സർവകലാശാല വൈസ് ചാൻസിലർ ഡോ. വി.പി. ജഗതി രാജ് സ്കോളർഷിപ്പ് വിതരണം ചെയ്യും. വയനാട് ദുരന്തത്തിൽ മരിച്ചവർക്കായി വിളക്ക് തെളിയിച്ച് കൂട്ട പ്രാർഥനയും നടത്തുമെന്ന് ഭാരവാഹികളായ ഡോ. ജി. ജയദേവൻ, അഡ്വ. അനിൽകുമാർ, നീരാവിൽ എസ്. അനിൽകുമാർ, എസ്. ഭാസി, വി. സജീവ് എന്നിവർ അറിയിച്ചു.