പനത്തടി: പനത്തടി പഞ്ചായത്ത് കൃഷിഭവന്റെ നേതൃത്വത്തിൽ സംഘടിപ്പിച്ച കർഷകദിനാചരണവും കർഷകരെ ആദരിക്കലും ഇ.ചന്ദ്രശേഖരൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്റ് പ്രസന്ന പ്രസാദ് അധ്യക്ഷത വഹിച്ചു. ജില്ലാ പഞ്ചായത്തംഗം ഷിനോജ് ചാക്കോ, ബ്ലോക്ക് ആരോഗ്യ-വിദ്യാഭ്യാസ സ്ഥിരം സമിതി അധ്യക്ഷ എം.പത്മകുമാരി, പഞ്ചായത്ത് വൈസ് പ്രസിഡന്റ് പി.എം.കുര്യാക്കോസ്, സ്ഥിരം സമിതി അധ്യക്ഷരായ ലത അരവിന്ദ്, സുപ്രിയ ശിവദാസ്, രാധാകൃഷ്ണ ഗൗഡ, കൃഷി ഓഫീസർ അരുൺ ജോസ്, അസി.കൃഷി ഓഫീസർ കെ.വി.ഗോപിനാഥ് എന്നിവർ പ്രസംഗിച്ചു.
ചിറ്റാരിക്കാൽ: കാർഷിക ദിനത്തോടനുബന്ധിച്ച് ചിറ്റാരിക്കാൽ കൃഷി ഓഫീസർ ഉമ എസ്.നായർ തോമാപുരം സെന്റ് തോമസ് ഹയർ സെക്കൻഡറി സ്കൂളിലെ ഹരിതസേനാംഗങ്ങളായ വിദ്യാർഥികളുമായി സംവദിച്ചു. കുട്ടികളുടെ വീടുകളിൽ ഒരുക്കുന്ന എന്റെ അടുക്കളത്തോട്ടം പദ്ധതിയിലേക്കുള്ള വിത്തുകളുടെ വിതരണോദ്ഘാടനവും നടന്നു.
മുഖ്യാധ്യാപിക സിസ്റ്റർ കെ.എം.ലിനറ്റ്, അധ്യാപകരായ സിജി അഗസ്റ്റിൻ, സെൽമ ജോസ്, വിദ്യാർഥി പ്രതിനിധി അൽഫോൻസ തോമസ് എന്നിവർ നേതൃത്വം നൽകി.
രാവണേശ്വരം: കർഷക ദിനത്തിൽ രാവണേശ്വരം ഗവ.ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്റെ നേതൃത്വത്തിൽ കർഷകരെ ആദരിച്ചു. കർഷക അവാർഡ് ജേതാവ് കെ.വി.രാഘവൻ, അധ്യാപക കർഷക അവാർഡ് ജേതാവ് സി.അനീഷ്, പ്ലസ് വൺ വിദ്യാർഥി വി.വിഷ്ണു എന്നിവരെയാണ് ആദരിച്ചത്. കെ.വി.രാഘവന്റെ പച്ചക്കറി തോട്ടം സന്ദർശിച്ച കുട്ടികളെ അദ്ദേഹം കക്കിരി നൽകി വരവേറ്റു.
ബ്ലോക്ക് പഞ്ചായത്തംഗം എം.ജി.പുഷ്പ കർഷകരെ ആദരിച്ചു. പിടിഎ പ്രസിഡന്റ് പി. രാധാകൃഷ്ണൻ അധ്യക്ഷത വഹിച്ചു. പ്രിൻസിപ്പൽ കെ.ജയചന്ദ്രൻ, എംപിടിഎ പ്രസിഡന്റ് ധന്യ അരവിന്ദ്, സ്റ്റാഫ് സെക്രട്ടറി എ.ആശാലത, പി.ഉണ്ണികൃഷ്ണൻ, വി.രാജി, പി.ദീപ, കെ.രാജി എന്നിവർ നേതൃത്വം നൽകി.
രാജപുരം: കർഷക ദിനത്തിൽ കേരള ഗ്രാമീൺ ബാങ്ക് രാജപുരം ശാഖയുടെ ആഭിമുഖ്യത്തിൽ കർഷകരായ എം.കുഞ്ഞമ്പുനായർ, അഞ്ജനമുക്കൂട്, രഞ്ജിത്ത് നമ്പ്യാർ കൊട്ടോടി എന്നിവരെ ആദരിച്ചു. ശാഖ മാനേജർ പി.സി തോമസ് അധ്യക്ഷത വഹിച്ചു. കള്ളാർ കൃഷി ഓഫീസർ കെ.എം.ഹനീന, ബാങ്ക് അസി.മാനേജർ എൻ.ശ്രുതി എന്നിവർ പ്രസംഗിച്ചു.
പരപ്പ: കർഷകദിനത്തോടനുബന്ധിച്ച് ബാനം ഗവ. ഹൈസ്കൂളിൽ കാർഷികോപകരണ പ്രദർശനവും കർഷക സംവാദവും കർഷകരെ ആദരിക്കലും സംഘടിപ്പിച്ചു. പഴയകാല കൃഷിരീതികളും കാർഷികോപകരണങ്ങളും പുതിയ തലമുറയ്ക്ക് പരിചയപ്പെടുത്തി.
കലപ്പ, നിലം തല്ലി, തണടുപ്പ, ഏറ്റുപാനി, കാളമണി, തട്ട, മന്ത്, പറ, ചെമ്പുകുടം, അടിച്ചൂറ്റി, നാഴി, ഉലക്ക, പാളത്തൊപ്പി, കട്ടപ്പെട്ടി, പരുവ എന്നിവ പ്രദർശനത്തിൽ ഒരുക്കിയിരുന്നു. കർഷകനായ സത്യൻ കെ.വരഞ്ഞൂർ കർഷകദിനാചരണം ഉദ്ഘാടനം ചെയ്തു. പിടിഎ പ്രസിഡന്റ് പി.മനോജ് കുമാർ അധ്യക്ഷത വഹിച്ചു. വി.സന്തോഷ്, പി.കെ.ബാലചന്ദ്രൻ, അനൂപ് പെരിയൽ എന്നിവർ പ്രസംഗിച്ചു.
രാജപുരം: കൊട്ടോടി ഗവ ഹയർ സെക്കൻഡറി സ്കൂളിൽ കർഷക ദിനം വിവിധ പരിപാടികളോടെ ആചരിച്ചു. കർഷകനായ കുഞ്ഞിക്കണ്ണൻ കൂരംകയയുടെ കൃഷിയിടം സന്ദർശിച്ച് അദ്ദേഹത്തെ ആദരിച്ചു. അധ്യാപകരായ കെ.അനിൽ കുമാർ, ആൻസി അലക്സ്, ബേബി പ്രസന്ന, എം.സന്ധ്യ, പി.ശുഭ, കെ.കെ.അക്കു എന്നിവർ നേത്യത്വം നൽകി.