കാഞ്ഞങ്ങാട്: ഓഗസ്റ്റ് 10നു തൃശൂരില് നടക്കുന്ന ഇന്ത്യാസ് മാര്ച്ച് ഫോര് ലൈഫിന്റെ മുന്നോടിയായി കെസിബിസി പ്രോലൈഫ് സമിതി നടത്തുന്ന കേരള മാര്ച്ച് ഫോര് ലൈഫ്-ജീവസംരക്ഷണ സന്ദേശയാത്രയ്ക്ക് തുടക്കമായി. പടന്നക്കാട് നല്ലിടയന് പാരിഷ്ഹാളില് ജാഥാ ക്യാപ്റ്റനും കെസിബിസി പ്രോലൈഫ് സമിതി ജനറല് സെക്രട്ടറിയുമായ ജയിംസ് ആഴ്ചങ്ങാടന് പതാക കൈമാറി തലശേരി ആര്ച്ച്ബിഷപ് മാര് ജോസഫ് പാംപ്ലാനി ഉദ്ഘാടനം ചെയ്തു. മഹത്തായ മനുഷ്യജീവന്റെ സുവിശേഷം പങ്കുവയ്ക്കുന്നതാണ് ഇന്നിന്റെ ദൈവികനിയോഗമെന്ന് മാര് പാംപ്ലാനി പറഞ്ഞു.
കെസിബിസി പ്രോലൈഫ് സമിതിയുടെയും ഫാമിലി കമ്മീഷന്റെയും ചെയര്മാന് റവ.ഡോ.പോള് ആന്റണി മുല്ലശേരി അധ്യക്ഷതവഹിച്ചു. കണ്ണൂര് രൂപത ബിഷപ് ഡോ.അലക്സ് വടക്കുംതല അനുഗ്രഹപ്രഭാഷണം നടത്തി. കെസിബിസി പ്രോലൈഫ് സമിതി ഡയറക്ടര് ഫാ.ക്ലീറ്റസ് വര്ഗീസ് കതിര്പറമ്പില്, തലശേരി അതിരൂപത വികാരി ജനറാള്മാരായ മോണ്. മാത്യു ഇളംതുരുത്തിപ്പടവില്, മോണ്. ജോസഫ് ഒറ്റപ്ലാക്കല്, കണ്ണൂര് രൂപത കാഞ്ഞങ്ങാട് ഫൊറോന വികാരി ഫാ. ആന്സില് പീറ്റര്, തലശേരി അതിരൂപത കാഞ്ഞങ്ങാട് ഫൊറോനാ വികാരി ഫാ. ജോര്ജ് കളപ്പുര, കണ്ണൂര് രൂപത ഡയറക്ടര് ഫാ.പീറ്റര് കനീഷ്, തലശേരി അതിരൂപത പ്രോലൈഫ് ഡയറക്ടര് ഫാ. ജോബി കോവാട്ട്, സിസ്റ്റര് ജോസി കൈമപറമ്പില്, കെസിബിസി പ്രോലൈഫ് സമിതി പ്രസിഡന്റ് ജോണ്സണ് ചൂരപ്പറമ്പില്, ആനിമേറ്റര്മാരായ സാബു ജോസ്, ജോര്ജ് എഫ്.സേവ്യര്, സിസ്റ്റര് മേരി ജോര്ജ്, ആന്റണി പത്രോസ്, മാര്ട്ടിന് ന്യൂനസ് എന്നിവര് പ്രസംഗിച്ചു.
ജോയ്സ് മുപ്പടം പ്രോലൈഫ് മാജിക് ഷോ നടത്തി. യാത്ര ഇന്നു രാവിലെ 6.30നു തളിപ്പറമ്പ് സെന്റ് മേരീസ് ഫൊറോന പള്ളിയിൽ നിന്ന് ആരംഭിച്ച് ആലക്കോട്, വായാട്ടുപറമ്പ്, ചെമ്പേരി, പയ്യാവൂര്, ഉളിക്കല്, ഇരിട്ടി എന്നിവിടങ്ങളിലൂടെ സഞ്ചരിച്ച് വൈകുന്നേരം ആറിന് പേരാവൂര് സെന്റ് ജോസഫ്സ് മേജര് ആര്ക്കിഎപ്പിസ്കോപ്പല് പള്ളിയിൽ നടക്കുന്ന സമാപന സമ്മേളനത്തോടെ കണ്ണൂര് ജില്ലയിലെ പര്യടനം പൂര്ത്തിയാക്കും.