കൊല്ലം: ഓണക്കാലത്ത് ജില്ലയില്‍ വ്യാജ മദ്യം, നിരോധിത ലഹരി വസ്തുക്കള്‍ എന്നിവയുടെ ഉപയോഗം തടയുന്നതിന് എക്‌സൈസ് വകുപ്പ് കഴിഞ്ഞമാസം 14 മുതല്‍ ആരംഭിച്ച ഓണം സ്‌പെഷല്‍ ഡ്രൈവില്‍ നിരവധി ലഹരി വസ്തുക്കള്‍ പിടിച്ചെടുത്തു. മയക്കു മരുന്ന് കേസുകളില്‍ ഇതുവരെ 71 പേരെ അറസ്റ്റ് ചെയ്തു.
13.51 കിലോഗ്രാം കഞ്ചാവ്, 4.591 ഗ്രാം എംഡിഎംഎ 700 മില്ലീഗ്രാം ഹെറോയിന്‍, 640 ലിറ്റര്‍ കോട, 80.100 ലിറ്റര്‍ അനധികൃത അരിഷ്ടം, 394.230 ലിറ്റര്‍ ഇന്‍ഡ്യന്‍ നിര്‍മ്മിത വിദേശമദ്യം, 20.400 ലിറ്റര്‍ ചാരായം, അഞ്ച് കഞ്ചാവ് ചെടികള്‍, 340.625 കിലോഗ്രാം നിരോധിത പുകയില ഉല്പന്നങ്ങള്‍ എന്നിവ പിടികൂടി. അബ്കാരി കേസുകളില്‍ 101 പേരെ അറസ്റ്റ് ചെയ്തു;
117 കേസുകള്‍ എടുത്തു. 951 റെയ്ഡുകള്‍ നടത്തി. 4,630 ലധികം വാഹനങ്ങള്‍ പരിശോധിച്ചു. 15 വാഹനങ്ങള്‍ പിടിച്ചെടുത്തു. നിരോധിത പുകയില ഉല്പന്നങ്ങള്‍ പിടികൂടിയ 665 കേസുകളിലായി 1,33,007 രൂപ പിഴ ഈടാക്കി.
സ്‌പെഷല്‍ ഡ്രൈവിന്‍റെ ഭാഗമായി ജില്ലാതലത്തിലും താലൂക്ക് തലത്തിലും കണ്ട്രോള് റൂമുകള്‍, താലൂക്കുകള്‍ കേന്ദ്രീകരിച്ചുള്ള സ്‌ട്രൈക്കിങ് ഫോഴ്‌സുകള്‍ എന്നിവ പ്രവര്‍ത്തിക്കുന്നുണ്ട്. പോലീസ്, റവന്യൂ, ഫോറസ്റ്റ്, റെയില്‍വേ, കോസ്റ്റല്‍ പോലീസ് എന്നിവയുടെ സംയുക്ത പരിശോധനകള്‍ നടത്തുന്നു. കടല്‍ മാര്‍ഗമുള്ള ലഹരി കടത്ത് തടയുന്നതിന് നീണ്ടകര കോസ്റ്റല്‍ പോലീസുമായി ചേര്‍ന്ന് കടല്‍ പട്രോളിംഗും നടത്തുന്നുണ്ട്.
കള്ളുഷാപ്പുകളില്‍ ക്യത്രിമകള്ള് തടയുന്നതിനുള്ള പ്രത്യേക പരിശോധനകളും നടത്തുന്നു. സെപ്തംബര്‍ 20 വരെയാണ് ഓണം സ്‌പെഷ്യല്‍ ഡ്രൈവിന്‍റെ ഭാഗമായ പ്രത്യേക പരിശോധനകള്‍ നടക്കുക.