കൊല്ലം: സീസണൽ വ്യവസായത്തിന്റെ എല്ലാ ആനുകൂല്യവും കശുവണ്ടി മേഖലയിലെ തൊഴിലാളികൾക്ക് ലഭ്യമാക്കണമെന്ന് ആർ. ചന്ദ്രശേഖരൻ ആവശ്യപ്പെട്ടു. സൗത്ത് ഇന്ത്യൻ കാഷ്യു വർക്കേഴ്സ് കോൺഗ്രസിന്റെ (ഐഎൻടിയുസി) നേതൃത്വത്തിൽ നടന്ന സമര സന്ദേശ യാത്ര ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.
കശുവണ്ടി തൊഴിലാളികൾക്ക് ഹാജറിന്റെ പേരിൽ ഇഎസ്ഐ ആനുകൂല്യം നിഷേധിക്കുന്നത് നീതീകരിക്കാനാകില്ല. മുൻ കേന്ദ്ര മന്ത്രി എസ്. കൃഷ്ണകുമാറിന്റെ കാലത്ത് ഐഎൻടിയുസിയുടെ ശ്രമഫലമായി കശുവണ്ടി തൊഴിലാളികൾക്ക് ഹാജർ ഇളവ് ഇഎസ്ഐ കോർപറേഷൻ അനുവദിച്ചിരുന്നതായി അദ്ദേഹം പറഞ്ഞു.
തൂക്കത്തിലും കൂലിയിലും തൊഴിലാളികളെ വഞ്ചിക്കുന്നത് നീതീകരിക്കാനാകില്ലെന്നും ഇതിനെതിരേ വരും ദിവസങ്ങളിൽ കൂടുതൽ പ്രക്ഷോഭങ്ങൾ സംഘടിപ്പിക്കുമെന്നും അധ്യക്ഷ പ്രസംഗത്തിൽ സൗത്ത് ഇന്ത്യൻ കാഷ്യൂ വർക്കേഴ്സ് കോൺഗ്രസ് സംസ്ഥാന പ്രസിഡന്റും ജാഥാ ക്യാപ്റ്റനുമായ ശൂരനാട് എസ്. ശ്രീകുമാർ പറഞ്ഞു.
ഐഎൻടിയുസി ജില്ലാ പ്രസിഡന്റ് എ.കെ. ഹഫീസ്, സംസ്ഥാന വൈസ് പ്രസിഡന്റ് വടക്കേവിള ശശി, യൂണിയൻ നേതാക്കന്മാരായ പെരിനാട് മുരളി, കുന്നത്തൂർ ഗോവിന്ദപിള്ള, ഒ.ബി. രാജേഷ്, പി. മോഹൻലാൽ, ചന്ദ്രൻ കല്ലട,
ബി. ശങ്കരനാരായണ പിള്ള, എം. നൗഷാദ്, വിനോദ് വില്യത്ത്, അയത്തിൽ വിക്രമൻ, അയത്തിൽ ശ്രീകുമാർ, ചെങ്ങമനാട് വിജയൻ, മുനീർ ബാനു, രാജ് പ്രസാദ്, അൻസർ തുടങ്ങിയവർ പ്രസംഗിച്ചു. സമര സന്ദേശയാത്ര ജില്ലയിലെ വിവിധ ഫാക്ടറികൾ സന്ദർശിച്ചു.